ដោយៈគង់ សូរិយា
ភ្នំពេញៈ បុគ្គលជោគជ័យនៅទីនេះសំដៅដល់អ្នកមានប្រាក់ កិត្តិយស មានសុខភាពល្អ និងចូលរួមជួយសង្គមបានច្រើន។
ហេតុនេះតើបុគ្គលដែលមានភាពជោគជ័យ ជាបុគ្គលប្រភេទណា និងមានឥរិយាបទបែបណា។
លោកឧកញ៉ាគីម ហ៊ាងៈ បុគ្គលជោគជ័យមានឥរិយាបទចំនួន៥យ៉ាង តើអ្វីខ្លះ?
លោកឧកញ៉ាបណ្ឌិតគីម ហ៊ាង ប្រធាន KW Cambodia ដែលបានវិវត្តន៍ខ្លួនពីភាពជាក្មេងវត្ត មកជាភ្នាក់ងារអចលនទ្រព្យសាមញ្ញ និងបានក្លាយជាឧកញ៉ាបានចែករំលែកពីឥរិយាបទបុគ្គលជោគជ័យមាន៥យ៉ាង ដូចជា ទី១ បុគ្គលជោគជ័យ ជាបុគ្គលដែលមានការចេះដឹង ព្រោះគ្មានអ្នកមានប្រាក់ច្រើនណាមួយមិនចេះនោះទេ ហើយបើមិនចេះក៏គាត់មិនអាចរក្សាភាពជាអ្នកមានបានយូរដែរ។
ហេតុនេះ បុគ្គលជាអ្នកមានត្រូវមានចំណេះដឹងផ្នែកហិរញ្ញវត្ថុ ចេះគ្រប់គ្រងផ្នែកទីផ្សារ គ្រប់គ្រងផ្នែកធនធានមនុស្ស។
ទី២ ជាបុគ្គលដែលមានចិត្តមោះមុត ហ៊ានសម្រេចចិត្ត ព្រោះការធ្វើជំនួញត្រូវតែមានការសម្រេចចិត្ត ប្រកបដោយភាពច្បាស់លាស់។ ចំណុចទី៣ បុគ្គលដែលជោគជ័យ ជាអ្នកមានវិន័យផ្ទាល់ខ្លួនតឹងរ៉ឹងក្នុងជីវិត ហើយអ្នកមានជោគជ័យខ្លាំង ត្រូវមានវិន័យតឹងរ៉ឹងចំពោះខ្លួនឯង ចំពោះបុគ្គលនៅជុំវិញខ្លួន ព្រោះអ្នកដែលមិនអាចគ្រប់គ្រងខ្លួនឯងបាន មិនងាយទទួលបានជោគជ័យនោះទេ។
ទី៤ អ្នកមានត្រូវធ្វើតាមជំនាញ ដែលខ្លួនឯងចេះ និងទី៥ ត្រូវតែជាបុគ្គលឧស្សាហ៍ព្យាយាម រៀនសូត្រជាប់ជាប្រចាំនូវអ្វីទាក់ទងនឹងអាជីព ឬមុខជំនួញផ្ទាល់ខ្លួនលោក៕
