សិក្សាពីគុណសម្បត្តិ និងគុណវិបត្តិ នៃការបង្កើតក្រុមហ៊ុនភ្នាក់ងារអចលនវត្ថុដោយទិញហ្រេ្វនឆាយ (Franchise)

ដោយ: ម៉ាលីស

ភ្នំពេញៈ សម្រាប់អ្នកទើបនឹងព្រលោកថ្មីៗក្នុងអាជីវកម្ម ការបង្កើតអាជីវកម្មថ្មី ទិញសិទ្ធិអាជីវកម្ម ឬយើងតែងនិយមថា ហ្រ្វេនឆាយ នោះក៏មានការពេញនិយមផងដែរក្នុងបរិបទរកស៊ីនៅក្នុងប្រទេសកម្ពុជានាពេលបច្ចុប្បន្ន។ ទោះជាយ៉ាងនេះក្តី វាបានផ្ដល់នូវចំណុចល្អនិងមិនល្អ។

ក្នុងសៀវភៅ “វិថីអចលនទ្រព្យ” របស់លោក គាម សៀកឡុង បានរៀបរាប់ពីគុណសម្បត្តិនិងគុណវិបត្តិ នៃការបើកក្រុមហ៊ុនអចលនវត្ថុបែបហ្រ្វេនឆាយ ដោយសង្ខេបដូចតទៅ

១ គុណសម្បត្តិ

-Master franchise ជួយផ្ដល់ជាយោបល់ និងជួយរៀបចំដំណើរការិយាល័យពីដំបូង ទាំងការជ្រើសរើសទីតាំង តុបតែងការិយាល័យ ការចុះបញ្ជីក្រុមហ៊ុនផ្ដល់ឯកសារចាំបាច់និងមានស្តង់ដារ នៃការប្រតិបត្តិនិងវគ្គបណ្ដុះបណ្ដាល ប្រព័ន្ធការងារណែនាំផងដែរ និងផ្ដល់ជាយុទ្ធសាស្ត្រផ្សេងៗ។

-កេរត្តិ៍ឈ្មោះជាសកលរបស់ Master Franchise ជួយជំរុញអាជីវកម្មថ្មីៗរបស់យើង មានការទទួលស្គាល់ និងទទួលបានទំនុកចិត្តយ៉ាងឆាប់រហ័ស ពីអតិថិជនហើយក៏មានភាពងាយស្រួល ក្នុងការជ្រើសរើសបុគ្គលិក មកបម្រើការងារផងដែរ។

-មានការជួយគាំទ្រ និងជួយផ្ដល់យោបល់ណែនាំបង្ហាញផ្លូវជាប្រចាំ នឹងរៀបចំឲ្យមានវគ្គបណ្ដុះបណ្ដាលជាមួយគ្រូ ដែលមានបទពិសោធន៍អនុវត្តផ្ទាល់ ក្នុងវិស័យនេះជាច្រើននៅក្នុងស្រុកនិងមកពីបរទេស។ ជួយរៀបចំឲ្យមានទស្សនៈកិច្ចសិក្សា ទៅរៀនសូត្រពីប្រទេសទាំងនោះផងដែរ។

-មានបណ្ដាញធំទូលាយ មានមនុស្សច្រើនមានអំណាចក្នុងការចចារយកគម្រោងធំៗ ល្អជាមួយនឹងកុំបែកជើងសារខ្ពស់និងលក្ខខណ្ឌល្អបំផុត។

២ គុណវិបត្តិ

-ចំណាយដើមទុនច្រើនសំរាប់ទិញហ្រ្វេនឆាយ និងរៀបចំការិយាល័យតាមស្តង់ដារហើយតម្រូវឲ្យបង់ប្រាក់ ហ្រ្វេនឆាយប្រចាំខែ អាចតាមចំនួនកំណត់មួយ ឬគិតជាភាគរយលើប្រាក់ចំណូល។ ការរៀបចំការិយាល័យ និងជ្រើសរើសទីតាំងត្រូវបានគេកំណត់ មិនអាចមានសិទ្ធិជ្រើសរើសរៀបចំការិយាល័យ តាមលទ្ធភាពដែលខ្លួនមាន ឬទីតាំងដែ​លខ្លួនចង់បាននោះឡើយ។

-យើងមិនមែនជាម្ចាស់នៃស្លាកយីហោដោយខ្លួនឯង ជួយកសាងកេរ្តិ៍ឈ្មោះឲ្យគេបន្ថែម យើងអាចចំណេញលុយតែមិនសល់យីហោផ្ទាល់ខ្លួនទេ។

-យើងមិនមែនជាម្ចាស់អាជីវកម្មដោយខ្លួនឯង ដែលមានសិទ្ធិសំរេចអ្វីៗគ្រប់យ៉ាងទេ ការងារខ្លះយើងអាចសម្រេចបាន ការងារខ្លះទៅឆ្លងទៅ Master Franchise។

-Master Franchise លក់សិទ្ធិអាជីវកម្មកាន់តែច្រើន ចំណែកទីផ្សារយើងកាន់តែរួមតូច៕

Elon Musk គ្រោងបោះទុនវិនិយោគបន្ថែមរាប់រយលានដុល្លារ ដើម្បីពង្រីកសមត្ថភាពផលិតកម្មនៅសៀងហៃ

ដោយៈសុខុម

សៀងហៃ: ក្រុមហ៊ុន Tesla គ្រោងបោះទុនវិនិយោគរហូតដល់១,២ពាន់លានយ័ន (១៨៨លានដុល្លាអាមេរិក) ដើម្បីពង្រីកសមត្ថភាពផលិតកម្ម នៅរោងចក្ររបស់ខ្លួនក្នុងក្រុងសៀងហៃ ដែលនឹងផ្ដល់ឱកាសការងារ ដល់មនុស្ស៤.០០០នាក់បន្ថែមទៀត។ នេះបើតាមកាសែតចិន Beijing Daily ចុះផ្សាយនៅថ្ងៃសុក្រ ទី២៦ វិច្ឆិកា នេះ។

