ការវិនិយោគលើផ្សារហ៊ុននៅចិនស្ថិតក្នុងកំណើនទាបបំផុតមិនធ្លាប់មាន

ដោយៈ ប៊ី

ភ្នំពេញៈ ចំនួនអ្នកវិនិយោគថ្មីរបស់ចិនបានកើនឡើងក្នុងខែមេសា ក្នុងល្បឿនយឺតបំផុត គិត្រឹមរយៈពេល១៣ខែចុងក្រោយ ដោយសារសន្ទុះហក់ឡើងនៃទីផ្សារភាគហ៊ុនយឺត និងការព្រួយបារម្ភចំពោះការរឹតបន្តឹងគោលនយោបាយ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៥ ខែឧសភា ឆ្នាំ២០២១។

ទិន្នន័យពីក្រុមហ៊ុនបញ្ញើមូលប័ត្រ និងសាជីវកម្មចិន (CSDC) បានបង្ហាញថា ចំនួនអ្នកវិនិយោគថ្មីសម្រាប់ទីផ្សារហ៊ុនកម្រិតA បានកើនឡើងត្រឹមតែ១,៧លាននាក់ ក្នុងខែមេសា ឬ ៣,១ ភាគរយបើធៀបនឹងរយៈពេលដូចគ្នាកាលពីឆ្នាំមុន ដែលជាអត្រាទាបបំផុតចាប់តាំងពីខែមីនាឆ្នាំ២០២០។

ក្រុមហ៊ុនបានឱ្យដឹងថា ចំនួនវិនិយោគិនសរុបមានចំនួន១៨៥,៦លាននាក់ គិតត្រឹមខែមេសា កើនឡើង១២,៥ភាគរយ។

សន្ទស្សន៍ភាគហ៊ុនរបស់ក្រុមហ៊ុន CSI300 បានកើនឡើង ២,៤ ភាគរយកាលពីថ្ងៃសុក្រ ដោយសារការព្រួយបារម្ភអំពីការរឹតបន្តឹងគោលនយោបាយ និងភាពតានតឹងរវាងចិននិងអាមេរិក ប៉ុន្តែបានកើនឡើងខ្ពស់បំផុតដល់១៤,៨ភាគរយ កាលពីថ្ងៃទី១៨ខែកុម្ភៈ ។

សន្ទស្សន៍នេះត្រូវបានជួញដូរនៅក្នុងតិចតូច ចាប់តាំងពីដើមខែមីនា នៅពេលដែលវាបានធ្លាក់ចុះដល់ទៅ១៧ភាគរយ ពីកម្រិតខ្ពស់បំផុតរបស់ខ្លួន ដែលធ្វើឱ្យវិនិយោគិនក្នុងផ្សារហ៊ុនធ្លាក់ចុះ៕

តើទិសដៅវិនិយោគអចលនទ្រព្យណាមួយនៃទីក្រុងភ្នំពេញនឹងផ្តល់ផលចំណេញខ្ពស់នាពេលអនាគត

ដោយៈ ប៊ី

ភ្នំពេញៈ នៅពេលនិយាយអំពីការវិនិយោគលើអចលនទ្រព្យ ពេលវេលានិងទីតាំងបង្កើតជាសសរស្តម្ភពីរសំខាន់នៃយុទ្ធសាស្ត្រវិនិយោគជោគជ័យ ហើយប្រសិនបើអ្នកធ្វើការវិនិយោគតាមពេលវេលា និងទីតាំងត្រឹមត្រូវ អ្នកកទទួលលទ្ធផលជាទីពេញចិត្ត។

ការទិញអចលនទ្រព្យសម្រាប់ផលចំណេញ មានរលក្ខណៈខុសៗជាច្រើន ហើយវានឹងបង្កើតផលចំណេញជាច្រើនពីការវិនិយោគ ដូច្នេះវាសំខាន់ណាស់ដើម្បីសិក្សាពីនិន្នាការ និងធ្វើការជ្រើសរើសត្រឹមត្រូវ។
ឥឡូវសំណួរដ៏សំខាន់នាពេលនេះគឺថា តើអ្នកគួរវិនិយោគនៅទីណា និងនៅពេលណា?

នៅក្នុងត្រីមាសទី៤ ឆ្នាំ២០២០ ការសិក្សារបស់ក្រុមហ៊ុន CBRE Cambodia បានបង្ហាញថា មានគម្រោងអចលនទ្រព្យចំនួន២៧៩ ដែលកំពុងសាងសង់នៅទូទាំងរាជធានីភ្នំពេញ រួមមានគម្រោងបុរីចំនួន១៣២ គម្រោអចលនទ្រព្យតម្លៃសមរម្យចំនួន៤១ គម្រោងតម្លៃមធ្យម៧៨ និងគម្រោងតម្លៃថ្លៃ១៣។ គម្រោងខុនដូមានចំនួន១៣ ក្នុងនោះរួមមានគម្រោងខុនដូតម្លៃសមរម្យចំនួន៤ និងគម្រោងខុនដូតម្លៃមធ្យមចំនួន៩។ ដោយមានជំរើសច្រើន វាអាចពិបាកក្នុងការសម្រេចថាតើអ្នកវិនិយោគប្រាក់របស់អ្នកនៅកន្លែងណា។

នាយកផ្នែកលំនៅដ្ឋានរបស់ក្រុមហ៊ុន CBRE Cambodia លោក David Pen មានប្រសាសន៍ថា មានគម្រោងរាប់រយ ដែលកំពុងអភិវឌ្ឍនៅទូទាំងទីក្រុងក្នុងរយៈពេល៥ឆ្នាំកន្លងមកនេះ ប៉ុន្តែតំបន់ដែលធ្វើឲ្យលោកកត់សម្គាល់ខ្លាំងជាងគេគឺការកើនឡើងខ្លាំងនៅតំបន់ភាគខាងត្បូងនៃទីក្រុង។

លោក David បានលើកឡើងពីអាកាសយានដ្ឋានអន្តរជាតិភ្នំពេញថ្មី ដែលជាកាត្តាលីករ អមជាមួយនឹងគម្រោង Aeon 3 ផ្លូវក្រវ៉ាត់ក្រុងទី៣ និងវត្តមានអាជីវកម្មធំៗ ជាច្រើនទៀត ដែលជាគម្រោងលំនៅដ្ឋាន ដែលជំរុញឱ្យតម្លៃដីធ្លី និងតម្លៃអចលនទ្រព្យកើនឡើងនៅភាគខាងត្បូង។

