ដោយៈគង់ ម៉ាលីន

ភ្នំពេញៈ ប្រធានសភាពាណិជ្ជកម្មកម្ពុជា អ្នកឧកញ៉ាគិត ម៉េងបានសម្តែងការគាំទ្រដល់ច្បាប់ស្តីពីការការពារសិទ្ឋអ្នកប្រើប្រាស់ និងការពារដល់ធុរជនក្នុងប្រទេសកម្ពុជា។

អ្នកឧកញ៉ាគិត ម៉េង បានមានប្រសាសន៍បែបនេះ ក្នុងឱកាសអញ្ជើញចូលរួមសិក្ខាសាលាថ្នាក់ជាតិស្តីពី ការផ្សព្វផ្សាយច្បាប់ស្តីពីកិច្ចការពារអ្នកប្រើប្រាស់ កាលពីព្រឹកថ្ងៃទី២៣ កញ្ញាកន្លងមកនេះ។

អ្នកឧកញ៉ាបានបញ្ជាក់ថា “ច្បាប់នេះនឹងជួយបញ្ជ្រាបការយល់ដឹង និងការពារដល់ធុរជន អ្នកប្រើប្រាស់ ក្នុងប្រទេសកម្ពុជា កំឡុងពេលដែលប្រទេសកម្ពុជា នឹងធ្វើជាប្រធានអាស៊ាននៅឆ្នាំក្រោយ ជារឿងមួយដែលធ្វើអោយប្រទេសកម្ពុជា និងប្រទេសជាសមាជិកអាស៊ាន និងសកលលោក នឹងមានការទំនាក់ទំនងគ្នា បង្កើនការទាក់ទាញអ្នកវិនិយោគ ធុរជនជាតិ-អន្តរជាតិ មកធ្វើធុរកិច្ច និងវិនិយោគក្នុងប្រទេសកម្ពុជា”។

ជាមួយគ្នានេះ លោក Frank Jattke ប្រធានក្រុមការងារអាស៊ាន នៃទីភ្នាក់ងារកិច្ចសហប្រតិបត្តិការអាល្លឺម៉ង់ (GIZ) ប្រចាំកម្ពុជា បានលើកឡើងថា ការធ្វើធុរកិច្ចប្រកប​ដោយសុចរិតយុត្តិធម៌ ទាំងតាមប្រព័ន្ធអនឡាញ និងមិនមែនអនឡាញ គឺជាកត្តាសំខាន់ជំរុញនូវភាពជោគជ័យក្នុងធុរកិច្ច ដោយសារក្រុមហ៊ុន ដែលទទួលបានការពេញចិត្តពេញថ្លើមពីសំណាក់អតិថិជន ឬអ្នកប្រើប្រាស់អាចពង្រីកមូលដ្ឋានអតិថិជនរបស់ខ្លួន បានកាន់​តែទូលំទូលាយ។

លោកបន្តថា ហេតុដូច្នេះហើយ ទើបកាលពីឆ្នាំ២០១៩ អាស៊ានបានបង្កើតមគ្គុ ទ្ទេសក៏សាមញ្ញមួយ ហៅថាក្រមសីលធម៌ធុរកិច្ចតាមប្រព័ន្ធអនឡាញ សម្រាប់អាស៊ាន ដែលក្នុងនោះ បានបញ្ចូលនូវការប្តេជ្ញាចិត្តចំនួន១៥ សម្រាប់ធុរកិច្ចប្រតិបត្តិតាម ដើម្បីផលប្រយោជន៍អ្នកប្រើប្រាស់ និងជាកិច្ចការពារដល់អ្នកប្រើប្រាស់។

លោកបានប្រកាសថា “ក្រមសីលធម៌នេះ ត្រូវបានគេរំពឹងថានឹងត្រូវយកទៅផ្សព្វ​ផ្សាយ នៅទូទាំងប្រទេសជាសមាជិកអាស៊ានទាំងអស់ ហើយវាក៏ជាផ្នែកមួយនៃកិច្ចខិតខំប្រឹងប្រែងស្តារប្រទេសឡើងវិញ ក្រោយពីវិបត្តិនៃជំងឺរាតត្បាត”។

