ដោយៈគង់ ម៉ាលីន
ភ្នំពេញៈ ស្របពេលប្រមុខរដ្ឋាភិបាលកំពុងជំរុញឲ្យប្រជាពលរដ្ឋចាក់វ៉ាក់សាំងដូសទី៣ ឬសូសជម្រុញ កាចាក់វ៉ាក់សាំងណាមូយ អាចជាជម្រើសរបស់ប្រជាពលរដ្ឋ ប៉ុន្តែការចាក់វ៉ាក់សាំងតាមប្រភេទបានត្រឹមត្រូវ ក៏ជាការប្រសើរផងដែរ ក្នុងការលើកកំពស់សុខភាពសាធារណៈ។
ចំណេះដឹងសុខភាពៈតើអ្នកណាខ្លះត្រូវចាក់វ៉ាក់សាំងរបស់ចិន និងអ្នកណាត្រូវចាក់វ៉ាក់សាំងអង់គ្លេសសំរាប់ដូសទី៣
ការចាក់វ៉ាក់សាំងដូសទី៣ ជាតម្រូវការចាំបាច់ ដើម្បីធានាភាពស៊ាំឱ្យបន្តកើតមានបានយូរ។ លើសពីនេះ ដោយសារភាពស៊ាំពីការចាក់វ៉ាក់សាំងកូវីដ-១៩ ចំនួន២ដូសទំនងមានរយៈពេលតែ៣ ទៅ៦ខែប៉ុណ្ណោះ ទើបការចាក់បន្ថែម១ដូសទៀត ត្រូវបានតម្រូវ និងលើកទឹកចិត្ត។
ក្រៅពីមន្ត្រីជួរមុខ និងបុគ្គលងាយរងគ្រោះ ប្រជាពលរដ្ឋទូទៅប្រមាណ១២លាននាក់ ក៏នឹងទទួលបានការចាក់វ៉ាក់សាំងដូសជំរុញផងដែរ។
ក្រសួងសុខាភិបាលកម្ពុជា បានប្រកាសរួចហើយអំពីប្រភេទវ៉ាក់សាំង ដែលនឹងយកមកប្រើជាដូសទី៣ ឬដូសជំរុញ រួមមាន វ៉ាក់សាំង AstraZeneca របស់អង់គ្លេស វ៉ាក់សាំងចិន Sinovac និង Sinopharm។
មួយវិញទៀត ពលរដ្ឋក៏អាចចាក់វ៉ាក់សាំងប្រភេទផ្សេងបាន ប្រសិនវាចរាចរនៅក្នុងស្រុក។
ខាងក្រោមនេះជាប្រសិទ្ធភាពនៃវ៉ាក់សាំង ២ប្រភេទ ក្រោយចាក់ដូសទី៣ ដែលអ្នកគួរតែមានការយល់ដឹង។
វ៉ាក់សាំង Sinovac
ការស្រាវជ្រាវថ្មីមួយ ដែលចុះផ្សាយដោយសារព៌តមាន Global Times ការចាក់វ៉ាក់សាំង Sinovac ដូសទី៣ បន្ទាប់ពីចាក់ដូសទី២បាន៦ខែ ឬច្រើនជាងនេះ អាចនាំឲ្យមានការកើនឡើងនូវកម្រិតអង់ទីគ័រ និងនាំឲ្យមានការឆ្លើយតបយ៉ាងខ្លាំង នៃប្រព័ន្ធភាពស៊ាំចំពោះការវាយលុកពីវីរុស។ ជាពិសេសវាជួយសុខភាពបុគ្គល ងាយរងគ្រោះបានខ្ពស់ និងទប់ស្កាត់ការរីករាលដាល នៃវីរុសបំប្លែងខ្លួនគ្រប់ប្រភេទ។
ស្របជាមួយគ្នាដែរ វ៉ាក់សាំងនេះមិនមានប្រតិកម្មធ្ងន់ធ្ងរណាមួយ ពាក់ព័ន្ធនឹងការចាក់ដូសទី៣ ត្រូវបានគេសង្កេតឃើញនៅក្នុងអំឡុងការសិក្សានោះទេ។
វ៉ាក់សាំង AstraZeneca
ចំណែកវ៉ាក់សាំង AstraZeneca វិញត្រូវបានអ្នកជំនាញអះអាងថា មានប្រសិទ្ធភាពខ្ពស់នៅពេលចាក់បន្ថែមដូសទី៣។
ការសិក្សារបស់សកលវិទ្យាល័យ Oxford បានរកឃើញថា ការចាក់វ៉ាក់សាំងប្រភេទនេះដូសទី៣ក្នុងរយៈពេល៦ខែ បន្ទាប់ពីចាក់ដូសទី២រួច អាចផលិតអង់ទីគ័រគួរឲ្យកត់សម្គាល់។ វាជួយឱ្យប្រព័ន្ធការពារខ្លួនបង្កើតអង់ទីគ័រខ្ពស់ និងកោសិកាប្រឆាំងនឹងមេរោគផ្សេងៗទៀត ដែលជួយការពារខ្លួនប្រាណ ក្នុងគ្រាដែលអ្នកឆ្លងមេរោគ។
បន្ថែមពីលើនេះ វ៉ាក់សាំង AstraZeneca នឹងជំរុញឲ្យសរីរាង្គ កាន់តែរឹងមាំជាងមុន អាចវាយបកប្រឆាំងនឹងមេរោគកូវីដ-១៩ បានខ្លាំងជាងមុន ព្រមទាំងមានសមត្ថភាពខ្ពស់ប្រឆាំងវីរុសបំប្លែងខ្លួន Delta ផងដែរ។
ចំណែកផលរំខាន អាចកើតមានខុសពីវ៉ាក់សាំងចិន ឬអាចមានផលរំខានច្រើនជាង ប៉ុន្តែពុំផ្ដល់ផលអវិជ្ជមានចំពោះសុខភាពឡើយ៕ ប្រភពកម្ពុជាថ្មី៕
