ផ្លូវជាតិសំខាន់ៗចំនួន៣នឹងជម្រុញសក្តានុពលខេត្តភូមិភាគពាយ័ព្យកាន់តែប្រសើរឡើង

ដោយៈរតនៈ
ពាយ័ព្យៈ ផ្លូវជាតិសំខាន់ៗចំនួនបីបាន និងកំពុងជម្រុញសក្តានុពលសេដ្ឋកិច្ច និងលើកកំពស់បរិយាកាសវិនិយោគ នៅភូមិភាគពាយ័ព្យ តាមរយៈសម្រួលការធ្វើដំណើរ ការដឹកជញ្ជូនទំនិញ ដើម្បីផ្លាស់ប្តូរពាណិជ្ជកម្មជាមួយប្រទេសជិតខាង។

អភិបាលរងខេត្តពោធិ៍សាត់ លោក ចេង ឡៃបានប្រាប់Propertyareaនៅថ្ងៃទី ២១ ខែ ឧសភានេះថា ផ្លូវធំៗចំនួន២ខែ្សគឺមានជាយូរមកហើយ គឺផ្លូវជាតិលេខ៥ និងផ្លូវស្របតាមផ្លូវរថភ្លើងតែផ្លូវទាំង២ខែ្សនេះ បាននិងកំពុងពង្រីកឲ្យកាន់តែធំ ដើម្បីសម្រួលដល់ការធ្វើដំណើរ ទាំងនៅក្នុងខេត្តពោធិ៍សាត់ និងឆ្លងទៅខេត្តផ្សេងៗ។

ដោយឡែកផ្លូវជាតិលេខ១០ ដែលបានស្ថាបនាពីខេត្តបាត់ដំបង មកកាន់ខេត្តពោ​ធិ​សាត់ និងតភ្ជាប់ទៅកាន់ខេត្តកោះកុង ក៏បាននិងកំពុងសាងសង់យ៉ាងសកម្មផងដែរ។ រហូតមកទល់ពេលនេះ ការស្ថាបនាផ្លូវនេះសម្រេចបានជាង៥០ភាឡគរយហើយ។

លោកចេង ឡៃបានបន្តថា ទីតាំងដែលអភិវឌ្ឍន៍ និងធ្វើឲ្យប្រែមុខមាត់ខេត្តពោធិ៍​សាត់ខ្លាំងជាងគេ គឺស្រុកវាលវែងដែលជាស្រុកទើបបង្កើតថ្មីមួយ ព្រោះថាមានផ្លូវសំខាន់ៗឆ្លងកាត់ដូចជា ផ្លូវលេខ១០ដែលកំពុងសាងសង់នេះ ក៏កាត់ស្រុកពោធិ៍សាត់ ផ្លូវជាតិលេខ៥៥ ដែលតភ្ជាប់ពីក្រុងពោធិ៍សាត់ ទៅទៅព្រំដែនខ្មែរ ថៃ ថ្មដារ បូករួមទាំងសម្រស់ធម្មជាតិនៅក្នុងស្រុកនេះ បានធ្វើឲ្យមានអ្នកវិនិយោគជាច្រើនចាប់អារម្មណ៍ដាក់ទុកលើវិស័យអចលនទ្រព្យនៅទីនោះ។

តែទោះជាយ៉ាងណាលោកថា តម្លៃដីដែលកើនឡើងលឿនជាងគេ ក្នុងខេត្តពោធិ៍​សាត់ គឺដីដែលនៅតាមបណ្ដោយផ្លូវជាតិលេខ៥។

លោកចេង ឡៃបានបន្តថា ក្រៅពីការពីផ្លូវសំខាន់ទាំង៣ខែ្ស ការអភិឌ្ឍសំណង់ក្នុងក្រុងពោធិ៍សាត់ ដូចជាបុរី ផ្ទះល្វែង និងសំណង់ផ្សេងៗទៀតបានកែប្រែមុខមាត់ខេត្តពោធិ៍សាត់ជាច្រើនផងដែរ។

អ្នកនាំពាក្យក្រសួងសាធារណៈការ និងដឹកជញ្ជូន លោកវ៉ាស៊ីម សូរិយាបានមានប្រ​សាសន៍ថា ការកសាងហេដ្ឋារចនាសម្ព័ន្ឋ ជាទិសដៅអាទិភាពរបស់រដ្ឋាភិបាល ដើម្បីជំរុញកំនើនសេដ្ឋកិច្ចជាតិ ព្រោះបើចង់ឲ្យសេដ្ឋកិច្ចរីកចម្រើនបន្ថែមទៀត រដ្ឋាភិបាលត្រូវតែវិនិយោគលើវិស័យហេដ្ឋារចនាសម្ព័ន្ឋ។

លោកបន្តថា “ជាក់ស្តែងផ្លូវជាតិលេខ១០ ដែលបានតភ្ជាប់ពីភូមិភាគពាយ័ព្យ មកកាន់តំបន់ឆ្នេរ ខេត្តកោះកុង មិនត្រឹមតែជាការធ្វើសមាហរណកម្មផ្ទៃក្នុងកម្ពុជានោះទេ តែជាការធ្វើឲ្យកម្ពុជា កាន់តែមានឯករាជ្យភាពខាងសេដ្ឋកិច្ច”។ លោកបន្តថា “ផ្លូវនេះនឹងសម្រួលការដឹកជញ្ជូនកសិផល ដ៏សម្បូរបែបពីភូមិភាគពាយ័ព្យ ទៅកាន់កំពង់ផែទឹកជ្រៅ ខេត្តកោះកុង ដើម្បីនាំចេញទៅកាន់ប្រទេសទី៣ ដោយកាត់បន្ថយការពឹងផ្អែកប្រទេសជិតខាង”។

ជាមួយគ្នានេះ លោកស្រីGrace Rachny Fongនាយិកាក្រុមហ៊ុនCentury21 Cambodiaបានមានប្រសាសន៍ថា តំបន់ភូមិភាគពាយ័ព្យមានសក្តានុពលខ្ពស់ លើការវិនិ​យោគផ្នែកអចលនទ្រព្យ ដែលបណ្តាខេត្តនានាដូចជាពោធិសាត់ បាត់ដំបង បន្ទាយមានជ័យ ពិសេសក្រុងប៉ោយប៉ែតបាន និងកំពុងមានភាពរីកចម្រើន ប៉ុន្តែពីមុនមិនមានក្រុមហ៊ុនអចលនទ្រព្យអន្តរជាតិអាចទុកចិត្តបាន ដែលធ្វើឲ្យទំនុកចិត្តក្នុងវិស័យនេះនៅមានកម្រិត។

លោកស្រីបន្តថា “ហេតុនេះការមានវត្តមានរបស់Century21 ទៅបើកការិយាល័យនៅតំបន់នេះ នឹងធ្វើឲ្យវិស័យអចលទ្រព្យមានភាពរីកចម្រើនខ្លាំងនាពេលអនាគត”៕

