Harbor Property ដាក់ដំណើរការប្រព័ន្ធគ្រប់គ្រង​អចលនទ្រព្យ​ CRM​ ជាផ្លូវការហើយ

ដោយៈសហសេវិក

ភ្នំពេញៈ តើអ្នកធ្លាប់ដឹងទេថាការប្រើប្រាស់ ប្រព័ន្ធគ្រប់គ្រងអចលនទ្រព្យ CRM មានអត្ថប្រយោជន៍អ្វីខ្លះសម្រាប់ក្រុមហ៊ុន ឫភ្នាក់ងារអចលនទ្រព្យ? ក្នុងនាមជាក្រុមហ៊ុន ឫភ្នាក់ងារអចលនទ្រព្យ វាប្រាដកណាស់ថាពួកគេចង់ឱ្យអចលនទ្រព្យ ក្នុងដៃរបស់ខ្លួន ទៅដល់អតិថិជន គោលដៅអោយបានកាន់តែលឿន ប្រកបដោយប្រសិទ្ធិភាពខ្ពស់​​ និងងាយស្រួលក្នុងការគ្រប់គ្រងការងារផងដែរ។

យើងខ្ញុំសូមណែនាំលោកអ្នកអំពីប្រព័ន្ធគ្រប់គ្រងអចលនទ្រព្យមួយរបស់គេហទំព័រចលនទ្រព្យ Harbor Property ដែលមានឈ្មោះថា​ ប្រព័ន្ធគ្រប់គ្រងអចលនទ្រព្យ CRM ឬ​ Property CRM។

តើប្រព័ន្ធគ្រប់គ្រងអចលនទ្រព្យ CRM គឺជាអ្វី? ​​ប្រព័ន្ធគ្រប់គ្រងអចលនទ្រព្យ CRM គឺជាប្រព័ន្ធ ដែលអាចគ្រប់គ្រងរាល់ទិន្ន័យអចលនទ្រព្យ​​​ និងអាចគ្រប់គ្រងបុគ្គលិកផ្នែកលក់នីមួយ​ក្នុងក្រុមហ៊ុន ឫភ្នាក់ងារអចលនទ្រព្យបានទាំងស្រុង និងប្រកបដោយប្រសិទ្ធភាពខ្ពស់។

ចំពោះចំណុចពិសេសៗរបស់ប្រព័ន្ធគ្រប់គ្រងអចលនទ្រព្យ CRM​ មានខាងក្រោម៖
•​ អាចបង្កើតគេហទំព័រក្រុមហ៊ុនរបស់លោកអ្នក ដោយសហការជាមួយក្រុមហ៊ុន Harbor Property
• គ្រប់គ្រងរាល់ទិន្ន័យអចលនទ្រព្យ​​របស់លោកអ្នកបានយ៉ាងល្អ
• ងាយស្រួលក្នុងការគ្រប់គ្រងនូវតម្រូវការអតិថិជននៅក្នុងដៃ
• គ្រប់គ្រងក្រុមការងារផ្នែកលក់នីមួយៗ និងសកម្មភាពប្រចាំថ្ងៃ
របស់ពួកគេឱ្យកាន់តែមានប្រសិទ្ធភាពខ្ពស់ជាងមុន
• ចំណេញពេលវេលាក្នុងការធ្វើយុទ្ធសាស្រ្តទីផ្សារ​​​ ដោយអ្នកគ្រាន់តែបញ្ចូលអចលនទ្រព្យតែមួយកន្លែង តែវាអាចចូលទៅកាន់បណ្ដាញផ្សព្វផ្សាយដល់ទៅ​៣កន្លែងដូចជាបណ្ដាញសង្គម​ គេហទំព័រក្រុមហ៊ុនរបស់លោកអ្នក​ និងគេហទំព័រ Harbor Property ។

គឺចំណុចពិសេសៗនៅខាងលើទាំងអស់នេះហើយ ដែលប្រព័ន្ធគ្រប់គ្រងអចលនទ្រព្យ CRM ​នឹងអាចជួយជាប្រយោជន៍ ដល់ក្រុមហ៊ុនលោកអ្នក អោយកាន់តែមានភាពរីកចម្រើនជាច្រើនថែមទៀតនៅលើទីផ្សារអចលនទ្រព្យមួយនេះ។

លោកអ្នកអាចធ្វើការសាកសួរព័ត៌មានលម្អិតបន្ថែមមកកាន់ +855 967876902 (Telegram) / +855 66886633។

ប្រភព៖ Harbor Property

 

ក្រុមហ៊ុន LG Display បោះទុនវិនិយោគបន្ថែមចំនួន១,៤ពាន់លានដុល្លារអាមេរិកនៅប្រទេសវៀតណាម

ដោយៈសុខុម

ហាណូយ: រដ្ឋាភិបាលវៀតណាម បានផ្តល់អាជ្ញាប័ណ្ណដល់ក្រុមហ៊ុន LG Display របស់កូរ៉េខាងត្បូង ដែលនឹងបោះទុនរវិនិយោគបន្ថែម នៅទីក្រុងកំពង់ផែភាគខាងជើង Haiphong រហូតដល់ទៅ១,៤ពាន់លានដុល្លារអាមេរិក។ នេះបើយោងតាមការចុះផ្សាយរបស់សារព័ត៌មាន CNA។

