ឡាវនឹងបើកកំណើរការអាកាសយានដ្ឋានអន្តរជាតិថ្មីមួយក្នុងខេត្តបរកែវ នៅខែមីនាខាងមុខនេះ

ដោយ៖ សុផារី

ឡាវ៖ ឡាវគ្រោងនឹងបញ្ចប់ការសាងសង់អាកាសយានដ្ឋានអន្តរជាតិថ្មីមួយក្នុងខេត្តបរកែវ និងត្រៀមបើកដំណើរការនៅខែមីនាឆ្នាំ២០២២ ខាងមុខនេះ។

នេះបើតាមការចុះផ្សាយរបស់សារព័ត៌មាន Laotian Times ក្នុងថ្ងៃទី០៦ ខែមករានេះថា វិទ្យុជាតិឡាវបានរាយការណ៍ថា ការសាងសង់អាកាសយានដ្ឋានអន្តរជាតិក្នុងតំបន់សេដ្ឋកិច្ចពិសេសត្រីកោណមាសជិតបញ្ចប់ហើយ និងត្រូវបានគេរំពឹងថានឹងបើកដំណើរការក្នុងពេលឆាប់ៗនេះ។

តាមប្រភពដដែល ការសាងសង់អាកាសយានដ្ឋានអន្តរជាតិនេះ ក្នុងដំណាក់កាលដំបូង ចំណាយទឹកប្រាក់១៥០លានដុល្លារ។

លោក Khamphaya Phompanya អភិបាលរងខេត្តបរកែវ បានមានប្រសាសន៍នៅថ្ងៃសុក្រនេះថា អាកាសយានដ្ឋានអន្តរជាតិថ្មីមានសក្ដានុពលសំខាន់ក្នុងការទាក់ទាញភ្ញៀវទេសចរជាតិ និងអន្តរជាតិមកទស្សនាខេត្តបកែវកាន់តែច្រើន។

លោកបន្តថា “ការសាងសង់អាកាសយានដ្ឋានអន្តរជាតិបរកែវបានដំណើរការអស់រយៈពេលពីរឆ្នាំហើយជិតរួចរាល់ហើយ។ យន្តហោះបានសាកល្បងការហោះហើរ និងការចុះចតនៅកន្លែងក្នុងអាកាសយានដ្ឋាន ក៏ដូចជាត្រួតពិនិត្យប្រព័ន្ធទំនាក់ទំនង និងបរិក្ខារក្នុងអាកាសយានដ្ឋាន”។

ក្រុមហ៊ុនអាកាសចរណ៍ក្នុងស្រុក Lao Airlines និង Lao Skyway បានសាកល្បងការហោះហើរយន្តហោះរបស់ពួកគេទៅកាន់អាកាសយានដ្ឋានថ្មីរួចរាល់ហើយ។

អាកាសយានដ្ឋាននេះមានផ្លូវរត់ប្រវែង ២,៥គីឡូម៉ែត្រ ដែលអាចផ្ទុកយន្តហោះធុនតូចទៅមធ្យម ដូចជាយន្តហោះ Airbus A320 និង Boeing B737 ដែលនឹងអាចចុះចតបានស្របតាមស្តង់ដារអន្តរជាតិបាន។

អាកាសយានដ្ឋានអន្តរជាតិបរកែវ ស្ថិតក្នុងភូមិស៊ឹមង៉ាន់ ស្រុកទនភឿង ចម្ងាយប្រហែល៥គីឡូម៉ែត្រពីតំបន់សេដ្ឋកិច្ចពិសេសត្រីកោណមាស។

ខេត្តបរកែវជាខេត្តជាប់ព្រំដែនមួយក្នុងប្រទេសឡាវ ដែលមានព្រំប្រទល់ជាប់នឹងប្រទេសថៃផង និងប្រទេសមីយ៉ាន់ម៉ាផង ដែលត្រូវបានគេឱ្យឈ្មោះថា ជាតំបន់ត្រីកោណមាស Golden Triangle Special Economic Zone៕

លោកបណ្ឌិតគីម ហ៊ាងៈគំរោងអភិវឌ្ឍន៍មួយទទួលបានជោគជ័យទាមទារកត្តាសំខាន់ៗចំនួនបី

ដោយៈ គង់ សូរិយា

ភ្នំពេញៈ គំរោងអភិវឌ្ឍន៍មួយទទួលបានជោគជ័យ មិនមែនជារឿងសាមញ្ញនោះឡើយ ប៉ុន្តែទាមទារឲ្យអ្នកអភិវឌ្ឍន៍ មានមូលដ្ឋានសំខាន់ៗចំនួនបី ដែលត្រូវធ្វើ។

លោកឧកញ៉ាបណ្ឌិតគីម ហ៊ាងប្រធានKW Cambodiaបានមានប្រសាសន៍ឲ្យដឹងក្នុងកិច្ចសម្ភាសន៍ ពិសេសនាព្រឹកថ្ងៃទី៦ មករានេះថា អ្នកអភិវឌ្ឍន៍គម្រោងអចលនទ្រព្យ ដើម្បីទទួលបានជោគជ័យ ត្រូវមានកត្តាសំខាន់ៗ​ចំនួនបី ដូចជា ទី១ មានទុនវិនិយោគគ្រប់គ្រាន់ ទី២ មានក្រុមបច្ចេកទេស​សាងសង់ប្រកបដោយជំនាញ និងវិជ្ជាជីវៈ និងទី៣ ត្រូវមានក្រុមលក់ដែលពូកែ។

លោកបន្តថា “ក្រុមលក់ពូកែគឺជាទ័ពស្រួច ព្រោះការសាងសង់គំរោងចប់ មិនប្រាកដថាជោគជ័យនោះទេ បើសិនជាគ្មានអ្នកលក់ដ៏ជំនាញ”។​លោកបន្តថា “មានអ្នកមានលុយច្រើនណាស់ បានសាងសង់គម្រោងរបស់ពួកគេរួចហើយ ប៉ុន្តែនៅជាប់គាំងលក់មិនចេញ គឺដោយសារខ្វះក្រុមលក់ជំនាញ”។

