អាមេរិកត្រូវការប្រាក់៣ពាន់លានដុល្លារ ដើម្បីដកHuawei និង ZTE ចេញពីបណ្ដាញទូរគមនាគមន៍របស់ខ្លួន

ដោយៈ សុខុម

វ៉ាស៊ីនតោន: និយតករទូរគមនាគមន៍អាមេរិក ត្រូវការប្រាក់ចំនួន៣ពាន់លានដុល្លារ បន្ថែមទៀតដើម្បីផ្ដល់ហិរញ្ញប្បទាន ដល់ការដកក្រុមហ៊ុនទូរគមនាគមន៍ខ្នាតយក្សរបស់ចិន គឺក្រុមហ៊ុន Huawei និងក្រុមហ៊ុន ZTE ចេញពីបណ្ដាញទូរគមនាគមន៍អាមេរិក។

យោងតាមសារព័ត៌មាន CNA ចុះផ្សាយកាលពីថ្ងៃអាទិត្យ ទី១៦ ខែកក្កដា ឱ្យដឹងថា ការបន្ថែមនេះធ្វើឱ្យការចំណាយសរុប ឈានរហូតដល់៤,៩ពាន់លានដុល្លារ។

លោកស្រី Jessica Rosenworcel ប្រធានគណៈកម្មការទូរគមនាគមន៍សហព័ន្ធ (FCC) បានផ្ញើលិខិតមួយច្បាប់កាលពីថ្ងៃ ទី១៥ ខែកក្កដា ទៅសមាជិកព្រឹទ្ធសភា គឺលោកស្រី Maria Cantwell ដែលជាប្រធានគណៈកម្មាធិកាពាណិជ្ជកម្ម វិទ្យាសាស្ត្រ និងដឹកជញ្ជូន (CCST) ដោយលោកស្រីលើកឡើងថា “ដើម្បីផ្តល់ហិរញ្ញប្បទាន ដល់រាល់ការចំណាយសមស្រប និងចំណាយគាំទ្រ កម្មវិធីផ្ដល់សំណងនេះ នឹងត្រូវការប្រាក់ដល់ទៅ៤,៩៨ពាន់លានដុល្លារ ដែលបច្ចុប្បន្ននៅខ្វះ៣,០៨ពាន់លានដុល្លារ”។

លោកស្រីបានបន្ថែមថា ដោយសារសភាអនុម័តតែ១,៩ពាន់លានដុល្លារ ដើម្បីផ្ដល់ហិរញ្ញប្បទាន ដល់ដំណើរការដកចេញនេះ ក្រុមហ៊ុននានានឹងទទួលបានសំណងមកវិញ ត្រឹមតែប្រមាណ៤០%ប៉ុណ្ណោះ នៃការចំណាយ។

ក្នុងឆ្នាំ២០១៩ សភាបានអនុម័តច្បាប់មួយ ផ្តល់ភារកិច្ចដល់គណៈកម្មការទូរគមនាគមន៍សហព័ន្ធ (FCC) បង្ខំឱ្យក្រុមទូរគមនាគមន៍នានារបស់សហរដ្ឋអាមេរិក ទទួលយកការឧបត្ថម្ភសហព័ន្ធ ដើម្បីលុបបំបាត់បណ្តាញឧបករណ៍ទូរគមនាគមន៍ ដែលបង្កហានិភ័យដល់សន្តិសុខជាតិ ហើយបានសន្យាថា នឹងទូទាត់សងវិញនូវការខូចខាត។

គណៈកម្មការទូរគមនាគមន៍សហព័ន្ធ (FCC) បានចាត់ទុកក្រុមហ៊ុន Huawei និងក្រុមហ៊ុន ZTE ជាការគំរាមកំហែង ហើយបានបង្ខំឱ្យក្រុមហ៊ុនអាមេរិកនានា ដកឧបករណ៍របស់ក្រុមហ៊ុនចិន ខាងលើចេញនេះ បើមិនដូច្នោះទេ នឹងគ្មានសិទ្ធិទទួលបានចំណែក នៃហិរញ្ញប្បទានរបស់រដ្ឋាភិបាលចំនួន៨,៣ពាន់លានដុល្លារ ដើម្បីទិញឧបករណ៍ថ្មីឡើយ។

ទោះជាយ៉ាងណា ដើម្បីផ្តល់ហិរញ្ញប្បទាន ដល់កិច្ចប្រឹងប្រែងនេះ សភាបានអនុម័តតែ១,៩ពាន់លានដុល្លារប៉ុណ្ណោះ ដែលធ្វើឱ្យមានការចោទជាសំណួរថា កម្មវិធីដកចេញនេះ នឹងអាចអនុវត្តន៍បានដោយប្រសិទ្ធភាពបានយ៉ាងដូចម្ដេច៕ Reuters៕

ក្រុមហ៊ុនលំដាប់អន្តរជាតិមួយគ្រោងធ្វើទំនើបកម្មបច្ចេកវិទ្យាក្នុងវិស័យអចលនទ្រព្យកម្ពុជា

ដោយៈ សុផារី

ភ្នំពេញៈ ក្រុមហ៊ុនអចលនទ្រព្យលំដាប់អន្តរជាតិ Century21 Cambodia គ្រោងធ្វើទំនើបកម្មបច្ចេកវិទ្យា ក្នុងវិស័យអចលនទ្រព្យកម្ពុជា ធ្វើយ៉ាងណាដើរឱ្យទាន់បច្ចេកវិទ្យាក្នុងប្រទេសអភិវឌ្ឍន៍។

