ដោយៈសុខុម

ញូវយ៉ក: ក្រុមហ៊ុនប្រព័ន្ធផ្សព្វផ្សាយ Digital World Acquisition Corp ដែលមានទំនាក់ទំនងជាមួយ អតីតប្រធានាធិបតីសហរដ្ឋអាមេរិក ដូណាល់ ត្រាំ កំពុងត្រូវប៉ាន់យ៉ាងខ្លាំង ដោយភាគហ៊ុនរបស់ក្រុមហ៊ុននេះ ត្រូវបានគេសម្រុកទិញយ៉ាងផុសផុល ដែលធ្វើឱ្យតម្លៃហក់ឡើងខ្ពស់។

យោងតាមសារព័ត៌មាន Aljazeera ដែលបានចុះផ្សាយនៅថ្ងៃសុក្រ ទី២៥ តុលាបាន​ឱ្យដឹងថា ភាគហ៊ុនរបស់ក្រុមហ៊ុននេះ បានហក់ឡើងខ្ពស់កប់ពពក រហូតដល់ទៅ១.២២៥% ចាប់តាំងពីមានការប្រកាសថា ក្រុមហ៊ុននេះនឹងច្របាច់បញ្ចូលគ្នាជាមួយក្រុមហ៊ុន Trump Media & Technology Group របស់លោក ដូណាល់ ត្រាំ។

ភាគហ៊ុនរបស់ក្រុមហ៊ុន Digital World Acquisition Corp បានហក់ឡើងជិត៣ដងដល់១៣១,៩០ដុល្លារ ក្នុង១ភាគហ៊ុន នៅពេលទីផ្សារហ៊ុនអាមេរិក បានបើកការជួញដូរកាលពីព្រឹកថ្ងៃសុក្រ ទី២២ តុលា ក្រោយពីហក់ឡើង៤ដង កាលពីថ្ងៃព្រហស្បតិ៍ ទី២១ តុលា។

ក្រុមអ្នកគាំទ្ររបស់លោក ដូណាល់ ត្រាំ  លើប្រព័ន្ធផ្សព្វផ្សាយសង្គមបានសម្រុកទិញភាគហ៊ុនរបស់ក្រុមហ៊ុននេះតាម Reddit និង StockTwits។ កាលពីថ្ងៃព្រហស្បតិ៍ ទី២១ តុលា ក្រុមហ៊ុននេះ បានជាប់កំពូលតារាងរបស់Fidelity ជាភាគហ៊ុនដែលទទួលបានការបញ្ជាទិញភាគហ៊ុនច្រើនជាងគេ រហូតដល់ទៅប្រមាណ៥៥.០០០ពីអតិថិជន។ ហើ​យកាលពីថ្ងៃសុក្រ ទី២២ តុលា ការបញ្ជាទិញជាង២០.០០០ត្រូវបានចុះឈ្មោះលើ Platform របស់ Fidelity។

យោងតាមសេចក្ដីប្រកាសព័ត៌មានឱ្យដឹងថា ក្រុមហ៊ុនដែលច្របាច់បញ្ចូលគ្នាថ្មីមានឈ្មោះថា Truth Social របស់អតីតប្រធានាធិបតី ដូណាល់ ត្រាំ នឹងចាប់ផ្ដើមដំណើរការនៅត្រីមាសទី១ ដើមឆ្នាំ២០២២។

ភាគហ៊ុននៃក្រុមហ៊ុន Digital World Acquisition Corp ដែលមានតម្លៃលើទីផ្សារជាង៥០០លានដុល្លារនេះ ជាភាគហ៊ុនដែលត្រូវបានជួញដូរសកម្មបំផុត។

យោងតាមទិន្នន័យរបស់សារព័ត៌មាន Bloomberg បង្ហាញថា ភាគហ៊ុនប្រហែល៣៥លានភាគហ៊ុនរបស់ក្រុមហ៊ុននេះ ត្រូវបានជួញដូរគិតត្រឹមម៉ោង៩:៣០នាទីព្រឹកនៅក្រុងញូវយ៉ក៕  Bloomberg៕