លោកបណ្ឌិតគីម ហ៊ាងបានបន្តថា ទាក់ទងនឹងស្ថានភាពសេដ្ឋកិច្ច អចលនទ្រព្យ រីកចម្រើនលឿនឡើងវិញ ទាមទារឲ្យមានការចូលរួមពីអ្នកវិនិយោគក្នុងស្រុក ប៉ុន្តែបើពឹងតែអ្នកវិនិយោគក្នុងស្រុកមិនគ្រប់គ្រាន់ និងធ្វើឲ្យវិស័យនេះរីកចម្រើនលឿននោះទេ ហេតុនេះយើងត្រូវការការចូលរួមពីរដ្ឋាភិ​បាល ដាក់ចេញគោលនយោបាយត្រឹមត្រូវច្បាស់លាស់ ដើម្បីលើកទឹកចិត្តវិនិយោគិនបរទេសឲ្យចូលមកវិនិយោគ ដើម្បីសេដ្ឋកិច្ចយើងរីកចម្រើនលឿន។

លោកបន្តថា ចំណុចសំខាន់មួយទៀត គឺរដ្ឋាភិបាលត្រូវធ្វើយ៉ាងណា ឲ្យអ្នកមានលុយច្រើន នៅបរទេសដែលជាជនជាតិខ្មែរ យកលុយរបស់ពួកគេចូលមកវិនិយោគនៅកម្ពុជា ពេលនោះសេដ្ឋកិច្ចយើងនឹងរីកចម្រើនលឿន វិស័យអចលនទ្រព្យនឹងងើបឡើងវិញឆាប់រហ័ស។

លោកបន្តថា “ការចូលរួមពីវិស័យឯកជន បានមួយចំណែកតូចនោះទេ ប៉ុន្តែបើរដ្ឋាភិបាលចូលរួម ដាក់ចេញគោលនយោបាយជាច្រើនទៀត សេដ្ឋកិច្ចរបស់យើង នឹងសម្រេចបានកំណើនកាន់តែលឿន”៕

គម្រោងផ្ទះវីឡា ផ្ទះល្វែងទំនើបស៊ីវិល័យដំបូងគេក្នុងតំបន់ ពីបុរីខាសិនភ្នំពេញ បានសម្ពោធដំណើរការជាផ្លូវការហើយ

ដោយៈសហការី

ភ្នំពេញៈ នៅថ្ងៃទី៦ ខែមករា គម្រោង “បុរី ខាសិន ភ្នំពេញ” ដែលបង្កើតឡើងដោយក្រុមហ៊ុន ខេមបូឌានខាសិន ហ្គ័រជី រៀលអ៊ីស្ទេតឯ.​ក បានបើកការដ្ឋានសាងសង់នៅផ្លូវជាតិលេខ៣ រាជធានីភ្នំពេញ និងបានបើកលក់នៅរសៀលថ្ងៃដដែលនេះ។

ទិដ្ឋភាពនៅការិយាល័យមានភាពអ៊ូអរ ខុសពីធម្មតា អ្នកទិញក៏បានចូលមកជាហូរហែរ ក៏បានទាក់ទាញសហគ្រាសល្បីៗ អ្នកនយោបាយ និងពាណិជ្ជករពីគ្រប់មជ្ឈដ្ឋាន ក្នុងប្រទេសកម្ពុជាមកចូលរួមសារទរផងដែរ។

ក្នុងពិធីសម្ពោធនេះ លោកហ្វាន់ តឺ ហួរ នាយកប្រតិបត្តិនៃគម្រោងបុរី ខាសិន ភ្នំពេញ បានថ្លែងអំណរគុណយ៉ាងស្មោះស្ម័គ្រ ចំពោះភ្ញៀវដែលឆ្លៀតពេលវេលាដ៏មានតម្លៃ និងមមាញឹករបស់ខ្លួន ដែលបានចចូលរួមសារទរ និងគាំទ្រគម្រោងនេះ។

លោកបានណែនាំថា គម្រោងបុរីខាសិនភ្នំពេញ គឺជាគម្រោងផ្ទះវីឡាដំបូងគេក្នុងទីក្រុងភ្នំពេញ ដែលបង្កើតឡើងដោយក្រុមហ៊ុន ខេមបូឌាន ខាសិន ហ្គ័រជី រៀល អ៊ីស្ទេត ឯ.ក ដែលមានផ្ទៃដីសរុបទំហំ៣០ហិកតា គ្រោងនឹងសាងសង់ផ្ទះវីឡា ផ្ទះល្វែងជាង២០០០ផ្ទះ ដែល​មានផ្ទៃសាងសង់សរុប320,000ម៉ែត្រការ៉េ រៀបចំឲ្យមានវិថីពាណិជ្ជកម្មប្រវែង220ម៉ែត្រ ស្ថិតតាម​បណ្តោយផ្លូវជាតិលេខ3 (មានហាងចំនួន៤១ហាង តាមដងវិថីពាណិជ្ជកម្ម) សាលារៀនអន្តរជាតិ មន្ទីរពេទ្យទំនើប និងទម្រង់អាជីវកម្មផ្សេងៗទៀត បណ្ដុំការរស់នៅ ការដើរទិញទំនិញ ការជួបជុំគ្នា ម្ហូបអាហារ ការកម្សាន្ត ការលំហែកាយ និងពាណិជ្ជកម្ម បង្កើតជាសហគមន៍ខ្នាតធំទំនើប លំដាប់ខ្ពស់នៃភាគខាងលិចទីក្រុងភ្នំពេញ និងជាសហគមន៍គំរូអត្តសញ្ញាណភូមិសាស្ត្រថ្មីបំផុតក្នុងខណ្ឌកំបូល ។

លោកបានមានប្រសាសន៍ថា “យើងនឹងប្រឹងប្រែងឱ្យអស់ពីសមត្ថភាព ដើម្បីធ្វើឱ្យគម្រោងអចលនទ្រព្យនេះ ដំណើរការទៅបានល្អ ដោយបង្ហាញនូវប្រភេទលំនៅដ្ឋានប្រណិតៗ”។

នៅប្រទេសកម្ពុជា ក្រុមហ៊ុន ខាសិន គ្រុប បានអភិវឌ្ឍន៍តំបន់សេដ្ឋកិច្ចពិសេសអន្តរជាតិកម្ពុជា-ចេ ជាងដំណាក់កាលទីមួយ ប្រកបដោយជោគ​ជ័យ ដែលស្ថិតនៅគីឡូម៉ែត្រលេខ១៧៥ ផ្លូវជាតិលេខ៤ ស្រុកព្រៃនប់ ខេត្តព្រះសីហនុ ។

