ក្រសួងទេសចរណ៍ផ្សព្វផ្សាយវីដេអូ ”ភ្លក់រសជាតិម្ហូបប្រទេសកម្ពុជា”

ដោយៈគង់ សូរិយា

ភ្នំពេញៈ ក្រសួងទេសចរណ៍បានចេញ សេចក្តីប្រកាសព័ត៌មាន អំពីវីដេអូផ្សព្វផ្សា​យ “ភ្លក់រសជាតិម្ហូបប្រទេសកម្ពុជា នៃព្រះរាជាណាចក្រអច្ឆរិយៈ”។

យោងតាមសេចក្តីប្រកាសលើបណ្តាញទំនាក់ទំនងសង្គម Facebook របស់ក្រសួ​ងទេសចរណ៍បានឲន្យដឹងកាលពីថ្ងៃទី៤ មិថុនាកន្លងមកថា សូមស្វាគមន៍មកកាន់ប្រទេសកម្ពុជា-ព្រះរាជាណាចក្រអច្ឆរិយៈ យើងខ្ញុំសូមនាំលោក អ្នកទៅស្វែងយល់ពីអាថ៌កំបាំង នៃម្ហូបអាហារខ្មែរ ដែលពោរពេញដោយរសជាតិ ជាមួយវីដេអូ “ភ្លក់រសជាតិម្ហូបប្រទេសកម្ពុជា”។

“ភ្លក់រសជាតិម្ហូបប្រទេសកម្ពុជា” មានជាទម្រង់វីដេអូផ្សេងៗ ដែលអាចទាញយកពីតំណភ្ជាប់ខាងក្រោម។ រាល់ការប្រើប្រាស់ និងផ្សព្វផ្សាយវីដេអូនេះ ឬផ្នែកណាមួយនៃវីដេអូនេះ ត្រូវបញ្ជាក់ពីការរក្សាសិទ្ធិរបស់ក្រសួងទេសចរណ៍ នៃព្រះរាជាណាចក្រកម្ពុជា៕

អាកាសយានដ្ឋានក្រុងព្រះសីហនុបានឈានដល់កម្រិត 4E ដែលអាចអនុញ្ញាត្តឲ្យយន្តហោះធំៗចុះចតបាន

ដោយៈ គង់ ម៉ាលីន

ព្រះសីហនុៈ អាកាសយានដ្ឋានអន្តរជាតិខេត្តព្រះសីហនុ បានខិតខំប្រឹងប្រែងកែលម្អអភិវឌ្ឍតាមជំហ៊ាន ឬដំណាក់កាលគម្រោង នូវហេដ្ឋារចនាសម្ព័ន្ធខ្លួនដើម្បីពង្រឹងសមត្ថភាព រហូតដល់កម្រិតលំដាប់ថ្នាក់អន្ដរជាតិ 4E និងពង្រីកពង្រីកប្រចែងផ្លូវរត់បានជាង៣.០០០ម៉ែត្រ វែងជាងគេនៅក្នុងចំណោម អាកាសយានដ្ឋានធំៗទាំងបីនៅកម្ពុជា។

នាយកអាកាសយានដ្ឋានអន្ដរជាតិខេត្ដព្រះសីហនុ លោក វ៉ាន់ ណូរ៉ាក់ បានមាន​ប្រសាសន៍ឲ្យដឹងកាលពីថ្ងៃទី៤ មិថុនាកន្លងមកថា ការវិវត្តន៍រីកចំរើនរបស់វិស័យអាកាសចរណ៍ នៅអាកាសយានដ្ឋានអន្តរជាតិខេត្តព្រះសីហនុ នាពេលកន្លងមក ទាំងការកសាងពង្រីកហេដ្ឋារចនាសម្ព័ន្ធបន្ថែម ព្រមទាំងកំណើននៃជើងហោះហើរ និងអ្នកដំណើរឆ្លងកាត់ ក្នុងមួយថ្ងៃៗ មានជើងយន្តហោះចុះចត និងហោះហើរឆ្លងកាត់យ៉ាងតិច១៥គ្រឿង។

ប៉ុន្តែដោយសារវិបត្ដិជំងឺកូវីដ-១៩ បានកំពុងយាយីពិភពលោក បានធ្វើឱ្យការហោះហើរទាំងអន្ដរជាតិ និងក្នុងតំបន់ ត្រូវបានកំណត់កម្រិត និងផ្អាក ដែលធ្វើឱ្យជើងហោះហើរ និងអ្នកដំណើរឆ្លងកាត់មានការធ្លាក់ចុះ។ ជាក់ស្ដែងរយៈពេល៤ខែ នៅក្នុងឆ្នាំ២០២១នេះ អាកាសយានដ្ឋានអន្ដរជាតិខេត្ដព្រះសីហនុ មានជើងហោះហើរសរុបចំនួន២៨៨ជើង និងអ្នកដំណើរឆ្លងកាត់សរុបចំនួន១១.៣៦០នាក់ ធៀបទៅនឹងរយៈពេល៤ខែដូចគ្នានៅក្នុងឆ្នាំ២០២០ គឺមានជើងហោះហើរសរុបចំនួន២.៥២៩ជើង និងអ្នកដំណើរឆ្លងកាត់សរុបចំនួន១៨២.៤៩០នាក់។

លោកវ៉ាន់ ណូរ៉ាក់បានបន្ដថា គោរពតាមអនុសាសន៍ណែនាំដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា កាលពីថ្ងៃទី២៦ ខែវិច្ឆិកា ឆ្នាំ២០១៨កន្លងទៅ តម្រូវឱ្យក្រុមហ៊ុនSCA រៀបចំអភិវឌ្ឍន៍ព្រលានយន្តហោះ តាមកិច្ចព្រមព្រៀងឲ្យទៅជាព្រ លានយន្តហោះលំដាប់ស្ដង់ដារអន្ដរជាតិ4E ។

អាកាសយានដ្ឋាននេះ ត្រូវបានអភិវឌ្ឍជាបន្តបន្ទាប់តាមដំណាក់កាល ដោយពង្រីកចាប់ពីចម្ងាយផ្លូវរត់ប្រវែង១.៨០០ម៉ែត្រ រហូតមកដល់លំដាប់ C4 ដែលមានប្រវែងផ្លូវរត់២.៥០០ម៉ែត្រ នឹងបន្ដពង្រីកបន្ថែមរហូតដល់លំដាប់4E ដែលមានប្រវែង៣.៣០០ម៉ែត្រ និងទទឹង៤៥ម៉ែត្រ លំដាប់អន្ដរជាតិ ដែលអាចទទួលយន្ដហោះខ្នាតធំៗ ចុះចត និងរត់ហោះហើយបាន៕

ការសិក្សាៈ ខណ្ឌចំនួន៥ក្នុងទីក្រុងភ្នំពេញនៅតែមានអ្នកស្វែងរកទិញនិងជួលអចលនទ្រព្យជាច្រើនគេ

