តើអ្វីជាផែនការមេទាំង៦ នៃផែនការអភិវឌ្ឍនៅទីក្រុង ING CITY នាភាគខាងត្បូងរាជធានីភ្នំពេញ

ដោយស៊ីវ ម៉េង

ភ្នំពេញៈ តំបន់ភាគខាងត្បូងរាជធានីភ្នំពេញ មានការអភិវឌ្ឍយ៉ាងឆាប់រហ័សស្ទើរមិមគួរឲ្យជឿ នៅក្នុងរយៈពេលប៉ុន្មានឆ្នាំចុងក្រោយនេះ ដោយសារតំបន់នេះមានផែនការអភិវឌ្ឍន៍ច្បាស់លាស់។

យោងតាមផែនការមេរបស់ក្រុមហ៊ុន ING Holding ដែល Propertyarea.asia ទទួលបានកាលពីពេលថ្មីៗនេះ បានឲ្យដឹងថា ទីក្រុងរណប ING CITY គ្របដណ្តប់លើផ្ទៃដីជាង២០០០ហិកតា ដែលមានវិសាលភាពដ៏ធំមួយ និងជាទីក្រុងរណបធំជាងគេនៅរាជធានីភ្នំពេញ។

គំរោងសំខាន់ៗដែលត្រូវអភិវឌ្ឍនៅតំបន់នេះ រួមមាន ទី១ ក្រុមហ៊ុនរៀបចំការអភិវឌ្ឍន៍តំបន់នេះ ជាតំបន់មានការអភិវឌ្ឍបែបបៃតង និងគោរពតាមគោលការណ៍បរិស្ថាន។ ទី២ ក្រុមហ៊ុនគ្រោងអភិវឌ្ឍន៍តំបន់នេះ ជាមជ្ឈមណ្ឌលលំនៅដ្ឋានស៊ីវិល័យ និងបែបសហកម្មសិទ្ឋ ទី៣ ប្រែក្លាយជាមជ្ឈមណ្ឌលពាណិជ្ជកម្ម ដែលបច្ចុប្បន្នមានផ្សារទំនើបធំៗចចំនួន៣រួចទៅហើយ បាននិងកំពុងសាងសង់នៅតំបន់នេះ ដូចជា EAON Mall 3, Peng Huorth Diamond , Chip Mong Mall ។

ទី៤ ក្រុមហ៊ុនក៏មានបំណងរៀបចំតំបន់នេះ ជាស្ថានីយ៍ចំណតយានយន្តលំដាប់អន្តរជាតិ ទី៥ រៀបចំជាសហគមន៍សម្រាប់និវត្តន៍ជនជាតិចិន និងទី៦ មជ្ឈមណ្ឌលកីឡា ការកំសាន្តជាដើម។

ជាមួយនឹងទស្សនវិស័យចំពោះមុខ និងរៀបចំតំបន់ដែលទើបអភិវឌ្ឍន៍ថ្មីនេះ សាលារាជធានីភ្នំពេញ រួមជាមួយសាលាក្រុងប៉ារីសដើម្បីសិក្សារួមគ្នាពីការអភិវឌ្ឍ និងដោះស្រាយបញ្ហាប្រឈមចំពោះមុខ ទាក់ទងនឹងការកើនឡើងនូវយានយន្ត ការបំពុលទឹកកខ្វក់ និងហេដ្ឋារចនាសម្ព័ន្ឋនានា ដើម្បីធ្វើយ៉ាងណាឲ្យតំបន់នេះសមស្របជាតំបន់ដែលមានភាពបៃតង និងត្រៀមរៀបចំនគរូបនីយកម្មឲ្យមានភាពល្អប្រសើរ និងអាចឆ្លើយតបនឹងកំនើនប្រជាសាស្ត្រនៅតំបន់នេះ។

អតីតវីរស្ថាត្យករកម្ពុជា លោកបណ្ឌិតវណ្ណ ម៉ូលីវណ្ណធ្លាប់បានផ្តល់អនុសាសន៍ឲ្យអភិវឌ្ឍន៍រាជធានីភ្នំពេញឆ្ពោះទៅកាន់ភាគខាងត្បូង ដោយសារតំបន់ភាគខាងត្បូងមានដីទំនេរច្រើន មានសណ្ឋានដីខ្ពស់មិនប្រឈមនឹងការលិចទឹក និងងាយស្រួលរៀបចំហេដ្ឋារចនាសម័ន្ឋនានា ដោយសារជាតំបន់មានការអភិវឌ្ឍថ្មី៕

វិភាគលើកត្តាអ្វីខ្លះ ដើម្បីដឹងថាអចលនទ្រព្យរបស់អ្នកឡើងថ្លៃខ្ពស់នាពេលអនាគត?

ដោយស៊ីវ ម៉េង

ភ្នំពេញៈ ការទិញអចលនទ្រព្យ ពិសេសដីធ្លីតែងតែមានផលចំណេញ ប៉ុន្តែក៏អាចកប់ដើម មិនឡើងថ្លៃតាមការចង់បានរបស់អ្នកវិនិយោគផងដែរ ហេតុនេះលោក អ្នកគួរតែចេះវិភាគទៅលើអចលនទ្រព្យរបស់ខ្លួន។

តើគេវិភាគទៅលើកត្តាអ្វីខ្លះ ដើម្បីដឹងថាអចលនទ្រព្យរបស់ខ្លូន នឹងឡើងថ្លៃខ្ពស់នាពេលអនាគត?។

ទីប្រឹក្សាសមាគមអចលនទ្រព្យសកល ជាសហស្ថាបនិក និងជាអគ្គនាយកនៃគេហទំព័រអចលនទ្រព្យឈានមុខគេនៅកម្ពុជា លោកយិន លាងគង់ បានមានប្រសាសន៍ឲ្យដឹងកាលពីពេលថ្មីៗនេះថា ការវិនិយោគលើអចលនទ្រព្យ ទាំងដីធ្លី ផ្ទះសម្បែង តែងតែមានផលចំណេញនាពេលអនាគត ប្រសិនជាអ្នកទិញបានក្នុងតម្លៃសមរម្យ ទីតាំងត្រឹមត្រូវ ជាតំបន់ដែលស្ថិតក្នុងផែនការអភិវឌ្ឍរបស់រដ្ឋាភិបាលជាដើម។

លោកបន្តថា ប៉ុន្តែដើម្បីទិញដីធ្លី ឬផ្ទះត្រូវ និងឡើងថ្លៃខ្ពស់នាពេលអនាគត អ្នកវិនិយោគត្រូវសម្លឹងលើកត្តាមួយចំនួន ដូចជា ពេលវេលាសមស្រប កត្តាសេដ្ឋកិច្ច ផែនការអភិវឌ្ឍន៍ គោលនយោបាយរបស់រដ្ឋាភិបាលជាដើម។

