រដ្ឋាភិបាល​កំណត់​មណ្ឌលគិរី ជាតំបន់​ប៉ូលសេដ្ឋកិច្ចទី៤ ក្រោម​ផែនការអភិវឌ្ឍន៍ ៦ចំណុច

ដោយ៖ សុធារី

មណ្ឌលគិរី៖ ​​ការអនុវត្តន៍សកម្មភាពប្លង់មេសម្រាប់អភិវឌ្ឍន៍ខេត្តមណ្ឌលគិរីនឹងជួយឱ្យខេត្តមណ្ឌលគិរីក្លាយជាខេត្ត ដែលលេចធ្លោលើវិស័យកសិឧស្សាហកម្មនិងទេសចរណ៍ តាមរយៈ​យុទ្ធសាស្ត្រសំខាន់ៗ ចំនួន៦ចំណុច​របស់​រាជរដ្ឋាភិបាល ​និង​កំណត់យកខេត្តមណ្ឌលគិរី ជាតំបន់ប៉ូលសេដ្ឋកិច្ចទី៤។

នេះ​បើតាម​ប្រសាសន៍របស់​លោក ថង សាវុន អភិបាលខេត្តមណ្ឌលគិរី នៅ​ក្នុង​ពិធីប្រកាសចូលកាន់មុខដំណែងប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តមណ្ឌលគិរី កាលពីថ្ងៃទី​៦ ខែមករា ឆ្នាំ២០២២នេះ។

លោក​បានបញ្ជាក់ថា ការអនុវត្តន៍សកម្មភាពប្លង់មេ សម្រាប់អភិវឌ្ឍន៍ខេត្តមណ្ឌលគិរី បន្ទាប់ពីខេត្តសៀមរាប នឹងជួយឱ្យ​ខេត្តមណ្ឌលគិរីក្លាយជាខេត្ត ដែលលេចធ្លោលលើវិស័យ​កសិឧស្សាហកម្មនិងទេសចរណ៍។ ប៉ុន្តែការអភិវឌ្ឍន៍នឹងជួបបញ្ហាបន្តិចបន្តួច ដល់ផលប្រយោជន៍ប្រជាពលរដ្ឋ ដោយការពង្រីកផ្លូវ សួនច្បារ និងហេដ្ឋារចនាសម្ព័ន្ធដទៃទៀត។

លោកអភិបាលខេត្ត បន្តថា ខេត្តមណ្ឌលគិរី ត្រូវបានកំណត់ដោយរាជរដ្ឋាភិបាល ជាអាទិ៍ភាពសំខាន់ៗ ចំនួន៦ ជាការរក្សាការអភិវឌ្ឍន៍ រួមមាន ១-តំបន់របៀងអេកូទេសចរណ៍ និងទេសចរណ៍ធម្មជាតិ ក្នុងដែនជម្រកសត្វព្រៃទាំង៥ ទី២-តំបន់របៀងទេសចរណ៍វប្បធម៌ ៣-ក្រុងសែនមនោរម្យ ដែលជាមជ្ឈមណ្ឌលពាណិជ្ជកម្ម និងទេសចរណ៍ ៤-តំបន់ស្រុកអូររាំងអភិវឌ្ឍន៍ព្រលានយន្តហោះ ៥-តំបន់ប្រជុំជនស្រុកកោះញែក ​៦-តំបន់ទេសចរណ៍សមាហរណកម្មតាមព្រំដែន៕

កំពង់ផែទេសចរណ៍កោះទន្សាយសម្រេចការសាងសង់១០០% គ្រោងសម្ពោធនាចុងខែក្រោយ

ដោយ៖ សុធារី

កែប៖ ក្រោយពីដំណើរការសាងសង់ ដោយក្រសួងសាធារណៈការ និងដឹកជញ្ជូន អស់រយៈពេល ឆ្នាំគត់ កំពង់ផែទេសចរណ៍កោះទន្សាយសម្រេចការសាងសង់ជាស្ថាពររួចរាល់១០០%ហើយ ដែលគ្រោងនឹងសម្ពោធដាក់អោយប្រើប្រាស់ នាចុងខែមករា ឆ្នាំ២០២២ នេះ។

លោក សោម ពិសិដ្ឋ អភិបាលខេត្តកែប មានប្រសាសន៍កាលពីពេលកន្លងទៅថា គម្រោងសាងសង់កំពង់ផែទេសចរណ៍កោះទន្សាយនេះ សម្រាប់ត្រៀមបម្រើដល់វិស័យទេសចរណ៍ ដែលមានលទ្ធភាពអាចទទួលចតនាវាផ្ទុកអ្នកដំណើរបានក្រោម៣០០នាក់ ចំពោះទំនិញផ្សេងៗ អាចដឹកបាន មិនលើសពី ១៥តោននោះទេ ហើយនេះគឺជាការពង្រីកសក្តានុពលវិស័យទេសចរណ៍ និងសេដ្ឋកិច្ច របស់ខេត្តកែបតាមរយៈផ្លូវទឹកទ្វេភាគី ជាមួយប្រទេសក្នុងតំបន់ ដែលផែនេះអាចឈានទៅដល់ទទួលភ្ញៀវកម្រិតថ្នាក់អន្តរជាតិផងដែរសម្រាប់ថ្ងៃអនាគត។

