អ្នកជំនាញៈ ទីផ្សារខុនដូចាប់ផ្តើមមានសកម្មភាពឡើងវិញជាបណ្តើរៗឡើងវិញ

ដោយៈ ប៊ី

ភ្នំពេញៈ អ្នកជំនាញអះអាងថា ការទិញ លក់ខុនដូចាប់ផ្តើមមានសកម្មភាពឡើងវិញជាបណ្តើរៗ បន្ទាប់ការបញ្ចប់ការបិទខ្ទប់បានបើកចំហជាងមុន ដែលធ្វើប្រជាពលរដ្ឋអាចចេញដំណើរទៅធ្វើការងារ និងប្រកបអាជីវកម្មបានលើកលែងតែតំបន់មួយចំនួន។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ ERA Cambodia លោកខន គង្គា មានប្រសាសន៍នៅថ្ងៃទី១០ ខែឧសភា ឆ្នាំ២០២១នេះថា បន្ទាប់ការបញ្ចប់ការបិទខ្ទប់ ការទិញលក់ខុនដូចាប់ផ្តើមមានសកម្មភាពឡើងវិញជាបណ្តើរៗហើយ។

លោកបានថ្លែងថា “បើទោះបីអំឡុងការបិទខ្ទប់ភូមសាស្ត្រភ្នំពេញ និងក្រុងតាខ្មៅ នៅតែមានអ្នកទិញ ឬវិនិយោគិនមួយៗធ្វើការកក់តាមអនឡាញ ប៉ុន្តែល្បឿននៃការកក់ ឬទិញមិនលឿនដូចការបើកចំហរនោះទេ”។ លោកបានថ្លែងបន្តថា “បន្ទាប់ការបញ្ចប់ការបិទខ្ទប់ ភ្ញៀវខ្ញុំផ្ទាល់តែម្តងចាប់ផ្តើមចេញមកចុះកុងត្រា និងបន្តកក់ជាបណ្តើរ”។

លោកបានបន្តថា អ្នកដែលមានធនធានល្អ ឬលំហូរសាច់ប្រាក់វិជ្ជមានគួរវិនិយោគលើខុនដូនាពេលនេះ គឺពេលល្អសម្រាប់វិនិយោគលើខុនដូ។

លោកគង្គាបានបញ្ជាក់ថា “វាមិនមានឱកាសណាល្អជាងពេលនេះទេ ដោយសារតែអំឡុងពេលកូវីដ១៩ តម្លៃខុនដូនៅតែរក្សាតម្លៃដើម ដោយមិនការឡើងថ្លៃ និងការបង់ប្រាក់ក៏មានការបត់បែន ហើយនាពេលតម្លៃខុនដូឡើងថ្លៃ ក្រោយកូវីដ១៩ ដែលនឹងផ្តល់ផលចំណេញដល់អ្នកវិនិយោគ”។

គម្រោងខុនដូថ្មីៗចំនួន៤ ត្រូវបានបញ្ចប់ការសាងសង់នៅត្រីមាសទី១ឆ្នាំនេះ ដោយចូលរួមចំណែកផ្គត់ផ្គង់ ក្នុងទីផ្សារខុនដូចំនួន៧៩៣យូនីត ខណៈការផ្គត់ផ្គង់ខុនដូរំពឹងថានឹងមានចំនួន១០.៨២៥យូនីត នៅក្នុងឆ្នាំ២០២១។ នេះបើយោងតាមរបាយការណ៍របស់ក្រុមហ៊ុន CBRE Cambodia។

លោកស្រីអាន សុធីតាអ្នកជំនាញឯករាជ្យមួយដែលមានបទពិសោធន៍ច្រើនឆ្នាំក្នុងវិស័យអចលនទ្រព្យ បានថ្លែងកាលពីថ្មីៗថា ទីផ្សារខុនដូ ត្រូវបានគេចាត់ថ្នាក់ជាផ្នែកលំនៅដ្ឋាន នៃវិស័យអចលនទ្រព្យ ដូច្នេះចំពោះផ្នែកលំនៅដ្ឋាន គឺមិនសូវជាមានការប៉ះពាល់ជាមួយកូវីដ១៩នេះទេ ប្រសិនបើប្រៀបធៀបជាមួយវិស័យផ្សេងៗ ដូចជាវិស័យបដិសណ្ឋារកិច្ច (សណ្ឋាគារ) និងវិស័យទីផ្សារលក់រាយ ក៏ប៉ុន្ដែវាក៏នៅតែទទួលរងផលប៉ះពាល់ដូចគ្នាផងដែរ។

លោកស្រីបន្ថែមថា “នៅប៉ុន្មានឆ្នាំចុងក្រោយនេះ ទីផ្សារខុនដូមានការផ្ដោតទាំងស្រុងទៅលើភ្ញៀវនៅក្នុងស្រុក ហើយទីផ្សារខុនដូមានការរីកចម្រើនលូតលាស់ ដោយសារអ្នកវិនិយោគក្នុងស្រុក មានបរិបទវិនិយោគដោយមើលឃើញពីកត្តា ដូចជា មានទីតាំងនៅកណ្ដាលក្រុង មានហេដ្ឋារចនាសម្ព័ន្ធគ្រប់គ្រាន់ និងតម្លៃក៏មានភាពសមរម្យ បើប្រៀបធៀបនឹងតម្លៃផ្ទះ នៅតំបន់ជាយក្រុង”។

បើទោះបីជាស្ថានភាពជំងឺកូវីដ១៩ មានការរីករាលដាលក៏ពិតមែន ចំពោះលោកស្រីមានការជឿជាក់ថា វ៉ាក់សាំងត្រូវបានចាក់ជាបណ្ដើរៗ នៅក្នុងប្រទេសកម្ពុជា ក៏ដូចជាបណ្ដាលប្រទេសផ្សេងទៀត ដូច្នេះទាំងអស់គ្នានឹងវិវត្តទៅរកភាពល្អប្រសើរឆាប់ៗ នៅរយៈពេល២ ទៅ៣ខែខាងមុខនេះ៕