ដោយៈ ម៉ាណេត

ភ្នំពេញៈ ទោះបីជាមានការបិទខ្ទប់នាពេលកន្លងទៅ ក៏នៅមានអ្នកស្វែងរកទិញរឺជួលអចលនទ្រព្យជាច្រើន បន្តការស្វែងរករបស់ខ្លួនដដែល បើគិតពីពាក់កណ្តាលខែមេសា ដល់ពាក់កណ្តលខែមិថុនា រាជធានីភ្នំពេញ ទើបតែចាប់ផ្តើមបើកឱ្យប្រជាពលរដ្ឋអាចធ្វើដំណើរបានសារជាថ្មី បន្ទាប់ពីឆ្លងកាត់ការបិទខ្ទប់ ដែលបានបន្តអស់រយៈកាលប្រមា​ណជាង៦សបា្តហ៍។

យោងតាមរយៈរបាយការណ៍របស់គេហទំព័រ Realestate.com.kh បានបង្ហាញថានៅក្នុងខែមីនា មានចំនួនអ្នកស្វែងរកមើលអចលនទ្រព្យច្រើន ជាងខែណាៗទាំងអស់នៅក្នុងឆ្នាំ២០២១ ដោយចំនួននេះ ត្រូវបានគេសម្គាល់ឃើញថា មានការធ្លាក់ចុះបន្តិចនៅក្នុងខែមេសា ដែលអាចបណ្តាលមកពីថ្ងៃឈប់សម្រាក ពិធីបុណ្យចូលឆ្នាំខ្មែរ និងវិធានបិទខ្ទប់នា រាជធានីភ្នំពេញ និងក្រុងតាខ្មៅ។

ថ្វីត្បិតបើចំនួនអ្នកស្វែងរកមើល អចលនទ្រព្យនាខែមេសានេះ មានការថមថយបន្តិចមែន តែវានៅមានចំនួនខ្ពស់ បើប្រៀបធៀបទៅនឹងខែមេសាកាលពីឆ្នាំ២០២០។

ខណ្ឌបឹងកេងកង គឺជាខណ្ឌឈរនៅលំដាប់ ដែលតែងតែទទួលបានការចាប់អារម្ម​ណ៍យ៉ាងខ្លាំង ពីសំណាក់អ្នកស្វែងរកអចលនទ្រព្យ នៅក្នុងរាជធានីភ្នំពេញសម្រាប់ខែមេសា ឆ្នាំ២០២១ នៅតែជាខណ្ឌបឹងកេងកង បន្ទាប់ខណ្ឌចំការមនឈរនៅលំដាប់ទី២ ទី៣ខណ្ឌដូនពេញ និងទី៤ខណ្ឌទួលគោក។ ប្រភេទអចលនទ្រព្យ ដែលគេនិយមស្វែងរកនៅក្នុងខណ្ឌទាំង៤នេះមាន៖ ១. អាផាតមិន/ខុនដូ ២. ផ្ទះផ្ទាល់ដី ៣. អាគារ រឺផ្ទះសម្រាប់ប្រកបអាជីវកម្ម និង៤. ដី។

ដោយឡែក ខណ្ឌសែនសុខចុងក្រោយ ខណ្ឌដែលអ្នកស្វែងរកអចលនទ្រព្យឧស្សាហ៍ស្វែងរកជាងគេ ជាពិសេសទៅលើ អចលនទ្រព្យប្រភេទផ្ទាល់ដី។ ប្រភេទអចលនទ្រព្យដែលគេនិយម ស្វែងរកនៅក្នុងខណ្ឌចំការមនមាន៖ ១. អាផាតមិន/ខុនដូ ២. ផ្ទះផ្ទាល់ដី ៣. អាគារ រឺផ្ទះសម្រាប់ប្រកបអាជីវកម្ម និង៤. ដី។

ជាមួយគ្នាដែរ យោងតាមការសិក្សាពីក្រុមហ៊ុន វាយតម្លៃអចលនទ្រព្យនៅកម្ពុជា បង្ហាញខណ្ឌ៥នៅរាជធានីភ្នំពេញ បានរក្សាតម្លៃល្អជាងគេ ក្នុងរយៈពេល១០ឆ្នាំកន្លងទៅនេះ វិស័យអចលនទ្រព្យជាពិសេសវិស័យដីធ្លី នៅក្នុងរាជធានីភ្នំពេញ ចាប់តាំងពីវិបត្តិហិរញ្ញវត្ថុក្នុងឆ្នាំ ២០០៨-២០០៩ ឃើញថា តម្លៃដីធ្លីបានងើបឡើងបន្តិចម្ដងៗ រហូតដល់ឆ្នាំ២០២១នេះ ទោះបីជាកម្ពុជាជួបវិបត្តិនឹងជំងឺរីករាលដាលក៏ដោយ ក៏ឃើញថាមិនមានការធ្លាក់ចុះឬប្រែប្រួលនោះដែរ។

នៅក្នុងរាជធានីភ្នំពេញ ក្នុងខណ្ឌចំនួន៥ គឺខណ្ឌដូនពេញ ៧មករា ចំការមន បឹងកេង និងទួលគោក តម្លៃដីចាប់ផ្ដើមមានកំណើនបន្តិចម្ដង ៗចាប់តាំងពីឆ្នាំ២០១១ ២០១២ ដោយសារតែមានការអភិវឌ្ឍច្រើន នៅក្នុងរាជធានីភ្នំពេញ ហើយក្នុងខណ្ឌទាំងនោះ ដីធ្លីមានតម្លៃខ្ពស់ជាងគេ។

លោកសន សៀបស្ថាបនិកនិងជានាយកក្រុមហ៊ុនអចលនទ្រព្យឃី រៀលអ៊ីស្ទេតបានឱ្យដឹងកាលពីព្រឹកថ្ងៃទី២៥ ឧសភានេះថា នៅក្នុងឆ្នាំ២០១៧ តម្លៃដីធ្លីបានធ្លាក់ចុះរហូត-៨ភាគរយ និងបានងើបឡើងវិញ នៅក្នុងអំឡុងឆ្នាំ២០១៨ ឬ២០១៩ ហើយ២០២០ ទោះបីជាកម្ពុជាជួបវិបត្តិកូវីដ១៩ក្ដី តែខណ្ឌទាំង៥ក្នុងរាជធានីភ្នំពេញ នៅតែបន្តកើនឡើងប្រមាណ០,៥ភាគរយ។

លោកបន្ថែមថា ក្នុងពេលបច្ចុប្បន្នក្នុងចំណោមខណ្ឌទាំង៥ ដែលមានសក្ដានុពល ឃើញថា ទួលគោកមានកំណើនជាងគេជុំវិញ២ភាគរយ។ ចំណែកខណ្ឌនៅជាយៗរាជធានីភ្នំពេញដូចជាខណ្ឌដង្កោ ខណ្ឌកំបូល ខណ្ឌសែនសុខ មានសន្ទុះតម្លៃដីធ្លីងើបខ្ពស់ ជាពិសេសខណ្ឌដង្កោ៕

តើអ្នកណាជាមហាសេដ្ឋីអចលនទ្រព្យដែលមានលុយច្រើនបំផុតក្នុងពិភពលោកប្រចាំឆ្នាំ២០២១?

