ដោយៈ សុផារី

កំពតៈ ក្រោយពីរាជរដ្ឋាភិបាលកម្ពុជា បានប្រកាសបើកដំណើរការប្រទេសលើគ្រប់វិស័យចាប់ពីថ្ងៃទី១ ខែវិច្ឆិកាមក ដីធ្លីក្នុងក្រុងកំពតនៅតែបន្តសកម្មភាពលក់ទិញជាហូរហែ ជាពិសេសការវិនិយោគលើវិស័យទេសចរណ៍និងលំនៅដ្ឋាន។

លោក Cooler Tan អគ្គនាយកក្រុមហ៊ុនភ្នាក់ងារអចលនទ្រព្យ Youngsia Real Estate បានប្រាប់ Property Area Asia នារសៀលថ្ងៃទី៤ វិច្ឆិកាថា ទោះជាមិនមានកូវីដ១៩ តម្លៃដីធ្លីនៅតែបន្តកើនឡើង ពីមួយខែទៅមួយខែកើនឡើងរហូត មិនចាំបាច់ទាល់​តែមានការប្រកាសបើកប្រទេសនោះទេ។ ជាពិសេស ការបើកប្រទេសឡើងវិញកាន់តែធ្វើឱ្យតម្លៃដីធ្លីក្នុងខេត្តកំពត កាន់តែមានប្រជាប្រិយភាពកើនឡើង និងអាចទាក់ទាញវិនិយោគិនក្នុងស្រុកនិងអន្តរជាតិកាន់តែច្រើនថែមទៀត។

លោកបានមានប្រសាសន៍ថា “កាលពីមុនតម្លៃឡើងតិចៗ ឥលូវនេះក្រោយបើកប្រទេសហើយ ខ្ញុំជឿថាតម្លៃនឹងកើនឡើងកាន់តែឡើង ហើយកាន់តែលឿនជាងមុនទៀត”។

លោកបានបញ្ជាក់អំពីតម្លៃដីធ្លីក្នុងក្រុងជាប់ផ្លូវជាតិ មានតម្លៃចាប់ពី៨០ ដល់១០០ ដុល្លារក្នុងមួយម៉ែត្រការ៉េ។ សម្រាប់ដីជាប់ផ្លូវលំតូចៗ មានតម្លៃពី២០ ដល់៦០ ដុល្លារក្នុងមួយម៉ែត្រការ៉េ។ សម្រាប់អ្នកវិនិយោគទិញដីទុកចំណេញ លោកបានណែនាំ៣ តំបន់ដែលមានសក្តានុពលសម្រាប់ថ្ងៃអនាគត ដូចជា ទី១ តំបន់ជាយក្រុងដែលមានផែនការអភិវឌ្ឍន៍របស់រាជរដ្ឋាភិបាល ដូចជា កំពង់ផែទេសចរណ៍។ លោកថា តំបន់នេះនឹងក្លាយជាតំបន់មានសក្តានុពលទេសចរណ៍ខ្លាំង នៅថ្ងៃអនាគត។

ទី២ តំបន់ផ្លូវជាតិលេខ៣ ពីផ្សារកំពតមកភ្នំពេញវិញ ដោយជ្រើសរើសតំបន់ចាប់ពី១៥ គីឡូម៉ែត្រពីផ្សារកំពត។ និងតំបន់ទី៣ តំបន់ផ្លូវជាតិលេខ៣ ចាប់ពីផ្សារកំពតទៅកាន់ភ្នំបូកគោ ចាប់ពី២០ គីឡូម៉ែត្រពីផ្សារកំពត។

សម្រាប់វិនិយោគិន ដែលមកវិនិយោគនៅក្នុងខេត្តកំពត ភាគច្រើនជាវិនិយោគិនក្នុងស្រុកដែលមកវិនិយោគលើវិស័យទេសចរណ៍ ផ្ទះសំណាក់ បឹងកាឡូ រីសត ជាដើម។ ចំណែកវិនិយោគិនបរទេស ភាគច្រើនចូលមកវិនិយោគ ដោយទិញដីទុកចំណេញតែប៉ុណ្ណោះ។ លោកថា កំពតត្រូវការរយៈពេលពី៣ ទៅ ៥ ឆ្នាំ ក្នុងការអភិវឌ្ឍខ្លាំង ហើយវិនិយោគិនបរទេសនឹងធ្វើការអភិវឌ្ឍលើដីដែលគាត់បានទិញ។

