ដោយៈ ម៉ាណេត

ភ្នំពេញៈ អ្នកជំនាញបានលើកឡើថា វិស័យអចលនទ្រព្យនៅក្បែរព្រលានយន្តហោះអន្តរជាតិភ្នំពេញថ្មី នៅតែមានតម្រូវការច្រើនពីសំណាក់វិនិយោគជាតិ និងអន្តរជាតិ ខណៈតំបន់នេះ នៅតែផ្តល់ឱកាសចំណេញដល់វិនិយោគិន ពីការវិនិយោគនៅតំបន់។

លោកខាត់ សុវណ្ណអគ្គនាយកក្រុមហ៊ុនCamtop Perperty Group Co.,Ltd បានថ្លែងប្រាប់ថ្លែងប្រាប់នៅថ្ងៃទី១ ខែមិថុនា ឆ្នាំ២០២១ ថា ដីធ្លីនៅភាគច្រើនត្បូង ពិសេសនៅតាមផ្លូវ ទៅព្រលានយន្តហោះអន្តរជាតិភ្នំពេញថ្មី នៅតែមានតម្រូវការច្រើន ព្រោះវិនិយោគិន មើលឃើញពីឱកាសចំណេញច្រើន បន្ទាប់ពីព្រលានយន្តហោះធ្វើរួចរាល់ និងផ្លូវមួយចំនួនស្ថាបនារួចរាល់ វាហួចផលចំណេញបានច្រើន។

លោកបានឱ្យដឹងថា “បច្ចុប្បន្ន យើងឃើញមានវិនិយោគិនមានពីរប្រភេទ គឺអ្នកវិនិយោគលើដីធ្លីទុកសម្រាប់លក់យកចំណេញ និងវិនិយោគទិញដីធ្លី ដើម្បីសាងសង់គម្រោងអចលលនទ្រព្យរយៈពេលវែង ប៉ុន្តែក្នុងរយៈពេលចុងក្រោយនេះ អំឡុងពេលកូវី១៩នេះ មិនមានអ្នកទិញ សម្រាប់ទុកចំណេញនោះទេ ពោលគឺមានតែទិញសម្រាប់គម្រោងសាងសង់ និងវិនិយោគសម្រាប់រយៈពេលវែង”។

លោកខាត់ សុវណ្ណបានឱ្យដឹងទៀតថា តំបន់ព្រលានអន្តរជាតិភ្នំពេញថ្មីនេះ គឺជាតំបន់មិនទាន់ច្នៃ ដូច្នេះតំបន់ណក៏ដោយ ដែលមិនកែច្នៃ នឹងផ្តល់ឱកាសចំណេញច្រើន។

លោកបានថ្លែងថា តម្លៃដីនៅតាមផ្លូវមេធំៗ អាចរកទិញបានក្នុងតម្លៃចន្លោះពី២០០ ទៅ២៥០ដុល្លារក្នុងម៉ែត្រការ៉េ អាស្រ័យលើស្ថានភាពផ្លូវ និងនៅតាមផ្លូវខាងក្នុងតូចៗ ដែលមិនទាន់មានការអភិវឌ្ឍ នៅមានតម្លៃចន្លោះពី៥០ដុល្លារ ដល់៨០ដុល្លារក្នុងមួយម៉ែត្រការ៉េ ហើយដីវាលស្រែ ដែលអត់មានផ្លូវចូល អាចរកទិញបានក្នុងតម្លៃចន្លោះពី២០ទៅ៥០ ហើយតម្លៃដីធ្លីមិនមានការប្រែប្រួលនោះទេ ទោះស្ថិតក្នុងវិបត្តិកូវិដ១៩ក៏ដោយ។

លោកបានបន្តថា បើទោះបីជាបច្ចុប្បន្ន យើងឃើញតំបន់នេះនៅតែសម្បូរដោយទីវាល និងដីស្រែក៏ពិតមែន ប៉ុន្តែនាពេលខាងមុខ តំបន់នឹងក្លាយជាទីក្រុងថ្មីមួយ ដែលពោពេញទៅដោយការអភិវឌ្ឍគម្រោងអចលនទ្រព្យបែបចម្រុះ។

