ដោយៈ ម៉ាណេត

ភ្នំពេញៈ បរិមាណនៃការនាំចូល និងនាំចេញ តាមរយៈតំបន់សេដ្ឋកិច្ចពិសេសក្រុងព្រះសីហនុ (SSEZ) សម្រេចបានទំហំទឹកប្រាក់សរុបជិត១០០០លានដុល្លារ ក្នុងរយៈពេល៦ខែដើមឆ្នាំនេះ។ នេះយោងតាមស្ថិតិចុងក្រោយរបស់SSEZ។

យោងតាមស្ថិតិចុងក្រោយគិតចាប់ពី ខែមករា ដល់ខែមិថុនាឆ្នាំនេះ សហគ្រាសនៅតំបន់សេដ្ឋកិច្ចពិសេសក្រុងព្រះសីហនុ ទទួលបានបរិមាណនាំចូល និងនាំចេញសរុបចំនួន៩៩៤លានដុល្លារអាមេរិក ពោលគឺកើនឡើង៤៩,៩២% បើធៀបនឹងរយៈពេលដូចគ្នានៃឆ្នាំកន្លងមក។ យើងនឹងបន្តរក្សាកំនើននេះឱ្យស្ថិតស្ថេរ។

លោក Wang Wentian ឯកអគ្គរដ្ឋទូតចិនប្រចាំកម្ពុជាបានថ្លែងថា ស្ថិតក្រោមលក្ខខណ្ឌនៃជំងឺវីរុសកូវីដ១៩ ពាណិជ្ជកម្មចិន-កម្ពុជាក្នុងឆ្នាំ២០២០បន្តកើនឡើង ទោះបី​ជាជួបនឹងឧបសគ្គជំងឺវីរុសក៏ដោយ ដែលមានចំនួនទឹកប្រាក់សរុបជាង៩.៥៦ពាន់លានដុល្លារ។

លោកបានថ្លែងថា “គម្រោងសំខាន់ៗនៃខ្សែក្រវាត់ និងផ្លូវ ត្រូវបានជំរុញយ៉ាងរលូនមានដូចជា គម្រោងតំបន់សេដ្ឋកិច្ចពិសេសខេត្តព្រះសីហនុ គម្រោងផ្លូវល្បឿនលឿនភ្នំពេ​ញ-ក្រុងព្រះសីហនុ គម្រោងផ្គត់ផ្គង់ទឹកស្អាតនៅទីជនបទ និងគម្រោងពហុកីឡាដ្ឋានជាតិមរតកតេជោជាដើម”។

កាលពីខែតុលា ឆ្នាំ២០២០ចិន-កម្ពុជាបានចុះហត្ថលេខា លើកិច្ចព្រមព្រៀងពាណិ​ជ្ជកម្មសេរីជាប្រវត្តិសាស្ត្រ ហើយផលិតផល ដែលមានគុណភាពខ្ពស់របស់កម្ពុជាត្រូវបានអនុញ្ញាតនាំចេញទៅទីផ្សារ ចិន និងមានវត្តមានលើតុអាហាររបស់ប្រជាជនចិន ដូចជាផ្លែចេក ស្វាយ និងជលផលជាដើម ខណៈកិច្ចព្រមព្រៀងពាណិជ្ជកម្មសេរីនេះត្រូវបានរំពឹងទុកថានឹងចូលជាធរមាននៅដើមឆ្នាំក្រោយ។

លោកប៉ាន សូរស័ក្តិរដ្ឋមន្ត្រីក្រសួងពាណិជ្ជកម្ម ដែលបានដឹកនាំគណៈប្រតិភូអន្តរក្រសួងចូលរួមកិច្ចប្រជុំការពារសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីកម្ពុជា-ចិន និងច្បាប់ស្តីពីការប្រកួតប្រជែង” ជាមួយលោកស្រីនិន សាផុនប្រធានគណៈកម្មការទី៩ នៃរដ្ឋសភាកាលពីថ្ងៃទី៨ ខែកក្កដា បានលើកឡើងថា ការសម្រេចបាននូវកិច្ចព្រមព្រៀងពាណិជ្ជកម្មសេរីកម្ពុជា-ចិន គឺពិតជានឹងចូលរួមអនុវត្តយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលនីតិកាលទី៦ នៃរដ្ឋសភា ស្របតាមចំណុចទី៤ស្តីពី ការពង្រឹងសមត្ថភាពកម្ពុជា ដើម្បីបន្តសមាហរណកម្មខ្លួនចូលក្នុងសេដ្ឋកិច្ចតំបន់ និងពិភពលោក។