ទោះជាយ៉ាងណា ពេលទីភ្នាក់ងារព័ត៌មាន Reuters ទាក់ទងទៅដើម្បីការឆ្លើយបំភ្លឺជុំវិញបញ្ហានេះ ក្រុមហ៊ុនផលិតរថយន្តអគ្គិសនីអាមេរិក របស់កំពូលមហាសេដ្ឋីលេខ១ របស់ពិភពលោក Elon Musk នេះមិនបានឆ្លើយតបនោះឡើយ។

ឯកសារដែលទីភ្នាក់ងារព័ត៌មាន Reuters ទទួលបានបង្ហាញថា ការពង្រីកសមត្ថភាពនេះនឹងផ្ដល់លទ្ធភាពឱ្យក្រុមហ៊ុន Tesla បន្ថែមបុគ្គលិកចំនួន ៤.០០០នាក់ ដែលធ្វើ ឱ្យចំនួនបុគ្គលិកសរុបធ្វើការនៅរោងចក្រនេះ កើនឡើងដល់ ១៩.០០០នាក់។

រោងចក្រនៅសៀងហៃ របស់ក្រុមហ៊ុនTesla ត្រូវបានរចនាឡើងដើម្បីផលិតរថយន្តឱ្យបានរហូត ដល់ ៥០០.០០០គ្រឿងក្នុងមួយឆ្នាំ ហើយបច្ចុប្បន្នរោងចក្រនេះមានសមត្ថភាពផលិតរថយន្ត Model3 និង Model Y ក្នុងអត្រា ៤៥០.០០០គ្រឿងក្នុងមួយឆ្នាំ។

ការលក់របស់ក្រុមហ៊ុននេះនៅប្រទេសចិន កំពុងកើនឡើងខ្ពស់ ទោះបីជារងសម្ពា​ធកាន់តែខ្លាំងឡើង ពីសំណាក់ក្រុមនិយ័តករ ក្រោយមានការប្ដឹងផ្ដល់ពីអ្នកប្រើប្រាស់ជុំវិញសុវត្ថិភាពផលិតផល និងការត្រួតពិនិត្យលើការប្រមូលទិន្នន័យរបស់ក្រុមហ៊ុននេះ។

កាលពីខែមុន ក្រុមហ៊ុន Tesla និយាយថា ខ្លួនបានបង្កើតមជ្ឈមណ្ឌលស្រាវជ្រាវមួយ និងមជ្ឈមណ្ឌលទិន្នន័យ ដាច់ដោយឡែកមួយនៅក្រុងសៀងហៃ ដើម្បីរក្សាទុកទិន្នន័យនៅតាមមូលដ្ឋានដែលខ្លួនឈរជើង៕ Reuters៕

តើផ្លូវជាតិមួយណាដែលមានសារៈសំខាន់ជាងគេនិងវែងជាងគេនៅកម្ពុជា

ដោយៈវឌ្ឍនៈ

ភ្នំពេញៈ រាជរដ្ឋាភិបាលកម្ពុជាបានអភិវឌ្ឍន៍ និងសាងសង់ផ្លូវជាច្រើនខ្សែចេញពីរាជធានីភ្នំពេញ ទៅបណ្ដាខេត្តនិងចេញពីបណ្ដាខេត្ត ទៅបណ្ដាខេត្តផ្សេងទៀត ក្នុងនោះផ្លូវជាតិសំខាន់ៗជាច្រើន ក៏ត្រូវបានរាជរដ្ឋាភិបាលកម្ពុជា កំពុងជួសជុលនិងលើកកម្ពស់ជាថ្មី។

ថ្ងៃនេះ គេហទំព័រ Property Area នឹងលើកយកផ្លូវជាតិ ដែលវែងនិងមានសារសំខាន់ជាងគេក្នុងប្រទេសកម្ពុជា។

តាមពិតទៅផ្លូវជាតិ ដែលរាជរដ្ឋាភិបាលបានសាងសង់ សុទ្ធតែមានសារសំខាន់ក្នុងការតភ្ជាប់ សម្រាប់ដឹកកសិផលរបស់កសិករ និងសម្រាប់ប្រជាពលរដ្ឋធ្វើដំណើរផងដែរ ប៉ុន្តែយើងក្រលេកទៅមើលផ្លូវជាតិលេខ៥ គឺជាផ្លូវដែលមានប្រវែងវែងជាងគេក្នុងប្រទេ សកម្ពុជា និងឆ្លងកាត់បណ្តាខេត្តជាច្រើនផងដែរ។

ផ្លូវជាតិលេខ៥តភ្ជាប់ពីរាជធានីភ្នំពេញ ឆ្ពោះទៅខេត្តកំពង់ ឆ្នាំង ពោធិ៍សាត់ បាត់ដំបង និងទៅកាន់ខេត្តបន្ទាយមានជ័យ ។ ផ្លូវនេះ ត្រូវបានរាជរដ្ឋាភិបាលកម្ពុជាជួសជុលនិងលើកកម្ពស់ជាថ្មី ដើម្បីឱ្យកាន់តែងាយស្រួលក្នុងការធ្វើដំណើរ របស់ប្រជាពលរដ្ឋ ក្រុមអ្នកដឹកជញ្ជូនទំនិញផងផដែរ ។

លោកទេសរដ្ឋមន្រ្តីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន  កន្លងមកក៏បានឱ្យផងដែរថា ផ្លូវជាតិលេខ៥ជាផ្លូវដែលតភ្ជាប់ពីប្រទេសចិន មកកម្ពុជានិងបន្តទៅប្រទេសវៀតណាម ដោយចេញពីចិន ឆ្លងកាត់ប្រទេសមីយ៉ាន់ម៉ា ឆ្លងកាត់ប្រទេសថៃ មកដល់កម្ពុជា និងបន្តទៅប្រទេសវៀតណាម ដែលធ្វើឱ្យផ្លូវនេះគេហៅថាផ្លូវអាស៊ាន ហាយវេ ។

