ដោយៈ ប៊ី

ភ្នំពេញៈ ក្រុមហ៊ុនអភិវឌ្ឍន៍អចលនទ្រព្យចិន Agile Group Holdings ប្រកាសលក់ភាគហ៊ុនតម្លៃ៧.០៥ពាន់លានយ័ន (ប្រមាណ១,០៨ពាន់លានដុល្លារអាមេរិក) នៅក្នុងគម្រោងអចលនទ្រព្យចំនួន៧ ទៅឱ្យក្រុមហ៊ុនPing An Insurance Group។ នេះបើយោងតាមការចេញផ្សាយរបស់ South China Morning Post កាលពីថ្មីៗនេះ។

ការលក់ភាគហ៊ុននឹងនាំមកនូវសាច់ប្រាក់ ដែលត្រូវការជាចាំបាច់ មុនពេលបទ ប្បញ្ញត្តិ រឹងបន្តឹងលើការកម្ចីចូលជាធរមាន ហើយអនុញ្ញាតឱ្យក្រុមហ៊ុនPing An ពង្រីកខ្លួនកាន់ធំ នៅក្នុងទីផ្សារអចលនទ្រព្យដ៏ធំរបស់ប្រទេសចិន។

ក្រុមហ៊ុន Agile ដែលបានចុះបញ្ជីនៅហុងកុង កំពុងលក់ភាគហ៊ុនរបស់ខ្លួននៅក្នុងការអភិវឌ្ឍជាច្រើន ជាពិសេសនៅភាគខាងត្បូងនិងខាងកើត និងភាគកណ្តាលនៃប្រទេ សចិនទៅឱ្យក្រុមហ៊ុនPing An។

ក្រុមហ៊ុនអចលនទ្រព្យ ដែលមានទីស្នាក់ការកណ្តាលនៅក្វាងចូវ បានឱ្យដឹងនៅក្នុងឯកសារមួយថា “នេះអាចធ្វើឱ្យមានការធ្វើពិពិធកម្ម ផ្នែកហិរញ្ញវត្ថុរបស់ក្រុមហ៊ុន និងជួយសម្រួលដល់ក្រុមហ៊ុន ដើម្បីបំពេញតាមតម្រូវការដើមទុនចរន្ត ការសម្រាប់ការអភិ វឌ្ឍគម្រោងអចលនទ្រព្យ”។

គម្រោងទាំង៧នេះ គ្របដណ្តប់លើផ្ទៃដី១,៧៦លានម៉ែត្រការ៉េ ក្នុងនោះគម្រោងចំនួនបីស្ថិតនៅក្នុងទីក្រុង Zhongshan, Qingyuan និង Huizhou ក្នុងខេត្ត Guangdong មួយស្ថិតនៅខេត្ត Hainan និងគម្រោងផ្សេងៗទៀតនៅសល់គឺនៅទីក្រុង Yang Yang, Zhengzhou និង Tianjin ។

ប្រព័ន្ធផ្សព្វផ្សាយរដ្ឋចិនបានរាយការណ៍ថា ចាប់ពីដើមឆ្នាំ២០២១ អ្នកអភិវឌ្ឍន៍ ដែលមិនបានបំពេញតាមតម្រូវការ ហិរញ្ញវត្ថុជាក់លាក់ចំនួន៣ នឹងត្រូវបានដាក់ឱ្យស្ថិតការរឹតបន្តឹង ឬត្រូវបានហាមឃាត់ទាំងស្រុងពីការខ្ចីប្រាក់។

លោក Zhang Bo ប្រធានអ្នកវិភាគនៅវិទ្យាស្ថានស្រាវជ្រាវអចលនទ្រព្យ58 Anjuke Real Estate Research Institute បានមានប្រសាសន៍ថា “ក្រុមហ៊ុនធានារ៉ាប់រងវិនិយោគ លើអ្នកអភិវឌ្ឍន៍អចលនទ្រព្យ គឺជានិន្នាការដ៏ធំមួយក្នុងរយៈពេល២ឆ្នាំចុងក្រោយនេះ។ ទោះបីពួកគេមិនបានអភិវឌ្ឍអចលនទ្រព្យក៏ដោយ និន្នាការរបស់ពួកគេក្នុងឧស្សាហកម្មអចលនទ្រព្យ តាមរយៈការទិញភាគហ៊ុននៅក្នុងគម្រោងនានា គឺកើតឡើងរួចទៅហើយ”៕

