ដោយៈសុខុម

ភ្នំពេញ: សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហោះសារមួយលើទំព័រហ្វេសប៊ុកផ្លូវការរបស់សម្ដេចកាលពីថ្ងៃព្រហស្បតិ៍ ទី២៨ តុលា “ការប្រជុំលើកទី៣៨ និងលើកទី៣៩ ត្រូវបានបិទបញ្ចប់ជាមួយ នឹងការទទួលជាប្រធានប្តូរវេនអាស៊ាន របស់កម្ពុជា សម្រាប់ឆ្នាំ២០២២”។

សម្ដេចបានសរសេរបន្ថែមទៀតថា “ខ្ញុំជានាយករដ្ឋមន្ត្រីកម្ពុជា មួយរូបដែលបានកាន់ញញួរប្រធានអាស៊ាន រហូត៣ដង ដែលខ្ញុំសូមយកឱកាសនេះថ្លែងអំណរគុណចំពោះបងប្អូនជនរួមជាតិ ដែលបានគាំទ្រដល់រូបខ្ញុំក្នុងការដឹកនាំកម្ពុជា ដែលធ្វើឱ្យខ្ញុំមានលទ្ធភាព ចូលរួមក្នុងកិច្ចការតំបន់ និងអន្តរជាតិតាមរយៈអាស៊ាន”។

ទន្ទឹមនេះ លោក ប្រាក់ សុខុន រដ្ឋមន្ត្រីការបរទេសកម្ពុជា បានថ្លែងប្រាប់សារព័ត៌មានបរទេសក្នុងថ្ងៃដដែលថា ប្រទេសកម្ពុជា ក្នុងឋានៈជាប្រធានប្ដូរវេនថ្មីរបស់អាស៊ាន នឹងបន្តជំរុញឱ្យក្រុមមេដឹកនាំយោធារបស់មីយ៉ាន់ម៉ា បើកការចរចាជាមួយក្រុមប្រឆាំងនឹងខ្លួន។ នេះបើយោងតាមការចុះផ្សាយរបស់សារព័ត៌មាន CNA។

លោករដ្ឋមន្ត្រីបានព្រមានថា ប្រទេសមីយ៉ាន់ម៉ា កំពុងស្ថិត “លើមាត់ជ្រោះនៃសង្គ្រាមស៊ីវិល” ហើយថាកម្ពុជា នឹងចាត់តាំងបេសកជនពិសេសថ្មីមួយរូបទៅកាន់ប្រទេសមីយ៉ាន់ម៉ា ដើម្បីចាប់ផ្តើមការងារនៅដើមឆ្នាំក្រោយ នៅពេលកម្ពុជា ចូលកាន់តំណែងស៊ប់ជាប្រធានប្ដូរវេនអាស៊ាន។

លោក Erywan Yusof គឺជាបេសកជនបច្ចុប្បន្ន តំណាងឱ្យប្រទេសព្រុយណេ ដែលជាប្រធានប្ដូរវេនជិតចប់អាណត្តិរបស់អាស៊ាន។

លោក ប្រាក់ សុខុន បានថ្លែងប្រាប់ទីភ្នាក់ងារព័ត៌មាន Reuters ថា “ខណៈយើងទាំងអស់គ្នា គោរពគោលការណ៍ នៃការមិនជ្រៀតជ្រែកចូលកិច្ចការផ្ទៃក្នុងរបស់បណ្ដាប្រទេសជាសមាជិក ស្ថានភាពក្នុងប្រទេសមីយ៉ាន់ម៉ា នៅតែបន្តជាប្រធានបទមួយ ដែលគួរឱ្យព្រួយបារម្ភយ៉ាងខ្លាំង”។

លោកបានបន្ថែមថា “វាជះផលប៉ះពាល់ជាអវិជ្ជមានមកលើតំបន់ ភាពគួរឱ្យជឿជាក់នៃសមាគម (អាស៊ាន) និងមកលើប្រជាជនមីយ៉ាន់ម៉ា ដែលជាបងប្អូនរបស់យើង”។

