អ្នកជំនាញៈ ការផ្ដល់ព័ត៌មានតាមអនឡាញជាមធ្យោបាយដ៏សំខាន់ក្នុងការទាក់ទាញអ្នកទិញលក់អចលនទ្រព្យ

ដោយៈ ម៉ាណេត

ភ្នំពេញៈ អ្នកជំនាញលើកឡើងថា ការផ្ដល់ព័ត៌មាន តាមអនឡាញបានក្លាយជាម ធ្យោបាយដ៏សំខាន់ក្នុងការទាក់ទាញ និងរក្សាចំណាប់អារម្មណ៍របស់អ្នកទិញ អំឡុងពេលវិបត្តិកូវីដ១៩។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក សុខនីមបានថ្លែងប្រាប់កាលពីថ្មីៗនេះថា ជាទូទៅ អ្នកស្វះស្វែងរកអចលនទ្រព្យ អាចទទួលបានគ្រប់ព័ត៌មានដែលពួកគេត្រូវការ នៅលើ Internet ហើយលោកគិតថា ពួកគេនឹងចូលមកស្វែងយល់ម្ដងទៀត អំពីទីផ្សារអចលនទ្រព្យ ក្រោយពេលវិបត្តិកូវីដ១៩​បានធូរស្រាល។

លោកបានបន្តថា “ចង់ឬមិនចង់ របៀបនៃការធ្វើជំនួញ ក្នុងទីផ្សារអចលនទ្រព្យ គឺជាការសម្លឹងទុកមុននូវអចលនទ្រព្យដែលសមគួរ ខណៈការផ្ដល់ព័ត៌មានតាមអនឡាញ ជាមធ្យោបាយដ៏សំខាន់ក្នុងការទាក់ទាញ និងរក្សាចំណាប់អារម្មណ៍របស់អ្នកទិញ អំឡុងវិបត្តិកូវីដ១៩”។

លោកក៏បានលើកឡើងថា ស្ថានការណ៍បច្ចុប្បន្នជារួម ស្ថិតនៅឆ្ងាយពីវិបត្តិខ្លាំងណាស់។ ទីផ្សារអចលនទ្រព្យនៅតែខ្លាំង ដោយសារនៅតែមានចំណាប់អារម្មណ៍ពីអ្នកចង់ទិញ។ វាគ្រាន់តែជាបញ្ហាថា តើអ្នកដែលចង់ទិញអាចមកមើលអចលនទ្រព្យ ដោយផ្ទាល់បានដែរឬទេ ដូច្នេះអ្នកទិញ អាចធ្វើការសម្រេចចិត្តត្រឹមត្រូវសម្រាប់ពួកគេ។

ផ្ទុយមកវិញលោកឃើញថា ស្ថានការណ៍នាពេលបច្ចុប្បន្ន វាជាឱកាសសម្រាប់ ភ្នាក់ងារអចលនទ្រព្យ ក្នុងការរៀនជំនាញថ្មីៗ ខណៈពេលដែលពួកគេត្រូវនៅផ្ទះ។

លោកសុខនីមបានថ្លែងថា “មានធនធានអនឡាញជាច្រើន ដែលបង្រៀនពីជំនា​ញចរចារ លក់ និងធ្វើទីផ្សារ។ ការរៀនមុខវិជ្ជាអនឡាញមួយ ទាក់ទងនឹងជំនាញចរចារ និងគ្រប់គ្រងផងដែរ”។

លោកបន្តថា “នេះគឺជាឱកាសល្អ សម្រាប់ភ្នាក់ងារអចលនទ្រព្យ ក្នុងការពង្រីក និងពង្រឹងជំនាញរបស់ពួកគេ ដូច្នេះពួកគេនឹងមានគុណតម្លៃកាន់តែច្រើន សម្រាប់ផ្ដល់ជូនអតិថិជន នៅពេលដែលស្ថានភាពទីផ្សារ ត្រលប់មករកប្រក្រតីភាពឡើងវិញ”៕

អ្នកជំនាញលើកឡើង​ពី​ទីតាំង​ខុនដូ​នៅ​តំបន់​ចំនួន​៣​ដែល​វិនិយោគ​ទទួល​បាន​ផល​ចំណេញ​នៅ​ថ្ងៃ​អនាគត

ដោយៈ គង់ សូរិយា

ភ្នំពេញៈ ទោះបីជាពេលនេះកម្ពុជា កំពុងជួបប្រទះជាមួយវិបត្តិកូវីដ១៩ក៏ដោយ ប៉ុន្តែអ្នកជំនាញបានបង្ហាញប្រាប់ពីខុនដូ ដែលស្ថិតនៅតំបន់ចំនួន៣ ដែលនៅតែមានចរន្ត​ទិញលក់ច្រើនដូចធម្មតា ជាពិសេសសម្រាប់អ្នកដែលចង់វិនិយោគខុនដូអាចទិញទុកចំណេញបាននៅថ្ងៃមុខ។

អគ្គនាយកក្រុមហ៊ុនអចលនទ្រព្យ Easy Property Investment លោកម៉ម សិរីបញ្ញា បានថ្លែងប្រាប់គេហទំព័រ Property Area Asia កាលពីពេលថ្មីៗនេះថា ថ្វីត្បិតតែមិនផុសផុល ដូចកាលវីរុសមិនទាន់ចូលមែន ក៏ប៉ុន្តែស្ថានភាពខុនដូនៅពេលបច្ចុប្បន្ន អ្នកអភិវឌ្ឍលើវិស័យខុនដូនេះ ចេះតែខិតខំប្រឹងលក់រួមជាមួយការផ្តល់ជូនពិសេស ដល់អតិថិជនទុកចំណេញនៅថ្ងៃក្រោយ។

