បុរីGB Residenceតម្លៃ៦២លានដុល្លារកំពុងផ្តល់នូវលក្ខខ័ណ្ឌបង់ប្រាក់យ៉ាងពិសេស

ដោយៈគង់ សូរិយា

ភ្នំពេញៈ បុរីGB Residence ដែលបោះទុនវិនិយោគ ក្នុងទំហំទឹកប្រាក់រហូតដល់៦២លានដុល្លារអាមេរិក បាននិងកំពុងផ្តល់នូវជំរើសបង់ប្រាក់ពិសេសជាច្រើន ដល់អតិថិជន។

អ្នកនាងគ្រុយ ស្រីខួចនាយិកាក្រុមហ៊ុនCMC Real Estate ដែលកំពុងទទួលបានសិទ្ឋលក់ផ្តាច់មុខនូវគំរោងបុរីដ៏ធំ និងមានទីតាំងនៅជាប់ផ្លូវក្រវ៉ាត់ក្រុងទី៣នេះ បានមានប្រសាសន៍ឲ្យដឹងតាមប្រព័ន្ឋតេឡេក្រាមនារសៀលថ្ងៃទី១ កញ្ញានេះថា ជាមួយនឹងគោលដៅលើកទឹកចិត្តដល់អតិថិជន មានលទ្ឋភាពបង់ប្រាក់កាន់តែងាយស្រួល អ្នកវិនិយោគបុរីGB Residentបាន និងកំពុងផ្តល់ជម្រើសបង់ប្រាក់ជាច្រើន ក្នុងនោះលក្ខខ័ណ្ឌបង់ប្រាក់ពិសេសមួយ គឺអតិថិជនអាចបង់រំលស់ ដោយឥតការប្រាក់រយៈពេល២៤ខែ។

អ្នកនាងបន្តថា “ជាមួយនឹងគុណភាព ប្រណីតភាព និងភាពស៊ីវិល័យ បុរីGB បាននិងកំពុងទាក់ទាញ ចំណាប់អារម្មណ៍ជាច្រើនពីអតិថិជន ដោយសារទីតាំងមានភាពល្អប្រសើរ ដែលព័ន្ឋជុំវិញដោយមជ្ឈមណ្ឌលពាណិជ្ជកម្ម ព្រលានយន្តហោះ និងសេវាកម្មបំរើឲ្យការរស់នៅកាន់តែមានភាពងាយស្រួល និងផាសុខភាព”។

អ្នកវិនិយោគបុរីGB Residence លោកឧកញ៉ាតាំង គួងហាវធ្លាប់បានមានប្រសា​សន៍ឲ្យដឹងថា ដោយសារមើលឃើញសក្តានុពលតំបន់នេះ ស្ថិតនៅជាប់នឹងផ្លូវក្រវ៉ាត់ក្រុងទី៣ និងព្រលានយន្តហោះអន្តរជាតិភ្នំពេញថ្មី និងការកើនឡើងនូវជីវភាពរបស់ប្រជាពលរដ្ឋ។ កំណើនពលរដ្ឋចូលមករស់នៅកៀកទីក្រុងកាន់តែច្រើន ទើបលោកសម្រេចចិត្តវិនិយោគបុរីនេះឡើង ដោយផ្តោតលើគុណភាព ប្រណីតភាព និងភាពស៊ីវិល័យ។

លោកឧកញ៉ាបានបន្តថា “ជាមួយនឹងការរចនាលំនៅដ្ឋាន ដោយអ្នកជំនាញអន្តរជាតិ ដែលបានឈ្នះពានរង្វាន់នៅទីក្រុងឌូបៃ បានធ្វើឲ្យគំរោងរបស់យើង មានម៉ូតផ្ទះស្អាត ប្លែក ប្រកបដោយស៊ីវិល័យ ពិសេសផ្តល់ជូនអ្នករស់នៅប្រកបដោយផាសុខភាព”។លោកបន្តថា “ផ្ទះក្នុងគំរោងGB Residenceមានតម្លៃចាប់ពីជាង៨ម៉ឺនដុល្លារ ដល់ជាង១០ម៉ឺនដុល្លារអាមេរិក អាស្រ័យលើប្រភេទផ្ទះ ទំហំ និងទីតាំងរបស់ផ្ទះនិមួយៗ”។

បុរីGB Residence សាងសង់លើទំហំដីជិត៩ហិកតា ជាមួយនឹងលំនៅដ្ឋានសរុប៥៨៨ផ្ទះ ពិសេសក្នុងគំរោងនេះមានផ្សារទំនើប ហាងកាហ្វេ ភោជនីយដ្ឋាន ក្លឹបហាត់ប្រាណ ពិសេសផ្លូវចូលបុរីទំហំ៥០ម៉ែត្រ ជាមួយនឹងសួនច្បារនៅចំកណ្តាល ដែលសម្រួលដល់ការធ្វើដំណើររបស់ប្រជាពលរដ្ឋ និងអ្នករស់នៅតំបន់នេះ។

លោកឧកញ៉ាតាំង គួងហាវបានមានប្រសាសន៍ឲ្យដឹងទៀតថា តំបន់ផ្លូវក្រវ៉ាត់ក្រុង នឹងមានសក្តានុពលខ្លាំងនាពេលអនាគត ដែលរយៈពេល១០ឆ្នាំខាងមុខ នឹងមានសភាពដូចផ្លូវ២៧១នាពេលបច្ចុប្បន្ននេះ ពិសេសអ្នកទិញលំនៅដ្ឋាននៅក្នុងគំរោងនេះនឹងទទួលបានផលចំណេញច្រើននាពេលអនាគត ដោយសារតំបន់នេះជាតំបន់អ្នកដំណើររជាតិ អន្តរជាតិចេញពីព្រលានយន្តហោះថ្មីឆ្លងកាត់ ដែលពួកគេអាចនឹងរកទីសម្រាក ការលំហែរ ហេតុនេះអ្នកទិញលំនៅដ្ឋាននៅទីនេះ អាចបើកជាផ្ទះសំណាក់ ភោជនីយដ្ឋាន និងសេវាកម្មជាច្រើនទៀត។

