ដោយៈ វឌ្ឈនៈ

ភ្នំពេញៈ សហភាពអឺរ៉ុប (EU ) និង អង្គការសុខភាពពិភពលោក (WHO ) បានប្រកាសថា ស្ថាប័នទាំងពីរបានរួមសហការគ្នាគាំទ្រការត្រៀមបង្ការ និងការឆ្លើយតបចំពោះជំងឺកូវីដ-១៩ និងការគំរាមកំហែងសនិ្តសុខសុខភាពនាពេលអនាគតនៅកម្ពុជា។

យោងតាមសេចក្តីប្រកាសរបស់សហភាពអឺរ៉ុបប្រចាំកម្ពុជា នៅថ្ងៃទី២មិថុនា ២០២១នេះ បានឱ្យដឹងថា សហភាពអឺរ៉ុប កំពុងវិនិយោគក្នុងទឹកប្រាក់សរុបជាង២,៨ លានអឺរ៉ូ (៣,៥លានដុល្លារសហរដ្ឋអាមេរិក) សម្រាប់រយៈពេល ៣ឆ្នាំខាងមុខ ដើម្បីផ្តល់ការគាំទ្រ តាមរយៈអង្គការសុខភាពពិភពលោក ដល់រាជរដ្ឋាភិបាលក ម្ពុជាក្នុងការពង្រឹងការបង្ការ និងការឆ្លើយតបចំពោះវិបតិ្តជំងឺកូវីដ-១៩ និងពង្រឹងប្រព័ន្ធសុខាភិបាល។

ការផ្តល់មូលនិធិនេះ គឺជាផ្នែកមួយនៃកម្មវិធីសុខភាព ថ្នាក់តំបន់ពិសេសមួយរបស់សហភាពអឺរ៉ុប និងអង្គការសុខភាពពិភពលោក ដើម្បីគំាទ្រដល់ប្រទេសជាសមាជិកអាស៊ាន។

លោកវេជ្ជបណ្ឌិតសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា បានមានប្រសាសន៍ថា ភាពជាដៃគូរវាងសហភាពអឺរ៉ុប និងអង្គការសុខភាពពិភពលោកដើម្បីគាំទ្រការតៀមបង្ការ និងការឆ្លើយតប គឺបង្ហាញពីសាមគ្គីភាព និងកិច្ចសហប្រតិបតិ្តការសម្រាប់ជួយប្រទេសមួយនៅក្នុងគ្រាលំបាក។លោកបន្តថា ក្រសួងសុខាភិបាល នឹងបន្តធ្វើការយ៉ាងជិតស្និទ្ឋ ជាមួយនឹងអង្គការសុខភាពពិភពលោក ដើម្បីពង្រឹងប្រព័ន្ធសុខាភិបាលរបស់ប្រទេសកម្ពុជា ។

លោកស្រីវេជ្ជបណ្ឌិត Li Ailan តំណាងអង្គការសុខភាពពិភពលោកប្រចាំកម្ពុជា បានមានប្រសាសន៍ថា ក្នុងរយៈពេលជាងមួយទសវត្សមកនេះ ប្រទេសកម្ពុជាបាននិងកំពុងពង្រឹងប្រព័ន្ធសុខាភិបាលរបស់ខ្លួន រួមទាំងការត្រៀមបង្ការចំពោះជំងឺរាតត្បាតផងដែរ។ ការផ្ដល់មូលនិធិពីសហភាពអឺរ៉ុប និងភាពជាដៃគូនេះ នឹងចូលរួមចំណែកក្នុងកិច្ចខិតខំប្រឹងប្រែងរួមគ្នារបស់យើង ដើម្បីឆ្លើយតបចំពោះការរាតត្បាតនៃជំងឺកូវីដ-១៩ ហើយនឹងចូលរួមជួយប្រទេសកម្ពុជា ក្នុងការត្រៀមបង្ការសម្រាប់បញ្ហា គ្រោះអាសន្នសុខភាពសាធារណៈបានប្រសើរជាងមុន ។

លោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានមានប្រសាសន៍ថា សហភាពអឺរ៉ុប និងប្រទេសជាសមាជិករបស់ខ្លួន ដូចជា ក្រុមការងារប្រចាំអឺរ៉ុប” ទាំងមូល បានប្តេជ្ញារួមគ្នាធ្វើការជាមួយកម្ពុជា ដើម្បីដោះស្រាយផលប៉ះពាល់ផ្នែកសេដ្ឋកិច្ច សង្គម និងបរិស្ថានដោយសារការរាតត្បាតនៃជំងឺកូវីដ-១៩ ដើម្បីកសាងឡើងវិញឲ្យកាន់តែប្រសើរ និងធានាឲ្យបានថាគ្មាននរណាម្នាក់ ត្រូវបានមើលរំលងនោះឡើយ។

លោកស្រីបន្តថា “រហូតមកទល់នឹងពេលនេះ ក្រុមប្រទេសសមាជិកអឺរ៉ុបបានផ្តល់ថវិកាចំនួន២,២ពាន់លានអឺរ៉ូ ដល់ប្រទេសចំនួន៩២ ដែលមានប្រាក់ចំណូលទាបនិងមធ្យមរួមទាំងប្រទេសកម្ពុជាផងដែរ ដើម្បីទទួលបានវ៉ាក់សំាងការពារជំងឺកូវីដ-១៩តាម រយៈយន្តការកូវ៉ាក់”។លោកស្រីបន្ថែមថា “យើងមានមោទនភាពដែលក្រុមអឺរ៉ុប គឺជាអ្នកចូលរួមចំណែកដ៏ធំបំផុតទៅឲ្យយន្តការកូវ៉ាក់នេះ”៕

ដោយៈ ប៊ី

សិង្ហបុរី/ភ្នំពេញ៖ អាជីវកម្មថ្មី នៃបច្ចេកវិទ្យាសុខាភិបាលកម្ពុជា ពេទ្យយើង របស់ក្រុមហ៊ុន ហ្វឺស វីម៉ិនថេក អេស៊ា និងក្រុមហ៊ុនបច្ចេកវិទ្យាសុខាភិបាលប្រទេសសិង្ហបុរី Ssivix Lab បានសម្រេចចាប់ដៃគូធ្វើអាជីវកម្មរួមគ្នា ដើម្បីឲ្យមន្ទីរពេទ្យ និងអ្នកផ្តល់សេវាព្យាបាលដៃគូ និងអ្នកជំងឺកម្ពុជាអាចទាក់ទងទទួល និងផ្តល់សេវា ពិគ្រោះ និងព្យាបាលតាមប្រព័ន្ធឌីជីថលរួមលើទូរស័ព្ទដៃ។

ការផ្តល់សេវានេះនឹងធានាបាននូវសុវត្ថិភាពបំផុត សន្សំសំចៃ និងធានាបាននូវ សុវត្ថិភាពជូនដល់ពលរដ្ឋកម្ពុជាក្នុងគ្រាកំពុងជួបវិបត្តិសុខភាពសាកលកូវីដ១៩ និងមានទិសដៅពង្រីកទៅកាន់បណ្តា ប្រទេសនៅអនុតំបន់មេគង្គ និងអាស៊ីផងដែរ នៅចុងឆ្នាំ២០២១នេះ។

e-Health MyCLNQ ជាប្រព័ន្ធច្រកចេញចូលតែមួយ នៃសេវាកម្មបច្ចេកវិទ្យាសុខាភិបាលថែទាំសុខភាពលើទូរស័ព្ទដៃ ទំនើបដំបូងគេមួយ និងជាកន្លែងផ្តល់សេវាពិគ្រោះ និងទទួលសេវាព្យាបាលធំជាងគេ ផ្តល់ដំដោះស្រាយបញ្ហាសុខភាព ជូនដល់ពលរដ្ឋកម្ពុជា និងនៅក្នុងតំបន់ ដែលជាសមិទ្ធិផលសេវាកម្មបច្ចេកវិទ្យាសុខាភិបាលរួមគ្នាបង្កើតឡើងដោយ កម្មវិធីបច្ចេកវិទ្យា ពេទ្យយើង នៃក្រុមហ៊ុន ហ្វឺស វីម៉ិនថេក អេស៊ា និងក្រុមហ៊ុន Ssivix Lab ក្នុងគោលបំណងចូលរួម បំរើដល់អ្នកជំងឺ ដើម្បីទទួលបានសេវាថែទាំសុខភាពឆ្លាតវៃ រហ័ស ចំណេញពេលវេលា និងថវិកា ហើយផ្ដល់ដំណោះ ស្រាយឲ្យមន្ទីរពេទ្យដៃគូ និងអ្នកផ្ដល់សេវាសុខភាពបន្តផ្តល់សេវាពិគ្រោះ និងព្យាបាលដល់អ្នកជំងឺបានពីគ្រប់ទីកន្លែង គ្រប់ពេលវេលាយ៉ាងរហ័ស ងាយស្រួល និងមានសុវត្ថិភាពបំផុតផងដែរ។

