ដោយៈតារា
កំពតៈ ខេត្តកំពតនៅតែមានសញ្ញាល្អនៃការវិនិយោគលើវិស័យសំណង់ ដោយរយៈពេល៤ខែឆ្នាំនេះ ទុនវិនិយោគជាង១៨លានដុល្លារ ត្រូវបានចាក់បញ្ចូលក្នុងខេត្តកំពុងមានភាពរីកចម្រើននេះ។

អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពត លោក ស៊ឹម សុខជា បានបញ្ជាក់ឲ្យដឹងនាព្រឹកថ្ងៃទី១៩ ឧសភានេះថា បួនខែដើមឆ្នាំនេះ ការដ្ឋាន ដែលបានស្នើសុំលិខិតអនុញ្ញាតសាងសង់ មានចំនួន១៣៣កន្លែង គិតជាទុនវិនិយោគ ចំនួនជាង១៨លានដុល្លារ ខណៈការដ្ឋានសំណង់ពេញមួយឆ្នាំមុន មានត្រឹមចំនួន២៩៩គម្រោង ដែលមានទុនវិនិយោគប្រមាណជាង៣៧ដុល្លារប៉ុណ្ណោះ។

របាយណ៍នេះបានបង្ហាញថា ក្នុងរយៈពេលបួនខែដើមឆ្នាំ២០២១ វិស័យសំណង់ខេត្តកំពត មានតម្លៃទុនវិនិយោគស្មើ នឹងពាក់កណ្ដាលឆ្នាំ២០២០ទៅហើយ។

លោកស៊ីម សុខជាបានបន្ថែមថា ការរីកចម្រើន នៃវិស័យសំណង់នេះ ដោយសារទី១. ការយកចិត្តទុកដាក់ខ្ពស់ ពីថ្នាក់ដឹកនាំរដ្ឋបាលខេត្តកំពត ទី២- រចនាសម្ព័ន្ធក្នុងខេត្ត មានការអភិវឌ្ឍច្រើនជាងមុន ទី៣- បរិស្ថាននៅល្អ ប្រសើរ ស្រស់បំព្រង ប្រកបដោយភាពទាក់ទាញ ទី៤- មានតំបន់ទេសចរណ៍ច្រើនកន្លែង ទាំងធម្មជាតិ និង កែច្នៃ ទី៥- សម្បូរភោគផលធម្មជាតិ និងវប្បធម៌ និងទី៦- មានការអភិវឌ្ឍវិស័យអចលនទ្រព្យ និងទី៧- ជាខេត្ត ជាប់នឹងមាត់សមុទ្រផង។

លោកជាវ តាយអភិបាលខេត្តកំពតបានមានប្រសាសន៍ឲ្យដឹងកាលពីពេលថ្មីៗនេះថា ការវិនិយោគនៅខេត្តកំពតបន្តកើនឡើង ទោះក្នុងបរិបទនៃជំងឺកូវីដ១៩ក្តី ហើយគ្មានគំរោងណាមួយត្រូវបានពន្យាពេលសាងសង់ ឬផ្អាកនោះទេ ខណៈខេត្តនឹងមានអាគារពាណិជ្ជកម្មខ្ពស់ៗកាន់តែច្រើននៅពេលឆាប់ៗខាងមុខនេះ។

លោកបន្តថា “អាគារកំពស់២០ជាន់ និងជាង៤០ជាន់មួយចំនួនកំពុងសាងងស់ ដែលនឹងផ្លាស់ប្តូរមុខមាត់ក្រុងកំពតនាពេលអនាគត”៕

ដោយៈរតនៈ
ភ្នំពេញៈ ក្រសួងព័ត៌មានបានស្នើឲ្យអង្គភាពព័ត៌មាន ដែលមិនទាន់បានចុះបញ្ជីពាណិជ្ជកម្ម និងម៉ាកដោយស្របច្បាប់ ត្រូវមកចុះបញ្ជីឲ្យបានមុនដំណាច់ឆ្នាំ ២០២១ ដើម្បីការពារសិទ្ធិ និងផលប្រយោជន៍ស្របច្បាប់របស់ស្ថាប័ន។