លោកបន្តថា “ផ្លូវជាតិលេខ៥គឺជាឆ្អឹងខ្នង ដ៏សំខាន់របស់ប្រទេសកម្ពុជា ដូច្នេះទើបបច្ចុប្បន្ននេះ ផ្លូវលេខ៥យើងបានអភិវឌ្ឍន៍ពី២គន្លងទៅ៤គន្លង ពីភ្នំពេញទៅព្រែកក្ដាម និងពង្រីកបន្ថែមទៀតពីព្រែកក្ដាមតទៅ”។

បើតាមរដ្ឋមន្ត្រីសាធារណការ និងដឹកជញ្ជូនរូបនេះឱ្យដឹងថា ក្រៅពីផ្លូវលេខ៥មួយខ្សែនេះ កម្ពុជាក៏បាននិងកំពុងសាងសង់ជាថ្មី ក្រោមហិរញ្ញប្បទានរបស់រដ្ឋាភិបាលជប៉ុន ដែលមានទំហំទឹកប្រាក់៥០០០លានដុល្លារអាមេរិក។

ជាមួយគ្នានេះ ក្រសួងក៏បាននិងកំពុងលើកកម្ពស់ផ្លូវជាងចំនួន៩ទៀត រួមមានផ្លូវជាងលេខ១ ពីភ្នំពេញស្វាយរៀងបាវិត ផ្លូវជាតិលេខ២ភ្នំពេញតាកែវ ផ្លូវជាតិលេខ៣ភ្នំពេ​ញកំពត ផ្លូវជាតិលេខ៤ ភ្នំពេញ ខេត្តព្រះសីហនុ ផ្លូវជាតិលេខ៦ ភ្នំពេញ កំពង់ចាម កំពង់ធំ សៀមរាប ផ្លូវជាតិលេខ៧ ស្គន់-កំពង់ចាមត្បូងឃ្មុំ ក្រចេះ ស្ទឹងត្រែង  ផ្លូវជាតិលេខ៨ពីព្រែកតាមាក់ទៅក្រែក លេខ៩ ស្ទឹងត្រែង ព្រះវិហារនិងលេខ១០ តភ្ជាប់ស្រុកសំឡូត វាលវែង មុនឆ្ពោះទៅកាន់ខេត្តកោះកុង៕

ក្រុមហ៊ុនល្បីឈ្មោះមួយដាក់ជួលអាផាតមិនតូចៗទំហំ១០មែត្រការ៉េ ក្នុងតំលៃតិចជាង១ដុល្លារក្នុង១ខែ នៅទីក្រុងតូក្យូ

ដោយ: ម៉ាលីស

អន្តរជាតិៈ Ikea ដែលជាក្រុមហ៊ុនលក់រាយរបស់ប្រទេសស៊ុយអែត  កំពុងក្លាយជាម្ចាស់លំនៅឋាននៅជប៉ុន  ដែលអាផាតម៉ិនតូចៗរបស់ពួកគេ នឹងដាក់ជួលនៅទីក្រុងតូក្យូ​ក្នុងតម្លៃទាបជាង១ដុល្លារក្នុងមួយខែ។

អាផាតមិនទំហំ 10 ម៉ែត្រការ៉េ (107 ហ្វីតការ៉េ) មានទីតាំងនៅក្នុងសង្កាត់ Shinjuku ហើយនឹងត្រូវចំណាយត្រឹមតែ99 យ៉េន (0.86 ដុល្លារ) ក្នុងមួយខែ ដើម្បីជួល នេះបើយោងតាមព័ត៌មានលម្អិត ដែលចេញផ្សាយដោយ Ikea ក្នុងសប្តាហ៍នេះ។

មានតែមួយយូនីតប៉ុណ្ណោះ ហើយវាត្រូវបានបំពាក់ដោយគ្រឿងសង្ហារឹម និងគ្រឿ​ងបរិក្ខាររបស់ Ikea យ៉ាងពេញលេញ។  ក្រុមហ៊ុនកំពុងទទួលយកពាក្យសុំពីអ្នកជួលដែលមានសក្តានុពល ដែលត្រូវតែមានអាយុលើសពី20 ឆ្នាំ រហូតដល់ថ្ងៃទី3 ខែធ្នូ។

តំណាងក្រុមហ៊ុនIkea បាននិយាយថា អាផាតម៉ិន នឹងត្រូវបានជួលរហូតដល់ថ្ងៃទី ១៥ ខែមករា ឆ្នាំ២០២៣។  អ្នកជួលនឹងត្រូវបង់វិក្កយបត្រប្រើប្រាស់ផ្ទាល់ខ្លួន។

១០ម៉ែត្រការ៉េមិនធំទេ ប៉ុន្តែIkea និយាយថា ពួកគេបានប្រឹងប្រែងធ្វើវាយ៉ាងលំបាក ដើម្បីអោយក្លាយជាកន្លែងរស់នៅមួយ ដែលអាចទទួលយកបាន។

តំណាងក្រុមហ៊ុនបាននិយាយនៅលើគេហទំព័ររបស់ខ្លួនថា “គន្លឹះមួយគឺត្រូវប្រើប្រាស់ចន្លោះ បញ្ឈរឱ្យបានល្អ។  ដោយការចាប់យកបន្ទប់ជា៣វិមាត្រ នេះជាលទ្ធភាពថ្មី ដែលទំហំមានដែនកំនត់”។

ទីក្រុងតូក្យូគឺជាទីក្រុងមួយ ស្ថិតក្នុងចំណោមទីក្រុង ដែលមានប្រជាជនច្រើនបំផុតនៅលើពិភពលោក ដែលជំរុញឱ្យមាននិន្នាការសម្រាប់អាផាតម៉ិនខ្នាតតូចៗ។  វាជាផ្ទះសម្រាប់មនុស្សជាង១៤លាននាក់ នេះបើយោងតាមរដ្ឋាភិបាលទីក្រុងតូក្យូ។

