អគ្គនាយកដ្ឋានពន្ធដារប្រកាសដាក់ដំណើរការការបង់ពន្ធអចលនទ្រព្យតាមកម្មវិធីក្នុងទូរស័ព្ទដៃ

ដោយៈ ប៊ី

ភ្នំពេញ៖ អគ្គនាយកដ្ឋានពន្ធដារ បានដាក់ឱ្យដំណើរការការបង់ពន្ធអចលនទ្រព្យ តាមទូរស័ព្ទដៃ ក្នុងកម្មវិធី «GDT Taxpayer App» ខណៈការដាក់ដំណើរការនេះនឹងបង្កលក្ខណៈងាយស្រួល ដល់ម្ចាស់អចលនទ្រព្យ ជាអ្នកជាប់ពន្ធ។ នេះបើយោងតាមសេចក្តីជូនដំណឹងរបស់អគ្គនាយកដ្ឋានពន្ធដារនៅថ្ងៃទី១១ ខែមីនា ឆ្នាំ២០២១។

បើតាមអគ្គនាយកដ្ឋានពន្ធដារបានឲ្យដឹងថា កម្មវិធីនេះនឹងបង្កលក្ខណៈងាយស្រួល ដល់ម្ចាស់អចលនទ្រព្យ ជាអ្នកជាប់ពន្ធក្នុងការ៖

* ពិនិត្យមើលព័ត៌មាន ស្តីពីអចលនទ្រព្យដែលបានចុះបញ្ជី និងបានធ្វើបច្ចុប្បន្នភាពរួចរាល់ នៅក្នុងប្រព័ន្ធគ្រប់គ្រង ទិន្នន័យអចលនទ្រព្យរបស់អគ្គនាយកដ្ឋានពន្ធដារ។

* បង់ពន្ធលើអចលនទ្រព្យប្រចាំឆ្នាំរបស់ខ្លួន ដោយមិនចាំបាច់បំពេញព័ត៌មាន ក្នុងទម្រង់លិខិតប្រកាសពន្ធ។

* ចំណេញពេលវេលា ដោយមិនចាំបាច់អញ្ជើញទៅបង់ប្រាក់ពន្ធ នៅតាមសាខាពន្ធដារខេត្ត-ខណ្ឌ ឬសាខាធនាគារពាណិជ្ជ ជាដៃគូរបស់អគ្គនាយកដ្ឋានពន្ធដារ។

* មិនចាំបាច់ទៅកាន់សាខាពន្ធដារខេត្ត-ខណ្ឌដែលអចលនទ្រព្យនោះស្ថិតនៅ ដើម្បីធ្វើការផ្ទៀងផ្ទាត់បង្កាន់ដៃបញ្ជាក់ការបង់ប្រាក់ពន្ធ។

* ទទួលបាននូវសេចក្តីជូនដំណឹងផ្សេងៗដូចជា៖ កាលបរិច្ឆេទនៃការប្រកាសបង់ពន្ធ កាលបរិច្ឆេទនៃការផុតកំណត់ការបង់ប្រាក់ពន្ធ ការប្រកាសបង់ប្រាក់ពន្ធខ្លះ ក្នុងការិយបរិច្ឆេទជាប់ពន្ធណាមួយ និងសេចក្តីជូនដំណឹងផ្សេងៗទៀត ពាក់ព័ន្ធនឹងប្រភេទពន្ធនេះ៕

មេដឹកនាំកម្ពុជា វៀតណាម ឡាវកំពុងជំរុញការតភ្ជាប់ផ្លូវល្បឿនលឿន និងផ្លូវរថភ្លើងតភ្ជាប់រវាងប្រទេសបី

ដោយៈប៊ី

ភ្នំពេញៈ មេដឹកនាំកម្ពុជា ឡាវ និងវៀតណាម (CLV) បានឯកភាពពន្លឿនការអនុវត្តផែនកា រការតភ្ជាប់សេដ្ឋកិច្ច CLV ដល់ឆ្នាំ២០៣០ ដោយផ្តោតលើកិច្ចសហប្រតិបត្តិការក្នុងគៀងគរធានធនពីដៃគូរអភិវឌ្ឍន៍ ដើម្បីស្ថាបនាផ្លូវល្បឿនលឿនហាណូយ-វៀងចន្ទន៍ ផ្លូវរថភ្លើងរៀងចន្ទន៍-វង្សអាន និងផ្លូវរថភ្លើងភ្នំពេញ-ហូជីមិញ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ។

ការឯកភាពនេះរវាងប្រទេសទាងបី ត្រូវបានឡើងក្នុងសប្តាហ៍នេះ ក្នុងពិភាក្សាតាមប្រព័ន្ធវីដេអូអំពី កិច្ចសហប្រតិបត្តិការរវាងប្រទេសទាំងបី ក្នុងក្របខ័ណ្ឌទ្វេភាគី ត្រីភាគី និងពហុភាគី រវាងសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា លោកថងលូន ស៊ីសុលីត នាយករដ្ឋមន្ត្រីនៃសាធារណរដ្ឋប្រជាធិបតេយ្យ ប្រជាមានិតឡាវ និងលោកង្វៀន សួនហ្វ៊ុកនាយករដ្ឋមន្ត្រី នៃសាធារណរដ្ឋសង្គមនិយមវៀតណាម។

នៅក្នុងវិស័យការតភ្ជាប់ នាយករដ្ឋមន្ត្រីទាំងបី បានឯកភាពពិចារណាអំពីការដំណើរឡើងវិញ នូវការហោះហើរអន្តរជាតិរវាងកម្ពុជា ឡាវ និងវៀតណាម ដើម្បីជំរុញពាណិជ្ជកម្ម និងការវិនិយោគ ក៏ដូចជាការផ្លាស់ប្តូររវាងប្រជាជននៃប្រទេសទាំងបី។

