ដោយៈ ម៉ាណេត

ភ្នំពេញៈ ស្ថានទូតអូស្ត្រាលីប្រចាំនៅប្រទេសកម្ពុជា នឹងគាំទ្រដល់កម្ពុជាក្នុងការផលិតថាមពលពន្លឺព្រះអាទិត្យ រហូតដល់៤៥០មេហ្គាវ៉ាត់ នៅកម្ពុជានាឆ្នាំ២០២២ ។ នេះបើយោងតាមការសេចក្តីប្រកាសព័ត៌មាន របស់ស្ថានទូតអូស្ត្រាលីប្រចាំនៅប្រទេសកម្ពុជា ដែលគេទំហ័រ Propertyarea.asia ទទួលបាននៅថ្ងៃទី១ ខែមិថុនានេះ។

ប្រទេសកម្ពុជាមានពន្លឺព្រះអាទិត្យច្រើន ដែលអាចប្រើដើម្បីផលិតថាមពលពន្លឺព្រះអាទិត្យរហូតដល់៤៤.០០០មេហ្គាវ៉ាត់។ នេះបើយោងតាមការសិក្សាដែលឧបត្ថម្ភដោយរដ្ឋាភិបាលអូស្ត្រាលី។

ព្រះអាទិត្យគឺជាប្រភពថាមពលមួយ ក្នុងចំណោមថាមពលនានា ដែលសន្សំសំចៃបំផុត និងមិនប៉ះពាល់បរិស្ថាន នៅលើផែនដី។

រដ្ឋាភិបាលកម្ពុជា បានទទួលយកថាមពលពន្លឺព្រះអាទិត្យ កម្រិតសំរាប់ប្រើប្រាស់ជាអាស្រ័យ និងប្តេជ្ញាដំឡើងថាមពលពន្លឺព្រះអាទិត្យចំនួន៤៥០មេហ្គាវ៉ាត់ នៅត្រឹមឆ្នាំ២០២២។

អូស្ត្រាលីសូមសរសើរចំពោះគោលដៅនេះ ហើយកម្មវិធីវិនិយោគលើវិស័យហេដ្ឋារចនាសម្ព័ន្ធរបស់យើង ជាមួយថវិកា៤៩លានដុល្លាអូស្ត្រាលី (ប្រមាណ៣៤,៨លានដុល្លារ) កំពុងជួយវាយតម្លៃ សក្តានុពលថាមពលកកើតឡើងវិញ របស់ប្រទេសនេះ រាប់ទាំងថាមពលពន្លឺព្រះអាទិត្យ និងខ្យល់ ព្រមទាំងរៀបចំយុទ្ធសាស្ត្រថាមពល កកើតឡើងវិញជាលើកដំបូងរបស់កម្ពុជាផងដែរ៕

ដោយៈគង់ សូរិយា

អន្តរជាតិៈ បន្ទាប់ពីការទន្ទឹងរង់ចាំយ៉ាងយូរ ទីបំផុតអង្គការសុខភាពពិភពលោកបានសម្រេចទទួលស្គាល់វ់ាក់សាំងបង្ការជំងឺកូវីដ១៩ Sinovac ដែលផលិតនៅប្រទេសចិនហើយ។

អង្គការសុខភាពពិភពលោក (WHO) នៅថ្ងៃអង្គារនេះ បានសម្រេចចុះបញ្ជីទទួលស្គាល់ជាផ្លូវការ នូវវ៉ាក់សាំងបង្ការជំងឺកូវីដ១៩ចិន Sinovac សម្រាប់ប្រើប្រាស់ជាបន្ទាន់។ នេះបើយោងតាមការចេញផ្សាយ ដោយសារព័ត៌មាន CGTN នៅយប់ថ្ងៃអង្គារ ទី១ ខែមិថុនា ឆ្នាំ២០២១កន្លងមកនេះ។