ក្រុមហ៊ុន Ikea កំពុងផ្សព្វផ្សាយផ្ទះដ៏តូចរបស់ខ្លួន ដោយមានជំនួយពីត្រីឆ្លាមមួយក្បាលឈ្មោះBlahaj ដែលបង្ហាញនៅក្នុងវីដេអូផ្សព្វផ្សាយជាបន្តបន្ទាប់ ដែលត្រូវបានផ្សព្វផ្សាយនៅលើ YouTube ។

តួអង្គ Blahaj បង្ហាញពីភ្នាក់ងារអចលនទ្រព្យ ដែលមានជំនាញក្នុងកន្លែងតូចៗ។  នៅក្នុងឈុតខ្លីៗ លោក Blahaj បង្ហាញពីចក្ខុវិស័យរបស់គាត់ សម្រាប់អាផាតមិនដ៏តូចនេះ ដោយមានជំនួយពីសមាជិកនៃក្រុមរចនាផ្ទៃខាងក្នុង Ikea ។

នេះមិនមែនជាលើកទីមួយទេដែល Ikea ដែលបានចូលរួមអភិវឌ្ឍន៍ក្នុងវិស័យអចលនទ្រព្យ៕ ប្រភព: CNN៕

ពិភពលោកកំពុងប្រឈមមុខនឹងមេរោគកូវីដថ្មី ដែលមានភាពសាហាវជាង Delta ទៅទៀត

ដោយៈគង់ សិរីជេស៊ីកា

ភ្នំពេញៈ បណ្តាប្រទេសនានាក្នុងពិភពលោក កំពុងប្រឈមមុខនឹងមេរោគកូវីដ១៩ថ្មី ដែលមានប្រភពពីទ្វីបអាហ្រ្វិក និងមានភាពសាហាវជាងមេរោគប្រភេទ DELTA ទៀតផង។

អង្គការសុខភាពពិភពលោក (WHO) នៅថ្ងៃព្រហស្បតិ៍សប្តាហ៍នេះ បានអំពាវនាវឱ្យមានការប្រុងប្រយ័ត្នក្នុងដំណាក់កាលដំបូង ព្រមជាមួយការស្រាវជ្រាវបន្ថែមទៀត ដើ​ម្បីយល់ពីឥទ្ធិពល និងការវិវឌ្ឍនៃវីរុស COVID-19 បំប្លែងខ្លួនថ្មី ដែលមានលេខសម្គាល់ «B.1.1.529» ខណៈទីក្រុងហុងកុងរបស់ចិន បានក្លាយជាដែនដីដំបូងគេនៅទ្វីបអាស៊ី ដែលបានរកឃើញវត្តមានវីរុសថ្មីនេះ លើបុរសពីរនាក់ ដែលបានធ្វើដំណើរមកពីអាហ្វ្រិកខាងត្បូង។ នេះបើតាមការដកស្រង់ ចេញពីទីភ្នាក់ងារសារព័ត៌មាន Reuters និង AFP នារសៀលថ្ងៃសុក្រ ទី២៦ ខែវិច្ឆិកា ឆ្នាំ២០២១។

ការអំពាវនាវខាងលើនេះ ត្រូវបានធ្វើឡើងដោយវេជ្ជបណ្ឌិតMaria Van Kerkhove ប្រធានក្រុមបច្ចេកទេសគ្រប់គ្រងជំងឺ COVID-19 របស់ WHO។

ក្នុងដំណាក់កាលនៃការប្រឈមមុខ នឹងវីរុសបំប្លែងខ្លួនថ្មី ដែលមិនទាន់មានភាពច្បាស់លាស់នៅឡើយនេះ លោកស្រីវេជ្ជបណ្ឌិតMaria Van Kerkhove នៅតែបន្តណែនាំអំពីសារៈសំខាន់ នៃការធានាឲ្យបានការចាក់វ៉ាក់សាំងពេញលេញ។

ប្រទេសមួយចំនួនដែលបានស្វែងយល់ អំពីវីរុសបំប្លែងថ្មី B.1.1.529 ខាងលើនេះ ដូចជាចក្រភពអង់គ្លេស និងអ៊ីស្រាអែលជាដើម បានសម្រេចផ្អាកជើងហោះហើរ ជាមួយប្រទេសអាហ្វ្រិកខាងត្បូង និងប្រទេសបុតស្វាណា (Botswana) ព្រមទាំងប្រទេសចំនួន ៣ទៀត ដូចជា ប្រទេសណាមីបៀ (Namibia), ហ្ស៊ីមបាបវ៉េ (Zimbabwe), ប្រទេសឡេសូថូ (Lesotho) និងអេស្វាទីនី (Eswatini) រួចរាល់ហើយ ចាប់ពីថ្ងៃសុក្រសប្ដាហ៍នេះតទៅ ខណៈប្រទេសអូស្ត្រាលីវិញក៏កំពុងគិតគូរ ក្នុងការធ្វើដូចគ្នានេះផងដែរ។

ដោយឡែកសម្រាប់ប្រទេសឥណ្ឌាវិញ កាលពីថ្ងៃព្រហស្បតិ៍សប្តាហ៍នេះ បានចេញបញ្ជាឲ្យអាជ្ញាធរ តាមអាកាសយានដ្ឋានអន្តរជាតិរបស់ខ្លួន ដាក់ឧបករណ៍តាមដានសុខភាព ទៅលើអ្នកដំណើរមកពីប្រទេសទាំង៥ នៅតំបន់អាហ្វ្រិកខាងត្បូងខាងលើនេះផងដែរ ហើយការកែសម្រួលផ្នែកទិដ្ឋាការ ចំពោះប្រទេសទាំង៥នេះ កំពុងស្ថិតនៅក្នុងការត្រួតពិនិត្យ។

