ដោយៈ សុផារី

ភ្នំពេញៈ លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានស្នើក្រុមហ៊ុនអាមេរិកធំៗ ចូលររួមវិនិយោគលើគំរោងហេដ្ឋារចនាសម្ព័​ន្ឋនានា​នៅកម្ពុជា។

លោកបានថ្លែងក្នុងជំនួបការងារ ជាមួយនឹងគណៈប្រតិភូក្រុមប្រឹក្សាធុរកិច្ចអាស៊ាន-អាមេរិក ដឹកនាំដោយលោក Ted Oslus ប្រធានក្រុមប្រឹក្សា ដោយមានការចូលរួមអមដំណើរពីតំណាងមកពីក្រុមហ៊ុនចំនួន១៣ ដែលជាសមាជិករបស់ក្រុមប្រឹក្សា តាមរយៈប្រព័ន្ធវីដេអូពីចម្ងាយ កាលពីថ្ងៃទី២០ ខែតុលា ឆ្នាំ២០២១។

ក្នុងជំនួបនេះ លោកបានលើកឡើងអំពីវឌ្ឍនភាពការងារ និងគម្រោងសាងសង់ហេដ្ឋារចនាសម្ព័ន្ធនៅកម្ពុជា ជាពិសេសគម្រោងសាងសង់ និងពង្រីកផ្លូវជាតិលេខ៧ (ស្គន់-កំពង់ចាម) ពីពីរគន្លងទៅបួនគន្លង និងគម្រោងសាងសង់ស្ពានឆ្លងកាត់ទន្លេមេគង្គ(ក្រចេះ) គម្រោងសាងសង់ផ្លូវ ល្បឿនលឿនភ្នំពេញ-ក្រុងព្រះសីហនុ ដែលគ្រោងនឹងបញ្ចប់នៅខែធ្នូ ឆ្នាំ២០២២ គម្រោងសាងសង់ផ្លូវល្បឿនលឿនភ្នំពេញ-បាវិត (ព្រំដែនកម្ពុជា-វៀតណាម) គម្រោងសាងសង់ហេដ្ឋារចនាសម្ព័ន្ធផ្លូវ៣៤ ខ្សែនៅក្រុងព្រះសីហនុ ខេត្តព្រះសីហនុ និងគម្រោងសាងសង់ផ្លូវ៣៨ខ្សែនៅក្រុងសៀមរាប ខេត្តសៀមរាប ដែលគ្រោងនឹងបញ្ចប់នៅខែធ្នូ ឆ្នាំ២០២១ ដើម្បីទាក់ទាញភ្ញៀវទេសចរនៅពេលកម្ពុជាបើកប្រទេសសារជាថ្មីឡើងវិញបន្ទាប់ពីជំងឺរាតត្បាតកូវីដ-១៩។

លោកស៊ុន ចាន់ថុល បានគូសបញ្ជាក់ពីសារៈសំខាន់ នៃការចូលរួមវិស័យឯកជន នៅក្នុងការអភិវឌ្ឍនូវហេដ្ឋារចនាសម្ព័ន្ធ ក៏ដូចជាសេដ្ឋកិច្ចជាតិ និងជាក្បាលម៉ាស៊ីននៃកំណើនសេដ្ឋកិច្ចកម្ពុជាដ៏សំខាន់ និងបានស្នើឱ្យក្រុមហ៊ុនអាមេរិក ចូលរួមដេញថ្លៃវិនិយោគ លើគម្រោងសាងសង់ហេដ្ឋារចនាសម្ព័ន្ធនៅកម្ពុជា។ កន្លងមក មិនទាន់មានក្រុមហ៊ុនរបស់អាមេរិកណាមួយចូលរួម ដេញថ្លៃគម្រោងសាងសង់នៅឡើយទេ សូម្បីតែផ្លូវជាតិលេខ៤ ដែលអាមេរិកបានសាងសង់កាលពីទសវត្សរ៍ឆ្នាំ៦០ក៏ដោយ។

