អ្នកជំនាញអចលនទ្រព្យបង្ហើបពីតំបន់មួយចំនួននៅកម្ពុជាដែលកំពុងមានសក្ដានុពលសម្រាប់វិនិយោគទុកចំណេញ

ដោយៈ ម៉ាណេត

ភ្នំពេញៈ អ្នកជំនាញបានបង្ហើបពីតំបន់មួយចំនួននៅទីក្រុងភ្នំពេញ និងបណ្តាខេត្តនានា កំពុងមានសក្ដានុពលក្នុងការវិនិយោគលើវិស័យអចលនទ្រព្យដែលអាចទាញយកផលចំណេញបានខ្ពស់ បន្ទាប់ពីវិបត្តិកូវីដ១៩។

លោកស៊ា ឆៃលីនអគ្គនាយកក្រុមហ៊ុនអចលនទ្រព្យ ស៊ីអិល រៀលធី បានថ្លែងប្រាប់នៅថ្ងៃទី១ ខែកក្កដា ឆ្នាំ២០២១នេះថា វិនិយោគិនគួរសម្លឹងការវិនិយោគនៅតំបន់ជាយក្រុងភ្នំពេញ ពិសេសនៅភាគខាងត្បូង និងក្រវាត់ក្រុងទី៣ ដោយសារតែតំបន់ទាំងនោះមានការអភិវឌ្ឍលឿន និងមិនទាន់មានការអភិវឌ្ឍន៍ឆ្អែត ដូច្នេះវិនិយោគនៅតែអាចរកផលចំណេញពីតំបន់ទាំងនេះបាន។

ដោយឡែក លោកបានឱ្យដឹងថា ខេត្តមួយចំនួន ដែលមានសក្ដានុពលក្នុងការវិនិយោគលើវិស័យអចលនទ្រព្យ ដើម្បីផលចំណេញ មានដូចជាខេត្តកែប កំពត កោះកុងជា និងខេត្តមណ្ឌលគិរី ដែលមានសក្ដានុពលសម្រាប់ការវិនិយោគ ដោយសារតែខេត្តទាំងអស់នេះត្រូវបានរដ្ឋាភិបាលយកចិត្តទុកដាក់ក្នុងការអភិវឌ្ឍលើវិស័យផ្សេងៗ ជាច្រើនពិសេសវិស័យហេដ្ឋារចនាសម្ព័ន្ធ ខណៈខេត្តទាំងអស់នេះកំពុងតែទទួលបានការវិនិយោគជាបន្តបន្ទាប់។

លោកបានថ្លែងបន្តថា បើនិយាយពីការវិនិយោគអចលនទ្រព្យសម្រាប់ផលចំណេញ គឺភាគច្រើនគេនិយាយពីការវិនិយោគលើវិស័យដីធ្លីនេះតែម្តង។ លោកបានបន្តថា អំឡុងពេលដែលវិបត្តិនេះ នៅពេលដែលវិនិយោគិនឆ្លាតវៃណា អាចរកបានអចលនទ្រព្យណាមួយដែលមានតម្លៃក្រោមទីផ្សារ និងរួចទិញយកសម្រាប់យកផលចំណេញនាពេលអនាគត នេះគឺជាឱកាសមួយដ៏ល្អប្រសើរ ។

លោកបន្តថា ដើម្បីទទួលបានផលចំណេញ នៅពេលខាងមុខអ្នកវិនិយោគគួរ ការវិនិយោគពីពេលឥឡូវនេះនៅពេលដែលវិបត្តិកូវីដបញ្ចប់ តម្លៃអចលនទ្រព្យនឹងកើនឡើងខ្លាំង នៅពេលនោះហើយដែលអ្នកវិនិយោគទទួលបានផលចំណេញខ្ពស់ពីការវិនិយោគវិស័យអចលនទ្រព្យរបស់ខ្លួន។

លោកPhillip Tanគ្រប់គ្រងផ្នែកទីផ្សារក្រុមហ៊ុនPropNex ប្រចាំប្រទេសអូស្ត្រាលី ដែលបទពិសោធន៍ជាច្រើនឆ្នាំ ក្នុងវិស័យអចលនទ្រព្យទាំងនៅអូស្រ្តាលី និងតំបន់អាស៊ីអាគ្នេយ៍ បានថ្លែងកាលពីថ្មីៗនេះ វិស័យអចលនទ្រព្យនៅកម្ពុជាកំពុងមានរីកចម្រើន និងមានឱកាសច្រើនសម្រាប់ការវិនិយោគ។
លោកបានឱ្យដឹងទៀតថា ក្រឡេកមកមើលប្រទេសកម្ពុជាវិញ ជាមួយនឹងការឈានមកដល់របស់ក្រុមហ៊ុនPropNex នៅប្រទេសកម្ពុជា វិស័យអចលនទ្រព្យនៅប្រទេសកម្ពុជាមានការរីកលូតលាស់យ៉ាងល្អប្រសើរ ដោយសារតែរយៈពេលប្រាំឆ្នាំចុងក្រោយនេះ ប្រទេសកម្ពុជាមានសេដ្ឋកិច្ចកើនឡើងជាប្រចាំ។

លោកបានថ្លែងថា “សម្រាប់វិស័យអចលនទ្រព្យនៅកម្ពុជាវិញគឺនៅតែអាចទាញយកផលចំណេញបាន ដោយសារតែតម្លៃអចលនទ្រព្យនៅក្នុងប្រទេសកម្ពុជា នៅមានតម្លៃសមរម្យនៅឡើយ បើធៀបជាមួយនឹងប្រទេសផ្សេងៗផ្សេង ដូច្នេះហើយនេះគឺជាឱកាសមួយនៅក្នុងការវិនិយោគក្នុងវិស័យអចលនទ្រព្យនៅកម្ពុជា”៕