លោកបញ្ជាក់ថា “ខុនដូដែលនៅមានចរន្តទិញលក់ដូចជា នៅផ្លូវ៦០ម៉ែត្រ។ និយា​យឱ្យចំទៅ មិននៅកណ្តាលក្រុងទេ ច្រើនតែនៅជាយក្រុង ហើយភាគច្រើនខុនដូដែលមានតម្លៃក្រោម៨ម៉ឺនគឺមានចរន្តទិញលក់ល្មមគួរសម”។

ទន្ទឹមនេះ អ្នកជំនាញមួយរូបទៀត លោក ខន គង្គារ អគ្គនាយកក្រុមហ៊ុន ERA បានមានប្រសាសន៍ថា “ពេលនេះគឺជាឱកាសល្អ សម្រាប់អ្នកវិនិយោគមែនទែន ដោយសារវាមានភាពបត់បែនច្រើនទាំងតម្លៃ ហើយក៏មានងាយស្រួលក្នុងការចរចារដែរ។ ខុនដូនៅតំបន់ទួលគោក ជ្រោយចង្វារ និងផ្លូវ៦០ ម៉ែត្រ គឺនៅតែមានការទិញលក់ដដែលក្នុងស្ថានភាពកូវិដ១៩នេះ”។

លោកបន្តថា ស្ថានភាពខុនដូនឹងកាន់តែរីកចម្រើន នៅពេលដែលរដ្ឋាភិបាលកម្ពុជាអាចគ្រប់គ្រងជម្ងឺហ្នឹងបាន និងបរិបទពិភពលោកអាចធូរស្បើយពីជម្ងឺនេះ នោះសភាពការណ៍នឹងត្រឡប់មករកភាពដើមឬអាចប្រសើរជាងមុនក៏ថាបាន។

នាយកក្រុមហ៊ុន Daily Realty Group លោក ហៃ រ៉ាវី បានសង្កត់ធ្ងន់ថា សម្រាប់គម្រោងសាងសង់ថ្មីៗ ដែលមានគម្រោងសាងសង់ត្រឹមរយៈពេល៣ឆ្នាំ ច្បាស់ណាស់ថានឹងមានប្រូម៉ូសិនផ្តល់ជូនភ្ញៀវ ហើយបើសិនជាភ្ញៀវទិញក្នុងអំឡុងរដូវនេះ អាចនឹងមានការផ្តល់ជូននូវការប្រាក់ទាប។

លោកនាយកបានប្រាប់ថា ជាក់ស្តែង ខុនដូនៅខាងជ្រោយចង្វារ មានតម្លៃសមរម្យដែលក្នុងយូនីតមានតម្លៃត្រឹម៥ម៉ឺន ឬ៦ម៉ឺនដុល្លារឡើង។ ចំណែកនៅក្នុងខណ្ឌទួលគោកក៏មានតម្លៃសមរម្យ ដែលអ្នកចង់វិនិយោគទិញរួចអាចចំណេញ បាននៅថ្ងៃអនាគតផងដែរ៕

សួនឧស្សាហកម្មកាណាឌីយ៉ា​ទំហំ​៥០០​ហិកតា​​លើ​ផ្លូវ​ជាតិ​លេខ​៥១​កំពុង​សាង​សង់​យ៉ាង​សកម្ម

ដោយៈគង់ សូរិយា

ភ្នំពេញៈ ការសាងសង់សួនឧស្សាហកម្មរបស់សហគ្រាសកាណាឌីយ៉ា ទំហំ៥០០ហិកតា នៅតំបន់ផ្លូវជាតិលេខ ៥១បាននិងកំពុងសាងសង់យ៉ាងសកម្ម ខណៈតំបន់នេះកំពុងទាក់ទាញការវិនិយោគយ៉ាងច្រើននាពេលបច្ចុប្បន្ននេះ។

ប្រធានក្រុមប្រឹក្សាភិបាលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកលឹម សុជាតិបានមានប្រសាសន៍ឲ្យដឹងកាលពីចុងសប្តាហ៍មុនថា ការសាងសង់សួនឧស្សាហកម្មនៅតំបន់ផ្លូវជាតិលេខ៥១ បាននិងកំពុងធ្វើឡើងយ៉ាងសស្រាក់សស្រាំ ស្របពេលតំបន់នេះ កំពុងទាក់ទាញគំរោងវិនិយោគធំៗ កាន់តែច្រើននាពេលបច្ចុប្បន្ននេះ។

លោកបន្តថា “តំបន់ផ្លូវជាតិលេខ៥១ ពេលមានវត្តមានសួនឧស្សាហកម្មទំហំ៥០០ហិកតា បានទាក់ទាញគំរោងជាច្រើន ពិសេសធ្វើឲ្យតម្លៃដីនៅតំបន់នោះមានភាពទាក់ទាញយ៉ាងខ្លាំង”។

ជាមួយគ្នានេះ លោកសន សៀបស្ថាបនិកនិងជានាយកក្រុមហ៊ុន Key Real Estate បានមានប្រសាសន៍ថា ទោះបីមានវិបត្តិកូវីដ១៩ក្តី ប៉ុន្តែដីធ្លីតំបន់មួយចំនួននៅតែឡើងថ្លៃ ដូចជាតំបន់ផ្លូវជាតិលេខ៤១ ផ្លូវជាតិលេខ៥១ តំបន់ផ្លូវក្រវ៉ាត់ក្រុងទី៣ និងតំបន់អភិវឌ្ឍន៍ជាច្រើនទៀត។

លោកបន្តថា “តម្លៃដីធ្លីនៅក្រុងភ្នំពេញនៅតែបន្តកើនឡើង ជាក់ស្តែងបើគិតពីឆ្នាំ២០១៩ ដល់ចុងឆ្នាំ២០២០ តម្លាំដីនៅទីក្រុងនេះកើនឡើងក្នុងរង្វង់ជិត២ភាគរយ”។