ក្រុមហ៊ុនចិនធំមួយប្រកាសវិនិយោគលើគម្រោងរមណីយដ្ឋានទេសចរណ៍ខ្នាតយក្ស នៅខេត្តកោះកុង

ដោយៈ ប៊ី
កោះកុងៈ

ក្រុមហ៊ុនហ្សេងហេងគ្រុប (ZHENG HENG GROUP) របស់វិនិយោគិនចិនបានប្រកាសថា ខ្លួនបាននិងកំពុងវិនិយោគលើគម្រោង Long Bay ដែលជាគម្រោងរមណីយដ្ឋានទេសចរណ៍វប្បធម៌ខ្នាតធំមានក្រឡាផ្ទៃ និងមានផ្ទៃដីសាងសង់២លានម៉ែត្រការ៉េនៅខេត្តកោះកុង។

លោកឧកញ៉ាតឹង ភីពីង ប្រធានក្រុមហ៊ុនហ្សេងហេងគ្រុបបានឲ្យដឹងថា គម្រោង Long Bay ជាគម្រោងរមណីយដ្ឋាន ទេសចរណ៍វប្បធម៌ខ្នាតធំមានក្រឡាផ្ទៃ និងមានផ្ទៃដីសាងសង់២លានម៉ែត្រការ៉េ។

លោកឧកញ៉ាបានឱ្យដឹងថា “នាពេលអនាគតគម្រោង Long Bayនេះ នឹងបង្កើតបានជាក្រុមសណ្ឋាគារ ដ៏ប្រណីតបំផុតមួយ ដែលរួមបញ្ចូលគ្នាដោយសណ្ឋាគារលំដាប់អន្តរជាតិជាច្រើន នឹងក្លាយទៅជាមជ្ឍមណ្ឌល សម្រាប់លំហែរកាយ វិស្សមកាល ការថែរក្សាសុខភាព និងការកម្សាន្តជាដើមដែលមានទំហំធំ និងមានប្រព័ន្ធគ្រប់គ្រងល្អ ឈានមុខគេបំផុតនៅក្នុងខេត្តកោះកុង ក៏ដូចជាប្រទេសកម្ពុជាបច្ចុប្បន្ន ព្រមទាំងដើរតួនាទីយ៉ាងសំខាន់ ក្នុងការអភិវឌ្ឍវិស័យឧស្សាហកម្មទេសចរណ៍ ក្នុងខេត្តកោះកុង និងប្រទេសកម្ពុជា”។

លោកឧកញ៉ាតឹង ភីពីងបានឲ្យដឹងថា រហូតមកដល់ពេលនេះ គម្រោងLong Bay មាននិយោជិត ក្នុងស្រុកជាង៨០០នាក់ ហើយនាពេលអនាគត ប្រមាណ២ឆ្នាំទៀតតម្រូវការនិយោជិត ក្នុងស្រុកនឹងមានចំនួនកើនដល់រាប់ម៉ឺននាក់។

លោកបានបញ្ជាក់ថា “ខេត្តកោះកុងបានទាក់ទាញខ្លួន តាមរយៈធនធានធម្មជាតិ និងបរិស្ថានដ៏ស្រស់បំព្រងនៅពេលដែលបាន មកទស្សនាខេត្តនេះជាលើកដំបូង”។

ជាមួយគ្នានេះដែរ លោកស្រីមិថុនា ភូថងអភិបាលនៃគណៈអភិបាលខេត្តកោះកុង បានបង្ហាញការគាំទ្រចំពោះការវិនិយោគគម្រោង រមណីយដ្ឋានលំហែកាយខ្នាតធំ (Long Bay) របស់ក្រុមហ៊ុនហ្សេងហេងគ្រុប (ZHENG HENG GROUP) ក្នុងឱកាសជួបសំណេះសំណាល ជាមួយលោកឧកញ៉ា តឹង ភីពីង ប្រធានក្រុមហ៊ុនហ្សេងហេងគ្រុប។

លោកស្រីមិថុនា ភូថងបានបញ្ជាក់ថា “ខ្ញុំ និងអាជ្ញាធរខេត្ត ពិតជាមានការគ្រាំទ្រ និងថ្លែងអំណរគុណ ចំពោះក្រុមហ៊ុនហ្សេងហេងគ្រុប និងលោកឧកញ៉ា តឹង ភីពីង ដែលបានមកវិនិយោគក្នុងខេត្តកោះកុង”។

លោកជំទាវបន្តថា នេះជាការផ្លាស់ប្តូរ និងសមិទ្ធិផលនៃការវិនិយោគធនធានទេសចរណ៍ និងការដោះស្រាយបញ្ហាកង្វះខាតការងារ ក្នុងស្រុកដែលគម្រោង Long Bay បានផ្តល់សម្រាប់ខេត្តកោះកុង ដែលចំណាយតែពីរឆ្នាំប៉ុណ្ណោះ ហើយបានកោតសរសើរ ចំពោះលោកឧកញ៉ា តឹង ភីពីងសម្រាប់ការយល់ឃើញដ៏ឈ្លាសវៃ និងការសំរេចចិត្តដ៏ត្រឹមត្រូវ ក្នុងការវិនិយោគមកលើខេត្តកោះកុង ការវិនិយោគរបស់លោកឧកញ៉ា តឹង ភីពីង ដូចនឹងសុភាសិតចិនមួយឃ្លាថា «ប្រែដុំថ្មទៅជាមាស»។

លោកជំទាវមិថុនា ភូថង បានបន្ថែមនូវការកោតសរសើរ លោកឧកញ៉ា តឹង ភីពីង ដែលមកដល់ប្រទេសកម្ពុជាជិត២០ឆ្នាំកន្លងមក បង្កើតបានសមិទ្ធិផលគួរឲ្យកោតសរសើរ និងអស្ចារ្យយ៉ាងខ្លាំង។ លើសពីនេះទៀតគម្រោង Long Bay នឹងបន្តការគ្រប់គ្រង និងយកចិត្តទុកដាក់យ៉ាងតឹងរឹងលើការបង្ការ និងទប់ស្កាត់ជម្ងឺរាតត្បាត ទោះក្រោយរយៈពេលនៃការឆ្លងរាលដាល។

លោកជំទាវបញ្ជាក់ថា ការខិតខំការពារ និងគ្រប់គ្រងការរាតត្បាតជាសកល របស់រាជរដ្ឋាភិបាលកម្ពុជា នឹងជំរុញឱ្យនិយោជិកយកចិត្តទុកដាក់យ៉ាងខ្លាំង ចំពោះការការពារ និងការត្រួតពិនិត្យលើជំងឺរាតត្បាត ដើម្បីឱ្យកម្ពុជាវិលត្រឡប់មករកភាពប្រក្រតីវិញ ក្នុងពេលឆាប់ៗនេះ។

