ដោយៈគង់ សូរិយា

          ភ្នំពេញៈ អភិបាលខេត្តមណ្ឌលគិរី ណែនាំដល់បណ្តាក្រុមហ៊ុនដីសម្បទានសេដ្ឋកិច្ចទាំងអស់ ត្រូវធ្វើផ្លូវព័ទ្ធជុំវិញដីឲ្យបានច្បាស់លាស់ ចៀសវាងមានការកាប់ទន្រ្ទានយកដីធ្វើជាកម្មសិទ្ធ។

លោកស្វាយ សំអ៊ាង អភិបាលខេត្តមណ្ឌលគិរី និងមន្រ្តីពាក់ព័ន្ឋ បានអញ្ជើញចុះពិនិត្យមើលវឌ្ឍនភាព របស់ក្រុមហ៊ុនផេស៊ីហ្វិកយ៉ញស្តុក​ ខមភេនី​ លីមីធីត ស្ថិតនៅក្នុងភូមិរវាក់ ឃុំរយ៉​ ស្រុកកោះញែ​ ខេត្តមណ្ឌលគិរី។ លោកស្វាយ សំអ៊ាង អភិបាលខេត្ត បានជួបពិភាក្សាជាមួយតំណាង ក្រុមហ៊ុនផេស៊ីហ្វិចយ៉ញស្តុកខមភេនី​ លីមីធីត​ស្តីពីវឌ្ឍនភាពរបស់ក្រុមហ៊ុន និងបានណែនាំឲ្យក្រុមហ៊ុន ត្រូវធ្វើរបង ឬធ្វើផ្លូវព័ទ្ធជុំវិញដីសម្បទានសេដ្ឋកិច្ចដែលបានវិនិយោគ ឲ្យបានច្បាស់លាស់ ដើម្បីជៀសវាងមានការចូលកាប់ទន្រ្ទានយកដីធ្វើជាកម្មសិទ្ធិពីបុគ្គលមួយចំនួន។

លោកបន្តថា “ជាពិសេសក៏សូមឲ្យក្រុមហ៊ុនមួយៗ ត្រូវគោរពតាមគោលការណ៍របស់រាជរដ្ឋាភិបាល។ បន្ថែមលើសនេះ លោកបានណែនាំដល់សមត្ថកិច្ច និងអាជាធរដែនដី ត្រូវសហការគ្នា ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ឲ្យមានប្រសិទ្ធភាព។

នាឱកាសនោះ ឯកឧត្តម រួមទាំងក្រុមការងារ បានចុះពិនិត្យកន្លែងសាងសង់ប៉ាឆា(ឈាបនដ្ឋាន)​ សម្រាប់បូជាសពអ្នកដែលបានស្លាប់ ដោយសារជម្ងឺកូវីដ-១៩ ដែលបានសាងសង់រួចជាស្ថាពរ ស្ថិតនៅក្នុងភូមិពូលុង សង្កាត់រមនា ក្រុងសែនមនោរម្យ ខេត្តមណ្ឌលគិរីផងដែរ៕

ដោយៈ លក្ខិណា

ភ្នំពេញៈ ទោះបីជាកម្ពុជាកំពុងជាប់ដៃប្រយុទ្ធជាមួយនឹងជំងឺកូវីដ១៩ ដែលរាលដាលក្នុងសហគមន៍យ៉ាងនេះ ក្ដី តែកម្ពុជាក៏នៅតែបន្តស្វែងរកទីផ្សារសម្រាប់ពាណិជ្ជកម្ម ជាក់ស្ដែងបច្ចុប្បន្នតាមរយៈក្រសួងពាណិជ្ជកម្ម កម្ពុជាបាននិងកំពុងពន្លឿននីតិវិធីដើម្បីឈានទៅដល់ការផ្ដល់សច្ចាប័នលើកិច្ចព្រមព្រៀងពាណិជ្ជកម្មសេរីនានាទាំងទ្វេភាគីនិងពហុភាគី។

នៅក្នុងកិច្ចប្រជុំតាមប្រព័ន្ធវីឌីអូ របស់គណៈកម្មការជាតិរៀបចំកិច្ចប្រជុំកំពូលអាស៊ាន នៅឆ្នាំ២០២២ កាលពីថ្ងៃទី១០ ឧសភា២០២១នេះ លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានមានប្រសាសន៍ថា តាមរយៈក្រសួងពាណិជ្ជកម្ម កម្ពុជាបាននឹងកំពុងពន្លឿននីតិវិធីក្នុងស្រុកសម្រាប់ឈានទៅការផ្តល់សច្ចាប័នលើកិច្ចព្រមព្រៀងពាណិជ្ជកម្មសេរីនានា ដែលកម្ពុជាជាសមាជិក រួមមានកិច្ចព្រមព្រៀង RCEP និងកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលត្រូវបានចុះហត្ថលេខាកាលពីឆ្នាំ២០២០ កន្លងទៅ។