តាមការរំពឹងទុក សហគ្រាសក្នុងតំបន់សេដ្ឋកិច្ចពិសេសនេះ នឹងមានផលិតភាពសរុប៦០០លានដុល្លារអាមេរិក និងផ្តល់ឳកាសការងារជូនប្រជាជនក្នុងស្រុកជាង៦.០០០នាក់ ។ តំបន់ពិសេសដំណាក់កាលទី១ មានសហគ្រាសចូលពេញអស់ហើយ ក្រុមហ៊ុនកំពុងរៀបចំសាងសង់ដំណាក់កាលទីពីរបន្ថែមទៀត ។

ដោយមើលឃើញអំពីទស្សនវិស័យអភិវឌ្ឍន៍ នាពេលអនាគតរបស់ប្រទេសកម្ពុជា លោកហ្វាន់ តឺ ហួរ​យល់ឃើញថា រាជធានីភ្នំពេញ ដែលជារាជធានីនៃព្រះរាជាណាចក្រកម្ពុជា ប្រាកដជាគោលដៅដ៏ល្អ សម្រាប់ប្រជាជនកម្ពុជាទាំងមូល សង្ឃឹមចង់បានសំរាប់ការរស់នៅ ។ ក្នុងនាមជាទីក្រុងអន្តរជាតិបើកចំហ រាជធានីភ្នំពេញក៏នឹងក្លាយជាកន្លែងដ៏ល្អ សម្រាប់មិត្តអន្តរជាតិក្នុងការវិនិយោគ និងអភិវឌ្ឍន៍។

គម្រោងបុរីខាសិនភ្នំពេញ ស្ថិតនៅសង្កាត់​ភ្លើងឆេះ​រទេះ ខណ្ឌកំបូល រាជធានីភ្នំពេញ(ពីរង្វង់មូលចោមចៅឆ្ពោះ ទៅផ្លូវជាតិលេខ៣ចំងាយ ២គីឡូម៉ែត្រ) ក៏ជាគម្រោងផ្ទះវិឡា ផ្ទះល្វែងទំនើបតែមួយគត់ នៅក្នុងតំបន់នេះ ។ គម្រោងនេះត្រូវបានសាងសង់នៅផ្ទៃដី ៣០ហិ​ចតា ដែលមានផ្ទៃសាងសង់សរុប320,000ម៉ែត្រការ៉េ គម្រោងសាងសង់ទាំងមូលត្រូវបានអនុវត្តជាបីដំណាក់កាល ។

ដំណាក់កាលទី១ សាងសង់លើផ្ទៃដីទំហំ ៥.៥ហិចតា ផ្ទៃសាងសង់មាន69,000ម៉ែត្រការ៉េ ដែលផ្តោតសំខាន់លើប្រភេទផ្ទះល្វែង វីឡា ប្រភេទផ្ទះទាំងអស់ អនុវត្តការតុបតែងរួចរាល់ ប្រកបដោយស្តង់ដារខ្ពស់ បំពាក់ដោយទូផ្ទះបាយ ទូជញ្ជាំង ចង្ក្រាន ទូបន្ទប់ទទួលភ្ញៀវ និងគ្រឿងសង្ហារិមម៉ាកល្បីៗផ្សេងៗទៀត ។

នាយកផ្នែកទីផ្សារគម្រោងបុរីខាសិនភ្នំពេញ លោកស្រីYing Huiling បានមានប្រសាសន៍ថា បុរីខាសិនភ្នំពេញ មានភាពខុសគ្នាពីគម្រោងផ្ទះល្វែងក្នុងស្រុក ដែលមានលក្ខណៈបុរាណ្យ ដោយធ្វើតាមទម្លាប់ការរស់របស់ប្រជាជនក្នុងស្រុក រួមផ្សំជាមួយគំនិត នៃការរស់នៅសហគមន៍ទំនើប មានបំពាក់ប្រព័ន្ធឧស្ម័នធម្មជាតិទំនើបអន្តរជាតិ ប្រើប្រាស់ធនធាតុឥទ្ធិភាពដែលស្អាតសុវត្ថិភាព ការពារបរិស្ថានបៃតង តម្លៃសមរម្យ និងមានភាពងាយស្រួល បង្កើតបានជាបរិយាកាសរស់នៅប្រកបដោយសុខភាពល្អ និងផាសុកភាពសំរាប់ប្រជាជន ។

លោកស្រីបាននិយាយថា ដើម្បីធានាបានគុណភាពសំណង់ បុរីខាសិនភ្នំពេញយើងខ្ញុំ បានអញ្ជើញក្រុមហ៊ុនស្ថាបត្យកម្មសាងសង់ ក្នុងចំណា​ត់ថ្នាក់TOP 10 របស់ទីក្រុងប៉េកាំងប្រទេសចិន ជាក្រុមហ៊ុនម៉ៅការធំលើគម្រោងនេះ។ លើសពីនេះ យើងបាននាំមកនូវសេវាកម្ម Greentown Services ដែលជាក្រុមហ៊ុនគ្រប់គ្រងអចលនទ្រព្យ ឡើងទីផ្សារភាគហ៊ុនហុងកុងប្រទេសចិន ធ្វើជាទីភ្នាក់ងារសេវាកម្មគ្រប់គ្រង អចលនទ្រព្យសហគមន៍របស់យើងផងដែរ។

មុនពេលចាប់ផ្តើមគម្រោង យើងបានផ្តល់សេវាកម្មគ្រប់គ្រងអចលនទ្រព្យ វិធីសាស្ត្រសេវាកម្ម ប្រកបដោយវិជ្ជាជីវៈជូនដល់អតិថិជន ខិតខំយ៉ាងណាធ្វើឲ្យហេដ្ឋារចនាសម្ព័ន្ធរឹង និងទន់របស់បុរីរួមបញ្ចូលគ្នាតែមួយ នឹងធ្វើឲ្យសហគមន៍នេះ ក្លាយជាសហគមន៍រស់នៅ ប្រកបដោយគុណភាពលំដា​ប់ខ្ពស់ បរិយាកាសស្រស់ស្អាត សេវាកម្មគ្រប់ជ្រុយជ្រោយ សុវត្ថិភាព និងស្រស់ថ្លា ។