ចំណែកលោកសុខ គែន អគ្គនាយកនិងជាស្ថាបនិកនៃក្រុមហ៊ុនអចលនទ្រព្យ Kompot Street Real Estate Co.,Ltd បានមានប្រសាសន៍ថា ចរន្តនៃការលក់ទិញហូរហែរ ទោះបីមិនទាន់មានការបើកប្រទេស និងស្ថិតក្នុងស្ថានភាពកូវីដ១៩ក៏ដោយ។ លោកក៏បានកត់សម្គាល់ឃើញថា បើទោះបីជាចរន្តនៃការលក់ទិញដីធ្លី ក្នុងកំពតមិនមានសន្ទុះខ្លាំងក៏ដោយ ក៏នៅតែមានចរន្តថេរដែរ។

លោកថា អ្នកវិនិយោគភាគច្រើន នឹងទទួលបានមកពីភ្ញៀវក្នុងស្រុក ជាពិសេសមកពីភ្នំពេញដើមឬមកពីខេត្តព្រះសីហនុជាដើម។ សម្រាប់វិនិយោគបរទេស លោកថា “ជារឿងធម្មតាទេ ដែលរាជរដ្ឋាភិបាលប្រកាសបើកប្រទេស និងអនុញ្ញាតិឱ្យវិនិយោគិនបរទេ​សចូលមក ជាពិសេសក្នុងខេត្តកំពត ដែលកន្លងមកភាគច្រើនបានទទួលការវិនិយោគពីវិនិយោគិនប៉ែកអ៊ឺរ៉ុប លើកវិស័យទេសចរណ៍ រីសត អូតែល កំសាន្តជាដើម”។

លោកសុខ គែន ក៏ធ្លាប់បានបញ្ជាក់ពីតម្លៃដីធ្លីក្នុងក្រុងកំពតថា ដីដែលនៅជំនៀជើងភ្នំបូកគោ មានតម្លៃចន្លោះ២៥ ដុល្លារក្នុងមួយម៉ែត្រការ៉េ។ សម្រាប់ដីនៅក្បែរមាត់ព្រែកឬជាប់ក្រុង ម្ដុំបរិវេណស្ពានថ្មីព្រែកកំពត និងដីក្នុងកាំរង្វង់កន្លះគីឡូម៉ែត្រជុំវិញក្រុងមានតម្លៃប្រហែល៩០០ ដុល្លារក្នុងមួយម៉ែត្រការ៉េ។ ដោយឡែក សម្រាប់ដីធ្វើកសិកម្មវិញ យើងអាចរកទិញបានក្នុងតម្លៃសមរម្យ ប្រហែល២ដុល្លារក្នុងមួយម៉ែត្រការ៉េ ក្នុងរយៈចម្ងាយ២៥ ទៅ ៣០ គីឡូម៉ែត្រពីក្រុងកំពតទៅកាន់ស្រុកទឹកឈូ។

លោកបានបន្តថា ចំណែកដីនៅតាមផ្លូវជាតិសំខាន់ៗ ដូចជា ផ្លូវជាតិលេខ៣ ក្នុងកាំរង្វង់៣គីឡូម៉ែត្រពីក្រុងកំពត គេក៏សង្កេតឃើញមានការឡើងច្រើនដែរ ជាពិសេសសម្រា​ប់ការអភិវឌ្ឍគម្រោងលំនៅដ្ឋាន ចាប់ពីផ្សារកំពតមកកាន់ផ្លូវជាតិ តម្លៃចន្លោះពី ១៨០ ទៅ ២០០ ដុល្លារក្នុងមួយគីឡូម៉ែត្រការ៉េ៕

