ដោយៈ ម៉ាណេត

អាមេរិកៈ មន្រ្តីសេតវិមានពីររូបបាននិយាយកាលពីថ្ងៃទី២ ខែឧសភា ឆ្នាំ២០២១ ថា អ្នកចរចាពាណិជ្ជកម្មកំពូលរបស់សហរដ្ឋអាមេរិក នឹងចាប់ផ្តើមពិភាក្សាជាមួយអង្គការពាណិជ្ជកម្មពិភពលោក លើវិធីនានា ដើម្បីជំនះលើបញ្ហាកម្មសិទ្ធិបញ្ញា ដែលកំពុងរាំងខ្ទប់ការទទួលបានវ៉ាក់សាំងកូវីដ១៩ ពីការចែកចាយឱ្យបានទូលំទូលាយ នៅទូទាំងពិភពលោក។

សេតវិមានបានរងសម្ពាធពីសមាជិកសភាទាំងរបស់ខ្លួន និងរដ្ឋាភិបាលប្រទេសផ្សេងៗ ដើម្បីចូលរួមក្នុងកិច្ចខិតខំប្រឹងប្រែង ដើម្បីលើកលែងច្បាប់ប៉ាតង់សម្រាប់វ៉ាក់សាំ​ងកូវីដ១៩ ដូច្នេះបណ្តាប្រទេសក្រីក្រ អាចចាប់ផ្តើមផលិតវ៉ាក់សាំងផ្ទាល់ខ្លួន ដើម្បីចាក់ជូនប្រជាជន។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី៣ ខែឧសភា ឆ្នាំ២០២១។

សហរដ្ឋអាមេរិកត្រូវបានគេរិះគន់ថា ផ្តោតតែលើការចាក់វ៉ាក់សាំងជូនរបស់ពលរ ដ្ឋអាមេរិក ជាពិសេសនៅពេលដែលការផ្គត់ផ្គង់វ៉ាក់សាំងរបស់ខ្លួន ចាប់ផ្តើមមានច្រើនជាងតម្រូវការ និងកម្រិតដែលត្រូវបានអនុម័ត សម្រាប់ការប្រើប្រាស់នៅប្រទេសផ្សេងៗទៀតនៅលើពិភពលោក។

លោក Ron Klain ប្រធានផ្នែកបុគ្គលិកនៃសេតវិមាន បានមានប្រសាសន៍ថា តំណាងពាណិជ្ជកម្មសហរដ្ឋអាមេរិក លោក Katherine Tai នឹងចាប់ផ្តើមពិភាក្សាជាមួយអង្គការពាណិជ្ជកម្មអំពីវិធី ដែលយើងអាចឱ្យវ៉ាក់សាំងនេះ ចែកចាយបានកាន់តែទូលំទូលាយ ផ្តល់សិទ្ធិ និងចែកចាយកាន់តែទូលំទូលាយ។

លោក Klain និងទីប្រឹក្សាសន្តិសុខជាតិលោក Jake Sullivan មានប្រសាសន៍ថា រដ្ឋបាលសហរដ្ឋអាមេរិក នឹងមានកិច្ចពិភាក្សាបន្ថែមទៀតលើបញ្ហានេះ នៅប៉ុន្មានថ្ងៃខាងមុខនេះ។

លោក Sullivan បាននិយាយថា រដ្ឋបាលសហរដ្ឋបាលសហរដ្ឋអាមេរិក ជឿជាក់ថា ក្រុមហ៊ុនឱសថ “គួរតែផ្គត់ផ្គង់ដល់ខ្នាត និងចែកចាយដល់ពិភពលោកទាំងមូល ដើម្បីកុំអោយមានឧបសគ្គចំពោះមនុស្សគ្រប់គ្នា ដែលទទួលបានការចាក់វ៉ាក់សាំង”។

លោក Klain បាននិយាយថា សហរដ្ឋអាមេរិក បានបញ្ជូនប្រទេសឥណ្ឌានូវវត្ថុធាតុដើមគ្រប់គ្រាន់ដែលខ្លួនត្រូវការ ដើម្បីបង្កើតវ៉ាក់សាំងចំនួន២០លានដូសភ្លាមៗ។ ប្រទេ​សឥណ្ឌា កំពុងប្រយុទ្ធប្រឆាំងនឹងការកើនឡើងថ្មីនៃការឆ្លង និងការស្លាប់ ដោយសារជំងឺកូវីដ១៩។

