ផ្លូវក្រវាត់ក្រុងទី៣កំពុងទាក់ទាញសក្ដានុពលអភិវឌ្ឍន៍លំនៅឋានខណៈបុរីថ្មីមួយទទួលបានការចាប់អារម្មណ៍ពីអតិថិជន

ដោយៈវឌ្ឍនៈ

ភ្នំពេញៈ ក្នុងពេលផ្លូវក្រវាត់ក្រុងទី៣ កាន់តែជិតរួចរាល់និងដំណើរការប្រើប្រាស់ វិនិយោគិនជាច្រើន ក៏បានចាប់អារម្មណ៍លើការវិនិយោគ នៅតាមបណ្ដោយផ្លូវនេះលើការអភិវឌ្ឍជាលំនៅឋានផងដែរ។

ជាក់ស្ដែងនាពេលបច្ចុប្បន្នតំបន់នៅក្បែរៗផ្លូវក្រវាត់ឃើញថា មានការអភិវឌ្ឍលើគម្រោងលំនៅឋានជាច្រើន ជាពិសេសគម្រោងលំនៅឋាន ដែលមានតម្លៃខ្ពស់ៗពីអ្នកអភិវឌ្ឍន៍ក្នុងស្រុក ។

លោកប៉ូ អ៊ាវគង់ អគ្គនាយកក្រុមហ៊ុន Advance បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៧ វិច្ឆិកានេះថា គម្រោងផ្លូវក្រវាត់ក្រុងទី៣ របស់រាជរដ្ឋាភិបាលកម្ពុជា បានបង្ហាញពីសក្ដានុពលកាន់តែខ្លាំង ទៅលើការអភិវឌ្ឍលំនៅឋាន ជាក់ស្ដែងដូចយើងបានឃើញស្រាប់ហើយ នៅក្រុងតាខ្មៅ តំបន់ប៉ែកខាងត្បូង រាជធានីភ្នំពេញ មានក្រុមហ៊ុនអភិវឌ្ឍន៍លំនៅឋានជាច្រើន បានចាប់ផ្ដើមអភិវឌ្ឍន៍គម្រោងរបស់ខ្លួន ជាបន្តបន្ទាប់។

លោកបន្តថា “ការអភិវឌ្ឍលំនៅឋាន នៅតាមបណ្ដោយនៃផ្លូវក្រវាត់ក្រុងមួយនេះក៏ត្រូវបែងចែកជាលំនៅឋានដែលមានតម្លៃថ្លៃៗ ដោយភាគច្រើនគឺនៅជិតៗក្រុង ហើយលំនៅឋានតម្លៃសមរម្យភាគច្រើន នៅឆ្ងាយពីក្រុងបន្តិច ដូចជាគម្រោងលំនៅឋានរបស់អ្នកឧកញ៉ាសៀ ឬទ្ធីជាដើម”។

ចំណែកលោកស្រីអាន សុធីតា អគ្គនាយិកាក្រុមហ៊ុន PropNex Cambodia បានមានប្រសាសន៍ឱ្យដឹងផងដែរថា តំបន់ដែលមានការទាក់ទាញខ្លាំងជាងគេ ក្នុងចំណោមតំបន់តាមបណ្ដោយផ្លូវក្រវាត់ក្រុងទី៣ គឺតំបន់ជិតព្រលានយន្តហោះអន្តរជាតិភ្នំពេញថ្មី ដែលតំបន់នេះធ្វើឱ្យតម្លៃដីធ្លីហក់ឡើងខ្ពស់មែនទែន ។

លោកស្រីនិយាយថា “ពីមុនដីធ្លីនៅតំបន់នោះ មានតម្លៃត្រឹម៥០ដុល្លារទៅ៦០ដុល្លារអាមេរិកប៉ុណ្ណោះ ក្នុងមួយម៉ែត្រការ៉េ ប៉ុន្តែពេលនេះ វាមានតម្លៃរហូតដល់រាប់រយដុល្លារអាមេរិកក្នុងមួយម៉ែត្រការ៉េ”។លោកស្រីបន្តថា “តំបន់តាមបណ្ដោយផ្លូវក្រវាត់ក្រុងទី៣នេះ កំពុងមានទាក់ទាញបន្ថែមទៀត ពិសេសការអភិវឌ្ឍគម្រោងលំនៅឋាន ហើយវានឹងមានការទាក់ទាញកាន់តែខ្លាំងថែមទៀត នៅពេលអនាគតខាងមុខនេះ”។

អ្នកអភិវឌ្ឍន៍លំនៅឋានជាច្រើន នៅក្បែរគម្រោងផ្លូវក្រវាត់ក្រុងទី៣ និងព្រលានយន្តហោះអន្តរជាតិភ្នំពេញថ្មី ក៏បានលើកយកពីហេតុផលនៃការអភិវឌ្ឍផ្លូវនេះ និងព្រលានយន្តហោះជាយុទ្ធសាស្ត្រទីផ្សារ សម្រាប់ការលក់លំនៅឋានរបស់ខ្លួនដែរ ។

បើតាមលោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាកន្លងមកក៏បានលើកឡើងផងដែរ ពីការអភិវឌ្ឍហេដ្ឋារចនាសម្ព័ន្ធនានារបស់រដ្ឋាភិបាល ដែលអាចជំរុញសក្ដានុពលអភិវឌ្ឍន៍ អចលនទ្រព្យមួយកម្រិតទៀតផងដែរ ហើយវិនិយោគិនតែងតែសម្លឹង ទៅមើលលើតំបន់ណា ដែលមានការអភិវឌ្ឍហេដ្ឋារចនាសម្ព័ន្ធច្រើនក្នុងការអភិវឌ្ឍគម្រោងរបស់ខ្លួន។