បុរីខាសិនភ្នំពេញ ត្រូវបានសាងសង់ឡើងដោយក្រុមហ៊ុន ខេមបូឌាន ខាសិន ហ្គ័រជី រៀល អ៊ីស្ទេត ឯ.ក ដែលមានក្រុមហ៊ុនមេ Kasen International Holdings limitedជាក្រុមហ៊ុនឡើង ទីផ្សារភាគហ៊ុននៅហុងកុងប្រទេសចិន(លេខកូដភាគហ៊ុន HK0496) ។ ក្រុមហ៊ុន Kasen International Holdings Co., Ltd. មានសកម្មភាពអាជីវកម្មចម្បងគឺអភិវឌ្ឍន៍អចលនទ្រព្យ និងផលិតគ្រឿងសង្ហារឹម ដែលមានទីស្នាក់ការក ណ្តាលនៅក្នុងខេត្តចេជាំងប្រទេសចិន។

ជាក្រុមហ៊ុនសម្ព័ន្ធឆ្លងប្រទេស មានអាជីវកម្មចម្រុះខ្នាតធំមួយ ដែលមានក្រុមហ៊ុនបុត្រសម្ព័ន្ធគ្រប់គ្រងភាគហ៊ុន និងចូលហ៊ុនជាង៣០ក្រុមហ៊ុ​ន នៅក្នុងនិងក្រៅប្រទេស ។ ក្រុមហ៊ុនមេនេះ មានគម្រោងអភិវឌ្ឍន៍អចលនទ្រព្យខ្នាតធំល្បីៗជាច្រើន នៅក្នុងប្រទេសចិន គម្រោងអភិវឌ្ឍន៍អចលនទ្រព្យដែលគេស្គាល់នៅក្នុងប្រទេសចិន រួមមានគម្រោង Yancheng Qianjiang Fangzhou គម្រោងQianjiang Oasisនៅខេត្តជាងស៊ូ គម្រោងទីក្រុងរណបHaining Kasenខេត្តចេជាង គម្រោងBoao Asia Bay និងគម្រោងPhoenix Mountain Resort in Sanyaនៅខេត្តហឺណាន និងគម្រោងChangbai Mountain Resort in Changshanខេត្តជីលីង ។ ល។៕

 

អ្នកជំនាញៈអចលនទ្រព្យដែលធ្លាប់រងផលប៉ះពាល់នឹងងើបឡើងវិញនៅក្នុងឆ្នាំ២០២២នេះ

ដោយៈ វឌ្ឍនៈ

ភ្នំពេញៈ សកម្មភាពនៃការទិញលក់ និងតម្លៃអចលនទ្រព្យដែលរងផលប៉ះពាល់នៅក្នុងវិបត្តិឆ្នាំ២០២០ និងឆ្នាំ២០២១កន្លងទៅចាប់ផ្ដើមមានសកម្មភាពកម្រើកឡើងវិញហើយ ដែលជាសញ្ញាវិជ្ជមានសម្រាប់វិស័យអចលនទ្រព្យក្នុងឆ្នាំ២០២២នេះ។

លោកខេន ឡូ អគ្គនាយកក្រុមហ៊ុន Century 21 Imperial Realty បានមានប្រសាសន៍ នៅក្នុងកិច្ចសម្ភាសន៍មួយ កាលពីដើមសប្ដាហ៍នេះថា ក្នុងឆ្នាំ២០២០ និង២០២១ វិស័យអចលនទ្រព្យបានថមថយល្បឿន នៃការអភិវឌ្ឍតិចតួច ក្នុងនោះទាំងពាណិជ្ជកម្ម លំនៅឋាន និងដីធ្លីសុទ្ធតែរងផលប៉ះពាល់។ យ៉ាងណាក្ដីតម្លៃអចលនទ្រព្យនៅក្នុងទីផ្សារ មិនមានការថមថយខ្លាំងនោះទេ ហើយវាក៏ចាប់ផ្ដើមមានកំណើនឡើងវិញ នៅចុងឆ្នាំ២០២១ ដោយរំពឹងថាតម្លៃអចលនទ្រព្យ ដែលរងផលប៉ះពាល់កាលពី២០២០និង២០២១ នឹងងើបឡើងវិញក្នុងឆ្នាំ២០២២នេះ។

លោកបន្តថា  “តំបន់ខ្លះទៀត តម្លៃដីធ្លីមិនត្រឹមតែមិនធ្លាក់ចុះនោះទេ តែផ្ទុយទៅវិញបែរជាមានកំណើននិងបន្តឡើង កាលពីចុងឆ្នាំ២០២១ ហើ​យបន្តកើនក្នុងឆ្នាំ២០២២ ដែលជាសញ្ញាមួយដ៏ល្អ នៅក្នុងវិស័យនេះ”។

លោកKen Loបានបន្តទៀតថា គម្រោងសាងសង់មួយចំនួននៅក្នុងរាជធានីភ្នំពេញ យើងបានមើលឃើញថា សន្ទុះនៃការទិញលក់មានការថមថយតិចតួច តែការអភិវឌ្ឍមិនបានបង្អង់ល្បឿននោះទេ។ ជាក់ស្ដែងក្រុម​ហ៊ុនអភិវឌ្ឍន៍លំនៅឋាននានា ថ្វីត្បិតតែការទិញលក់គម្រោងមានការថម​ថយតិចតួចមែន តែសម្រាប់សកម្មភាពអត់បានបញ្ឈប់ ឬក៏បង្អាក់សកម្ម​ភា​ពសាងសង់ឡើយ គឺនៅតែដំណើរទៅមុខបន្តទៀត។

ជាមួយគ្នានេះ លោក គាម សៀកឡុង អ្នកជំនាញនៃវិស័យអចលនទ្រព្យមួយរូបក្នុងប្រទេសកម្ពុជា ក៏បានលើកឡើងផងដែរថា នៅក្នុងឆ្នាំ២០២០ និងឆ្នាំ២០២១ ថ្វីត្បិតតែមានបញ្ហា និងធ្វើឱ្យរារាំងដល់ការទិញលក់អចលនទ្រព្យក៏ពិតមែន ប៉ុន្តែក្រលេកទៅមើលសកម្មភាពនៃការអភិវឌ្ឍនៅបន្តសកម្មភាពដដែល។