បន្ថែមពីលើនេះ លោកបានជំរុញលើកទឹកចិត្ត ឱ្យក្រុមហ៊ុនរបស់អាមេរិកចូលរួម ក៏ដូចជាដាក់ទុនវិនិយោគ នៅក្នុងការអភិវឌ្ឍវិស័យហេដ្ឋារចនាសម្ព័ន្ធកម្ពុជា ឱ្យមានគុណភាពរឹងមាំ។

គណៈប្រតិភូក្រុមប្រឹក្សាធុរកិច្ចអាស៊ាន-អាមេរិក បានថ្លែងអំណរគុណយ៉ាងជ្រាលជ្រៅដល់ លោកទេសរដ្ឋមន្ត្រី និងបានសន្យាបន្តពង្រឹងកិច្ចសហប្រតិបត្តិការវិស័យឯកជនរវាងប្រទេសទាំងពីរឱ្យកាន់តែរឹងថែមទៀត៕

         ដោយៈគង់ សិរីជេស៊ីកា

         ភ្នំពេញៈ គំរោងវិនិយោគសាងសង់ផ្លូវរថភ្លើង ល្បឿនលឿនភ្នំពេញ សៀមរាប និងតភ្ជាប់ទៅកាន់ក្រុងប៉ោយប៉ែត មានការសិក្សាជាបន្តបន្ទាប់ ប៉ុន្តែលទ្ឋផលបែបណានៅមិនទាន់មានការបង្ហាញជាក់លាក់នៅឡើយទេ។

អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២០ តុលានេះថា គំរោងសាងសង់ផ្លូវរថភ្លើងល្បឿនលឿនភ្នំពេញ សៀមរាប និងតភ្ជាប់ទៅកាន់ក្រុងប៉ោយប៉ែត កន្លងមកមានក្រុមហ៊ុនចិនមួយចំនួនបានស្នើសុំសិក្សាជាបន្តបន្ទាប់ ប៉ុន្តែរហូតមកទល់ពេលនេះ ក៏មានសភា ពស្ងប់ស្ងាត់ទៅវិញ។

លោកបន្តថា “រហូតមកទល់ពេលនេះ មិនទាន់មានក្រុមហ៊ុនណាមួយបង្ហាញលទ្ឋផលបែបណានៅឡើយទេ”។ លោកបន្តថា “វាជារឿងស៊ីជម្រៅមួយ ដែលត្រូវការពេលវេលាបន្ថែមទៀត”។

លោកវ៉ាស៊ីម សូរិយាបានបន្តថា ជាធម្មតាការសាងសង់ផ្លូវរថភ្លើងធម្មតា ត្រូវចំណា​យថវិកាប្រមាណ៤លានដុល្លារក្នុងមួយគីឡូម៉ែត្រ ប៉ុន្តែបើសិនជាសាងសង់ផ្លូវរថភ្លើងល្បឿនលឿន គឺត្រូវចំណាយច្រើនជាងនេះ។

ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិតម៉ី កល្យាណបានមានប្រសាសន៍ថា ការវិនិយោគលើហេដ្ឋារចនាសម្ព័ន្ឋជារឿងចាំបាច់ ដើម្បីជម្រុញកំនើនសេដ្ឋកិច្ចជាតិ តែការវិនិយោគត្រូវចំណាយប្រាក់ច្រើនណាស់ រាប់បញ្ចូលទាំងពេលវេលា ប៉ុន្តែរដ្ឋាភិបាលចាំបាច់ត្រូវតែវិនិយោគ ដើម្បីរុញសេដ្ឋកិច្ចកម្ពុជាទៅកាន់លំដាប់ថ្មីមួយទៀត។

លោកបន្តថា “កត្តាកង្វះខាតហេដ្ឋារចនាសម្ព័ន្ឋ បានក្លាយជាបញ្ហាប្រឈមមួយនៃការប្រកួតប្រជែងរបស់កម្ពុជា ជាមួយប្រទេសក្នុងតំបន់ ហេតុនេះទើបរដ្ឋាភិបាលបានចំណាយប្រាក់យ៉ាងច្រើន ដើម្បីវិនិយោគលើវិស័យនេះ”៕

