ឆៀងខាងជើងក្រុង
ដោយៈរតនៈ
បាត់ដំបងៈ បើទោះជាស្ថិតក្នុងបរិបថ ដែលពិភពលោកកំពុងតែរីករាលដាលនូវជំងឺកូវីត១៩ហើយធ្វើឲ្យប៉ះពាល់ដល់ សេដ្ឋកិច្ចនិងហិរញ្ញវត្ថុក្តី ប៉ុន្តែវិស័យអចលនទ្រព្យនៅខេត្តបាត់ដំបង បាននិងកំពុងរីកដុះដាលខ្លាំងនៅភាគខាងលិច ឆៀងខាងជើងក្រុង។

ប្រធានមន្ទីររៀបចំដែនដី នគររូបនីយកម្មនិង សំណង់ ខេត្តបាត់ដំបង លោក អ៊ូ ដារី បានប្រាប់Propertyarea នៅថ្ងៃទី ១៩ ខែឧសភានេះថា ខេត្តបាត់ដំបងទីតាំងដែលវិស័យអចលនទ្រព្យបាន និងកំពុងរីកដុះដាលខ្លាំងគឺភាគខាងលិច ឆៀងខាងជើងខេត្ត ព្រោះថានៅតំបន់នោះជិតទីប្រជុំជន មានមន្ទីរពេទ្យ សាលារៀន ហើយដីនៅតំបន់នោះ នៅទូលាយច្រើនអំណោយផលសម្រាប់ប្រជាពលរដ្ឋរស់នៅ។
លោកបន្តថា “ប្រជាពលរដ្ឋដែលទៅទិញដីនៅតំបន់នោះភាគច្រើន គឺអ្នកនៅក្នុងខេត្តតែម្ដង ដោយអ្នកខ្លះជាអ្នកក្រុងបាត់ដំបង និងអ្នកខ្លះទៀតមកពីស្រុកផ្សេងៗនៃខេត្តបាត់ដំបង”។
លោក អ៊ូ រីដាបន្ថែមថា គម្រោងអចលនទ្រព្យធំៗ ដែលចូលទៅអភិវឌ្ឍន៍នៅភាគខាងលិច ឆៀងខាងជើងមាន៤ក្រុមហ៊ុនធំៗ និងមានលក់ដូរបែបតូចតាចមួយចំនួនទៀតផងដែរ ដោយនៅក្នុងនោះ មានការពុះជាដីឡូត៍លក់ ការសង់ផ្ទះល្វែង និង ដីឡូត៍ទំហំមធ្យមហើយមានផ្ទះនៅក្នុងនោះតែម្ដង។

ជាមួយគ្នានេះ លោកឆម ចំរើ់នអនុប្រធានសមាគមអ្នកអភិវឌ្ឍន៍ដីឡូត៍កម្ពុជាបានមានប្រសាសន៍ថា បាត់ដំបងគឺជាទីតាំងដែលមានសក្ដានុពលខ្លាំង ហើយផលប៉ះពាល់ដោយសារជំងឺកូវីត១៩ក៏តិចតួចជាងគេ ដែលកត្ដានេះធ្វើឲ្យវិស័យអចលនទ្រព្យរីកចម្រើន។
លោកបន្តថា “ខេត្តបាត់ដំបងជាចំណុចប្រសព្វមួយនេះ ខេត្តផ្សេង ជាពិសេសគម្រោងសាងសង់ផ្លូវជាតិលេខ១០ កាត់ខេត្តមួយនេះ ទៅខេត្តផ្សេងទៀត កំពុងតែមានច្រើន តំបន់ទេសចរណ៍ក៏មានច្រើន បូករួមទាំងដីដែលមានអំណោយផលខាងកសិកម្មផងដែរ”។
បើតាមលោក អ៊ូ រីដា នៅតាមបណ្ដាស្រុកផ្សេង នៃខេត្តបាត់ដំបងក៏មានដែរការទិញលក់ដី តែមិនសូវមានសម្រាប់ការធ្វើលំនៅដ្ឋាននោះទេ គឺមានជាប្រភេទដីធ្វើកសិកម្ម ហើយក៏មានអតិថិជនពីរាជធានី និងខេត្តផ្សេងៗទៅទិញនៅទីនោះផងដែរ៕

ការធ្វើដំណើរ
ដោយៈលក្ខិណា
ភ្នំពេញៈ ចាប់តាំងពីរាជរដ្ឋាភិបាលបានបន្ធូរបន្ថយ នូវការរឹតបន្តឹងការធ្វើចរាចរណ៍មក សកម្មភាពរបស់ភ្នាក់ងារអចលនទ្រព្យចាប់ផ្ដើមសកម្មឡើងវិញ ដោយភ្នាក់ងារអចលនទ្រព្យ ជាពិសេសភ្នាក់លក់គម្រោងដីឡូត៍ និងផ្ទះល្វែងនៅតំបន់ជាយកក្រុង ក៏ចាប់ផ្ដើមប្រកាសលក់ជាបន្តបន្ទាប់ឡើងវិញ។