ពេលវេលាសមស្រប

ពេលវេលាសមស្រប គឺសំដៅដល់ការទិញដីឬផ្ទះ នៅក្នុងពេលមានវិបត្តិសេដ្ឋកិច្ច ដែលតម្លៃដីធ្លី ឬផ្ទះសម្បែងតែងតែចុះថ្លៃ ឬស្ថិតក្នុងតម្លៃទ្រឹង។ ហេតុនេះការវិនិយោគដីធ្លីក្នុងកំឡុងពេលបែបនេះ នឹងមានឳកាសចំណេញខ្ពស់ ពិសេសនៅពេលសេដ្ឋកិច្ចងើបឡើងវិញឆាប់រហ័ស។

ការវិនិយោគដីធ្លី ឬអចលនទ្រព្យដទៃទៀត សម្រាប់អ្នកវិនិយោគឆ្លាតវៃ ពួកគេមិនសូវទុកយូរពេកនោះទេ នៅពេលចំណេញបាន៥០ភាគរយ ឬមួយគុណនឹងពីរ គេលក់ចេញ ដើម្បីទៅវិនិយោគនៅកន្លែងដទៃទៀតហើយ។ លើកលែងតែអ្នកវិនិយោគប្រើយុទ្ឋសាស្ត្រ Land Banking ឬ House Banking។

កត្តាសេដ្ឋកិច្ច

នៅពេលសេដ្ឋកិច្ចមានភាពរសរវើក និងកំណើនល្អប្រសើរ វាតែងតែមានរយៈពេលកំណត់របស់វា។ ហេតុនេះអ្នកវិនិយោគត្រូវតែតាមដានព៌តមាន និងវដ្តនៃវិបត្តិសេដ្ឋកិច្ចពិភពលោក ដែលតែងតែកើតមានស្ទើរតែរៀងរាល់១០ឆ្នាំម្តង។ ហេតុនេះ បើសិនជាស្ថានភាពសេដ្ឋកិច្ចមានកំណើនល្អប្រសើរ រយៈពេល៣ទី៥ឆ្នាំ តម្លៃដីរបស់អ្នកបានហក់ឡើងខ្ពស់រួចទៅហើយ។ វាជាពេលវេលាសមស្រប ដែលអ្នកគួរបញ្ចេញ ដើម្បីកុំឲ្យមានភាពស្តាយក្រោយ ដូចករណីអ្នកនៅក្រុងព្រះសីហនុជាដើម។

ហេតុនេះ សេដ្ឋកិច្ចគឺជាប់ពាក់ព័ន្ឋនឹងតម្លៃដីធ្លី ឬអចលនទ្រព្យដទៃទៀត ដូច្នេះអ្នកវិនិយោគឆ្លាតវៃ ត្រូវតែតាមដានស្ថានភាពសេដ្ឋកិច្ចពិភពលោក ដើម្បីមានមូលដ្ឋានក្នុងការសម្រេចចិត្តត្រឹមត្រូវ។

ផែនការអភិវឌ្ឍន៍និងគោលនយោបាយរដ្ឋាភិបាល

រដ្ឋាភិបាលកម្ពុជា តែងតែដាក់ចេញផែនការអភិវឌ្ឍន៍ជាតិ រយៈពេលមធ្យម(5ឆ្នាំ) ផែនការអភិវឌ្ឍន៍ជាតិរយៈពេលវែងមានចំនួន១០ឆ្នាំ ដែលផែនការនេះជាការធ្វើពិពិធកម្មនូវមូលដ្ឋាននៃការអភិវឌ្ឍសេដ្ឋកិច្ច សង្គម និងរៀបចំប៉ូលសេដ្ឋកិច្ចរបស់ជាតិ។

ឧទាហរណ៍ នៅឆ្នាំ២០២០កន្លងមក រដ្ឋាភិបាលបានប្រកាសពីការវិនិយោគព្រលានយន្តហោះខេត្តមណ្ឌលគិរី ពីផែនការអភិវឌ្ឍន៍សាងសង់់ផ្លូវល្បឿនលឿនភ្នំពេញ ក្រុងបាវិតជាដើម។

ដូច្នេះ ប្រសិនជាអ្នកទិញដីនៅតំបន់ស្ថិត នៅក្នុងផែនការអភិវឌ្ឍរបស់រដ្ឋាភិបាល តម្លៃដីរបស់អ្នកនឹងឡើងថ្លៃនៅក្នុងរយៈពេលកំណត់មួយ។ ហេតុនេះការវិនិយោគដីធ្លីឬអចលនទ្រព្យដទៃទៀត អ្នកវិនិយោគដែលតែងតែទុកដីបានយូរ ចំណេញច្រើន តែងតែជាអ្នកសក្តាប់បាននូវទិសដៅ ផែនការអភិវឌ្ឍន៍របស់ជាតិ ពិសេសអានព៌តមានជាប្រចាំ៕

តើកត្តាសំខាន់ៗអ្វីខ្លះបានធ្វើឲ្យកម្ពុជាទាក់ទាញទំហំទុនវិនិយោគ ៦០ពាន់លានដុល្លារលើវិស័យអចលនទ្រព្យក្នុងរយៈពេលពីរទសវត្សរ៍

ដោយគង់ សូរិយា

ភ្នំពេញៈ វាមិនមែនជាសុបិនទេ ប៉ុន្តែវាជាការពិត ដែលកម្ពុជាបានឈានមុខគេក្នុង តំបន់អាស៊ាន ក្នុងរយៈពេលពីរទសវត្សរ៍ចុងក្រោយនេះ នោះគឺល្បឿនដ៏លឿននៃការអភិវឌ្ឍវិស័យសំណង់ និងអចលនទ្រព្យ។

យោងតាមរបាយការណ៍របស់រដ្ឋាភិបាលបានបង្ហាញថា កម្ពុជាទទួលបានទុនវិនិយោគពីវិស័យសំណង់ទូទាំងប្រទេស ចំនួនប្រមាណ៦០,៨៧ពាន់លានដុល្លារអាមេរិក ចាប់តាំងពីឆ្នាំ២០០០ ដល់ដំណាច់ឆ្នាំ២០២០ ខណៈគម្រោងសាងសង់សរុបទូទាំងប្រទេសមានចំនួន៥៣ ២៨៧គម្រោង នៅលើផ្ទៃក្រឡាសរុបចំនួន១៥៣,៦២លានម៉ែត្រក្រឡា។

របាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានឲ្យដឹងទៀតថា គម្រោងអគារខ្ពស់ៗចាប់ពី ៥ជាន់ឡើង នៅទូទាំងប្រទេសមានចំនួន២ ១៨០អគារ ក្នុងនោះខេត្តព្រះសីហនុ មាន៦១៥អគារ។

អគារខ្ពស់ៗចាប់ពី៥ជាន់ ដល់៩ជាន់ មានចំនួន១ ១៧៦អគារ ហើយអគារចាប់ពី១០ជាន់ ទៅ១៩ជាន់ មានចំនួន៦២៥អគារ អគារកំពស់ពី២០ជាន់ ដល់២៩ជាន់ មានចំនួន២០៧អគារ កំពស់ពី៣០ជាន់ ដល់៣៩ជាន់ មាន១២២អគារ និងអគារកំពស់ចាប់ពី៤០ជាន់ឡើង មានចំនួន៥០អគារ។