បើតាមក្រុមអ្នកវិទ្យាសាស្ត្រ នៃចក្រភពអង់គ្លេសបានប្រកាសថា ខ្លួនមានការព្រួយបារម្ភយ៉ាងខ្លាំងចំពោះវីរុស COVID-19 បំប្លែងខ្លួនថ្មី B.1.1.529 នេះ មានទ្រង់ (Spike Protein) ខុសគ្នាយ៉ាងខ្លាំងពីវីរុសដើម ដែលវ៉ាក់សាំងត្រូវបានអភិវឌ្ឍឡើង ដើម្បីប្រយុទ្ធប្រឆាំងនឹងវា។ ក្រុមមន្ត្រីអង់គ្លេសបានកំណត់ថា វីរុសនេះប្រហែលជាមានការបំប្លែងខ្លួន «ទ្វេដង» ដែលយើងបានឃើញនៅក្នុងវីរុសបំប្លែងខ្លួន Delta ហើយវាជាអ្វីដែល “អាក្រក់បំផុត” ព្រោះវ៉ាក់សាំងនានាបច្ចុប្បន្ននេះ ទំនងជាមិនមានប្រសិទ្ធភាពក្នុងការទប់ទល់វាឡើយ។

មេរោគCOVID-19 បំប្លែងខ្លួនថ្មី B.1.1.529 ត្រូវបានរកឃើញដំបូង នៅក្នុងប្រទេសអាហ្វ្រិកខាងត្បូង នៅក្នុងសប្តាហ៍នេះតែម្តង ហើយវាបានរីករាលដាល ទៅកាន់ប្រទេសចំនួន ០៤ ទៀតដែលនៅក្បែរខាងដូចខាងលើនេះ។ នៅប្រទេសអាហ្វ្រិកខាងត្បូងតែឯង វីរុសនេះ ត្រូវបានរកឃើញលើមនុស្សជាង១០០នាក់ហើយ ខណៈនៅប្រទេសបុតស្វាណាវិញ មានចំនួនតិចតួចនៅឡើយ។

ចំពោះអការៈរោគ ឬផលប៉ះពាល់ធ្ងន់ធ្ងរក្នុងកម្រិតណា ចំពោះសុខភាព នៅពេលមនុស្សឆ្លងវីរុសបំប្លែងខ្លួនថ្មីនេះ គឺមិនទាន់មានការបញ្ជាក់នៅឡើយទេ៕

ចំណេញរហូតដល់ ៧៨​,០០០ដុល្លារ ពីកម្មវិធី Orkide Flash Sales របស់ក្រុមហ៊ុនអ័រគីដេ

ដោយៈ សហសេវិក

ភ្នំពេញៈ ដូចដែលបានប្រកាសកាលពីសប្តាហ៍មុន ថាក្រុមហ៊ុនអ័រគីដេ ឌីវែឡុបម៉ិន នឹងរៀបចំកម្មវិធី ដែលពុំធ្លាប់មានពីមុនមក នោះគឺ Orkide Flash Sales ហើយកម្មវិធីនេះដែរឃើញថា​មានការគាំទ្រយ៉ាងច្រើន ពីសំណាក់អតិថិជនដែលអញ្ជើញ មកចូលរួមកម្មវិធិនៅការិយាល័យលក់ផ្ទាល់របស់គម្រោង។

កម្មវិធី Orkide Flash Sales នេះដែរមានការបើកលក់ផ្ទះ ប្រកបអាជីវកម្មប្រភេទ The Prestige ដែលជាម៉ូតផ្ទះអឺរ៉ុប បែបក្លាហ្សិក ​​ចំនួន២ប្រភេទគឺ The Prestige A ទំហំ 6m x 18m មាន៥បន្ទប់គេង និង ៦បន្ទប់ទឹក និង The Prestige C ដែលមានទំហំផ្ទះ 4.20m x 18m មាន៤បន្ទប់គេង និង ៥បន្ទប់ទឹក។

លក្ខណៈពិសេសនៃផ្ទះអាជីវកម្ម The Prestige ទាំង២ប្រភេទនេះដែរ គឺស្ថិតនៅលើផ្លូវរដ្ឋទំហំ ២០ម ដែលតភ្ជាប់ពីទីក្រុងរណបOCIC ទៅដល់គម្រោងគម្រោងអភិវឌ្ឍន៍របស់អ្នកឧកញ៉ា លី យ៉ុងផាត់ ដែររួមមានពហុកីឡាដ្ឋានជាតិ មរតក តេជោ និងវិមានឈ្នះឈ្នះ សួនសត្វសាហ្វារី និងសួនទឹកហ្គាឌិនស៊ីធី ដែលជាទីតាំងដល់ល្អបំផុតសម្រាប់ការប្រកបរបរអាជីវកម្ម និងការរស់នៅ ដោយសារស្ថិតនៅអមសងសងទន្លេសាប និងទន្លេមេគង្គផ្ទាល់តែម្តង។

កម្មវិធី មានរយះពេលបីថ្ងៃ ចាប់​ពីថ្ងៃទី ២៦-២៧ និង២៨​ ខែវិច្ឆិកា ហើយក្រុមហ៊ុនក៏មានជាការប្រ៉ូម៉ូសិនពិសេស ពុំធ្លាប់មានពីមុនមក គឺអតិថិជននឹងទទួលបានការបញ្ចុះតម្លៃរហូតដល់១២% ជាមួយនឹងការចាប់រង្វាន់ផ្សេងៗ និងឱកាសទទួលបានទឹកប្រាក់ត្រឡប់មកវិញចាប់ពី ១ពាន់ដុល្លារ រហូតដល់ ដល់ការបញ្ចុះតម្លៃ ១%បន្ថែមទៀត សរុបជាទឹកប្រាក់លោក អ្នក អាចមានឱកាសចំណេញរហូតដល់៧៨,០០០ដុល្លារភ្លាមៗ ទាំងនេះពិតជាកម្មវិធី ដែលពុំធ្លាប់មានពីមុនមករបស់ក្រុមហ៊ុនអ័រគីដេ។