នៅក្នុងចំណាត់ការ ដ៏គួរឱ្យភ្ញាក់ផ្អើលមិនធ្លាប់មាន អាស៊ាន បានធីបចោ លលោក Min Aung Hlaing មេដឹកនាំយោធាមីយ៉ាន់ម៉ា មិនឱ្យចូលរួមកិច្ចប្រជុំកំពូលអាស៊ី ជាបន្តបន្ទាប់ដែលអាស៊ាន ខ្លួនឯងធ្វើជាម្ចាស់ផ្ទះក្នុងសប្តាហ៍នេះ។

នាយឧត្តមសេនីយ Min Aung Hlaing ដែលបានដឹកនាំរដ្ឋប្រហារបង្ហូរឈាមថ្ងៃទី០១ កុម្ភៈ ដើមឆ្នាំនេះ ត្រូវបានធីបចោល មិនឱ្យចូលរួមកិច្ចប្រជុំនានារបស់អាស៊ាន ដោយសារលោកមិនគោរពការប្តេជ្ញាចិត្តរបស់ខ្លួន ចំពោះអាស៊ានថា នឹងបញ្ឈប់អំពើហិង្សា ចាប់ផ្ដើមកិច្ចចរចា និងអនុញ្ញាតឱ្យជំនួយមនុស្សធម៌ ព្រមទាំងបេសកជនអាស៊ាន ចូលក្នុងប្រទេសមីយ៉ាន់ម៉ា៕ Reuters៕

         ដោយៈគង់ សូរិយា

         ភ្នំពេញៈ អគ្គនាយកក្រុមហ៊ុនLSCG លោកលី សុខឆាយបានសហការជាមួយក្រុមហ៊ុនចិន ដោយបោះទុនរួមគ្នា១០លានដុល្លារអាមេរិក ដើម្បីចូលហ៊ុនជាមួយក្រុមហ៊ុនថៃ ប៊ុនរ៉ុង ដើម្បីបង្កើនផលិតភាពស៊ីម៉ងត៍របស់ក្រុមហ៊ុននេះ។

លោកលី សុខឆាយបានមានប្រសាសន៍ឲ្យដឹង តាមបណ្តាញតេឡេក្រាមនារសៀ​លថ្ងៃទី២៨ តុលានេះថា លោកនិងសេដ្ឋីចិនបានសហការគ្នា ដើម្បីចូលហ៊ុនជាមួយក្រុមហ៊ុនផលិតស៊ីម៉ងត៍ នៃក្រុមហ៊ុនថៃ ប៊ុនរ៉ុង ដើម្បីបង្កើនការផលិតស៊ីម៉ងត៍ ក្នុងន័យឆ្លើយតបនឹងកំណើននៃតម្រូវការក្នុងស្រុក ដោយសារវិស័យសំណង់កម្ពុជាកំពុងមានភាពរីកចម្រើន និងធ្វើឲ្យមានតម្រូវការស៊ីម៉ងត៍កាន់តែច្រើន។

លោកបន្តថា “យើងផ្តោតលើមូលដ្ឋានផលិតកម្ម ជាមួយនឹងទំនុកចិត្តលើគុណភាពស៊ីម៉ងត៍ និងធ្វើយ៉ាងណាឲ្យការផលិតឆ្លើយតប នឹងតម្រូវការរបស់ទីផ្សារពិតប្រាកដ”។លោកបន្តថា “ជាមួយគ្នានេះ យើងនឹងផ្តល់នូវតម្លៃមានភាពប្រកួតប្រជែងមួយ ជាមួយ គុណភាពផលិតផលតាមស្តង់ដាអន្តរជាតិ”។

បច្ចុប្បន្នកម្ពុជាមានរោងចក្រផលិតស៊ីម៉ងត៍កាន់តែច្រើន ដែលឆ្លើយតបនឹងតម្រូវ​ការក្នុងស្រុក ពិសេសបានចូលរួមកាត់បន្ថយការពឹងផ្អែក ការនាំចូលស៊ីម៉ងត៍ពីប្រទេសជិតខាងផងដែរ៕