គណៈកម្មាធិការប្រជាជននៃទីក្រុង Haiphong បានចេញសេចក្ដីថ្លែងការណ៍កាលពីថ្ងៃអង្គារ ទី៣១ សីហា ថា ការវិនិយោគបន្ថែមនេះនឹធ្វើឱ្យក្រុមហ៊ុន LG Display មានលទ្ធភាពបង្កើនទិន្នផល នៃការផលិតអេក្រង់ទូរទស្សន៍ប្រភេទ OLED នៅឯរោងចក្ររបស់ខ្លួនក្នុងទីក្រុងនេះ ចន្លោះពី១៣ទៅ១៤លានអេក្រង់ក្នុងមួយខែ បើធៀបនឹងបច្ចុប្បន្នដែលអាចផលិតបានចន្លោះពី៩,៦ទៅ១០,១លានអេក្រង់។

ការបោះទុនវិនិយោគបន្ថែម ចំនួន១,៤ពាន់លានដុល្លារអាមេរិកនេះ នឹងធ្វើឱ្យទំហំវិនិយោគសរុបរបស់ក្រុមហ៊ុន LG Display នៅក្នុងប្រទេសវៀតណាម ឈានដល់៤.៦៥ពាន់លានដុល្លារអាមេរិក។

ទោះជាយ៉ាងណា ក្រុមហ៊ុនមួយនេះមិនបានឆ្លើយតបឡើយ នៅពេលសុំឱ្យឆ្លើយបំភ្លឺជុំវិញករណីនេះ។ LG Display ស្ថិតក្នុងចំណោមក្រុមហ៊ុនផលិត និងផ្គត់ផ្គង់អេក្រង់ប្រភេទ TFT-LCD អេក្រង់ប្រភេទ OLED និងអេក្រង់ប្រភេទកាច់បត់បានធំៗបំផុត របស់ពិភពលោក។

គណៈកម្មាធិការប្រជាជននៃក្រុង Haiphong បានគូសបញ្ជាក់ថា ការវិនិយោគបន្ថែមនេះ នឹងផ្ដល់ការងារថ្មីចំនួន១០,០០០កន្លែង និងបង្កើតប្រាក់ចំណូលនាំចេញបានចំនួន៦,៥ពាន់លានដុល្លារអាមេរិក ក្នុងមួយឆ្នាំៗ៕

ប្រធាន CVEA បង្ហាញវិធីសាស្រ្តប្រើប្រាស់បំណុលសម្រាប់ទាញយកប្រយោជន៍ពីវិស័យអចលនទ្រព្យ

ដោយៈ ស៊ីវ ម៉េង

ភ្នំពេញៈ ការវិនិយោគអចលនទ្រព្យ មិនថាការទិញដី ឬទិញលំនៅដ្ឋានសម្រាប់ស្នាក់នៅ ឬទុកលក់យកផលចំណេញវិញ មិនមែនជារឿងងាយស្រួលនោះទេ ហើយក៏មិនមែនជារឿងដែលពិបាកនោះដែរ។

លោកច្រឹក សុខនីម ប្រធានសមាគមភ្នាក់ងារ និងវាយតម្លៃអចលនវត្ថុកម្ពុជា (CVEA) បានមានប្រសាសន៍ឱ្យដឹងថា ជាទូទៅនៅក្នុងពិភពលោក តែងតែមានបំណុ​លដែលបំណុលទាំងនេះ មានលក្ខណៈជាគ្រួសារ សហគមន៍ ឯកជន ក្រុមហ៊ុន និងប្រទេសជាតិ  ហើយនៅពេលដែលប្រើប្រាស់បំណុលទាំងនេះ មានប្រសិទ្ធិភាពនោះ នឹងជំរុញឱ្យជីវភាព នៅក្នុងស្ថានភាពសេដ្ឋកិច្ចគ្រួសារ សហគន៍ ប្រទេស និង ក្រុមហ៊ុន មានការរីកចំរើន។

លោកពន្យល់ថា “បំណុលគឺជាការប្រើប្រាស់ធនធានអ្នកដទៃ តាមរយៈការប្រើប្រា​ស់ជាថវិកាឬជាទ្រព្យសម្បត្តិ និងអ្វីផ្សេងៗទៀតសម្រាប់ធ្វើការការដោះដូរ និងជាប្រយោ​ជន៍ក្នុងការវិស័យជំនួញឱ្យមានប្រសិទ្ធិភាព”។

លោកបន្តថា នៅក្នុងការវិនិយោគលើវិស័យអចលនទ្រព្យ អ្នកវិនិយោគអាចស្វែងរកបំណុល តាមរយៈធនាគារដែលជាស្ថាប័នឯករាជ្យ ក្នុងការផ្តល់ប្រាក់កម្ចីដល់អតិថិជនទូទៅ ក្នុងការទិញលំនៅឋានសម្រាប់ស្នាក់នៅ ឬទិញលំនៅឋានសម្រាប់ធ្វើការវិនិយោគ​បន្ត ។

លោកពន្យល់ថា “មុនដំបូងយើងត្រូវធ្វើការសិក្សានូវគុណតម្លៃ នៃវិស័យអចលនទ្រព្យដែលយើងត្រូវវិនិយោគ តើជាប្រភេទអចលនទ្រព្យបែបណា”។

ឧទាហរណ៍បើយើងវិនិយោគលើលំនៅឋាន ដូចជាផ្ទះ ឬខុនដូ ឬមួយជាគម្រោងដែលកំពុងសាងសង់ សម្រាប់ទុកវិនិយោគបន្ត ឬសម្រាប់ជួលជាដើមនោះ យើងត្រូវសិក្សាពីចំណូល និងកំណើនតម្លៃអចលនទ្រព្យនៅពេលខាងមុខ ដោយធៀបជាមួយនឹងបំណុល។