លោកជំទាវបានជូនដំណឹង ដល់មន្ទីររដ្ឋបាល និងប៉ូលីសរដ្ឋបាលខេត្ត ផ្តល់នូវកិច្ចសហប្រតិបត្តិការ និងការគាំទ្រពេញទំហឹង ដើម្បីឆ្លើយតបនឹងការការពារ និងទប់ស្កាត់ការរាតត្បាតនៃជំងឺកូវីដ១៩ និងសកម្មភាពវិនិយោគប្រចាំថ្ងៃនៃគម្រោង Long Bay៕

អ្នកនាងឆយ ហ្រ្វីដាត្រូវបានតែងតាំងជាទីប្រឹក្សាទទួលបន្ទុកផ្នែកទីផ្សារសំរាប់ គេហទំព័រPropertyarea

ដោយៈគង់ សូរិយា

ភ្នំពេញៈ អ្នកនាងឆយ ហ្រ្វីដានាយិកាក្រុមហ៊ុនអចលនទ្រព្យAngel Realty Co, Ltd ត្រូវបានតែងតាំងជាទីប្រឹក្សាគេហទំព័រPropertyarea.asia ដើម្បីរួមចំណែកជួយផ្សព្វផ្សាយពីកិត្តិនាមគេហទំព័រនេះ ពិសេសជួយលើការងារផ្នែកទីផ្សារឯករាជ្យ។

លោកយិន លាងគង់ស្ថាបនិក និងជាអគ្គនាយកគេហទំព័រPropertyarea.asia និងCambodiafinancialtimes.comលោកយិន លាងគង់បានមានប្រសាសន៍ឲ្យដឹងនាព្រឹកថ្ងៃទី២១ ឧសភានេះថា ក្រុមការងារនៃគេហទំព័រទាំងពីរមានក្តីសោមនស្សរីករាយ ដែលអ្នកនាងឆយ ហ្រ្វីដាបានចែករំលែកនូវពេលវេលាខ្លះៗ ដើម្បីជួយលើការងារផ្សព្វផ្សាយពីកិត្តិនាម ក៏ដូចជាជួយធ្វើទីផ្សារ និងស្វែងរកពាណិជ្ជកម្មសំរាប់គេហទំព័រនេះ។

លោកបន្តថា “អ្នកនាងឆយ ហ្រ្វីដានឹងធ្វើការងារក្នុងនាមជាប្រធានផ្នែកទីផ្សារឯករាជ្យ សំរាប់គេហទំព័រនេះ ហើយយើងនឹងធ្វើការក្នុងនាមជាដៃគូសហការ និងចែកផលលាភចំពោះគ្នាទៅវិញទៅមក អាស្រ័យលើលទ្ឋផលការងារ ដែលអ្នកនាងទទួលបាន”។លោកបន្តថា “អ្នកនាងឆយ ហ្រ្វីដាមានសមត្ថភាពខ្ពស់ ធ្លាប់ទទួលបានការបណ្តុះបណ្តាលផ្នែកអចលនទ្រព្យទាំងក្នុងនិងក្រៅប្រទេស ពិសេសអ្នកនាងមានទំនាក់ទំនងល្អក្នុងសង្គមជំនួញជាច្រើនផងដែរ”។

ជាមួយគ្នានេះ អ្នកនាងឆយ ហ្រ្វីដាបានមានប្រសាសន៍ថា តាមការសង្កេតជាក់ស្តែង និងការធ្វើការងារក្នុងនាមជាភ្នាក់ងារអចលនទ្រព្យ និងការវិនិយោគ អ្នកនាងបានទទួលព៌តមាន និងការកោតសរសើរពីបណ្តាក្នាក់ងារ និងអ្នកវិនិយោគផ្នែកអចលនទ្រព្យនៅរាជធានីភ្នំពេញ និងតាមបណ្តាខេត្ត ចំពោះគេហទំព័រPropertyarea.asia ដែលបានផ្សព្វផ្សាយព៌តមានបានលឿនរហ័ស អាចទុកចិត្តបាន និងឈរលើមូលដ្ឋានក្រមសីលធ៌មវិជ្ជាជីវៈច្បាស់លាស់។

អ្នកនាងបន្តថា “តាមខ្ញុំបានតាមដានគេហទំព័រនេះកន្លងមក ខ្ញុំបានសង្កេតឃើញថា គេហទំព័រនេះផ្តលឥព៌តមានបានលឿន និងឈានមុខគេពីគំរោងអភិវឌ្ឍន៍របស់រដ្ឋាភិបាល វិស័យឯកជនដូចជា គំរោងព្រលានយន្តហោះខេត្តមណ្ឌលគិរី គំរោងសាងសង់ស្ពានតភ្ជាប់កោះពេជ្រ និងកោះនរា គំរោងផ្លូវក្រវ៉ាត់ក្រុងទី៣ និងទី៤ជាដើម”។

អ្នកនាងឆយ ហ្រ្វីដាបានបន្តថា ដោយបានតានដាមព៌តមាន ដែលអាចទុកចិត្តនិងជឿជាក់បានពីគេហទំព័រនេះ និងចងង់រួមចំណែកផ្តល់ព៌តមានល្អៗ ពីការអភិវឌ្ឍនៅកម្ពុជា ខ្ញុំមានក្តីរីករាយក្នុងការរួមចំណែកពេលវេលា តាមការជាក់ស្តែងដើម្បីជួយដល់គេហទំព័រនេះ អាចបន្តបេសកកម្មផ្សព្វផ្សាយព៌តមានល្អៗពីរដ្ឋាភិបាល ពីទិដ្ឋភាពនៃការអភិវឌ្ឍថ្មីៗរបស់កម្ពុជាទៅកាន់ប្រជាពលរដ្ឋកម្ពុជា និងបណ្តាវិនិយោគិនជាតិ និងអន្តរជាតិ៕

អ្នកជំនាញព្យាករណ៍ថា វិស័យអចលនទ្រព្យនឹងមានសន្ទុះទ្វេរដងក្រោយកូវីតបានបញ្ចប់

ដោយៈរតនៈ

ភ្នំពេញៈ ខណៈដែលកូវីត១៩នៅកម្ពុជា ហាក់ថមថយសន្ទុះការឆ្លងហើយនោះ ក្រុមអ្នកជំនាញមើលឃើញថា វិស័យអចលនទ្រព្យនិងប្រសើរឡើងវិញ ពោលគឺប្រសើរឡើងជាងមុនពេលកើតមុនកូវីតទៅទៀត។

មូលហេតុល ដែលអ្នកជំនាញខាងអចលនទ្រព្យ ហ៊ានព្យាករណ៍យ៉ាងដូច្នេះដោយលើកហេតុផលផ្សេងៗគ្នា។

លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ឲ្យដឹង ក្នុងសន្និសីទសារព៌តមានកាលពីថ្ងៃទី២០ ឧសភាកន្លងមកថា នៅចុងឆ្នាំ២០២១ និងដើមឆ្នាំ២០២២ខាងមុខ វិស័យអចលនទ្រព្យនឹងមានសក្ដានុពលឡើងវិញហើយ ព្រោះថាប្រសិនបើជំងឺកូវីត ត្រូវបានគ្រប់គ្រងថ្នាក់ប្រទេស ថ្នាក់តំបន់ និងនៅលើពិភពលោក។

លោកបន្តថា “ចរន្តនៃការធ្វើដំណើររបស់ប្រជាជន គឺមានឡើងវិញ។ ដូច្នេះការរៀបចំក្នុងការធ្វើជំនួញ នឹងត្រូវរៀបចំឡើងវិញ។ ម៉្យាងវិញទៀតលោកលើកឡើងថា លទ្ធភាពនៃការដោះដូរអចលនទ្រព្យ ក៏នឹងកើនឡើងដែលអំណោយផល ដល់វិស័យអចលនទ្រព្យនេះផងដែរ”។

ជាមួយគ្នានេះ លោកលឹម សុជាតិ ប្រធានក្រុមប្រឹក្សាភិបាលសមាគម សមាគមអ្នកវាយតម្លៃ និងភ្នាក់ងារអលនវត្ថុកម្ពុជាបាន្យដឹងផងដែរថា បរិបទកូវីតគឺខុសពីវិបត្តិសេដ្ឋកិច្ច ប៉ុន្តែកូវីតនេះបានអូសបន្លាយយូរ ធ្វើឲ្យវិបត្តិកូវីតនេះ ក្លាយជាវិបត្តសេដ្ឋកិច្ចផងដែរ ។

លោកបន្តថា “មិនថាតែវិស័យសេដ្ឋកិច្ច ឬវិស័យអចលនទ្រព្យនោះទេ អាចជួបវិបត្តិរៀងរាល់១០ឆ្នាំម្ដង ដោយសារបញ្ហាផ្សេងៗ តែទោះជាយ៉ាងណាលោកថា បន្ទាប់ពីបញ្ហានានាបានបញ្ចប់ គឺសន្ទុះនៃវិស័យនីមួយៗ គឺមានការកើនឡើងរហ័សជាងពេលធម្មតា”។លោកបន្តថា “ដូចនេះសម្រាប់វិស័យអចលនទ្រព្យ នឹងកើនឡើងខ្លាំងជាងមុនពេលមានកូវីតផងដែរ”។

លើកឡើងស្រដៀងគ្នានេះ លោកសន សៀប ស្ថាបនិក និងនាយក ក្រុមហ៊ុន ឃីរៀលអេស្ទេត
Founder/Director, Key Real Estate Co., Ltd មើលឃើញថា កំនើនលើវិស័យអចលនទ្រព្យ នឹងកើនឡើងជាងពេលកូវីតផ្ទុះឡើងបន្ទាប់ពីជំងឺនេះបានបញ្ចប់។

លោកអះអាងដូចនេះ ដោយលើកយកហេតុផល២ ទី១ បើទោះជាកំនើនសេដ្ឋកិច្ចមានទាបជាងមុនមានកូវីត ប៉ុន្តែហេដ្ឋារចនាសម្ព័ន្ធនៅកម្ពុជា ត្រូវបានពង្រីកជាបន្តបន្ទាប់ដែលធ្វើឲ្យតម្លៃអចលនទ្រព្យកើនឡើងផងដែរ។ ទី២ ក្នុងអំឡុងកូវីត ក៏នៅមានដែរអ្នកទិញ និងមើលទីតាំងសម្រាប់ទិញអចលនទ្រព្យ ដូចនេះពេលដែលកូវីតហាក់ស្ងប់ស្ងាត់នោះ ការទិញលក់ អចលនទ្រព្យ នឹងមានចរន្តរស់រវើកជាងមុន។

អំឡុងពេលកូវីតផ្ទុះជាសកល វិនិយោគិនផ្នែកអចលនទ្រព្យមួយចំនួន បានផ្អាកដំណើរការសាងសង់ និងទិញ លក់ ដែលវិនិយោគិនទាំងនោះ មានទាំងជាតិ និងអន្តរជាតិ ជាពិសេសនៅតំបន់សំខាន់ នៃប្រទេសកម្ពុជា ដូចជានៅរាជធានីភ្នំពេញ ខេត្តព្រះសីហនុ និងខេត្តសៀមរាបជាដើម៕

គម្រោងបញ្ជូនអគ្គិសនីតង់ស្យុងខ្ពស់២៣០គីឡូវ៉ុលពីក្រចេះទៅខេត្តមណ្ឌលគិរី បានបើកដំណើការ

ដោយៈ ប៊ី
ភ្នំពេញៈ ខ្សែបញ្ជូន២៣០គីឡូវ៉ុល ភ្ជាប់ពីខេត្តក្រចេះមកខេត្តមណ្ឌលគិរី ចម្ងាយ១៣៣គីឡូម៉ែត្រ ព្រមទាំងដាក់ឲ្យដំណើរការ អនុស្ថានីយអគ្គិសនីតង់ស្យុងខ្ពស់២៣០គីឡូវ៉ុល ចំនួន២បានដាក់ឱ្យដំណើរការហើយ។ នេះបើយោងតាមបញ្ជាក់របស់លោកកែវ រតនៈរដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា នៅថ្ងៃទី២០ ខែឧសភានេះ។
អនុស្ថានីយអគ្គិសនីតង់ស្យុងខ្ពស់២៣០គីឡូវ៉ុល ចំនួន២នេះ រួមានអនុស្ថានីយអគ្គិសនីអូរខ្វាវ កំលាំង33MVA ក្នុងឃុំចុងផ្លាស់ ស្រុកកែវសីមា ជាតំបន់អាជីវកម្មរ៉ែមាស និងអនុស្ថានីយអគ្គិសនីមណ្ឌលគិរី កំលាំង 50MVA ក្នុងក្រុងសែនមនោរម្យ។

សមិទ្ធផលដ៏ថ្មីនេះ គឺជាប្រភពផ្គត់ផ្គង់ថ្មី​ ដល់ខេត្តមណ្ឌលគិរីទាំងមូល និងជាពិសេ​សតំបន់ឧស្សាហកម្មរ៉ែមាស ដែលនឹងត្រូវចាប់ផ្តើមដំណើរការ ក្នុងពេលឆាប់ៗខាងមុខនេះ។ កន្លងមកការផ្គត់ផ្គង់ជូនប្រជាពលរដ្ឋ គឺពឹងផ្អែកស្ទើរតែទាំងស្រុង លើការនាំចូលអគ្គិសនីពីប្រទេសវៀតណាម និងពីខេត្តរតនគិរី តាមរយៈខ្សែបណ្តាញតង់ស្យុងមធ្យម ២២ និង៣៥គីឡូវ៉ុល ដែលប្រភពនីមួយៗមានចម្ងាយជាង១០០គីឡូម៉ែត្រ ដែលបង្កឲ្យមានការរអាក់រអួលជារឿយៗ។
លោកកែវ រតនៈបានបញ្ជាក់បន្ថែមថា ខ្សែបញ្ជូនអគ្គិសនី២៣០គីឡូវ៉ុល និងអនុស្ថា​នីយអគ្គិសនីមណ្ឌលគិរីនេះ គឺទទួលបានពីផ្លែផ្កានៃកិច្ចសហប្រតិបត្តិការដ៏ល្អរវាងរដ្ឋាភិបាលកម្ពុជា និងរដ្ឋាភិបាលចិន ដែលបានផ្តល់កម្ចីឥណទានសម្បទានសម្រាប់គម្រោងនេះ។