ថ្នាក់ដឹកនាំទាំងបី បានឯកភាពពង្រឹងបន្ថែម កិច្ចសហប្រតិបត្តិការលើវិស័យនយោបាយ សន្តិសុខ ការពារជាតិ ការគ្រប់គ្រងព្រំដែន ពាណិជ្ជកម្ម និងការវិនិយោគ ការតភ្ជាប់ ថាមពល និងអប់រំ។

នាយករដ្ឋមន្ត្រីទាំងបី ក៏បានភាពបន្តរក្សា និងអនុវត្តន៍យ៉ាងមានប្រសិទ្ធភាពនូវយន្តការ នៃកិច្ចសហប្រតិបត្តិការដែលមាន ជំរុញកិច្ចសហប្រតិបត្តិការ រវាងបណ្តាខេត្តជាប់ព្រំដែន អនុវត្តន៍ឱ្យមានប្រសិទ្ធិភាព នូវរាល់កិច្ចព្រមព្រៀងស្តីពីការគ្រប់គ្រងព្រំដែន សហការបន្ថែមក្នុងការការពារសន្តិសុខ តាមបណ្តោយព្រំដែនរួម សម្របសម្រួលសកម្មភាពពាណិជ្ជកម្ម និងការវិនិយោគ ព្រមទាំងការឆ្លងកាត់របស់ប្រជាជន និងទំនិញនៅតាមបណ្តាប៉ុសិ៍តត្រួតពិនិត្យព្រំដែន៕

មហាយក្សចិន និងអាស៊ាន រួមគ្នារៀបចំខួប ៣០ឆ្នាំ ដើម្បីរឹតបន្តឹងជាដៃគូសន្ទនាឱ្យកាន់តែស៊ីជម្រៅ

ដោយៈសុខុម

ប៉េកាំង:ក្រសួងការបរទេសចិនបាននិយាយថា ប្រទេសចិន និងសមាគមប្រជាជាតិអាស៊ីអាគ្នេយ៍ (អាស៊ាន) បានព្រមព្រៀងរៀបចំព្រឹត្តិការណ៍រួមគ្នា ដើម្បីប្រារព្ធខួប ៣០ឆ្នាំ នៃការបង្កើតទំនាក់ទំនងជាដៃគូសន្ទនា។ នេះបើយោងតាមសារព័ត៌មាន Ecns.cn ចុះផ្សាយកាលពីថ្ងៃទី១១ មីនា។

ព្រឹត្តិការណ៍នេះ នឹងគ្រប់ដណ្ដប់លើប្រធានបទសំខាន់ៗ រួមមាន កិច្ចសហប្រតិបត្តិការផ្នែកនយោបាយ សន្តិសុខ សេដ្ឋកិច្ច ពាណិជ្ជកម្ម វប្បធម៌ និងកិច្ចសហប្រតិបត្តិការផ្សេងៗទៀត។

ក្នុងសន្និសីទកាសែតកាលពីថ្ងៃពុធ ទី១០ មីនា លោក ចាវ លីជៀន (Zhao Lijian) អ្នកនាំពាក្យក្រសួងការបរទេសចិន បានគូសបញ្ជាក់ថា “ថ្នាក់ដឹកនាំនៃភាគីទាំង២ នឹងបញ្ជូនសារអបអរសាទរឱ្យគ្នាទៅវិញទៅមក។ កិច្ចប្រជុំរំឭកខួបមួយ នឹងត្រូវធ្វើឡើងរួមជាមួយពិធីទទួលស្វាគមន៍ សិក្ខាសាលា ការតាំងពិព័រណ៍ដែលបង្ហាញ ពីលទ្ធផលនៃទំនាក់ទំនងជាដៃគូសន្ទនា និងវេទិកាស្តីពីកិច្ចសហប្រតិបត្តិការសេដ្ឋកិច្ច និងពាណិជ្ជកម្ម។ លើសពីនេះទៀតភាគីទាំង២ នឹងធ្វើការបង្ហាញស៊ុមរូបថតអនុស្សាវរីយ៍ និងស្រោមសំបុត្រអនុស្សាវរីយ៍ រៀបចំការប្រកួតផលិតវីដេអូខ្លី និងរៀបចំការបោះតង់យុវជនផងដែរ” ។

អ្នកនាំពាក្យដដែលបានលើកឡើងបន្ថែមទៀតថា ប្រទេសចិន ទន្ទឹងរង់ចាំសហការជាមួយបណ្តាប្រទេសជាសមាជិកអាស៊ាន ដើម្បីធានារៀបចំព្រឹត្តិការណ៍ទាំងនេះ ដោយជោគជ័យ ក្នុងបំណងពង្រឹងទំនាក់ទំនងឱ្យកាន់តែស្អិតរមួត។

លោកចាវ លីជៀន គូសបញ្ជាក់ថា “ឈរលើចំណុចចាប់ផ្ដើមថ្មី ជាប្រវត្តិសាស្ត្រ ប្រទេសចិន ត្រៀមខ្លួនរួចជាស្រេច ក្នុងការធ្វើការជាមួយអាស៊ាន ដើម្បីអបអរសាទរខួប ៣០ឆ្នាំ នៃទំនាក់ទំនងជាដៃគូសន្ទនា ជាមួយនឹងគោលបំណងបង្កើន ការជឿទុកចិត្តគ្នាទៅវិញទៅមក” ។ លោកបន្តថា “យើងនឹងរឹតបន្តឹងកិច្ចសហប្រតិបត្តិការជាក់ស្ដែង ក្នុងវិស័យសុខាភិបាលសាធារណៈ សេដ្ឋកិច្ច ពាណិជ្ជកម្ម សង្គម វប្បធម៌ និងវិស័យសន្តិសុខ ជំរុញការងើបឡើងនៃសេដ្ឋកិច្ច ក្រោយការឆ្លងរាតត្បាតវីរុសកូវីដ-១៩ និងការអភិវឌ្ឍយូរអង្វែង” ។