លោកស្រី ហ្រ្គេសរចនី ហ្វុង អគ្គនាយិកានៃក្រុមហ៊ុន Century21 Cambodia បានមានប្រសាសន៍កាលពីសប្តាហ៍មុនថា ចក្ខុវិស័យសំខាន់មួយក្នុងចំណោមចក្ខុវិស័យផ្សេងៗ របស់ក្រុមហ៊ុនរបស់លោកស្រី គឺការប្រើប្រាស់បច្ចេកវិទ្យាថ្មី ដែលអនុញ្ញាតិឱ្យអ្នកទិញស្វែងរកអចលនទ្រព្យ ដែលខ្លួនត្រូវការបាន ដោយប្រើប្រាស់តែកម្មវិធីទូរស័ព្ទ និងអ៊ីនធឺណេត។

លោកស្រីឱ្យដឹងថា “រាល់ដងការបញ្ជាទិញរវាងអ្នកលក់ និងអ្នកទិញតែងតែទៅមើលដីផ្ទាល់ តែងតែទៅទិញទីតាំងផ្ទាល់ ឬទៅមើលផ្ទះផ្ទាល់”។ លោកស្រីបន្តថា “ជំហានទៅមុខទៀត យើងនឹងឱ្យមានចក្ខុវិស័យមួយ ដូចនៅក្រៅប្រទេស ដែលមុននឹងទៅមើលផ្ទាល់ គាត់អាចមើលតាមប្រព័ន្ធអនឡាញ”។

លោកស្រីបន្ថែមថា ចង់ទិញដី ទិញផ្ទះនាពេលឥលូវនេះ មិនចាំបាច់យកលុយសុទ្ធទៅដែរ ដោយប្រើប្រាស់តែទូរស័ព្ទដៃ ដែលអាចប្រើប្រាស់កម្មវិធីទូរស័ព្ទ និងអ៊ីនធឺណេតបាន។

អ្នកជំនាញរូបនេះលើកឡើងថា តាមរយៈកម្មវិធីមួយនេះ នឹងជួយសម្រួលក្នុងការទិញលក់ និងជួយយសន្សំសំចៃពេលវេលា របស់អតិថិជន ដោយអតិថិជន អាចបញ្ជាទិញតាមរយៈទូរស័ព្ទ ចំពោះអចលនទ្រព្យ ដែលត្រូវការ អាចមើលទីតាំង មើលទំហំ មើលរូបភាព មើលlocation មុនពេលធ្វើការសម្រេចចិត្ត។

លោកស្រីមានប្រសាសន៍បន្តថា “អនាគតទៅ ចក្ខុវិស័យរបស់ពួកយើង នឹងបំពាក់បច្ចេកវិទ្យាតិចណូឡូជី ជាApplication មួយ ដែលគាត់អាចបញ្ជាទិញតាមរយៈទូរស័ព្ទ”។ លោកស្រីពន្យល់ថា “អ្នកទិញគាត់អាចមើលដំបូងសិន ទៅលើអចលនទ្រព្យណាមួយដែលគាត់ស្រឡាញ់ មើលទីតាំង មើលទំហំ មើលរូបភាព មើលlocation ហើយចាំចុះទៅផ្ទាល់ ហើយចាំសម្រេចចិត្ត ដើម្បីកាត់បន្ថយពេលវេលារបស់គាត់បានច្រើន”។

លោកស្រីGrace Rachny Fongបានបន្តថា ការធ្វើទំនើបកម្មនេះត្រូវចំណាយពេល និងថវិកាច្រើន តែជាចក្ខុវិស័យរបស់ក្រុមហ៊ុន ក្នុងការជំរុញការប្រើប្រាស់បច្ចេកវិទ្យាបន្ថែម ក្នុងការទិញលក់ និងជួលអចលនទ្រព្យ ដើម្បីធ្វើយ៉ាងណាឱ្យវិស័យ អចលនទ្រព្យរបស់ប្រទេសកម្ពុជា ដើរទាន់ប្រទេសអភិវឌ្ឍន៍ផ្សេងៗទៀតបាន។

លោកស្រីបន្ថែមថា “ការវិនិយោគលើប្រព័ន្ធ Technology មិនមែនជាការវិនិយោគតូចទេ តែវាជាចក្ខុវិស័យដើម្បីដើរទាន់គេ ដូចប្រទេសសិង្ហបុរី សហរដ្ឋអាមេរិក ដែលមានជំនាញជាងយើងច្រើនណាស់”៕

ផ្លូវល្បឿនលឿនភ្នំពេញ-ព្រះសីហនុ សាកល្បងបច្ចេកទេសនៃការបង់ប្រាក់តាមបញ្ជរជាលើកដំបូង

ដោយៈ សុផារី

ព្រះសីហនុៈ ក្រុមហ៊ុនសាងសង់ផ្លូវល្បឿនលឿនភ្នំពេញ ព្រះសីហនុ បានចាប់ផ្ដើមដំណើរការសាកល្បង ជាលើកដំបូង នៅថ្ងៃ១៦ ខែកក្កដា ឆ្នាំ២០២២នេះ ចំពោះលក្ខណៈបច្ចេកទេស នៃការបង់ប្រាក់តាមបញ្ជរនីមួយៗ ខណៈដំណើរការស្ថាបនា ផ្លូវប្រវែងជាង១៨៥គីឡូម៉ែត្រនេះ ជិតនឹងបញ្ចប់នៅអំឡុង២ខែខាងមុខទៀត។

តំណាងក្រុមហ៊ុនសាងសង់បានឱ្យដឹងថា បញ្ជរបង់ប្រាក់លើផ្លូវល្បឿនលឿននេះមានចំនួន៥កន្លែង សម្រាប់គោលដៅចាប់ផ្ដើមចេញពីភ្នំពេញត្រង់ផ្លូវក្រវ៉ាត់ក្រុងទី៣ ឬមហាវិថីឈ្នះឈ្នះ ឡើងលើផ្លូវល្បឿនលឿនត្រង់គីឡូម៉ែត្រលេខ៣ គឺមានបញ្ជរបង់ប្រាក់នៅទីនោះ។