         ដោយៈស៊ីវ ម៉េង

         ភ្នំពេញៈ បណ្តាខេត្តមួយចំនួនបាន និងកំពពុងស្ថិតក្នុងគោលដៅវវិនិយោគរយៈពេលវែង លើវិស័យអចលនទ្រព្យ និងសកម្មភាពសេដ្ឋកិច្ចដទៃទៀត ស្របពេលរដ្ឋាភិបាល​បានដាក់ចេញគោលនយោបាយថ្មីៗ និងអភិវឌ្ឍន៍ហេដ្ឋារចនាសម្ព័ន្ឋជាបន្តបន្ទាប់។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ឲ្យដឹងនារសៀលថ្ងៃទី២៨ តុលានេះថា បណ្តាខេត្តមានសក្តានុពលសេដ្ឋកិច្ច និងអចលនទ្រព្យរយៈពេលវែង មានដូចជា ខេត្តព្រះសីហនុ បាត់ដំបង កំពត កែប និងមណ្ឌលគិរី ដែលបច្ចុប្បន្នអ្នកវិនិយោគជាច្រើនបាន និងកំពុងឆ្ពោះទៅកាន់គោល​ដៅទាំងនោះ។

លោកបន្តថា “សំរាប់សកម្មភាពទិញលក់ដីធ្លី នៅតែមានភាពសកម្មនៅតាមខេត្តទាំងនោះ បើទោះជាក្នុងបរិបទកូវីដ១៩ក្តី ប៉ុន្តែអ្នកវិនិយោគនៅតែបន្តវិនិយោគ ដើម្បីរក​ផលចំណេញ ពិសេសលើអចលនទ្រព្យមានតម្លៃក្រោមទីផ្សារ”។លោកបន្តថា “ចរនត្នៃការវិនិយោគនៅកម្ពុជា នៅតែបន្តមានការវិនិយោគទាំងក្នុងក្រុង និងតំបន់ជាយក្រុង”។

លោកច្រឹក សុខនីមបានបន្តថា ការបើកប្រទេសឡើងវិញនាពេលឆាប់ៗនេះ វិស័យឯកជនមានភាពរីករាយ និងស្វាគមន៍យន្តការថ្មីរបស់រាជរដ្ឋាភិបាល ប៉ុន្តែទោះជាយ៉ាងណាកិច្ចការទាំងអស់នេះ គឺចាប់ផ្តើមពីអ្នកក្នុងស្រុកសិន ហើយសម្រាប់អ្នកវិនិយោគបរទេស ពួកគេនឹងអាចមកវិញ នៅពេលស្ថានភាពការចាក់វ៉ាក់សាំងនៅតាមប្រទេសទាំងនោះមានភាពល្អប្រសើរ។

ជាមួយគ្នានេះ លោកឧកញ៉ាសំ សុខនឿនប្រធានសមាគមអចលនទ្រព្យសកលបានមានប្រសាសន៍សម្តែងក្តីរីករាយផងដែរ នៅក្នុងឱកាសដែលប្រមុខរដ្ឋាភិបាលកម្ពុជាប្រកាសបើកសេដ្ឋកិច្ច និងទេសចរណ៍ឡើងវិញ ដោយលោកបានមើលឃើញចរន្តសេដ្ឋកិច្ច ពិសេសការទិញលក់ក្នុងវិស័យអចលនទ្រព្យ បានកើនឡើងវិញយ៉ាងប្រសើរ។

លោកបន្តថា “ពេលនេះអ្នកវិនិយោគ ពួកគេបានចាប់ផ្តើមបញ្ចេញកញ្ចប់លុយដែលផ្អឹបទុក យកមកវិនិយោគលើវិស័យអចលនទ្រព្យបណ្តើរៗឡើងវិញហើយ”៕

ដោយៈសុខុម

សឹង្ហបុរី: ក្រុមហ៊ុនជប៉ុន Mitsubishi Power ដែលជាបុត្រសម្ព័ន្ធរបស់ក្រុមហ៊ុនឧស្សាហកម្មធុនធ្ងន់ Mitsubishi Heavy Industries បាននិយាយនៅថ្ងៃព្រហស្បតិ៍ ទី២៨ តុលា នេះថា ខ្លួនបានចាប់ផ្តើមដំណើរការពាណិជ្ជកម្មហើយ នូវទួបីនផលិតអគ្គិសនីដើរដោយឧស្ម័នធម្មជាតិកម្លាំង៥០០មេហ្គាវ៉ាត់ (MW) ក្នុងរោងចក្រអគ្គិសនី Muara Karang Power Plant របស់ប្រទេសឥណ្ឌូនេស៊ី។