ជាមួយគ្នានេះ អ្នកជំនាញអចលនទ្រព្យដទៃទៀត ក៏កំពុងមើលឃើញសញ្ញាវិជ្ជមានបណ្តើរៗលើទីផ្សារដីធ្លីផងដែរ។
លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ឲ្យដឹងផងដែរថា ស្របពេលស្ថានភាពហាក់មានភាពធូរស្រាល និងរដ្ឋាភិបាលអនុញ្ញាត្ត ឲ្យប្រជាពលរដ្ឋធ្វើដំណើរឡើងវិញ សកម្មភាពទិញលក់ក្នុងវិស័យអច​លនទ្រព្យ ពិសេសទីផ្សារដីធ្លីនឹងកើនឡើងសកម្មភាពទិញ លក់មុនគេ បន្ទាប់មកទើបទីផ្សារលំនៅដ្ឋានងើបឡើងវិញ។

លោកបន្តថា “សកម្មភាពវិនិយោគក្នុងវិស័យអចលនទ្រព្យ នឹងមានភាពប្រសើរឡើងវិញនៅចុងឆ្នាំនេះ ឬដើមឆ្នាំ២០២២ខាងមុខ ស្របពេលអ្នកវិនិយោគអន្តរជាតិនឹងចូលមកបណ្តើរៗនៅចុងឆ្នាំនេះ ឬដើមឆ្នាំ២០២២ខាងមុខ”៕

តើកត្តាអ្វីខ្លះបានជាវិនិយោគិនដីធ្លីបោះទុនច្រើននៅតាមជាយក្រុងជាជាងក្នុងក្រុង?

ដោយៈ សហការី

ភ្នំពេញៈ អ្នកជំនាញបានឱ្យដឹងថា ការប្រតិបត្តិការលើកវិនិយោគលើវិស័យដីធ្លីនៅតាមបណ្តោយផ្លូវក្រវ៉ាត់ក្រុង និងជាយក្រុងកំពុងមានសន្ទុះរីកចំរើនច្រើន ជាងនៅក្នុងក្រុង ខណៈដីធ្លីនៅក្នុងក្រុងស្ថិតនៅក្នុងតម្លៃខ្ពស់។

អ្នកជំនាញអចលនទ្រព្យលំដាប់អន្តរជាតិ លោកស្រីអាន សុធិតា បានប្រាប់គេហទំព័រ propertyarea.asia កាលពីពេលថ្មីៗនេះថា ការធ្វើប្រតិបត្តិការ និងការវិនិយោគដីធ្លីនៅតាមជាយក្រុង ជាពិសេសនៅតាមបណ្តោយផ្លូវក្រវ៉ាត់ក្រុងទី៣ ហាក់មានសន្ទុះរីកចម្រើនខ្លាំងជាងនៅក្នុងទីក្រុងភ្នំពេញ។

លោកស្រីបន្តថា “មានកត្តាជាច្រើន ដែលធ្វើឱ្យការធ្វើប្រតិបត្តិការវិនិយោគលើវិស័យដីធ្លីនៅតាមជាយក្រុង និង នៅតាមផ្លូវក្រវ៉ាត់ក្រុងមានការកើនឡើង ដោយសារតែតម្លៃដីនៅក្នុងទីក្រុងមានការកើនឡើងខ្ពស់ និងមានតម្រូវការកើនឡើងជាបន្តបន្ទាប់កក្នុងរយៈពេលប៉ុន្មានឆ្នាំចុងក្រោយនេះ”។

ជាមួយគ្នានេះ លោក ស៊ា ឆៃលីន អគ្គនាយកក្រុមហ៊ុន Chailin Sear Realty Co., Ltd បានឯកភាពជាមួយលោកស្រីអាន សុធីតាដែរថា នាពេលបច្ចុប្បន្ននេះសន្ទុះ នៃការប្រតិបត្តិការទិញលក់អចលនវត្ថុនៅតាមជាយក្រុង គឺមានសន្ទុះរីកចំរើនខ្លាំងជាង នៅក្នុងទីក្រុងភ្នំពេញ ជាពិសេសដីធលីនៅតាមបណ្តោយផ្លូវក្រវ៉ាត់ក្រុង។

លោកពន្យល់ថា “មូលហេតុដែលធ្វើឱ្យដីធ្លី នៅតាមជាយក្រុងមានសន្ទុះរីកចំរើនខ្លាំងជាពិសេសផ្លូវក្រវ៉ាត់ក្រុងទី៣ គឺដោយសារមានហេដ្ឋារចនាសម្ព័ន្ធល្អ តម្លៃដីធ្លីស្ថិតនៅក្នុងតធូថ្លៃជានៅក្នុងក្រុង និងជាពិសេសគឺហេដ្ឋារចនាសម្ព័ន្ធថ្មី ដែលរដ្ឋាភិបាលបាននឹងកំពុងអនុវត្ត ដោយមិនមែនស្ថិតនៅក្នុងគម្រោង”។

លោកបន្តថា “មូលហេតុដែលការទិញលក់ដីធ្លី នៅក្នុងក្រុងធ្លាក់ចុះ ដោយសារតែតម្លៃដីខ្ពស់ អ្នកដែលចង់ទិញហើយខ្វះទីផ្សារ ក្នុងការវិនិយោគ ដូចជាការសាងសង់អគារខ្ពស់ៗ និងមនុស្សមួយចំនួនសម្រុកទិញផ្ទះក្នុងបុរី ជាដើម”។

ទោះជាយ៉ាងណា លោក ហៃ រ៉ាវី នាយកក្រុមហ៊ុន Daily Realty Group បានឱ្យដឹងថា សន្ទុះនៃការវិនិយោគដីធ្លីនៅក្នុងទីក្រុងភ្នំពេញ ហាក់មានសន្ទុះរីកចំរើនខ្លាំ​ង ជាងនៅតាមជាយក្រុង ដោយសារតែនៅទីក្រុងភ្នំពេញមានការតម្រូវការច្រើន ដូចជាសាងសង់ខុនដូ អគារពាណិជ្ជកម្ម និងអគារការិយាល័យជាដើម។

លោកបន្តថា “ដីធ្លីនៅតាមតំបន់ឆ្ងាយៗពីជាយក្រុង ហាក់មិនសូវមានសន្ទុះ ដោយសារតែវានៅឆ្ងាយ ពិបាកធ្វើដំណើរមកធ្វើការនៅក្នុងក្រុង និងមិនសូវមានតម្រូវការ”៕

តើមូលដ្ឋានគ្រឹះនៃការគិតថ្លៃសេវានិងកម្រៃជើងសាទិញអចលនទ្រព្យត្រូវកំណត់យ៉ាងដូចម្តេច?