ដោយៈ វឌ្ឍនៈ

ភ្នំពេញៈ សកម្មភាពវិនិយោគនៅក្នុងប្រទេសកម្ពុជា លើវិស័យអចលនទ្រព្យក៏ដូចជាវិស័យជាច្រើនទៀត រំពឹងថានឹងមានកំណើនឡើងវិញ បន្ទាប់ពីរាជរដ្ឋាភិបាលបានប្រកាសបើកប្រទេស និងអនុញ្ញាតឱ្យជនបរទេស អាចចូលមកបណ្ដាក់ទុនវិនិយោគឡើងវិញបាន។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានលើកឡើង នៅក្នុងសន្និសីទសារព័ត៌មាននាព្រឹកថ្ងៃទី៣ វិច្ឆិកាកន្លងមកថា សម្រាប់ឆ្នាំ២០២១នេះ ដោយសារតែចុងឆ្នាំហើយ ដូច្នេះយើងមិនទាន់រំពឹងថា វិនិយោគិនបរទេសនឹងចូលមកបណ្ដាក់ទុនវិនិយោគនៅកម្ពុជាច្រើននោះទេ ប៉ុន្តែនៅដើមឆ្នាំ២០២២ខាងមុខ លោករំពឹងថា វិនិយោគិនបរទេសដែលចូលមកវិនិយោគ នៅក្នុងប្រទេសអាចមានប្រមា​ណពី៣០ ភាគរយទៅ៤០ភាគរយ នៃវិនិយោគិនដែលមានមុនវិបត្តិកូវីដ១៩ ។

លោកបន្តថា សម្រាប់វិនិយោគិនក្នុងស្រុក ដែលមានដើមទុនច្រើនអាចត្រៀមខ្លួនទទួលផល ពីវត្តមានវិនិយោគិនបរទេសចូលមកកម្ពុជាឡើងវិញ ដោយអាចទិញដីនៅជាយៗរាជធានីភ្នំពេញ ដូចជានៅផ្លូវ៥១ ដីជាប់ផ្លូវក្រវ៉ាត់ក្រុង និងដីនៅម្ដុំភ្នំពេញថ្មីជាដើម ។

លោកបន្តថា “អ្នកមានលុយច្រើន អាចទិញទុកតែមួយរយៈពេលខ្លីប៉ុណ្ណោះនឹងទទួលបានប្រាក់ចំនេញត្រលប់មកវិញហើយ”។លោកបន្តទៀតថា “សម្រាប់អ្នកដែលមានដើមទុនតិចតួច អាចទិញនៅតាមបណ្ដាខេត្តសក្ដានុល ដូចនៅខេត្តកំពង់ស្ពឺ នៅតាមផ្នែកខ្លះនៃក្រវ៉ាត់ក្រុងទី៤ ដូចជា ខេត្តកណ្ដាល ខេត្តតាកែវ ដើម្បីទុកធ្វើការអភិវឌ្ឍរយៈពេលយូរ”។

សម្រាប់អ្នកដែលមិនមានហិរញ្ញវត្ថុផ្ទាល់ខ្លួន ដោយយកទុនពីប្រភពផ្សេងដូចជាធនាគារជាដើម អាចយកទៅវិនិយោគលើផ្ទះឬក៏ខុនដូ ពីព្រោះថាអចលនទ្រព្យទាំងនេះ អាចរកចំណូលត្រលប់មកវិញ ពីការជួលឱ្យអ្នកដទៃស្នាក់នៅបាន ហើយជនបរទេសគឺចូលចិត្តស្នាក់នៅក្នុងខុនដូណាស់ គេមិនសូវចូលចិត្តស្នាក់នៅផ្ទះជាប់ដៃនោះទេ ។

ជាមួយគ្នានេះអ្នកនាងគឹម គិនកេសាអ្នកគ្រប់គ្រងជាន់ខ្ពស់ នៃក្រុមហ៊ុនអចលនទ្រព្យ CBRE បានលើកឡើងផងដែរថា សម្រាប់ឆ្នាំ២០២១ ចំនួនជនបរទេសចូលមកវិនិយោគនៅក្នុងប្រទេសកម្ពុជា អាចនឹងមានតិចតួបប៉ុណ្ណោះ ដោយសារតែស្ថានភាពកូវីដ១៩នៅមិនទាន់ធូរស្រាលខ្លាំង ប៉ុន្តែសម្រាប់ឆ្នាំ២០២២ខាងមុខ អ្នកនាងជឿថាវិនិយោគិនបរទេស នឹងចូលមកបណ្ដាក់ទុនវិនិយោគ នៅក្នុងប្រទេសកម្ពុជាឡើងវិញជាក់ជាមិនខានជាពិ សេសទៅលើគម្រោងអភិវឌ្ឍន៍ខុនដូ ។