         ដោយៈជេស៊ីកា

         ភ្នំពេញៈ មន្រ្តីជាន់ខ្ពស់នៃរាជរដ្ឋាភិបាលកម្ពុជាថ្លែងថា កម្ពុជានឹងបង្ហាញជូនបណ្តាអ្នកចូលរួមឲ្យបានយល់ និងស្គាល់កម្ពុជាកាន់តែច្បាស់ ជាពិសេសបានស្វែងយល់ពីសក្តានុពលវិស័យពាណិជ្ជកម្ម និងកាលានុវត្តភាពវិនិយោគ ដើម្បីទាក់ទាញបន្ថែមក្រុមវិនិយោគិន និងធុរជនមកពីអាស៊ី និងអឺរ៉ុបមកកាន់កម្ពុជា។

ការអះអាងយ៉ាងដូច្នេះរបស់លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានធ្វើឡើងក្នុងសន្និសីទសារព័ត៌មានស្តីពី ការត្រៀមរៀបចំវេទិកាសេដ្ឋកិច្ចនិងធុរកិច្ចអាស៊ី-អឺរុបលើកទី១ កាលពីព្រឹកថ្ងៃទី២០ ខែតុលា ឆ្នាំ២០២១នេះ នៅទីស្តីការក្រសួង ដែលមានការចូលរួមពីមន្រ្តីក្រសួង និងអ្នកសារព័ត៌មានជាតិសរុបចំនួនប្រមាណ៣០នាក់។

លោករដ្ឋមន្រ្តីបានបន្តថា សេដ្ឋកិច្ចនិងធុរកិច្ចអាស៊ី-អឺរុបលើកទី១ ជាវេទិកាលំដាប់អន្តរជាតិ ដែលនឹងអញ្ជើញចូលរួមដោយប្រមុខរដ្ឋាភិបាល នៃប្រទេសជាសមាជិក ASEM អ្នកជំនាញការ បញ្ញាវ័ន្ត និងជាពិសេសថ្នាក់ដឹកនាំក្រុមធុរជនមកពីអាស៊ី និងអឺរ៉ុប។ លោកបានបន្តថា ជាការពិតណាស់តាមរយៈការរៀបចំវេទិកាលំដាប់អន្តរជាតិនេះ នឹងផ្តល់នូវការលើកកម្ពស់កិត្យានុភាព និងលើកមុខមាត់ប្រទេសកម្ពុជាលើឆាកអន្តរជាតិ បង្ហាញជូនបណ្តាអ្នកចូលរួមមកពីអាស៊ី និងអឺរ៉ុបបានយល់ និងស្គាល់កម្ពុជាកាន់តែច្បាស់ ជាពិសេ​សបានស្វែងយល់ ពីសក្តានុពលវិស័យពាណិជ្ជកម្ម និងកាលានុវត្តភាពវិនិយោគនៅកម្ពុជា និងអាចទាក់ទាញក្រុមវិនិយោគិន និងធុរជនមកពីអាស៊ី និងអឺរ៉ុប ពិនិត្យលទ្ធភាពមកបណ្តាក់ទុកវិនិយោគនៅកម្ពុជា ព្រោះកម្ពុជាមានច្បាប់វិនិយោគថ្មី មានលក្ខណៈទាក់ទាញខ្លាំង តម្លៃពលកម្មទាប ប្រព័ន្ធហេដ្ឋារចនាសម័្ពន្ធរូបវ័ន្តសមស្រប មានទីផ្សារសម្រាប់នាំចេញច្រើន (ទាំងក្រោមលក្ខខណ្ឌប្រព័ន្ធអនុគ្រោះពន្ធ និងកិច្ចព្រមព្រៀងពាណិជ្ជកម្មសេរី ដែលកម្ពុជាបានចុះរួចរាល់ជាមួយប្រទេសចិន និងគ្រោងចុះជាមួយកូរ៉េ នាពេលខាងមុខ) និងដទៃទៀត។