លោកបន្តថា ក្រសួងក៏បាននឹងកំពុងជំរុញនីតិវិធីសេសសល់ នៅក្នុងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង ដើម្បីឈានទៅរកការចុះហត្ថលេខាឱ្យបានកាន់តែឆាប់ មុននឹងសម្រេចបើកការចរចាកិច្ចព្រមព្រៀងជាមួយដៃគូពាណិជ្ជកម្មផ្សេងទៀត រួមមានជប៉ុន ឥណ្ឌាជាដើម នៅពេលការសិក្សាបានបញ្ចប់។

លោកបានថ្លែងថា ក្រសួងក៏បាននឹងកំពុងបង្កើតក្រុមការងារថ្នាក់ក្រសួង ដើម្បីត្រៀមរៀបចំផ្តល់ជាធាតុចូលសំខាន់ៗក្នុងវិស័យពាណិជ្ជកម្ម ជូនដល់ក្រសួងការបរទេស និងសហប្រតិបត្តិការអន្តរជាតិ សម្រាប់ ដាក់ ជាចំណុ ច អាទិភាព និងគំនិតផ្តួចផ្តើមនានារបស់កម្ពុជាក្នុងឋានៈជាម្ចាស់ផ្ទះនៃកិច្ចប្រជុំនេះ”។

រហូតមកដល់ពេលនេះកម្ពុជាបានសម្រេចនូវការចរចានិងចុះហត្ថលេខាលើកិច្ចព្រមព្រៀងពាណិជ្ជកម្មសេរីចំនួន៣រួចហើយ រួមមានកិច្ចព្រមព្រៀងពាណិជ្ជកម្មទ្វេភាគីកម្ពុជា ចិន កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ RCEP និងកិច្ចព្រមព្រៀងពាណិជ្ជកម្មសេរីកម្ពុជា និងកូរ៉េខាងត្បូង។ កិច្ចព្រមព្រៀង ពាណិជ្ជកម្មសេរី នឹងជំរុញឱ្យកម្ពុជាទទួលបានការនាំចេញនិងការវិនិយោគពីប្រទេសជាដៃគូបន្ថែមទៀត។

មន្ត្រីជាន់ខ្ពស់កម្ពុជាកន្លងមករំពឹងថា កិច្ចព្រមទាំងទាំងនេះ អាចនឹងចូលជាធរមាននៅក្នុងឆ្នាំ២០២១នេះ ក្រោយពេលដំណើរការចរចារបានបញ្ចប់និងចុះហត្ថលេខារួចរាល់ហើយ៕

ដោយៈ ប៊ី

ភ្នំពេញៈ ការសាងសង់អាកាសយានដ្ឋានអន្តរជាតិសៀមរាបអង្គរថ្មី នៅតែដំណើរការជាធម្មតា ដោយសម្រេចបាន៤២ភាគរយ បើទោះបីកម្ពុជាកំពុងរងការរាតត្បាតនៃជំងឺកូវីដ-១៩ ដែលបានធ្វើឱ្យមានការយឺតយ៉ាវការងារមួយចំនួនក៏ដោយ។

លោកស៊ីន ចាន់សិរីវុត្ថាអ្នកនាំពាក្យនិងជារដ្ឋលេខាធិការ នៃលេខាធិការដ្ឋានអាកាសចរស៊ីវិលកម្ពុជា ត្រូវបានដកស្រង់សម្តីចេញពីសារព័ត៌មានរដ្ឋនៅថ្ងៃទី១០ ខែឧសភា ឆ្នាំ២០២១នេះ ដោយលោកបានលើកឡើថាថា បើទោះបីកម្ពុជាកំពុងរងការរាតត្បាតនៃជំងឺកូវីដ-១៩ បានធ្វើឱ្យមានការយឺតយ៉ាវការងារមួយចំនួនក៏ដោយ ក៏ប៉ុន្ដែការសាងសង់អាកាសយានដ្ឋានអន្ដរជាតិថ្មីនៅលើទឹកដីអង្គរខេត្ដសៀមរាបនៅតែដំណើរការជាធម្មតា។

