គំរោងបង្កើតសួនសត្វចម្រុះនៅលើដីនិងក្រោមទឹកក្នុងខេត្តសៀមរាបសម្រេចបាន៧០ភាគរយហើយ

ដោយ:លាងហួរ

សៀមរាប: ក្រុមហ៊ុន Angkor Wildlife and Aquarium Co Ltd បានបណ្តាក់ទុនចំនួន១៨លានដុល្លារអាមេរិក បង្កើតសួនសត្វក្នុងខេត្តសៀមរាប ដែលនឹងបើកដំណើរការក្នុងខែតុលា ដើម្បីអប់រំ និងលើកកម្ពស់ការអភិរក្សសត្វ ក៏ដូចជាទាក់ទាញភ្ញៀវទេសចរជាតិនិងអន្តរជាតិ។

បច្ចុប្បន្ន អង្គការសត្វព្រៃ និងអាងចិញ្ចឹមត្រីអង្គរ កំពុងសាងសង់ហេ   ដ្ឋារចនាសម្ព័ន្ធចាំបាច់ សម្រាប់ការអភិរក្សធនធានជលផល និងសត្វព្រៃ នៅលើផ្ទៃដីទំហំ២២ហិចតា ស្ថិតក្នុងភូមិកាបោន ឃុំខ្សាច់ស ស្រុកសូទ្រនិគម។

លោកម៉េង ហ៊ាងអ្នកគ្រប់គ្រងទូទៅ សត្វព្រៃ និងអាងចិញ្ចឹមត្រីអង្គរ មានប្រសាសន៍ថា ការសាងសង់បានចាប់ផ្តើមនៅឆ្នាំ២០២១ ជាមួយនឹងហេដ្ឋារចនាសម្ព័ន្ធសម្រាប់ការតាំងបង្ហាញ និងថែទាំប្រភេទសត្វក្នុងទឹក (ត្រីទឹកសាប ត្រីសមុទ្រ និងអណ្តើក) និងសត្វនៅលើដីសម្រេចបាន៧០ភាគរយហើយ។

ការសាងសង់ដែលកំពុងដំណើរការនេះ ក៏រួមបញ្ចូលផងដែរនូវឯករភជប់សម្រាប់សត្វព្រៃធំៗដូចជា ខ្លា ដំរី ខ្លាឃ្មុំតូច ក៏ដូចជា សត្វសមុទ្រ និងទឹកសាប និងត្រីពីទន្លេអាម៉ាហ្សូន។  លើសពីនេះ សួនសត្វនឹងមានបន្ទប់ពិសោធន៍។

លោកម៉េង ហ៊ាងបានបន្តថា ក្រុមហ៊ុនមានបំណងស្នើសុំការអនុញ្ញាត ឲ្យនាំចូលចំនួន៨ប្រភេទស្មើនឹងសត្វព្រៃ៦១ប្រភេទ។

លោកបានបន្តថា  សត្វ ដំរី ទាំង នោះ មាន ដំរី អាស៊ី៨ក្បាល ស៊ូម៉ាត្រា៨ខ្លា ឃ្មុំ ព្រះអាទិត្យ៥ក្បាល សត្វ កណ្ដុរ តូច អាស៊ី ១០ក្បាល សត្វ ស្វាJavan១០ក្បាល ព្រូន Malayan ១០ ពស់ ថ្លាន់៥ក្បាល និង ពស់ វែក បូព៌ា៥ក្បាល។

ក្នុងដំណើរចុះទៅពិនិត្យការដ្ឋានសាងសង់សួនសត្វ កាលពីសប្តាហ៍មុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍ថា គម្រោងនេះមានសារៈសំខាន់ណាស់ ហើយត្រូវបានចាត់ទុកថាជាការងារអាទិភាពសម្រាប់ខេត្តសៀមរាប ដែលជាបង្គោលសេដ្ឋកិច្ចមួយ ក្នុងចំណោមប៉ូលសេដ្ឋកិច្ចទាំងបី របស់ព្រះរាជាណាចក្រកម្ពុជា ដែលតាមប្រពៃណីជំរុញដោយវិស័យទេសចរណ៍របស់ខ្លួន៕

EUអំ​ពាវនាវឱ្យមានបទឈប់បាញ់នៅអ៊ុយក្រែន ដើម្បីនាំចេញស្បៀងអាហារទៅកាន់ពិភពលោក

ដោយ៖ លាងហួរ

អឺរ៉ុប៖ ប្រធានគោលនយោបាយការបរទេសរបស់សហភាពអឺរ៉ុបបាននិយាយកាលពីថ្ងៃចន្ទម្សិលមិញនេះថាសហភាពអឺរ៉ុបកំពុងទទូចឱ្យមានបទឈប់បាញ់នៅក្នុងប្រទេសអ៊ុយក្រែនដើម្បីអាចនាំចេញគ្រាប់ធញ្ញជាតិរាប់លានតោន។

បើយោងតាមទីភ្នាក់ងារព័ត៌មាន Xinhua ចុះផ្សាយកាលពីថ្ងៃច័ន្ទ ទី២១ ខែមិថុនា បានឱ្យដឹងថា វិបត្តិអ៊ុយក្រែនកំពុងធ្វើឱ្យមានផលពិបាកយ៉ាងធ្ងន់ធ្ងរ ដល់ភាពអត់ឃ្លាន នៅក្នុងពិភពលោកទាំងមូល។