លោកបានថ្លែងថា “នៅក្នុងកាលៈទេសៈនៃវិបត្តិជំងឺឆ្លងកូវីដ១៩ ច្បាប់ទាំង២ នេះនឹងជួយដល់យុទ្ធសាស្ត្រស្តារឡើងវិញ នូវសេដ្ឋកិច្ចកម្ពុជា ដែលបានរងការញាំញីធ្ងន់ធ្ងរពីជំងឺកូវីដ១៩ ព្រមទាំងជួយឱ្យមានភាពស៊ាំនៃសង្គមសេដ្ឋកិច្ច ក្នុងប្រក្រតីភាពថ្មីនៃសង្គមកម្ពុជា តាមរយៈកំណើននៃការនាំចេញទៅកាន់ទីផ្សារចិន និងលំហូរវិនិយោគចូលមកកម្ពុជា ដែលនឹងជួយបង្កើតការងារ និងចំណូលជូនប្រជាពលរដ្ឋយើង”៕

ដោយៈវឌ្ឈនៈ

ភ្នំពេញៈ ទោះបីជាមានការយារយីពីវិបត្តិនៃជំងឺកូវីដ១៩ក្ដី តែ ប្រតិបត្តិការសំខាន់ៗនៅក្នុងប្រទេសកម្ពុជា នៅតែមានដំណើរការល្អប្រសើរ ជាក់ស្ដែងនៅក្នុងត្រីមាសទី២នៃឆ្នាំ២០២១នេះ ចំណូលពីប្រតិបត្តិការនានា នៃកំពង់ផែស្វយ័តក្រុងភ្នំពេញនៅតែមានកំណើន។

យោងតាមរបាយការណ៍របស់កំពង់ផែស្វយ័តក្រុងភ្នំពេញឱ្យដឹងថា នៅក្នុងត្រីមា​សទី២ នៃឆ្នាំ២០២១នេះ កំពង់ផែស្វយ័តក្រុងភ្នំពេញ រកចំណូលបានប្រមាន៧,១លានដុល្លារអាមេរិក ធៀបនឹងត្រីមាសទី២ដូចគ្នា កាលពីឆ្នាំមុនមានកំណើនប្រមាណ១១ភាគរយ ខណៈត្រីមាសទី២កាលពីឆ្នាំមុន ចំណូលកំពង់ផែនេះរកបាន៦,៤លានដុល្លារអាមេរិក ។

របាយការណ៍ដដែល បានបង្ហាញទៀតថា ក្នុងត្រីមាសទី២ ឆ្នាំ២០២១នេះ ចំណូ​លពីប្រតិបត្តិការផែជាង៥៧ម៉ឺនដុល្លារអាមេរិក កើនឡើង១១ភាគរយ ចំណូលពីអាជ្ញាធរផែមានជាង៧៧ម៉ឺនដុល្លារអាមេរិក កើនឡើង៦ភាគរយ ចំណូលពីសេវាកម្មផ្សេងៗ ជាង ១៣ម៉ឺនដុល្លារអាមេរិក កើនឡើង៧១៩ភាគរយ និងចំណូលផ្សេងៗជាង៥៥ម៉ឺនដុល្លារអាមេរិកធ្លាក់ចុះ៩ភាគរយ ។

របាយការណ៍របស់កំពង់ផែស្វយ័តក្រុងភ្នំពេញ បានបង្ហាញពីចំណូលប្រចាំខែមិថុនា ឆ្នាំ២០២១ដែរ ដោយចំណូលពីប្រតិបត្តិការផែ មានទំហំជាង២,២លានដុល្លារអាមេរិក កើនឡើង៤ភាគរយ។ ចំណូលពីអាជ្ញាធរផែជាង ២៩ម៉ឺនដុល្លារអាមេរិក កើនឡើង២ភាគរយ ចំណូលពីសេវាកម្មផ្សេងៗជាង៤ម៉ឺនដុល្លារអាមេរិក កើនឡើង៥៦០ភាគរយ និងចំណូលផ្សេងៗ ជាង២៣ម៉ឺនដុល្លារអាមេរិកធ្លាក់ចុះ៦ភាគរយ ។

កំពង់ផែស្វយ័តក្រុងភ្នំពេញជាក្រុមហ៊ុនរបស់រដ្ឋមួយ ដែលបានចូលក្នុងផ្សារហ៊ុនកម្ពុជាផងដែរ ហើយប្រតិបត្តិការទិញលក់ភាគហ៊ុន របសកំពង់ផែមួយនេះនៅតែមានសកម្មភាពបន្តបន្ទាប់ផងដែរ ។