         ដោយៈគង់ សូរិយា

         ភ្នំពេញៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី២៥ ខែតុលា ឆ្នាំ២០២១នេះ  បានអនុញ្ញាតឲ្យនាយកក្រុមហ៊ុន ហ័រឡុងតូជឺជីទួន (ខេមបូឌា) ឯ.ក និងសហការីចូលជួបសម្តែងការគួរសម និងពិភាក្សាការងារ ក្នុងគោលបំណង ដើម្បីសិក្សាស្វែងយល់ពីឱកាសវិនិយោគលើវិស័យកសិកម្ម និងបង្កើតវិទ្យាស្ថានស្រាវជ្រាវដំណាំត្រូពិច។

ក្រោយបញ្ចប់ជំនួបការងារនេះ លោករដ្ឋមន្រ្តី វេង សាខុន បានឲ្យដឹងថា ក្នុងនាមថ្នាក់ដឹកនាំក្រសួងកសិកម្ម លោកបានសម្តែងការស្វាគម ន៍ចំពោះវត្តមានរបស់ភ្ញៀវ និងគាំទ្រចំពោះកម្មវត្ថុវិនិយោគលើវិស័យកសិកម្ម ស្របពេលដែលវិស័យមួយនេះ បាននិងកំពុងត្រូវការអភិវឌ្ឍ លើអនុវិស័យសំខាន់ៗមួយចំនួន ដូចជា ហេដ្ឋារចនាសម្ព័ន្ធគាំទ្រ ការងារស្រាវជ្រាវ និងការកែច្នៃកសិផល។ល។ ឆ្លើយតបតាមតម្រូវការទីផ្សារក្នុងស្រុក និងទីផ្សារនាំចេញ លើសពីនេះវិស័យកែច្នៃកសិផលនឹងត្រូវ បានលើកកម្ពស់ មានតម្លៃផ្នែកសេដ្ឋកិច្ច ប្រើប្រាស់វត្ថុធាតុដើមក្នុងស្រុក ជាពិសេសស្រូបយកពលកម្មក្នុងស្រុក និងបង្កើនប្រាក់ចំណូល។ល។

លោករដ្ឋមន្ត្រីបានអំពាវនាវឲ្យវិស័យឯកជនចិន ចូលរួមវិនិយោគឲ្យបានពេញលេ​ញលើគ្រប់ខ្សែច្រវាក់ផលិតកម្ម កែច្នៃ និងហេដ្ឋារចនាសម្ព័ន្ធគាំទ្រ ធ្វើយ៉ាងណាច្បាមយកកាលានុវត្តភាព ដើម្បីចូលរួមជំរុញកំណើនសេដ្ឋកិច្ច និងនិរន្តរភាពផលិតកម្មកសិកម្ម ហើយសង្ឃឹមថា កសិផលកម្ពុជានឹងមានឱកាសបង្ហាញខ្លួន នៅលើទីផ្សារអន្តរជាតិកាន់តែច្រើនថែមទៀត ពិសេសទីផ្សារចិន ដោយឈរលើស្តង់ដារគុណភាព សុវត្ថិភាព និងការប្រកួតប្រជែង។

លោកនាយកក្រុមហ៊ុន ហ័រឡុងតូជឺជីទួន (ខេមបូឌា) ឯ.ក បានលើកឡើងថា កសិកម្មកម្ពុជាមានសក្តានុពល ប៉ុន្តែបញ្ហានៅត្រង់ថាមិនទាន់បានប្រើបច្ចេកវិទ្យា ដើម្បីបង្កើនផលិតភាពផលិតកម្ម ការងារស្រាវជ្រាវ និងកែច្នៃ ហេតុដូច្នេះហើយក្រុមហ៊ុនបានអញ្ជើញវិទ្យាស្ថានសំខាន់ៗចំនួនបី មកធ្វើការសិក្សាស្រាវជ្រាវ ទាក់ទងដំណាំឈើហូបផ្លែតំបន់ត្រូពិច។

វិទ្យាស្ថានទាំង៣ដែលគ្រោងបង្កើតនោះ រួមមានទី ១ វិទ្យាស្ថានស្រាវជ្រាវដំណាំអនុតំបន់ត្រូពិចខាងត្បូង ទី២ វិទ្យាស្ថានស្រាវជ្រាវ និងកែច្នៃផលិតផលកសិកម្ម និងទី៣Chinese Academy of Tropical Agricultural Science។ លោកនាយកក្រុមហ៊ុន បានស្នើក្រសួងជួយពិនិត្យពិចារណាទីតាំងដី សម្រាប់ធ្វើការរៀបចំសាងសង់វិទ្យាស្ថាន។

