ដោយៈសុធា

ភ្នំពេញៈ ប្រធានសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា (PATA) លោកធួន ស៊ីណានបានស្វាគមន៍ចំពោះវិធានការរដ្ឋាភិបាល ក្នុងការបើកប្រទេសកម្ពុជាឡើងវិញសម្រាប់ទទួលភ្ញៀវអន្តរជាតិ។

លោករំពឹងថា កម្ពុជាអាចទទួលកំណើនភ្ញៀវទេសចរអន្តរជាតិ ត្រឹមតែ២០ភាគរយប៉ុណ្ណោះ បើប្រៀបធៀបព្រឹត្តិការណ៍មុនវិបត្តិ កូវិត ១៩។

លោកធូន ស៊ីណានបានបន្តថា វិបត្តិកូវីដ១០ បានវាយប្រហារពិភពលោកអស់រយៈពេលពីរឆ្នាំមកហើយ បានធ្វើអោយប្រតិបត្តិករទេសចរណ៍ខ្លះ ប្រឈមមុខនឹងក្ស័យធន និងអ្នកខ្លះទៀត ប្រកបរបរផ្សេងទៀត និងអ្នកខ្លះទៀត ហៀបនឹងក្ស័យធនទៅហើយ ។

លោកបន្តថា រដ្ឋាភិបាលបានប្រកាសបើក ទទួលទេសចរបរទេសឡើងវីញនេះ ប្រត្តិបត្តិករទេសចរនានា បានត្រៀមខ្លួនរួចជាស្រេច សម្រាប់អ្នកមានលទ្ធភាព ហើយអ្នកមិនទាន់មានលទ្ធភាពបានដុតដៃ ដុតជើងដើម្បីធ្វើយ៉ាងណា ដើម្បីយកឱកាសសម្រាប់ស្តារអាជីវកម្មរបស់ខ្លួនឡើងវិញ។

លោកបន្ថែមទៀតថា “តាមទស្សនៈផ្ទាល់ខ្លួន ខ្ញុំគិតថាបន្ទាប៉ពីបើកទទួលភ្ញៀវទេសចរបរទេសឡើងវិញ យើងមិនអាចទទួលកំណើនទេសចរ ដូចមុនវិបត្តិកូវីត ១៩នោះទេ”។លោកបន្ថែមថា “ពីព្រោះថា កូវីដ១៩ នៅមិនទាន់បញ្ចប់នោះទ កូវីដនៅតែវាយប្រហារនៅជុំវិញពិភពលោក។ ការវាយប្រហារធ្វើអោយសេដ្ឋកិច្ចពិភពលោក ទន់ជ្រាយ ដែលផ្អាកទៅលើដំណើរការរបស់ពិភពលោក ដោយប្រទេសនានានៅតែមានរឹតត្បិតនៅក្នុងការធ្វើដំណើររបស់មនុស្ស”។

លោកបន្តថា ប្រជាជនកម្ពុជា និងប្រជាជននៅលើពិភពលោក នៅតែមានភាពភ័យខ្លាចការឆ្លងជំងឺដ៏កាចសាហាវនេះ។ យើងអាចសន្និដ្ឋានបានថា មុនកូវិដ ទេសចរបរទេសមកចំនួន១០នាក់ ប៉ុន្តែនៅពេលបើកប្រទេសឡើងវិញ កម្ពុជាអាចទទូលភ្ញៀវទេសចរណ៍ ចំនួន២នាក់ប៉ុណ្ណោះ៕

        ដោយៈ គង់ សូរិយា

        ភ្នំពេញៈ អ្នកវិនិយោគក្នុងស្រុកបាន និងកំពុងវិនិយោគផ្ទះលំហែររំដូលត្បូងឃ្មុំ ជាលើកដំបូង នៅក្នុងទីរួមខេត្តត្បូងឃ្មុំនៅលើផ្ទៃដី១០ហិកតា ដែលមានចម្ងាយពីរដ្ឋបាលសាលាខេត្តត្បូងឃ្មុំមួយគីឡូម៉ែត្រ។

