លោកស្រីឆាយ ស៊ីវលីនបានជាប់ជាប្រធានសមាគមទីភ្នាក់ងារទេសចរណ៍កម្ពុជាសំរាប់អាណត្តិទី៩

ដោយៈគង់ សិរីជេស៊ីកា

ភ្នំពេញៈ ប្រធានសមាគមទីភ្នាក់ងារទេសចរណ៍កម្ពុជា (CATA) លោកស្រីឆាយ ស៊ីវលីនអាណត្តិទី៨ ត្រូវបានសម្រេចតែងតាំងជាប្រធានសមាគមនេះ សម្រាប់អាណត្តិទី៩ឆ្នាំ២០២១ ដល់ឆ្នាំ២០២៤ខាងមុខ។

លោកហូ វណ្ឌីប្រធានគណកម្មការរៀបចំ ការបោះឆ្នោតរបស់សមាគម CATA បានមានប្រសាសន៍ឲ្យដឹងតាមទូរស័ព្ទ កាលពីរាត្រីថ្ងៃទី២៥ វិច្ឆិកាកន្លងមកថា គណកម្មការរៀបចំការបោះឆ្នោតសមាគម បានសម្រេចជាឯកច្ឆ័នតែងតាំងលោកស្រីឆាយ ស៊ីវលីនជាប្រធានសមាគមនេះសម្រាប់អាណត្តិថ្មីខាងមុខនេះ។

លោកបន្តថា “ការសម្រេចជាឯកច្ឆ័ននេះ ដោយសារអ្នកឈរឈ្មោះបោះឆ្នោតម្នាក់ទៀតបានសម្រេចបោះបង់ការឈរឈ្មោះ ហេតុនេះដំណែងប្រធានជាស្វ័យប្រវត្តិបានទៅលើលោកស្រីឆាយ ស៊ីវលីន”។

លោកហូ វណ្ឌីបានបន្តថា នៅថ្ងៃទី២៦ វិច្ឆិកានេះ នឹងមានការប្រកាសពីសមាសភាព និងប្រធានសមាគមថ្មី និងពិធីសំណេះសំណាល និងផ្តល់អនុសាសន៍ណែនាំដែលធ្វើឡើងដោយលោកថោង ខុនរដ្ឋមន្រ្តីក្រសួងទេសចរណ៍ នៅសណ្ឋាគារម៉ារីយ៉ុត (លើផ្លូវត្រសក់ផ្អែម កែវផ្លូវសម្តេចប៉ាន)ដែលមានទីតាំងនៅសង្កាត់បឹងរាំង ខ័ណ្ឌដូនពេញ រាជធានីភ្នំពេញ៕

ក្រុមហ៊ុនប៉េង ហួតគ្រុប ទទួលបណ្ណសរសើរមេត្រីភាពបរិស្ថានលើកទី២ ពីក្រសួងបរិស្ថាន

ដោយៈសហការី

ភ្នំពេញៈ ក្រុមហ៊ុន ប៉េង ហួត គ្រុប បានចូលរួមទទួល “បណ្ណសរសើរមេត្រីភាពបរិស្ថាន” ពីក្រសួងបរិស្ថាន លើភាពឈានមុខគេក្នុងការអភិវឌ្ឍគម្រោងលំនៅឋានប្រណីត ជាមួយហេដ្ឋារចនាសម្ព័ន្ធ បៃតងលេចធ្លោជាងគេក្នុងប្រទេសកម្ពុជា។

ក្រុមហ៊ុន ប៉េង ហួត គ្រុប បានចូលរួមយ៉ាងសកម្ម ក្នុងការអនុវត្តសកម្មភាពប្រតិបត្តិមេត្រីភាពបរិស្ថានលើកិច្ចគាំពារបរិស្ថាន ការការពារធនធានធម្មជាតិ ការអភិរក្សជីវៈចម្រុះ និងការរស់នៅដោយចីរភាព។ នេះជាលើកទី២ហើយដែលក្រុមហ៊ុន ប៉េង ហួត គ្រុប បានទទួលបានបណ្ណសរសើរពីក្រសួងបរិស្ថាន និងការទទួលស្គាល់លើកិច្ចខិតខំប្រឹងប្រែង ចំពោះការចូលរួមរបស់ក្រុមហ៊ុនក្នុងការងារបរិស្ថាន។

ថ្លែងក្នុងកម្មវិធីលើកទឹកចិត្តមេត្រីភាពបរិស្ថាន ដើម្បីផ្តល់បណ្ណសរសើរមេត្រីភាពបរិស្ថានដល់ប្រតិបត្តិករគំរូសម្រាប់ឆ្នាំ២០២១ លោកសាយ សំអាល់ រដ្ឋមន្រ្តីក្រសួងបរិស្ថាន បានមានប្រសាសន៍លើកឡើងនូវចំណុចគន្លឹះថា ក្រសួងបរិស្ថានមានបេសកកម្មជាច្រើនក្នុងវិស័យបរិស្ថាន ក្នុងនោះការលើកកម្ពស់ប្រតិបត្តិមេត្រីភាពបរិស្ថាន គឺជាកិច្ចការមួយដ៏សំខាន់ ធ្វើយ៉ាងណាឲ្យកម្ពុជាមានបរិស្ថានស្អាត មានភាពបៃតង និងមានភាពស៊ីវិល័យ។

លោកបន្តថា “ការងារនេះ អាចសម្រេចបាន ដ៏រាបណាមានការចូលរួមពីគ្រប់តួរអង្គពាក់ព័ន្ធ និងប្រជាពលរដ្ឋគ្រប់រូប”។លោកបន្តថា “ជាប្រវត្តិសាស្ត្រថ្មីរបស់កម្ពុជា ប្រជាពលរដ្ឋ ចាប់ផ្តើមស្គាល់អំពីសក្ដានុពល និងសម្រស់ប្រទេសកម្ពុជា ដែលមានតំបន់ទេស​ចរណ៍សម្បូរបែប ជាពិសេសទេសភាពបែបធម្មជាតិ។ ផ្តើមចេញពីកត្តានេះ បង្កើតនូវមនសិការស្រឡាញ់ទឹកដី និងធម្មជាតិក្នុងប្រទេស ដែលជាមូលដ្ឋានគ្រឹះជំរុញឲ្យកិច្ចគាំពារបរិស្ថាន និងការអភិរក្សធនធានធម្មជាតិ ទទួលបានជោគជ័យ”។

ជាមួយគ្នានេះលោកចាន់ រដ្ឋា ប្រធានផ្នែកកិច្ចការសាធារណៈជាន់ខ្ពស់ នៃក្រុមហ៊ុន ប៉េង ហួត គ្រុប បានលើកឡើងថា ក្រុមហ៊ុនមានកិត្តិយស និងសេចក្តីសោមនស្សយ៉ាងក្រៃលែងដែលទទួលបាននូវបណ្ណសរសើរមេត្រីភាពបរិស្ថាននេះជាលើទី២។ បរិស្ថានបៃតង និងការអភិវឌ្ឍរបស់ក្រុមហ៊ុន ត្រូវបានផ្សារភ្ជាប់គ្នាយ៉ាងជិតស្និទ្ធ តាមចក្ខុវិស័យរបស់ស្ថាបនិក និងទិសដៅរបស់ក្រុមហ៊ុន។

