ទីក្រុងរណបទំហំ ៤៥ហិកតា តម្លៃ១០០លានដុល្លារនៅក្រុងតាខ្មៅមានការវិវត្តន៍យឺតជាងការគ្រោងទុក

ដោយៈ សុធារី

ភ្នំពេញៈ ការឆ្លងរាលដាលជំងឺកូវីដ ១៩ នៃព្រឹត្តិការណ៍សហគមន៍២០ កុម្ភៈ បានធ្វើឱ្យដំណើរការសាងសង់ គម្រោងអភិវឌ្ឍន៍លំនៅឋានតម្លៃសមរម្យ ទីក្រុងរណបសិរីមង្គល ដែលមានទុនវិនិយោគប្រមាណ ១០០លានដុល្លារ របស់ក្រុមហ៊ុន Worldbridge Homes Co., Ltd នៅក្រុងតាខ្មៅ យឺតជាងការគ្រោងទុក។

ប៉ុន្តែនៅពេលបច្ចុប្បន្នក្រុមហ៊ុន បាននិងកំពុងសម្រុកសាងសង់ ដើម្បីអាចបញ្ចប់តាមផែនការនាដំណាច់ឆ្នាំ ២០២១ នេះ។

ទីក្រុងរណបសិរីមង្គល ជាគម្រោងអភិវឌ្ឍន៍លំនៅដ្ឋានតម្លៃសមរម្យដំបូងគេនៅកម្ពុជា ដែលបានបើកការដ្ឋានសាងសង់ជាផ្លូវការ នៅដើមឆ្នាំ២០១៨ លើផ្ទៃដី៤៥ហិកតា ដោយមានខ្នងផ្ទះសរុប២៤៥៧។

គម្រោងនេះស្ថិតក្នុងសង្កាត់រកាខ្ពស់ ក្រុងតាខ្មៅ ចម្ងាយប្រមាណ១៤គីឡូម៉ែត្រពីរាជធានីភ្នំពេញ (ស្ពានព្រះមុនីវង្ស)។ Worldbridge Home Co., Ltd គឺជាក្រុមហ៊ុនបុត្រសម្ព័ន្ធរបស់ក្រុមហ៊ុន Worldbridge Group ដែលកំពុងអភិវឌ្ឍន៍គម្រោងធំៗនៅក្នុងរាជធានីភ្នំពេញមានដូចជា The Bridge និង The Peak។

ប្រធានគ្រប់គ្រងទូទៅនៃក្រុមហ៊ុន Worldbridge Home Co., Ltd លោក យក់ សុធីរិទ្ធ បានមានប្រសាសន៍ នៅថ្ងៃទី ២៤ ខែវិច្ឆិកាកន្លងមកថា គម្រោងទីក្រុងរណបសិរីមង្គល បាននិងកំពុងពន្លឿនការសាងសង់ ដើម្បីធ្វើឱ្យការគម្រោងទាំងមូល អាចបញ្ចប់នៅត្រឹមដំណាច់ឆ្នាំ២០២១នេះ ខណៈវិបត្តិនៃការឆ្លងរាលដាលជំងឺកូវីដ១៩ បានបង្ខំឱ្យមានការរឹតត្បិតការធ្វើដំណើរ និងការបិទសេដ្ឋកិច្ចមួយចំនួនបានធ្វើឱ្យប៉ះពាល់ ដល់ដំណើរការសាងសង់មួយរយៈ។

លោកថ្លែងថា “អំឡុងការផ្ទុះរាលដាលជំងឺកូវីដ ១៩ ខ្លាំងវាបានធ្វើឱ្យការសាងសង់នៅផ្នែកខ្លះមិនដំណើរការមួយរយៈ ហេតុនេះយើងកំពុងខិតខំបង្កើនល្បឿងសាងសង់ឡើងវិញនៅពេលនេះ”។

លោកឌឹត ចណ្ណា នាយកប្រតិបត្តិក្រុមហ៊ុនអចលនទ្រព្យ ឡាក់គី រៀលធី បានលើកឡើងថា គម្រោងអភិវឌ្ឍន៍លំនៅដ្ឋានតម្លៃសមរម្យ មិនត្រឹមតែទទួលបានការចាប់អារ​ម្មណ៍ច្រើនពីអ្នកមានប្រាក់ចំណូលទាប និងមធ្យមប៉ុណ្ណោះទេ ប៉ុន្តែថែមទាំងបានចូលរួមជាមួយរដ្ឋាភិបាល ក្នុងការបង្កើនលទ្ធភាពឱ្យប្រជាជន មានលំនៅដ្ឋានផ្ទាល់ខ្លួនផងដែរ។ ការអភិវឌ្ឍគម្រោងបែបនេះ នឹងកាន់តែងាយទទួលជោគជ័យ ប្រសិនបើស្ថិតនៅទីតាំងសមស្របមានតម្លៃសមរម្យ និងជាពិសេសមានវិធីសាស្ត្របង់ប្រាក់ងាយស្រួល។

លោកនិយាយថា “សម្រាប់គម្រោងនេះ ខ្ញុំអាចនិយាយថា វាស្ថិតនៅទីតាំងសមរម្យ និងទទួលជោគជ័យមួយចំនួនរួចហើយ ដោយមានអតិថិជនខ្លះបានចូលទៅរស់នៅហើយ”។ លោកក៏បន្ថែមទៀតថា “ប្រសិនបើមានក្រុមហ៊ុនវិនិយោគ លើគម្រោងបែបនេះកាន់តែច្រើន គឺជាការល្អ ព្រោះវាអាចផ្តល់នូវជម្រើសកាន់តែច្រើន សម្រាប់ប្រជាជនថ្នាក់កណ្តាល ក្នុងការស្វែងរកទីតាំងដែលងាយស្រួលសម្រាប់ពួកគេ ក្នុងការធ្វើដំណើរទៅធ្វើការ ឬរៀនសូត្រ”។

យោងតាមក្រសួងរៀបចំដែនដី នគរូបនីយកម្ម និងសំណង់ គិតត្រឹមចុងឆ្នាំ២០២០ នៅកម្ពុជាមានគម្រោងអភិវឌ្ឍន៍លំនៅដ្ឋាន តម្លៃសមរម្យចំនួន៥ ដែលស្មើនឹងបន្ទប់ស្នាក់នៅសរុប៨ ៣៣១ខ្នងផ្ទះ និងចំនួន៧ ២៥៦ យូនីតខុនដូ។

កាលពីឆ្នាំ ២០១៤ ប្រទេសកម្ពុជាបានអនុម័ត គោលនយោបាយលំនៅឋានថ្នាក់ជាតិ ដើម្បីជំរុញការអភិវឌ្ឍលំនៅឋាន ឱ្យបានកាន់តែច្រើនជូនប្រជាពលរដ្ឋ។ បើយោងតាមគោលនយោបាយនេះ កម្ពុជានឹងត្រូវការផ្ទះបន្ថែមប្រមាណ៥ម៉ឺនខ្នង ក្នុង១ឆ្នាំៗរហូតដល់ឆ្នាំ២០៣០។

យោងតាមទិន្នន័យនិន្នាការសេដ្ឋកិច្ច-សង្គមនៃក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ចាប់ពីខែមករា-ខែសីហា ឆ្នាំ២០២១ គម្រោងសាងសង់ ដែលបានទទួលការអនុញ្ញាតឱ្យសាងសង់ពីក្រសួងរៀបចំដែនដី នគរូបនីយកម្ម និងសំណង់ មានចំនួន២ ៩០១ គម្រោង ធ្លាក់ចុះ ៤៤៩គម្រោង។ ចំណែកទុនវិនិយោគមានតម្លៃ៣៨៤៣ លានដុល្លារ ធ្លាក់ចុះ២៤,៤ ភាគរយ៕

សិក្សាពីចំណុចសំខាន់ៗទាំងនេះ ដើម្បីដឹងពីគុណសម្បត្តិនិងគុណវិបត្តិនៃការរស់នៅខុនដូ

ដោយ: ម៉ាលីស

ភ្នំពេញៈ ជាការពិតណាស់ចំនង់ចំណូលចិត្ត នៃការរស់នៅរបស់មនុស្សយើង មានលក្ខណៈខុសៗពីគ្នា ឯការសាងសង់លំនៅស្ថានក៏មានប្រភេទខុសៗគ្នា ដើម្បីបំពេញតំរូវការខុសៗគ្នាទាំងនោះ ហើយគ្រប់ប្រភេទលំនៅស្ថានទាំងអស់ តែងមានគុណសម្បតិ្តនិងគុណវិបត្តិរៀងៗខ្លួន។