សម្តេចតេជោបានបញ្ជាទិញវ៉ាក់សាំងកូវីដ១៩ចំនួន៥លានដូសបន្ថែមទៀត ដើម្បីចាក់ជូនប្រជាពលរដ្ឋ

ដោយៈ ប៊ី

ភ្នំពេញៈ លោកស្រីយក់ សម្បត្តិរដ្ឋលេខាធិការក្រសួងសុខាភិបាល បានបញ្ជាក់ជូនអ្នកសារព័ត៌មាននៅថ្ងៃទី១១ ខែឧសភានេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបញ្ជាទិញ៥លានដូសបន្ថែមទៀត ដើម្បីចាក់ជូនប្រជាពលរដ្ឋការពារពីជំងឺកូវីដ១៩ ដោយឥតគិតថ្លៃ។

ជាមួយគ្នានេះដែរ លោកស្រី យក់ សម្បត្តិ បានបញ្ជាក់បន្ថែមថា វ៉ាក់សាំងបង្ការជំងឺកូវីដ១៩ ចំនួន១.៥លានដូសនេះ មាន៥០ម៉ឺនដូស នឹងមកដល់នៅថ្ងៃទី១៦ ខែឧសភា និង១លានដូសទៀត នឹងមកដល់នៅថ្ងៃទី២៣ ខែឧសភា ឆ្នាំ២០២១ ខណៈដែលវ៉ាក់សាំងចំនួន៥០ម៉ឺនដូសប្រភេទស៊ីណូវ៉ាក់ (Sinovac) ទើបនឹងត្រូវបានដឹកមកដល់ប្រទេ សកម្ពុជា នៅព្រឹកថ្ងៃទី១១ ខែឧសភានេះ។

លោកស្រីបានឱ្យដឹងទៀតថា “សម្តេចតេជោ ហ៊ុន សែន បានបញ្ជាទិញវ៉ាក់សាំងស៊ីណូវ៉ាក់ចំនួន៥លានដូសបន្ថែមទៀតផងដែរ ពីរដ្ឋាភិបាលចិន ដើម្បីយកមកចាក់ជូនប្រជាពលរដ្ឋឥតគិតថ្លៃ នៅក្នុងប្រទេសកម្ពុជា ក្នុងគោលបំណងបង្កើតភាពស៊ាំ ដើម្បីការ ពារការចម្លងមេរោគកូវីដ១៩”។

គិតចាប់ពីខែកុម្ភៈ ឆ្នាំ២០២១ រហូតមកដល់ពេលនេះ កម្ពុជាទទួលបានវ៉ាក់សាំងជាង ៤.៥លានដូសរួចមកហើយ រួមមាន៖ ស៊ីណូហ្វាមជំនួយរបស់រដ្ឋាភិបាលចិន១.៧លានដូស វ៉ាក់សាំងស៊ីណូវ៉ាក់ទិញពីចិន២.៥លានដូស (បូកជាមួយនឹងវ៉ាក់សាំងស៊ីណូវ៉ាក់មកដល់ថ្ងៃនេះ) និងវ៉ាក់សាំងអាស្ត្រាហ្សេនីកា៣២៤,០០០ដូស ជាជំនួយរបស់ខូវ៉ាក់ តាមរយៈអង្គការសុខភាពពិភពលោកផងដែរ។

តាម “ផែនការយុទ្ធសាស្ត្រយុទ្ធនាការជាតិ ចាក់វ៉ាក់សាំងបង្ការជំងឺកូវីដ-១៩ សំដៅបង្កើតឱ្យបាននូវភាពស៊ាំសង្គម-សេដ្ឋកិច្ចនៅកម្ពុជា ក្នុងឆ្នាំ២០២១” រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន បានដាក់ចេញនូវផែនការស្វែងរកវ៉ាក់សាំងការពារជំងឺកូវីដ-១៩ ដើម្បីចាក់ជូនប្រជាពលរដ្ឋឱ្យរួចរាល់នៅឆ្នាំ២០២២ ខាងមុខនេះ។

តាមផែនការរៀបចំដោយរាជរដ្ឋាភិបាល បានបញ្ជាក់ថា នៅខែឧសភា ឆ្នាំ២០២១នេះ កម្ពុជាគ្រោងទទួលវ៉ាក់សាំង ៣លានដូស ខែមិថុនា នឹងទទួលបានវ៉ាក់សាំង៣លានដូស ខែកក្កដា នឹងទទួលបានវ៉ាក់សាំង១លានដូស ខែសីហា នឹងទទួលបានវ៉ាក់សាំង១លានដូស និងខែកញ្ញា នឹងទទួលបានវ៉ាក់សាំង១,៥លានដូស។

ដោយឡែក តាមការគ្រោងនេះដែរ នៅក្នុងឆ្នាំ២០២២ខាងមុខនេះ កម្ពុជានឹងទទួលបានវ៉ាក់សាំងចំនួន ១០,៤៣០,៦០០ដូស ផងដែរ។

កម្ពុជាបានក្លាយជាប្រទេសចំណាត់ថ្នាក់លេខ២ នៅអាស៊ាន បន្ទាប់ពីសិង្ហបុរី ជាប្រទេសចាក់វ៉ាក់សាំងបានលឿន និងបានច្រើនជូនប្រជាពលរដ្ឋ។ តាមរយៈវត្តមានវ៉ាក់សាំងនេះ នឹងជួយឱ្យកម្ពុជា អាចសម្រេចបាននូវផែនការចាក់វ៉ាក់សាំងរបស់ខ្លួន ដែលគ្រោងចាក់ពលរដ្ឋឱ្យបានជាង ១០លាននាក់ត្រឹមឆមាសទី១ ឆ្នាំ២០២២ ជាមួយការរំពឹងថា នឹងទទួលបានជោគជ័យក្នុងបេសកកម្មប្រយុទ្ធប្រឆាំងជំងឺកូវីដ១៩ ធ្វើឱ្យស្ថានភាពសេដ្ឋកិច្ចបានប្រសើរឡើងវិញ៕