ដោយ៖ ម៉ាណេត

ភ្នំពេញៈ ក្រសួងសេដ្ឋកិច្ច និងហិរញ្ញវត្ថុ បានចេញផ្សាយសេចក្តីប្រកាសច្បាប់ស្តីពី ថ្លៃសេវា និងកម្រៃជើងសាវិជ្ជាជីវៈ សម្រាប់ការផ្តល់សេវាកម្មវាយតម្លៃ និងសេវាកម្មអចលនវត្ថុដល់ក្រុមហ៊ុនអចលនទ្រព្យនានា នៅក្នុងប្រទេសកម្ពុជាទូទាំងគ្រប់ខេត្តក្រុង។

យោងតាមឧបសម្ព័ន្ធនៃការប្រកាសលេខ៧៦១.សហវ.ប្រក ចុះថ្ងៃទី៣១ ខែកក្កដា ឆ្នាំ២០១៧ រូបមន្តនៃការគណនា និងមូលដ្ឋាននៃការកំណត់ថ្លៃសេវា និងកម្រៃជើងសាវិជ្ជាជីវៈ សម្រាប់ការបំពេញសេវាកម្មវាយតម្លៃ និងសេវាកម្មអចលនវត្ថុ ដែលត្រូវទិញលក់ ត្រូវបានកំណត់ដូចជាៈ

សម្រាប់ក្រុមហ៊ុនវាយតម្លៃ

តម្លៃអចលនទ្រព្យដូចជាដីធ្លីនិងផ្ទះសម្បែងដែលទិញ ឬលក់ មានតម្លៃស្មើនឹង៖
– ១០០,០០០ ដុល្លារ ឬក្រោមនេះ ត្រូវកំណត់ថ្លៃសេវាវិជ្ជាជីវៈ០,១៧០% ឬអប្បបរិមាស្មើនឹង១៧០ដុល្លា។
– ១,០០០,០០១ – ៥,០០០,០០០ដុល្លារ ត្រូវកំណត់ថ្លៃសេវាវិជ្ជាជីវៈ០,០៥0%។
– ៥,០០០,០០១ – ១០,០០០,០០០ដុល្លារ ត្រូវកំណត់ថ្លៃសេវាវិជ្ជាជីវៈ០,០៣០%។
– លើសពី ១០,០០០,០០០ដុល្លារ ត្រូវកំណត់ថ្លៃសេវាវិជ្ជាជីវៈ០,០២៥%។

សម្រាប់ក្រុមហ៊ុនភ្នាក់ងារអចលទ្រព្យ និងក្រុមហ៊ុនគ្រប់គ្រងអចលនវត្ថុ

១. ការទិញ និងលក់ អចលនវត្ថុ ដូចជាដីធ្លីនិងផ្ទះសម្បែង
ចំពោះការទិញ និងលក់ទាំងអស់ត្រូវបានកំណត់ថ្លៃសេវាវិជ្ជាជីវៈ អប្បបរិមា៣% ក្នុងរយៈពេលដែលមិនកំណត់។

២. ការជួលអចលនវត្ថុ
– ការជួលអចលនវត្ថុ ដែលមានរយៈពេលក្រោម១ឆ្នាំ កម្រៃសេវាវិជ្ជាជីវៈអាចកំណត់ទៅបានតាមកិច្ចព្រមព្រៀងរវាងភាគីទាំងសងខាងគឺអ្នកជួល និងម្ចាស់អចលនវត្ថុ។

– ការជួលអចលនវត្ថុរយៈពេល១ឆ្នាំ កម្រៃសេវាវិជ្ជាជីវៈ គឺត្រូវតែស្មើនឹងតម្លៃជួលអចលនទ្រព្យ១ខែ។
– ការជួលអចលនទ្រព្យលើសពី១ឆ្នាំ កម្រៃសេវាវិជ្ជាជីវៈ គឺត្រូវតែស្មើនឹងតម្លៃជួលអចលនទ្រព្យ១ខែ បូករួមនឹងចំនួន២៥%បន្ថែម ទៅតាមសមាមាត្រនៃការជួលតាមឆ្នាំនីមួយ៕

សហរដ្ឋអាមេរិក អាចផលិតវ៉ាក់សាំងកូវីដ-១៩ បានរហូតដល់១ពាន់លានដូសត្រឹមដំណាច់ឆ្នាំ២០២១

Syringes with prepared doses of the Johnson & Johnson Janssen Covid-19 vaccine and bandages at San Rafael Commons in San Rafael, California. Photographer: David Paul Morris/Bloomberg

សុខុម

វ៉ាស៊ីនតោន: លោកប្រធានាធិបតី ចូ បៃឌិន បានលើកឡើងកាលពីថ្ងៃសុក្រ ទី២១ ឧសភា ថា សហរដ្ឋអាមេរិក អាចផលិតវ៉ាក់សាំងកូវីដ-១៩ បានរហូតដល់១ពាន់លានដូសនៅត្រឹមដំណាច់ឆ្នាំ២០២១។ នេះបើយោងតាមសារព័ត៌មាន The Edge Markets ចុះផ្សាយនៅថ្ងៃទី២២ ឧសភា នេះ។