នៅក្នុងត្រីមាសទី១នៃឆ្នាំ២០២១ កំពង់ស្វយ័តក្រុងភ្នំពេញរកចំណូល១៥,៣លានដុល្លារអាមេរិក ( ពុំទាន់ធ្វើសវនកម្ម ) ដែលមានកំណើនប្រមាណ៨ភាគរយ ធៀបនឹងរយៈពេលដូចគ្នាកាលពីឆ្នាំ២០២០ ដូច្នេះនៅក្នុងឆមាសទី១នៃឆ្នាំ២០២១នេះ ចំណូលរបស់កំពង់ផែមួយនេះ មិនទាន់ធ្វើសវនកម្មមានចំនួន ២២,៤លានដុល្លារអាមេរិក៕

ដោយៈវឌ្ឈនៈ

ភ្នំពេញៈ ដោយសារកម្ពុជាមានផ្ទៃដីដាំដុះ និងមានកំលាំងបម្រើក្នុងវិស័យកសិកម្មច្រើន កម្ពុជានឹងប្រែក្លាយទៅជាប្រទេសផលិតស្បៀងអាហារ សម្រាប់បម្រើដល់ទីផ្សារនៃការនាំចេញ និងកំពុងក្លាយជាប្រទេស ក្នុងការផ្គត់ផ្គង់កសិផល ដល់ខ្សែសង្វាក់ផលិតកម្មសកលផងដែរ។ នេះតាមការលើកឡើងរបស់មន្រ្តីជាន់ខ្ពស់នៃក្រសួងពាណិជ្ជកម្ម។

អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិបានមានប្រសាសន៍ឲ្យដឹងកាលពីល្ងាចថ្ងៃទី១២ ខែកក្កដា ឆ្នាំ២០២១កន្លងមកថា យោងតាមអនុសាសន៍របស់ប្រមុខរាជរដ្ឋាភិបាល កម្ពុជានឹងប្រែក្លាយទៅជាប្រទេសផលិតស្បៀងអាហារ សម្រាប់បម្រើទៅកាន់ទីផ្សារពិភពលោក នឹងអាចប្រែក្លាយទៅជាប្រទេសធ្វើកសិកម្មទំនើប ក្នុងនោះក្រសួងក៏បានប្តេជ្ញាចិត្តស្វែងរកទីផ្សារថ្មីៗទៀត ក្នុងការធ្វើពិពិធកម្មទីផ្សារផងដែរ។
ជាក់ស្តែងមកដល់ពេលនេះ កម្ពុជាកំពុងមានលទ្ធភាព និងមានមុខងារយ៉ាងសំខា​ន់លើការបំពេញបន្ថែម នៅក្នុងខ្សែសង្វាក់ផលិតកម្ម ដើម្បីបម្រើទីផ្សារនៃការនាំចេញ និងកំពុងក្លាយជាប្រទេសនៅក្នុងការផ្គត់ផ្គង់កសិផល ដល់ខ្សែសង្វាក់ផលិតកម្មសកល។

លោកបានបន្ថែមថា ការធ្វើពាណិជ្ជកម្មអន្តរជាតិ នៅប៉ុន្មានឆ្នាំចុងក្រោយនេះ ទីផ្សារនាំចេញផលិតផល ជាពិសេសទីផ្សារនាំចេញកសិផលរបស់កម្ពុជា បានជ្រៀតចូលអន្តរជាតិជាបណ្តើរៗ ជាក់ស្តែងការនាំចេញអង្ករទៅកាន់ទីផ្សារប្រទេសចិន គឺបានកំពុងពេញនិយម និងមានការគាំទ្រយ៉ាងខ្លាំង។

ក្រៅពីនេះការនាំចេញទៅកាន់ទីផ្សារសហគមន៍អឺរ៉ុប ទោះបីមានការបង់ពន្ធខ្លះៗយ៉ាងណាក៏ដោយ គឺនៅបន្តការនាំចេញជាធម្មតា។ ចំណែ​កទីផ្សារទំនិញកសិផលផ្សេងៗទៀត ប្រទេសចិនក៏បានទទួលស្គាល់អំពីបញ្ហាអនាម័យ ភូតគាមអនាម័យដូចជា ចំណិតដំឡូងមី ចេក និងស្វាយស្រស់ជាដើម។