បុរី GB Residence បាននិងកំពុងបង្ហាញខ្លួននៅតំបន់នេះ លើទំហំផ្ទៃដី៩ហិកតា​ជាមួយនឹងផែនការវិនិយោគរាប់លានដុល្លារ ដែលបុរីថ្មីនេះផ្តោតលើលំនៅដ្ឋានបែបអាជីវកម្ម វីឡា និងរចនាប្លង់ដោយក្រុមហ៊ុនស្ថាបត្យកម្ម ដ៏ល្បីល្បាញលំដាប់ពិភពលោកបានបង្ហាញស្នាដៃរបស់ពួកគេជាលើកដំបូងនៅបុរីនេះ។

ជាមួយគ្នានេះ អ្នកវិនិយោគបុរី GB Residence លោកឧកញ៉ាតាំង គួងហាវបានមានប្រសាសន៍ឲ្យ ដឹងកាលពីពេលថ្មីៗនេះថា ដោយសារមើលឃើញសក្តានុពលតំបន់នេះ ស្ថិតនៅជាប់នឹងផ្លូវក្រវ៉ាត់ក្រុងទី៣ និងព្រលានយន្តហោះអន្តរជាតិភ្នំពេញថ្មី និងការកើនឡើងនូវជីវភាពរបស់ប្រជាពលរដ្ឋ។ កំណើនពលរដ្ឋចូលមករស់នៅកៀកទីក្រុងកាន់ តែច្រើន ទើបលោកសម្រេចចិត្តវិនិយោគបុរីនេះឡើង ដោយផ្តោតលើគុណភាពប្រណីត ភាព និងភាពស៊ីវិល័យ។

លោកឧកញ៉ាបានបន្តថា “ជាមួយនឹងការរចនាលំនៅដ្ឋាន ដោយអ្នកជំនាញអន្តរជាតិ ដែលបានឈ្នះពានរង្វាន់នៅទីក្រុងឌូបៃ បានធ្វើឲ្យគំរោងរបស់យើង មានម៉ូតផ្ទះស្អាត ប្លែក ប្រកបដោយស៊ីវិល័យ ពិសេសផ្តល់ជូនអ្នករស់នៅប្រកបដោយផាសុខភាព”។​ លោកបន្តថា “ផ្ទះក្នុងគំរោង GB Residence មានតម្លៃចាប់ពីជាង៨ម៉ឺនដុល្លារ ដល់ជាង១០ម៉ឺនដុល្លារអាមេរិក អាស្រ័យលើប្រភេទផ្ទះ ទំហំ និងទីតាំងរបស់ផ្ទះនិមួយៗ”។

បុរី GB Residence សាងសង់លើទំហំដីជិត៩ហិកតា ជាមួយនឹងលំនៅដ្ឋានសរុប៥៨៨ផ្ទះ ពិសេសក្នុងគំរោងនេះមានផ្សារទំនើប ហាងកាហ្វេ ភោជនីយដ្ឋាន ក្លឹបហាត់ប្រាណ ពិសេសផ្លូវចូលបុរីទំហំ៥០ម៉ែត្រ ជាមួយនឹងសួនច្បារនៅចំកណ្តាល ដែលសម្រួលដល់ការធ្វើដំណើររបស់ប្រជាពលរដ្ឋ និងអ្នករស់នៅតំបន់នេះ៕

ខេត្តមួយក្នុងភូមិភាគឦសានកំពុងទាក់ទាញវិនិយោគិនទៅវិនិយោគយ៉ាងច្រើនសន្ធឹកសន្ធាប់

ដោយ: សុផារី

មណ្ឌលគីរី៖ អ្នកវិនិយោគបរទេសកំពុងចំណាប់អារម្មណ៍មកស្វែងរកឱកាសវិនិយោគនៅតំបន់ភូមិភាគឦសាន ជាពិសេសខេត្តមណ្ឌលគិរី ដោយសារខេត្តនេះមានសម្រស់ធម្មជាតិស្រស់ស្អាត និងការរីកចម្រើនផ្នែកហេដ្ឋារចនាសម្ព័ន្ធ។

លោកច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានលើកឡើងពីសក្តានុពលនៃខេត្តមណ្ឌលគិរីថា ខេត្តមណ្ឌលគិរីគឺជាកន្លែងសម្រាកលំហែកាយដល់នៅអាកាសធាតុដែលល្អបរិសុទ្ធ តាមរយៈគោលនយោបាយរបស់រាជរដ្ឋាភិបាលកម្ពុជា បានធ្វើការភិវឌ្ឍន៍ខេត្តមណ្ឌលគិរី ក្នុងយន្តការពីរសំខាន់ គឺ យន្តការការអភិវឌ្ឍន៍ខ្លួនឯងនៅក្នុងថ្នាក់ខេត្ត និង យន្តការអភិវឌ្ឍដោយរាជរដ្ឋាភិបាល។

លោកមានប្រសាសន៍ថា តាមរយៈការសិក្សាចំនួនបន្ទប់ក្នុងខេត្តមណ្ឌលគិរីមានការសាងសង់ប្រហែល១,៥០០បន្ទប់ ដែលភាគច្រើនក្នុងចំណោមចំនួនខាងលើត្រូវបានកក់ជារៀងរាល់សៅរ៍អាទិត្យដោយពុំមានចន្លោះនៅទំនេរឡើយ។