ទំនាក់ទំនងលេខទូរស័ព្ទ ០៦៩ ៩៦៤, ២២២, ០៧៩ ៤៤៣ ៧៧៣, ០១០ ៦០០, ៥៨៧, 0១៦ ៩៩៩ 758៕

ក្រុមហ៊ុនអភិវឌ្ឍន៍អចលនទ្រព្យ Singha Estate គ្រោងចាប់ផ្ដើមគម្រោងលំនៅដ្ឋានដ៏ធំ

ដោយៈសុខុម

បាងកក: ក្រុមហ៊ុនអភិវឌ្ឍន៍អចលនទ្រព្យថៃ Singha Estate Plc គ្រោងចាប់ផ្ដើមដំណើរការគម្រោងអភិវឌ្ឍន៍លំនៅដ្ឋាន កម្ពស់ទាបដល់ទៅ៣គំរោងចាប់ពីឆ្នាំ២០២២ បន្ទាប់ពីផ្អាកគម្រោងខុនដូថ្មីៗរបស់ខ្លួន ក្នុងរយៈពេល១៨ខែចុងក្រោយនេះ។ នេះបើយោងតាមកាសែត Bangkok Post ចុះផ្សាយនៅថ្ងៃទី០១ កញ្ញា នេះ។

ដំណឹងនេះអាចចាត់ទុកជាសញ្ញាវិជ្ជមាន សម្រាប់វិស័យអចលនទ្រព្យ មិនត្រឹមនៅក្នុងប្រទេសថៃប៉ុណ្ណោះទេ ប៉ុន្តែគឺសម្រាប់តំបន់ផងដែរ ខណៈវិបត្តិកូវីដ-១៩ មិនដឹងចប់នៅពេលណា។

លោក Chairath Sivapornpan ប្រធានផ្នែកហិរញ្ញវត្ថុ នៃក្រុមហ៊ុនអភិវឌ្ឍន៍អចល​នទ្រព្យដែលចុះបញ្ជីនៅផ្សារមូលបត្រថៃ ខាងលើនេះបានលើកឡើងថា គម្រោងទី១ ដែលគ្រោងចាប់ផ្ដើមនៅត្រីមាសទី៣ ឆ្នាំ២០២២ នឹងមានយូនីតដែលមានតម្លៃចន្លោះពី៥០លានបាត (១,៥៥លានដុល្លារអាមេរិក) ទៅ១០០លានបាត (៣,០៩លានដុល្លារអាមេរិក) ជាផ្នែកមួយដែលក្រុមហ៊ុនមានជំនាញ។

លោកបន្ថែមទៀតថា “លំនៅដ្ឋានប្រណីតប្រភេទផ្ទះដាច់ៗពីគ្នា គឺមានតម្រូវការខ្ពស់។ យើងកំពុងព្យាយាមទិញដីធ្លី២កន្លែងទៀត សម្រាប់ចាប់ផ្ដើមគម្រោងលំនៅដ្ឋាននៅឆ្នាំក្រោយ”។ លោកបន្ថែមថា “តម្លៃគោលដៅរបស់យើង នឹងមានចន្លោះពី១០លានបាត (៣០៩.០០០ដុល្លារអាមេរិក) ទៅ១០០លានបាត (១,៥៥លានដុល្លារអាមេរិក)”។

ចាប់តាំងពីខែកុម្ភៈឆ្នាំមុនមក ក្រុមហ៊ុននេះបានផ្អាកការបើកដំណើរការ គម្រោងខុនដូថ្មីៗ នៅពេលទីផ្សារអចលនទ្រព្យ មានផ្ទះលក់មិនចេញច្រើន ហើយតម្រូវការធ្លាក់ចុះខ្លាំងអំឡុងពេលរីករាលដាលវីរុសកូវីដ-១៩។

លោក Chairath Sivapornpan បានថ្លែងថា ក្រុមហ៊ុននឹងផ្តោតលើស្តុកខុនដូមានស្រាប់ ដែលមានតម្លៃសរុបចំនួន៦,៦២ពាន់លានបាត (២០៥លានដុល្លារ) ពីគម្រោងចំនួន៣។

ប្រធានផ្នែកហិរញ្ញវត្ថុរូបនេះបានគូសបញ្ជាក់ថា “យើងនឹងចាប់ផ្ដើមដំណើរការប៊្រែន (ម៉ាកយីហោ) The Extro ឡើងវិញនៅដំណាច់ឆ្នាំនេះ ដើម្បីឆ្លើយតបទៅនឹងផែនការរបស់រដ្ឋាភិបាល បើកព្រំដែនស្វាគមន៍ជនបរទេសឡើងវិញ។ ប្រទេសថៃ នៅតែជាជម្រើ​សកំពូលសម្រាប់ការទិញផ្ទះទី២ ក្នុងចំណោមអ្នកទិញមកពីហុងកុង និងប្រទេសចិន”។

ក្រុមហ៊ុនអភិវឌ្ឍន៍អចលនទ្រព្យ Singha Estate ក៏បានធ្វើពិពិធកម្មក្នុងវិស័យអចលនទ្រព្យផងដែរ តាមរយៈការហក់ចូលអភិវឌ្ឍវិស័យសួនឧស្សាហកម្ម ដោយគ្រោងបោះទុន១,៨ពាន់លានបាត (៥៥,៧លានដុល្លារអាមេរិក) ដើម្បីអភិវឌ្ឍហេដ្ឋារចនាស   ម្ព័ន្ធ និងបណ្ដាញទឹកភ្លើង នៅក្នុងគម្រោងសួនឧស្សាហកម្មថ្មីមួយ នៅខេត្តអាងថុង (Ang Thong) នៅឆ្នាំក្រោយ៕

ហេតុអ្វីតំបន់មានការអភិវឌ្ឍហេដ្ឋាចនាសម្ព័ន្ធថ្មីៗកាន់តែមានភាពទាក់ទាញវិនិ យោគអចលទ្រព្យ