លោកបន្តថា “ក្រុមហ៊ុនខ្លះពិតជាជួបវិបត្តិ ប៉ុន្តែមិនអាចបញ្ឈប់សកម្ម​ភាពរបស់ខ្លួនបានឡើយ ដោយលោកប្រៀប ដូចជា ម៉ាស៊ីនយានយន្ត បើកាលណាយើងបង្អង់ល្បឿន ឬពន្លត់ម៉ាស៊ីន ដោយឈប់ឬផ្អាកដំណើរការ នៅពេលចប់វិបត្តិកាលណា ក្រុមហ៊ុនដែលមិនផ្អាកដំណើរការសាងសង់ គេនឹងទៅមុខមួយជំហានហើយ”។

លោកគាម សៀកឡុងបានបន្តថា ការបង្អង់ល្បឿនអភិវឌ្ឍន៍ ឬក៏ផ្អាកល្បឿនអភិវឌ្ឍន៍ ពិតជាមានផលប៉ះពាល់ធ្ងន់ធ្ងរជាងបន្តទៅទៀត។ ជាក់ស្ដែងពេលបញ្ឈប់សកម្មភាព កម្មករ បុគ្គលិករបស់ខ្លួននឹងអត់ការងារ អត់ចំណូល ប៉ះពាល់ដល់សេដ្ឋកិច្ចកាន់តែធំ។ ពេលចាប់ផ្ដើមដំណើរការសាងសង់ឡើងវិញ ត្រូវប្រមូលបុគ្គលិក កម្មករ ហើយទំរាំតែរកបានគ្រប់គ្រាន់ ក្រុមហ៊ុនដែលមិនបញ្ឈប់សកម្មភាព គេទៅមុខកាន់តែឆ្ងាយហើយ៕

គម្រោងខុនដូប្រណិត ចំនួន៣៧ជាន់ថ្មីមួយកំពុងលេចរូបរាងនៅកណ្តាលក្រុងភ្នំពេញ

ដោយ៖ សុផារី

ភ្នំពេញ៖ គម្រោងខុនដូទំនើបថ្មីមួយ ឈ្មោះថា ONE70 ដែលមានកម្ពស់៣៧ជាន់ បាននឹងកំពុងលេចរូបរាងនៅខាងក្រោយមន្ទីរពេទ្យកាល់ម៉ែត្រ ដែលជាទីតាំងមានសក្តានុពលកណ្តាលក្រុង។

លោក តាំង ម៉េងហ៊ុយ បុគ្គលិកផ្នែកលក់របស់គម្រោងនេះបានមានប្រសាសន៍ថា គម្រោង ONE70 ជាគម្រោងខុនដូទំនើបដែលមាន៣៧ជាន់ និងជាគម្រោងទទួលបានការវិនិយោគពីសំណាក់វិនិយោគិនចិន ដោយមានក្រុមហ៊ុនអភិវឌ្ឍន៍ចិនឈ្មោះថា New Moment Real Estate Development Co., Ltd។

គម្រោងខុនដូនេះមានទីតាំងនៅខាងក្រោយមន្ទីរពេទ្យកាល់ម៉ែត្រ តាមបណ្តាយផ្លូវលេខ៧០ សង្កាត់ស្រះចក ខណ្ឌដូនពេញ បានចាប់ផ្តើមការសាងសង់តាំងពីឆ្នាំ២០១៩ និងបាននិងកំពុងបន្តការសាងសង់បន្ថែមទៀត។ បើតាមប្រភពដដែលបានឱ្យដឹងថា បច្ចុប្បន្ននេះ ការសាង់សង់សម្រេចបានជាង៥០ភាគរយហើយ (ដល់ជាន់ទី២០) ហើយគ្រោងនឹងបញ្ចប់ការសាងសង់នៅដើមឆ្នាំ២០២៣ខាងមុខនេះ។

គម្រោងខុនដូថ្មីនេះដែលកំពុងសាងសង់ស្ថិតចំកណ្តាលទីក្រុងភ្នំពេញ ONE70 រួមមានខុនដូជាច្រើនប្រភេទ ក្លឹបហាត់ប្រាណ អាងហែលទឹក សួនច្បារលើអាកាស ស្កាយបារ និងចំណតរថយន្តដ៏ធំទូលាយ។ សម្រាប់តម្លៃខុនដូក្នុងមួយយូនីត ចាប់ផ្តើមពី៦៧០ដុល្លារអាមេរិកក្នុងមួយម៉ែត្រការ៉េ ឡើងទៅ។

គម្រោង ONE70 បានចាប់់ផ្តើមបើកលក់បណ្តើរៗហើយ ដោយក្រុមហ៊ុនគ្រោងនឹងបើកសម្ភោធការិយាល័យលក់នៅក្នុងខណ្ឌដូនពេញ នៅក្នុងខែកុម្ភៈ ឆ្នាំ២០២២ នេះតទៅ៕

កត្តាជម្រុញសំខាន់ៗចំនួន៣ ធ្វើឱ្យផ្លូវជាតិលេខ៤៨ក្លាយជាតំបន់ទាក់ទាញការវិនិយោគអចលនទ្រព្យ

ដោយ៖ វឌ្ឍនៈ

ភ្នំពេញ ៖ ការបើកការដ្ឋានជួសជុលស្ថាបនាផ្លូវជាតិលេខ៤៨ តភ្ជាប់ពីផ្លូវជាតិលេខ៤ ខេត្តព្រះសីហនុទៅកាន់ខេត្តកោះកុង ជាការបង្កើនសក្តានុពលវិនិយោគ និងដឹកជញ្ជូន ដែលកត្តានេះនឹងធ្វើឱ្យផ្លូវជាតិលេខ៤៨ក្លាយជាផ្លូវដ៏សំខាន់មួយ ក្នុងការជំរុញការវិនិយោគលើវិស័យអចលនទ្រព្យ។

ក្នុងនោះកត្តាសំខាន់ៗមួយចំនួនដែលជឿជាក់ថាផ្លូវលេខ៤៨នឹងក្លាយជាផ្លូវដ៏សំខាន់ក្នុងវិស័យអចលនទ្រព្យ ក្នុងនោះរួមមាន៖