លោកបានបន្តថា ប្រទេសចិន នឹងធ្វើការជាមួយអាស៊ាន ដើម្បីចាប់យកឱកាសដៃគូសហការជាយុទ្ធសាស្ត្រ ឱ្យឈានដល់កម្រិតកាន់តែខ្ពស់ និងដើម្បីកសាងសហគមន៍មួយ ដែលមានទំនាក់ទំនងកាន់តែជិតស្និទ្ធ ជាមួយអនាគតរួមតែមួយ ធ្វើយ៉ាងណាឱ្យបណ្តាប្រទេស និងប្រជាជនក្នុងតំបន់ ទទួលបានអត្ថប្រយោជន៍កាន់តែល្អប្រសើរ៕

លោកហុង សុហួរ បង្ហើបប្រាប់ពីរបៀបវិនិយោគដើម្បីថ្ងៃអនាគត

ដោយៈ រ៉ាណេត

ភ្នំពេញៈ នៅក្នុងការប្រកបអាជីវកម្ម ការធ្វើជំនួញ ឬការវិនិយោគនៅក្នុងវិស័យណាមួយ ត្រូវបានធ្វើក្នុងគោលបំណងតែមួយគត់ គឺទទួលបានភាពជោគជ័យ និងមានកំណើនទ្រព្យប្រកបដោយស្ថិរភាព។

លោកបណ្ឌិតហុង សុហួរ អគ្គនាយកផ្សារមូលបត្រកម្ពុជា ដែលមានជំនាញផ្នែកវិនិយោគ និងបណ្តាក់ទុនក្នុងផ្សារភាគហ៊ុន បានមានប្រសាសន៍នៅក្នុងអង្គសិក្ខាសាលាកាលពីពេលកន្លងទៅថ្មីៗនេះថា ការវិនិយោគត្រូវបានធ្វើឡើងច្រើនរូបភាព ដែលរាប់ចាប់តាំងពីការបណ្តាក់ទុន ធ្វើអាជីវកម្មខ្នាតតូច រហូតដល់ការបង្កើតមុខជំនួញ ក្នុងទ្រង់ទ្រាយធំ ឬការបណ្តាក់ទុនទិញភាគហ៊ុនក្នុងផ្សារមូលបត្រ។

លោកលើកឡើងថា “មិនថាចំពោះការបណ្តាក់ទុនវិនិយោគ នៅក្នុងវិស័យណាមួយ ក្នុងទ្រង់ទ្រាយណាមួយនោះទេ អ្វីដែលសំខាន់គឺអាចទទួលបានផលចំណេញ ហើយចំណេញបានច្រើន និងមានកំណើនទ្រព្យប្រកបដោយស្ថិរភាពទៅថ្ងៃអនាគត” ។

លោកបណ្ឌិតហុង សុហូរ បានបញ្ជាក់ថា ការវិនិយោគដើម្បីថ្ងៃអនាគត មានភាពរីកចម្រើន ដំបូងឡើយត្រូវផ្តើមចេញពីចំណុចទាំង៣ ជាគោលការណ៍សំខាន់ ដែលត្រូវតែមានការយកចិត្តទុកដាក់ រួមមាន ទី១ ព្យាយាមរកឱកាសវិនិយោគ ទី២ រកអ្នកដែលមានគំនិតអាជីវកម្មល្អ និងច្បាស់លាស់ដើម្បីចូលរួមជាដៃគូ និងទី៣ មិនត្រូវវិនិយោគរហូតអស់ពីខ្លួន ដែលមនុស្សភាគច្រើននិយាយវិនិយោគដល់ថ្នាក់ចងកនោះទេ។

លោកបានពន្យល់ថា ថ្វីត្បិតការវិនិយោគ ត្រូវបានគេធ្វើឡើងច្រើរូបភាព ច្រើនទម្រង់ ប៉ុន្តែអ្វីដែលលោកណែនាំនោះ គឺការវិនិយោគជាក្រុម ឬវិនិយោគដោយការទិញភាគហ៊ុន។ លោកបន្តថា ក្រោយពីមានធនធានគ្រប់គ្រាន់ អ្នកមិនចាំបាច់ត្រូវតែបង្កើតឡើងដោយខ្លួនឯងទាំងស្រុងនោះទេ ប៉ុន្តែអ្នកគួរសម្លឹងមើលក្រុមហ៊ុនណា ឬអាជីវកម្មណាដែលដំណើរការល្អ ដែលត្រូវបានបង្កើតឡើង ដោយអ្នកមានគំនិតអាជីវកម្មពិតប្រាកដ ដែលមានចក្ខុវិស័យច្បាស់លាស់ មានផលិតផលស្រាប់ មានសេវាកម្មស្រាប់ ហើយទាំងផលិតផល និងសេវាកម្មទាំងនោះ នឹងនៅតែបន្តមានតម្រូវការរហូតដល់ដល់ថ្ងៃអនាគត។

លោកបន្តថា ប៉ុន្តែទោះជាយ៉ាងណាក៏ដោយ អ្នកក៏មិនត្រូវព្យាយាមចំណាយទុនលើសពីអ្វីដែលខ្លួនមានឬខ្ចីបុលធនាគារ ដើម្បីបានជាទុនសម្រាប់វិនិយោគនោះទេ ជៀសវាងជួយហានិភ័យ ដោយប្រការណាមួយដែលមិនអាចស្មានបាន។