បញ្ជរទី២ គឺនៅគីឡូម៉ែត្រ២៦ ត្រង់ខាងកើតទីរួមខេត្តកំពង់ស្ពឺ។ បញ្ជរទី៣ នៅត្រង់គីឡូម៉ែត្រ៧៦ តំបន់គីរីរម្យ និងត្រែងត្រយឹង។ បញ្ជរទី៤ ត្រង់គីឡូម៉ែត្រ១១៤ តំបន់កំពង់សិលា ចុះទៅផ្លូវបំបែកស្រែអំបិល និងបញ្ជរចុងទីនៅគីឡូម៉ែត្រ១៨០ ទៅភ្ជាប់ផ្លូវជាតិលេខ៤ ត្រង់ខាងកើតច្រកចូលតំបន់ក្បាលឆាយ។

អ្នកដំណើរលើផ្លូវល្បឿនលឿននេះ គឺត្រូវប្រើប្រាស់កាតអេឡិចត្រូនិក ដើម្បីស្គេនឆ្លងកាត់ និងបង់ប្រាក់ទៅតាមចម្ងាយផ្លូវបើកបរជាក់ស្ដែង ដោយគិតជាគីឡូម៉ែត្រ ហើយបង់ប្រាក់នៅបញ្ជរណាមួយ ដែលអ្នកបើកបរឈប់បន្តធ្វើដំណើរលើផ្លូវមួយខ្សែនេះទៅតាមតំបន់បញ្ជរ។

ក្រុមហ៊ុនល្បឿនលឿន ក៏មានរៀបចំជាកាតអេឡិចត្រូនិកពិសេសសម្រាប់អ្នកដំណើររូបណា ចង់បានកាតនោះទៅកាន់ជាប់ជាប្រចាំ ដោយមិនចាំយក ក្នុងពេលធ្វើដំណើរពីភ្នាក់ងារបញ្ជរក៏បាន ដែលកាតអេឡិចត្រូនិកនោះមានឈ្មោះETC ជាកាតបង់ប្រាក់រួចរាល់ និងមានកត់ត្រាអត្តសញ្ញាណរថយន្តរួចជាស្រេចជាមួយក្រុមហ៊ុន៕

លោកបណ្ឌិតគីម ហ៊ាងបង្ហាញទស្សនទាន និងផែនការអភិវឌ្ឍន៍នាពេលអនាគត

ដោយ៖ វឌ្ឍនៈ

ភ្នំពេញ៖ លោកបណ្ឌិត គីម ហ៊ាង គឺជាអ្នកវិនិយោគអចលនទ្រព្យមួយរូបនៅកម្ពុជា ដែលរហូតមកដល់ពេលនេះ បានអភិវឌ្ឍគម្រោងបុរីធំៗពីរហើយ ដោយមួយនៅតំបន់ប៉ែកខាងកើត ជាប្រភេទលំនៅឋានសម្រាប់អ្នកមានចំណូលក្រោមមធ្យម ហើយមួយទៀតនៅប៉ែកខាងជើងរាជធានីភ្នំពេញ ជាប្រភេទលំនៅឋានសម្រាប់អ្នកមានលុយ។

ក្នុងពេលចុះហត្ថលេខាជាមួយធនាគារហ្វីលីព ក្នុងការសហការលើការផ្ដល់ឥណទាន សម្រាប់គម្រោងបុរីវិមានសំណាង ដែលជាបុរីបែបអភិជន លោកបណ្ឌិត គីម ហ៊ាង ថាគម្រោងបុរីទាំងនេះគ្រាន់តែជាការកំដៅសាច់ដុំ នៃការអភិវឌ្ឍន៍របស់ខ្លួនប៉ុណ្ណោះ។ នៅពេលខាងមុខ ក្រុមហ៊ុនរបស់លោកនឹងអភិវឌ្ឍន៍គម្រោងធំ ជាងបច្ចុប្បន្ននេះទ្វេរដង ស្របនឹងតម្រូវការលំនៅឋាន នៅក្នុងប្រទេសកម្ពុជា កាន់តែមានកំណើនឡើង។

លោកបណ្ឌិតមានប្រសាសន៍ថា មូលហេតុដែលលោកនឹងអភិវឌ្ឍន៍បុរីបន្ថែមទៀត និងកាន់តែធំនៅពេលអនាគតខាងមុខ ព្រោះលោកមានក្រុមលក់គ្រប់គ្រាន់ មានបទពិសោធន៍ក្នុងការលក់។ ជាក់ស្ដែងក្រុមលក់របស់លោកមានរាប់រយនាក់ទៅហើយ។ ប្រសិនបើ ក្នុងមួយខែលក់តែ១ផ្ទះក្នុងម្នាក់ ក៏អាចលក់បានរាប់រយផ្ទះដែរ អញ្ចឹងក្នុងមួយឆ្នាំៗ យើងលក់មិនតិចដែរ។

លោកបន្តថា ដោយសារតែកត្តាទាំងនេះ បូករួមនឹងតម្រូវការលំនៅឋាននៅក្នុងរាជធានីភ្នំពេញនឹងកើនឡើងជាបន្តបន្ទាប់ បានធ្វើឱ្យលោកនឹងអនុវត្តន៍នូវគម្រោងទី៣ ទី៤បន្តបន្ទាប់ ហើយគម្រោងក្រោយៗ ក៏នឹងកាន់តែធំឡើងៗផងដែរ។ សម្រាប់ទីតាំងវិញ មិនទៅណាឆ្ងាយពីគម្រោងទី២ឡើយ ពីព្រោះតំបន់នៃបុរីវិមានសំណាងជាតំបន់មានសក្ដានុពល។