ទីផ្សារអចលនទ្រព្យប្រភេទលំនៅដ្ឋាននៅសហរដ្ឋអាមេរិក មានសន្ទុះងើបឡើងខ្លាំង គួរឱ្យភ្ញាក់ផ្អើលក្នុងខែឧសភា

ដោយៈសុខុម

អាមេរិក: ពលរដ្ឋអាមេរិក កាន់តែច្រើនឡើងបានចុះកិច្ចសន្យា ដើម្បីទិញផ្ទះនៅក្នុងខែឧសភា ហើយនេះជាសន្ទុះងើបឡើងគួរឱ្យភ្ញាក់ផ្អើល បន្ទាប់ពីទីផ្សារអចលនទ្រព្យប្រភេទលំនៅដ្ឋាន មានសភាពស្ងាត់ជ្រាបអស់រយៈពេលជាច្រើនខែ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី០១ កក្កដា នេះ។

សន្ទស្សន៍របស់សមាគមភ្នាក់ងារអចលនទ្រព្យជាតិ National Association of Realtors (NAR)បានបង្ហាញថា ការលក់ផ្ទះដែលពុំទាន់ឈានដល់ការព្រមព្រៀងដំណា​ក់កាលចុង ក្រោយបានកើនឡើង៨% ដល់១១៤,៧ពិន្ទុ ដែលជាសន្ទុះងើបឡើងខ្ពស់បំផុតសម្រាប់ខែឧសភា ចាប់តាំងពីឆ្នាំ២០០៥ មក។

តួលេខនេះកើនឡើងពី១០៦,២ពិន្ទុនៅក្នុងខែមេសាផងដែរ។ សន្ទស្សន៍ Index of The 100 បង្ហាញថា តួលេខនេះគឺស្មើគ្នានឹងកម្រិតសកម្មភាពទិញក្នុងឆ្នាំ២០០១។

ការចុះកិច្ចសន្យាបានកើនឡើង១៣,១% បើធៀបនឹងឆ្នាំមុន ដែលពេលនោះកំពុងតែផ្ទុះការឆ្លងរាលដាលវីរុសកូវីដ-១៩ ខ្លាំង។ វាគ្រាន់តែជាកំណើនប្រចាំខែទី២ ប៉ុណ្ណោះគិតមកទល់ពេលនេះក្នុងឆ្នាំ២០២១ ប៉ុន្តែបើយោងតាមការព្យាករថា ទីផ្សារលំនៅដ្ឋាននឹងទទួលបានកំណើនរឹងមាំក្នុងរដូវក្ដៅ។

ខណៈពេលដែលមិនខ្វះអ្នកទិញនៅក្នុងទីផ្សារ បែរជាខ្វះផ្ទះសម្រាប់លក់ទៅវិញ ហើយនេះជាហេតុធ្វើឱ្យតម្លៃផ្ទះ ដែលសង់រួចស្រាប់ហក់ឡើងខ្ពស់មិនធ្លាប់មាន។

កាលពីសប្តាហ៍មុន ក្រសួងពាណិជ្ជកម្មសហរដ្ឋអាមេរិក បានរាយការណ៍ថា ការលក់ផ្ទះថ្មី បានធ្លាក់ចុះរយៈពេល២ខែជាប់គ្នា។ ការធ្លាក់ចុះ៥,៩%នៅក្នុងខែឧសភា កើតមានក្រោយពីធ្លាក់ចុះ៧,៨%ក្នុងខែមេសា។ តម្លៃជាមធ្យមសម្រាប់ផ្ទះថ្មី ដែលបានលក់ក្នុងខែឧសភា បានហក់ឡើងដល់៣៧៤.៤០០ដុល្លារក្នុងផ្ទះមួយ ពោលគឺកើនឡើង១៨,១%បើប្រៀបធៀបទៅនឹងឆ្នាំមុន។

សមាគមភ្នាក់ងារអចលនទ្រព្យ NAR ក៏បានរាយការណ៍កាលពីសប្ដាហ៍មុនដែរថា ការលក់ផ្ទះដែលគេធ្លាប់កាន់កាប់ពីមុន (ផ្ទះមួយទឹក) បានធ្លាក់ចុះរយៈពេល៤ខែជាប់គ្នានៅក្នុងខែឧសភា។ តម្លៃលក់ជាមធ្យមសម្រាប់ផ្ទះ ដែលសាងសង់រួចស្រាប់បានហក់ឡើងលើស៣៥០.០០០ដុល្លារ ក្នុងផ្ទះមួយកាលពីខែមុន ដែលជាកម្រិតខ្ពស់ធ្លាប់មាន ហើយក៏ទំនងជាឧបសគ្គរាំងស្ទះដែរសម្រាប់អ្នកចង់ទិញផ្ទះ ជាពិសេសអ្នកទិញផ្ទះដំបូង៕

អ្នកជំនាញៈ ការជំរុញការអភិវឌ្ឍវិស័យហេដ្ឋារចនាសម្ព័ន្ធកំពុងជួយលើកកម្ពស់វិស័យអចលនទ្រព្យអំឡុងពេលមានវិបត្តិនេះ

ដោយៈ ម៉ាណេត

ភ្នំពេញៈ ទោះស្ថិតក្នុងវិបត្តិកូវីដ១៩ រដ្ឋាភិបាលកម្ពុជា បាននិងកំពុងបង្ហាញសកម្មភាពយ៉ាងសកម្មចំពោះការអភិវឌ្ឍប្រព័ន្ធហេដ្ឋារចនាសម្ព័ន្ធនៅទូទាំងប្រទេស ខណៈអ្នកជំនាញលើកឡើងថា ការបង្កើនសកម្មភាពអភិវឌ្ឍន៍ហេដ្ឋរចនាសម្ព័ន្ធកំពុងជួយលើកកម្ពស់វិស័យអចលនទ្រព្យ អំឡុងពេលវិបត្តិនេះ។

