ដោយៈ ម៉ាណេត

ភ្នំពេញៈ ក្រុមហ៊ុន HLH Agriculture (Cambodia) ដែលក្រុមហ៊ុនបុត្រសម្ព័ន្ធរបស់ក្រុមហ៊ុនសិង្ហបុរី Hong Lai Huat បានចុះអនុស្សរណៈយោគយល់ (MOU) ជាមួ​យក្រុមហ៊ុន Cambodia Hei Shi Mineral ដើម្បីសហការលើការរុករកធនធានរ៉ែនៅមជ្ឈមណ្ឌលកសិកម្មកម្ពុជា-សិង្ហបុរីរបស់ខ្លួន។

កិច្ចសហប្រតិបត្តិការនេះ មានទឹកប្រាក់វិនិយោគប្រមាណ២០លានដុល្លារអាមេរិក (២៦,៥ លានដុល្លារសឹង្ហបុរី) ។ នេះបើយោងតាមការចេញផ្សាយរបស់សារព័ត៌មាន The Edge Singapore នៅថ្ងៃទី៩ ខែមិថុនា ឆ្នាំ២០២១។

អនុស្សារណៈយោគយល់បញ្ជាក់ថាទាំងក្រុមហ៊ុន HLH Agriculture និងក្រុមហ៊ុន Cambodia Hei Shi Mineral ចាត់ទុកគ្នាទៅវិញទៅមកជាដៃគូយុទ្ធសាស្ត្រ ហើយនឹងផ្តោតលើការងារក្នុងរយៈពេល៣ខែ ដើម្បីឈានដល់កិច្ចព្រមព្រៀងកាតព្វកិច្ច។

តាមរយៈអនុស្សារណៈនៃការយោគយល់គ្នានេះ ភាគីទាំងពីរនឹងបង្កើតការបណ្តាក់ទុនរួមគ្នា (JV) ដែលក្រុមហ៊ុន HLH Agriculture នឹងទទួលខុសត្រូវក្នុងការផ្តល់ដី និងការបែងចែកសិទ្ធិរុករករ៉ែ។

ក្រុមហ៊ុន Cambodia Hei Shi Mineral នឹងផ្តោតលើកំណត់ត្រារុករករ៉ែ ដើម្បីដំណើរការប្រតិបត្តិការរុករករ៉ែ និងទទួលខុសត្រូវរាល់ការចំណាយ ដែលបានកើតឡើងចំពោះការជួលកម្លាំងពលកម្មជំនាញ បុគ្គលិក គ្រឿងម៉ាស៊ីន និងជំនួយបច្ចេកទេស ក៏ដូចជាការអភិវឌ្ឍហេដ្ឋារចនាសម្ព័ន្ធ សម្រាប់ប្រតិបត្តិការរុករករ៉ែ ក្នុងថវិកាប្រតិបត្តិការដែលបានព្រមព្រៀងរវាងភាគីទាំងពីរ។

ក្រុមហ៊ុន HLH Agriculture នឹងទទួលបាន៦០% នៃប្រាក់ចំណេញដែលបានមកពីក្រុមហ៊ុនបណ្តាក់ទុនរួម។ រយៈពេលនៃការបណ្តាក់ទុនរួម នឹងមានរយៈពេល១០ឆ្នាំ និងអាចបន្តរយៈពេលនៃកិច្ចព្រមព្រៀងបន្ថែមទៀត។

ការបណ្តាក់ទុនរួមនេះ នឹងប្រើប្រាស់ធនធានរ៉ែ ដែលមាននៅក្នុងដី សម្រាប់សាងសង់ហេដ្ឋារចនាសម្ព័ន្ធ រោងចក្រ និងអាគារនានានៅខាងក្នុងមណ្ឌលកសិកម្ម របស់ក្រុមហ៊ុន HLH ។

លើសពីនេះ កិច្ចសហការនេះ នឹងផ្តល់ឱកាសការងារបន្ថែមទៀតនៅកម្ពុជា ជាពិសេសសម្រាប់ប្រជាជនក្នុងស្រុក ដែលរស់នៅក្នុងស្រុកឱរ៉ាល់ ខេត្តកំពង់ស្ពឺ។