បន្ទាប់ពីកិច្ចប្រជុំនៃក្រុមប្រឹក្សាកិច្ចការបរទេស ជាមួយរដ្ឋមន្ត្រីការបរទេសសហភាពអឺរ៉ុប  លោក Josep Borrell តំណាងជាន់ខ្ពស់ទទួលបន្ទុកកិច្ចការបរទេស និងគោលនយោបាយសន្តិសុខ របស់សហភាពអឺរ៉ុប បានប្រាប់សារព័ត៌មានមួយ ដោយលោកបានច្រានចោលការស្តីបន្ទោសរបស់រុស្ស៊ី ចំពោះស្ថានការណ៍លើការដាក់ទណ្ឌកម្មរបស់សហភាពអឺរ៉ុប ថាជាព័ត៌មានមិនពិត។

លោកបានកត់សម្គាល់ថា ក្នុងអំឡុងកិច្ចប្រជុំ នៅប្រទេស Luxembourg រដ្ឋមន្ត្រីការបរទេសអឺរ៉ុបបានពិនិត្យមើលឡើងវិញនូវជំនួយយោធារបស់សហភាពអឺរ៉ុប ដែលអ៊ុយក្រែនកំពុងទទួលបាន និងជំនួយពីរដ្ឋសមាជិកនីមួយៗ។

លោកបានមានប្រសាសន៍ថា ប្រទេសជាសមាជិកទាំងអស់បានចូលរួមក្នុងកិច្ចខិតខំប្រឹងប្រែងទាំងនេះ ហើយយើងនឹងគាំទ្រជំនួយដល់អ៊ុយក្រែន ឱ្យបានយូរបំផុតតាមអាចធ្វើបាន។ ក្នុងពេលជាមួយគ្នានេះ យើងកំពុងស្នើសុំឱ្យមានបទឈប់បាញ់ ដែលអាចអនុញ្ញាតឱ្យមានការនាំចេញស្បៀងអាហារ៕

គម្រោងបង្កើតតំបន់សេដ្ឋកិច្ចពិសេសជំរុញតម្លៃដីធ្លី តាមបណ្តាខេត្តតាមព្រំដែនកម្ពុជាវៀតណាម

ដោយ៖ វឌ្ឍនៈ

ភ្នំពេញ ៖ ប្រមុខរាជរដ្ឋាភិបាលកម្ពុជាបានជំរុញឱ្យបង្កើតតំបន់សេដ្ឋកិច្ចពិសេសជាបន្តបន្ទាប់ ក្នុងគោលដៅទាក់ទាញការវិនិយោគពីក្នុង និងក្រៅប្រទេស។ ជាលទ្ធផល សកម្មភាពវិនិយោគលើវិស័យឧស្សាហកម្ម នៅក្នុងតំបន់សេដ្ឋកិច្ចពិសេសមានសកម្មភាពកាន់តែខ្លាំង ដែលជំរុញឱ្យមានតម្រូវការ និងកំណើនតម្លៃដីធ្លី នៅតាមបណ្តាខេត្តក្នុងតំបន់នោះ។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ថា ការបង្កើតតំបន់សេដ្ឋកិច្ចពិសេសនៅតាមព្រំដែននឹងជំរុញឱ្យសកម្មភាពនៃការវិនិយោគកាន់តែមានសន្ទុះ ហើយមានភាពងាយស្រួល ក្នុងការដឹកជញ្ជូនទំនិញចេញ និងចូលប្រទេស ដែលនាំឱ្យទំហំពាណិជ្ជកម្មកម្ពុជាជាមួយប្រទេសជិតខាងក៏កាន់តែមានសន្ទុះកើនឡើងបន្ថែមទៀត។

សម្ដេចក៏បានលើកឡើងពីការបង្កើតតំបន់សេដ្ឋកិច្ច នៅព្រំដែនកម្ពុជាវៀតណាម ដែលតាមរយៈតំបន់សេដ្ឋកិច្ចពិសេស កន្លងមក ឃើញថាបាននាំរោងចក្រឧស្សាហកម្មទៅបោះទុនវិនិយោគនៅក្នុងតំបន់នោះ ហើយធ្វើឱ្យប្រជាពលរដ្ឋមានឱកាសការងារធ្វើក៏កាន់តែច្រើន ។

លោក ថា ថេង អ្នកជំនាញនៃវិស័យដីធ្លីនៅក្នុងខេត្តព្រៃវែង បានលើកឡើងថា ការបង្កើតច្រកព្រំដែនកម្ពុជា និងវៀតណាម នៅក្នុងខេត្តព្រៃវែង បានជំរុញឱ្យតម្លៃដីធ្លី ដែលមិនធ្លាប់មានការចាប់អារម្មណ៍ និងមានតម្លៃទាប ទៅជាដីដែលមានតម្លៃ ហើយនឹងបង្កើនការចាប់អារម្មណ៍ពីសំណាក់វិនិយោគិនជាតិអន្តរជាតិជាច្រើន។

លោកថា ដីធ្លីមួយចំនួននៅតំបន់ច្រកព្រំដែន ដែលពីមុនមានតម្លៃត្រឹមតែប៉ុន្មានលានរៀលក្នុងហិចតា បានឡើងដល់ខ្ទង់លានដុល្លារក្នុងមួយហិចតាហើយ។

លោកបន្តថា “មិនយូរដីនៅតាមច្រកព្រំដែនក្នុងខេត្តព្រៃវែង នឹងមានកំណើនបន្ថែមទៀត ហើយវិនិយោគិនជាតិ និងអន្តរជាតិជាច្រើនទៀត នឹងចូលទៅកាន់តំបន់នោះ ស្វែងរកការវិនិយោគនានាបន្ថែមទៀត”។