អ្នកស្រីអាន សុធីតាអ្នកជំនាញអន្តរជាតិមានបទពិសោធន៍ជាច្រើនឆ្នាំ ក្នុងវិស័យអចលនទ្រព្យនៅកម្ពុជា បានថ្លែងប្រាប់នៅថ្ងៃទី១ ខែកក្កដា ឆ្នាំ២០២១ ថា នៅក្នុងបរិបទវិបត្តិកូវីដ១៩ ការអភិវឌ្ឍវិស័យហេដ្ឋារចនាសម្ព័ន្ធនឹងជួយលើកកម្ពស់ វិស័យអចលនទ្រព្យបន្ថែមទៀត យើងដឹងហើយថាការអភិវឌ្ឍ ហេដ្ឋារចនាសម្ព័ន្ធគឺជាកម្លាំងចលករមួយ ដែលជួយជំរុញវិស័យនេះឲ្យកាន់តែមានការវិវឌ្ឍទៅមុខកាន់តែប្រសើរ។

អ្នកស្រីបានឱ្យដឹងថា “យើងដឹងហើយថា នៅពេលណាដែលមានសាងសង់ផ្លូវ ស្ពាន ឬថ្នល់តំបន់ សកម្មភាពសេដ្ឋកិច្ចនឹងទៅដល់ទីនោះ ដែលជួយលើកកម្ពស់ដល់តម្លៃអចលនទ្រព្យនៅតំបន់មួយដែលមានការអភិវឌ្ឍហេដ្ឋារចនាសម្ព័ន្ធល្អប្រសើរ”។

អ្នកបានឱ្យដឹងទៀតថា ការអភិវឌ្ឍន៍វិស័យហេដ្ឋារចនាសម្ព័ន្ធ គឺដើម្បីពង្រីកសសៃឈាមសេដ្ឋកិច្ច ក៏ដូចជាការចូលរួមចំណែកកាត់ថ្លៃធ្វើដំណើររបស់ប្រជាពលរដ្ឋ និងវិស័យដឹកជញ្ជួន ដើម្បីឈានដល់ការប្រកួតប្រជែងក្នុងតំបន់ទៀតផង។

អ្នកស្រីបានថ្លែងបន្តថា ជាមួយគ្នានេះដែរ អ្នកអភិវឌ្ឍន៍ក៏គួរតែ បង្កើតឱ្យមានការបត់បែនសម្រាប់សម្រាប់ការទូទាត់ជូនអតិថិជន ឬតាមរយៈការបញ្ចុះតម្លៃអចលនទ្រព្យ ដែលពួកគាត់កំពុងអភិវឌ្ឍន៍។ អ្នកស្រីបានថ្លែងបន្តថា បច្ចុប្បន្នយើងឃើញថា មានគម្រោងជាច្រើនកំពុងតែដាក់ចេញនូវយុទ្ធសាស្ត្រជាច្រើន ដើម្បីទាក់ទាញអតិថិជន ដូចជាការបញ្ចុះតម្លៃ ការទូទាត់បង់ប្រាក់មានភាពបត់បែនទាំងនេះហើយ ដែលលើកទឹកចិត្តដល់អតិថិជនក្នុងការទិញអចលនទ្រព្យ។

លោកច្រឹក សុខនីមប្រធានសមាគមភ្នាក់ងារ និងវាយតម្លៃអចលនវត្ថុកម្ពុជា បានថ្លែងប្រាប់ថា ការដាក់ចេញអភិវឌ្ឍន៍ហេដ្ឋារចនាសម្ព័ន្ធរបស់រដ្ឋាភិបាលនាពេលកន្លងមកនេះ គឺសញ្ញាមួយល្អដែលជំរុញឱ្យមានស័យនានាឱ្យមានការរីកចំរើន រួមជាមួយនឹងវិស័យអចលនទ្រព្យផងដែរ។

លោកបន្តថា “ចំពោះការអភិវឌ្ឍន៍ហេដ្ឋារចនាសម្ព័ន្ធ ក៏វានឹងជួយជំរុញឱ្យវិស័យអលចនទ្រព្យរីកចម្រើនផងដែរជាពិសេសអចលនទ្រព្យប្រភេទ”៕

អំឡុងវិបត្តិកូវីដៈ សាំងឡើងថ្លៃដល់៤១៦០រៀលហើយក្នុង១លីត្រ

ដោយៈគង់ សូរិយា

ភ្នំពេញៈ ទោះបីកម្ពុជាកំពុងរងវិបត្តិកូវីដ១៩ក្តី តែសុខភាពប្រេងឥន្ឋនៈនៅកម្ពុជានៅតែល្អប្រសើរ ដោយតម្លៃសាំងបានបន្តហក់ឡើងដល់៤១៦០រៀល និងប្រេងម៉ាស៊ូត៣៧៦០រៀលក្នុងមួយលីត្រ។

យោងតាមទិន្នន័យរបស់ក្រសួងពាណិជ្ជកម្ម នៅរសៀលថ្ងៃទី១ ខែកក្កដានេះ បានឲ្យដឹងថា តម្លៃលក់រាយប្រេងឥន្ធនៈខាងលើនេះ ដាក់ឲ្យអនុវត្តចាប់ពីថ្ងៃទី១ ដល់ថ្ងៃទី១៥ ខែកក្កដា ឆ្នាំ២០២១។ ប្រភពដដែលបន្តថា ផ្អែកតាមតម្លៃប្រេងឆៅនៅលើទីផ្សារអន្តរជាតិ តម្លៃលក់រាយប្រេងឥន្ធនៈ ក្នុងរយៈពេលដូចគ្នាខាងលើ នឹងត្រូវលក់៤១៦០ រៀល ក្នុង១លីត្រ សម្រាប់ប្រេងសាំងធម្មតាEA92 និង៣៧៦០រៀល សម្រាប់ប្រេងម៉ាស៊ូត។