ជាមួយគ្នានេះដែរ ក៏ជាការខិតខំរបស់រាជរដ្ឋាភិបាល ក្នុងការទាក់ទាញវិនិយោគិនបរទេស មកវិនិយោគឧស្សាហកម្មធន់ធ្ងន់ ដែលក្រុមហ៊ុន Renaissance Minerals (Cambodia) Limited ពីប្រទេសអូស្រ្តាលី បានមកសិក្សាស្រាវជ្រាវ និងសាងសង់រោងចក្រផលិតមាស។

អនុស្ថានីយអគ្គិសនីអូរខ្វាវនេះ ត្រូវបានសាងសង់ដោយប្រើទុនវិនិយោគផ្ទាល់របស់ក្រុមហ៊ុនខាងលើ ដើម្បីផ្គត់ផ្គង់ដល់ឧស្សាហកម្មរបស់គេ និងប្រើប្រាស់ជាប្រភពផ្គត់ផ្គង់អគ្គិសនី ដល់ការសិក្សាស្រាវជ្រាវធនធានរ៉ែផ្សេងៗ នៅតំបន់នេះបន្តទៀត ក៏ដូចជាជួយផ្គត់ផ្គង់ជូនប្រជាពលរដ្ឋ ជាពិសេសជូនបងប្អូនជនជាតិភាគតិចនៅជុំវិញទីនោះ។

អនុស្ថានីយអគ្គិសនីតង់ស្យុងខ្ពស់២៣០គីឡូវ៉ុលនេះ នឹងត្រូវប្រគល់ជូនជាអំណោ​យមកជូនរាជរដ្ឋាភិបាលកម្ពុជា ដែលមានអគ្គិសនីកម្ពុជាជាអ្នកគ្រប់គ្រងដំណើរការ។

លោកកែវ រតនៈបានបន្តថា ចាប់ពីពេលនេះ តទៅខេត្តមណ្ឌលគិរី នឹងទទួលបាននូវការផ្គត់ផ្គង់គ្រប់គ្រាន់ល្អប្រសើរច្រើនជាងមុន ដែលនឹងជួយទាក់ទាញអ្នកវិនិយោគទាំងផ្នែកកសិកម្ម ឧស្សាហកម្ម និងទេសចរណ៍ ដែលជាខេត្តមានសក្តានុពលធនធានធម្មជាតិដ៏ច្រើនសម្បូរបែប។

លោកបានបន្ថែមទៀតថា “នេះជាសមិទ្ធផលថ្មីមួយទៀត ក្រោមការចង្អុលទិសនិងគាំទ្ររបស់សម្តេចតេជោ ហ៊ុន សែន នាយករដ្ឋមន្ត្រី ដែលធ្វើឲ្យខេត្តមណ្ឌលគិរី កែប្រែនូវមុខមាត់ឲ្យកាន់តែរីកចម្រើនថែមទៀត ដើម្បីជួយបង្កើនចំណូលដលប្រជាពលរដ្ឋ និងជម្រុញកំណើនសេដ្ឋកិច្ចជាតិ”៕

អនុប្រធានGRA បង្ហាញពីហានិភ័យរបស់គំរោងខុនដូមួយចំនួននិងទង្វើខុសវិជ្ជាជីវះរបស់ ក្រុមហ៊ុនអចលនទ្រព្យ

ដោយៈគង់ សូរិយា
ភ្នំពេញៈ នៅក្នុងវិស័យអចលនទ្រព្យ បញ្ហានិងហានិភ័យបានកើតមានជាហូរហែរ ប្រសិនជាយើងខ្វះចំណេះដឹងក្នុងផ្នែកនេះ ហេតុនេះការសិក្សាឲ្យបានច្បាស់លាស់ពីហានិភ័យ និងចំណុចជាច្រើនទៀតមានសារៈសំខាន់ណាស់។
អនុប្រធានសមាគមអចលនទ្រព្យសកល (GRA)ប្រចាំរាជធានីភ្នំពេញ លោកឡោ វិចិត្របានសរសេរ លើបណ្តាញទំនាក់ទំនងសង្គមរបស់ខ្លួនថា បងប្អូនជនរួមជាទីគោរពនិងជាទីស្នេហា ថ្ងៃនេះខ្ញុំសូមចែករំលែក និងដាស់តឿន ចំពោះប្រធានក្រុមហ៊ុនអចលនទ្រព្យទាំងឡាយ ដែលយកគំរោងខុនដូរមកលក់ ដោយមិនបានផ្ទៀងផ្ទាត់ឯកសារផ្លូវច្បាប់និងរដ្ឋបាលត្រឹមត្រូវ។

លោកបន្តថា “តើខុនដូ ពិតជាមានហានិភ័យមែនទេ? វាជាសំណួរដែលប្អូនៗភ្នាក់ងារអចលនទ្រព្យតែងតែសួរមកខ្ញុំ? ហើយហេតុអ្វីបានជាការវិនិយោគ លើខុនដូសហកម្មសិទ្ធ មានហានិភិយខ្ពស់ជាងដីនិងផ្ទះជាប់ដីឫផ្ទះអាជីវកម្ម”។

ការវិនិយោគទៅលើខុនដូមានហានិភ័យខ្ពស់ ឫទាបអាស្រ័យលើកត្តាសំខាន់បីយ៉ាងដូចតទៅ។
១ ទីតាំងគំរោង
២ ភាពស្របច្បាប់នៃគំរោង
៣ ប្រភពទុននិងចំនួនទុនពិតប្រាកដ ដែលម្ចាស់គំរោងបានត្រៀមទុកសំរាប់សាងសង់
ចម្លើយសំរាប់កត្តាសំខាន់ ខាងលើទាំងបីមានដូចតទៅ ទី១ ទីតាំងនៃគំរោងសំដៅទៅលើគំរោងណា ដែលជាប់ទន្លេរ ឫសមុទ្រ ដែលតម្រូវអោយម្ចាស់គំរោងទាំងអស់ត្រូវសិក្សា ពីលទ្ធភាពសំរាប់សាងសង់គំរោង(Land Feasibility Study) ជាប់ទន្លេជាមួយក្រុមហ៊ុន ដែលមានបទពិសោទន៍ និងឯកទេសទៅលើការសាងសង់ អគារខ្ពស់ជាប់ទន្លេឫសមុទ្រថា តើគំរោងគាត់ត្រូវថយចូលប៉ុន្មានម៉ែត្រពីទន្លេ ឫសមុទ្រ។