លោក David Pen នាយកផ្នែកលក់ និងជួលក្រុមហ៊ុនCBRE Cambodia មានប្រសាសន៍ថា មានគម្រោងរាប់រយ ដែលកំពុងអភិវឌ្ឍនៅទូទាំងទីក្រុង ក្នុងរយៈពេល៥ឆ្នាំកន្លងមកនេះ ប៉ុន្តែតំបន់ដែលធ្វើឲ្យលោកកត់សម្គាល់ខ្លាំងជាងគេ គឺការកើនឡើងខ្លាំងនៅតំបន់ភាគខាងត្បូងនៃទីក្រុងភ្នំពេញ។

លោក David បានលើកឡើងពីអាកាសយានដ្ឋានអន្តរជាតិភ្នំពេញថ្មី ដែលជាកាត្តាលីករ អមជាមួយនឹងគម្រោង Aeon 3 ផ្លូវក្រវ៉ាត់ក្រុងទី៣ និងវត្តមានអាជីវកម្មធំៗ ជាច្រើនទៀត ដែលជាគម្រោងលំនៅដ្ឋាន ដែលជំរុញឱ្យតម្លៃដីធ្លី និងតម្លៃអចលនទ្រព្យកើនឡើងនៅភាគខាងត្បូង។

លោកបានសន្និដ្ឋានថា “មិនមានអ្វីគួរឱ្យសង្ស័យនៅក្នុងចិត្តរបស់ខ្ញុំទេ នេះគឺជាតំបន់ដែលមានសន្ទុះនាពេលបច្ចុប្បន្ននេះ ហើយជាមួយនឹងគម្រោង និងសកម្មភាពសេដ្ឋកិច្ចជាច្រើនទៀតឆ្ពោះទៅទិសខាងត្បូង និន្នាការនេះមើលទៅមាននិរន្តរភាព”។

ការណែនាំរបស់លោក David សម្រាប់អ្នកវិនិយោគអចលនទ្រព្យគឺថា ទោះបីមានអ្វីកើតឡើងនៅជុំវិញយើងទាក់ទងសេដ្ឋកិច្ច ឬជំងឺត្បាតក៏ដោយ វិនិយោគិនឆ្លាតវៃតែងតែដឹងថា ពេលណា និងកន្លែងណា ក្នុងការស្វែងរកឱកាសល្អបំផុត។

លោក David បានថ្លែងថា “ចំពោះខ្ញុំយោងទៅតាមទិន្នន័យ និងការសិក្សាទីផ្សារ ដែលខ្ញុំមាននៅក្នុងដៃ ពេលវេលាដើម្បីវិនិយោគគឺនៅពេលនេះ ហើយភាគខាងត្បូងនៃទីក្រុងគឺកន្លែងល្អប្រសើរសម្រាប់ការវិនិយោគ”។

លោកបន្តថា “បើខ្ញុំមិនខុសទេ ការវិនិយោគលើអចលនទ្រព្យតែងតែល្អ ប្រសិនបើអ្នកធ្វើវាតាមរបៀបឆ្លាតវៃ ប៉ុន្តែវាអាស្រ័យលើចំនួនទឹកប្រាក់ ដែលអ្នកចង់បានពីវា”។

ជាមួយនឹងល្បឿននៃការសាងសង់យ៉ាងសកម្ម ទីបំផុតព្រលានយន្តហោះអន្តតរជាតិភ្នំពេញថ្មីសម្រេចបាន៤០ភាគរយហើយ គិតត្រឹមតែឧសភានេះ។

ការសាងសង់តាមផ្នែកសំខាន់នីមួយៗ អនុវត្តន៍បានលទ្ឋផលតាមផែនការគ្រោង ទុក។ នេះបើយោងតាមតាមមន្រ្តីជំនាញ នៃអាកាសយានដ្ឋានអន្តរជាតិភ្នំពេញថ្មី កាលពីថ្ងៃសុក្រ កន្លងមកនេះ។តាមការគ្រោងទុក អាកាសយានថ្មីនេះ នឹងសាងសង់ចប់រួចរាល់ និងដាក់ឱ្យដំណើរការនៅឆ្នាំ២០២៣ បើទោះប្រទេសកំពុងមានវិបត្តិកូវីដ១៩ក្ដី៕

ដោយៈ សុខុម

អន្តរជាតិៈ ធនាគារពិភពលោក (World Bank) ជាធនាគារដ៏ល្បីល្បាញ និងមានឥទ្ធិពលយ៉ាងខ្លាំងនៅក្នុងពិភពលោក ព្រោះធនាគារនេះ តែងតែជួយដល់បណ្ដាប្រទេសកំពុងអភិវឌ្ឍន៍។
ដូចនេះ តើវាមានឥទ្ធិពលបែបណា មកលើសេដ្ឋកិច្ចពិភពលោកទាំងមូល? អញ្ចឹងតោះ! ដើម្បីជ្រាបកាន់តែច្បាស់អំពីស្ថាប័នកំពូលមួយនេះ សូមស្វែងយល់ទាំងអស់គ្នា!