លោកច្រឹក សុខនីម ក៏បានអះអាងពីសុទិដ្ឋិនិយមរបស់អ្នកវិនិយោគិនក្នុងតំបន់អាស៊ានដែលមានគោលបំណងចង់មកសិក្សាដោយផ្ទាល់ឬប្រយោលនៅក្នុងប្រទេសកម្ពុជាជាពិសេសនៅក្នុងភូមិភាគឥសាន្ត ពួកគាត់ក៏អាចសម្លឹងមើលឱកាសនៃការវិនិយោគផងដែរ។

អ្នកជំនាញអចលនទ្រព្យរូបនេះបានណែនាំថា “វិនិយោគិនអាចចាប់ផ្ដើមបន្តិចម្ដងៗ ហើយនៅក្នុងពេលអនាគត វិនិយោគទៅលើវិស័យដីធ្លីនឹងទទួលបានប្រាក់ចំណេញខ្ពស់។” លោកបន្តថា “យើងទិញដីនៅក្នុងពេលឥឡូវនេះ ធូរថ្លៃ ១០ទៅ១៥ ឆ្នាំក្រោយគោលនយោបាយនៃយន្តការអភិវឌ្ឍទេសចរណ៍មកដល់ ដូច្នេះគាត់ចំណេញទាំងនេះអចលនទ្រព្យ៕”

តំណាងគម្រោងមណ្ឌលដួងចិត្ត Eco Resort &Villas លោក អុិន ស៊ីថា បានមានប្រសាសន៍លើកឡើងពីសក្តានុពលរបស់ខេត្តមណ្ឌលគីរីថា “យើងមើលឃើញនូវសក្កានុពលទេសចរណ៍ ដែលបច្ចុប្បន្ននេះទេសចរណ៍ថ្នាក់ជាតិតែងតែមានលំហូរពីរាជធានីភ្នំពេញនិងបណ្ដាខេត្តមួយចំនួនមកភូមិភាគឦសាន ជាពិសេសខេត្តមណ្ឌលគិរី។”

លោកបានបញ្ជាក់ពីការអភិវឌ្ឍនូវបណ្ដាញផ្លូវថ្នល់ ដែលសម្រួលនិងផ្តល់ភាពងាយស្រួលដល់ការធ្វើដំណើរពីរាជធានីភ្នំពេញនិងបណ្ដាខេត្តផ្សេងមកកាន់ខេត្តមណ្ឌលគិរី ហើយគម្រោងអភិវឌ្ឍន៍នៅក្នុងខេត្តមណ្ឌលគិរីមានលក្ខណៈជាការអភិវឌ្ឍដោយវិនិយោគិនហើយជួលបន្តដូចជាផ្ទះសំណាក់ សណ្ឋាគារឬ បូទិចអូតែល។

លោកបានមានប្រសាសន៍ថា “ទៅថ្ងៃខាងមុខខ្ញុំជឿជាក់ថាមានក្រុមហ៊ុនវិនិយោគអាចថាជាតិ អន្តរជាតិជាច្រើននឹងមកបោះទុនវិនិយោគនៅភូមិភាគឦសាននេះ”៕

ក្រុមហ៊ុន ខេអេច លែន ចុះកិច្ចព្រមព្រៀង ស្តីពីការផ្គត់ផ្គង់អគ្គិសនីដល់អតិថិជនលើគម្រោង ក្រុងថ្មីដីមាសសំរោងលើ នឹងរួចរាល់នាដើមខែក្រោយនេះ

ដោយៈសហការី

កណ្តាល៖ នៅថ្ងៃទី១០ ខែវិច្ឆិកា ឆ្នាំ២០២១នេះ ក្រុមហ៊ុន ខេអេច លែន បានចុះកិច្ចព្រមព្រៀងមួយ ស្តីអំពីការផ្គត់ផ្គង់អគ្គីសនីសម្រាប់គម្រោងក្រុងថ្មីដីមាសសំរោងលើ ស្ថិតនៅស្រុកអង្គស្នួល ខេត្តកណ្តាល ឲ្យបានរួចរាល់ជាស្ថាពរនាដើមខែធ្នូ ឆ្នាំ២០២១ខាងមុខនេះ ដើម្បីផ្តល់ភាពងាយស្រួលជូនដល់អតិថិជន ដែលបានទិញ និងមានបំណងចង់ទិញដីឡូតិ៍ពីក្រុមហ៊ុនផ្ទាល់។

ក្រុមហ៊ុន ខេអេច លែន ដែលជាក្រុមហ៊ុនវិនិយោគ និងអភិវឌ្ឍន៍លើគម្រោងក្រុងថ្មីដីមាសសំរោងលើ ដែលមានទីតាំងស្ថិតនៅស្រុកអង្គស្នួល ខេត្តកណ្តាល តាមបណ្តោយផ្លូវជាតិលេខ៥១ លើផ្ទៃដីសរុបប្រមាណ៥០ហិកតា និងជាគម្រោងទី៦របស់ខ្លួនផងដែរ ក្រោយពីទទួលបានជោគជ័យ និងមានការគាំទ្រយ៉ាងខ្លាំងពីអតិថិជន។