ដូចនេះយើងសូមណែនាំពីគុណសម្បត្តិ និងគុណវិបត្តិនៃការរស់នៅលំនៅស្ថានជាលក្ខណៈខុនដូរវិញម្តង។

យោងតាម លោក អ៊ួន សារ៉ាត់ ក្នុងសៀវភៅ “ភាពវៃឆ្លាតក្នុងរឿងអចលនទ្រព្យ” បានរៀបរប់អោយដឹងថា គុណសម្បត្តិនិងគុណវិបត្តិរបស់ខុនដូរ មានដូចជា៖

១ គុណសម្បត្តិ

-មិនមានការរំខានពីអ្នកជិតខាង

-អាទទួលបានខ្យល់អាកាសល្អបរិសុទ្ធ

-អាចទស្សនាទស្សនីយភាពនៃទីក្រុងបាន

-បរទេសមានសិទ្ធិទិញខុនដូ ខណៈពេលច្បាប់ទិញដីមិនទាន់មាន

-ងាយស្រួលបំផុតសម្រាប់អ្នកដែលធ្វើការ និងរកមធ្យោបាយធ្វើដំណើរ

-អ្នកមិនចាំបាច់មានរថយន្តក៏បាន ដោយវាអាចជាជំរើសមួយដ៏ពេញនិយម និងចំណាយតិចផងដែរ។

-មានសេវានៅនឹងកន្លែងផ្ទាល់ដូចជាស្ប៉ា អាងហែលទឹក កន្លែងហាត់ប្រាណ នៅហាងកាហ្វេផងដែរ ព្រមទាំងផ្ដល់នូវការរស់នៅពិសេសខុសគេ បើប្រៀបធៀបទៅនឹងបណ្ដាផ្ទះដែលមានសេវារបៀបនេះ ដូចជាវីឡាឬឬផ្ទះដាច់ពីគេ។

២ ចំណុចអវិជ្ជមាន

-គ្មានប្លង់ដី

-អាគារខូចខាតចាស់ទ្រុឌទ្រោម ឬត្រូវសង់ថ្មីត្រូវធ្វើយ៉ាងណា? បបួលគេសង់ទាំងអស់គ្នាតើគេព្រមទេ? តើយើងមានសិទ្ធិសង់ថ្មីដែរឬទេ?។

-ពេលមានអគ្គីភ័យនៅជាន់លើ តើធ្វើយ៉ាងណា?

-មិនសូវមានការនិយមច្រើនដូចផ្ទះជាប់ដី

-ត្រូវបង់សេវាថែទាំនិងគ្រប់គ្រងជាប្រចាំ

-ប្រសិនបើអ្នកជាមនុស្សខ្លាចកម្ពស់ សូមចៀសវាងផ្ទះប្រភេទនេះ

-ប្រសិនបើអ្នកចូលចិត្តដាំសួនច្បារ សូមជៀសវាងផ្ទះប្រភេទនេះ៕

ក្រុមហ៊ុនអាមេរិកកាន់តែច្រើនបង្ហាញសុទិដ្ឋិនិយម និងប្រកាសផែនការពង្រីកអាជីវកម្មនៅកម្ពុជា

ដោយៈសុខុម

ភ្នំពេញ: ក្រុមហ៊ុនអាមេរិក កាន់តែច្រើនបានប្រកាសផែនការ ពង្រីកអាជីវកម្មរបស់ខ្លួន និងចាក់បញ្ចូលទុនវិនិយោគបន្ថែមទៀតនៅកម្ពុជា ដែលរួមចំណែកជួយជំរុញសន្ទុះងើបឡើងនៃសេដ្ឋកិច្ចរបស់កម្ពុជា។

ដំណឹងដ៏គួរឱ្យសាទរនេះ គឺជាការលើកឡើងរបស់ឯកអគ្គរដ្ឋទូត Michael Michalak ដែលជាអនុប្រធាន និងជានាយកគ្រប់គ្រងថ្នាក់តំបន់នៃក្រុមប្រឹក្សាធុរកិច្ចអាមេរិក-អាស៊ាន នៅក្នុងកិច្ចប្រជុំតាម Video Conference ជាមួយឯកឧត្តម ប៉ាន សូរស័ក្តិ រដ្ឋមន្ត្រីពាណិជ្ជកម្មកម្ពុជា កាលពីពេលថ្មីៗនេះ។

នៅក្នុងកិច្ចប្រជុំនេះ ក៏មានការអញ្ជើញចូលរួម ពីតំណាងស្ថានទូតអាមេរិក ប្រចាំកម្ពុជា និងតំណាងក្រុមហ៊ុនអន្តរជាតិល្បីៗជាច្រើន រួមមាន ក្រុមហ៊ុន ConocoPhillips ក្រុមហ៊ុន FordMotor ក្រុមហ៊ុន Amazon ក្រុមហ៊ុន Walmart ក្រុមហ៊ុន Pernod Ricard ក្រុមហ៊ុន Visa និងក្រុមហ៊ុន Jhpiego ជាដើមផងដែរ។

ក្រសួងពាណិជ្ជកម្មបានលើកឡើងថា “បណ្ដាក្រុមហ៊ុនអាមេរិក បានបង្ហាញសុទិដ្ឋិ​និយមចំពោះការបន្តវិនិយោគ និងពង្រីកអាជីវកម្មរបស់ខ្លួននៅកម្ពុជា ជាពិសេសនៅក្នុងការគាំទ្រដល់ការងើបឡើងនៃសេដ្ឋកិច្ចកម្ពុជា អំឡុងសម័យកូវីដ-១៩”។

ពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិក បានឈានដល់៥,៥ពាន់លានដុល្លារ ក្នុងរយៈពេល៨ខែដំបូងនៃឆ្នាំ២០២១ នេះ ដោយទទួលបានកំណើន២៨,៤%បើធៀបនឹងរយៈពេលដូចគ្នាក្នុងឆ្នាំ២០២០៕

លោកច្រឹក សុខនីមៈ ពេលសាធារណជនទំនុកចិត្តលើគុណភាពសេវាកម្មវាយតម្លៃអចលនទ្រព្យ អ្នកអាជីពនេះនឹងដើរតួមាទីយ៉ាងសំខាន់

ដោយៈស៊ីវ ម៉េង

ភ្នំពេញៈ ប្រធានសមាគមអ្នកវាយតម្លៃអចលនទ្រព្យអាស៊ាន លោកច្រឹក សុខនីមបានមានប្រសាសន៍ថា នៅពេលដែលសាធារណជនកាន់តែមានទំនុកចិត្ត លើគុណភាពសេវាកម្មវាយតម្លៃ អ្នកអាជីពក្នុងវិស័យនេះ នឹងដើរតួមាទីយ៉ាងសំខាន់នៅក្នុងទីផ្សារអចលនទ្រព្យក្នុងស្រុក និងតំបន់។

លោកបានមានប្រសាសន៍ ក្នុងពិធីបើកសមាជសមាគមអ្នកវាយតម្លៃអចលនទ្រព្យអាស៊ានលើកទី២៣ ដែលកម្ពុជាបាននិងកំពុងធ្វើជាម្ចាស់ផ្ទះកាលពីថ្ងៃទី២៥ វិច្ឆិកាកន្លងមកថា នៅពេលដែលសេវាកម្មវាយតម្លៃទទួលបានការគាំទ្រ និងទំនុកចិត្តពីសាធារណៈជនតម្រូវការលើសេវាកម្ម ដែលមានគុណភាពនឹងកើនឡើង។

លោកច្រឹក សុខនីមបន្តថា សមាជលើកទី ២៣ របស់សមាគមអ្នកវាយតម្លៃអាស៊ាន មានគោលបំណងពង្រឹងកិច្ចសហប្រតិបត្តិការ រវាងតួអង្គសំខាន់ៗ សម្រាប់ផ្លាស់ប្តូរបទពិសោធន៍ពាក់ព័ន្ធនឹងទីផ្សារអចលនវត្ថុ និងស្តង់ដារបច្ចេកទេសនៃការវាយតម្លៃអចលនវត្ថុ ក្នុងតំបន់អាស៊ាន ក្នុងបរិការណ៍នៃការឆ្លងរាលដាល ជំងឺកូវីដ-១៩ ពិសេសចូលរួមចំណែកដល់ការរក្សានិរន្តភាព នៃសកម្មភាពទីផ្សារអចលនវត្ថុ នៅក្នុងតំបន់។