លោកស្រីប៉ុង លីមសានសហស្ថាបនិក និងប្រធាននាយកប្រតិបត្តិ ក្រុមហ៊ុន ហ្វឺស វីម៉ិនថេក អេស៊ា បានលើកឡើងថា “ក្នុងនាមយើងជាក្រុមហ៊ុនបច្ចេកវិទ្យាសុខាភិបាលថ្មី ដែលទទួលបានការគាំទ្រពីវេជ្ជបណ្ឌិត រាប់ពាន់នាក់ និងបានកំពុង តែជួយឲ្យពលពលរដ្ឋកម្ពុជា និងអ្នកជំងឺបរទេសប្រមាណជិត២លាននាក់មានកំណត់ត្រាវេជ្ជសាស្ត្រ ទទួលបានសេវា ព្យាបាលអនឡាញ”។

លោកស្រីបានថ្លែងបន្តថា ជាមួយនឹងក្តីសុបិន្ត ក្នុងការចូលរួមចំណែកកសាងប្រព័ន្ធសុខាភិបាល និងសេវាព្យាបាល បែបឌីជីថលក្នុងតំបន់មួយ យើងពិតជាមានមោទនៈភាពខ្លាំងណាស់ ដែលយើងបានចាប់ដៃគូជាមួយក្រុមហ៊ុន បច្ចេកវិទ្យាសុខាភិបាលថ្មីមានសក្តានុពលរបស់ប្រទេសសិង្ហបុរី Ssivix Lab ដែលជាក្រុមហ៊ុនកំពុងតែផ្តល់សេវាព្យាបាល និងថែទាំសុខភាពជាមួយសេវាពិសេសៗជាច្រើន ដើម្បីយកសេវាទាំងនោះមកដាក់បញ្ចូលគ្នាផ្តល់ឲ្យគ្លីនិក និងមន្ទីរពេទ្យ ដៃគូរបស់យើងនៅតែអាចបន្តផ្ដល់សេវាពិគ្រោះ និងព្យាបាលដល់អ្នកជំងឺជាប្រក្រតី ដោយពុំមានការរំខានពីមេរោគ សាកលវីរុសកូវីដ១៩។ អ្នកជំងឺនៅអាច ស្វែងរកសេវាព្យាបាល ដោយអស់ក្តីបារម្ភតាមរយៈកម្មវិធីសុខភាពឆ្លាតវៃ e-Health MyCLNQ លើទូរស័ព្ទដៃ ដែលជាកម្មវិធីគួរឲ្យទុកចិត្ត និងមានសុវត្ថិភាពបំផុតមួយ។

លោកស្រីបានបន្ថែមទៀតថា “អ្នកជំងឺអាចស្វែងរកសេវាពិគ្រោះ និងព្យាបាលឆ្លងប្រទេសបានផងដែរ ជាពិសេស សេវាពិគ្រោះជាមួយមន្ទីរពេទ្យ និងវេជ្ជបណ្ឌិតដៃគូនៅសិង្ហបុរី ឥណ្ឌា និងប្រទេសមួយចំនួនទៀតនៅក្នុងតំបន់អាស៊ី។ គ្លីនិក មន្ទីរពេទ្យ និងវេជ្ជបណ្ឌិតផ្តល់សេវាព្យាបាលដៃគូរបស់យើងក៏អាចមានឱកាស ផ្ដល់សេវាពិគ្រោះ និងព្យាបាល របស់ខ្លួនដល់អ្នកជំងឺទូទាំងតំបន់បានផងដែរ តាមរយៈការប្រកួតប្រជែតតំលៃ និងគុណភាព។ e-Health MyCLNQ ផ្ដោត ចំបងទៅលើការផ្ដល់ដំណោះស្រាយសេវាពិគ្រោះ ព្យាបាល និងប្រព័ន្ធសុខាភិបាលឌីជីថលក្នុងប្រទេសនៅអាស៊ី ប៉ុន្តែយើងផ្ដើមចេញដំណើរពីមូលដ្ឋានរឹងម៉ាំរបស់យើង ក្នុងប្រទេសកម្ពុជា សិង្ហបុរី ឥណ្ឌា និងតំបន់ទន្លេមេគង្គមុនគេ។”