ដើម្បីឆ្លើយតបតាមតម្រូវការរបស់អតិថិជន ដែលបានវិនិយោគលើដីឡូតិ៏ និងលំនៅដ្ឋាននៅគម្រោង ក្រុងថ្មីដីមាសំរោងលើ ក្នុងទឹកដីខេត្តកណ្តាលនេះ ក្រុមហ៊ុនបានរៀបចំហេដ្ឋារចនាសម្ព័ន្ធជាច្រើនដែលរួមមានដូចជា៖ ផ្លូវបេតុងខ្វាត់ខ្វែងក្នុងគម្រោង ប្រព័ន្ធទឹកស្អាត និងប្រព័ន្ធអគ្គីសនីជាដើម។

គួរបញ្ជាក់ផងដែរថា អតិថិជនដែលបានវិនិយោគលើដីឡូតិ៍ និងលំនៅដ្ឋាននៅគម្រោងក្រុងថ្មីដីមាសសំរោងលើ នៅស្រុកអង្គស្នួល ខេត្តកណ្តាល នឹងទទួលបានការផ្គត់ផ្គង់អគ្គីសនី ពីអគ្គីសនីកម្ពុជា (EDC) ដោយផ្ទាល់តែម្តង៕

រដ្ឋាភិបាលចិនរឹបអូសឡាយឡុងកីឡដ្ឋានបាល់ទាត់តម្លៃរាប់ពាន់លានដុល្លាររបស់ក្រុមហ៊ុនអភិវឌ្ឍន៍ Evergrande

ដោយៈសុខុម

ហុងកុង: រដ្ឋាភិបាលប្រទេសចិន បានរឹបអូសកីឡដ្ឋានបាល់ទាត់របស់ក្រុមហ៊ុនអភិវឌ្ឍន៍អចលនទ្រព្យ China Evergrande Group យកមកលក់ឡាយឡុង ខណៈក្រុមហ៊ុននេះកំពុងដុនដាបខ្លាំង និងខ្វែងដៃខ្វែងជើងរកលុយមកសងបំណុលរុំកោះរបស់ខ្លួន។ នេះបើយោងតាមសារព័ត៌មាន CNA ចុះផ្សាយកាលពីថ្ងៃសុក្រ ទី២៦ វិច្ឆិកា។

ប្រភពច្បាស់ការណ៍ ដែលសុំមិនបញ្ចេញអត្តសញ្ញាណ បានទម្លាយប្រាប់ទីភ្នាក់ងារព័ត៌មាន Reuters ថា ក្រុមហ៊ុន Evergrande ដែលជំពាក់បំណុលរុំកោះ រហូតដល់ទៅជាង៣០០ពាន់លានដុល្លារអាមេរិក ក៏កំពុងពិចារណាលក់ក្លឹបបាល់ទាត់ Guangzhou Football Club របស់ខ្លួនផងដែរ។

ដំណើរការសាងសង់កីឡដ្ឋានបាល់ទាត់ Guangzhou Evergrande Football Stadium ដែលតាមការអះអាងថាធំជាងគេបំផុតក្នុងពិភពលោក ជាមួយនឹងទុនវិនិយោគរហូតដល់ទៅ១២ពាន់លានយ័ន (១,៨៦ពាន់លានដុល្លារអាមេរិក) នេះបានចាប់ផ្តើមក្នុងខែមេសា ឆ្នាំ២០២០ ហើយគ្រោងបញ្ចប់ជាស្ថាពរនៅត្រឹមដំណាច់ឆ្នាំ២០២២។

ទោះជាយ៉ាងណា ក្រុមហ៊ុន Evergrande បានផ្អាកការសាងសង់កណ្ដាលទីដោយ​សារខ្វះដើមទុន ហើយការគ្រប់គ្រងលើកីឡដ្ឋាននេះ ក៏ត្រូវធ្លាក់ទៅលើអាជ្ញាធរដែលគ្រោងលក់វាឡាយឡុង។

ទន្ទឹមនេះ ប្រភពមួយផ្សេងទៀតបានទម្លាយឱ្យដឹងដែរថា ការសាងសង់កីឡដ្ឋាននេះផ្អាកយ៉ាងហោចណាស់៣ខែមកហើយ។

ទោះជាយ៉ាងណា ក្រុមហ៊ុន Evergrande បានបដិសេធមិនធ្វើអត្ថាធិប្បាយឡើយជុំវិញរឿងនេះ។ កាលពីខែកញ្ញា ក្រុមហ៊ុននេះបានអះអាងថា ការងារសាងសង់កីឡដ្ឋាននេះកំពុងដំណើរការ “ជាធម្មតា”។

Evergrande ធ្លាប់ជាក្រុមហ៊ុនអភិវឌ្ឍន៍អចលនទ្រព្យ ដែលលក់ដាច់ជាងគេបំផុតរបស់ប្រទេសចិន ប៉ុន្តែឥឡូវនេះកំពុងតែដុនដាបខ្លាំង ក្នុងការរកលុយសងម្ចាស់បំណុល និងក្រុមហ៊ុនផ្គត់ផ្គង់។ ប្រភពដែលដឹងរឿងនេះ បានទម្លាយប្រាប់ទីភ្នាក់ងារព័ត៌មាន Reuters ថា រដ្ឋាភិបាលថ្នាក់តំបន់ទូទាំងប្រទេសចិន កំពុងរ៉ាប់រងមើលការខុសត្រូវលើការលក់ទ្រព្យសកម្មមួយចំនួនរបស់ក្រុមហ៊ុននេះដើម្បីដោះបំណុល៕ Reuters៕