ធនាគារពិភពលោក ត្រូវបានបង្កើតឡើងនៅថ្ងៃទី៤ ខែកក្កដា ឆ្នាំ១៩៤៤ និងមានទីស្នាក់ការកណ្តាលនៅវ៉ាស៊ីនតោន ឌីស៊ី សហរដ្ឋអាមេរិក ហើយមានសមាជិករហូតដល់ទៅ១៨៩ប្រទេស។

ស្ថាប័នធនាគារពិភពលោកទាំងមូលមាន ស្ថាប័នអន្តរជាតិចំនួន៥ ដែលផ្តល់ឥណទានដល់បណ្តាប្រទេសកំពុងអភិវឌ្ឍន៍។ វាជាធនាគារអភិវឌ្ឍន៍ដ៏ធំបំផុត និងល្បីល្បាញបំផុតក្នុងពិភពលោក ហើយវាក៏ដើរតួនាទីជាអ្នកសង្កេតការណ៍ របស់អង្គការសហប្រជាជាតិ (UN) ផងដែរ។

ធនាគារនេះបានផ្តល់ឥណទាន និងជំនួយប្រមាណ៦១ពាន់លានដុល្លារ ទៅដល់បណ្ដាប្រទេសកំពុងអភិវឌ្ឍន៍ក្នុងឆ្នាំ២០១៤។

ធនាគារនេះមានបេសកកម្ម ដើម្បីសម្រេចគោលដៅដ៏សំខាន់២ គឺបញ្ចប់ភាពក្រីក្រ និងកសាងវិបុលភាពរួម។ ការផ្តល់ឥណទានសរុបគិតត្រឹមឆ្នាំ២០១៥ សម្រាប់រយៈពេល១០ឆ្នាំចុងក្រោយនេះ តាមរយៈកម្មវិធីហិរញ្ញប្បទាន គោលនយោបាយអភិវឌ្ឍន៍ (Development Policy Financing) គឺមានចំនួនរហូតដល់១១៧ពាន់លានដុល្លារ។

ស្ថាប័នទាំង៥ស្ថិតក្រោមចំណុះ របស់ធនាគាពិភពលោករួមមាន ដូចជា ធនាគារអន្តរជាតិដើម្បីការកសាងឡើងវិញ និងការអភិវឌ្ឍន៍ (International Bank for Reconstruction and Development (IBRD)) សមាគមអភិវឌ្ឍន៍អន្តរជាតិ (International Development Association (IDA)) សាជីវកម្មហិរញ្ញវត្ថុអន្តរជាតិ (International Finance Corporation (IFC)) ទីភ្នាក់ងារធានាលើការវិនិយោគពហុភាគី (Multilateral Investment Guarantee Agency (MIGA)) និងមជ្ឈមណ្ឌលអន្តរជាតិ ដើម្បីការដោះស្រាយវិវាទវិនិយោគ (International Centre for Settlement of Investment Disputes (ICSID))។ ពេលខ្លះធនាគារ IBRD និងសមាគមអភិវឌ្ឍន៍អន្តរជាតិ IDA ត្រូវបានគេហៅរួមគ្នាថាធនាគារពិភពលោក។

សកម្មភាពរបស់ធនាគារពិភពលោក (ធនាគារ IBRD និងសមាគមអភិវឌ្ឍន៍អន្តរជាតិ IDA) ផ្ដោតសំខាន់លើបណ្ដាប្រទេសកំពុងអភិវឌ្ឍន៍ នៅក្នុងវិស័យសំខាន់ៗ ដូចជា ការលើកកំពស់សិទ្ធិមនុស្ស (ឧទាហរណ៍ការអប់រំ សុខាភិបាល) ការការពារបរិស្ថាន (ឧទាហរណ៍ការកាត់បន្ថយការបំពុលបរិស្ថាន ការបង្កើត និងការអនុវត្តបទប្បញ្ញត្តិនានា) ហេដ្ឋារចនាសម្ព័ន្ធ (ឧទាហរណ៍ផ្លូវថ្នល់ និងអគ្គិសនី) គម្រោងសំណង់ឧស្សាហកម្មធំៗ និងអភិបាលកិច្ច (ឧទាហរណ៍ការប្រឆាំងអំពើពុករលួយនិងការអភិវឌ្ឍស្ថាប័នច្បាប់)។