ដោយៈវឌ្ឍនៈ

ភ្នំពេញៈ ក្នុងរយៈពេលប៉ុន្មានឆ្នាំចុងក្រោយនេះ រាជរដ្ឋាភិបាលកម្ពុជាបានខិតខំ ក្នុង​ការអភិវឌ្ឍហេដ្ឋារចនាសម្ព័ន្ធទូទាំងប្រទេស ដោយបានលើកកម្ពស់ផ្លូវដែលមានស្រា​ប់ផង និងអភិវឌ្ឍន៍ផ្លូវថ្មីៗផង។

ការអភិវឌ្ឍហេដ្ឋារចនាសម្ព័ន្ធថ្មីៗ បានជំរុញឱ្យតម្លៃដីធ្លី នៅតាមបណ្ដោយផ្លូវនោះកាន់តែមានសន្ទុះងើបឡើង។

បើតាមការសង្កេតរបស់អ្នកជំនាញ នៃក្រុមហ៊ុនវាយតម្លៃអចលនវត្ថុកម្ពុជាបានបង្ហាញថា ផ្លូវសំខាន់ៗដែលទើបសាងសង់មួយចំនួនបាន និងកំពុងជំរុញសក្ដានុពលវិនិយោគអចលនទ្រព្យ និងតម្លៃដីធ្លីកាន់តែមានសន្ទុះ ក្នុងនោះគេសង្កេតឃើញថា ផ្លូវជាតិលេខ១០ ដែលតភ្ជាប់ពីខេត្តបាត់ដំបង កាត់តាមខេត្តពោធិ៍សាត់ ឆ្ពោះទៅកាន់ខេត្តកោះកុង កំពុងសាងសង់ តែតម្លៃដីធ្លីចាប់ផ្ដើមហក់ឡើងក្រឺតៗតែម្ដង។

ក្រៅពីនេះ ផ្លូវសំខាន់មួយទៀតនៅក្នុងខេត្តកោះកុង ដែលតភ្ជាប់ពីតំបន់ដាច់ស្រយាលទៅកាន់តំបន់ទីរួមខេត្តកោះកុង ក៏បាននិងកំពុងជំរុញដីធ្លី កាន់តែមានសន្ទុះនិងជាចំណាប់របស់អ្នកវិនិយោគក្នុងវិស័យដីធ្លីផងដែរ ។

យោងតាមការចុះផ្សាយរបស់គេហទំព័រ ក្រុមហ៊ុនអចលនទ្រព្យមួយបានឱ្យដឹងថាគម្រោងផ្លូវជាតិលេខ៣ ដែលតភ្ជាប់ខេត្តសំខាន់៣ នៅក្នុងប្រទេសកម្ពុជាកំពុងតែទទួលបានការចាប់អារម្មណ៍ខ្លាំង ពីសំណាក់វិនិយោគិន ក្នុងការស្វែងរកការវិនិយោគ។

តំបន់តាមបណ្ដោយផ្លូវជាតិថ្មីមួយនេះ នឹងក្លាយជាទិសដៅក្នុងការដឹកជញ្ជូនទំនិញនិងទេសចរដ៏សំខាន់នៅពេលខាងមុខ។ ផ្លូវនេះមានប្រវែង១៩៨គីឡូម៉ែត្រ និងទទឹង៩ម៉ែត្រ  ដែលអភិវឌ្ឍជាផ្លូវក្រាលកៅស៊ូ២ស្រទាប់ និងបានចាប់ផ្ដើមបើកការដ្ឋានសាងសង់កាលពីចុងខែធ្នូ២០១៩ និងចំណាយទឹកប្រាក់សាងសង់ ប្រមាណ១៨៨លានដុល្លារអាមេរិក ហើយមកដល់ពេលនេះ សាងសង់បានប្រមាណជាង៥០ភាគរយ និងបញ្ចប់នៅអំឡុងឆ្នាំ២០២៤ខាងមុខ ។

អ្នកជំនាញនៃវិស័យអចលនទ្រព្យជាច្រើន បានលើកឡើងពីហេតុផលស្រដៀងគ្នាថា ការអភិវឌ្ឍហេដ្ឋារចនាសម្ព័ន្ធជាពិសេសផ្លូវថ្នល់ នឹងបង្កើនភាពទាក់ទាញដល់វិនិយោ​គិនក្នុងការបណ្ដាក់ទុនវិនិយោគ ជាក់ស្ដែងកន្លងមកទីណា មានការអភិវឌ្ឍគម្រោងហេដ្ឋារចនាសម្ព័ន្ធ ទីនោះតែងតែទទួលបានគម្រោងវិនិយោគទៅដល់ផងដែរ។

លោកទេសរដ្ឋមន្រ្តីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនក៏បានឱ្យដឹងផងដែរថា ដោយសារតែហេដ្ឋារចនាសម្ព័ន្ធ មានសារសំខាន់ដល់ការធ្វើដំណើររបស់ពលរដ្ឋនិងទេសចរ ក៏ដូចជា វិនិយោគិនបែបនេះ ទើបរាជរដ្ឋាភិបាលបានខិតខំក្នុងការសន្សំថវិកាផងនិងកៀងគរថវិកា ពីខាងក្រៅប្រទេសផង ដើម្បីសាងសង់ផ្លូវកាន់តែច្រើននៅក្នុងប្រទេសកម្ពុជា តភ្ជាប់ពីភ្នំពេញទៅបណ្ដាខេត្ត និងពីបណ្ដាខេត្តទៅបណ្ដាខេត្តផ្សេងៗ។

ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសន៍ថា ហេដ្ឋារចនាសម្ព័ន្ឋជាចំណុចគន្លឹះមួយ ដែលទាក់ទាញការអភិវឌ្ឍ និងការវិនិយោគពីសំណាក់វិនិយោគិនជាតិ និងអន្តរជាតិ ដោយមើលឃើញកំលាំងចលករនេះហើយ ទើបរាជរដ្ឋាភិបាលបានវិនិយោគ ទឹកប្រាក់រាប់រយលានដុល្លារជារៀងរាល់ឆ្នាំ ដើម្បីសម្រួល​ការដឹកជញ្ជូនផង លើកកំពស់ជីវភាពប្រជាពលរដ្ឋផង ធ្វើឲ្យមានលំហូរប្រជាពលរដ្ឋទៅកាន់គ្រប់ទីកន្លែងផង និងធ្វើសមាហរណកម្មផ្ទៃក្នុងប្រទេសផង។

លោកបន្តថា “ហេដ្ឋារចនាសម្ព័ន្ឋត្រូវបានរាជរដ្ឋាភិបាល ចាត់ទុកជាសសៃឈាម​សេដ្ឋកិច្ចជាតិ ហេតុនេះទើបការវិនិយោគលើហេដ្ឋារចនាសម្ព័ន្ឋ ទឹក ភ្លើង ផ្លូវ និងធនធានមនុស្ស នៅតែជាគោលនយោបាយអាទិភាពរបស់សម្តេចតេជោ”៕

ព្រលានយន្តហោះChangi  airport របស់សិង្ហបុរីខាតបង់ប្រាក់៧០៨លានដុល្លារជាការធ្លាក់ចុះលើកដំបូងបង្អស់

ដោយៈសុជាតា

សឹង្ហបុរីៈ ព្រលានយន្តហោះលំដាប់កំពូលរបស់ពិភពលោក Changi  របស់ប្រទេសសិង្ហបុរី បានធ្លាក់ចុះប្រាក់ចំណូលជាលើកដំបូង សម្រាប់ឆ្នាំសាពើពន្ធដែលបញ្ចប់នៅថ្ងៃទី ៣១ ខែមិនា ឆ្នាំ ២០២១។

ជាមួយនឹងអ្នកធ្វើដំណើរមានត្រឹមតែ១,១លាននាក់ បានឆ្លងកាត់ប្រទេសនេះ ដោ​យ​​សារតែវិបត្តិ Covid19  ដែលប៉ះពាល់ដល់ការធ្វើដំណើរតាមផ្លូវអាកាស។

តួលេខអ្នកដំណើរនេះ បានតំណាងអោយការធ្លាក់ចុះ៩៨ភាគរយ បើប្រៀបធៀបនឹងរយៈពេលដូចគ្នាឆ្នាំមុន។

ទំហំទឹកប្រាក់ខាតបង់ចំពោះភាគហ៊ុនិក គឺមានប្រមាណ៩៥៤លានដុល្លារ សីង្ហបុរី ( ៧០៨ លានដុល្លារ) ពោលគឺធ្លាក់ចុះប្រមាណ៤៣៥លានដុល្លារសិង្ហបុរី ( ៣២៣ លានដុល្លារ)នៅឆ្នាំហិរញ្ញវត្ថុ២០១៩ និង២០២០ កន្លងទៅនេះ។

បើតាមរបាយការណ៍ប្រចាំឆ្នាំរបស់ក្រុមហ៊ុន Chagi Airport បានបង្ហាញអោយដឹងថា ចំនួនជើងហោះហើរបានឆ្លងកាត់ ព្រលានយន្តហោះនេះ បានធ្លាក់ចុះប្រមាណ៨០ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។ ហើយការលក់សម្បទានបានបាត់បង់សឹងតែ៩០ភាគរយ៕

រដ្ឋាភិបាលចិនបាននិងកំពុងចាត់វិធានការក្ដៅកំណត់ថ្លៃឈ្នួលផ្ទះក្នុងទីក្រុងនានា

ដោយៈសុខុម

ប៉េកាំង: រដ្ឋាភិបាលចិនបានប្រកាសថា ថ្លៃឈ្នួលផ្ទះនៅតាមទីក្រុងនានា មិនត្រូវឡើងលើសពី៥%ឡើយក្នុងមួយឆ្នាំ។ នេះបើយោងតាមសារព័ត៌មាន CNA ចុះផ្សាយនៅថ្ងៃទី០១ កញ្ញា នេះ។

នេះគឺជាចំណាត់ការដំបូង មិនធ្លាប់មានរបស់រដ្ឋាភិបាលចិន នៅក្នុងការកំណត់ថ្លៃឈ្នួលផ្ទះ ហើយវាជាផ្នែកមួយនៃកិច្ចខិតខំប្រឹងប្រែង ដើម្បីធ្វើឱ្យលំនៅដ្ឋានកាន់តែមានតម្លៃសមរម្យ ដែលពលរដ្ឋចិនទូទៅអាចមានលទ្ធភាពទិញ ឬជួល។

ស្ថានភាពលំបាករបស់ពលរដ្ឋ ដែលមានប្រាក់ចំណូលទាប បានក្លាយជាចំណុចស្នូល នៃគោលនយោបាយរបស់រដ្ឋាភិបាលចិន ស្របពេលប្រធានាធិបតីចិន លោក ស៊ី ជីនភីង បានប្ដេជ្ញាកាត់បន្ថយគម្លាតកម្រិតជីវភាព ឬវិសមភាពសង្គមរបស់ពលរដ្ឋ ដើម្បីឆ្ពោះឈានទៅរក “ភាពរុងរឿងទាំងអស់គ្នា”។

ថ្លៃឈ្នួលផ្ទះក្នុងទីក្រុងធំៗនានា បានហក់ឡើងខ្ពស់កាលពីរដូវក្តៅ ដែលមួយអន្លើដោយសារនិស្សិតទើបបញ្ចប់ការសិក្សា សម្រុកចូលទៅក្នុងទីក្រុងទាំងនោះ ដើម្បីស្វែងរកការងារធ្វើ។ ក្រុងប៉េកាំង និងក្រុងស៊ឹនជិន (Shenzhen) បានចាប់ផ្តើមអនុវត្តវិធានការនានានៅឆ្នាំនេះដើម្បីជំរុញការផ្គត់ផ្គង់ផ្ទះជួល។