សូមថ្លែងអំណរគុណដល់ក្រសួងបរិស្ថាន ដែលបានរៀបចំឲ្យមានកម្មវិធីនេះលើក ព្រមទាំងជំរុញ ឲ្យមានការចូលរួមកាន់តែច្រើនពីប្រតិបត្តិករនានា និងបងប្អូនប្រជាពលរដ្ឋ។ ទន្ទឹមនឹងនេះក៏សូមថ្លែងអំណរគុណផងដែរ ដល់ថ្នាក់ដឹកនាំបុគ្គលិកគ្រប់ជាន់ថ្នាក់របស់ក្រុមហ៊ុន បងប្អូនប្រជាពលរដ្ឋដែលរស់នៅក្នុងគម្រោង និងអតិថិជនរបស់បុរីប៉េងហួតដែលបានចូលរួមដោយផ្ទាល់ និងដោយប្រយោល ជាមួយការគំាទ្រលើសកម្មភាព និងការងារបរិស្ថានរបស់ក្រុមហ៊ុនកន្លងមក។

ដើម្បីជំរុញការចូលរួមពីប្រតិបត្តិករ ជានីតិបុគ្គល និងរូបវន្តបុគ្គល មកពីគ្រប់វិស័យ មិនថាវិស័យសាធារណៈ វិស័យឯកជន ឬគ្រឹះស្ថាននានា ក្នុងកិច្ចគាំពារបរិស្ថាន ការអភិរក្សជីវៈចម្រុះ ការប្រើប្រាស់ធនធានធម្មជាតិឲ្យមាននិរន្តរភាព និងការរស់នៅដោយចីរភាព ក្រសួងបរិស្ថាន ដែលមាននាយកដ្ឋានរង្វាន់ និងលើកទឹកចិត្ត នៃអគ្គនាយកដ្ឋានចំណេះដឹង និងព័ត៌មានបរិស្ថានជាសេនាធិការ បានរៀបចំកម្មវិធីលើកទឹកចិត្តមេត្រីភាពបរិស្ថានប្រចាំឆ្នាំ ដើម្បីផ្តល់បណ្ណសរសើរមេត្រីភាពបរិស្ថានជូនដល់ប្រតិបត្តិករដែលបានចូលរួមប្រតិបត្តិមេត្រីភាពបរិស្ថានបានល្អប្រសើរ។

នៅឆ្នាំ២០២១នេះ ប្រតិបត្តិករមេត្រីភាពបរិស្ថានឆ្នើមសរុបចំនួន២៣០ ដែលទទួ​លបានបណ្ណសរសើរមេត្រីភាពបរិស្ថាន មកពីចម្រុះវិស័យ រួមមានជាអាទិ៍៖ (ទី១)នីតិបុគ្គល ដូចជា ក្រុមហ៊ុនផលិតភេសជ្ជៈ ក្រុមហ៊ុនទូរស័ព្ទចល័ត ក្រុមហ៊ុនអចលនទ្រព្យ ធនាគារ ផលិតកម្ម រម្មណីយដ្ឋាន ភោជនីដ្ឋាន ឬគ្រឹះស្ថានសាធារណៈផ្សេងៗជាដើម និង(ទី២)រូបវន្តបុគ្គល៖ ដូចជា អ្នកថតរូប សិល្បៈករ តន្រ្តីករ ផលិតករ ឬបុគ្គលសាធារណៈផ្សេងៗទៀត។

កន្លងមកក្រុមហ៊ុនបានចូលរួមក្នុងសកម្មភាពជាច្រើនដូចជា ទិវាសម្អាតពិភពលោកនៅកម្ពុជា ទិវាបរិស្ថានជាតិ និងទិវាបរិស្ថានពិភពលោក សហការជាមួយក្រសួងបរិស្ថានចុះផ្សព្វផ្សាយអំពីការបែងចែក និងរៀបចំទុកដាក់សំរាមឱ្យបានត្រឹមត្រូវ ឧបត្ថម្ភរថយន្តបោសសំរាម ដល់អាជ្ញាធរមូលដ្ឋានក្នុងការសម្អាតទីក្រុងភ្នំពេញ ចូលរួមកម្មវិធីប្រមូ​លសំណល់ប្លាស្ទិក នៅតាមបឹងទន្លេសាបនារដូវទឹកសម្រក ក៏ដូចជាបានចូលរួមរៀបចំកម្មវិធីដាំដើមឈើ។ល។៕

រដ្ឋសភាជាតិសម្រេចអនុម័តឱ្យរាជរដ្ឋាភិបាលចំណាយថវិកា៨៥០០លានដុល្លារសម្រាប់ឆ្នាំ២០២២

ដោយៈវឌ្ឈនៈ

ភ្នំពេញៈ គម្រោងចំណាយប្រាក់ចំនួន៨,៥ពាន់លានដុល្លារអាមេរិក របស់រាជរដ្ឋាភិបាលកម្ពុជា ត្រូវរដ្ឋសភាជាតិយល់ព្រមនិងសម្រេចអនុម័តជាឯកច្ឆន្ទរួចហើយ ។ នេះបើតាមលទ្ធភាពកិច្ចប្រជុំរបស់រដ្ឋសភានៅថ្ងៃទី២៥ វិច្ឆិកា២០២១នេះ ។

យោងតាមសេចក្តីប្រកាសព័ត៌មានរបស់រដ្ឋសភាកម្ពុជាឱ្យដឹងថា អង្គរដ្ឋសភាចំនួន៩៩រូប នៅក្នុងសម័យប្រជុំពេញដឹក នាំដោយសម្ដេចអគ្គមហាពញាចក្រី ហេង សំរិន ប្រធានរដ្ឋសភា យល់ឃើញថា សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់ គ្រងឆ្នាំ២០២២របស់រាជរដ្ឋាភិបាល ក្នុងគម្រោងចំណាយដែលមានការកើនឡើង៨,៤ ភាគរយ បើធៀបនឹងច្បាប់ថវិកាឆ្នាំ២០២១នេះ គឺមានលក្ខណៈសមស្រប ទៅនឹងបរិការណ៍នាពេ​លបច្ចុប្បន្ន ដែលកម្ពុជាកំពុងតែប្រយុទ្ធប្រឆាំងនឹងជំងឺកូវីដ-១៩ផង និងធ្វើការស្តារសេដ្ឋកិច្ចឱ្យងើបឡើងវិញ បន្ទាប់ពីរងផលប៉ះពាល់ទៅលើគ្រប់វិស័យ នៃជំងឺរាតត្បាតសកលនេះផង។