លោកបន្ថែមថា ក្រោយពេលស្ថានភាពជំងឺឆ្លងកូវីដ-១៩ បានល្អប្រសើរ ដំណើរការសកម្មភាពវិនិយោគ នឹងចាប់ផ្តើមជាជំហានៗតាមផែនការដែលបានគ្រោងទុក។

បន្ទាប់ពីបានទទួលព័ត៌មាននេះ លោករដ្ឋមន្ត្រីបានសម្តែងនូវកិច្ចស្វាគមន៍ និងគាំទ្រចំពោះកម្មវត្ថុវិនិយោគ លើវិស័យកសិកម្មរបស់ក្រុមហ៊ុននាពេលអនាគត។ ករណីនេះ លោកសន្យាថា នឹងផ្តល់កិច្ចសហការ ដោយមានអគ្គនាយកដ្ឋានកសិកម្ម ជាសេនាធិការរបស់ក្រសួងជាស្ថាប័នអនុវត្តផ្ទាល់ ធ្វើយ៉ាងណាឲ្យគម្រោងវិនិយោគ និងការបង្កើតវិទ្យាស្ថានស្រាវជ្រាវវិស័យកសិកម្មចម្រុះ ដោយឡែកដំណាំត្រូពិច និងការកែច្នៃកសិផលទទួលបានជោគជ័យ ដែលទាមទារចាំបាច់ត្រូវប្រើបច្ចេកវិទ្យា និងធនធានមនុស្ស ហើយពិតណាស់កិច្ចការនេះ ក៏ចាំបាច់ត្រូវមានកិច្ចសហការ ពីគ្រប់ភាគីពាក់ព័ន្ធមន្រ្តីជំនាញទាំងថ្នាក់ជាតិ និងថ្នាក់មូលដ្ឋាន ជាពិសេសប្រជាកសិករ ធ្វើយ៉ាងណាឲ្យពួកគេអាចទទួលយកបច្ចេកវិទ្យាសម ស្របយកទៅអនុវត្តទទួលបានប្រសិទ្ធភាព និងប្រសិទ្ធផល៕

ដោយៈវឌ្ឍនៈ

ភ្នំពេញៈ បើនិយាយពីផ្លូវ៥១ កាលពីមុនគឺគេនឹងឃើញដល់ឧស្សាហកម្ម ដីឡូត៏ និងអនាគតតំបន់រោងចក្រ ប៉ុន្តែមកដល់ពេលនេះផ្លូវ៥១ ចាប់ផ្ដើមកែប្រែពីតំបន់អភិវឌ្ឍន៍ដីឡូត៏ទៅជាតំបន់អភិវឌ្ឍន៍លំនៅឋាន និងឧស្សាហកម្មជាបណ្ដើរៗហើយ ។ នេះបើតាមការលើកឡើងរបស់អភិវឌ្ឍន៍ដីឡូត៏នៅតំបន់ប៉ែកខាងលិចរាធានីភ្នំពេញ។

លោកចេ សុន អ្នកអភិវឌ្ឍន៍ដីឡូត៏និងដីលំហែជាយរាជធានីភ្នំពេញ បានប្រាប់គេហទំព័រ Property Area ឱ្យដឹងនាព្រឹកថ្ងៃទី២៥ តុលានេះថា ពេលនេះតំបន់ស្ថិតនៅតាមបណ្ដោយផ្លូវ៥១ ចាប់ផ្ដើមមានការអភិវឌ្ឍជាលំនៅឋាន និងរោងចក្រឧស្សាហកម្មច្រើនហើយ ដោយមានក្រុមហ៊ុនអភិវឌ្ឍន៍លំនៅឋានជាច្រើន បានចូលទៅកាន់តំបន់នោះ និងធ្វើសកម្មភាពក្នុងការអភិវឌ្ឍគម្រោងរបស់ខ្លួនជាបន្តបន្ទាប់។

លោកបន្តថា “កាលពីមុនតំបន់នេះគឺជាតំបន់ដីឡូត៏ ដោយប្រជាពលរដ្ឋជាច្រើនបានទិញដីនៅតាមបណ្ដោយផ្លូវ៥១ សម្រាប់ទុកសង់លំនៅឋានផ្ទាល់ខ្លួន ហើយមកដល់ពេលនេះដីឡូត៏ ដែលពលរដ្ឋបានទិញ ក៏ចាប់ផ្ដើមរៀបចំសាងសង់ដោយខ្លួនឯង”។ លោក​បន្តថា “មិនតែប៉ុណ្ណោះ ក្រុមហ៊ុនឯកជន ជាច្រើនទៀតដូចជាបុរីម៉ន ដានី ជាដើមក៏បានទៅអភិវឌ្ឍន៍លំនៅឋានសម្រាប់ផ្គត់ផ្គង់នៅតំបន់នោះដែរ”។