សកម្មភាពរបស់ធនាគារពិភពលោក (ធនាគារ IBRD និងសមាគមអភិវឌ្ឍន៍អន្តរជាតិ IDA) ផ្ដោតសំខាន់លើបណ្ដាប្រទេស កំពុងអភិវឌ្ឍន៍នៅក្នុងវិស័យសំខាន់ៗ ដូចជា ការអភិវឌ្ឍន៍សិទ្ធិមនុស្ស (ឧទាហរណ៍ការអប់រំ សុខាភិបាល) ការការពារបរិស្ថាន (ឧទាហរណ៍ការកាត់បន្ថយការបំពុលបរិស្ថាន ការបង្កើត និងការអនុវត្តបទប្បញ្ញត្តិនានា) ហេដ្ឋារចនាសម្ព័ន្ធ (ឧទាហរណ៍ផ្លូវថ្នល់ និងអគ្គិសនី) គម្រោងសំណង់ឧស្សាហកម្មធំៗ និងអភិបាលកិច្ច (ឧទាហរណ៍ការប្រឆាំងអំពើពុករលួយនិងការអភិវឌ្ឍស្ថាប័នច្បាប់)។

ធនាគារពិភពលោក (ធនាគារ IBRD និងសមាគមអភិវឌ្ឍន៍អន្តរជាតិ IDA) ផ្ដល់ឥណទានការប្រាក់ទាប ទៅដល់បណ្ដាប្រទេសជាសមាជិក ព្រមទាំងជំនួយឥតសំណងទៅដល់បណ្ដាប្រទេសក្រីក្របំផុតផងដែរ។ ការផ្តល់ឥណទាន ឬជំនួយឥតសំណងសម្រាប់គម្រោងជាក់លាក់ណាមួយ ច្រើនតែពាក់ព័ន្ធទៅនឹងការកែប្រែ គោលនយោបាយទូលំទូលាយនៅក្នុងវិស័យណាមួយ ឬសេដ្ឋកិច្ចរបស់ប្រទេសមួយទាំងមូល។

ឧទាហរណ៍ ឥណទានសម្រាប់ការកែលម្អ ការគ្រប់គ្រងបរិស្ថានតំបន់ឆ្នេរ ត្រូវភ្ជាប់ទៅនឹងការអភិវឌ្ឍស្ថាប័នបរិស្ថានថ្មីនៅថ្នាក់ជាតិ និងថ្នាក់ក្រោមជាតិ និងការអនុវត្តបទប្បញ្ញត្តិថ្មីៗ ដើម្បីកម្រិតការបំពុលបរិស្ថានជាដើម៕

ដោយៈតារា

ភ្នំពេញៈ ទំហំពាណិជ្ជកម្មទ្វេភាគីរវាងកម្ពុជា-អាមេរិករយៈពេល៤ខែ ដើមឆ្នាំនេះ សរុបការនាំចេញនាំចូល មានទំហំទឹកប្រាក់ជិត២ពាន់លានដុល្លារអាមេរិក កើនឡើងប្រមាណ២៨.៥២% ក្នុងនោះសម្រាប់ពាណិជ្ជកម្មនៃការនាំចេញ បានកើនឡើងក្នុងរង្វង់ ២៩.៥៣%។

អ្នកនាំពាក្យ និងជាអនុរដ្ឋលេខាធិការក្រសួងពាណិជ្ជកម្ម លោកប៉ែន សុវិជាតិ បានឱ្យដឹងនាព្រឹកថ្ងៃទី១ មិថុនានេះថា រយៈពេលប៉ុន្មានឆ្នាំចុងក្រោយនេះ ការនាំចេញផលិតផលពីកម្ពុជាទៅកាន់សហរដ្ឋអាមេរិក គឺមានកំណើនកើនឡើងគួរជាទីកត់សម្គាល់ ដូចជា ការនាំចេញសម្លៀកបំពាក់ កាបូប ស្បែកជើង និងសម្ភារផ្សេងៗ។