ហិរញ្ញវត្ថុសម្រាប់ការគ្រប់គ្រងឆ្នាំ២០២២ ត្រូវបានរាជរដ្ឋាភិបាលស្នើក្នុងគម្រោងចំណាយចំនួន៣៤,៧ទ្រីលានរៀល ដែលត្រូវជា២៧,៩៥ភាគរយ នៃផលិតផលក្នុងស្រុកសរុប ដោយកើនឡើង៨,៤ភាគរយ បើធៀបនឹងច្បាប់ថវិកាឆ្នាំ២០២១។ ជាមួយគ្នានេះរដ្ឋាភិបាលក៏បានកំណត់ទំហំ នៃការខ្ចីប្រាក់ពីដៃគូអភិវឌ្ឍន៍ ក្នុងកម្រិត១.៦០០ លានSDR ឬត្រូវជាប្រមាណជា២.២០០ លានដុល្លារអាមេរិក ដើម្បីប្រើប្រាស់លើការស្តារ និងជំរុញកំណើនសេដ្ឋកិច្ចឡើង វិញពីផលប៉ះពាល់នៃជំងឺកូវីដ១៩។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ មាន ប្រសាសន៍ថា ថវិកាជាតិឆ្នាំ២០២២ ត្រូវបានរៀបចំ និងវិភាជសម្រាប់ការអនុវត្តន៍សកម្មភាពជាអាទិភាពដូចជា ការទប់ទល់នឹងការរាតត្បាត និងកាត់បន្ថយផលប៉ះពាល់នៃជំងឺកូវីដ-១៩ ការស្តារនិងជំរុញកំណើន សេដ្ឋកិច្ចឱ្យស្ទុះងើបឡើងវិញ ផ្តល់លទ្ធភាពឱ្យប្រជាជនទទួលបានប្រាក់ ចំណូលខ្ពស់ឡើងវិញនិងជំរុញ បង្កើនចំណូលថវិកាជាតិ ការបន្តអភិវឌ្ឍន៍ធន ធានមនុស្ស ការបន្តកសាងហេដ្ឋារចនាសម្ព័ន្ធរូបវ័ន្ត ការបន្តអភិវឌ្ឍន៍និងបង្កើនតម្លៃ បន្ថែមនៃវិស័យកសិកម្ម។

ការកសាងប្រព័ន្ធគាំពារសង្គមរឹង មាំនិងប្រព័ន្ធសុខាភិបាល ប្រកបដោយគុណភាពនិងមានភាពឆ្លើយតបខ្ពស់ជាដើម។ ជាមួយគ្នានេះ ក៏ដើម្បីបន្តធានាបាននូវការបើកផ្តល់បៀវត្សរ៍ បស់មន្ត្រីរាជការឱ្យទាន់ពេលវេលា គឺ២ដងក្នុង១ខែ ដោយមិនមានការកាត់ប្រាក់បៀវត្សរបស់មន្ត្រីរាជការគ្រប់ប្រភេទ ខណៈកម្រិតប្រាក់បៀវត្សអប្បបរមាឆ្នាំ ២០២២សម្រាប់មន្ត្រីរាជការស៊ីវិល ត្រូវបានរក្សាជាង ១,១៧ម៉ឺនរៀល បៀវត្សគ្រូបង្រៀននិងគ្រូពេទ្យ រក្សាស្មើនឹងប្រមាណ១លាន២៧ម៉ឺនរៀល និងបៀវត្សនគរបាលរក្សាទាបបំផុតចាប់ពី ១លាន១២ម៉ឺនរៀលឡើងទៅ៕

អាជ្ញាធរកំពុងសាងសង់ហេដ្ឋារចនាសម្ព័ន្ឋធំ៣ ដើម្បីលេចមុខមាត់នៅតំបន់ប្រាសាទសំបូរព្រៃគុកលើការអភិរក្សនិងអភិវឌ្ឍន៍

ដោយៈសុធារី

កំពង់ធំៈ អាជ្ញាធរជាតិសំបូរព្រៃគុក បាននិងកំពុងសាងសង់សមិទ្ធផលសំខាន់ៗនៅតំបន់ប្រាសាទសំបូរព្រៃគុក ដើម្បីបម្រើដល់ការអភិរក្ស និងការអភិវឌ្ឍ ក្នុងនោះរួមមានហេដ្ឋារចនាសម្ព័ន្ធ ក្នុងបរិវេណអាជ្ញាធរជាតិព្រៃគុក អគារសិក្សានិងសមិទ្ធផលគាំទ្រមួយចំនួន ក្នុងសាកលវិទ្យាល័យតេជោសែនកំពង់ធំ និងផ្លូវវាងតំបន់ប្រាសាទសំបូរព្រៃគុក។

អាជ្ញាធរជាតិសំបូរព្រៃគុកបានឱ្យដឹងថា ហេដ្ឋារចនាសម្ពន្ធក្នុងបរិវេណអាជ្ញាធរជាតិសំបូរព្រៃគុក គឺមានការសាងសង់អគារស្នាក់ការ១ខ្នង របងព័ទ្ធជុំវិញ ដែលលាតសន្ធឹងលើផ្ទៃដីសរុប៥ហិកតា។ គម្រោងនេះ ត្រូវបានអនុវត្តការសាងសង់ដោយក្រុមហ៊ុន លី ឈួង សំណង់ អាហរ័ណនីហរ័ណ។

ចំណែកនៅអគារសាកលវិទ្យាល័យតេជោសែនកំពង់ធំ គឺមានការសាងសង់អគារ២ខ្នង កម្ពស់៣ជាន់ គឺអគារ A និងអគារ C មានរបងព័ទ្ធជុំវិញ មានស្រះទឹក អន្តេវាសិក   ដ្ឋាន (ទីសំណាក់របស់សិស្សា) និងហេដ្ឋារចនាសម្ពន្ធផ្សេងទៀត។ សំណង់ទាំងអស់នេះលាតសន្ធឹងលើផ្ទៃដីសរុប២០ហិកតា ដោយវគ្គទី១ អនុវត្តគម្រោងរយៈពេល២ឆ្នាំ ចាប់ពីខែមិថុនា ឆ្នាំ២០២០ រហូតដល់ខែមិថុនា ឆ្នាំ២០២២។ គម្រោងនេះក៏ត្រូវបានអនុវត្តការដោយក្រុមហ៊ុន លី ឈួង សំណង់ អាហរ័ណនីហរ័ណដែរ។

ដោយឡែក សម្រាប់ការសាងសង់ផ្លូវ វាងប្រាសាទសំបូរព្រៃគុកវិញ គឺមានប្រវែងសរុប ១៣.៤៩គីឡូម៉ែត្រ ទទឹង១១ម៉ែត ក្នុងនោះត្រូវចាក់កៅស៊ូប្រភេទ AC ចំនួន៩ម៉ែត្រ កម្រាស់៩ហ៊ុន ហើយមានស្ពាន លូ ដែលបានកំណត់រួចមកហើយ។

