ដោយៈគង់ ម៉ាលីន

          ភ្នំពេញៈ រដ្ឋបាលខេត្តព្រះសីហនុបានចាប់ផ្តើមរៀបចំនិមិត្តសញ្ញាលើក្រុង ស្រុក ឃុំសង្កាត់របស់ខ្លួនជាផ្លូវការហើយ។

នាយករដ្ឋបាលសាលាខេត្តព្រះសីហនុ លោកឯម ភាពបានដឹកនាំកិច្ចប្រជុំពិភាក្សារៀបចំនិមិត្តសញ្ញារដ្ឋបាលក្រុងស្រុក ឃុំសង្កាត់ទូទាំាំងខេត្តព្រះសីហនុ ដោយបានមានប្រសាសន៍បើកកិច្ចប្រជុំ ពិនិត្យពិភាក្សានិមិត្តសញ្ញារបស់រដ្ឋបាលក្រុងស្រុកទាំង៥ ដែលក្រុមការងារបានធ្វើការប្រជុំពិភាក្សា ចូលរួមកែលម្អនិមិត្តសញ្ញារដ្ឋបាលក្រុង-ស្រុកជាបន្តបន្ទាប់នាពេលកន្លងមក និមិត្តសញ្ញារដ្ឋបាលក្រុងស្រុកនីមួយៗ ត្រូវមានការបញ្ជាក់ពីប្រវត្តិនៃនិមិត្តសញ្ញា សក្តានុភាព និងភូមិសាស្ត្រក្រុង-ស្រុកនីមួយៗ ស្របទៅនឹងនិមិត្តសញ្ញា ម្យ៉ាងទៀតនិមិត្តសញ្ញាក្រុងស្រុកទាំង៥ ត្រូវរចនាអក្សរ និងខ្លឹមសារឯកភាពគ្នា ដើម្បីដាក់ជូនអភិបាលខេត្ត សម្រេចមុននឹងបញ្ជូនបន្តសុំសេចក្តីសម្រេច ពីក្រសួងមហា​ផ្ទៃយកមកប្រើប្រាស់ជាផ្លូវការនាពេលខាងមុខ ។

លោកបានបន្តថា កន្លងមកយើងបានបង្កើតក្រុមការងាររៀបចំ និមិត្តសញ្ញារដ្ឋបាលក្រុង ស្រុក ហើយការងារនេះ បានអូសបន្លាយរយ:ពេលយូរខែហើយ ដើម្បីធ្វើការប្រជុំពិភាក្សាធ្វើការកែសម្រួល និងបញ្ជាក់ពីខ្លឹមសារ និងអត្ថន័យនៃរូបសញ្ញា និងសក្តានុពលរបស់ក្រុងស្រុកនីមួយៗ ដូច្នេះក្រុងស្រុកនីមួយៗត្រូវបំពេញឯកសារឱ្យបានលឿន ដើម្បីដាក់ជូន លោកអភិបាលខេត្តពិនិត្យសម្រេច និងបន្តបញ្ជូនទៅក្រសួងមហាផ្ទៃសម្រេចយកមកប្រើប្រាស់ជាផ្លូវការ៕

          ដោយៈគង់ សូរិយា

          ភ្នំពេញៈ រដ្ឋាភិបាលកម្ពុជាបានកំណត់យកកំពង់ផែ ជាទិសដៅនៃការរអភិវឌ្ឍឧស្សាហកម្ម សម្រាប់ការពង្រីកការដឹកជញ្ជូនទំនិញ ទៅកាន់ទីផ្សារបណ្តាប្រទេសក្នុងតំបន់ និងពិភពលោកទាំងមូល។

យោងតាមឯកសារព៌តមានរបស់ក្រសួងសាធារណៈការ និងដឹកជញ្ជូនដែលបាន​បង្ហាញលើបណ្តាញទំនាក់ទំនងសង្គមផ្លូវការរបស់ខ្លួន កាលពីចុងសប្តាហ៍មុនបានបង្ហាញថា ក្នុងរយៈពេលប៉ុន្មានឆ្នាំចុងក្រោយនេះ សកម្មភាពដឹកជញ្ជូនតាមផ្លូវទឹករបស់កម្ពុជា មានវិសាលភាពយ៉ាងធំធេង ជាពិសេសការលើកដាក់ទំនិញនៅកំពង់ផែ ក្រុងព្រះសីហនុកំពុងមានសកម្មភាព យ៉ាងមមាញឹកជាមួយនឹងបទពិសោធន៍ និងមានការទទួលខុសត្រូវខ្ពស់របស់កំពង់ផែ។