លោកប៉ាន សូរស័ក្តបានបន្តថា វាជាព្រឹត្តិការណ៍អមក្នុងចំណោមព្រឹត្តិការណ៍អម (Side Events)ចំនួន៧ នៃកិច្ចប្រជុំកំពូលអាស៊ី-អឺរ៉ុប លើកទី១៣ (ASEM13) ក្នុងនោះការរៀបចំកន្លងទៅ គឺមានវេទិកាចំនួន២ ដូចជា ទី១ វេទិកាធុរកិច្ចអាស៊ី-អឺរ៉ុប (Asia-Europe Business Forum-AEBF) ដែលតែងតែជាព្រឹត្តិការណ៍អមមួយជាមួយការរៀបចំអមនឹងកិច្ចប្រជុំកំពូលអាស៊ី-អឺរ៉ុប (ASEM) ដែលបានរៀបចំធ្វើចុងក្រោយលើកទី១៦ នៅក្នុងឆ្នាំ២០១៨ នៅទីក្រុងព្រុចស៊ែល ប្រទេសបែលហ្សិក និងទី២ វេទិកាសេដ្ឋកិច្ចអាស៊ី-អឺរ៉ុប (Asia-Europe Economic Forum-AEEF) ដែលជាធម្មតាមិនរៀបចំភ្ជាប់ជាមួយកិច្ចប្រជុំកំពូលអាស៊ី-អឺរ៉ុបទេ ហើយការរៀបចំវេទិកាសេដ្ឋកិច្ចអាស៊ី-អឺរ៉ុបលើកទី១៦ ត្រូវបានធ្វើឡើងនៅទីក្រុងប៊ែកឡាំង ប្រទេសអាល្លឺម៉ង់ ក្នុងឆ្នាំ២០១៩។

លោកបន្តទៀតថា ឆ្នាំ២០២១នេះ ដោយសារកម្ពុជាធ្វើជាម្ចាស់ផ្ទះនៃកិច្ចប្រជុំកំពូ​លអាស៊ី-អឺរ៉ុប លើកទី១៣(ASEM13) មូលនិធិអាស៊ី-អឺរ៉ុប (Asia-Europe Foundation-ASEF) និងក្រសួងការបរទេសនៃកម្ពុជាបានជូនយោបល់ថា វេទិកាទាំងពីរខាងលើគួរត្រូវបានរួមបញ្ចូលគ្នា ជាព្រឹត្តិការណ៍តែមួយអមជាមួយ នឹងកិច្ចប្រជុំកំពូលអាស៊ី-អឺរ៉ុបទី១៣នេះ ហើយដាក់ឈ្មោះថា “វេទិកាសេដ្ឋកិច្ច និងធុរកិច្ចអាស៊ី-អឺរ៉ុប លើកទី១” (1st Asia-Europe Economic and Business Forum-AEEBF1)តែម្តង ក្រោមមូលបទការផ្លាស់ប្តូរទៅរកគន្លងប្រក្រតីភាពថ្មី ការធ្វើអានុភាវូបនីយកម្មខ្សែច្រវាក់តម្លៃសកល ពហុភាគីនិយម និងបដិវត្តឧស្សាហកម្ម ៤.0។ នេះគឺជាមូលហេតុដែលបង្កើតឱ្យមានវេទិកានេះឡើងនៅកម្ពុជា។

វេទិកាសេដ្ឋកិច្ច និងធុរកិច្ចអាស៊ី-អឺរ៉ុប លើកទី១ គឺជាព្រឹត្តិការណ៍អមក្នុងចំណោម ព្រឹត្តិការណ៍អម (Side Events) ចំនួន៧ នៃកិច្ចប្រជុំកំពូលអាស៊ី-អឺរ៉ុប លើកទី១៣ (ASEM13) ដែលនឹងប្រព្រឹត្តទៅនៅថ្ងៃទី២៥-២៦ ខែវិច្ឆិកា ឆ្នាំ២០២១ តាមប្រព័ន្ធវីដេអូ។  តាមការគ្រោងទុក វេទិកានេះនឹងអញ្ជើញចូលរួមដោយបណ្តាប្រទេសជាសមាជិក ASEM មួយចំនួន មកពីអាស៊ី និងអឺរ៉ុប រួមមាន៖ ប្រទេសអាស៊ានទាំង១០ ចិន ឥណ្ឌា ជប៉ុន កូរ៉េខាងត្បូង អូស្រា្តលី ហុងគ្រី បារាំង ចក្រភពអង់គ្លេស រុស្ស៊ី បែលហ្ស៊ិក អេស្តូនី ព្រមទាំងមានការចូលរួមដោយអ្នករៀបចំគោលនយោបាយ បញ្ញាវ័ន្ត អ្នកជំនាញការ ប្រធានក្រុមហ៊ុនធំៗ ក្រុមធុរជន និងវិស័យឯកជនមកពីអាស៊ី និងអឺរ៉ុបផងដែរ៕