ដោយៈសុខុម

អន្តរជាតិៈ អចលនទ្រព្យជាវិស័យមួយ ដ៏មានសក្ដានុពលខ្លាំងក្លាបំផុតនៅក្នុងការរួមចំណែកដល់សេដ្ឋកិច្ចជាតិ ជាពិសេសនៅក្នុងបណ្ដាប្រទេសកំពុងអភិវឌ្ឍន៍ ដូចនៅកម្ពុជាយើងជាដើម។

ចង់ដឹងទេថា តើមហាសេដ្ឋីអចលនទ្រព្យ ដែលមានទ្រព្យសម្បត្តិច្រើនបំផុតក្នុងពិភពលោកប្រចាំឆ្នាំ២០២១ ជានរណា និងជាជនជាតិអ្វី?។

យោងតាមការដាក់ចំណាត់ថ្នាក់កំពូល មហាសេដ្ឋីរបស់ទស្សនាវដ្ដី Forbes ប្រចាំឆ្នាំ២០២១ នេះបង្ហាញថា មហាសេដ្ឋីចិនហុងកុង Lee Shau-kee ដែលមានវ័យ៩៣ឆ្នាំបានជាប់ឈ្មោះជាកំពូលមហាសេដ្ឋីអចលនទ្រព្យ ដែលមានលុយច្រើនបំផុតក្នុងពិភពលោក ជាមួយនឹងទ្រព្យសម្បត្តិសរុប៣១,៧ពាន់លានដុល្លារអាមេរិក។

លោក Lee គឺជាប្រធានក្រុមហ៊ុន Henderson Land Development ដែលជាក្រុមហ៊ុនអភិវឌ្ឍន៍អចលនទ្រព្យ ឈានមុខគេនៅទីក្រុងហុងកុង ដែលសាងសង់គម្រោងលំនៅ​ដ្ឋាន និងគម្រោងប៉ាណូពាណិជ្ជកម្មធំៗ ដូចជា អគារមជ្ឈមណ្ឌលហិរញ្ញវត្ថុពិភពលោក (World Financial Center) នៅក្រុងប៉េកាំង ប្រទេសចិន និងអគារមជ្ឈមណ្ឌលហិរញ្ញវត្ថុអន្តរជាតិ (International Finance Centre) នៅក្រុងហុងកុង ជាដើម។

យោងតាមទស្សនាវដ្ដី Forbes បានឱ្យដឹងថា ទ្រព្យសម្បត្តិរបស់កំពូលៗមហាសេដ្ឋីអចលនទ្រព្យទូទាំងពិភពលោករួមបញ្ចូលគ្នា បានកើនឡើង១៥១ពាន់លានដុល្លារអាមេរិក ក្នុងឆ្នាំ២០២០។

កំពូលមហាសេដ្ឋីអចលនទ្រព្យទាំង២១៥រូប មានទ្រព្យសម្បត្តិរួមបញ្ចូលគ្នាជាង៨០០ពាន់លានដុល្លារ ហើយស្មើនឹងប្រមាណ៨% នៃកំពូលមហាសេដ្ឋីដែលជាប់ឈ្មោះក្នុងទស្សនាវដ្ដីខាងលើនេះ។ ក្នុងនោះមានតែកំពូលមហាសេដ្ឋីអចលនទ្រព្យ៣០រូបប៉ុណ្ណោះ ដែលទ្រព្យសម្បត្តិរបស់ពួកគាត់បានធ្លាក់ចុះក្នុងឆ្នាំកន្លងទៅ។

អ្វីដែលគួរឱ្យភ្ញាក់ផ្អើលជាខ្លាំងនោះគឺ កំពូលមហាសេដ្ឋីអចលនទ្រព្យពិភពលោកដែលមានទ្រព្យសម្បត្តិច្រើនបំផុតទាំង៦ គឺសុទ្ធតែមកពីចិនដីគោក ឬក្រុងហុងកុង ដោយរួមទាំងលោក Lee Shau-kee ផងដែរ។

កំពូលមហាសេដ្ឋីអចលនទ្រព្យ ដែលទ្រព្យសម្បត្តិរបស់ខ្លួនកើនឡើងច្រើនបំផុតកាលពីឆ្នាំមុន បានទៅលើមហាសេដ្ឋីចិនZuo Hui ដែលទ្រព្យសម្បត្តិរបស់លោកបានកើនឡើង១៣,៣ពាន់លានដុល្លារ។

យោងតាមទស្សនាវដ្ដីដដែលឱ្យដឹងទៀតថា លោក Zuo បានជាប់ចំណាត់ថ្នាក់លេខ១៥ក្នុងពិភពលោក លោកស្ថិតក្នុងចំណោមកំពូលមហាសេដ្ឋីអចលនទ្រព្យកំពូលទាំង២០រូប៕

វិស័យអាកាសចរណ៍កម្ពុជានឹងរីកចម្រើនខ្លាំង បន្ទាប់ពីបញ្ចប់ការចចារជាមួយអឺរ៉ុបលើភាពជាដៃគូនៃការដឹកជញ្ជូនតាមផ្លូវអាកាស

ដោយៈគង់ សូរិយា

ភ្នំពេញៈ វិស័យអាកាសចរណ៍កម្ពុជា នឹងមានភាពរីកចម្រើនខ្លាំង បន្ទាប់ពីកម្ពុជា​រួមទាំង​ប្រទេស​ដែលជា​សមាជិក​អាស៊ាន​ទាំងអស់ ​បាន​បញ្ចប់​ការចរចា​ជាមួយ​នឹង​សហគមន៍​អឺរ៉ុប ​លើ​កិច្ចព្រមព្រៀង​គ្រប់​ជ្រុងជ្រោយ ​នៃ​ការដឹកជញ្ជូន​តាមផ្លូវ​អាកាស​រវាង​អាស៊ាន និង​សហគមន៍​អឺរ៉ុប (CATA)។

វា​នឹង​ក្លាយជា​កិច្ចព្រមព្រៀង​ដំបូងបង្អស់​មិន​ធ្លាប់មាន ដើម្បី​លើកកម្ពស់​ការតភ្ជាប់​តាមផ្លូវ​អាកាស​រវាង​អាស៊ាន និង​សហភាព​អឺរ៉ុប​។

ការចរចា​ដែល​រៀបចំ​កាលពី​ថ្ងៃទី​ ២ ខែមិថុនា តាម​ប្រព័ន្ធ​អនឡាញ​ត្រូវបាន​ដឹកនាំ​ដោយ​លោក ឈៀង ពេជ្រ អគ្គនាយក​នៃ​អគ្គនាយកដ្ឋាន​ភ័ស្តុភារកម្ម​ នៃ​ក្រសួង​សាធា​រណការ និង​ដឹកជញ្ជូន ដែល​ជា​តំណាងឱ្យឧត្តមមន្ត្រី​ផ្នែក​ដឹកជញ្ជូន ​របស់​ក្រុម​ប្រទេស​ជា​សមាជិក​អាស៊ាន​ទាំងអស់​។

