ដោយៈវឌ្ឍនៈ

ភ្នំពេញៈ ក្នុងរយៈពេលប៉ុន្មានឆ្នាំចុងក្រោយនេះ គេសង្កេតឃើញថា ការអភិវឌ្ឍផ្ទះល្វែង នៅតំបន់ជាយក្រុងមានការរីកចម្រើន គួរឱ្យកត់សម្គាល់ខណៈការអភិវឌ្ឍខុនដូ ក៏មានសន្ទុះរីកចម្រើនដោយភាគច្រើន នៅកណ្ដាលក្រុង ក្នុងនោះដែរអតិថិជននៃផ្ទះល្វែង និងខុនដូក៏មានភាពខុសដែរ ដោយផ្ទះល្វែងភាគច្រើនជាអតិថិជនក្នុងស្រុក ហើយខុនដូជាជនបរទេស។

សម្រាប់អ្នកចង់ទិញផ្ទះស្នាក់នៅ គួរតែជ្រើសរើសយកខុនដូ ឬក៏ផ្ទះជាប់ដីនៅជាយក្រុង? ថ្ងៃនេះអ្នកជំនាញនៃវិស័យខុនដូ នឹងបកស្រាយលម្អិតពីជម្រើសក្នុងការទិញផ្ទះសម្រាប់ស្នាក់នៅ ។

លោកខន គង្គា អគ្គនាយកក្រុមហ៊ុន ERA Cambodia បានមានប្រសាសន៍ នៅក្នុងកិច្ចសម្ភាសន៍មួយនៅរសៀលថ្ងៃទី១១ មេសា ២០២២នេះថា តាមពិតទៅប្រជាជនកម្ពុជា បានទទួលបទពិសោធន៍ក្នុងការរស់នៅអគារសហកម្មសិទ្ធិយូរមកហើយ ជាក់ស្ដែងសំណង់ទាំងនោះក៏បានបន្សល់ទុករហូតមកដល់បច្ចុប្បន្ននេះដែរ ដូចជាអគារប៊ូលឌីង អគារចាស់ៗនៅតាមផ្លូវព្រះមុនីវង្ស ជាជាដើម ។

លោកបន្តថា “ការរស់នៅក្នុងសហកម្មសិទ្ធិ នៅជំនាន់នោះមិនទាន់មានភាពទំនើបដូចបច្ចុប្បន្ននោះទេ ទើបតែក្នុងអំឡុងឆ្នាំ២០០៦ កម្ពុជាក៏ចាប់ផ្ដើម អភិវឌ្ឍន៍អគារសហកម្មសិទ្ធិ ដែលគេហៅថា អគារខុនដូ”។ លោក​បន្តថា “ការអភិវឌ្ឍផ្ទះល្វែងផ្ទះជាប់ដី ក៏បានចាប់ផ្ដើមអនុវត្តន៍យូរមកហើយដែរ ជាក់ស្ដែងនៅជុំវិញផ្សារនៅរាជធានីភ្នំពេញ ដូចជាផ្សារអូរឬស្សី ផ្សារ អូរឡាំពិក ផ្សារថ្មីសុទ្ធតែសំណង់ផ្ទះល្វែង”។

ក្រោយមកសំណង់នេះ ក៏បានរីកដុះដាលកាន់តែខ្លាំងនៅតំបន់ជាយៗក្រុង និងកាន់តែច្រើនរហូតមកអភិវឌ្ឍន៍ទៅជាបុរី ។

លោកខន គង្គាបានបន្តថា ការជ្រើសរើសសំណង់ ផ្ទះល្វែងឬខុនដូ គឺអាស្រ័យ ទៅតាមទំនោររបស់មនុស្សយើងម្នាក់ៗ។ អ្នកខ្លះគាត់ត្រូវការភាពទំនើបកម្ម គឺការរស់នៅដោយភាពងាយស្រួល ហើយខ្លះទៀត ត្រូវការភាពស្ងប់ស្ងាត់ ខ្លះត្រូវការភាពអ៊ូរអរជាដើម ។