ដូច្នេះកុំអោយឱកាសដ៏វិសេសវិសាលនេះ កន្លងផុតទៅអោយសោះ​ សូមប្រញ៉ាប់មកសាកសួរព័ត៌មាន និងចូលរួមកម្មវិធីរបស់យើង នៅការិយាល័យលក់ដល់មានទីតាំងនៅតាមបណ្តោយផ្លូវជាតិលេខ៦អា ពីស្ពានជ្រោយចង្វារ៧គ.ម រួចបត់ឆ្វេងតាមស្តុបអ័រគីដេ ឬទំនាក់ទំនងតាមរយះលេខទូរស័ព្ទ 093 73 3333 – 095 277 ​277 – 085 388 388 –  076 879 9999 និងគេហទំព័រហ្វេសប៊ុកផេក https://www.facebook.com/orkide.development​​

អបអរសាទរៈលោកស្រីឆាយ ស៊ីវលីនបានជាប់ជាប្រធានសមាគមទីភ្នាក់ងារទេសចរណ៍កម្ពុជាសំរាប់អាណត្តិទី៩

ដោយៈគង់ សិរីជេស៊ីកា

ភ្នំពេញៈ ប្រធានសមាគមទីភ្នាក់ងារទេសចរណ៍កម្ពុជា (CATA) លោកស្រីឆាយ ស៊ីវលីន អាណត្តិទី៨ ត្រូវបានសម្រេចតែងតាំងជាប្រធានសមាគមនេះ សម្រាប់អាណត្តិទី៩ឆ្នាំ២០២១ ដល់ឆ្នាំ២០២៤ខាងមុខ។

លោកហូ វណ្ឌី ប្រធានគណកម្មការរៀបចំ ការបោះឆ្នោតរបស់សមាគម CATA បានមានប្រសាសន៍ឲ្យដឹងតាមទូរស័ព្ទ កាលពីរាត្រីថ្ងៃទី២៥ វិច្ឆិកាកន្លងមកថា គណកម្មការរៀបចំការបោះឆ្នោតសមាគម បានសម្រេចជាឯកច្ឆ័នតែងតាំងលោកស្រីឆាយ ស៊ីវលីនជាប្រធានសមាគមនេះសម្រាប់អាណត្តិថ្មីខាងមុខនេះ។

លោកបន្តថា “ការសម្រេចជាឯកច្ឆ័ននេះ ដោយសារអ្នកឈរឈ្មោះបោះឆ្នោតម្នាក់ទៀតបានសម្រេចបោះបង់ការឈរឈ្មោះ ហេតុនេះដំណែងប្រធានជាស្វ័យប្រវត្តិបានទៅលើលោកស្រីឆាយ ស៊ីវលីន”។

លោកហូ វណ្ឌីបានបន្តថា នៅថ្ងៃទី២៦ វិច្ឆិកានេះ នឹងមានការប្រកាសពីសមាសភាព និងប្រធានសមាគមថ្មី និងពិធីសំណេះសំណាល និងផ្តល់អនុសាសន៍ណែនាំដែលធ្វើឡើងដោយលោកថោង ខុនរដ្ឋមន្រ្តីក្រសួងទេសចរណ៍ នៅសណ្ឋាគារម៉ារីយ៉ុត (លើផ្លូវត្រសក់ផ្អែម កែវផ្លូវសម្តេចប៉ាន)ដែលមានទីតាំងនៅសង្កាត់បឹងរាំង ខ័ណ្ឌដូនពេញ រាជធានីភ្នំពេញ៕

ការវិនិយោគអចលនទ្រព្យនៅកម្ពុជាភាគច្រើនធ្វើឡើងទៅតាមជំនោរទីផ្សារ?

ដោយៈវឌ្ឍនៈ

ភ្នំពេញៈ វិស័យអចលនទ្រព្យនៅក្នុងប្រទេស ក្នុងរយៈពេលប៉ុន្មានឆ្នាំចុងក្រោយនេះ ហាក់មានកំណើនឡើងខ្ពស់ បើធៀបនឹងរយៈពេលកន្លងមក ហើយក៏មានអ្នកជំនួញអ្នកវិនិយោគក្នុងស្រុកជាច្រើន បានងាកទោរកវិស័យអចលនទ្រព្យដើម្បីជារបរបន្ថែមក្នុងការរកប្រាក់ចំណេញរបស់ខ្លួន។

ប៉ុន្តែការវិនិយោគអចលនទ្រព្យនៅក្នុងប្រទេសកម្ពុជា ហាក់មិនបានផ្ដោតខ្លាំងទៅលើតម្រូវការជាមូលដ្ឋាននោះទេ ។

លោកង៉ែត ជូ អ្នកជំនាញហិរញ្ញវត្ថុនិងជាអ្នកវិនិយោគអចលនទ្រព្យមួយនៅកម្ពុជាបានមានប្រសាសន៍ នៅក្នុងកិច្ចសម្ភាសន៍កាលពីពែលថ្មីៗនេះឱ្យដឹងថា យើងឃើញមួយរយៈចុងក្រោយនេះ អ្នកចូលរួមវិនិយោគក្នុងវិស័យអចលនទ្រព្យ ពិតជាមានច្រើនមែន ប៉ុន្តែពួកគាត់ មិនបានផ្ដោតទៅលើតម្រូវការជាមូលដ្ឋានទេ គឺធ្វើឡើងទៅតាមជំនោរទីផ្សារ។

លោកបន្តថា “ការវិនិយោគដោយធ្វើឡើងតាមជំនោរទីផ្សារនេះ មានន័យថាការធ្វើឡើងដោយតាមគ្នា ដោយឃើញគេរកស៊ីយ៉ាងម៉េចបានក៏ធ្វើតាមគេដែរ ទាំងដែលខ្លួនមិនទាន់មានបទពិសោធន៍ ចំណេះដឹងទៅលើវិស័យនោះទាល់តែសោះ”។ លោកបន្តថា “មួយចំនួនធំអ្នកដែលវិនិយោគលើដីធ្លី មិនមានគោលបំណងច្បាស់លាស់នោះទេ ដោយមិនដឹងថាតើត្រូវវិនិយោគដើម្បីអ្វី  វិនិយោគទៅលើផ្នែកណាមួយជាដើម”។