លោក ឈៀង ពេជ្របានឱ្យដឹងថា “នៅពេល​នេះ​អាស៊ាន​សម្រេចបាន​ការងារ​ដ៏សំខាន់​មួយ គឺ​បញ្ចប់​ការចរចា​ជាមួយ​សហគមន៍​អឺរ៉ុប ​នូវ​កិច្ចព្រមព្រៀង​គ្រប់​ជ្រុងជ្រោយ​ស្តីពី​ ការដឹកជញ្ជូន​តាមផ្លូវ​អាកាស​រវាង​អាស៊ាន និង​សហគមន៍​អឺរ៉ុប​ (The ASEAN-EU Comprehensive Air Transport Agreement – CATA )​”។លោកបន្តថា​ “​ខ្ញុំ​តំណាង​ឱ្យ​ឧត្តម​មន្ត្រី​ដឹកជញ្ជូន​អាស៊ាន ​បាន​ធ្វើ​សហប្រធាន​ដឹកនាំ​កិច្ចប្រជុំ​វិសាមញ្ញ ​រវាង​អាស៊ាន-សហគមន៍​អឺរ៉ុប ដើម្បី​ចរចា​គ្នា​ជុំ​ចុងក្រោយ​នៃ​កិច្ចព្រមព្រៀង​មួយ​នេះ”។

លោក​បន្ថែមថា នេះ​ជា​លើក​ទី​១ ដែល​កម្ពុជា​ធ្វើជា​ប្រធាន​ឧត្តម​មន្ត្រី​អាស៊ាន និង​ធ្វើជា​ម្ចាស់ផ្ទះ​រៀបចំ​កិច្ចប្រជុំ​នេះ​។

សហភាព​អឺរ៉ុប​នៅតែ​ជា​ដៃគូ​ពាណិជ្ជកម្ម​ ដ៏សំខាន់​របស់​អាស៊ាន​ ដោយផ្អែក​តាម​ស្ថិតិ​បឋម​អាស៊ាន​បង្ហាញ​ថា ​អាស៊ាន-សហភាព​អឺរ៉ុប​ នៅតែ​រក្សា​ជំហរ​ជា​ដៃគូ​ធំ​ទី​២ របស់​អាស៊ាន​ ជាមួយ​នឹង​ទំហំ​ពាណិជ្ជកម្ម​ទ្វេភាគី​ក្នុង​ឆ្នាំ២០១៨ ឈានដល់២៨២ ​ពាន់​លាន​ដុសហភាពអឺរ៉ុប ​ក៏​ជា​ប្រភព​វិនិយោគទុន​បរទេស​ដ៏ធំ​ជាងគេ​ផងដែរ ​ក្នុងចំណោម​ដៃគូ​សន្ទនា​ឆ្នាំ​ ២០១៨ ដោយមាន​ទំហំ​ទឹកប្រាក់​សរុប២២ពាន់​លាន​ដុល្លារ​។ នេះ​បើ​យោង​តាម​ឯកសារ​
ព័ត៌មាន​របស់​លេខាធិការដ្ឋាន​អាស៊ាន ​កាលពី​ខែកុម្ភៈ ឆ្នាំ​ ២០២០ ស្តីពី​ទិដ្ឋភាព​នៃ​ទំនាក់ទំនង​អាស៊ាន-អឺរ៉ុប​។

ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា លោកធួន ស៊ីណាន​បានមានប្រសាសន៍ថា នេះ​ជា​ដំណឹង​ល្អ​សម្រាប់​កម្ពុជា ​ក្នុង​ការពង្រីក​ការតភ្ជាប់​ជើងហោះហើរ​ផ្ទាល់​ទៅ​សហគមន៍​អឺរ៉ុប ស្របពេល​ការភ្ជាប់​ជើងហោះហើរ​របស់​កម្ពុជា ​នៅ​មាន​កម្រិត ដោយ​លើកលែង​ចិន និង​កូរ៉េ​ដែល​កម្ពុជា​មាន​តភ្ជាប់​ជើង​ហោះ​ច្រើន​។

លោក​បន្តថា​ “សម្រាប់​ខ្ញុំ​បើ​រដ្ឋាភិបាល​ អាច​ភ្ជាប់​ជើង​ហោះ​ត្រង់​របស់​កម្ពុជា​ទៅក្នុង​តំបន់​អឺរ៉ុប ឬ​ទីក្រុង​ធំ​របស់​អឺរ៉ុប គឺជា​រឿង​ល្អ​មែនទែន ព្រោះ​អឺរ៉ុប​គឺជា​ទីផ្សារ​ដ៏ធំ​ពិតប្រាកដ ​សម្រាប់​ទំនិញ​កសិកម្ម និង​ឧស្សាហកម្ម​កម្ពុជា”៕

គ្រាន់តែចំណតរថយន្តមួយលក់បានតម្លៃរាប់លានដុល្លារនៅទីក្រុងហុងកុង

ដោយៈ គៀតឈូ
ភ្នំពេញៈ ប្រព័ន្ធផ្សព្វផ្សាយក្នុងស្រុកនៅទីក្រុងកុង បានរាយការណ៍នៅថ្ងៃសុក្រទី៤ ខែមិថុនានេះថា កន្លែងចតឡានមួយត្រូវបានលក់ចេញ ក្នុងតម្លៃ១០លានដុល្លារហុងកុង (១,៧ លានដុល្លារ) នៅក្នុងឯអាគារអាផាតមិនប្រណីតមួយកន្លែងនៅទីក្រុងហុងកុង។ នេះបើយោងតាមការចេញផ្សាយរបស់សារព័ត៌មាន Straits Times នៅថ្ងៃដដែលនេះ។

កន្លែងចំណត ដែលមានទំហំ១២.៥ម៉ែតការ៉េនេះ គឺជាផ្នែកមួយនៃការអភិវឌ្ឍន៍នៅលើគម្រោងThe Peak ដែលជាតំបន់ប្រណីត និងតម្លៃអចលនទ្រព្យខ្ពស់ និងបានទាក់ទាញអ្នកមានជាងគេបំផុតនៅក្នុងទីក្រុងហុងកុង តាំងពីសម័យអាណានិគមមកម្លេះ។

តំបន់នេះ គឺតំបន់ដែលមានអចលនទ្រព្យថ្លៃបំផុតមួយ នៃតំបន់អចលនទ្រព្យមួយចំនួននៅលើពិភពលោក។

អ្នកមាននៅហុងកុង មិនគិតពីការចំណាយប្រាក់រាប់លានដុល្លារ សម្រាប់គេហដ្ឋានរបស់ពួកគេទេ ប៉ុន្តែអ្នករស់នៅទីក្រុងរាប់លាននាក់ នៅតែជួបផលំបាកក្នុងការរស់នៅបន្ទប់ជួលអាផាតមិនតូចៗ ដែលមានទំហំតូចជាងកន្លែងចតរថយន្តខាងលើទៅទៀត។