ក្នុងរយៈពេលប៉ុន្មានខែចុងក្រោយនេះ ទីក្រុងធំៗបានចេញសេចក្ដីព្រាងវិធានស្ដីពីការជួលផ្ទះ ដើម្បីផ្ដល់ការការពារកាន់តែប្រសើរ លើសិទ្ធិរបស់អ្នកជួល រួមទាំងបម្រាមមិនឱ្យម្ចាស់ផ្ទះ យកប្រាក់កក់លើសពីថ្លៃឈ្នួលផ្ទះមួយខែផងដែរ។

អាជ្ញាធរក៏នឹងធ្វើការបង្ក្រាបផងដែរ ទៅលើការអនុវត្តបំពានពីសំណាក់ក្រុមហ៊ុនអចលនទ្រព្យ និងPlatform អចលនទ្រព្យតាមអនឡាញ ដូចជា ការយកថ្លៃលើសហួសហេតុពីអ្នកជួលផ្ទះជាដើម។

វិធានទាំងនេះគឺជាផ្នែកមួយ នៃវិធានការបោសសម្អាតទីផ្សារអចលនទ្រព្យឱ្យស្អាតនៅរយៈពេល៣ឆ្នាំក្រោយ ដើម្បីលុបបំបាត់ភាពមិនប្រក្រតីនានា ដែលបានធ្វើឱ្យតម្លៃផ្ទះហក់ឡើងខ្ពស់ខ្លាំងដែលពលរដ្ឋចិន ទូទៅគ្មានលទ្ធភាពទិញសម្រាប់រស់នៅ៕

តោះមកទស្សនារូបភាពព្រលានយន្តហោះតម្លៃ៩០០លានដុល្លារនៅខេត្តសៀមរាប

ដោយៈគង់ សូរិយា

សៀមរាបៈ ព្រលានយន្តហោះអន្តរជាតិខេត្តសៀមរាប សាងសង់បានប្រមាណ៥០ភាគរយហើយរហូតមកទល់ពេលនេះ។

ព្រលានយន្តហោះ ស្ថិតក្នុងស្រុកសូទ្រនិគមនេះ សាងសង់លើផ្ទៃដីប្រមាណ៧០០ហិកតា ដែលគ្រោងនឹងបញ្ចប់ការសាងសង់នៅដើមឆ្នាំ២០២៣ខាងមុខនេះ។

តោះមកទស្សនារូបភាពថតពីលើអាកាស របស់ព្រលានយន្តហោះ ដែលបាននិងកំពុងសាងសង់ និងវិនិយោគដោយក្រុមហ៊ុនយូណាន មកពីប្រទេសចិននេះទាំងអស់គ្នា៕

រដ្ឋមន្ត្រីសេដ្ឋកិច្ចៈ វិស័យឯកជនដើរតួនាទីសំខាន់ក្នុងការធ្វើបរិវត្តកម្មឌីជីថល ក្នុងអាជីវកម្ម

ដោយៈវឌ្ឍនៈ

ភ្នំពេញៈ ទោះបីជារាជរដ្ឋាភិបាលបាន និងកំពុងខិតខំធ្វើបរិវត្តកម្មឌីជីថល ប៉ុន្តែការងារកសាងនិងអភិវឌ្ឍសេដ្ឋកិច្ច និងសង្គមឌីជីថល និងមិនអាចសម្រេចឡើយ បើតួអង្គពាក់ព័ន្ធនៃប្រព័ន្ធអេកូឡូស៊ី មិនដើរស្រប់គ្នា និងមិនចាប់ផ្ដើមចាប់យកបច្ចេកវិទ្យាឌីជីថលនេះមកប្រើប្រាស់ ។ នេះបើតាមលោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុថ្លែងនៅព្រឹកថ្ងៃទី១កញ្ញា២០២១នេះ។

លោកបន្តថា វិស័យឯកជនដើរតួនាទីជាតួអង្គដ៏សំខាន់មួយ ដែលត្រូវចាប់ផ្ដល់ធ្វើបរិវត្តនកម្មឌីជីថល ក្នុងអាជីវកម្មរបស់ខ្លួន តាមរយៈការប្រើប្រាស់បច្ចេកវិទ្យាឌីជីថល ក្នុងប្រតិបត្តិការអាជីវកម្ម និងសម្រាប់ជាមធ្យោបាយ ដើម្បីពង្រីកទីផ្សាររបស់ខ្លួន ក៏ដូចជាការលក់ដូរអនឡាញ និងពាណិជ្ជកម្មតាមប្រព័ន្ធអេឡិចត្រូនិកជាដើម”។

លោកបានផ្ដល់ជាអនុសាសន៍មួយចំនួន ដល់វិស័យឯកជនក្នុងការចាប់ផ្ដើមគិតគូរធ្វើបរិវត្តកម្មឌីជីថលរួមមាន ទី១ គួរផ្លាស់ប្តូរផ្នត់គំនិត និងរបៀបរបបធ្វើការតាមយុគបច្ចេកវិទ្យាឌីជីថល ព្រោះការធ្វើបរិវត្តកម្មឌីជីថល មិនមែនជាដំណើរការដែលធ្វើតែមួយលើកឬមួយពេលនោះទេ ពោលគឺជាដំណើរការ ដែលត្រូវធ្វើជាប្រចាំ។ ដូច្នេះយើងត្រូវពង្រឹងសមត្ថកភាពសម្របខ្លួន និងសមត្ថភាពផ្លាស់ប្តូររហ័ស ដើម្បីរកដំណោះស្រាយថ្មីៗធ្វើឱ្យបរិវត្តកម្មឌីជីថល កាន់តែមានប្រសិទ្ធភាព និងមានសន្ទុះលឿន។