សឹង្ហបុរីអនុញ្ញាតការធ្វើដំណើរមកពីប្រទេសកម្ពុជា ថៃ ហ្វីជី ស្រីលង្កា ម៉ាល់ឌីវ និងតួកគី សម្រាប់អ្នកចាក់វ៉ាក់សាំងរួចរាល់

ដោយ: សុផារី

សឹង្ហបុរីៈ អាជ្ញាធរអាកាសចរណ៍ស៊ីវិលសិង្ហបុរី (CAAS) នៅថ្ងៃសុក្រនេះបានប្រកាសថា ប្រទេសសិង្ហបុរីនឹងពង្រីកមធ្យោបាយធ្វើដំណើរ ចំពោះអ្នកដែលបានទទួលការចាក់វ៉ាក់សាំងបង្ការជំងឺ COVID-19 រួចរាល់ហើយ (VLT) មកពីប្រទេសចំនួន ៦ បន្ថែមទៀតនៅខែធ្នូខាងមុខ។ នេះបើតាមការចេញផ្សាយដោយ សារព័ត៌មាន CNA នៅល្ងាចថ្ងៃសុក្រ ទី២៦ ខែវិច្ឆិកា ឆ្នាំ២០២១។

ចាប់ពីថ្ងៃទី១៤ ខែធ្នូខាងមុខនេះ អ្នកដំណើរដែលបានទទួលការចាក់ វ៉ាក់សាំងបង្ការ COVID-19 រួចរាល់ហើយមកពីប្រទេសថៃ នឹងអាចចូលមកកាន់ប្រទេសសិង្ហបុរីបាន ដោយមិនចាំបាច់ឆ្លងកាត់ការធ្វើចត្តាឡីស័កឡើយ ខណៈលក្ខខណ្ឌដូចគ្នានេះ ក៏នឹងត្រូវអនុវត្តផងដែរ ចំពោះអ្នកដំណើរមកពីប្រទេសកម្ពុជា ហ៊្វីជី ម៉ាល់ឌីវ ស្រីលង្កា និងតួកគី នឹងអាចធ្វើដូច្នេះបានចាប់ពីថ្ងៃទី១៦ ខែធ្នូខាងមុខនេះ។

ការពង្រីកបន្ថែមចុងក្រោយនេះ នឹងបង្កើនចំនួនប្រទេសរហូតដល់២៧ ដែលរដ្ឋាភិបាលសិង្ហបុរីអនុញ្ញាត ឱ្យចូលមកកាន់ប្រទេសរបស់ខ្លួន ដោយមិនចាំបាច់តម្រូវឱ្យធ្វើចត្តាឡីស័ក ចំពោះអ្នកដែលបានទទួលការចាក់វ៉ាក់សាំងរួចរាល់ហើយ ខណៈអ្នកចូលមកកាន់ទឹកដីសិង្ហបុរី គឺត្រូវតែទទួលការធ្វើតេស្តរកកូវីដ-១៩ ទាំងមុនពេលចេញដំណើរពីប្រទេសរបស់ពួកគេ និងពេលមកដល់ទឹកដីសិង្ហបុរី៕

ស្វែងយល់ពីការតភា្ជប់គ្នានៃលំហស្ថាបត្យកម្ម តើវាមានសារៈសំខាន់បែបណា?

ដោយៈជេស៊ីកា

ភ្នំពេញៈ សា្ថបត្យកម្ម គឺជាបណ្តុំគ្នានៃលំហជាច្រើន ដែលតភ្ជាប់គ្នាតាមសិល្ប៏វិធីរបស់អ្នកសិក្សាគំរោង។ ការតភ្ជាប់គ្នាតាមវិធីសាស្ត្រ និងមានភាពរលូន បង្កើតបានជារបាយនៃលំហ ដែលមានមុខងារទៅតាមលក្ខខណ្ឌរបស់វា ហើយលំហទាំងនោះនឹងក្លាយជា៖

• ទិដ្ឋភាព
• សោភណ្ឌភាព
• ការបង្កើតគំនិតបង្កប់នៅក្នុងការរៀបចំ (Concept) ដែលអាចហៅបានថារចនាបថស្ថាបត្យកម្ម។
រចនាបថនេះ មិនសំដៅសំខាន់ទៅលើការ ការតុបតែងលំអស្ថាបត្យកម្ម ដូចជា បង្អួច ទ្វារ និង គ្រឿងលំអផ្សេងៗ ទៀតនោះទេ ប៉ុន្តែកត្តាសំខាន់ទីមួយ គឺគំនិតបង្កើតឡើងដែលមានការរៀបចំ ផ្សំផ្គុំលំហនានាបញ្ចូលគ្នា ហើយលក្ខណះបែបនេះអាចធ្វើការបកស្រាយបានដោយអ្នកឯកទេសស្ថាបត្យកម្មតែមួយគត់។

ការតភ្ជាប់គ្នានៃលំហមានច្រើនសណ្ឋាន ដែលរួមមានទិដ្ឋភាពសំខាន់ៗដូចជា
• លំហក្នុងលំហៈ ជាការតភ្ជាប់គ្នាដោយលំហធំក្តោបលំហតូច មានពេលខ្លះលំហតូចក៏អាចក្តោបលំហធំបានដែរ។
• ការស្រេះចូលគ្នាៈជាការរលាយចូលគ្នានៃលំហពីរ ដែលមានផ្ទៃភាគខ្លះត្រួតស៊ីគ្នា បង្កើតបានជាលំហរួមមួយ។