តាមបទដ្ឋានបច្ចេកទេស តើអាងសាង់សង់កម្ពស់ប៉ុន្មានម៉ែត្រ ប៉ុន្មានជាន់ និងការយកសំណាកដីជាប់ទន្លេឫសមុទ្រទៅឡាបូ (Laboratory) ដើម្បីធ្វើការពិសោធន៍ថាតើដីប្រភេទជាប់ទន្លេរ នឹងអាចបុកគ្រឹះចុះទៅក្រោមដីយ៉ាងជ្រៅបំផុតត្រឹមប៉ុន្មានម៉ែត?។

ទី២ ភាពស្របច្បាប់នៃគំរោង សំដៅទៅលើថាតើដី របស់គំរោងជាដីដែលទិញស្របច្បាប់ហើយ បានកាត់ឈ្មោះមកក្រុមហ៊ុនម្ចាស់គំរោងឫនៅ? តើគំរោងមានច្បាប់អនុញ្ញាតសាងសង់ចេញ ពីក្រសួងរៀបចំដែនដី នគររូបនីយកម្មនិងសំណង់ឫនៅ? តើគំរោងមានលិខិតបើកការដ្ឋានឫនៅ? តើគំរោងមានអាជ្ញាប័ណ្ណលក់ ចេញដោយក្រសួងសេដ្ឋកិច្ចនិងហិរញវត្ថុឫនៅ?។

ទី៣ ប្រភពទុនជាកត្តាសំខាន់ខ្លាំងណាស់ ព្រោះម្ចាស់គំរោងទាំងអស់ត្រូវបង្ហាញថាទុនរបស់លោក មានប្រភពពីខាងណា បើប្រភពទុនមិនច្បាស់លាស់ ព្រោះអាចជាលុយខ្មៅដែលគេយកមកលាងនៅស្រុកយើង។

លោកឡោ វិចិត្របានបន្តថា ដោយឡែកចំនួនទុនពិតប្រាកដ ដែលម្ចាស់គំរោងបានត្រៀមទុកសំរាប់សាងសង់គំរោង រឹតតែសំខាន់និងចាំបាច់ជាងប្រភពទុនទៀត ព្រោះបើម្ចាស់គំរោងមានលទ្ធភាពត្រឹមទិញដី តែនៅខ្វះទុនសំរាប់សាងសង់នោះ អត្រាគំរោងគាំង ឫស្អុយមានខ្ពស់ណាស់ ប្រសិនបើក្នុងករណីគំរោងលក់មិនដាច់៕

ដើម្បីបង្កើនឱកាសវិនិយោគសម្រាប់វិនិយោគិននៅកម្ពុជា ក្រុមហ៊ុនGCCគ្រុបបានបង្ហើបអំពីគម្រោងផ្សារបោះដុំនិងលក់រាយថ្មីមួយក្នុងស្រុកបន្ថែមទៀត

ដោយៈ មុនី
ភ្នំពេញៈ រាជរដ្ឋាភិបាលកម្ពុជាបានខិតខំប្រឹងប្រែង អភិឌ្ឍន៍ហេដ្ឋារចនាសម្ព័ន្ធទីក្រុងភ្នំពេញ ដើម្បីទាក់ទាញការវិនិយោគពីបរទេសផ្ទាល់ឲ្យកាន់តែច្រើន ក៏ដូចជាគាំទ្រដល់ការរីកចម្រើននៃនគរូបនីយកម្មផងដែរ។

អាកាសយានដ្ឋានអន្តរជាតិភ្នំពេញ និងផ្លូវល្បឿនលឿន ភ្នំពេញ-ព្រះសីហនុ គឺជាផ្នែកមួយនៃកិច្ចខិតខំប្រឹងប្រែងរបស់រាជរដ្ឋាភិបាល ដើម្បីធ្វើឱ្យហេដ្ឋារចនាសម្ព័ន្ធទីក្រុងកាន់តែប្រសើរឡើង។

ដោយមានការលើកទឹកចិត្តពីរដ្ឋាភិបាល វិស័យទីផ្សារអចលនទ្រព្យ បានពង្រីកវិសាលភាពជាច្រើនប្រភេទ។ យើងទទួលស្គាល់ថាអចលនទ្រព្យ ដីធ្លី និងផ្ទះ គឺជាប្រភេទនៃការវិនិយោគ ដែលមានសុវត្ថិភាពខ្ពស់បំផុតសម្រាប់មនុស្សជាច្រើន។

យ៉ាងណាមិញ អចលនទ្រព្យសម្រាប់ធ្វើពាណិជ្ជកម្ម មានការអភិវឌ្ឍន៍ជាខ្លាំងដោយមានការចូលរួមពីក្រុមហ៊ុនអន្តរជាតិជាច្រើន ហើយនឹងក្លាយទៅជាចំណែកមួយបន្ថែមទៀត ដែលនឹងទទួលបានប្រាក់ចំណេញខ្ពស់ ក្នុងការវិនិយោគ នៅក្នុងទីក្រុងភ្នំពេញ និងតាមបណ្ដារខេត្តផ្សេងៗទៀត។

យើងអាចឃើញថាមានការអភិវឌ្ឍ អាគារពាណិជ្ជកម្ម ផ្សារទំនើប និងកន្លែងលក់ទំនិញ កាន់តែច្រើនឡើងៗ។ ផ្សារទំនើបដែលគួរអោយកត់សម្គាល់ នាពេលថ្មីៗនេះ មានដូចជា ផ្សារជីប ម៉ុងណូរ៉ូ ម៉ល ដែលមានទីតាំងស្ថិតនៅតាមបណ្តោយមហាវិថីព្រះនរោត្តម
ជីបម៉ុងសេនធើ បាក់ទូកស្ថិតនៅជាប់វិទ្យាល័យបាក់ទូក និងផ្សារទំនើបNew City Walk ដែលស្ថិតនៅក្នុងសង្កាត់ជ្រោយចង្វារ។

ក្នុងពេលបច្ចុប្បន្ននេះ ផ្សារពាណិជ្ជកម្មចំនួន២ ដែលកំពុងទទួលបានការចាប់អារម្មណ៍យ៉ាងខ្លាំងពីវិនិយោគិន គឺការផ្សារទំនើបអ៊ីអនម៉ល៣ និងផ្សារជីស៊ីអូរឫស្សី ដែលផ្សារទាំង២ត្រូវបានរំពឹងទុកថានឹងបញ្ចប់ការសាងសង់នៅក្នុងឆ្នាំ២០២៤ ។