ទី២ កំណត់ចក្ខុវិស័យរបស់ខ្លួន ក្នុងការប្រើប្រាស់បច្ចេកវិទ្យាឌីជីថល និងធ្វើការវាយតម្លៃឡើយវិញ នូវសមត្ថភាពនិងធានធានរបស់ខ្លួន ទី៣ កំណត់អាទិភាពនៃការធ្វើឌីជីថលូបនីយកម្ម ទាំងលើផ្នែកប្រតិបត្តិការនិងផ្នែកទីផ្សារ និងទី៤ ពង្រឹងកិច្ចសហប្រតិបត្តិការ និងសហបង្កើតថ្មី រវាងរដ្ឋនិងឯកជន ឬឯកជននិងឯកជននិងពនិត្យនិងស្វងរកកម្មវិធីគាំទ្រផ្សេងៗរបស់រាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុនិងក្រសួង ស្ថាប័នពាក់ព័ន្ធនឹងដាក់ឱ្យមានកម្មវិធីគាំទ្រថ្នាក់ជាតិ ដល់សហគ្រាសធុនតូចនិងមធ្យម ក្នុងការចាប់យកបច្ចេកវិទ្យាឌីជីថល ដែលកម្មវិធីនេះ មានការគិតគូរជាកញ្ចប់ និងគ្រប់ជ្រុងជ្រោយ ទាំងទិដ្ឋភាពហិរញ្ញវត្ថុបច្ចេកទេសនិងជំនាញ។

លោកបន្ថែមថា “តាមរយៈប្រព័ន្ធចុះបញ្ជីតាមអេឡិចត្រូនិក នឹងជួយសម្រួលដល់ធុរជន និងវិនិយោគិនក្នុងការចុះបញ្ជីអាជីវកម្ម ហើយនឹងទាក់ទាញដល់ធុរជន និងវិនិយោគិនដើម្បីធ្វើការបណ្ដាក់ទុនវិនិយោគ និងបង្កើតអាជីវកម្មនៅក្នុងប្រទេសកម្ពុជា”៕

Grand City Siem Reapឱកាសនៃការកសាងទីក្រុងថ្មីជាមួយនឹងសក្តានុពលមូលដ្ឋាន

ដោយៈគង់ សូរិយា

ភ្នំពេញៈ ការអនុម័តគំរោងGrand City Siem Reapរបស់សម្តេចតេជោបាននិងកំពុងធ្វើឲ្យប្រជាពលរដ្ឋនៅក្បែរតំបន់នេះ ទទួលបានផលប្រយោជន៍រួចទៅហើយ បើទោះបីជាទីក្រុងនេះមិនទាន់លេចចេញជារូបរាងក្តី។

ប៉ុន្តែចំណុចសំខាន់នៃគំរោងនេះ ស្ថិតនៅលើផ្លូវវែងឆ្ងាយនៅឡើយ បើទោះបីជាព្រលានយន្តហោះថ្មីកំពុងសាងសង់យ៉ាងសកម្ម ដែលរំពឹងនឹងបញ្ចប់នៅឆ្នាំ២០២៣ខាងមុខនេះក្តី។

អ្នកជំនាញនិងវិភាគពីអចលនទ្រព្យលំដាប់អន្តរជាតិ លោកស្រីអាន សុធីតាបានមានប្រសាសន៍ឲ្យដឹងនាព្រឹកថ្ងៃទី១ កញ្ញានេះថា ការកសាងទីក្រុងថ្មីនេះជារឿងល្អ ដែលការរៀបចំតំបន់ថ្មីបែបនេះ រដ្ឋាភិបាលមានភាពងាយស្រួល ក្នុងការរៀបចំហេដ្ឋារចនាស  ម្ព័ន្ឋបែបSmart City ប៉ុន្តែការរៀបចំបែបនេះវាត្រូវចំណាយដើមទុនច្រើន និងងាយស្រួល​រៀបចំបើធៀបនឹងរាជធានីភ្នំពេញ។

លោកស្រីបន្តថា “ដើម្បីអភិវឌ្ឍន៍ទីក្រុងនេះបានលឿន កម្ពុជាត្រូវការធនធានបីសំខាន់ដូចជា ធនធានមនុស្ស បច្ចេកវិទ្យា និងធនធានហិរញ្ញវត្ថុ”។

បច្ចុប្បន្នតំបន់ស្ថិតក្នុងប្លុកទីក្រុងថ្មីនេះ ជាដីទំនេរ វាលស្រែ ប៉ុន្តែតំបន់ជុំវិញមានគំរោងអភិវឌ្ឍន៍លំនៅដ្ឋានមួយចំនួនបណ្តើរៗហើយ។

សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានអនុម័តរួចហើយ នូវគម្រោងបង្កើតទីក្រុងGrand City Siem Reap ដែលមានទីតាំងជិតព្រលានយន្តហោះអ្តរជាតិថ្មី នៃខេត្តសៀមរាប។

រដ្ឋមន្រ្តីក្រសួងទេសចរណ៍ លោកបណ្ឌិតថោង ខុនធ្លាប់បានមានប្រសាសន៍ឲ្យដឹង ថា Master Planរបស់ទីក្រុងថ្មីនេះ ត្រូវបានសម្តេចតេជោអនុម័តរួចហើយ ស្របពេលក្រសួងបាននិងកំពុងផ្ញើរឯកសារ និងផែនការអភិវឌ្ឍន៍ទីក្រុងនេះ ទៅកាន់ស្ថាប័នពាក់ព័ន្ឋពិនិត្យ​ ព្រោះការងារនេះត្រូវធ្វើជាអន្តរក្រសួង។លោកបន្តថា ទីក្រុងថ្មីនេះ មានទីតាំងនៅក្បែរព្រលានយន្តហោះថ្មី ក្នុងស្រុកសូទ្រនិគម ខេត្តសៀមរាប ដែលជាតំបន់មិនស្ថិតក្រោមការ​ការពាររបស់់អាជ្ញាធរអប្សរានោះទេ។