ក្នុងរយៈពេល៤ខែ ដើមឆ្នាំនេះ ទំហំពាណិជ្ជកម្មរវាងប្រទេសទាំងពីរ ក្នុងនោះសម្រាប់ការនាំចូល មានតម្លៃទឹកប្រាក់សរុបជាង៩៣លានដុល្លារ កើនឡើងជាង១០ភាគរយ ខណៈការនាំចេញ មានចំនួនទឹកប្រាក់ជាង១៩00លានដុល្លារ កើនឡើងជាង២៩% ក្នុងនោះបើសរុបនៃការនាំចេញនាំចូល មានទំហំទឹកប្រមាណជិត២ពាន់លានដុល្លារអាមេរិក កើនឡើងជាង២៨ភាគរយ។

លោកបន្តថា ទំហំពាណិជ្ជកម្មទ្វេភាគីរវាងកម្ពុជា-អាមេរិក កើនឡើងនេះ ដោយសារទំនាក់ទំនងពាណិជ្ជកម្មរវាងប្រទេសទាំងពីរ នៅតែរក្សាបានស្ថិរភាពល្អប្រសើរ ក្នុងនោះសហរដ្ឋអាមេរិក នៅតែចាត់ទុកប្រទេសកម្ពុជា គឺជាប្រភពមួយ នៃការផលិតសម្រាប់ការនាំចេញ ខណៈសហរដ្ឋអាមេរិកមានក្រុមហ៊ុនធំៗជាដៃគូ បានកំពុងទទួលទិញពីផលិតផលទាំងនេះពីកម្ពុជា ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានមានប្រសាសន៍ថា ស្របពេលការធ្វើពាណិជ្ជកម្មរវាងប្រទេសទាំងពីរ កំពុងរក្សាបាននូវស្ថិរភាពកំណើនល្អ ក្នុងនោះចំពោះដំណើរទស្សនកិច្ចនៅកម្ពុជា របស់លោកជំទាវWendy Ruth Sherman អនុរដ្ឋមន្ត្រីក្រសួងការបរទេសសហរដ្ឋអាមេរិក នៅក្នុងថ្ងៃនេះ គឺបានបង្ហាញនូវទំនាក់ទំនងកាន់តែជិតស្និតថែមទៀត រវាងប្រទេសទាំងពីរ ក្នុងនោះសម្រាប់ការធ្វើពាណិជ្ជកម្ម ទំនាក់ទំនងនេះ នឹងធ្វើឲ្យកិច្ចសហប្រតិបត្តិការពាណិជ្ជកម្ម រវាងប្រទេសទាំងពីរ នឹងប្រព្រឹត្តទៅកាន់តែប្រសើរថែមទៀត ខណៈបច្ចុប្បន្នមានក្រុមដៃគូរជាច្រើន កំពុងរងចាំឱកាសវិនិយោគបន្ទាប់ពីស្ថានភាពជម្ងឺកូវីដឥ១៩ បានធូរស្រាល ។

ទំហំពាណិជ្ជកម្មនៃការនាំចេញពីកម្ពុជា នៅក្នុងរយៈពេល៣ខែ ដើមឆ្នាំ ២០២១ ការទៅកាន់ទីផ្សារសហរដ្ឋអាមេរិក បានឈរក្នុងលំដាប់ទី១ នៃការនាំចេញផលិតផលពីកម្ពុជាច្រើនជាងគេ បន្ទាប់មកការនាំចេញទៅកាន់ទីផ្សារចិន អឺរ៉ុប អាស៊ាន ជប៉ុន ចក្រភពអង់គ្លេស និងការនាំចេញទៅកាន់ទីផ្សារផ្សេងៗមួយចំនួនទៀត៕

ដោយៈលក្ខិណា

ភ្នំពេញៈ ខណៈវិស័យកសិកម្មកម្ពុជា កំពុងតែដើរនាទីសំខាន់ក្នុងការជំរុញ កំណើនសេដ្ឋកិច្ចគ្រាដែលកូវីដ១៩នៅតែបន្តរាលដាលក្នុងប្រទេស ធនាគារអភិវឌ្ឍន៍ជនបទនិងកសិកម្ម បានស្នើរដ្ឋាភិបាលបន្តទម្លាក់ថវិកាបន្ថែមទៀត ដើម្បីផ្ដល់កម្ចីដល់វិស័យនេះ សម្រាប់អភិវឌ្ឍន៍ទៅមុខបន្ត។