• លំហភ្ជាប់គ្នាៈ ជាទូទៅយើងជួបប្រទះលំហ ប្រភេទនេះ ដោយសារតែភាពងាយស្រួលនៅក្នុងការមើលឃើញ ហើយបានកំណត់ នូវរូបរាងរបស់លំហទាំងនេះ និងមានតម្រូវការជាក់លាក់។

• លំហតភ្ជាប់គ្នាដោយលំហមួយៈ ជាការតភ្ជាប់គ្នាររវាងលំហ ពីរដែលនៅដាច់ពីគ្នា អោយមើលឃើញលំហ នោះកាន់តែមានភាពធំទូលាយឡើង៕

ដំណឹងល្អៈ អាជ្ញាធរកម្ពុជា ថៃត្រៀមបើកច្រកព្រំដែនឡើងវិញឆាប់ៗនេះ

ដោយៈគង់ សូរិយា

ភ្នំពេញៈ អាជ្ញាធរកម្ពុជា និងភាគីថៃ កាលពីថ្ងៃទី២៥ ខែវិច្ឆិកា កន្លងមកនេះ បានប្រជុំពិភាក្សាត្រៀមបើកច្រកព្រំដែនអន្តរជាតិ និងច្រកតំបន់តាមបណ្តោយព្រំដែននានា នាពេលឆាប់ៗខាងមុខនេះ។

កិច្ចប្រជុំនេះ ចូលរួមដោយអភិបាលខេត្តបន្ទាយមានជ័យ លោកអ៊ុំ រាត្រី អភិបាលខេត្តបាត់ដំបង លោកសុខ លូ និងអភិបាលខេត្តស្រះកែវ នៃប្រទេសថៃឯកឧត្តម បរិនបញ្ញា ភោធិសាធ។

ភាគីទាំង២ មិនទាន់បញ្ជាក់ពីកាលបរិច្ឆេទ បើកច្បាស់លាស់នោះទេ តែបញ្ជាក់ថាច្រកដែលនឹងត្រូវបើករួមមាន ច្រកទ្វារអន្តរជាតិប៉ោយប៉ែត ច្រកម៉ាឡៃ និងច្រកបឹងត្រកួន ដែលស្ថិតក្នុងខេត្តបន្ទាយមានជ័យ ក៏ដូចជា ច្រកទ្វារអន្តរជាតិគីឡូ១៣ នៅស្រុកសំពៅលូន ដែលស្ថិតក្នុងខេត្តបាត់ដំបងផងដែរ។

លើសពីនេះ ភាគីកម្ពុជាក៏បានស្នើសុំឱ្យពលរដ្ឋចេញ-ចូលទៅធ្វើការ ព្រឹកវិលល្ងាច១ថ្ងៃ ៣០០០នាក់ និងអ្នកអូសរទេះ១ថ្ងៃ ៣០០ជើង តែត្រូវអនុវត្តតាមវិធានសុខាភិបាល។ សម្រាប់ពលករដែលមានប័ណ្ណឆ្លងព្រំដែន អាចចូលបាន៣ខែ សម្រាប់ការកសិកម្មតាមបន្ទាត់ព្រំដែន។

អាជ្ញាធរខត្តជាប់ព្រំដែនកម្ពុជារបស់ប្រទេសថៃ បានទទួលយកសំណើ ដើម្បីទៅរាយការណ៍ជូនរដ្ឋាភិបាលខ្លួន មុនចេញជាគោលការណ៍ឯកភាព៕

សមាគមអ្នកអភិវឌ្ឍន៍លំនៅឋានកម្ពុជាពិភាក្សាការងារជាមួយរដ្ឋាករទឹកស្វយ័តដើម្បីស្វែងរកដំណោះស្រាយបញ្ហាទឹកស្អាត

ដោយៈសុផារី

ភ្នំពេញៈ អ្នកឧកញ៉ាលី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា បានដឹកនាំសមាជិក-សមាជិកា រៀបចំប្រជុំសំណេះសំណាល និងពិភាក្សាការងារជាមួយរដ្ឋាករទឹកស្វយ័តរាជធានីភ្នំពេញ ដឹកនាំដោយលោក ឡុង ណារ៉ូ អគ្គនាយករដ្ឋាករទឹកស្វយ័តរាជធានីភ្នំពេញ នៅព្រឹកថ្ងៃទី២៦ ខែវិច្ឆិកា ឆ្នាំ២០២១នេះ។

កិច្ចប្រជុំនេះ ត្រូវបានរៀបចំតាមរយៈប្រព័ន្ធអនឡាញ (Zoom) ដែលមានក្រុមហ៊ុន​អភិវឌ្ឍលំនៅឋាន ជាសមាជិករបស់សមាគមជាង៥០ក្រុមហ៊ុន និងមន្ដ្រីជំនាញបច្ចេ​កទេសរបស់រដ្ឋាករទឹកស្វយ័តក្រុងភ្នំពេញ។

អង្គប្រជុំបានពិភាក្សាស្វែងយល់លម្អិតពីបញ្ហាប្រឈមនានា និងបានរកដំណោះស្រាយរួមគ្នា ដើម្បីបន្ដជំរុញដំណើរការអភិវឌ្ឍន៍វិស័យសំណង់ បុរី លំនៅឋាន និងខុនដូ ដែលមានកំណើនតម្រូវការខ្ពស់ លើការប្រើប្រាស់បណ្ដាញទឹកស្អាតពេលបច្ចុប្បន្ន។