ចំណែកលោកប៉ាន សូរស័ក្ត រដ្ឋមន្រ្តីក្រសូងពាណិជ្ជកម្មបានមានប្រសាសន៍ថា “ការការពារផលប្រយោជន៍ និងសិទ្ធិរបស់អ្នកប្រើប្រាស់ មិនគួរត្រូវបានចាត់ទុកថាជាឧបសគ្គដល់អាជីវកម្មឡើយ”។

លោកបន្តថា ការការពារអ្នកប្រើប្រាស់ប្រកបដោយប្រសិទ្ធភាព តម្រូវឱ្យអាជីវកម្មទទួលបាន ការជូនដំណឹងអំពីកាតព្វកិច្ចរបស់ខ្លួន ចំពោះអ្នកប្រើប្រាស់ និងជៀសវាងសកម្មភាពណាមួយ ដែលអាចភូតកុហក ពង្វាងការពិត ឬធ្វើឱ្យខូចប្រយោជន៍ដល់អ្នកប្រើប្រាស់ ទាំងក្នុងប្រតិបត្តិការជាទម្លាប់ប្រពៃណី ឬក្នុងពាណិជ្ជកម្មអេឡិចត្រូនិក។

លោកបន្តថា “អាជីវកម្មដែលលក់ផលិតផល ឬសេវាកម្មទៀងត្រង់ និងបម្រើអតិថិជនរបស់ពួកគេដោយស្មើភាព ជាឧទាហរណ៍ ដោយការគោរពតាមការធានាអះអាង និងការធានាលើផលិតផល អាចពង្រីក មូលដ្ឋានអតិថិជន និងការប្រកួតប្រជែងរបស់ពួកគេ”។លោកបន្តថា “អ្នកតំណាងមកពីសហគមន៍ពាណិជ្ជកម្ម ក៏អាចដើរតួជាដៃគូដែលទុកចិត្តសម្រាប់រដ្ឋាភិបាលក្នុងការគាំទ្រដល់ការការពារអ្នកប្រើប្រាស់”៕

ដោយៈសុខុម

អ៊ីតាលី: ក្រុមហ៊ុនខ្សែសង្វាក់ភោជនីយដ្ឋានដ៏ល្បីរបស់ចិន Yum China និងក្រុមហ៊ុន ផលិតកាហ្វេខ្នាតយក្សរបស់អ៊ីតាលី Lavazza ដែលបានចាប់ដៃគូសហការគ្នា ក្នុងឆ្នាំ២០២០ មានគម្រោងបើកហាងកាហ្វេ Lavazza រហូតដល់ទៅ១.០០០ទីតាំងក្នុងប្រទេសចិន នៅត្រឹមឆ្នាំ២០២៥។

ក្រុមហ៊ុនទាំង២នេះ បានបញ្ជាក់កាលពីថ្ងៃព្រហស្បតិ៍ ទី២៣ កញ្ញា ថា ជាដំណាក់កាលដំបូង ខ្លួននឹងបោះទុនវិនិយោគ ចំនួន២០០លានដុល្លារអាមេរិក នៅក្នុងការបណ្តាក់ទុនរួមគ្នានេះ។

លើសពីនេះ ការបណ្តាក់ទុនរួមគ្នានេះ នឹងជួយធ្វើយុទ្ធសាស្ត្រទីផ្សារ លក់ និងចែកចាយផលិតផលលក់រាយរបស់ក្រុមហ៊ុន Lavazza នៅក្នុងប្រទេសចិន ក្រោមកិច្ចព្រមព្រៀងសិទ្ធិផ្ដាច់មុខ។

ហាងកាហ្វេ Lavazza ដំបូងបង្អស់ដែលបើកនៅក្រៅប្រទេសអ៊ីតាលី បានបើកដំណើរការក្នុងក្រុងសៀងហៃ នៅខែមេសា ឆ្នាំ២០២០។ ចាប់តាំងពីនោះមក Lavazza បន្តពង្រីកសាខាបាន ជាង២០ទីតាំងទូទាំងប្រទេសចិន រួមមាននៅក្រុងសៀងហៃ ក្រុងហាងចូវ (Hangzhou) ក្រុងប៉េកាំង និងក្រុងគ័ងចូវ (Guangzhou) ផងដែរ។