លោកបន្ថែមថា បច្ចុប្បន្ននេះ អំណាចនៃការទិញលំនៅឋាននៅក្នុងប្រទេសកម្ពុជាទាំងមូល ភ្នំពេញជាទីតាំងស្រូបទាញអ្នកទិញលំនៅឋានបានច្រើនជាងគេ ហើយបន្ទាប់មកជាតំបន់ជុំវិញរាជធានីភ្នំពេញ គឺខេត្តកណ្ដាល ដូចជាតាខ្មៅ កៀនស្វាយ ជាដើម ដោយបានជំរុញឱ្យវិនិយោគិនចាប់យកឱកាសក្នុងការអភិវឌ្ឍលំនៅឋាន នៅតំបន់ទាំងនោះ សម្រាប់ការអភិវឌ្ឍផ្គត់ផ្គង់លើទីផ្សារ៕

ក្រុងបាត់ដំបងត្រៀមស្វាគមន៍កម្មវិធីមហោស្រប “ជំនោរសិល្បៈ”នៅចុងឆ្នាំនេះ

ដោយៈ គង់ សូរិយា

បាត់ដំបងៈ ទីក្រុងបាត់ដំបង ដ៏ទាក់ទាញនាភូមិភាគពាយ័ព្យប្រទេសបាននិងកំពុងត្រៀមរៀបចំនូវ បណ្តុំទស្សនីយភាពនៃការសម្តែងសិល្បៈរបាំ សម្តែងសៀក តន្រ្តី ការដើរបង្ហាញម៉ូដ បង្ហាញស្នាដៃសិល្បៈនានា ជាលក្ខណៈប្រចាំឆ្នាំ នៅក្នុងខែវិច្ឆិកាខាងមុខនេះ។

កម្មវិធីដែលត្រូវបានប្រសិទ្ឋនាម “ជំនោរសិល្បៈ”នេះ ធ្វើឡើងក្នុងគោលដៅផ្សព្វផ្សាយ និងរកទីផ្សារឱ្យអ្នកសិល្បៈចម្រុះជំនាញ នឹងប្រារព្ធឡើងវិញម្តងទៀត នៅលើកំណាត់ផ្លូវ ២.៥ ក្រុងបាត់ដំបង ខេត្តបាត់ដំបង រយៈពេល ៣ ថ្ងៃ ពីថ្ងៃទី ២៥-២៧ ខែវិច្ឆិកា ឆ្នាំនេះ ក្រោយពីបានខកខាន ២ ឆ្នាំ។

លោកប៉ោយ ឈុនលី ជាអ្នករៀបចំកម្មវិធីមហោស្រព “ជំនោរសិល្បៈ” នៅឆ្នាំ ២០២២បានមានប្រសាសន៍ឲ្យដឹងកាលពីចុងសប្តាហ៍មុនថា ពេលនេះ យើងព្យាយាមបង្ហាញតាមហ្វេសប៊ុក ដើម្បីដាស់អារម្មណ៍ដល់មហាជន ដែលជាអ្នកគាំទ្រឱ្យនឹកឃើញ និងចងចាំពីកម្មវិធីមហោស្រព “ជំនោរសិ ល្បៈ ឡើងវិញ។

លោកបន្ថែមថា “ផែនការដំបូង គឺយើងចង់ប្រមែប្រមូលក្រុមអ្នកសិ ល្បៈក្មេងៗជំនាន់ក្រោយ ឱ្យចូលរួមបានច្រើន ដើម្បីបង្ហាញស្នាដៃរបស់ខ្លួន”។ លោកបន្ថែមថា “បន្ទាប់មក គឺចង់ពង្រីកដែនដីនៃក្រុមអ្នកសិល្បៈទាំងនោះ ដោយសារនាពេលកន្លងមក យើងឃើញមានតែការចូលរួមពីខេត្តបាត់ដំបង ហើយនៅលើកនេះ យើងបានពង្រីកទៅខេត្តសៀមរាប និងរាជធានីភ្នំពេញ”។

លោកប៉ោយ ឈុនលី បញ្ជាក់ថា ការរៀបចំកម្មវិធីមហោស្រព “ជំនោរសិល្បៈ”នេះ គឺចង់ប្រែក្លាយឱ្យទៅជាយុទ្ធសាស្រ្តមួយ ដើម្បីរកទីផ្សារជូនអ្នកសិល្បៈ គឺធ្វើយ៉ាងណា ឱ្យមានការទាក់ទាញពីមហាជនទាំងជាតិ និងអន្តរជាតិ ក្នុងរយៈពេល៣ថ្ងៃនេះ។

លោកបន្តថា ក្រុមសិល្បករ ដែលបានបង្កើតស្នាដៃខ្លួនត្រៀមយកមកបង្ហាញ និងលក់ដូរនូវផលិតផលសិល្បៈទាំងនោះ នាថ្ងៃប្រារព្ធកម្មវិធីមហោស្រពនេះ ត្រូវដាក់តម្លៃយ៉ាងណាឱ្យទាបជាងតម្លៃដើម ដែលខ្លួនត្រៀមលក់នៅលើទីផ្សារ ដោយនេះជាវិធីសាស្រ្តផ្សព្វផ្សាយ ស្នាដៃខ្លួនឯងឱ្យគេចាប់អារម្មណ៍។