លោក Ong Jia Jing នាយកគ្រប់គ្រងទូទៅ និងជានាយកប្រតិបត្តិក្រុមហ៊ុន Hong Lai Huat បានថ្លែងថា “ប្រតិបត្តិការរុករករ៉ែ នឹងស្ថិតនៅក្នុងតំបន់សាងសង់របស់មណ្ឌលកសិកម្ម។ ធនធានរ៉ែធម្មជាតិល្អ ត្រូវបានរកឃើញនៅលើទឹកដីរបស់យើង ដូចជា ថ្មម៉ាប និងថ្មក្រានីត ហើយភាពជាដៃគូនេះ នឹងជួយឱ្យក្រុមហ៊ុននេះអាចជីកយករ៉ែ និងផ្គត់ផ្គង់រ៉ែធម្មជាតិល្អៗទាំងនេះ ដើម្បីបំពេញតម្រូវការទីផ្សារ និងអភិវឌ្ឍហេដ្ឋារចនាសម្ព័ន្ធនៅមណ្ឌលកសិកម្ម។

លោក Ong បន្ថែមថា“ ធនធានរ៉ែដែលទាញបាន ក៏នឹងចូលរួមចំណែកយ៉ាងច្រើនដល់ការរីកចម្រើនរបស់ក្រុមហ៊ុន ក៏ដូចជាម្ចាស់ភាគហ៊ុនរបស់យើង សម្រាប់រយៈពេលជាច្រើនឆ្នាំខាងមុខ៕

ភ្នំពេញ ៖ រដ្ឋបាលជលផលនៃក្រសួងកសិកម្មរុក្ខាប្រមាញ់និងនេសាទបាននិងកំពុងសាងសង់ស្ថានីយ៍ផលិតកូនត្រីពូជមួយកន្លែងលើផ្ទៃដីទំហំ ១០,៤ហិកតា នៅភូមិបាដើម សង្កាត់សាមឃួយ ស្រុកសេសាន ខេត្តស្ទឹងត្រែង ក្រោមគម្រោងហិរញ្ញប្បទានធនាគារពិភពលោក (M-IWRMP3-C1) ចំនួន មួយលានពីរប្រាំសែនដុល្លារអាមេរិក ។គម្រោងនេះ នឹងជូលរួមយ៉ាងសំខាន់ក្នុងការអភិវឌ្ឍវិស័យវារីវប្បកម្មកម្ពុជា ហើយវានឹងអាចកាត់បន្ថយបាននូវការនាំចូលផលិតផលវារីវប្បកម្មពីបរទេសមកក្នុងស្រុកផងដែរ ។

យោងតាមការបង្ហោះព័ត៌មានរបស់លោកវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទបានឱ្យដឹងថា សំណង់នេះមានទ្រង់ទ្រាយធំ ដែលបានរៀបចំទៅតាមរចនាបទ និងបច្ចេកទេសខ្ពស់ បំពាក់ដោយឧបករណ៍ សម្ភារៈបរិក្ខារទំនើបៗសម្រាប់ដំណើរការ។ ស្ថានីយនេះនឹងបម្រើដល់ការសិក្សាស្រាវជ្រាវ បង្កាត់ភ្ញាស់ ប្រភេទត្រីកំពុងរងគ្រោះថ្នាក់ និងផ្គត់ផ្គង់កូនត្រីពូជ ដែលមានតម្លៃសេដ្ឋកិច្ច ដើម្បីបំពេញតម្រូវការទីផ្សារក្នុងស្រុក និងនាំចេញ។

លោកបន្តថាស្ថានីយ៍ផលិតកូនត្រីពូជនេះ មានស្រះមេអាចស្ដុកទឹកបាន ២០.១៤០ ម៉ែត្រត្រីគុណ ដែលយកប្រភពទឹកពីទន្លេសេកុង ដោយប្រើម៉ូទ័របូមទឹកចំនួន៣គ្រឿង និងមានស្រះកូនត្រីចំនួន១២ ស្រះបំប៉នត្រីសាច់ចំនួន៤ និងស្រះត្រីមេពូជចំនួន៦ទៀត មានប្រព័ន្ធប្រឡាយបញ្ចេញនិងបញ្ចូលទឹក ស្រះចម្រោះទឹកកខ្វក់និងកាកសំណល់ ដើម្បីកែលម្អរគុណភាពទឹក សម្រាប់ប្រើប្រាស់ឡើងវិញ និងការការពារបរិស្ថាន ដោយមិនបង្ហូរផ្ទាល់ចូលទៅក្នុងទន្លេ និងមានទំនប់ការពារទឹកជំនន់ដែលអាចកើតឡើងជាយថាហេតុ ។

