ដោយៈ សុផារី

ភ្នំពេញៈ តំណាងក្រុមហ៊ុន Alibaba បង្ហាញពីបំណងក្នុងការនាំយកផលិតផលខ្មែរទៅបញ្ចូល និងដាក់លក់នៅលើទីផ្សារប្រទេសចិន និងបណ្តាប្រទេសនានាក្នុងទ្វីបអាស៊ី អឺរ៉ុប និងអាហ្វ្រិក តាមរយៈ App Lazada របស់ Alibaba Group។

ក្នុងកិច្ចប្រជុំជាមួយក្រុមហ៊ុន Alibaba Group តាមរយៈប្រព័ន្ធ Video ស្តីអំពី “កិច្ចសហប្រតិបត្តិការរវាងក្រុមហ៊ុន Alibaba Group ជាមួយរាជរដ្ឋាភិបាលកម្ពុជា”នៅថ្ងៃទី២៨ ខែមករានេះ លោកឧបនាយករដ្ឋមន្រ្តីយឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានគណៈកម្មាធិការជាតិ ជំរុញចលនាភូមិមួយផលិតផលមួយ បានស្វាគមន៍ ចំពោះគំនិតផ្តួចផ្តើមនៃកិច្ចសហការ រវាងក្រុមហ៊ុនAlibaba និងគណៈកម្មាធិការជាតិ ជំរុញចលនាភូមិមួយ ផលិតផលមួយ ដែលមានក្រសួងនិងស្ថាប័នពាក់ព័ន្ធចំនួន១៧ជាសមាជិក។

រដ្ឋមន្ត្រីក្រសួងពាណិជ្ជកម្ម ជាអនុប្រធានទី១នៃគណៈកម្មាធិការជាតិជំរុញចលនាភូមិមួយផលិតផលមួយ ដែលមានភារកិច្ចត្រូវជួយស្វែងរកទីផ្សារសម្រាប់ផលិតផលកម្ពុជា។

លោក សុង ជីងថាវ (Song Juntao) អគ្គលេខាធិការ eWTP នៃក្រុមហ៊ុនAlibabaរបស់ប្រទេសចិន បានជម្រាបជូនលោកឧបនាយករដ្ឋមន្ត្រីពីវេទិកាពាណិជ្ជកម្មអេឡិចត្រូនិកពិភពលោក ហៅកាត់ថា eWTP គឺជាវេទិកាកិច្ចសហប្រតិបត្តិការសាធារណៈ និងឯកជន ដែលមានសណ្ឋានជាពហុភាគី ដើម្បីលើកកម្ពស់ពាណិជ្ជកម្មតាមរយៈប្រព័ន្ធ Online។

លោកបន្តថា eWTP ត្រូវបានបង្កើតឡើង និងចាប់ដំណើរការពីឆ្នាំ២០១៦ ដែលជាបុត្រសម្ព័ន្ធរបស់ក្រុមហ៊ុនAlibaba Group ហើយទទួលបានការគាំទ្រ ពីថ្នាក់ដឹកនាំនៃប្រទេសG20 ក្នុងឆ្នាំ២០១៦ លើសពីនេះ eWTP ត្រូវបានទទួលស្គាល់ដោយប្រមុខរដ្ឋ និងប្រមុខរដ្ឋាភិបាលនៃបណ្តាប្រទេស ដែលមានកិច្ចសហប្រតិបត្តិការ ជាមួយក្រុមហ៊ុន Alibaba។

eWTP នឹងធ្វើការជាមួយដៃគូក្នុងស្រុក និងបរទេសដើម្បីបង្កើតប ណ្តាញរចនាសម្ព័ន្ធ ឌីជីថលចំនួនបួន រួមមាន ប្រតិបត្តិការសកល ការដឹកជញ្ជូន ហិរញ្ញវត្ថុទូទាត់ និងបណ្តាញវេទិកាសេវាសាធារណៈ ស្វែងយល់ពីច្បាប់ថ្មីនៃពាណិជ្ជកម្មឌីជីថល តាមរយៈការអនុវត្តអាជីវកម្ម និងលើកកម្ពស់ពាណិជ្ជកម្ម តាមរយៈបច្ចេកវិទ្យាឌីជីថល និងកិច្ចសហប្រតិបត្តិការរួមបញ្ចូ​លការអភិវឌ្ឍបៃតង និងការអភិវឌ្ឍប្រកបដោយនិរន្តរភាពនិងចីរភាព។