លោកហុង សុហួរបានបន្តថា “ចូរចាំថា គ្រប់ការវិនិយោគទាំងអស់ មិនមែនសុទ្ធតែទទួលបានផលចំណេញ និងភាពជោគជ័យទាំងអស់គ្រប់ពេលនោះទេ វាក៏អាចជួបភាពបរាជ័យ ដែលបណ្តាលមកពីផែនការអាជីវកម្ម ឬកត្តារួមផ្សំពីសង្គមផងដែរ” ៕

តើកម្ពុជាមានឧទ្យានជាតិចំនួនប៉ុន្មាន នៅខេត្តណាខ្លះ និងមានសក្តានុពលដូចម្តេច

ដោយៈ គង់ សូរិយា

ភ្នំពេញៈ ប្រទេសកម្ពុជា ត្រូវបានចាត់ទុកថាជាព្រះរាជាណាចក្រនៃវប្បធ៌ម និងធនធានធម្មជាតិ ដោយប្រទេសនេះមានឧទ្យានជាតិជាច្រើន ដែលមានរ៉ាយប៉ាយនៅ តាមបណ្តាខេត្តជាច្រើនទាំងភាគខាងជើង ភាគខាងលិច និងភាគខាងកើតឆៀងខាងជើងប្រទេស។

បច្ចុប្បន្នកម្ពុជាមានឧទ្យានជាតិសំខាន់ៗចំនួន១៤ ដែលត្រូវបានប្រើប្រាស់សម្រាប់រក្សាគំរបព្រៃឈើផង ទាញយកសក្តានុពលពីវិស័យទេសចរណ៍ផង ទាញយកផលប្រយោជន៍សេដ្ឋកិច្ចបៃតងផង និងរក្សាអាកាសធាតុឲ្យមានភាពអំណោយផលផងដែរ។

ឧទ្យានសំខាន់ៗទាំង១២នោះរួមមាន៖

១. ឧទ្យានជាតិព្រះសុរាម្រិត-កុសមៈ (គីរីរម្យ) មានទីតាំង ភូមិសាស្ត្រក្នុងខេត្ត៣គឺ៖ខេត្តកំពង់ស្ពឺ កំពត និងខេត្តព្រះសីហនុ មានផ្ទៃក្រលា៣៥.២៣២ហិកតា បង្កើតឡើងដោយព្រះរាជក្រឹត្យលេខ១៧១ អនក្រ.កបថ្ងៃទី២៨ ខែធ្នូ ឆ្នាំ ២០១០ ។

២. ឧទ្យានជាតិព្រះមុនីវង្ស (បូកគោ) មានទីតាំងភូមិសាស្ត្រ ក្នុងខេត្តកំពត និងខេត្តព្រះសីហនុ។ មានផ្ទៃក្រលា១៥៤.៤៥៨ហិកតា បង្កើតឡើងដោយព្រះរាជក្រឹត្យលេខ១៧១អនក្រ. បក ថ្ងៃទី២៨ ខែធ្នូ ឆ្នាំ ២០១០ ។

៣. ឧទ្យានជាតិកែប មានទីតាំងភូមិសាស្ត្រក្នុងខេត្តកែប មានផ្ទៃក្រលា១.១៥២ហិកតាបង្កើតឡើងដោយព្រះរាជក្រឹត្យលេខ១៣៨អនក្រ. បក ថ្ងៃទី២៥ ខែតុលា ឆ្នាំ ២០០៣ ។

៤. ឧទ្យានជាតិព្រះសីហនុ (រាម) មានទីតាំងនៅក្នុងភូមិសាស្ត្រ ខេត្តព្រះសីហនុ។ មានផ្ទៃក្រលា១៥.០០០ហិកតា បង្កើតឡើងដោយព្រះរាជក្រឹត្យលេខខស/រកត/០៧ ថ្ងៃទី០២ ខែវិច្ឆិកា ឆ្នាំ ១៩៩៣ ។

៥. ឧទ្យានជាតិបុទុមសាគរ មានទីតាំងភូមិសាស្ត្រក្នុងខេត្តកោះកុង។មានផ្ទៃក្រលា១៧១.២៥០ហិកតា បង្កើតឡើងដោយព្រះរាជក្រឹត្យលេខ នស/ រកត/ ០៧ ថ្ងៃទី០១ ខែវិច្ឆិកា ឆ្នាំ ១៩៩៣ ។

៦. ឧទ្យានជាតិព្រះជយវរ្ម័ន- នរោត្តម (ភ្នំគូលែន) មានទីតាំងភូមិសាស្ត្រក្នុងខេត្តសៀរាប។មានផ្ទៃក្រលា៣៧.៥០០ហិកតា បង្កើតឡើងដោយព្រះរាជក្រឹត្យលេខ នស/រតក/០៧ ថ្ងៃទី០១ ខែវិច្ឆិកា ឆ្នាំ ១៩៩៣ ។

៧. ឧទ្យានជាតិវិរៈជ័យ មានទីតាំងភូមិសាស្ត្រខេត្តរតនគីរី និងស្ទឹងត្រែង។ មានផ្ទៃក្រលា៣៣២.៥០០ហិកតា បង្កើតឡើងដោយព្រះរាជក្រឹត្យលេខនស/រតក/០៧ ថ្ងៃទី០១ ខែវិច្ឆិកា ឆ្នាំ ១៩៩៣ ។

៨. ឧទ្យាមជាតិវើនសៃ- សៀមប៉ាង មានទីតាំងភូមិសាស្តខេត្តស្ទឹងត្រែង និងរតនៈគីរី ។ មានផ្ទៃក្រលា៥៧.៤៦៥ហិកតា បង្កើតឡើងដោយអនុក្រឹត្យលេខ ៧៧អនក្រ.បក ថ្ងៃទី០៩ ខែឧសភា ឆ្នាំ ២០១៦ ។