លោកពន្យល់ថា “ការរស់នៅក្នុងខុនដូគឺមានភាពទំនើប ដូចនឹងបរទេស ដោយសារតែក្នុងខុនដូ មានផ្សារទំនើបៗ  មានអាងហែលទឹក ជាកន្លែងឯកជនភាព”។ លោបន្តថា “សម្រាប់ផ្ទះល្វែង គឺជាបណ្ដុំផ្ទះជាប់ដី និងមានមនុស្សអ៊ូរអរ ចេញចូល និងមានទីធ្លាទូលាយ”។
លោកបន្ថែមថា ការរស់នៅផ្ទះជាប់ដីនៅជាយក្រុង និងការរស់នៅផ្ទះជាលក្ខណៈខុនដូ មិនមែនថាមួយណាល្អជាងមួយណាទេ តែយើងត្រូវគិតពីចំណុចមួយចំនួននៃការរស់នៅក្នុងខុនដូ និងផ្ទះល្វែង ។ ទីតាំងខុនដូភាគច្រើននៅកណ្ដាលក្រុង និងមានទីតាំងជិតតំបន់ ឬក្នុងតំបន់ពាណិជ្ជកម្ម ដូច្នេះអ្នកមិនចង់ធ្វើដំណើរ ឬចំណាយពេលវេលាច្រើន ក្នុងការធ្វើដំណើរ ពីផ្ទះនៅជាយក្រុង ចូលកណ្ដាលក្រុងដើម្បីធ្វើការ គេអាចជ្រើសរើសយកខុនដូដើម្បីជាកន្លែងស្នាក់នៅ ។ ដោយឡែកអ្នកនៅផ្ទះជាប់ដី ក៏មានលក្ខណៈម្យ៉ាងពីការរស់នៅក្នុងខុនដូ ហើយប្រជាជនកម្ពុជាភាគច្រើន នៅតែចាប់អារម្មណ៍លើការរស់នៅផ្ទះជាប់ដីដដែល ។

ចំណែកលោកច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាក៏បានលើកឡើងផងដែរថា ដោយសារតែតម្លៃផ្ទះនៅក ណ្ដា​លក្រុងកាន់តែកើនឡើងខ្ពស់ អ្នកអភិវឌ្ឍន៍លំនៅឋានជាលក្ខណៈបុរីមិនអាចទិញដីនៅកណ្ដាលក្រុង សម្រាប់អភិវឌ្ឍន៍ជាលំនៅឋានបានទេ ដូច្នេះដីនៅកណ្ដាលក្រុង គេទិញសម្រាប់អភិវឌ្ឍន៍ជាអគារខ្ពស់ៗ ហើយសម្រាប់ផ្គត់ផ្គង់លំនៅឋានជាខុនដូ ដល់អ្នកដែលចង់ស្នាក់នៅជិតកន្លែងធ្វើការឬនៅតំពាណិជ្ជកម្ម ។

លោកបន្តថា “ពីព្រោះតែតម្លៃដីធ្លីនៅកណ្ដាលក្រុងកាន់តែខ្ពស់ ទើបធ្វើឱ្យអ្នកអភិវឌ្ឍន៍លំនៅឋានផ្ទះជាប់ដី ងាកទៅទិញដីនៅជាយៗក្រុងសម្រាប់សង់ផ្ទះលក់ជូនអ្នក ដែលត្រូវការទិញផ្ទះជាប់ដីស្នាក់នៅ”។ លោកបន្តថា “ការអភិវឌ្ឍលំនៅឋានជាប់ដីកាន់តែច្រើននេះហើយ ធ្វើឱ្យតំបន់ជាយក្រុងកាន់តែមានរីកចម្រើន ហើយតម្លៃដីនៅតំបន់នោះ ក៏បានឡើងថ្លៃបន្តបន្ទាប់ផងដែរ។

យោងតាមការសិក្សារបស់នាយកដ្ឋានស្ថិតិ នៃក្រសួងផែនការបានបង្ហាញថា ចំនួនប្រជាពលរដ្ឋរស់នៅរាជធានីភ្នំពេញនៅឆ្នាំ២០៣០នឹងកើនដល់៣៦,៣ភាគរយ ដែលតាមការប៉ាន់ប្រមាណ ចំនួនប្រជាជននឹងមានចំនួនជាង៦លាននាក់ នៃចំនួនប្រជាពលរដ្ឋប៉ាន់ស្មាននៅទូទាំងប្រទេសនឹងកើនដល់ប្រមាណ១៨លាននាក់នៅទូទាំងប្រទេស៕