ជាលទ្ធផលអង្គប្រជុំបានសម្រេច លទ្ធផលចំនួន៣ចំណុចដូចជា ទី១ រដ្ឋាករទឹកស្វយ័តក្រុងភ្នំពេញ បានធ្វើបទបង្ហាញស្ដីពី “ស្ថានភាពផ្គត់ផ្គង់ទឹកបច្ចុប្បន្ន និងផែនការអភិវឌ្ឍបណ្ដាញទឹកស្អាតដល់ឆ្នាំ២០៣២”។ ទី២ សមាគមអ្នកអភិវឌ្ឍន៍លំនៅឋានកម្ពុជា និងរដ្ឋាករទឹកស្វយ័តក្រុងភ្នំពេញ បានឯកភាពបង្កើតយន្ដការកិច្ចសហប្រតិបត្តិការយ៉ាងជិតស្និទ្ធរវាងវិស័យឯកជន និងស្ថាប័នរដ្ឋ ក្នុងការបន្ដលើកកម្ពស់ខ្ពស់ការផ្គត់ផ្គង់សេវាទឹកស្អាតតាមបណ្ដាលគម្រោងអភិវឌ្ឍន៍សំណង់នីមួយៗ។

ទី៣ ការបង្ហាញពីបញ្ហាប្រឈមនានារបស់គម្រោងអភិវឌ្ឍន៍សំណង់ តាមបណ្ដាលជាយក្រុងភ្នំពេញ ដោយរៀបចំសិក្សាបន្ថែមពន្លឿនយន្ដការដោះស្រាយ ប្រកបដោយប្រសិទ្ធភាពខ្ពស់ផងដែរ៕

ប្រធាន CVEA ឆ្នាំ២០២២ វិស័យអចលនទ្រព្យនឹងមានវឌ្ឍនភាពល្អប្រសើរជាពិសេសដីធ្លីនិងសំណង់

ដោយៈវឌ្ឍនៈ

ភ្នំពេញៈ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោកច្រឹក សុខនីម បានមានប្រសាសន៍ក្រោយសមាជលើកទី២៣ កាលពីពេលថ្មីៗនេះឱ្យដឹងថា ចាប់ពីឆ្នាំ២០២ខាងមុខ វិស័យអចលនទ្រព្យកម្ពុជានឹងកាន់តែប្រសើរឡើង ជាពិសេសផ្នែកដីធ្លី និងសំណង់។

លោកអះអាងបែបនេះ ដោយសារលោកមើលឃើញថា វិស័យទេសចេណ៍នឹងទទួលបានការគាំទ្រយ៉ាងខ្លាំងពីសំណាក់ភ្ញៀវជាតិ និងអន្តរជាតិ ក្នុងបណ្តាប្រទេសជាសមាជិកអាស៊ាន ។

លោកបន្តថា លោកមើលឃើញថាសក្កានុពល នៃការវិនិយោគនៅក្នុងវិស័យអចលនទ្រព្យនៅកម្ពុជា បើធៀបនឹងបណ្តាប្រទេស នៃតំបន់អាស៊ានប្រទេសកម្ពុជា នៅតែមានឱកាសទទួលបានប្រាក់ចំណេញខ្ពស់ ព្រោះថាតម្លៃអចលនទ្រព្យនៅរាជធានីភ្នំពេញ និងនៅតាមបណ្តាខេត្ត បើធៀបនឹងប្រទេសផ្សេងៗទៀត គឺនៅតម្រិតធូរថ្លៃល្អ ជាក់ស្តែង ១ម៉ែត្រការ៉េនៅក្នុងព្រះរាជាណាចក្រកម្ពុជាយើង នៅកណ្តាលទីក្រុងភាគច្រើនតម្លៃ៥ពាន់ដុល្លារទៅ ៨ពាន់ដុល្លារអាមេរិកក្នុងមួយម៉ែត្រ ប៉ុន្តែបើនៅហាណូយ ឬបាងកក ភាគច្រើនមានតម្លៃជាង១ម៉ឺនដុល្លារអាមេរិករួចទៅហើយ។

លោកបន្តថា “បើសិនជាតម្លៃទាំងអស់នេះ នឹងកើនឡើងនៅកម្ពុជាយើង ដូច្នេះវិស័យអចលនទ្រព្យមានឱកាសចំណេញខ្ពស់នាថ្ងៃអនាគត”។

លោកច្រឹក សុខនីមបានបន្ថែមថា វិនិយោគិនមួយចំនួន ដែលចូលរួមក្នុងសមាជលើកទី២៣ ក្រោមប្រធានបទ ការវាយតម្លៃអចលនវត្ថុ ក្នុងអំឡុងនៃការរីករាលដាលជំងឺកូវីដ-១៩ របស់សមាគមអ្នកវាយតម្លៃអចលនវត្ថុអាស៊ាន មានចំណាប់អារម្មណ៍ទៅលើវិស័យអចលនទ្រព្យនៅកម្ពុជា។ លោកថា វិស័យអចលនទ្រព្យគឺជាគន្លឹះដ៏សំខាន់ ដើម្បីអាចឲ្យបណ្តាប្រទេសសមាជិកទាំងអស់ ទទួលបាននូវការគាំទ្រ ពិសេសពង្រីកសក្តានុពលក្នុងការវិនិយោគវិស័យនេះ។