៩. ឧទ្យានជាតិជួរភ្នំក្រវាញកណ្ដាល មានទីតាំងភូមិសាស្ត្រខេត្តកោះកុង ពោធិ៍សាត់ និងកំពង់ស្ពឺ។មានផ្ទៃក្រលា៤០១.៣១៣ហិកតា បង្កើតឡើងដោយអនុក្រឹត្យលេខ៨១ អនក្រ. បកថ្ងៃទី០៩ ខែឧសភា ឆ្នាំ ២០១៦ ។

១០. ឧទ្យានជាតិជួរភ្នំក្រវាញខាងត្បូង មានទីតាំងភូមិសាស្ត្រខេត្តកោះកុង ពោធិសាត់ កំពង់ស្ពឺ និងព្រះសីហនុ មានផ្ទៃក្រលា៤១០.៣៩២ហិកតា បង្កើតឡើងដោយអនុក្រឹត្យលេខ ៨៩ អនក្រ.បក ថ្ងៃទី០៩ ខែឧសភា ឆ្នាំ ២០១៦ ។

១១. ឧទ្យានជាតិអូយ៉ាដាវ មានទីតាំងភូមិសាស្ត្រក្នុងខេត្តរតនគីរី ។ មានផ្ទៃក្រលា ១០១.៣៤៨ហិកតា បង្កើតឡើងដោយអនុក្រឹត្យលេខ៨២ អនក្រ.បក ថ្ងៃទី០៩ ខែឧសភា ឆ្នាំ២០១៦ ។

១២.ឧទ្យានជាតិកោះរុង មានទីតាំងភូមិសាស្ត្រក្នុងខេត្តព្រះសីហនុ។ ឧទ្យាននេះមានផ្ទៃក្រលា២.៦៥៥, ៣៥ហិកតា និងបង្កើតឡើងដោយអនុក្រឹត្យលេខ១៨៨ អនក្រ.បក ថ្ងៃទី១៣ ខែកញ្ញា ឆ្នាំ ២០១៦ ៕

អភិបាលខេត្តកំពត៖ ទីក្រុងកំពតនឹងមានអាគារខ្ពស់ៗច្រើននាពេលខាងមុខ

ដោយៈស៊ីវ ម៉េង

ភ្នំពេញៈ អភិបាលខេត្តកំពតលោក ជាវ តាយ បានមានប្រសាសន៍ឲ្យដឹងថា ទីក្រុងកំពតនឹងមានវត្តមាន អាគារខ្ពស់ៗច្រើននាពេលខាងមុខនេះ ខណៈគំរោងវិនិយោគតូចធំក្នុងខេត្ត មិនបានផ្អាកសកម្មភាពដោយសារជំងឺកូវីដនោះទេ។

លោកបាមមានប្រសាសន៍ឲ្យដឹងតាមទូរស័ព្ទនាដើមសប្តាហ៍នេះថា ក្រៅពីវត្តមានអាគារពាណិជ្ជកម្មភ្លោះកប់ពពក កំពស់ ៤៥ជាន់នៅកណ្តាលក្រុងកំពត ខេត្តនេះមានគម្រោងអាគារខ្ពស់កំពស់ ១៨ជាន់ និងជាង ២០ជាន់ជាច្រើនគំរោងទៀត ដែលគំរោងទាំងនោះបានអនុម័តរួចហើយ។

លោកបន្តថា “គំរោងអាគារខ្ពស់ៗជាច្រើនកំពុងសាងសង់ ហើយចំនួនអាគារខ្ពស់សរុបមានប៉ុន្មានលោកបានអះអាងថា របាយការណ៍ស្ថិតក្នុងដៃមន្ទីររៀបចំដែនដី នគរូបនីយកម្ម និងសំណង់ខេត្ត” ។ លោកបន្តថា “ទោះជាបណ្តាខេត្តដទៃមានជំងឺកូវីដក្តី ប៉ុន្តែខេត្តកំពតមិនមាននៅឡើយទេ” ។

ទាក់ទងនឹងការហូរចូលរបស់អ្នកវិនិយោគជាតិ អន្តរជាតិកាន់តែច្រើន លោកជាវ តាយបានមានប្រសាសន៍ឲ្យដឹងថា ខេត្តនៅតែបន្តទាក់ទាញគំរោងវិនិយោគតូច ធំ ដែលបានចូលមកវិនិយោគកាន់តែច្រើន ហើយគំរោងវិនិយោគតូច ធំ ដែលមាននាពេលកន្លងមកមិនបានផ្អាកសកម្មភាពនោះទេ។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជាបានថ្លែងថា ខេត្តកំពតមានសក្តានុពលច្រើនលើការវិនិយោគ ដោយសារខេត្តនេះ មានលក្ខខ័ណ្ឌភូមិសាស្ត្រ កៀកនឹងរាជធានីភ្នំពេញ បើធៀបនឹងបណ្តាខេត្តមានសក្តានុពលសេដ្ឋកិច្ចដទៃទៀត។លោកបន្តថា ធនធានធម្មជាតិរបស់ខេត្តកំពត ពិសេសរមណីយដ្ឋានទេសចរណ៍ធម្មជាតិ និងកែច្នៃបានកើនឡើងកាន់តែច្រើន ដែលទាក់ទាញដល់ភ្ញៀវទេសចរណ៍ជាតិ និងអន្តរជាតិ ពិសេសអ្នកវិនិយោគរមណីយដ្ឋានលំហែរកាយបានកើនឡើងខ្ពស់ ដោយសារលំហូរទេសចរណ៍ និងអ្នកវិនិយោគជាតិ និងអន្តរជាតិ៕

រដ្ឋាភិបាលអនុម័តច្បាប់វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវជាបន្ទាន់

ដោយៈសហសេវិក

ភ្នំពេញៈ រដ្ឋាភិបាលបានអនុម័តឲ្យប្រើប្រាស់ជាបន្ទាន់នូវច្បាប់ស្តីពី វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតជាបន្ទាន់ ដើម្បីឆ្លើយតបនឹងការរីករាលដាលជំងឺកូវីដ១៩ ។

