ដោយៈ ប៊ី

ភ្នំពេញៈ ក្រុមហ៊ុនថ្មីៗចំនួន៣ តាមរយៈក្រុមប្រឹក្សាអភិវឌ្ឍន៍កម្ពុជា នៅថ្ងៃទី១៤ ខែមិថុនា ឆ្នាំ២០២១ ប្រកាសបោះទុនវិនិយោគប្រមាណ១៤.៩លានដុល្លារ ដោយមានទីតាំងផលិតកម្មនៅខេត្តកណ្តាល ខេត្តតាកែវ និងភ្នំពេញ។

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

ទី១- J.A.K GARMENT CO., LTD: គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំង វិនិយោគស្ថិតនៅភូមិកំពង់ព្រីង សង្កាត់សិត្បូ ក្រុងតាខ្មៅ ខេត្តកណ្តាល មានទុនវិនិយោគប្រមាណ២,៤លានដុល្លារអាមេរិក និងអាចបង្កើតការងារបានចំនួន ១.០៥៣កន្លែង។

ទី២- PREMIER TECH GARMENT (CAMBODIA) CO., LTD: គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិត្រពាំងឈូក ឃុំសូភី ស្រុកបាទី ខេត្តតាកែវ មានទុនវិនិយោគប្រមាណ៤,៣លានដុល្លារអាមេរិក និងអាចបង្កើតការងារបានចំនួន១.៧៤៨កន្លែង។

ទី៣- CHANCO TEXTILES (CAMBODIA) CO., LTD: គម្រោងបង្កើតរោងចក្រកាត់ដេរសម្លៀកបំពាក់ ភួយ ស្រោមពូក និងស្រោមខ្នើយ ដែលមានទីតាំងវិនិយោគស្ថិតនៅភូមិចុងខ្សាច់ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ មានទុនវិនិយោគប្រមាណ៨,២លានដុល្លារអាមេរិក និងអាចបង្កើតការងារបានចំនួន៤២៤កន្លែង៕

ដោយៈ គៀតឈូ

តូក្យូៈ ផ្សារហ៊ុនលើពិភពលោក នៅតែរក្សាបានសុខភាពរ៉ឹងមាំនៅថ្ងៃចន្ទនេះ ប៉ុន្តែមូលបត្របំណុលរបស់អាមេរិក បានធ្លាក់ចុះជាមួយនឹងកម្រិតទាប រយៈពេល៣ខែជាប់ៗគ្នា ខណៈវិនិយោគិនរំពឹងថាស្ថានភាពផ្សារហ៊ុនកាន់តែប្រសើរ បន្ទាប់ពីកិច្ចប្រជុំរបសធនាគារកណ្តាលអាមេរិកនៅចុងសប្តាហ៍នេះ។

សន្ទស្សន៍ក្រុមហ៊ុន Nikkei របស់ជប៉ុនបានកើនឡើង០,៣៥ភាគរយ ខណៈសន្ទស្សន៍ភាគហ៊ុនក្រុមហ៊ុន MSCI ក្នុងតំបន់អាស៊ីប៉ាស៊ីហ្វិកនៅក្រៅប្រទេសជប៉ុន បានធ្លាក់ចុះ០,១ភាគរយ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៤ ខែមិថុនា ឆ្នាំ២០២១នេះ។

នៅទូទាំងពិភពលោកទីផ្សារមូលធនរំពឹងទុក នៃការងើបឡើងវិញ ដោយសារសេដ្ឋកិច្ចនៅលើពិភពលោកកំពុងងើបឡើងវិញ ពីវិបត្តិជំងឺកូវីដ១៩ និងការរំពឹងទុករឿងល្អៗ ដែលចេញគោលនយោបាយរូបិយវត្ថុ បន្ទាប់ពីកិច្ចប្រជុំរបស់ធនាគារកណ្តាលអាមេរិក។

សន្ទស្សន៍តម្លៃហ៊ុនរបស់ក្រុមហ៊ុនMSCI ជុំវិញពិភពលោក សន្ទស្សន៍ក្រុមហ៊ុនអាមេរិក S&P 500 និងក្រុមហ៊ុន STOXX របសអឺរ៉ុប បានបិទការជួញដូរនៅក្នុងកម្រិតខ្ពស់បំផុតកាលពីថ្ងៃសុក្រ។

ការកើនឡើងនេះ នៃសន្ទស្សន៍ទីផ្សារហ៊ុននេះ នឹងនៅតែបន្ត បើទោះបីជាទិន្នន័យអតិផរណារបស់សហរដ្ឋអាមេរិក នៅថ្ងៃព្រហស្បតិ៍ លើសពីការរំពឹងទុករបស់ទីផ្សារ។