ការសាងសង់ផ្លូវវាងនេះ គឺចាប់ផ្ដើមចេញពីភូមិចំណារ ឃុំសាលាវិស័យ ស្រុកប្រាសាទបល្ល័ង្ក មកដល់ភូមិត្រពាំងជ្រូកឃុំសំបូរ ស្រុកប្រាសាទសំបូរ ដើម្បីវាងតំបន់ប្រាសាទសំបូរព្រៃគុក កុំឱ្យរថយន្តធំៗដឹកទំនិញចេញចូលនៅក្នុងតំបន់ប្រាសាទ។ គម្រោងសាងសង់នេះ គឺអនុវត្តដោយអាជ្ញាធរជាតិសំបូរព្រៃគុក។ អាជ្ញាធរជាតិសំបូរព្រៃគុកបានបន្តថា គម្រោងសាងសង់ទាំង៣ខាងលើនេះ គឺប្រើប្រាស់ថវិកានៅថ្នាក់ក្រោមជាតិ។

ខណៈដែលក្រុមហ៊ុនសាងសង់កំពុងអនុវត្តការងារនោះ នាថ្ងៃទី២៤ ខែវិច្ឆិកា ឆ្នាំ២០២១ លោកជំទាវភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ រួមជាមួយលោក ងួន រតនៈ អភិបាលខេត្តកំពង់ធំ បានចុះពិនិត្យវាយតម្លៃលើការសាងសង់ទាំង៣ទីតាំងសំខាន់ៗខាងលើនេះ។ ក្នុងការចុះត្រួតពិនិត្យនោះ លោកស្រីរដ្ឋមន្ត្រីបានដាស់តឿនឱ្យក្រុមការងារនៃអាជ្ញាធរជាតិសំបូរព្រៃគុក និងក្រុមហ៊ុនសាងសង់ត្រូវប្រកាន់ខ្ជាប់នូវគុណភាព ដោយអនុលោមរូបភាពទៅតាមកិច្ចសន្យា ដែលបានព្រមព្រៀងគ្នារួចហើយ។

លោកជំទាវភឿង សកុណា បានជំរុញឲ្យក្រុមការងារ ត្រូវឧស្សាហ៍ចុះត្រួតពិនិត្យលក្ខណៈបច្ចេកទេស ដើម្បីរកឲ្យឃើញនូវគុណភាព សំដៅឱ្យការប្រើប្រាស់បានយូរអង្វែង និងសម្រាប់ក្មេងជំនាន់ក្រោយបានឃើញទាំងសំណង់អគារ ហេដ្ឋារចនាសម្ពន្ធ និងផ្លូវជាដើម៕

ប្រទេសបារ៉ែនចាប់ផ្ដើមផែនការវិនិយោគ ៣០ពាន់លានដុល្លារសាងសង់ទីក្រុងក្នុងទឹកសមុទ្រ

ដោយៈសុខុម

ក្រុងរីយ៉ាដ: ប្រទេសបារ៉ែន កាលពីថ្ងៃពុធ ទី២៤ វិច្ឆិកា បានចាប់ផ្ដើមផែនការជាយុទ្ធសាស្រ្តថ្មីមួយ ដើម្បីបោះទុនរហូតដល់ទៅ៣០ពាន់លានដុល្លារ វិនិយោគលើគម្រោងថ្មីៗជាង២០ គម្រោងជាមួយនឹងការសាងសង់ទីក្រុងក្នុងទឹកសមុទ្រថ្មីៗចំនួន៥។

យោងតាមទីភ្នាក់ងារសារព័ត៌មានរដ្ឋ Bahrain News Agency (BNA) ឱ្យដឹងថា គម្រោងដែលមានទំហំទុនវិនិយោគ យ៉ាងច្រើនសន្ធឹកសន្ធាប់នេះ រាប់បញ្ចូលការអភិវឌ្ឍហេដ្ឋារចនាសម្ព័ន្ធ ដែលរួមមានទាំងផ្លូវឆ្លងកាត់សមុទ្រថ្មីមួយខ្សែ ដែលតភ្ជាប់ប្រទេសបារ៉ែន ទៅប្រទេសអារ៉ាប៊ីសាអូឌីត។

ទន្ទឹមនេះប្រទេសបារ៉ែន ក៏នឹងបង្កើតប្រព័ន្ធរថភ្លើងក្រោមដី ប្រវែង១០៩គីឡូម៉ែត្រ និងផ្លូវ Northern Road ប្រវែង២២,៥គីឡូម៉ែត្រផងដែរ។

រដ្ឋាភិបាលប្រទេសនេះ បានបង្ហាញសុទិដ្ឋិយមថា យុទ្ធសាស្ត្រនេះ នឹងជួយបង្កើតការងារសម្រាប់ពលរដ្ឋ និងជួយជំរុញកំណើនសេដ្ឋកិច្ចនៅក្នុងប្រទេសបារ៉ែន។

ក្រៅពីនេះប្រទេសបារ៉ែន នឹងបង្កើនសមត្ថភាពចម្រាញ់ប្រេង ពី២៦៧.០០០បារ៉ែលទៅ៣៨០.០០០បារ៉ែលក្នុងមួយថ្ងៃ តាមរយៈកម្មវិធី Bapco Modernisation Programme ដែលជាគម្រោងឧស្សាហកម្មដ៏ធំបំផុត ក្នុងប្រវត្តិសាស្ត្ររបស់ប្រទេសបារ៉ែន។

ជាផ្នែកមួយនៃយុទ្ធសាស្ត្រថ្មីនេះ បណ្ដាក្រុមហ៊ុនអភិវឌ្ឍន៍ឯកជន អាចចូលរួមដេញថ្លៃយកកិច្ចសន្យា ដើម្បីអភិវឌ្ឍគម្រោងទាំងនេះបាន៕ Arab News៕

ទីក្រុងឌូបៃបានរកឃើញ “ត្រីមាសទីបីដ៏ល្អបំផុតក្នុងប្រវត្តិសាស្ត្រ” របស់ខ្លួនសម្រាប់តម្លៃប្រតិបត្តិការលក់អចលនទ្រព្យ

ដោយៈម៉ាលីស

ឌូបៃៈ តម្លៃអចលនទ្រព្យលំនៅដ្ឋាននៅទីក្រុងឌូបៃ បាននិងកំពុងស្ទុះងើបឡើងវិញយ៉ាងខ្លាំងពីកម្រិតទាបបំផុត ដោយផ្អែកលើតម្រូវការកើនឡើង អារម្មណ៍ប្រសើរឡើងវិញនៃវិនិយោគិន និងអ្នកប្រើប្រាស់ ការស្ទុះងើបឡើងវិញនៃតម្លៃប្រេង និងឧស្ម័ន និងការស្ទុះងើបម៉ាក្រូសេដ្ឋកិច្ចបន្តិចម្តងៗ។ នេះបើយោងតាម   S&P Global Platts ។

ទីក្រុងឌូបៃបានឃើញ “ត្រីមាសទីបីដ៏ល្អបំផុតក្នុងប្រវត្តិសាស្ត្រ” របស់ខ្លួនសម្រាប់តម្លៃប្រតិបត្តិការលក់អចលនទ្រព្យ នេះបើយោងតាមមន្ទីរដែនដីរបស់ឌូបៃ។  ដោយសារទីក្រុងឌូបៃបានបដិសេធការចាក់សោរ បង្កើនការចាក់វ៉ាក់សាំង និងអនុវត្តន៍គោលនយោ​បាយថ្មី ដើម្បីទាក់ទាញមនុស្សឱ្យឆ្លងកាត់ជម្រៅនៃជំងឺរាតត្បាត។