ក្រៅពីសំណង់អគារខ្ពស់ៗ កម្ពុជាក៏មានការវិនិយោគច្រើនទៅលើបុរីលំនៅឋានផងដែរ ដោយក្នុងនោះ គម្រោងបុរីលំនៅឋាន និងបណ្ដុំលំនៅឋានមានលក្ខណៈជាបុរីមានចំនួន៣៩៣គម្រោង។

ដោយឡែកគិតចាប់ពីឆ្នាំ២០០៨ ដល់ដំណាច់ឆ្នាំ២០២០ សំណង់សណ្ឋាគារវិញមានចំនួន១ ៩៣៧គម្រោង សំណង់អគារពាណិជ្ជកម្មមានចំនួន ២ ៦៥១គម្រោង សំណង់អគាររោងចក្រមានចំនួន១០ ៤២២គម្រោង និងសំណង់អគារពហុមុខងារ មានចំនួន២០៧គម្រោង។

លោកយិន លាងគង់ ទីប្រឹក្សាសមាគមអចលនទ្រព្យសកល និងជាអ្នកបានតាមដាន និងវិភាគពីការវិវត្តន៍នៃសេដ្ឋកិច្ចកម្ពុជាបានថ្លែងថា វាមិនមែនជាសុបិនទេ ប៉ុន្តែវាជាការដាក់ចេញនូវគោលនយោបាយ ផែនការយុទ្ឋសាស្ត្រ និងរៀបចំនូវមូលដ្ឋានក្របខ័ណ្ឌច្បាប់ បទដ្ឋានគតិយុត្តិច្បាស់លាស់ពីរដ្ឋាភិបាល ទើបកម្ពុជាបានស្ថិតនៅក្នុងក្រសែភ្នែករបស់អ្នកវិនិយោគមកពីជុំវិញពិភពលោក ក្នុងរយៈពេលជាង២០ឆ្នាំកន្លងមកនេះ។

លោកបន្តថា “កត្តាសន្តិភាព ស្ថេរភាពនយោបាយដើរតួនាទីមុនគេ បន្ទាប់មកស្ថេរភាពសង្គម កំណើនសេដ្ឋកិច្ចដែលកម្ពុជា សម្រេចបានជាង៧ភាគរយក្នុងរយៈពេលវែង ការកែទម្រង់ស៊ីជម្រៅរបស់រដ្ឋាភិបាល ពិតជាគាំទ្រដល់ការអភិវឌ្ឍទាំងនេះ” ។

លោកយិន លាងគង់ បានបន្តថា ការអនុម័តច្បាប់សហកម្មសិទ្ឋឆ្នាំ២០១០ ដោយអនុញ្ញាត្តឲ្យជនបរទេស អាចមានសិទ្ឋទិញផ្ទះចាប់ពីជាន់ទី១ឡើង ការធ្វើវិសោធនកម្មច្បាប់វិនិយោគ ដោយអនុញ្ញាត្តឲ្យជនបរទេស អាចបើកក្រុមហ៊ុននៅកម្ពុជា ដោយប្រើប្រាស់ទុនរបស់ខ្លួនបាន ១០០ភាគរយ ការមិនមាននិតិវិធីស្មុគ្រស្មាញ លើប្រព័ន្ឋបង់ពន្ឋ និងការរីកចម្រើន នៃប្រាក់ចំណូលរបស់ប្រជាពលរដ្ឋ ពិតជាតម្លៃស្នូល ដែលរដ្ឋាភិបាលបានខិតខំយ៉ាងសកម្ម ដោយមិនខ្លាចនឿយហត់ ដើម្បីនាំកម្ពុជាឆ្ពោះទៅមុខ។

លោកបន្តថា “វាមិនមែនមិត្តភាពមួយមុខ ធ្វើឲ្យគេមកវិនិយោគនៅប្រទេសកម្ពុជាទេ ប៉ុន្តែការដែលម្ចាស់ផ្ទះបានរៀបចំខ្លួនរួចជាស្រេច និងមានមាយាទល្អផងដែរ ទើបអាចទាក់ទាញទុនវិនិយោគដ៏សម្បើមនេះ” ។ លោកបន្តថា “សុបិនរបស់សម្តេចតេជោ ដែលចង់ប្រែក្លាយកម្ពុជា ជាខ្លាសេដ្ឋកិច្ចនៅអាស៊ី បានសម្រេចកាលពីឆ្នាំ២០១៥ ដោយធនាគារអភិវឌ្ឍន៍អាស៊ី បានហៅកម្ពុជាជាខ្លាថ្មីរបស់អាស៊ី ព្រោះកំនើនប្រាក់ចំណូលប្រចាំឆ្នាំរបស់ប្រជាជនកម្ពុជា ដែលរុញប្រទេសនេះពីប្រទេសក្រីក្រ មានការអភិវឌ្ឍតិចតួច មកជាប្រទេសមានប្រាក់ចំណូលមធ្យមកម្រិតទាប” ៕

កាន់តែបារម្ភ! រដ្ឋបាលរាជធានីភ្នំពេញ រកឃើញទីតាំងចំនួន ៦៣កន្លែង ជាប់ពាក់ព័ន្ធព្រឹត្តិការណ៍ «សហគមន៍ ២០កុម្ភៈ» ខណៈចំនួនអ្នកឆ្លងជំងឺកើនឡើងដល់ ៦៥នាក់

ភ្នំពេញ៖ គិតត្រឹមល្ងាចថ្ងៃទី២៤ ខែកុម្ភៈ ឆ្នាំ២០២១នេះ រដ្ឋបាលរាជធានីភ្នំពេញ បានបន្តរកឃើញទីតាំង ដែលមានការពាក់ព័ន្ធនឹងព្រឹត្តិការណ៍ «សហគមន៍ ២០កុម្ភៈ» រហូតដល់ ៦៣ទីតាំងហើយ។

ជាមួយនឹងការឃើញទីតាំងជាប់ពាក់ព័ន្ធកើនឡើងនេះ អភិបាលរាជធានីភ្នំពេញ លោក ឃួង ស្រេង បានអំពាវនាវដល់បងប្អូន ដែលធ្លាប់ចេញចូលទីតាំងទាំង ៦៣កន្លែងនេះ ទាក់ទងទៅលេខ ១១៥ ឬលេខទូរសព្ទលេខ ០១២ ៨២៥ ៤២៤ ឬ ០១២ ៤៨៨ ៩៨១ ឬ ០១២ ៨៣៦ ៨៦៨ ដើម្បីមកធ្វើតេស្តរកកូវីដ១៩ និងធ្វើចត្តាឡីស័កឲ្យបានត្រឹមត្រូវ។

សូជម្រាបថា ក្រសួងសុខាភិបាលបានអំពាវនាវ និងក្រើនរំលឹក សូមបងប្អូនប្រជាពលរដ្ឋទាំង អស់នៅទូទាំងប្រទេស និងជាពិសេសអ្នករស់នៅក្នុងរាជធានីភ្នំពេញ និងខេត្តកណ្ដាល ត្រូវប្រកាន់យកនូវការប្រុង ប្រយ័ត្នខ្លួនជាប់ជានិច្ច គ្រប់គ្រងក្រុមគ្រួសារឲ្យបានល្អ និងចូលរួមអនុវត្តវិធានការការពារខ្លួនឲ្យបានខ្ជាប់ខ្លួនគ្រប់ៗគ្នា៕

ហេតុអ្វីតំបន់ជាយក្រុងទទួលបានចំណែកទីផ្សារលំនៅដ្ឋានបែបប្រណីតកាន់តែច្រើន?