សណ្ឋាគារលំដាប់អន្តរជាតិថ្មីមួយទៀតនឹងបង្ហាញរូបរាងនៅទីក្រុងភ្នំពេញនាឆ្នាំដើម២០២២

ដោយៈ ប៊ី

ភ្នំពេញៈ សណ្ឋាគារលំដាប់អន្តរជាតិមួយទៀត ដែលវិនិយោគដោយក្រុមហ៊ុន Autograph Collection Hotels ដែលជាក្រុមហ៊ុនបុត្រសម្ព័ន្ធក្រុមហ៊ុន Marriott International ដែលមានសណ្ឋាគារជាង១៧០នៅជុំវិញពិភពលោក បង្ហាញរូបរាងនៅក្រុងភ្នំពេញនាឆ្នាំដើមឆ្នាំ២០២២ ។

ក្រុមហ៊ុន Autograph Collection Hotels បានចុះហត្ថលេខាជាមួយសណ្ឋាគារ The Khom Hotel ខណៈសណ្ឋាគារ The Khom Hotel នេះ គ្រោងនឹងបើកដំណើរការនៅដើមឆ្នាំ២០២២ និងមានបន្ទប់សណ្ឋាគារចំនួន១៣០បន្ទប់។ នេះបើយោងតាមការចេញផ្សាយរបស់គេទំហំព័រ Hosptality Net។

ដោយមានទីតាំងស្ថិតនៅលើផ្លូវ ឧកញ៉ា សួនស្រ៊ុន នៅតាមបណ្តោយមហាវិថីព្រះសុរាម្រឹត សណ្ឋាគារ The Khom Hotel នឹងស្ថិតនៅជិតវត្តបទុមវត្តី ដែលជាវត្តចំណាស់ជាងគេ និងសំខាន់បំផុតមួយនៅក្នុងក្រុង ក៏ដូចជាព្រះបរមរាជវាំងនិងវិមានឯករាជ្យ។ តំបន់ទេសចរណ៍សំខាន់ៗផ្សេងទៀត ដែលនៅជិតសណ្ឋាគាររួមមាន ផ្សារកណ្តាល និងវត្តភ្នំ។

លោក Paul Foskey ប្រធានផ្នែកអភិវឌ្ឍន៍ប្រចាំតំបន់អាស៊ីប៉ាស៊ីហ្វិកក្រុមហ៊ុន Marriott International ធ្លាប់មានប្រសាសន៍ថា យើងទន្ទឹងរងចាំធ្វើជាដៃគូជាមួយក្រុមហ៊ុន Wywaza Investment ក្នុងការនាំមកនូវសណ្ឋាគារ The Khom Hotel ដែលជាសណ្ឋាគារដំបូងគេរបស់ក្រុមហ៊ុន Autograph Collection នៅលើទីផ្សារកម្ពុជានេះ” ។

លោក Douk Dien ម្ចាស់និងជានាយកប្រតិបត្តិក្រុមហ៊ុន Wywaza Investment បានមានប្រសាសន៍ថា “យើងមានមោទនភាព ដែលបានសហការជាមួយក្រុមហ៊ុន Marriott International ដើម្បីនាំយកសណ្ឋាគារយីហោក្រុមហ៊ុន Autograph Collection Hotels មកប្រទេសកម្ពុជា” ។ លោកបន្តថា “យើងនឹងគ្រប់គ្រងទីតាំងសណ្ឋាគារ ដែលមានកិត្យានុភាពបំផុតនៅភ្នំពេញ ហើយធ្វើឱ្យមានការស្នាក់នៅ មានកម្រិតស្តង់ដារជាមួយនឹងការរំពឹងទុកខ្ពស់ ដែលទីតាំងតែមួយគត់នៅជាប់នឹងព្រះបរមរាជវាំង និងសេវាផ្សេងៗទៀត” ។

លោកបានបន្តថា រួមជាមួយការប្តេជ្ញាចិត្តរបស់ក្រុមហ៊ុន Marriott International លើការផ្តល់ម៉ាក និងស្តង់ដារសេវាកម្ម យើងជឿជាក់ថាភ្ញៀវទេសចរ និងប្រជាជនក្នុងស្រុកនឹងស្វាគមន៍សណ្ឋាគារ នៅពេលដែលបើកនៅឆ្នាំ២០២២” ៕

លោកឧកញ៉ាហួត អៀងតុងៈការវិនិយោគលើបច្ចេកវិទ្យាហិរញ្ញវត្ថុកាន់តែជារឿងបន្ទាន់និងចាំបាច់

ដោយៈ គង់ ម៉ាលីន

ភ្នំពេញៈ ប្រធានអគ្គនាយកធនាគារហត្ថា លោកឧកញ៉ាហួត អៀងតុងបានមានប្រសាសន៍ថា ការវិនិយោគលើបច្ចេកវិទ្យាហិរញ្ញវត្ថុជារឿងចាំបាច់ និងមានសារៈសំខាន់ ដើម្បីសម្រួលការប្រើប្រាស់សេវាហិរញ្ញវត្ថុរបស់អតិថិជនរបស់យើង។

លោកឧកញ៉ាបានមានប្រសាសន៍ឲ្យដឹងនាសប្តាហ៍មុនថា ការផ្តោតលើបច្ចេកវិទ្យាជារឿងសំខាន់ ហេតុនេះទើបយើងបានបង្កើន ការវិនិយោគលើបច្ចេកវិទ្យាកាន់តែចច្រើន ដើម្បីផ្តល់ជូននូវសេវាកម្មដល់អតិថិជន ឲ្យកាន់តែមានភាពងាយស្រួល សុវត្ថិភាព និងអាចទុកចិត្តបាន ពិសេសអាចឲ្យពួកគេប្រើប្រាស់សេវាកម្មរបស់់យើងបានលឿន ដោយពួកគេះអាចទូទាត់ ឬវេសាច់ប្រាក់ជាមួយធនាគារផ្សេងៗបាន តាមរយៈកម្មវិធី “បាគង”របស់់ធនាគារជាតិនៃកម្ពុជា។