អ្នកជំនាញមូលដ្ឋានរូបនេះបញ្ជាក់ថា “ឃើញអ្នកអភិវឌ្ឍន៍មួយចំនួនបានពុះឡូត៏ សង់ផ្ទះល្វែងសម្រាប់លក់ និងអនាគតជឿជាក់ថា នឹងមានរោងចក្រឧស្សាហកម្មចូលមកដំណើរការផលិត ហើយធ្វើឱ្យតំបន់នោះកាន់តែអ៊ូរអរ”៕

សាំងធម្មតារក្សាតម្លៃដដែលខណៈម៉ាស៊ូតហក់ឡើង២០០រៀល បន្ថែមទៀតក្នុងមួយលីត្រ

ដោយៈ វឌ្ឍនៈ

ភ្នំពេញៈ ចាប់ពីថ្ងៃទី២១ដល់ថ្ងៃទី៣០ មិថុនា ២០២២ តម្លៃប្រេងសាំងធម្មតាលក់រាយលើទីផ្សារកម្ពុជា ត្រូវកំណត់៥៨០០រៀលក្នុងមួយលីត្រ ប៉ុន្តែតម្លៃប្រេងម៉ាស៊ូត បានហក់ឡើងពី៦១០០រៀលក្នុងមួយលីត្រ ដល់៦៣០០រៀលក្នុងមួយលីត្រ គឺឡើង២០០រៀលបន្ថែមទៀតក្នុងមួយលីត្រ។

យោងតាមសេចក្ដីប្រកាសព័ត៌មាន របស់ក្រសួងពាណិជ្ជកម្មកម្ពុជាចេញផ្សាយនៅថ្ងៃទី២១ មិថុនា ២០២២នេះឱ្យដឹងថា តាមពិតទៅបើផ្អែកលើទីផ្សារប្រេងអន្តរជាតិ តម្លៃប្រេងសាំងធម្មតា នៅកម្ពុជានឹងត្រូវលក់៦០៦៤រៀលក្នុងមួយលីត្រ និងប្រេងម៉ាស៊ូតត្រូវលក់៦៥៦៤រៀល ក្នុងមួយលីត្រ ។ ប៉ុន្តែដើម្បីសម្រួលដល់ជីវភាពរបស់ប្រជាពលរដ្ឋ និងដោយមានការចូលរួមពីក្រុមហ៊ុនប្រេងឥន្ធនៈ សម្ដេចតេជោហ៊ុនបានជួយបញ្ចុះតម្លៃប្រេងឥន្ធនៈក្នុងមួយលីត្រ៦,៥សេន ទើបធ្វើឱ្យតម្លៃប្រេងសាំង និងប្រេងម៉ាស៊ូតលក់តម្លៃ ៥៨០០រៀលនិង៦៣០០រៀលក្នុងមួយលីត្រ។

ការកើនឡើងនៃតម្លៃប្រេងឥន្ធនៈនៅកម្ពុជា ក៏ដូចជា នៅលើពិភពលោក ត្រូវបានមើលឃើញយ៉ាងច្បាស់ ចាប់តាំងពីសង្គ្រាមរវាងរុស្ស៊ីនិងអ៊ុយក្រែន ហើយបើសិនជាសង្គ្រាមនេះ កាន់តែអូសបន្លាយយូរបន្ថែមទៀត វានឹងធ្វើឱ្យតម្លៃប្រេងឥន្ធនៈ កាន់តែហក់ឡើងថ្លៃបន្ថែមទៀតផងដែរ ។

យ៉ាងណាក្ដីតាមប្រទេសមួយចំនួនតម្លៃប្រេងឥន្ធនៈ មានតម្លៃខ្ពស់ជាងកម្ពុជា និងមួយចំនួនទៀតក៏ទាបជាងកម្ពុជា  ហើយប្រទេសខ្លះទៀតក៏មិនមានប្រេងឥន្ធនៈ សម្រាប់ផ្គត់ផ្គង់លើទីផ្សាររបស់ខ្លួនផងដែរ។ ដោយកម្ពុជា ត្រូវបានប្រមុខរាជរដ្ឋាភិបាលអះអាងថា នឹងមិនឱ្យខ្វះប្រេងឥន្ធនៈសម្រា​ប់ប្រើប្រាស់ឡើយ ទោះបីជាតម្លៃប្រេងបន្តកើនឡើងក្ដី៕

ដំណឹងល្អ គម្រោងវិនិយោគក្រោម៥លានដុល្លារ អនុម័តត្រឹមអនុគណៈកម្មាធិការវិនិយោគរាជធានី-ខេត្ត

ដោយ៖ សុផារី

 

ភ្នំពេញ៖ រាជរដ្ឋាភិបាលបានចេញអនុក្រឹត្យ បង្កើនទំហំទឹកប្រាក់វិនិយោគ ដែលអនុគណៈកម្មាធិការវិនិយោគរាជធានី-ខេត្ត មានសិទ្ធិអនុម័តគម្រោងវិនិយោគ នៅតាមបណ្តាខេត្តនីមួយក្រោម៥លានដុល្លារ។

ការសម្រេចបែបនេះ ដើម្បីបង្កភាពងាយស្រួលដល់វិនិយោគិន ទទួលបានការអនុម័ត គម្រោងកាន់តែលឿន និងងាយស្រួលជាងមុន។

 

