រដ្ឋាភិបាលកម្ពុជាបញ្ចេញកញ្ចប់ថវិកាជាង៣២២លានដុល្លារដើម្បីលើកកំពស់ ជីវភាពប្រជាពលរដ្ឋ

ដោយៈ ប៊ូ
ភ្នំពេញៈ រដ្ឋាភិបាលកម្ពុជា បានបញ្ចេញថវិកាអស់ជាង៣២២លានដុល្លារ ក្នុងការអនុវត្តកម្មវិធីឧបត្ថម្ភសាច់ប្រាក់ ជូនគ្រួសារក្រីក្រនិងងាយរងគ្រោះ ដោយសារជំងឺកូវីដ-១៩ ចាប់តាំងពីប្រកាសដាក់ឲ្យដំណើរការជាផ្លូវការ កាលពីថ្ងៃទី២៥ ខែមិថុនា ឆ្នាំ២០២០ រហូតដល់ថ្ងៃទី២៤ ខែឧសភា ឆ្នាំ២០២១។ នេះតាមយោងសេចក្តីប្រកាសព័ត៌មាន របស់ក្រសួងសេដ្ឋកិច្ច និងហិរញ្ញវត្ថុ ដែលចេញផ្សាយនៅថ្ងៃទី៤ ខែមិថុនា ឆ្នាំ២០២១នេះ។

អគ្គបណ្ឌិតសភាចារ្យអូន ព័ន្ធមុនីរ័ត្នឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម នាថ្ងៃទី១ ខែមិថុនា ឆ្នាំ២០២១កន្លងទៅនេះ បានអញ្ជើញដឹកនាំ កិច្ចប្រជុំក្រុមប្រឹក្សាជាតិ គាំពារសង្គម តាមរយៈប្រព័ន្ធអនឡាញ (Zoom) ដោយមានការចូលរួមពីលោក លោកស្រី ជាអនុប្រធាន និងសមាជិកក្រុមប្រឹក្សាជាតិ គាំពារសង្គម ដែលជារដ្ឋមន្រ្តី រដ្ឋលេខាធិការ និងថ្នាក់ដឹកនាំមកពីក្រសួង-ស្ថាប័នពាក់ព័ន្ធ ដើម្បីពិនិត្យ និងពិភាក្សាលើរបៀបវារៈសំខាន់ៗ រួមមាន៖

១៖ សេចក្តីព្រាងអនុក្រឹត្យស្តីពី ការកំណត់ប្រាក់ឈ្នួល ឬប្រាក់បៀវត្សជាប់ភាគទាន «អនុក្រឹត្យស្តីពីប្រាក់ឈ្នួល ឬប្រាក់បៀវត្សជាប់ភាគទាន» រៀបចំ និងស្នើឡើងដោយ ក្រសួងការងារ និងបណ្តុះបណ្តាលវិជ្ជាជីវៈ ដែលមានបេឡាជាតិសន្តិសុខសង្គមជាសេនាធិការ ត្រូវបានរៀបចំឡើង ដើម្បីបង្កើតបាននូវបទដ្នានគតិយុត្តគ្រប់គ្រាន់ ក្នុងការឈានទៅដាក់ឲ្យអនុវត្តរបបសន្តិសុខសង្គមផ្នែកប្រាក់សោធន ដោយអនុលោមតាមច្បាប់ ស្តីពីរបបសន្តិសុខសង្គម ដែលចូលជាធរមានកាលពីថ្ងៃទី២ ខែវិច្ឆិកា ឆ្នាំ២០១៩។

កិច្ចប្រជុំក្រុមប្រឹក្សាជាតិគាំពារសង្គម បានពិភាក្សា ដោយផ្លាស់ប្តូរយោបល់ ទាំងក្នុងទិដ្ឋភាពគោលនយោបាយ និងយុទ្ធសាស្ត្រ ក៏ដូចជាទិដ្ឋភាពបច្ចេកទេស លើការកំណ​ត់កម្រិតប្រាក់បៀវត្ស ឬប្រាក់ឈ្នូលដែលត្រូវជាប់ភាគទាន សម្រាប់របបសន្តិសុខសង្គម ទាំងសម្រាប់ផ្នែកសោធន ផ្នែកថែទាំសុខភាព និងផ្នែកហានិភ័យការងារ ដោយគិតគូរថ្លឹងថ្លែងនូវបន្ទុកនានា ដែលនិយោជិត និងនិយោជកត្រូវបង់ និងអត្ថប្រយោជន៍ដែលកម្មករ-និយោជិត និងបុគ្គលក្នុងវិស័យសាធារណៈ ត្រូវទទួលបានជាការគាំពារក្រោមក្របខណ្ឌគោលនយោបាយជាតិ គាំពារសង្គមរបស់រាជរដ្ឋាភិបាល។

ជាលទ្ធផល កិច្ចប្រជុំបានសម្រេចផ្តល់នូវធាតុចូលបន្ថែម ដើម្បីឲ្យសេចក្តីព្រាងអនុក្រឹត្យនេះ កាន់តែមានភាពពេញលេញ មុននឹងអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ អាចយកសេចក្តីគោរពស្នើសុំការសម្រេចពី រាជរដ្ឋាភិបាល ដើម្បីដាក់ចេញឲ្យអនុវត្ត។

ទី២ ការចាប់ផ្តើមដាក់ឲ្យអនុវត្តរបបសន្តិសុខសង្គម ផ្នែកប្រាក់សោធនសម្រាប់បុគ្គលទាំងឡាយ ដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ដោយសារវិបត្តិ នៃជំងឺកូវីដ-១៩ រាជរដ្ឋាភិបាល បានសម្រេចពន្យារពេលដាក់ឲ្យអនុវត្តន៍ របបសន្តិសុខសង្គមផ្នែកប្រាក់សោធនសម្រាប់បុគ្គលទាំងឡាយ ដែលស្ថិតនៅក្រោមបទប្បញ្ញត្តិ នៃច្បាប់ស្តីពីការងារ ដល់ដំណាច់ឆមាសទី១ នៃឆ្នាំ២០២១នេះ ដោយតាមដាន និងពិនិត្យមើលស្ថានភាពជាក់ស្តែង នៃឥទ្ធិពលរបស់ជំងឺកូវីដ-១៩នេះ យ៉ាងយកចិត្តទុកដាក់។

តាមស្ថានការនៃការបន្តប្រឈម នឹងការរីករាលដាលនៃជំងឺកូវីដ-១៩ ជាពិសេស ឥទ្ធិពលលើស្ថានភាពសង្គម-សេដ្ឋកិច្ច នៃព្រិត្តិការណ៍២០ កុម្ភៈ ២០២១, កិច្ចប្រជុំ បានពិនិត្យ និងពិភាក្សា ទាំងក្នុងទិដ្ឋភាពបច្ចេកទេស និងទិដ្ឋភាពគោលនយោបាយ និងបានឯកភាពគ្នាថា ស្ថានភាពបច្ចុប្បន្ន នៅមិនទាន់មានភាពអំណោយផល សម្រាប់ការដាក់ឲ្យអនុវត្តរបបសន្តិសុខសង្គមផ្នែកប្រាក់សោធន សម្រាប់បុគ្គលទាំងឡាយដែលស្ថិតនៅក្រោ​មបទប្បញ្ញត្តិនៃច្បាប់ស្តីពីការងារនេះនៅឡើយ។