ដោយៈ ម៉ាណេត

ភ្នំពេញៈ អ្នកជំនាញបានលើកឡើងថា អ្នកអភិវឌ្ឍន៍លំនៅដ្ឋានបែបប្រណីត ឬមានតម្លៃថ្លៃ បាននិងកំពុងបាញ់ឆ្ពោះ ទៅកាន់តំបន់ជាយរាជធានីភ្នំពេញ ស្ទើរតែគ្រប់ទិស ក្នុងរយៈពេលប៉ុន្មានឆ្នាំចុងក្រោយនេះ ដើម្បីរកផលចំណេញ ខណៈដីនៅកណ្តាលក្រុងចាប់ផ្តើមចង្អៀត និងមានតម្លៃថ្លៃសម្រាប់ការអភិវឌ្ឍ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានថ្លែងប្រាប់កាលពីថ្មីៗនេះថា ការអភិវឌ្ឍន៍លំនៅដ្ឋានបែបប្រណីត ទៅកាន់ជាយរាជធានី ដោយសារតែតម្លៃដីនៅក្បែរៗ ឬកណ្ដាលរាជធានី ដែលធ្វើឱ្យអ្នកវិនិយោគមិនអាចរកប្រាក់ចំណេញបាន។

លោកបានថ្លែងថា “ពួកគេត្រូវការតម្លៃដីទាបល្មម ដែលអាចឱ្យពួកគេចំណេញពីការវិនិយោគ។ ម្យ៉ាងទៀតនៅក្បែរ ឬកណ្ដាលរាជធានី ក៏មិនមានដីទូលាយ សម្រាប់អភិវឌ្ឍន៍ជាបុរីបានស្រួលនោះដែរ” ។

លោកច្រឹក សុខនីមបានបន្តថា នៅតំបន់ជាយរាជធានីភ្នំពេញ នាពេលបច្ចុប្បន្ននេះ ក៏មានការអភិវឌ្ឍហេដ្ឋារចនាសម្ព័ន្ធបានច្រើនផងដែរ ដែលជំរុញអោយវិនិយោគិនងាកទៅរកតំបន់ជាយៗក្រុង សម្រាប់អភិវឌ្ឍន៍គម្រោងរបស់ខ្លួន។

លោកបានថ្លែងថា “តាមផែនការមេរបស់រាជរដ្ឋាភិបាល ក៏បានកំណត់ការអភិវឌ្ឍជុំវិញរាជធានីជាមុំ៣៦០ដឺក្រេ ដូច្នេះហើយគ្រប់ទិសនៃរាជធានី គឺត្រូវមានការអភិវឌ្ឍជាបន្តបន្ទាប់។ សម្រាប់តម្លៃត្រឹម២០ ឬ៣០ម៉ឺនដុល្លារអាមេរិក នៅតំបន់ជាយរាជធានី បច្ចុប្បន្ន គឺនៅមានការគាំទ្រច្រើនពីប្រជាពលរដ្ឋ ព្រោះថាវាក៏មិនទាន់ថាឆ្ងាយប៉ុន្មានពីរាជធានីភ្នំពេញដែរ” ។

ជាមួយគ្នានេះ លោកប៉ូ អ៊ាវគង់អគ្គនាយក និងស្ថាបនិកក្រុមហ៊ុនអ៊ែតវ៉ាន់ស៍ រៀលអ៊ីស្ទេតបានថ្លែងប្រាប់កាលពីថ្មីៗនេះថា សញ្ញាវិជ្ជមានសម្រាប់ វិស័យអចលនទ្រព្យចាប់ ផ្តើមមានឡើងវិញជាបណ្តើរៗ ហើយទន្ទឹមនឹងនេះ លំនៅដ្ឋានបែបប្រណីតក្នុងគម្រោងបុរីថ្មីៗមួយចំនួន ត្រូវបានដាក់ដំណើរការសាងសង់នៅដើមឆ្នាំ២០២១នេះ។

លោកបានឱ្យដឹងថា “តម្រូវការលំនៅដ្ឋានបែបប្រណីតភាគច្រើន ជាតម្រូវការសំរាប់ប្រជាជនក្នុងស្រុករបស់យើង ហើយមួយភាគតូច ក៏ត្រូវបានវិនិយោគិនទិញសម្រាប់ជួលទៅឱ្យអ្នកប្រធានអង្គការធំៗ និងប្រធានក្រុមហ៊ុនធំៗពីបរទេស ដើម្បីទទួលបានផលចំណេញផងដែរ” ។

លោកបានថ្លែងថា “យើងឃើញថាតម្រូវការលំនៅដ្ឋានបែបប្រណីត នៅដើមឆ្នាំ២០២១ នៅតែមានកំណើន ដោយសារអ្នកមានចំណូលខ្ពស់ និងអ្នករកស៊ីមានរំហូរសាច់ល្អ នៅតែត្រូវការលំនៅដ្ឋានបែបប្រណីត” ។

លោកបានបន្តថា លំនៅដ្ឋានបែបប្រណីត មានតម្លៃចាប់ពី ១០ម៉ឺនដុល្លារ ទៅដល់ជាង១លានដុល្លារ ហើយលំនៅដ្ឋានបែបប្រណីតភាគច្រើន ត្រូវបានអភិវឌ្ឍន៍ក្នុងគម្រោងបុរី៕

ក្រសួងទេសចរណ៍កែសម្រួលយុទ្ធសាស្ត្រទីផ្សារក្នុង និងក្រោយវិបត្តិកូវីដ១៩

ដោយគង់ សូរិយា

ភ្នំពេញៈ ក្រសួងទេសចរណ៍ បានដឹកនាំកិច្ចប្រជុំក្រុមការងារបច្ចេកទេស នៃក្រសួងដើម្បីពិនិត្យ និងកែសម្រួលលើផែនការយុទ្ធសាស្ត្រទីផ្សារ ទាក់ទាញទេសចរណ៍កម្ពុជាក្នុង និងក្រោយវិបត្តិកូវីដ-១៩ សម្រាប់ឆ្នាំ២០២១-២០២៥ ។

ជាមួយគ្នានេះ កម្ពុជាក៏ត្រៀមរៀបចំពិធីប្រកាសផ្សព្វផ្សាយជាផ្លូវការ “កម្ពុជា” ជាម្ចាស់ផ្ទះវេទិកាទេសចរណ៍អាស៊ានឆ្នាំ២០២២» ។

កិច្ចប្រជុំនេះ មានធ្វើឡើងក្រោមការដឹកនាំរបស់លោកសុខ សង្វារអនុរដ្ឋលេខាធិការក្រសួងទេសចរណ៍ និងមានការចូលរួមពីមន្ត្រីពាក់ព័ន្ឋ។