លោកបន្តថា ជាក្តីស្រមៃគិតទុក សម្រាប់ពេលអនាគតនោះ យើងចង់ឱ្យមហោស្រពនេះ មិនត្រឹមតែធ្វើឡើងសម្រាប់តែជាការជួបជុំ របស់ក្រុមសិល្បករ-សិល្បការិនី ក្នុងប្រទេសកម្ពុជានោះឡើយ គឺយើងចង់ឱ្យក្លាយជាមហោស្រពសម្រាប់អ្នកសិល្បៈអន្តរជាតិ ដែលអាចចាប់ផ្តើមពីប្រទេសជិតខាងយើង មានដូចជានៅប្រទេសថៃ វៀតណាម ជាដើម។

នាពេលថ្មីៗនេះ យើងកំពុងពិភាក្សាគ្នាជាមួយ នឹងខាងភាគីជប៉ុន Japan Foundation ដោយគេចាប់អារម្មណ៍ ចូលរួមក្នុងកម្មវិធីមហោស្រព”ជំនោរសិល្បៈ” នេះផងដែរ។

ក្រុមសិល្បៈច្នៃម៉ូដមួយ មានមូលដ្ឋាននៅខេត្តបាត់ដំបង ឈ្មោះថា “ក្រុមទេពច្យុត-Tepsyort Art Fashion” ដែលមានលោកហ៊ិន គឺមយាន ជាប្រធានក្រុមនោះ ក៏គ្រោងកែច្នៃម៉ូដសម្លៀកបំពាក់ សម្រាប់ដើរបង្ហាញដល់មហាជន នាថ្ងៃប្រារព្ធកម្មវិធីមហោស្រពដែរគឺ “ម៉ូដរូបសត្វព្រៃហេមពាន្ត”។

លោកហ៊ិន គឹមយាន សិល្បករវ័យ២៩ឆ្នាំរូបនេះបង្ហើបថា យើងបានត្រៀមស្នាដៃច្នៃម៉ូដស្តីពីសត្វព្រៃហេមពាន្ត នាសម័យកាលពុទ្ធអង្គមានចំនួន ១០ ឈុត ដែលនឹងដើរ ក្រុមតារាម៉ូដែលជាភេទទី ៣។ យើងចង់បង្កប់សារយល់ដឹងបែបក្រើនរំឭកមួយដល់មហាជនថា កាលពីសម័យព្រះពុទ្ធ មិនមានការបរបាញ់សត្វច្រើនឡើយ ដូច្នេះសម្បូរសត្វព្រៃច្រើនប្រភេទ រួមទាំងបង្ហាញប្រភេទសត្វ ដែលមានក្នុងរូបគំនូរនៃសម័យកាលព្រះពុទ្ធផងដែរ”។

បណ្តុំទស្សនីយភាព នៃការរៀបចំមហោស្រព “ជំនោរសិល្បៈ” នៅលើកំណាត់ផ្លូវ២.៥ នៅក្រុង និងខេត្តបាត់ដំបង លើកដំបូងកាលពីថ្ងៃទី ២១-២២ ខែធ្នូ ឆ្នាំ២០១៩៕

ដំណឹងល្អៈ គេហទំព័រល្បីឈ្មោះមួយចាត់ចំណាត់ថ្នាក់ក្រុងសៀមរាបស្ថិតក្នុងចំណោមទីក្រុងទាក់ទាញបំំផុតនៅអាស៊ី

ដោយៈ ជេស៊ីកា

សៀមរាបៈ ជាមោទនភាពមួយសម្រាប់កម្ពុជា ជាថ្មីដោយគេហទំព័រដ៏ល្បីមួយ Travel+Leisure បានធ្វើការស្ទង់មតិទៅលើអ្នកគាំទ្រ អំពីទីកន្លែងកម្សាន្តល្អបំផុត ដែលពួកគេបានទៅ ក៏ដូចជាចែករំលែកពីបទពិសោធន៍ថ្មីៗ។

ជាលទ្ឋផលអ្នកគាំទ្រ បានបញ្ចេញមតិទៅលើទីក្រុងកំពូលៗដូចជា តំបន់កោះ នាវាកម្សាន្ត ស្ប៉ា ក្រុមហ៊ុនអាកាសចរណ៍ និងជាច្រើនទៀត។ មិនតែប៉ុណ្ណោះ ពួកគេក៏បានវាយតម្លៃទីក្រុងលើទេសភាព និងកន្លែង វប្បធម៌ ម្ហូបអាហារ ភាពរួសរាយរាក់ទាក់ ការទិញទំនិញ និងតម្លៃរួមរបស់ពួកគេ។

យោងតាមការបញ្ចេញមតិ និងការវាយតម្លៃគេហទំព័រ Travel+Leisure បានរៀបបញ្ជីឈ្មោះទីក្រុងល្អបំផុតទាំង១៥ ប្រចាំទ្វីបអាស៊ីសម្រាប់ឆ្នាំ២០២២នេះ ហើយក្នុងចំណោមនោះទីក្រុងសៀមរាបរបស់ប្រទេសកម្ពុជា គឺឈរនៅក្នុងចំណោមTop 10 ដែលក្នុងនោះរួមមានដូចជា

១.ទីក្រុង Ubud ប្រទេសឥណ្ឌូនេស៊ី
២.ទីក្រុង Chiang Mai ប្រទេសថៃ
៣.ទីក្រុង Jaipur ប្រទេសឥណ្ឌា
៤.ទីក្រុង Osaka ប្រទេសជប៉ុន
៥.ទីក្រុង Udaipur ប្រទេសឥណ្ឌា
៦.ទីក្រុង Tokyo ប្រទេសជប៉ុន
៧.ទីក្រុង Kyoto ប្រទេសជប៉ុន
៨.ទីក្រុងសៀមរាប ប្រទេសកម្ពុជា
៩.ទីក្រុង Seoul ប្រទេសកូរ៉េខាងត្បូង
១០.ទីក្រុង Hoi An ប្រទេសវៀតណាម
១១.ទីក្រុង Bangkok ប្រទេសថៃ
១២.ទីក្រុង Luang Prabang ប្រទេសឡាវ
១៣.ទីក្រុង Taipei ប្រទេសតៃវ៉ាន់
១៤.ទីក្រុង Mumbai ប្រទេសឥណ្ឌា
១៥.ទីក្រុង Singapore ប្រទេសសិង្ហបុរី៕