នៅថ្ងៃទី២០ ខែមិថុនា ឆ្នាំ២០២២នេះ រាជរដ្ឋាភិបាលបានចេញអនុក្រឹត្យបង្កើតអនុគណៈកម្មាធិការវិនិយោគរាជធានី-ខេត្ត ដើម្បីជាយន្តការក្នុងការពិនិត្យសម្រេចលើការវិនិយោគឯកជន និងការដោះស្រាយវិវាទពាក់ព័ន្ធនឹងគម្រោងវិនិយោគ។

 

សមាភាពនៃអនុគណៈកម្មាធិការវិនិយោគរាជធានី-ខេត្ត មានចំនួន២០រូប ក្នុងនោះអភិបាលរាជធានី-ខេត្ត គឺជាប្រធាន និងអភិបាលរង១រូប គឺជាអនុប្រធាន និងប្រធានមន្ទីរពាក់ព័ន្ធមួយចំនួន និងតំណាងសាខាគយ និងរដ្ឋាករ ព្រមទាំងតំណាងសាខាពន្ធដារ នៃខេត្តនីមួយៗ ជាសមាជិក។

 

តាមមាត្រា៣នៃអនុក្រឹត្យនេះ អនុគណៈកម្មាធិការវិនិយោគរាជធានី ខេត្តមានតួនាទី និងភារកិច្ចពិនិត្យ និងសម្រេចលើការចុះបញ្ជី ការផ្តល់ការលើកទឹកចិត្ត ការធានាការទិញ ការលក់ ការរួមបញ្ចូលគ្នា ការលុប និងការដោះស្រាយវិវាទនានា ពាក់ព័ន្ធនឹងគម្រោងវិនិយោគឯកជន ដែលមានទុនវិនិយោគសមមូលនឹង៥លានដុល្លារអាមេរិកចុះ នៅក្នុងដែនសមត្ថកិច្ចរបស់រដ្ឋបាលរាជធានី ខេត្តសាមីនីមួយៗ ស្របតាមនីតិវិធីដែលកំណត់ ដោយអនុក្រឹត្យដោយឡែក និងស្របតាមច្បាប់វិនិយោគនៃកម្ពុជា៕

អនាគតនៃទីផ្សារ Mart នៅកម្ពុជានឹងរីកដុះដាលក្នុងរយៈពេល៣ទៅ៥ឆ្នាំខាងមុខ

ដោយ៖ សុផារី

ភ្នំពេញ៖ ទីផ្សារលក់រាយនៅកម្ពុជាត្រូវបានមើលឃើញថា នៅមានកម្រិតនៅឡើយ ដែលទាមទារឱ្យមានការវិនិយោគបន្ថែម ដើម្បីចូលរួមចំណែកអភិវឌ្ឍន៍ប្រទេសកម្ពុជាឱ្យកាន់តែទំនើប។

អ្នកជំនាញ ព្យាករណ៍ថា ទីផ្សារមួយនេះនឹងមានការរីកចម្រើនកាន់តែខ្លាំង ក្នុងរយៈពេលប្រហែលជា៣ទៅ៥ឆ្នាំទៀត។

លោកឧកញ៉ា ច័ន្ទ តារា អគ្គនាយកក្រុមហ៊ុន Lee’s Food Service និងជាម្ចាស់អាជីវកម្មមួយរូប បានថ្លែងថា បច្ចុប្បន្នការលក់រាយនៅកម្ពុជានៅមានកម្រិតនៅឡើយ ដែលជំរុញឱ្យមានការវិនិយោគនៅកម្ពុជា ដើម្បីចូលរួមចំណែកអភិវឌ្ឍន៍ផ្សារលក់រាយបែបទំនើបឱ្យកាន់តែប្រសើរឡើង ដូចប្រទេសដទៃ។

 

បើតាមម្ចាស់អាជីវកម្មរូបនេះបានឱ្យដឹងថា វត្តមានការវិនិយោគផ្សារលក់រាយបែបទំនើបនៅកម្ពុជា មានការប្រកួតប្រជែងកាន់តែច្រើន នាំឱ្យអ្នកប្រើប្រាស់ទទួលបានអត្ថប្រយោជន៍កាន់តែច្រើន ជាមួយនឹងការប្រកួតប្រជែងតម្លៃ គុណភាព និងសេវាកម្ម។

លោកបន្តថា “តាមទស្សនៈរបស់ខ្ញុំ អនាគតនៃទីផ្សារ Mart នៅកម្ពុជានឹងភ្លឺស្វាង ហើយនិងរីកដុះដាលក្នុងរយៈពេល៣ទៅ៥ឆ្នាំខាងមុខ ព្រោះដោយសារបច្ចុប្បន្នមានការប្រកួតប្រជែងក្នុងវិស័យម៉ាតនេះកាន់តែច្រើន អ្នកប្រើប្រាស់នឹងទទួលបានអត្ថប្រយោជន៍កាន់តែច្រើនជាមួយនឹងតម្លៃប្រកួតប្រជែង”។

ទីផ្សារលក់រាយនៅក្នុងប្រទេសកម្ពុជាមានការរីកចម្រើនគួរឱ្យកត់សម្កាល់ ក្នុងរយៈពេលប៉ុន្មានឆ្នាំចុងក្រោយនេះ ដោយគេសង្គេតឃើញមានវត្តមាននៃបណ្តាក្រុមហ៊ុនជាតិ និងអន្តរជាតិជាច្រើនចូលមកកាន់ទីផ្សារកម្ពុជា ដែលជំរុញការប្រកួតប្រជែងបន្ថែម។