១. ផ្លូវហាយវ៉េអាស៊ាន១២៣ (ASEAN Highway 123) ៖ តាមការបញ្ជក់ពីក្រសួងសាធារណការ និងដឹកជញ្ជូន ការស្ថាបនាផ្លូវជាតិលេខ៤៨ មានប្រវែង១៤៨ គីឡូម៉ែត្រ ដោយចាប់ផ្តើមសាងសង់ពីចំណុចប្រសព្វជាមួយផ្លូវជាតិលេខ៤ ស្ថិតក្នុងភូមិអូរជ្រៅ ឃុំបឹងព្រាវ ស្រុកស្រែអំបិល រហូតដល់ក្រុងខេមរភូមិន្ទ ខេត្តកោះកុង។ ផ្លូវនេះនឹងជួយសម្រួលដល់ការដឹកជញ្ជូន ជំរុញសក្តានុពលតំបន់ទេសចរណ៍ និងបង្កើនសេដ្ឋកិច្ចក្នុងតំបន់ជាពិសេស ជាមួយប្រទេសជិតខាង ដោយសារតែផ្លូវនេះ ជាផ្នែកមួយនៃផ្លូវហាយវ៉េអាស៊ាន១២៣ ដែលភ្ជាប់ប្រទេសកម្ពុជា ទៅប្រទេសថៃ និងប្រទេសភូមា។

២. ជាផ្លូវដែលបណ្តុំដោយតំបន់សេដ្ឋកិច្ចពិសេស ៖ សក្តានុពលនៃផ្លូវជាតិលេខជាតិលេខ ៤៨ បានទាក់ទាញការវិនិយោគសួនឧស្សាហកម្មដល់ទៅ៤ ដែលស្ថិតនៅតាមបណ្តោយផ្លូវនេះតែមួយ។ តំបន់សេដ្ឋកិច្ចពិសេស៤កន្លែងនេះមានដូចជា តំបន់សេដ្ឋកិច្ចពិសេសកោះកុង (Koh Kong SEZ) តំបន់សេដ្ឋកិច្ចពិសេសស៊ួយ ឆេង (Suoy Chheng SEZ) តំបន់សេដ្ឋកិច្ចពិសេសគិរីសាគរកោះកុង (Kirisakor Koh Kong SEZ) និងតំបន់សេដ្ឋកិច្ចពិសេសរតនា(Ratana SEZ) ។

៣. ទីផ្សាដីធ្លីបន្តកើនឡើងពីមួយឆ្នាំទៅមួយឆ្នាំ៖ ដោយសារទីតាំង និងសក្តានុពល្អទាំងនេះហើយ បានជំរុញឱ្យតម្លៃដីនៅតាមបណ្តោយផ្លូវជាតិលេខ ៤៨ មានកំណើនល្អពីមួយឆ្នាំទៅមួយឆ្នាំ។

តាមការសិក្សាពីក្រុមហ៊ុន Century 21 Zillion Holding ប្រចាំខេត្តកោះកុងឱ្យដឹងថា តម្លៃដីនៅតាមបណ្តោយផ្លូវជាតិលេខ៤៨ មានតម្លៃដាក់លក់ចន្លោះពី៧ទៅ៨ដុល្លារក្នុងមួយម៉ែត្រការ៉េ កាលពីដើមឆ្នាំ២០២០។ បច្ចុប្បន្នតម្លៃនេះបានកើនដល់ចន្លោះពី១៣ទៅ១៨ដុល្លារ ក្នុងមួយម៉ែត្រការ៉េ ដែលតម្លៃនេះគឺអាស្រ័យលើទីតាំងសក្តានុពលនៃដី។

ជាការកត់សម្គាល់ តំបន់ណាដែលមានការអភិវឌ្ឍហេដ្ឋារចនាសម្ព័ន្ធថ្មីៗ តម្លៃដីធ្លីនៅក្នុងតំបន់នោះ មានកំណើនស្ទុះងើបឡើងជាបន្តបន្ទាប់ ហើយក៏ទាក់ទាញការវិនិយោគពីវិនិយោគិនក្នុងនិងក្រៅប្រទេសជាច្រើនផងដែរ ហេតុដូច្នេះហើយទើបរាជរដ្ឋាភិបាលលោកបានសាងសង់ហេដ្ឋារចនាសម្ព័ន្ធថ្មីៗនិងលើកកម្ពស់ហេដ្ឋារចនាសម្ព័ន្ធចាស់ៗឡើងវិញឱ្យកាន់តែទំនើបនិងធំទូលាយ៕

អ្នកជំនាញ៖ អចលនទ្រព្យតំបន់អរិយក្សត្រចាប់ផ្តើមកម្រើក ក្រោយស្ងប់ស្ងាត់រយៈពេល២ឆ្នាំ

ដោយ៖ សុធារី

កណ្តាល៖ ក្រោយដ្ឋាភិបាលកូរ៉េខាងត្បូងប្រកាសពីគម្រោងសាងសង់ស្ពានមិត្តភាពកម្ពុជា-កូរ៉េខាងត្បូង ឆ្លងកាត់ទន្លេមេគង្គតភ្ជាប់ពីរាជធានីភ្នំពេញ ទៅតំបន់អរិយក្សត្រ ឬស្ពានស្វាយជ្រុំ អ្នកជំនាញអចលនទ្រព្យមើលឃើញថា តំបន់អរិយក្សត្រកំពុងតែកម្រើកឡើងវិញ ក្រោយពីស្ងប់ស្ងាត់ក្នុងរយៈពេល២ឆ្នាំ ចុងក្រោយនេះ។

លោកឧកញ៉ាបណ្ឌិត គីម ហ៊ាង ប្រធានក្រុមហ៊ុនអចលនទ្រព្យ KW Cambodia បានមានប្រសាសន៍ថា ដំណឹងនៃគម្រោងសាងសង់ស្ពានមិត្តភាពកម្ពុជា-កូរ៉េខាងត្បូង ពីរាជធានីភ្នំពេញទៅតំបន់អរិយក្សត្រនេះ គឺជាសញ្ញាបង្ហាញពីសក្ដានុពលនៃតំបន់នោះឡើងវិញ បន្ទាប់ពីខកខានប្រមាណជា២ឆ្នាំ ដោយសារតែជំងឺកូវីដ១៩។