ការលក់ផ្ទះថ្មីៗនៅប្រទេសសិង្ហបុរី ធ្លាក់ចុះរហូតដល់ទៅ៦៤ភាគរយក្នុងខែមិថុនា ឆ្នាំ២០២២

ដោយ៖ សុខុម

សិង្ហបុរី: ការលក់ផ្ទះឯកជនថ្មីៗនៅប្រទេសសិង្ហបុរី បានធ្លាក់ចុះខ្លាំងរហូតដល់ទៅ៦៤%ក្នុងខែមិថុនា បើធៀបនឹងខែឧសភា ឆ្នាំ២០២២ ដែលភាគច្រើនដោយសារកង្វះចាប់ផ្ដើមគម្រោងថ្មីៗ។

ដោយមិនរាប់បញ្ចូលខុនដូ Executive Condominium (ប្រភេទខុនដូសម្រាប់អ្នកមានវណ្ណៈកណ្ដាល) បណ្ដាក្រុមហ៊ុនអភិវឌ្ឍន៍លក់ផ្ទះបានត្រឹមតែ៤៨៨យូនីតប៉ុណ្ណោះកាលពីខែមុន ដោយធ្លាក់ចុះពីចំនួន១.៣៥៥យូនីតដែលលក់បានក្នុងខែឧសភា។ នេះបើយោងតាមតួលេខដែលអាជ្ញាធរអភិវឌ្ឍន៍ទីក្រុង (URA) បានចេញផ្សាយកាលពីថ្ងៃសុក្រ ទី១៥ ខែកក្កដា។

លោកស្រី Christine Sun អនុប្រធានជាន់ខ្ពស់ផ្នែកស្រាវជ្រាវ និងវិភាគនៅទីភ្នាក់ងារអចលនទ្រព្យសិង្ហបុរី OrangeTee & Tie បានធ្វើការកត់សម្គាល់ថា នេះជាចំនួនលក់ទាបបំផុតចាប់តាំងពីខែឧសភា ឆ្នាំ២០២០ ជាពេលដែលបណ្ដាក្រុមហ៊ុនអភិវឌ្ឍន៍លក់បានត្រឹមតែ៤៨៧យូនីត ព្រោះកំពុងផ្ទុះកូវីដ-១៩ ខ្លាំងពេលនោះ។

ដោយរាប់បញ្ចូលទាំងខុនដូ Executive Condominium ការលក់នៅក្នុងខែមិថុនា បានធ្លាក់ចុះ៦៣,៩% បើធៀបនឹងខែឧសភា។

ផ្អែកលើមូលដ្ឋានប្រចាំឆ្នាំ ការលក់ផ្ទះថ្មីៗដែលមិនរាប់បញ្ចូលទាំងខុនដូ Executive Condominium បានធ្លាក់ចុះ៤៤%ពីចំនួន៨៧២យូនីតដែលលក់បានក្នុងខែមិថុនា ឆ្នាំ២០២១។

តំបន់ Core Central Region បាននាំមុខគេដោយលក់ផ្ទះថ្មីបានចំនួន២០៦យូនីត បន្ទាប់មកគឺតំបន់ Rest of Central Region ដែលលក់បាន១៧១យូនីត និងតំបន់ Outside Central Region លក់បាន១១១យូនីត៕ CNA៕

មន្ត្រីជាន់ខ្ពស់កម្ពុជា៖ គម្រោងខ្សែក្រវាត់និងផ្លូវដើរតួនាទីសំខាន់ក្នុងការអភិវឌ្ឍហេដ្ឋារចនាសម្ព័ន្ធនៅកម្ពុជា

ដោយ៖ លាងហួរ

ភ្នំពេញ៖ លោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា បានមានប្រសាសន៍ថា គម្រោងគំនិតផ្តួចផ្តើមខ្សែក្រវាត់ និងផ្លូវ (BRI) បានដើរតួនាទីយ៉ាងសំខាន់ក្នុងការអភិវឌ្ឍន៍ហេដ្ឋារចនាសម្ព័ន្ធ និងការតភ្ជាប់នៅកម្ពុជា។

ក្នុងបទសម្ភាសន៍មួយ កាលពីពេលថ្មីៗនេះ ជាមួយប្រព័ន្ធផ្សព្វផ្សាយចិន លោក ប្រាក់ សុខុន បានមានប្រសាសន៍ថា គម្រោងហេដ្ឋារចនាសម្ព័ន្ធធំៗ រួមមានផ្លូវថ្នល់ ស្ពាន កំពង់ផែសមុទ្រ អាកាសយានដ្ឋាន ផ្លូវដែក ទំនប់វារីអគ្គីសនី និងផ្កាយរណបទំនាក់ទំនង ក្នុងចំណោមគម្រោងផ្សេងទៀតកំពុងដំណើរការហើយនៅក្នុងប្រទេសកម្ពុជា ហើយគម្រោងទាំងនេះសុទ្ធតែជាអាទិភាពកំពូល។

លោកបានបន្ថែមថា មានគម្រោងធំៗដែលកើតចេញពីកិច្ចសហប្រតិបត្តិការរវាងកម្ពុជា និងចិន ក្រោមគម្រោង BRI ដែលស្នើដោយប្រទេសចិន រួមមាន តំបន់សេដ្ឋកិច្ចពិសេសក្រុងព្រះសីហនុ ផ្លូវល្បឿនលឿនភ្នំពេញ-ព្រះសីហនុ អាកាសយានដ្ឋានអន្តរជាតិសៀមរាបថ្មី។