លោកបានបង្ហាញសុទិដ្ឋិនិយមថា ប្រធានបទនៃការពិភាក្សាថ្ងៃនេះ មានសារៈសំខាន់សម្រាប់សមាជ ដែលកំពុងផ្តល់សេវាកម្មវាយតម្លៃ និងចែករំលែកបទពិសោធន៍កាលពីឆ្នាំមុន។ ជាមួយគ្នានេះ សមាជនឹងវាយតម្លៃលើបញ្ហាប្រឈម និងឱកាសនាពេលបច្ចុប្បន្ន ដើម្បីស្វែងរកវិធានការថ្មីៗ ដើម្បីធ្វើឱ្យល្អប្រសើរក្នុងការផ្តល់សេវាកម្ម ក្នុងទីផ្សារអចលនទ្រព្យក្នុងប្រទេសនីមួយៗ និងក្នុងតំបន់សម្រាប់ការអភិវឌ្ឍន៍សេដ្ឋកិច្ចសង្គម។

ចំណែកលោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុបានគាំទ្រ និងលើកទឹកចិត្ត ឱ្យមានការរៀបចំសមាជនសមាគមអ្នក វាយតម្លៃអាស៊ាន នៅឆ្នាំក្រោយៗទៀត ដោយឈរលើមូលដ្ឋាន នៃការពង្រឹងកិច្ចសហប្រតិបត្តិការការសិក្សាស្វែងយល់ និងការផ្លាស់ប្តូរបទពិសោធន៍គ្នាទៅវិញទៅមក សំដៅពង្រឹងគុណ ភាព និង លើកកម្ពស់វិជ្ជាជីវៈនេះ ឱ្យកាន់តែទទួលបាននូវជំនឿទុកចិត្តពីសាធារណជនបន្ថែមទៀត ដើម្បីទទួលបាននូវកិត្យានុភាព និងធានាបាននូវការប្រកួតប្រជែងជាមួយបណ្តាដៃគូ ដែលប្រកបធុរកិច្ចដូចគ្នានៅក្នុងតំបន់ ។

លោកបន្តថា នៅពេលដែលសាធារណជន កាន់តែមានជំនឿទុកចិត្តចំពោះគុណភាពនៃការផ្តល់សេវាកម្មរបស់អ្នក វាយតម្លៃអចលនវត្ថុ គឺមានន័យថា អ្នកប្រកបវិជ្ជាជីវៈក្នុងវិស័យនេះនឹងមានតួនាទីកាន់ត សំខាន់នៅក្នុងទីផ្សារអចលនវត្ថុ ទាំងនៅក្នុងប្រទេសរបស់ខ្លួន និងទាំងនៅក្នុងតំបន់អាស៊ានទាំងមូល ហើយការប្រើប្រាស់សេវាកម្មវាយតម្លៃក៏កាន់តែមានការរីកចម្រើនឡើងថែមទៀត៕

រដ្ឋាភិបាលចាប់ផ្តើមលើកកំពស់ចលនាភូមិ១ ផលិតផល១នៅតាមបណ្តាខេត្តចំនូន១០

ដោយៈ វឌ្ឍនៈ

ភ្នំពេញៈ រដ្ឋាភិបាលតាមរយៈចលនាជម្រុញភូមិ១ ផលិតផល១បាននិងកំពុងសហការជាមួយវិស័យឯកជន ក្នុងការលើកស្ទួយការនាំចេញផលិតផលជាតិ ទៅកាន់ទីផ្សារអន្តរជាតិ។

កាលពីរសៀលថ្ងៃទី ២៥ វិច្ឆិកា២០២១កន្លងទៅនេះ អគ្គលេខាធិការដ្ឋាន នៃគណៈកម្មាធិការជាតិជំរុញចលនាភូមិមួយផលិតផលមួយ និងក្រុមហ៊ុនដឹកជញ្ជូនវីរ:ប៊ុនថាំ បានចុះកិច្ចព្រមព្រៀងសហប្រតិបត្តិការជាមួយគ្នា លើកកម្ពស់ផលិតផលខ្មែរ ក្នុងក្របខណ្ឌការងារជំរុញ ចលនាភូមិមួយផលិតផលមួយ ដើម្បីស្វែងរកទីផ្សារលក់ផលិតផលខ្មែរ ទាំងក្នុងប្រទេស ក្រៅប្រទេស ដើម្បីរួមចំណែកធ្វើឱ្យមានកំណើនសេដ្ឋកិច្ច តាមរយៈលើកកម្ពស់ផលិតភាព និងការអភិវឌ្ឍប្រកបដោយចីរភាពនៅកម្ពុជា។

កិច្ចព្រមព្រៀងសហប្រតិបត្តិការនេះ នឹងអនុវត្តសាកល្បងនៅខេត្តចំនួន១០ គឺខេត្តកំពង់ឆ្នាំង ពោធិ៍សាត់ សៀមរាប ឧត្តរមានជ័យ ក្រចេះ កំពង់ចាម ព្រៃវែង ស្វាយរៀង កំពត និងខេត្តតាកែវ ដោយសហការយ៉ាងជិតស្និទ្ធ ជាមួយនឹងគណៈកម្មាធិការជំរុញចលនាភូមិមួយផលិតផលមួយខេត្តនីមួយៗ និងកសិករ ផលិតករ ដោយមានការជួយសម្របសម្រួល ពីសមាគមពាណិជ្ជករដឹកជញ្ជូន និងបុត្រសម្ព័ន្ធ Super App ក្នុងការលើកកម្ពស់ផលិតផលក្នុងស្រុក ក្នុងបរិបទការងារជំរុញចលនាភូមិមួយផលិតផលមួយ។

លោកជា សំណាង អគ្គលេខាធិការនៃគណៈកម្មាធិការជាតិ ជំរុញចលនាភូមិមួយផលិតផលមួយបានមានប្រសាសន៍ថា គោលបំណងសំខាន់ នៃគំនិតផ្តួចផ្តើមនេះ គឺដើម្បីលើកកម្ពស់គុណភាពផលិតផលក្នុងស្រុក ទាំងសិប្បកម្ម កសិកម្ម និងសេវាកម្ម ក្នុងបរិបទភូមិមួយផលិតផលមួយ ដើម្បីឆ្លើយតបទៅនឹងតម្រូវការ ទីផ្សារក្នុងស្រុក និងក្រៅប្រទេស។

កិច្ចព្រមព្រៀងនេះ ក៏ដើម្បីលើកម្ពស់ផលិតផលភូមិមួយផលិតផលមួយ តាមរយៈការប្រើប្រាស់ក្រុមហ៊ុនដឹកជញ្ជូនវីរ:ប៊ុនថាំ ដើម្បីវេចខ្ចប់និងដឹកជញ្ជូន បំពេញសេចក្តីត្រូវការ របស់អតិថិជនទាន់ពេលវេលា និងកាត់បន្ថយថ្លៃសេវាដឹកជញ្ជូន ចំពោះផលិតករភូមិមួយផលិតផលមួយ។

ជាមួយគ្នានោះ ក៏ដើម្បីលើកទឹកចិត្តផលិតករ ដោយលក់ផ្ទាល់ទៅអតិថិជន តាមរយៈផ្សារអនឡាញ ដោយមានការសម្រួល ក្នុងការដឹកជញ្ជូនទំនិញ ដល់ដៃអ្នកប្រើប្រាស់ តាមរយៈក្រុនហ៊ុនវីរៈប៊ុនថាំជាដៃគូរ និងផ្តល់ជូនថ្លៃសេវាដឹកជញ្ជូន ពិសេសជូនដល់សមាជិកចលនាភូមិមួយផលិតមួយទាំងអស់ របស់គណៈកម្មាធិការជាតិ ជំរុញចលនាភូមិមួយផលិតមួយទូទាំងប្រទេស ។