លោក លីប ជាង វិស្វករសាងសង់គម្រោងកំពង់ផែកោះទន្សាយនេះ បានអោយដឹងនារសៀល ថ្ងៃទី៤ ខែមករា ឆ្នាំ២០២២នេះថា ការអភិវឌ្ឍន៍សាងសង់កំពង់ផែទេសចរណ៍ (កោះទន្សាយ) នេះ អនុវត្តន៍តាមបទដ្ឋានកម្រិតកំណត់បច្ចេកទេសសំណង់សាធារណការ របស់ក្រសួងសាធារណការ និងដឹកជញ្ជូន។

លោកបន្ថែមថា ក្នុងនោះយើងបានសាងសង់ផ្លូវបេតុងសរសៃដែក អគារលក់សំបុត្រព្រមទាំងរង់ចាំ បន្ថែមពីនោះមានស្ពានចូលផែ តួផែដែលមានរាងស្នូកក្តាម និងដៃផែចំនួន៤ មានតូច២ ធំ២។ ហើយទីតាំងផែដែលទើបសាងសង់រួចនេះ ស្ថិតនៅកំពង់ផែចាស់ (កោះទន្សាយ) ក្រុងកែប ខេត្តកែប ដែលយើងបានប្រើរយៈពេលសាងសង់ ២៤ខែ ដោយគិតចាប់ពីថ្ងៃបើកការដ្ឋានថ្ងៃទី១២ ខែធ្នូ ឆ្នាំ២០១៩ រហូតដល់ ថ្ងៃទី២៧ ខែធ្នូ ឆ្នាំ២០២១។

កំពង់ផែទេសចរណ៍ កោះទន្សាយនេះ ចំណាយថវិការក្នុងការសាងសង់ប្រមាណជិត ៥ពាន់លានរៀល ស្ថិតក្នុងភូមិកែប សង្កាត់កែប ក្រុងកែប ខេត្តកែប ដែលមានសណ្ឋានជារូប ក្តាម ចម្ងាយពីដីគោកចូលទៅក្នុងសមុទ្រប្រមាណ ៣០៦ម៉ែត្រ ទទឹង ៦៨ម៉ែត្រ មានផ្ទៃក្រឡាសរុបប្រមាណជាង ៤ពាន់ម៉ែត្រការ៉េ (៤៦៦១,៥០ម៉ែត្រការ៉េ)៕

ការវិនិយោគដីឡូត៏នៅផ្លូវ៥១ ត្រូវបានរំពឹងថានឹងមានកំណើនសកម្មភាពឡើងវិញក្នុងឆ្នាំនេះ

ដោយ៖ វឌ្ឍនៈ

ភ្នំពេញ ៖ ផ្លូវជាតិលេខ៥១ជា​តំបន់ដែល​មាន​សក្តានុពល​យ៉ាងខ្លាំង​ ក្នុងវិស័យអចលនទ្រព្យ ជាពិសេសគឺវិស័យដីធ្លី។ ទោះ​មានការថមថយបន្តិចបន្តួចនៅក្នុងឆ្នាំ២០២១ ប៉ុន្តែនៅដើមឆ្នាំ២០២២កន្លងទៅនេះ អាជីវកកម្មដីឡូតិ៍​នៅតំបន់ផ្លូវ៥១ ត្រូវ​បាន​មើលឃើញថា នឹងមានសកម្មភាពកើនឡើងវិញ។

បើតាមអ្នកជំនាញនៃវិស័យអចលនទ្រព្យជាច្រើនបានបង្ហាញទស្សនស្រដៀងគ្នាថា អាជីវកម្មដីឡូត៏នៅតែមានសក្ដានុពលនិងតម្រូវការសម្រាប់ប្រជាពលរដ្ឋដែលមានប្រាក់ចំណូលទាបនិងមធ្យម ពីព្រោះថាអ្នកដែលមានប្រាក់ចំណូលទាបមិនមានលទ្ធភាពក្នុងការទិញផ្ទះសម្រាប់ស្នាក់នៅទេ តែពួកគេអាចទិញជាដីឡូត៏រួចហើយសន្សំលុយសង់ផ្ទះនៅពេលក្រោយ។

លោក អ៊ឹង ប៊ុនហួត ប្រធានផ្នែកទីផ្សារនិងភ្នាក់ងារលក់របស់ក្រុមហ៊ុន PIXIU Property បានឱ្យដឹងថានៅដើមឆ្នាំ២០២២នេះ លោកមានសុទិដ្ឋិនិយមខ្ពស់ចំពោះការអភិវឌ្ឍនៅតំបន់ផ្លូវ៥១ ជាពិសេសវានឹងមានការអភិវឌ្ឍទៅលើលំនៅឋានជាបុរីសម្រាប់ផ្គត់ផ្គង់ជូនពលរដ្ឋដែលនឹងផ្លាស់ទៅរស់នៅតំបន់នោះ ជាបន្តបន្ទាប់ខណៈគម្រោងរោងចក្រជាច្រើនក៏បាននិងកំពុងលេចរូបរាងជាបន្តបន្ទាប់ផងដែរ។