យោងតាមការចុះផ្សាយរបស់សារព័ត៌មាននៅថ្ងៃទី ៣១ ឧសភា ២០២១កន្លងមកនេះ លោក កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្មបានលើកឡើងថា នៅឆ្នាំ២០២១នេះ ធនាគារអាចនឹងមានការស្នើសុំកញ្ចប់មូលនិធិបន្ថែម ពីរាជរដ្ឋាភិបាល ប៉ុន្តែមិនទាន់ដឹងច្បាស់ថា ត្រូវស្នើសុំនូវទំហំទឹកប្រាក់ប៉ុន្មាននោះដែរ ប៉ុន្តែបើគិតពីទំហំតម្រូវដែលនឹងត្រូវការបន្តទៀតនោះ ក្នុងរង្វង់ទឹកប្រាក់៥៥លានដុល្លារ ដើម្បីចូលរួមបង្កើនការផ្តល់ឥណទាន ឲ្យដល់៣០០លានដុល្លារ សម្រាប់ជាទិសដៅឆ្នាំ២០២១។

លោកបន្តថា “ធនាគារអភិវឌ្ឍន៍ជនបទ និងកសិកម្មនៅតែរក្សាបន្តការជំរុញអភិវ ឌ្ឍន៍វិស័យកសិកម្មដោយឈរលើកត្តាសំខាន់ៗ ដូចឆ្នាំ២០២០ ដូចជា ជំរុញការដាំដុះ បន្លែផ្លែឈើ ការចិញ្ចឹមសត្វ ការចិញ្ចឹមត្រី ដើម្បីធ្វើយ៉ាងឱ្យមានស្ថិរភាព និងសុវត្ថិភាពស្បៀងនៅកម្ពុជា ដោយឈានទៅរកការកាត់បន្ថយការនាំចូល”។

ដោយឡែក កញ្ចប់ឥណទានពិសេស ដែលរាជរដ្ឋាភិបាលផ្តល់ទាំងប៉ុន្មាននៅពេលនេះ ធនាគារអភិវឌ្ឍន៍ជនបទ និងកសិកម្មបានបញ្ចេញឲ្យប្រជាកសិករ និងអ្នករកស៊ីនៅក្នុងវិស័យកសិកម្មនេះរួចអស់ហើយ គិតមកដល់បំណាច់ឆ្នាំ២០២០ ប៉ុន្តែចំពោះឆ្នាំ២០២១នេះ ធនាគារអភិវឌ្ឍន៍ជនបទ និងកសិកម្ម មានគម្រោងស្នើសុំកញ្ចប់មូលនិធិកម្ចីបន្ថែម ដើម្បីជួយទ្រទ្រង់ដល់វិស័យកសិកម្មនេះបន្តទៀត។

គិតមកដល់ពេលនេះ ទំហំមូលនិធិកម្ចី ដែលរដ្ឋាភិបាលផ្តល់ឲ្យធនាគារអភិវឌ្ឍន៍ជនបទ និងកសិកម្ម សម្រាប់ទ្រទ្រង់ដល់វិស័យកសិកម្ម ប្រមាណ៤៥លានដុល្លារ ពេលនេះត្រូវបានបញ្ចេញអស់ហើយ។ ក្រោយពីមានការផ្តល់កញ្ចប់ឥណទានឃើញថា វិស័យកសិកម្ម មានការរីកចម្រើនខ្លាំងគួឱ្យកត់សម្គាល់ ទៅលើការចិញ្ចឹមសត្វ និងការធ្វើវារីវប្បកម្ម ដូចជា ការចិញ្ចឹមត្រីជាដើម គឺមានកំណើននៃការចិញ្ចឹមខ្ពស់ធៀបនឹងវិស័យដទៃទៀត ។

ក្នុងរយៈពេលជិត៥ខែដើមឆ្នាំនេះ កម្ពុជាបាននាំចេញផលិតផលកសិកម្ម ទៅកាន់ទីផ្សារអន្តរជាតិចំនួនជាង៤លានតោន ក្នុងនោះមានអង្ករ ផ្លែឈើ ស្រូវ និងផលិតផលជាច្រើនទៀត ដែលអាចឱ្យកម្ពុជាទទួលបានចំណូលត្រលប់មកវិញ សម្រាប់ទ្រទ្រង់សេដ្ឋកិច្ចជាតិផងដែរ៕