ដោយៈសុខុម

សឹង្ហបុរី: ក្រុមហ៊ុននាំចេញឧស្ម័នធម្មជាតិរាវ (LNG) របស់សហរដ្ឋអាមេរិក ដែលមានឈ្មោះថាVenture Global LNG បានចុះកិច្ចព្រមព្រៀងរយៈពេល២០ឆ្នាំចំនួន២ជាមួយក្រុមហ៊ុនរដ្ឋរបស់មហាយក្សចិនSinopec ដើម្បីផ្គត់ផ្គង់ឧស្ម័នLNG ពីរោងចក្រ Plaquemines។ នេះបើយោងតាមឯកសារមួយ ដែលត្រូវបានបង្ហោះនៅលើគេហទំព័ររបស់ក្រសួងថាមពលរបស់សហរដ្ឋអាមេរិក។

រោងចក្រ Plaquemines ដែលស្ថិតនៅក្នុងរដ្ឋ Lousiana សហរដ្ឋអាមេរិក មានសមត្ថភាពនាំចេញឧស្ម័ន LNG រហូតដល់ទៅ២០លានតោនក្នុងមួយឆ្នាំ ហើយការចុះកិច្ចព្រមព្រៀងនេះ ជាការឈានជើងមួយជំហានទៀត សម្រាប់ក្រុមហ៊ុនខិតកាន់តែជិតដល់ការសម្រេចចិត្តចុងក្រោយ លើការបោះវិនិយោគដែលគេរំពឹងថា នឹងធ្វើឡើងនៅដំណាច់ឆ្នាំនេះ។

ប្រភពច្បាស់ការមួយចេញពីឧស្សាហកម្មហ្គាស ដែលមានមូលដ្ឋាននៅក្រុងប៉េកាំង ប្រទេសចិន បានទម្លាយប្រាប់ទីភ្នាក់ងារព័ត៌មាន Reuters ថា ប្រទេសចិនក្នុងឆ្នាំនេះ បានវ៉ាដាច់ប្រទេសជប៉ុន ក្លាយជាអ្នកទិញឧស្ម័ន LNG ច្រើនបំផុតរបស់ពិភពលោក កិច្ចព្រមព្រៀងនេះ នឹងក្លាយជាកិច្ចព្រមព្រៀងជួញដូរឧស្ម័ន LNG ធំបំផុតរបស់ខ្លួន។

កិច្ចព្រមព្រៀងទាំង២ខាងលើនេះ ជាកិច្ចព្រមព្រៀងលក់ និងទិញឧស្ម័ន LNG ក្នុងបរិមាណសរុប៤លានតោនក្នុងមួយឆ្នាំ។

យោងតាមឯកសារដាច់ដោយឡែកមួយ ដែលបានបង្ហោះលើគេហទំព័ររបស់រដ្ឋាភិបាលសហរដ្ឋអាមេរិក បង្ហាញថា ក្រុមហ៊ុន Venture Global ក៏បានចុះកិច្ចព្រមព្រៀងទី៣ មួយទៀតជាមួយក្រុមហ៊ុន Unipec ដែលជាបុត្រសម្ព័ន្ធរបស់ក្រុមហ៊ុន Sinopec ផងដែរដើម្បីផ្គត់ផ្គង់ឧស្ម័ន LNG ចំនួន១លានតោនក្នុងមួយឆ្នាំ សម្រាប់រយៈពេល៣ឆ្នាំដោយចាប់ផ្តើមពីថ្ងៃទី០១ មីនា ឆ្នាំ២០២៣។