ប្រទេសចិនមានក្រុមហ៊ុនផលិតវ៉ាក់សាំងបង្ការជំងឺកូវីដ១៩ចំនួនពីរ គឺក្រុមហ៊ុនផលិតវ៉ាក់សាំង Sinopham និងក្រុមហ៊ុនផលិតវ៉ាក់សាំងបង្ការជំងឺកូវីដ១៩ឈ្មោះ Sinovac ដែលវ៉ាក់សាំងទាំងពីរនេះ ត្រូវបានចែកចាយទូលំទូលាយនៅទូទាំងពិភពលោក ហើយវ៉ាក់សាំងទាំងពីរនេះ មិនមានរឿងអាស្រូវណាមួយលេចឡើងនោះទេ៕

ដោយៈ សុខុម

ក្រុងរីយ៉ាដ: យោងតាមរបាយការណ៍ថ្មីមួយបង្ហាញថា ប្រទេសអារ៉ាប់ប៊ីសាអូឌីត នឹងក្លាយជាទីផ្សារធំបំផុតក្នុងតំបន់មជ្ឈិមបូព៌ា សម្រាប់គម្រោងអភិវឌ្ឍន៍ថ្មីៗប្រចាំឆ្នាំ២០២១ ជាមួយនឹងទំហំវិនិយោគរហូត ដល់ទៅប្រមាណ៣៥ពាន់លានដុល្លារ។ នេះបើយោងតាមសារព័ត៌មាន Arab News ចុះផ្សាយកាលពីថ្ងៃទី៣១ ឧសភា។

ក្រុមហ៊ុនវិនិយោគ KAMCO Invest និយាយថា ទីផ្សារគម្រោងអភិវឌ្ឍន៍របស់ក្រុមប្រឹក្សាប្រតិបត្ដិឈូងសមុទ្រ (Gulf Cooperation council) បានងើបឡើងវិញយ៉ាងរឹងមាំ និងឆាប់រហ័សអំឡុងត្រីមាសទី១ ដើមឆ្នាំ២០២១ ដោយគម្រោងដែលទទួលបានកើនឡើងលើសពីទ្វេដង ក្នុងកម្រិតត្រីមាសធៀបត្រីមាសដល់២៦,៣ពាន់លានដុល្លារ។

ភាគច្រើន ការកើនឡើងនេះបណ្ដាលមកពីគម្រោង ដែលនៅពុំទាន់សម្រេចក្នុងឆ្នាំ២០២០ ហើយគម្រោងទាំងនោះបានចាប់ផ្ដើមឡើងវិញ ស្របពេលតំបន់កំពុងបង្កើនកិច្ចប្រឹងប្រែងចាក់វ៉ាក់សាំងកូវីដ-១៩។
ទំហំគម្រោងនានាដែលបានគ្រោងទុក និងស្ថិតក្រោមការអនុវត្តក្នុងក្រុមប្រឹក្សាប្រតិ​​បត្ដិឈូងសមុទ្រ (Gulf Cooperation council) គឺរក្សានៅទំហំប្រមាណ១,៧ទ្រីលានដុល្លារ ដដែលចាប់តាំងពីឆ្នាំ២០១៧ ។

ប្រទេសអារ៉ាប់ប៊ីសាអូឌីត និងប្រទេសអារ៉ាប់រួមអេមីរ៉ាត បានគ្របដណ្ដប់ជាង៨៤%នៃទីផ្សារសរុបក្នុងរយៈពេល២ឆ្នាំចុងក្រោយនេះ។

ប្រទេសអារ៉ាប់ប៊ីសាអូឌីត នៅតែជាទីផ្សារធំបំផុត ជាមួយគម្រោងក្នុងទំហំទឹកប្រាក់១,២ទ្រីលានដុល្លារ ដែលវិនិយោគលើបំពង់បង្ហូរប្រេង ឬឧស្ម័ន បន្ទាប់មកគឺប្រទេសអារ៉ាប់រួមអេមីរ៉ាត ជាមួយនឹងទំហំវិនិយោគ៦៥២ពាន់លានដុល្លារ ហើយប្រទេសកូវែត ជាមួយនឹងទំហំវិនិយោគ១៨៧ពាន់លានដុល្លារ៕