គិតត្រឹមរយៈពេលឆមាសទី១ ឆ្នាំ២០២១នេះ ការនាំចេញកសិផលពីកម្ពុជាមានបរិមាណសរុបសរុបជាង៤៤៥លានតោន ទៅកាន់ទិសដៅ៦២ប្រទេស កើនឡើងចំនួនជាង២០០លានតោន ស្មើនឹងប្រមាណជាង៨៤ភាគរយ ប្រៀបធៀបនឹងរយៈពេលដូចគ្នាទៅនឹងឆ្នាំ២០២០។

តាមការប៉ាន់ស្មានតម្លៃ ដែលទទួលបានពីការនាំចេញកសិផល មានចំនួនជាង២ ៥០០លានដុល្លាអាម៉េរិក ក្នុងនោះការនាំចេញអង្ករមានចំនួនជាង២៣៧លានដុល្លា ស្រូវ​ចំនួន២៧៩លានដុល្លារ និងកសិផលក្រៅពីស្រូវ-អង្ករ មានចំនួនប្រមាណ២ពាន់លានដុល្លារផងដែរ៕

ដោយៈសុខុម

សិង្ហបុរី: លោក Gan Kim Yong រដ្ឋមន្ត្រីពាណិជ្ជកម្ម និងឧស្សាហកម្មសិង្ហបុរី បានថ្លែងនៅឯវេទិកា FutureChina Global Forum កាលពីថ្ងៃច័ន្ទ ទី១២ កក្កដា នេះថា ការជំរុញការតភ្ជាប់ហេដ្ឋារចនាសម្ព័ន្ធរូបវន្ត និងឌីជីថលរវាងអាស៊ាន និងចិន នឹងជួយសម្រួ​លដល់ពាណិជ្ជកម្ម និងជំរុញការងើបឡើងនៃសេដ្ឋកិច្ចតំបន់។ នេះបើយោងតាមសារព័ត៌មាន The Business Times។

ថ្លែងក្នុងឋានៈជាភ្ញៀវពិសេសសម្រាប់ព្រឹត្តិការណ៍ ដែលរៀបចំឡើងដោយស្ថាប័ន Business China នេះ រដ្ឋមន្ត្រីសិង្ហបុរី រូបនេះបានគូសបញ្ជាក់ពីវិធានការសំខាន់ៗមួយចំនួនដែលសិង្ហបុរី អាចនឹងយកទៅអនុវត្តដើម្បីធ្វើឱ្យតំបន់អាស៊ាន ចូលទៅប្រទេសចិន កាន់តែងាយស្រួល ដើម្បីទទួលយកឱកាសសេដ្ឋកិច្ចបន្ថែមទៀត។

លោកបានគូសបញ្ជាក់ថា “គំនិតផ្តួចផ្តើមតភ្ជាប់ចិន-សិង្ហបុរី (ក្រុងឆុងឈីង)” (China-Singapore (Chongqing) Connectivity Initiative) ជាច្រករបៀងពាណិជ្ជកម្មតាមផ្លូវគោក-ផ្លូវសមុទ្រអន្តរជាតិថ្មីមួយ ដែលបានដើរតួនាទីយ៉ាងសំខាន់ក្នុងការជួយសម្រួលដល់រំហូរទំនិញសំខាន់ៗ ដូចជា ស្បៀងអាហារ និងគ្រឿងបរិក្ខារផ្គត់ផ្គត់ផ្នែកវេជ្ជសាស្ត្រជាដើមរវាងប្រទេសចិន និងតំបន់អំឡុងវិបត្តិកូវីដ-១៩”។

ទោះបីជាមានការរអាក់រអួលខ្លះក្ដី ក៏ច្រករបៀងនេះទទួលបានកំណើនរំហូរទំនិញ៣០%ឆ្នាំធៀបនឹងឆ្នាំ។
លោកជឿជាក់យ៉ាងមុតមាំថា ការបង្កើនការតភ្ជាប់ និងឱកាសសេដ្ឋកិច្ចក្នុងតំបន់នឹងជួយជំរុញឱ្យសេដ្ឋកិច្ច ក្នុងតំបន់ងើបឡើងឆាប់រហ័ស។