ក្នុងន័យនេះ កិច្ចប្រជុំបានសម្រេចថា នឹងស្នើសុំរាជ-រដ្ឋាភិបាល ដើម្បីបន្តពន្យារពេលការដាក់ឲ្យអនុវត្ត និងបន្តសិក្សា និងវាយតម្លៃស្ថានភាព នៃឥទ្ធិពលរបស់ ជំងឺកូវីដ-១៩ ជាប្រចាំ និងជាបន្តបន្ទាប់។

កិច្ចប្រជុំ ក៏បានផ្តល់ការណែនាំដល់ស្ថាប័ន ដែលជាប់ពាក់ព័ន្ធដល់ការអនុវត្តរបបសន្តិសុខសង្គម ផ្នែកប្រាក់សោធននេះ ធ្វើការផ្សព្វផ្សាយឲ្យបានទូលំទូលាយ មុននឹងដាក់ឲ្យអនុវត្ត ដើម្បីជាការបង្កើនចំណេះដឹង ទាំងទៅលើគោលការណ៍ និងជាពិសេស ទៅលើអត្ថប្រយោជន៍ ដែលជាការផ្តល់ការគាំពារដល់កម្មករ-នយោជិត ដោយរបបសន្តិសុខសង្គមផ្នែកប្រាក់សោធន។

ទី៣ ការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ វឌ្ឍនភាពនៃការអនុវត្ត «កម្មវិធីឧបត្ថម្ភសាច់ប្រាក់ ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩» ដែលគិតចាប់ពីពេលដែលរាជរដ្ឋាភិបាល បានប្រកាសដាក់ឲ្យដំណើរការជាផ្លូវការ កាលពីថ្ងៃទី២៥ ខែមិថុនា ឆ្នាំ២០២០ រហូតដល់ថ្ងៃទី២៤ ខែឧសភា ឆ្នាំ២០២១ រួមមាន៖ គ្រួសារក្រីក្រ និងងាយរងគ្រោះ ដែលបានមកផ្ទៀងផ្ទាត់ឈ្មោះ និងទទួលប្រាក់ឧបត្ថម្ភមានចំនួន ៦៩៣ ៩៣៣ គ្រួសារ ឬស្មើនឹងសមាជិកចំនួន ២ ៧៥០ ៥០១នាក់ (រួមទាំងកុមារអាយុក្រោម ៥ឆ្នាំ, ជនមានពិការភាព, ចាស់ជរាអាយុចាប់ពី ៦០ឆ្នាំឡើង, និងគ្រួសារដែលមានសមាជិកផ្ទុកមេរោគអេដស៍) បានទទួលការឧបត្ថម្ភក្រោមកម្មវិធីជំនួយសង្គមពិសេសនេះ ដោយរាជរដ្ឋាភិបាល បានចំណាយថវិកា សរុបចំនួន ១ ២៩១ ២៤៣ ៨៥៦ ០០០ រៀល ស្មើនឹង៣២២,៨១ លានដុល្លារអាមេរិក។

បើគិតត្រឹមខែមិថុនា ឆ្នាំ២០២១ នេះ «កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩» ត្រូវអនុវត្តបានរយៈពេល ពេញ១ឆ្នាំ និងទទួលបានលទ្ធផលល្អប្រសើរ ដោយគ្រួសារក្រីក្រ និងងាយរងគ្រោះ បាន និងកំពុងទទួលបានការគាំពារ និងទ្រទ្រង់ជីវភាពរស់នៅប្រចាំថ្ងៃ ពីរាជរដ្ឋាភិបាល ។ «កម្មវិធី» នេះ ក៏ទទួលបានការសាទរផងដែរ ពីដៃគូអភិវឌ្ឍន៍ និងមជ្ឈដ្ឋានអន្តរជាតិ។

ដើម្បីត្រៀមខ្លួនអនុវត្តកម្មវិធីឧបត្ថម្ភសាច់ប្រាក់នេះ ក្នុងជំហានបន្ទាប់ ដោយយោងតាមបិរបទ និងស្ថានភាពជាក់ស្តែងនៃការរីករាលដាលនៃជំងឺកូវីដ-១៩, អង្គប្រជុំ បានពិនិត្យ ពិភាក្សា និងផ្តល់ការណែនាំបន្ថែម លើការគិតគូរអំពីជំហានដែលត្រូវអនុវត្តបន្ត ដោយផ្តោតការយកចិត្តទុកដាក់ លើការរក្សាបាននូវលំនឹងផ្នែកជីវភាព រស់នៅរបស់គ្រួសារក្រីក្រ និងងាយរងគ្រោះ ទាំងក្នុងអំឡុងពេលនៃការរីករាលដាលនៃជំងឺកូវីដ-១៩ និងនៅពេលដែលស្ថានភាព មានភាពប្រសើរឡើង៕

រដ្ឋាភិបាលជំរុញឲ្យគណៈកម្មាការឲ្យរៀបចំក្រុងបូកគោបានល្អប្រសើរ

ដោយៈតារា
ភ្នំពេញៈ ក្រុងបូកគោ របស់ខេត្តកំពត នឹងលេចចេញរូបរាងក្នុងពេលឆាប់ៗខាងមុខនេះហើយ ដើម្បីធានាដល់អភិបាលកិច្ចល្អ ថ្នាក់ដឹកនាំក្រសួងមហាផ្ទៃបានជំរុញដល់គណៈកម្មាការថ្នាក់ជាតិ និងថ្នាក់ខេត្តឲ្យរៀបចំក្រុងបូកគោ បានល្អប្រសើរទាំងការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាលក្រុង ឆ្លើយតបទាន់ពេលវេលា។

ថ្លែងនៅក្នុងកិច្ចប្រជុំគណៈកម្មការរៀបចំ និងដាក់ដំណើរការរដ្ឋបាលក្រុងបូកគោតាមប្រព័ន្ធវីដេអូZoom  ព្រឹកថ្ងៃទី៤  ខែមិថុនា ឆ្នាំ២០២១ លោកសក់ សេដ្ឋា រដ្ឋលេខា​ធិការប្រចាំការ ក្រសួងមហាផ្ទៃ និងជាប្រធានគណៈកម្មការរៀបចំ និងដាក់ឱ្យដំណើរការរដ្ឋបាលក្រុងបូកគោ បានមានប្រសាសន៍ថា កិច្ចប្រជុំពេលនេះពាក់ព័ន្ធការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាលក្រុងបូកគោ គឺអនុលោមឲ្យស្របតាមច្បាប់ស្ដីពី ការគ្រប់គ្រងរដ្ឋបាលរាជធានីខេត្ត ក្រុង ស្រុក ខណ្ឌ  ដោយរួមគ្នាពិនិត្យពិភាក្សា ទៅលើការរៀបចំមន្រ្តីរាជការរដ្ឋបាលក្រុង និងអង្គភាពកងកម្លាំង ការកំណត់ទីតាំងជាក់លាក់សាងសង់អគាររដ្ឋបាលសាលាក្រុង ការរៀបចំបញ្ជីសារពើភណ្ឌទ្រព្យសម្បត្តិរដ្ឋ ដែលត្រូវផ្ទេរពីរដ្ឋបាលស្រុកទឹកឈូ មករដ្ឋបាលក្រុងបូកគោ ការរៀបចំថវិកាប្រចាំឆ្នាំរបស់ក្រុង និងការប្រកាសចូលកាន់មុខតំណែងក្រុមប្រឹក្សាក្រុង និងគណៈអភិបាលក្រុង។