កំពង់ផែស្វយ័តក្រុងព្រះសីហនុ កំពុងដើរតួនាទីយ៉ាងសំខាន់ ក្នុងការកសាងជាតិមាតុភូមិ ដោយបានរួមចំណែករក្សាកំណើនសេដ្ឋកិច្ចជាតិប្រចាំឆ្នាំក្នុងរង្វង់៧% ប្រកប​ដោ​យចីរភាព ជាកំពង់ផែទឹកជ្រៅតែមួយគត់របស់កម្ពុជា ជាដង្ហើមសេដ្ឋកិច្ចដ៏សំខាន់បំផុត បានជំរុញកំណើនសេដ្ឋកិច្ចជាតិឱ្យឆ្ពោះទៅមុខ។

មានទីតាំងអំណោយផលឋិតនៅក្នុងតំបន់ឆ្នេរសមុទ្រ ខេត្តព្រះសីហនុ ដែលជាទីតាំងល្អបំផុត និងធានាបាននូវការការពារដ៏រឹងមាំពីគ្រោះធម្មជាតិ។ បរិមាណទំនិញឆ្លងកា​ត់ឧបករណ៍លើកដាក់នៅក្នុងកំពង់ផែនេះ មានការកើនឡើងគួរឱ្យកត់សម្គាល់ពីមួយឆ្នាំ​ទៅមួយឆ្នាំ ធ្វើឱ្យប្រាក់ចំណូលរបស់កំពង់ផែ ក៏ដូចជាប្រាក់ចំណូលរបស់ជាតិមានការកើតឡើងជាលំដាប់។

ឯកសារដដែលបានឲ្យដឹងថា ស្របពេលជាមួយគ្នានេះដែរ បច្ចុប្បន្នក្រសួងសាធារណការ និងដឹកជញ្ជូនកំពុងរៀបចំការពង្រីកកំពង់ផែ និងបង្កើតប្រព័ន្ធកំពង់ផែ EDI (Electronic Data Intercharge) ដែលនឹងជួយសម្រួលដល់នីតិវិធីផ្លូវ ការនៃនាវាចេញចូលកំពង់ផែកម្ពុជាក្នុងគោលបំណងពន្លឿននីតិវិធី និងកាត់បន្ថយថ្លៃដើមដឹកជញ្ជូនទំនិញ តាមផ្លូវសមុទ្រ ការស្តុកទំនិញ និងអាចឆ្លើយតបទៅនឹងកំណើនវិនិយោគពីបរទេស ជាពិសេស សំដៅធ្វើឱ្យកម្ពុជាក្លាយជាទីតាំងយុទ្ធសាស្ត្រមួយ ប្រកបដោយការប្រកួតប្រជែងនៅតំបន់អាស៊ី ទាក់ទងនឹងវិស័យ ភស្តុភារកម្ម និងការដឹកជញ្ជូន។

ជាងនេះទៅទៀត កម្ពុជាគ្រោងនឹងពង្រីកសមត្ថភាព កំពង់ផែស្វយ័តក្រុងព្រះសីហនុបន្ថែមទៀត តាមរយៈ ការកសាងចំណតផែកុងតឺន័រថ្មីមួយជម្រៅទឹក១៤,៥ម៉ែត្រ ប្រវែង៣៥០ម៉ែត្រ ដែលនឹងធានាដល់ការចូល ចតនាវាកុងតឺន័រខ្នាតធំៗ មានចំណុះរហូតដល់ទៅ ៦០.០០០តោន ឬស្មើនឹង៩៣% នៃចំនួននាវាប្រចាំ តំបន់អាស៊ី-ប៉ាស៊ីហ្វិក នៅដើមឆ្នាំ២០២៣ ដើម្បីឆ្លើយតបទៅនឹងការកើនឡើងនៃបរិមាណកុងតឺន័រ ឆ្លងកាត់កំពង់ផែមួយនេះក្នុងពេលបច្ចុប្បន្ន និងនាពេលអនាគត។

សុខសន្តិភាព និងស្ថិរភាពនយោបាយ ក្រោមការដឹកនាំប្រកបដោយគតិបណ្ឌិត របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កម្ពុជាត្រូវបានគេចាត់ទុកជាប្រទេស ដែលមានកំណើនសេដ្ឋកិច្ចរីកចម្រើនឆាប់រហ័ស នៅក្នុងតំបន់អាស៊ាន៕