លោកសួរ វីរៈ អគ្គនាយកក្រុមហ៊ុនដឹកជញ្ជូនវីរៈប៊ុនថាំ បានលើកឡើងដែរថា ដើម្បីគាំទ្រការងារជំរុញចលនាភូមិមួយ ផលិតផលមួយ ក្រុមហ៊ុនដឹកជញ្ជូនរបស់លោក នឹងសហការជាមួយអគ្គលេខាធិការដ្ឋាន នៃគណៈកម្មាធិការជាតិជំរុញ ចលនាភូមិមួយផលិត​ផលមួយ និងអនុវត្តសកម្មភាពមួយចំនួន ក្នុងជំហានទីមួយរយៈពេល២៤ខែ ចាប់ពីថ្ងៃចុះហត្ថលេខា ដើម្បីជួយបណ្តុះបណ្តាលផ្សព្វផ្សាយដល់កសិករ ផលិតករពីរបៀបវេចខ្ចប់ផលិតផល របៀបរក្សាគុណភាពផលិតផល ទុកដាក់ផលិតផលមុនបញ្ជើរ និងដឹកជញ្ជូនផលិតផលបញ្ជើរមកក្រុមហ៊ុន។
លោកបន្តថា “ក្រុមហ៊ុនមានសាខាទូទាំង២៥រាជធានី/ខេត្ត និងតាមបណ្តា ​ស្រុក/ខណ្ឌ និងឃុំ/សង្កាត់ផងដែរ ដើម្បីជួយស្វែងរកទីផ្សារលក់ផលិត​ផលខ្មែរ”៕

Chengdu ក្លាយជាទីក្រុងចិនទី១ ដែលប្រកាសបន្ធូរបន្ថយការរឹតបន្តឹងលើក្រុមហ៊ុនអភិវឌ្ឍន៍អចលនទ្រព្យ

ដោយៈសុខុម

ប៉េកាំងៈ ទីក្រុងឈឹងទូ (Chengdu) បានប្រកាសវិធានការបង្កលក្ខណៈកាន់តែងាយស្រួល សម្រាប់បណ្ដាក្រុមហ៊ុនអភិវឌ្ឍន៍ លក់អចលនទ្រព្យរបស់ខ្លួន ដែលធ្វើឱ្យវាក្លាយជាទីក្រុងទី១ របស់ប្រទេសចិន ដែលបានបន្ធូរបន្ថយការរឹតបន្តឹង លើវិស័យអចលនទ្រព្យដែលកំពុងជួបវិបត្តិ ក្រោយពីរដ្ឋាភិបាលក្រុងប៉េកាំង ចាត់វិធានការក្ដៅដើម្បីរឹតបន្តឹងលើបំណុល។

យោងតាមកាសែត Bangkok Post ដែលបានចុះផ្សាយកាលពីថ្ងៃព្រហស្បតិ៍ ទី២៥ វិច្ឆិកា ឱ្យដឹងថា ការប្រកាសនេះ បានធ្វើឡើងបន្ទាប់ពីក្រុមហ៊ុនអចលនទ្រព្យជាច្រើនបានធ្លាក់ចូល ក្នុងវិបត្តិហិរញ្ញវត្ថុក្នុងឆ្នាំ២០២០ បន្ទាប់ពីប្រទេសចិន ចាប់ផ្តើមដាក់ចេញវិធានការ ដើម្បីបញ្ឈប់ការទិញផ្ទះទុកលក់យកចំណេញ ដែលមិនមែនជាការទិញសម្រាប់រស់នៅពិតប្រាកដ។

ស្ថានភាពនេះ បានធ្វើឱ្យក្រុមហ៊ុនទាំងនោះ ជួបការលំបាកយ៉ាងខ្លាំង នៅក្នុងការបំពេញកាតព្វកិច្ចបំណុលរបស់ខ្លួន ដោយសារលក់ផ្ទះក៏មិនចេញ ហើយស្នើឥណទានថ្មីដើម្បីដោះទាល់ក៏មិនបាន។

ទោះជាយ៉ាងណា កាលពីថ្ងៃពុធ ទី២៤ វិច្ឆិកា ទីក្រុងឈឹងទូ ដែលស្ថិតនៅភាគនិរតីបានប្រកាសថា ខ្លួននឹងពន្លឿនការអនុម័តសម្រាប់ការលក់ផ្ទះ និងឥណទានអចលនទ្រព្យ ហើយទន្ទឹមនេះ ក៏នឹងបន្ធូរបន្ថយការរឹតបន្តឹង លើការប្រើប្រាស់ប្រាក់ចំណូល ដែលបានពីការលក់មុនបញ្ចប់គម្រោង (Pre-sale) ផងដែរ។

ចំណាត់ការនេះ បានធ្វើឱ្យទីក្រុងដ៏សំខាន់នៃខេត្តស៊ីឈាន់ (Sichuan) មួយនេះក្លាយជាទីក្រុងទី១ ដែលចេញមុខដោះស្រាយបញ្ហានានា ដែលបណ្ដាក្រុមហ៊ុនអភិវឌ្ឍន៍កំពុងជួបប្រទះ ស្របពេលក្រុមមន្ត្រីទទួលរងសម្ពាធកាន់តែខ្លាំងឡើង ដែលទាមទារឱ្យពួកគេជួយគ្រប់គ្រងវិបត្តិនេះ ដែលអាចជះផលប៉ះពាល់ធ្ងន់ធ្ងរ ដល់វិស័យអចលនទ្រព្យរបស់ប្រទេសចិនទាំងមូល។

រដ្ឋាភិបាលក្រុងប៉េកាំង បានបើកភ្លៀងខៀវថា ខ្លួនកំពុងតែបន្ធូរបន្ថយការរឹតបន្តឹងលើឧស្សាហកម្មអចលនទ្រព្យ ដោយកាលពីខែកញ្ញា ធនាគារកណ្តាលចិន បានណែនាំ ឱ្យមេៗហិរញ្ញវត្ថុ ជួយរដ្ឋាភិបាលថ្នាក់មូលដ្ឋាន នៅក្នុងការគាំទ្រទីផ្សារលំនៅដ្ឋាន ខណៈសេដ្ឋកិច្ចរបស់ប្រទេសចិន ទទួលបានសន្ទុះកំណើនយឺតបំផុត ក្នុងរយៈពេលជាច្រើនទសវត្សរ៍មកនេះ។

វិបត្តិនេះ បានលេចចេញកាន់តែច្បាស់ នៅពេលផ្ទុះវិបត្តិក្រុមហ៊ុនអភិវឌ្ឍន៍អចលនទ្រព្យ Evergrande ដែលជំពាក់បំណុលគរដូចភ្នំ រហូតដល់ទៅ៣០០ពាន់លានដុល្លារ ហើយប្រឈមការក្ស័យធន។ ស្ថានភាពនេះ បានបង្កឱ្យមានការព្រួយបារម្ភថា វិបត្តិនេះនឹងធ្វើឱ្យប៉ះពាល់ដល់សេដ្ឋកិច្ចចិន កាន់តែខ្លាំង ហើយអាចនឹងសាយភាយទូទាំងពិភពលោក។

រហូតមកទល់ពេលនេះ ក្រុមហ៊ុន Evergrande បានប្រឹងប្រែងដោះសងម្ចាស់បំណុលដោយជោគជ័យ ដើម្បីជៀសវាងការខកខាន ប៉ុន្តែបញ្ហាប្រឈមនានានៅតែមាន៕ Bangkok Post៕

រដ្ឋាភិបាលកំណត់បទបញ្ញត្តិថ្មីលើការសាងសង់សំណង់នានា

ដោយៈគង់ សូរិយា

ភ្នំពេញៈ រដ្ឋាភិបាលតាមរយៈ ក្រសួងដែនដី នគរូបនីយកម្ម និងសំណង់ បានដាក់ចេញប្រកាសថ្មីមួយ តម្រូវឱ្យគម្រោងសំណង់នានា ត្រូវដាក់ប្លង់ស្ថាបត្យកម្ម និងប្លង់គ្រឿងផ្គុំសំណង់ ឱ្យក្រុមការងារជំនាញរបស់ក្រសួងត្រួតពិនិត្យ និងបញ្ជាក់សិន ទើបអាចស្នើសុំលិខិតអនុញ្ញាតសាងសង់ ឬលិខិតអនុញ្ញាតផ្សេងទៀតបាន។