ច្បាប់ថ្មីនេះ ត្រូវបានប្រមុខរដ្ឋស្តីទី សម្តេចវិបុលសេនាភក្តី សាយ ឈុំ ប្រកាសឱ្យប្រើប្រាស់ហើយ នៅល្ងាចថ្ងៃទី១១ ខែមីនា ឆ្នាំ២០២១នេះ បន្ទាប់ពីព្រឹទ្ធសភាឱ្យយោបល់គាំទ្រប៉ុន្មានម៉ោង។ នេះបើតាម លោក ម៉ម សារិន នាយកខុទ្ទកាល័យសម្តេចវិបុលសេនាភក្តី សាយ ឈុំ ។

សេចក្តីព្រាងច្បាប់ស្តីពី វិធានការទប់ស្កាត់ការឆ្លងរាលដាល នៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ត្រូវបានព្រឹទ្ធសភា ឱ្យអនុម័តគាំទ្រទាំងស្រុង ដោយឥតកែប្រែ ក្នុងសម័យប្រជុំវិសាមញ្ញព្រឹទ្ធសភា នីតិកាលទី៤ នាព្រឹកថ្ងៃទី១១ ខែមីនា ឆ្នាំ២០២១នេះ។

ច្បាប់នេះត្រូវបានរៀបចំឡើង ដើម្បីកំណត់អំពីគោលបំណង វិសាលភាព វិធានការ ទោសប្បញ្ញត្តិ និងសមត្ថកិច្ច ដែលត្រូវអនុវត្តសំដៅ ការពារអាយុជីវិតប្រជាពលរដ្ឋ សុខភាពសាធារណៈ និងសណ្តាប់ធ្នាប់សាធារណៈ ព្រមទាំងការកាត់បន្ថយឱ្យបានជាអតិបរមានូវផលប៉ះពាល់នៃជំងឺឆ្លងនេះ ចំពោះវិស័យសង្គម-សេដ្ឋកិច្ចនៅកម្ពុជា។

ច្បាប់នេះបង្ហាញពីឆន្ទៈរបស់រាជរដ្ឋាភិបាល ក្នុងការលើកកម្ពស់ការទទួលខុសត្រូវចំពោះភាពរស់រានមានជីវិតរបស់ប្រជាពលរដ្ឋ និងការថែរក្សាសន្តិសុខ សណ្តាប់ធ្នាប់សាធារណៈ ក្នុងកាលៈទេសៈដែលប្រទេសជាតិ កំពុងប្រឈមនឹងការគំរាមកំហែង ពីការរីករាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។

ច្បាប់ស្តីពី វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ដែលរៀបចំឡើងដោយ រាជរដ្ឋាភិបាល មាន ០៦ជំពូក និង១៨មាត្រា ត្រូវបានរដ្ឋសភាកម្ពុជាអនុម័តយល់ព្រម ជាលើកដំបូងចំនួន ៨៣សំឡេង នៃចំនួនសមាជិករដ្ឋសភាទាំងមូល កាលពីថ្ងៃទី៥ ខែមីនា ឆ្នាំ២០២១ នាសម័យប្រជុំរដ្ឋសភាជាវិសាមញ្ញ នីតិកាលទី៦ ។

សូមអាន ច្បាប់ស្តីពី វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតខាងក្រោមនេះ៕

រដ្ឋាភិបាលកាត់ដីជិត៦០០ហិកតាជូនពលរដ្ឋនៅខេត្តកោះកុងដែលរងផលប៉ះពាល់ពីការវិនិយោគក្នុងវិស័យឯកជន

ដោយៈ រ៉ាណេត

កោះកុងៈ ក្រោយបញ្ចប់ការសិក្សាលម្អិត ទៅលើវិសាលភាពនៃគម្រោងវិនិយោគ និងអភិវឌ្ឍន៍របស់ក្រុមហ៊ុនឯកជនដ៏ធំ នៅក្នុងដែនឧទ្យានជាតិបុទុមសាគរ ខេត្តកោះកុង រដ្ឋាភិបាល បានសម្រេចកាត់ឆ្វៀលដីទំហំជិត៦០០ហិកតា ជូនប្រជាពលរដ្ឋដែលរងនូវផលប៉ះពាល់ពីគម្រោង។

អភិបាលរងខេត្តកោះកុង លោកសុខ សុទ្ធីបានមានប្រសាសន៍ប្រាប់ឱ្យដឹងនៅក្នុងសប្ដាហ៍នេះថា ក្រុមហ៊ុនដែលទទួលបានសិទ្ធិ និងអនុញ្ញាតពីសំណាក់រាជរដ្ឋាភិបាលកម្ពុជាស្ថិតនៅតំបន់ឧទ្យានជាតិបុទុមសាគរ មានឈ្មោះស៊ីណូម៉ិចសិន ក្នុងការអភិវឌ្ឍនៅនឹងកន្លែង ដោយក្នុងនោះរួមមាន ការបង្កើតជាតំបន់កម្សាន្ត និងលំហែរកាយតំបន់សេដ្ឋកិច្ច។

លោកបានបន្តថា “ប្រជាពលរដ្ឋដែលទទួលរងនូវផលប៉ះពាល់ ពីគម្រោងអភិវឌ្ឍន៍របស់ក្រុមហ៊ុនខាងលើនេះ រដ្ឋបាលខេត្តបានស្រងឈ្មោះរួចរាល់ហើយ ដោយមានចំនួនសរុបចំនួន១៣១គ្រួសារ ដែលត្រូវកាត់ឆ្វៀលដីចេញពីឧទ្យានជាតិបុទុមសាគរ ដើម្បីធ្វើប្រទានកម្មសិទ្ធិប្រជាពលរដ្ឋ មានទំហំប្រមាណ៥៩៨ហិកតា ដោយក្នុងនោះត្រូវបានរៀបចំជា២ទីតាំង ហើយបែងចែកទំហំផ្សេងគ្នា”។