លោកបន្តថា “បច្ចេកវិទ្យាមានការរីកចម្រើនយ៉ាងលឿន ហេតុនេះយើងក៏ត្រូវតែធ្វើបច្ចុប្បន្នភាពសេវាកម្មរបស់យើងជាប់ជាប្រចាំ ព្រោះគោលដៅរបស់យើងគឺផ្តល់សេវាកម្មបានកាន់តែលឿន ងាយស្រួលដល់អតិថិជន និងចង់ឲ្យអតិថិជនប្រើប្រាស់សេវាកម្មឥណទានរបស់យើងបានកាន់តែច្រើន” ។ លោកបន្តថា “ជាមួយនឹងការទទួលបានទំនុកចិត្តពីអតិថិជន ធនាគារហត្ថាបាន និងកំពុងបង្កើនទុន២៥លានដុល្លារនៅឆ្នាំនេះ សម្រាប់សេវាកម្មឥណទានរបស់យើង បន្ទាប់ពីយើងទើបទទួលបានការអនុម័ត ពីធនាគារជាតិនៃកម្ពុជា” ។

លោកឧកញ៉ាហួត អៀងតុង បានបន្តថា បច្ចុប្បន្នធនាគារហត្ថាមានសាខាសរុបចំនួន១៧៧នៅទូទាំងប្រទេស មានបុគ្គលិក៥៦០០នាក់ និងមានទ្រព្យសកម្មសរុបប្រមាណ១៥០០លានដុល្លារអាមេរិក៕

ឧត្តរមានជ័យនឹងមានរោងចក្រដុតធ្យូងថ្មតម្លៃជាង២៩៤លានដុល្លារជាលើកដំបូង

ដោយៈគង់ ម៉ាលីនណា

ឧត្តរមានជ័យៈ រោងចក្រផលិតអគ្គិសនីពីការដុតធ្យូងថ្មកម្លាំង២៦៥ មេហ្គាវ៉ាត់ របស់ក្រុមហ៊ុន Han Seng Coal Mine Co Ltd (HSCMC) នឹងដាក់ដំណើរការជាលើកដំបូង ក្នុងខេត្តឧត្តរមានជ័យ នាខែមិថុនាខាងមុខ។

ការកសាងហេដ្ឋារចនាសម្ព័ន្ធក្នុងរោងចក្រ និងបណ្តាញចែកចាយតភ្ជាប់ទៅកាន់អនុស្ថានីយខាងកើតរបស់ខេត្តសៀមរាប បានបញ្ចប់ស្ទើរទាំងស្រុងហើយ។

អភិបាលរងខេត្តឧត្តរមានជ័យលោក ឌី រ៉ាដូ អភិបាលរងខេត្តឧត្តរមានជ័យបានមានប្រសាសន៍ឲ្យដឹង កាលពីម្សិលម៉ិញនេះថា រដ្ឋាភិបាលកម្ពុជាកាលពីខែកុម្ភៈ ឆ្នាំ ២០២០ បានអនុម័តឱ្យក្រុមហ៊ុន Han Seng Coal Mine Co Ltd (HSCMC) វិនិយោគលើរោងចក្រផលិតអគ្គិសនីពីធ្យូងថ្មកម្លាំង២៦៥ មេហ្គាវ៉ាត់ នៅក្នុងស្រុកត្រពាំងប្រាសាទ ខេត្តឧត្តរមានជ័យ ក្នុងតម្លៃវិនិយោគ២៩៤,៣លានដុល្លារ។

តាមផែនការរោងចក្រនេះ នឹងចាប់ផ្តើមដំណើរការនៅចុងឆ្នាំ ២០២១ ឬដើមឆ្នាំ ២០២២ ដោយប្រើរ៉ែធ្យូងថ្ម ដែលមាននៅក្នុងស្រុកត្រពាំងប្រាសាទ ខេត្តឧត្តរមានជ័យ។

លោកឌី រ៉ាដូ បានឲ្យដឹងទៀតថាការសាងសង់រោងចក្រផលិតអគ្គិសនីពីធ្យូងថ្មកម្លាំង២៦៥ មេហ្គាវ៉ាត់ ក្នុងខេត្តឧត្តរមានជ័យ កំពុងមានដំណើរការទៅមុខជាប្រចាំ ដោយការសាងសង់ ហេដ្ឋារចនាសម្ព័ន្ធជិតបញ្ចប់អស់ហើយ ដោយនៅរង់ចាំតែការយកម៉ាស៊ីនមកដំឡើងប៉ុណ្ណោះ។

លោកបន្តថា “បើតាមទិដ្ឋភាពការងារ គឺរោងចក្រនេះនឹងអាចចាប់ដំណើរការតាមការកំណត់របស់រដ្ឋាភិបាល ដោយនៅចុងឆ្នាំនេះ (២០២១) ក្រុមហ៊ុននឹងធ្វើតេស្តសាកល្បងម៉ាស៊ីន និងនៅដើមឆ្នាំ ២០២២ ចាប់ផ្តើមដំណើរការជាផ្លូវការ” ។

អ្នកនាំពាក្យក្រសួងរ៉ែ និងថាមពល លោក វិចទ័រ ហ្សូនា បាននិយាយថា បច្ចុប្បន្នប្រទេសកម្ពុជា អាចផលិតថាមពលអគ្គិសនីបានពី៧០ ទៅ៨០ភាគរយ នៃតម្រូវការប្រើប្រាស់ក្នុងស្រុកសរុប ខណៈសល់ពីនោះបានមកពីការនាំចូលពីប្រទេសជិតខាង។

លោកបន្តថា “ការបង្កើនការផ្គត់ផ្គង់ថាមពល ជាគោលការណ៍នៃការអភិវឌ្ឍវិស័យឧស្សាហកម្ម កសិកម្ម និងវិស័យផ្សេងៗទៀតដែលជាស្នូល និងមូលដ្ឋានគ្រឹះក្នុងការបង្កើតការងារសម្រាប់ប្រជាជនខ្មែរ” ៕