ដោយៈ ប៊ី

ភ្នំពេញៈ អ្នកជំនាញសេដ្ឋកិច្ចបានលើកឡើងថា កម្ពុជានឹងទាក់ទាញវិនិយោគិនជាច្រើនពីសហរដ្ឋអាមេរិកនា ពេលអនាគត តាមរយៈការវិនិយោគលើផ្នែកអេឡិចត្រូនិច និងផ្នែកឧស្សាហកម្មធុនមធ្យមនៅកម្ពុជា ទៅតាមរបត់នៃចន្តរសេដ្ឋកិច្ច។

អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា លោកបណ្ឌិតគី សេរីវឌ្ឍន៍បានថ្លែងថា នៅក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនរបស់អាមេរិកទទួលជោគជ័យនៅកម្ពុជាមានជាច្រើន ដែលកត្តាទាំងនេះបានកើតឡើងពីទំទុកចិត្ត ក្នុងនោះសម្រាប់បរិបថនៃប្រជាជនកម្ពុជាវិញ គឺនៅតែស្រឡាញ់គោលការណ៍ និងការស្រឡាញ់គុណភាពផលិតផលរបស់សហរដ្ឋអាមេរិកជាដើម។

លោកបណ្ឌិតបានបន្តថា ក្នុងនោះចំពោះភាពជោគជ័យរបស់ក្រុមហ៊ុនអាមេរិក ក៏ដោយសារមានការរួមចំណែករវាងរាជរដ្ឋាភិបាលរបស់ប្រទេសទាំងពីរ ការប្រកួតប្រជែងនៅកម្ពុជាស្នើរភាពគ្នាជាដើម ដែលនាំឲ្យ សហរដ្ឋអាមេរិកក្នុងពេលបច្ចុប្បន្ន បានក្លាយជាដៃគូយ៉ាងសំខាន់ នៅក្នុងវិស័យពាណិជ្ជកម្ម ។

លោកបណ្ឌិតបានបន្តទៀតថា ពាក់ព័ន្ធការវិនិយោគនេះ កម្ពុជាគឺជាប្រទេសដែលមានទីផ្សារតូច ក្នុងនោះកម្ពុជាក៏បានដើរក្រោយគេបន្តិចនៅក្នុងតំបន់អាស៊ានដូចជា ប្រទេសវៀតណាម និងប្រទេសថៃជាដើម តែនៅពេលខាងមុខ លោកបណ្ឌិត រំពឹងថា វិនិយោគិនសហរដ្ឋអាមេរិក នឹងមកវិនិយោគនៅកម្ពុជាកាន់តែច្រើន ជាពិសេសរុញការវិនិយោគលើវិស័យអេឡិចត្រូនិច នឹងឧស្សាហកម្មធុនមធ្យមដូចជា ផ្នែកតម្លើងរថយន្ត និងការតម្លើងគ្រឿងចក្រផ្សេងៗទៀតនៅកម្ពុជា គឺស្របតាមរបត់នៃចន្តរសេដ្ឋកិច្ច ខណៈប្រទេសមួយចំនួននឹងអាចដើរផុតវិស័យនេះ ។

លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជាបានថ្លែងប្រាប់នៅថ្ងៃទី១៧ ខែឧសភា ឆ្នាំ២០២១នេះថា កម្ពុជាទទួលបានភាពអនុគ្រោះពន្ធពីអឺរ៉ុប ក៏ដូចGSP ពីអាមេរិក និងទទួលប្រព័ន្ធGSP ពីអង់គ្លេស ហើយក៏បានចុះកិច្ចព្រមព្រៀងពាណិជ្ជកម្មសេរីជាមួយច្រើនជាបណ្តាប្រទេសមួយចំនួន។

លោកឧកញ៉ាបានថ្លែងថា ទាំងអស់នេះ ជាកត្តាដែលទាក់ទាញវិនិយោគប្រទេសកម្ពុជា ស្របពេលដែលអាមេរិក និងចិនដំឡើងពន្ធលើគ្នាទៅវិញទៅមក ក្នុងសង្រ្គាមពាណិជ្ជកម្ម ដូច្នេះវាធ្វើឱ្យមានប្រទេសណា ដែលមានភាពអនុគ្រោះពន្ធ ដូចជាប្រទេសកម្ពុជា គឺគេសម្លឹងឃើញហើយ។