លោកអភិបាលរងខេត្តបានបញ្ជាក់ថា ដីដែលត្រូវធ្វើការកាត់ឆ្វៀលពីមុនជាដីសម្បទានសេដ្ឋកិច្ច ទៅឱ្យក្រុមហ៊ុនអភិវឌ្ឍន៍ស៊ីណូម៉ិចសិន ប៉ុន្តែបច្ចុប្បន្នដីទាំងនេះបានបំពេញលិខិតឯកសារសលាកបត្រ ជាមួយក្រសួងរៀបចំដែនដី នគរូបនីយកម្ម និងសំណង់រួចរាល់អស់ហើយ។ ដោយឡែកចំពោះដី ដែលត្រូវបែងចែកជូនប្រជាពលរដ្ឋ ដែលរងនូវផលប៉ះពាល់ គឺត្រូវធ្វើឡើងចំនួន២ទីតាំង ដោយទីតាំងទី១រៀបចំកាត់ជាដីឡូតិ៍ទំហំ២០ម៉ែត្រ x ៧០ម៉ែត្រ ស្ថិតនៅស្របផ្លូវសាយភូថង ហើយទីតាំងមួយទៀតត្រូវរៀបចំជាដីឡូតិ៍ដូចគ្នា ប៉ុន្តែមានទំហំ ២០ម៉ែត្រ x ១០០ម៉ែត្រ ដែលមានទីតាំងស្ថិតនៅក្បែរគ្នា។

លោកសុខ សុទ្ធី អភិបាលរងខេត្តកោះកុងក៏បានឱ្យដឹងដែរថា សក្តានុពលទីតាំងភូមិសាស្ត្រនៅជាប់មាត់សមុទ្រ និងមានធនធានធម្មជាតិចម្រុះសម្បូរបែប បានធ្វើឱ្យខេត្តកោះកុង ទាក់ទាញបានគម្រោងវិនិយោគ លើគ្រប់វិស័យជាបន្តបន្ទាប់ ទោះបីក្នុងអំឡុងពេលពិភពលោក កំពុងស្ថិតក្នុងដំណាក់កាលដ៏លំបាក នៃការរីករាលដាលជំងឺកូវីដ១៩ ក៏ នៅក្នុងតំបន់បុទុមសាគរនេះ មានគម្រោងអភិវឌ្ឍន៍ខ្នាតតូច ក្នុងវិស័យទេសចរណ៍មិនតិចជាង៧គម្រោងនោះទេ៕

ក្រុមហ៊ុនOCICសាងសង់គ្រឹះទីក្រុងកោះនរាសម្រេចបាន៤៥ភាគរយហើយ

ដោយគង់ សូរិយា

ភ្នំពេញៈ មន្រ្តីជាន់ខ្ពស់ក្រុមហ៊ុនOCICបានថ្លែងឲ្យដឹងថា គិតរហូតមកទល់ពេលនេះ ការសាងសង់គ្រឹះឬហេដ្ឋារចនាសម្ព័ន្ឋទីក្រុងកោះនរា ដែលមានទំហំ១២៥ហិកតា សម្រេចបាន៤៥ភាគរយហើយ។

កោះនរា មានទីតាំងនៅក្នុងតំបន់ច្បារអំពៅនៃខណ្ឌច្បារអំពៅទល់មុខក្រុងរណបកោះពេជ្រដែលបច្ចុប្បន្នក្រុមហ៊ុន OCIC កំពុងសង់ស្ពានចំនួន២ ខ្សែភ្ជាប់ទៅទីនោះ (១ ចេញពីកោះពេជ្រ និង ១ ទៀតចេញពីផ្លូវជាតិលេខ ១) ដោយស្ពានទាំង ២ នឹងត្រូវចំណាយថវិកាប្រមាណ៣៩,៦ លានដុល្លារ។

អគ្គនាយករងក្រុមហ៊ុនOCIC លោកទូច សំណាងកាលពីថ្ងៃម្សិលម៉ិញថា ការសាងសង់ហេដ្ឋារចនាសម្ព័ន្ធ គម្រោងអភិវឌ្ឍន៍កោះនរា កំពុងដំណើរទៅមុខដោយរលូន ខណៈការចាក់ដីបំពេញ និងការសាងសង់ច្រាំងទន្លេនាពេលនេះ សម្រេចបានជិត៤៥ភាគរយ។ លោកបន្តថា ពេលនេះក្រុមហ៊ុនមិនទាន់បើកលក់គម្រោងណាមួយទេ ដោយក្រុមហ៊ុនផ្តោតសំខាន់ទៅលើការកសាងហេដ្ឋារចនាសម្ព័ន្ធតែប៉ុណ្ណោះ។

លោកអះអាងថា “សកម្មភាពសាងសង់គម្រោងអភិវឌ្ឍន៍នៅកោះនរា កំពុងដំណើរការទៅមុខតាមផែនការកំណត់។ ការរីករាលដាលជំងឺកូវីដ ១៩ មិនបានធ្វើឱ្យអាក់ខានដល់ដំណើរការសាងសង់ទេ”។លោកបន្ថែមថា “សម្រាប់ការកំណត់ថា នឹងមានសំណង់ធំៗចំនួនប៉ុន្មានក្នុងគម្រោងនេះ គឺក្រុមហ៊ុន OCIC មិនទាន់អាចកំណត់បានទេ ដោយអ្វីៗវានឹងអាស្រ័យទៅលើកំណើនសេដ្ឋកិច្ច និងការចូលមកបណ្តាក់ទុនរបស់វិនិយោគិនជាក់ស្តែងគឺវាអាចប្រហាក់ប្រហែល នឹងគម្រោងក្រុងរណបកោះពេជ្រ ដែលរហូតមកដល់ពេលនេះមានការសាងសង់សំណង់ធំៗ និងខ្ពស់ៗជាបន្តបន្ទាប់”។