វឌ្ឈនភាពៈការស្ថាបនាផ្លូវក្រាលបេតុងលើខ្សែទាំងមូលបានចាប់ផ្តើមជាផ្លូវការហើយ

ដោយៈគង់ ម៉ាលីន

ភ្នំពេញៈ ទីបំផុតការស្ថាបនាផ្លូវល្បឿនលឿនជាប្រវត្តិសាស្ត្ររបស់កម្ពុជា សម្រេចបាននូវវឌ្ឍនភាពគួរឲ្យកត់សំគាល់ ដោយរហូតមកទល់ពេលនេះ ក្រុមវិស្វករជំនាញការស្ថាបនាផ្លូវនេះ បានសម្រេចក្រាលបេរុងលើខ្សែផ្លួវទាំងមូលហើយ។

យោងតាមផេកបណ្តាញទំនាក់ទំនងសង្គមផ្លូវការ របស់ផ្លូវល្បឿនលឿនភ្នំពេញព្រះសីហនុ ដែលបានឲ្យដឹងកាលពីល្ងាចថ្ងៃទី១០ ឧសភាកន្លងមកថា តោះយើងមកមើលទាំងអស់គ្នានៃមូលដ្ឋានក្រាលថ្ម ដែលមានស្ថេរភាព ATB-25 ។ ដើម្បីធានាបានទាំងការរីកចម្រើននិងសុវត្ថិភាព គម្រោងផ្លូវល្បឿនលឿនភ្នំពេញ – ក្រុងព្រះសីហនុគាំទ្រយ៉ាងពេញទំហឹង ចំពោះសកម្មភាពរបស់រដ្ឋាភិបាល លើការទប់ស្កាត់ការរីករាលដាលនៃ Covid-19 ។

ផ្លូវល្បឿនលឿនភ្នំពេញ -ព្រះសីហនុរបស់កម្ពុជា នឹងក្លាយជាគម្រោងអភិវឌ្ឍន៍បៃតងជាលើកដំបូងនៅកម្ពុជា។

គុណសម្បត្តិរបស់ផ្លូវ

តើផ្លូវល្បឿនលឿនភ្នំពេញ-ក្រុងព្រះសីហនុមានគុណសម្បត្តិអ្វីខ្លះ?

ល្បឿនបើកបរលឿន សមត្ថភាពដឹកជញ្ជូនខ្លាំង//
ផ្លូវសម្រាប់យានយន្តផ្សេងៗ មានការត្រួតពិនិត្យ មានសុវត្ថិភាព
លើកកម្ពស់សេដ្ធកិច្ចការងារ//
ជំរុញការវិនិយោគ ស្របពេលជំរុញកំណើននៃសេដ្ឋកិច្ច
ជំរុញសេដ្ឋកិច្ចនិងឧស្សាហកម្ម កាត់បន្ថយថ្លៃដឹកជញ្ជូន
ពន្លឿនទំនើបកម្ម៕

ដំណឹងល្អៈអភិបាលខេត្តកំពង់ស្ពឺបង្ហាញទីតាំងរមណីយដ្ឋានតម្លៃ៥០០លានដុល្លារជាក់លាក់ហើយ

ដោយៈគង់ សូរិយា

កំពង់ស្ពឺៈ ទីតាំហរមណីយដ្ឋានទេសចរណ៍បែបអេកូទេសចរណ៍ លំដាប់ពិភពលោក ដែលគ្រោងបោះទុនវិនិយោគ ៥០០លានដុល្លារ ត្រូវបានអភិបាលខេត្តកំពស់ស្ពឺបង្ហាញទីតាំងជាក់លាក់ហើយ។

លោកវ៉ី សំណាង អភិបាលខេត្តកំពង់ស្ពឺ បានមានប្រសាសន៍ឲ្យដឹងតាមទូរស័ព្ទ នាល្ងាចថ្ងៃទី១០ ឧសភាកន្លងមកថា គំរោងនេះស្ថិតនៅលើផ្ទៃដី១៩០ហិកតា បាននិងកំពុងមានវឌ្ឍនភាពឆ្ពោះទៅមុខ ដោយបច្ចុប្បន្នក្រុមហ៊ុនកំពុងរៀបចំចុះបញ្ជីរប័ណ្ណកម្មសិទ្ឋដីធ្លី រៀបចំផែនការមេអភិវឌ្ឍន៍ និងរៀបចំនិតិវិធីស្នើសុំទៅកាន់ក្រុមប្រឹក្សាអភិវឌ្ឍន៍កម្ពុជាផងដែរ។

លោកបន្តថា “ក្រុមហ៊ុនបានបង្ហាញខ្ញុំពីគំរោងផែនការនេះ ជាក់លាក់រួចហើយ ដោយគំរោងនេះនឹងរួមចំណែកអភិវឌ្ឍន៍ខេត្តកំពង់ស្ពឺ ដែលគេទៅហួស មកហួស ប៉ុន្តែបច្ចុប្បន្នខេត្តនេះកំពុងមានការអភិវឌ្ឍយ៉ាងលឿនលើវិស័យទេសចរណ៍ សំណង់ អចលនទ្រព្យ តំបន់ឧស្សាហកម្មជាដើម” ។

ទាក់ទងនឹងរមណីយដ្ឋានលំដាប់ពិភពលោកនេះ ស្ថិតនៅទីតាំងណា លោកវ៉ី សំណាង បានមានប្រសាសន៍ឲ្យដឹងថា “រមណីយដ្ឋាននេះ មានទីតាំងស្ថិតនៅព្រំប្រទល់ ស្ថិតនៅព្រំប្រទល់ស្រុកភ្នំស្រួស និងស្រុកសំរោងទង ខេត្តកំពង់ស្ពឺ” ។