លោកស្រី Joey Wat អគ្គនាយកក្រុមហ៊ុនខ្សែសង្វាក់ភោជនីយដ្ឋាន Yum China បានថ្លែងថា “ការរីកចម្រើនថ្មីៗនេះរបស់ហាងកាហ្វេ Lavazza ក្នុងប្រទេសចិន បានជំរុ​ញលើកទឹកចិត្តពួកយើងខ្លាំងមែនទែន ហើយបានផ្ដល់លទ្ធភាព ឱ្យយើងចាប់យកឱកាសអាជីវកម្មកាហ្វេដ៏ធំនៅក្នុងប្រទេសចិន ជាមួយនឹងការពង្រីកចំនួនសាខាយ៉ាងឆាប់រហ័ស”។

នៅក្នុងការបណ្តាក់ទុនរួមគ្នានេះ ក្រុមហ៊ុនខ្សែសង្វាក់ភោជនីយដ្ឋាន Yum China កាន់កាប់ភាគហ៊ុន៦៥% ចំណែកឯក្រុមហ៊ុន Lavazza កាន់កាប់ភាគហ៊ុន៣៥%។

យោងតាមគេហទំព័រ Starbucks China បានបង្ហាញថា ក្រុមហ៊ុនហាងកាហ្វេ Starbucks របស់សហរដ្ឋអាមេរិក មានហាងជាង៥.០០០ទីតាំង នៅក្នុងទីក្រុងចំនួន២០០ទូទាំងប្រទេសចិន៕ Reuters៕

ដោយៈ សុជាតា

ភ្នំពេញៈ ទីភ្នាក់ងារសហប្រតិបត្តិការអន្តរជាតិរបស់ប្រទេសជប៉ុន (JICA) បានផ្តល់កិច្ចសហប្រតិបត្តិការ លើការលើកកំពស់ហេដ្ឋារចនាសម្ព័ន្ឋនានា នៅរាជធានីភ្នំពេញ ដោយកាត់បន្ថយផលប៉ះពាល់ដោយការជន់លិច។

JICA បានគាំទ្រក្នុងការបង្កើតផែនការមេ និងធ្វើបច្ចុប្បន្នភាពផែនការមេនេះ ដើម្បីកំណត់យកគម្រោងអាទិភាព ក្នុងនោះមានហិរញ្ញប្បទានឥតសំណង ចំនួន៤ជំហានដូចជា គម្រោងការពារទឹកជំនន់ និងការកែលម្អប្រព័ន្ធប្រឡាយ-លូ ជំហានទី១ ទី២ និងទី៣ ដែលគ្របដណ្តប់លើតំបន់អាគ្នេយ៍ ឦសាន្ត និងកណ្តាលនៃទីក្រុង។

គម្រោងជំហានទី៤ ដែលបានបើកការដ្ឋានសាងសង់ កាលពីខែមេសា ឆ្នាំ២០១៩កន្លងទៅនេះ នឹងត្រូវបញ្ចប់ជាស្ថាពរ មន្ទីរសាធារណការ និងដឹកជញ្ជូនរាជធានីភ្នំពេញ បានរៀបចំកិច្ចប្រជុំ ដើម្បីបញ្ចប់គម្រោងជាផ្លូវការ ដោយមានការចូលរួមពី តំណាងស្ថានទូតជប៉ុន តំណាងទីភ្នាក់ងារចៃកា ក្រុមហ៊ុនប្រឹក្សា CTI និងក្រុមហ៊ុនម៉ៅការសំណង់ TOA។

គម្រោងដែលមានទឹកប្រាក់ចំនួនប្រមាណ៣៦ លានដុល្លារអាមេរិកនេះ មានវិសា​លភាពគ្របដណ្តប់លើប្រព័ន្ធប្រឡាយលូ នៅតំបន់ខាងជើងនៃវត្តភ្នំ និងតំបន់ទួលគោក។ គម្រោងបានបញ្ចប់ទំហំការងារដូចជា ទី១ តំឡើងប្រព័ន្ធលូសរុបប្រវែង១២.២គីឡូម៉ែត្រ។

ទី២. សាងសង់អាងស្តុកទឹកក្រោមដី និងស្ថានីយ៍បូមទឹកនៅសួនសាធារណៈខាងមុខ CDC ទី ៣. តំឡើងម៉ាស៊ីនមេកានិច(ម៉ាស៊ីនស្ទាក់សម្រាមស្វ័យប្រវត្តិ)ចំនួន៦នៅច្រកទ្វាស្ថានីយ៍បូមទឹក។ ទី៤- លទ្ធកម្មរថយន្តបំពាក់ម៉ាស៊ីនបូមទឹកចំនួន២ និងទី៥. ជំនួយក្នុងការចាប់ផ្តើម ការងារប្រតិបត្តិការ និងថែរទាំ។