ខណៈពេលដែលប្រទេសជាច្រើន បានដាក់ការចាក់សោរឡើងវិញ និងការហាមប្រាមការធ្វើដំណើរកាលពីឆ្នាំមុន ទីក្រុងឌូបៃមានភាពលេចធ្លោ សូម្បីតែក្នុងចំណោមប្រទេសជិតខាងរបស់ខ្លួន ដោយអនុញ្ញាតឱ្យមានការធ្វើដំណើរ ដោយភាគច្រើនមិនមានការរំខានសម្រាប់ការការធ្វើដំនើរឡើយ។

វាក៏ត្រូវបានបន្ធូរបន្ថយបទប្បញ្ញត្តិធុរកិច្ច និងទិដ្ឋាការផងដែរ ដោយនាំយកអ្នកតំណាងឌីជីថលជាច្រើន ចូលទៅក្នុងប្រទេសអេមីរ៉ាត បន្ទាប់ពីចំនួនប្រជាជនរបស់ខ្លួនបានធ្លាក់ចុះជិតជាង៨ភាគរយ ក្នុងឆ្នាំ ២០២០ ដោយសារជំងឺរាតត្បាត។

លោកSajwani បាននិយាយថា ប្រជាជនបានមកទីក្រុងឌូបៃ ក្នុងអំឡុងពេលបិទខ្ទប់ប្រទេសរបស់ពួកគេ ហើយបានរកឃើញសុវត្ថិភាព ការថែទាំសុខភាព វ៉ាក់សាំង និងសន្តិសុខ ដែលធ្វើឱ្យទីក្រុងនេះ ក្លាយជាកន្លែងទាក់ទាញក្នុងការវិនិយោគ។ ទីក្រុងឌូបៃពិតជារីកចំរើនខ្លាំងពីការកាន់ទស្សនៈបែបនេះ”។

អ្នកជួលនៅទីក្រុងឌូបៃ ក៏មានអារម្មណ៍ថា មានការកើនឡើងយ៉ាងខ្លាំងនៅក្នុងទីផ្សារផងដែរ។  អ្នកជំនាញវ័យក្មេងជាច្រើន បានបង្ហោះការផ្សាយពាណិជ្ជកម្ម ស្វែងរកបន្ទប់នៅក្នុងផ្ទះរួម ដោយទុកអាផាតម៉ិនរបស់ពួកគេ ខណៈដែលពួកគេនិយាយថា ម្ចាស់ផ្ទះរបស់ពួកគេ កំពុងបង្កើនតម្លៃជួលពី៣០% ទៅ ៥០% ៕ ប្រភព: CNBC៕

សួនពាណិជ្ជកម្មណាឌី និងកម្មវិធីចែករំលែកអំពីការវិនិយោគនៅការិយាល័យលក់បុរីណាឌី

ដោយៈ មុនី

ភ្នំពេញៈ ថ្ងៃទី 25 ខែវិច្ឆិកា ឆ្នាំ 2021 – បុរី ណាឌីនឹងរៀបចំកម្មវិធីចែករំលែកគន្លឹះនៃការវិនិយោគ ជាមួយនឹងអ្នកជំនាញអចលនទ្រព្យ លោក Simon Luu នៅថ្ងៃទី 27 ខែវិច្ឆិកា ឆ្នាំ 2021 វេលាម៉ោង 3 រសៀលនៅការិយាល័យលក់ បុរី ណាឌី។

អចលនទ្រព្យពាណិជ្ជកម្ម គឺជាការវិយោគដ៏មានឥទ្ធិពលបំផុតមួយ សម្រាប់អ្នកវិនិយោគទាំងអស់។ សម្រាប់ប្រជាជនកម្ពុជា ដែលចង់ធ្វើការវិនិយោគចម្រុះ និងចង់ប្រើប្រាស់ធនធានក្នុងការវិនិយោគ លើអចលនទ្រព្យពាណិជ្ជកម្ម គម្បីធ្វើការជ្រើសរើសទីកន្លែងឲ្យបានត្រឹមត្រូវ ដើម្បីធានាផ្ដល់ជូននូវផលចំណេញ ប្រកបដោយចីរភាព និងភាពនឹងនរផងដែរ។

សម្រាប់អ្នកវិនិយោគលើអចលនទ្រព្យបែបពាណិជ្ជកម្ម ដែលមានភាពវ័យឆ្លាតតែងទទួលបានអត្ថប្រយោជន៍ ដ៏សម្បូរបែបលើសគេទាំង អត្រាផលចំណេញ កំណើនលំហូរសាច់ប្រាក់ ការកើនតម្លៃ ការចំណាយតិចលើការជុសជុល និងគ្រប់គ្រង និងជាពិសេសកុងត្រាជួលរយៈពេលវែង។

សួនពាណិជ្ជកម្មណាឌី មានទីតាំងស្ថិតនៅក្នុងតំបន់ ដែលមានសន្ទុះនៃការអភិវឌ្ឍខ្លាំងគឺខណ្ឌជ្រោយចង្វារ។ អ្នកតំណាងផ្ទាល់ពីបុរី ណាឌីបានរៀបរាប់ក្នុងព្រឹត្តិការណ៍សម្ពោធសួនពាណិជ្ជកម្មណាឌី អំពីការផ្ដល់ជូននូវសេវាកម្មឡានក្រុង ដែលនឹងបម្រើដល់អ្នកមកទស្សនាកម្សាន្តជាង 10,000 នាក់ក្នុងមួយថ្ងៃ ហើយទីនេះមានចម្ងាយ ត្រឹមតែ 2 គីឡូម៉ែត្រប៉ុណ្ណោះ ពីពហុកីឡដ្ឋានដែលនឹងប្រារព្ធព្រឹត្តិការណ៍កីឡាស៊ីហ្គេម។

ទាំងនេះបង្ហាញឲ្យឃើញអំពី ការយកចិត្តទុកដាក់ខ្ពស់របស់អ្នកអភិវឌ្ឈន៍ ចំពោះម្ចាស់គេហដ្ឋានទាំងអស់។ ក្រៅអំពីនេះ សួនពាណិជ្ជកម្មណាឌី ក៏មានក្រុមហ៊ុនអន្តរជាតិជាង 10 ត្រៀមជួលទីតាំងរួចជាស្រេចរួមមាន  ភោជនីយដ្ឋានKabukicho, Luk Hot Pot, Hong Kong Restaurant, Singapore Bak Kut Teh, Bioplus Health Centre, GC Pest Control ហើយក៏កំពុងអញ្ជើញក្រុមហ៊ុនលំដាប់ពិភពលោក ដូចជា Starbucks Coffee, Burger King, Adidas Outlet, Nike Outlet ជាដើមមកចូលរួម។