     ដោយៈគង់ សូរិយា

        ភ្នំពេញៈ ក្រុមហ៊ុនបុរីបុស្បាបានចំណាយប្រាក់ រហូតដល់១០ម៉ឺនដុល្លារអាមេរិក ដើម្បីរៀបចំព្រឹត្តិការណ៍មហាសង្រ្កានម្លប់ឆ័ត្រ ដើម្បីអបអរពិធីបុណ្យចូលឆ្នាំប្រពៃណីជាតិខ្មែរនាពេលខាងមុខនេះ។

ជាមួយនឹងការរៀបចំនូវព្រឹត្តិការណ៍ ដែលមានការលេងល្បែងប្រជា​ប្រិយ ការចូលរួមសម្តែង និងច្រៀងពីតារាលំដាប់ជាតិជួរមុខល្បីៗ ការហែរក្បួនល្បុក្កតោដ៏ធំមុបធ្លាប់មាន ផលិតកម្មរៀម ដែលជាសម្ព័ន្ឋក្រុមហ៊ុនរបស់បុរីបុស្បាបានសម្ភោធនូវបទចម្រៀង “អ្នកចម្បាំង” ដែលបាន​ផលិត និងនិពន្ឋដោយក្រុមផលិតករររបស់ផលិតកម្មនេះផងដែរ។

“អ្នកចម្បាំង”បានបង្ហាញពីមោទនភាពនៃ “ក្បាច់គុនល្បុកក្កតោ” និងចម្រៀង ដែលមានអត្ថន័យស្នេហាជាតិ និងការការពារខ្លួនពីសត្រូវឈ្លាន​ពានផងដែរ។

លោកអ៉ី ពិសិដ្ឋក្រុមប្រឹក្សាភិបាល និងជាប្រធានផ្នែកទីផ្សាររបស់បុរីបុស្បាបានមានប្រសាសន៍ឲ្យដឹងថា ដោយសារយើងចង់រំលេច និងលើកស្ទួយនូវវប្បធ៌ម អត្តសញ្ញាណជាតិខ្មែរ ទើបក្រុមហ៊ុនបានរៀបចំព្រឹត្តិការណ៍ដ៏ធំនេះឡើង ដើម្បីបង្ហាញពីមោទនភាពជាតិ ក៏ដូចជាបង្កភាពសប្បាយរីករាយដល់ប្រជាពលរដ្ឋនៅរាជធានីភ្នំពេញ។

លោកបន្តថា “ប្រជាពលរដ្ឋរាប់ម៉ឺននាក់ បានមកចូលរួមព្រឹត្តិការណ៍នេះ ដែលវាជាអ្វីសំរាប់បុរីត្រូវធ្វើ និងរៀបចំឡើង ដើម្បីចូលរួមអបអរសាទរពិធីបុណ្យចូលឆ្នាំខ្មែរនាពេលខាងមុខនេះ”។

ចំណែកលោកឧកញ៉ាឈាង រ័ត្នអគ្គនាយកបុរីបុស្បាបានមានប្រ​សា​សន៍ថា យើងបានចំណាយប្រាក់ជាច្រើន សម្រាប់ព្រឹត្តិការណ៍ដ៏ធំនេះ ហើយបើគិតពីសសង្រ្កានបៃតង ដែលបានរៀបចំនៅស្រុកឱរ៉ាល់ យើងបានចំណាយប្រាក់រហូតដល់១៨ម៉ឺនដុល្លារអាមេរិក ដើម្បីបងង្កភាពសប្បាយរីករាយដល់ប្រជាពលរដ្ឋខ្មែរ ក៏ដូចជា ចូលរួមលើកស្ទួយលើការអភិវឌ្ឍបុរីបុស្បា ឲ្យទទួ​លបានជោគជ័យបន្ថែមទៀត។