លោករដ្ឋលេខាធិការ ក៏បានផ្ដល់អនុសាសន៍ណែនាំ ដល់ក្រុមការងារគណៈកម្មការថ្នាក់ជាតិ និងថ្នាក់ខេត្តរួមទាំងអ្នកពាក់ព័ន្ធផ្សេងទៀត ត្រូវខិតខំយកចិត្តទុកដាក់ជំរុញអនុវត្តការងារចំពោះមុខនេះ ដូចជាការរៀបចំសំណើសុំសមាសភាពគណៈអភិបាល សមាសភាពមន្រ្តី រាជការតាមរចនាសម្ព័ន្ធរដ្ឋបាលក្រុង  ឲ្យមានចំនួនសមរម្យល្មមទៅទំហំការងារ  ហើយជំហានដំបូងត្រូវផ្ដល់អាទិភាពដល់មន្ត្រី ដែលរស់នៅក្នុងមូលដ្ឋាននេះស្រាប់  និងរកពីកន្លែងបណ្ដោះអាសន្ន សម្រាប់ដំណើរការរដ្ឋបាលក្រុង។

ចំពោះទីតាំងសាងសង់អាគាររដ្ឋបាលគួរ អនុវត្តន៍លើប្លង់គោលមេ មានការប្រមូលផ្ដុំការិយាល័យចំណុះ ក្នុងអាគាររដ្ឋបាលតែមួយ  និងមានការគិតគូរទីតាំងទុកដីសម្រាប់អភិវឌ្ឍន៍ហេដ្ឋារចនាសម្ព័ន្ធរដ្ឋបាល នៅពេលការអភិវឌ្ឍន៍រីកចម្រើនខាងមុខបន្តទៀត។

ដោយឡែកទីតាំងសម្រាប់អធិការដ្ឋាននគរបាលក្រុង ក៏គួរយកទីតាំងឱ្យបានសមរម្យ ដាច់ដោយឡែកពីសាលាក្រុង សម្រាប់បម្រើការងារសន្តិសុខសណ្ដាប់ធ្នាប់សាធារណៈឲ្យបានល្អ ។

អភិបាលខេត្តកំពត  លោកជាវ តាយបានបញ្ជាក់ថា រដ្ឋបាលខេត្តកំពត តែងតែបានយកចិត្តទុកដាក់សហការ ជាមួយថ្នាក់ដឹកនាំក្រសួងមហាផ្ទៃ ក៏ដូចជាក្រសួងស្ថាប័នពាក់ព័ន្ធក្នុងដំណើរការរៀបចំក្រុងបូកគោនេះ និងបានត្រៀមទីកន្លែងសម្រាប់ បម្រើការងាររដ្ឋបាលបណ្ដោះអាសន្នរបស់ក្រុងបូកគោ រួចរាល់ផងដែរ៕

ក្រុមហ៊ុនចំនួន២ប្រកាសបោះទុនជាង១០លានុដល្លារនៅទីក្រុងភ្នំពេញនិងកណ្តាល

ដោយៈ ម៉ាណេត
ភ្នំពេញៈ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា (CDC) នៅថ្ងៃទី៤ ខែមិថុនា ឆ្នាំ២០២១ បានសម្រេចអនុម័តគម្រោងវិនិយោគថ្មីចំនួន២ ដែលបោះទុនវិនិយោគ១០,៦លានដុល្លារនៅទីក្រុងភ្នំពេញ និងខេត្តកណ្តាល។

យោងតាមសេចក្តីប្រកាសព៏ត៌មានរបស់CDC បានឱ្យដឹងថា តាមសំណើសុំវិនិយោ គរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

ទី១-IMPAK (CAMBODIA) CO., LTD: គម្រោងបង្កើតរោងចក្រផលិតវ៉ាលិស និងកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិដំណាក់កោះ ឃុំសំរោងលើ ស្រុកអង្គស្នួល ខេត្តកណ្តាល មានទុនវិនិយោគប្រមាណ៥លានដុល្លារអាមេរិក និងអាចបង្កើតការងារបានចំនួន ៦០៣កន្លែង។

ទី២-WING CHENG PACKAGING CO., LTD: គម្រោងបង្កើតរោងចក្រផលិតកេសកាតុង ប្រអប់ក្រដាស ថង់ក្រដាស និងបោះពុម្ព ដែលមានទីតាំងវិនិយោគស្ថិតនៅភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ៥,៦លានដុល្លារអាមេរិក និងអាចបង្កើតការងារបានចំនួន ២៣៧កន្លែង៕

ប្រធានាធិបតីអាមេរិកដាក់ចេញបទបញ្ជាហាមយាត់ក្រុមហ៊ុនអាមេរិកមិនឱ្យវិនិយោគជាមួយក្រុមហ៊នបច្ចេកវិទ្យាចិន

ដោយៈ គៀតឈូ
ភ្នំពេញ៖ លោកចូ បៃដិន (Joe Biden) ប្រធានាធិបតីអាមេរិក បានចុះហត្ថលេខាលើបទបញ្ជាមួយកាលពីថ្ងៃព្រហស្បតិ៍ ដែលហាមប្រាមក្រុមហ៊ុនអាមេរិក មិនឱ្យវិនិយោគលើក្រុមហ៊ុនចិនរាប់សិប ដែលមានជាប់ពាក់ព័ន្ធនឹងវិស័យការពារជាតិ ឬបច្ចេកវិទ្យាឃ្លាំមើលសកម្មភាព ដោយរដ្ឋបាលរបស់លោកឱ្យថាជាការបំពេញការខ្វះខាតរបស់អតីតរដ្ឋបាលTrump។

នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី៤ ខែមិថុនា ឆ្នាំ២០២១។

មន្រ្តីរដ្ឋបាលជាន់ខ្ពស់បានប្រាប់អ្នកយកព័ត៌មានថា ក្រសួងរតនាគារនឹងពង្រឹង និងធ្វើបច្ចុប្បន្នភាពលើបញ្ជីហាមប្រាមថ្មីរបស់ក្រុមហ៊ុនចំនួន៥៩ ដែលរារាំងការទិញ ឬលក់មូលបត្រ ដែលបានជួញដូរជាសាធារណៈនៅក្នុងក្រុមហ៊ុនគោលដៅ និងជំនួសបញ្ជីមុនពីក្រសួងការពារជាតិ។