លោកបណ្ឌិតម៉ូត ទូល័ស( ទូលូ) ប្រធានក្រុមប្រឹក្សាភិបាល ក្រុមហ៊ុន CRT 168 រៀលអ៊ីស្តេត ឯ.ក និង វិមានបៃតង បានមានប្រសាសន៍ឲ្យដឹងនាព្រឹកថ្ងៃទី២៤ កញ្ញានេះថា នេះជាគំរោងទី៩ហើយរបស់ក្រុមហ៊ុន ដែលគំរោងនេះមានលក្ខណៈប្លែក និងពិសេសដោយយើងមានសាងសង់ផ្ទះលំហែរបែបបុរាណ ដែលមានមួយគត់នៅក្នុងក្រុងត្បូងឃ្មុំ ដែលមានចម្ងាយ៥០០ម៉ែត្រពីទន្លេសប្បនិម្មិត និង៣០០ម៉ែត្រពីរង្វង់មូលផ្លូវ៦០ម៉ែត្ររបស់ទីរួមខេត្តនេះ។

លោកបន្តថា “គំរោងនេះបាននិងកំពុងវិនិយោគនេះ សាងសង់លើផ្ទៃដីទំហំ១០គុណនឹង២០ម៉ែត្រ ដែលលក់ក្នុងតម្លៃត្រឹម១៦,០០០ដុល្លារអាមេរិក ហើយប្រសិនជាអតិ​ថិជនបង់ផ្តាច់ យើងនឹងថែមដីមួយឡូត៍ទៀតលើផ្លូវ១២ម៉ែត្រ”។ លោកបន្តថា “យើ​ងបាននិងកំពុងសាងសង់ផ្ទះចំនួន១៦ លើផ្លូវ១៦ម៉ែត្រនិងមានសួនច្បារចំកណ្តាល​ ដែលលក់បានមួយចំនួនរួចហើយ ទោះស្ថិតក្នុងវិបត្តិជំងឺកូវីដក្តី”។

លោកបណ្ឌិតម៉ុត ទូលស់បានបន្តថា ដីឡូត៍ក្នុងគំរោងនេះ បាននិងកំពុងដាក់លក់ក្នុងតម្លៃចន្លោះពី៣០០០ ទៅ៣៥០០ដុល្លារអាមេរិកប៉ុណ្ណោះក្នុងមួយឡូត៍ និងមានការ​បញ្ចុះតម្លៃពិសេសប្រសិនជាអតិថិជនបង់ផ្តាច់។

ទីរួមខេត្តត្បូងឃ្មុំ ជាទីក្រុងមានលក្ខណៈពិសេសមួយ ព្រោះមានទីតាំងនៅចំចំណុ​ចប្រសព្វរវាងស្រុកចំនួនពីរ និងក្រុង១ ដូចជា ក្រុងសួង ស្រុកតំបែរ និងស្រុកពញ្ញាក្រែក ខេត្តត្បូងឃ្មុំ។ ទីក្រុងនេះ មានធម្មជាតិដ៏ស្រស់ត្រកាលជាមួយចម្ការម៉ៃសាក់ ទន្លេសប្បនិម្មិត និងខ្ពង់រាបរពើតរពើង ពិសេសមានលក្ខខ័ណ្ឌអាកាសធាតុដ៏ល្អ។

ទីក្រុងត្បូងឃ្មុំជាទីក្រុងនៃខេត្តគំរូមួយ ដែលមានការរៀបចំប្លង់គោលអភិវឌ្ឈន៍រួចជាស្រេច និងជាខេត្តដែលមានរដ្ឋបាល និងមន្ទីរពាក់ព័ន្ឋនៅប្រមូលផ្តុំគ្នា ក្នុងទីតាំងតែមួយ៕

ដោយ សុជាតា

ភ្នំពេញៈ ខេត្តមណ្ឌលគិរី នៅតែមានសក្តានុពលលើវិស័យទេសចរណ៍ធម្មជាតិ ខណៈផែនការមេដើម្បីអភិវឌ្ឍខេត្តនេះរបស់រដ្ឋាភិបាលបានបញ្ចប់ និងកំពុងជំរុញការរីកចម្រើនលើវិស័យបដិសណ្ឋារកិច្ចមួយក​ម្រិតទៀត។