លោកច្រឹក សុខនីមបានបន្ថែមទៀតថា នៅពេលដែល យើងមានគម្រោងដាក់ទុនវិនិយោគលើវិស័យអចលនទ្រព្យប្រកបដោយចីរភាព យើងត្រូវវិភាគអំពីឱកាសនៅក្នុងការវិនិយោគ រួមផ្សំជាមួយនឹងការសងត្រឡប់ បូកជាមួយប្រាក់បំរ៉ុងទុក។ បើយើងមានធនធានទាំងអស់នេះ បំណុលនៅក្នុងវិស័យអចលនទ្រព្យ គឺទុន និងជាលទ្ធភាពល្អបំផុត ពីព្រោះ នៅពេលដែលយើងប្រើប្រាស់បំណុល ធ្វើឱ្យយើងចំណេញពេលវេលា និងអាចធ្វើឱ្យជីវភាពដើរលឿនជាអ្នកដែលមិនប្រើប្រាស់បំណុល។

លោកបញ្ជាក់ថា “ដូច្នេះនៅពេលដែលយើងប្រើប្រាស់បំណុលបានត្រឹមត្រូវ ហើយ ស្ទង់មើលនូវឥទ្ធិពល នៅក្នុងកម្រិតដែលជាវិជ្ជមាន គឺជាហេតុផលចម្បងដែលធ្វើឱ្យសេដ្ឋកិច្ចក្រុមគ្រួសារ មានការរីកចំរើន ។ ការប្រើប្រាស់បំណុល ជាទ្រព្យសម្បត្តិ នឹងទទួលបាននូវគុណតម្លៃពីការវិនិយោគ”។

លោកបន្ថែមថា ជាមួយគ្នានេះដើម្បីទទួលបាននូវព័ត៌មានជុំវិញ ការប្រើប្រាស់បំណុ​លើការវនិយោគវិស័យអចលចនទ្រព្យ លោកអ្នកអាចប្រឹក្សាយោបល់ ជាមួយភ្នាក់​ងារអចលនវត្ថុ ឬ ក៏មន្ត្រីធនាគារ៕

រដ្ឋមន្រ្តីសាធារណៈការៈ ផ្លូវជាតិទូទាំងប្រទេសនឹងត្រូវសម្រួលល្បឿនបើកបរឡើងវិញ

ដោយៈគង់ សូរិយា

ភ្នំពេញៈ ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូនបានថ្លែងថា ការ​កំណត់​ល្បឿន​បើកបរ​ លើ​ផ្លូវ​ជាតិ​ទូទាំងប្រទេស នឹង​ត្រូវ​ធ្វើ​វិសោធនកម្ម​ថ្មី​ ដើម្បី​កែសម្រួល​ឲ្យ​សមស្រប​តាម​ស្ថានភាព​ជាក់ស្តែងនាពេលខាងមុខនេះ។

លោកស៊ុន ចាន់ថុលបានមានប្រសាសន៍ក្នុងកម្មវិធីផ្សាយផ្ទាល់ពិសេសកាលពីដើមសប្តាហ៍នេះថា ការ​កំណត់​ល្បឿន​បើកបរ​តាម​ផ្លូវ​ជាតិ​មួយ​ចំនួន​ឃើញ​ថា​ ការ​កំណត់​ល្បឿន​អតិបរមា​កន្លង​មក​ មិន​សមស្រប​នឹង​លំហូរ​ចរាចរណ៍ ​ប៉ះពាល់​ដល់​ការ​ដឹកជញ្ជូន​ និង​ការ​ធ្វើ​ដំណើរ​របស់​ប្រជាពលរដ្ឋ។

លោកបន្តថា “ក្រសួងសាធារណការ​និង​ដឹក​ជញ្ជូន​ នឹង​​រៀបចំ​វិសោធនកម្ម​ រួម​ទាំង​ការ​ជជែក​លើ​​ការកំណត់​ល្បឿន បើកបរ​លើផ្លូវ​ជាតិ​មួយ​ចំនួន ដើម្បី​ដាក់ឆ្លងកែ​សម្រួលជា​ថ្មី”។

លោកបន្តថា ក្រុមការងារ​បច្ចេកទេស ​នឹង​ធ្វើ​ការ​​ចុះ​សិក្សា​លើ​ការ​កំណត់ល្បឿនបើកបរលើ​ផ្លូវជាតិ​ទូទាំងប្រទេសឡើង​វិញ ដើម្បី​សម្រួលការ​ធ្វើ​ដំណើរ​ឲ្យ​បាន​ឆាប់​រហ័ស តាម​ស្ថានភាព​ប្រើប្រាស់​ជាក់ស្តែង។ កន្លងទៅ​តែងតែ​មានការ​រិះ​គន់​ លើការកំណត់ល្បឿនបើកបរ​តាម​ដង​ផ្លូវ​ជាតិ​មួយ​ចំនួន ដែល​មិន​សមស្រប​តាម​ភូមិសាស្រ្ត​តំបន់៕

គំរោងដីឡូត៍លំហែរកាយតម្លៃ៣លានដុល្លារកំពុងទាក់ទាញការចាប់អារម្មណ៍និងពង្រីកសក្តានុពលផ្លូវជាតិលេខ៤៣