លោកបៃដិន បានថ្លែងថា បទបញ្ជានេះរារាំងការវិនិយោគរបស់សហរដ្ឋអាមេរិកពីការគាំទ្រដល់ឧស្សាហកម្មយោធាឧស្សាហកម្មចិន ក៏ដូចជាកម្មវិធីយោធា ការស៊ើបការណ៍សម្ងាត់ និងកម្មវិធីស្រាវជ្រាវសន្តិសុខ និងការអភិវឌ្ឍន៍។

ដោយប្រើពាក្យកាត់សម្រាប់សាធារណរដ្ឋប្រជាមានិតចិន លោកបៃដិនបាននិយាយថា “លើសពីនេះទៀត ខ្ញុំឃើញថា ការប្រើប្រាស់បច្ចេកវិទ្យាឃ្លាំមើលរបស់ចិននៅក្នុងទឹកដីខ្លួន និងការអភិវឌ្ឍ ឬការប្រើប្រាស់បច្ចេកវិទ្យាឃ្លាំមើលរបស់ចិន ដើម្បីសម្រួលដល់ការបង្ក្រាប ឬការរំលោភសិទ្ធិមនុស្សធ្ងន់ធ្ងរគឺជាការគំរាមកំហែងមួយមិនធម្មតានោះទេ”។

ឯកសារអង្គហេតុរបស់សេតវិមានស្តីពីការបញ្ជានេះ បានឱ្យដឹងថា គោលនយោបាយនេះនឹងមានប្រសិទ្ធភាពសម្រាប់ក្រុមហ៊ុនទាំងនោះ ដែលបានចុះបញ្ជីនៅថ្ងៃទី២ ខែសីហា ខាងមុខ។

ក្រុមហ៊ុនធំៗ របស់ចិន ដែលបានបញ្ចូលក្នុងបញ្ជីក្រសួងការពារជាតិកាលពីមុន ក៏ត្រូវបានដាក់បញ្ចូលក្នុងបញ្ជីដែលបានធ្វើបច្ចុប្បន្នភាពផងដែរ រួមមានក្រុមហ៊ុន Aviation Industry Corp of China (AVIC), ក្រុមហ៊ុន China Mobile Communications Group, ក្រុមហ៊ុន China National Offshore Oil Corp (CNOOC), ក្រុមហ៊ុន Hangzhou Hikvision Digital Technology ក្រុមហ៊ុន Huawei Technologies និងក្រុមហ៊ុន and Semiconductor Manufacturing International Corp (SMIC)។ ក្រុមហ៊ុន SMIC ដើរតួនាទីយ៉ាងក្នុងការជំរុញវិស័យឈីបក្នុងស្រុករបស់ចិន។

មន្ត្រីជាន់ខ្ពស់ម្នាក់បាននិយាយថា “យើងរំពឹងយ៉ាងមុតមាំថា នៅប៉ុន្មានខែខាងមុខនេះ … យើងនឹងបន្ថែមក្រុមហ៊ុនបន្ថែមទៅក្នុងបញ្ជាថ្មីនេះ”៕

Wow! ​អតិថិជន​ប្រា​សាក់​​នៅ​​ខេត្តតាកែវ​​អាច​​ទូទាត់​​វិក្កយបត្រ​​ភ្លើង​​ដោយ​មិន​អស់​កម្រៃ​សេវា

ដោយសហការី

ខេត្តតាកែវ៖ កាន់តែងាយស្រួលសម្រាប់អ្នក​ខេត្ត​តាកែវ! ឥឡូវនេះ ប្រាសាក់ ដែលជាគ្រឹះស្ថានហិរញ្ញវត្ថុធំជាងគេនៅកម្ពុជា ​ផ្ដល់ជូន​សេវាទូទាត់​ថ្លៃ​ប្រើ​ប្រាស់​អគ្គិសនី​នៅ​ខេត្តតាកែវ ពិសេសអតិថិជន​ប្រាសាក់​ដែលរស់​នៅ​ទី​រួម​ខេត្ត​នេះ អាច​ធ្វើ​ការទូទាត់វិក្កយបត្រ​ភ្លើង តាម​រយៈ​កម្មវិធី ប្រាសាក់ម៉ូបាលប៊ែងឃីង (PRASAC Mobile Banking) ​បានគ្រប់ទី​កន្លែង ​គ្រប់​ពេល​វេលា និងមិនអស់កម្រៃសេវា។

លោក​ ​សាយ​ ​សូ​នី​ ​អនុប្រធាន​នាយក​ប្រតិបត្តិ​នៃ​គ្រឹះស្ថាន​មីក្រូ​ហិរញ្ញវត្ថុ​ប្រា​សាក់ ម.ក ​បាន​មានប្រសាសន៍ថា​ ​«​ប្រាសាក់ មាន​មោទកភាព​ដែល​ទទួល​បាន​ការ​ផ្តល់​ទំនុក​ចិត្ត និង​ជ្រើសរើស​ធ្វើ​ជា​ដៃគូ​របស់​អគ្គិសនី​កម្ពុជា ក្នុង​ការ​បម្រើ​សេវា​ទូទាត់ថ្លៃប្រើប្រាស់អគ្គិសនីតាកែវ ​តាមរយៈ ប្រាសាក់ម៉ូបាលប៊ែងឃីង (PRASAC Mobile Banking) អ៊ីនធឺណិតប៊ែងឃីង (PRASAC Internet Banking) និងនៅសាខាប្រាសាក់»។

លោក​ សាយ​ សូ​នី​ បានបន្តថា «​យើងប្តេជ្ញាចិត្ត ដើម្បី​ផ្ដល់​ជូន​នូវ​ភាព​ងាយ​ស្រួល​សម្រាប់​អតិថិជនដោយមិនចាំបាច់ចំណាយពេលក្នុងការធ្វើដំណើរទៅទូទាត់វិក្កយបត្រ មិនបារម្ភពីការឆ្លងជំងឺកូវីដ-19 មានពេលវេលាច្រើនក្នុងការប្រកបអាជីវកម្ម ដោយគ្រាន់តែជ្រើសយកការទូទាត់​វិក្កយបត្រ​​អគ្គិសនីដោយមិនគិតកម្រៃសេវាតាមរយៈ ប្រាសាក់ម៉ូបាលប៊ែងឃីង (PRASAC Mobile Banking) ដែលមាននៅក្នុងទូរស័ព្ទដៃ បានគ្រប់ពេលវេលា និងគ្រប់ទីកន្លែង»។