លោកបន្តថា “លើសពីនេះ យើងបានសម្ភោធជាផ្លួវការនូវបទចម្រៀង  ”អ្នកចម្បាំង” ដើម្បីបង្ហាញពីអត្តសញ្ញាណជាតិ និងលើកស្ទួយវប្បធ៌មខ្មែរផងដែរ”។លោកបន្តថា “ការរៀបចំព្រឹត្តិការណ៍នេះ ជាផ្នែកមួយនៃការចូលរួមលើកស្ទួយវប្បធ៌មជាតិ ផ្សព្វផ្សាយវប្បធ៌មជាតិ ទៅកាន់ប្រជាពលរដ្ឋខ្មែរឲ្យបានស្គាល់ ស្រលាញ់ ការពារអត្តសញ្ញាណរបស់ខ្លួន”។

បុរីបុស្បាបាន និងកំពុងសាងសង់ឡើងយ៉ាងសកម្ម និងបានកំពុងទទួលបានការចាប់អារម្មណ៍ ពីប្រជាពលរដ្ឋយ៉ាងច្រើន ដែលរហូតមកដល់ពេលនេះ ក្រុមហ៊ុនបានលក់លំនៅដ្ឋាន សម្រេចបានលើសពីផែនការដែលបានគ្រោងទុុក។

បុរីបុស្បាបានកសាងនូវគុណតម្លៃយ៉ាង​ច្រើន រួមមាន ការផ្តោតលើគុណភាព សោភ័ណភាពសំណង់ ការកសាងនូវបរិស្ថានបៃតង ដើម្បីផ្តល់​ផាសុខភាព និងត្រជាក់ត្រជុំដល់អ្នករស់នៅ ការឌីសាញម៉ូតផ្ទះនិមួយៗសមស្របនឹងលក្ខខ័ណ្ឌអាកាសធាតុ ដែលអាចឲ្យខ្យល់ និងពន្លឺថ្ងៃចេញចូលគ្រប់គ្រាន់ និងតម្លៃមានភាពសមរម្យធៀបជាមួយបុរីដទៃទៀត៕

ដោយៈសុផារី

ភ្នំពេញៈ នៅក្នុងការធ្វើពាណិជ្ជកម្មនិងជំនួញ មានការយល់ច្រលំគិតថា Sale និង Marketing ជាពាក្យ ដែលមានអត្តន័យដូចគ្នា និងមានការយកទៅប្រើប្រាស់ ទាំងមិនច្បាស់លាស់ច្រើន។ តាមពិតទៅពាក្យទាំងពីរនេះភាពពាក់ព័ន្ធគ្នា ប៉ុន្តែមានភាពខុសគ្នាដាច់ស្រឡះ។

លោកបណ្ឌិត គីម ហ៊ាង ប្រធាន KW Cambodia បានមានប្រសាសន៍នៅថ្ងៃទី១១ ខែមេសានេះថា ផ្នែកលក់ (Sale) មានតួនាទីក្នុងការលក់ផលិតផល និងសេវាកម្មឱ្យដាច់ធ្វើយ៉ាងណាឱ្យលក់ដាច់។

លោកបណ្ឌិតបន្តថា “នៅក្នុងវិស័យអចលនទ្រព្យ Sale ត្រូវធ្វើយ៉ាងណាឱ្យគេស្គាល់ច្រើន ដោយប្រើប្រាស់វិធីណាក៏ដោយ ឱ្យតែលក់ដាច់ ដូចជាពាក្យស្លោកមួយថា “ឆ្មាសក៏ដោយ ឆ្មាខ្មៅក៏ដោយ ឱ្យតែចាប់កណ្តុរបាន”។ នៅ

លោកបន្ថែមថា ក្នុងវិស័យពាណិជ្ជកម្ម Sale ប្រើប្រាស់វិធីគ្រប់យ៉ាង ដើម្បីលក់ឱ្យដាច់នូវផលិតផលនិងសេវាកម្មរបស់ខ្លួន”។

ពាក្យថា ការលក់(Sale និងការធ្វើទីផ្សារ (Marketing) មានតួនាទីដើរទន្ទឹមគ្នា ប៉ុនែ្តពាក្យទាំងពីរនេះមានអត្ថន័យខុសគ្នាដាច់ស្រឡះ។