ដោយៈ ម៉ាណេត

ភ្នំពេញៈ ប្រជាជនកម្ពុជាចំនួន៤៤ភាគរយ បានកាត់បន្ថយការកាន់សាច់ប្រាក់សុទ្ធជាប់ខ្លួន បើប្រៀបធៀបជាមួយមុនពេលមានការរាលដាលនៃជំងឺកូវីត។ នេះបើយោងតាមការសិក្សាស្តីពី ឥរិយាបថទូទាត់ប្រាក់របស់អតិថិជនរបស់ក្រុមហ៊ុនVisa ដែលជាក្រុមហ៊ុនបច្ចេកវិទ្យាទូទាត់តាមប្រព័ន្ធឌីជីថល ឈានមុខគេនៅក្នុងពិភពលោកនៅថ្ងៃទី១ ខែមិថុនា ឆ្នាំ២០២១។

យោងតាមទិន្នន័យរបស់ Visa បានឱ្យដឹងថា ទំនោរនៃការទូទាត់ តាមរយៈបច្ចេកវិទ្យា contactless កំពុងមានកំណើននៅក្នុងប្រទេសកម្ពុជា អតិថិជន២នាក់ ក្នុងចំណោម៣នាក់ (ស្មើរនឹង៧១ភាគរយ)បានប្រើប្រាស់ប្រតិបត្តិការបច្ចេកវិទ្យា Contactless2 របស់ Visa។ ពីមួយឆ្នាំទៅមួយឆ្នាំ កំណើននៃគុណតម្លៃរបស់ប្រតិបត្តិការ ពាណិជ្ជកម្មអេឡិចត្រូនិច មានការកើនឡើងបួនដង បើគិតចាប់ពីត្រីមាសចុងក្រោយនៃឆ្នាំ២០២០ រហូ​តដល់ត្រីមាស ទី១ នៃឆ្នាំ២០២១៣។

តាមការសិក្សាចុងក្រោយរបស់ក្រុមហ៊ុន Visa ស្តីអំពីឥរិយាបថក្នុងការទូទាត់ប្រាក់របស់អតិថិជន បានបង្ហាញសញ្ញាណនៃនិន្នាការថ្មីដែលបញ្ជាក់ថា ពេលនេះ គឺជាពេលវេលាដ៏សាកសមបំផុត សម្រាប់ការផ្លាស់ប្តូរនូវទម្លាប់ក្នុងការការទូទាត់ប្រាក់។ បើតាមការឆ្លើយតបរបស់អ្នកចូលរួមស្ទង់មតិ អត្ថប្រយោជន៍ចម្បងមួយចំនួនរបស់សង្គម ដែលមិនប្រើប្រាស់សាច់ប្រាក់សុទ្ធ រួមមាន ការកាត់បន្ថយហានិភ័យ នៃការរីករាលដាលការឆ្លងមេរោគ (រហូតដល់ទៅ៣៤ភាគរយ) ការជម្រុញឱ្យមានការធ្វើបរិយាបន្នហិរញ្ញវត្ថុ (៣២ ភាគរយ) ការបង្កើនប្រសិទ្ធិភាពសង្គម និងការរំខានតិចជាងមុន (២៩ភាគរយ សម្រាប់២កត្តាចុងក្រោយ)។

អ្នកស្រីជុំ ម៉ូនីកានាយិកាគ្រប់គ្រងក្រុមហ៊ុន Visa ប្រចាំប្រទេសកម្ពុជា បានមានប្រ​សាសន៍ថា “ក្នុងកំឡុងពេលដ៏លំបាកនេះ យើងគួរតែពិនិត្យមើលវិធីសាស្រ្ត ដើម្បីអភិវឌ្ឍការទូទាត់ ដោយមិនប្រើសាច់ប្រាក់សុទ្ធនៅទូទាំងប្រទេស”។ អ្នកស្រីបន្តថា “ខណៈពេលដែលសាច់ប្រាក់សុទ្ធ នៅតែបន្តជាជម្រើសដ៏ពេញនិយម សម្រាប់ប្រជាជនកម្ពុជាភាគច្រើននោះ ឥឡូវនេះគឺជាពេលវេលាដ៏សមស្របមួយ ដើម្បីលើកកម្ពស់ការយល់ដឹងក្នុងចំណោមសហគមន៍ តាមរយៈការផ្សព្វផ្សាយពីភាពងាយស្រួល រហ័ស និងមានសុវត្ថិភាព តាមរយៈការប្រើប្រាស់ការទូទាត់សាច់ប្រាក់តាមប្រព័ន្ធឌីជីថល”។