ក្រៅពីសេវាទូទាត់វិក្កយបត្រអគ្គិសនីខេត្តតាកែវ ប្រាសាក់ក៏បានផ្ដល់សេវានេះសម្រាប់អតិថិជនដែលរស់នៅក្នុងតំបន់ប្រតិបត្តិរបស់អគ្គិសនីកម្ពុជាស្ថិតនៅបណ្តាទីតាំងខាងក្រោមនេះផងដែរ មានដូចជា 1. រាជធានីភ្នំពេញ 2. ខេត្តកណ្តាល 3. ខេត្តកំពត 4. ស្រុកកំពង់ត្រាច 5. ខេត្តក្រចេះ 6. ស្រុកស្នួល 7. ខេត្តរតនគិរី 8. ស្រុកវើនសៃ 9. ស្រុកលំផាត់ 10. ស្រុកតាវែង 11. ក្រុងសែនមនោរម្យ 12. ខេត្តបន្ទាយមានជ័យ 13. ខេត្តកំពង់ចាម 14. ខេត្តកំពង់ស្ពឺ 15. ខេត្តសៀមរាប 16. ស្រុកបន្ទាយស្រី 17. ខេត្តស្ទឹងត្រែង 18. ខេត្តព្រៃវែង 19. ខេត្តត្បូងឃ្មុំ 20. ក្រុងព្រះសីហនុ 21. ខេត្តបាត់ដំបង 22. ខេត្តមណ្ឌលគិរី 23. ស្រុកកែវសីមា 24. ស្រុកពេជ្រាដា 25. ស្រុកកោះញែក 26. ខេត្តស្វាយរៀង 27. ក្រុងបាវិត 28. ជីភូ 29. ស្រុកកំពង់រោទ៍។

សូមបើកគណនីសន្សំនៅប្រាសាក់នៅថ្ងៃនេះ ដើម្បីទទួលបានចំណូលពីការប្រាក់ និងងាយស្រួលចាត់ចែងសាច់ប្រាក់ដោយខ្លួនឯង៕

រដ្ឋាភិបាលចិនប្រតិកម្មនិងចេញមុខការពារទំនាក់ទំនងដ៏ល្អជាមួយកម្ពុជា

ដោយៈគង់ ម៉ាលីន
ភ្នំពេញៈ រដ្ឋាភិបាលប្រទេសចិនបានចេញមុខប្រតិកម្ម និងបង្ហាញជំហរការពារទំនា​ក់ទំនងដ៏ល្អជាមួយកម្ពុជា ដោយអ្នកនាំពាក្យក្រសួងការបរទេសចិន បាននិយាយថា “ទំនាក់ទំនងល្អរបស់ខ្លួនជាមួយប្រទេសកម្ពុជា គឺបានចូលរួមចំណែកជាវិជ្ជមាន ដល់សន្តិភាព និងស្ថេរភាពក្នុងតំបន់យ៉ាងពិតប្រាកដ”។

ការលើកបែបនេះ គឺជាការឆ្លើយទៅកាន់សហរដ្ឋអាមេរិក ដែលបានសម្តែងការព្រួយបារម្ភអំពីវត្តមានរបស់យោធាចិននៅក្នុងប្រទេសកម្ពុជា។

យោងតាមការចេញផ្សាយដោយសារព័ត៌មាន AP នៅយប់ថ្ងៃព្រហស្បតិ៍ ទី៣ ខែ

មិថុនា ឆ្នាំ២០២១ កន្លងមកបានឲ្យដឹងថា អ្នកនាំពាក្យក្រសួងការបរទេសចិនលោក Wang Wenbin បានចេញមុខមកប្រតិកម្ម នឹងក្តីកង្វល់របស់អនុរដ្ឋមន្រ្តី ក្រសួងការបរទេស សហរដ្ឋអាមេរិកខាងលើភ្លាមៗថា ប្រទេសចិននិងកម្ពុជាមាន “មិត្តភាពជាប្រពៃណី” និងជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយ។

លោក Wang បានសង្កត់ធ្ងន់ទៀតថា “ទំនាក់ទំនងល្អរបស់ប្រទេសចិន ជាមួយកម្ពុជាគឺបានចូលរួមចំណែក ជាវិជ្ជមានដល់សន្តិភាព និងស្ថេរភាពក្នុងតំបន់ គឺមិនដូចអ្វីដែលសហរដ្ឋអាមេរិកកំពុងមានកង្វល់នោះឡើយ”។

នៅក្នុងជំនួបជាមួយសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាកាលពីថ្ងៃអង្គារ៍សប្តាហ៍នេះ លោកស្រី Wendy Sherman អនុរដ្ឋមន្រ្តីក្រសួងការបរទេស សហរដ្ឋអាមេរិក បានផ្តោតសំខាន់ទៅលើការសាងសង់អគារថ្មីរបស់ចិន នៅមូលដ្ឋានកងទ័ពជើងទឹករាម។

លោកស្រីបានស្វែងរកការបំភ្លឺជុំវិញការវាយអគារចំនួន២ ដែលឧបត្ថម្ភថវិកាដោយសហរដ្ឋអាមេរិកចំនួន២ នៅកំពង់ផែរាម ខេត្តព្រះសីហនុ។ លោកស្រីក៏បានលើកឡើងថា មូលដ្ឋានយោធាចិននៅកម្ពុជា នឹងធ្វើឱ្យអន្តរាយដល់អធិបតេយ្យភាពរបស់កម្ពុជា ក៏ដូចជាគំរាមកំហែងដល់សន្តិសុខក្នុងតំបន់ និងជះឥទ្ធិពលអវិជ្ជមានដល់ទំនាក់ទំនងអាមេរិក-កម្ពុជា។

ជាមួយគ្នានេះ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានបញ្ជាក់ប្រាប់អគ្គនាយកបណ្តាញព័ត៌មាន Fresh News នៅព្រឹកថ្ងៃទី០៣ ខែមិថុនា ឆ្នាំ២០២១នេះ រាជរដ្ឋាភិបាលកម្ពុជា បានអនុញ្ញាតឱ្យអនុព័ន្ធយោធាសហរដ្ឋអាមេរិក ចុះពិនិត្យកំពង់ផែរាម ដើម្បីឱ្យអស់មន្ទិលសង្ស័យថាមានមូលដ្ឋានទ័ពចិន។

ការអនុញ្ញាតនេះ បានធ្វើឡើងបន្ទាប់ពីសហរដ្ឋអាមេរិក តាមរយៈលោកស្រី Wendy Ruth Sherman អនុរដ្ឋមន្រ្តីការបរទេសអាមេរិក បានស្នើសុំសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ចុះពិនិត្យមើលកំពង់ផែនេះ ក្នុងពេលជំនួបជាមួយសម្តេច អំឡុងលោកស្រី មកបំពេញទស្សនកិច្ចរយៈពេល១ថ្ងៃ កាលពីថ្ងៃទី១ ខែមិថុនា ឆ្នាំ២០២១​។

ទោះជាយ៉ាងនេះក្តី ប្រមុខក្រសួងការពារជាតិកម្ពុជា មិនទាន់បញ្ជាក់អំពីពេលវេលាពិតប្រាកដ ដែលអនុព័ន្ធយោធាអាមេរិក នឹងទៅកាន់តំបន់កំពង់ផែរាមនេះ ដើម្បីពិនិត្យមើលស្ថានភាពជាក់ស្តែងនៅឡើយទេ ដោយសម្តេចបញ្ជាក់ថា ពួកគេអាចមកពិនិត្យកំពង់ផែរាម នៅពេលឆាប់ៗខាងមុខនេះ៕