សមាជិកព្រឹទ្ធសភា Bernie Sanders ដែលស្ថិតក្នុងចំណោមក្រុមសមាជិកព្រឹទ្ធ​សភាប្រជាធិបតេយ្យ ដែលកំពុងដាក់សម្ពាធសេតវិមានលើបញ្ហានេះ បាននិយាយថា “នៅពេលដែលជីវិតរាប់លាននាក់ស្ថិតក្នុងគ្រោះថ្នាក់ ក្រុមហ៊ុនថ្នាំត្រូវតែប្រាប់ឬអនុញ្ញាតឱ្យប្រទេសផ្សេងទៀត ទទួលបានកម្មសិទ្ធិបញ្ញា ដូច្នេះពួកគេអាចផលិតវ៉ាក់សាំង ដែលត្រូវការជាចាំបាច់នៅក្នុងប្រទេសក្រីក្រ”។

លោក Sanders បានមានប្រសាសន៍ថា “វាពិតមិនសមស្រប ដែលប្រទេសអ្នកមាន អាចទទួលបានវ៉ាក់សាំងច្រើន ហើយប្រជាជនរាប់លាន និងរាប់ពាន់លាននាក់នៅក្នុងប្រទេសក្រីក្រ មិនអាចមានលទ្ធភាពទិញវាបាន”៕

          ដោយៈវិបុលភាព

          ភ្នំពេញៈ ក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំបើកដំណើរការទីតាំងចាក់វ៉ាក់សាំងកាពារជំងឺកូវីដ-១៩(ស៊ីណូវ៉ាក់)ដូសទី២ ជូនដល់កម្មករនិយោជិត និង​ថ្នាក់ដឹកនាំអង្គការវិជ្ជាជីវៈសរុបចំនួន២០ទីតាំង គិតត្រឹមថ្ងៃម្សិលម៉ិញនេះ។

អនុគណៈកម្មការចំពោះកិច្ច សម្រាប់ចាក់វ៉ាក់សាំងការពារជំងឺកូវីដ-១៩ ជូនកម្មករនិយោជិត នៃក្រសួងការងារ និងបណ្ដុះបណ្ដាលវិជ្ជាជីវៈ បានរម្លឹកដល់កម្មករ និយោជិត ដែលបានចាក់វ៉ាក់សាំងដូសទី១ ដោយក្រុមគ្រូពេទ្យរបស់ក្រសួងការងារទាំងអស់ថា ចំពោះអ្នករស់នៅក្បែររោងចក្រ ដែលជាទីតាំងចាក់វ៉ាក់សាំងដូសទី១ នោះ សូមទៅចាក់វ៉ាក់សាំងដូសទី២ នៅតាមទីតាំងចាស់របស់ខ្លួន។

ដោយភ្ជាប់ជាមួយនូវកាតចាក់វ៉ាក់សាំង និងអត្តសញ្ញាណបណ្ណសញ្ជាតិខ្មែរ ឬបណ្ណ ប.ស.ស. ឬឯកសារបញ្ជាក់អត្តសញ្ញាណ ដែលបានប្រើប្រាស់ពេលមកចាក់វ៉ាក់សាំងកូវីដ-១៩ ដូសទី១។

ប្រភពខាងលើបន្តថា ដោយការចាក់ដូសទី២ មានគម្លាតពីការចាក់ ដូសទី១ រយៈពេលចន្លោះពី ១៤ ទៅ ២៨ ថ្ងៃ ដូច្នេះសូមបងប្អូនកម្មករនិយោជិត ចងចាំថាការចាក់វ៉ាក់សាំង ត្រូវតែចាក់ឲ្យបានត្រឹមត្រូវ តាមបច្ចេកទេសវេជ្ជសាស្ត្រអោយបាន២លើក រួមផ្សំនឹងការអនុវត្ត ៣កុំ និង ៣ការពារ ទើបអាចធានានូវប្រសិទ្ធភាពពេញលេញក្នុងការបង្ការការឆ្លងជំងឺកូវីដ-១៩បាន។