បច្ចុប្បន្ននេះ eWTPបានអនុវត្តន៍ នៅក្នុងប្រទេសចំនួន៦ នៅក្នុងទ្វីបអាស៊ី អឺរ៉ុប និងអាហ្វ្រិក ដែលនៅក្នុងទ្វីប អាស៊ី មាន ប្រទេសម៉ាឡេស៊ី និង ប្រទេសថៃ។ ចក្ខុវិស័យរបស់ eWTP ក្នុងការជួយប្រទេសដៃគូពង្រីកការនាំ ចេញ តាមរយៈពាណិជ្ជកម្មអេឡិចត្រូនិកឆ្លងព្រំដែន ដោយផ្តោតលើការអភិវឌ្ឍសេដ្ឋកិច្ចនិងការអភិរក្សបរិស្ថាន។
ក្រៅពីប្រទេសចិន ដែលបានប្រើប្រាស់គេហទំព័រ Alibaba.com ដែលជួយសហគ្រាសធុនតូច និងមធ្យមនាំចេញទៅជាង២០០ ប្រទេសជុំវិញពិភពលោក តាមរយៈអនឡាញ ហើយក្រុមហ៊ុនជិតមួយពាន់នៅម៉ាឡេស៊ី និងថៃ គឺជាសមាជិករបស់ក្រុមហ៊ុន Alibaba។

លើសពីនេះ ទាក់ទងនឹងការធ្វើពាណិជ្ជកម្ម តាមប្រព័ន្ធអេឡិចត្រូនិក ក្រុមហ៊ុនAlibaba ក៏បានណែនាំគេហទំព័រ Lazada ដែលជាវេទិកាពាណិជ្ជកម្មអេឡិចត្រូ និកឈានមុខគេនៅអាស៊ីអាគ្នេយ៍ ដែលបម្រើអតិថិជនចំនួន៦៥០លាននាក់ក្នុង៦ ប្រទេស រួមមានវៀតណាម (Lazada.vn) សិង្ហបុរី (Lazada.sg) ម៉ាឡេស៊ី (Lazada.com.my) ថៃ (Lazada.co.th) ហ្វីលីពីន (Lazada.com.ph) និងឥណ្ឌូនេស៊ី (Lazada.co.id)៕

ដោយៈគង់ សូរិយា

ភ្នំពេញៈ គំរោងផ្លូវល្បឿនលឿនភ្នំពេញ ព្រះសីហនុសម្រេចសាងសង់​បាន៨០ភាគរយហើយ ខណៈប្រភពស្និទ្ឋនឹងមន្រ្តីរដ្ឋាភិបាលបានបញ្ជាក់ថា ផ្លូវនេះ នឹងបើកដំណើរការសាកល្បងនៅខែកក្កដាខាងមុខនេះ។

គម្រោងសាងសង់ផ្លូវល្បឿនលឿននេះ មានប្រវែងជាង១៩០គីឡូ​ម៉ែត្រ សម្រេចបាន៨១ភាគរយហើយ គិតត្រឹមខែមករា ឆ្នាំ២០២២នេះ។

អនុរដ្ឋលេខាធិការ និងជាអ្នកនាំពាក្យក្រសួងសាធារណៈការ និងដឹកជជញ្ជូន លោកវ៉ាស៊ីម សុរិយាបានបង្ហើបឲ្យដឹងពីវឌ្ឍនភាពផ្លូវនេះ។

ចាប់ផ្តើមសាងសង់នៅខែមីនា ឆ្នាំ២០១៩ ផ្លូវល្បឿនលឿននេះ សាងសង់ដោយក្រុមហ៊ុន PPSHV Expressway Co., Ltd និងត្រួតពិនិត្យបច្ចេកទេសដោយក្រុមហ៊ុន MINCONSULT SDN. BHD។