លោកឧកញ៉ា នួន រឹទ្ធី អគ្គនាយកក្រុមហ៊ុនអចលនទ្រព្យ KFA មានប្រសាសន៍ថា នៅក្នុងបរិបទសេដ្ឋកិច្ច លំហូរចូលនៃក្រុមហ៊ុនស្តង់ដារអន្តរជាតិចូលមកកាន់ប្រទេសកម្ពុជា ជាសញ្ញាល្អ​ស្របនឹងកម្រិតជីវភាព និងស្តង់ដារ​នៃការរស់នៅ ដែលបង្ហាញពីការរីកចម្រើននៃកម្រិតជីវភាព ការប្រើប្រាស់​ និងការចាយវាយរបស់ប្រជាជនកម្ពុជា។

លោកឧកញ៉ា បញ្ជាក់ថា “ស្តង់ដាររបស់យើងឥលូវកាន់តែល្អប្រសើរហើយ ពាក់ព័ន្ធនឹងការចូលមកនៃ​ Mart មានកេរ្ត៍ឈ្មោះចូលមកកាន់ប្រទេសកម្ពុជាយើង គេវាស់ស្ទង់នឹងកម្រិតជីវភាព និងការចាយវាយរបស់ប្រជាជនកម្ពុជា”៕

ផ្លូវរថភ្លើងល្បឿនលឿនប៉េកាំង-Wuhan ត្រូវបានដាក់ឱ្យដំណើរការជាមួយល្បឿន ៣៥០គីឡូម៉ែត្រក្នុងមួយម៉ោង

ដោយសុខុម

ប៉េកាំង: ផ្លូវរថភ្លើងល្បឿនលឿនមួយខ្សែដែលតភ្ជាប់រដ្ឋធានីប៉េកាំង ជាមួយទីក្រុងអ៊ូហាន (Wuhan) នៃខេត្តហ៊ូប៉ី (Hubei) ភាគកណ្តាលប្រទេសចិន ត្រូវបានដាក់ឱ្យដំណើរការក្នុងល្បឿន៣៥០គីឡូម៉ែត្រក្នុងមួយម៉ោងកាលពីថ្ងៃច័ន្ទ ទី២០ ខែមិថុនា។

យោងតាមក្រុមហ៊ុន China State Railway Group Co., Ltd (China Railway) ឱ្យដឹងថា ជាមួយនឹងល្បឿនរថភ្លើងដែលត្រូវបានបង្កើនពី៣១០គីឡូម៉ែត្រក្នុងមួយម៉ោង ដល់៣៥០គីឡូម៉ែត្រក្នុងមួយម៉ោង ការធ្វើដំណើរទៅមករវាងក្រុងប៉េកាំង និងក្រុងអ៊ូហាន ត្រូវបានកាត់បន្ថយប្រហែលកន្លះម៉ោងមកនៅត្រឹម៣ម៉ោង និង៤៨នាទី។

ក្រុមហ៊ុននេះបានបន្ថែមទៀតថា សមត្ថភាពដឹកជញ្ជូនទាំងមូលនៃកំណាត់ផ្លូវដែកនេះត្រូវបានរំពឹងថានឹងកើនឡើង៧% ដោយកើនឡើងរហូតដល់រថភ្លើងមានចំនួនសរុប១៥ខ្សែដែលផ្ដល់អីអ្នកដំណើរប្រមាណ១៨.០០០កៅអីក្នុងមួយថ្ងៃៗ។

បច្ចុប្បន្នប្រទេសចិន មានផ្លូវរថភ្លើងល្បឿនលឿនជិត៣.២០០គីឡូម៉ែត្រជាមួយនឹងល្បឿនដំណើរការ៣៥០គីឡូម៉ែត្រនៅខ្សែផ្លូវដែកដូចជា Beijing-Shanghai High-speed Railway ផ្លូវដែក Beijing-Tianjin Intercity Railway និងផ្លូវដែក Beijing-Zhangjiakou High-speed Railway ជាដើម។

លោក Nie Yunfeng មកពីក្រុមហ៊ុន Beijng Group បានលើកឡើងថា “ការដំឡើងកម្រិតល្បឿនរថភ្លើងនេះនឹងជួយបម្រើដល់សេដ្ឋកិច្ច និងការអភិវឌ្ឍសង្គមបានកាន់តែល្អប្រសើរជាងមុន”៕ Xinhua៕

រុស្ស៊ី វ៉ាដាច់អារ៉ាប៊ីសាអូឌីត ក្លាយជាអ្នកផ្គត់ផ្គង់ប្រេងឆៅធំបំផុតរបស់ប្រទេសចិន

ដោយ សុខុម

សិង្ហបុរី: ការនាំចូលប្រេងឆៅរបស់មហាយក្សចិន ពីប្រទេសរុស្ស៊ី បានកើនឡើងរហូតដល់៥៥%បើធៀបនឹងឆ្នាំ២០២១ ឈានដល់កម្រិតខ្ពស់បំផុតមិនធ្លាប់មានក្នុងខែឧសភា ឆ្នាំ២០២២ ដោយរុស្ស៊ី បានវ៉ាដាច់ប្រទេសអារ៉ាប៊ីសាអូឌីត ក្លាយជាអ្នកផ្គត់ផ្គង់ដ៏កំពូលរបស់ប្រទេសចិន។