បើតាមលោកបណ្ឌិត ពាក្យថា Marketing សំដៅវិធីសាស្ត្រ ដែលធ្វើឱ្យគេស្គាល់អំពីផលិតផលនិងសេវាកម្មនោះ។ គ្រប់វិធីសាស្ត្រទាំងឡាយណា ដែលធ្វើឱ្យគេស្គាល់អំពីបុគ្គល ផលិតផល និងសេវាកម្មណាមួយ គឺជាការធ្វើទីផ្សារ (Marketing)។

លោកបណ្ឌិតគីម ហ៊ាងមានប្រសាសន៍ថា “Marketing គឺជាវិធីសាស្ត្រទាំងឡាយណា ដែលធ្វើឱ្យអ្នកដទៃស្គាល់ថា យើងជានរណា លក់ផលិតផល ឬសេវាកម្មអ្វី? នៅក្នុងសង្គមបច្ចុប្បន្ន មានការប្រើប្រាស់វិធីជាច្រើន ដូចជា ការផ្សព្វផ្សាយក្នុងវិធីត្រឹមត្រូវមួយ មានអ្នកខ្លះក៏បានប្រើប្រាស់វិធីអវិជ្ជមានផងដែរ”។

ឧទាហរណ៍ លោកElon Musk បានយកដុំថ្មគប់ទៅលើកញ្ចក់ឡាន Teslaរបស់គាត់ ដើម្បីឱ្យគេស្គាល់ និងចុះផ្សាយអំពីផលិតផលរបស់គាត់។ នេះគឺវិធីសាស្រ្គនៅក្នុងការធ្វើទីផ្សាររបស់លោក៕

លោកបណ្ឌិតបញ្ជាក់ថា វិធីសាស្រ្តនៅក្នុងការលក់ និងការធ្វើទីផ្សារមានវិធីខុសៗគ្នា នៅក្នុងការអនុវត្ត អាស្រ័យតាមការជ្រើសរើសប្រើប្រាស់ ដោយអ្នកខ្លះប្រើវិធីក្នុងផ្លូវល្អ និងអ្នកខ្លះប្រើប្រាស់វិធីក្នុងផ្លូវមិនល្អ៕

ដោយៈសហការី

ភ្នំពេញៈ អ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា ត្រូវបានសមាគមគាំទ្រជាឯកច្ឆ័ន្ទ ជាប្រធានសមាគមអាណត្តិទី៣បន្តទៀត។ ជាមួយគ្នានេះដែរ អ្នកឧកញ៉ាលី យ៉ងផាត់ ត្រូវបានតែងតាំងជាឧត្តមទីប្រឹក្សា សមាគមអ្នកអភិវឌ្ឍន៍លំនៅឋានកម្ពុជាផងដែរ។

ក្នុងសន្និបាតប្រចាំឆ្នាំ២០២២ និងពិធីពិសាអាហារសាមគ្គីរបស់សមាគម នាថ្ងៃទី១០ ខែមេសា ឆ្នាំ២០២២ ក្នុងគោលបំណង ដើម្បីបង្ហាញអំពីវឌ្ឍនភាពការងាររបស់សមាគម អ្នកអភិវឌ្ឍន៍លំនៅឋានកម្ពុជា មានវត្ត​មានរបស់លោក ហ៊ុន ម៉ានី ប្រធានគណៈកម្មការទី៧នៃរដ្ឋសភា ជាប្រធានសហភាពសហព័ន្ធយុវជនកម្ពុជា និងជាទីប្រឹក្សាជាន់ខ្ពស់នៃស​មាគមអ្នកអភិវឌ្ឍន៍លំនៅឋានកម្ពុជា លោកសាយ សំអាល់ រដ្ឋមន្ត្រីក្រសួងបរិស្ថាន លោក ឃួង ស្រេង អភិបាលនៃគណៈអភិបាលសារាជធានីភ្នំពេញផងដែរ។