ក្រោយពីគម្រោងនេះបានបញ្ចប់ វានឹងជួយកាត់បន្ថយបញ្ហាជន់លិច តាមរយៈការបញ្ចេញទឹកភ្លៀង តាមប្រព័ន្ធលូបានលឿនជាងមុន នៅក្នុងរដូវវស្សា (ពីរយៈពេល១២-២៤ម៉ោង ទៅតិចជាង ២ម៉ោង)។ ដើម្បីធានាបាននូវប្រសិទ្ធភាពមុខងារប្រព័ន្ធលូ ដែលបានតំឡើងដោយគម្រោងនេះ យើងរំពឹងទុកថា ប្រជាពលរដ្ឋរស់នៅក្នុងរាជធានីភ្នំពេញនឹងចូលរួមចំណែកកាត់បន្ថយ ការខូចខាតដោយសារការជន់លិច ដោយជៀសវាងការបោះចោលសំរាមតាមដងផ្លូវ ដែលជាប្រភពចម្បងនាំអោយកកស្ទះប្រព័ន្ធលូ៕

ដោយៈសុខុម

ញូវយ៉ក: កាលពីថ្ងៃពុធ ទី២២ កញ្ញា ក្រុមហ៊ុន Boeing ដែលជាក្រុមហ៊ុនផលិតយន្តហោះធំបំផុតរបស់សហរដ្ឋអាមេរិក បានប្រកាសផែនការសាងសង់ រោងចក្រដំឡើងយន្តហោះនៅក្រៅប្រទេសដំបូងបង្អស់របស់ខ្លួន។

រោងចក្រដែលនឹងត្រូវសាងសង់នៅក្នុងទីក្រុង Toowoomba ប្រទេសអូស្ត្រាលី នេះ សម្រាប់ដំឡើងយន្តហោះដ្រូនរបស់យោធា មិនមែនយន្តហោះស៊ីវិលសម្រាប់ដឹកអ្នកដំណើរ ដែលជាអាជីវកម្មចម្បងរបស់ក្រុមហ៊ុន Boeing នោះឡើយ។ ទោះជាយ៉ាងណា វាពិតជាគួរឱ្យចាប់អារម្មណ៍ណាស់ ដែលក្រុមហ៊ុនមួយនេះឈានជើងចេញហួស ពីសហរដ្ឋអាមេរិក។

អាជីវកម្មផ្នែកការពារជាតិ អវកាស និងសន្តិសុខរបស់ក្រុមហ៊ុន Boeing បានក្លាយជាប្រភពប្រាក់ចំណូលដ៏រឹងមាំបំផុតរបស់ខ្លួន ក្នុងរយៈពេលប៉ុន្មានឆ្នាំចុងក្រោយ ដែលក្រុមហ៊ុននេះជួបការលំបាក។

ផ្អែកតាមរបាយការណ៍បង្ហាញថា អាជីវកម្មផ្នែកនេះ ទទួលបានប្រាក់ចំណូលចំនួន២៦ពាន់លានដុល្លារ ជារៀងរាល់ឆ្នាំចាប់តាំងពីឆ្នាំ២០១៨មក ខណៈប្រាក់ចំណូលពីយន្តហោះពាណិជ្ជកម្ម ឬដឹកអ្នកដំណើររបស់ក្រុមហ៊ុននេះ បានដាំក្បាលចុះរហូតទៅ៤១ពាន់លានដុល្លារ ឬស្មើនឹង៧២% ក្នុងគ្រាដែលក្រុមហ៊ុននេះ ប្រឈមមុខនឹងវិបត្តិយន្តហោះ 737 Max និងការរីករាលដាលវីរុសកូវីដ-១៩។

នៅក្នុងឆ្នាំ២០២០ ប្រហែល៨៣%នៃអាជីវកម្ម ផ្នែកការពារជាតិគឺទទួលបានពីក្រសួ​ងការពារជាតិរបស់សហរដ្ឋអាមេរិក។ ប៉ុន្តែអាជីវកម្មផ្នែកនេះ ក៏មានអតិថិជនបរទេសធំៗផងដែរ។