ក្រោយជំនួបថ្ងៃទី១នៅសេតវិមានជាមួយប្រធានាធិបតីកូរ៉េខាងត្បូង លោក Moon Jae-in លោក ចូ បៃឌិន បានថ្លែងថា “ក្តីសង្ឃឹម និងការរំពឹងទុក” គឺនៅតែមានសម្រាប់ឆ្នាំ២០២១ ហើយសហរដ្ឋអាមេរិក នឹង “អាចចាក់វ៉ាក់សាំងឱ្យពលរដ្ឋអាមេរិក បានគ្រប់រូប”។

រដ្ឋនានាកំពុងដាក់ចេញវិធីផ្សេងៗប្រកបដោយភាពច្នៃប្រឌិត ដើម្បីទាក់ទាញពលរដ្ឋឱ្យទៅទទួលវ៉ាក់សាំង។ តួយ៉ាងរដ្ឋ Oregon រួមជាមួយរដ្ឋមួយចំនួនទៀតបានផ្តល់ឱកាសផ្សងសំណាងឱ្យពលរដ្ឋឈ្នះឆ្នោតរង្វាន់ធំសម្រាប់ពលរដ្ឋណាដែលបានចាក់វ៉ាក់សាំង ដោយពលរដ្ឋម្នាក់អាចឈ្នះឆ្នោតដល់ទៅ១លានដុល្លារ។ រដ្ឋញូវយ៉ក រដ្ឋ Ohio រដ្ឋ Maryland និងរដ្ឋ Kentucky ក៏កំពុងផ្តល់រង្វាន់ឆ្នោតផងដែរដើម្បីលើកទឹកចិត្តឱ្យពលរដ្ឋទៅចាក់វ៉ាក់សាំង ខណៈល្បឿននៃការចាក់វ៉ាក់សាំងមានសន្ទុះយឺតនៅទូទាំងប្រទេស។

ក្នុងសន្និសីទកាសែតរួមជាមួយលោក Moon Jae-in លោក ចូ បៃឌិន បានគូសបញ្ជាក់ថា នៅក្នុងប្រទេសកូរ៉េខាងត្បូង ទាហានប្រហែល៥៥០.០០០នាក់ដែលទំនាក់ទំនងស្និទ្ធជាមួយកងកម្លាំងសហរដ្ឋអាមេរិក ក៏នឹងត្រូវចាក់វ៉ាក់សាំងកូវីដ-១៩ ដែរ។

ប្រទេសកូរ៉េខាងត្បូង ពិតជាចង់ទទួលបានការផ្គត់ផ្គង់វ៉ាក់សាំងពីសហរដ្ឋអាមេរិក ដែលប្រទេសមហាអំណាចពិភពលោកមួយនេះបានអនុញ្ញាតឱ្យនាំចេញកាលពីពេលថ្មីៗនេះ។ យោងតាម Bloomberg Vaccine Tracker ឱ្យដឹងថា វ៉ាក់សាំងជាង៥លានដូសត្រូវបានចែកចាយនៅក្នុងប្រទេសកូរ៉េខាងត្បូង ដែលគ្របដណ្តប់ប្រហែល៥%នៃចំនួនប្រជាជនសរុប។ ស្ថិតក្នុងអត្រាចាក់វ៉ាក់សាំងនាពេលបច្ចុប្បន្ន គេប៉ាន់ប្រមាណថា ប្រទេសនេះនឹងត្រូវការពេល២ឆ្នាំកន្លះដើម្បីចាក់បាន៧៥%នៃប្រជាជនសរុបរបស់ខ្លួន។ យុទ្ធនាការចាក់វ៉ាក់សាំងបានចាប់ផ្តើមប្រហែល១១សប្តាហ៍មុននៅក្នុងប្រទេសនេះ។

លោក ចូ បៃឌិន ថ្លែងថា លោក និងលោក Moon Jae-in បានពិភាក្សាអំពីលទ្ធភាពដែលក្រុមហ៊ុនផលិតវ៉ាក់សាំងមួយរបស់សហរដ្ឋអាមេរិក អាចចាប់ដៃគូសហការជាមួយប្រទេសកូរ៉េខាងត្បូង។ លោកបានបន្តថា “ជាមួយជំនួយពីក្រុមហ៊ុននោះ កូរ៉េខាងត្បូង នឹងអាចផលិតវ៉ាក់សាំងបានច្រើនសម្រាប់ខ្លួនពួកគេ”។

កាលពីព្រឹកថ្ងៃសុក្រ ម្សិលមិញ រដ្ឋមន្រ្តីពាណិជ្ជកម្មសហរដ្ឋអាមេរិក លោកស្រី Gina Raimondo បានថ្លែងថា “ក្រុមហ៊ុនផលិតវ៉ាក់សាំងនានារបស់សហរដ្ឋអាមេរិក កំពុងធ្វើការយ៉ាងជិតស្និទ្ធជាមួយរដ្ឋការលោក ចូ ពៃឌិន ដើម្បីផ្គត់ផ្គង់វ៉ាក់សាំងកូវីដ-១៩ ដល់ប្រទេសកូរ៉េ”។

សេតវិមានបានប្រកាសនៅសប្តាហ៍នេះថា ខ្លួនគ្រោងនឹងបង្កើនការនាំចេញវ៉ាក់សាំងជាសកលនៅត្រឹមដំណាច់ខែមិថុនា។

លោក ចូ បៃឌិន បាននិយាយកាលពីថ្ងៃច័ន្ទ ដើមសប្ដាហ៍នេះថា លោកនឹងនាំចេញវ៉ាក់សាំងចំនួន២០លានដូសពីក្រុមហ៊ុន Pfizer Inc ក្រុមហ៊ុន Moderna Inc ឬ ក្រុមហ៊ុន Johnson & Johnson បន្ថែមពីលើវ៉ាក់សាំងចំនួន៦០លានដូសរបស់ក្រុមហ៊ុន AstraZeneca Plc ដែលលោកគ្រោងផ្តល់ឱ្យប្រទេសផ្សេងៗទៀត៕