ខ្លឹមសារយុទ្ធសាស្ត្រទីផ្សារ ដែលក្រុមការងារបានរៀបចំឡើង ឆ្លើយតបនឹងវិបត្តិកូវីដ-១៩ សម្រាប់ឆ្នាំ២០២១-២០២៥ គឺផ្តោតលើយុទ្ធសាស្ត្រចំនួន៥ គឺ យុទ្ធសាស្ត្រពង្រីកទីផ្សារគោលដៅអាទិភាព ផែនការយុទ្ធសាស្ត្រពង្រឹងគុណភាព និងអភិវឌ្ឍន៍ផលិតផលឆ្លើយតបតាមតម្រូវការទីផ្សារ ផែនការយុទ្ធសាស្ត្រជំរុញការធ្វើការដំណើរ និងការតភ្ជាប់ និងផែនការយុទ្ធសាស្ត្របង្កើនការផ្សព្វផ្សាយ។

ក្រៅពីពិនិត្យកែសម្រួលលើផែនការយុទ្ធសាស្ត្រទីផ្សារ ទាក់ទាញទេសចរណ៍កម្ពុជាក្នុង និងក្រោយវិបត្តិកូវីដ-១៩ សម្រាប់ឆ្នាំ២០២១-២០២៥ ក្រុមការងារក៏បានពិភាក្សាគ្នាផងដែរ អំពីការត្រៀមរៀបចំកម្មវិធីប្រកាសផ្សព្វផ្សាយជាផ្លូវការ “កម្ពុជា ជាម្ចាស់ផ្ទះវេទិកាទេសចរណ៍អាស៊ានឆ្នាំ២០២២” ដែលគ្រោងនឹងរៀបចំនៅខេត្តព្រះសីហនុ នៅថ្ងៃទី១៥ ខែមីនា ឆ្នាំ២០២១ខាងមុខនេះ៕

អ្នកជំនាញ ៖ បន្តិចទៀតទីផ្សារខុនដូកម្រិតសមរម្យកាន់តែមានតម្រូវការសម្រាប់ជនជាតិខ្មែរក្នុងរាជធានីភ្នំពេញ

ដោយ ៖ រ៉ាណេត

ភ្នំពេញ ៖ ដោយសារទំហំនៃទីក្រុងភ្នំពេញកំពុងតែមានការរីកធំឡើងៗ ខណៈពេលប្រជាជននៅក្នុងក្រុងមានកំនើនជាបន្តបន្ទាប់នាំឱ្យមានតំរូវការលំនៅដ្ឋានខ្ពស់កាន់តែច្រើន ហើយតម្លៃកាន់តែឡើងថ្លៃ រហូតធ្វើឱ្យអ្នកដែលមានចំណូលមធ្យមមិនអាចមានលទ្ធភាពទិញលំនៅដ្ឋានជាន់ផ្ទាល់ដីនោះឡើយ ក្រៅតែពីជម្រើសទិញលំនៅដ្ឋានសហកម្មសិទ្ធិតម្លៃសមរម្យក្រោម១០ដុល្លារសម្រាប់រស់នៅ។

លោក សំ សុខនឿន ប្រធានសមាគមអចលនទ្រព្យសកល និងជាអគ្គនាយកក្រុមហ៊ុន KW SAM SN បានមានប្រសាសន៍ថា តម្រូវការទីផ្សារខុនដូតម្លៃសមរម្យក្នុងក្រុងភ្នំពេញកំពុងតែមានការកើនឡើងសម្រាប់អតិថិជនជនជាតិខ្មែរ។

លោកបានបន្ថែមទៀតថា មូលហេតុដែលកំណើនខុនដូតម្លៃសមរម្យកំពុងមានការកើនឡើង ព្រោះបណ្តាលមកពីកត្តា៤សំខាន់ៗ: ទី១ បុរីថ្មីៗកាន់តែឆ្ងាយពីក្រុងហើយមានតម្លៃខ្ពស់ទៅៗ ដែលធ្វើអោយអ្នកស្នាក់នៅក្នុងបុរីត្រូវចំណាយពេលវេលា ក្នុងការចូលមកក្នុងទីក្រុងដើម្បីបំពេញការងារ។ ទី២ ដោយសារតែប្រជាជនក្នុងក្រុងមានការកើនឡើងនាំឱ្យមានការស្ទះចរាចរណ៍ ទី៣ ដោយសារតែប្រជាជនខ្មែរ មានការយល់ដឹងពីរបៀបរស់នៅដែលមានស្តង់ដារប្រសើរជាងមុន ដូចជាហេដ្ឋារចនាសម្ព័ន្ធ ឧបករណ៍ប្រើប្រាស់ ផ្សារទំនើប សាលារៀន មន្ទីរពេទ្យ ។ល។ ហើយទី៤ និន្នាការរបស់អតិថិជនដែលទិញដីឆ្ងាយពីក្រុង ហើយកំពុងតែជួលផ្ទះនៅក្នុងទីក្រុងភ្នំពេញ នឹងងាកមកទិញខុនដូតម្លៃសមរម្យវិញ ដោយហេតុថាការទិញខុនដូមានភាពងាយស្រួល ក្នុងការបង់ប្រាក់ ដែលអាចអោយពួកគាត់យកលុយពីការជួលផ្ទះ រឺលុយពីការបង់រំលោះដី ដែលនៅជាយក្រុង ជំនួសដោយការទិញខុនដូវិញ។

លោកបានបន្តថា “ការទិញខុនដូគឺជាការទិញផ្ទះសម្រាប់រស់នៅតែម្តង អាចឱ្យគាត់មានស្ថេរភាព និងផាសុកភាពសំរាប់គ្រួសារ ជាពិសេស គាត់អាចបំពេញភារកិច្ចក្នុងទីក្រុងភ្នំពេញបានយ៉ាងងាយស្រួល និងចំណេញពេលវេលា ថែមទាំងកូនៗរបស់គាត់អាចមានឱកាសក្នុងការចូលរៀនសាលាល្អៗក្នុងក្រុងភ្នំពេញទៀតផង”។

នាយិកាប្រចាំប្រទេសក្រុមហ៊ុន CBRE Cambodia លោកស្រីអាន សុធីតា បានមានប្រសាសន៍ផងដែរថា “បច្ចុប្បន្ននេះខុនដូដែលតម្លៃសមរម្យភាគច្រើន មានតម្រូវការខ្ពស់ពីសំណាក់អតិថិជនក្នុងស្រុក ដោយសារពួកគាត់បានយល់ និងស្គាល់ពីគុណតម្លៃនៃការស្នាក់នៅក្នុងខុនដូ ហើយពួកគាត់ទិញសម្រាប់រស់នៅច្រើន ជាងទិញសម្រាប់ទុកវិនិយោគបន្ត”។