មួយភាគធំនៃអាជីវកម្មធំចម្បងរបស់ក្រុមហ៊ុន Boeing គឺបានពីបរទេស។ នៅឆ្នាំ២០១៨ ក្រុមហ៊ុនផលិតយន្តហោះមួយនេះ ទទួលបានប្រាក់ចំណូលច្រើនបំផុតមិនធ្លាប់មាន រហូតដល់ទៅ១០១ពាន់លានដុល្លារ ដោយ៥៦%នៃប្រាក់ទាំងនោះបានមកពីអតិថិជនបរទេស។

ក្រុមប្រតិបត្តិការរបស់ក្រុមហ៊ុន Boeing ប្រចាំប្រទេសអូស្រ្តាលី បានឌីហ្សាញយន្តហោះដ្រូនមានឈ្មោះថា Loyal Wingman ដែលត្រូវដំឡើងនៅទីនោះ។ តាមការរំពឹងទុកថា រោងចក្រនេះនឹងបង្កើតការងារពេញម៉ោង បានចំនួន៣.៥០០កន្លែង នៅត្រឹមឆ្នាំ២០២៨។ បច្ចុប្បន្នកងទ័ពអាកាសរបស់អូស្រ្តាលី គឺជាអតិថិជនតែមួយគត់ដែលបញ្ជាទិញយន្តហោះដ្រូននេះ ប៉ុន្តែក្រុមហ៊ុនBoeing ក៏មានគម្រោងនាំចេញដ្រូននេះទៅឱ្យអតិ​ថិជនជាយោធាដទៃទៀតនៅជុំវិញពិភពលោកផងដែរ។

ដំណឹងនេះ កើតមានឡើងមិនយូរប៉ុន្មានក្រោយ ពីមានការប្រកាសដាច់ដោយឡែកមួយថា ប្រទេសអូស្រ្តាលី មានបំណងសាងសង់កងនាវាមុជទឹក ដើរដោយថាមពលនុយក្លេអ៊ែរ ដោយប្រើប្រាស់បច្ចេកវិទ្យារបស់សហរដ្ឋអាមេរិក និងប្រទេសអង់គ្លេស។ គេមើលឃើញថា ចំណាត់ការនោះជាកិច្ចខិតខំប្រឹងប្រែងមួយ របស់សហរដ្ឋអាមេរិក ដើម្បីទប់មហិច្ឆតាយោធារបស់មហាយក្សចិន ដែលកំពុងកើនឡើងនៅក្នុងតំបន់៕ CNN៕

ដោយៈវឌ្ឍនៈ

ភ្នំពេញៈ សម្តេចអគ្គមហា សេនាបតីតេជោ ហ៊ុន សែននាយករដ្ឋមន្រ្តីនៃកម្ពុជា បានបង្ហាញនូវយុទ្ធសាស្រ្តអាទិភាពមួយចំនួន ដើម្បីត្រៀមលក្ខណៈចាប់ផ្តើមបើកឡើងវិញនូវសកម្មភាពទេសចរណ៍ជាតិ និងអន្តរជាតិជាជំហានៗនាពេលខាងមុខ បន្ទាប់ពីបានផ្អាកអស់មួយរយៈដោយសារ តែការវាយលុកពីជំងឺកូវីដ១៩ នៅលើពិភពលោក និងនៅកម្ពុជា។

ក្នុងសារលិខិតអបអរសាទរក្នុងឱកាសទិវាទេស ចរណ៍ពិភពលោកឆ្នាំ ២០២១ ក្រោមប្រធានបទទេសចរណ៍ “សម្រាប់កំណើនប្រកបដោយបរិយាប័ន្ន” ដែលនឹងធ្វើឡើងនៅថ្ងៃទី២៧ខែកញ្ញាខាងមុខនេះ សម្តេចអគ្គមហាសេនាបតីតេជោមានប្រសាសន៍ថា   យោងទៅលើល្បឿន នៃការចាក់វ៉ាក់សាំងនៅប្រទេសកម្ពុជា សម្ដេចជឿជាក់ថាគោលដៅទេសចរណ៍នៅកម្ពុជា ត្រូវបានមើលឃើញថាពិតជាធានា បាននូវសុវត្ថិភាពទំនុកចិត្ត និងភាពជឿជាក់របស់ភ្ញៀវទេសចរជាតិ និងអន្តរជាតិឡើងវិញ។