លោកចេ សុនបានបន្ថែមថា សម្រាប់រូបលោកផ្ទាល់ក៏បាន និងកំពុងរៀបចំសាងសង់ជាផ្ទះលំហែនៅជើងភ្នំ ដើម្បីផ្គត់ផ្គង់ជូនអតិថិជន ដែលមានតម្រូវការខាងផ្ទះលំហែ ប៉ុន្តែលោកក៏បន្តអភិវឌ្ឍន៍ដីឡូត៏ និងដីលំហែនៅខាងលិចតំបន់ផលូវ៥១នេះដែរ ពីព្រោះថាដី៥១វាមិនអាចអភិវឌ្ឍន៍ដីឡូត៏ទៀតទេ វាចង្អៀតហើយ ។

អ្នកអភិវឌ្ឍន៍លំនៅឋាននៅតំបន់ផ្លូវ៥១ ក៏បានលើកឡើងពីសក្ដានុពលនៃតំបន់នេះផងដែរ ដោយនិយាយថា តំបន់ផ្លូវ៥១ជាផ្លូវដែលតភ្ជាប់ ទៅកាន់ផ្លូវសំខាន់ៗជាច្រើនទៀតនៅក្នុងប្រទេសកម្ពុជា ដូចជា ភ្ជាប់ពីខេត្តព្រះសីហនុ ទៅកាន់ខេត្តបាត់ដំបង បន្ទាយមានជ័យ ខេត្តជាយដែននៃប្រទេសនិងជាផ្លូវសំខាន់ ក្នុងការដឹកជំនិញចេញទៅកាន់កំពង់ផែ និងទៅកាន់ព្រំដែនកម្ពុជា។

លោកស្រីសុខ ស្រីអូនម្ចាស់គម្រោងអភិវឌ្ឍន៍ដីឡូត៏ និងលំនៅឋានតាមបណ្ដោយផ្លូវ៥១បាននិយាយថា អនាគតផ្លូវនេះ នឹងក្លាយជាតំបន់ឧស្សាហកម្ម ដ៏មានសក្ដានុពល ហើយនឹងមានមនុស្សរស់នៅកាន់តែច្រើន ជាក់ស្ដែងបច្ចុប្បន្ននេះ ក៏មានមនុស្សចាប់ផ្ដើមងាកមករស់នៅក្នុងតំបន់ផ្លូវ៥១បណ្ដើរៗហើយផងដែរ ។

លោកសន សៀប នាយកប្រតិបត្តិក្រុមហ៊ុនអចលនទ្រព្យឃី រៀលអ៊ីស្ទេតបានឱ្យដឹងផងដែរ តំបន់ខាងលិចភ្នំពេញ ដែលសំដៅដល់ខេត្តកំពង់ស្ពឺ នឹងមានការទាក់ទាញខ្លាំងទៅលើការអភិវឌ្ឍវិស័យឧស្សាហម្ម ជាពិសេសនៅតាមបណ្ដោយផ្លូវ៥១ នឹងកាន់តែមានអ្នកចាប់អារម្មណ៍ លើឧស្សាហកម្មកាន់តែច្រើន។

លោកបន្តថា “កត្តាជំរុញឱ្យផ្លូវនេះមានការទាក់ទាញ លើឧស្សាហកម្មដោយសារតែទីតាំងងាយស្រួល ក្នុងការដឹកជញ្ជូនចេញចូលទៅកាន់កំពង់ផែ និងទៅកាន់ច្រកព្រំដែននៃប្រទេសកម្ពុជាថៃផងដែរ”៕

         ដោយៈសិរី ជេស៊ីកា

         ភ្នំពេញៈ សេចក្តីព្រាងច្បាប់ស្តីពី វិសោធនកម្មរដ្ឋធម្មនុញ្ញកំណត់សញ្ជាតិខ្មែរតែមួយសម្រាប់ប្រធានរដ្ឋសភា ប្រធានព្រឹទ្ធសភា នាយករដ្ឋមន្រ្តី និងប្រធានក្រុមប្រឹក្សាធម្មនុញ្ញត្រូវបានរដ្ឋសភាអនុម័តនាថ្ងៃនេះ។