លោកឧកញ៉ាបានថ្លែងបន្តទៀតថា ដើម្បីអាចឱ្យក្រុមហ៊ុនអាមេរិកនាំចេញទៅចិនងាយស្រួល គឺមានក្រុមហ៊ុនមកផលិតនៅកម្ពុជា ព្រោះមានភាពអនុគ្រោះ ហើយដើម្បីងាយស្រួលក្នុងការនាំចេញអាមេរិក ចិននឹងមកផលិតនៅកម្ពុជាផងដែរ ដោយសារកម្ពុជាទទួលបានប្រព័ន្ធអនុគ្រោះពន្ធGSPនាំចេញទៅអាមេរិក។

ដូច្នេះភាពទាក់ទាញទាំងនេះហើយ ដែលធ្វើឱ្យទាំងក្រុមហ៊ុនអាមេរិក និងចិនកំពុងសម្លឹងឃើញកម្ពុជាយើង ហើយមិនត្រឹមតែក្រុមហ៊ុនអាមេរិក និងចិនប៉ុណ្ណោះទេ ប៉ុន្តែថែមទាំងក្រុមហ៊ុនពីប្រទេសផ្សេងៗ ដែលមានបំណងចង់នាំចេញទៅប្រទេសមហាអំណាចសេដ្ឋកិច្ចទាំងពីរនេះ ក៏សម្លឹងរកប្រទេសកម្ពុជាជាទីតាំងផលិតផងដែរ។

ទាក់ទងនិងការវិនិយោគរបស់ក្រុមហ៊ុនមកពីសហរដ្ឋអាមេរិកនៅកម្ពុជា បើតាមរបាយការណ៍ក្រសួងពាណិជ្ជកម្ម បានបង្ហាញឲ្យដឹងថា គិតមកដល់បច្នុប្បន្ន ចំនួនក្រុមហ៊ុន និងសហគ្រាសរបស់សហរដ្ឋអាមេរិក ដែលបានចុះបញ្ជីនៅក្រសួងពាណិជ្ជកម្មសរុបមានចំនួន៤២៧ ក្នុងនោះក្រុមហ៊ុនមានចំនួន៣៨៧ និងសហគ្រាសមានចំនួន៤០សហគ្រាស។

ចំពោះក្រុមហ៊ុនដែលបានចុះបញ្ជី និងកំពុងប្រតិបត្តិការនៅកម្ពុជា, នាពេលថ្មីៗនេះ ឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា បានលើកក្នុងពិរព័ណ៌តាមរយៈអេឡិចត្រូនិច ថា ក្រុមហ៊ុនធំៗរបស់សហរដ្ឋអាមេរិកដូចជា៖ ក្រុមហ៊ុន Ford, Facebook, Coca-Cola និងក្រុមហ៊ុន Piza ជាដើម បច្ចុប្បន្នកំពុងទទួលបានជោគជ័យនៅកម្ពុជា ក្នុងនោះឯកឧត្តមសង្ឃឹមថា នឹងមានក្រុមហ៊ុនសហរដ្ឋអាមេរិកផ្សេងៗទៀត អាចទទួលបានភាពរីកចម្រើនកាន់តែច្រើននៅក្នុងមុខរបរផងដែរ៕

ដោយៈ ប៊ី

ភ្នំពេញៈ រដ្ឋាភិបាលសហរដ្ឋអាមេរិក តាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) បានផ្តល់ថវិកាជាង១១លានដុល្លារអាមេរិក ដើម្បីជួយប្រទេសកម្ពុជាក្នុងការឆ្លើយតបទៅនឹងការរីករាលដាលនៃជំងឺកូវីដ១៩។ នេះបើយោងតាមសេចក្តីប្រកាសព័ត៌មានរបស់ USAID កាលពីសប្តាហ៍មុន។

ធនធានបន្ថែមទាំងនេះផ្អែកលើការគាំទ្រដែលមានស្រាប់ដល់ប្រជាជនកម្ពុជា ដែលភាគច្រើនត្រូវបានសម្របសម្រួល ដើម្បីឆ្លើយតបទៅនឹងបញ្ហាប្រឈមដែលបណ្តាលមកពីជំងឺរាតត្បាតសាកល។

ជំនួយសម្រាប់ការឆ្លើយតបនឹងជំងឺកូវីដ១៩ បានជួយប្រទេសកម្ពុជាក្នុងការការពាររក និងឆ្លើយតបចំពោះការរាតត្បាតរាតត្បាត។ ធនធានទាំងនេះបានជួយប្រទេសកម្ពុជា លលើការចូលរួមសហគមន៍ ការការពារការឆ្លង ការគ្រប់គ្រងឆ្លង ប្រព័ន្ធមន្ទីរពិសោធន៍ និងទំនិញចាំបាច់។