លោកបន្តថា “រហូតមកទល់ពេលនេះ ទីក្រុងថ្មីនេះមិនទាន់មានសកម្មភាពអភិវឌ្ឍ​ន៍ជាដុំកំភួនអ្វីនៅឡើយទេ ខណៈការរៀបចំសិក្ខាសាលាផ្សព្វផ្សាយ ពីផែនការនេះត្រូវបានផ្អាក ដោយសារវិបត្តិកូវីដ១៩”។ លោកបន្តថា “ទោះជាយ៉ាងណា យើងមិនទាន់អាច​បញ្ជាក់ពីទំហំផ្ទៃដី និងផែនការលំអិតរបស់ទីក្រុងនេះបាននៅឡើយទេ ប៉ុន្តែអ្វីៗបានរៀបចំរួចរាល់ហើយ ព្រោះសម្តេចបានអនុម័តរួចហើយ”។

លោករដ្ឋមន្រ្តីបានបន្តថា បច្ចុប្បន្នការងារស្ថាបនាផ្លូវចំនួន៣៨ខ្សែ នៅក្នុងទីក្រុងសៀមរាប បាននិងកំពុងជម្រុញយ៉ាងសកម្ម ដើម្បីលើកកំពស់សោភ័ណភាពក្រុង ទាក់ទាញទេសចរណ៍ជាតិ និងអន្តរជាតិ។

រដ្ឋាភិបាលបាន និងកំពុងសហការជាមួយក្រុមហ៊ុនយូណាន មានមូលដ្ឋាននៅប្រ​ទេសចិន ដើម្បីដំណើរការសាងសង់ព្រលានយន្តហោះខ្នាតអន្តរជាតិ នៅក្នុងស្រុកសូទ្រ​និគម ដែលស្ថិតនៅលើផ្ទៃដី៧០០ហិកតា និងគ្រោងបោះទុនវិនិយោគប្រមាណ៩០០លានដុល្លារអាមេរិក។ តាមផែនការព្រលានយន្តហោះនេះ នឹងបញ្ចប់ការសាងសង់នៅដើមឆ្នាំ២០២៣ខាងមុខនេះ៕

ក្រុមហ៊ុនចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានវិទ្យាកើនដល់៧៧១៥ជាមួយ ទុនវិនិយោគជាង៣ពាន់លានដុល្លារអាមេរិក

ដោយៈវឌ្ឍនៈ

ភ្នំពេញៈ ការចុះបញ្ជីតាមប្រព័ន្ធអនឡាញ ឬការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន បានជួយឱ្យកម្ពុជាទទួលបានការវិនិយោគ និងទទួលក្រុមហ៊ុនចុះបញ្ជីថ្មីៗជាបន្តបន្ទាប់ ជាក់ស្ដែងចាប់តាំងពីបង្កើតនូវប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មានវិទ្យារហូតដល់ត្រឹមថ្ងៃទី២៤ សីហា២០២១ មានក្រុមហ៊ុនចុះបញ្ជី តាមប្រព័ន្ធនេះចំនួន៧៧១៥ក្រុមហ៊ុន គិតជាទឹកប្រាក់ចុះបញ្ជីមានរហូត ដល់ជិត៣ពាន់លានដុល្លារអាមេរិក។

លោកអគ្គបណ្ឌិតសភាចារ្យអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុថ្លែងនៅក្នុងពិធីប្រកាសដាក់ឱ្យប្រើប្រាស់ជាផ្លូវការ ថ្នាលចុះបញ្ជីអាជីវកម្មតាមប្រព័ន្ធបច្ចេកវិទ្យាព័ត៌មានដំណាក់កាលទី២នៅថ្ងៃទី១ កញ្ញា២០២១នេះថា វិស័យចំនួន៥ ដែលមានទំហំដើមទុនធំជាងគេ រួមមាន ទី១ វិស័យសំណង់មានចំនួន២៥,៣២ភាគរយ ទី២អាហរ័ណនីហរ័ណ ទិញលក់ជួសជុលយានយន្ត និងទោចក្រយានយន្តគ្រប់ប្រភេទចំនួន១៦,៤៤ភាគរយ ទី៣ សកម្មភាពអចលនវត្ថុមានចំនួន១៥,៥៣ភាគរយ ទី៤ កម្មន្តសាលមានចំនួន១៤,៣ភាគរយ និងទី៥ សកម្មភាពហិរញ្ញវត្ថុ និងធានារ៉ាប់រងមានចំនួន១៣,២២ភាគរយ ។

 

លោកបន្ថែមថា ដំណាក់កាលទី១នៃការចុះបញ្ជីអាជីវកម្ម តាមប្រព័ន្ធបច្ចេកវិទ្យាព័ត៌មានវិទ្យា បានផ្ដោតជាសំខាន់លើនីតិវិធីចាំបាច់ជាមូលដ្ឋាន ដែលគ្រប់ក្រុមហ៊ុនសហគ្រាសត្រូវបំពេញ ដើម្បីធ្វើការចុះបញ្ជីអាជីវកម្មរបស់ខ្លួនជាផ្លូវការ និងស្របច្បាប់ ដែលមានជាអាទិ៍ ការចុះបញ្ជីពាណិជ្ជកម្មជាមួយក្រសួងពាណិជ្ជកម្ម ការចុះបញ្ជីពន្ធដារជាមួយអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ និងការផ្ដល់សេចក្ដីប្រកាសជូនដំណឹងពីការបើកសហគ្រាស ទៅក្រសួងការងារ និងបណ្ដុះបណ្ដាលវិជ្ជាជីវៈ។

លោកបានបន្តថា ជាមួយនឹងភាពជោគជ័យនៃដំណាក់កាលទី១ រាជរដ្ឋាភិបាលបានពង្រីកវិសាលភាព ទៅដំណាក់កាលទី២ថែមទៀត ដើម្បីបន្តសម្រួលដល់ធុរជន តាមរយៈការរៀបចំថ្នាលបច្ចេកវិទ្យាព័ត៌មាន ឱ្យមានលក្ខណៈគ្រប់ជ្រុងជ្រោយ និងប្រកបដោ​យប្រសិទ្ធភាពខ្ពស់ តាមលំអានការងារ និងគោលការណ៍ ដែលយើងបានអនុវត្តន៍ក្នុងដំណាក់កាលទី១។