ក្នុងការធ្វើដៃគូជំនួញរួមគ្នានេះផងដែរ សហស្ថាបនិក និងប្រធាននាយកប្រតិបត្តិរបស់ក្រុមហ៊ុន Ssivix Lab លោក Anwar Rafique បាននិយាយថា “ការចាប់ដៃគូជាមួយ ពេទ្យយើង នៃក្រុមហ៊ុន ហ្វឺស វិម៉ិនថិក អាស៊ា ជាឱកាសដ៏អស្ចារ្យ មួយសំរាប់ក្រុមការងារក្រុមហ៊ុន Ssivix Lab យើង ក្នុងការអនុវត្តផែនការពង្រីកចក្ខុវិស័យសុខាភិបាលរួមគ្នានៅកម្ពុជា ដែលជាផែនការពង្រីកវិសាលភាពរបស់យើងនៅក្នុងតំបន់ និងជាចក្ខុវិស័យសុខាភិបាលសម្រាប់តំបន់អាស៊ីរបស់ពួកយើង។

លោកបានបន្តថា ពួកយើងជឿជាក់ថានេះជាឱកាសដ៏កម្រមួយ និងចាំបាច់បំផុតបានអនុញ្ញាតិឲ្យពួកយើងបានចូលរួមចំណែក កសាងប្រព័ន្ធសុខាភិបាលឌីជីថលនៅប្រទេសកម្ពុជាកាន់តែទំនើប និងពេញលេញថែមទៀតជាមួយរាជរដ្ឋាភិបាល កម្ពុជា និងក្រសួងសុខាភិបាល និងផ្ដោតទៅលើការបំពេញតម្រូវការសេវាព្យាបាលរបស់អ្នកជំងឺជាអាទិ៍ភាព។”

លោក Anwar Rafique បានថ្លែងបញ្ជាក់ថា “ខ្ញុំជឿជាក់ថា e-Health MyCLINQ នឹងជួយឲ្យប្រជាជនកម្ពុជាទទួលបាននូវ សេវាពិគ្រោះ និងសេវាព្យាបាលកាន់តែឆ្លាតវៃជាងមុន ងាយស្រួលជាងមុន និងតំលៃសមរម្យបំផុតមួយ។ ជាមួយការប្រើ ប្រព័ន្ធដំណើរការដោយមានជំនួយពីបញ្ញាសិប្បនិម្មិត AI លើបច្ចេកវិទ្យាសុខាភិបាលរបស់យើង យើងអាចជួយឲ្យ អ្នកជំងឺអាចស្វែងរកសេវាព្យាបាលពីវេជ្ជបណ្ឌិតមកពីគ្រប់ទីកន្លែង និងអាចជ្រើសរើសយកសេវាព្យាបាលពីវេជ្ជបណ្ឌិត នៅតាមគ្លីនិក និងមន្ទីរពេទ្យនៅតំបន់របស់គាត់កំពុងតែរស់នៅ ឬនៅតំបន់នានានៅក្នុងស្រុក និងនៅក្រៅប្រទេស ដែល ពួកគាត់មានលទ្ធភាពចំណាយថ្លៃសេវាបាន។ e-Health MyCLINQ មិនត្រឹមតែជាប្រព័ន្ធភ្ជាប់ទំនាក់ទំនងផ្តល់សេវា ព្យាបាលប៉ុណ្ណោះទេ វាជាប្រព័ន្ធ នៃបណ្ដុំផ្ដល់សេវាថែទាំសុខភាពគ្រួសារចំរុះមួយ ដែលអាចជួយបំពេញនូវរាល់តំរូវការ សេវាថែទាំសុខភាពចាំបាច់នានា។
លោកក៏បានបញ្ជាក់ផងដែរ ថាបច្ចុប្បន្ននេះមានមនុស្សជាង ៨ ម៉ឺននាក់ និងអ្នកផ្ដល់ សេវាព្យាបាល និងថែទាំប្រមាណមួយពាន់នាក់ ដែលបានកំពុងតែប្រើ និងទទួលអត្ថប្រយោជន៍ពីកម្មវិធី MyCLNQ នៅក្នុងប្រទេសសិង្ហបុរី និងឥណ្ឌា។