ទីផ្សារអចលនទ្រព្យនៅអាស៊ីនៅតែបង្កើតបង្កើតឱកាសល្អប្រសើរសម្រាប់វិនិយោគ

ដោយៈ ប៊ី
ភ្នំពេញៈ ទិន្នន័យថ្មីមយយបានបង្ហាញថា អចលនទ្រព្យ (លំនៅដ្ឋាន) នៅអាស៊ីមានតម្លៃសរុបប្រមាណ៩០ទ្រីពាន់លានដុល្លារអាមេរិក ដែលមានន័យថា អាស៊ីមានការអភិវឌ្ឍអចលនទ្រព្យយ៉ាងរីកចម្រើនក្នុងពិភពលោក។ នេះបើយោងតាមចេញផ្សាយរបស់គេហទំព័រ e27 កាលពីថ្មីៗនេះ។

នោះហើយជាមូលហេតុបង្ហាញថា អាស៊ីបង្ហាញឱកាសដ៏ទាក់ទាញ សម្រាប់ការវិនិយោគលើវិស័យអចលនទ្រព្យ។

អចលនទ្រព្យតំបន់អាស៊ីមានចំនួនប្រហែល៤៥ភាគរយ នៃតម្លៃអចលនទ្រព្យសរុប (លំនៅដ្ឋាន) ទូទាំងពិភពលោក ទោះបីជាតម្លៃទិញជាមធ្យមដែលទាបជាងនៅអឺរ៉ុប ឬអាមេរិកខាងជើងក៏ដោយ។

ប្រតិបត្តិការទិញលក់អចលនទ្រព្យឆ្លងកាត់ព្រំដែនខណៈពេលដែលការគណនាតម្លៃសរុបនៃទ្រព្យសម្បត្តិអចលនទ្រព្យនៅអាស៊ី យើងក៏បានព្យាយាមធ្វើការប៉ាន់ស្មាន នៃប្រតិបត្តិការអចលនទ្រព្យលំនៅដ្ឋានឆ្លងកាត់ព្រំដែន។ ប៉ុន្តែប្រតិបត្តិការទិញលក់ឆ្លងកាត់ព្រំដែនពិបាកនឹងធ្វើការប៉ាន់ប្រម៉ាណ ហើយមិនមានទិន្នន័យជាក់លាក់ណាមួយដែលយកប្រើប្រាស់បាន លើកលែងតែទិន្នន័យនៅចិនដីគោក។

ការប៉ាន់ស្មានរបស់ក្រុមហ៊ុន Juwai IQI បង្ហាញថា គ្រាន់តែអ្នកទិញជនជាតិចិន បានទិញអចលនទ្រព្យលំនៅដ្ឋាននៅក្រៅប្រទេសប្រមាណ២០២,៨ពាន់លានដុល្លារក្នុងឆ្នាំ២០១៥ ដល់ឆ្នាំ២០២០ ដែលជាវិនិយោគលើវិស័យអចលនទ្រព្យនៅប្រទេសខ្លួនដ៏ខ្ពស់គួរឱ្យកត់សម្គាល់។

ក្រុមហ៊ុន Juwai IQI បានយកតំបន់អាស៊ីមកធ្វើជាគំរូទីផ្សារអចលនទ្រព្យ ដោយបានលើកឡើងថា អាស៊ីមានប្រជាជនចំណយន៤,៥ពាន់លាននាក់ ដែលអាចធ្វើឱ្យតម្រូវអចលនទ្រព្យនៅតំបន់នេះ កើនឡើងប្រជាចាំ ហើយនឹងក្លាយជាឱកាសសម្រាប់ការវិនិយោគិន និងក្រុមហ៊ុនអចលនទ្រព្យ៕

អ្នកជំនាញៈចង់វិនិយោគដីធ្លីទទួលបានចំណេញឆាប់កុំវិនិយោគក្បែរក្រុង

ដោយៈវឌ្ឈនៈ

ភ្នំពេញៈ វិស័យអចលនទ្រព្យបានរីកចម្រើន ជាបន្តបន្ទាប់នៅក្នុងរយៈជាង១០ឆ្នាំមកនេះ ហើយការអភិវឌ្ឍក៏សាយភាយទៅកាន់តំបន់ជាយៗក្រុង ធ្វើឱ្យតម្លៃដីនៅជាយក្រុងក៏កាន់តែមានហាងឆេងជាបន្តបន្ទាប់។

ដូច្នេះហើយទើបអ្នកជំនាញបានផ្ដល់ជាយោបល់ថា បើចង់វិនិយោគដីធ្លី សូមកុំសម្លឹងមើនៅក្បែរៗក្រុង តែសូមស្វែងរកដីនៅតំបន់ជាយក្រុងវិញប្រសើរជាង។

លោកសន សៀបស្ថាបនិកនិងជានាយកប្រតិបត្តិក្រុមហ៊ុនអចលនទ្រព្យឃីរៀលអ៊ីស្ទេតបានឱ្យដឹងកាលពីថ្ងៃព្រហស្បត៍ថា តម្លៃដីធ្លីនៅក្បែរក្រុងៗ គឺបានហក់ឡើងខ្ពស់ទៅហើយ ហើយអ្នកទិញដីទាំងនោះ មិនមែនសម្រាប់ទុកវិនិយោគនោះទេ តែគេទិញដើម្បីអភិវឌ្ឍន៍តែម្ដង។ ដូច្នេះហើយបើចង់វិនិយោគដីធ្លី ដើម្បីចំណេញគួរតែរកទៅរកតំបន់ណារាងឆ្ងាយពីក្រុងបន្តិច ហើយក៏ត្រូវចេះមើលពីតំបន់ណា ដែលមានសក្ដានុពលសម្រាប់ការវិនិយោគដីធ្លីដែរ។