លោកបន្តថា សម្រាប់អាជីវកម្មដីឡូត៏នៅតំបន់ផ្លូវ៥១នេះ នឹងមានកំណើនសកម្មភាពឡើងវិញ ការទិញលក់នឹងមានសន្ទុះជាងឆ្នាំ២០២០និង២០២១ ហើយប្រជាពលរដ្ឋដែលទិញដីឡូត៏នៅតំបន់នោះ ក៏នឹងចាប់ផ្ដើមសាងសង់ផ្ទះជាបន្តបន្ទាប់ផងដែរ ជាមួយនឹងក្រុមហ៊ុនអភិវឌ្ឍន៍លំនៅឋានជាច្រើនទៀតក៏បញ្ចេញសកម្មភាព វិនិយោគរបស់ខ្លួនដែរ។

អ្នកវិនិយោគលំនៅឋានជាច្រើនទៀតក៏បានបង្ហាញថា តំបន់ផ្លូវ៥១ជាតំបន់ដែលមានសក្ដានុពលខ្ពស់នៅពេលអនាគត ខណៈបច្ចុប្បន្ននេះ វាបានបញ្ចេញសកម្មភាពអភិវឌ្ឍន៍ជាបណ្ដើរៗហើយ ដូច្នេះមិនយូរទៀតទេ វានឹងក្លាយជាតំបន់មមាញឹកទៅលើឧស្សាហកម្មហើយនិងមានប្រជាពលរដ្ឋទៅរស់នៅកាន់តែច្រើនឡើងៗ៕

បច្ចេកវិទ្យាឌីជីថលបាននិងកំពុងដើរតួនាទីសំខាន់ក្នុងការវាយតម្លៃអចលនទ្រព្យ

ដោយ៖ វឌ្ឍនៈ

ភ្នំពេញ ៖ វិស័យអចលនទ្រព្យបាននិងកំពុងធ្វើបច្ចុប្បន្នភាពកាន់តែទំនើបបន្តិចម្ដងៗ ដើម្បីឱ្យវិស័យនេះ កាន់តែរួមចំណែកធំឡើងក្នុងសេដ្ឋកិច្ច ជាក់ស្ដែងអ្នកប្រឡូកក្នុងវិស័យនេះ បាននិងកំពុងប្រើប្រាស់បច្ចេកវិទ្យា (Technology) ក្នុងគោលដៅជំរុញវិស័យមួយនេះ កាន់តែមានស្តង់ដារក្នុងការប្រកួតប្រជែងជាមួយប្រទេសក្នុងតំបន់។

លោក សន សៀប នាយកប្រតិបត្តិក្រុមហ៊ុនអចលទ្រព្យឃី រៀលអ៊ីស្ទេត បានឱ្យដឹងថា ការវាយតម្លៃអចលនទ្រព្យចាំបាច់ណាស់ត្រូវការឯកសារយោង ហើយទិន្នន័យនេះ ត្រូវការធ្វើបច្ចុប្បន្ន និងផ្ទៀងផ្ទាត់ត្រឹមត្រូវច្បាស់លាស់។ ការវាយតម្លៃយើងត្រូវលើជំនាញ ហើយបើសិនជាយើងគ្រាន់តែមើលឱ្យដឹងពីតម្លៃ យើងក៏មិនបាច់ត្រូវការអ្នកជំនាញខ្លាំងនោះដែរ។ ក្នុងនោះបើសិនជាអចលនទ្រព្យនោះជាប្រភេទអចលនទ្រព្យធម្មតា រឹតតែមិនត្រូវការជំនាញខ្លាំងនោះដែរ ប៉ុន្តែបើសិនជាយើងត្រូវការវាយតម្លៃអចលនទ្រព្យខ្នាតធំ គឺយើងក៏ត្រូវការជំនាញខ្លាំងពូកែ។

លោកបន្តថា អ្នកវាយតម្លៃត្រូវការមានចំណេះដឹងប្លែកៗថ្មីៗពីមួយឆ្នាំទៅមួយឆ្នាំ ហើយបច្ចុប្បន្ននេះ តិចណូឡូជីបានតួនាទីយ៉ាងសំខាន់ក្នុងការវាយតម្លៃអចលនទ្រព្យ ជាក់ស្ដែងនៅពេលចុះទៅមើលទីតាំង បើសិនជាគ្មានតិចណូឡូជីទេ វានឹងចំណាយពេលយូរដើម្បីរកទីតាំងនោះនិងក៏មានផលលំបាកនៅពេលអ្នកវាយតម្លៃប្រមូលទិន្នន័យដែរ។ លោកថា ”តិចណូឡូជីបានសម្រួលដល់ការងាររបស់អ្នកវាយតម្លៃបានច្រើនជ្រើននិងងាយស្រួលក្នុងការប្រមូលទិន្នន័យ និងអាចបញ្ជូនទិន្នន័យទៅកាន់ការិយាល័យអ្នកវាយតម្លៃបានលឿននិងវាយតម្លៃបានភ្លាមៗ” ។

លោកឧកញ៉ា ចេង ខេង អគ្គនាយកក្រុមហ៊ុនស៊ីភីអិលបានឱ្យដឹថា ប្រព័ន្ធបច្ចេកវិទ្យាបានជួយអ្នកវាយតម្លៃ អាចធ្វើការវាយតម្លៃបានសុក្រិតនិងស្តង់ដារ និងអាចផ្ទុកទិន្នន័យបានច្រើនដោយមិនស្មុគ្រស្មាញ។ ហើយដើម្បីឱ្យកាន់តែសុក្រិតជាងនេះទៅទៀតនោះ ក្រុមហ៊ុននីមួយៗ គួរចុះទៅផ្ទាល់មើលផ្ទាល់ទើបវាយតម្លៃបានច្បាស់លាស់។