កំណើននាំចូលយ៉ាងគំហុកនេះកើតមានឡើង ស្របពេលបណ្ដាក្រុមហ៊ុនចម្រាញ់ប្រេងចិន សម្រុកទិញប្រេងឆៅបញ្ចុះតម្លៃថោកៗរបស់រុស្ស៊ី ស្របពេលលោកខាងលិច និងបណ្ដាប្រទេសសម្ព័ន្ធមិត្តដាក់ទណ្ឌកម្មលើរដ្ឋាភិបាលក្រុងមូស្គូ ចំពោះការបញ្ឆេះសង្គ្រាមចូលឈ្លានពានប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters ចុះផ្សាយកាលពីថ្ងៃច័ន្ទ ទី២០ ខែមិថុនា។

យោងតាមទិន្នន័យពីរដ្ឋបាលគយទូទៅរបស់ប្រទេសចិន បង្ហាញថា ការនាំចូលប្រេងរបស់រុស្ស៊ី មានចំនួនសរុបជិត៨,៤២លានតោន។ ការនាំចេញនេះរួមទាំងការផ្គត់ផ្គង់ដែលបូមតាមបំពង់បង្ហូរប្រេង East Siberia Pacific Ocean (ESPO) ដែលជាប្រព័ន្ធបង្ហូរប្រេងតាមសមុទ្រសម្រាប់ការនាំចេញប្រេងឆៅរុស្ស៊ី មកកាន់ទីផ្សារនានានៅអាស៊ី-ប៉ាស៊ីហ្វិក (ជប៉ុន ប្រទេសចិន និងកូរ៉េ) និងការដឹកជញ្ជូនតាមសមុទ្រពីកំពង់ផែអឺរ៉ុប និងចុងបូព៌ារបស់រុស្ស៊ី ផងដែរ។

តួលេខនេះគឺស្មើនឹងប្រមាណ១,៩៨លានបារ៉ែលក្នុងមួយថ្ងៃ (bpd) បើធៀបនឹង១,៥៩លានបារ៉ែលក្នុងមួយថ្ងៃក្នុងខែមេសា។

ទិន្នន័យបង្ហាញថា រដ្ឋាភិបាលក្រុងមូស្គូ នៅតែមានលទ្ធភាពអាចស្វែងរកអ្នកទិញប្រេងរបស់ខ្លួន បើទោះបីជាមានការដាក់ទណ្ឌកម្មពីលោកខាងលិចយ៉ាងណាក៏ដោយចុះ ប៉ុន្តែទន្ទឹមនេះរុស្ស៊ី ត្រូវបង្ខំចិត្តលក់បញ្ចុះតម្លៃយ៉ាងច្រើនផងដែរ។

ហើយខណៈពេលតម្រូវការប្រេងឆៅសរុបរបស់ប្រទេសចិន ត្រូវបានរាំងស្ទះដោយសារវិធានការទប់ស្កាត់ការរីករាលដាលវីរុសកូវីដ-១៩ និងការធ្លាក់ចុះសេដ្ឋកិច្ច បណ្ដាក្រុមហ៊ុននាំចូលឈានមុខគេរបស់ចិន បានសម្រុកបង្កើនការទិញប្រេងឆៅថោកៗរបស់រុស្ស៊ី បន្ថែមពីលើការផ្គត់ផ្គង់ប្រេងពីប្រទេសអ៊ីរ៉ង់ និងប្រទេសវេណេហ្ស៊ុយអេឡា ដែលសុទ្ធតែទទួលរងទណ្ឌកម្ម៕ Reuters៕

រដ្ឋមន្ត្រីសាធារណការរំពឹងថាគម្រោងសាងសង់ផ្លូវជាតិលេខ៧១C សម្រេចមុនផែនការ

ដោយ វឌ្ឍនា

ភ្នំពេញ ៖ ផ្លូវជាតិលេខ៧១C ដែលតភ្ជាប់ពីផ្លូវជាតិលេខ៧ ស្រុកត្បូងឃ្មុំ ខេត្តត្បូងឃ្មុំ ដល់ផ្លូវជាតិលេខ៧១ ស្រុកចំការលើខេត្តកំពង់ចាម ប្រវែង១១៥គីឡូម៉ែត្រ ត្រូវបានប្រើប្រាស់ថវិកាសាងសង់ប្រមាណ១៣០លានដុល្លារអាមេរិក នឹងគ្រោងបញ្ចប់នៅខែតុលាឆ្នាំ២០២៤ខាងមុខ ។

យ៉ាងណាក្ដីរដ្ឋមន្ត្រីក្រសួងសាធារណការនិងដឹកជញ្ជូនលោកស៊ុន ចាន់ថុល រំពឹងផ្លូវនេះនឹងសាងសង់រួចមុនកាលកំណត់ ។

មានប្រសាសន៍នៅក្នុងឱកាសចុះពិនិត្យសកម្មភាពសាងសង់នៅថ្ងៃទី២០ មិថុនា ២០២២ លោកស៊ុនចាន់ថុលបានឱ្យដឹងថា តាមរយៈសកម្មភាពសាងសង់របស់ក្រុមហ៊ុនចិន លើគម្រោងផ្លូវជាតិលេខ៧១C លោកជឿជាក់ថាក្រុមហ៊ុននេះ នឹងធ្វើឱ្យចប់មុនកាលកំណត់គឺខែតុលា២០២៤ ដោយបច្ចុប្បន្ននេះ ក្រុមហ៊ុនសាងសង់សម្រេចបានប្រមាណ៣៧ភាគរយហើយ ខណៈការប្រើប្រាស់ពេលវេលាក្នុងការសាងសង់ប្រមាណ៣៥ភាគរយផងដែរ ដូច្នេះទាំងពេលវេលានិងការងារដែលបានធ្វើគឺប្រហាក់ប្រហែលគ្នា ។