យោងតាមសេចក្តីជូនដំណឹងចុះនៅថ្ងៃទី ១៨ ខែឧសភា ផ្ញើជូន ម្ចាស់ស្ថានីយ៍វិទ្យុ និងទូរទស្សន៍គ្រប់ប្រភេទ ចាងហ្វាងកាសែត ទស្សនាវដ្តី ព្រឹត្តិបត្រ គេហទំព័រ និងម្ចាស់ប្រព័ន្ធផ្សព្វផ្សាយតាមអនឡាញ នាយកក្រុមហ៊ុនផ្ដល់សេវាកម្មលើវិស័យព័ត៌មាន និងសោតទស្សន៍ទាំងអស់ បានឲ្យដឹងថា កន្លងមកមានម្ចាស់ស្ថាប័នព័ត៌មាន និងសោតទ ស្សន៍មួយចំនួនធំ បានយកចិត្តទុកដាក់អនុវត្តតាមច្បាប់ ដែលមានជាធរមាននៃព្រះរាជាណាចក្រកម្ពុជា ប៉ុន្តែមានស្ថាប័នផ្ដល់សេវាកម្មផ្នែកព័ត៌មានមួយចំនួនតូច មិនទាន់បានអនុវត្តន៍តាមច្បាប់ និងបទដ្ឋានគតិយុត្ត នៃព្រះរាជាណាចក្រកម្ពុជានៅឡើយ ហើយបានប្រើប្រាស់ម៉ាកពាណិជ្ជនាមស្ថាប័នរបស់ខ្លួន បំពានទៅលើអត្តសញ្ញាណរបស់ស្ថាប័ន អង្គភាព និងក្រុមហ៊ុនដទៃទៀត ធ្វើឲ្យមានការភាន់ច្រឡំ ច្របូកច្របល់ និងប៉ះពាល់ដល់ផលប្រយោជន៍របស់ស្ថាប័ន អង្គភាព ក្រុមហ៊ុនអាជីវកម្មដែលបានចុះបញ្ជីស្របច្បាប់រូចរាល់ហើយ ។

សេចក្ដីជូនដំណឹងបន្តថា ដើម្បីធានា ការពារសិទ្ធិ និងផលប្រយោជន៍ស្របច្បាប់របស់ស្ថាប័ន អង្គភាពសារព័ត៌មាន និងក្រុមហ៊ុនផ្ដល់សេវាកម្មលើវិស័យព័ត៌មាន និងសោទស្សន៍ក្នុងព្រះរាជាណាចក្រកម្ពុជា ក្រសួងព័ត៌មានណែនាំដល់ម្ចាស់អង្គភាពព័ត៌មានដែលមិនទាន់បានចុះបញ្ជីពាណិជ្ជកម្ម និងម៉ាកដោយស្របច្បាប់ ត្រូវមកចុះបញ្ជីឲ្យបានមុនដំណាច់ឆ្នាំ ២០២១។ ក្នុងករណីមិនបានមកចុះបញ្ជីពាណិជ្ជកម្ម ហើយនៅតែបន្តប្រើប្រាស់ម៉ាក និងពាណិជ្ជនាមស្ថាប័ន អង្គភាព និងក្រុមហ៊ុនរបស់ខ្លួនបំពានច្បាប់ ក្រសួងព័ត៌មាន នឹងបញ្ឈប់ការផ្ដល់អាជ្ញារបណ្ណចាប់ពីឆ្នាំ២០២២តទៅ៕