លោកងិន សុវិមាន ប្រធានមន្ទីទេសចរណ៍ខេត្តមណ្ឌលគិរី បានឱ្យដឹងនាព្រឹកថ្ងៃទី២៤ កញ្ញានេះថា ទោះស្ថិតក្នុងបរិបទកូវីត១៩ក៏ដោយ  តែវិស័យទេសចរណ៍នៅតែអភិ​វឌ្ឍទៅមុខរហូត ដោយគិតត្រឹមពេលនេះ មានការសាង់សងផ្ទះសំណាក់ សណ្ឋាគារ រីសត បន្ថែមរហូតដល់ជាង១៥០០បន្ទប់ហើយ ដើម្បីត្រៀមទទួលអ្នកទេសចរនៅពេលប្រទេសកម្ពុជា បើកដំណើរការវិស័យនានាជាធម្មតាវិញ។

លោកបន្តថា “ភ្ញៀវទេសចរណ៍ក្នុងស្រុកនៅតែបន្តមកទស្សនា ដោយសារហេដ្ឋារចនាសម្ព័ន្ឋធ្វើដំណើរស្រួល ទេសភាពស្អាត និងលក្ខខ័ណ្ឌអាកាសធាតុមានភាពអំណោ​យផលខ្ពស់”។

ជាមួយគ្នានេះ លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានប្រាប់ Property area asia នៅថ្ងៃទី ២៤ ខែកញ្ញា ថា ខេត្តមណ្ឌលគីរី គឺជាខេត្តដែលមានទាក់ទាញទេសចរណ៍បែបធម្មជាតិ ជាពិសេសសម្បត្តិព្រៃឈើ ដែលអ្នកទេសចរអាចទ ស្សនាកំសាន្ត បន្ថែមពីលើទេសចរបែបប្រពៃណី និងវប្បធម៌ នៅក្នុងប្រទេសកម្ពុជា។ លោកបន្តថា គេសងេ្កតឃើញថា កំណើនភ្ញៀវទេសចរមកទស្សនាខេត្តមណ្ឌលគីរី មានការកើនឡើងជាលំដាប់ជារៀងរាល់ឆ្នាំៗ ហើយរដ្ឋាភិបាលកម្ពុជា បានបង្កើតផលិតផលថ្មី​ៗមួយចំនួនទៀត គឺកសិទេសចរ សម្រាប់ភ្ញៀវទេសចរអាចមានជម្រើសបន្ថែមទៀត ក្រៅពីតំបន់ប្រាសាទ និង តំបន់ឆ្នេរសមុទ្រ។

លោកបន្ថែមទៀតថា “តាមរយៈគម្រោងវិនិយោគព្រលានយន្តហោះ នៅខេត្តមណ្ឌលគីរី ពីសំណាក់រាជរដ្ឋាភិបាល ធ្វើអោយតំបន់នេះ ក្លាយទៅជាប៉ូលទេសចរណ៍ និង សេដ្ឋកិច្ចដ៏សំខាន់មួយទៀត ពីព្រោះថា វិស័យទេសចរណ៍ និងសេវាកម្ម ជាប្រភពប្រាក់ចំណូលដ៏សំខាន់ ដែលភ្ញៀវទេសចរបានចំណាយប្រាក់ជាច្រើន សម្រាប់ដំណើរកំសាន្ត”។

ក្រោមការគិតគូរវែងឆ្ងាយ ទូលំទូលាយ និងគ្រប់ជ្រុងជ្រោយ រាជរដ្ឋាភិបាលរៀបចំនិងដាក់ចេញ ផែនការមេអភិវឌ្ឍន៍ វិស័យទេសចរណ៍ខេត្តមណ្ឌលគិរី ដើម្បីជាត្រីវិស័យ ចង្អុលបង្ហាញយន្តការ និងទិសដៅយុទ្ធសាស្ត្រសំខាន់ៗ សម្រាប់ការអភិវឌ្ឍវិស័យទេស​ចរណ៍ខេត្តមណ្ឌលគិរី ឆ្លើយតបទៅនឹងចក្ខុវិស័យ នៃការអភិវឌ្ឍជាតិក្នុងរយៈពេល(២០២១-២០៣៥) និងបណ្តាឆ្នាំខាងមុខ។