យោងតាមប្រកាសលេខ ១០៩ ដនស/ប្រ.ក/នី.ក ចុះថ្ងៃទី ២២ ខែវិច្ឆិកា ឆ្នាំ២០២១របស់ក្រសួងបានឲ្យដឹងថា ការត្រួតពិនិត្យ និងបញ្ជាក់គម្រោងប្លង់ គឺត្រូវធ្វើជាដាច់ខាត ចំពោះសំណង់គ្រប់ប្រភេទ ដែលតម្រូវឱ្យសុំលិខិតអនុញ្ញាតសាងសង់ ពីក្រសួងដែនដី នគរូបនីយកម្ម និងសំណង់ ឬ/និង រដ្ឋបាលរាជធានី ខេត្ត។

ប៉ុន្តែសំណង់សាសនា និងគម្រោងសំណង់ ដែលតម្រូវឱ្យសុំលិខិតអនុញ្ញាតសាងសង់ពីរដ្ឋបាលថ្នាក់ក្រោមដូចជា ក្រុង ស្រុក ខណ្ឌ គឺមិនតម្រូវឱ្យមានការត្រួតពិនិត្យ និងបញ្ជាក់គម្រោងប្លង់នោះទេ តែអាចធ្វើឡើងបានដោយការស្ម័គ្រចិត្ត។

ការត្រួតពិនិត្យនិងបញ្ជាក់គម្រោងប្លង់ សំដៅដល់ការត្រួតពិនិត្យ ការវិភាគ ការផ្ទៀងផ្ទាត់ និងការបញ្ជាក់អំពីអនុលោមភាព តាមបទប្បញ្ញត្តិបច្ចេកទេសសំណង់ សម្រាប់ការងារសាងសង់ សំណង់ថ្មី ការងារជួសជុល ការងារកែប្រែ ការងាររុះរើ ឬការប្ដូរមុខងារប្រើប្រាស់សំណង់។

យោងតាមប្រកាសថ្មីនេះ ម្ចាស់សំណង់ទាំងអស់ ត្រូវចុះកិច្ចសន្យា និងបង់សោ​ហ៊ុយ ជាមួយអ្នកត្រួតពិនិត្យ និងបញ្ជាក់សំណង់ដោយខ្លួនឯង ដើម្បីអនុវត្តការងារត្រួតពិនិ ត្យ និងបញ្ជាក់គម្រោងប្លង់របស់ខ្លួនផងដែរ៕

ភាពមិនប្រក្រតីញឹកញាប់របស់ធនាគារ ABA នឹងអាចប៉ះពាល់ដល់ទំនុកចិត្តអតិថិជន?

ដោយៈគង់ សូរិយា

ភ្នំពេញៈ បញ្ហាជាប់គាំង មិនអាចចូលទៅប្រើប្រាស់ Mobile App និងការដកសាច់ប្រាក់តាមម៉ាស៊ីន ATM របស់ធនាគារ ABA នៅថ្ងៃទី២៥ វិច្ឆិកាកនហលងមកនេះ អាចនឹងធ្វើឲ្យអតិថិជនបាត់បង់ទំនុកចិត្តឬយ៉ាងណា។

ជាមួយគ្នានឹងបញ្ហាស្រដៀងគ្នា ដែលកើតមានញឹកញាប់នេះ និងបញ្ហាដទៃទៀតដូចជា ការមិនឃើញមានលោតសញ្ញាទឹកប្រាក់ចេញ ចូល លើទូរស័ព្ទដៃ ពាក្យចចាម​អារ៉ាមពីការបាត់បង់ទឹកប្រាក់របស់អតិថិជន ការមិនអាច Short screen បានលើទូរស័ព្ទដៃមួយចំនួន ពិសេសការមិនមានសរសេរកាលបរច្ឆេទ លើបូទុកបញ្ចាក់ពីចំនួនទឹកប្រាក់ ដែលមានលើ App ទូរស័ព្ទដៃ ពិតជាកំពុងក្លាយជាបញ្ហាដែលធនាគារនេះ និងធនាគារដទៃទៀតគួរដោះស្រាយផងដែរ។

សហស្ថាបនិក និងជាអគ្គនាយកគេហទំព៍រ Cambodiafinancialtimes.com ដែលជាគេហទំព័រឈានមុខគេលើព៌តមាន ទាក់ទងនឹងហិរញ្ញវត្ថុ និងសេដ្ឋកិច្ច លោកយិន លាងគង់ បានមានប្រសាសន៍ឲ្យដឹងកាលពីល្ងាចថ្ងៃទី២៥ វិច្ឆិកាកន្លងមកថា លោកបានលេចលឺព៌តមានតៗគ្នាជាច្រើន និយាយពីបញ្ហាដែលពួកគេជួបប្រទះ ក្នុងពេលពួកគេប្រើប្រាស់ App របស់ធនាគារនេះ ប៉ុន្តែពួកគេមិនងាយទទួលបានការបំភ្លឺ ពីថ្នាក់ដឹកនាំរបស់ធនាគារនេះទេ។

លោកបន្តថា “ការស្តាប់លឺគេនិយាយ១០០០ដង មិនស្មើនឹងជួបម្តងនោះទេ ដោ​យសារនៅក្នុងវីស័យសារគមនាគម តែងតែទាមទារការផ្ទៀងផ្ទាត់ព៌តមាន ដើម្បីទទួលបានភាពជាក់លាក់ និងអាចទុកចិត្តបាន”។ លោកបន្តថា “ប៉ុន្តែសម្រាប់ខ្ញុំផ្ទាល់បានជូបបទពិសោធន៍ជាក់ស្តែង គឺគណនីរបស់ខ្ញុំ មិនឃើញមានលោត notification ពេលទឹកប្រាក់ចូលឬផ្ទេរចេញឡើយ ទោះទៅជួបបុគ្គលិកធនាគារជាច្រើន សាខាឲ្យជួយដោះស្រាយក្តី”។

លោកយិន លាងគង់ បានបន្តថា ចំណុចសំខាន់មួយទៀត ដែលធនាគារនេះ និងធនាគារដទៃទៀតគួរដោះស្រាយ គឺការបង្ហាញពីកាលបរិច្ឆេទឲ្យបានច្បាស់លាស់នៅលើ​ប្រអប់បញ្ជាក់ពីចំនួនទឹកប្រាក់ដល់អតិថិជន ដើម្បីធានាបាននូវតម្លាភាព គណនេយ្យភាព និងសុច្ចរិតភាពរបស់ធនាគារនិមួយៗផងដែរ។

លោកបន្តថា ធនាគារជាតិនៃកម្ពុជា ដែលដើរតួនាទីជាអាណាព្យាបាលរបស់គ្រឹះ​ស្ថានធនាគារ និងហិរញ្ញវត្ថុនានា គួរពិនិត្យលើបញ្ហានេះ ដើម្បីកុំឲ្យពលរដ្ឋដែលមិនសូវមានចំណេះដឹងផ្នែកហិរញ្ញវត្ថុ បន្តជួបភាពរងគ្រោះ និងងាយរងគ្រោះបន្ថែមទៀត។

ជាមួយគ្នានេលោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា មានប្រសាសន៍ថា បញ្ហាជាប់គាំងមិនអាចចូលទៅប្រើប្រាស់ Mobile App និងការដកសាច់ប្រាក់តាមម៉ាស៊ីន ATM របស់ធនាគារ ABA ពេញមួយព្រឹកថ្ងៃទី២៥ ខែវិច្ឆិនេះ ធ្វើអតិថិជនជាអ្នកប្រើប្រាស់មួយចំនួន យល់ឃើញថាធនាគារមួយនេះ អាចនឹងមានបញ្ហាអ្វីមួយ។

លោកបន្តថា “ការជាប់គាំងនេះ ក៏បានធ្វើឲ្យប្រតិបត្តិការទូទាត់សាច់ប្រាក់ តាមប្រព័ន្ធ Mobile App នេះ មិនអាចធ្វើទៅបានផងដែរ”។លោកបន្តថា “ប្រតិបត្តិការមួយចំនួនមិនត្រូវបានធ្វើ បែរត្រឡប់មកសាច់ប្រាក់ ហើយអាចនឹងមានមនុស្សមួយចំនួនតូចខកខាន ដោយមិនបានប្រើប្រាស់សាច់ប្រាក់តាមខ្លួន”។