លោកង៉ែត ជូឱ្យដឹងថា ការវិនិយោគនៅកម្ពុជាលើវិស័យអចលនទ្រព្យ មិនបានផ្ដោតទៅលើតម្រូវការជាក់ស្ដែង ដូចបណ្ដាប្រទេសមួយចំនួននោះទេ ដោយការវិនិយោគអចលនទ្រព្យនៅកម្ពុជានាពេលនេះ គឺអាស្រ័យលើឥរិយាបថរបស់ប្រជាពលរដ្ឋកម្ពុជា។

ចំណែកលោកសំ សុខនឿនប្រធានសមាគអចលនទ្រព្យសកលក៏បានលើកឡើងកាលពីពេលកន្លងមកថា ការអភិវឌ្ឍអចលនទ្រព្យនៅកម្ពុជា ផ្នែកខ្លះហាក់លើសពីតម្រូវការជាក់ស្ដែងទៅហើយ ដូចជាការអភិវឌ្ឍលំនៅឋានបច្ចុប្បន្ននេះ មើលទៅគឺដូចជាលើសអ្វីដែលប្រជាពលរដ្ឋមានលទ្ធភាព ក្នុងការទិញ ហើយជាក់ស្ដែងផ្ទះនៅតាមបុរីមួយចំនួនក៏មានតែផ្ទះតែមិនមានមនុស្សរស់នៅដែរ ។

កាលពីមួយរយៈមុននេះ ប្រជាពលរដ្ឋជាច្រើនបានចាប់អារម្មណ៍ លើការទិញដីឡូត៏ ដោយបង់រំលស់ជាប្រចាំខែ  ។ កាលនោះ អ្នកអភិវឌ្ឍន៍ដីឡូត៏ជាច្រើនមើលឃើញថាមានអ្នកទិញច្រើន ក៏នាំគ្នាទៅអភិវឌ្ឍន៍ជាដីឡូត៏ ទាំងអ្នកធ្វើការក្នុងវិស័យផ្សេងៗ ក៏ទៅចូលរួមក្នុងការអភិវឌ្ឍដីឡូត៏សម្រាប់លក់ដែរ៕

គម្រោងផ្លូវល្បឿនលឿនភ្នំពេញ-ព្រះសីហនុតម្លៃជិត ២០០០លានដុល្លារអាមេរិក សម្រេចបានជិត៧០ភាគរយហើយ

ដោយ: ម៉ាលីស

ភ្នំពេញៈ គិតត្រឹមសប្តាហ៍ទី៣ ខែវិច្ឆិកា ឆ្នាំ២០២១នេះ ការស្ថាបនាផ្លូវល្បឿនលឿនពីភ្នំពេញទៅក្រុងព្រះសីហនុ សម្រេចបានលទ្ធផល៦៩,៩៣ភាគរយ ដោយដំណើរការសាងសង់លឿនជាងផែនការ និងរំពឹងថា អាចនឹងចប់រួចរាល់ជាស្ថាពរនៅមុនខែកញ្ញា ឆ្នាំ២០២២។

លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និង ជាអ្នកនាំពាក្យក្រសួងសាធារណការ និងដឹកជញ្ជូនបានមានប្រសាសន៍ឲ្យដឹងងា លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនកំពុងចរចាជាមួយភាគីក្រុមហ៊ុនវិនិយោគផ្លូវនេះ ដើម្បីអនុញ្ញាតឱ្យប្រជាពលរដ្ឋ អាចធ្វើការបើកបរសាកល្បងនៅលើផ្លូវនេះ សំដៅឱ្យបានយល់ដឹងពីស្ថានភាពផ្លូវជាមុនសិន មុននឹងឈានទៅដាក់ឱ្យប្រើប្រាស់ជាផ្លូវការ ដោយការបង់ប្រាក់។

លោកបញ្ជាក់ថា “បើសិនជាការចរចាទទួលបានការឯកភាព ពីភាគីវិនិយោគចិន គឺផ្លូវនេះ នឹងអាចអនុញ្ញាតឱ្យប្រជាពលរដ្ឋ បើកបរសាកល្បងបាននៅចុងឆ្នាំ២០២២ ពោលគឺនៅពេលសំណង់ផ្លូវថ្នល់នេះរួចរាល់ជាស្ថាពរ”។

តាមរបាយការណ៍របស់ក្រុមហ៊ុនអភិវឌ្ឍន៍ ផ្លូវល្បឿនលឿនភ្នំពេញ-ព្រះសីហនុបានឱ្យដឹងថា ការស្ថាបនាផ្លូវនេះ បាននិងកំពុងក្រាល ស្រទាប់កៅស៊ូជាន់លើគេបង្អស់ហើយ ដោយការក្រាលដល់ស្រទាប់នេះ ហាក់ដូចជាផ្លូវល្បឿនលឿនភ្នំពេញ- ព្រះសីហនុ ជិតសាងសង់រួច ចេញជារូបរាង។

តាមផែនការ ផ្លូវល្បឿនលឿនពីភ្នំពេញទៅក្រុងព្រះសីហនុ នឹងចប់រួចរាល់ជាស្ថា​ពរនៅខែកញ្ញា ឆ្នាំ២០២២ បន្ទាប់ពីបើកការដ្ឋានសាងសង់ នៅថ្ងៃទី២២ ខែមីនា ឆ្នាំ២០១៩ ក្នុងទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិនពីប្រទេសចិន តាមរយៈក្រុមហ៊ុន Cambodian PPSHV Expressway Co.,Ltd ប្រមាណ២.០០០លានដុល្លារអាមេរិក និងហិរញ្ញប្បទានឥតសំណងពីរដ្ឋាភិបាលចិន ប្រមាណ១៥០លានដុល្លារ។