លោក គុយ វ៉ាត ប្រធានក្រុមប្រឹក្សាភិបាលក្រុមហ៊ុន VTrust ក៏បានលើកឡើងថា ប្រទេសជឿនលឿនភ្នាក់ងារអចលនទ្រព្យឬបុគ្គលិករបស់ក្រុមហ៊ុនអចលនទ្រព្យមិនបាច់ចូលការិយាល័យទេ គេអាចធ្វើការពីទីណាក៏បានដោយប្រើប្រព័ន្ធឌីជីថលនេះ តែសម្រាប់កម្ពុជាយើងត្រូវការពេលវេលាដើម្បីឱ្យទាន់គេ៕

S Korea’s Lotte Chemical to build US$3.9 billion petchem project in Indonesia

 

SEOUL: South Korea’s Lotte Chemical Corp said on Friday it plans to build a large-scale petrochemical complex in Indonesia worth US$3.9 billion in investment.

The project’s commercial production target is 2025, and is aiming to generate annual revenue of about US$2.06 billion, the company said in a statement.

The complex, which will also involve its subsidiary Lotte Chemical Titan, will be located in Banten province, and plans to annually produce 1 million tonnes of ethylene, 520,000 tonnes of propylene, 250,000 tons of polypropylene, as well as downstream products, Lotte Chemical said.

Lotte Chemical has signed a memorandum of understanding with Indonesian authorities, and entered into agreement with builders Lotte Engineering & Construction and Hyundai Engineering for the construction, it added.

Source: Reuters

ក្រុមហ៊ុនកូរ៉េ គ្រោងបោះទុនវិនិយោគជិត៤ពាន់លានដុល្លារ អភិវឌ្ឍនគម្រោងដ៏ធំមួយនៅឥណ្ឌូនេស៊ី

ដោយ៖ សុខុម

សេអ៊ូល៖ ក្រុមហ៊ុនកូរ៉េខាងត្បូង Lotte Chemical Corp បានប្រកាសនៅថ្ងៃសុក្រ ទី៧ ខែមករានេះថា ខ្លួនគ្រោងបោះទុនវិនិយោគរហូតដល់ទៅ៣,៩ពាន់លានដុល្លារអាមេរិក ដើម្បីសាងសង់រោងចក្រគីមីឥន្ធនៈដ៏ធំមួយនៅប្រទេសឥណ្ឌូនេស៊ី។ នេះបើយោងតាមការចុះផ្សាយរបស់សារព័ត៌មាន CNA។

ក្រុមហ៊ុនមួយនេះបានចេញសេចក្តីថ្លែងការណ៍ថា គោលដៅផលិតកម្មសម្រាប់ពាណិជ្ជកម្មនៃគម្រោងនេះគឹនៅឆ្នាំ២០២៥ ហើយមានបំណងបង្កើតប្រាក់ចំណូលប្រចាំឆ្នាំឱ្យបានប្រមាណ២,០៦ពាន់លានដុល្លារអាមេរិក។

ក្រុមហ៊ុន Lotte Chemical បានគូសបញ្ជាក់ថា រោងចក្រនេះនឹងមានទីតាំងស្ថិតនៅក្នុងខេត្តបានតេន (Banten) ប្រទេសឥណ្ឌូនេស៊ី ហើយមានគម្រោងផលិតអេទីឡែន (Ethylene) ឱ្យបាន១លានតោន ប្រូពីឡែន (Propylene) ឱ្យបាន៥២០.០០០តោន និងប៉ូលីប្រូពីឡែន (Polypropylene) ឱ្យបាន២៥០.០០០តោនក្នុងមួយឆ្នាំ ព្រមទាំងផលិតផលបន្ទាប់បន្សំផ្សេងៗទៀតដូចជាប្រេងម៉ាស៊ូតជាដើម។

ក្រុមហ៊ុន Lotte Chemical បានចុះអនុស្សរណៈនៃការយោគយល់គ្នា (MoU) ជាមួយអាជ្ញាធរឥណ្ឌូនេស៊ី ហើយបានចុះកិច្ចព្រមព្រៀងជាមួយក្រុមហ៊ុនសំណង់ Lotte Engineering & Construction និង Hyundai Engineering ដែលទទួលសាងសង់រោងចក្រនេះ៕

ក្រុមហ៊ុនមួយវិនិយោគសាងសង់ឃ្លាំងត្រជាក់ធំមួយក្នុងតំបន់កំពង់ផែស្វយ័តភ្នំពេញ

ដោយ៖ សុផារី

ភ្នំពេញ៖ កំពង់ផែស្វយ័តភ្នំពេញ និងក្រុមហ៊ុន KHMER COLD CHAIN COMPANY LIMITED បានចុះកិច្ចព្រមព្រៀង ស្តីពីការជួលដី និងការគ្រប់គ្រង ប្រតិបត្តិការឃ្លាំងត្រជាក់ នៅចំណតផែកុងតឺន័រ ក្នុងគោលបំណងផ្តល់សេវាកម្មផ្ទេរផ្ទុក និងស្តុកទំនិញត្រជាក់រយៈពេលវែង និងរយៈពេលខ្លី។