លោកបន្តថា “ដីនៅតំបន់ជិតៗក្រុង វាបានហក់ឡើងខ្ពស់រួចហើយ ដូចជាផ្លូវ៦០ម៉ែត្រប៉ែកខាងត្បូងរាជធានីភ្នំពេញជាដើម វាបានឡើងរាប់លានដុល្លារអាមេរិកទៅហើយក្នុងមួយហិចតា”។លោកបន្តថា “តំបន់ខ្លះជាយក្រុង ក៏មានតម្លៃលានដុល្លារអាមេរិកដែរក្នុងមួយហិចតា ដូច្នេះការទិញដីក្នុងតម្លៃខ្ពស់ ដើម្បីទុកលក់ចំណេញវាមិនមែនជាការងាយស្រួលទេ ព្រោះថាវាបានឡើងដល់កម្រិតមួយរួចហើយ”។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ក៏បានឱ្យដឹងផងដែរថា ទិញដី នៅជិតក្រុង ឬកណ្ដាលក្រុងជាអ្នកអភិវ ឌ្ឍន៍ ហើយការអភិវឌ្ឍរបស់ពួកគេភាគច្រើនផ្ដោតលើខុនដូ និងអគារខ្ពស់ៗ ពីព្រោះការអភិវឌ្ឍប្រភេទនេះ អាចឱ្យគេរកបានចំណេញច្រើន តែបើសិនជាទិញដើម្បីទុកលក់បន្តទៀតវាប្រហែលជាមិនមាននោះទេ។

ដោយឡែកអ្នកអភិវឌ្ឍន៍លំនៅឋានជាបុរី ក៏មិនទិញដីដែលមានតម្លៃថ្លៃៗ ដើម្បីអភិវឌ្ឍន៍ដែរ ព្រោះបើកាលណាទិញដីថ្លៃ ពួកគេក៏ត្រូវលក់ផ្ទះថ្លៃដែរ ដែលធ្វើឱ្យអ្នកមានលទ្ធភាពទិញភាគតិច ដូច្នេះគេត្រូវសម្លឹងទៅមើលតំបន់ឆ្ងាយៗពីក្រុងបន្តិច ដើម្បីអភិវឌ្ឍន៍ជាបុរី ។

លោកបន្តថា “អ្នកដែលទិញដីដើម្បីចំណេញនៅពេលអនាគត ក៏ត្រូវតែចេះមើលពីទិសដៅអភិវឌ្ឍន៍របស់រាជរដ្ឋាភិបាលផងដែរ បើទិញត្រូវទិសដៅអភិវឌ្ឍន៍ ពួកគេនឹងទទួលបានការចំណេញមកវិញលឿន ដូច្នេះហើយអ្នកដែលឆ្លាតត្រូវចេះរកព័ត៌មានពីការអភិវឌ្ឍនានាដូចជានៅ សាលាក្រុង នៅមន្ទីរឬក្រសួងពាក់ព័ន្ធជាដើម”។

បើតាមលោកសុខនីមថា នៅជុំវិញរាជធានីភ្នំពេញសឹងតែ៣៦០ដឺក្រេហើយ សុទ្ធតែមានការអភិវឌ្ឍដូចគ្នា គ្រាន់តែតំបន់ខ្លះមានបែបផែននៃការអភិវឌ្ឍខុសគ្នា ហើយតម្លៃដីក៏មានការខុសគ្នាតិចតួចប៉ុណ្ណោះ តែលោកមើលឃើញថា ទៅប៉ែកខាងលិចរាជធានីភ្នំពេញហាក់ទទួលបានការវិនិយោគច្រើន ជាងតំបន់ជាយក្រុងផ្សេងៗទៀត៕

រដ្ឋបាលខេត្ពពោធិ៍សាត់គ្រោងបង្កើតឃុំថ្មីបន្ថែមនៅក្នុងស្រុកតាលោសែនជ័យ

ដោយៈរតនៈ

ពោធិសាត់ៈ រដ្ឋបាលខេត្តពោធិសាត់ គ្រោងបង្កើតឃុំថ្មីបន្ថែមទៀត នៅស្រុកតាលោសែនជ័យ ដែលជាស្រុកស្រុងចុងក្រោយមួយ នៃដែនរដ្ឋបាលខេត្តពោធិ៍សាត់ដែលមានតែ២ឃុំប៉ុណ្ណោះ។

យ៉ាងនេះក្តីអាជ្ញាធរខេត្តឲ្យដឹងថា រដ្ឋបាលខេត្តគ្រោងបង្កើតឃុំថ្មីបន្ថែម ក្នុងស្រុកកូនពៅមួយនេះ ឲ្យបានមុនការបោះឆ្នោតក្រុមប្រឹក្សាឃុំសង្កាត់។

អភិបាលរងខេត្តពោធិ៍សាត់ លោក ចេង ឡៃបានប្រាប់Propertyareaនៅថ្ងៃទី ២២ខែ ឧសភានេះថា ដោយសារតែឃុំតាលោសែនជ័យ ដែលទើបបង្កើតថ្មីនេះមានជាង២០ភូមិ ដែលជាចំនួនមួយច្រើន និងមានទំហំដីធំ ដូចនេះរដ្ឋបាលខេត្តគ្រោងបង្កើតឃុំផ្សេងទៀតលើផ្ទៃដីដដែល ដើម្បីងាយស្រួលក្នុងការគ្រប់គ្រង។

តែទោះជាយ៉ាងណាលោកចេង ឡៃ មិនបានឲ្យដឹងថា ស្រុកកូនពៅនៃខេត្តពោធិ៍សាត់នេះ នឹងត្រូវបង្កើតឃុំចំនួនប៉ុន្មានទៀតនោះទេ។