របាយការណ៍ឆ្នាំ២០១៩ របស់ក្រុមហ៊ុន UBS បានឱ្យដឹងថា “បុគ្គលិកជំនាញ” ត្រូវការប្រាក់ចំណូលថេរក្នុងរយៈពេល២២ឆ្នាំ ដើម្បីអាចទិញបានលំនៅដ្ឋានទំហំ៦០ម៉ែត្រការ៉េបាន។

ការសិក្សាមួយទៀតបានឲ្យដឹងថា បានចុះបញ្ជីតម្លៃអចលនទ្រព្យ ជាមធ្យមនៅហុងកុង១,២លានដុល្លារអាមេរិក។

ទីផ្សារអចលនទ្រព្យបែបប្រណីតបានស្ទុះងើបឡើងវិញ បន្ទាប់ពីមានភាពមិនច្បាស់លាស់ជុំវិញភាពវឹកវរនយោបាយ នៅក្នុងទីក្រុងហិរញ្ញវត្ថុដ៏ធំមួយនេះ។

នៅឆ្នាំនេះ ផ្ទះទំហំ៣.៣៧៨ហ្វីតការ៉េ ត្រូវបានលក់ក្នុងតម្លៃ៥៩លានដុល្លារ ដែលកំណត់ត្រាតម្លៃអចលនទ្រព្យថ្លៃបំផុតក្នុងទីក្រុងមួយនេះ៕

គម្រោងធ្វើឱ្យប្រសើរឡើងផ្លូវជាតិលេខ៣នឹងលើកកម្ពស់វិស័យអចលនទ្រព្យ នៅខេត្តកំពតមួយកម្រិតទៀត

ដោយៈ ម៉ាណេត
ភ្នំពេញៈ គម្រោងធ្វើឱ្យប្រសើរឡើងផ្លូវជាតិលេខ៣ ពីរាជធានីភ្នំពេញទៅក្រុងកំពត ដែលសម្រេចបានជិត១០០% នឹងលើកកម្ពស់វិស័យអចលនទ្រព្យនៅខេត្ត ដែលកំពុងមានសក្តានុពលទាំងវិស័យអចលនទ្រព្យ និងទេសចរណ៍ សម្រាប់ការវិនិយោគ។

នៅពេលគម្រោងធ្វើឱ្យប្រសើរឡើងផ្លូវជាតិលេខ៣ ពីភ្នំពេញទៅក្រុងកំពត ត្រូវបានបញ្ចប់ទាំងស្រុង ការធ្វើដំណើរទៅខេត្តកំពត នឹងជួយដល់ការកាត់បន្ថយពេលវេលា​។ នេះគឺកត្តាអំណោយផលមួយសម្រួល ដល់ការធ្វើដំណើររបស់វិនិយោគ ក្នុងការទៅស្វែងរកការវិនិយោគនៅក្នុងខេត្តមួយនេះ។

លោកCooler Tanអគ្គនាយកក្រុមហ៊ុនYoungsia Real Estateបានមានប្រសា​សន៍នៅថ្ងៃទី៤ ខែមិថុនា ឆ្នាំ២០២១ថា នៅពេលគម្រោងធ្វើឱ្យប្រសើរឡើងផ្លូវជាតិលេខ៣នេះបញ្ចប់ការស្ថាបនារួចរាល់ហើយ វានឹងជួយជំរុញវិស័យអចលនទ្រព្យខ្លាំង ជាពិសេសនៅខាងខេត្តកំពត។

លោកបានថ្លែងថា “យើងគ្រាន់តែឃើញ សេចក្តីប្រកាសបង្កើតទីក្រុងបូកគោ និងកាត់ចូលជាទីក្រុងបូកគោនេះ តម្លៃអចលនទ្រព្យកើនឡើងខ្ពស់ ហើយយើងឃើញមានការទិញដូរច្រើន ដោយអ្នកទៅទិញទុក និងទិញសម្រាប់ការអភិវឌ្ឍន៍”។

លោកបានថ្លែងបន្តថា “ខេត្តកំពត គឺជាតំបន់មានសក្តានុពលយ៉ាងខ្លាំង ដោយសារសក្តានុពលជាច្រើនដែលខេត្តនេះមាន ពិសេសក្រោយពេលរដ្ឋាភិបាល ប្រកាសពង្រីកផ្លូវជាតិលេខ៣ភ្លាម ខេត្តកំពតបានទាក់ទាញគម្រោងអភិវឌ្ឍន៍ជាច្រើនរួចទៅហើយ ខណៈបច្ចុប្បន្នផ្លូវដ៏សំខាន់នេះ បានជិតដល់ដំណាក់កាលបញ្ចប់”។

ដោយឡែក លោកសុខ គែន ភ្នាក់ងារអចលនទ្រព្យមួយរូបប្រចាំខេត្តកំពតបានឱ្យដឹងថា ទោះស្ថិតនៅក្នុងវិបត្តិនៃជំងឺកូវីដ៩ក្ដី សកម្មភាពទិញលក់មានការថយចុះខ្លះ តែតម្លៃអចលនទ្រព្យជាពិសេសទៅលើដីធ្លី មិនមានការថយចុះទេ ហើយមានតែឡើងថ្លៃបន្តទៀតនៅតាមតំបន់មានសក្ដានុពលមួយចំនួន។ ទោះជាយ៉ាងណាក្ដីវាថយតិចតួច ក្រោមទីផ្សារបន្តិចចំពោះអ្នក ដែលត្រូវការលក់អចលនទ្រព្យបន្ទាន់ៗប៉ុណ្ណោះ សម្រាប់ទីផ្សារទូទៅអត់មានថយទេ។

លោកបន្តថា “អ្នកមានលុយនៅតែបន្តស្វែងរកទិញអចលនទ្រព្យ ហើយអាចទិញបាននៅតំបន់ដែលមានសក្ដានុពល ក្នុងតម្លៃចរចានៅលើទីផ្សារ”។​លោកបន្តថា “សម្រា​ប់អ្នកដែលមានសំណាង អាចរកទិញបានដីធ្លីរបស់ម្ចាស់ ដែលត្រូវការលុយបន្ទាន់សម្រា​ប់ដោះស្រាយជីវភាព និងដោះស្រាយបញ្ហា តែសម្រាប់ដីធ្លីរបស់ម្ចាស់ដែលមិនត្រូវការបន្ទាន់តម្លៃ នៅតែរឹងនិងអាចលើទីផ្សារពីមុនទទៀត”។

ខេត្តកំពតនៅតែមានសញ្ញាល្អ នៃការវិនិយោគលើវិស័យសំណង់ ដោយរយៈពេល៤ខែឆ្នាំនេះ ទុនវិនិយោគជាង១៨លានដុល្លារ ត្រូវបានចាក់បញ្ចូលក្នុងខេត្តកំពុងមានភាពរីកចម្រើននេះ។