ឥណ្ឌូនេស៊ី ដែលជាប្រទេសនាំចេញធ្យូងថ្ម ធំបំផុតរបស់ពិភពលោក កំពុងរៀបចំផែនការឆ្ពោះទៅរកការបោះបង់រោងចក្រអគ្គិសនី ដើរដោយថាមពលធ្យូងថ្មរបស់ខ្លួនបន្តិចម្តងៗ ដើម្បីចូលរួមចំណែកជាមួយពិភពលោក ឆ្ពោះទៅរកការកាត់បន្ថយការបំភាយឧស្ម័នកាបូនឱ្យមកនៅកម្រិតសូន្យត្រឹមឆ្នាំ២០២៦។

ប្រព័ន្ធទួប៊ីនផលិតអគ្គិសនីដើរ ដោយឧស្ម័នធម្មជាតិថ្មី (GTCC) នេះត្រូវបានសាងសង់ឡើងសម្រាប់រោងចក្រអគ្គិសនី Muara Karang Power Plant ដែលអាចស្ថិតក្នុងចំណោមរោងចក្រអគ្គិសនីដំបូងៗ គេក្នុងប្រទេសឥណ្ឌូនេស៊ី ដែលនឹងឈប់ប្រើប្រាស់ធ្យូងថ្មនៅត្រឹមឆ្នាំ២០៣០។

លោក Kazuki Ishikura ប្រធានក្រុមហ៊ុន Mitsubishi Power Indonesia ប្រចាំប្រទេសឥណ្ឌនេស៊ីបានថ្លែងថា “ក្រុមហ៊ុន Mitsubishi Power ប្តេជ្ញាគាំទ្រដល់តម្រូវការដែលកំពុងកើនឡើងនេះ នៅក្នុងប្រទេសឥណ្ឌូនេស៊ី ជាមួយនឹងបច្ចេកវិទ្យាទួប៊ីនផលិតអគ្គិសនីដើរដោយឧស្ម័នរបស់យើង ដែលអាចកាត់បន្ថយការបំភាយឧស្ម័នផ្ទះកញ្ចក់បានច្រើន បើធៀបទៅនឹងរោងចក្រអគ្គិសនីដើរដោយថាមពលធ្យូងថ្ម”។

រោងចក្រអគ្គិសនី Muara Karang Power Plant ដែលគ្រប់គ្រងដោយក្រុមហ៊ុនអគ្គិសនីរបស់រដ្ឋ Perusahan Listrik Nasional នេះមានទីតាំងស្ថិតនៅចម្ងាយប្រមាណ១០គីឡូម៉ែត្រពីរដ្ឋធានីហ្សាកាតា និងផ្គត់ផ្គង់តម្រូវការអគ្គិសនីនៅក្នុងទីក្រុងនេះ។

ក្រុមហ៊ុន Mitsubishi Power បានចេញសេចក្តីថ្លែងការណ៍ថា គម្រោងនេះក៏ជាផ្នែកនៃកម្មវិធីប្រកបដោយមហិច្ឆតា របស់រដ្ឋាភិបាលឥណ្ឌូនេស៊ី ឆ្ពោះទៅរកការអភិវឌ្ឍថាមពលថ្មីឱ្យបានរហូតដល់ទៅ៣៥ជីហ្គាវ៉ាត់ (GW)។

ប្រទេសឥណ្ឌូណេស៊ី មានផែនការបន្ថែមថាមពលអគ្គិសនី ឱ្យបាន៣៥ជីហ្គាវ៉ាត់ (GW) នៅត្រឹមឆ្នាំ២០២៩ ប៉ុន្តែខ្លួនសម្រេចបានតែ៣០.២% នៃគោលដៅប៉ុណ្ណោះគិតត្រឹមដំណាច់ខែកញ្ញា៕  Reuters៕