ក្រុមហ៊ុនដែលកំពុងរៀបចំផែនការមេដើម្បីអភិវឌ្ឍគំរោងនេះ មកពីប្រទេសសឹង្ហបុរី ហុងកុង និងក្រុមហ៊ុនមកពីប្រទេសស្វីស ៕

មូលដ្ឋានសំខាន់ៗចំនួន៤គួរពិចារណាមុនសម្រេចចិត្តយកលុយអ្នកដទៃដើម្បីវិនិយោគអចលនទ្រព្យ

ដោយៈស៊ីវ ម៉េង

ភ្នំពេញៈ វិធីសាស្ត្រវិនិយោគអចលនទ្រព្យ ត្រូវបានប្រើប្រាស់លើមូលដ្ឋានរូម និងមូលដ្ឋានដាច់ដោយឡែកពីគ្នា ដើម្បីទាញយកផលប្រយោជន៍ចេញពីវិស័យ ដែលមានផលចំណេញខ្ពស់ និងកំពុងមានប្រជាប្រិយភាពនេះ។

អ្នកជំនាញបានលើកឡើងពីភាពឆ្លាតវៃរបស់អ្នកវិនិយោគ ដោយប្រើប្រាស់ប្រាក់អ្នកដទៃ ឬខ្ចីដៃអ្នកដទៃដើម្បីទទួលបានផលប្រយោជន៍ក្នុងវិស័យនេះ។

តើអ្វីជាមូលដ្ឋាននៃការលើកឡើងនេះ ហើយតើយើងគួរពិចារណាលើមូលដ្ឋានអ្វីខ្លះ មុននឹងខ្ចីទ្រព្យ ឬលុយអ្នកដទៃមកវិនិយោគ? លោក អ្នកគួរសិក្សាលើមូលដ្ឋានមួយចំនូននេះ។

១ តើវាជាអចលនទ្រព្យក្រោមតម្លៃទីផ្សារ

វាជាសំណួរធំមួយ ដែលលោក អ្នកត្រូវឆ្លើយ មុនសម្រេចចិត្តវិនិយោគលើអចលនទ្រព្យនោះថា វាពិតជាមានតម្លៃទាបជាងទីផ្សារពិតប្រាកដ? តើអ្នកសំអាងលើមូលដ្ឋាន ឬរូបមន្តវាយតម្លៃបែបណា ដើម្បីដឹងថាវាមានតម្លៃទាបជាងទីផ្សារ? បើពិតជាមានតម្លៃទាបជាងទីផ្សារ តើវាទាបជាងប៉ុន្មានភាគរយ ដែលគួរវិនិយោគដែរឬទេ?។

នេះសុទ្ឋតែជាសំណួរធំៗ ដែលទាមទារឲ្យអ្នកវិនិយោគធ្វើការវិភាគ ពិចារណាមុនសម្រេចចិត្តខ្ចីលុយបងប្អូន សាច់ញាតិ ឬលុយពីធនាគារ ដែលអ្នកអាចយកមកប្រើប្រាស់បាន។

២ តើវាងាយនឹងលក់ចេញឬទេ?

នេះក៏ជាមូលដ្ឋាន ដែលអ្នកវិនិយោគគួរវិភាគដោយខានមិនបានផងដែរថា តើអចលនទ្រព្យ ដែលអ្នកចង់វិនិយោគជាប្រភេទអចលនទ្រព្យ ដែលងាយនឹងលក់ចេញឬយ៉ាងណា? ហេតុអ្វី? វាមានទីតាំងនៅតំបន់មានសក្តានុពលឬទេ? វាមានទីតាំងនៅជាប់ផ្លូវធំឬទេ? វាស្ថិតក្នុងតំបន់ស្ថិតក្នុងផែនការអភិវឌ្ឍរបស់វិស័យឯកជន ឬរដ្ឋាភិបាលឬទេ? ពិសេសវាមានច្បាប់ទម្លាប់ លិខិតស្នាមត្រឹមត្រូវឬប័ណ្ណកម្មសិទ្ឋត្រឹមត្រូវឬទេ?។

៣ តើវាពិតជាឡើងថ្លៃលឿន?

មុនពេលសម្រេចចិត្តវិនិយោគ អ្នកក៏ត្រូវតែសិក្សាទៅលើចំណុចទី២ ឲ្យបានល្អិតល្អន់ ពិសេសតើស្ថានភាពសង្គម សេដ្ឋកិច្ចមានភាពនឹងន ហើយសេដ្ឋកិច្ចប្រទេសជាតិនឹងវិលមករកភាពល្អប្រសើរឡើងវិញឬទេ?។

ព្រោះតម្លៃអចលនទ្រព្យកើនឡើងលឿនឬយឺត អាស្រ័យលើល្បឿនអភិវឌ្ឈន៍របស់រដ្ឋាភិបាល វាអាស្រ័យលើកំណើនសេដ្ឋកិច្ច វាក៏អាស្រ័យលើបរិយាកាសវិនិយោគ ពិសេសលំហូរទុនវិនិយោគផ្ទាល់ពីបរទេសជាពិសេសផងដែរ។

៤ តើលំហួរសាច់ប្រាក់របស់អ្នកមានបញ្ហាឬទេ បើវាជាប់គាំង

ការប្រើប្រាស់មូលធនរបស់អ្នកដទៃ ស្ថិតនៅលើលក្ខខ័ណ្ឌ ពិសេសភាពវ័ណ្ឌ “ក” នឹងបំណុល បើសិនជាលោក អ្នកមាបសាច់ញាតិល្អ ឲ្យខ្ចីប្រាក់ដោយមិនយកការប្រាក់ជារឿងល្អ ផ្ទុយទៅវិញបើលោក អ្នកខ្ចីលុយធនាគារ ច្បាស់ណាស់លោក អ្នកត្រូវបង់ប្រាក់ដើមផង និងការប្រាក់ជាប់ជាប្រចាំផង។