ក្រសួងសាធារណការ និងដឹកជញ្ជូន កាលពីថ្មីៗនេះបានឱ្យដឹងថា គម្រោងធ្វើឱ្យប្រសើរឡើងផ្លូវជាតិលេខ៣ពីភ្នំពេញទៅក្រុងកំពត សម្រេចបាន៩៨,០៤%ហើយ គិតរហូតមកទល់ពេលនេះ នៅសេសសល់តែការងារមួយចំនួនតូចប៉ុណ្ណោះ។

បច្ចុប្បន្ននេះក្រសួងសាធារណការ និងដឹកជញ្ជូន កំពុងខិតខំប្រឹងប្រែងយកចិត្តទុកដាក់ពន្លឿនការងារ បំពាក់កាមេរ៉ាចាប់ល្បឿនយានយន្ត កាមេរ៉ាសុវត្ថិភាព ជញ្ជីងថ្លឹងទម្ងន់ក្រោមដ និងជញ្ជីងថ្លឹងទម្ងន់នៅក្នុង ស្ថានីយ៍ ដោយឡែក ស្ពានអាកាសថ្មើជើងនៅលើកំណាត់ផ្លូវជាតិលេខ៣ ឋិតនៅម្ដុំត្រាំខ្នាគ្រោងនឹងបញ្ចប់ការងារទាំងស្រុង ក្នុងចុងខែមិថុនា ឆ្នាំ២០២១ខាងមុខ ពោលគឺក្នុងរយៈពេលមួយខែទៀតចាប់ពីពេលនេះតទៅ។

គម្រោងនេះចំណាយថវិកា សរុបប្រមាណ២១៩,៩១១,០០០ដុល្លារអាមេរិក ជាហិរញ្ញប្បទានសម្បទានពីសាធារណរដ្ឋ ប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សាងសង់ដោយក្រុមហ៊ុន សាជីវកម្មស្ពាន និងថ្នល់ចិន (China Road and Bridge Corporation) ត្រួតពិនិត្យបច្ចេកទេស ដោយក្រុមហ៊ុនទីប្រឹក្សាបច្ចេកទេសសំណង់ ក្វាងចូវ វ៉ានអាន (Guangzhou Wanan Construction Supervision Co., Ltd) ប្រើប្រាស់រយៈពេលសាងសង់៤៨ខែ៕

ហេដ្ឋារចនាសម្ព័ន្ធក្នុងខេត្តព្រះសីហនុ ទាក់ទាញទេសចរនិងវិនិយោគិន កាន់តែខ្លាំងនាពេលអនាគត

ដោយៈវឌ្ឈនៈ
ភ្នំពេញៈ ហេដ្ឋារចនាសម្ព័ន្ធប្រណីតៗផ្លូវជាច្រើនខ្សែ នៅក្នុងខេត្តព្រះសីហនុ បាននិងកំពុងបង្អួតសម្រស់ ហើយជាការទាក់ទាញវិនិយោគិន និងទេសចរជាតិអន្តរជាតិ ទៅទស្សនាកម្សាន្ត តាមរមណីយដ្ឋាននានា និងវិនិយោគក្នុងខេត្តនេះ ជាពិសេសនៅពេលចប់វិបត្តិកូវីដ១៩ នៅពេលខាងមុខនេះ។

រដ្ឋាភិបាលបានចំណាយថវិកាប្រមាណ៣០០លានដុល្លារអាមេរិក ក្នុងការសាងស​ង់ផ្លូវចំនួន៣៤ខ្សែនៅក្នុងខេត្តព្រះសីហនុ ដែលមានប្រវែងជាង៨៧គីឡូម៉ែត្រ ដើម្បីជាកា​រទាក់ទាញការវិនិយោគបន្ថែមពីវិនិយោគិនក្នុង និងក្រៅប្រទេស និងជាការទាក់ទាញដល់ទេសចរជាតិនិងអន្តរជាតិផងដែរ ។ ផ្លូវប្រណីតៗ និងអគារខ្ពស់ៗជាច្រើន នៅក្នុងខេត្តព្រះសីហនុ នឹងក្លាយជាចំណុចទាក់ទាញបន្ថែម ដល់វិនិយោគិននិងទេសចរចូលមកកាន់ខេត្តនេះ នៅពេលចប់វិបត្តិកូវីដ១៩ ។

នៅពេលកន្លងទៅ លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា ដោយសារហេដ្ឋារចនាសម្ប័ន្ធ មានឥទ្ធិពលដល់ការទាក់ទាញវិនិយោគិនជាតិ និងអន្តរជាតិ ដើម្បីដាក់ទុនវិនិយោគ ទើបរដ្ឋាភិបាលបានចំណាយថវិកាជាតិរាប់រយលានដុល្លារ ដើម្បីបណ្ដាក់ទុនវិនិយោគលើហេដ្ឋារចនាសម្ព័ន្ធនេះ។ ជាក់ស្ដែងផ្លូវជាតិសំខាន់ៗតភ្ជាប់ពីភ្នំពេញ ទៅកាន់បណ្ដាខេត្តសក្ដានុពលក៏បាននិងកំពុងជួសជុលកែលម្អបន្ថែម ដូចជាផ្លូវជាតិលេខ៣ ផ្លូវជាតិលេខ២ និងផ្លូវសំខាន់ៗផ្សេងទៀតផងដែរ ។

លោកបន្តថា “មិនតែប៉ុណ្ណោះ រដ្ឋាភិបាលក៏បានចំណាយថវិកា ក្នុងការអភិវឌ្ឍហេ  ដ្ឋារចនាសម្ព័ន្ធក្នុងខេត្ត ដែលមានការទាក់ទាញវិនិយោគជាច្រើនផងដែរ ដូចជាផ្លូវនៅក្នុងខេត្តព្រះសីហនុ និងខេត្តសៀមរាបជាដើម ដែលសុទ្ធសឹងតែចំនុចទាក់ទាញ វិនិយោគក្នុងការស្វែងរកឱកាសវិនិយោគក្នុងតំបន់ទាំងនេះ”។ លោកបន្តថា “បច្ចុប្បន្ននេះប៉ូលបីសំខាន់ៗ ដែលមានសក្ដានុពលសម្រាប់វិនិយោគនោះគឺភ្នំពេញ ខេត្តព្រះសីហនុ និងខេត្តសៀមរាប ហើយរំពឹងថាវិនិយោគិនបរទេស ជាពិសេសវិនិយោគិនចិន នឹងត្រលប់មកកម្ពុជាដើម្បីស្វែងរកការវិនិយោគឡើងវិញនៅពេលឆាប់ៗនេះ”។

បើតាមលោកសន សៀបនាយកប្រតិបត្តិក្រុមហ៊ុនអចលនវត្ថុកម្ពុជាក៏បានលើកឡើងផងដែរថា ខេត្តព្រះសីហនុ នឹងក្លាយជាបណ្ដុំឧស្សាហកម្ម ពាណិជ្ជកម្ម ដ៏មានសក្ដានុពលនៅពេលឆាប់ៗនេះ ខណៈខេត្តនេះក៏នឹងក្លាយជាសហគមន៍ វិនិយោគរបស់វិនិយោគិនចិននៅពេលចប់វិបត្តិកូវីដ១៩។