ដំណោះស្រាយរួមគ្នា ដែលមានឈ្មោះថា e-Health MyCLNQ វាគឺជាសេវាកម្មប្រព័ន្ធផ្តល់ដំណោះស្រាយរួមគ្រប់ទិដ្ឋភាព ថែទាំសុខភាពដំបូងគេ និងជាដំណោះស្រាយដែលនឹងចូលរួមចំណែកផ្តល់សេវាពិគ្រោះព្យាបាល និងថែទាំមនុស្ស រាប់លាននាក់ និងមានវេជ្ជបណ្ឌិត អ្នកជំនាញផ្ដល់សេវាថែទាំសុខភាពរាប់សែននាក់នៅសិង្ហបុរី ឥណ្ឌា និងកម្ពុជា ហើយពេលដ៏ខ្លីខាងមុខនឹងឈានចូលទៅបណ្តាប្រទេសក្នុងអនុតំបន់ទន្លេមេគង្គផងដែរ។

លោកប៊ិន សុជាតិសហស្ថាបនិក ក្រុមហ៊ុន ហ្វឺស វីម៉ិនថេក អេស៊ា និងនាយកគ្រប់គ្រងប្រចាំប្រទេសកម្ពុជា នៃកម្មវិធី e-Health MyCLNQ បានលើកឡើងថា “e-Health MyCLNQ ជាជំរើស ដ៏មានសារៈប្រយោជន៍របស់ប្រជាពលរដ្ឋ និងអ្នកជំនាញវេជ្ជសាស្ត្រ ទាំងឡាយក្នុងការទទួលសេវាព្យាបាល និងថែទាំសុខភាព និងផ្ដល់សេវាព្យាបាល និងថែទាំសុខាភាពឆ្លាតវៃជាងមុន ងាយស្រួលជាងមុន និង សន្សំសំចៃច្រើនជាងមុន ក្រៅតែពីចូលរួមចំណែកកសាងប្រព័ន្ធសុខាភិបាលឌីជីថល និង សម្រួលដល់ការផ្តល់សេវាឲ្យប្រសើរជាមុនដោយពុំមានការរំខានដល់សង្វាកទទួល និងផ្តល់សេវាពិគ្រោះព្យាបាលនៅ កម្ពុជា នៅសហគមន៍អាស៊ាន និងនៅបណ្តាប្រទេសកំពុងអភិវឌ្ឍន៍នានា៕

ដោយៈឧត្តម

បាងកក: រដ្ឋាភិបាលថៃ នឹងចាក់បញ្ចូលថវិកា១៥,២ពាន់លានដុល្លារអាមេរិក ទៅក្នុងសេដ្ឋកិច្ចនៅឆមាសទី២ បន្ទាប់ពីខ្លួនបានអនុម័តកញ្ចប់ថវិកាស្ដារសេដ្ឋកិច្ច កាលពីថ្ងៃអង្គារ ទី១ មិថុនា ដើម្បីសម្រាលផលប៉ះពាល់ធ្ងន់ធ្ងរ ដែលបង្កឡើងដោយការឆ្លងរាត ត្បាតវីរុសកូវីដ-១៩ រលកទី៣។

យោងតាមសារព័ត៌មាន CNA ឱ្យដឹងថា ការផ្ទុះវីរុសកូវីដ-១៩ រលកចុងក្រោយនៅក្នុងប្រទេសជាសមាជិកអាស៊ាន មួយនេះបានបង្កការឆ្លងស្មើនឹងជាង៨០% នៃករណីឆ្លងសរុប ហើយស្មើនឹងជាង៩០%នៃករណីស្លាប់សរុប ហើយបានធ្វើឱ្យសកម្មភាពសេដ្ឋកិច្ចក្នុងប្រទេសនេះបង្អង់ល្បឿនយ៉ាងខ្លាំង។