លោកបានសន្និដ្ឋានថា “មិនមានអ្វីគួរឱ្យសង្ស័យនៅក្នុងចិត្តរបស់ខ្ញុំទេ នេះគឺជាតំបន់ដែលមានសន្ទុះនាពេលបច្ចុប្បន្ននេះ ហើយជាមួយនឹងគម្រោង និងសកម្មភាពសេដ្ឋកិច្ចជាច្រើនទៀតឆ្ពោះទៅទិសខាងត្បូង និន្នាការនេះមើលទៅមាននិរន្តរភាព”។

ដូចពាក្យចាស់ពោលថា “គ្មានពេលវេលាណាប្រសើរជាងបច្ចុប្បន្នទេ” លោក David និយាយថា ស្ថានភាពបច្ចុប្បន្នបានបង្កើតឱកាសកាន់តែច្រើន សម្រាប់អ្នកទិញ ក្នុងការទទួលបានទិញលក់ដ៏ល្អប្រសើរ។ នៅក្នុងលក្ខខណ្ឌនៃការវិនិយោគអចលនទ្រព្យ Best Deal មានន័យថា មិនមែនជាតម្លៃដែលទទួលបាននោះទេ ប៉ុន្តែតម្លៃ ដែលបានទិញ ហើយរួមបញ្ចូលទាំងផែនការទូទាត់ អត្រាការប្រាក់ ការ Promotion គុណភាព ការធានា និងសក្តានុពលសម្រាប់ការវិនិយោគនាពេលអនាគត។

លោកបានថ្លែងបន្តថា “លក្ខណៈ នៃការរីករាលដាលនៃជំងឺរាតត្បាតមកលើសេដ្ឋកិច្ច និងការកើនឡើងនៃការប្រកួតប្រជែងមានន័យថា អ្នកអភិវឌ្ឍន៍កំពុងផ្តល់ជូននូវផែនការទូទាត់ ដែលអាចបត់បែនបាន ដែលមានភាពសមរម្យនឹងអ្នកគ្រប់គ្នា។ ធនាគារក៏កំពុងផ្តល់អត្រាការប្រាក់គួរឱ្យទាក់ទាញកាន់តែខ្លាំងឡើង និងលក្ខខណ្ឌផ្តល់ប្រាក់កម្ចីពិសេស ជាពិសេសសម្រាប់គម្រោងបុរី”។

ការណែនាំរបស់លោក David សម្រាប់អ្នកវិនិយោគអចលនទ្រព្យគឺថា ទោះបីមានអ្វីកើតឡើងនៅជុំវិញយើងទាក់ទងសេដ្ឋកិច្ច ឬជំងឺត្បាតក៏ដោយ វិនិយោគិនឆ្លាតវៃតែងតែដឹងថា ពេលណា និងកន្លែងណា ក្នុងការស្វែងរកឱកាសល្អបំផុត។

លោក David បានថ្លែងថា “ចំពោះខ្ញុំ យោងទៅតាមទិន្នន័យ និងការសិក្សាទីផ្សារ ដែលខ្ញុំមាននៅក្នុងដៃ ពេលវេលាដើម្បីវិនិយោគគឺនៅពេលនេះ ហើយភាគខាងត្បូងនៃទីក្រុងគឺកន្លែងល្អប្រសើរសម្រាប់ការវិនិយោគ។ បើខ្ញុំមិនខុសទេ ការវិនិយោគលើអចលនទ្រព្យតែងតែល្អ ប្រសិនបើអ្នកធ្វើវាតាមរបៀបឆ្លាតវៃ ប៉ុន្តែវាអាស្រ័យលើចំនួនទឹកប្រាក់ ដែលអ្នកចង់បានពីវា”៕

បុរី KS Residence ផ្តល់ជូនប្លង់រឹង ១០០% ដល់អតិថិជនជាមួយនឹងគុណតម្លៃជាច្រើន ជូនពីអ្នកអភិវឌ្ឍន៍

ដោយៈវឌ្ឈនៈ

កណ្តាលៈ គម្រោងអភិវឌ្ឍរបស់បុរី KS Residence ដែលស្ថិតនៅក្នុងស្រុកកៀនស្វាយ ខេត្តកណ្ដាល បានចាប់ផ្ដើមអភិវឌ្ឍក្នុងអំឡុងដើមឆ្នាំ២០២០ ហើយរហូតមកដល់ពេលនេះម្ចាស់ផ្ទះបានចូលស្នាក់នៅជាបណ្តើរៗហើយ ដោយគម្រោងសាងសង់ផ្ទះរួចរាល់ចំនួន៥៧ផ្ទះ សាងសង់បាន៥០% ចំនួន៥៤ផ្ទះ និងសាងសង់បាន ២០% ចំនួន ៤៩ផ្ទះ ព្រមទាំងកំពុងសាងសង់អោយបានចំនួន ៣៣៨ផ្ទះទៀតឆាប់ៗនេះ។

លោកឧកញ៉ាបណ្ឌិត គីម ហ៊ាង ម្ចាស់គម្រោងអភិវឌ្ឍន៍បុរី KS Residence បានឱ្យដឹងកាលពីចុងសប្តាហ៍កន្លងមកថា លក្ខណៈពិសេសមួយចំនួន បានធ្វើឱ្យអតិថិជនទិញផ្ទះនៅក្នុងបុរី KS Residence កាន់តែមានទំនុកចិត្តកាន់តែខ្លាំង ដោយសារបុរី KS Residence បានចំណាយពេលចាក់បំពេញដីទៅលើគម្រោង ធ្វើរបងពទ្ធ័ជុំវិញបុរី និងធ្វើការសាងសង់ជាមុនសិន មុនពេលប្រកាសលក់! ព្រោះគម្រោងបុរីយើងខ្ញុំមានកញ្ចប់ថវិការគ្រប់គ្រាន់ក្នុងការចាប់ផ្តើមសាងសង់រហូតដល់គំរោងសង់ចប់១០០%។

ជាក់ស្តែងកន្លងទៅនេះក្នុងតំណាក់កាលវិបត្តិកូវីដរីករាលដាលជាច្រើនតំណាក់កាលដែលធ្វើអោយគំរោងអភិវឌ្ឍផ្សេងមួយចំនួនត្រូវផ្អាកការសាងសង់ដោយបញ្ហាហិរញ្ញវត្ថុ តែគំរោងបុរី KS Residence មានលុយគ្រប់គ្រាន់បន្តការសាងសង់បានជាធម្មតា។