លោកបានឱ្យដឹងថា ក្រុមហ៊ុនវិនិយោគបានបង្កើនការងារសាងសង់ទាំងយប់ទាំងថ្ងៃ ដើម្បីឱ្យសម្រេចគោលដៅដូចអ្វីដែលបានគ្រោងទុកឱ្យរួចរាល់នៅឆ្នាំ២០២៣ខាងមុខ។

លោកបានបន្តថា មកដល់ពេលនេះក្រុមហ៊ុនអភិវឌ្ឍន៍របស់ចិន(AIAI) Angkor International Airport Investment (Cambodia)Co., Ltd សាងសង់សម្រេចបានជាង៤០ភាគរយហើយ ក្នុងនោះមានគម្រោងចំនួន៣ធំៗរួមមាន សង់សំណង់អគារ សំណង់ដែលពាក់ព័ន្ធនឹងការចុះចតយន្ដហោះ និងសំណង់ផ្សេងៗដែលពាក់ព័ន្ធនឹងសេវាកម្មរបស់អាកាសយានដ្ឋាន ។

លោកបានថ្លែងថា “ព្រលានយន្តហោះខេត្តសៀមរាបគិតមកដល់ក្នុងបំណាច់ខែ៤នេះ គឺអនុវត្តបាន៤២ភាគរយហើយក្នុងគម្រោងរួម ហើយថាតើមានផលប៉ះពាល់អ្វីអត់? សម្រាប់ដំណើរការនេះគឺប្រាកដជាមាន ដោយសារតែការឆ្លងនៅក្នុងសហគមន៍នេះ មានការបិទការធ្វើដំណើរតាមខេត្តគឺមានការយឺតយ៉ាវមួយចំនួនតូចដែរ ប៉ុន្តែមិនទាំងស្រុងទេ ដោយយឺតយ៉ាវទៅលើការផ្លាស់ប្ដូរធនធានមនុស្ស ការធ្វើដំណើររបស់ជំនាញការមានការយឺតយ៉ាវខ្លះ អ៊ីចឹងគឺមិនយឺតយ៉ាវខ្លាំងក្លានោះទេ ហើយសម្រាប់ការអនុវត្តគម្រោងការនេះ គឺនៅតែអនុវត្តជាបណ្ដើរៗរហូត ដោយមិនមានការប៉ះពាល់អ្វីធំដុំនោះទេ”។

លោកបានបន្តទៀតថា ប្រទេសកម្ពុជា ជាពិសេសខេត្តសៀមរាប នឹងទទួលបាននូវអាកាសយានអន្តរជាតិថ្មីមួយនាឆ្នាំ២០២៣ឆាប់ៗខាងមុខ ដែលនឹងចូលរួមចំណែកក្នុងការទាក់ទាញភ្ញៀវទេសចរមកទស្សនាខេត្តសៀមរាបកាន់តែច្រើន សំដៅជំរុញកំណើនសេដ្ឋកិច្ចជាតិ ការបង្កើនការងារ និងប្រាក់ចំណូលជូនប្រជាពលរដ្ឋ និងរួមចំណែកក្នុងការអភិវឌ្ឍសង្គមប្រកបដោយចីរភាព។

អាកាសយាន្តដ្ឋានអន្តរជាតិសៀមរាបអង្គរថ្មី មានទីតាំងស្ថិតនៅឃុំពពេល ស្រុកសូទ្រនិគម ខេត្ដសៀមរាប ដែលបានចាប់ផ្ដើមសាងសង់កាលពីថ្ងៃទី១៥ខែមីនាឆ្នាំ២០២០ នៅលើផ្ទៃដីប្រមាណ៧០០ហិកតា ហើយគ្រោងនឹងបញ្ចប់នៅឆ្នាំ២០២៣ ដែលមានរយៈពេល៣៦ខែ ក្រោយពីអ្នកជំនាញបានសិក្សាប្លង់មេរួចរាល់កាលពីឆ្នាំ២០១៦កន្លងទៅ៕

ដោយៈ ម៉ាណេត

ភ្នំពេញៈ យោងតាមការសិក្សាមួយបានឱ្យដឹងថា ផលចំណេញត្រឡប់ប្រចាំឆ្នាំ (Return of Investment) ពីការវិនិយោគលើខុនដូនៅកម្ពុជា នាពេលបច្ចុប្បន្ន មានអត្រាជាមធ្យមត្រឹមតែ៥% ធ្លាក់ចុះ បើប្រៀបធៀបកាលពីកាលមុនមានអត្រាជាមធ្យមប្រចាំឆ្នាំ៧%។