USAID ក៏បានលើកឡើងពីផលប៉ះពាល់ផ្នែកសេដ្ឋកិច្ចនិងសង្គមភ្លាមៗ និងបន្ទាប់បន្សំ ដែលបណ្តាលមកពីជំងឺកូវីដ១៩ ទៅលើប្រជាជនកម្ពុជាជា ពិសេសកុមារ និងក្រុមគ្រួសារដែលងាយរងគ្រោះ។ ទីភ្នាក់ងារ USAID បាននិងកំពុងធ្វើការ ដើម្បីកាត់បន្ថយផលប៉ះពាល់នៃការបិទសាលារៀននៅលើការអប់រំរបស់កុមារ ក្នុងកំឡុងពេលមានជំងឺរាតត្បាត តាមរយៈការគាំទ្រសម្រាប់ការរៀនសូត្រតាមអនឡាញ និងចែករំលែកសម្ភារៈអប់រំ និងព័ត៌មាននៅលើប្រព័ន្ធផ្សព្វផ្សាយសង្គម និងវេទិកាផ្សេងទៀត។

ទីភ្នាក់ងារ USAID ក៏បានគាំទ្រដល់វិស័យសាធារណៈ និងឯកជន និងសង្គមស៊ីវិល ក្នុងការរួមបញ្ចូលការការពារកុមា ជាមួយសេវាកម្មវេជ្ជសាស្រ្ត និងសង្គមដើម្បីធានាថាកុមារត្រូវបានការពារ។ លើសពីនេះទៀត ដើម្បីលើកកម្ពស់ជីវភាពសេដ្ឋកិច្ចសម្រាប់ប្រជាជនកម្ពុជាដែលរងផលប៉ះពាល់ដោយជំងឺរាតត្បាត ទីភ្នាក់ងារ USAID កំពុងពង្រីកការងារជាមួយវិស័យឯកជន តាមរយៈការបង្កើតទំនាក់ទំនងទីផ្សារនៅក្នុងកសិកម្មអេកូទេសចរណ៍ និងផលិតផលមិនមែនព្រៃឈើ។

ការខិតខំរបស់ទីភ្នាក់ងារ USAID ឆ្លុះបញ្ចាំងពីភាពជាដៃគូយូរអង្វែងរបស់សហរដ្ឋអាមេរិកជាមួយប្រជាជនកម្ពុជា។ ក្នុងរយៈពេលជាង៣ទសវត្សចុងក្រោយនេះ ទីភ្នាក់ងារ USAID បានវិនិយោគទឹកប្រាក់ជាង១,៥ពាន់លានដុល្លារនៅកម្ពុជា ក្នុងនោះមានថវិកាជាង៤០០លានដុល្លារអាមេរិកក្នុងការជួយដោះស្រាយអត្រាមរណភាពទារកអាយុក្រោម៥ឆ្នាំ អត្រាមរណភាពមាតា ជំងឺគ្រុនចាញ់ របេង អេដស៍ កង្វះអនាម័យ កង្វះអាហារូបត្ថម្ភ ភាពក្រិន និងដើម្បីបង្កើនសមត្ថភាពរបស់ប្រទេសកម្ពុជាក្នុងការផ្តល់ហិរញ្ញវត្ថុ និងគ្រប់គ្រងភ័ស្តុភារ និងព័ត៌មានសម្រាប់ប្រព័ន្ធសុខាភិបាលរបស់ខ្លួន។

ទីភ្នាក់ងារ USAID បានជួយពង្រឹងគោលនយោបាយ និងប្រព័ន្ធសុខាភិបាលជាតិរបស់ប្រទេសកម្ពុជា ពង្រីកការផ្សព្វផ្សាយតាមសហគមន៍ និងលើកកម្ពស់ការទទួលបានសេវាសុខភាពប្រកបដោយគុណភាព។ ទីភ្នាក់ងារ USAID ក៏បានជួយក្នុងការពង្រីកមូលនិធិសមធម៌សុខភាពនៅទូទាំងប្រទេស ដែលជាគម្រោងគាំពារសុខភាពសង្គមនៅកម្ពុជា ដែលបានអនុញ្ញាតឱ្យប្រជាជនកម្ពុជាក្រីក្រជាង៣លាននាក់ ទទួលបានសេវាសុខភាពដោយមិនគិតថ្លៃ៕