លោកបន្តថា “ក្នុងគម្រោងលំនៅឋាននេះទាំងមូលបានធ្វើរបងជុំវិញរួចរាល់ ហើយគ្រប់ផ្ទះនិមួយៗមានរបងរៀងៗខ្លួនសំរាប់ដាក់ឡាន ម៉ូតូក្នុងរបងផ្ទះ ។

លោកឧកញ៉ាបណ្ឌិត គីម ហ៊ាង បានបន្តទៀតថា ចំណុចពិសេសសម្រាប់គម្រោងនេះ គឺបុរី KS Residence នឹងរត់ការផ្ទេរកម្មសិទ្ធិក្នុងប្លង់រឹង LMAP ព្រមទាំងបង់ពន្ធប្រថាប់ត្រា ៤% អោយអ្នកទិញដោយខាងបុរីជាអ្នកចេញថ្លៃចំណាយ ដើម្បីផ្តល់ភាពងាយស្រួលដល់អតិថិជន។ លោកឧកញ៉ាបន្ថែមថា ភាពស្របច្បាប់នៃការសាងសង់ គឺជាចំណុចសំខាន់ សម្រាប់អ្នកស្វែងរកទិញលំនៅឋាន ជាក់ស្ដែងបុរី KS Residence បានសុំច្បាប់សាងសង់ពីអាជ្ញាធរ គ្រប់លំដាប់ថ្នាក់ និងសុំអាជ្ញាប័ណ្ណត្រឹមត្រូវតាមផ្លូវច្បាប់ និងបានបង់ពន្ធជូនរដ្ឋយ៉ាងត្រឹមត្រូវ។

លោកឧកញ៉ាបណ្ឌិត គីម ហ៊ាងបានបញ្ជាក់ថា លក្ខណះពិសេសមួយទៀតនោះគឺសុវត្ថិភាពសម្រាប់អ្នករស់នៅក្នុងបុរី KS Residence ព្រោះច្រកទ្វារចេញ និងចូលមានការត្រួតពិនិត្យពីសន្តិសុខរបស់បុរី២៤ម៉ោង។ ដូច្នេះអ្នកចូលមកប្លែកៗនឹងមានការសួរពីសន្តិសុខ ព្រោះបុរីនេះធ្វើឡើងដោយផ្ដោតលើសុវត្ថិភាព ផាសុខភាព និងភាពរឹងមាំជូនអតិថិជនរបស់ខ្លួន៕

ក្រុមហ៊ុន Hyundai គ្រោងបោះទុនវិនិយោគ៧,៤ពាន់លានដុល្លារនៅសហរដ្ឋអាមេរិក ដោយផ្ដោតលើការផលិតរថយន្តអគ្គិសនី

ដោយសុខុម

សេអ៊ូល: ក្រុមហ៊ុនផលិតរថយន្តកូរ៉េខាងត្បូង Hyundai Motor Group បានប្រកាសកាលពីថ្ងៃព្រហស្បតិ៍ ទី១៣ ឧសភាថា ខ្លួនមានគម្រោងបោះទុនវិនិយោគ៧,៤ពាន់លានដុល្លារ នៅសហរដ្ឋអាមេរិក ត្រឹមឆ្នាំ២០២៥ ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី១៤ ឧសភា។

គម្រោងបោះទុនវិនិយោគក្នុងទំហំទឹកប្រាក់យ៉ាងច្រើនសន្ធឹកសន្ធាប់នេះ គឺដើម្បីកែលម្អរោងចក្រផលិត ហើយវិនិយោគបន្ថែមទៀតលើការផលិតរថយន្តអគ្គិសនី (EV) ។

ការប្រកាសរបស់ក្រុមហ៊ុន Hyundai ធ្វើឡើងស្របពេលដែលរដ្ឋការនៃប្រធានាធិបតីសហរដ្ឋអាមេរិក លោក ចូ បៃឌិន បានផ្ដល់អាទិភាពលើការជំរុញឆ្ពោះទៅរកការផលិត និងប្រើប្រាស់រថយន្តអគ្គិសនី ដោយមានបំណងប្ដូរចេញរថយន្តប្រើប្រេងឥន្ធនៈរបស់រដ្ឋចំនួន៦៥០.០០០គ្រឿង ហើយដាក់ជំនួសដោយរថយន្តអគ្គិសនីផលិតដោយសហរដ្ឋអាមេរិក។

កាលពីខែមករា ដើមឆ្នាំ២០២១ លោក ចូ បៃឌិន ក៏បានចុះហត្ថលេខាលើបទបញ្ជាមួយជាមួយគោលបំណងដាក់វិធានតឹងរ៉ឺងជាងមុនលើការអនុវត្តលទ្ធកម្មរបស់រដ្ឋាភិបាល ដើម្បីបង្កើនការទិញផលិតផលដែលផលិតដោយសហរដ្ឋអាមេរិក ពង្រឹងការផលិតក្នុងស្រុក និងបង្កើតទីផ្សារសម្រាប់បច្ចេកវិទ្យាថ្មីៗផងដែរ។

ក្រុមអ្នកវិភាគមើលឃើញថា ការវិនិយោគរបស់ក្រុមហ៊ុន Hyundai នៅសហរដ្ឋអាមេរិក ពិតជាមានសារៈសំខាន់ណាស់ដើម្បីទាញយកអត្ថប្រយោជន៍ពីគោលនយោបាយរថយន្តអគ្គិសនី (EV) នៃរដ្ឋការរបស់លោក ចូ បៃឌិន និងដើម្បីទទួលបានការឧបត្ថម្ភធន និងការលើកទឹកចិត្តផ្នែកពន្ធដារ៕

មហសេដ្ឋីអចលនទ្រព្យ Robert Kiyosaki: អ្នកមិនគួរនិយាយ “ខ្ញុំគ្មានលទ្ធភាពទិញវាទេ”

ដោយៈ ប៊ី

ភ្នំពេញៈ ដោយត្រូវបានគេស្គាល់ថាជាអ្នកនិពន្ធសៀវភៅដ៏ល្បី “ឪពុកមាន ឪពុកក្រ ឬ Rich Dad Poor” ដែលជាសៀវភៅចំណេះដឹងហិរញ្ញវត្ថុលេខ១លើពិភពលោក លោក Robert Kiyosaki បានប្រកួប្រជែងប្រជែង និងផ្លាស់ប្តូររបៀបគិតរបស់មនុស្សរាប់លាននាក់នៅជុំវិញពិភពលោកអំពីលុយ។