ហេតុនេះការសិក្សាឲ្យបានម៉ត់ចត់លើលំហួរសាច់ប្រាក់របស់ខ្លួន មានសារៈសំខាន់ណាស់ ដើម្បីធ្វើឲ្យប្រាកដថា អ្នកមិនមានបញ្ហាលំហូរសាច់ប្រាក់ មានបញ្ហាបំណុលពេញគ្រួសារ និងមានបញ្ហាជាច្រើនទៀតនឹងកើតឡើង បើសិនជាអ្នកជាប់គាំងលំហូរសាច់ប្រាក់។

សិក្សាលើមូលដ្ឋានទាំងបួននេះរួចបានវិភាគ ពិចារណាច្បាស់លាស់ហើយ ទើបសម្រេចចិត្តវិនិយោគ លោក អ្នកនឹងទទួលបានផលចំណេញច្រើន និងអាចបញ្ចៀសបាននូវហានិភ័យផងដែរ៕

ដំណឹងល្អ! រដ្ឋាភិបាលសម្រេចជ្រើសរើសខេត្តសៀមរាប ជាខេត្តអាទិភាពសម្រាប់រៀបចំការប្រណាំងទោចក្រយាន ក្នុងព្រឹត្តិការស៊ីហ្គេម ២០២៣

ដោយ សហការី

ភ្នំពេញ៖ ខេត្តសៀមរាប ត្រូវបានកំណត់ជាខេត្តអាទិភាព ក្នុងចំណោមខេត្តមានសក្ដានុពលចំនួន៣ ដែលអាចជ្រើសរើសជាទីកន្លែងរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ នៅកម្ពុជា លើប្រភេទកីឡាទោចក្រយាន (ប្រណាំងកង់) ។

បើយោងតាមផែនការយុទ្ធសាស្ដ្រ និងការចង្អុលបង្ហាញរបស់មន្ដ្រីបច្ចេកទេសហព័ន្ធក្នុងការជ្រើសរើសទីតាំងខេត្ត៣ សម្រាប់ត្រៀមរៀបចំការប្រកួតស៊ីហ្គេម លើប្រភេទកីឡារប្រណាំងកង់នោះ រួមមានខេត្តសៀមរាប ខេត្តព្រះសីហនុ និងខេត្តកែប ដែលជាខេត្តមានអំណោយផល ទាំងហេដ្ឋារចនាសម្ព័ន្ធ និងវិស័យទេសចរណ៍។

ខេត្តសៀមរាប មានហេដ្ឋារចនាសម្ព័នព្រលានយន្ត ហោះ ផ្លូវថ្នល់ ទីតាំងប្រាសាទបុរាណ តំបន់ទេសចរណ៍ជាច្រើន ជាពិសេសឧទ្យានជាតិភ្នំគូលែន ដែលអាចរៀបចំការប្រកួតបានទាំងប្រភេទកីឡាកង់ភ្នំ និងកង់គក់។ ក្រុមការងារបច្ចេកទេសសហព័ន្ធ បានចុះទៅត្រួតពិនិត្យម្តងរួចមកហើយ ដោយបានសង្កេត និងវាយតម្លៃថា នឹងអាចរៀបចំការប្រកួតស្របតាមស្តង់ដារបច្ចេកទេសយ៉ាងល្អប្រសើរ។

ចំណែកខេត្តព្រះសីហនុ និងខេត្តកែបវិញ មានសក្ដានុពលស្រដៀងគ្នា ព្រោះជាខេត្តជាប់មាត់សមុទ្រ ជាក់ស្ដែងកាលពីដើមឆ្នាំ២០២០ ខេត្តទាំងពីរ ធ្លាប់ត្រូវបានសហព័ន្ធរៀបចំការប្រកួតកីឡាប្រណាំងកង់ពិភពលោកតំបន់ឆ្នេរសមុទ្រកម្ពុជា ប្រកបដោយភាពជោគជ័យ។ លើសពីនេះទៀត ខេត្តទាំងពីរក៏មានសក្ដានុពលផ្លូវថ្នល់ឡើងចុះភ្នំ ស្របតាមស្ដង់ដារបច្ចេកទេស ក្នុងការទទួលរៀបចំព្រឹត្តិការណ៍អន្ដរបានផងដែរ។

ក្នុងចំណោមខេត្តទាំង៣ នេះ សៀមរាប គឺជាខេត្តអាទិភាពជាងគេ ក្នុងការជ្រើសរើសយកខេត្តនេះធ្វើម្ចាស់ផ្ទះរៀបចំការប្រកួតកីឡាទោចក្រយាន ក្នុងព្រឹត្តិការណ៍កីឡាស៊ីហ្គេម ឆ្នាំ២០២៣ ព្រោះក្រៅពីមានសក្ដានុពលផ្នែកហេដ្ឋារចនាសម្ព័ន្ធផ្សេងៗ ប្រភេទកីឡាកីឡាករ-កីឡាការិនី គ្រូបង្វឹក និងធនធានមន្ដ្រីពាក់ព័ន្ធរបស់សហព័ន្ធភាគច្រើន ក៏ពួកគាត់ចេញពីខេត្តសៀមរាបនេះដែរ គឺជាខេត្តមានអំណោយផលគ្រប់បានយ៉ាង…» ។

គួរបញ្ជាក់ថា គិតត្រឹមថ្ងៃនេះ កម្ពុជាសល់តែ ៧២៥ថ្ងៃទៀតប៉ុណ្ណោះ ក្នុងដំណើរឆ្ពោះទៅស៊ីហ្គេម ឆ្នាំ២០២៣ ដែលនឹងប្រារព្ធពិធីបើកផ្លូវការនៅថ្ងៃទី០៥ ខែឧសភា ឆ្នាំ២០២៣ ។ ចំពោះបញ្ហាទីលានប្រកួតវិញ ឯកឧត្តម បណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងអនុប្រធានអចិន្ដ្រៃយ៍ CAMSOC បានទុកពេល ១សប្ដាហ៍ទៀតប៉ុណ្ណោះក្នុងការកំណត់ និងបញ្ចប់ ដើម្បីដាក់ជូនសម្ដេចពិជ័យសេនា ទៀ បាញ់ ប្រធាន CAMSOC ពិនិត្យ និងសម្រេច ហើយបញ្ជូនទៅសហព័ន្ធ និងភាគីពាក់ព័ន្ធត្រៀមលក្ខណៈរៀបចំ និងទទួលខុសត្រូវក្នុងដំណើរឆ្ពោះទៅរកព្រឹត្តិការណ៍ប្រវត្តិសាស្ដ្រនេះ៕