លោកបន្ថែមថា ស្ថានីយ៍នេះ មានអគារសម្រាប់ការងារពិសោធន៍ស្រាវជ្រាវ បណ្ដុះបណ្ដាល ការិយាល័យ បណ្ណាល័យ អគារបង្កាត់ ភ្ញាស់ និងថែបំប៉នកូនត្រីចំនួន៦ ព្រមទាំងអគារស្នាក់នៅ សម្រាប់មន្ត្រីរាជការ និស្សិត និងកម្មករ។ ក្នុងស្ថានីយ៍នេះ ក៏បានសាងសង់ឃ្លាំងផ្ទុកសម្ភារ ឃ្លាំងស្ដុកចំណី រោងម៉ាស៊ីនភ្លើង ប្រព័ន្ធផ្លូវបេតុង និង បណ្ដាញអគ្គិសនី ចំណតរថយន្ត របងការពារ រោងយាម និងអណ្តូងទឹកស្អាត។

លោកបញ្ជាក់ថា ទោះបីស្ថានភាពជំងឺកូវីដ១៩កំពុងរាលដាលឆ្លងក្នុងសហគមន៍ក៏ដោយ ក៏រដ្ឋបាលជលផលបាននិងកំពុងជំរុញការសាងសង់ស្ថានីយ៍នេះ ឱ្យបានរួចរាល់ជាស្ថាពរនៅខែតុលាឆ្នាំ២០២១ តាមការគ្រោងទុក។
ស្ថានីយ៍នេះនឹងមានតួនាទីយ៉ាងសំខាន់ក្នុងវិស័យជលផល ពិសេសការអភិវឌ្ឍវារីវប្បកម្មនៅភូមិភាគ ឦសាន និងធនធានជលផលទឹកសាប ។

ដោយៈ សុខុម

សេអ៊ូល: ធនាគារពិភពលោក (World Bank) បានធ្វើការព្យាករជាថ្មីថា យុទ្ធនាការចាក់វ៉ាក់សាំងកូវីដ-១៩ និងកញ្ចប់ថវិកាយ៉ាងធំសម្បើមសម្រាប់ស្ដារសេដ្ឋកិច្ចក្នុងបណ្ដាប្រទេសអ្នកមាន នឹងជួយជំរុញឱ្យសេដ្ឋកិច្ចពិភពលោកទទួលបានកំណើនលឿនបំផុតក្នុងរយៈពេលជិត៥ទសវត្សរ៍មកនេះ។ នេះបើយោងតាមសារព័ត៌មាន Korea Times ចុះផ្សាយនៅថ្ងៃទី៩ មិថុនា។

ក្នុងរបាយការណ៍ចុងក្រោយរបស់ខ្លួនស្តីពីទស្សនវិស័យសេដ្ឋកិច្ចសកល (Global Economic Prospects) ដែលបានចេញផ្សាយកាលពីថ្ងៃអង្គារ ទី៨ មិថុនា World Bank ដែលជាទីភ្នាក់ងារប្រឆាំងភាពក្រីក្រនៅក្នុងប្រទេសចំនួន១៨៩ បានព្យាករថា សេដ្ឋកិច្ចពិភពលោកនឹងទទួលបានកំណើន៥,៦%នៅឆ្នាំនេះ ពោលគឺកើនឡើងពី៤,១%ដែលខ្លួនបានព្យាករកាលពីខែមករា។

កាលពីឆ្នាំ២០២០ សេដ្ឋកិច្ចពិភពលោកបានដាំក្បាលចុះ៣,៥% នៅពេលដែលការឆ្លងរាតត្បាតវីរុសកូវីដ-១៩ បានសកម្មភាពសេដ្ឋកិច្ចរាំងស្ទះ និងបង្ខំឱ្យអាជីវកម្មនានាបិទទ្វារ ហើយមនុស្សសម្ងំនៅតែក្នុងផ្ទះ។

ប្រសិនបើដូចការព្យាករទុកមែន កំណើននេះនឹងធ្វើឱ្យឆ្នាំ២០២១ ក្លាយជាឆ្នាំដែលទទួលបានកំណើនលឿនបំផុតចាប់តាំងពីឆ្នាំ១៩៧៣ ដែលកាលនោះទទួលបានកំណើន៦,៦%។