សម្តេចអគ្គមហាពញាចក្រី ហេង សំរិន ប្រធានរដ្ឋសភា បានដឹកនាំបន្តសម័យប្រជុំរដ្ឋសភា លើកទី៦ នីតិកាលទី៦ នាព្រឹកថ្ងៃទី២៥ ខែតុលា ឆ្នាំ២០២១ នេះ។ សម័យប្រជុំថ្ងៃនេះមានរបៀបវារៈចំនួនបួន ដែលត្រូវបានពិភាក្សា និងអនុម័ត រួមមានសេចក្តីព្រាងច្បាប់ធម្មនុញ្ញស្តីពី វិសោធនកម្មមាត្រា១៩ថ្មី មាត្រា៨២ថ្មី មាត្រា១០៦ថ្មី(មួយ) មាត្រា១១៩ថ្មី និងមាត្រា១៣៧ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និងមាត្រា៣ និងមាត្រា៤ នៃច្បាប់ធម្មនុញ្ញបន្ថែម សំដៅធានានូវដំណើរការជាប្រក្រតី នៃស្ថាប័នជាតិមួយដែរ។

សេចក្តីព្រាងច្បាប់ខាងលើនេះ សំដៅកំណត់សញ្ជាតិខ្មែរតែមួយសម្រាប់ ប្រធានរដ្ឋសភា ប្រធានព្រឹទ្ធសភា នាយករដ្ឋមន្រ្តី និងប្រធានក្រុមប្រឹក្សាធម្មនុញ្ញ។ រដ្ឋសភា ព្រឹទ្ធសភា រាជរដ្ឋាភិបាល និងក្រុមប្រឹក្សាធម្មនុញ្ញ គឺជាស្ថាប័នកំពូលរបស់ជាតិដែលមានចែងក្នុងរដ្ឋធម្មនុញ្ញ នៃព្រះរាជាណាចក្រកម្ពុជា និងមានការទទួលខុសត្រូវខ្ពស់ក្នុងការសម្រេចលើកិច្ចការសំខាន់ៗ ដែលជាអាយុជីវិតរបស់ប្រទេសជាតិ សំដៅធានា ការពារឯករាជ្យជាតិ អធិបតេយ្យជាតិ និងបូរណភាពទឹកដី នៃព្រះរាជាណាចក្រកម្ពុជា ឧត្តមប្រយោជន៍ជាតិ និងប្រជាជនកម្ពុជា ព្រមទាំងការប្រឆាំងដាច់ខាតទៅនឹងការជ្រៀតជ្រែកពីបរទេសចូលក្នុងកិច្ចការផ្ទៃក្នុងរបស់ជាតិ ឬការបង្គាប់បញ្ជាចំពោះគោលនយោបាយជាតិ អន្តរជាតិរបស់កម្ពុជា។

ចំពោះរបៀបវារៈផ្សេងទៀត រដ្ឋសភាបានបោះឆ្នោតផ្តល់សេចក្តីទុកចិត្តលើការបំពេញបន្ថែមសមាសភាពសមាជិក នៃរាជរដ្ឋាភិបាលដល់ លោកប៉ា សុជាតិវង្ស ជាទេសរដ្ឋមន្រ្តីទទួលបន្ទុកបេសកកម្មពិសេស និងបានពិភាក្សានិងអនុម័តសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងបន្ថែម ទៅលើកិច្ចព្រមព្រៀងរវាងរាជរដ្ឋាភិបាលកម្ពុជា និងអង្គការសហប្រជាជាតិ ទាក់ទងទៅនឹងការកាត់សេចក្តី នៅក្រោមច្បាប់កម្ពុជានូវឧក្រិដ្ឋកម្មដែលប្រព្រឹត្តឡើងនៅក្នុងរយៈកាល នៃរបបកម្ពុជាប្រជាធិបតេយ្យស្តីពី ការរៀបចំក្នុងពេលអន្តរកាល និងការបញ្ចប់ការងាររបស់អង្គជំនុំជម្រះវិសាមញ្ញ និងការពិភា​ក្សា និងអនុម័តសេចក្តីព្រាងច្បាប់ស្តីពី ភាពជាដៃគូរវាងរដ្ឋ និងឯកជន៕