ទាំងនេះសបញ្ជាក់ឲ្យឃើញថា ម្ចាស់អាជីវកម្មទាំងអស់អាចឈប់បារម្ភ អំពីចំនួនអ្នកមកទស្សនាកម្សាន្ត ដោយសារតែភាពល្បីល្បាញ នាពេលអនាគតរបស់សួនពាណិជ្ជកម្មណាឌីនៅពេល ដែលក្រុមហ៊ុនទាំងនេះចូលមកដល់។ មិនតែប៉ុណ្ណោះបន្ទាប់ពីការប្រគល់ផ្ទះ សហគមន៍ណាឌី នឹងមានអ្នករស់នៅមិនក្រោម 5,000នាក់បន្ថែមទៀតសម្រាប់ជាអតិថិជនរបស់អាជីវកម្មទាំង អស់។

សួនពាណិជ្ជកម្មណាឌីត្រូវបានរចនាឡើង ដោយផ្ដោតលើការបង្កើននូវប្រសិទ្ធិភាពប្រើប្រាស់អាគារ ទីតាំង និងពេលវេលា។ គេហដ្ឋានទាំងអស់មានកម្ពស់4ជាន់ព្រមជាមួយនឹងបន្ទប់គេង 4 និងបន្ទប់ទឹក 5 នៅគ្រប់ផ្ទះទាំងអស់ ព្រមជាមួយនឹងវ៉េរ៉ង់ដាចំនួន 2 សម្រាប់មើលទេសភាពដ៏ ស្រស់បំព្រង។ សួនពាណិជ្ជកម្មណាឌី ក៏រួមមាននូវផ្ទះជាន់លើបង្អស់ សម្រាប់ឲ្យម្ចាស់លំនៅឋាន ទាំងអស់ប្រើប្រាស់ផងដែរ។ ពួកគេក៏អាចកែប្រែជាន់ដំបូលឲ្យក្លាយ ទៅជាស្កាយបារផ្ទាល់ខ្លួនផង ឬជួលសម្រាប់ការប្រើប្រាស់ផ្សេងទៀតផង។

តើអ្នកចាប់អារម្មណ៍ពីសួនពាណិជ្ជកម្មណាឌីមែនទេ? សូមអញ្ជើញមកស្ដាប់អ្នកជំនាញផ្នែកអចលនទ្រព្យលោក Simon Luu នៅថ្ងៃសៅរ៍ 27 ខែវិច្ឆិកា ឆ្នាំ 2021 នាម៉ោង 3 រសៀល។ លោក Simon នឹងជម្រាបជូនលោកអ្នកនូវចំណេះដឹង និងគន្លឹះនៅក្នុង ការវិនិយោគលើអចលនទ្រព្យពាណិជ្ជកម្ម ជាពិសេសគឺផ្ទះអាជីវកម្ម និងសួនពាណិជ្ជកម្មណាឌី។

លោក Simon Luu មានបទពិសោធន៍ជាង25ឆ្នាំ ក្នុងវិស័យពាណិជ្ជកម្មនៅក្នុងព្រះរាជាណាចក្រកម្ពុជា។ លោកមានបទពិសោធន៍ ជាអ្នកគ្រប់គ្រងជាន់ខ្ពស់លើវិស័យដ៏សម្បូរបែបផ្សេងទៀត ដូចជា នៅធនាគាបរទេស និងធនាគាក្នុងស្រុកដ៏ល្បីល្បាញ និងនៅក្នុងក្រុមហ៊ុនគ្រប់គ្រងសន្និធិ និងមូលធនឯកជនជាង10 ឆ្នាំ។ លោកក៏មានតំណែងជាអ្នកប្រឹក្សាជាន់ខ្ពស់ សម្រាប់អ្នកអភិវឌ្ឈន៍បុរីលំដាប់ខ្ពស់ នៅក្នុងព្រះរាជាណាចក្រកម្ពុជាជាង10 ឆ្នាំផ្សេងទៀត។

លោកអ្នកអាច អញ្ជើញមកទស្សនាការិយាល័យលក់ផ្ទាល់ ដែលមានទីតាំងស្ថិតនៅតាមបណ្ដោយផ្លូវជាតិលេខ ​6 ហើយនៅក្នុងឱកាសនេះ កាដូពិសេស ការធានាជួលត្រឡប់ ប្រូម៉ូសិន និងការផ្ដល់ជូនដ៏ច្រើនសន្ធឹកសន្ធាប់ នឹងត្រូវបានផ្ដល់ជូនទៅអតិថិជនទាំងអស់ ដែលកក់នៅក្នុងពេលនេះ។ សម្រាប់អ្នកដែលមានចំណាប់អារម្មណ៍ ក្នុងការចូលរួមក្នុងការចូលរួមស្ដាប់លោក Simon Luu សូមធ្វើការចុះឈ្មោះតាមរយៈលេខទូរស័ព្ទ 096 606 6688 (តេលេក្រាម)។

សម្រាប់ព័ត៌មានលម្អិតអំពីបុរី ណាឌីសូមចូលទៅកាន់ហ្វេសប៊ុកផេកផ្លូវការ៖

–        Borey Nadi by GC City: https://www.facebook.com/NADIBYGCC

–        Borey Nadi by GC City: https://www.instagram.com/borey_nadi_by_gc_city/

–        ឆាណែលតេលេក្រាម – https://t.me/BOREYNADIBYGCCITY

–        លេខទូរស័ព្ទ និងតេលេក្រាម: 096 606 6688៕

ក្រុមហ៊ុនប៉េង ហួតផ្តល់ជូនខុនដូតម្លៃជាង4ម៉ឺនដុល្លារ អាចរំលស់100ភាគរយនិងផ្ដល់ជូនគ្រឿងសង្ហារិមមួយកំភ្លេ

ដោយៈសហការី

ភ្នំពេញៈ គម្រោងខុនដូ ដឹស្តា ប៉ូឡារីស២៣ របស់បុរីប៉េង ហួត ដែលមានទីតាំងស្ថិតនៅក្នុងខណ្ឌច្បារអំពៅ គ្រោងនឹងបញ្ចប់ការសាងសង់ក្នុងពេលឆាប់ៗនេះ ព្រមជាមួ​យការបំពាក់គ្រឿងសង្ហារិមរួចជាស្រេច សម្រាប់គ្រប់ប្រភេទយូនីត។

ស្ថិតក្នុងទីតាំងដ៏មានសក្ដានុពល ពោលគឺនៅចំកណ្ដាលគម្រោងពាណិជ្ជកម្មដ៏មមាញឹក “ដឹស្តាផ្លាទីនីម ប៉ូឡារីស” របស់បុរី ប៉េង ហួត ខុនដូ ដឹស្តា ប៉ូឡារីស ២៣ គឺជាជម្រើសនៃការរស់នៅបែបស៊ីវិល័យ ទាន់សម័យ និងឯករាជ្យភាពយ៉ាងពេញលេញ ជាមួ​យតម្លៃចាប់ពីជាង4ម៉ឺនដុល្លារឡើងទៅ ហើយស្ថិតនៅជិតទីតាំងសំខាន់ៗ ជាច្រើនទាំងក្នុងគម្រោងបុរី ប៉េង ហួត ផ្ទាល់ និងហេដ្ឋារចនាសម្ព័ន្ធក្រៅគម្រោងផ្សេងៗ។