លោកបន្តថា ទោះបីជាយ៉ាងណាក៏ដោយ បញ្ហាជាប់គាំងមិនអាចចូលទៅប្រើប្រាស់ Mobile App របស់ធនាគារ ABA ពេញមួយព្រឹកកន្លងមកនេះ មានផលប៉ះពាល់តិចតួចបំផុតសម្រាប់សេដ្ឋកិច្ច ពីព្រោះប្រជាពលរដ្ឋខ្មែរភាគច្រើន នៅតែមានទម្លាប់ដាក់សាច់ប្រាក់តាមខ្លួននៅឡើយ៕

សិក្សាលើកត្តាហានិភ័យចំនូន១០ ដែលអ្នកវិនិយោគអចលនទ្រព្យត្រូវប្រយ័ត្ន

ដោយៈសិរី ជេស៊ីកា

ភ្នំពេញៈ ភាពធូរលុងនៃបទបញ្ញត្តិមួយចំនួន ក៏ដូចជា ស្តង់ដារអាជីវកម្មក្នុងវិស័យអចលនទ្រព្យនៅមិនទាន់មាន បានធ្វើឲ្យអ្នកទិញមិនបានដឹងថា ពួកគេកំពុងត្រូវបានគេបោកប្រាស់ ប៉ុន្តែវាយឺតពេលទៅហើយ នៅពេលដែលពួកគេបានដឹងថាខ្លួនកំពុងត្រូវបានគេបោកប្រាស់។

ហេតុនេះសូមសិក្សាលើមូលដ្ឋានសំខាន់ៗទាំង១១ចំណុចនេះ ដើម្បីបញ្ចៀសហានិភ័យពីការកើតមាន នៃការបោកប្រាស់នានា។

១ អចលនទ្រព្យមានប័ណ្ណកម្មសិទ្ធិចំនួនពីរ
ការកាន់កាប់អចលនទ្រព្យនៅកម្ពុជាអាចមានជាប្លង់រឹង និងប្លង់ទន់ អចលនទ្រព្យខ្លះអាចមានទាំងពីរ។ ការឆបោកនេះពាក់ព័ន្ធទៅនឹងម្ចាស់ ដែលលក់ផ្ទះទៅឲ្យអ្នកទិញពីរនាក់។ អ្នកទិញម្នាក់ទទួលបានប្លង់រឹងហើយ ម្នាក់ទៀតទទួលបានប្លង់ទន់។ អ្នកទិញដែលទទួលបានប្លង់ទន់ នឹងត្រូវបាត់បង់លំនៅដ្ឋាននោះ ដោយសារតែប្លង់ទន់គឺបានទទួលស្គាល់ត្រឹមតែពីអាជ្ញាធរមូលដ្ឋានប៉ុណ្ណោះ។ រីឯប្លង់រឹងវិញគឺទទួលស្គាល់ពីថ្នាក់ជាតិ។ មានករណី នៃការចេញប្លង់ច្រើនលើកម្មសិទ្ធិតែមួយ ឬការថតចម្លង ហើយអ្នកលក់បានលក់នូវអចលនទ្រព្យដដែលទៅឲ្យមនុស្សជាច្រើន។

ករណីមួយទៀត ដែលអ្នកទិញត្រូវបានគេឆបោក ដោយមានការផ្តល់នូវប្លង់រឹងដូចគ្នាប៉ុន្តែករណីបែបនេះក៏មិនសូវកើតមានដែរ។

លោក អ្នកអាចជៀសវាងសេណារីយ៉ូនេះ ដោយធ្វើការស៊ើបអង្កេតជាមួយក្រសួងរៀបចំដែនដី នគរូបនីយកម្ម និងសំណង់ និងការិយាល័យសុរិយោដីក្នុងតំបន់ផ្ទាល់។ ត្រូវយកច្បាប់ចម្លងនៃប្លង់កម្មសិទ្ធិពីអ្នកលក់ និងត្រួតពិនិត្យជាមួយនឹងកំណត់ត្រាជាផ្លូវការ។

ចំណុចមួយទៀត គឺការពិនិត្យមើលថា តើអ្នកជិតខាងមានប្លង់រឹងឬក៏អត់ ប្រសិនបើពួកគេមាននោះគឺមានន័យថា រដ្ឋាភិបាលបានចេញប្លង់រឹង ជូនដល់តំបន់នោះរួចទៅហើយ។

២ ករណីវិវាទដីធ្លីលាក់កំបាំង
ការមានប្លង់ទន់ ឬប្លង់រ៉ឹងគឺស្ទើរតែមិនពាក់ព័ន្ធនឹងការឆបោកនេះទេ។ ការបោកប្រាស់នេះមានន័យថា ដីនោះជាប់ពាក់ព័ន្ធនឹងអចលនទ្រព្យ ដែលកំពុងមានវិវាទដីធ្លីជាដើម។ ការនិយាយជាមួយអ្នកជិតខាងជាធម្មតា នឹងអាចបង្ហាញរាល់បញ្ហាទាំងអស់ ប៉ុន្តែអ្នកគួរតែធ្វើការស្វែងរកប្លង់កាន់កាប់ តាមរយៈក្រុមប្រឹក្សាឃុំសង្កាត់ ឬមន្ត្រីក្រសួងដែនដីដោយគ្រាន់តែចង់ដឹងថា ដីនោះជាដីមានជម្លោះឫក៏អត់។

ភ្នាក់ងារអចលនទ្រព្យមួយ ដែលមានជំនាញវិជ្ជាជីវៈ ឬមេធាវីដែលមានបទពិសោធន៍ក្នុងការធ្វើការ នឹងធ្វើការងារនេះជំនួសអ្នកបាន។

៣ ប្រយ័ត្នចំពោះប្រាក់កក់របស់អ្នក
ការឆបោកនេះ ត្រូវបានធ្វើឡើងដោយម្ចាស់ក្លែងក្លាយ។  អ្នកទិញត្រូវបានស្នើរឲ្យបង់ប្រាក់កក់ ដើម្បីធានាលើអចលនទ្រព្យ។ បន្ទាប់ពីទទួលបានប្រាក់កក់ អ្នកលក់ក្លែងក្លាយបានគេចខ្លួនបាត់។  អ្នកអាចជ្រើសយកជម្រើស នៃការផ្ញើប្រាក់កក់ តាមរយៈភាគីទីបីដែលអាចទុកចិត្តបាន ឬដាក់ក្នុងគណនីធនាគារអន្តរការី និងរង់ចាំរហូតដល់អ្វីគ្រប់យ៉ាងត្រូវបានដោះស្រាយធ្វើបែបនេះ គឺជាការការពារខ្លួនអ្នកពីការឆបោក។

៤ ប្រយ័ត្នម្ចាស់ក្លែងក្លាយ
ការឆបោកនេះ ជាប់ពាក់ព័ន្ធនឹងនរណាម្នាក់ ដែលតាំងខ្លួនជាម្ចាស់កម្មសិទ្ធិលើអចលនទ្រព្យមួយ។ អចលនទ្រព្យទាំងនេះ គឺភាគច្រើនជាអចលនទ្រព្យនៅទំនេរ។ អ្វីដែលអ្នកអាចធ្វើបានគឺសាកសួរ ឬមាននរណាម្នាក់ទៅសួរអ្នកជិតខាង និងប្រធានភូមិអំពីអចលនទ្រព្យនោះ និងប្រវត្តិរបស់ម្ចាស់ដីនោះ។ បន្ទាប់មកពិនិត្យថាតើមានភាពខុសគ្នារវាងព័ត៌មានរបស់ពួកគេ និងព័ត៌មានរបស់អ្នកលក់យ៉ាងដូចម្តេច។

ជាថ្មីម្តងទៀតការត្រួតពិនិត្យលើប្លង់កម្មសិទ្ធិ ពិតជាមានសារៈសំខាន់ណា​ស់ ប្រ​សិនបើម្ចាស់ មិនអាចទទួលបានប្លង់កម្មសិទ្ធិ នោះគឺមានអ្វីមួយមិនប្រក្រតីជាមិនខាន។ ត្រូវទៅរកអាជ្ញាធរពាក់ព័ន្ធ និងស្វែងរកថា តើពួកគេគឺជាម្ចាស់ពិតប្រាកដឬមិនមែន មុនពេលដែលអ្នកប្រគល់ប្រាក់ឲ្យពួកគេ។