គម្រោងនេះ គ្រោងចំណាយថវិកាប្រមាណ ២ពាន់លានដុល្លារ ដោយនឹងក្លាយជាផ្លូវល្បឿនលឿនទី១នៅកម្ពុជា ជួយកាត់បន្ថយពេលវេលាធ្វើដំណើរពីរាជធានីភ្នំពេញ ទៅកំពង់ផែសមុទ្រក្រុងព្រះសីហនុពី៥ម៉ោង មកត្រឹម២ម៉ោងប៉ុណ្ណោះ ស្របពេលស្ថានភាពផ្លូវនេះអាចអនុញ្ញាត្តឲ្យអ្នកបើកបរ អាចបើកបាន១២០គីឡូម៉ែត្រ ក្នុងមួយម៉ោង ប៉ុន្តែផ្លូវនេះមិនអាចបើកបរបកក្រោយ និងមិនអនុញាត្តឲ្យម៉ូតូកង់បី រម៉កបើកបរបានឡើយ៕

ដោយៈ សុផារី

ភ្នំពេញៈ សាធារណរដ្ឋកូរ៉េ បានសន្យាផ្តល់កញ្ចប់ឥណទានសម្បទានបន្ថែមដល់ប្រទេសកម្ពុជា តាមរយៈកិច្ចសម្របសម្រួលក្របខ័ណ្ឌ (Framework Arrangement) ថ្មី ដែលមានទឹកប្រាក់ប្រមាណ១,២ពាន់ លានដុល្លារ សម្រាប់ឆ្នាំ២០២២ ដល់ឆ្នាំ២០២៦។

ព៌តមាននេះ ត្រូវបានបង្ហើបក្នុងជំនួបរវាងលោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ និង លោកស្រី Minnie Chey ដែលទើបចូលកាន់តំណែង ជាប្រធានថ្មី នៃមូលនិធិសហប្រតិបត្តិការ សម្រាប់ការអភិវឌ្ឍសេដ្ឋកិច្ច (Economic Development Cooperation Fund – EDCF) របស់សាធារណរដ្ឋកូរ៉េ ប្រចាំនៅកម្ពុជា និងលោកស្រី Lee Hye-Kyung ដែលបានបញ្ចប់អាណត្តិ នៅព្រឹកថ្ងៃទី២៧ ខែមករា ឆ្នាំ២០២២នេះ។

គិតមកដល់ដំណាច់ឆ្នាំ ២០២១កន្លងទៅនេះ ឥណទានសម្បទាន ពីសាធារណរដ្ឋកូរ៉េ មានទឹកប្រាក់សរុបប្រមាណ១,២១១លានដុល្លារ សម្រា​ប់ហិរញ្ញប្បទានដល់គម្រោង/កម្មវិធីអភិវឌ្ឍន៍ ចំនួន២៦គម្រោង។

លោក វង្សី វិស្សុត មានប្រសាសន៍ថា ក្នុងអាណត្តិរបស់លោកស្រី Lee Hye-Kyungកន្លងមក កម្ពុជាសម្រេចបាននូវការចុះហត្ថលេខា លើកិច្ចព្រមព្រៀងឥណទានសម្បទានចំនួន៨គម្រោង មានទឹកប្រាក់សរុបប្រមាណ ៤៤០លានដុល្លារ ដែលនេះជាស្នាដៃដ៏ធំធេងរបស់លោកស្រី និងជាការសម្រេចបាននូវផ្លែផ្កា សម្រាប់ប្រទេសកម្ពុជា។

នៅក្នុងឱកាសនោះដែរ លោកក៏បានស្នើដល់ភាគីកូរ៉េ ឱ្យពិនិត្យលទ្ធភាពក្នុងការបង្កើនទំហំ នៃកញ្ចប់ឥណទានសម្បទានបន្ថែមទៀត ដើម្បីបំពេ​ញនូវតម្រូវវិនិយោគបន្ថែមរបស់កម្ពុជា ស្របតាមការរីកចម្រើនលូតលាស់ នៃសេដ្ឋកិច្ចលើវិស័យ ដែលមានសក្តានុពលមួយចំនួន ដើម្បីជំរុញកំណើនដូចជា ការអភិវឌ្ឍហេដ្ឋារចនាសម្ព័ន្ធបៃតង កសិកម្ម ទេសចរណ៍ និងឡូជីស្ទីក ព្រមទាំងឌីជីថល។

លោកក៏ផ្តល់នូវក្តីសង្ឈឹមខ្ពស់ ដល់កិច្ចព្រមព្រៀងពាណិជ្ជកម្មសេរីរ វាងកម្ពុជា និងសាធារណរដ្ឋកូរ៉េ ដែលនឹងជួយជំរុញនូវពាណិជ្ជកម្មទេ្វភាគី រវាងប្រទេសទាំងពីរ ឱ្យកាន់តែមានសន្ទុះរីកចម្រើនខ្លាំងក្លា ក៏ដូចជា ជួយទាក់ទាញវិស័យឯកជនកូរ៉េ ដើម្បីបង្កើនការបោះទុនវិនិយោគ ឱ្យបានច្រើននៅកម្ពុជាផងដែរ។