ដោយឡែក សម្រាប់កម្មករនិយោជិត ដែលរស់នៅខណ្ឌផ្សេងពីទីតាំងរោងចក្រ ដែលបានចាក់ដូសទី១ ដោយក្រុមគ្រូពេទ្យរបស់ក្រសួងការងារ គឺអាចទៅចាក់ដូសទី២ នៅតាមទីតាំង និងកាលបរិច្ឆេទដែលរៀបចំដោយក្រសួងការងារ នៅក្នុងខណ្ឌដែលខ្លួនកំពុងរស់នៅដោយមិនអាចឆ្លងខណ្ឌបាននោះទេ។

គិតត្រឹមថ្ងៃទី១ ខែឧសភា ឆ្នាំ២០២១ កម្មករនិយោជិត និងថ្នាក់ដឹកនាំអង្គការវិជ្ជាជីវៈដែលទទួលបានការចាក់វ៉ាក់សាំងដូសទី២ សរុបចំនួន៤៥ ៥៣១នាក់ (បរទេសចំនួន ១ ៥៨៨នាក់)។

ប្រមុខរដ្ឋាភិបាលសម្តេចតេជោហ៊ុន សែននាយករដ្ឋមន្រ្តីនៃកម្ពុជាបានដាក់ចេញបទបញ្ជាជូនកងទ័ព ដើម្បីធ្វើយ៉ាងណាចូលរួមរៀបចំទីតាំង និងសម្ភារៈផ្សេងៗ ដើម្បីចាក់វ៉ាក់សាំងជូនប្រជាពលរដ្ឋនៅតំបន់ក្រហមឲ្យបានទាំងអស់គ្នា និងលឿនបំផុត ដើម្បីកាត់ផ្តាច់ប្រភពចម្លងជំងឺកូវីដ១៩ កាន់តែធ្ងន់ធ្ងរ ពិសេសក្នុងខ័ណ្ឌចំនួន៤ ដែលស្ថិតក្នុងតំបន់ក្រហម៕

        ដោយៈ គង់ សូរិយា

        ភ្នំពេញៈ បណ្តារដ្ឋមន្ត្រីហិរញ្ញវត្ថុ និងទេសាភិបាលធនាគារកណ្ដាលមកពីប្រទេសសេដ្ឋកិច្ចធំៗជាងគេនៅអាស៊ី បានប្តេជ្ញារួបរួមគ្នា ក្នុងការស្តារសេដ្ឋកិច្ចឡើងវិញក្រោយវិបត្តិកូវីដ១៩។

រដ្ឋមន្រ្តីហិរញ្ញវត្ថុរបស់ប្រទេសចិន, ជប៉ុន និងកូរ៉េខាងត្បូង នៅថ្ងៃចន្ទនេះបានប្ដេជ្ញាចិត្តថា នឹងជំរុញស្ថិរភាពសារពើពន្ធ និងហិរញ្ញវត្ថុ ដើម្បីគាំទ្រដល់ការងើបឡើងវិញនៃសេដ្ឋកិច្ចពីវិបត្តិCOVID-19។ នេះបើតាមការចេញផ្សាយ ដោយទីភ្នាក់ងារព័ត៌មាន Reuters នៅរសៀលថ្ងៃចន្ទ ទី០៣ ខែឧសភា ឆ្នាំ២០២១។

នៅក្នុងសេចក្ដីថ្លែងការណ៍រួម ចេញផ្សាយក្រោយបញ្ចប់កិច្ចប្រជុំប្រចាំឆ្នាំ នៃធនាគា​រអភិវឌ្ឍអាស៊ី (ADB) តាមវីដេអូអនឡាញ រដ្ឋមន្ត្រីហិរញ្ញវត្ថុនៃប្រទេសទាំង៣ ក៏បានសន្យាដែរថា នឹងសម្រេចឱ្យបាននូវការងើបឡើង នៃសេដ្ឋកិច្ចគ្រប់ជ្រុងជ្រោយ, រក្សានូវស្ថិរភាពសារពើពន្ធ និងហិរញ្ញវត្ថុ។

សេចក្តីថ្លែងការណ៍បានបញ្ចាក់ថា “ទស្សនវិស័យតំបន់កាន់តែមានភាពប្រសើរឡើង ជាមួយការបន្តគាំទ្រគោលនយោបាយ និងកំណើននៃការចាក់វ៉ាក់សាំង… តែទោះជាយ៉ាងណា យើងគួរតែបន្តរក្សាការយកចិត្តទុកដាក់ ចំពោះការងើបឡើងវិញនៃសេដ្ឋកិច្ច”។