នាព្រឹកថ្ងៃទី ២១ ខែ ឧសភា ២០២១នេះ ក្រុមហ៊ុនវិនិយោគ អចលនទ្រព្យធំមួយ
ដែលជាម្ចាស់គម្រោងខុនដូរ៣៣ជាន់ CEO Wyndham Residence ដែលនៅមុខវិទ្យាល័យបាក់ទូក និងជាម្ចាស់គម្រោងបុរីណាឌី ដោយជីស៊ី ស៊ីធី នៅសង្កាត់បាក់ខែង ខណ្ឌជ្រោយចង្វារ បានបង្ហើបពីគម្រោងថ្មីមួយ គឺជាផ្សារបោះដុំនិងលក់រាយក្នុងស្រុក នៅតាមបណ្តោយផ្លូវសហព័ន្ធរុស្ស៊ី។

លោកបានលើកឡើងថា “ផ្សារជីស៊ី អូរឫស្សី គឺជាឱកាសមាសមួយសម្រាប់វិនិយោគិនឈានចូលក្នុងវិស័យទីផ្សារអចលនទ្រព្យ បែបពាណិជ្ជកម្មក្នុងរាជធានីភ្នំពេញ”។ លោកបន្តថា “គម្រោងផ្សារជីស៊ី អូរឫស្សី នឹងធ្វើភាវូបនីយកម្ម ផ្សារក្នុងស្រុកបែបប្រពៃណីឲ្យកាន់តែរីកចម្រើន សម្រាប់ម្ចាស់អាជីវកម្ម ដើម្បីអាចធ្វើពាណិជ្ជកម្មតាមប្រព័ន្ធអេឡិចត្រូនិច (E-commerce)នាយុគសម័យដ៏ទំនើបនេះ”។

ផ្សារជីស៊ីអូរឫស្សីនឹងបន្តនូវគោលដៅ របស់ផ្សារនៅក្នុងស្រុករបស់កម្ពុជា ដោយធ្វើការលាយបញ្ចូលគ្នា នូវស្ថាបត្យកម្មបែបប្រពៃណី ព្រមជាមួយនឹងការប្រើប្រាស់នូវលំ
ហូរខ្យល់ និងម្លប់ធម្មជាតិ។ ផ្សារជីស៊ី អូរឫស្សីមិនមែនមានរចនាបទមួយប៉ុណ្ណោះទេ ប៉ុន្តែបានលាយបញ្ចូលគ្នា រវាងកម្ចីពីប្រវត្តិសាស្ត្រ និងទីក្រុងទំនើប បង្កើតបានជា ការរចនាបែបប្រពៃណី ដែលពោរពេញទៅដោយភាពច្នៃប្រឌិត ទៅតាមរចនាបទទីក្រុង ហៅថា ស្ថាបត្យកម្មទំនើបបម្លែងពីស្ថាបត្យកម្មខ្មែរបុរាណ។

គម្រោងផ្សារជីស៊ីអូរឫស្សី នឹងបើកដំណើរការនៅក្នុងឆ្នាំ២០២៤ ហើយនឹងក្លាយទៅជាកន្លែងទាក់ទាញបំផុត សម្រាប់ប្រជាជនក្នុងស្រុក និងភ្ញៀវទេសចរណ៍ផងដែរ ព្រោះជាតំណាងឱ្យប្រវត្តិសាស្រ្ត និងអត្តសញ្ញាណរបស់ខ្មែរយើង។ យើងផ្សារភ្ជាប់រវាងអតីតកាល បច្ចុប្បន្នកាល និងអនាគយើងដឹងច្បាស់ថាបេតិកភណ្ឌវប្បធម៌ គឺមានសារៈសំខាន់លើសពីអចលនទ្រព្យទៅទៀត រួមជាមួយនឹងគុណតម្លៃ និងចំណេះដឹង ប្រពៃណី និងទំនៀមទម្លាប់ ជំនាញ និងទ្រព្យសម្បត្តិសម្រាប់បន្តទៅកាន់កូនចៅរាប់ជំនាន់៕

សម្តេចតេជោៈ បើចិនមិនជួយកម្ពុជា នោះប្រជាពលរដ្ឋកម្ពុជាគ្មានផ្លូវធ្វើដំណើរ និងស្ពានឆ្លងកាត់ទន្លេរនោះឡើយ

ដោយៈ ប៊ី
ភ្នំពេញៈ ប្រទេសចិន និងកម្ពុជាបានក្លាយមហាមិត្តដែកថែប និងមានទំនាក់ទំនងការទូតយ៉ាងប្រសើររវាងប្រទេស ហើយមហាយក្សចិន បាននិងកំពុងជួយកម្ពុជា ក្នុងការប្រយុទ្ធប្រឆាំងនឹងវិបត្តិជំងឺកូវីដ១៩ ដែលបង្កទៅជាវិបត្តិសេដ្ឋកិច្ចសកល និងថែមទាំងផ្តល់ជំនួយអភិវឌ្ឍន៍ផ្សេងៗជាច្រើន ដើម្បីលើកកម្ពស់ដល់សេដ្ឋកិច្ចកម្ពុជា។

អ្នកសម្របសម្រួលបានចោទសំណួរទៅសម្តេចតេជោ ហ៊ុន សែន នាយរដ្ឋមន្ត្រីនៃកម្ពុជាថា កម្ពុជាមានលំអៀងឬពឹងពាក់ខ្លាំងទៅលើចិន ក្នុងសន្និសីទអន្តរជាតិស្តីពី “អនា​គតរបស់អាស៊ី” ដែលរៀបចំឡើងដោយក្រុមហ៊ុននីកេ (Nikkei) របស់ជប៉ុន តាមរយៈប្រព័ន្ធវីដេអូ។

សម្តេចតេជោចោទសួរត្រឡប់ទៅវិញថា “បើខ្ញុំមិនពឹងចិន តើឱ្យខ្ញុំពឹងនរណា? ទុក​ឱ្យប្រជាជនកម្ពុជាឆ្លងទន្លេ ឆ្លងព្រែកដោយជិះទូកដរ ដោយឆ្លងស្ពានឫស្សី ឬឈើប្រកបដោយគ្រោះថ្នាក់ ដោយគ្មានផ្លូវដើរ ឬយ៉ាងណា?”។សម្តេចតេជោ ហ៊ុន សែន បានលើកឡើងថា “បើចិនមិនជួយកម្ពុជា នោះប្រជាពលរដ្ឋកម្ពុជា គ្មានផ្លូវធ្វើដំណើរ និងស្ពានឆ្លងកាត់ទន្លេនោះឡើយ”។

សម្តេចតេជោ បានសង្កត់បន្ថែមថា ក្នុងនោះសូម្បីតែវ៉ាក់សាំងសម្រាប់ចាក់ប្រជាពលរដ្ឋកម្ពុជានេះ ក៏ជាការជួយរបស់ចិននោះដែរ ខណៈដែលទេសដទៃមិនមានអ្នកហារមាត់ផ្តល់វ៉ាក់សាំងនោះឡើយ។