ដោយៈ គង់ សូរិយា

ភ្នំពេញៈ ផ្តោតលើផាសុខភាពដល់អ្នករស់នៅ និងអភិវឌ្ឈន៍៍គំរោងជោគជ័យដោយចីរភាព ដីឡូត៍លំហែរកាយបូកគោលែនដ៏២ បាននិងកំពុងសាងសង់ហេដ្ឋារចនាសម្ព័ន្ឋ សួនច្បារ កន្លែងកំសាន្តកុមារ ពិសេសក្លោងទ្វារយ៉ាងប្រណីត។

បោះទុនវិនិយោគ៣លានដុល្លារ លោក Coolor Tan អគ្គនាយកក្រុមហ៊ុន Youngsia Real estate​ មានបំណងផ្តល់នូវការលើកកំពស់ វិស័យទេសចរណ៍ក្នុងខេត្តកំពត ពិសេស​ផ្តល់នូវបរិកាសរីករាយសំរាប់អ្នកសាងសង់ផ្ទះលំហែរ នៅលើគំរោងរបស់លោកឲ្យក្លាយជាគំរោងគំរូមួយនៅកម្ពុជា។

លោកបានមានប្រសាសន៍ថា “វិស័យទេសចរណ៍នៅខេត្តកំពត មានសក្តានុពលខ្លាំងនាពេលអនាគត ពិសេសដីឡូត៍លំហែរកាយ ដែលមានទំហំ១៥គុណនឹង៣០ម៉ែត្រ ទំហំ២០គុណនឹង៤០ម៉ែត្រ សំរាប់សាងសង់ផ្ទះលំហែរ ដោយមានភ្ជាប់ប្រព័ន្ឋទឹក ភ្លើង បណ្តាញលូរួចជាស្រេច”។

លោកបន្តថា “លក្ខណៈពិសេសនៃគំរោងនេះ គឺយើងសាងសង់ខ្លោងទ្វារដោយ​ចំណាយអស់២៦ម៉ឺនដុល្លារ សួនច្បារទំហំ៣០០០ម៉ែត្រការ៉េ ដែលអ្នករស់នៅឬទិញដីសាងសង់ផ្ទះលំហែរក្នុងគំរោងនេះ អាចអអ្គុយលេង អានសៀវភៅ និងសំរាកលំហែរក្នុងបរិយាកាសយ៉ាងមនោរម្យ”។

លោកបន្តថា “យើងតែងតែគិតពីផាសុខភាពដល់អ្នករស់នៅ គំរោងនេះបានសង់ផ្លួវទំហំចាប់ពី១២ដល់១៦ម៉ែត្រ ដោយមានសួនច្បារនៅចំកណ្តាល និងអំពូលសូឡាបំភ្លឺនាពេលរាត្រីផងដែរ”។

លោក Coolor Tan បានបន្តថា គោលដៅរបស់យើង គឺផ្តោតចំពោះអ្នកដែលចង់់មានសុខភាពផ្លូវចិត្ត ផ្លូវកាយល្អ និងចង់មានលំនៅដ្ឋាន សំរាប់លំហែរអាចវិនិយោគលើគំរោងនេះបាន ដោយសារទំហំដីរបស់យើងមាន ១៤,៥០ហិកតា ដែលបានរៀបចំសួនលំអរ ផ្កា បណ្តាញហេដ្ឋារចនាសម្ព័ន្ឋរួចជាស្រេច ហេតុនេះអ្នកទិញដីគ្រាន់តែសាងសង់ផ្ទះតាមចំណូលចិត្តរបស់ខ្លួនប៉ុណ្ណោះ នឹងមានលំនៅដ្ឋានសំរាកលំហែរចុងសប្តាហ៍បានហើយ។

ទីប្រឹក្សាសមាគមអ្នកអភិវឌ្ឍន៍ដីឡូត៍កម្ពុជា លោកយិន លាងគង់បានមានប្រសា​សន៍ថា ការកើនឡើងនូវស្តង់ដាជីវិតរបស់ប្រជាជនកម្ពុជា ជីវភាពពួកគាត់កាន់តែប្រសើរឡើង បានធ្វើឲ្យទីផ្សារដីឡូត៏លំហែរកាយ កាន់តែមានភាពរីកចម្រើន ប៉ុន្តែអ្នកទិញដីឡូត៍បែបនេះ គួរជ្រើសរើសគំរោងដែលមានការអភិវឌ្ឈន៍ ជាមួយអ្នកវិនិយោគដែលមានទំនួលខុសត្រូវ ខណៈអ្នកអភិវឌ្ឍន៍មួយចំនួនបានគិតតែប្រាក់ចំណេញ ពេលលក់ដីអស់គំរោងនោះត្រូវបានទុកចោល។

លោកបន្តថា “បូកគោលែនដ៍អាចចាត់ទុកជាគំរោងគំរូមួយ តាមរយៈការចុះពិនិត្យ​សិក្សាផ្ទាល់ ព្រោះគំរោងនេះមានខ្លោងទ្វារ សួនច្បារ មានផ្លូវធំទូលាយ មានសន្តិសុខ២៤ម៉ោង មានការសាងសង់​ប្រព័ន្ឋអហេដ្ឋារចនាសម្ព័ន្ឋយ៉ាងប្រសើរ ដែលមិនលំបាកដល់អ្នកទិញ ដើម្បីសាងសង់ផ្ទះនោះទេ”៕