ជុំវិញតម្លៃលក់ប្រេងឥន្ធនៈនេះ ក្រសួងបានបញ្ជាក់ថា ក្រសួងមិនមែនជាអ្នកកំណត់ថ្លៃលក់រាយប្រេងឥន្ធនៈនៅកម្ពុជាទេ ពោលគឺក្រសួងគ្រាន់តែស្រង់តម្លៃឡើង-ចុះ នៃប្រេង តាមទីផ្សារអន្តរជាតិមកគណនាតាមប្រកាសដូចមានក្នុងឯកសារ។

ក្នុងរយៈពេល២សប្តាហ៍កន្លងទៅ (១៦-៣០មិថុនា ២០២១) ការលក់រាយប្រេងសាំងធម្មតាថ្លៃ៣៩០០រៀល។ ដោយឡែក ប្រេងម៉ាស៊ូតថ្លៃ៣. ៥៥០រៀល ក្នុង១លីត្រ៕

SUNDOORផលិតផលក្នុងស្រុកចូលរួមលើកកំពស់គុណភាពនិងសោភ័ណភាព វិស័យសំណង់កម្ពុជា

ដោយៈគង់ សូរិយា

ភ្នំពេញៈ ក្រុមហ៊ុន SUN DOORផលិត និងផ្គត់ផ្គង់ពិដាន និងទ្វារ PVC នៅពេលបច្ចុប្បន្ន បាននិងកំពុងពង្រីកទីផ្សារកាន់តែទូលាយ លើផលិតផលខាងលើនេះ ពិសេស​ក្រុមហ៊ុនបានផ្តល់សេវាកម្មដំឡើងទ្វារ ពិដានដល់ម្ចាស់គំរោងលំនៅដ្ឋាននិងបុរីនានាប្រកបដោយភាពឆាប់រហ័ស និងមានសោភ័ណភាពខ្ពស់។

ជាផលិតផលផលិតក្នុងស្រុក ប៉ុន្តែប្រើប្រាស់បច្ចេកវិទ្យាមកពីបរទេស ក្រុមហ៊ុនផលិតទ្វារនិងពិដានSun Door PVC ម៉ាក SUNDOOR បាននិងកំពុងទទួលបានការគាំទ្រពីអ្នកវិនិយោគសំណង់លំនៅដ្ឋាន បុរី ខុនដូ និងអាផាតម៉ិននានាយ៉ាងច្រើន។

កម្ពុជានាពេលបច្ចុប្បន្ន ក្រុមហ៊ុនអភិវឌ្ឍន៍ជាច្រើនទទួលស្គាល់ និងជឿជាក់ទៅលើគុណភាព សោភ័ណភាព និងភាពទាក់ទាញយ៉ាងខ្លាំង សម្រាប់ការបំពាក់ដាក់បន្ទប់គេង ខុនដូ មន្ទីរពេទ្យ សាលារៀន វីឡា ផ្ទះល្វែង ដែលមានគុណភាពល្អ មិនរីករួម ស្រក អាចកម្មង់ទំហំទៅតាមតម្រូវការបែបទំនើបទាន់សម័យ។

អ្នកតំណាងក្រុមហ៊ុនSUNDOOR បានបញ្ជាក់ថា នៅក្នុងរយៈពេលដ៏ខ្លីនៃកិច្ចដំណើ​រការផ្គត់ផ្គង់ផលិតផល ក្នុងវិស័យសំណង់នៅកម្ពុជាកន្លងទៅនេះ ខ្សែសង្វាក់ផលិត​កម្មរបស់ក្រុមហ៊ុនបានប្រព្រឹត្តទៅយ៉ាងរលូន ខណៈដែលក្រុមហ៊ុនមានការតាំងចិត្តខ្ពស់ជាមួយនឹងការខិតខំប្រឹងប្រែង ក្នុងការជំនះនូវរាល់ឧបសគ្គដែលប្រឈម ហើយធ្វើការដោះស្រាយដោយសន្ដិវិធី ដើម្បីឈានទៅដល់ការគោលដៅ នៃភាពជោគជ័យយ៉ាងត្រចះត្រចង់។

គោលបំណងចម្បងរបស់ក្រុមហ៊ុនក្នុងរយៈពេលនេះ គឺចាំបាច់បំផុត ធ្វើគ្រប់មធ្យោ​បាយ ដើម្បីបំពេញនូវតម្រូវការរបស់អតិថិជន ធ្វើយ៉ាងណាពង្រីកវិសាលភាព និងចែកចាយនៅលើទីផ្សារគ្រប់បណ្តាខេត្តក្រុងនានា នៅទូទាំងប្រទេសកម្ពុជា ដោយការផ្តល់ជូននូវផលិតផលថ្មីៗ ប្រកបដោយគុណភាពខ្ពស់ទៅកាន់ទីផ្សារកម្ពុជា ដែលកំពុងមានកំនើនសេដ្ឋកិច្ច និងកាលានុវត្តភាពនៃវិស័យពាណិជ្ជកម្មនៅពេលបច្ចុប្បន្ន និងបន្តទៅថ្ងៃអនាគត។

ជាមួយគ្នានេះ ក្រុមហ៊ុនក៏មានបេសកកម្មពិសេស ដើម្បីធ្វើការផ្តល់ជូននូវសេវាកម្ម រួមជាមួយនឹងផលិតផលមានគុណភាព ប្រកបដោយក្រមសីលធម៌របស់បុគ្គលិកជំនាញ មានសមត្ថភាព និងចំណេះដឹងយ៉ាងពិតប្រាកដ ដើម្បីបំពេញសេចក្ដីត្រូវការរបស់អតិថិជនគោលដៅរបស់ខ្លួន ដែលក្នុងនោះរួមមានជាអាទិ៍ ៖ អតិថិជនដែលជាអ្នកប្រើប្រាស់ផ្ទាល់ អ្នកចែកចាយបន្ត ក៏ដូចជាចែកចាយទៅតាមបណ្តាទីផ្សារនៅទូទាំងប្រទេសទៅតាមតម្រូវការ។