រដ្ឋមន្រ្តីកសិកម្មៈកម្មវិធីASPIRE ជួយបង្កើនចំណូលគ្រួសារកសិករចូលរួមចំណែកកាត់បន្ថយភាពក្រីក្រកសិករកម្ពុជា

ដោយៈលក្ខិណា
ភ្នំពេញៈ គម្រោងកម្មវិធីបច្ចេកទេសកសិកម្មបែបថ្មី ដែលជាជំនួយរបស់ IFAD បានជួយដល់កសិករកម្ពុជាជាច្រើនរួចមកហើយ ជាក់ស្ដែងគម្រោងកម្មវិធីរបស់APSPIRE បានជួយបង្កើនចំណូល ដល់គ្រួសារកសិករកម្ពុជាពី២.៨០០ដុល្លារ ទៅជាង៣៣០០ដុល្លារអាមេរិកក្នុងមួយឆ្នាំ និងបន្តកើនឡើងជាបន្តបន្ទាប់ទៀត ទោះស្ថិតនៅក្នុងវិបត្តិកូវីដ១៩ក្ដី។

លោកវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានបង្ហោះលើបណ្ដាញសង្គមនៅថ្ងៃទី៤ មិថុនា ២០២១នេះឱ្យដឹងថា កម្មវិធី (ASPASPIRE) ត្រូវបានអនុវត្តពីដំបូងនៅឆ្នាំ២០១៥  ដោយអនុវត្តនៅក្នុងខេត្តចំនួន៦ គឺខេត្តកំពង់ឆ្នាំង ពោធិ៍សា​ត់ បាត់ដំបង ព្រះវិហារ ស្ទឹងត្រែង និងខេត្ក្រចេះ ដោយត្រូវបានទទួលការវាយតម្លៃខ្ពស់ពីថ្នាក់ដឹកនាំក្រសួងកសិកម្ម រុក្ខាប្រមាញ់និងនេសាទ និងបេសកកម្ម ជាបន្តបន្ទាប់របស់ IFADថា ជាកម្មវិធីដ៏ល្អ ដែលបានរួមចំណែកអភិវឌ្ឍវិស័យកសិកម្មជាតិ និងបង្កើនជីវភាព ប្រជាកសិករ ។

លោកបន្តថា “ចាប់តាំងពីឆ្នាំ២០២០ កម្មវិធីនេះត្រូវបានអនុវត្តន៍នៅក្នុងខេត្តទាំង២៥នៅកម្ពុជា ហើយរហូតមកដល់ពេលនេះ កម្មវិធីASPIRE បានចំណាយថវិកាអស់ប្រមាណ៥៩លានដុល្លារអាមេរិក ស្មើនឹងជាង៨៨ភាគរយនៃថវិកាសរុបចំនួនជាង៦៧លានដុល្លារអាមេរិក ដោយសម្រេចបានជោគជ័យ ប្រមាណ៨៩ភាគរយនៃលទ្ធផលដែលបានគ្រោងទុក”។ លោកបន្តថា “ទន្ទឹមនឹងនេះ កម្មវិធីបច្ចេកទេសកសិកម្មមួយនេះ បានគាំទ្រគ្រួសារកសិករគោលដៅចំនួន១៤ម៉ឺន៤ពាន់គ្រួសារ ដោយបានបង្កើនតចំណូលរាប់ពាន់ដុល្លារអាមេរិកក្នុងឆ្នាំ២០២០កន្លងទៅ”។

ដើម្បីជំរុញផលិតកម្មកសិកម្មឱ្យរីកចម្រើន ឆ្លើយតបនឹងតម្រូវការទីផ្សារ កម្មវិធីASPIRE បានចងក្រងបណ្ដុំអាជីវករ ដើម្បីប្រមូលទិញកសិផល ពីកសិករកម្ពុជាបានចំនួន២.២១៥បណ្ដុំអាជីវករ និងមានកសិករផ្គត់ផ្គង់ចំនួនជាង៧ម៉ឺន២ពាន់គ្រួសារ ។

សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជា កន្លងមកបានថ្លែងគាំទ្រ ដល់ការធ្វើកសិករកម្មសម្រាប់ពាណិជ្ជកម្ម ដែលសំដៅដល់ការផ្គត់ផ្គង់ក្នុងស្រុក និងឈានដល់ការនាំចេញទៅកាន់ទីផ្សារអន្តរជាតិ។ សម្ដេចមានប្រសាសន៍ថា ទោះស្ថិតនៅក្នុងវិបត្តិកូវីដ១៩ក្ដី តម្រូវការសម្ភារប្រើប្រាស់នានា ត្រូវបានថយចុះដូចជា សម្លៀកបំពាក់ស្បែកជើងជាដើម តែសម្រាប់អាហារហូបចុក គឺនៅតែមានតម្រូវការខ្ពស់ ដូច្នេះពលរដ្ឋដែលបាត់បង់ការងារ គួរចាប់យកវិស័យកសិកម្មសម្រាប់ចិញ្ចឹមគ្រួសារ៕

ឧកញ៉ាចេង ខេងៈទីផ្សារដីធ្លីនៅតែមានការទិញលក់នៅតំបន់អភិវឌ្ឍន៍នានា តែក្នុងលក្ខខ័ណ្ឌពិសេស

ដោយៈគង់ សូរិយា
ភ្នំពេញៈ អ្នកជំនាញក្នុងវិស័យអចលនទ្រព្យបានអះអាងថា ទីផ្សារដីធ្លីនៅតែមានការទិញលក់ក្នុងអំឡុងពេលនេះ បើទោះស្ថានភាពជំងឺកូវីដ១៩ កំពុងនៅតែមិនទាន់បិទបញ្ចប់ក្តី។

លោកឧកញ៉ាចេង ខេងប្រធានក្រុមប្រឹក្សាភិបាលនៃក្រុមហ៊ុនCPLបានមានប្រសា​សន៍ឲ្យដឹងតាមទូរស័ព្ទនាព្រឹកថ្ងៃទី៤ មិថុនានេះថា នៅតាមតំបន់អភិវឌ្ឍន៍នានា នៅតែមានសកម្មភាពទិញលក់ដីធ្លី ដែលការទិញលក់ទាំងនោះដូចជា នៅតំបន់សាងសង់ព្រលានយន្តហោះថ្មី តំបន់ជិតគំរោងអភិវឌ្ឈន៍បុរីថ្មីៗ និងតំបន់ជាយក្រុងភ្នំពេញដែលកំពុងមានសក្តានុពល។

លោកឧកញ៉ាបានបន្តថា “ទោះជាយ៉ាងណាដីធ្លីដែលមានតម្រូវការគឺជាដី ដែលមានតម្លៃក្រោមទីផ្សារ ទើបមានការទិញច្រើន ដោយសារស្ថានភាពបច្ចុប្បន្នមានអ្នកលក់​ច្រើនជាងអ្នកទិញ”។លោកបន្តថា “សកម្មភាពទិញលក់ដីធ្លី នៅមានភាពសកម្មជាងគេ ក្នុងវិស័យអចលនទ្រព្យនៅកម្ពុជា”។