ដឹស្តា ប៉ូឡារីស ២៣ មានច្រើនជម្រើសដូចជា យូនីតបន្ទប់គេង១ ដែលមានទំហំ ៣០ម៉ែត្រការេ និងយូនីតបន្ទប់គេង២ ដែលមានទំហំ៤៦ម៉ែត្រការេ ចែកចេញជា៣អគារដែលអតិថិជន អាចរីករាយជាមួយទេសភាពប្លែកភ្នែក ប្លែកអារម្មណ៍ពីការរស់នៅក្នុងគេហដ្ឋានធម្មតា។

នៅខាងក្រោមដីមានចំណតយានយន្តដ៏ធំទូលាយ និងមានសុវត្ថិភាព។ ចំណែកជាន់ទី១ និងជាន់ទី២ មានហាងលក់ទំនិញចម្រុះ ប្រមូលផ្ដុំទៅដោយហាងល្បីៗ ទីធ្លាលម្ហែ និងសួនច្បារនៅជាន់ទី៧ ដែលលោក អ្នកអាចលំហែអារម្មណ៍ ឬជជែកកម្សាន្តជាមួយមិត្តភ័ក្ដិយ៉ាងសប្បាយរីករាយ និងស្កាយបារនៅជាន់ទី២៦ ដែលលោកអ្នកអាចរីករាយជាមួយទេសភាព និងទទួលយកអារម្មណ៍​ត្រជាក់នៃដងទន្លេមេគង្គ ក៏ដូចជាទេសភាពនៃខណ្ឌច្បារអំពៅទាំងមូល។

មិនតែប៉ុណ្ណោះ គ្រប់យូនីតរបស់ខុនដូ ដឹស្តា ប៉ូឡារីស២៣ ត្រូវបានបំពាក់គ្រឿងសង្ហារិមពហុមុខងារមួយកំផ្លេរួចជាស្រេចដូចជា គ្រែគេងដែលមានថតសម្រាប់ដាក់អីវ៉ាន់នៅពីក្រោម ទូសម្លៀកបំពាក់ ទូចង្ក្រានលើក្រោម តុចាប់ជាប់ជញ្ជាំងដែលធ្វើឱ្យផ្ទៃបន្ទប់មានភាពទូលាយ ទូតាំងដ៏ទាន់សម័យ និងបរិក្ខាផ្សេងទៀត។

https://www.facebook.com/condoboreypenghuoth/videos/378346327248599។

អ្វីដែលកាន់តែពិសេសសម្រាប់ខុនដូដ៏ប្រណីតនេះ គឺគោលការណ៍បង់ប្រាក់មានភាពងាយស្រួល ជាមួយជម្រើសបង់រំលស់រហូតដល់ 100% ដោយមិនចាំបាច់មានប្រាក់កក់ឡើយ។

គួរឱ្យចាប់អារម្មណ៍ណាស់មែនទេ? ដើម្បីជ្រាបព័ត៌មានកាន់តែច្បាស់ សូមទាក់​ទងទៅបុគ្គលិកផ្នែកលក់របស់បុរី ប៉េង ហួត តាមរយៈលេខទូរសព្ទ៖ 098 / 016 / 017 596 789 ឬចូលរួមជាមួយ Telegram Channel https://t.me/boreypenghuoth ៕

អ្នកជំនាញថៃៈទំនុកចិត្តរបស់វិនិយោគិនបរទេសមកលើវិស័យអចលនវត្ថុថៃនៅតែមានកម្រិតខ្ពស់

ដោយៈ សុផារី

ប្រទេសថៃៈ ទោះបីជាប្រឈមនឹងបញ្ហាកូវីដ១៩ក៏ដោយ ទំនុកចិត្តរបស់អ្នកវិនិយោគបរទេសមកលើប្រទេសថៃ នៅតែមានកម្រិតខ្ពស់លើវិស័យអចលនវត្ថុថៃ។

លោកស្រី  Naridtanan Palakavong Na Ayuthaya សមាជិកនៃគណៈកម្មការសមាគមអ្នកវាយតម្លៃអចលនវត្ថុប្រទេសថៃ ក្នុងសមាជលើកទី២៣ ក្រោមប្រធានបទ “ការវាយតម្លៃអចលនវត្ថុ ក្នុងអំឡុងពេលនៃការរីករាលដាលជំងឺកូវីដ-១៩” របស់សមា​គមអ្នកវាយតម្លៃអចលនវត្ថុអាស៊ាន (ASEAN Valuers Association – AVA) ក្នុងថ្ងៃទី២៤ ខែវិច្ឆិកាដែលកម្ពុជាធ្វើជាប្រធាននេះបានបន្តថា

យោងតាមការសិក្សាទៅលើក្រុមហ៊ុន វិនិយោគបរទេសចំនួន៦០០ បានបង្ហាញថា មាន១៩,៣៣ភាគរយ មានគម្រោងថានឹងពង្រីកការវិនិយោគរបស់ខ្លួន នៅក្នុងប្រទេសថៃបន្ថែមទៀត និង៧៦,៦៧ភាគរយទៀតនៅបន្តការវិនិយោគ ក្នុងកម្រិតបច្ចុប្បន្នបន្តទៀត។

តាមរយៈការការស្ទាបស្ទង់មតិទៅលើផលប៉ះពាល់លើការវិនិយោគ ដែលបណ្តាលមកពីវិបត្តិកូវីដ១៩ បានបង្ហាញថា ៦៣% នៃការវិនិយោគបានទទួលរងផលប៉ះពាល់ ក៏ប៉ុន្តែនៅតែអាចបន្តដំណើរការទៅមុខបាន។ ចំណែក២៩% បានទទួលរងផលប៉ះពាល់ធ្ងន់ធ្ងរ ប៉ុន្តែនៅតែបន្តដំណើរការទៅមុខបាន៧ភាគរយ មិនទទួលរងផលប៉ះពាល់នោះទេនិងនៅតែបន្តដំណើរការជាធម្មតា ហើយមានត្រឹមតែ០,១៧% បានបញ្ឈប់ដំណើរការវិនិយោគរបស់ខ្លួនក្នុងប្រទេសថៃ។

លោកស្រីបានធ្វើបទបង្ហាញថា និន្នាការការវិនិយោគដោយរបស់វិនិយោគិនបរទេសមានការធ្លាក់ចុះ ចាប់តាំងពីការចាប់ផ្ដើមនៃវិបត្តិកូវីដ១៩ ប៉ុន្តែនៅដើមឆ្នាំមុនមានការធ្លាក់ចុះខ្លាំងបំផុត។ នៅក្នុងដើមឆ្នាំ២០២១នេះ យើងសង្កេតឃើញថាចំនួននៃការវិនិយោគរបស់វិនិយោគិនបរទេស មកលើប្រទេសថៃមានការកើនឡើង ប្រហែលទ្វេដងប្រៀបធៀបទៅនឹងឆ្នាំមុន។