សម្រាប់ព័ត៌មានលម្អិតសូមទាក់ទងតាមរយៈទូរស័ព្ទលេខ ៖ 077 555 554 / 077 783 168 / 087 783 168៕

 

តម្លៃលំនៅដ្ឋានឯកជននៅសិង្ហបុរីបន្តហក់ឡើងនៅត្រីមាសទី២ឆ្នាំនេះខណៈសេដ្ឋកិច្ចកំពុងងើបឡើងវិញ

ដោយៈ គៀតឈូ

សិង្ហបុរីៈ យោងតាមរបាយការន៍ ដែលចេញដោយអាជ្ញាធរអភិវឌ្ឍន៍ទីក្រុង (URA) របស់សិង្ហបុរី បានបង្ហាញនៅថ្ងៃព្រហស្បតិ៍ ទី១ ខែកក្កដានេះថា តម្លៃផ្ទះឯកជនរបស់សិង្ហបុរីបានកើនឡើង០,៩ភាគរយនៅក្នុងត្រីមាសទី២ ធៀបនឹងត្រីមាសទី១ ឆ្នាំ២០២១នេះ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១ ខែកក្កដា ឆ្នាំ២០២១។

ការកើនឡើងនេះមានល្បឿនយឺតបន្តិច បើធៀបនឹងតម្លៃកើនឡើង៣,៣ភាគរយ កាលពី២ឆ្នាំ កន្លះមុន។ ទោះយ៉ាងណា វានៅតែមានការកើនឡើងប្រចាំត្រីមាសទី៥ជាប់ៗគ្នា ទោះបីជាប្រទេសសិង្ហបុរីបានដាក់វិធានការការពារប្រឆាំងនឹងការរីករាលដាលនៃជំងឺកូវីដ១៩ នៅក្នុងសហគមន៍ កាលពីពាក់កណ្តាលខែឧសភាក៏ដោយ។

បើធៀបពីមួយឆ្នាំទៅមួយឆ្នាំ តម្លៃផ្ទះឯកជនបានកើនឡើង៧,៣ភាគរយ។ ការឡើងថ្លៃនៅត្រីមាសទី២នេះត្រូវបានជំរុញ ដោយផ្ទះដែលមិននៅតំបន់កៅក្រុង (OCR) ហើយបានកើនឡើងច្រើនបំផុត១,៨ភាគរយបើប្រៀបធៀបទៅនឹងកំណើន១,១ភាគរយក្នុងត្រីមាសមុន។

ប្រហែល៦០,៥ភាគរយនៃការលក់អចលនទ្រព្យឯកជនកាលពីត្រីមាសមុន គឺជាការលក់ផ្ទះបន្ត ខ្ពស់ជាង ៥៦,៦ភាគរយនៅក្នុងបីខែមុន។

លោកស្រី Christine Sun អនុប្រធានជាន់ខ្ពស់នៃអ្នកស្រាវជ្រាវនិងវិភាគនៅក្រុមហ៊ុន OrangeTee & Tie បាននិយាយថា មានតម្រូវការយ៉ាងខ្លាំងសម្រាប់ផ្ទះដែលនៅក្នុងតំបន់ជាយក្រុង។

អ្នកទិញកាន់តែច្រើនក៏បានជ្រើសរើសយកផ្ទះធំៗ ដោយ៣៩,៦ភាគរយនៃប្រតិបត្តិការទិញលក់ ត្រូវបានធ្វើឡើងចំពោះផ្ទះ ដែលមានទំហំ១២០០ការ៉េហ្វីត កើនឡើងពី៣៥,៨ភាគរយ។

លោកស្រី Sun បានមានប្រសាសន៍ថា ទីផ្សារអចលនទ្រព្យកំពុងត្រូវបានជំរុញដោយតម្រូវការខ្លាំងពីអ្នកទិញផ្ទះ ខណៈសេដ្ឋកិច្ចកំពុងងើបឡើងវិញ និងអត្រាការប្រាក់កម្ចីទាប៕

កម្ពុជារកចំណូលបានជាង៥០០លានដុល្លារពីនាំចេញស្រូវនិងអង្ករក្នុង១ឆមាសឆ្នាំនេះ

ដោយៈ លក្ខិណា

ភ្នំពេញៈ ក្នុងរយៈពេល៦ខែនៃឆ្នាំ២០២១នេះ ការនាំចេញកសិផលរបស់កម្ពុជាទៅកាន់ទីផ្សារអន្តរជាតិនៅតែទទួលបានកំណើងឡើងជាវិជ្ជមាន ដោយក្នុងរយៈពេល៦ខែនៃឆ្នាំ២០២១នេះ ការនាំចេញស្រូវនិងអង្កររបស់កម្ពុជាទទួលបានទឹកប្រាក់ជាង៥០០លានដុល្លារអាមេរិក។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ចេញផ្សាយនៅល្ងាចថ្ងៃទី៣០ ខែមិថុនា ឆ្នាំ២០២១នេះ។

ក្នុងរបាយការណ៍ដដែលបានឱ្យដឹងផងដែរថា ការនាំចេញស្រូវរបស់កម្ពុជា រយៈពេល៦ខែនេះ មានបរិមាណ១.៦៩២.៨១៣តោនទៅកាន់ប្រទេសវៀតណាមនិងប្រទេសអារ៉ាប់រួម មានការកើនឡើង៧២,១២ភាគរយគិតជាទឹកប្រាក់ដែលទទួលបានមកវិញចំនួន ជាង២៧៩,៣១លានដុល្លារអាមេរិក និងការនាំចេញអង្ករវិញមានបរិមាណ២៨០.៤៥០តោន មានការថយចុះប្រមាណ២៩,៤៧ភាគរយ គិតជាទឹកប្រាក់នាំចេញរយៈពេល៦ខែនេះមានចំនួន ២៣៧,៥៤លានដុល្លារអាមេរិក។