ដោយៈ សុធារី

ភ្នំពេញៈ ខណៈដែលកម្ពុជាកំពុងត្រៀមលក្ខណៈ ទទួលទេសចរណ៍វ៉ាក់សាំង នាចុងខែវិច្ឆិកា ឆ្នាំ២០២១ ខាងមុខនោះ រាជរដ្ឋាភិបាលបានដាក់អនុសាសន៍មួយចំនួន ដល់ក្រសួង-ស្ថាប័ន និងដៃគូពាក់ព័ន្ធរួមគ្នា សម្រេចឱ្យបាននូវផែនការនេះ ក្នុងនោះក៏បានស្នើក្រសួងទេសចរណ៍ និងផ្នែកឯកជនក្នុងវិស័យទេសចរណ៍ បន្តការខិតខំទាក់ទាញភ្ញៀវទេសចរ ពីប្រភពទីផ្សារអន្តរជាតិដែលមានសុវត្ថិភាព និងហានិភ័យទាបផងដែរ។

ការដាក់ចេញអនុសាសន៍នេះ ត្រូវបានធ្វើឡើងក្នុងពិធីប្រកាសផ្សព្វផ្សាយដាក់ឱ្យអនុវត្តន៍ “ផែនការយុទ្ធសាស្ត្រស្តីពីការបើកទទួលទេសចរណ៍វ៉ាក់សាំង” នាព្រឹកថ្ងៃទី២៨ ខែសីហា ឆ្នាំ២០២១ ក្រោមអធិបតីភាពលោក អូន ព័ន្ធមុនីរ័ត្ន ឧបនាយករដ្ឋមន្ត្រីរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការជាតិ អភិវឌ្ឍន៍ទេសចរណ៍ ដោយមានការចូលរួមពីលោក ថោង ខុន រដ្ឋមន្រ្តីក្រសួងទេសចរណ៍ និងជាប្រធានក្រុមការងាររាជរដ្ឋាភិបាល និងឯកជន ដើម្បីស្តារនិងលើកស្ទួយវិស័យទេសចរណ៍ក្នុង និងក្រោយវិបត្តិជំងឺកូវីដ-១៩ ព្រមទាំងមានមន្ត្រីពាក់ព័ន្ធមួយចំនួនទៀត ដែលបានធ្វើឡើងតាមប្រព័ន្ធវីដេអូពីចម្ងាយ។

ការបើកទទួលទេសចរណ៍វ៉ាក់សាំងនេះ នឹងចាប់ផ្ដើមឡើងនាថ្ងៃទី៣០ ខែវិច្ឆិកា ឆ្នាំ២០២១ ក្នុងនោះរាជរដ្ឋាភិបាលកម្ពុជា បានកំណត់គោលដៅចំនួន៣ សម្រាប់បើកទទួលទេសចរអន្តរជាតិ ដែលបានចាក់វ៉ាក់សាំងហើយនេះ ក្នុងនោះរួមមានក្រុងព្រះសីហនុ ក្រុងកោះរ៉ុង នៃខេត្តព្រះសីហនុ និងតំបន់វិស្សមកាលតារាសាគរ នៃស្រុកបទុមសាគរ ខេត្តកោះកុង។

ដើម្បីជំរុញការអនុវត្តផែនការយុទ្ធសាស្ត្រស្តីពី ការបើកទទួលទេសចរណ៍វ៉ាក់សាំង និងវិធានការគោលនយោបាយ ជំរុញចលនាទេសចរណ៍ផ្ទៃក្នុង ឆ្នាំ២០២១-២០២៣ ឱ្យសម្រេចបានជោគជ័យ ប្រកបដោយប្រសិទ្ធភាព និងស័ក្តិសិទ្ធភាព លោក អូន ព័ន្ធមុនីរ័ត្ន បានដាក់ចេញនូវអនុសាសន៍ដូចជា ទី១ ស្នើរដ្ឋបាលខេត្តព្រះសីហនុ និងរដ្ឋបាលខេត្តកោះកុង សហការជាមួយក្រសួង-ស្ថាប័នពាក់ព័ន្ធរៀបចំ ឱ្យបានរួចរាល់នូវការបើកទទួលភ្ញៀវទេសចរអន្តរជាតិ ក្នុងក្របខណ្ឌនៃកម្មវិធីទេសចរណ៍វ៉ាក់សាំង ចាប់ពីថ្ងៃទី៣០ ខែវិច្ឆិកា ឆ្នាំ២០២១ នេះតទៅ ដោយការចាប់ផ្តើមដំបូងនៅក្រុងព្រះសីហនុ ក្រុងកោះរ៉ុង នៃខេត្តព្រះសីហនុ និងតំបន់តារាសាគរ នៃខេត្តកោះកុង។ ទន្ទឹមនេះ ស្នើរដ្ឋបាលខេត្តសៀមរាបសហការ ជាមួយក្រសួង-ស្ថាប័នពាក់ព័ន្ធ និងត្រៀមលក្ខណសម្បត្តិឱ្យបានរួចរាល់ ក្នុងការបើកទទួលទេសចរណ៍វ៉ាក់សាំងនៅក្នុងខែមករា ឆ្នាំ២០២២។