អ្នកជំនាញ និងអ្នកវិនិយោគវិស័យអចលនទ្រព្យនៅកម្ពុជា ហាក់មានសុទិដ្ឋិនិយមខ្ពស់ ចំពោះការវិលត្រលប់របស់វិនិយោគិនបរទេស ចូលមកកម្ពុជាជាពិសេសវិនិយោគិនជនជាតិចិន ក្នុងនោះដែរ លោកបណ្ឌិតគី សេរីវឌ្ឍន៍អ្នកវិភាគសេដ្ឋកិច្ចកម្ពុជាមួយរូបបានថ្លែងប្រាប់អ្នកសារព័ត៌មានក្នុងស្រុកថា ៥ឆ្នាំទៅមុខទៀត គ្មានវិនិយោគិនបរទេសណាដណ្ដើមតំណែងវិនិយោគិនចិននៅកម្ពុជា ដែលជាវិនិយោគិនលំដាប់ទី១នោះទេ៕

ដោយៈ ស៊ីវ ម៉េង

ភ្នំពេញៈ ប្រធានសមាគមអចលនទ្រព្យអាស៊ាន លោកច្រឹក សុខនីមបានមានប្រ​សាសន៍ថា ក្រុមអ្នកជំនាញអចលនទ្រព្យអាស៊ាន កំពុងមានសុទិដ្ឋិនិយមអំពីទីផ្សារអច​លនទ្រព្យនឹងងើបឡើងវិញ នៅអំឡុងឆ្នាំ២០២២ខាងមុខនេះ។

លោកបានមានប្រសាសន៍ឲ្យដឹងតាមបណ្តាញតេឡេក្រាម កាលពីថ្ងៃទី៤ វិច្ឆិកាកន្លងមកថា តាមការលើកឡើងរបស់អ្នកជំនាញ ក្នុងតំបន់នេះបានអះអាងថា តម្លៃអចល​នទ្រព្យនៅតំបន់នេះ មិនមានការធ្លាក់ចុះនោះទេ អំឡុងវិបត្តិកួវីដរយៈពេល២ឆ្នាំកន្លងមកនេះ ប៉ុន្តែចរន្តនៃការទិញលក់មានការធ្លាក់ចុះ។

លោកបន្តថា “ការទិញ លក់ធ្លាក់ចុះដូចនៅកម្ពុជាដែរ ដោយសារការព្រួយបារម្ភទាក់ទងនឹងជំងឺកូវីដ១៩”។លោកបន្តថា “អ្នកជំនាញអាស៊ានបានបង្ហាញសុទិដ្ឋិនិយមដូចគ្នាថា នៅឆ្នាំ២០២២ និងឆ្នាំ២០២៣វិស័យនេះ នឹងងើបឡើងវិញនិងជាពេលវេលា សម្រាប់ការចាប់ផ្តើមឡើងវិញ”។

លោកច្រឹក សុខនីមបានបន្តថា អ្នកជំនាញក្នុងវិស័យនេះ មកពីបណ្តាប្រទេសក្នុងតំបន់ក៏បានឲ្យដឹងក្នុងសន្និសីទសារព៌តមានផងដែរថា ទីផ្សារអចលនទ្រព្យក្នុងតំបន់នេះ នឹងឈានទៅរកភាពល្អប្រសើរ នៅឆ្នាំ២០២២ និងឆ្នាំ២០២៣ខាងមុខនេះ បន្ទាប់ពីវិស័យនេះបានរងវិបត្តិដោយសារជំងឺកូវីដ១៩។