ក្នុងរបាយការណ៍ក៏បានបញ្ជាក់ថា ទីផ្សារអង្ករកម្ពុជារយៈពេល៦ខែនេះ មានគោលដៅនាំចេញចំនួន៤៧ប្រទេស ក្នុងនោះប្រទេសក្នុងសហភាពអឺរ៉ុបមានចំនួន២០ប្រទេស មានបរិមាណសរុប៦៧.១៣៦តោនថយចុះប្រមាណ៥០,៤៨ភាគរយ ប្រទេសចិនមានបរិមាណសរុប១៤៣.២៩៣តោន ថយចុះប្រមាណ៣,១៥ភាគរយ ទិសដៅប្រទេសក្នុងតំបន់អាស៊ានចំនួន៥មានបរិមាណ២៧.១៣៦តោន ថយចុះប្រមាណ៤៨,៧៩តោន និងទិសដៅប្រទេសដទៃទៀតចំនួន២១ប្រទេសមានបរិមាណសរុប៤២.៨៨៥តោនធ្លាក់ចុះ២៩,៨៦តោន។

បើតាមការបញ្ជាក់សហព័ន្ធស្រូវអង្ករកម្ពុជាបានឱ្យដឹងថា ការនាំធ្លាក់ចុះនៃការនាំចេញអង្ករទៅកាន់ទីផ្សារអន្តរជាតិជាប្រទេសទីផ្សារប្រទេសអឺរ៉ុប គឺបណ្ដាលមកពីកង្វះខាតនៃមធ្យោបាយដឹកជញ្ជូន និងតម្លៃនៃមធ្យោបាយដឹកជញ្ជូនឡើងថ្លៃ ដែលធ្វើឱ្យភាគីអ្នកបញ្ជាទិញបានស្នើសុំផ្អាកការដឹកជញ្ជូនទៅកាន់ពួកគេមួយរយៈសិន។

លោកស៊ិន ចន្ធីប្រធានសមាគមភស្តុភារកម្មកម្ពុជា បានថ្លែងថាមធ្យោបាយដឹកជញ្ជូនបានចាប់ផ្ដើមឡើងថ្លៃនៅក្នុងឆ្នាំ២០២១នេះ ដោយមួយកុងតឺន័របានឡើងដល់៨៥០០ដុល្លារឬដល់ជិត១ម៉ឺនដុល្លារខណៈកាលពីឆ្នាំមុនតម្លៃនេះ ត្រឹមតែ៣០០០ដុល្លារឬ៤០០០ដុល្លារអាមេរិកប៉ុណ្ណោះ។
លោកបានថ្លែងបន្តថា មួយវិញទៀត ក្រៅពីតម្លៃដឹកជញ្ជូនឡើងថ្លៃហើយ ក៏មិនសូវមានកប៉ាល់សម្រាប់ស្តុកទុកកុងតឺន័រផងដែរ ( No space )។ ទាំងនេះជាហេតុផលដែលធ្វើឱ្យការបញ្ជូនទំនិញពីកម្ពុជាទៅកាន់ទីផ្សារអន្តរជាតិមានការធ្លាក់ចុះជាពិសេសអង្ករពីព្រោះតែអង្ករជាទំនិញពិបាកក្នុងការដឹក៕

សម្ដេចតេជោប្រកាសយកចិនធ្វើជាបង្អែកយុទ្ធសាស្ត្រក្នុងការផ្គត់ផ្គង់វ៉ាក់សាំងប្រឆាំងនឹងជំងឺកូវីដ១៩

ដោយៈ វឌ្ឍនៈ

ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសថ្លែងសារពិសេសនៅព្រឹកថ្ងៃទី១ កក្កដា ២០២១ ប្រកាសយកចិនធ្វើជាបង្អែកយុទ្ធសាស្ត្រក្នុងការផ្គត់ផ្គង់វ៉ាក់សាំង ដើម្បីប្រយុទ្ធប្រឆាំងនឹងជំងឺកូវីដ១៩។

សម្ដេចតេជោបានថ្លែងថា បើគ្មានប្រទេសចិនទេ កម្ពុជាមិនអាចសម្រេចបាននូវការចាក់វ៉ាក់សាំងជូនពលរដ្ឋរហូតដល់ជាង៤លាននាក់នោះទេ ខណៈកម្មវិធីកូវ៉ាក់ ដែលជាជំនួយដល់កម្ពុជា ទើបតែផ្ដល់បានជាង៣២ម៉ឺនដូសឬ១៦ម៉ឺននាក់ប៉ុណ្ណោះ។

សម្ដេចតេជោមានប្រសាសន៍ថា កម្ពុជាត្រូវតែរកវ៉ាក់សាំងប្រឆាំងកូវីដ១៩ ជាជំហានដំបូងឱ្យបាន១០លាននាក់ និងត្រូវរកវ៉ាក់សាំងចាក់ឱ្យក្មេងអាយុក្រោម១៨ឆ្នាំបន្តទៀត ហើយមកដល់ពេលនេះ កម្បុជាទទួលរួចមកហើយជាង១១លាននាក់ និងបានចាក់ជូនពលរដ្ឋបាន៤លាន២សែននាក់ ស្មើនឹង៤២ភាគរយនៃចំនួនប្រជាពលរដ្ឋ១០លាននាក់ដែលត្រូវចាក់។

សម្ដេចតេជោមានប្រសាសន៍បន្តថា គម្រោងវ៉ាក់សាំងដែលកម្ពុជាត្រូវទទួល បើគិតទាំងជំនួយគឺ២៩លាន៧សែនដូស ប៉ុន្តែសម្ដេចស្នើឱ្យដកចេញពីការគិតគូរបស់សម្ដេច ទៅលើបញ្ហាពីកូវ៉ាក់៧លាននាក់ និងអូស្ត្រាលី៣លានដូស សរុប១០លានដូស និងបង្វិលទៅរកចិនធ្វើជាបង្អែកយុទ្ធសាស្ត្រសម្រាប់ការគ្រប់គ្រងវ៉ាក់សាំង ឯប្រភពផ្សេងទៀតជាប្រភពគាំទ្រ ហើយការសម្រេចចិត្តនេះគឺជាការត្រឹមត្រូវ ចង់អ្នកណាថាអីថាទៅ ពីព្រោះជាក់ស្ដែង កម្ពុជានឹងទទួលបានវ៉ាក់សាំងពីចិនជាង២០លានដូស។