លោកស្រី Kulaya Tantitemit ប្រធានការិយាល័យគោលនយោបាយសារពើពន្ធនៃក្រសួងហិរញ្ញវត្ថុថៃ បានថ្លែងក្នុងសន្និសីទសារព័ត៌មានថា “វិធានការនេះនឹងផ្ដលជំនួយគ្របដណ្តប់លើពលរដ្ឋចំនួន៥១លាននាក់ ជួយរក្សាអំណាចទិញ និងគាំទ្រដល់សេដ្ឋកិច្ចក្នុងឆមាសទី២ នៃឆ្នាំ២០២១”។

កាលពីខែមុន ទីភ្នាក់ងាររៀបចំផែនការរដ្ឋ បានកាត់បន្ថយការព្យាករអំពីកំណើនសេដ្ឋកិច្ចឆ្នាំ២០២១ របស់ខ្លួនពី២,៥% ទៅ៣,៥% មកនៅត្រឹម១,៥%ទៅ២,៥%ដោយសារការផ្ទុះការឆ្លងរលកថ្មី។

យោងតាមលោក Sethaput Suthiwartnarueput ទេសាភិបាលនៃធនាគារកណ្តាលថៃ (Bank of Thailand) បានឱ្យដឹងថា ទម្រាំតែសេដ្ឋកិច្ចធំបំផុតទី២ របស់អាស៊ាន មួយនេះ អាចវិលទៅរកកម្រិតល្អប្រសើរ ដូចមុនពេលផ្ទុះវិបត្តិកូវីដ-១៩ យ៉ាងហោចណាស់ក៏នៅត្រីមាសទី១ ដើមឆ្នាំ២០២៣ដែរ ពោលគឺយូរជាងការព្យាករលើកមុន៕

ដោយៈ ម៉ាណេត

ភ្នំពេញៈ ការដោះស្រាយផលប៉ះពាល់ ក្នុងការសាងសង់ផ្លូវល្បឿនលឿន ភ្នំពេញ-ក្រុងព្រះសីហនុ សម្រេចបាន៩៩,៩% ខណៈវឌ្ឍនភាពគម្រោងសាងសង់ផ្លូវល្បឿនលឿន ភ្នំពេញ-ក្រុងព្រះសីហនុប្រវែង១៨៧,០៥០គីឡូម៉ែត្រសម្រេចបាន៥១,៣៥%ហើយ។

នេះបើយោងតាមការសេចក្តីប្រកាសព័ត៌មានរបស់ ក្រសួងសាធារណការ និងដឹកជញ្ជូននៅថ្ងៃទី២ ខែមិថុនា ឆ្នាំ២០២១។

ក្រសួងបានឱ្យដឹងថា គម្រោងសាងសង់ផ្លូវល្បឿនលឿនភ្នំពេញ -ក្រុងព្រះសីហនុ ប្រវែងសរុបជាង១៩០គីឡូម៉ែត្រតភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ សម្រេចបានប្រមាណ ៥១,៣៥% ហើយ តាមកិច្ចសន្យា គ្រោងបញ្ចប់នៅថ្ងៃទី៣១ ខែឧសភា ឆ្នាំ២០២៣។

ក្រសួងបានឱ្យដឹងបន្តថា “ចំពោះការដោះស្រាយផលប៉ះពាល់ ក្នុងការសាងសង់ផ្លូវល្បឿនលឿន ភ្នំពេញ-ក្រុងព្រះសីហនុ សម្រេចបាន៩៩,៩% ស្មើនឹង១៨៦,៨៦គីឡូ ម៉ែត្រហើយ គិតត្រឹមថ្ងៃទី២៨ ខែឧសភា ឆ្នាំ២០២១ ហើយក្រសួងកំពុងតែខិតខំប្រឹងប្រែងធ្វើការដោះស្រាយបញ្ហា ដែលនៅសេសសល់ឱ្យបានរួចរាល់ក្នុងពេលឆាប់ៗនេះ”។