លោកស្រីបានបន្តទៀតថា “និយាយរួមទៅ ការវិនិយោគទៅលើប្រភេទខុនដូតម្លៃសមរម្យ នៅតែមានទីផ្សារទាំងពេលនេះ និងបន្តទៅឆ្នាំក្រោយទៀត ព្រោះកាលណាតម្លៃទាប នឹងមានទីផ្សារទូលាយ បន្ទាប់ពីទទួលបានការចាប់អារម្មណ៍កាន់តែច្រើនពីអតិថិជនក្នុងស្រុក ជាពិសេសជនជាតិខ្មែរ”។

លោកស្រីបានបញ្ជាក់ថា ខុនដូដែលត្រូវបានចាត់ទុកថាប្រភេទសមរម្យ គឺមានតម្លៃប្រមាណ១២០០ដុល្លារក្នុងមួយម៉ែត្រការ៉េ។ ដោយឡែកខុនដូតម្លៃមធ្យម ឬតម្លៃកណ្តាល គឺមានតម្លៃប្រមាណចាប់ពី១៥០០ដុល្លារឡើងទៅ ក្នុងមួយម៉ែត្រការ៉េ ហើយចំពោះប្រភេទខុនដូតម្លៃខ្ពស់គឺមានតម្លៃចាប់ពីប្រមាណ២៥០០ដុល្លារ ក្នុងមួយម៉ែត្រការ៉េឡើងទៅ និងស្ថិតនៅជាន់ខ្ពស់ៗ៕

ផ្លូវរត់ព្រលានយន្ដហោះវែងជាងគេ និងផ្លូវល្បឿនលឿននៅខេត្តព្រះសីហនុនឹងបញ្ចប់តាមផែនការកំណត់

ដោយៈ ប៊ី

ព្រះសីហនុៈ ព្រះសីហនុ ដែលខេត្ដមួយកំពុងតែមានអភិវឌ្ឍន៍ខ្លាំងនោះ នឹងសម្រេចបានសមទ្ធិផលថ្មីធំៗចំនួន២បន្ថែមទៀត រួមមាន ផ្លូវរត់ព្រលានយន្ដហោះកងកេង ដែលជាផ្លូវរត់វែងជាងក្នុងប្រទេសកម្ពុជា និងផ្លូវល្បឿនលឿន ភ្នំពេញ-ក្រុងព្រះសីហនុ ស្របតាមផែនការនៅក្នុងឆ្នាំ២០២២ខាងមុខនេះ។

ផ្លូវល្បឿនលឿន ភ្នំពេញ-ក្រុងព្រះសីហនុ មានប្រវែងសរុប ជាង១៩០គីឡូម៉ែត្រ ដែលទុនវិនិយោគសាងសង់សរុបប្រមាណ២ពាន់លានដុល្លារអាមេរិក ជាទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន (CRBC) តាមរយៈក្រុមហ៊ុន Cambodian PPSHV Expressway Co., Ltd។

ផ្លូវនេះ ឆ្លងកាត់រាជធានីភ្នំពេញ ប្រវែង៨.៣០គីឡូម៉ែត្រ ខេត្តកណ្តាល ប្រវែង ៩.១០គីឡូម៉ែត្រ ខេត្តកំពង់ស្ពឺ ប្រវែង ៨០.៨០គីឡូម៉ែត្រ ខេត្តកោះកុង ប្រវែង ១.៩២គីឡូម៉ែត្រ និងខេត្តព្រះសីហនុ ប្រវែង៨៩.៨៩គីឡូម៉ែត្រ។

ដោយឡែកផ្លូវរត់ព្រលានយន្ដហោះកងកេង ខេត្ដព្រះសីហនុ ដែលជាផ្លូវរត់វែងជាង ក្នុងប្រទេសកម្ពជានោះ ត្រូវបានរាជរដ្ឋាភិបាល ផ្ដល់សិទ្ធឲ្យក្រុមហ៊ុនវ៉ាងស៊ី របស់ប្រទេសបារាំង ជាអ្នកសាងសង់។
បើតាមក្រុមហ៊ុនវ៉ាងស៊ី បានធានាថា នឹងធ្វើឲ្យរួចរាល់ នៅក្នុងរង្វង់ឆ្នាំ២០២១ ឬដើមឆ្នាំ២០២២ ដូច្នេះយន្ដហោះធំៗ ដែលមកពីឆ្ងាយរាប់ទាំងយន្ដហោះ របស់ប្រធានាធិបតីអាមេរិកក៏អាចមកចុះចត នៅប្រទេសកម្ពុជាបានដែរ។

លោកគួច ចំរើនអភិបាលខេត្តព្រះសីហនុ បានឲ្យដឹងថា ព្រលានយន្ដហោះកងកេង ខេត្តព្រះសីហនុ គឺជាព្រលានយន្ដហោះ ដែលមានប្រវែងរត់វែងជាងគេ នៅក្នុងប្រទេសកម្ពុជា ហើយមកដល់ពេលនេះ កំពុងធ្វើបានកសាងផ្លូវរត់ ផ្លូវចុះចតសម្រាប់យន្ដហោះ។

លោកបានឲ្យដឹងទៀតថា បើគ្មានការវាយប្រហារពីជំងឺកូវីដ-១៩នោះទេ សង្ឃឹមថា ផ្លូវរត់ព្រលានយន្ដហោះកងកេង នឹងអាចរួចរាល់ នៅក្នុងឆ្នាំ២០២២ ដែលជាការគាំទ្រ ដល់សំខាន់បន្ថែមទៀត សម្រាប់ការវិនិយោគ និងការអភិវឌ្ឍន៍ នៅក្នុងខេត្តព្រះសីហនុ។

អភិបាលខេត្តព្រះសីហនុ បានគូសបញ្ជាក់ថា រាជរដ្ឋាភិបាលបានខិតខំជាប្រចាំ ក្នុងការកសាង ការអភិវឌ្ឍន៍ ការដោះស្រាយ និងបញ្ហាប្រឈមនានា ដើម្បីជំរុញឲ្យការសាងសង បានលឿនឆាប់ទៅតាមផែនការ ដែលបានគ្រោងទុក។

ចំពោះការសាងសង់ ផ្លូវល្បឿនលឿនវិញ ត្រូវបានអភិបាលខេត្តព្រះសីហនុ បញ្ជាក់ឲ្យដឹងថា ការកសាងផ្លូវនេះ មិនមានឧបសគ្គពីបញ្ហាកូវីដ-១៩នោះទេ ព្រោះថា ក្រុមជាងក្រុមវិស្វករ គឺបានមានវត្ដមាន នៅលើការដ្ឋានរួចរាល់ហើយ។

លោកគួច ចំរើនបានឲ្យដឹងទៀតថា ចំពោះដំណើរការសាងសង ផ្លូវល្បឿនលឿននេះ នៅលើទឹកដីខេត្តព្រះសីហនុ មិនមានផ្ដល់ប៉ះពាល់អ្វីនោះទេ ព្រោះថា រដ្ឋបាលខេត្តបានដោះស្រាយនូវបញ្ហាទាំងនេះ រួចអស់ហើយ។