ដោយៈ ម៉ាណេត

ភ្នំពេញៈ ក្រុមហ៊ុន Top Planning Japan (TPJ) សហការជាមួយសិប្បកម្មកែច្នៃគ្រាប់ស្វាយចន្ទី ជ័យ សំបូរ នឹងពង្រីកទិសដៅនាំចេញទៅកាន់ទីផ្សារអន្តរជាតិ ដូចជាទីផ្សារអឺរ៉ុប សហរដ្ឋអាមេរិក កាណាដា ចិន និងអូស្រ្តាលី បន្ទាប់នាំចេញទីផ្សារជប៉ុនទទួលបានជោគជ័យ។

ការបង្ហាញទិសដៅនាំចេញថ្មីៗនេះ ត្រូវបានធ្វើឡើង ក្នុងអំឡុងពេលលោក វេង សាខុន រដ្ឋមន្ត្រីក្រសួងកសិកម្ម រក្ខាប្រមាញ់ និងនេសាទ អញ្ជើញមកពិនិត្យសកម្មភាពកែច្នៃគ្រាប់ស្វាយចន្ទីរបស់សិប្បកម្ម កែច្នៃគ្រាប់ស្វាយចន្ទីជ័យ សំបូរ ដែលមានទីតាំងនៅភូមិត្រពាំងអារក្ស ឃុំជ័យ ស្រុកកំពង់ស្វាយសម្រួលពីនាយកដ្ឋានកសិ-ឧស្សាហកម្ម នៅថ្ងៃទី១៣ ខែមិថុនាកន្លងមកនេះ។

ជាមួយគ្នានេះ សហការជាមួយសមាគមស្វាយចន្ទីកម្ពុជា កសាងឃ្លាំងស្តុកគ្រាប់ស្វាយចន្ទីស្រស់ ដែលមានសមត្ថភាពស្តុកទុកគ្រាប់យ៉ាងតិច៥០០០តោន ដើម្បីធានាបរិមាណផ្គត់ផ្គត់ និងតម្លៃកិច្ចសន្យា។ នៅឆ្នាំ២០២៣ ក្រុមហ៊ុនTPJ គ្រោងបង្កើតរោងចក្រកែច្នៃ ដែលមានសមត្ថភាពផលិតបានរហូតដល់ ២ ០០០-៣ ០០០តោន/ឆ្នាំ។

តាមរបាយការណ៍របស់នាយកដ្ឋានកសិ-ឧស្សាហកម្ម បានឲ្យដឹងថា ដោយមានការគាំទ្រពីអង្គការ JICA) ក្រុមហ៊ុន TPJ បានទទួលគម្រោងគាំទ្រ ដើម្បីសិក្សាលំអិតអំពីស្ថានភាពទូទៅ នៃខ្សែច្រវាក់តម្លៃស្វាយចន្ទី ក្នុងគោលបំណងកសាងផែនការមេសម្រាប់អភិវឌ្ឍន៍ និងលើកកកម្ពស់ផលិតផលស្វាយចន្ទីកម្ពុជា រយៈពេល១៤ខែ ចាប់ពីថ្ងៃទី១៦ ខែសីហា ឆ្នាំ២០១៩ ដល់ថ្ងៃទី៣០ ខែកញ្ញា ឆ្នាំ២០២០ ក្នុងខេត្តគោលដៅចំនួន៤ (ព្រះវិហារ កំពង់ធំ សៀមរាប និងខេត្តកំពង់ចាម)។

ជាការសាកល្បងអនុវត្តន៍គម្រោង ក្រុមហ៊ុន TPJ បានចុះកិច្ចព្រមព្រៀងជាមួយសិប្បកម្មកែច្នៃគ្រាប់ស្វាយចន្ទីជ័យសំបូរ ក្នុងការទិញគ្រាប់ស្វាយចន្ទី ដើម្បីធ្វើការកែច្នៃសាកល្បងប្រមាណចំនួន១៥០តោន។ ទទួលបានទុនវិនិយោគពាណិជ្ជកម្ម ពីក្រុមហ៊ុន បានចរចារទិញគ្រាប់ស្វាយចន្ទី តាមការចរចារតម្លៃលើប្រភេទ និងគុណភាពតាមទីផ្សារជាក់ស្តែងប្រមាណ២០ម៉ឺនដុល្លាក្នុងឆ្នាំ២០២០។

ឆ្នាំ២០២១ នេះសិប្បកម្មគ្រោងទិញគ្រាប់ស្វាយចន្ទី ចំនូន១០០០តោន ពីកសិករ ដែលក្នុងនោះ ក៏នឹងសាកល្បងកែច្នៃគ្រាប់ស្វាយចន្ទីសរីរាង្គ ចំនួន៣០តោនដែលទទួលទិញពីសហគមន៍ ផលិតគ្រាប់ស្វាយចន្ទីសរីរាង្គក្នុងខេត្តព្រះវិហារ។