អ្នកជំនាញដទៃទៀតបានលើកឡើងថា ការវិនិយោគដីធ្លីនៅកម្ពុជា នៅតែមានឱកាសចំណេញខ្ពស់ពីការវិនិយោគ បើធៀបនឹងការវិនិយោគលើផ្នែកដទៃទៀត នៃអចលនទ្រព្យនៅកម្ពុជា។

យោងតាមការសិក្សារបស់ក្រុមហ៊ុនKey Real Estateបានឲ្យដឹងថា នៅដើមឆ្នាំ២០២១នេះ ដីនៅតាមតំបន់អភិវឌ្ឍន៍នានាដូចជា គំរោងព្រលានយន្តហោះថ្មី តំបន់ផ្លូវជាតិលេខ៤១ ផ្លូវជាតិលេខ៥១ និងផ្លូវក្រវ៉ាត់ក្រុងទី៣តម្លៃដីធ្លីនៅតែបន្តកើនឡើង៕

រដ្ឋសភាកម្ពុជាអនុម័តទទួលយកសេចក្តីព្រាងច្បាប់ស្តីពីកិច្ចព្រមព្រៀងប្លុកពាណិជ្ជកម្មធំបំផុតក្នុងពិភពលោក(RCEP)

ដោយៈ ម៉ាណេត
ភ្នំពេញៈ គណៈកម្មាធិការអចិន្រ្តៃយ៍រដ្ឋសភា បានអនុម័តទទួលយកសេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។

សម្ដេចអគ្គមហាពញាចក្រីហេង សំរិនប្រធានរដ្ឋសភា នៃព្រះរាជាណាចក្រកម្ពុជា បានដឹកនាំកិច្ចប្រជុំគណៈកម្មាធិការអចិន្រ្តៃយ៍រដ្ឋសភា តាមប្រព័ន្ធវីដេអូ នៅព្រឹកថ្ងៃទី៤ ខែមិថុនា ឆ្នាំ២០២១ ដើម្បីអនុម័តរបៀបវារៈ មួយចំនួន។

នៅក្នុងនោះកិច្ចប្រជុំរដ្ឋសភា បានអនុម័តទទួលយកសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយតំបន់ និងសេចក្តីព្រាងច្បាប់ស្តីពី វិសោធនកម្មមាត្រា១៨ថ្មី នៃច្បាប់ស្តីពីវិសោធនកម្មមាត្រា១៨ នៃច្បាប់ស្តីពីសវនកម្មនៃព្រះរាជាណាចក្រកម្ពុជា តាមសំណើរបស់រាជរដ្ឋាភិបាល ប្រគល់ជូនគណៈកម្មការជំនាញរដ្ឋសភា ពិនិត្យសិក្សា។

លោកប៉ាន សូរស័ក្តិរដ្ឋមន្ត្រីក្រសួងពាណិជ្ជកម្មបានមានប្រសាសន៍នៅក្នុងកិច្ចប្រជុំតាមប្រព័ន្ធវីឌីអូ របស់គណៈកម្មការជាតិរៀបចំកិច្ចប្រជុំកំពូលអាស៊ាន នៅឆ្នាំ២០២២ កាលពី ខែឧសភា ឆ្នាំ២០២១ថា តាមរយៈក្រសួងពាណិជ្ជកម្ម កម្ពុជាបាននឹងកំពុងព        ន្លឿននីតិវិធីក្នុងស្រុក សម្រាប់ឈានទៅការផ្តល់សច្ចាប័ន លើកិច្ចព្រមព្រៀងពាណិជ្ជកម្មសេរីនានា ដែលកម្ពុជាជាសមាជិក រួមមានកិច្ចព្រមព្រៀង RCEP និងកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលត្រូវបានចុះហត្ថលេខាកាលពីឆ្នាំ២០២០ កន្លងទៅ។

លោកបានបន្តថា ក្រសួងក៏បាននឹងកំពុងជំរុញនីតិវិធីសេសសល់ នៅក្នុងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង ដើម្បីឈានទៅរកការចុះហត្ថលេខាឱ្យបានកាន់តែឆាប់ មុននឹងសម្រេចបើកការចរចា កិច្ចព្រមព្រៀងជាមួយដៃគូពាណិជ្ជកម្មផ្សេងទៀត រួមមានជប៉ុន ឥណ្ឌាជាដើម នៅពេលការសិក្សាបានបញ្ចប់។

លោកបានថ្លែងថា #ក្រសួងក៏បាននឹងកំពុងបង្កើតក្រុមការងារថ្នាក់ក្រសួង ដើម្បីត្រៀមរៀបចំផ្តល់ជាធាតុចូលសំខាន់ៗ ក្នុងវិស័យពាណិជ្ជកម្ម ជូនដល់ក្រសួងការបរទេស និងសហប្រតិបត្តិការអន្តរជាតិ សម្រាប់ ដាក់ ជាចំណុ ច អាទិភាព និងគំនិតផ្តួចផ្តើមនានារបស់កម្ពុជាក្នុងឋានៈជាម្ចាស់ផ្ទះនៃកិច្ចប្រជុំនេះ”។

ក្រុមអ្នកជំនាញ និងអ្នកវិភាគសេដ្ឋកិច្ច បានលើកឡើងថា ដោយមានការពន្លឿនលើការផ្តល់សច្ចាប័ន កិច្ចព្រមព្រៀង RCEP នឹងអាចចូលជាធរមាននៅឆ្នាំក្រោយ។

លោក Zhang Jianping អគ្គនាយកមជ្ឈមណ្ឌលកិច្ចសហប្រតិបត្តិការសេដ្ឋកិច្ចតំបន់ចិន ដែលមានមូលដ្ឋាននៅទីក្រុងប៉េកាំងបាននិយាយថា ទំនាក់ទំនងកាន់តែជិតស្និទ្ធ ក្នុងចំណោមប្រទេសហត្ថលេខីនៃកិច្ចព្រមព្រៀង RCEP នឹងមានឥទ្ធិពលយ៉ាងខ្លាំងលើពាណិជ្ជកម្មក្នុងតំបន់ការវិនិយោគ និងការធ្វើសមាហរណកម្មទីផ្សារ។

លោកបានបន្តថា “ប្រការនេះនឹងជួយដល់ការស្ទុះងើបឡើងវិញ នៃសេដ្ឋកិច្ចពិភពលោក ដែលកំពុងទទួលរងផលប៉ះពាល់ ដោយសារជំងឺរាតត្បាតកូវីដ១៩ និងងាកចេញពីការប្រឈមនឹងការកើនឡើង នូវការគាំពារនិយមផ្នែកពាណិជ្ជកម្ម”។