សេចក្ដីប្រកាសព័ត៌មានរបស់កំពង់ផែស្វយ័តភ្នំពេញ ដែលបានចុះផ្សាយនៅថ្ងៃទី០៦ ខែមករា ឆ្នាំ២០២២នេះថា បានបញ្ជាក់ថា កិច្ចព្រមព្រៀងនេះ មានរយៈពេល១៤ឆ្នាំ និង១១ខែ ដោយគិតចាប់ពីថ្ងៃទី៣០ ខែធ្នូ ឆ្នាំ២០២១ រហូតដល់ថ្ងៃទី២៩ ខែវិច្ឆិកា ឆ្នាំ២០៣៦។

ឃ្លាំងត្រជាក់របស់ក្រុមហ៊ុន KHMER COLD CHAIN COMPANY LIMITED “KCCC” នឹងសាងសង់លើផ្ទៃដីទំហំ១២៣៨០ម៉ែត្រការ៉េ ស្ថិតនៅចំណតផែកុងតឺន័រ LM១៧ របស់ កំពង់ផែស្វយ័តភ្នំពេញ នៅក្នុងភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល។

ក្រុមហ៊ុននឹងផ្តល់សេវាកម្មស្តុកទុកទំនិញ ត្រជាក់ តាមស្តង់ដារអន្តរជាតិ ទាំងការស្តុកទុកទំនិញ រយៈពេលវែង និងរយៈពេលខ្លី។ ក្រុមហ៊ុន ក៏មានសេវាកម្មផ្សេងទៀត ដូចជា សេវាកម្មធ្វើឱ្យត្រជាក់រហ័ស សេវាកម្មវេចខ្ចប់ និងដាក់ស្លាកសញ្ញា សេវាកម្មអនាម័យ និងភូតគាមអនាម័យ ការជ្រើសរើសនិងចែកចាយដោយផ្ទាល់តាមហាង។

ការប្រតិបត្តិការឃ្លាំងផ្ទេរផ្ទុកទំនិញត្រជាក់នេះ នឹងផ្តល់សេវាកម្មភ័ស្តុភារកម្ម ដែលអាចគ្រប់គ្រងសីតុណ្ណភាព Temperature Controlled Logistics (TCD) និងជួយចូលរួមលើកស្ទួយសេដ្ឋកិច្ចជាតិដូចជា ជួយផ្តល់ឱកាស ការងារដល់ប្រជាជននៅកម្ពុជា។

លើសពីនោះទៀត នឹងជំរុញឱ្យមានកំណើនកុងតឺន័រត្រជាក់បន្ថែមទៀត ឆ្លងកាត់កំពង់ផែស្វយ័តភ្នំពេញ ក៏ដូចជាជួយបំពេញតម្រូវការ របស់អ្នកប្រើប្រាស់ ជាពិសេសកសិករក្នុងតំបន់ កសិឧស្សាហកម្ម ក្រុមហ៊ុនកែច្នៃម្ហូបអាហារក្រុមហ៊ុនឱសថ និងអាជីវកម្មបដិសណ្ឋារកិច្ច រួមមាន សណ្ឋាគារ/ភោជនីយដ្ឋាន៕

អគារមន្ទីរពេទ្យតេជោ សែន កោះធំ ត្រូវបានរៀបចំពិធីក្រុងពាលីបុកគ្រឹះសាងសង់ហើយ

ដោយ៖សុផារី

កណ្តាល៖ គម្រោងសាងសង់អគារមន្ទីរពេទ្យតេជោ សែន កោះធំ ឋិតនៅស្រុកកោះធំ ខេត្តកណ្តាល ដែលមានទំហំផ្ទៃអគារសរុប១២.៥៤៤,៤ ម៉ែត្រការ៉េ អាចផ្តល់សេវាសុខាភិបាលសាធារណៈជូនដល់ប្រជាពលរដ្ឋប្រមាណជាង ៦០ម៉ឺននាក់ដែលរស់នៅក្នុងស្រុកស្អាង ស្រុកកោះធំ ស្រុកលើកដែក នៃខេត្តកណ្តាល និងស្រុកព្រៃកប្បាស នៃខេត្តតាកែវ នៅថ្ងៃទី៧ ខែមករា ឆ្នាំ២០២២ ត្រូវបានរៀបចំពិធីក្រុងពាលីបុកគ្រឹះសាងសង់ហើយ។

កម្មវិធីនេះត្រូវបានធ្វើឡើង ដោយមានការចូលរួមពីលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ដោយមានការចូលរួមពីលោក ម៉ៅ ភិរុណ ប្រធានក្រុមប្រឹក្សាខេត្តកណ្ដាល លោក គង់ សោភ័ណ្ឌ អភិបាល នៃគណៈអភិបាលខេត្តកណ្ដាល លោកសាស្ត្រាចារ្យ ឈាង រ៉ា អគ្គនាយកមន្ទីពេទ្យកាល់ម៉ែត អភិបាលរងនៃគណៈអភិបាលខេត្តកណ្តាល និងបុគ្គលិកជាច្រើនរូប។

លោក ស៊ុន ចាន់ថុល បានគូសបញ្ជាក់បន្ថែមពីសារសំខាន់នៃកត្តាសុខសន្តិភាព ដែលផ្ដល់ឱកាសឱ្យយើងបានកសាងហេដ្ឋារចនាសម្ព័ន្ធផ្លូវថ្នល់ ទាក់ទាញវិនិយោគិនមកបណ្ដាក់ទុននៅកម្ពុជា ទាក់ទាញទេសចរណ៍មកលេងកម្ពុជា នាំយកផលិតផលទៅលក់នៅបរទេសបង្កើតការងារធ្វើជូនបងប្អូនប្រជាពលរដ្ឋ។