លោកថា “ថ្វីត្បិតតែខេត្តព្រះសីហនុនៅពេលនេះ មិនមានសកម្មភាពវិនិយោគខ្លាំងដូចពីមុនក្ដី។ តែមិនមែនមានន័យថាខេត្តនេះ វាឆ្អែតនោះឡើយ នៅពេលស្ងប់ស្ងាត់កូវីដ​១៩ វិនិយោគិននឹងចូលមកកម្ពុជាហើយខេត្ត ដែលពួកគេសម្លឹងមានព្រះសីហនុ និងកោះកុង”៕

បុរីគីម ស័ងផ្តល់ជូននូវលក្ខខ័ណ្ឌពិសេសលើការបង់ប្រាក់ក្នុងបរិបទកូវីដ១៩

ដោយៈសហការី

ភ្នំពេញៈ ការរីករាលដាលជំងងឺកូវីដជាង២ឆ្នាំមកនេះ បានធ្វើឲ្យប៉ះពាល់សដល់សុខភាពសេដ្ឋកិច្ច និងសង្គម។ យ៉ាងណាមិញ វិស័យអចលនទ្រព្យផ្នែកលំនៅឋាននៅប្រទេសយើង (ពិសេសក្នុង និងជុំវិញរាជធានីភ្នំពេញ) ដូចជាមានសកម្មភាពល្អប្រសើរផងដែរ ទោះបីជាមិនដល់ស្ថានភាពមុនវិបត្តិ។

តើបងប្អូន ដែលកំពុងពិចារណាទិញផ្ទះក្នុងឆ្នាំនេះ ក្នុងកំឡុងពេលវិបត្តិកូវីដ តើគួរតែបន្តទិញឬទេ? ឬក៏គួរទុកលុយចាំឆ្នាំក្រោយៗសិន? ដើម្បីសម្រេចចិត្តឲ្យបានត្រឹមត្រូវ បងប្អូនត្រូវពិចារណា លើចំណុចសំខាន់ៗដូចជា ពិនិត្យមើលស្ថានភាពហិរញ្ញវត្ថុរបស់អ្នកនាបច្ចុប្បន្ន និងអនាគត ព្រោះវាជាចំណុចដែលសំខាន់បំផុត និងពិចារណាឲ្យបានគ្រប់ជ្រុងជ្រោយ ព្រោះថាការផ្លាស់ប្ដូរលឿនៗ នៃនិន្នាការសេដ្ឋកិច្ចទីផ្សារ អាចធ្វើឲ្យប៉ះពាល់ដល់អ្នកភ្លាមៗទាំងមិនបានរំពឹងទុក។

ហេតុនេះ ប្រសិនជាអ្នកមិនសូវមានភាពនឹងនរ រឹងមាំផ្នែកហិរញ្ញវត្ថុ ហើយឈោងចាប់ទិញផ្ទះក្នុងសម័យកូវីដ នោះនឹងហានិភ័យមានកម្រិតខ្ពស់។

លោក អ្នកត្រូវសួរខ្លួនឯងនូវសំណួរទាំងនេះជាមុន ដូចជា តើអ្នកមានទុនគ្រប់គ្រាន់យ៉ាងហោចណាស់៣០ភាគរយ នៃតម្លៃផ្ទះនៅក្នុងដៃឬនៅ? បន្ទាប់ពីចំណាយលុយ៣០%នោះហើយ អ្នកមានលុយគ្រប់គ្រាន់សម្រាប់រស់នៅសុខស្រួលប្រចាំថ្ងៃ និងការពារពេលមានអាសន្នដែរឬទេ? ឬក៏ត្រូវកាត់បន្ថយចំណាយច្រើន?។

ប្រសិនជាអ្នកត្រូវខ្ជីលុយធនាគារបន្ថែម តើអ្នកមានចំណូលយ៉ាងហោចណាស់២ដង នៃប្រាក់ត្រូវបង់ធនាគារប្រចាំខែឬអត់ជាដើម។

បន្ទាប់ពីសួរសំណួរទាំងនេះទៅខ្លួនឯងរួចហើយ និងរកឃើញថា ចម្លើយរបស់អ្នកបង្ហាញថា អ្នកមិនទាន់មានភាពនឹងនរផ្នែកហិរញ្ញវត្ថុក្នុងពេលនេះទេ កុំទាន់ប្រថុយទិញអីល្អជាង។

អាចរងចាំដល់ពេលស្ថានភាពហិរញ្ញវត្ថុ របស់អ្នកល្អឡើងវិញសិន ក៏មិនទាន់ហួសពេលដែរ។

ជាមួយគ្នានេះ ការសិក្សាពីតម្លៃទីផ្សារលំនៅឋាន ពិតជាមានសារៈសំខាន់ផងដែរប្រសិនជាស្ថានភាពហិរញ្ញវត្ថុរឹងមាំហើយ អ្នកត្រូវមើលស្ថានភាពទីផ្សារលំនៅឋាន។ បច្ចុប្បន្ននេះ  គឺជាឱកាសល្អសម្រាប់អ្នក ដែលមានធនធានគ្រប់គ្រាន់ ក្នុងការទិញ ព្រោះថាឥឡូវនេះ អ្នកទិញមានប្រៀបជាងអ្នកលក់ហើយ។

ទោះបីជាតម្លៃផ្ទះមើលទៅមិនសូវមានការធ្លាក់ថ្លៃខ្លាំង ក៏អ្នកលក់មានការផ្តល់ជូនច្រើនផ្សេងៗពីការបញ្ចុះតម្លៃផ្ទះដែរ ដូចជាការបង់ប្រាក់ធូរជាងមុន ផ្តល់រយៈពេលបង់យូរជាងមុន មានផ្ដល់ជូនសម្ភារៈក្នុងផ្ទះច្រើនជាងមុន និងមានកម្មវិធីចាប់ឆ្នោតចុះតម្លៃផ្សេងៗ។ បើគម្រោងដែលអ្នកចង់ទិញ មិនមានផ្តល់កម្មវិធីទាំងអស់នេះទេ ក៏អ្នកទាំងអស់គ្នាអាចសុំចុះតម្លៃបានច្រើនជាងមុនដែរ អាចដល់១០%ឬច្រើនជាងនេះ។

ជាមួយគ្នានេះ អ្នកជំនាញអចលនទ្រព្យ លោកម៉ម សិរីបញ្ញាអគ្គនាយកក្រុមហ៊ុនEasy Property Investment បានមានប្រសាសន៍ថា ទីផ្សារលំនៅដ្ឋានបានងើបឡើងវិញហើយ ដោយចរន្តទិញលក់កំពុងមានភាពសកម្មបណ្តើរ លើតំបន់ផ្លូវជាតិលេខ១ និងផ្លូវថៃហ្គ័រ ដែលបច្ចុប្បន្នមានគំរោងលំនៅដ្ឋានច្រើនបានសាងសង់ និងត្រៀមសាងសង់នៅតំបន់នេះ។