លោកឧបនាយករដ្ឋមន្រ្តីបានបញ្ជាក់ថា យ៉ាងណាមិញដំណាក់កាលទី២នេះ ផ្ដោតជាសំខាន់ លើការស្នើសុំអាជ្ញាប័ណ្ណនិងលិខិតអនុញ្ញាតផ្សេងៗ ទៅតាមប្រភេទនៃសកម្ម​ភាពអាជីវកម្ម ដែលមានការចូលរួមពីក្រសួងស្ថាប័នចំនួន៤ រួមមាន ក្រសួងឧស្សាហកម្ម វិទ្យាសាស្ត្រ និងនវានុវត្តន៍ ក្រសួងទេសចរណ៍ ក្រសួងប្រៃសណីយ៍ និងទូរគមនាគមន៍និងនិយ័តករអាជីវកម្មអចលនវត្ថុ និងបញ្ចាំនៃអាជ្ញាធរសេវាហិរញ្ញវត្ថុមិនមែនធនាគារ។

ការជ្រើសរើសយកក្រសួងស្ថាប័នចំនួន៤នេះ ចូលក្នុងដំណាក់កាលទី២នេះ គឺចូលក្នុងដំណាក់កាល នៃវិស័យដែលមានការស្នើសុំថ្មី ឬស្នើសុំបន្តសុពលភាពនៃសកម្ម​ភាពធុរកិច្ចកន្លងមកក្នុងចំនួនច្រើន៕

ក្រសួងពាណិជ្ជកម្មជំរុញឱ្យផ្សារបរទេសនៅកម្ពុជាទទួលលក់ផលិតផលខ្មែរ

ដោយៈលក្ខិណា

ភ្នំពេញៈ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា លោកប៉ែន សុវិជាតិបានឱ្យដឹងថា ក្រសួងពាណិជ្ជកម្ម បានជំរុញឱ្យផ្សារនាំម៉ាកយីហោពីបរទេ​សចូលកម្ពុជា ទទួកលក់នូវផលិតផលផង ដើម្បីជាចំណែកមួយនៃទីផ្សាររបស់ផលិត​ផលកម្ពុជា ។

ជាមួយគ្នានេះ ក្រសួងក៏ស្នើដល់អ្នកផលិតក្នុងស្រុក ពង្រឹងគុណភាពស្ដង់ដារផលិ​តផលរបស់ខ្លួន ដើម្បីដាក់លក់លើទីផ្សារ Franchise បរទេសទាំងនេះ ព្រោះថាកាលណាផលិតផលរបស់ខ្មែរមានគុណភាពល្អ មានគ្រប់តម្រូវការ និងមាននិរន្ដរភាពនៃការផ្គត់ផ្គង់ មិនយូរមិនឆាប់នោះទេ ផលិតផលខ្មែរនឹងមានកេរ្ដិ៍ឈ្មោះល្អ ព្រមទាំងមានការចាប់អារម្ម​ណ៍យ៉ាងច្រើនពីសាធារណជន ។

លោកបន្តថា “កម្ពុជាតែងតែជំរុញឱ្យទីផ្សារទាំងនោះ ផ្សារ Franchise បរទេស ទទួលលក់នូវផលិតផលកម្ពុជា។ ជាក់ស្ដែងចំពោះទំនិញស្រស់ ដូចជា បន្លែ ផ្លែឈើ និងអាហារកែច្នៃខ្លះ មិនអាចនាំចូលបាននោះទេ ច្បាស់ជាត្រូវការទិញពីប្រជាកសិករនៅកម្ពុជា”។

លោកបន្ថែមថាកន្លងមក ក្រសួងពាណិជ្ជកម្មក៏បានសហកា រនិងបានចុះហត្ថលេ​ខាជាមួយផ្សារទំនើប មកពីក្រៅប្រទេសដូចជាផ្សារ ម៉ាក្រូជាដើម ទទួលទិញបន្លែ ផ្លែឈើ ត្រីសាច់ គ្រឿងសមុទ្រពីកម្ពុជា ដោយមិនបានបញ្ជាទិញទំនិញទាំងស្រុង ពីប្រទេសដើមនោះឡើយ ។

ជាមួយគ្នានេះ លោកសង្ឃឹមថា ផ្សារម៉ាតមកប្រទេសថៃ 7-Eleven នឹងទទួលយកទំនិញក្នុងស្រុកលក់ក្នុងផ្សារម៉ាតមួយនេះផងដែរ ។

បើតាមអ្នកផលិតនូវទំនិញជាច្រើន នៅក្នុងប្រទេសកម្ពុជា កំពុងតែពិបាកក្នុងការរកទីផ្សារសម្រាប់លក់ផលិតផល ជាក់ស្ដែងផ្លែមៀនកម្ពុជាជាច្រើនត្រូវគាំងទីផ្សារ នៅក្នុងបរិបទកូវីដនេះ ហើយបញ្ហាក្រៅពីនោះ គឺកសិករដែលចិញ្ចឹមត្រី ចិញ្ចឹមាន់ បានក៏ជួបប្រទះនឹងបញ្ហាទីផ្សារលក់មិនចេញផងដែរ ។

ដោយសារតែផលិតបានទំនិញមិនមានទីផ្សារ និងតម្រូវការនៅលើទីផ្សារបានធ្វើ ឱ្យម្ចាស់អាជីវកម្មជាច្រើន បានជួបនឹងវិបត្តិហិរញ្ញវត្ថុ មិនមានសាច់ប្រាក់សម្រាប់បង្វិលក្នុងដំណើរការអាជីវកម្ម ហើយម្ចាស់អាជីវកម្មជាច្រើន ក៏បាននិងកំពុងរត់រកការជួយពីស្ថាប័នហិរញ្ញវត្ថុ សម្រាប់គាំទ្រដំណើរការអាជីវកម្មបន្តទៀតផងដែរ៕