អ្នកជំនាញនៃវិស័យអចលនវត្ថុកម្ពុជា ជាច្រើននាក់ក៏បានបង្ហាញពីសុទិដ្ឋិនិយមចំពោះការវិលត្រលប់របស់វិនិយោគិនបរទេស មកកាន់ទឹកដីប្រទេសកម្ពុជា ស្វែងរកការវិនិយោគឡើងវិញ បន្ទាប់ពីរាជរដ្ឋាភិបាលបានសម្រេច បើកប្រទេសបើកសេដ្ឋកិច្ចរបស់ខ្លួនឡើងវិញចាប់ពីដើមខែវិច្ឆិកា២០២១កន្លងទៅនេះ៕

ខេត្តសៀមរាប ត្រៀមរៀបចំព្រឹត្តិការណ៍ចំនួន៣ នៅចុងឆ្នាំ២០២១ដើម្បីជំរុញកំណើនភ្ញៀវទេសចរ

ដោយ: ម៉ាលីស

សៀមរាបៈ ខេត្តសៀមរាប នៅចុងឆ្នាំ២០២១នេះ ក៏បានត្រៀមរៀបចំព្រឹត្តិការណ៍ចំនួន៣ ដើម្បីជំរុញទេសចរផ្ទៃក្នុង ហើយក៏ជាសញ្ញាបង្ហាញផងដែរថា ខេត្តទេសចរណ៍ដ៏ធំរបស់កម្ពុជាមួយនេះ បានត្រៀមខ្លួនរួចរាល់ ក្នុងការទទួលស្វាគមន៍ដំណើរទស្សនកិច្ចរបស់ភ្ញៀវជាតិ និងអន្តរជាតិផងដែរ។

លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបកាលពីថ្ងៃទី២៦ វិច្ឆិកាកន្លងមកនេះបានឲ្យដឹងថា ព្រឹត្តិការណ៍ចំនួន៣ ដែលខេត្តសៀមរាប នឹងរៀបចំនៅក្នុងខែធ្នូខាងមុខនេះ រួមមាន ព្រឹត្តិការណ៍អបអរទីក្រុងសៀមរាប ជាទីក្រុងវប្បធម៌អាស៊ានព្រឹត្តិការណ៍ប្រកួតវាយកូនហ្គោល សៀមរាបថ្មី២០២១ និងព្រឹត្តិការណ៍រត់ប្រណាំងអន្តរជាតិពាក់កណ្ដាលម៉ារ៉ាតុងលើកទី២៦។

លោកប្រធានមន្ទីរបន្ថែមថា តាមការណែនាំរបស់លោក ទៀ សីហា អភិបាលខេត្តសៀមរាប បានជំរុញ និងលើកទឹកចិត្តដល់បណ្ដាមន្ទីរ អង្គភាព និងក្រុមហ៊ុនឯកជន ចូលរួមបង្កើតព្រឹត្តិការណ៍នានា ដើម្បីទាក់ទាញចំណាប់អារម្មណ៍ភ្ញៀវទេសចរ។ បន្ថែមពីលើ ការរៀបចំព្រឹត្តិការណ៍ក្នុងប្រទេស លោកបានបញ្ជាក់ផងដែរថា ភ្នាក់ងារទេសចរណ៍ជិត ៣០០ក្រុមហ៊ុន ក្នុងខេត្តសៀមរាប បាននឹងកំពុងទាក់ទងជាមួយដៃគូ របស់ពួកគេនៅបរទេស ដើម្បីផ្សព្វផ្សាយពីកញ្ចប់ទេសចរណ៍ ក៏ដូចជាសិក្សាពីព័ត៌មានលម្អិតផ្សេងៗជុំវិញវិធានសុខាភិបាលចំពោះភ្ញៀវអន្តរជាតិ ដែលទទួលបានវ៉ាក់សាំងពេញលេញ។

ប៉ុន្តែ ការរៀបចំដំណើរទស្សនកិច្ច សម្រាប់ភ្ញៀវអន្តរជាតិមកកម្ពុជា ត្រូវការកិច្ចសហការទៅវិញទៅមកទាំងក្នុង និងក្រៅប្រទេស ព្រមទាំងត្រូវការពេលវេលាច្រើន។

ទោះបីការរង់ចាំភ្ញៀវទេសចរ ពីក្រៅប្រទេសនៅមានឧបស័គ្គខ្លះៗ ប៉ុន្តែលោកប្រធានមន្ទីរទេសចរណ៍ខេត្ត នៅតែបង្ហាញគំនិតវិជ្ជមានថា ទេសចរផ្ទៃក្នុង គឺជាផ្នែកមួយដ៏សំខាន់ ក្នុងការលើកកម្ពស់ចលនាទេសចរណ៍ក្នុងស្រុក ឱ្យមានសកម្មភាពឡើងវិញ។ ក្នុងនោះ ជនបរទេស ដែលកំពុងស្នាក់នៅក្នុងប្រទេសកម្ពុជា មានប្រមាណ២០ម៉ឺននាក់ ក៏នឹងរួមចំណែកជួយជំរុញទេសចរណ៍ក្នុងស្រុកផងដែរ។

ជាក់ស្ដែង នៅក្នុងថ្ងៃឈប់សម្រាកនៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែអកអំបុកកន្លងទៅនេះ ខេត្តសៀមរាបទទួលបានភ្ញៀវទេសចរប្រមា ១៤ម៉ឺននាក់ ដែលជួយឱ្យសេវាកម្មទេសចរណ៍មួយចំនួន ក្នុងខេត្តបានបើកដំណើរការឡើងវិញ៕