បើតាមលោកវង្សី វិស្សុតរដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ឱ្យដឹងថា វ៉ាក់សាំងSinopharm នឹងមកដល់ប្រទេសចិននៅថ្ងៃទី៦កក្កដា ២០២១នេះ១លានដូសបន្ថែមទៀត ថ្ងៃទី១០កក្កដា ១លានដូសទៀត ហើយSinovac នឹងមកដល់កម្ពុជា៣លានដូសនៅថ្ងៃទី១០ខែកក្កដា ដូច្នេះក្នុងខែកក្កដា កម្ពុជានឹងទទួលបាន៥លានដូសពីប្រទេសចិន ហើយខែសីហានឹងទទួលបាន៨លានដូសនឹងធ្វើឱ្យគ្រប់ចំនួន២០លានដូស។

សម្ដេចតេជោបញ្ជាក់ថា បើសិនជាសម្ដេចមិនចាប់យកយុទ្ធសាស្ត្រយកចិនធ្វើជាបង្អែកវ៉ាក់សាំង ហើយវិលទៅនេះទៅនោះបន្តិច ម្ល៉េះមកដល់ពេលនេះ ប្រហែលជាកម្ពុជាចាក់វ៉ាក់សាងជូនពលរដ្ឋមិនបាន២០ម៉ឺននាក់ផង កុំថាឡើយដល់៤លាននាក់។

សម្ដេចតេជោបានថ្លែងដូច្នេះថា បើគ្មានមិត្តចិនទេ កុំថាឡើយដល់៤លាននាក់នៅពេលនេះ សូម្បីតែ២០ម៉ឺននាក់ក៏មិនបានផង ពីព្រោះ Covac ដែលសន្យាផ្ដល់ឱ្យយើងចំនួន ៧លានដូស មកដល់ពេលនេះបានមកដល់តែ៣២ម៉ឺន៤ពាន់ដូសតែប៉ុណ្ណោះ”។

សម្ដេចតេជោបញ្ជាក់បន្ថែមថា បើមិនឱ្យកម្ពុជាទៅពឹងចិន តើឱ្យទៅពឹងអ្នកណា ព្រោះនេះជាការពិត ជាក់ស្ដែងការសន្យារបស់ប្រទេសជាច្រើនក្នុងការផ្ដល់ជំនួយវ៉ាក់សាំងដល់កម្ពុជា តែធាតុពិតជាក់ស្ដែងមានតែវ៉ាក់សាំងចិនប៉ុណ្ណោះដែលបានផ្ដល់មកដល់កម្ពុជាជាបន្តបន្ទាប់៕

មិនគិតកម្រៃសេវាប្រចាំខែ និងសេវាប្រតិបត្តិលើការប្រើកម្មវិធីប្រាសាក់ម៉ូបាលប៊ែងឃីង

ដោយ សហការី

ភ្នំពេញ៖ គ្រឹះស្ថាន​មីក្រូ​ហិរញ្ញវត្ថុ​ ​ប្រា​សាក់​ ​ម​.​ក​ ​ដែល​ជា​គ្រឹះស្ថាន​ធំ​មួយ​ក្នុងចំណោម​គ្រឹះស្ថាន​ធនាគារ​ធំ​ៗ​ចំនួន​ 5 ​នៅ​កម្ពុជា​ ​បាន​ប្រកាស​ ថា គ្មានកម្រៃសេវាប្រចាំខែ និងគ្មានកម្រៃសេវាប្រតិបត្តិការ លើការប្រើប្រាស់កម្មវិធីប្រាសាក់ម៉ូបាលប៊ែងឃីង (PRASAC Mobile Banking App) និងអ៊ីនធឺណិតប៊ែងឃីង នោះឡើយ។ ហេតុនេះ អតិថិជនចាស់ និងអតិថិជនថ្មីទាំងអស់នឹងមិនចំណាយថ្លៃសេវាប្រចាំខែក្នុងការប្រើកម្មវិធីនោះទេ។

អ្នកប្រើប្រាស់​កម្មវិធីប្រាសាក់ម៉ូបាលប៊ែងឃីង អាច​ផ្ទេរ​ប្រាក់​ឆ្លង​ធនាគារ​ ផ្ទេរប្រាក់ក្នុងរង្វង់ប្រាសាក់ ​ទូទាត់​វិក្កយបត្រ​ ​បញ្ចូល​កាត​ទូរស័ព្ទ​ ​ស្កេន​ QR កូ​ដ​ទូទាត់​ថ្លៃ​ទំនិញ​និង​សេវា​ ​ពិនិត្យ​សមតុល្យ​​គណនី​បញ្ញើ​មានកាល​កំណត់​ ​ផ្ទេរ​ប្រាក់​ទៅ​វ៉ា​ឡេ​ត​ ​និង​មុខងារ​ផ្សេងៗ​ជាច្រើន​ទៀត​ដោយឥតគិតថ្លៃ។​