ទោះជាយ៉ាងណា ក្រុមហ៊ុន Sinopec បានបដិសេធមិនឆ្លើយបំភ្លឺឡើយជុំវិញរឿងនេះ ចំណែកក្រុមហ៊ុន Venture Global មិនអាចទាក់ទងបានព្រោះផុតម៉ោងធ្វើការ៕  Reuters៕

ដោយៈ សុផារី

ភ្នំពេញៈ ការទិញខុនដូអាចជាការវិនិយោគធំបំផុតមួយ ដែលអ្នកមិនសូវប្រាកដចិត្ត និងមានភ័យខ្លាចក្នុងការសម្រេចចិត្តទិញ ក្រុមហ៊ុនCBRE Cambodia បានចែក រំលែកចំណុចសំខាន់ៗ ដែលអាចជួយអ្នកក្នុងការសម្រេចចិត្ត មុនពេលធ្វើការកក់ឬទិញខុនដូ។

១. ទីតាំង

នៅពេលទិញខុនដូទីតាំង គឺជាមូលដ្ឋានសំខាន់បំផុត។ ប្រសិនបើអ្នកកំពុងសម្លឹងមើលតំបន់ ដែលមានការអភិវឌ្ឍល្អរួចមក តម្លៃចាប់ផ្តើមប្រាកដជាខ្ពស់ជាងតំបន់ ដែលទើបតែចាប់ផ្តើមអភិវឌ្ឍថ្មីៗ។

អ្នកគួរស្វែងរកព័ត៌មាន ឱ្យបានច្រើនទាក់ទងនឹងទីតាំងគម្រោងខុនដូនានា ទូទាំងទីក្រុង ដែលផ្តល់នូវតម្លៃតាមកញ្ចប់ថវិការតបស់អ្នក។ ម៉្យាងទៀត អ្នកអាចជូបពិភាក្សាជាមួយភ្នាក់ងារដែលមានបទពិសោធន៍ ដែលអាចផ្តល់ទិន្នន័យ និងការណែនាំល្អៗដល់អ្នកបាន។

២. ប្រវត្តិក្រុមហ៊ុនអភិវឌ្ឍន៍

គម្រោងខុនដូថ្មីៗក្នុងទីក្រុងភ្នំពេញ បានចាប់ផ្តើមរីកដុះដាលលឿន គួរឱ្យចាប់អារម្មណ៍ ដោយគ្មានសញ្ញានៃការធ្លាក់ចុះ។

អ្នកគួរដឹងប្រវត្តិនិងភាពល្បីល្បាញ របស់ក្រុមហ៊ុនអភិវឌ្ឍខ្លះៗ ព្រោះវានឹងផ្តល់ឱ្យអ្នកនូវការយល់ដឹងកាន់តែច្បាស់ អំពីគុណភាពសំណង់ ការធ្វើផែនការនិងកាលវិភាគ ការទុកចិត្តរឿងហិរញ្ញវត្ថុ ការអនុលោមតាមច្បាប់រដ្ឋាភិបាល កេរ្តិ៍ឈ្មោះ និងការទទួលស្គាល់ពីសំណាក់អ្នកផង។

៣. ការគ្រប់គ្រងខុនដូ ការថែរក្សាខុនដូល្អ គឺជាផលប្រយោជន៍ដ៏ល្អបំផុតរបស់អ្នកគួរយកចិត្តទុកដាក់។

៤. បរិក្ខារនិងការរចនា អ្នកគួរសាកសួរភ្នាក់ងារលក់ នូវសម្ភារនិងការផ្តល់ជូន ដែលខុនដូនឹងផ្តល់ជូន។ ការមានសម្ភារស្រាប់ នឹងផ្តល់នូវភាពងាយស្រយលដល់អ្នក។ ម្យ៉ាងទៀត តម្លៃដែលអ្នកកំពុងចំណាយសម្រាប់ខុនដូភាគច្រើន បញ្ចូលនូវតម្លៃសេវាកម្មទាំងអស់នោះស្រាប់។