ទាក់ទងនឹងស្ថានភាពនៅកម្ពុជា អ្នកឧកញ៉ាលី ហួរប្រធានសមាគមអ្នកអភិវឌ្ឈន៍លំនៅដ្ឋានកម្ពុជា បានមានប្រសាសន៍ឲ្យដឹងកាលពីដើមសប្តាហ៍នេះផងដែរថា ការបើក​ប្រទេសឡើងវិញរបស់រដ្ឋាភិបាល នឹងជាឱកាសមាសសម្រាប់ការចាប់ផ្តើមឡើងវិញនូវ​សកម្មភាពសេដ្ឋកិច្ច ដែលវិស័យអចលនទ្រព្យនឹងមានការរីកចម្រើនឡើងវិញ ជាបន្តបន្ទាប់នៅពេលឆាប់ៗខាងមុខនេះ ស្របពេលវិស័យនេះ នឹងបន្តរីកចម្រើនរយៈពេលវែង​បន្ថែមទៀតនាពេលអនាគត៕

ដោយៈគង់ សិរីជេស៊ីកា

ភ្នំពេញៈ មន្រ្តីជាន់ខ្ពស់ក្រសួងសាធារណៈការបានថ្លែងថា បច្ចុប្បន្នអ្នកជំនាញការកម្ពុជា និងកូរ៉េកំពុងសិក្សាបឋម ដើម្បីឈានទៅសាងសង់ស្ពានជ្រោយចង្វារ ស្វាយជ្រុំនាពេលខាងមុខនេះ។

អ្នកនាំពាក្យនិងជាអនុរដ្ឋលេខាធិការក្រសួងសាធារណៈការ និងដឹកជញ្ជូន លោកវ៉ាស៊ីម សូរិយាបានមានប្រសាសន៍ឲ្យដឹងតាមទូរស័ព្ទ កាលពីរសៀលថ្ងៃទី៤ វិច្ឆកាកន្លងមកថា ក្រុមការងារជំនាញកំពុងសិក្សាមូលដ្ឋានបឋម ដើម្បីជ្រើសរើសទីតាំងស្ពាន និងទំហំចំណាយសម្រាប់ការសាងសង់ស្ពាននេះ ដែលការសិក្សានេះអាចចំណាយរយៈពេលចន្លោះពី១៦ទៅ១៨ខែ។

លោកបន្តថា “បន្ទាប់ពីការសិក្សាចប់ ទើបការសិក្សាកម្រិតធំចាប់ផ្តើម ហេតុនេះការ​សាងសង់ស្ពាននេះនាពេលណា មិនទាន់អាចកំណត់ជាក់លាក់នៅឡើយទេ”។លោក​បន្តថា “ទោះជាយ៉ាងណាក្រុមការងារជំនាញ បាននិងកំពុងធ្វើការងារនេះយ៉ាងសកម្មហើយ”។

លោកវ៉ាស៊ីម សូរិយាធ្លាប់បានមានប្រសាសន៍ឲ្យដឹង នាពេលកន្លងមកផងដែរថា ការសិក្សាសាងសង់ស្ពាននិមួយៗ ត្រូវការលំអិតច្រើនទាក់ទងលំហូរទឹក ទាក់ទងបញ្ហាបរិស្ថាន ទាក់ទងនឹងការងារបច្ចេកទេសជាច្រើនទៀត ហេតុនេះការសាងសង់គម្រោងនិមួយៗយឺតឬលឿនអាស្រ័យលើការសិក្សា និងលក្ខខ័ណ្ឌនៃការចចាប្រាក់កម្ចីពីប្រទេសជាដៃគូផងដែរ។

កាលពីពេលថ្មីៗនេះ ក្រសួងសេដ្ឋកិច្ចបានបញ្ចេញរបាយការណ៍មួយ ទាក់ទងនឹងលទ្ឋភាពរបស់រដ្ឋាភិបាល ផែនមានផែនការខ្ចីប្រាក់ ពីដៃគូអភិវឌ្ឍចំនួន១៦០០លាន USD ដើម្បីវិនិយោគលើវិស៧យសំខាន់ៗជាច្រើន ដោយរួមបញ្ចួលនូវផែនការហេដ្ឋារចនាសម្ព័ន្ឋចំនួន៦ ក្នុងនោះក៏មានគំរោងសាងសង់ស្ពាន តភ្ជាប់តំបន់ជ្រោយចង្វារ និងស្វាយជ្រុំផងដែរ៕