កម្ពុជាត្រៀមចុះ MOU ជាមួយក្រុមហ៊ុន CCC ដើម្បីជម្រុញការវិនិយោគ ពាណិជ្ជកម្មនិងទេសចរណ៍

ដោយៈសុជាតា

ភ្នំពេញៈ រដ្ឋាភិបាលកម្ពុជា បាននិងកំពុងព្រាងអនុស្សរណៈ នៃការយោគយល់គ្នា (MOU) ជាមួយក្រុមហ៊ុន Cambodia (Xi’an) Commercial Center Co., Ltd ដើម្បីជំរុញវិស័យពាណិជ្ជកម្ម វិនិយោគ និងទេសចរណ៍ រវាងព្រះរាជាណាចក្រកម្ពុជា និងប្រទេសចិន។

លោកកៅ កោសល អគ្គនាយក នៃអគ្គនាយកជំរុញពាណិជ្ជកម្ម ក្រសួងពាណិជ្ជកម្ម បានដឹកនាំកិច្ចប្រជុំស្តីពី ការកែសម្រួលសេចក្តីព្រាងអនុស្សរណៈ នៃការយោគយល់គ្នារវាងក្រសួងពាណិជ្ជកម្ម នៃព្រះរាជាណាចក្រកម្ពុជា ជាមួយនឹងក្រុមហ៊ុន Cambodia (Xi’an) Commercial Center Co., Ltd (CCC) ។

លោកបានណែនាំឱ្យធ្វើការកែសម្រួល លើខ្លឹមសារមួយចំនួន នៃអនុស្សរណៈនេះ ក្នុងគោលបំណងធានាបាននូវប្រសិទ្ធភាពការងារ និងកិច្ចសហប្រតិបត្តិការល្អលើវិស័យពាណិជ្ជកម្ម សេដ្ឋកិច្ច និងវិនិយោគ រវាងប្រទេសទាំងពីរ កម្ពុជា-ចិន។

បន្ថែមពីនេះទៀត តាមរយៈអនុស្សរណៈនេះ ក្រសួងពាណិជ្ជកម្ម នឹងផ្តល់ទីតាំងនៅក្នុងស្ថានតំណាងពាណិជ្ជកម្ម ប្រចាំនៅទីក្រុងណាននីង នៃសាធារណរដ្ឋប្រជាមានិតចិន ឱ្យទៅក្រុមហ៊ុនខាងលើ ដើម្បីតាំងបង្ហាញផលិតផលខ្មែរ ផ្សព្វផ្សាយព័ត៌មាន និងជំរុញវិស័យពាណិជ្ជកម្ម វិនិយោគ និងទេសចរណ៍ រវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន៕

សេដ្ឋីចិននិងក្រុមហ៊ុនLSCGបោះទុនរួមគ្នាលើទឹកប្រាក់២០០លានដុល្លារនៅតំបន់ ព្រលានយន្តហោះភ្នំពេញថ្មី

ដោយៈគង់ សូរិយា

ភ្នំពេញៈ ក្រុមហ៊ុនមហាសេដ្ឋីពីប្រទេសចិន និងក្រុមហ៊ុនក្នុងស្រុក LSCG បានរួមគ្នាអនុម័តថវិកា២០០លានដុល្លារ សម្រាប់សហការវិនិយោគជាមួយអ្នកឧកញ្ញា ពុង ឃាវសែ លើគម្រោងព្រលានយន្តហោះភ្នំពេញថ្មី។

អគ្គនាយកក្រុមហ៊ុន LSCG លោកលី សុខឆាយ ដែលជាតំណាងចរចាលើកិច្ចសហការនេះ ក្រុមហ៊ុនចិន និងក្រុមហ៊ុនរបស់លោក បានត្រៀមខ្លួនរួចរាល់ ទាំងថវិកាប   ច្ចេ​កទេស និងធនធានមនុស្ស សម្រាប់រួមអនុវត្តគម្រោងព្រលានថ្មីនេះ ដោយបច្ចុប្បន្ន គឺនៅរង់ចាំតែការអនុម័តចុងក្រោយពីអ្នកឧកញ្ញា ពុង ឃាវសែ ប៉ុណ្ណោះ។

លោកលី សុខឆាយ បានបន្តថា ក្រុមហ៊ុនមហាសេដ្ឋីចិន និងក្រុមហ៊ុនLSCG បានចរចាជាមួយនឹងOCIC និងអ្នកឧកញ្ញា ពុង ឃាវសែ ជាច្រើនលើកមកហើយ មុននឹងឈានដល់ដំណាក់កាលត្រៀមថវិកា២០០លានដុល្លារ ពីទីក្រុងប៉េកាំងដោយផ្ទាល់នេះ។

លោកបន្តថា លើសពីនេះក្រុមហ៊ុនក៏បានសិក្សា លើផែនការមេនៃគម្រោងលទ្ធភាពនៃការវិនិយោគ ការងារបច្ចេកទេស ដែលក្រុមហ៊ុនអាចរួមសហការបាន ក៏ដូចជាហានិភ័យដែលអាចនឹងកើតមាន រួចរាល់ជាស្រេចអស់ហើយ។ គ្រប់យ៉ាងក៏ត្រូវបានដាក់បញ្ជូនទៅខាងក្រុមហ៊ុន ព្រលានយន្តហោះថ្មី និង OCIC រួចរាល់” លោកបានបន្ត។