៥. ភ្នាក់ងារអចលនទ្រព្យ ត្រូវប្រាកដចិត្តថាអ្នកកំពុងជ្រើសរើសភ្នាក់ងារ ដែលបានចុះឈ្មោះត្រឹមត្រូវនិងអាចទុកចិត្តបាន ហើយស្គាល់ពួកគាត់ ចៀសវាងមានបញ្ហានៅក្នុងថ្ងៃក្រោយ។

៦. ហិរញ្ញវត្ថុ តើអ្នកមានសមត្ថភាព ក្នុងការទិញខុនដូដោយបង់ផ្តាច់ ឬត្រូវបង់រំលោះ។ ប្រសិនបើអ្នកជ្រើសរើសការបង់រំលោះ នោះអ្នកត្រូវប្រាកដចិត្តអំពីចំណូលរបស់អ្នក។ នៅពេលស្នើសុំប្រាក់កម្ចីអ្នកមានជម្រើសពីរ៖

• ជម្រើសទីមួយ ស្នើសុំប្រាក់កម្ចីនៅធនាគារ ដែលជារឿយៗត្រូវការឯកសារច្រើននិងជាដំណើរការច្រើន។
• ជម្រើសទីពីរ ស្នើសុំប្រាក់កម្ចីដោយផ្ទាល់ជាមួយអ្នកអភិវឌ្ឍ។ អ្នកនឹងមានឯកសារតិច ប៉ុន្តែអត្រាការប្រាក់ប្រហែល ជាខ្ពស់ជាងជាមួយធនាគារ។ អត្រាការប្រាក់ ៧% ជាទូទៅត្រូវបានចាត់ទុកថាជាអត្រាការប្រាក់ល្អ។

៧. អាជ្ញាប័ណ្ណរបស់ក្រុមហ៊ុន

ដើម្បីទទួលបានអាជ្ញាប័ណ្ណលក់ អ្នកអភិវឌ្ឍន៍ក៏ត្រូវមានអាជ្ញាប័ណ្ណអភិវឌ្ឍន៍និងមានអាជ្ញាប័ណ្ណសាងសង់ផងដែរ។ អ្នកគួរទិញអចលនទ្រព្យ នៅពេលអ្នកអភិវឌ្ឍន៍ដែលមានអាជ្ញាប័ណ្ណត្រឹមត្រូវ ដលម្បីចៀសវាងការមានបញ្ហាក្នុងថ្ងៃក្រោយ។

៨. រយៈពេល

មានចំណុចពីរដែលត្រូវប្រយ័ត្នគឺ រយៈពេលនៃការសាងសង់ និងរយៈពេលនៃការប្រគល់កម្មសិទ្ធ។

• ប្រសិនបើខុនដូមិនទាន់ត្រូវបានសាងសង់ គួរសួរអំពីរយៈពេលនៃគម្រោងទាំងមូល ហើយថ្លឹងថ្លែងមើលថា តើវាសមហេតុផលដែរឬទេ។ ឧទាហរណ៍ បើពួកគេមានគម្រោងចំណាយពេលសាងសង់ខុនដូប្រាំជាន់ ចំណាយពេលប្រាំឆ្នាំ នោះអ្នកគួរតែពិចារណាឡើងវិញ។
• ប្រសិនបើវាកំពុងសាងសង់ តើគម្រោងនេះទាន់ពេលវេលា ឬត្រូវពន្យារពេល? អ្នកក៏គួរសួរថា តើអ្នកនឹងទទួលបានការបញ្ចុះតម្លៃប្រភេទណា ប្រសិនបើគម្រោងមិនត្រូវបានប្រគល់ឱ្យទាន់ពេលវេលា?។