លោកឧកញ៉ាបន្តថា បន្ទាប់ពីមានគម្រោងនេះតម្លៃអចលនទ្រព្យក្នុងតំបន់អរិយក្សត្រ មិនហក់ឡើងខ្លាំងបន្ថែមទៀតទេ ដោយសារតែ៣ឆ្នាំចុងក្រោយនេះ តម្លៃដីធ្លីបានឡើងថ្លៃរួចទៅហើយ ប៉ុន្ដែគម្រោងនេះ បានជួយឱ្យតម្លៃដីធ្លីមានភាពល្អប្រសើរ ដោយរក្សាបានតម្លៃយ៉ាងល្អ មានន័យថា មិនឡើងតាមមាត់ និងមិនចុះតាមមាត់។

លោកឧកញ៉ាបន្ថែមថា ”តំបន់អរិយក្សត្រជាតំបន់ដ៏ល្អ ដោយដីមានទំហំធំ និងជាតំបន់អាចសាងសង់លំនៅដ្ឋាន តម្លៃក្រោមមធ្យមបាន។ ចំពោះគម្រោងសាងសង់ស្ពាននេះនឹងធ្វើឱ្យប្រជាពលរដ្ឋកាន់តែសម្រុកទៅទិញអចលនទ្រព្យ ក្នុងតំបន់នោះបន្ថែមទៀត។ លើសពីនេះនឹងជួយឱ្យគម្រោងនានា ដែលបានរាំងស្ទះប្រមាណ២ឆ្នាំមកនេះ ចាប់ផ្ដើមសកម្មភាពឡើងវិញ ជាក់ស្ដែងបច្ចុប្បន្នតំបន់អរិយក្សត្រមានការសាងសង់បុរីជាច្រើន”។

លោកឧកញ៉ាបានបង្ហាញពីភាពវិជ្ជមានថា បន្ទាប់ពីមានស្ពាននឹងមានការអភិវឌ្ឍន៍ជាច្រើនដូចជា ការអភិវឌ្ឍន៍ខុនដូ ការអភិវឌ្ឍន៍រោងចក្រ និងការអភិវឌ្ឍន៍លើវិស័យផ្សេងៗជាច្រើនទៀត។

លោកឧកញ៉ា ចេង ខេង អគ្គនាយកក្រុមហ៊ុន CPL បានថ្លែងថា ស្ពានមិត្តភាពកម្ពុជា-កូរ៉េ ជាតម្រូវការចាំបាច់ សម្រាប់ប្រជាពលរដ្ឋ រស់នៅក្នុងតំបន់អរិយក្សត្រ ដូច្នេះនៅពេលមានការ សាងសង់ស្ពាននេះឡើង នោះវិស័យដីធ្លីនឹងហក់ឡើងថ្លៃថែមមួយកម្រិត។ ការហក់ឡើងថ្លៃនេះក៏អាស្រ័យលើតំបន់។ ប្រសិនតំបន់ដីជាប់ផ្លូវធំតម្លៃដីក៏ហក់ឡើងខ្លាំង ប៉ុន្ដែទោះជាយ៉ាងនេះក្ដីចំពោះតម្លៃ ក៏មិនហក់ឡើងខ្លាំងណាស់ណានោះទេ ដោយសារតែតំបន់អរិយក្សត្រនេះ តម្លៃដីគឺស្ថិតក្នុងតម្លៃមួយដែលថ្លៃល្មមដែរហើយ។

លោកឧកញ៉ាបញ្ជាក់ថា “តំបន់អរិយក្សត្រជាតំបន់មានសក្ដានុពលខ្លាំងលើវិស័យដីធ្លី ដោយសារតែតំបន់ស្របនឹងទីក្រុងភ្នំពេញ ស្របនឹងទន្លេបួនមុខ ហើយក៏ស្របនឹងមុខវាំង ដែលជាបេះដូងនៃរាជធានីភ្នំពេញ ហើយអាចទាក់ទាញបានទាំងភ្ញៀវជាតិ និងអន្ដរជាតិ ព្រោះថាមានទន្លេបួនមុខ ស្ថិតនៅចំចំណុចកណ្ដាលនៃមុខវាំង ហើយជាចំណុចទាក់ទាញភ្ញៀវទេសចរអន្ដរជាតិ”៕

China Mobile holds massive Chinese listing after leaving Wall Street

Hong Kong: China Mobile’s stock rose on its first day of trading in Shanghai, where it was forced to retreat to after being booted off Wall Street a year ago.

Shares of the Chinese telecom giant were up 1.8% on Wednesday after it pulled off mainland China’s biggest listing in 10 years, according to Dealogic.
The company had earlier raised about 48.7 billion yuan ($7.64 billion), a figure that could go even higher to 56 billion yuan ($8.8 billion) if an over-allotment option is taken by early February.
China Mobile’s shares were trading at 58.64 yuan ($9.23) apiece in Shanghai as of 2:34 p.m. local time. The company’s stock in Hong Kong, where it also trades, jumped 4.3%, too.
The massive debut makes for one of the world’s biggest equity offerings in recent months — and a splashy homecoming for China Mobile.
Last year, the firm, along with two other Chinese state-run telecom providers — China Telecom and China Unicom — were kicked off the New York Stock Exchange, after the Trump administration barred American investment in companies with ties to the Chinese military.

US President Joe Biden signed an executive order in June that expanded the ban.
Since then, China Telecom, the country’s second largest telecom firm, has also listed in Shanghai. Its $7.4 billion raise last year was one of mainland China’s biggest on record, too, according to Dealogic.
Meanwhile, China Unicom already trades in Shanghai and Hong Kong, while both China Mobile and China Telecom are listed in Hong Kong.
Mainland investors had been eyeing a comeback for China Mobile since last month, when the company said that it had received approval from Chinese regulators to move ahead with its latest share sale in Shanghai.
It also announced plans in a stock exchange filing Tuesday to buy back up to 10% of its Hong Kong-listed shares.
In August, the firm said that it would use its new funds to shore up its 5G capabilities, as well as cloud infrastructure and smart home projects.
It disclosed plans to use roughly half the money it planned to raise in Shanghai on wireless technology, and build at least 500,000 5G base stations by 2022.