ដោយមានការជួយជ្រោមជ្រែងពីនាយកដ្ឋានកសិ-ឧស្សាហកម្ម នៅថ្ងៃទី២២ ខែកុម្ភៈ ឆ្នាំ២០២០ ក្រុមហ៊ុន Top Planning Japan (TPJ) បានចុះអនុសារណៈយោគយល់គ្នា (MOU) ជាមួយសិប្បកម្មកែច្នៃគ្រាប់ស្វាយចន្ទី ជ័យសំបូរ លើកិច្ចសហប្រតិបត្តិការពាណិជ្ជកម្ម ដើម្បីសាងសង់រោងចក្រកែច្នៃគ្រាប់ស្វាយចន្ទីខ្នាតតូច ជាការសាកល្បង។

MOU នេះមានគោល បំណងលើកកម្ពស់គុណភាពគ្រាប់ស្វាយចន្ទីស្រស់ និងផ្តល់តម្លៃខ្ពស់ដល់កសិករក្នុងតំបន់ និងកសិករដែលបានចុះកិច្ចសន្យាផលិតកម្មកសិកម្ម ធានាគុណភាព និងសុវត្ថិភាពគ្រាប់ស្វាយចន្ទី បង្កើតឱកាសការងារ និងប្រាក់កម្រៃសមរម្យដល់ស្រ្តី និងយុវជននៅក្នុងសហគមន៍ និងលើក កម្ពស់សមត្ថភាពប្រកួតប្រជែងទាំងនៅលើទីផ្សារនៅក្នុងតំបន់ និងទីផ្សារអន្តរជាតិ។ បច្ចុប្បន្នសិប្បកម្មកែច្នៃគ្រាប់ស្វាយចន្ទីមានសមត្ថភាពកែច្នៃគ្រាប់ស្វាយចន្ទីបាន១០តោន/ខែ។

លទ្ធផលនៃការអនុវត្ត MOU និងដោយមានកិច្ចសហការល្អ ជាមួយនាយកដ្ឋានកសិ-ឧស្សាហកម្ម ធ្វើឲ្យគ្រាប់ស្វាយចន្ទីកែច្នៃរួចបានបង្ហាញខ្លួន នៅលើទីផ្សារជប៉ុននាពេលថ្មីៗនេះ។ ជាក់ស្តែង នៅថ្ងៃទី៧ ខែឧសភា សិប្បកម្មគ្រាប់ស្វាយចន្ទីជ័យសំបូរ បាននាំចេញគ្រាប់ស្វាយចន្ទីកែច្នៃរួចចំនួន៧តោន ទៅកាន់ប្រទេសជប៉ុនសម្រាប់លើកទី១ ហើយលើកទី២ គឺនៅថ្ងៃនេះតែម្តងមានចំនួន៩តោន បានដាក់ចូលក្នុងទូកុងទីន័ររួចរាល់ គ្រោងនាំចេញនៅថ្ងៃទី១៧ខាងមុខ ហើយសង្ឃឹមថា ផលិតផលខ្មែរនេះនឹងទៅដល់ទីក្រុង OSAKA នៅថ្ងៃទី១៥ ខែកក្កដា។

សិប្បកម្មកែច្នៃគ្រាប់ស្វាយចន្ទីជ័យ សំបូរ គ្រោងនាំចេញក្នុងបរិមាណ៩តោន ជារៀងរាល់ខែ ហើយបរិមាណនេះនឹងមានការកើនឡើង តាមការបញ្ជាទិញពីទីផ្សារជប៉ុននាពេលអនាគត។ ក្រៅពីទីផ្សារអន្តរជាតិ សិប្បកម្មកែច្នៃគ្រាប់ស្វាយចន្ទី ជ័យ សំបូរ បានផ្គត់ផ្គងឲ្យទីផ្សារក្នុងស្រុក ដូចជា សហករណ៍សរីរាង្គខ្មែរ លក់ដុំ លក់រាយជូនអតិថិជនទៅតាមបណ្តាខេត្ត និងតំបន់ទេសចរណ៍ប្រាសាទសំបូរព្រៃគុកផងដែរ៕