សន្ទុះនៃកំណើនការទូទាត់ដោយមិនប្រើសាច់ប្រាក់សុទ្ធ ត្រូវបានជំរុញដោយការទូទាត់តាមរយៈបច្ចេកវិទ្យាQR កូដ និងការទូទាត់តាមរយៈការប្រើប្រាស់កាត នៅក្នុងចំណោមអ្នកប្រើប្រាស់កម្ពុជា។ ការកើនឡើងទាំងនេះ គឺស្របពេលជាមួយនឹងការចាប់អារម្មណ៍កាន់តែខ្លាំងឡើង នៅក្នុងជម្រើសនៃការទូទាត់ ដោយប្រើប្រាស់វិធីសាស្ត្រផ្សេងៗទៀតផងដែរ។

ការកើនឡើងទាំងនេះ ស្របជាមួយនឹងការចាប់អារម្មណ៍កាន់តែខ្លាំង ពីជម្រើសនៃការទូទាត់។ ការទូទាត់តាមរយៈបច្ចេកវិទ្យា QR កូដ ត្រូវបានគេមើលឃើញថា មានការកើនឡើងក្នុងចំណោមអតិថិជន ដែលមានទំនោរមិនចង់យកសាច់ប្រាក់សុទ្ធតាមខ្លួនច្រើន ជាពិសេសការទូទាត់វិក្កយបត្រ នៅពេលទិញគ្រឿងឧបភោគបរិភោគ និងការទទួលទាននៅតាមភោជនីយដ្ឋាន (ទាំងពីរនេះកើនឡើងប្រមាណ ២៥ ភាគរយ)។

សូចនាករនៅពីក្រោយការកើនឡើងនេះ គឺដោយសារតម្រូវការប្រជាជនមានការកើនឡើង ក្នុងការការការពារសុវត្ថិភាពពីជំងឺរាតត្បាត COVID-19 ដែលកំពុងតែរីករាលដាល នៅក្នុងនោះដែរចំនួនប្រជាជន ដែលប្រើសាច់ប្រាក់សុទ្ធ ក៏ត្រូវបានគេមើលឃើញថា មានការធ្លាក់ចុះ៨ភាគរយ បើប្រៀបធៀបនឹងការកើនឡើង ក្នុងចំណោមអ្នកប្រើប្រាស់ដែលបានជ្រើសរើសប្រើបច្ចេកវិទ្យាQR កូដ ដើម្បីធ្វើការទូទាត់ មានរហូតដល់ទៅ ៤៤ ភាគរយ។

អ្នកស្រីជុំ ម៉ូនីកាបន្ថែមទៀតថា “យើងដឹងថាអតិថិជនរំពឹងចង់បាន ការទូទាត់ប្រាក់ដែលមានសុវត្ថិភាព រហ័ស និងមានភាពងាយស្រួល នោះហើយជាមូលហេតដែលការទូទាត់ប្រាក់តាមរយៈបច្ចេកវិទ្យា contactless បានក្លាយជាជម្រើសសម្រាប់ការទូទាត់លើប្រតិបត្តិការដែលមានទំហំតូច និងការចំណាយប្រចាំថ្ងៃ”។

អ្នកស្រីបានថ្លែងបន្តថា នៅពេលដែលការទូទាត់តាមរយៈបច្ចេកវិទ្យា contactless ត្រូវបានដាក់ឱ្យប្រើប្រាស់នៅ តាមទីកន្លែងដែលប្រជាជន ទៅទិញទំនិញជាប្រចាំ ដូចជាបណ្តារផ្សារទំនើប ហាងលក់ទំនិញ និងស្ថានីយ៍ប្រេងឥន្ធនៈ ការទូទាត់ដោយប្រើបច្ចេកវិទ្យា contactless នឹងក្លាយជាវិធីសាស្ត្រទូទាត់ ប្រក្រតីភាពមួយយ៉ាងឆាប់រហ័ស សម្រា​ប់ប្រតិបត្តិការទូទាត់ ដែលតម្រូវឱ្យមានការប្រាស្រ័យជួបគ្នារវាងបុគ្គល។ នេះគឺជាឱកាសមួយសម្រាប់ Visa ដើម្បីសហការជាមួយដៃគូរបស់យើង ដើម្បីបង្កើនការទូទាត់ប្រាក់ដោយប្រើបច្ចេកវិទ្យា contactless នៅទូទាំងប្រទេស៕