រាជរដ្ឋាភិបាល បានកំណត់ក្នុងផែនការ រៀបចំដែនដី ខេត្តព្រះសីហនុ ចក្ខុវិស័យ ឆ្នាំ២០៣០ គឺរៀបចំ និងអភិវឌ្ឍខេត្តព្រះសីហនុ ជាប៉ូលអភិវឌ្ឍជាតិ ប្រកបដោយចីរភាព នៅតំបន់ឆ្នេរសមុទ្រកម្ពុជា តាមរយៈការអភិវឌ្ឍទីក្រុងទំនើប រមណីយដ្ឋានឆ្នេរសមុទ្រ ដែលស្អាតបំផុតលើសកលលោក។

ជាពិសេស ជាតំបន់សេដ្ឋកិច្ចពិសេស គំរូពហុបំណង ច្រកចេញចូលអន្តរជាតិ មជ្ឈមណ្ឌលកំណើនជាតិ មជ្ឈមណ្ឌលភស្តុភារកម្មជាតិ ដោយមានទំនាក់ទំនងជាមួយ ទីផ្សារអាស៊ាន និងទីផ្សារសកលលោក និងជាមជ្ឈមណ្ឌលឧស្សាហកម្ម ផលិតកម្មបែបបច្ចេកវិទ្យាទំនើប ដែលមានសុខដុមនីយកម្ម ជាមួយនឹងបរិស្ថាន រស់នៅល្អប្រសើរ៕

លំនៅដ្ឋានតម្លៃក្រោម១០ម៉ឺនដុល្លារកំពុងវាយឡុកទីផ្សារនៅតំបន់ជាយក្រុងជុំវិញរាជធានីភ្នំពេញ

ដោយ ៖ រ៉ាណេត
ភ្នំពេញ ៖ គម្រោងលំនៅដ្ឋានជាច្រើនត្រូវបានគេមើលឃើញថាកំពុងតែមានសកម្មភាពយ៉ាងមមាញឹកក្នុងសាងសង់គម្រោងរបស់ខ្លួន ដែលភាគច្រើនស្ថិតនៅតំបន់ជាយក្រុងជុំវិញរាជធានីភ្នំពេញ និងត្រូវបានដាក់លក់នៅលើទីផ្សាររួមក្នុងតម្លៃក្រោម១០ម៉ឺនដុល្លារ។

អគ្គនាយកក្រុមហ៊ុនភ្នាក់អចលនទ្រព្យ Century21 Advance លោកឡុងគីម សួគ៌ បានមានប្រសាសន៍ប្រាប់ឱ្យដឹងនៅរសៀលថ្ងៃទី២៤ ខែកុម្ភៈ ឆ្នាំ២០២១នេះថា មិនថាពេលនេះ ឬក្នុងរយៈពេល៥ទៅ១០ឆ្នាំខាងមុខទៀត តម្រូវការលំនៅដ្ឋានកម្រិតមធ្យមដែលមានតម្លៃក្រោម១០ម៉ឺនដុល្លារនៅតែមានទីផ្សារខ្ពស់ ព្រោះអ្នកដែលរស់នៅ និងប្រកបអាជីវកម្ម ក៏ដូចជាការងារនៅក្នុងរាជធានីភ្នំពេញភាគច្រើនមិនទាន់មានលំនៅដ្ឋានស្នាក់នៅកម្មសិទ្ធិនៅឡើយនោះទេ។

លោកបានបញ្ជាក់ថា សម្រាប់លំនៅដ្ឋានដែលមានតម្លៃសមរម្យក្រោម១០ម៉ឺនដុល្លារនៅតែមានប្រជាប្រិយភាពខ្ពស់ ព្រោះមនុស្សអត់ទាន់មានផ្ទះនៅកម្មសិទ្ធិនៅមានច្រើនណាស់ ហើយមួយឆ្នាំៗមានអ្នកចំណូលថ្មីមកកាន់រាជធានីភ្នំពេញជាបន្តបន្ទាប់ ដូច្នេះតម្រូវការនៅតែបន្តមានមិនធ្លាក់ចុះនោះទេ។ ហេតុផលដែលធ្វើឱ្យបណ្តាក្រុមហ៊ុនអភិវឌ្ឍន៍សំណង់លំនៅដ្ឋានភាគច្រើនសម្រុកទៅកាន់តំបន់ជាយក្រុងដោយសារតែនៅតំបន់ទាំងនោះជាតំបន់មានការអភិវឌ្ឍថ្មី តម្លៃដីធ្លីនៅមានកម្រិតដែលអនុគ្រោះដល់ការវិនិយោគរបស់ពួកគេអាចមានឱកាសទទួលបានចំណេញច្រើន ដែខុសប្លែកពីដីនៅកណ្តាលក្រុងឡើងខ្ពស់ហួសពីកម្រិត ដែលមិនអនុគ្រោះសម្រាប់អភិវឌ្ឍន៍ក្នុងវិស័យលំនៅដ្ឋានកម្រិតមធ្យមទៀតនោះទេ ដែលសូម្បីតែលំនៅដ្ឋាននៅក្នុងតំបន់មួយចំនួនដូចជាក្នុងខណ្ឌសែនសុខ ខណ្ឌជ្រោយចង្វារ ខណ្ឌមានជ័យ(ម្ដុំផ្លូវ៦០ម៉ែត្រ) ដែលលំនៅដ្ឋានមួយខ្នងមានតម្លៃជាង២០ម៉ឺនដុល្លាររួចទៅហើយនោះ។

អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ានួន រិទ្ធី ជាអ្នកអភិវឌ្ឍន៍លំនៅដ្ឋាននៅតំបន់ជាយក្រុងក្បែរផ្លូវជាតិលេខ១ បុរីកៀនស្វាយផាក ជិតគម្រោងផ្លូវក្រវាត់ក្រុងទី៣ដែលកំពុងមានគម្រោងអភិវឌ្ឍន៍ជាច្រើននោះបានមានប្រសាសន៍ថា ការវិនិយោគវិស័យលំនៅដ្ឋានតម្លៃមធ្យមដែលមានទីតាំងស្ថិតនៅតំបន់ជាយក្រុងគឺអាចផ្តល់ឱកាសចំណេញដល់អ្នកអភិវឌ្ឍន៍ និងមានទីផ្សារធំទូលាយជាងលំនៅដ្ឋានប្រណីតកម្រិតខ្ពស់។