លោកហ៊ឹម ស៊ុយ( ចេ ស៊ុន )ភ្នាក់ងារអចលនទ្រព្យមួយរូបបានឱ្យដឹងនារសៀលកថ្ងៃទី១៩ ឧសភានេះថា ក្រោយរដ្ឋាភិបាលប្រកាសបិទបញ្ចប់ការបិទខ្ទប់ និងបើកឱ្យធ្វើដំណើរឆ្លងកាត់ ពីខេត្តមួយទៅខេត្តមួយ ភ្នាក់ងារលក់គម្រោងរបស់លោកក៏ចាប់ផ្ដើមប្រកាសលក់និងសម្រុកលក់សារជាថ្មី បន្ទាប់ពីស្ងប់ស្ងាត់មួយរយៈអំឡុងពេលនៃការបិទខ្ទប់រាជធានីភ្នំពេញ និងក្រុងតាខ្មៅនៃខេត្តកណ្ដាល។
លោកបន្តថា “ក្នុងអំឡុងពេលនៃការបិទខ្ទប់ កុំថាឡើយដល់ភ្ញៀវមកមើលគម្រោងដី សូម្បីតែភ្ញៀវត្រង់បង់រំលោះដីក៏ពិបាកដែរ ព្រោះកន្លងទៅពួកគាត់ត្រូវបង់ផ្ទាល់ៗ និងចុះមើលគម្រោងដីរបស់ពួកគាត់ដែរ តែដល់ពេលបិទការធ្វើដំណើរ ពួកគាត់ត្រូវបង់តាមភ្នាក់ងារវេរលុយជំនួសវិញ”។ លោកបន្តថា “កាលពីពេលបិទខ្ទប់ការលក់ធ្លាក់ចុះសឹងតែគ្រប់គម្រោង និងគ្រប់វិនិយោគិនទាំងអស់ តែក្រោយពេលមានការបើកចរាចរណ៍ឡើងវិញសកម្មភាពលក់ចាប់ផ្ដើមបានខ្លះៗ តែបើប្រៀបធៀបនឹងមុនពេលមានការបិទខ្ទប់និងមុនព្រឹត្តិការណ៍២០កុម្ភៈ ២០២១ ការលក់នៅមានចំនួនតិចតួចនៅឡើយ”។

ជាមួយគ្នានេះ លោកគឹម សង្គ្រាមភ្នាក់ងារអចលនវត្ថុមួយរូបបានឱ្យដឹងថា ក្នុងអំឡុងពេលរដ្ឋាភិបាល បិទការធ្វើដំណើរឆ្លងខេត្ត អ្នកទិញមិនអាចធ្វើដំណើរទៅមើលទីតាំងអចលនទ្រព្យដែលប្រកាសលក់បាន ធ្វើឱ្យការលក់មានការថមថយ។ តែបន្ទាប់ពីរាជរដ្ឋាភិបាល ប្រកាសបើកឱ្យធ្វើដំណើរឡើងវិញ អ្នកទិញអាចចេញធ្វើដំណើរទៅមើលគម្រោងទីតាំងអចលនទ្រព្យ និងចរចាជាមួយម្ចាស់ដី ដើម្បីទិញទុកអភិវឌ្ឍនៅពេលអនាគត ។
លោកបន្តថា “ក្នុងពេលបច្ចុប្បន្ននេះ អ្នកមានលុយមានឱកាសក្នុងការទិញដីតម្លៃក្រោមទីផ្សារ ព្រោះដីធ្លីខ្លះប្រកាសលក់ក្រោមតម្លៃទីផ្សារច្រើន តែបើនិយាយជាទូទៅតម្លៃវាមិនធ្លាក់នោះឡើយ គ្រាន់តែម្ចាស់ដីដែលត្រូវការលុយ គេប្រកាសលក់បន្ទាន់និងលក់ក្រោមទីផ្សារទើបមានការចរចានិងទិញ”។
ជាការកត់សម្គាល់ បច្ចុប្បន្ននេះ គេមើលឃើញថាភ្នាក់ងារអចលនទ្រព្យជាច្រើន ចាប់ផ្ដើមប្រកាសលក់គម្រោងអចលនទ្រព្យ ជាបន្តបន្ទាប់ដោយយកបណ្ដាញទំនាក់ទំនងសង្គមផ្សេងៗ សម្រាប់ការផ្សព្វផ្សាយលក់គម្រោងរបស់ខ្លួន ជាពិសេសគម្រោងអចលនទ្រព្យដែលមានតម្លៃសមរម្យ សម្រាប់គម្រោងអចលនទ្រព្យតម្លៃខ្ពស់ៗ នៅតែបន្តបាត់បង់ចំណែកទីផ្សារដដែល ក្នុងអំឡុងនៃវិបត្តិនេះ៕