ដោយៈ ម៉ាណេត

ភ្នំពេញៈគម្រោងវិនិយោគថ្មីៗចំនួន៦ ដែលត្រូវបានអនុម័ត ដោយក្រុមប្រឹកអភិវឌ្ឍន៍កម្ពុជា (CDC) ប្រកាសបោះទុនវិយោគ៩៩,៦លានដុល្លារក្នុងរយៈពេល៣ខែ គិតចាប់ពីមីនា ដល់ដើមខែមិថុនា ឆ្នាំ២០២១។ នេះបើយោងតាមការបុកសរុបគេទំព័រ Propertyarea.asia។

គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចជា ទី១ ក្រុមហ៊ុន XIN WEI JIE CO., LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ មានទុនវិនិយោគប្រមាណ ២,៩លានដុល្លារអាមេរិក និងអាចបង្កើតការងារបានចំនួន ៦៥៩កន្លែង។

ទី២ ក្រុមហ៊ុនISLAND LABORATOIRE CO., LTD. គម្រោងបង្កើតរោងចក្រផលិតឱសថ ដែលមានទីតាំងវិនិយោគស្ថិតនៅភូមិបាក់ខែងលើ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ មានទុនវិនិយោគប្រមាណ៦,៣លានដុល្លារអាមេរិក និងអាចបង្កើតការងារបានចំនួន ២៦០កន្លែង។

ទី៣ ក្រុមហ៊ុន “HERBA (CAMBODIA) CO., LTD” គម្រោងបង្កើតរោងចក្រកែច្នៃ និងវេចខ្ចប់ផលិតផលកសិកម្ម ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេសភ្នំពេញ, មានទុនវិនិយោគប្រមាណ៣,៦លានដុល្លារអាមេរិក និងអាចបង្កើតការ​ងារបានចំនួន១២០កន្លែង។

ទី៤ ក្រុមហ៊ុន SPARKBAGS (CAMBODIA) CO., LTD : គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិកន្ទោកជើង សង្កាត់កន្ទោ​ក ខណ្ឌកំបូល រាជធានីភ្នំពេញ មានទុនវិនិយោគប្រមាណ ៣,៣លានដុល្លារអាមេរិក និងអាចបង្កើតការងារបានចំនួន ៧១៨កន្លែង។

ទី៥-ក្រុមហ៊ុន RUIXUE (CAMBODIA) CO., LTD គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនខាងលើ មានទីតាំងវិនិយោគស្ថិតនៅផ្លូវលេខ១៩៨ ភូមិសំរោង សង្កាត់ឃ្មួញ ខណ្ឌសែនសុខ រាជធានីភ្នំពេញ មានទុនវិនិយោគប្រមាណ៤,៥លានដុល្លារអាមេរិក និងអាចបង្កើតការងារបានចំនួន ១.៩២៩កន្លែង។

ទី៦-ក្រុមហ៊ុន CONTINENT CROWN INVESTMENT MANAGEMENT CO., LTD: គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៤ ចំនួន២៧៥បន្ទប់ និងមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅដីឡូតិ៍លេខ១៦៧៩ ផ្លូវសហព័ន្ធរុស្ស៊ី ភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ៧៩លានដុល្លារអាមេរិក និងអាចបង្កើតការងារបានចំនួន ៦៧៨កន្លែង។

លោកច្រឹក សុខនីមប្រធានសមគមអ្នកវាយតម្លៃ និងភ្នាក់ងារវត្ថុកម្ពុជាបានថ្លែងប្រាប់ថា បច្ចុប្បន្ន រោងចក្រសហគ្រាសថ្មីៗភាគច្រើន ដែលចូលមកវិនិយោគនៅទីក្រុងភ្នំពេញ បានបោះទីតាំងនៅតំបន់ជាយក្រុង ដោយសារសាលាក្រុងបានដាក់ចេញសម្រេចមួយ ដែលតម្រូវឱ្យផ្លាស់ប្តូរទីតាំងពីក្នុងទីក្រុង ទៅជាយក្រុង។

លោកបានថ្លែងបន្តថា “ទោះស្ថិតក្នុងវិបត្តិកូវីដ១៩ វិស័យរោងចក្រ ឧស្សាហកម្មនៅកម្ពុជា នៅតែទទួលបានគម្រោងវិនិយោគថ្មីៗជាបន្តបន្ទាប់ ដែលបញ្ជាក់ថា កម្ពុជានៅតែមានសក្តានុពលសម្រាប់ការវិនិយោគនានា ពិសេសវិស័យរោងចក្រ និងឧស្សាហកម្ម”៕