ក្រៅពីការតភ្ជាប់ហេដ្ឋារចនាសម្ព័ន្ធរូបវន្ត ប្រទេសសិង្ហបុរី ក៏គ្រោងនឹងធ្វើឱ្យប្រសើរឡើងនូវការតភ្ជាប់ហេដ្ឋារចនាសម្ព័ន្ធឌីជីថល រវាងបណ្ដាប្រទេសជាសមាជិកអាស៊ាន និងប្រទេសចិនផងដែរ តាមរយៈវិធានការនានា។ វិធានការមួយចំនួនក្នុងចំណោមនោះរួមមាន ទាំងវិធានការដែលមានស្រាប់ ដើម្បីជួយបង្កើនសមត្ថភាពរបស់ក្រុមហ៊ុននានានៅក្នុងខ្សែសង្វាក់ផ្គត់ផ្គង់ឧស្សាហកម្ម ៤.០ (Industry 4.0) ព្រមទាំងផែនការកំពុងបន្តអនុវត្តន៍នានា ដើម្បីអភិវឌ្ឍហេដ្ឋារចនាសម្ព័ន្ធទិន្នន័យរួម (Common Data Infrastructure (CDI)) សម្រាប់ដោះស្រាយភាពមិនមានប្រសិទ្ធភាព ក្នុងប្រព័ន្ធខ្សែសង្វាក់ផ្គត់ផ្គង់បច្ចុ​ ប្បន្នផងដែរ។

លោក Gan Kim Yong បានថ្លែងថា “តាមរយៈការសម្របសម្រួលការផ្លាស់ប្តូរ​ទិន្នន័យ ដែលអាចទុកចិត្តបាន និងមានសុវត្ថិភាព ហេដ្ឋារចនាសម្ព័ន្ធទិន្នន័យរួម (CDI) អាចជួយជំរុញប្រសិទ្ធភាព និងផលិតភាពតាមរយៈរំហូរព័ត៌មាន កាន់តែល្អប្រសើរនៅក្នុងប្រព័ន្ធខ្សែសង្វាក់ផ្គត់ផ្គង់ទាំងមូល”។

លោកបានបន្ថែមថា “ការអភិវឌ្ឍCDI នឹងជួយជំរុញឱ្យប្រទេសសិង្ហបុរី ក្លាយជាមជ្ឈមណ្ឌលឌីជីថល (Digital Hub) សម្រាប់ពាណិជ្ជកម្ម និងបង្កើតឱកាសថ្មីៗសម្រាប់បណ្ដាដៃគូសហការរបស់យើងធ្វើពាណិជ្ជកម្មជាមួយ និងការឆ្លងកាត់ប្រទេសសិង្ហបុរី”។

នៅក្នុងឆ្នាំ២០២០ ទំហំពាណិជ្ជកម្មរវាងប្រទេសជាសមាជិកទាំង១០ របស់អាស៊ាន និងប្រទេសចិន បានកើនឡើង៧% ដល់៧៣០ពាន់លានដុល្លារអាមេរិក។

រដ្ឋមន្រ្តីសិង្ហបុរី រូបនេះលើកឡើងថា ទំហំពាណិជ្ជកម្មដ៏ធំសម្បើមនេះ ជាសញ្ញាបង្ហាញថា ពាណិជ្ជកម្មរវាងអាស៊ាន និងចិននៅតែបន្តរឹងមាំ បើទោះបីជាស្ថិតក្នុងវិបត្តិកូវីដ-១៩ ក្ដី។

លោក Gan Kim Yong បានគូសបញ្ជាក់ថា បណ្ដាសេដ្ឋកិច្ចជាសមាជិកអាស៊ាន ក៏នឹងមានសារៈសំខាន់កាន់តែខ្លាំងឡើងចំពោះប្រទេសចិន។ លោកថ្លែងថា កត្តានេះធ្វើឱ្យសិង្ហបុរី និងប្រទេសជាសមាជិកអាស៊ាន ផ្សេងៗទៀតស្ថិតនៅក្នុងជំហរដ៏ល្អ ដើម្បីជួយសម្រួលដល់រំហូរទំនិញ ហិរញ្ញប្បទាន និងការវិនិយោគរវាងចិន អាស៊ាន និងតំបន់ផ្សេងទៀតនៃពិភពលោក។

លោកបានគូសបញ្ជាក់ជាថ្មីម្ដងទៀតថា “ប្រទេសសិង្ហបុរី និងអាស៊ាន អាចបន្តពង្រឹងទំនាក់ទំនងសេដ្ឋកិច្ច ដ៏រឹងមាំរបស់យើងជាមួយប្រទេសចិន ហើយស្វែងរកឱកាសថ្មីៗដើម្បីបង្កើនពាណិជ្ជកម្មរូបវន្ត និងឌីជីថល”។លោកបានបន្ថែមថា “ការធ្វើដូចនេះ ប្រទេសសិង្ហបុរី និងអាស៊ាន អាចរក្សាបាននូវសារៈសំខាន់របស់យើង និងបន្តរីកចម្រើនជាមួយគ្នាក្នុងនាមជាតំបន់តែមួយ”៕