ក្នុងឆមាសទី១ឆ្នាំនេះ
ដោយៈ ប៊ី
ភ្នំពេញៈ ការផ្ទត់ផ្គង់គម្រោងអចលនទ្រព្យផ្ទាល់ដី នៅក្នុងក្រុងភ្នំពេញបានមានកាន់តែច្រើន និងវិនិយោគក្នុងល្បឿនដ៏លឿននារយៈពេល៦ខែ ឈានទៅកាន់ត្រីមាសទី១ឆ្នាំ២០២១ ខណៈគម្រោងភាគច្រើនបាន និងកំពុងផ្ដោតទៅលើវិស័យគេហដ្ឋានតម្លៃសមរម្យនេះ។ នេះបើយោងតាមរបាយការណ៍ស្តីពី “ទិដ្ឋភាពទីផ្សារអចលនទ្រព្យប្រចាំត្រីមាសទី១ឆ្នាំ២០២១ ដែលចេញដោយទីភ្នាក់ងារអចលនទ្រព្យCBRE Cambodia កាលពីថ្មីៗនេះ។

ក្នុងរយៈពេល៦ខែឈានទៅឆមាសទី១ឆ្នាំ២០២១នេះ គម្រោងចំនួន២១ហើយបានចាប់ផ្ដើមសម្ភោធ នៅក្នុងខ័ណ្ឌចំនួន៩ផ្សេងៗគ្នា សម្រាប់វិស័យអចលនទ្រព្យផ្ទាល់ដីនៅឯទីក្រុងភ្នំពេញ។ គម្រោងទាំង២១នេះនឹងបង្កើតគេហដ្ឋានចំនួន១៥,៥០០យូនីត ក្នុងការផ្គត់ផ្គង់អចលនទ្រព្យផ្ទាល់ដីនៅឯទីក្រុងភ្នំពេញ។

សម្រាប់ការសាងសង់បញ្ចប់គម្រោង ក្នុងរយៈពេលដូចគ្នានេះ CBRE រាយការណ៍ថា គម្រោងថ្មីៗចំនួន១១ នឹងបើកទទួលស្វាគមន៍អ្នកចូលមករស់នៅ ដោយបានបន្ថែមគេហដ្ឋានចំនួន៤៥០០យូនីធ ទៅលើចំនួនគេហដ្ឋានសរុប ដែលមានក្នុងរាជធានីភ្នំពេញ។

របាយការណ៍បានឱ្យដឹងទៀតថា ការផ្លាស់ប្ដូរទៅកាន់ការអភិវឌ្ឍផ្ទះដែលមានតម្លៃសមរម្យនៅតែបន្ត ដោយមានគម្រោង ដែលទើបតែចាប់ផ្ដើមមួយចំនួន បាននិងកំពុងផ្ដោតទៅលើវិស័យគេហដ្ឋានតម្លៃសមរម្យនេះ។ យោងតាមរបាយការណ៍របស់CBRE ជាង៦០%នៃផ្ទះជាប់ និងជាង៧០%នៃវីឡាទោល ស្ថិតនៅក្នុងចំណោមគេហដ្ឋានដែលមានតម្លៃសមរម្យ។
លោក James Hodge នាយកជាន់ខ្ពស់ក្រុមហ៊ុន CBRE Cambodia បានថ្លែងប្រាប់កាលពីម្សិលមិញនេះថា ទីផ្សារលំនៅដ្ឋានត្រូវបានរំពឹងថា នឹងងើបឡើងវិញយ៉ាងឆាប់រហ័ស ដែលគាំទ្រដោយការធ្វើឱ្យប្រសើរឡើងនូវលក្ខខណ្ឌប្រាក់កម្ចី និងការទូទាត់ពីធនាគារ និងអ្នកអភិវឌ្ឍន៍។
លោកបានថ្លែងថា “យើងរំពឹងថា សកម្មភាពនៃការលក់ នឹងមានភាពប្រសើរឡើងទាំងផ្នែកខុនដូ និងផ្នែកអចលនទ្រព្យជាប់ដី (ផ្ទះ) នៅត្រីមាសទី៣ ឆ្នាំ២០២១ ខណៈរយៈពេលនៅសល់នៃត្រីមាសទី២ សកម្មភាពទិញលក់ហាក់ ដូចជានៅភាពយឺតនៅឡើ យ”។

ការរំខានពីការឆ្លងជំងឺកូវីដ១៩ ចូលក្នុងសហគមន៍ក្នុងព្រឹត្តិការរណ៍២០កុម្ភៈ ទំនងជានឹងរុញច្រានការស្ទុះឡើងវិញ ក្នុងវិស័យអចលនទ្រព្យយឺតយ៉ាវ ដូច្នេះស្ថានភាពទីផ្សារប្រសើរឡើងវិញ គឺពឹងផ្អែកលើល្បឿន និងប្រសិទ្ធភាពនៃការចាក់វ៉ាក់សាំង ដើម្បីបង្កើតសន្ទុះ និងបង្កើនភាពជឿជាក់លើការវិនិយោគអចលនទ្រព្យ៕