លោក Norihiro Fujito ប្រធានអ្នកយុទ្ធសាស្រ្តវិនិយោគនៅក្រុមហ៊ុន Mitsubishi UFJ Morgan Stanley Securities បាននិយាយថា “កត្តាធំមួយក្នុងការរក្សាបាននូវកំណើននៅក្នុងផ្សារហ៊ុន គឺថាធនាគារកណ្តាលអាមេរិក បានលើកឡើងថាអត្រាអតិផរណានឹងមានការផ្លាស់ប្តូរ ហើយខ្លួននឹងរក្សាគោលនយោបាយរូបិយវត្ថុ”៕

ដោយៈ ប៊ី

ភ្នំពេញៈ ក្រុមហ៊ុន NagaCorp ដែលគ្រប់គ្រងដោយមហាសេដ្ឋីម៉ាឡេស៊ី Chen Lip Keong បានឱ្យដឹងថា ខ្លួនគ្រោងប្រមូលទុនចំនួន២០០លានដុល្លារតាមរយៈការចេញបណ្ណបំណុលបន្ថែម ដើម្បីពង្រឹងតុល្យភាពហិរញ្ញវត្ថុរបស់ខ្លួន ខណៈវិបត្តិកូវីដ១៩កំពុងបង្កផលប៉ះពាលដល់ចំណូលរបស់ខ្លួននៅទីក្រុងភ្នំពេញ។ នេះបើយោងតាមការចេញផ្សាយរបស់សារព័ត៌មានForbes កាលពីសប្តាហ៍មុន។

NagaWorld ដែលជារមណីយដ្ឋានបែបចម្រុះក្នុងរាជធានីភ្នំពេញ ប្រកាសបានផ្អាកដំណើរការ តាំងពីដើមខែមីនា បន្ទាប់ពីបុគ្គលិក១១នាក់បានធ្វើតេស្តិ៍វិជ្ជមានកូវីដ១៩។ ដើម្បីទប់ស្កាត់ការរីករាលដាលនៃជំងឺបន្ថែមទៀតរដ្ឋាភិបាលកម្ពុជាកាលពីសប្តាហ៍មុនបានហាមប្រាមការប្រមូលផ្តុំចាប់ពី១៥នាក់ឡើង និងបានបញ្ជាឱ្យបិទកន្លែងកំសា ន្តរួមមានកាស៊ីណូ និងក្លឹបរាត្រីនៅក្នុង និងជុំវិញរាជធានី។

ក្រុមហ៊ុន NagaCorp បានឱ្យដឹងនៅក្នុងឯកសារដែលដាក់ជូនផ្សារភាគហ៊ុនហុងកុងថា “ប្រតិបត្តិការអាជីវកម្មរបស់យើងនៅតែត្រូវបានផ្អាក ហើយយើងមិនបានបង្កើតប្រាក់ចំណូលណាមួយឡើយ”។ នៅឆ្នាំ២០២០ ប្រាក់ចំណេញសុទ្ធរបស់ក្រុមហ៊ុនបានធ្លាក់ចុះពី៥២១លានដុល្លារ មកត្រឹម១០២លានដុល្លារ ដោយសារវិបត្តិកូវីដ១៩។

ជាមួយនឹងស្ថានភាពរាតត្បាតកាន់តែអាក្រក់ឡើងនៅកម្ពុជាក្នុងឆ្នាំនេះ ក្រុមហ៊ុន NagaCorp បានសម្រេចចិត្តបោះផ្សាយបណ្ឌបំណុលបន្ថែមបណ្ឌបំណុលដើមចំនួន៣៥០លានដុល្លារ ដែលបានបោះចេញកាលពីខែកក្កដា ឆ្នាំ២០២០។

ទោះបីជាការសន្សំពីការចំណាយ និងសាច់ប្រាក់ និងប្រាក់បញ្ញើបច្ចុប្បន្នរបស់ក្រុមហ៊ុនមានចំនួន៤៥១,៧ លានដុល្លារគិតត្រឹមថ្ងៃទី៣០ ខែមេសា ឆ្នាំ២០២១ និងគិតពីភាគលាភ៨១,៧លានដុល្លារគ្រោងនឹងទូទាត់ទៅឱ្យភាគហ៊ុនិកនៅខែក្រោយ។ ក្រុមហ៊ុនបានឱ្យដឹងថា សាច់ប្រាក់ងាយស្រួលរបស់យើងអាចជួយដល់ការចំណាយប្រតិបត្តិការ និងចំណាយការប្រាក់ច្រើនបានជាង៦ខែទៅមុខ។

ក្រុមហ៊ុនNagaCorp ត្រូវបានបង្កើតឡើងដោយលោក Chen ក្នុងឆ្នាំ១៩៩៥ បន្ទាប់ពីទទួលបានអាជ្ញាប័ណ្ណកាស៊ីណូនៅភ្នំពេញ ដែលអាចដំណើរការរហូតដល់ឆ្នាំ២០៦៥។ បញ្ជីអ្នកមានរបស់ប្រទេសដែលបានចេញផ្សាយកាលពីសប្តាហ៍មុន លោក Chen គឺជាអ្នកមានសម្បត្តិច្រើនបំផុតទី៩នៅប្រទេសម៉ាឡេស៊ី ដែលទ្រព្យសម្បត្តិសរុបប្រមាណ៣,៤ពាន់លានដុល្លារ៕