ទី២ ស្នើក្រសួងទេសចរណ៍ និងផ្នែកឯកជនបន្តការខិតខំទាក់ទាញភ្ញៀវទេសចរគោលដៅពីប្រភពទីផ្សារអន្តរជាតិ ដែលមានសុវត្ថិភាព និងហានិភ័យទាប ព្រមទាំងធ្វើពិពិធកម្មផលិតផល និងសេវាកម្មទេសចរណ៍ ស្របតាមបរិបទថ្មីនៃតម្រូវការ និងការផ្គត់ផ្គង់របស់ទីផ្សារទេសចរណ៍អន្តរជាតិ និងផ្ទៃក្នុង។ ជាមួយគ្នានេះ ស្នើក្រសួងការបរទេស និងសហប្រតិបត្តិការអន្តរជាតិ ជំរុញសកម្មភាពលើផ្នែក «ការទូតទេសចរណ៍» តាមរយៈការលើកកម្ពស់កិច្ចសហប្រតិបត្តិការ ជាមួយបណ្តាប្រទេស ដែលជាប្រភពទីផ្សារទេស​ចរណ៍សំខាន់ៗរបស់កម្ពុជា។

ទី៣ ស្នើរដ្ឋបាលរាជធានី-ខេត្តរៀបចំគោលដៅទេសចរណ៍នានា ក្នុងដែនសមត្ថកិច្ចរបស់ខ្លួនឱ្យមានភាពទាក់ទាញ និងសុវត្ថិភាព ស្របតាមវិធីសាស្រ្តនៃការកំណត់តំបន់ ឬគោលដៅទេសចរណ៍សុវត្ថិភាព ក្នុងការទាក់ទាញភ្ញៀវទេសចរផ្ទៃក្នុង និងភ្ញៀវទេសចរអន្តរជាតិ។

លោក អូន ព័ន្ធមុនីរ័ត្ន បានបញ្ជាក់ថា បើពិនិត្យមើលទីផ្សារទេសចរណ៍ជារួម បន្ទាប់ពីការរីករាលដាលនៃជំងឺកូវីដ-១៩ ចលនាទេសចរអន្តរជាតិក្នុងកម្រិតតំបន់ និងសកលលោក មានការប្រែប្រួលជាមួយការផ្លាស់ប្តូរឥរិយាបថ ដោយមានទំនោរគិតគូរខ្ពស់លើកត្តាសុវត្ថិភាព ទំនុកចិត្តលើការជ្រើសរើសគោលដៅធ្វើដំណើរ និងការប្រើប្រាស់បច្ចេកវិទ្យា និងនវានុវត្តន៍ នៅក្នុងវិស័យទេសចរណ៍ទាំងក្នុងផ្នែកតម្រូវការ និងផ្នែកផ្គត់ផ្គង់។ ជាមួយនឹងនិន្នាការថ្មីនេះ រាជរដ្ឋាភិបាលក៏បានដាក់ចេញនូវ“ផែនទីចង្អុលផ្លូវស្តីពីផែនការស្តារ និងលើកស្ទួយវិស័យទេសចរណ៍កម្ពុជា ក្នុងនិងក្រោយវិបត្តិជំងឺកូវីដ-១៩។