លោកបានមានប្រសាសន៍បន្តថា តំបន់សេដ្ឋកិច្ចពិសេសក្រុងព្រះសីហនុ គឺជាសក្ខីភាពនៃកិច្ចសហប្រតិបត្តិការប្រកបដោយផ្លែផ្កា រវាងប្រទេសទាំងពីរក្រោម BRI ខណៈដែលផ្លូវល្បឿនលឿន និងអាកាសយានដ្ឋាននឹងរួមចំណែកយ៉ាងសំខាន់ក្នុងការជំរុញសេដ្ឋកិច្ចបន្ថែមទៀត។

ចំណែកវិស័យ ដូចជា ការកសាងសមត្ថភាពស្ថាប័ន ការចែករំលែកចំណេះដឹង និងការអភិវឌ្ឍន៍ធនធានមនុស្ស ប្រទេសចិនបានផ្តល់ជំនួយតាមរយៈអាហារូបករណ៍ អាហារូបករណ៍ និងមជ្ឈមណ្ឌលស្រាវជ្រាវ។លោក ប្រាក់ សុខុន បានមានប្រសាសន៍ថា ធនធានបន្ថែមទៀតនៅក្នុងការច្នៃប្រឌិត និងបច្ចេកវិទ្យាបៃតងគឺត្រូវការជាចាំបាច់ ដោយសារការអភិវឌ្ឍន៍បៃតងបានក្លាយជាលក្ខណៈសំខាន់នៃគម្រោង BRI៕

ការវិនិយោគទ្រព្យសកម្មរបស់ប្រទេសចិនបានកើនឡើង៦,១ភាគរយក្នុងឆមាសទី១

ដោយ៖ លាងហួរ

ចិន៖ ទិន្នន័យផ្លូវការបានបង្ហាញនៅថ្ងៃសុក្រនេះ ថាការវិនិយោគលើទ្រព្យសកម្មថេររបស់ប្រទេសចិនបានមានកំណើនជាលំដាប់ នៅក្នុងឆមាសទីមួយ ឆ្នាំ២០២២នេះ។

យោងតាមការិយាល័យស្ថិតិជាតិ បានឱ្យដឹង នៅក្នុងសេចក្តីថ្លែងការណ៍មួយថា ការវិនិយោគទ្រព្យសកម្មថេរបានកើនឡើង ៦,១ភាគរយ ធៀបនឹងឆ្នាំ២០២១ ដល់ ២៧,១៤ពាន់ពាន់លានយ័ន (ប្រហែល ៤,០២ពាន់ពាន់លានដុល្លារអាមេរិក) នៅក្នុងឆមាសទីមួយ។

កំណើននេះបានធ្លាក់ចុះពីការកើនឡើង ៦,២ភាគរយដែលបានចុះបញ្ជី ក្នុងរយៈពេល៥ខែដំបូង។

នៅក្នុងខែមិថុនា ការវិនិយោគទ្រព្យសកម្មថេរបានកើនឡើង០,៩៥ភាគរយពីមួយខែមុន។ ចាប់ពីខែមករាដល់ខែមិថុនា ការវិនិយោគទ្រព្យសកម្មថេរពីវិស័យឯកជនបានកើនឡើង៣,៥ភាគរយធៀបនឹងឆ្នាំមុនដល់១៥,៣១ពាន់ពាន់លានយ័ន។

ការវិនិយោគលើហេដ្ឋារចនាសម្ព័ន្ធ និងការផលិតបានកើនឡើង៧,១ភាគរយ និង ១០,៤ភាគរយពីមួយឆ្នាំទៅមួយឆ្នាំ។

ទិន្នន័យរបស់ NBS បានបង្ហាញថា ការវិនិយោគលើការអភិវឌ្ឍន៍អចលនទ្រព្យបានធ្លាក់ចុះ៥,៤ភាគរយពីមួយឆ្នាំទៅមួយឆ្នាំនៅក្នុងឆមាសទីមួយមកត្រឹម៦,៨៣ពាន់ពាន់លានយ័ន។

ការវិនិយោគទៅក្នុងវិស័យផលិតកម្ម និងសេវាកម្មបច្ចេកវិទ្យាខ្ពស់ បានរក្សាសន្ទុះកំណើន ដោយនិរន្តរភាព ដោយកើនឡើង២៣,៨ភាគរយ និង១២,៦ភាគរយ ពីមួយឆ្នាំទៅមួយឆ្នាំ។ នៅក្នុងត្រីមាសទីពីរ ការវិនិយោគទ្រព្យសកម្មថេរបានកើនឡើង៤,២ភាគរយ ពីមួយឆ្នាំទៅមួយឆ្នាំ៕

អ្នកជំនាញបង្ហាញ០៦ចំណុចត្រូវសិក្សាឱ្យបានច្បាស់មុនសម្រេចចិត្តទិញដីធ្លី

ដោយ៖ ជេស៊ីកា

ភ្នំពេញ៖ ដោយសារដីធ្លីជាប្រភេទអចលនទ្រព្យម្យាង ដែលវិនិយោគមានផលចំណេញលឿនជាងគេ ច្បាស់លាស់ជាងគេ និងពេញនិយមជាងគេ ហេតុនេះការវិនិយោគលើផ្នែកនេះ គួរតែសិក្សាលើមូលដ្ឋានសំខាន់ៗទាំងនេះជាមុនសិន។

លោក វ៉ា វីរៈ អ្នកជំនាញអចលនទ្រព្យអន្តរជាតិ បានផ្តល់ពីដំបូន្មានសំខាន់ៗមួយចំនួនដល់អ្នកចង់វិនិយោគលើដីធ្លី ដែលចំណុចសំខាន់ៗទាំងនោះមានចំនួន៦ដូចជា៖