ទោះបីជាប្រទេសកម្ពុជា ប្រឈមនឹងការរីករាលដាលនៃជំងឺកូវីដ-១៩ យ៉ាងណាក៏ដោយ ក៏ដំណើរការសាងសង់ផ្លូវល្បឿនលឿននេះ នៅតែបន្តដំណើរការដដែល មិនមានការប៉ះពាល់នោះទេ ដោយសារតែក្រុមការងារ បុគ្គលិក កម្មករទាំងអស់ បានខិតខំប្រឹងប្រែងតស៊ូជំនះនូវស្ថានភាពដ៏លំបាកនេះបាន។

គម្រោងសាងសង់ផ្លូវល្បឿនលឿនភ្នំពេញ- ក្រុងព្រះសីហនុ ឆ្លងកាត់រាជធានីភ្នំពេ ញ៨,៣០គីឡូម៉ែត្រ ខេត្តកណ្តាល៩,១០គីឡូម៉ែត្រ ខេត្តកំពង់ស្ពឺ៨០,៨០គីឡូម៉ែត្រ ខេត្តកោះកុង១,៩២គីឡូម៉ែត្រ និងខេត្តព្រះសីហនុ៨៩,៨៩គីឡូម៉ែត្រ ចំណាយថវិកាសាងសង់សរុបប្រមាណ២.០០០លានដុល្លារអាមេរិក ជាទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន (CRBC) តាមរយៈក្រុមហ៊ុន Cambodian PPSHV Expressway Co., Ltd។

ទទឹងតួផ្លូវសរុបនៃគម្រោងខាងលើ នឹងត្រូវសាងសង់រហូតដល់២៤,៥ម៉ែត្រ ក្រាលបេតុងកៅស៊ូ (AC) កម្រាស់១០សង់ទីម៉ែត្រ ទទឹង២៣ម៉ែត្រ ដែលក្នុងនោះរួមមាន គន្លងផ្លូវធ្វើចរាចរណ៍សម្រាប់រថយន្ដ ទទឹង១៥ម៉ែត្រ ចែកជា៤គន្លង (២គន្លងទៅ ២គន្លងមក) ដែលគន្លងនីមួយៗ មានទទឹង៣,៧៥ម៉ែត្រ អាចឱ្យយានយន្ត គ្រប់ប្រភេទបើកបរក្នុងល្បឿនរហូតដល់១០០គីឡូម៉ែត្រក្នុងមួយម៉ោង និងកន្លែងខ្លះអាចដល់១២០គីឡូម៉ែត្រ ក្នុងមួយម៉ោង។

ខឿនសួនចែកទិសចរាចរណ៍នៅចំកណ្តាលទ្រូងផ្លូវ ទទឹង៣ម៉ែត្រ ចិញ្ចើមផ្លូវក្រាលបេតុងកៅស៊ូទទឹង២,៥០ម៉ែត្រសងខាង និងចិញ្ចើមផ្លូវក្រាលគ្រួសក្រហមទទឹង០,៧៥ម៉ែត្រសងខាង។

មានការសាងសង់លូគ្រប់ប្រភេទចំនួន២៦៣កន្លែង ស្ពានតូច៥កន្លែង ប្រវែងសរុ ប១០៥ម៉ែត្រ ស្ពានធំ និងស្ពានមធ្យម៨០កន្លែង ប្រវែងសរុប៦០១៥ម៉ែត្រ។ សាងសង់ផ្លូវប្តូរទិសចរាចរណ៍ចំនួន៧កន្លែង ផ្លូវប្រសព្វ២៨កន្លែង ផ្លូវក្រោមផ្លូវល្បឿនលឿន២៣៧កន្លែង និងស្ពានរំលងផ្លូវ ២០កន្លែង។

សាងសង់តំបន់សេវាកម្ម ឬចំណតឈប់សម្រាកចំនួន៣កន្លែង ចំណតរថយន្ត១កន្លែង មណ្ឌលប្រតិបត្តិការ និងថែទាំផ្លូវ ៤កន្លែង និងបញ្ជរបង់ប្រាក់៩កន្លែង។

បំពាក់គ្រឿងបរិក្ខារផ្លូវថ្នល់ដែលរួមមាន ផ្លាកសញ្ញាចរាចរណ៍ ភ្លើងសញ្ញាចរាចរណ៍ និងគំនូសសញ្ញាចរាចរណ៍ផងដែរ៕