ដោយៈគង់ សូរិយា

ភ្នំពេញៈ អនុរដ្ឋមន្ត្រីក្រសួងការបរទេសសហរដ្ឋអាមេរិក លោកជំទាវ Wendy R. Sherman បានសម្តែងក្តីពេញចិត្តចំពោះកម្ពុជា និងអាមេរិក ពិសេសការដែលសម្តេចតេជោហ៊ុន សែនអនុញ្ញាត្តឲ្យកប៉ាល់ Westerdam ចូលចតនៅកំពង់ផែព្រះសីហនុ។

ក្នុងជំនួបជាមួយសម្តេចតេជោកាលពីល្ងាចថ្ងៃទី១ មិថុនាកន្លងមក លោកជំទាវ Wendy R. Sherman បានជម្រាបជូនសម្តេចតេជោថា ដំណើរទស្សនកិច្ចរបស់លោកជំទាវមកកាន់ប្រទេសកម្ពុជានាពេលនេះ គឺដើម្បីពាំនាំនូវលិខិតរបស់ ឯកឧត្តមប្រធានា​ធិបតី Joe Biden គោរពជូនសម្ដេចតេជោនាយករដ្ឋមន្ត្រី នៃព្រះរាជាណាចក្រកម្ពុជា។ លោកជំទាវក៏បានបន្ថែមថា នេះគឺជាបំណងរបស់ ឯកឧត្តមប្រធានាធិបតី សហរដ្ឋអាមេរិក ក្នុងន័យធ្វើយ៉ាងណាឱ្យអ្វីៗ មានភាពល្អប្រសើរសម្រាប់ប្រទេសទាំងពីរ។

លោកជំទាវ ក៏បានសម្ដែងនូវការពេញចិត្ត ចំពោះកិច្ចសហប្រតិបត្តិការរវាងកម្ពុជា និងសហរដ្ឋអាមេរិកកន្លងមកលើវិស័យជាច្រើន ជាពិសេសលើការរុករកអដ្ឋិធាតុទាហានអាមេរិកដែលបាត់ខ្លួន នៅក្នុងប្រទេសកម្ពុជា កិច្ចសហប្រតិបត្តិការប្រយុទ្ធប្រឆាំងនឹងភេរវកម្ម កិច្ចសហប្រតិបត្តិការលើវិស័យមនុស្សធម៌ ដូចជា អនុញ្ញាតឲ្យនាវា Wasterdam ចូលចតនៅក្នុងប្រទេសកម្ពុជា ដើម្បីជួយសង្គ្រោះប្រជាជន ដែលជាប់នៅលើនាវាដោយប្រទេសដទៃទៀត មិនអនុញ្ញាតឱ្យចុះចត ដោយសារបញ្ហាជំងឺកូវីដ១៩នោះ។

លោកជំទាវ ក៏បានគោរពជម្រាបជូនសម្ដេចតេជោ អំពីឱកាសនៃកិច្ចសហប្រតិបត្តិការរវាងប្រទេសទាំងពីរ ដែលរួមមានទាំងការលុបបំបាត់បំណុលរបស់កម្ពុជា កិច្ចសហប្រតិបត្តិការលើប្រេង និងឧស្ម័ន និងការវិនិយោគរបស់សហរដ្ឋអាមេរិក លើបញ្ហាទឹក បញ្ហាហេដ្ឋារចនាសម្ព័ន្ធ បញ្ហាថាមពលបៃតង និងបញ្ហាដទៃទៀតជាច្រើន។