តាមរបាយការណ៍ដដែល លោកស្រីបានបញ្ជាក់ថា ឧស្សាហកម្មដែលទទួលបានការពេញនិយម ក្នុងការវិនិយោគរបស់វិនិយោគិនបរទេសមាន ដូចជា វិស័យឌីជីថល វិស័យវេជ្ជសាស្ត្រ វិស័យគីមីឥន្ធនៈនិង វិស័យ Robot Automation និងវិស័យផ្សេងៗទៀត។ ប្រទេសជប៉ុន គឺជាប្រទេសដែលវិនិយោគច្រើនបំផុត មកលើប្រទេសថៃក្នុងចំនួន១២៥គម្រោង តាមដោយសហរដ្ឋអាមេរិក ប្រទេសសិង្ហបុរី និងប្រទេសចិន៕

កំណើនភ្ញៀវទៅកាន់ខេត្តមណ្ឌលគីរីជំរុញសក្ដានុពលអភិវឌ្ឍន៍អចលនទ្រព្យបែបលំហែកាយកាន់តែច្រើន

ដោយៈ វឌ្ឍនៈ

មណ្ឌលគិរីៈ ភ្ញៀវទេសចរជាច្រើនជាពិសេសទេសចរក្នុងស្រុក បានចាប់ផ្ដើមសម្លឹ​ងទៅរកការកម្សាន្តនៅឯខេត្តមណ្ឌលគីរី ក្នុងពេលមានបុណ្យទានឈប់សម្រាកម្ដងៗ  ដែលធ្វើឱ្យខេត្តមួយនេះ នឹងមានតម្រូវការទៅលើការស្នាក់នៅ ក្នុងនោះបឹងកាឡូ ឬលំនៅឋានលំហែកាយកាន់តែមានសក្ដានុពលក្នុងការអភិវឌ្ឍ។

លោកមាឃ រឹទ្ធីជ័យ ប្រធានសាខាក្រុមហ៊ុន Century 21 Zillion Holding ប្រចាំខេត្តមណ្ឌលគិរីបានឱ្យដឹងតាមទូរស័ព្ទនាព្រឹកថ្ងៃទី២៥ វិច្ឆិកានេះថា ចំនួនResortទាំង ៥០ ទីតាំងនេះមានប្រហែលជាង២០ ទីតាំងកំពុងដំណើរការអាជីវកម្ម និងមួយចំនួនទៀតកំពុងសាងសង់។ ចំនួនResort ក្នុងខេត្តមណ្ឌលគិរីនាពេលបច្ចុប្បន្ន មិនទាន់ឆ្លើយតបទៅនឹងតម្រូវការភ្ញៀវទេសចរនៅឡើយទេ។

លោកបន្តថា “ខ្ញុំជឿថានឹងមានការវិនិយោគគម្រោងបែបនេះបន្ថែមទៀត ដោយតាំងដីសម្រាប់អភិវឌ្ឍន៍ Resort ឬផ្ទះលំហែកាយក៏នៅមានលក្ខណៈច្រើនផងដែរ”។ លោកបន្តថា Resort នីមួយៗជាមធ្យមសាងសង់លើផ្ទៃដី២ហិកតា ហើយគម្រោងនីមួយ ៗអាចមានផ្ទះស្នាក់នៅចន្លោះពី ៣០ ទៅ៤០ផ្ទះ” ។

សម្រាប់តម្លៃជួលស្នាក់នៅអាចមានតម្លៃចន្លោះពី ៣០ ទៅ២០០ដុល្លារ ក្នុងមួយយប់​។ Resort ទាំងនេះ បានបោះទីតាំងវិនិយោគនៅតំបន់ពូតាំង ឡាវការ ដាក់ដាំ និងក្រុងសែនមនោរម្យ ដែលទីតាំងទាំងនេះសក្កិសមជាងគេ សម្រាប់ការសាងសង់Resort ដោយសារមានជ្រលងភ្នំ និងទេសភាពដ៏ស្រស់ស្អាត។

តាមរយៈកំណើននៃភ្ញៀវទេសចរ និងការអភិវឌ្ឍលំនៅឋានលំហែកាយ ក៏ដូចជាការបំពេញបន្ថែមនូវសេវាកម្មទេសចរណ៍នានា បានជំរុញឱ្យតម្លៃដីធ្លីសម្រាប់សាងសង់រីសតតមានតម្លៃចន្លោះពី៥ ទៅ១០ដុល្លារក្នុងមួយម៉ែត្រការ៉េ សម្រាប់ទីតាំងដីស្ថិតក្នុងតំបន់ពូតាំង ឡាវកា និងដាក់ដាំ។ ចំណែក ទីតាំងដីនៅក្រុងសែនមនោរម្យវិញ មានតម្លៃចាប់ពី១០០ ទៅ៣០០ ដុល្លារក្នុងមួយម៉ែត្រការ៉េ ។

លោកមាឃ រិទ្ឋីជ័យបានបន្តថា មួយរយៈពេលចុងក្រោយនេះ មានវិនិយោគិនក្នុងស្រុកជាច្រើនបានសម្រុក ទៅទិញដីនៅខេត្តមណ្ឌលគីរី ដើម្បីត្រៀមក្នុងការសាងសង់គម្រោងរបស់ខ្លួន ឬក៏ទិញសម្រាប់ទុកយកចំនេញនៅពេលអនាគត ។

ចំណែកលោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាក៏បានលើកឡើងផងដែរថា ខេត្តមណ្ឌលគីរីជាតំបន់មានសក្តានុពល លើការវិនិយោគផ្ទះលំហែរ និងរមណីយដ្ឋាននានា ដោយសារទេសភាពធម្មជាតិ និងលក្ខខ័ណ្ឌអា​កាសធាតុដ៏ប្រសើរ។

លោកបន្តថា ខេត្តនេះមានសក្តានុពលមួយបែបម្នាក់ ធៀបជាមួយខេត្តសៀមរាប ដោយខេត្តមណ្ឌលគិរីមានទម្រង់ជាអេកូទេសចរណ៍ និងខេត្តសៀមរាបមានសក្តានុពលបែបទេសចរណ៍វប្បធ៌ម ប្រវត្តិសាស្រ្ត”។

លោកបន្តថា បច្ចុប្បន្នអ្នកវិនិយោគជាតិ អន្តរជាតិជាច្រើនបាននិងកំពុងសម្រុកទិញដីវិនិយោគលំនៅដ្ឋានលំហែរ និងរមណីយដ្ឋានធម្មជាតិ ដោយសារខេត្តនេះមានសក្តានុពលលើការវិនិយោគ ពិសេសតម្លៃដីធ្លីនៅទាបនៅឡើយ ដែលផ្តល់ឱកាសចំណេញនាពេលអនាគត។

រដ្ឋាភិបាលបានបង្កើតគណកម្មការអន្តរក្រសួងរួចហើយ ដើម្បីធ្វើការជាមួយក្រុមហ៊ុន China Power ក្នុងការរៀបចំផែនការសាងស ង់ព្រលានយន្តហោះខ្នាតអន្តរជាតិនៅ ក្រុងសែនមនោរម្យ ខេត្តមណ្ឌលគិរី ដែលព្រលានយន្តហោះនេះអាចចំណាយទុនវិនិយោគប្រមាណ១០០លានដុល្លារអាមេរិក៕