ដោយៈគង់ សូរិយា

ភ្នំពេញៈ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានសម្រេចដឹកនាំគណៈកម្មការជាតិប្រយុទ្ធនឹងជំងឺកូវីដ១៩ (គ.ប.ក)ដោយផ្ទាល់ ដោយអមដោយឧបនាយ​ក​រដ្ឋមន្រ្តី៤រូប ក្នុងនោះអនុប្រធានប្រចាំការ១រូប និងអនុប្រធានចំនួន៤រូប ព្រមទាំងសមាជិកជាច្រើននាក់ទៀតផងដែរ។

យោងតាមអនុក្រឹត្យស្ដីពីការរៀបចំ និងការប្រព្រឹត្តទៅ នៃគណៈកម្មការជាតិប្រយុទ្ធនឹងជំងឺកូវីដ១៩ ដែលបានចេញផ្សាយនៅល្ងាចថ្ងៃទីថ្ងៃទី១៣ ខែមិថុនា ឆ្នាំ២០២១កន្លងមកបានឲ្យដឹងថា សម្ដេចតេជោ ហ៊ុន សែន ក៏បានកំណត់ឲ្យមានគណៈប្រចាំការមួយ ជាសេនាធិការប្រចាំការផងដែរ ដោយសមាសភាពប្រធានមួយរូប គឺឧបនាយករដ្ឋមន្ដ្រី រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ អមដោយអនុប្រធាន២រូប និងសមាជិក។

គណៈកម្មការជាតិប្រយុទ្ធនឹងជំងឺកូវីដ១៩ មានតួនាទី និងភារកិច្ចដូចខាងក្រោម៖
* ដឹកនាំការប្រយុទ្ធនឹងជំងឺកូវីដ១៩
* កំណត់គោលនយោបាយ និងផែនការយុទ្ធសាស្ដ្រ ដើម្បីប្រយុទ្ធនឹងជំងឺកូវីដ១៩ សំដៅកាត់បន្ថយឲ្យបានជាអតិបរមា នូវផលប៉ះពាល់ដល់វិស័យសុខាភាពសាធារណៈ និងធានា​ដល់និរន្ដរភាព នៃកិច្ចដំណើរការ និងជំរុញការស្ទុះងើបឡើង នៃវិស័យសង្គម-សេដ្ឋកិច្ចតាម “គន្លងប្រក្រតីភាពថ្មី”។

* ដឹកនាំអនុវត្តផែនការយុទ្ធសាស្ដ្រ ក្នុងការប្រយុទ្ធ ទប់ស្កាត់ និងគ្រប់គ្រងការឆ្លងរាលដាលជំងឺកូវីដ១៩។
* គ្រប់គ្រងផលប៉ះពាល់លើទិដ្ឋភាពនយោបាយ សេដ្ឋកិច្ច និងសង្គមទាំងកម្រិតជាតិ និងអន្ដរជាតិ និង
* ដឹកនាំ និងសម្របសម្រួលការអនុវត្តវិធានការជាអន្ដរវិស័យ អន្ដរស្ថាប័ន ទាំងនៅរដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិ និងជាមួយដៃគូដែលមានការពាក់ព័ន្ធ។

ជាមួយគ្នានេះ មាត្រា៥ នៃអនុក្រឹត្យនេះក៏បានកំណត់ពី គណៈកម្មការក្រោមឱវាទរបស់ គណៈកម្មការជាតិប្រយុទ្ធនឹងជំងឺកូវីដ១៩ រួមមាន៖
* គណៈកម្មការអន្ដរក្រសួង ដើម្បីប្រយុទ្ធនឹងជំងឺកូវីដ១៩ សរសេរជាអក្សរកាត់ថា «គ.អ.ក»
* គណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខ័ណ្ឌទូទាំងប្រទេស សរសេរជាអក្សរកាត់ថា “គ.វ.ក-១៩”។
* គណៈកម្មការចំពោះកិច្ចទទួលបន្ទុកលទ្ធកម្ម វ៉ាក់សាំងកូវីដ១៩ សរសេរជាអក្សរកាត់ថា”គ.ល.វ”។
* គណៈកម្មការប្រយុទ្ធនឹងជំងឺកូវីដ១៩ ថ្នាក់រាជធានី-ខេត្ត សរសេរជាអក្សរកាត់ថា “គ.រ.ខ”។

ក្នុងករណីចាំបាច់ រាជរដ្ឋាភិបាលអាចបង្កើតគណៈកម្មការ ឬយន្ដការផ្សេងទៀត ដោយសេចក្ដីសម្រេច តាមសំណើរបស់គណៈប្រចាំការ នៃ គ.ប.ក ដើម្បីបម្រើឲ្យការប្រយុទ្ធនឹងជំងឺកូវីដ១៩៕