រដ្ឋាភិបាលចាប់ផ្តើមកិច្ចប្រជុំដើម្បីរៀបចំធ្វើម្ចាស់ផ្ទះកិច្ចប្រជុំកំពូលអាស៊ានជា លើកទី៣ដ៏មានកិត្យានុភាព

ដោយៈ គង់ សូរិយា

ភ្នំពេញៈ ក្រុមមន្រ្តីជាន់ខ្ពស់នៃរាជរដ្ឋាភិបាលកម្ពុជា បាននិងកំពុងរៀបចំកិច្ចប្រជុំពិភាក្សាលើប្រធានបទសំខាន់ៗ ដើម្បីត្រៀមធ្វើជាម្ចាស់ផ្ទះកិច្ចប្រជុំកំពូលអាស៊ានជាលើកទី៣ ដែលកិច្ចប្រជុំនេះនឹងលើកមុខមាត់ និងកិត្យានុភាពកម្ពុជាលើឆាកអន្តរជាតិ។

នៅព្រឹកថ្ងៃទី១០ ឧសភានេះ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានដឹកនាំកិច្ចប្រជុំពិភាក្សាលើការងារសំខាន់ៗមួយចំនួន ក្នុងការត្រៀមធ្វើជា ម្ចាស់ផ្ទះកិច្ចប្រជុំអាស៊ាននៅឆ្នាំ២០២២។

កិច្ចប្រជុំបានពិភាក្សាផ្តោតជាសំខាន់លើរបៀបវារៈចំនួន៤ រួមមាន ការកំណត់មូលបទ និងអាទិភាពសម្រាប់កម្ពុជាធ្វើជាប្រធានអាស៊ាន។ ការត្រៀមរៀបចំនូវគំនិត ផ្តួចផ្តើមរបស់កម្ពុជាសម្រាប់ឆ្នាំ២០២២ ដំណើរការប្រព្រឹត្តទៅ នៃអនុគណៈកម្មការនីមួយៗ ក្នុងការរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ និងបញ្ហាផ្សេងៗ ដែលធ្វើឡើងដើម្បីកម្ពុជាត្រៀមខ្លួន ក្នុងការធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅឆ្នាំ២០២២។

ក្នុងកិច្ចប្រជុំនេះ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានលើកឡើងពីការត្រៀមខ្លួនរបស់ក្រសួងពាណិជ្ជកម្ម ពិសេសក្នុងការឈានទៅសម្រេចបាននូវកិច្ចការក្រោមសរសរស្តម្ភសេដ្ឋកិច្ចរបស់អាស៊ាន។

លោករដ្ឋមន្ត្រីបានរំលេចថា តាមរយៈក្រសួងពាណិជ្ជកម្ម កម្ពុជាបាននឹងកំពុងព ន្លឿននីតិវិធីក្នុងស្រុក សម្រាប់ឈានទៅការផ្តល់សច្ចាប័ន លើកិច្ចព្រមព្រៀងពាណិជ្ជកម្មសេរីនានា ដែលកម្ពុជាជាសមាជិក រួមមាន កិច្ចព្រមព្រៀង RCEP និងកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលត្រូវបានចុះហត្ថលេខាកាលពីឆ្នាំ២០២០ កន្លងទៅ។

ក្រៅពីនេះ ក្រសួងក៏បាននិងកំពុងជំរុញនីតិវិធីសេសសល់ នៅក្នុងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង ដើម្បីឈានទៅរកការចុះហត្ថលេខា ឱ្យបានកាន់តែឆាប់ មុននឹងសម្រេចបើកការចរចា កិច្ចព្រមព្រៀងជាមួយដៃគូពាណិជ្ជកម្មផ្សេងទៀត (រួមមានជប៉ុន ឥណ្ឌា…) នៅពេលការសិក្សាបានបញ្ចប់។

លោកប៉ាន សូរស័ក្តបានគូសបញ្ជាក់ដែរថា “ក្រសួងក៏បាននិងកំពុងបង្កើតក្រុមការងារថ្នាក់ក្រសួង ដើម្បីត្រៀមរៀបចំផ្តល់ជាធាតុចូលសំខាន់ៗ ក្នុងវិស័យពាណិជ្ជកម្ម ជូនដល់ក្រសួងការបរទេស និងសហប្រតិបត្តិការអន្តរជាតិ សម្រាប់ដាក់ជាចំណុចអាទិភាព និងគំនិតផ្តួចផ្តើមនានារបស់កម្ពុជា ក្នុងឋានៈជាម្ចាស់ផ្ទះនៃកិច្ចប្រជុំនេះ”។

លោករដ្ឋមន្ត្រីបានទទួលយកអនុសាសន៍ របស់លោកឧបនាយករដ្ឋមន្ត្រី ប្រាក់ សុខុន ដែលជាប្រធានអង្គប្រជុំ និងបានប្តេជ្ញាចូលរួមសហការតាមគ្រប់មធ្យាបាយ និងក្នុងគ្រប់កាលៈទេសៈ ដើម្បីធានាសម្រេចបាននូវភាពជោគជ័យរបស់កម្ពុជា ក្នុងការធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅឆ្នាំ២០២២។

កម្ពុជាបានធ្វើជាម្ចាស់ផ្ទះរៀបចំ កិច្ចប្រជុំកំពូលអាស៊ានលើកទី១ នៅឆ្នាំ២០០២ លើកទី២ នៅឆ្នាំ២០១២ និងលើកទី៣ នៅឆ្នាំ២០២២ខាងមុខនេះ៕