លោក Zhang បាននិយាយថា កិច្ចសហប្រតិបត្តិការ ក្នុងចំណោមបណ្តាប្រទេសដែលចូលរួម និងផ្តល់ផលប្រយោជន៍គ្នាទៅវិញទៅមក នឹងជម្រុញយ៉ាងខ្លាំងដល់ពាណិជ្ជកម្ម និងការវិនិយោគក្នុងតំបន់ ដោយបន្ថែមថាមពលថ្មីដល់ការអភិវឌ្ឍក្នុងតំបន់ និងផ្តល់ការគាំទ្រយ៉ាងខ្លាំងដល់ការងើបឡើងវិញនៃសេដ្ឋកិច្ចពិភពលោក។

កិច្ចព្រមព្រៀង RCEP ត្រូវបានរៀបចំឡើង ដើម្បីកាត់បន្ថយពន្ធគយចំនួន៩០ភាគរយលើទំនិញ ដែលបានធ្វើពាណិជ្ជកម្មរវាងប្រទេសហត្ថលេខី ក្នុងរយៈពេល២០ឆ្នាំចាប់ តាំងពីចូលជាធរមាន។ នៅក្នុងច្បាប់រួមនៃប្រភពដើម ដែលបង្កើតឡើងដោយRCEP មានតែ៤០ភាគរយនៃមាតិកាប៉ុណ្ណោះ ត្រូវបានទាមទារសម្រាប់ទំនិញ ដើម្បីពិចារណាពីជាប្រភពដើមRCEP ដែលទាបជាងកម្រិតនៃកិច្ចព្រមព្រៀង ពាណិជ្ជកម្មសេរីដទៃទៀតយ៉ាងខ្លាំង។

កិច្ចព្រមព្រៀង RCEP នឹងគ្របដណ្តប់ប្រជាជនជាង២,២ពាន់លាននាក់ (៣០ ភាគរយនៃចំនួនប្រជាជនពិភពលោក) ផលិតផលសរុបក្នុងស្រុកសរុបជាង២៥,៦ទ្រីលានដុល្លារ (២៩,៣ ភាគរយនៃ GDP ពិភពលោក) និងតម្លៃពាណិជ្ជកម្មជាង១០,៤ទ្រីលានដុល្លារ (២៧,៤ ភាគរយ នៃពាណិជ្ជកម្មពិភពលោក)៕

លំហូរទុនវិនិយោគក្នុងវិស័យសំណង់អាចនឹងបន្តដាំក្បាលចុះនៅក្នុងឆ្នាំនេះ ឬយ៉ាងណា?

ដោយៈ ប៊ី
ភ្នំពេញៈ អ្នកជំនាញបានធ្វើការព្យាករណ៍ថា ទុនវិនិយោគវិស័យសំណង់ អាចនឹងធ្លាក់ចុះនៅក្នុងឆ្នាំ២០២១ ធៀបនឹងឆ្នាំ២០២០ ដោយសារការអូសបន្លាយពេលនៃវិបត្តិកូវីដ១៩ ដែលធ្វើឱ្យអ្នកអភិវឌ្ឍន៍ និងវិនិយោគិនធំៗពីបរទេសមិនអាចធ្វើដំណើរ ដើម្បីស្វែងរកវិនិយោគនៅកម្ពុជា។

លោកស្រីអាន សុធីតាអ្នកជំនាញអន្តរជាតិមួយរូប ក្នុងវិស័យអចលនទ្រព្យនៅកម្ពុជាប្រាប់កាលពីដើមខែមិថុនា ឆ្នាំ២០២១នេះថា ដោយសារស្ថានភាពការឆ្លងរាលដាលជំងឺកូវីដ១៩ នៅកម្ពុជាមិនទាន់មានភាពធូរស្រាល ព្រមជាមួយនឹងផែនការស្ថាបនាហេដ្ឋារចនាសម្ព័ន្ធរបស់រដ្ឋ មិនសូវមានច្រើនដូចមុនឆ្នាំ២០២០ ដូច្នេះទុនវិនិយោគវិស័យសំណ​ង់នៅក្នុងឆ្នាំ២០២១ អាចនឹងធ្លាក់ចុះបន្ថែមទៀតធៀបនឹងឆ្នាំ២០២០។

លោកស្រីបានថ្លែងថា “សូម្បីវិស័យអចលនទ្រព្យ ក៏មិនទាន់មានល្អឡើងវិញដែរក្នុងឆ្នាំនេះ”។អ្នកស្រីអះអាងថា “ខ្ញុំគិតឃើញថា ទុនវិនិយោគក្នុងឆ្នាំ២០២១នេះ នឹងបន្តធ្លាក់ចុះទៀត ព្រោះមិនសូវមានគម្រោងវិនិយោគធំៗក្នុងឆ្នាំទេ ហើយចំនួនការដ្ឋានសាងសង់លំនៅដ្ឋាន ដូចជាអគារខុនដូ និងបុរីឃើញថាមានការធ្លាក់ចុះផងដែរ”។

ប្រធានក្រុមប្រឹក្សាភិបាលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោ​កលឹម សុជាតិបានអះអាងថា ការដ្ឋានសំណង់នានាប្រមាណ៣០ភាគរយបានផ្អាក និងពន្យាពេលសាងសង់ដោយសារវិបត្តិកូវីដ១៩។

លោកបានមានប្រសាសន៍ឲ្យដឹងក្នុងសន្និសីទសារព៌តមានស្តីពី “បច្ចុប្បន្នភាពនៃទីផ្សារអចលនវត្ថុកម្ពុជា ក្នុងអំឡុងវិបត្តិកូវីដ១៩កាលពីខែឧសភានេះថា ការផ្អាក និងពន្យាពេលសាងសង់គំរោងមួយចំនួន ដោយសារកត្តាធំៗចំនួនពីរ ទី១ កំណើននៃការលក់បានថយចុះ និងទី២ បញ្ហាពិបាកក្នុងការនាំចូលសម្ភារៈសំណង់ និងសម្ភារៈដទៃទៀត ដែលមានបញ្ហាលើការដឹកជញ្ជូនដោយសារជំងឺកូវីដ។

លោកបន្តថា “វិស័យសំណង់ និងអចលនទ្រព្យ ទោះបីមានការធ្លាក់ចុះនូវការវិនិ​យោគពីបរទេស ប៉ុន្តែវិស័យនេះនៅតែមានភាពរ៉ឹងមាំ និងមានផលចំណេញច្រើន ដែលអ្នកវិនិយោគក្នុងវិស័យនេះ នៅតែមានផលចំណេញ លើកលែងតែការទិញដីឬអចលនទ្រព្យហើយមានជម្លោះ”។ លោកបន្តថា “កំនើននៃការវិនិយោគធ្លាក់ចុះឆ្នាំនេះ ដោយសារវិបត្តិកូវីដ១៩ ពិសេសការថមថយរបស់វិនិយោគចិនមកកាន់កម្ពុជា”។

ទុនវិនិយោគវិស័យសំណង់នៅកម្ពុជា មានទំហំទឹកប្រាក់សរុបមានជាង៧,៨ពាន់លានដុល្លារកាលពីឆ្នាំមុន ធ្លាក់ចុះជាង៣០ភាគរយ ធៀបនឹងឆ្នាំ២០១៩។ នេះបើយោងតាររបាយការណ៍របស់ធនាគារជាតិនៃកម្ពុជា៕