លោកគឺជាសហគ្រិនអ្នកអប់រំនិងអ្នកវិនិយោគដែលជឿជាក់ថា ពិភពលោកត្រូវការសហគ្រិនកាន់តែច្រើនបន្ថែមទៀត។ ដោយមានទស្សនវិស័យលើលុយ និងការវិនិយោគ លោក Robert Kiyosaki ដែលមហាសេដ្ឋីអចលនទ្រព្យ ទទួលបានកេរ្តិ៍ឈ្មោះនៅលើឆាកអន្តរជាតិ ហើយបានក្លាយជាអ្នកតស៊ូមតិ សម្រាប់ការអប់រំហិរញ្ញវត្ថុ។

តើអ្នកនឹងផ្តល់ដំបូន្មានអ្វីខ្លះដល់មនុស្សក្មេងអំពីលុយ?

លោក Robert Kiyosaki: ជ្រើសរើសគ្រូរបស់អ្នកដោយឆ្លាតវៃ។ ផ្នែកដ៏សំខាន់បំផុតនៃអចលនទ្រព្យ ដែលយើងកាន់កាប់គឺមានទំហំប្រាំមួយអ៊ីង រវាងត្រចៀកខាងឆ្វេង និងត្រចៀកខាងស្តាំរបស់យើង។ ខ្ញុំបានប្រាប់ខ្លួនឯងកាលពីក្មែង ឱ្យប្រយ័ត្នប្រយែងបំផុតអំពីគំនិត ដែលបានវិនិយោគនៅក្នុងផ្នែកនៃអចលនទ្រព្យនោះ។

តើអ្វីដែលល្អបំផុតដែលអ្នកបានធ្វើដើម្បីកែលម្អសុខភាពហិរញ្ញវត្ថុរបស់អ្នក?

លោក Robert Kiyosaki: អស់រយៈពេលជាច្រើនឆ្នាំ ខ្ញុំបានចូលរួមសិក្ខាសាលាវិនិយោគជារៀងរាល់ត្រីមាស។ ថ្ងៃនេះ ខ្ញុំចូលរួមសិក្ខាសាលារាល់ថ្ងៃតាម YouTube ។ ថ្ងៃនេះ ខ្ញុំអាចជួបគ្រូល្អៗ តាមកាលវិភាគរបស់ខ្ញុំ ហើយពួកគេបង្រៀនដោយឥតគិតថ្លៃ។

តើមានវិធីសាស្ត្រ ឬឧបករណ៍ងាយៗអ្វីខ្លះដែលមនុស្សអាចប្រើដើម្បីធ្វើឱ្យប្រាកដថាពួកគេកំពុងគិតអំពីប្រាក់របស់ពួកគេដោយឆ្លាតវៃ?

លោក Robert Kiyosaki: ខ្ញុំហាមខ្លួនឯងមិនឱ្យនិយាយថា “ខ្ញុំគ្មានលទ្ធភាពទិញវាបានទេ។ ខ្ញុំបានដាក់វិន័យឱ្យខ្ញុំសួរជំនួសវិញថា “តើខ្ញុំអាចទិញវាបានយ៉ាងដូចម្តេច?” ការសួរខ្លួនឯងថា តើខ្ញុំអាចទិញវាបានដោយរបៀបណា នឹងធ្វើឱ្យមានការបើកទូលាយ និងបង្កើតការប្រកួតប្រជែងក្នុងគំនិតខ្ញុំ ដើម្បីគិត។ ពាក្យ ដែលយើងនិយាយទៅកាន់ខ្លួនយើង និងពាក្យដែលយើងជឿជាក់គឺជាកម្លាំង ដែលមានឥទ្ធិពលបំផុតនៅក្នុងពិភពលោក។ តាមបទពិសោធន៍របស់ខ្ញុំនិយាយថា “ខ្ញុំមិនអាចមានលទ្ធភាពទិញវា” គឺជាអ្វីដែលប្រជាជនក្រីក្រនិយាយ។ នោះហើយជាមូលហេតុដែលពួកគេក្រីក្រ។ វាមានភាពខុសគ្នារវាង “គ្មានបាក់” និង “ក្រ” ។ ភាពក្រីក្រគឺជាផ្នែកមួយក្នុងចិត្ត ដែលយើងទាំងអស់គ្នាមានអំណាចដើម្បីផ្លាស់ប្តូរវាបាន។

តើកំហុសអ្វីធំបំផុតដែលមនុស្សធ្វើនៅពេលគ្រប់គ្រងបំណុល?

លោក Robert Kiyosaki: បើគ្មានការអប់រំផ្នែកហិរញ្ញវត្ថុទេ មនុស្សភាគច្រើនមិនដឹងថាមានបំណុលពីរប្រភេទ គឺបំណុលល្អ និងបំណុលអាក្រក់។ បំណុលល្អធ្វើឱ្យខ្ញុំក្លាយជាអ្នកមាន ហើយបំណុលមិនល្អធ្វើឱ្យខ្ញុំក្រ។ ជំនាញមួយដែលអ្នកវិនិយោគម្នាក់ៗត្រូវតែមានគឺសមត្ថភាពក្នុងការយល់ពីបំណុល និងវិធីប្រើប្រាស់បំណុល ដើម្បីធ្វើឱ្យពួកគេក្លាយជាអ្នកមាន មិនមែនក្រជាងគេនោះទេ។ ជនជាតិអាមេរិកជាមធ្យមមានបន្ទុកបំណុលអាក្រក់។ នោះគឺជាតម្លៃនៃការមិនការពារអចលនទ្រព្យប្រាំមួយអ៊ីញទាំងនោះរវាងត្រចៀកខាងឆ្វេង និងត្រចៀកខាងស្តាំរបស់អ្នក។ ស្វែងរក និងឆ្លៀតយកឱកាសដើម្បីទទួលបានភាពវៃឆ្លាតអំពីប្រាក់…និងវិធីប្រើប្រាស់បំណុលល្អ៕