៥ ផ្ទះជួលរួចហើយ
មានករណីជាក់ស្តែងដែលបានកើតឡើង ដែលបានបង់ប្រាក់ជួលរយៈពេលវែង។ ក្នុងករណីនៃការជួលបែបនេះ គឺអាចត្រូវបានចុះបញ្ជី ជាផ្នែកមួយដាច់ដោយឡែកពីដី។ វាអាចមានបន្ទប់ដាក់លក់ ដែលប្រើប្រាស់ប្លង់ទន់នេះ គឺជាស្ថានភាពស្មុគស្មាញ និងគួរប្រុងប្រយ័ត្នជាទីបំផុត ការស្វែងរកប្លង់កម្មសិទ្ធិអាចបង្ហាញ ពីការពិតប្លង់រឹងគួរតែមានរាល់ព័ត៌មានលំអិតចាំបាច់ទាំងអស់។

ជាមួយគ្នានេះ លោក អ្នកគួរតែស្វែងរកជំនួយពីអាជ្ញាធរមូលដ្ឋាន ប្រសិនបើមានត្រឹមតែជាប្លង់ទន់។ ក្នុងការត្រួតពិនិត្យដំបូង ត្រូវចំណាំថាតើមានបន្ទប់នៅក្នុងផ្ទះ ដែលអ្នកលក់ពុំអាចបើកឲ្យមើលបានដែរឬទេ។ ប្រសិនបើពួកគេមានបំណងចង់លក់ផ្ទះពួកគេត្រូវតែមានឆន្ទៈក្នុងការបើកទ្វា ឬមានកូនសោរបើក បន្ទប់នោះមិន ខាន។

៦ ការខូចខាតមិនអាចមើលឃើញ
មូលហេតុមួយ ដែលគេលក់អចលនទ្រព្យរបស់ពួកគេ ក្នុងតម្លៃទាបគឺដោយសារតែមានការខូចខាត ដែលអ្នកនឹងមិនអាចមើលឃើញ។ ការខូចខាតមួយចំនួនពិតជាមិនអាចមើលឃើញ រហូតដល់បន្ទាប់ពីអ្នកបានទិញ និងចាប់ផ្តើមផ្លាស់ប្តូរមករស់នៅ ទើបដឹងអំពីការខូចខាតទាំងនោះ។

ជាការណែនាំ អ្នកគួរនាំអ្នកជំនាញមកជាមួយ ដើម្បីឲ្យជួយពិនិត្យមើលប្រព័ន្ធទឹក អគ្គិសនី និងភាពរឹងមាំនៃសំណង់នោះ មុនពេលអ្នកទិញលំនៅដ្ឋានណាមួយ។

៧ តំបន់មានទឹកជំនន់
មិនស្ថិតនៅតំបន់មានទឹកជំនន់ គឺជាចំណុចដ៏ពិសេសមួយ នៃអចលនទ្រព្យសម្រា​ប់លក់។ អ្នកលក់នឹងធ្វើការផ្សព្វផ្សាយថា តំបន់នោះគឺគ្មានទឹកជំនន់នោះទេបើទោះបីជាក្នុងតំបន់នោះមានទឹកជំនន់ក៏ដោយ។ ចំណុចនេះ អាចបង្ករឲ្យមានគ្រោះមហន្តរាយនៅពេល ដែលមានភ្លៀងធ្លាក់ច្រើននៅក្នុងតំបន់។ ចំណុចមួយដែលអ្នក អាចត្រួតពិនិត្យមើលថាតើតំបន់នេះ មានទឹកជំនន់ឫក៏អត់ អ្នកអាចសាកសួរអ្នកក្នុងតំបន់ ឫអ្នកជិតខាង កន្លែងនោះថា តើតំបន់នោះពិតជាមានទឹកជំនន់ ឬក៏អត់។

៨ ឆបោកដោយឲ្យបង់ប្រាក់មុនគម្រោង
នៅពេលដែលអ្នកអភិវឌ្ឍន៍ មិនពិតប្រាកដបានផ្សព្វផ្សាយគម្រោងថ្មី និងបានប្រមូ​លប្រាក់មុន ដែលពួកគេនិយាយថា ពួកគេនឹងប្រើប្រាស់ប្រាក់នេះ សម្រាប់ការសាងសង់តែបន្ទាប់មកពួកគេស្រាប់តែគេចខ្លួនបាត់។ ករណីនេះ អាចកើតមានចំពោះគម្រោងលំនៅដ្ឋាន ដែលជាប់ជាមួយដីគម្រោងបុរី គម្រោងដីឡូតិ៍ ឬក៏គម្រោងអភិវឌ្ឍន៍ខុនដូមួយចំនួន។

ដើម្បីជៀសវាងរាល់បញ្ហាទាំងនេះ អ្នកអាចធ្វើការពិនិត្យឲ្យបានម៉ត់ចត់ លើប្រវត្តិរបស់គម្រោងពីមុនៗ របស់អ្នកអភិវឌ្ឍន៍។ អ្នកអភិវឌ្ឍន៍ដែលទុកចិត្តបានជាធម្មតាបានបន្សល់ទុកកេរ្តិ៍ឈ្មោះល្អរួចទៅហើយ។ ចំណាំថានេះ មិនមែនមានន័យថាអ្នកអភិវឌ្ឍន៍ថ្មីគឺសុទ្ធតែជាអ្នកបោកប្រាស់ទាំងអស់នោះទេ។

អ្នកអាចព្យាយាមរកមើលអត្ថបទព័ត៌មានល្អៗ ដែលទាក់ទងនឹងគម្រោងអភិវឌ្ឍន៍ពីការផ្សាយព័ត៌មានធំៗ និងអាចទុកចិត្តបាន។ អត្ថបទភាគច្រើនបានបង្ហាញពីសមិទ្ធិផលកន្លងមករបស់អ្នកអភិវឌ្ឍន៍ថា តើគម្រោងត្រូវបានគេអនុម័ត ព្រមព្រៀងឲ្យសាងសង់ឬក៏អត់។

សូមកត់សម្គាល់ពីប្រព័ន្ធផ្សព្វផ្សាយ ដែលមានភាពត្រឹមត្រូវដូចជា Propertyarea មិនគួរពឹងផ្អែកលើអ្វីតែម្ខាងៗទេ ដោយសារវាមិនអាចបង្ហាញ ពីភាពត្រឹមត្រូវទាំងស្រុងបានទេ។

អ្នកអាចផ្ទៀងផ្ទាត់ជាមួយក្រសួងពាក់ព័ន្ធផងដែរ ដូចជាក្រសួងរៀបចំដែនដីនគរូបនីយកម្ម និងសំណង់ថាតើមានការយល់ព្រមណាមួយ និងលិខិតបញ្ជាក់សម្រាប់អ្នកអភិវឌ្ឍន៍។ ពួកគេត្រូវតែទទួលបានអាជ្ញាប័ណ្ណក្រុមហ៊ុន សម្រាប់ក្រុមហ៊ុនអភិវឌ្ឍន៍របស់ខ្លួន។

ពួកគេត្រូវតែមានប្លង់រឹងមេលើដី ដែលពួកគេកំពុងអភិវឌ្ឍន៍ ត្រូវមានអាជ្ញាប័ណ្ណសម្រាប់ការអភិវឌ្ឍន៍រួមទាំងផែនការមេ នៃការអភិវឌ្ឍពេញលេញចាប់តំាងពីការចាប់ផ្តើមរហូតដល់បញ្ចប់ ហើយពួកគេត្រូវតែមានអាជ្ញាប័ណ្ណសាងសង់។ ប្រសិនបើការអភិវឌ្ឍន៍នេះ មិនបង្ហាញនូវឯកសារទាំងនេះច្បាស់លាស់អ្វីទេ។

នេះជាសញ្ញាមិនល្អសម្រាប់អ្នកទិញ។ ប្រសិនបើអ្នកមិនអាចទិញដោយទទួលបានប្លង់រឹង​ ឬប្លង់កាន់កាប់រួមគ្នាសម្រាប់យូនីត នៃអគារខ្ពស់ៗនេះ គឺជាសញ្ញានៃគ្រោះថ្នាក់មួយយ៉ាងច្បាស់លាស់។