បើតាមការលើកឡើងរបស់លោក ស៊ុន ចាន់ថុល មន្ទីរពេទ្យនេះសាងសង់ឡើងដោយថវិកាបានមកពីការចូលរួមវិភាគទានរបស់សប្បុរសជនក្នុងស្រុកទាំងអស់ ដោយរួមសហការជាមួយនឹងមន្ទីរពេទ្យកាល់ម៉ែត្រ គ្រោងចំណាយថវិកាសរុបទាំងអស់ប្រមាណ១០លានដុល្លារសហរដ្ឋអាមេរិក ក្នុងនោះការសាងសង់រចនាសម្ព័ន្ធអគារមន្ទីរពេទ្យគ្រោងចំណាយទឹកប្រាក់ប្រមាណ៦លាន២សែនដុល្លារសហរដ្ឋអាមេរិក និងការបំពាក់សម្ភារបរិក្ខារពេទ្យគ្រោងចំណាយទឹកប្រាក់ពី៤ ទៅ ៥លានដុល្លារសហរដ្ឋអាមេរិកថែមទៀត។

ជាពិសេស មន្ទីរពេទ្យនេះត្រូវប្រសិទ្ធនាមថាមន្ទីរពេទ្យតេជោ សែន កោះធំ និងក្លាយជាមន្ទីរពេទ្យមានទីតាំងផ្តល់សេវាសុខាភិបាលសាធារណៈជូនដល់ប្រជាពលរដ្ឋប្រមាណជាង ៦០ម៉ឺននាក់ដែលរស់នៅក្នុងស្រុកស្អាង ស្រុកកោះធំ ស្រុកលើកដែក នៃខេត្តកណ្តាល និងស្រុកព្រៃកប្បាស នៃខេត្តតាកែវ។

គម្រោងសាងសង់មន្ទីរពេទ្យនេះរួមមាន៖ ការសាងសង់អគារថ្មីចំនួន០៣ខ្នង ១)អគារមន្ទីរពេទ្យ ចំនួន០១ខ្នង មាន០៣ជាន់ ដែលជាន់ផ្ទាល់ដីមានទំហំ៣.៥១៤,៨ ម៉ែត្រការ៉េ ជាន់ទី១មានទំហំ ៣.៥១៤,៨ ម៉ែត្រការ៉េ និងជាន់ទី២ មានទំហំ ៣.៥១៤,៨ ម៉ែត្រការ៉េ ស្មើនឹងទំហំសរុប១០.៥៤៤,៤ ម៉ែត្រការ៉េ ២) អគារខាងឆ្វេង ចំនួន ០១ខ្នង មាន០២ជាន់ ដែលជាន់ផ្ទាល់ដីមានទំហំ៥០០ម៉ែត្រការ៉េ និងជាន់ទី១មានទំហំ៥០០ ម៉ែត្រការ៉េ ស្មើនឹងទំហំសរុប១០០០ ម៉ែត្រការ៉េ ៣) អគារខាងស្តាំចំនួន០១ខ្នង មាន០២ជាន់ ដែលជាន់ផ្ទាល់ដីមានទំហំ៥០០ម៉ែត្រការ៉េ និងជាន់ទី១ មានទំហំ៥០០ម៉ែត្រការ៉េ ស្មើនឹងទំហំសរុប១០០០ ម៉ែត្រការ៉េ។

អគារទាំង០៣ ខាងលើមានទំហំសរុបស្មើនឹង១២.៥៤៤,៤ ម៉ែត្រការ៉េ ដែលអាចផ្ទុកគ្រែអ្នកជំងឺបានចំនួន១៥០ គ្រែ បំពាក់ដោយម៉ាស៊ីនត្រជាក់ សម្ភារបរិក្ខារពេទ្យ និងឧបករណ៍បច្ចេកទេសទំនើបៗបម្រើឱ្យការព្យាបាល គ្រោងចំណាយពេលសាងសង់ចំនួន១២ខែ ចាប់ផ្តើមពីខែមករា ឆ្នាំ២០២២ និងគ្រោងបញ្ចប់ការសាងសង់នៅខែធ្នូ ឆ្នាំ២០២២៕

NBC ៖ វិស័យសំណង់និងអចលនទ្រព្យរំពឹងថានឹងមានកំណើនឡើងសន្សឹមៗក្នុងឆ្នាំ២០២២នេះ

ដោយ៖ វឌ្ឍនៈ

ភ្នំពេញ ៖ បើតាមរបាយការណ៍វឌ្ឍនភាពម៉ាក្រូសេដ្ឋកិច្ចវិស័យធនាគារឆ្នាំ២០២១និងទស្សនវិស័យឆ្នាំ២០២២របស់ធនាគារជាតិនៃកម្ពុជា ចេញផ្សាយកាលពីពេលថ្មីៗកន្លងទៅនេះ បានបង្ហាញថា វិស័យសំណង់និងអចលនទ្រព្យរំពឹងថានឹងកើនឡើងជាសន្សឹមៗ ដែលគាំទ្រដោយកំណើនចំណូលក្នុងស្រុក និងលំហូរទុនវិនិយោគមកកម្ពុជា។