លោកឧកញ៉ាបញ្ជាក់ថា “លំនៅដ្ឋានកម្រិតសមរម្យងាយស្រួលរកអតិថិជនគោលដៅ ព្រោះបើអតិថិជនមានលុយត្រឹម១០ម៉ឺនដុល្លារ ឬក្រោមនេះមិនអាចទិញលំនៅដ្ឋានស្នាក់នៅក្នុងរាជធានីភ្នំពេញបានទេ ដូច្នេះលំនៅដ្ឋាននៅតំបន់ជាយក្រុងគឺជាជម្រើសរបស់ពួកគាត់។ ម៉្យាងវិញទៀត ស្ទើរគ្រប់គម្រោងទាំងអស់សុទ្ធតែបានផ្តល់ជូននូវលក្ខខណ្ឌងាយស្រួលដល់អតិថិជនជាមួយនឹងជម្រើសបង់ផ្តាច់ដែលអាចទទួលបានការបញ្ចុះបន្ថែម ក៏ដូចជាជម្រើសនៃការបង់រំលោះប្រចាំខែជាមួយក្រុមហ៊ុនផ្ទាល់ ឬជាមួយធនាគារជាដៃគូរបស់ក្រុមហ៊ុនដែលកាន់តែផ្តល់នូវទំនុកចិត្តដល់ពួកគាត់ ហើយពួកគាត់ក៏មានឱកាសចំណេញជាច្រើន មិនថាចំពោះការទិញសម្រាប់រស់នៅ ក៏ដូចជាការទិញទុកសម្រាប់ជួល ឬលក់បន្តយកចំណេញនៅពេលអនាគតនោះទេ ព្រោះពីមួយឆ្នាំទៅមួយឆ្នាំទាំងតម្លៃដី និងតម្លៃលំនៅដ្ឋានតែងមានកំណើនជារៀងរាល់ឆ្នាំ”៕

ក្រសួងសាធារណៈការកំពុងរៀបចំអនុក្រឹត្យស្តីពីការគ្រប់គ្រងដីចំណីផ្លូវ និងផ្លូវរថភ្លើង

ដោយ:គង់ សូរិយា

ភ្នំពេញៈ ក្រសួងសាធារណៈការ និងដឹកជញ្ជូនបាននិងកំពុងរៀបចំសេចក្តីព្រាងអនុក្រឹត្យស្តីពីការងារគ្រប់គ្រងដីចំណីផ្លូវថ្នល់់ និងផ្លូវរថភ្លើង ដើម្បីឈានទៅលុបបំបាត់ការទន្ទ្រានយកដីចំណីផ្លូវសាធារណៈទៅសាងសង់សំណង់ ឬដាំដំណាំផ្សេងៗ។

សេចក្តីព្រាងអនុក្រឹត្យស្តីពីការងារគ្រប់គ្រងដីចំណីផ្លូវថ្នល់ និងផ្លូវរថភ្លើង មានគោលបំណងលុបបំបាត់បាតុភាពការទន្ទ្រានយកដីចំណីផ្លូវទៅធ្វើការកសាងសំណង់ ឬដាំដំណាំផ្សេងៗ ទប់ស្កាត់ឧប្បទ្ទវហេតុគ្រោះថ្នាក់ចរាចរណ៍ និងការរក្សាសណ្តាប់ធ្នាប់សង្គមដែលតែងតែកើតមាននៅតាមបណ្ដាញផ្លូវ កាត់បន្ថយឧបសគ្គនានាដែលរាំងស្ទះដល់ការអភិវឌ្ឍផ្លូវ។

ជាងនេះទៅទៀត អនុក្រឹត្យនេះមានគោលបំណងកាត់បន្ថយរាល់ការចំណាយរបស់រដ្ឋទៅលើការដោះស្រាយផលប៉ះពាល់ផ្ទះសម្បែងប្រជាពលរដ្ឋ ដែលតាំងទីលំនៅតាមបណ្ដាញផ្លូវបង្កលក្ខណៈងាយស្រួលដល់សមត្ថកិច្ចពាក់ព័ន្ធក្នុងការផ្ដល់ភាពស្របច្បាប់ដល់ប្រជាពលរដ្ឋ ដែលមានកម្មសិទ្ធិនៅតាមបណ្ដាញផ្លូវ និងធានាការអភិវឌ្ឍវិស័យហេដ្ឋារចនាសម្ព័ន្ធរូបវន្ត ប្រកបដោយនិរន្តរភាពនៅក្នុងព្រះរាជាណាចក្រកម្ពុជា។

កិច្ចប្រជុំនេះ បានធ្វើឡើ់ងក្រោមអធិបតីភាពលោកលឹម ស៊ីដេនីនរដ្ឋលេខាធិការក្រសួងសាធារណៈការ និងដឹកជញ្ជូន។

យោងតាមខ្លឹមសារនៃសេចក្តីព្រាងអនុក្រឹត្យនេះ ក្រសួងសាធារណការ និងដឹកជញ្ជូន មានសមត្ថកិច្ចក្នុងការគ្រប់គ្រង និងប្រើប្រាស់ដីចំណីផ្លូវជាតិ និងផ្លូវរថភ្លើងក្នុងការធ្វើផែនការ ការសិក្សាគម្រោងប្លង់អភិវឌ្ឍន៍ផ្លូវជាតិ និងផ្លូវរថភ្លើង ឬផ្ដល់សេវាកម្មផ្សេងៗទៀតដែលពាក់ព័ន្ធនឹងផ្លូវជាតិ និងផ្លូវរថភ្លើង ដើម្បីបម្រើផលប្រយោជន៍អ្នកប្រើប្រាស់ផ្លូវជាតិ និងផ្លូវរថភ្លើងឱ្យមានប្រសិទ្ធភាពខ្ពស់។

លោកលឹម ស៊ីដេនីន ដឹកនាំកិច្ចប្រជុំដើម្បីពិនិត្យពិភាក្សា និងកែសម្រួលសេចក្តីព្រាងអនុក្រឹត្យនេះ កិច្ចប្រជុំនេះធ្វើឡើងក្នុងពិនិត្យ ពិភាក្សា និងកែសម្រួលសេចក្តីព្រាងអនុក្រឹត្យស្តីពី ការគ្រប់គ្រងលើការប្រើប្រាស់ដី ចំណីផ្លូវនៅតាមបណ្តាញផ្លូវថ្នល់ និងផ្លូវរថភ្លើង ក៏ដូចជាដើម្បីប្រមូលធាតុចូលឱ្យកាន់តែទូលំ ទូលាយ សំដៅឱ្យការរៀបចំសេចក្ដីព្រាងអនុក្រឹត្យនេះ មានខ្លឹមសារកាន់តែច្បាស់លាស់ ជាក់លាក់ និងស៊ីជម្រៅក្នុងក្របខណ្ឌនៃកំណត់ការគ្រប់គ្រង និងការប្រើប្រាស់ដីចំណីតាមបណ្ដាញផ្លូវជាតិ និងផ្លូវរថភ្លើង ឱ្យសមស្របតាមការអភិវឌ្ឍ និងការរីកចម្រើននៅកម្ពុជា។

លោករដ្ឋលេខាធិការ បានជំរុញលើកទឹកចិត្តឱ្យក្រុមការងារជំនាញ បច្ចេកទេសពិនិត្យបន្ថែមទៀត និង សិក្សាពាក្យពេជន៍ ឃ្លា ប្រយោគឱ្យបានល្អិតល្អន់ និងស៊ីជម្រៅសំដៅឱ្យមានសង្គតភាពជាមួយនឹង ឯកសារគតិយុត្តពាក់ព័ន្ធទាំងឡាយ នៅក្នុងព្រះរាជាណាចក្រកម្ពុជា ដើម្បីជំរុញឱ្យការរៀបចំសេចក្ដីព្រាង អនុក្រឹត្យនេះមានលក្ខណៈគ្រប់ជ្រុងជ្រោយ និងដំណើរការទៅមុខដោយរលូន៕