លោកបន្តថា “ដោយសារមានការអភិវឌ្ឍលំនៅដ្ឋានច្រើន មជ្ឈមណ្ឌលពាណិជ្ជកម្មធំៗក៏កំពុងសាងសង់ និងបើកដំណើរការបណ្តើរៗនៅតំបន់ផ្លូវជាតិលេខ១ ដែលជួយសម្រួលដល់ការរស់នៅកាន់តែប្រសើរ”។លោកបន្តថា “ការសាងសង់ស្ពានតភ្ជាប់រវាងទីក្រុងកោះនរា និងទីក្រុងរណបកោះពេជ្រ នឹងធ្វើឲ្យប្រជាពលរដ្ឋចូលមករស់នៅតំបន់ខាងលើកាន់តែច្រើននាពេលអនាគត ដោយសារស្ពានតភ្ជាប់រវាងទីក្រុងរណបទាំងពីរនឹងជួយសម្រួលការធ្វើដំណើរ និងកាត់បន្ថយការកកស្ទះចរាចរណ៍”។

ជាមួយគ្នានេះ ក្រុមប្រឹក្សាភិបាលនៃបុរីគីម ស័ងបានមានប្រសា​សន៍ឲ្យដឹងផងដែរថា ក្នុងឱកាសនៃបញ្ហាជំងឺកូវីដ១៩នេះ ដើម្បីលើកទឹកចិត្តជូនអតិថិជន បុរីគីម ស័ង ដោយផ្តល់ជូនអតិថិជននូវលក្ខខ័ណ្ឌបង់ប្រាក់ពិសេស ដោយអតិថិជនបង់ត្រឹម៩៩៩ដុល្លារក្នុងមួយខែ ផ្តល់ជូនការបញ្ចុះតម្លៃ២០០០០ដុល្លារអាមេរិក និងបន្ថែម៣ភាគរយបន្ថែមទៀតផងដែរ។

ក្រុមប្រឹក្សារភិបាល បុរី គីម ស័ង បានមានប្រសាសន៍ឲ្យដឹងផងដែរថា ជាមួយនឹងល្បឿននៃការអភិវឌ្ឍរបស់រាជធានីភ្នំពេញ និងកំនើនប្រជាពលរដ្ឋកាន់តែកើនឡើងពីមួយថ្ងៃទៅមួយថ្ងៃ បានធ្វើឲ្យ បុរី គីម ស័ងសម្រេចចិត្តវិនិយោគលំនៅដ្ឋានដ៏ប្រណីត ដែលស្របនឹងបណ្តោយផ្លូវថៃ ហ្គ័រ បុរី នេះមានផ្ទៃដី៥ហិកតា និងកំពុងដាក់លក់ផ្ទះបីប្រភេទ ដូចជា Shop House, វីឡាកូនកាត់ និងវីឡាភ្លោះ ដែលមានតម្លៃចាប់ពី១៣ម៉ឺន ទៅដល់២៣ម៉ឺនដុល្លារអាមេរិក។

ក្រុមប្រឹក្សាភិបាលនៃ បុរី គីម ស័ង មានប្រសាសន៍ បន្តទៀតថា “បុរី បានផ្តោតទៅលើគុណភាព សុវត្តិភាព ប្រណិតភាព និងផាសុខភាពដល់អ្នករស់នៅ តាមរយៈការរៀបចំហេដ្ឋារចនាសម្ព័ន្ឋធំទូលាយ មានសួនច្បារនិងដាំដើមឈើ ឲ្យក្លាយជាដំបន់បៃតងមួយ ដើម្បីរស់នៅក្នុងបរិបទជីវិតបែបសុវិល័យ”។

សូមអញ្ជើញចូលទស្សនាផ្ទះគំរូពិត និងទទួលយកព័ត៌មានលម្អិត 078 915 999 /086 915 999 ទីតាំងគម្រោង៖ផ្លូវលេខ114(ផ្លូវថៃហ្គ័រ) ខណ្ឌ ច្បារអំពៅ រាជធានីភ្នំពេញ https://goo.gl/maps/KzpJBe1mvyMywny88 @Borey Kimsoing៕

សប្ដាហ៍ដំបូងនៃខែមិថុនារដ្ឋាភិបាលកម្ពុជាអនុម័តគម្រោងវិនិយោគលើទឹកប្រាក់ជិត១០០លានដុល្លារ

ដោយៈវឌ្ឈនៈ
ភ្នំពេញៈ នៅដើមខែមិថុនា ឆ្នាំ២០២១នេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគចំនួន៤ ដែលមានទឹកប្រាក់វិវនិយោគប្រមាណជិត១០០លានដុល្លារអាមេរិក ព្រមទាំងផ្ដល់ការងារដល់ពលរដ្ឋកម្ពុជា រាប់ពាន់កន្លែងផងដែរ។

យោងតាមក្រុមប្រឹក្សាអភិវឌ្ឍន៍កម្ពុជាបានឱ្យដឹងថា គម្រោងវិនិយោគទាំង៤ ដែលបានអនុម័តសម្រេចចុះបញ្ជីវិនិយោគជាផ្លូវការរួមមាន ទី១- គម្រោងបង្កើតរោងចក្រផលិតវ៉ាលិស និងកាបូបគ្រប់ប្រភេទ ដែលមានទីតាំងវិនិយោគ ស្ថិតនៅភូមិដំណាក់កោះ ឃុំសំរោងលើ ស្រុកអង្គស្នួល ខេត្តកណ្តាល មានទុនវិនិយោគប្រមាណ៥លានដុល្លារអាមេរិក និងអាចបង្កើតការងារបានចំនួន ៦០៣កន្លែង។

ទី២- គម្រោងបង្កើតរោងចក្រផលិតកេសកាតុង ប្រអប់ក្រដាស ថង់ក្រដាស និងបោះពុម្ព ដែលមានទីតាំងវិនិយោគស្ថិតនៅភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ៥,៦លានដុល្លារអាមេរិក និងអាចបង្កើតការងារបានចំនួន២៣៧កន្លែង។ ទី៣- គម្រោងបង្កើតរោងចក្រកែច្នៃផ្លែស្វាយ ដែលមានទីតាំងវិនិយោគស្ថិតនៅភូមិត្បែស ឃុំវល្លិសរ ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ៦,៥លានដុល្លារអាមេរិក និងអាចបង្កើតការងារបានចំនួន ៥០០កន្លែង។

ទី៤- គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៤ ចំនួន២៧៥បន្ទប់ និងមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅដីឡូតិ៍លេខ១៦៧៩ ផ្លូវសហព័ន្ធរុស្ស៊ី ភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ៧៩លានដុល្លារអាមេរិក និងអាចបង្កើតការងារបានចំនួន៦៧៨កន្លែង៕