ធនាគារជាតិបង្ហាញថា នៅក្នុងឆ្នាំ២០២២នេះ សេដ្ឋកិច្ចពិភពលោកក៏រំពឹងថានឹងបន្តងើបឡើងវិញក្នុងល្បឿនខុសគ្នា អាស្រ័យលើប្រសិទ្ធភាពនៃការការពារការរាតត្បាតជំងឺកូវីដ១៩ និងវិធានការគាំទ្ររបស់រាជរដ្ឋាភិបាល។
ជាមួយនឹងបើកសេដ្ឋកិច្ចឡើងវិញ សកម្មភាពសេដ្ឋកិច្ចក្នុងស្រុក ដែលរួមមានពាណិជ្ជកម្មដុំរាយ ទូរគមនាគមន៍និងការដឹកជញ្ជូននិងទេសចរក្នុងស្រុក រំពឹងថាកើនឡើងជាលំដាប់ ខណៈទេសចរអន្តរជាតិអាចកើនសន្សឹមៗ និងទាមទារពេលវេលានិងកិច្ចខិតខំប្រឹងប្រែងដើម្បីឱ្យវិស័យនេះ មានកំណើនដូចគ្រាមុនវិបត្តិ ។

ផ្អែកលើទស្សនវិស័យមួយចំនួនរបស់រាជរដ្ឋាភិបាល សេដ្ឋកិច្ចកម្ពុជាត្រូវបានរំពឹងដោយសុទិដ្ឋិនិយមថាបន្តងើបឡើងបន្ថែមទៀត ក្នុងអត្រាប្រមាណ៥ភាគរយ នៅក្នុងឆ្នាំ២០២២។

បើតាមអ្នកជំនាញនៃវិស័យអចលនទ្រព្យក៏បានបង្ហាញជាទស្សនថា តាមរយៈសកម្មភាពសេដ្ឋកិច្ចនៅចុងឆ្នាំ២០២១កន្លងទៅនេះ រំពឹងថានៅក្នុងឆ្នាំ២០២២ វិស័យមួយចំនួននឹងត្រលប់ទៅរកភាពដើមវិញ ក្នុងនោះសំណង់និងអចលនទ្រព្យក៏ឃើញថាចាប់ផ្ដើមមានសកម្មភាពសាងសង់ ហើយវិនិយោគិនក្នុងស្រុកធំៗជាច្រើនក៏បាននិងកំពុងសម្លឹងរកមើលពីឱកាសវិនិយោគក្នុងឆ្នាំថ្មីនេះដែរ។

លោក ច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាបានមានប្រសាសន៍ថា ឆ្នាំ២០២០និង២០២១ វិនិយោគិនបរទេសចូលមកកម្ពុជាដើម្បីស្វែងរកការវិនិយោគមានចំនួនតិចតួច ហើយវិនិយោគិនក្នុងស្រុកបានដើរតួនាទីសំខាន់ក្នុងការបណ្ដាក់ទុនវិនិយោគលើវិស័យសំណង់។ នៅឆ្នាំ២០២២និងឆ្នាំបន្តបន្ទាប់ វិស័យនេះនឹងកាន់តែរឹងមាំថែមទៀត ជាមួយកំណើនវិនិយោគិនក្នុងស្រុកចូលរួមបណ្ដាក់ទុនវិនិយោគលើសំណង់និងអចលនទ្រព្យ ។

លោកក៏រំពឹងថា ក្នុងឆ្នាំ២០២២នេះវិនិយោគិនបរទេសជាពិសេសចិននឹងចូលមកវិញបន្តិចម្ដងៗ ហើយនឹងជំរុញឱ្យវិស័យអចលនទ្រព្យនិងសំណង់នៅកម្ពុជាចាប់ផ្ដើមរើបៗឡើងវិញជាបន្តបន្ទាប់ផងដែរ៕

លោក ហ៊ុន ម៉ានី ៖ កម្ពុជានឹងចាប់ផ្តើមឆ្នាំ២០២២ជាមួយនឹងសុទិដ្ឋិនិយមជាច្រើន ទោះប្រឈមបញ្ហាមួយចំនួនក្តី

ដោយ៖ សុផារី

ភ្នំពេញ៖ លោក ហ៊ុន ម៉ានី មានប្រសាសន៍ថា សម្រាប់កម្ពុជា យើងទាំងអស់គ្នានឹងចាប់ផ្តើមឆ្នាំ២០២២នេះ ជាមួយនឹងសុទិដ្ឋិនិយមជាច្រើន បើទោះជាយើង ក៏ដូចជាបណ្តាប្រទេសដទៃទៀតក្នុងលោក នៅមានបញ្ហាប្រឈមមួយចំនួនដែលត្រូវដោះស្រាយ។

ដោយមិននិយាយពីវិស័យធំៗ ដែលក្នុងនោះរួមមាន “សន្តិសុខជាតិ” “ស្ថិរភាពនយោបាយ” “ការងើបឡើងវិញនៃសេដ្ឋកិច្ច” “កិច្ចការសង្គមសេដ្ឋកិច្ច” និងបណ្តាវិស័យផ្សេងៗទៀត លោកបានលើកយកទិដ្ឋភាពសុទិដ្ឋិនិយម ដែលនឹងស្តែងចេញពីព្រឹត្តិការណ៍ធំៗចំនួន០៣។