លោកបន្តថា ស្របពេលនឹងការងារសាងសង់នេះដែរ យើងក៏បានតាមដានលើការងារនេះជាប្រចាំ តាំងពីការបុកគ្រឹះ រហូតដល់ចាក់កៅស៊ូ មិនមែនទាល់តែចាក់កៅស៊ូហើយ ទើបយើងទៅតាមដាននិងពិនិត្យ ហើយបើសិនជាមិនពេញចិត្តតម្រូវឱ្យបុកគ្រឹះជាថ្មីនឹងខាតពេលវេលាកាន់តែច្រើន ។

លោកបន្ថែមថា កំណាត់ផ្លូវជាតិ៧១Cនេះដែរក៏មានកន្លែងដែលត្រូវរងគ្រោះដោយសារទឹកជំនន់ដែរ ដូច្នេះ យើងក៏បានគិតគូរធ្វើឱ្យយ៉ាងណាលើកកម្ពស់ផ្លូវឱ្យរួចផុតពីទឹក និងបានសង់ស្ពានដើម្បីបង្ហូរទឹក ពីព្រោះនៅតំបន់ខ្លះទឹកបុកមកខ្លាំងបើមិនធ្វើឱ្យបានត្រឹមត្រូវទេនោះ វានឹងឆាប់ខូចខាតហើយត្រូវជួសជុលនិងធ្វើជាថ្មី ។

សម្ដេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ក៏បានថ្លែងប្រាប់ឱ្យរដ្ឋមន្ត្រីក្រសួងសាធារណការនិងដឹកជញ្ជូនឱ្យសិក្សាលើការសងនិងពង្រីកផ្លូវធំៗតភ្ជាប់ពីបណ្ដាខេត្តនានាទៅកាន់តំបន់ច្រកព្រំដែនអន្តរជាតិកម្ពុជា វៀតណាម ដើម្បីសម្រួលដល់ការដឹកជញ្ជូនទំនិញចេញចូលប្រទេស ជម្រុញដល់ការធ្វើពាណិជ្ជកម្មរវាងប្រទេសកម្ពុជានិងវៀតណាម ៕

ចំណុចសំខាន់ៗចំនួន៤ ដែលភ្នាក់ងារ​អចលនទ្រព្យ​ត្រូវស្វែងយល់ មុននឹង​សម្រេចចិត្ត​ចូលប្រឡូក​ក្នុង​វិស័យនេះ

ដោយ៖ រ៉ាវី

ភ្នំពេញ៖ ការ​ក្លាយជា​ភ្នាក់ងារ​អចលនទ្រព្យ​មួយរូប មិន​ពិបាក​ទេ តែ​ដើម្បី​ក្លាយជា​អ្នកទទួលបាន​ជោគជ័យ គឺ​មិនមែនជា​រឿង​សាមញ្ញ​ពេក​នោះទេ ប៉ុន្តែ​ការខិតខំ​ប្រឹងប្រែង​សិក្សា​រៀនសូត្រ មាន​ទំនាក់ទំនង​ល្អ និ​ត​អាកប្បកិរិយា​ល្អជា​រឿង​មិនអាច​ខ្វះ​បាន។

គេហទំព័រ Propertyarea.asia សូម​លើកយក​ចំណុចសំខាន់ៗចំនួន៤ ដែល ភ្នាក់ងារ​អចលនទ្រព្យ​ត្រូវមាន មុននឹង​សម្រេចចិត្ត​ចូលប្រឡូក​ក្នុង​វិស័យនេះ។

យោងតាម​ឯកសារ​បរទេស​បាន​ឲ្យ​ដឹងថា ការ​មាន​ភាពស្មោះត្រង់ មានការ​ទទួលខុសត្រូវ បង្កើត​បណ្តាញ​ការងារ​ពិត​ជាមាន​សារៈសំខាន់ ដើម្បី​កំណត់​ភាពជោគជ័យ​ក្នុង​ការងារ​របស់ខ្លួន។

ការទទួលបាន​អាជ្ញាប័ណ្ណ
ការបង្កើត​ជំនួញ​មួយ មិនមែន​ចេះតែធ្វើ​នោះទេ តែ​ត្រូវមាន​ក្រុមហ៊ុន​មួយ

ដែល​ត្រូវមាន​អាជ្ញាប័ណ្ណ​ច្បាស់លាស់ ព្រោះ​អាជ្ញាប័ណ្ណ​មាន​សារៈសំខាន់​ណាស់​ដើម្បី​ផ្តល់​ទំនុកចិត្ត​ដល់​អតិថិជន និង​ក្រុមហ៊ុន​ដៃគូ​របស់ខ្លួន។ លើសពីនេះ ក្រុមហ៊ុន​ភ្នាក់ងារ​នេះ ត្រូវ​រៀបចំខ្លួន​សម្រាប់​ការប្រឡង​ទាក់ទង​នឹង​វិស័យ​អចលនទ្រព្យ។