សម្តេចបានបន្តថា “កត្តានេះរួមផ្សំទៅនឹងការទទួលយកនូវការរស់នៅ ក្នុងគន្លងប្រក្រតីភាពថ្មី ដោយប្រកាន់ខ្ជាប់នូវវិធានសុខាភិបាល ទប់ស្កាត់ការឆ្លងរីករាលដាលជំងឺកូវីដ ១៩ នឹងជំរុញឱ្យកម្ពុជាអាចបើកឡើងវិញជាជំហានៗ នូវសកម្មភាពទេសចរណ៍ផ្ទៃក្នុងនិងអន្តរជាតិ ដោយតម្កល់សុខភាពសាធារណៈជាអាទិភាព”។

សម្ដេចបន្ថែមថា ស្ថិតនៅក្នុងភាពសុទិដ្ឋិ និយមនេះ អាជ្ញាធរពាក់ព័ន្ធគ្រប់លំដាប់ថ្នាក់ផ្នែកឯកជន និងភាគីពាក់ព័ន្ធនានា ត្រូវផ្ដល់កិច្ចសហប្រតិបត្តិការគាំទ្រ ចំពោះការរៀបចំផែនការយុទ្ធសាស្ត្រ ក្នុងការត្រៀមបើកទ្វារទទួលទេសចរណ៍សុវត្ថិភាព នាពេលខាងមុខ។

សម្តេចតេជោហ៊ុនសែនបានលើកទឹកចិត្តដល់ស្ថាប័នពាក់ ព័ន្ធអាជ្ញាធរមូលដ្ឋានផ្នែកឯកជន យុវជន និងដៃគូអភិវឌ្ឍន៍ជាតិជាតិ និងអន្តរជាតិចូលរួមជំរុញបង្កើត និងផ្គត់ផ្គង់សេវាកម្មទេសចរណ៍ឱ្យកាន់តែសម្បូរបែប តាមរយៈការដាក់ ចុះនូវកម្មវិធីយុវជននិងធុរកិច្ចនៅក្នុងវិស័យទេសចរណ៍ កម្មវិធីជំរុញបង្កើតថ្មី និងនវានុវត្តន៍ទេសចរណ៍ ព្រមទាំងលើក កម្ពស់ការយល់ដឹង និងកសាងសមត្ថភាពផ្នែកទេសចរណ៍ឌីជីថល ដល់ថ្នាក់មូល   ដ្ឋានក្រោមការសម្របសម្រួលដឹក នាំរបស់ក្រសួងទេសចរណ៍ និងក្រោមកិច្ចសហប្រតិ​បត្តិការពីអង្គការទេសចរណ៍ពិភពលោក សមាគមអន្តរជាតិនិងដៃគូអភិវឌ្ឍន៍នានា។

លោកAlain Brun អគ្គនាយកក្រុមហ៊ុន Cambodia airport បានថ្លែងនៅក្នុងសន្និសីទកាលពីព្រឹកថ្ងៃទី២៣ កញ្ញា ២០២១នេះថា ការបើកភ្លើងខៀវពីរដ្ឋាភិបាលក្នុងការបើកទេសចរណ៍អន្តរជាតិឡើងវិញ គឺជារឿងដែលរំភើបបំផុត ហើយអាកាសយាន      ដ្ឋានទាំងបីនៅកម្ពុជា ក៏បានត្រៀមខ្លួនក្នុងការស្វាគមន៍ អ្នកដំណើរបរទេស ក៏ដូចជាអ្នកដំណើរឆ្លងកាត់ព្រលានយន្តហោះនេះផងដែរ។

លោកបន្តថា “ការបើកដំណើរការឡើងវិញ នៃទេសចរណ៍អន្តរជាតិ នឹងផ្ដល់ឱកា​សការងារដល់អ្នកជំនាញទេសចរណ៍ ដែលបានបាត់បង់ការងារនៅក្នុងវិបត្តិកូវីដ១៩ ហើយ នឹងជួយពួកគេមានប្រាក់ចំណូល ពីវិស័យជំនាញរបស់ពួកគេឡើងវិញផងដែរ”៕