ការលក់ខុនដូចាប់ផ្ដើមធ្លាក់ចុះយ៉ាងគំហុកក្រោយថ្ងៃ២០កុម្ភៈ២០២១

ដោយ ប៊ី

ភ្នំពេញ៖ ចាប់តាំងពីកម្ពុជាជួបវិបត្តិនៃការឆ្លងកូវីដ១៩ក្នុងព្រឹត្តិការណ៍សហគមន៍២០កុម្ភៈ ២០២១ ទីផ្សារខុនដូនិងការលក់ចេញនៃខុនដូនៅក្នុងប្រទេសកម្ពុជា ចាប់ផ្ដើមធ្លាក់ចុះបន្តិចម្ដងៗ និងធ្លាក់ចុះយ៉ាងគំហុកនៅពេលចុងក្រោយនេះ ។

បើតាមលោក រិន ច័ន្ធរឹទ្ធ ប្រធានក្រុមហ៊ុន DNZ Realty បានឱ្យដឹងថា ជាការពិតណាស់ ចាប់តាំងពីកម្ពុជាជួបប្រទះនឹងការឆ្លងរាលដាលក្នុងសហគមន៍២០កុម្ភៈ ២០២១ ការលក់ខុនដូ ការលក់ខុនដូពិតជាបានជួបប្រទះនឹងបញ្ហាមែន ។ ក្រុមខ្លះគឺលក់អត់បានសោះ ឬលក់បានត្រឹមតែ១យូនីតឬ២យូនីតក្នុងមួយខែ ខណៈកាលពីមុនព្រឹត្តិការណ៍២០កុម្ភៈ២០២១ ការលក់ចេញអាចបានក្នុងរង្វង់១០យូនីតដែរ។ លោកថា៖«ក្នុងអំឡុងពេលនេះ មិនថាក្រុមហ៊ុនធំឬក្រុមហ៊ុនពូកែលក់យ៉ាងណាក្ដីគឺលក់បានតិចបំផុត ជាក់ស្ដែងក្រុមហ៊ុនធំមួយដែលជាដៃគូរបស់យើង ពីមុនអាចលក់បាន៥០យូនីត តែក្រោយមកក៏ធ្លាក់មកសល់ត្រឹម៤ឬ៥យូនីតប៉ុណ្ណោះ ហើយអ្នកដែលទិញខុនដូក្នុងចំនួនបួនប្រាំយូនីតគឺជាសាច់ញាតិភ្ញៀវចាស់ៗ ដោយមិនមានភ្ញៀវថ្មីៗចូលមកមើលឡើយ » ។

លោកបន្តថា អ្នកលក់ទាំងអស់ពិតជាពិបាកក្នុងការអញ្ជើញភ្ញៀវមកមើលគម្រោងផ្ទាល់ណាស់ ព្រោះក្នុងអំឡុងពេលនៃការឆ្លងខ្លាំងនេះ ខណៈការលក់កន្លងមកគឺបានដោយសារតែការរៀបចំនូវកម្មវិធីជួបជុំនានា ដូចជាកម្មវិធីជួបភ្ញៀវពិសេស កម្មវិធីរាត្រីស្រមោលសរជាដើម ។ តែក្រោយថ្ងៃទី២០ កុម្ភៈ ២០២១មក យើងមិនអាចធ្វើអ្វីបានទាល់តែសោះ ព្រោះបម្រាមរបស់រដ្ឋាភិបាលក្នុងការជួបជុំដើម្បីកាត់បន្ថយនូវការឆ្លងរាលដាល ។ម្យ៉ាងទៀតកុំថាឡើយដល់រៀបចំកម្មវិធីជួបជុំធំៗ សូម្បីតែអញ្ជើញភ្ញៀវមកផ្ទាល់ក៏ពិបាកដែរ ព្រោះពួកគាត់ក៏ខ្លាចដូចគ្នា ហើយគួបផ្សំនឹងការបិទខ្ទបទៀតផងដែរ ។

លោកបន្ថែមថា តាមរយៈរបាយការណ៍លក់របស់ក្រុមហ៊ុនលោកនិងក្រុមហ៊ុនជាដៃគូបានបង្ហាញថាការលក់ខុនដូ ក្រោយថ្ងៃទី២០ កុម្ភៈ ២០២១មក ការលក់ខុនដូ អាចនិយាយបានថាធ្លាក់ចុះ៩០ភាគរយ ពោលក្រុមហ៊ុនដែលធ្លាប់លក់បាន១០០នៅសល់ត្រឹម១០ប៉ុណ្ណោះ ហើយក្រុមហ៊ុនធ្លាប់លក់បាន១០នៅសល់ត្រឹម១ប៉ុណ្ណោះក្នុងមួយខែ បើទោះបីជាយើងនៅបន្តលក់និងជួបភ្ញៀវតាមអនឡាញក្ដី ។

បើតាមលោកគុយ វ៉ាត ប្រធានក្រុមប្រឹក្សាភិបាលនៃក្រុមហ៊ុន Century 21 Cambodia បានឱ្យដឹងថា នៅប្រទេសកម្ពុជាការលក់អចលនទ្រព្យតាមអនឡាញវាមិនទាន់អាចធ្វើទៅបាននោះឡើយ បើទោះបីជាបច្ចេកវិទ្យារីកចម្រើនយ៉ាងណាក៏ដោយ ។ តែសម្រាប់ប្រទេសអភិវឌ្ឍន៍ និងរីកចម្រើនដូចជានៅសហរដ្ឋអាមេរិកជាដើម ការទិញលក់គឺអាចធ្វើឡើងតាមអនឡាញដោយមិនបាច់មានការិយាល័យនោះឡើយ ។ ក្រៅពីកម្ពុជាប្រទេសជិតខាងរបស់យើង ការទិញលក់តាមអនឡាញ នៅតែមិនទាន់អាចធ្វើទៅបានដូចគ្នា ៕

សណ្ឋាគារប្រណីតរាងទឹករលក សំណង់ស្ថាបត្យកម្មដ៏អស្ចារ្យនៃក្រុងឌូបៃ

ដោយសុខុម

ឌូបៃ: ពេលនិយាយដល់អគារខ្ពស់ៗកប់ពពក យើងប្រាកដជានឹកឃើញដល់ក្រុងឌូបៃ មុនគេ ព្រោះអគារខ្ពស់បំផុតលើពិភពលោកស្ថិតនៅក្នុងទីក្រុងនេះ។ ហើយសំណង់ស្ថាបត្យកម្មដ៏អស្ចារ្យដែលមានរាងដូចទឹករលកមួយនេះក៏ស្ថិតនៅក្នុងទីក្រុងនេះដែរ។