១) គោលបំណង (Goal or Purpose)
លោក អ្នកត្រូវមានគោលដៅច្បាស់លាស់ថា តើការទិញដីនោះក្នុងគោលបំណងជាការវិនិយោគ លើការអភិវឌ្ឍគម្រោង ដូចជា រីសត ឬលំនៅដ្ឋាន, ទិញដើម្បីវិនិយោគបង្កើតជាលំហូរសាច់ប្រាក់ (cash flow) ឬមួយទិញទុកដើម្បីយកចំណេញ ពេលដែលអចលនទ្រព្យនោះឡើងថ្លៃ (capital appreciation)។

២) ស្វែងយល់ពីទំហំទឹកប្រាក់ក្នុងការវិនិយោគ (Budget and Finance)
បន្ទាប់ពីគោលបំណង នៃការវិនិយោគនោះហើយ លោកអ្នកត្រូវសិក្សាពីលទ្ធភាព នៃចំនួនទឹកប្រាក់ ដែលលោកអ្នកអាចលៃលក ក្នុងការទិញ តើការវិនិយោគនោះប្រើប្រាស់លុយខ្លួនឯងសុទ្ធ ឬក៏ការខ្ចីបុលមួយផ្នែកណាមួយពីធនាគារមកកវិនិយោគ ដែលត្រង់ចំណុចនេះលោកអ្នកត្រូវចេះថ្លឹងថ្លែង ពីលទ្ធភាពក្នុងការដោះស្រាយ ទៅលើបញ្ហាសងត្រលប់។ សណ្ឋានដី ក៏ជាកត្តាសំខាន់ផងដែរ ដែលលោកអ្នកគួរពិចារណា ហើយដើម្បីដឹងពីសណ្ឋានដីនោះ ត្រូវចេះប្រើ Google Map, Google Earth និងបន្ទាប់មកគឺត្រូវទៅមើលទីតាំងជាក់ស្តែង។

៣) ទីតាំងយុទ្ធសាស្រ្ត (Location)
ទីតាំងជាកត្តាស្លាប់រស់ នៅពេលដែលអ្នកទិញអចលនទ្រព្យ ព្រោះតម្លៃគឺអាស្រ័យលើទីតាំងសក្តានុពល ដែលនេះមានន័យថា លោកអ្នកគួរសម្លឹងមើលទីតាំងដី ដែលឋិតនៅតាមបណ្តោយផ្លូវធំ ឬទីតាំងឋិតនៅកែងកាច់ជ្រុង។ ដូច្នេះការទិញអចលនទ្រព្យជាដី លោកអ្នកគួរទិញកន្លែងណាដែលជាទីតាំងយុទ្ធសាស្រ្ត។

ជាថ្មីម្តងទៀត ដូចអ្វីដែលរៀបរាប់ក្នុងចំណុចទីមួយ អ្វីដែលសំខាន់អាស្រ័យលើគោលបំណង ថាតើការទិញដីនោះសម្រាប់ការធ្វើវិស័យកសិកម្ម ឬសម្រាប់ការវិនិយោគលើម្រោងផ្តោតលើវិស័យទេសចរណ៍។

៤) ការបែងចែកតំបន់ (Zoning and Protected Zone)
បន្ទាប់ពីដឹងពីគោលបំណងនៃការទិញ ហើយត្រូវទិញនៅកន្លែងណា។ ដូច្នេះ ការស្វែងយល់ពីការបែងចែកតំបន់នេះ គឺជារឿងសំខាន់ ដែលលោកអ្នកត្រូវសិក្សាពីផែនការមេ (master plan) ថាតើតំបន់នោះ ជាតំបន់លំនៅដ្ឋាន ពាណិជ្ជកម្ម កសិកម្ម ឬឧស្សាហកម្ម។

មួយវិញទៀត លោកអ្នកក៏ត្រូវដឹង និងប្រុងប្រយ័ត្នផងដែរចំពោះទីតាំងដីមួយចំនួន ដូចជាទីតាំងដែលឋិតក្នុងតំបន់ការពារ (ការកំណត់កម្ពស់ក្នុងការសាងសង់) ឧទ្យានជាតិ ឬជាតំបន់បេតិកភណ្ឌជាដើម។

៥) ហេដ្ឋារចនាសម្ព័ន្ធ (Utilities)
ប្រសិនបើលោក អ្នកទិញដីក្នុងបំណងអភិវឌ្ឍលំនៅដ្ឋាន ចាំបាច់ត្រូវមើលទៅលើទីតាំងដីនោះ មានហេដ្ឋារចនាសម្ព័ន្ធគ្រប់គ្រាន់ដែរឬទេ ដូចជាបណ្តាញគមនាគមន៍ (ផ្លូវថ្នល់) បណ្តាញទឹក(ស្អាត) ភ្លើង និងបណ្តាញលូជាដើម។

៦) ផ្លូវច្បាប់ (Legal)
ត្រង់ចំណុនេះ លោកអ្នកត្រូវពិនិត្យទៅលើទិដ្ឋភាពផ្លូវច្បាប់ថា តើទីតាំងដីនោះជាប្លង់ទន់ រឺប្លង់រឹង ហើយទីតាំងដីនោះមានជម្លោះដែរឬទេ។ ព្រោះប្រសិនបើលោក អ្នកទិញចំទីតាំងដីជាប់បណ្តឹងនៅអាជ្ញាធរ ឬតុលាការ សុរិយោដីនឹងមិនអាចផ្ទេរឈ្មោះឱ្យបាននោះទេ៕

1...1,4571,4581,459...3,382 Page 1,458 of 3,382