៩ ការឆបោកដោយការពន្លើស
ការឆបោកនេះ គឺជាប់ទាក់ទងនឹងការប្រកាសទ្រព្យសម្បត្ដិ ដែលមានទំហំធំជាងការពិត ហើយបន្ទាប់មកចាប់ផ្តើមលក់ចេញ។ អ្នកលក់អាចនិយាយថា ផ្ទះរបស់ខ្លួនមានទំហំ ៦x១៦ម តាមការពិតទំហំត្រឹមតែ ៤x១០ ម ប៉ុណ្ណោះ។ ការទិញក្នុងលក្ខខណ្ឌនេះអាចធ្វើឲ្យផ្នែកមួយ នៃផ្ទះរបស់អ្នកត្រូវបានវាយកម្ទេចចោលនៅថ្ងៃអនាគត។ ពេលខ្លះម្ចាស់ដឹងពីបញ្ហានេះ ហើយពេលខ្លះទៀតពួកគេមិនបានដឹង អំពីបញ្ហានោះទេ ដូច្នេះនេះគឺមិនមែនជាការបោកប្រាស់ដោយចេតនារហូតនោះទេ។

ការត្រួតពិនិត្យមើលប្លង់កាន់កាប់ ជាមួយអាជ្ញាធរពាក់ព័ន្ធ សម្រាប់ទំហំទាំងនេះនឹងបញ្ជាក់ពីស្ថានភាពច្បាស់លាស់ នៃអចលនទ្រព្យ។ អចលនទ្រព្យ ដែលមានប្លង់រឹងប្រភេទ LMAP គឺមានព្រំដែនដែលបានកំណត់ និងប្រើប្រាស់ប្រព័ន្ធ GPS ក្នុងការត្រួតពិនិ ត្យ​។ ទាំងនេះជាប្លង់ដែលមានសុវត្ថិភាពបំផុត ហើយកាត់បន្ថយការចំណាយ។ ទោះជាយ៉ាងណាការចំណាយបន្ថែមទៀត នឹងធានាថាអ្នកបានទិញអ្វីដែលអ្នកចង់ទិញ។

១០ ការធ្វើការងារក្នុងពេលជាមួយគ្នា
ការឆបោកនេះគឺជាអង្គភាពពីរ ឬមនុស្សពីរនាក់ធ្វើការរួមគ្នា ដើម្បីបង្កើនតម្លៃអចលនទ្រព្យមួយ។ មនុស្សម្នាក់ទិញដី ដែលមិនទាន់មានការអភិវឌ្ឍន៍ និងមនុស្សទីពីរបានប្រកាសថា នឹងមានការអភិវឌ្ឍន៍ក្បែរនោះ។ ការអភិវឌ្ឍន៍នេះ ជាធម្មតាមិនបានបញ្ជាក់ពីទីតាំងជាក់លាក់ណាមួយទេ។ អ្នកទីមួយ បន្ទាប់មកក៏លក់ដី ដែលមិនទាន់មានការអភិវឌ្ឍន៍នោះក្នុងតម្លៃខ្ពស់ បន្ទាប់មកពួកគេទាំងពីរនាក់ បានចែកប្រាក់ចំណេញគ្នាជាក់ស្តែងគ្មានអ្វីត្រូវបានសាងសង់ និងអភិវឌ្ឍន៍អ្វីឡើយ។

ការជៀសវាងពីបញ្ហានេះ គឺមានភាពងាយស្រួល ជាងការបោកប្រាស់ផ្សេងទៀតដោយសារការអភិវឌ្ឍន៍ធំៗ ត្រូវទាមទារការអនុម័តពីក្រសួងជាច្រើន និងត្រូវបានអនុវត្តន៍ដោយក្រុមហ៊ុន ដែលមានបទពិសោធន៍ជោគជ័យ។ ជនបោកប្រាស់ជាធម្មតាពួកគេមិនមានការិយាល័យពិតប្រាកដណាមួយឡើយ។

និយាយដដែលៗ ពួកគេចាំបាច់ត្រូវតែមានបានអាជ្ញាប័ណ្ណ ក្រុមហ៊ុនសម្រាប់ក្រុមហ៊ុនអភិវឌ្ឍន៍របស់ខ្លួន។ ពួកគេត្រូវតែមានប្លង់រឹងមេលើដី ដែលពួកគេកំពុងអភិវឌ្ឍន៍ត្រូវមានអាជ្ញាប័ណ្ណ សម្រាប់ការអភិវឌ្ឍន៍រួមទាំងផែនការមេ នៃការអភិវឌ្ឍពេញលេញចាប់តាំងពីការចាប់ផ្តើមរហូតដល់បញ្ចប់ ហើយពួកគេត្រូវតែតែមានអាជ្ញាប័ណ្ណសាងសង់ផងដែរ។ ប្រសិនបើការអភិវឌ្ឍនេះ មិនបង្ហាញនូវឯកសារទាំងនេះ ច្បាស់លាស់ទេវាជាសញ្ញាមិនល្អសម្រាប់អ្នកទិញនោះឡើយ៕

ដំណឹងល្អៈក្រុមហ៊ុន Singapore Airline នឹងភ្ជាប់ការហោះហើរត្រង់មកកាន់ក្រុងសៀមរាបនៅពាក់កណ្តាលខែធ្នូខាងមុខនេះ

ដោយៈជេស៊ីកា

ភ្នំពេញៈ ក្រុមហ៊ុនអាកាសចរណ៍ Singapore Airline គ្រោងនឹងភ្ជាប់ជើងហោះហើរមកកាន់ក្រុងសៀមរាប នាពាក់កណ្តាលខែធ្នូខាងមុខនេះ ប្រសិនជាគ្មានអ្វីប្រែប្រួលទេនោះ។

ទីប្រឹក្សាសមាគមទីភ្នាក់ងារទេសចរណ៍កម្ពុជា និងជាប្រធានក្រុមហ៊ុនទេសចរណ៍ World Express &Tours លោកហូ វណ្ឌី បានមានប្រសាសន៍ឲ្យដឹង នាល្ងាចថ្ងៃទី២៥ វិច្ឆិកាកន្លងមកថា ក្រុមហ៊ុនអាកាសចរណ៍នេះ បានដាក់សំណើរទៅកាន់រដ្ឋលេខាធិការដ្ឋានអាកាសចរណ៍ស៊ីវិលរួចហើយ ពីការភ្ជាប់ជើងហោះហើរនាពេលខាងមុខនេះ ខណៈបច្ចុ ប្ប្បន្ននេះ មានក្រុមហ៊ុនអាកាសចរណ៍៍ចំនួន៥ទៀត បានកំណត់ពេលវេលា និងខ្លះទៀតត្រៀម​ហោះហើរមកកម្ពុជារួចហើយ។

លោកបន្តថា “រហូតមកទល់ពេលនេះ ក្រុមហ៊ុនឬការីទេសចរណ៍នានាបានជូនដំណឹងពីការបើកចំហ ប្រទេសរបស់ប្រមុខរដ្ឋាភិបាលទៅកាន់អឺរ៉ុប និងបណ្តាប្រទេសដទៃទៀតរួចហើយ ប៉ុន្តែការកក់ជើងហោះហើរ ឬការត្រៀមមកទស្សនាកម្ពុជាមិនទាន់មានច្រើននៅឡើយទេ ព្រោះវាត្រូវការពេលវេលាខ្លះ”។ លោកបន្តថា “ភ្ញៀវមកពីបណ្តាអឺរ៉ុបមិនទាន់មានច្រើនទេ តែមកពីប្រទេសជិតខាងដូចជាថៃ និងប្រទេសមួយចំនួនទៀតបានចាប់ផ្តើមត្រៀមធ្វើដំណើរមកកាន់កម្ពុជាហើយ”។

លោកហូ វណ្ឌីបានបន្តថា ប្រសិនជារដ្ឋាភិបាលវៀតណាម បានភ្ជាប់ជើងហោះហើរមកកម្ពុជាតាមការស្នើសុំរបស់សម្តេចតេជោ ក្នុងឱកាសជួបឯកអគ្គរដ្ឋទូតវៀតណាមថ្មីក្នុង​សប្តាហ៍នេះ យើងរំពឹងទទួលបានភ្ញៀវទេសចរណ៍មកពីប្រទេសវៀតណាម ព្រោះប្រទេ​សនេះ មានសក្តានុពលក្នុងការទាក់ទាញភ្ញៀវទេសចរណ៍ ពិសេសការចាប់ផ្តើមហោះហើរឡើងវិញ របស់ក្រុមហ៊ុនអាកាសចរណ៍ Cambodia Angkor Airline៕