លោកអះអាងថា សកម្មភាពសាងសង់គម្រោងអភិវឌ្ឍន៍នៅកោះនរា កំពុងដំណើរការទៅមុខតាមផែនការកំណត់។ ការរីករាលដាលជំងឺកូវីដ ១៩ មិនបានធ្វើឱ្យអាក់ខានដល់ដំណើរការសាងសង់ទេ។

លោកបន្ថែមថា សម្រាប់ការកំណត់ថា នឹងមានសំណង់ធំៗចំនួនប៉ុន្មានក្នុងគម្រោងនេះ គឺក្រុមហ៊ុនOCIC មិនទាន់អាចកំណត់បានទេ ដោយអ្វីៗវានឹងអាស្រ័យទៅលើកំនើនសេដ្ឋកិច្ច និងការចូលមកបណ្តាក់ទុនរបស់វិនិយោគិនជាក់ស្តែង គឺវាអាចប្រហាក់ប្រហែល នឹងគម្រោងក្រុងរណបកោះពេជ្រ ដែលរហូតមកដល់ពេលនេះ មានការសាងសង់សំណង់ធំៗ និងខ្ពស់ៗជាបន្តបន្ទាប់។

ទោះយ៉ាងណាលោកបញ្ជាក់ថា នៅពេលសាងសង់រួច កោះនរានឹងក្លាយជាតំបន់ពាណិជ្ជកម្ម និងកន្លែងរស់នៅប្រណីតមួយនៅភ្នំពេញដែលរួមមាន មជ្ឈមណ្ឌលពាណិជ្ជកម្ម សួនច្បារសាធារណៈ រោងមហោស្រពលំនៅឋានប្រណីតៗ និងធនាគារជាដើម៕

ក្នុងគ្រាលំបាកបណ្ដាលពីព្រឹត្តិការណ៍សហគមន៍២០កុម្ភៈ ក្រុមហ៊ុន ប៉េង ហួត គ្រុប ចូលរួមឧបត្ថម្ភថវិកា៣លានដុល្លារជាថ្មីម្តងទៀតជូនសម្តេចតេជោ

ដោយ ៖ សហការី

ភ្នំពេញ ៖ យមានការយកចិត្ដទុកដាក់ពីសុខមាលភាពរបស់ប្រជាជន ក្រុមហ៊ុន ប៉េង ហួត គ្រុប បានចូលរួមបរិច្ចាគថវិកាចំនួន ៣លានដុល្លារ បន្ថែមទៀត ជូនដល់សម្តេចតេជោហ៊ុនសែន ដើម្បីចូលរួមជាមួយរាជរដ្ឋាភិបាលកម្ពុជាក្នុងការទប់ស្កាត់ការរីករាលដាលនៃជំងឺឆ្លងកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ។

នេះជាលើកទី៣ហើយ ដែលក្រុមហ៊ុនបានបរិច្ចាគថវិកាតាមរយៈរាជរដ្ឋាភិបាល ដើម្បីចូលរួមសកម្មភាពទប់ស្កាត់ការរីករាលដាលជំងឺឆ្លងកូវីដ-១៩។

តំណាងក្រុមហ៊ុន ប៉េង ហួត គ្រុប លោក ចាន់ រដ្ឋា បានលើកឡើងថា៖ “ក្រុមហ៊ុនសូមថ្លែងអំណរគុណដល់ក្រុមគ្រូពេទ្យ និងអាជ្ញាធរដែលបានខិតខំប្រឹងប្រែងទាំងយប់ថ្ងៃ ហើយក៏សូមថ្លែងអំណរគុណផងដែរចំពោះអតិថិជន និងដៃគូសហការរបស់ បុរី ប៉េង ហួត ដែលបានចូលរួមចំណែកក្នុងបេសកកម្មដ៏ថ្លៃថ្លាមួយនេះ”។

ចុងក្រោយ លោក ចាន់ រដ្ឋា ក៏បានអំពាវនាវដល់បងប្អូនប្រជាពលរដ្ឋទាំងអស់មេត្តាចូលរួមអនុវត្តវិធានការរបស់រាជរដ្ឋាភិបាលក៏ដូចជាវិធានការរបស់ក្រសួងសុខាភិបាល។ ជាពិសេសត្រូវអនុវត្តនូវវិធានការ ៣ការពារ និង ៣កុំ។

៣ការពារ៖

១-ពាក់ម៉ាស់។

២-លាងដៃ។

៣-គម្លាតសុវត្ថិភាពសង្គម និងគម្លាតសុវត្ថិភាពបុគ្គល ដោយចាប់ពី ១ម៉ែត្រកន្លះឡើងទៅ។

៣កុំ៖

១-កុំចូលទៅកន្លែងបិទជិតគ្មានខ្យល់ចេញចូល និងប្រើម៉ាស៊ីនត្រជាក់ច្រើនពេក។

២-កុំទៅកន្លែងមានមនុស្សច្រើនកុះករ។

៣-កុំប៉ះពាល់គ្នា កុំចាប់ដៃគ្នា កុំកៀកស្មាគ្នា កុំឱបគ្នាជាដើម ពេលជួបគ្នា អ្នកមានផ្តាសាយ ឬសង្ស័យមានជំងឺកូវីដ-១៩ កុំចេញក្រៅ ឬកុំមកកន្លែងធ្វើការ ហើយត្រូវទាក់ទងទៅគ្រូពេទ្យ៕