លោកបានបន្ថែមថា ស្ថិតក្នុងបរិការណ៍នេះ ផែនការយុទ្ធសាស្ត្រស្តីពីការបើកទទួលទេសចរណ៍វ៉ាក់សាំង និងវិធានការគោលនយោបាយជំរុញចលនា ទេសចរផ្ទៃក្នុង ឆ្នាំ២០២១-២០២៣ ត្រូវបានរៀបចំឡើងដោយឈរលើគោលការណ៍ រក្សាបាននូវតុល្យ​ភាពរវាងសកម្មភាពសង្គម-សេដ្ឋកិច្ច និងការធានាសុវត្ថិភាព និងសុខភាពសាធារណៈសម្រាប់ប្រជាពលរដ្ឋ និងភ្ញៀវទេសចរ៕

ដោយ៖ សុផារី

ភ្នំពេញ៖ សម្តេចពញាចក្រី ហេង សំរិនប្រធានរដ្ឋសភា បានលើកទឹកចិត្តដល់សហរដ្ឋអាមេរិក បន្តផ្តល់អាហារូបករណ៍ និងឱកាសបណ្តុះបណ្តាលដល់និស្សិត និងអ្នកដឹកនំាវ័យក្មេងកម្ពុជា ដោយកម្ពុជាផ្តល់អាទិភាព ដល់សេដ្ឋកិច្ច ផ្អែកលើចំណេះដឹង ក្នុងឱកាសជួបពិភាក្សាការងារជាមួយលោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា នៅវិមានរដ្ឋសភា នាព្រឹកថ្ងៃទី ២៨ ខែតុលា ឆ្នាំ២០២១។

សម្តេចពញាចក្រី ហេង សំរិន បានសម្តែងការកោតសរសើរ ឯកឧត្តមឯកអគ្គរដ្ឋទូត ដែលបានខិតខំប្រឹងប្រែងនៅក្នុងការបំពេញបេសកកម្មការទូតនៅកម្ពុជា ដែលក្នុងរយៈពេលជាងពីរឆ្នាំមកនេះបានធ្វើឱ្យយកិច្ចសហប្រតិបត្តិការជាច្រើនវិស័យរវាងប្រទេសទាំងពីរ បានជំរុញ លើកកម្ពស់ និងមានការវិវឌ្ឍរីកចម្រើនគួរឱ្យកត់សម្គាល់។ សម្តេចជឿជាក់ថា ទំនាក់ទំនង ប្រជាជនទំាងពីរប្រទេស ក៏ដូចជាកិច្ចសហប្រតិបត្តិការរវាងកម្ពុជានិងអាម៉េរិក ដែលមានជាង៧០ឆ្នាំមកនេះ នឹងកាន់តែរីកលូតលាស់ ប្រកបដោយផ្លែផ្កាថែមទៀត។
លោក Patrick Murphy អបអរសាទរដល់រាជរដ្ឋាភិបាលកម្ពុជាបានខិតខំចាក់វ៉ាក់សំាងប្រឆាំងកូវីដ-១៩ ជូនពលរដ្ឋបានក្នុងកម្រិតខ្ពស់និងឈានដល់ការបើកដំណើរការសកម្មភាពសង្គមនិងសេដ្ឋកិច្ចជាបណ្តើរៗឡើងវិញ។
លោកបានបន្តថា សហរដ្ឋអាមេរិកជាប្រទេសមួយ ដែលបានចូលរួមយ៉ាងសកម្មជួយដល់វិស័យសុខាភិបាលនៅកម្ពុជា ពិសេសនៅកំឡុងពេលនៃការរាលត្បាតជំងឺកូវីដ១៩នេះ អាមេរិកបានផ្តល់វ៉ាក់សំាង Johnson & Johnson ជូនកម្ពុជាប្រមាណជាង១លានដូស តាមយន្តការអង្គការសុខភាពពិភពលោក។
សម្តេចពញាចក្រី ហេង សំរិន ក៏បានថ្លែងអរគុណជ្រាលជ្រៅចំពោះសហរដ្ឋអាមេរិក ដែលបានផ្តល់ជំនួយអភិវឌ្ឍន៍ដល់កម្ពុជា មានជាអាទិ៍លើ វិស័យសុខាភិបាល អប់រំ បរិស្ថាន វប្បធម៌ កសិកម្ម និងការបោសសំអាតមីនជាដើមនោះ ពិសេសវ៉ាក់សាំងប្រឆាំងកូវីដ-១៩៕