បើតាមសេចក្ដីថ្លែងការណ៍រួមខាងលើដដែល ប្រទេសចិន ជប៉ុន និងកូរ៉េខាងត្បូង នឹងធ្វើដាក់ចេញនូវគំនិតផ្ដួចផ្ដើមថ្មី ដើម្បីពង្រឹងសុវត្ថិភាពហិរញ្ញវត្ថុតំបន់ នៃអាស៊ានបូកបី ហើយការសន្យានេះនឹងត្រូវធ្វើឡើង ក្នុងកិច្ចប្រជុំតាមវីដេអូជាមួយ បណ្ដាប្រទេសទាំង ១០ ជាសមាជិកអាស៊ាននៅថ្ងៃចន្ទនេះ៕

          ដោយៈគង់ សូរិយា

          ភ្នំពេញៈ ប្រធានអគ្គនាយកធនាគារហត្ថា លោកឧកញ៉ាហួត អៀងតុងបានមានប្រសាសន៍អបអរសាទរ ដែលរាជរដ្ឋាភិបាលនឹងបន្ឋូរបន្ថយលើតំបន់មួយចំនួន ធ្វើឲ្យប្រជាពលរដ្ឋអាចធ្វើដំណើរបាន ដែលនឹងជួយធ្វើឲ្យប្រជាពលរដ្ឋអាចធ្វើដំណើរ និងមានសកម្មភាពសេដ្ឋកិច្ចឡើងវិញ។

លោកឧកញ៉ាបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី៣ ឧសភានេះថា ការបើកចំហតំបន់មួយចំនួនក្រោយថ្ងៃទី៥ ឧសភាខាងមុខ ជារឿងល្អ ព្រោះវាធ្វើឲ្យប្រជាពលរដ្ឋអាចធ្វើដំណើរ ប្រកបមុខរបរឡើងវិញ ដែលធ្វើឲ្យសកម្មភាពសេដ្ឋកិច្ចមានដំណើរការល្អ។លោកបន្តថា ប៉ុន្តែទោះជាយ៉ាងណា លោកសូមសំណូមពរឲ្យប្រជាពល​រដ្ឋចូលរួមអនុវត្តន៍តាមវិធានការណ៍ណែនាំរបស់ក្រសួងសុខាភិបាល ដោយអនុវត្តន៍តាមវិធានបីកុំ និងបីការពារ។

លោកបន្តថា “ការអនុវត្តន៍៍តាមវិធាន៣កុំ ៣ការពារ ជាការចូលរួមក្នុងការទប់ស្កាត់រលកទី៤បន្ថែមទៀត ខណៈស្ថានភាពនៃការឆ្លងរាលដាលជំងឺនេះ បានធ្វើឲ្យប៉ះពាល់ដល់ជីវភាព និងការរស់នៅរបស់ប្រជាពលរដ្ឋយ៉ាងខ្លាំង”។លោកបន្តថា “ជាមួយគ្នានឹងការបើកចំហតំបន់ខ្លះៗនេះ ធនាគារនឹងបើកដំណើរការការិយាល័យ មួយចំនួនពេញលេញឡើងវិញ ប៉ុន្តែតំបន់ខ្លះមិនទាន់អាចធ្វើបាននៅឡើយ ដោយសារបុគ្គលិកខ្លះជាប់រស់នៅក្នុងតំបន់ក្រហម”។

អភិបាលរាជធានីភ្នំពេញ លោកឃួង ស្រេងបានមានប្រសាសន៍នាព្រឹកថ្ងៃទី៣ ឧសភានេះថា រដ្ឋបាលរាជធានីភ្នំពេញ នៅតែកំណត់តំបន់ក្រហម តំបន់លឿងទុំ និងតំបន់លឿងដដែល។

ធនាគារហត្ថាមានការិយាល័យសរុប នៅទូទាំងប្រទេសចំនួន១៧៧ មានបុគ្គលិក៥៦០០នាក់ និងមានទ្រព្យសកម្មប្រមាណ១៥០០លានដុល្លារអាមេរិក៕