គម្រោងផ្លូវល្បឿនលឿននៅកម្ពុជា ជាលើកដំបូងនេះ មានប្រវែងសរុបជាង១៩០គីឡូម៉ែត្រ ចាប់ពីក្នុងសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ក្រុងព្រះសីហនុ ដោយមានទទឹងតួផ្លូវ២៤,៥ម៉ែត្រ និងក្រាលបេតុងកៅស៊ូ(AC)កម្រាស់ ១០សង់ទីម៉ែត្រ ចំណែកគន្លងផ្លូវធ្វើចរាចរចែកជា៤គន្លង (២គន្លងទៅ ២គន្លងមក) ដែលអនុញ្ញាតឱ្យយានយន្តគ្រប់ប្រភេទ អាចបើកបរ ក្នុងល្បឿនរហូតដល់១០០គីឡូម៉ែត្រ ក្នុងមួយម៉ោង និងកន្លែងខ្លះអាចបើកបរ ក្នុងល្បឿនដល់១២០គីឡូម៉ែត្រ ក្នុងមួយម៉ោង៕

តើអចលនទ្រព្យណាខ្លះដែលត្រូវជាប់ពន្ធ ណាខ្លះត្រូវបានលើកលែងពន្ធ? និងពន្ឋត្រូវបានគណនាដោយរបៀបណា?

ដោយៈ សុផារី

ភ្នំពេញៈ ពន្ធអចលនទ្រព្យ គឺជាពន្ធដែលប្រមូលចំពោះអចលនទ្រព្យ ដែលមានតម្លៃលើសពី ១០០លានរៀល និងមានទីតាំងស្ថិតនៅក្នុងភូមិសាស្ត្ររដ្ឋបាលរាជធានី និង ខេត្តនៃព្រះរាជាណាចក្រកម្ពុជា។

ពន្ធនេះជាប្រភេទពន្ធផ្ទាល់ ដែលតម្រូវឱ្យអ្នកជាប់ពន្ធដែលជាកម្មសិទ្ធករ ឬអ្នកកាន់កាប់ ឬអ្នកទទួលផលប្រយោជន៍ចុងក្រោយមកចុះបញ្ជីអចលនទ្រព្យ និងធ្វើការប្រកាសបង់ប្រាក់ពន្ធយ៉ាងយឺតបំផុត ត្រឹមថ្ងៃទី៣០ ខែកញ្ញាជារៀងរាល់ឆ្នាំ។

អចលនទ្រព្យ ដែលជាប់ពន្ធសំដៅលើអចលនទ្រព្យជា ដី (ដែលមាន ឬគ្មានអគារ), លំនៅដ្ឋាន, អគារ ឬសំណង់ផ្សេងៗដែលនៅលើដីរួមមាន សណ្ឋាគារ ផ្ទះល្វែង ការិយាល័យ ខុនដូ រោងចក្រ ឃ្លាំងទំនិញ អគារឧស្សាហកម្ម និងចំណតរថយន្ត។

ប្រភេទអចលនទ្រព្យដូចដែលបានរៀបរាប់នេះ មានតម្លៃលើសពី១០០លានរៀល ($២៥ ០០០)។ អចលនទ្រព្យទាំងនេះ ត្រូវបានចាត់ទុកជាអចលនទ្រព្យជាប់កាត្វកិច្ចបង់ពន្ធ។ យោងទៅតាមច្បាប់ស្ដីពីពន្ធចលនទ្រព្យកម្ពុជា ឆ្នាំ២០១០ មាត្រា១៣ ដោយមូលដ្ឋានគិតពន្ធ មានដូចខាងក្រោម៖

១. ពន្ធលើអចលនទ្រព្យត្រូវបានកំណត់តាមអត្រា០,១%នៃមូលដ្ឋានគិតពន្ធ។

២. មូលដ្ឋានគិតពន្ធគឺជាតម្លៃ៨០%តម្លៃអចលនទ្រព្យ ហើយដែលអនុញ្ញាតឱ្យកាត់បន្ថយនូវទឹកប្រាក់ចំនួន ១០០,០០០,០០០៛។

៣. តម្លៃអចលនទ្រព្យត្រូវកំណត់ ដោយគណៈកម្មការវាយតម្លៃអចលនទ្រព្យ ទៅតាមអាយុកាលសំណង់និងប្រភេទ នៃសំណង់ដោយយោងតាមតម្លៃទីផ្សារ។

ចំណែកប្រាក់ពន្ធលើអចលនទ្រព្យត្រូវបង់ ត្រូវបានគណនាដោយរូបមន្តដូចខាងក្រោម៖

ប្រាក់ពន្ធលើអចលនទ្រព្យត្រូវបង់ = [(តម្លៃអចលនទ្រព្យ x ៨០%) – ១០០,០០០,០០០៛] x ០,១%

ចំណែកករណីពិសេស ចំពោះការលើកលែងពន្ធ មានដូចជា អចលនទ្រព្យដែលជាកម្មសិទ្ធិរបស់ស្ថាប័នរដ្ឋ បេសកកម្មការទូត អគ្គកុងស៊ុលបរទេស អង្គការអន្តរជាតិ ទីភ្នាក់ងារសហប្រតិបត្តិការបចេ្ចកទេសបរទេស ហេដ្ឋារចនាសម្ព័ន្ធរូបវ័ន្ត អចលនទ្រព្យដែលសាងសង់លើដីធ្លីកសិកម្ម ដែលបម្រើផ្ទាល់ និងជាអចិន្ត្រៃយ៍ដល់សកម្មភាពកសិកម្មអចលនទ្រព្យរងគ្រោះដោយករណីប្រធានសក្តិ ផ្ទះ អគារ និងសំណង់ដែលកំពុងត្រូវបានសាងសង់តិចជាង៨០% និងមិនទាន់បានប្រើប្រាស់ នង អចលនទ្រព្យស្ថិតក្នុងតំបន់សេដ្ឋកិច្ចពិសេស៕