ដោយៈឧត្តម
តូក្យូៈ រដ្ឋាភិបាលជប៉ុនគ្រោងវិនិយោគទឹកប្រាក់៣,៤ពាន់លានដុល្លារអាមេរិក ពីមូលនិធិបៃតង(Green Fund) សម្រាប់គម្រោង២ ដើម្បីពន្លឿនការស្រាវជ្រាវ& ការអភិវឌ្ឍន៍ (Research and Development- R&D) និងការលើកកម្ពស់ការប្រើប្រាស់អ៊ីដ្រូសែន ក្នុងរយៈពេល១០ឆ្នាំខាងមុខ។ នេះបើយោងតាមសារព័ត៌មាន CNA។

ជប៉ុនបានបង្ហាញគោលដៅ ប្រកបដោយមហិច្ឆតាមួយកាលពីខែធ្នូ ដើម្បីជំរុញតម្រូវការប្រើប្រាស់អ៊ីដ្រូសែនក្នុងប្រទេសនេះ ពីប្រមាណ២លានតោនក្នុងមួយឆ្នាំនាពេលបច្ចុប្បន្ន ឱ្យដល់៣លានតោនក្នុងមួយឆ្នាំនៅត្រឹមឆ្នាំ២០៣០ និងឱ្យដល់២០លានតោនក្នុងមួយឆ្នាំនៅត្រឹមឆ្នាំ២០៥០។

យោងតាមក្រសួងឧស្សាហកម្មឱ្យដឹងថា កាលពីថ្ងៃអង្គារទី១៨ ឧសភា អង្គការអភិវឌ្ឍន៍ថាមពលថ្មី និងបច្ចេកវិទ្យាឧស្សាហកម្ម (NEDO) ដែលជាទីភ្នាក់ងារ R&D គ្រប់គ្រងដោយរដ្ឋ បានចាប់ផ្ដើមទទួលយកពាក្យស្នើសុំ សម្រាប់គម្រោងអ៊ីដ្រូសែនចំនួន២។

គម្រោងទាំង២នេះ នឹងទទួលបានថវិកាពីមូលនិធិនវានុវត្តន៍បៃតង របស់រដ្ឋាភិបាលជប៉ុនជាមួយនឹងទំហំជាង១៨ពាន់លានដុល្លារ។ មូលនិធិនេះត្រូវបានបង្កើតឡើង ដើម្បីជួយប្រទេសជប៉ុន ឱ្យសម្រេចបានគោលដៅកាត់បន្ថយ ការបំភាយឧស្ម័នកាបូន ឱ្យមកនៅកម្រិតសូន្យត្រឹមឆ្នាំ២០៥០។

គម្រោងទាំងនេះ ស្ថិតក្នុងចំណោមគម្រោងចំនួន១៨ ដែលក្រសួងឧស្សាហកម្មបានប្រកាសកាលពីខែមុន។
អ៊ីដ្រូសែនភាគច្រើន ត្រូវបានផលិតចេញពីឧស្ម័នធម្មជាតិ ឬធ្យូងថ្ម។ ភាគច្រើនគេប្រើប្រាស់វាសម្រាប់ចម្រាញ់ប្រេង និងដើម្បីផលិតអាម៉ូនីញាក់ (ammonia) សម្រាប់ធ្វើជី។ ទោះជាយ៉ាងណា តាមការរំពឹងទុកថា នៅថ្ងៃអនាគតតម្រូវការអ៊ីដ្រូសែននឹងកើនឡើងក្នុងវិស័យជាច្រើនទៀតដូចជាការជញ្ជូន ការកសាង និងការផលិតថាមពលជាដើម៕

ដោយៈរតនៈ
ភ្នំពេញៈ បើទោះជាខេត្តត្បូងឃ្មុំជាខេត្តកើតថ្មី ដែលត្រូវការអភិវឌ្ឍនលើកផ្នែកជាច្រើនក្តី ប៉ុន្តែវិស័យកសិឧស្សាហកម្ម គឺជាផ្នែកមួយដែលជួយឲ្យជំរុញខេត្តកូនពៅមួយនេះឲ្យអភិវឌ្ឍន៍ និងមានភាពរីកចំរើន។