លោកបានស្នើសុំដល់លោកស្រី ប្រធានថ្មី នៃ EDCF និងក៏ដូចលោកស្រីប្រធាន ដែលចប់អាណត្តិ ជួយជំរុញការផ្សព្វផ្សាយព័ត៌មាន ពីកម្ពុជា ដល់ប្រជាជនកូរ៉េ ក៏ដូចដល់វិស័យឯកជនកូរ៉េ ដើម្បីចូលមកទស្សនា និងបោះទុនវិនិយោគ នៅកម្ពុជាឱ្យបានច្រើន៕

ដោយៈគង់ សូរិយា

 កណ្តាលៈ គណៈប្រតិភូនៃសមាគមអ្នកអភិវឌ្ឍន៍ដីឡូត៍កម្ពុជា  ដឹកនាំដោយលោកឧកញ៉ាម៉ន  សុខា អមដំណើរដោយសមាជិក  សមាជិកាបាន​រៀបចំកម្មវិធី “ជួបសម្តែងការគួសម សំណេះសំណាល និងពិភាក្សាការងាជាមួយអភិបាល នៃគណៈអភិបាលស្រុកឧត្តុង្គ”ជាមួយលោកមួង ធីអភិបា​ល នៃគណៈអភិបាលស្រុកឧដុង្គ  ខេត្តកំពង់ស្ពឺ។

ក្នុងជំនួបសម្តែងការគួរសម និងសំណេះសំណាល និងនាំអំណោយមួយចំនួន ជូនលោកអភិបាលស្រុក ព្រមទាំងលោកអភិបាលរង និងមន្ត្រី ជំនាញ នៃសាលាស្រុកឧត្តុង្គ ដោយមានភ្ជាប់ជាមួយ នូវអំណោយសប្បុរសធម៌មួយចំនួនដូចជា អង្ករ  មី  ទឹកសុទ្ឋ  និងគ្រឿងឧបភោគ  បរិភោគមួយចំនួនទៀត ជូនរដ្ឋបាលស្រុកឧដុង្គ ដើម្បីចែកជូនប្រជាពលរដ្ឋដែលមានជីវភាពក្រីក្រ  និងប្រជាជនដែលរងគ្រោះមហន្តរាយផ្សេងៗទៀត។

ក្នុងឱកាសនោះ លោកឧកញ៉ា ម៉ន សុខា តំណាងឲ្យសមាគម បានបង្ហាញពីទស្សនវិស័យ  បេសកកម្ម របស់សមាគម អ្នកអភិវឌ្ឍន៍ ដីឡូត៍កម្ពុជានាពេលកន្លងមក  និងស្នើសុំកិច្ចសហការការសម្របសម្រួលនានា  ជូនដល់អ្នកវិនិយោគ អ្នកអភិវឌ្ឍន៍អចលនវត្ថុ  ដូចជា បច្ចេកទេសផ្លូវច្បាប់ សន្តិ​សុខ និងសំណូមពរមួយចំនួនទៀតជូនដល់លោកអភិបាល។

ជាមួយគ្នានេះដែរ  លោក មួង ធី  អភិបាលនៃគណៈអភិបាលស្រុកឧដុង្គ បានសម្ដែងក្ដីស្វាគមន៍ និងសាទរ ចំពោះបេសកកម្មរបស់សមាគម  ហើយទទួលយកសំណើរផ្សេងៗ  ព្រមទាំងផ្ដល់កិច្ចសហប្រតិបត្តិការជាមួ​យសមាគម និងលើកទឹកចិត្តឲ្យសមាគមអ្នកអភិវឌ្ឍន៍ដីឡូត៍កម្ពុជា ខិតខំប្រឹងប្រែងបំពេញ បេសកកម្មការងាររបស់ខ្លួនបន្តទៀត ដើម្បីរួមចំណែកជួយដល់ការអភិវឌ្ឍនៅក្នុងស្រុកឧដុង្គ  និងប្រទេសជាតិបន្តទៀត៕