លោក​ ​សាយ​ ​សូ​នី​ ​អនុប្រធាន​នាយក​ប្រតិបត្តិ​របស់​ប្រា​សាក់​ ​មានប្រសាសន៍ថា​ ​« នេះជាការផ្តល់ជូនអតិថិជនទាំងចាស់និងថ្មីដែលប្រើប្រាស់កម្មវិធីប្រាសាក់ម៉ូបាលប៊ែងឃីង (PRASAC Mobile Banking App) ក្នុងអំឡុងពេលដ៏លំបាក​នៃ​ការ​រីក​រាលដាល​ជំងឺ​កូ​វី​ដ​-19 ដើម្បីពួកគាត់មិនចាំបាច់ប្រើប្រាស់ក្រដាសប្រាក់ពេលចាត់ចែងសាច់ប្រាក់របស់ខ្លួន។ យើងខ្ញុំក៏សូមចូលរួមជាមួយធនាគារជាតិនៃកម្ពុជា (NBC) ដើម្បីលើកកម្ពស់ការទូទាត់ដោយឥតប្រើសាច់ប្រាក់តាមរយៈប្រព័ន្ធអេឡិចត្រូនិកដែលមានស្រាប់ ដើម្បីប្រយុទ្ធប្រឆាំងនឹងការរីករាលដាលនៃជំងឺកូវីដ-19»។

លោកបានបញ្ជាក់ថា ​«យើងលើកទឹកចិត្តអតិថិជនឱ្យប្រើប្រាស់ការទូទាត់តាមអ៊ីនធឺណិត ដូចជាកម្មវិធីម៉ូបាលប៊ែងឃីង អ៊ីនធឺណិតប៊ែងឃីង និងគ្រប់ប្រព័ន្ធទូទាត់របស់ធនាជាតិនៃកម្ពុជា ដើម្បីបង្កើនគម្លាតបុគ្គលតាមតែអាចធ្វើទៅបាន និងកាត់បន្ថយការរីករាលដាលនៃជំងឺកូវីដ-19 ឱ្យនៅកម្រិតទាប​»។

លោកបានបន្ថែមទៀតថា ​«ជាមួយកម្មវិធីប្រាសាក់ម៉ូបាលប៊ែងឃីង អតិថិជនអាចផ្ទេរប្រាក់តាមបែបអេឡិចត្រូនិកបានរហូតដល់ 10 ម៉ឺនដុល្លារអាមេរិកក្នុងមួយថ្ងៃ ក្នុងរង្វង់ប្រាសាក់ ផ្ទេរប្រាក់ឆ្លងធនាគាររហូតដល់ 200 លានរៀល និង 5 ម៉ឺនដុល្លារអាមេរិក​ក្នុងមួយថ្ងៃតាមប្រព័ន្ធបាគងដោយមិនប្រើប្រាស់ក្រដាសប្រាក់ អាចស្កេនទូទាត់តាមបណ្ដាហាងនានា ទូទាត់វិក្កយបត្រ និងបញ្ចូលលុយក្នុងទូរស័ព្ទដៃបានយ៉ាងងាយស្រួល»។

ដើម្បីរីករាយនឹងបទពិសោធន៍ប្រតិបត្តិការធនាគារប្រកបដោយងាយស្រួលនិងសុវត្ថិភាពជាមួយកម្មវិធីប្រាសាក់ម៉ូបាលប៊ែងឃីង អតិថិជនស្នើសុំភ្ជាប់ដំណើរការកម្មវិធីនេះដែលភ្ជាប់ជាមួយនឹងគណនីសន្សំ។ សម្រាប់ព័ត៌មានបន្ថែម សូមចូលទៅកាន់ https://bit.ly/3ygtsao ឬ សូមទាក់ទងទូរស័ព្ទលេខ 086 999 911 ឬ 023 999 911 ឬ 0969 999 911.

សូមទាញយកកម្មវិធី PRASAC Mobile Banking ពី App Store: https://apple.co/3wbzgjD  និង Google Play: https://play.google.com/store/apps ។

សម្តេចតេជោៈ កម្ពុជាចំណាយថវិកាជាង៤០លានដុល្លារដើម្បីជួយដល់ពលរដ្ឋជាង៧០ម៉ឺនគ្រួសារក្នុងអំឡុងពេលកូវីដ១៩

ដោយៈ ប៊ី

ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី១ ខែកក្កដា ឆ្នាំ២០២១ មានប្រសាសន៍បញ្ជាក់ថា កម្ពុជាបានចំណាយថវិកា ជាង៤០លានដុល្លារ ដើម្បីចិញ្ចឹមពលរដ្ឋជាង៧០ម៉ឺនគ្រួសារ ក្នុងអំឡុងពេលកូវីដ១៩។

សម្តេចតេជោ បានថ្លែងបន្តថា ក្រុមការងាររាជរដ្ឋាភិបាល បានធ្វើកម្មភាព ចែកស្បៀងជូនដល់ពលរដ្ឋនៅពេលនោះ ព្រោះថា ប្រសីនបើពេលនោះ ចែកលុយឱ្យពួកគាត់ តើគាត់ទិញអាហារនៅទីណា ព្រោះយើងបានបិទខ្ទប់អស់ហើយ។

សម្តេចតេជោ ហ៊ុន សែន ក៏បានឆ្លើយតបទៅកាន់ អ្នកចោទប្រកាន់មួយចំនួនថា រដ្ឋាភិបាលកម្ពុជា ដឹកនាំដោយសម្តេចតេជោ នៅមិនទាន់ខ្វះលុយបើកប្រាក់ខែ ឱ្យមន្រ្តីរាជការនោះទេ។

សម្តេចតេជោ មានប្រសាសន៍ថា “បើយកលុយទៅឱ្យគាត់ ក៏គាត់មិនដឹងទៅចាយនៅឯណាដែរ ព្រោះយើងបិទខ្ទប់ទៅហើយ យើងបានផ្គត់ផ្គង់ស្បៀងជាង៤០ម៉ឺនគ្រូសារ នៅតំបន់បិទខ្ទប់។ ចំណាយជាង ៤០លានដុល្លារ ក្នុងការចិញ្ចឹមពលរដ្ឋជាង ៧០ម៉ឺគ្រួសារ។ យើងមិនទាន់ក្ស័យធនទេ យើងនៅតែបើកលុយបានឱ្យមន្រ្តីរាជការ ២អាទិត្យម្តង មិនដូចការលើកឡើង ពីមតិមួយចំនួននោះទេ”៕