អគារ Jumeirah Beach Hotel គឺជាសណ្ឋាគារប្រណីតនាមាត់ឆ្នេរដែលស្ថិតលើកោះមួយក្នុងទីក្រុងឌូបៃ ប្រទេសអារ៉ាប់រួមអេមីរ៉ាត។ អគារកម្ពស់២៦ជាន់នេះត្រូវបានឌីហ្សាញដោយក្រុមហ៊ុនស្ថាបត្យកម្មអង់គ្លេស WS Atkins និងសាងសង់ឡើងដោយសណ្ឋាគារ & រីហ្សត Jumeirah ។

ដំណើរការសាងសង់សណ្ឋាគារនេះបានបញ្ចប់ជាស្ថាពរក្នុងឆ្នាំ១៩៩៧ ហើយក៏ត្រូវបានបើកសម្ពោធដាក់ឱ្យប្រើប្រាស់ក្នុងឆ្នាំដដែល។

សណ្ឋាគារនេះមានបន្ទប់ធម្មតា និងបន្ទប់ស្វីត (Suite) ចំនួន៥៩៨បន្ទប់ បន្ទប់ប្រភេទវីឡាចំនួន១៩បន្ទប់ និងភោជនីយដ្ឋាន & បារចំនួន២០ ហើយដំណើរការដោយក្រុមហ៊ុនគ្រប់គ្រងសណ្ឋាគារ Jumeirah ដែលមានមូលដ្ឋាននៅក្រុងឌូបៃ។

សណ្ឋាគារដែលត្រូវបានជួសជុលកែកុនឡើងវិញក្នុងឆ្នាំ២០១៨ នេះកាន់កាប់ផ្ដាច់មុខនូវទីតាំងមួយលើឆ្នេរខ្សាច់ ហើយភ្ញៀវដែលមកស្នាក់នៅទីនេះមានឆ្នេរខ្សាច់ទំហំ៣៣.៨០០ម៉ែត្រការ៉េសម្រាប់លេងជាលក្ខណៈឯកជន។ នៅក្បែរសណ្ឋាគារនេះមានសួនទឹក Wild Wadi Water Park ដែលភ្ញៀវអាចចូលកម្សាន្តដោយសេរី។

វាមានឈ្មោះដើមថា Chicago Beach Hotel ប៉ុន្តែក្រោយមកត្រូវបានប្ដូរឈ្មោះថ្មីថា Jumeirah Beach Hotel រហូតមកទល់បច្ចុប្បន្ន។

នៅពេលសាងសង់បញ្ចប់ជាស្ថាពរក្នុងឆ្នាំ១៩៩៧ សណ្ឋាគារកម្ពស់៩៤ម៉ែត្រនេះបានក្លាយជាអគារខ្ពស់បំផុតទី៩នៅក្រុងឌូបៃ ហើយបច្ចុប្បន្នវាបានធ្លាក់មកនៅចំណាត់ថ្នាក់លេខជាង១០០ ។ ទោះបីជាបែបនេះក្ដី ក៏សណ្ឋាគារនេះនៅតែជាតំបន់ទេសចរណ៍ដ៏ទាក់ទាញមួយនៅក្នុងទីក្រុងឌូបៃ៕

UN: បរិយាកាសធុរកិច្ចសហគ្រាសធុនតូចនិងមធ្យមនៅកម្ពុជាកំពុងមានភាពប្រសើរឡើង

ដោយៈ សាវុធ

ភ្នំពេញៈ បរិយាកាសធុរកិច្ចសហគ្រាសធុនតូច និងមធ្យមនៅកម្ពុជាកំពុងមានភាពប្រសើរឡើង ខណៈការធ្វើការរូមគ្នាចាំបាច់ត្រូវបង្កើតបន្ថែមទៀតនៅក្នុងឧស្សាហកម្ម និងកម្មវិធីជាច្រើនទៀតត្រូវបានណែនាំ ដើម្បីគាំទ្រសហគ្រាសដែលដឹកនាំដោយស្ត្រី ជាពិសេសនៅក្នុងវិស័យដែលទាក់ទងនឹងបច្ចេកវិទ្យា។

នេះបើយោងតាមសិក្សារបស់ធនាគារបច្ចេកវិទ្យាសម្រាប់ប្រទេសដែលមានការអភិវឌ្ឍន៍តិចតួចរបស់អង្គការសហប្រជាជាតិ (United Nations Technology Bank for Least Developed Countries) កាលពីថ្មីៗនេះ។

ការសិក្សានេះត្រូវបានធ្វើឡើងតាមរយៈបទសម្ភាសន៍ពីអ្នកជំនាញក្នុងឧស្សាហកម្ម និងតំណាងមកពីវិស័យឯកជននិងរដ្ឋាភិបាល។ សហគ្រាសធុនតូច និងមធ្យមដែលមានការអភិវឌ្ឍ ការជំរុញការធ្វើឌីជីថលនីយកម្ម និងការផ្តល់សិទ្ធអំណាចដល់ស្ត្រីត្រូវបានរំពឹងថានឹងក្លាយជាកម្លាំងចលករដ៏សំខាន់ក្នុងការធានាការផ្លាស់ប្តូរនេះឱ្យទទួលបានជោគជ័យ។

ក្នុងប្រទេសកម្ពុជា ប្រភេទការងារដែលមានគឺមិនមានទំហំធំឬមានជំនាញគ្រប់គ្រាន់ក្នុងការទ្រទ្រង់ប្រជាជនវ័យក្មេងដែលមានចំណេះដឹងផ្នែកបច្ចេកវិទ្យានោះទេ។ ពួកគេត្រូវការការងារដែលមានជំនាញខ្ពស់ ជាអ្វីមួយដែលអាចត្រូវបានបង្កើតតាមរយៈការអភិវឌ្ឍន៍អាទិភាពរបស់សហគ្រិន និងសហគ្រាសធុនតូចនិងមធ្យម។

យោងតាមរបាយការណ៍ ក្រុមហ៊ុន៩០ភាគរយនៅទូទាំងពិភពលោកគឺជាសហគ្រាសធុនតូចនិងមធ្យម ដែលផ្ដល់ការងារចំនួន៦០ភាគរយ។