ក្នុងន័យនេះ រាជរដ្ឋាភិបាលតម្រង់ទិសការអភិវឌ្ឍ ក្នុងក្របខ័ណ្ឌយុទ្ធសាស្ត្ររបស់ខេត្តមណ្ឌលគិរី ដោយឈរលើស្ថានភាពជាក់ស្តែង និងប្រភពធនធានសក្តានុពលសម្រា​ប់ការវិនិយោគ និងអភិវឌ្ឍន៍វិស័យ ទេសចរណ៍និងអន្តរវិស័យគាំទ្រ ក្នុងក្តីសង្ឃឹមប្រកប​ដោយសុទិដ្ឋិនិយមថា ការអភិវឌ្ឍប្រកបដោយនិរន្តរភាព និងការទទួលខុសត្រូវនៃវិស័យនេះ នឹងបង្កើតបានជាផលប្រយោជន៍សេដ្ឋកិច្ច សង្គមសម្រាប់ប្រជាពលរដ្ឋមូលដ្ឋាន និងរួមចំណែកដល់ការថែរក្សាការពារ និងអភិរក្សធនធានធម្មជាតិ បេតិកភណ្ឌវប្បធម៌ និងរក្សាបាននូវអត្តសញ្ញាណ ដើមរបស់ខេត្ត៕

ដោយៈគង់ សូរិយា

ភ្នំពេញៈ ជាលើកដំបូងហើយ ដែលអភិបាលខេត្តកែប លោកសោម ពិសិដ្ឋបានដឹកនាំមន្រ្តីពាក់ព័ន្ឋ និងសិស្ស និស្សិតចុះសិក្សាស្វែងយល់ពីធនធានធម្មជាតិ ដែលជាសក្តានុពលនៃឧទ្យានជាតិកែប។

ក្រុងកែប ខេត្តកែបជាក្រុងតែមួយគត់នៅកម្ពុជា ដែលមានឧទ្យានជាតិកណ្តាល​ក្រុង ដែលព័ន្ឋជុំវិញដោយជ្រលងភ្នំ និងសមុទ្រដ៏ល្ហល្ហេវ។

ក្រុងកែបធ្លាប់ទទួលបានពានរង្វាន់ស្អាតកម្រិតអាស៊ាន ដោយសារខេត្តនេះមានដីស្អាត ទឹកស្អាត និងខ្យល់ស្អាត។
ប្រធានសមាគមទីភ្នាក់ងារទេសចរណ៍កម្ពុជា លោកស្រីឆាយ ស៊ីវលីនបានមានប្រសាសន៍ថា ខេត្តកែបជា ខេត្តមានសក្តានុពលទេសចរណ៍ធម្មជាតិដ៏ល្អឯក ដែលពេលយើងចូលទៅដល់ទីក្រុងនេះ ហាក់មានអារម្មណ៍ដក់ជាប់ជាមួយសម្រស់ធម្មជាតិ និងខ្យល់អាកាសត្រជាក់ស្រឹប។

លោកស្រីបន្តថា “ពេលទៅដល់ក្រុងកែប យើងមានអារម្មណ៍ស្រស់ស្រាយ ចង់សំរាកលំហែរ មិនចង់ត្រលប់មកកាន់ភ្នំពេញវិញនោះទេ”។

រាជរដ្ឋាភិបាលតាមរយៈក្រសួងទេសចរណ៍ បានបញ្ចេញផែនការមេអភិវឌ្ឍន៍វិស័យទេសចរណ៍ក្នុងខេត្តនេះរូចហើយ ដោយគ្រោងប្រែក្លាយខេត្តនេះជាតំបន់លំហែរកាយ​កម្រិតខ្ពស់ ដែលមិនអនុញ្ញាត្តឲ្យមានរោងចក្រ​ សហគ្រាស ដែលបញ្ចេញផ្សែងពុលបំពុល​បរិស្ថាននោះទេ៕