ដោយៈសុខុម

អាមេរិក:  ក្រុមហ៊ុនយក្ស Berkshire Hathaway (BRKB) របស់កំពូលមហាសេដ្ឋីដ៏ជោគជ័យបំផុត Warren Buffett ចាប់ផ្ដើមទទួលបានប្រាក់ចំណេញវិញហើយក្នុងត្រីមាសទី១ ដើមឆ្នាំ២០២១នេះ បន្ទាប់ពីខាតបង់ធ្ងន់ធ្ងរជិត៥០ពាន់លានដុល្លារ អំឡុងពេលត្រីមាសទី១ ដើមឆ្នាំ២០២០ ដោយសារការឆ្លងរាតត្បាតវីរុសកូវីដ-១៩។

យោងតាមសារព័ត៌មាន CNN ចុះផ្សាយកាលពីថ្ងៃទី១ ឧសភាកន្លងមកបានឱ្យដឹងថា ក្រុមហ៊ុនរបស់កំពូលមហាសេដ្ឋីអាមេរិក មួយនេះទទួលបានប្រាក់ចំណេញសុទ្ធចំនួន១១,៧ពាន់លានដុល្លារ និងប្រាក់ចំណេញប្រតិបត្តិការ៧ពាន់លានដុល្លារ។

ក្រុមហ៊ុន Berkshire Hathaway កាន់កាប់ក្រុមហ៊ុនបុត្រសម្ព័ន្ធជាច្រើន រាប់ចាប់ពីក្រុមហ៊ុនធានារ៉ាប់រងខ្នាតយក្ស Geico និងក្រុមហ៊ុនបណ្ដាញផ្លូវដែកដឹកទំនិញធំបំផុតនៅទ្វីបអាមេរិកខាងជើង BNSF Railway រហូតដល់ប៊្រែនផលិតផលល្បីល្បាញបំផុតដូចជាហាងការ៉េម និងអាហារសម្រន់ Dairy Queen ក្រុមហ៊ុនថ្នាំលាប Benjamin Moore និងក្រុមហ៊ុនផលិតថ្មពិល Duracell។

ក្រុមហ៊ុន Berkshire Hathaway បាននិយាយកាលពីថ្ងៃសៅរ៍ ទី០១ ឧសភា ថា ប្រាក់ចំណូលសម្រាប់អាជីវកម្មផលិតកម្ម សេវាកម្ម និងលក់រាយភាគច្រើនរបស់ខ្លួនបានកើនឡើងខ្លាំងគួរឱ្យកត់សម្គាល់ ក្នុងរយៈពេលពីរបីខែចុងក្រោយនេះ នៅពេលដែលសេដ្ឋកិច្ចបើកឡើងវិញ។

ប៉ុន្តែទោះបីមានសុទិដ្ឋិនិយមបែបនេះក្ដី ក៏ក្រុមហ៊ុន Berkshire Hathaway បានបន្តជះលុយយ៉ាងច្រើនសន្ធឹកសន្ធាប់ ដើម្បីទិញយកភាគហ៊ុនរបស់ខ្លួនមកវិញ ជាជាងទះលុយទិញយកក្រុមហ៊ុនគេបន្ថែមទៀត។

ក្រុមហ៊ុន Berkshire Hathaway បានចំណាយប្រាក់ជិត៦.៦ពាន់លានដុល្លារ ដើម្បីទិញយកភាគហ៊ុនលំដាប់ A និងភាគហ៊ុនលំដាប់ B នៅក្នុងត្រីមាសទី១ នេះ។

ទោះបីក្រោយការទិញភាគហ៊ុនទាំងនោះ ក៏សាច់ប្រាក់របស់ក្រុមហ៊ុន Berkshire Hathaway នៅតែកើនឡើងយ៉ាងច្រើន។ ពេលនេះក្រុមហ៊ុននេះ មានសាច់ប្រាក់រហូតដល់ទៅប្រមាណ១៤៥,៤ពាន់លានដុល្លារ នៅលើតារាងតុល្យការរបស់ខ្លួន បើធៀបនឹង១៣៨,៣ពាន់លានដុល្លារនៅចុងឆ្នាំ២០២០។

ភាគហ៊ុនលំដាប់ A របស់ក្រុមហ៊ុននេះលក់ ក្នុងតម្លៃរហូតដល់៤១២.៥០០ដុល្លារឯណោះនៅពេលនេះ ចំណែកឯភាគហ៊ុនលំដាប់B លក់ក្នុងតម្លៃក្រោម២៧៥ដុល្លារប៉ុណ្ណោះ​នៅក្នុងការជួញដូរកាលពីថ្ងៃសុក្រ ទី៣០ មេសា៕