៩. លទ្ធភាពលក់ចេញ

សួរភ្នាក់ងារលក់ តើមានលក្ខខណ្ឌអ្វីខ្លះ ប្រសិនបើអ្នកចង់លក់ខុនដូ? កិច្ចសន្យាខ្លះមិនអនុញ្ញាតឱ្យអ្នកលក់ឡើងវិញទេ រហូតដល់អ្នកបានសងប្រាក់កម្ចីរបស់អ្នកទាំងស្រុង។

១០. ទំហំ

អ្នកគួរពិចារណាទាំងទំហំឯកតា និងទំហំគម្រោង។ អ្នកគួរសាកសួរទំហំទាំងតំបន់ឯកជន និងតំបន់សាធារណៈ/រួម៕

         ដោយៈគង់ សិរីជេស៊ីកា

         ភ្នំពេញៈ ថ្នាក់ដឹកនាំជាន់ខ្ពស់ក្រុមហ៊ុនOCICបានថ្លែងឲ្យដឹងថា ស្ពានឆ្លងកាត់តភ្ជាប់ពីទីក្រុងកោះពេជ្រ និងទីក្រុងកោះនរាសម្រេចបានល្អប្រសើរ ជាមួយនឹងការសាងសង់ជើងតាងសម្រេចបាន៣៦ភាគរយហើយ។

លោកទូច សំណាងអគ្គនាយករងក្រុមហ៊ុនOCICបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២០ តុលានេះថា ការសាងសង់ជើងតាមបានបញ្ចប់ហើយ ដែលវាចាការងារនៅក្នុងទឹក ហេតុនេះនៅពេលយើងបញ្ចប់ការងារនេះ ក្រុមអ្នកសាងសង់លែកបារម្ភពីកម្រិតទឹកទៀតហើយ មានន័យថា ពួកគេអាចធ្វើការងារបានលឿនជាងមុន។

លោកបន្តថា “ទោះជាយ៉ាងណាការបញ្ចប់កាតរសាងសង់ស្ពាននេះ ត្រូវការរយៈពេលវែងបន្ថែមទៀត ដោយស្ពាននេះគ្រោងនឹងបញ្ចប់ នៅខែតុលាឬវិច្ឆិកាឆ្នាំ២០២៣ខាងមុខ”។លោកបន្តថា “ស្ពាននេះមានបណ្តោយប្រមាណ៥០០ម៉ែត្រ និងចំណាយថវិ​កា​សាងសង់អស់ប្រមាណ៣៨លានដុល្លារអាមេរិក”។

លោកទូច សំណាងបានបន្តថា ចំណែកស្ពានមួយទៀត មានប្រវែង៥៥ម៉ែត្រតភ្ជាប់ពីទីក្រុងកោះនរា ទៅកាន់ផ្លូវជាតិលេខ១ នឹងញ្ចប់មុនស្ពានតភ្ជាប់រវាងទីក្រុងកោះពេជ្រ និងទីក្រុងកោះនរា។ ស្ពាននេះគ្រោងនឹងបញ្ចប់នៅចុងឆ្នាំ២០២២ខាងមុខនេះ។

ទីក្រុងកោះនរាមានទំហំផ្ទៃដី១២៥ហិកតា ដែលជាទីក្រុងថ្មីមួយវិនិយោគដោយក្រុមហ៊ុនលំដាប់យក្សក្នុងស្រុកOCIC ដែលការចំណាយសាងសង់ហេដ្ឋារចនាសម្ព័ន្ឋអស់​ប្រមាណ២៥០០លានដុល្លារ។

អ្នកឧកញ៉ាពុង ឃាវសែអគ្គនាយកក្រុមហ៊ុនOCICបានថ្លែងក្នុងពិធីបើកការដ្ឋានសម្ភោធសាងសង់ស្ពានខាងលើ ក្រោមអធិបតីភាពសម្តេចតេជោហ៊ុន សែននាយករដ្ឋមន្រ្តីនៃកម្ពុជាថា នៅពេលទីក្រុងនេះសាងសង់ចប់ ក្រុមហ៊ុនអាចផ្តល់ចំណូលពន្ឋដល់រដ្ឋាភិបាលប្រមាណ២៥០លានដុល្លារអាមេរិកក្នុងមួយឆ្នាំ៕