Source: CNN

តើកាមេរ៉ាចាប់ល្បឿនរបស់ក្រសួងលើផ្លូវជាតិលេខ៣មានសមត្ថភាពខ្ពស់ដល់កម្រិតណា?

ដោយៈ សុផារី

ភ្នំពេញៈ កាមេរ៉ាចាប់ល្បឿនឆ្លាតវៃ ១០ទីតាំង និងភ្លើងសញ្ញាចរាចរ​ណ៍បច្ចេកវិទ្យាទំនើបលើផ្លូវជាតិលេខ៣ ត្រូវបានចាប់ផ្តើមដំឡើងចាប់ពីថ្ងៃទី០៤ ខែសីហា ឆ្នាំ២០២១ និងបានបញ្ចប់នៅថ្ងៃទី០៦ ខែវិច្ឆិកា ឆ្នាំ២០២១ នៅលើកំណាត់ផ្លូវជាតិលេខ៣។

ផ្លូវជាតិលេខ៣ បើគិតពីតំបន់ចោមចៅ ដល់ខេត្តកំពត មានប្រវែងសរុប១៣៥គីឡូម៉ែត្រ ក្នុងនោះពីចោមចៅដល់បែកគូសជាផ្លូវ៤គន្លង មានចំនួន៤ទីតាំង និងកំណាត់ផ្លូវពីបែកគូស ទៅទីរួមខេត្តកំពត ជាផ្លូវ២គន្លង មានចំនួន៦ទីតាំង។

តើកាមេរ៉ាចាប់ល្បឿនទាំងនោះ មានសមត្ថភាពខ្ពស់ដល់កម្រិតណា? បើតាមការបញ្ជាក់របស់ក្រសួងសាធារណការ និងដឹកជញ្ជូន កាមេរ៉ាចាប់ល្បឿនទាំងនេះ​​​ អាចឱ្យមន្រ្តីជំនាញដឹងនូវល្បឿនរបស់រថយន្ត ពណ៌ ប្រភេទ និងស្លាកលេខរថយន្ត អ្នកបើកបរមិនពាក់ខ្សែក្រវ៉ាត់ការពារ និងប្រើទូរសព្ទពេលបើកបរ។

មុននឹងដាក់ប្រើប្រាស់ផ្លូវការ អាជ្ញាធរពាក់ព័ន្ធ នឹងខិតខំអប់រំផ្សព្វផ្សា​យ ជូនដំណឹងដល់បងប្អូនប្រជាពលរដ្ឋ ឱ្យបានដឹងអំពីច្បាប់ចរាចរណ៍ និងការដាក់កាមេរ៉ាចាប់ល្បឿន ហើយអាជ្ញាធរនឹងបំពាក់ផ្លាកសញ្ញា ជូនដំណឹងដល់អ្នកបើកបរយ៉ាងតិច១គីឡូម៉ែត្រ មុនដល់ទីតាំងកាមេរ៉ាចាប់ល្បឿន៕

អ្នកវិទ្យាសាស្ត្ររកឃើញវីរុសកូវីដបំប្លែងខ្លួនថ្មី មួយប្រភេទទៀតហើយ

ដោយៈ សុធារី

អន្តរជាតិៈ វីរុសកូវីដបំប្លែងខ្លួនថ្មីមួយទៀត មានឈ្មោះថា IHU ត្រូវបានគេរកឃើញនៅប្រទេសបារាំង ហើយមានការប្រែប្រួលចំនួន៤៦ដង និងត្រូវបានគេជឿថាងាយឆ្លង និងធន់ជាមួយវ៉ាក់សាំង។

វីរុសបំប្លែងខ្លួនប្រភេទ B.1.640.2. ត្រូវបានរកឃើញដំបូងដោយអ្នកវិទ្យាសាស្ត្រ នៅវិទ្យាស្ថានមន្ទីរពេទ្យសាកលវិទ្យាល័យមេឌីទែរ៉ាណេ (IHU) កាលពីថ្ងៃទី១០ ខែធ្នូ ឆ្នាំ២០២១ ដោយពូកគេបានប្រកាសនៅលើ Twitter ថា ពួកគេបានរកឃើញវីរុសបំប្លែងខ្លួនថ្មី​​ នៅក្នុងអ្នកជំងឺមកពីតំបន់ Forcalquier ក្នុងទីក្រុង Alpes-de-Haute-Provence។ ប៉ុន្តែវាទើបតែត្រូវបានលើកមកនិយាយជាអន្តរជាតិ បន្ទាប់ពីទទួលបានការចាប់អារម្មណ៍ពីអ្នកជំនាញពិភពលោក។

សារព័ត៌មាន Bloomberg បានរាយការណ៍ថា មេរោគបំប្លែងថ្មី IHU ត្រូវបានកំណត់អត្តសញ្ញាណ នៅក្នុងមនុស្ស១២នាក់នៅភាគខាងត្បូងភ្នំអាល់ ស្របពេលដូចគ្នាដែលOmicron ត្រូវបានរកឃើញនៅអាហ្វ្រិកខាងត្បូងកាលពីឆ្នាំមុន។

មេរោគបំប្លែង IHU ថ្មីនេះ ដែលត្រូវបានគេជឿថា មានទំនាក់ទំនងជាមួយ ការធ្វើដំណើរទៅកាន់ប្រទេសកាម៉េរូន នៅក្នុងទ្វីបអាហ្រ្វិក ដែលយ៉ាងហោចណាស់មានចំនួន១២ករណី ត្រូវបានរកឃើញនៅជិតតំបន់ Marseilles​។

ប្រភពដដែលបានរាយការណ៍ថា “អ្នកជំងឺដំបូងគេដែលកំណត់អត្តសញ្ញាណជាមួយមេរោគបំប្លែ IHU ថ្មីនេះ បានចាក់វ៉ាក់សាំងហើយ និងទើបតែត្រលប់មកពីប្រទេសកាម៉េរូន”។

សារព័ត៌មាន news.com.au បានរាយការណ៍ថា “ទោះជាយ៉ាងណាក៏ដោយ គេកត់សម្គាល់ឃើញថា មេរោគថ្មីនេះហាក់ដូចជាមិនរីករាលដាលយ៉ាងឆាប់រហ័សនោះទេ”៕