        ដោយៈសុជាតា

        ហាណូយៈ ប្រទេសវៀតណាម បានចាប់ផ្តើមស៊ើបអង្កេត ទៅលើចោទប្រកាន់ចំពោះស្ករស ដែលមានប្រភពដើមពីប្រទេសថៃ ប៉ុន្តែត្រូវឆ្លងកាត់ពីប្រទេសជិតខាង ដើម្បីជៀសផុតពីការបង់ពន្ធ ដែលជាការបន្ទាបតម្លៃទំនិញ។ នេះបើយោងតាមសាព័ត៌មាន Bangkok Post ចេញផ្សាយនៅថ្ងៃទី ២៣ ខែកញ្ញា ឆ្នាំ២០២១ នេះ។

យោងតាមការចេញផ្សាយដោយក្រសួងពាណិជ្ជកម្មវៀតណាម បានលើកឡើងថា ប្រទេសវៀតណាម បានដាក់កំណត់ទៅលើការនាំចូលបន្ទាបតម្លៃស្ករសរ ពីប្រទេសថៃប្រមាណ៤៧. ៦៤ ភាគរយ សម្រាប់រយៈពេល៥ ឆ្នាំ ពីព្រោះថា ប្រទេសថៃគឺជាប្រទេសមួយ ក្នុងចំណោមអ្នកនាំចេញស្ករធំបំផុតនៅលើពិភពលោក។

ការអះអាងនេះ ធ្វើឡើងបន្ទាប់ពីការចោទប្រកាន់កើនឡើង ក្នុងចំណោមក្រុមហ៊ុនក្នុងស្រុកដែលថា ផលិតផលស្ករសគឺត្រូវនាំចូលពីប្រទេសឡាវ ប្រទេសកម្ពុជា ឥណ្ឌូនេស៊ី ម៉ាឡេស៊ី និងប្រទេសមីយ៉ាម៉ា គឺមិនមានផលិតផលដើមពីប្រទេសទាំងនោះ។

យោងតាមក្រសួងពាណិជ្ជកម្មវៀតណាម បានលើកឡើថាគិតចាប់ពីខែតុលា  ទៅដល់ខែ មិថុនា ឆ្នាំ ២០២០ ការនាំចូលស្ករស ទៅកាន់ទីផ្សារប្រទេសវៀតណាមបានកើនបរិមាណឡើង៥ដងរហូតដល់ ៥០០,២៧០តោន។ នេះបើប្រៀបធៀបនឹងរយៈពេលដូចគ្នាកាលពីឆ្នាំមុន។ ដោយនៅក្នុងការនាំចូលពីប្រទេសថៃ បានធ្លាក់ចុះអស់៣៨ភាគរយនៅរយៈពេលដូចគ្នានេះ។

ឧស្សាហកម្មស្ករស បានផ្តល់ភស្តុតាងដោយបង្ហាញ ពីសញ្ញាមិនប្រក្រតីនៃពាណិជ្ជកម្មស្ករសររបស់ប្រទេសថៃ ដែលបានឆ្លងកាត់ប្រទេសទាំងប្រាំខាងលើ ដែលមានកើនឡើងយ៉ាងឆាប់រហ័សនៅក្នុងនាំចូលផលិតផលស្ករស។

ប្រទេសវៀតណាម បានលុបចោលនូវពន្ធនាំចូលស្ករស ពីប្រទេសអាស៊ីអាគ្នេយ៍នៅឆ្នាំ ២០២០ ដោយយោងទៅលើកិច្ចព្រមព្រៀងពាណិជ្ជកម្មទំនិញអាស៊ាន។

ទោះបីជាយ៉ាងណា បទប្បញ្ញត្តិបានអនុញ្ញាត អោយមានតម្លើងពន្ធទៅលើទំនិញនាំចូល សម្រាប់សមាជីកអាស៊ានដើម្បីការពារសិទ្ធិ និងសារៈប្រយោជន៍សម្រាប់ឧស្សាហកម្មក្នុងស្រុកផងដែរ។

ក្រសួងពាណិជ្ជកម្មវៀតណាម បានជំរុញអោយអង្គភាពផលិត និងជួញដូរស្ករស ក្នុងការផ្តល់ព័ត៌មានលំអិត ដើម្បីជួយដល់ការស៊ើបអង្កេតនេះ៕