ទោះជាយ៉ាងណា លោក លី សុខឆាយ នៅមិនទាន់បញ្ជាក់នៅឡើយទេថា ទុនវិនិយោគ២០០លានដុល្លារ នឹងត្រូវយកទៅប្រើប្រាស់លើផ្នែកណា ឬយកទៅធ្វើការងារអ្វីនៃគម្រោងព្រលានថ្មីនេះ ដោយរង់ចាំការអនុម័តចុងក្រោយពី អ្នកឧកញ្ញាពុង ឃាវសែជាមុនសិន។

ក្រុមហ៊ុនLSCGកន្លងមក ក៏បានដេញថ្លៃឈ្នះ ដើម្បីធ្វើការងារមួយចំនួនក្នុងគម្រោ​ងរបស់ OCIC ដូចជាគម្រោងព្រលានយន្តហោះភ្នំពេញថ្មី គម្រោងបឹង៥០០ និងគម្រោងផ្សេងៗទៀតផងដែរ៕

 

តំបន់ភាគខាងលិចក្រុងភ្នំពេញមិនទាន់មានវត្តមានផ្សារទំនើប និងគម្រោងអភិវឌ្ឍធំៗ ខណៈសក្តានុពលតំបន់នេះត្រូវបានមើលរំលង

ដោយៈសុជាតា

ភ្នំពេញៈ តំបន់ជាយក្រុង ភាគខាងលិចរាជធានីភ្នំពេញ ដែលបញ្ចូលជាខណ្ឌចុងក្រោយ នោះគឺខណ្ឌកំបូល ដែលត្រុវបង្កើតឡើងដោយអនុក្រឹត្យ ឆ្នាំ២០១៩ កន្លងទៅនេះ បានស្រូបទាញគម្រោងអភិវឌ្ឍជាច្រើនដូចជា បុរី លំនៅដ្ឋាន រោងចក្រសហគ្រាសច្រើន ប៉ុន្តែអ្នកវិនិយោគផ្សារទំនើប មិនទាន់បោះទីតាំងនៅតំបន់នេះនៅឡើយ។

ផ្លូវជាតិលេខ៣ និងផ្លូវជាតិលេខ៤ គិតពីរង្វង់មូលចោមចៅ ជាតំបន់មានមនុស្សរស់នៅរាប់ម៉ឺនសែននាក់ ប៉ុន្តែហេតុអ្វីបានជាតំបន់នេះ មិនទាន់ទាក់ទាញការវិនិយោគ​ ផ្សារទំនើប។

អ្នកជំនាញខាងដីធ្លីបានលើកឡើងថា ខណ្ឌកំបូលនេះ បន្តអភិវឌ្ឍទាំងហេដ្ឋរចនាសម្ពន្ធ និង គម្រោងបុរីជាបន្តបន្ទាប់ ព្រមទាំងហាងទំនើបៗជាច្រើន ដែលធ្វើអោយតម្លៃដីធ្លីបន្តកើនឡើងគួរអោយកត់សំគាល់។

លោកឌឹត ចណ្ណា អគ្គនាយកក្រុមហ៊ុនអចលនទ្រព្យ ឡាក់គីរៀលធី បានប្រាប់ Property area asia នារសៀលថ្ងៃទី៣១ សីហានេះថា តម្លៃដីនៅតំបន់នេះ ជាមធ្យមគឺចន្លោះពី៥០ ទៅ១០០ ដុល្លារក្នុងមួយម៉ែត្រការ៉េ សម្រាប់ផ្លូវខាងក្នុង និងផ្លូវកៅស៊ូទំហំ៨ ម៉ែត្រ គឺមានតម្លៃ ១០០ ដុល្លារ ទៅ១៥០ ដុល្លារក្នុងមួយម៉ែត្រការ៉េ និងសម្រាប់ដីនៅផ្លូវធំ គឺមានតម្លៃចន្លោះពី២០០ដុល្លារ ទៅ៣០០ ដុល្លារក្នុងមួយម៉ែត្រការ៉េ។

លោកបន្ថែមទៀតថា “ការទិញលក់ អចលនទ្រព្យនៅខណ្ឌកំបូល គឺធ្លាក់ចុះបន្តិច ដោយសារតែវិបត្តិ Covid 19   ហើយគម្រោងអភិវឌ្ឍភាគច្រើនជាបុរី ស្នាក់នៅ សម្រាប់អតិថិជនកម្រិតមធ្យម និងក្រោមមធ្យម”។

ប៉ុន្តែសម្រាប់អ្នកលក់ដីឡូលំនៅដ្នាន និងគេហដ្ឋានស្នាក់នៅ លោក អែក វណ្ណដា ប្រធានទីផ្សារក្រុមហ៊ុនBDS បានលើកឡើងថា ការទិញលក់អចលនទ្រព្យ នៅតំបន់នេះ បានធ្លាក់ចុះអស់៥០ភាគរយ ដោយសារវិបត្តិសកលនេះ ។ អតិថិជនអ្នកទិញលំដាប់មធ្យ​មជាច្រើន បានថមថយការទិញដីធ្លីនៅតំបន់នេះ ដោយរំពឹងរង៉ចាំសភាពធូរស្រាលឡើញវិញ។