ទី១. ក្នុងបរិបទនៃការរស់នៅក្នុង”គន្លងថ្មី” តាមរយៈសមិទ្ធផលដ៏ធំធេងរបស់រាជរដ្ឋាភិបាល រួមជាមួយនឹងការចូលរួមរបស់វីរជនជួរមុខ និងប្រជាពលរដ្ឋគ្រប់រូបក្នុងការប្រយុទ្ធប្រឆាំងនឹងជំងឺកូវីដ១៩ ជាមួយគ្នានឹងការមើលឃើញពីដំណើរការជាប្រក្រតីនៃការប្រារព្ធកម្មវិធីឆ្លងឆ្នាំនៅតាមបណ្តាទីតាំងនានាក្នុងប្រទេស លោកមានសុទិដ្ឋិនិយមថា ជីវភាពប្រជាពលរដ្ឋយើង បាននិងកំពុងវិលត្រលប់មកកាន់ប្រក្រតីភាពវិញ បើទោះជាពេលនេះ មិនដូចកាលមុនពេលផ្ទុះការឆ្លងរាលដាលនៃជំងឺកូវីដ ១៩ក្តី។ ប៉ុន្តែស្របពេលដែលយើងកំពុងតែសាទរនូវការងើបឡើងវិញនេះ យើងក៏មិនត្រូវភ្លេចបន្តចូលរួមអនុវត្តតាមវិធានសុខាភិបាល បន្តប្រុងប្រយ័ត្ន និងបន្តចូលរួមតាមគ្រប់លទ្ធភាពក្នុងការរក្សាភាពជោគជ័យនោះទេ។

ទី២. សម្រាប់ភាពជាប្រធានអាស៊ានរបស់កម្ពុជាក្នុងឆ្នា២០២២នេះ កម្ពុជាបានដាក់ចេញនូវមូលបទ “អាស៊ាន A.C.T.៖ ស្គាល់បញ្ហា និងរួមគ្នាដោះស្រាយបញ្ហាទាំងអស់គ្នា” ក៏ដូចជារបៀបវារៈ ដែលក្នុងឋានៈកម្ពុជាជាប្រធានអាស៊ាន នឹងអាចដឹកនាំកិច្ចពិភាក្សា ឈានទៅសម្រេចបានកុងសង់ស៊ុសលើលទ្ធផល ដែលជាឧត្តមប្រយោជន៍ដល់អាស៊ាន និងប្រជាជននៃអាស៊ានទាំងមូលផងដែរ។ ប្រធានបទនានា (ដែលក្នុងនោះមានប្រធានបទដែលត្រូវបានបន្តពីឆ្នាំមុនៗ ដែលមិនទាន់មានការព្រមព្រៀង) រួមមានទាំងបញ្ហានយោបាយ សន្តិសុខ សេដ្ឋកិច្ច “ការងើបឡើងវិញក្រោយវិបត្តិកូវីដ ១៩” និងសង្គមវប្បធម៌ នឹងត្រូវលើកមកពិភាក្សា។ លោកថា ជាមួយស្មារតីសហគមន៍ និងភាពជាស្នូលរបស់អាស៊ាន កិច្ចពិភាក្សានឹងមានការវិវឌ្ឍន៍ល្អក្នុងឆ្នាំ២០២២នេះ បើទោះជាបញ្ហាទាំងនោះមានភាពលំបាកយ៉ាងណាក៏ដោយ។

ទី៣. សម្រាប់ការបោះឆ្នាតជ្រើសរើសក្រុមប្រឹក្សាឃុំ សង្កាត់ ២០២២ ស្របតាមគោលការណ៍លទ្ធិប្រជាធិបតេយ្យ ដែលបានចារិកក្នុងរដ្ឋធម្មនុញ្ញនៃព្រះរាជាណាចក្រកម្ពុជា នៅថ្ងៃទី០៥ ខែមិថុនា ខាងមុខនេះ ប្រជាពលរដ្ឋកម្ពុជានឹងធ្វើដំណើរទៅកាន់ការិយាល័យបោឆ្នោតក្នុងឃុំសង្កាត់រៀងៗខ្លួន ដើម្បីបោះឆ្នោតដោយសេរី យុត្តិធម៌ និងសម្ងាត់ ជ្រើសរើសអ្នកដឹកនាំមូលដ្ឋានរបស់ខ្លួនក្នុងចំណោមគណបក្សចូលរួមប្រកួតប្រជែងជាច្រើន ដែលខ្លួនជឿថា មានសមត្ថភាពបម្រើប្រជាពលរដ្ឋ និងប្រទេសជាតិនៅក្នុងអាណត្តិ ២០២២ ២០២៧ ខាងមុខ។

យ៉ាងណាក្តី លោកថា កម្ពុជាមានបញ្ហាសេសល់ច្រើនដើម្បីបន្តដោះស្រាយ មិនថាក្នុងវិស័យនយោបាយ សេដ្ឋកិច្ច និងសង្គម តែនៅមានសុទិដ្ឋិនិយមខ្ពស់ចំពោះអ្វី ដែលកម្ពុជាសម្រេចបាននាពេលកន្លងមក ជាពិសេសការគ្រប់គ្រងបានយ៉ាងមានប្រសិទ្ធិភាពនូវការឆ្លងរីករាលដាលជំងឺកូវីដ១៩ នាពេលថ្មីៗនេះ៕