អភិបាលខេត្តត្បូងឃ្មុំ លោកជាម ច័ន្ទសោភ័ណ បានប្រាប់ Propertyarea នៅថ្ងៃទី១៨ ខែឧសភានេះថា ខេត្តត្បូងឃ្មុំគឺជាខេត្ត ដែលបង្កើតមែនតែខេត្តមួយនេះកំពុងតែបង្កើនសក្ដានុពលលើគ្រប់ផ្នែក ក្នុងនោះផ្នែកមួយដែលមានសក្តានុពល គឺដំណាំកសិឧស្សាហកម្ម ដែលមានដូចជា ដំណាំកៅស៊ូមានប្រមាណជា៨ ទៅ៩ម៉ឺនហិចតាក្នុងនោះភាគច្រើនជាដំណាំបែបគ្រួសារ និង លក្ខណៈឧស្សាហកម្មមានប្រមាណ៣ ទៅ៤ម៉ឺនហិចតា។

លោកបន្តថា “ក្រៅពីកៅស៊ូ ខេត្តត្បូងឃ្មុំ មានដំណាំជាច្រើនទៀត ដែលគាំទ្រដល់វិស័យកសិឧស្សាហកម្ម ដូចជា ដំឡូងមី សណ្ដែក ល្ង ចន្ទី ជាដើមដែលផ្ដល់ផលរាប់សែនតោនក្នុងមួយឆ្នាំ”។

ខេត្តត្បូងឃ្មុំ ត្រូវបានចេញប្រកាសបង្កើតឡើងនៅដើមខែមករា ឆ្នាំ២០១៤ មានផ្ទៃដី៤៩២៨គីឡូម៉ែត្រការ៉េ។
ស្រុកនៃខេត្តត្បូងឃ្មុំដែលគេសង្កេតឃើញមាន ដំណាំកសិឧស្សាហកម្មច្រើនមានដូចជា ស្រុកតំបែរ ស្រុកពញាក្រែក និងស្រុកមេមត់ជាដើម។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាថ្លែងមានប្រសាសន៍៍ថា ដំណាំកសិឧស្សាហម្ម គឺពិតជាបានជួយសេដ្ឋកិច្ចខេត្តត្បូងឃ្មុំបានយ៉ាងច្រើន ព្រោះថាដំណាំទាំងនោះ គឺមានស្រាប់តាំងពីខេត្តចុងក្រោយមួយនេះបានបង្កើត ព្រោះថាខេត្តត្បូងឃ្មុំគឺជាខេត្ត ដែលដែលភាគច្រើនជាប្រភេទតំបន់ដីក្រហម អំណោយផលដល់ដំណាំកសិឧស្សាហកម្ម។

លោកមានសុទិដ្ឋិនិយមថាខេត្តមួយនេះ នឹងបន្តបង្កើនសក្តានុពលផ្នែកដំណាំកសិឧស្សាហកម្ម ប្រសិនបើហេដ្ឋារចនាសម្ព័ន្ធកាន់តែរីកដុះដាល បានគ្រប់តំបន់ក្នុងខេត្តមួយនេះ។

លោកឧកញ៉ាលឹម ហេងបានបន្តថា បច្ចុប្បន្នដំណាំកសិកម្មមួយចំនួន ក៏វិវឌ្ឍន៍មកជាដំណាំកសិឧស្សាហកម្មផងដែរ ខណៈដែលកម្ពុជាបានចុះកិច្ច ព្រមព្រៀងពាណិជ្ជកម្មសេរីជាមួយប្រទេសជាច្រើនដូចជា ចិន កូរ៉េ ជាដើមនោះនឹងមកបង្កើតរោងចក្រកែច្នៃនៅកម្ពុជាដើម្បីនាំចេញទៅក្រៅប្រទេស៕