លោកបន្ថែមទៀតថា នាពេលបច្ចុប្បន្ននេះ  តំបន់កំបូល គឺមានគម្រោងអភិវឌ្ឍធំៗ ដូចជា បុរីពិភពថ្មី កម្រោងអភិវឌ្ឍរបស់អ្នកឧកញ៉ា ពុង ឃាងសែ និង ផ្លូវល្បឿនលឿនពីទីក្រុងភ្នំពេញ ទៅ ក្រុងសីហនុ ដែលសសៃឈាមសេដ្ឋកិច្ចដ៏សំខាន់។

ខណ្ឌកំបូល គឺស្ថិតនៅភាគខាងលិចរាជធានីភ្នំពេញ ដោយកាត់ចេញពីផ្នែកខ្លះនៃខេត្តកណ្តាល និង ផ្នែកខ្លះនៃខណ្ឌពោធិសែនជ័យ។ ហើយខណ្ឌគឺ មាន៧សង្កាត់ ស្នើនឹង ៩៣ភូមិ នៅក្នុងនោះ៦សង្កាត់ បានកាត់ចេញពីខណ្ឌពោធិសែនជ័យ និងមួយសង្កាត់ទៀតពិខាងដង្កោ។

ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសន៍ថា តំបន់ភាគខាងលិចក្រុងភ្នំពេញ ពិតជាមានភាពមមាញឹក ដែលមានការកកស្ទះចរាចរណ៍ជាប្រចាំ ដោយសារតំបន់នេះសម្បូររោងចក្រ សហគ្រាស និងលំនៅដ្ឋានតម្លៃមធ្យមច្រើ​ន ប៉ុន្តែការដែលអ្នកវិនិយោគផ្សារទំនើបនៅតំបន់នេះ អាចមានមូលហេតុមួយចំនួនដូចជា អំណាចនៃការទិញរបស់ប្រជាជននៅតំបន់នេះ នៅមានកម្រិត ភាពមិនសូវមានសណ្តាប់ធ្នាប់នៃការធ្វើចរា​ចរណ៍លើដងផ្លូវ និងការមិនទាន់ចាប់អារម្មណ៍ពីអ្នកវិនិយោគធំៗមួយចំនួន ដែលមើលរំលងសក្តានុពលតំបន់នេះផងដែរ។

លោកបន្តថា “ការដែលមានវត្តមានផ្សារទំនើបធំៗ នៅកណ្តាលរាជធានីភ្នំពេញ គឺដោយសារប្រជាពលរដ្ឋ នៅកណ្តាលក្រុងមានជីវភាពធូរធារខ្លាំង សម្បូរជនបរទេសរស់នៅ និងជាទីកន្លែងសម្រាប់ការលំហែរបស់ភ្ញៀវទេសចរណ៍ផងដែរ”៕

រដ្ឋាភិបាលចិនដាក់ចេញនូវគោលនយោបាយសុខមាលភាពសង្គម សេដ្ឋកិច្ចនៅរយៈពេល៥ឆ្នាំខាងមុខ

ដោយៈសុជាតា

ប្រទេសចិនៈ ប្រទេសចិនបានចេញផ្សាយផែនការសេដ្ឋកិច្ច៥ ឆ្នាំ ដើម្បីលើកកំពស់ភាពមានការងារធ្វើ ការយកចិត្តទុកដាក់លើប្រាក់ចំណូល និងពង្រីកប្រព័ន្ធអប់រំ ដើម្បីជួយកំណើនតំរូវការក្នុងស្រុក និងលើកកំពស់វិស័យឧស្សាហកម្ម។

ក្រោមផែនការដែលដាក់ចេញដោយក្រុមប្រឹក្សារដ្ឋ មន្រ្តីចិនបានលើកឡើងថា ភាពរដ្ឋាភិបាលនឹងបង្កើតការងារធ្វើ នៅទីប្រជុំជនប្រមាណ៥៥លានកន្លែងនៅត្រឹមឆ្នាំ២០២៥ និងអត្រាអត់ការងារធ្វើស្ថិតនៅត្រឹម៥.៥ភាគរយ បើប្រៀបធៀបអត្រាអត់ការងារធ្វើប្រមាណ៥ភាគរយ ក្រោមផែនការដែលបានដាក់ចេញនៅចន្លោះ២០១៦ ដល់ឆ្នាំ២០២០។

ផែនការថ្មីនេះ មានគោលបំណងបង្កើនជាលំដាប់ នៃចំណែកប្រាក់បៀរវត្សរ៍ក្នុងផលិតផលក្នុងស្រុកសរុប។ ហើយទាមទារគោលដៅលើកកម្ពស់វិស័យអប់រំ ជាមធ្យមប្រមាណ១១.៣ ភាគរយ សម្រាប់អាយុមានការងារធ្វើនៅត្រឹមឆ្នាំ២០២៥ ពោលគឺកើនឡើង១០.៨ ភាគរយនៅត្រឹមឆ្នាំ២០២០កន្លងមកនេះ។

ទីក្រុងប៉េកាំង បានបង្កើតអត្រាការងារធ្វើ ជាអាទិភាពកំពូលចាប់តាំងពីវិបត្តិ Covid 19 វាយលុកកាលពីឆ្នាំមុន ដែលទាមទារការងារដែលមានគុណភាព។

ភាពមានការងារធ្វើត្រូវបានគេមើលឃើញថា ជាសុវត្ថិភាពសេដ្ឋកិច្ច ជាពិសេសប្រទេសចិនជំរុញយុទ្ធសាស្រ្តទ្វេភាគី ដោយជំរុញផលិតផលកំរិតខ្ពស់ ដើម្បីជៀសវាង អន្ទាក់ចំណូលមធ្យម និងពុះពារការដាក់ទណ្ឌកម្ម ពីសំណាក់បរទេសចំពោះបច្ចេកវិទ្យាជាន់ខ្ពស់។