ការបង្កើត​ក្រុម

បើ​ចង់ទៅ​លឿន ត្រូវ​ដើរ​ម្នាក់ឯង តែបើ​ចង់ទៅ​មុខ​ដោយ​ជោគជ័យ​និង​ប្រកបដោយ​និរន្តរភាព ត្រូវ​ធ្វើជា​ក្រុម។ ការងារ​ជា​ក្រុម និង​ការបង្កើត​បណ្តាញ​ជំនួញ​ជាការ​ងារ​មួយ ដែល​មិនអាច​មើលរំលង​បាន ដើម្បី​ពង្រីក​ការផ្សព្វផ្សាយ​ពី​ផលិតផល​របស់ខ្លួន និង​អាចរួមចំណែក​ជួយ​គ្នា​ទៅវិញទៅមក​នៅក្នុង​ក្រុម។

ដោយសារ​សេដ្ឋកិច្ច​បាន​ឈានដល់​បដិវត្តន៍​បច្ចេក​វិទ្យា ដែលជា​ដំណាក់កាល​ទី៤ នៃ​សេដ្ឋកិច្ច ការបង្កើត​បណ្តាញ​ផ្សព្វផ្សាយ​ពី​ក្រុមហ៊ុន ពី​ផលិតផល​របស់ខ្លួន​តា​មរយៈ​បច្ចេកវិទ្យា ជា​រឿង​ដែល​មិន​អាចធ្វើ​មិនដឹងមិនលឺ​ឡើយ។ បច្ចុប្បន្ន​បច្ចេកវិទ្យា​កំពុង​ដើរតួនាទី​យ៉ាងសំខាន់ ក្នុង​វិស័យ​ជំនួញ ព្រោះ​បច្ចេកវិទ្យា កំពុងមាន​ការពេញនិយម​នៅលើ​ពិភពលោក។

ហេតុនេះ​ការ​មាន​វេ​ប​យ​សាយ ឬ​គេហទំព័រ​ផ្ទាល់ខ្លួន ដើម្បី​ពង្រីក​ការផ្សព្វផ្សាយ​ផលិតផល​របស់ខ្លួន ពិត​ជាមាន​សារៈសំខាន់​មិនអាច​ខ្វះ​បាន​ក្នុងការ​ឆ្ពោះទៅមុខ។

ធ្វើ​ទីផ្សារ​ដោយ​ខ្លួនឯង

គ្មាន​អ្នកណា​ធ្វើ​ទីផ្សារ​ជំនួស​យើង​បាន​នោះទេ ទីផ្សារ​នៅទីនេះ​សំដៅលើ​ការបង្កើន​កិត្យានុភាព​របស់​ក្រុមហ៊ុន ឬ​ធ្វើ​ឲ្យ​ក្រុមហ៊ុន​របស់​យើង​មានការ​ទទួលស្គាល់​ទូលំទូលាយ​ក្នុង​ស្រទាប់​មហាជន និង​អតិថិជន​គោលដៅ។

ហេតុនេះ​ម្ចាស់​ក្រុមហ៊ុន ភ្នាក់ងារ​អចលនវត្ថុ​ឬ​ក្រុមហ៊ុន​ជំនួញ​ផ្សេងទៀត ត្រូវ បង្កើត​កាលវិភាគ​សម្រាប់​ការស្វែងរក​ព័ត៌មាន​និង​អតិថិជន ចូលរួម​ជួយ​ដល់​ការងារ​ក្នុង​សហគមន៍។ រក្សា​ទំនាក់ទំនង​ល្អ​ជាមួយ​អតិថិជន​ចាស់ ព្រោះ75ភាគរយ​នៃ​អាជីវកម្ម​សម្រាប់​ក្រុមហ៊ុន​ទិញ លក់​អចលនទ្រព្យ​ជាទូទៅ​បានមកពី​ការណែនាំតៗគ្នា។

ក្នុងនាម​ជា​អ្នកលក់​អចលនទ្រព្យ ការលក់​ខ្លួនឯងបាន​សម្រេច​គឺជា​រឿងសំខាន់បំផុត។

ធ្វើជា​អ្នកសិក្សា​ពេញ​មួយជីវិត

មនុស្ស​ជោគជ័យ មិនដែល​បញ្ចប់​ការសិក្សា​នោះឡើយ ព្រោះ​ការបញ្ចប់​ការសិក្សា​មានន័យថា ធ្វើ​ឲ្យ​ខ្លួនឯង​ក្រេស​ក្រិន លែង​ចង់​ដើរ​ទៅមុខទៀត ហេតុនេះ អ្វីដែល​ត្រូវធ្វើ​គឺ​ហ៊ុំព័ទ្ធ​ខ្លួន​អ្នក​ជាមួយ​អ្នក​នៅក្នុង​វិស័យនេះ។ ការធ្វើការ​ជាមួយ​មនុស្ស នៅក្នុង​វិស័យ​អចលនទ្រព្យ ផ្ដល់ឱ្យ​អ្នក​នូវ​បណ្តាញ​នៃ​អ្នកជំនាញ​ដើម្បី​ស្វែងរក​អចលនទ្រព្យ​បានល្អ។

ការសិក្សា​ដើម្បី​ពង្រីក​ចំណេះដឹង​របស់ខ្លួន យើង​អាច​ចូលរួម​ក្នុង​សិក្ខាសាលា។ ចូល​សង្កេត​និន្នាការ​ទីផ្សារ និង​ភាពជា​អ្នកជិតខាង: ទីផ្សារ​អចលនទ្រព្យ​ត្រូវបាន​ផ្លាស់ប្តូរ​ជានិច្ច។ ត្រូវ​ដឹង​ពី​កត្តា​ដែល​ប៉ះពាល់​ដល់​តម្លៃ និង​កាលបរិច្ឆេទ​ក្នុង​តំបន់​របស់​អ្នក៕