នៅក្នុងប្រទេសកម្ពុជា របាយការណ៍បានឲ្យដឹងថាមូលនិធិអភិវឌ្ឍន៍សហគ្រិនភាព (EDF) ដែលត្រូវបានអនុវត្តដោយរដ្ឋាភិបាលក្នុងឆ្នាំ២០១៩ គឺជាចំណុចដ៏ល្អមួយនៅក្នុងកិច្ចខិតខំប្រឹងប្រែងរបស់ប្រទេសដើម្បីជួយអភិវឌ្ឍសហគ្រាសធុនតូចនិងមធ្យម។

រដ្ឋាភិបាលបានចំណាយថវិកាចំនួន៥លានដុល្លារ ជារៀងរាល់ឆ្នាំដល់មូលនិធិដែលផ្តោតលើការកសាងសមត្ថភាព ការធ្វើឱ្យប្រសើរឡើងនូវសហគ្រាសធុនតូចនិងមធ្យម ការស្វែងរកបណ្តាញ និងការណែនាំ ការលើកកម្ពស់វប្បធម៌សហគ្រិនភាពនិងការផ្តល់មូលនិធិលើកដំបូង។

របាយការណ៍បានលើកឡើងអំពីសហគ្រិនខ្មែរ (Khmer Enterprise) ដែលជាអង្គភាពរដ្ឋាភិបាលដែលដើរតួជាក្រុមហ៊ុនឯកជនដោយវិនិយោគលើក្រុមហ៊ុនក៏ដូចជាផ្តល់ការប្រឹក្សានិងឱកាសក្នុងការភ្ជាប់បណ្តាញដល់សហគ្រិនដែលជាឧទាហរណ៍មួយទៀតនៃគំនិតផ្តួចផ្តើមគំនិតរបស់រដ្ឋាភិបាលដែលឆ្ពោះទៅមុខ។

នៅប្រទេសកម្ពុជា រដ្ឋាភិបាលកំពុងចាត់ទុកវាជាអាទិភាពក្នុងការចុះឈ្មោះសហគ្រាសធុនតូចនិងមធ្យមក្រៅផ្លូវការ។ ជំរឿនសេដ្ឋកិច្ចឆ្នាំ២០១១ ដែលដកស្រង់ដោយរបាយការណ៍បានរកឃើញថាមានតែសហគ្រាសកម្ពុជាប្រមាណ៣.៥ភាគរយប៉ុណ្ណោះ ដែលបានចុះបញ្ជីពេញលេញ។

ភាពជាសហគ្រិនស្ត្រីត្រូវបានគាំទ្រដោយអង្គការនានាដូចជាទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) និងនាយកដ្ឋានកិច្ចការបរទេសនិងពាណិជ្ជកម្មអូស្ត្រាលី ប៉ុន្តែរបាយការណ៍បានកត់សម្គាល់ថាគំនិតផ្តួចផ្តើមដែលជំរុញដោយស្ត្រីគឺមានការខ្វះខាតគួរឱ្យកត់សម្គាល់នៅក្នុងគោលនយោបាយរបស់រដ្ឋាភិបាល។

ការទទួលបានហិរញ្ញប្បទានត្រូវបានចុះបញ្ជីថាជាក្តីកង្វល់ដ៏ធំមួយសម្រាប់ចក្ខុវិស័យកំណើនរបស់សហគ្រាសធុនតូចនិងមធ្យម បើទោះបីជាកម្មវិធីថ្មីៗបានបង្កើតឡើងក្នុងកិច្ចខិតខំប្រឹងប្រែងដើម្បីជួយលើកស្ទួយក្រុមហ៊ុនឱ្យរួចផុតពីវិបត្តិសេដ្ឋកិច្ចដោយករណីជម្ងឺរាតត្បាតក៏ដោយ។

របាយការណ៍ក៏បានលើកឡើងពីភាពលំអៀងផ្នែកយេនឌ័រដែលជាបញ្ហាធំមួយនៅក្នុងការផ្តល់ហិរញ្ញប្បទាននៅកម្ពុជា។ របាយការណ៍បានឲ្យដឹងថាធនាគារអភិវឌ្ឍន៍អាស៊ីបានផ្តល់អាទិភាពដល់ការពង្រីកហិរញ្ញប្បទានដល់សហគ្រាសដែលដឹកនាំដោយស្ត្រី។

គំនិតផ្តួចផ្តើម Doing Business របស់ធនាគារពិភពលោកបានលើកឡើងពីពេលវេលាចុះបញ្ជីយឺតនិងកង្វះភាពច្បាស់លាស់ទាក់ទងនឹងពន្ធដែលជាកត្តាធ្វើឲ្យប្រទេសកម្ពុជាមានចំណាត់ថ្នាក់លេខ ១៨៧ ក្នុងចំណោម ១៩០ ប្រទេសដែលបានសិក្សានៅក្នុងការស្ទង់មតិនេះ៕

ក្រុមហ៊ុនថ្មីៗចំនួន៨បោះទុនវិនិយោគជាង១១១លានដុល្លារនៅកម្ពុជា ក្នុងរយៈពេល២សប្តាហ៍នៃខែឧសភានេះ

ដោយៈ ម៉ាណេត

ភ្នំពេញៈ រដ្ឋាភិបាល តាមរយៈពេលក្រុមប្រឹក្សាអភិវឌ្ឍន៍កម្ពុជា សម្រេចអនុម័គម្រោងចំនួន៨ ដែលបោះទុនវិនយោគ១១១លានដុល្លារក្នុងរយៈពេលពីរសប្តាហ៍នៃខែឧសភានេះ ហើយនឹងបង្កើតការងាររាប់ពាន់កន្លែងដល់ប្រជាពលរដ្ឋក្នុងស្រុក។

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

១- GREEN POWER BIOCHEMICAL CO., LTD: គម្រោងបង្កើតរោងចក្រផលិតជីវគីមី ដែលមានទីតាំងវិនិយោគស្ថិតនៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង មានទុនវិនិយោគប្រមាណ ២,៣លានដុល្លារអាមេរិក និងអាចបង្កើតការងារបានចំនួន ២១៣កន្លែង។

២- CONTENDER COMPOSITE CO., LTD: គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិព្រៃស្តេច ឃុំវាល ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ២,៤លានដុល្លារអាមេរិក និងអាចបង្កើតការងារបានចំនួន ៣៨៨នាក់។