ទោះជាយ៉ាងណា World Bank ព្យាករថា ការងើបឡើងនៃសេដ្ឋកិច្ចក្នុងឆ្នាំ២០២១ នេះនឹងមិនស្មើគ្នាឡើយ ព្រោះបណ្ដាប្រទេសអ្នកមានដូចជាហរដ្ឋអាមេរិក ជាដើមមានលទ្ធភាពចំណាយប្រាក់របស់អ្នកជាប់ពន្ធយ៉ាងច្រើនសន្ធឹកសន្ធាប់ដើម្បីជួយទ្រទ្រង់សេដ្ឋកិច្ចរបស់ខ្លួន។

ធនាគារនេះលើកឡើងថា ៩០%នៃបណ្ដាសេដ្ឋកិច្ចជឿនលឿននឹងអាចវិលទៅរកស្ថានភាពមុនពេលផ្ទុះវិបត្តិកូវីដ-១៩ នៅឆ្នាំ២០២២ បើគិតជាប្រាក់ចំណូលក្នុងមនុស្សម្នាក់ ចំណែកឯបណ្ដាប្រទេសកំពុងអភិឌ្ឍន៍មានតែ១ភាគ៣ប៉ុណ្ណោះ។

World Bank កំពុងអំពាវនាវឱ្យមានការចែកចាយវ៉ាក់សាំងកូវីដ-១៩ ទៅដល់បណ្តាប្រទេសដែលមានប្រាក់ចំណូលទាបឱ្យកាន់តែទូលំទូលាយ ព្រោះអត្រាចាក់វ៉ាក់សាំងនៅក្នុងប្រទេសទាំងនោះមានសន្ទុះយឺត។

ធនាគារនេះរំពឹងថា សេដ្ឋកិច្ចរបស់សហរដ្ឋអាមេរិក នឹងទទួលបានកំណើន៦,៨%នៅឆ្នាំ២០២១ ដោយកើនឡើងពី៣,៥%ដែលខ្លួនបានព្យាករកាលពីខែមករា។ សេដ្ឋកិច្ចធំបំផុតរបស់ពិភពលោកមួយនេះបានដាំក្បាលចុះ៣.៥%កាលពីឆ្នាំ២០២០ នៅពេលដែលវិបត្តិកូវីដ-១៩ បានធ្វើឱ្យសកម្មភាពសេដ្ឋកិច្ចនានាស្ទើរតែជាប់គាំងទាំងស្រុងអំឡុងរដូវផ្ការីក។

ទោះជាយ៉ាងណា យុទ្ធនាការចាក់វ៉ាក់សាំងកូវីដ-១៩ យ៉ាងគំហុក រួមជាមួយអត្រាការប្រាក់ទាប និងការចំណាយយ៉ាងធំសម្បើមរបស់រដ្ឋាភិបាលបានធ្វើឱ្យសេដ្ឋកិច្ចមានភាពប្រសើរឡើងវិញយ៉ាងឆាប់រហ័ស។

តាមការព្យាករថា មហាយក្សចិន ដែលជាសេដ្ឋកិច្ចធំបំផុតទី២ របស់ពិភពលោក និងជាប្រទេសទី១ ដែលងើបផុតពីការដាំក្បាលចុះនៃសេដ្ឋកិច្ចដោយសារវិបត្តិកូវីដ-១៩ នឹងទទួលបានកំណើន៨,៥%ក្នុងឆ្នាំ២០២១នេះ បន្ទាប់ពីទទួលបានកំណើនត្រឹមតែ២,៣%កាលពីឆ្នាំ២០២០។

ប្រទេសចំនួន១៩នៅអឺរ៉ុប ដែលប្រើរូបិយប័ណ្ណអឺរ៉ូ រួមគ្នាត្រូវបានរំពឹងថានឹងទទួលបានកំណើន៤,២% ក្រោយដាំក្បាលចុះ៦,៦%កាលពីឆ្នាំមុន។ ហើយប្រទេសជប៉ុន ត្រូវបានព្យាករថានឹងទទួលបានកំណើន២,៩%នៅឆ្នាំនេះ បន្ទាប់ពីទិន្នផលសេដ្ឋកិច្ចបានដាំក្បាលចុះ៤,៧%កាលពីឆ្នាំមុន៕