លោកស្រីអាន សុធីតាក្នុងនាមជាអ្នកវិភាគឯករាជ្យ ដែលមានបទពិសោធន៍យូរឆ្នាំក្នុងវិស័យនេះ បានមានប្រសាសន៍កាលពីថ្មីៗនេះថា ផលចំណេញត្រឡប់ប្រចាំឆ្នាំ (Return of Investment) ពីការវិនិយោគលើខុនដូ នាពេលបច្ចុប្បន្ន មានអត្រាជាមធ្យមត្រឹមតែ៥% បើប្រៀបធៀបកាលពីកាលមុនមានអត្រាជាមធ្យមប្រចាំឆ្នាំ៧% ដោយសារទីផ្សារកាន់តែមានភាពប្រកួតប្រជែង និងការផ្គត់ផ្គង់កើនឡើង។

លោកបានបន្តថា ការធ្លាក់ចុះនៃផលចំណេញត្រឡប់នេះអាចធ្វើឱ្យកម្ពុជាធ្លាក់ចុះលើការវិនិយោគលើវិស័យខុនដូ ប្រសិនបើផលចំណេញត្រឡប់លើវិស័យខុនដូមានភាពប្រហាក់ប្រហែលនឹងប្រទេសជិតខាង។

លោកស្រីបានឱ្យដឹងទៀតថា ប៉ុន្តែជាដំណឹងល្អ យោងតាមការវាយតម្លៃ ផលចំណេញត្រឡប់នៅថៃមានត្រឹមតែ២ទៅ៣%ប៉ុណ្ណោះ សិង្ហបុរីស្រដៀងគ្នានឹងថៃដែរ និងវៀតណាមមានត្រឹមតែ៤ទៅ៥% ខណៈផលចំណេញត្រឡប់ពីការវិនិយោគលើខុនដូនៅកម្ពុជាមានអត្រាប្រមាណ៥%។

លោស្រីបានណែនាំថា ដើម្បីទទួលបានផលចំណេញខ្ពស់ អ្នកវិនិយោគលើខុនដូត្រូវមើលកត្តាចំនួន៤ ដូចជាទី១ត្រូវមើលទីតាំង ទី២មើលលើតម្លៃ ទី៣មើលគុណភាព និងទី៤មើលប្រវិត្តិ និងកេរ្តិ៍ឈ្មោះអ្នកអភិវឌ្ឍន៍។

ទោះជាយ៉ាងណាក៏ដោយ លោកស្រីបានលើកឡើងថា អត្រាផលចំណេញត្រឡប់៥%នេះ គិតជាមធ្យមប្រចាំប៉ុណ្ណោះ ប៉ុន្តែបើទិញគម្រោងខុនដូត្រូវ អត្រាផលចំណេញនឹងនៅតែសម្រេចបាន៧%ដដែល។

លោកខន គង្គាអគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ ERA Cambodia មានប្រសាសន៍នៅថ្ងៃទី១០ ខែឧសភា ឆ្នាំ២០២១នេះថា គម្រោងដែលយើងលក់ ភាគច្រើនយើងផ្តោតលើគម្រោង Presale (គម្រោងដែលទើបតែចាប់ផ្តើម ឬចាប់ផ្តើមបុកគ្រឹះ) ផលចំណេញត្រឡប់ ក្នុងមួយឆ្នាំ មានអត្រាចន្លោះពី១៥%ទៅ២៥%គិតជាមធ្យម ដោយសារផលចំណេញនេះពឹងផ្អែកលើតម្លៃសំណង់ គិតចាប់ពីចាប់ពីការផ្តើមសាងសង់ រហូតដល់ការសាងសង់បញ្ចប់។

លោកបានបន្តថា នៅពេលសាងសង់បញ្ចប់ក្នុងរយៈពេលបីឆ្នាំ អត្រាផលចំណេញអាចនឹងកើនឡើងដល់៤៥% បើសិនជាយើងគិតត្រឹមអត្រា១៥%។

លោកបានឱ្យដឹងថា ការវិនិយោគលើវិស័យខុនដូនាពេលបច្ចុប្បន្ន គឺឱកាសល្អប្រសើរសម្រាប់វិនិយោគ ដែលមានលំហូរសាច់វិជ្ជាអំឡុងពេលបច្ចុប្បន្ន ព្រោះពេលបើកសេដ្ឋកិច្ច អ្វីៗគ្រប់យ៉ាងនឹងត្រឡប់មករកសភាព និងវិស័យអចលនទ្រព្យនឹងកើនឡើងវិញផងដែរ៕