ដោយៈវឌ្ឈនៈ

ភ្នំពេញៈ សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជា បានស្នើឯកអគ្គរដ្ឋទូតឆែកថ្មីប្រចាំប្រទេសកម្ពុជា ជំរុញការធ្វើសហប្រតិបត្តិការបន្ថែមទៀត ដោយជំរុញឱ្យវិនិយោគិន និងធុរជននៃសាធារណៈរដ្ឋឆែក ដាក់ទុននិងធ្វើពាណិជ្ជកម្មជាមួយកម្ពុជាបន្ថែម ខណៈកម្ពុជាក៏ជាប្រទេសមួយ ដែលមានសក្ដានុពលក្នុងការទាក់ទាញវិនិយោគិនបរទេសផងដែរ។

ការស្នើរបស់ប្រមុខរាជរដ្ឋាភិបាលកម្ពុជា ធ្វើឡើងក្នុងជំនួបជាមួយនឹងលោក Martin Vavra ឯកអគ្គរដ្ឋទូតថ្មី នៃសាធារណៈរដ្ឋឆែកប្រចាំកម្ពុជា ។

យោងតាមប្រសាសន៍លោក អ៊ាង សុផល្លែត ជំនួយការសម្តេចតេជោបានប្រាប់ឲ្យដឹងក្រោយជំនួបថា ក្នុងជំនួបនេះលោក ម៉ាទីន បានជម្រាបជូនសម្តេចតេជោថា បេសកកម្មរបស់លោក មកកាន់កម្ពុជានាពេលនេះ គឺធ្វើយ៉ាងណាពង្រីក និងពង្រឹងទំនាក់ទំនងរវាងប្រទេសទាំងពីរឲ្យកាន់តែរីកធំធាត់ឡើង និងស៊ីជម្រៅថែមទៀត។

លោកបានបន្ថែមថា “សាធារណៈរដ្ឋឆែក មានមនោសញ្ចេតនាខ្ពស់ និងអារម្មណ៍យ៉ាងជិតស្និទជាមួយនឹងកម្ពុជា។ ឈរនៅលើមូលដ្ឋាននេះ លោកបានសន្យា ជូនសម្តេចតេជោថា នឹងប្រឹងប្រែងឲ្យអស់ពីសមត្ថភាព ដើម្បីជំរុញនិងលើកស្ទួយកិច្ចសហប្រតិបត្តិការ លើវិស័យនយោបាយ វិស័យសេដ្ឋកិច្ច វិស័យពាណិជ្ជកម្ម និងលើវិស័យវិនិយោគ ។លោកក៏បានជំរាបជូនសម្តេចតេជោដែរថា សាធារណៈរដ្ឋឆែក នឹងបន្តជួយដល់កម្ពុជា ជាពិសេសលើការអភិវឌ្ឍធនធានមនុស្ស”។

សម្តេចតេជោ បានសម្តែងនូវការស្វាគមន៍ និងអបអរជូនចំពោះលោក ម៉ាទីន វ៉ាវរ៉ា ដែលត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាព ប្រចាំនៅកម្ពុជា។

សម្តេចតេជោ បានថ្លែងអំណរគុណ ដល់ប្រជាជន និងរដ្ឋាភិបាលសាធារណៈរដ្ឋឆែក ដែលបានជួយដល់កម្ពុជា ពីអតីតកាលលើវិស័យនយោបាយ សេដ្ឋកិច្ច និងសង្គមកិច្ច។ ពីនោះទៅទៀត ក៏បានលុបបំណុលមួយចំនួនធំ ហើយបំណុលដែលសេសសល់ បានបង្វែរមកជួយកម្ពុជាវិញ តាមរយៈការសាងសង់សាលារៀន និងវិស័យសង្គមកិច្ចជាដើម។ សម្តេចតេជោ បានឱ្យលោកអគ្គរដ្ឋទូតថ្មីរបស់ឆែកប្រចាំកម្ពុជា យកចិត្តទុកដាក់ ទៅលើការជំរុញកិច្ចសហប្រតិបត្តិការ លើវិស័យសេដ្ឋកិច្ច ពាណិជ្ជកម្ម វិនិយោគ និងទៅលើការអភិវឌ្ឍធនធានមនុស្ស ខណៈកម្ពុជាក៏បាន និងកំពុងតែជំរុញការចាក់វ៉ាក់សាំងបង្ការជំងឺកូវីដ១៩ ដែលអាចចាក់បានដល់ទៅ១០លាននាក់ ត្រឹមតែវិច្ឆិកាខាងមុខ៕