៣-YIANKANG BIOLOGICAL TECHNOLOGY CO., LTD : គម្រោងបង្កើតរោងចក្រកែច្នៃម្ហូបអាហារ ដែលមានទីតាំងវិនិយោគស្ថិតនៅភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ មានទុនវិនិយោគប្រមាណ ២,៩លានដុល្លារអាមេរិក និងអាចបង្កើតការងារបានចំនួន ២១០កន្លែង។

៤-OCEAN TREASURE DYEING & PRINTING CO., LTD : គម្រោងបង្កើតរោងចក្របោកគក់ ជ្រលក់ពណ៌ និងបោះពុម្ព ដែលមានទីតាំងវិនិយោគស្ថិតនៅភូមិក្រាំងទ្រា ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ៣,១លានដុល្លារអាមេរិក និងអាចបង្កើតការងារបានចំនួន ២១៨កន្លែង។

៥- LESSO (CAMBODIA) TRADING CO., LTD : គម្រោងបង្កើតរោងចក្រផលិតបំពង់ទីប ទុយោជ័រ និងបរិក្ខារបំពង់ជ័រ (PVC pipe fittings) គ្រប់ប្រភេទ ដែលមានទីតាំងវិនិយោគស្ថិតនៅភូមិព្រៃរកានិងភូមិត្រពាំងជូន ឃុំឆក់ឈើនាង ស្រុកអង្គស្នួល ខេត្តកណ្តាល មានទុនវិនិយោគប្រមាណ ៩,៤លានដុល្លារអាមេរិក និងអាចបង្កើតការងារបានចំនួន ២០១កន្លែង។

៦- SANTELYS PHARMACEUTICAL CO., LTD : គម្រោងបង្កើតរោងចក្រផលិតឱសថ ដែលមានទីតាំងវិនិយោគស្ថិតនៅភូមិសន្លុង ឃុំសន្លុង ស្រុកខ្សាច់កណ្តាល ខេត្តកណ្តាល មានទុនវិនិយោគចំនួន ១២,៥លានដុល្លារអាមេរិក និងអាចបង្កើតការងារបានចំនួន ២១៥កន្លែង។

៧- KUANTECH (CAMBODIA) INTERNATIONAL CO., LTD: គម្រោងបង្កើតរោងចក្រផ្គុំដំឡើងគ្រឿងអេឡិចត្រូនិកគ្រប់ប្រភេទ គ្រឿងបន្លាស់អេឡិចត្រូនិក ម៉ាស់អេឡិចត្រូនិក និងឧបករណ៍បន្សុទ្ធខ្យល់ គ្រប់ប្រភេទ ដែលមានទីតាំងវិនិយោគស្ថិតនៅភូមិចមពល ឃុំពពេល ស្រុកត្រាំកក់ ខេត្តតាកែវ មានទុនវិនិយោគប្រមាណ ២៩,៧លានដុល្លារអាមេរិក និងអាចបង្កើតការងារបានចំនួន ៦២៨កន្លែង។

៨- JIN BEI PALACE CO., LTD : គម្រោងសាងសង់និងអាជីវកម្មសណ្ឋាគារថ្នាក់ផ្កាយ៥ ចំនួន១៩៥បន្ទប់ ដែលមានទីតាំងវិនិយោគស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ៤៨,៧លានដុល្លារអាមេរិក និងអាចបង្កើតការងារបានចំនួន ៣៨០កន្លែង៕

ប្រទេសចិន បង្ហាញសំណងស្ថាបត្យកម្មដ៏ទាក់ទាញមួយសម្រាប់ពិភពលោក

ដោយ:សុខុម

សៀងហៃ: បើក្រឡេកមើលមួយភ្លែត យើងនឹងឃើញថាវាគ្រាន់តែជាតួអក្សរចិន 人 (Ren ឬ យិន) ដែលមានន័យថា “មនុស្ស” តែប៉ុណ្ណោះ។ ប៉ុន្តែតាមពិត វាជាសំណង់ដ៏ខ្ពស់ស្កឹមស្កៃមួយដែលជាស្ថាបត្យកម្មដ៏ចម្លែកអស្ចារ្យរបស់មហាយក្សចិន។ អញ្ចឹងតោះ! មកដឹងស្វែងយល់ត្រួសៗអំពីអគារចម្លែកនេះទាំងអស់គ្នា!

អគារ REN Building នេះត្រូវបានសាងសង់ឡើងដោយបែកចែកជាផ្នែកសម្រាប់សណ្ឋាគារ មជ្ឈមណ្ឌលកីឡា និងសាលសន្និសីទដើម្បីត្រៀមទទួលព្រឹត្តិការណ៍ពិព័រណ៍ពិភពលោកឆ្នាំ២០១០ (World Expo 2010) ដែលមានឈ្មោះថា “Better City, Better Life” (ទីក្រុងកាន់តែល្អ ជីវិតកាន់តែប្រសើរ) ក្នុងក្រុងសៀងហៃ ប្រទេសចិន។

អគារនេះត្រូវបានគេចាត់ទុកថាអគារ២រួមបញ្ចូលគ្នាតែមួយ។ នៅចំណុចខាងក្រោម វាជាអគារ២ដាច់ដោយឡែកពីគ្នា ប៉ុន្តែអគារទាំង២លូតឡើងទៅប្រសព្វគ្នានៅខាងលើ ហើយស្តួចឡើងទៅលើ បង្កើតបានជាទម្រង់អក្សរ 人 (យិន)។

អគារទី១ ដែលផុសចេញពីផ្ទៃទឹកគឺសម្រាប់មជ្ឈមណ្ឌលកីឡា និងមជ្ឈមណ្ឌលវប្បធម៌។ ចំណែកឯអគារទី២ ដែលផុសចេញពីផ្ទៃដីគឺសម្រាប់មជ្ឈមណ្ឌលអប់រំផ្លូវចិត្ត និងសាលសន្និសីទ។ អគារទាំង២ឡើងទៅជួបប្រសព្វគ្នានៅខាងលើដែលសម្រាប់សណ្ឋាគារ១.០០០បន្ទប់។

សំណង់ស្ថាបត្យកម្មនេះត្រូវបានគូរប្លង់ដោយក្រុមហ៊ុនស្ថាបត្យកម្ម Bjarke Ingels Group (BIG) ដែលមានមូលដ្ឋាននៅក្រុងកូប៉ិនហាក ប្រទេសដាណឺម៉ាក។ ទោះជាយ៉ាងណា គ្មានព័ត៌មានបញ្ជាក់ពីជាន់ និងកម្ពស់នៃអគារនេះទេ៕