ដោយៈ សាវុធ

ភ្នំពេញៈ តំណាងមកពីធនាគារជាតិនៃកម្ពុជា (NBC) សមាគមធនាគារនៅកម្ពុជា (ABC) និងក្រុមហ៊ុនសាជីវកម្ម Moody ដែលមានមូលដ្ឋាននៅសហរដ្ឋអាមេរិក បានកិច្ចពិភាក្សាគ្នា ដើម្បីជំរុញការស្វែងរកកិច្ចសហប្រតិបត្តិការ និងភាពជាដៃគូលើហិរញ្ញវត្ថុប្រកបដោយចីរភាពនៅកម្ពុជានាពេលអនាគត។ នេះបើយោងតាមការសេចក្តីប្រកាសព័ត៌មានរបស់សមាគមធនាគារនៅកម្ពុជានៅថ្ងៃទី៣១ ខែឧសភានេះ។

កិច្ចប្រជុំនេះត្រូវបានដឹកនាំ ដោយលោកហេង បូមករាអគ្គនាយករងត្រួតពិនិត្យ នៃធនាគារជាតិនៃកម្ពុជា លោកហេង កុយអគ្គនាយកសមាគមធនាគារនៅកម្ពុជា និងលោក James Flitton ប្រធានផ្នែកទំនាក់ទំនងនៃក្រុមហ៊ុន Moody’s ប្រចាំតំបន់អាស៊ីអាគ្នេយ៍ ក្នុងគោលបំណងជំរុញការសហការគ្នា និងភាពជាដៃគូលើវិស័យហិរញ្ញវត្ថុ ប្រកបដោយនិរន្តរភាព។

លោកហេង បូមករាបាថ្លែងថា “ការអនុវត្តប្រកបដោយចីរភាព ក្នុងវិស័យហិរញ្ញវត្ថុត្រូវបានកើនឡើង នៅក្នុងវិស័យហិរញ្ញវត្ថុនៅលើកម្រិតជាតិ និងអន្តរជាតិ”។លោកបន្តថា”សុខភាពហិរញ្ញវត្ថុប្រកបដោយចីរភាព មិនត្រឹមតែបានផ្តោតលើ តែនៅក្នុងប្រទេសកម្ពុជាប៉ុណ្ណោះទេ ប៉ុន្តែថែមទាំងនៅក្នុងបណ្តាប្រទេស G20 ក៏ដូចជា IMFផងដែរ”។

ជាមួយគ្នានេះដែរ សមគមធនាគារនៅកម្ពុជា បានបង្កើតគណៈកម្មាធិការប្រកបដោយនិរន្តរភាព ប៉ុន្តែសម្រាប់កិច្ចប្រជុំនេះ យើងនឹងរៀនបន្ថែមទៀត ដើម្បីទទួលបានភាពជោគជ័យបន្ថែមពីក្រុមហ៊ុន Moody។

លោក James Flitton បានកោតសរសើរ ចំពោះបទបង្ហាញដ៏ទូលំទូលាយរបស់សមាគមធនាគារនៅកម្ពុជា ដោយលោកបាននិយាយថា វាហាក់ដូចជាសមាគមធនាគារ និងធនាគារសមាជិក មានសកម្មភាពយ៉ាងខ្លាំងទាក់ទងនឹងហិរញ្ញវត្ថុ ប្រកបដោយនិរន្តរភាព។

ក្រុមហ៊ុន Moody គឺជាក្រុមហ៊ុនសាជីវកម្ម សេវាកម្មហិរញ្ញវត្ថុរបស់អាមេរិក ដែលកាន់កាប់ក្រុមហ៊ុន Moody’s Investors Service និងក្រុមហ៊ុនវិភាគហិរញ្ញវត្ថុ Moody’s Analytics។ ក្រុមហ៊ុន Moody’s Investors Service ផ្តល់ជូនវិនិយោគិននូវចំណាត់ថ្នាក់ឥណទាន ការវិភាគហានិភ័យ និងការស្រាវជ្រាវសម្រាប់ភាគហ៊ុន បណ្ណបំណុល និងអង្គភាពរដ្ឋាភិបាល៕