បើតាមផែនការយុទ្ធសាស្រ្ត បានលើកឡើងថា ប្រជាសាស្រ្ត និងរចនាសម្ពន្ធសេដ្ឋកិច្ច បានផ្លាស់ប្តូរស៊ីជំរៅជាមួយនឹងការផ្គត់ផ្គង់ និងតំរូវការពលករ។

អ្នកនិពន្ធផែនការនេះ បានព្រមានពីប្រព័ន្ធអប់រំ ដែលមិនអាចបង្កើតនូវការអប់រំដែលមានជំនាញខ្ពស់ ដើម្បីបំពេញតំរូវការទីផ្សារ។

ទោះបីជាចំនួននិស្សិតបញ្ចប់ពីសាកលវិទ្យាល័យប្រទេសចិន បានកើនឡើងដល់ជាង ៩,៩លាននាក់នៅឆ្នាំ២០២១ នេះ ប៉ុន្តែក្រុមហ៊ុនផលិតកម្មជាច្រើន នៅតែស្វែងរកយ៉ាងលំបាកនូវប្រជាជន ដែលមានជំនាញដែលសេចក្តីត្រូវការ។

អ្នកជំនាញសេដ្ឋកិច្ចបាននិយាយថា កង្វះកម្មករជំនាញ គឹដោយសារតែធ្លាក់ចុះចំណែកផលិតកម្មក្នុងវិស័យសេដ្ឋកិច្ចជាតិ។

ប្រធានាធិបតីចិន លោក ស៊ី ហ្សីនពីង បានអំពាវនាវសម្រាប់វិបុលភាពទូទៅ ដោយដាក់ផែនការប្រាក់បៀវត្សរ៍ ជាការបែងចែកទ្រព្យសម្បត្តិជាជំហានដំបូង។

អ្នករៀបចំគោលនយោបាយ បានលើកទឹកចិត្តប្រជាពលរដ្ឋ ក្នុងការចាប់ផ្តើមជំនួញនៅតំបន់ជនបទ ជាមួយនឹងការសន្យាផ្តល់ហិរញ្ញវត្ថុ និងការគាំទ្រគោលនយោបាយ៕

រដ្ឋាភិបាលកូរ៉េខាងត្បូងគ្រោងចំណាយទឹកប្រាក់៥០០ពាន់លានដុល្លារនៅឆ្នាំ២០២២

ដោយៈសុខុម

សេអ៊ូល: រដ្ឋាភិបាលកូរ៉េខាងត្បូង នៅថ្ងៃអង្គារទី៣១ សីហា នេះបានបង្ហាញផែនការបង្កើនការចំណាយយ៉ាងច្រើនសម្បើម នៅក្នុងកញ្ចប់ថវិកាប្រចាំឆ្នាំរបស់ប្រធា​នាធិបតី មូន ចែអ៊ីន ស្របពេលឱនភាពសារពើពន្ធ (fiscal deficit) កាន់តែអាក្រក់ទៅ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters។

ប្រទេសកូរ៉េខាងត្បូង គ្រោងចំណាយរហូតដល់ទៅ៦០៤.៤ទ្រីលានវ៉ុន (៥១៨.៤ពាន់លានដុល្លារអាមេរិក) នៅឆ្នាំក្រោយ ពោលគឺច្រើនជាង៨.៣ភាគរយ បើធៀបនឹងថវិកាឆ្នាំ២០២១ មុនពេលកញ្ចប់ចំណាយបន្ថែមចំនួន២ សម្រាប់គ្រាអាសន្នត្រូវបានព្រាងឡើង ដើម្បីផ្តល់ជំនួយសង្គ្រោះបន្ទាន់ ដល់គ្រួសារដែលរងផលប៉ះពាល់ដោយសារការរីករាលដាលវីរុសកូវីដ-១៩។

ផែនការចំណាយខ្ពស់បំផុតមិនធ្លាប់មាននេះ នឹងធ្វើឱ្យអនុបាតបំណុលធៀបនឹង GDP (Debt-to-GDP Ratio) របស់ប្រទេសកូរ៉េខាងត្បូង កើនរហូតដល់៥០,២%ដែលជាចំនួនធំបំផុតមិនធ្លាប់មានជាប្រវត្តិសាស្ត្រ។

មន្ត្រីមួយរូបនៅក្រសួងហិរញ្ញវត្ថុបានលើកឡើងថា “បំណុលរបស់យើងនឹងកើនលើស៥០ភាគរយ នៃទំហំសេដ្ឋកិច្ចក្នុងរយៈពេលមធ្យម ប៉ុន្តែនៅពេលយើងចាប់ផ្ដើមធ្វើឱ្យជំហរសារពើពន្ធប្រសើរឡើង យើងរំពឹងថានឹងមានភាពល្អប្រសើរឡើងច្រើន នៅក្នុងសមតុល្យសារពើពន្ធ (fiscal balance) នៃការទូទាត់នៅឆ្នាំក្រោយ”។

យោងតាមក្រសួងហិរញ្ញវត្ថុឱ្យដឹងថា នៅត្រឹមឆ្នាំ២០២៥ ប្រទេសកូរ៉េខាងត្បូង រំពឹងថា អនុបាតបំណុលធៀបនឹង GDP នឹងឈានដល់៥៨,៨%៕