តាលោសែនជ័យ គឺជាស្រុកថ្មីដែលទើបបង្កើតឡើងក្នុងឆ្នាំ២០១៩។ ស្រុកនេះបានបង្កើតឡើងដោយកាត់យកឃុំចំនួនពីរគឺ ឃុំតាលោ នៃស្រុកបាកាន និងឃុំផ្ទះរុង នៃស្រុកភ្នំក្រវាញ របស់ខេត្តពោធិ៍សាត់។ ក្រៅពីនេះគេកាត់យកភូមិចំនួនពីរ គឺភូមិកោះស្វាយ និងភូមិកោះវត្ត នៃឃុំខ្នារទទឹង របស់ស្រុកបាកានមកឱ្យឃុំតាលោទៀត៕

កំណាត់ផ្លូវជាតិជាច្រើនខ្សែត្រូវបានជួសជុលថែទាំដើម្បីសម្រួលដល់ការធ្វើ ដំណើររបស់ប្រជាពលរដ្ឋ

ដោយៈ ប៊ី

ភ្នំពេញៈ កំណាត់ផ្លូវជាតិជាច្រើនខ្សែ ត្រូវបានបន្តខិតខំយកចិត្តទុកដាក់ជួសជុលថែទាំ ដើម្បីជួយសម្រួលដល់ការដឹកជញ្ជូន និងការធ្វើដំណើរឆ្លងកាត់របស់បងប្អូនប្រជាពលរដ្ឋ ឱ្យកាន់តែមានភាពងាយស្រួលថែមទៀត។
នេះបើយោងតាមការបញ្ជាក់របស់ក្រសួងសាធារណការ និងដឹកជញ្ជូននៅថ្ងៃទី២២ ខែឧសភា ឆ្នាំ២០២១។

នៅថ្ងៃទី២០-២១ ខែឧសភា ឆ្នាំ២០២១ មន្ទីរសាធារណការ និងដឹកជញ្ជូន ខេត្តបាត់ដំបង ឧត្តរមានជ័យ ព្រះវិហារ កំពង់ឆ្នាំង ត្បូងឃ្មុំ និងខេត្តរតនគីរី បានបន្តខិតខំយកចិត្តទុកដាក់ចុះត្រួតពិនិត្យគុណភាពផ្លូវថ្នល់ និងបានធ្វើការជួសជុលថែទាំលើ កំណាត់ផ្លូវជាតិលេខ៥ លេខ៨ លេខ៥២ លេខ៥៦ លេខ៦២ លេខ៦៤ លេខ៧២ លេខ៧៨ លេខ៩៥ លេខ៥៧B លេខ៧៨-៥ លេខ៥៧B1 និងផ្លូវថ្នល់មួយចំនួនផ្សេងទៀត ដែលបានរងការខូចខាតក្លាយជាជង្ហុកសំបុកមាន់ ត្រូវបានជួសជុលផងដែរ។

រដ្ឋាភិបាលកម្ពុជា បាននិងកំពុងបង្ហាញសកម្មភាពយ៉ាងសកម្ម ចំពោះការអភិវឌ្ឍប្រព័ន្ធហេដ្ឋារចនាសម្ព័ន្ធ នៅទូទាំងប្រទេស រួមទាំងគម្រោងកែលម្អគម្រោងហេដ្ឋរចនាសម្ព័ន្ធផេងៗ នៅតាមបណ្តាខេត្ត និងជនបទជាដើម ដើម្បីសម្រួលការធ្វើដំណើររបស់ប្រជាពលរដ្ឋ និងវិស័យដឹកជញ្ជួន ដែលជាការរួមចំណែកដល់ការជំរុញកំណើនសេដ្ឋកិច្ច។

ការកែលម្អនឹងត្រូវធ្វើទៅលើផ្នែកជាច្រើន នៃតាមផ្លូវជាតិ និងផ្លូវខេត្ត ដែលជាលទ្ធផលជួយកាត់បន្ថយថ្លៃចំណាយ លើការដឹកជញ្ជូន និងហានិភ័យគ្រោះថ្នាក់ ដោយសារតែផ្លូវខូច និងជួយសម្រួលដល់ខ្សែចង្វាក់ផ្គត់ផ្គង់ ក្នុងវិស័យកសិកម្ម និងការអភិវឌ្ឍវិស័យទេសចរណ៍ផងដែរ។

ជាមួយនេះដែរ មានការលើកឡើងថា ការអភិវឌ្ឍន៍វិស័យហេដ្ឋារចនាសម្ព័ន្ធ គឺដើម្បីពង្រីកសសៃឈាមសេដ្ឋកិច្ច ក៏ដូចជាការចូលរួមចំណែកកាត់ថ្លៃ ធ្វើដំណើររបស់ប្រជាពលរដ្ឋ និងវិស័យដឹកជញ្ជួន ដើម្បីឈានដល់ការប្រកួតប្រជែងក្នុងតំបន់ទៀតផង។

លោកទេសរដ្ឋមន្ត្រីស៊ុន ចាន់ថុលរដ្ឋមន្ត្រីក្រសួងសាធារណៈការ និងដឹកជញ្ជូនធ្លា ប់លើកឡើងថា ការវិនិយោគលើហេដ្ឋារចនាសម្ព័ន្ធ និងសំណង់ នឹងចូលរួមចំណែកយ៉ាងខ្លាំងក្លានៅក្នុងការអភិវឌ្ឍសេដ្ឋកិច្ចនិងសង្គម ពីព្រោះវាជាកត្តាដែលនាំឱ្យមានការបង្កើតនូវឱកាសការងារ ជំរុញកំណើនសេដ្ឋកិច្ចជាតិ ព្រមទាំងពង្រឹង និងពង្រីកទំនាក់ទំនងជាមួយបណ្តាប្រទេសនានាក្នុងតំបន់ និងសង្គមជាតិដ៏មានប្រសិទ្ធភាព៕