អ្នកឧកញ៉ា លី ហួរ បានមានប្រសាសន៍ថា “យើងទាំងអស់គ្នាបានដឹងហើយរយៈពេលជា២ឆ្នាំកន្លងមកនេះជំងឺឆ្លងកូវីដ១៩ មានការរីករាលដាលយ៉ាងខ្លាំងទូទាំងពិភពលោក និងបានធ្វើឱ្យសេដ្ឋកិច្ចពិភពលោកមានការធ្លាក់ចុះយ៉ាងធ្ងន់ធ្ងរ និងបានប៉ះពាល់ដល់សេដ្ឋកិច្ចកម្ពុជាផងដែរ ក្នុងនោះក៏មានការប៉ះពាល់ដល់វិស័យសំណង់យើងដែរ។

លោកបន្តថា “ដោយកត្តាខាងលើនេះហើយ បានធ្វើឲ្យសមាគមយើងមិនអាចមានលទ្ធភាពជួបជុំប្រារព្ធពិធីផ្សេងៗ ឬកិច្ចប្រជុំនានាបាន”។

អ្នកឧកញ៉ា លី ហួរ បានបន្តថា ទោះបីបញ្ហាជំងឺឆ្លងកូវីដ១៩ ជាឧបសគ្គដ៏ធំមែន តែសមាគមនៅតែបន្តធ្វើកិច្ចការ បម្រើជាផលប្រយោជន៍រួមសម្រា​ប់សមាជិក-សមាជិកាសមាគម ដោយបន្តសកម្មភាពការងារយ៉ាងសកម្ម និងធ្វើកិច្ចសហប្រតិបត្តិការ ជាមួយស្ថាប័នពាក់ព័ន្ធជាច្រើន ដូចជា ក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដី នគរូបនីយកម្ម និងសំណង់ ក្រសួងប្រៃសណីយ៍ និងទូរគមនាគមន៍ និយ័តករទូរគមនាគមន៍កម្ពុជា និយ័តករគណនេយ្យ និងសវនកម្ម អគ្គិសនីកម្ពុជា រដ្ឋាករទឹកស្វយ័តក្រុងភ្នំពេញ សាលារាជធានីភ្នំពេញ ក្រុមការងារទី១៣ ផ្នែកសំណង់ និងអចលនទ្រព្យ នៃសភាពាណិជ្ជកម្មកម្ពុជា និងអាជ្ញាធរពាក់ព័ន្ធផ្សេងទៀត ក្នុងការសម្របសម្រួល និងដោះស្រាយបញ្ហាប្រឈមជាច្រើន ជូនសមាជិក-សមាជិកា ដោយទទួលបានលទ្ធផលយ៉ាងត្រចះត្រចង់។

អ្នកឧកញ៉ា លី ហួរ ក៏បានសម្តែងនូវការកោតសរសើរដោយស្មោះចំពោះថ្នាក់ដឹកនាំ និងសមាជិក-សមាជិកាសមាគមទាំងអស់ ដែលបានគាំទ្រយ៉ាងពេញទំហឹងទាំងកម្លាំងកាយចិត្ត ថវិកាធនធាន ក្នុងការចូលរួមក្នុងសកម្មភាព ជាមួយសមាគមអ្នកអភិវឌ្ឍន៍លំនៅឋានកម្ពុជា តាំងពីដើមអាណត្តិរហូតដល់បច្ចុប្បន្ន ធ្វើឲ្យសមាគមទទួលបាននូវភាពរីកចម្រើន មានកេរ្តិ៍ឈ្មោះ និងមានការគាំទ្រយ៉ាងខ្លាំង ពីសំណាក់រាជរដ្ឋាភិបាល ក្រោមការដឹកនាំ ដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។

អ្នកឧកញ៉ាបញ្ជាក់ថា បច្ចុប្បន្ន ក្រុមហ៊ុនវិនិយោគលើវិស័យសំណង់មានការចាប់អារម្មណ៍ និងបានចូលជាសមាជិក សមាគមបន្ថែមទៀតយ៉ាងច្រើន ដែលបច្ចុប្បន្នសមាគម មានសមាជិកសរុប៦៨ក្រុមហ៊ុន ក្នុងនោះសម្រាប់ឆ្នាំ២០២០-២០២១ សមាគមបានទទួលសមាជិកថ្មីបន្ថែមចំនួន២០ក្រុមហ៊ុន បន្ថែមទៀត៕