ជាការឆ្លើយតប សម្ដេចតេជោ ហ៊ុន សែន បានសម្ដែងនូវក្តីរីករាយចំពោះអ្វីដែលលោកជំទាវបានលើកឡើង និងអ្វីដែលសហរដ្ឋអាមេរិក បានចូលរួមចំណែកជួយដល់កម្ពុជា រួមមានការចូលរួមចំណែក ក្នុងការស្វែងរកសន្តិភាពនៅកម្ពុជា ការចូលរួមចំណែកអភិវឌ្ឍកម្ពុជារហូតមកដល់ពេលនេះ និងការចូលរួមចំណែករបស់សហរដ្ឋអាមេរិកជួយដល់កម្ពុជាដោយផ្ទាល់ និងដោយប្រយោល តាមរយៈអង្គការ WHO ក្នុងការប្រយុទ្ធឆាំងជំងឺរាតត្បាតកូវីដ១៩។

សម្ដេចតេជោ ក៏បានសំដែងនូវការអបអរសាទរជូនដល់ប្រជាជន រដ្ឋាភិបាលសហរដ្ឋអាមេរិក ដែលបានទប់ស្កាត់ជំងឺកូវីដ១៩ បានជោគជ័យដែលជាការឆ្លុះបញ្ចាំងរយៈពេលប៉ុន្មានថ្ងៃខាងមុខនេះ គឺមានការចុះថយ នៃការរីករាយកណ្ដាលឆ្លងជម្ងឺកូវីដ១៩ នៅសហរដ្ឋអាមេរិកគួរជាទីកត់សម្គាល់ផងដែរ។

សម្ដេចតេជោនាយករដ្ឋមន្ត្រី ក៏បានថ្លែងអំណរគុណលោកជំទាវផងដែរ ក្នុងឱកាសដែលលោកជំទាវ Wendy R. Sherman បានអញ្ជើញបំពេញទស្សនកិច្ចនៅក្នុងប្រទេសកម្ពុជានាពេលនេះ ជាពិសេសអ្វីដែលលោកជំទាវបានលើកឡើង ដូចជា ការដោះស្រាយបំណុល សម្ដេចតេជោបានស្នើឲ្យសហរដ្ឋអាមេរិក ជាពិសេសឯកឧត្តមប្រធានាធិបតី Joe Biden ពិនិត្យពិចារណាដោះស្រាយបំណុល ដែលកម្ពុជាមានចំពោះសហរដ្ឋអាមេរិក តាមវិធីទ្វេរភាគី ទី១) អនុញ្ញាតឲ្យកម្ពុជាសងប្រាក់បំណុលនេះ តាមកម្មវិធីសងឡើងវិញបន្តិចម្ដងៗ ។

ទី២) សងបំណុលតាមកម្មវិធីដែលមាន ការប្រាក់មិនលើសពី១ភាគរយ និងទី៣) បំណុលដែលកម្ពុជា ជំពាក់សហរដ្ឋអាមេរិកគឺសំណងចំនួន ៧០% ត្រូវបង្វិលមកធ្វើជាជំនួយដល់កម្ពុជាវិញទៅលើវិស័យអប់រំ វិស័យវប្បធម៌ វិស័យដោះមីន និងយុទ្ធភណ្ឌមិនទាន់ផ្ទុះជាដើម។

លើសពីនេះទៅទៀតសម្ដេចតេជោ ក៏សូមស្នើឲ្យសហរដ្ឋអាមេរិកពិនិត្យឡើងវិញនូវកិច្ចសហប្រតិបត្តិការលើការបញ្ជូន ជនជាតិកម្ពុជាពីសហរដ្ឋអាមេរិកមកកម្ពុជាវិញ។

ជាការឆ្លើយតប លោកជំទាវ ក៏បានថ្លែងអំណរគុណចំពោះ សម្ដេចតេជោនាយករដ្ឋមន្ត្រី រាល់កិច្ចសហប្រតិបត្តិការ ហើយលោកជំទាវសន្យាថា អ្វីដែលជាការលើកឡើងរបស់ សម្ដេចតេជោ ដែលជាសំណើនេះ លោកជំទាវនឹងជម្រាបជូនឯកឧត្តមប្រធានា​ធិបតី Joe Biden៕