សម្តេចតេជោ បានគូសបញ្ជាក់បែបនេះ “សូម្បីតែវ៉ាក់សាំងដែលខ្ញុំរកមកចាក់ជូនប្រជាពលរដ្ឋជាង២លាននាក់ បើគ្មានជំនួយពីចិន និងការផ្គត់ផ្គង់ពីចិនដោយការលក់ យើងខ្ញុំ ក៏គ្មានវ៉ាក់សាំងសម្រាប់ចាក់ជូនប្រជាជនកម្ពុជា។ ក្រៅពីខូវ៉ាក់ ដែលបានផ្តល់ជាង៣០ម៉ឺនដូស តើមានប្រទេសណាមួយបានហារមាត់បញ្ជូន ឬបញ្ជូនមកដល់កម្ពុជាហើយឬនៅនូវវ៉ាក់សាំងសម្រាប់ការចាក់?”។

សម្តេចតេជោនាយករដ្ឋមន្ត្រី បានគូសបញ្ជាក់ដែរថា ប្រទេសកម្ពុជាមិនដែលបដិ​សេធនោះឡើយ សម្រាប់ជំនួយ ការវិនិយោគ និងការធ្វើពាណិជ្ជកម្មពីបណ្តាប្រទេសដទៃ។ ជាមួយគ្នានេះ សម្តេចបានលើកករណីប្រទេសជប៉ុន ដែលបានជួយកម្ពុជាច្រើនជាងនៅទសវត្សរ៍ឆ្នាំ៩០ ហើយបន្តជួយមកដល់ពេលបច្ចុប្បន្ននេះ។

សម្តេចតេជោ គូសបញ្ជាក់យ៉ាងដូច្នេះ “យើងខ្ញុំមិនបានបិទទ្វារសម្រាប់នរណាទាំងអស់ ទៅលើការទទួលយកជំនួយសម្រាប់កសាងប្រទេសកម្ពុជា ដូចជាជប៉ុនកំពុងកសាងផ្លូវជាតិលេខ៥ ដ៏ល្អ តភ្ជាប់ពីខេត្តកណ្តាល ទៅកាន់ព្រំដែនកម្ពុជា-ថៃ ដែលកំពុងធ្វើការសាងសង់ បន្ទាប់ពីការកសាងផ្លូវជាតិលេខ១ និងផ្លូវជាច្រើនខ្សែទៀត”។

សម្តេចតេជោ ហ៊ុន សែន បានស្នើឱ្យបណ្តាប្រទេសនានា គួរពិនិត្យឡើងវិញ លើគោលនយោបាយការបរទេសរបស់កម្ពុជា ហើយគេគួរមានឥរិយាបថយ៉ាងណាចំពោះកម្ពុជា ទើបកម្ពុជាទទួលយក៕

ទីភ្នាក់ងារដាក់កម្រិតគុណភាពឥណទានអាមេរិក Moody’s កោតសរសើរកម្ពុជា ថាឆ្លើយតបវិបត្តិកូវីដ-១៩ បានល្អ

សុខុម
ភ្នំពេញ: ទីភ្នាក់ងារវាយតម្លៃឥណទានអាមេរិក Moody’s Investors Service ឬហៅកាត់ថា Moody’s លើកឡើងថា ប្រទេសកម្ពុជា បានឆ្លើយតបប្រកបដោយប្រសិទ្ធភាពខ្ពស់ទៅនឹងវិបត្តិឆ្លងរាតត្បាតវីរុសកូវីដ-១៩ ហើយរំពឹងថានឹងមានគោលនយោបាយគាំទ្របន្ថែមទៀតក្រោយព្រឹត្តិការណ៍សហគមន៍ ២០ កុម្ភៈ បញ្ចប់។ នេះបើយោងតាមកាសែត Khmer Times ចុះផ្សាយនៅថ្ងៃទី២១ ឧសភា នេះ។

តាមរយៈរបាយការណ៍វិភាគឥណទានប្រចាំឆ្នាំដែលបានចេញផ្សាយកាលពីថ្ងៃពុធ ទី១៩ ឧសភា ទីភ្នាក់ងារនេះនិយាយថា “ការគ្រប់គ្រងរបស់រដ្ឋាភិបាលកម្ពុជា លើស្ថានការណ៍វិបត្តិកូវីដ-១៩ មានប្រសិទ្ធភាពខ្ពស់នៅក្នុង២០២០ កន្លងទៅ”។

របាយការណ៍ដដែលបន្ថែមទៀតថា “ដើម្បីទ្រទ្រង់ដល់សេដ្ឋកិច្ច រដ្ឋាភិបាលកម្ពុជា បានប្រើប្រាស់ធនធានដែលខ្លួនមាននៅក្នុងវិធានការធំៗដើម្បីស្ដារសេដ្ឋកិច្ច”។

ទន្ទឹមនឹងនេះ “ធនាគារជាតិនៃកម្ពុជា (NBC) បានធ្វើការរួមគ្នាជាមួយវិស័យហិរញ្ញវត្ថុក្នុងប្រទេសដើម្បីជួយសម្រាលបន្ទុករបស់អ្នកជាប់បំណុលដែលងាយរងគ្រោះ”។ វិធានការហិរញ្ញវត្ថុរបស់ធនាគារជាតិនៃកម្ពុជា គឺផ្ដោតសំខាន់លើការរៀបចំឥណទានឡើងវិញ ហើយវិធានការទាំងនោះរួមទាំងការបញ្ចុះអត្រាការប្រាក់ផងដែរ។

ទីភ្នាក់ងារវាយតម្លៃឥណទាន Moody’s បានធ្វើការកត់សម្គាល់ថា ធនាគារជាតិនៃកម្ពុជា បានចេញសេចក្ដីណែនាំឱ្យធនាគារ និងគ្រឹះស្ថានមីក្រូហិរញ្ញវត្ថុនានារៀបចំឥណទានឡើងវិញសម្រាប់អ្នកខ្ចីប្រាក់នៅក្នុងវិស័យដែលរងផលប៉ះពាល់ខ្លាំងជាងគេដូចជា វិស័យទេសចរណ៍ វិស័យសម្លៀកបំពាក់ វិស័យសំណង់ និងវិស័យដឹកជញ្ជូនរហូតដល់ពាក់កណ្តាលឆ្នាំ២០២១ ក្នុងន័យជួយសម្រាលការលំបាករបស់ពួកគាត់។

ទន្ទឹមនេះ វិធានការសារពើពន្ធរបស់រដ្ឋាភិបាលក៏បានរួមបញ្ចូលទាំងការលើកកម្ពស់សុខភាពសាធារណៈ និងការកាត់បន្ថយផលប៉ះពាល់ដែលបង្កឡើងដោយសារវិបត្តិឆ្លងរាតត្បាតវីរុសកូវីដ-១៩ តាមរយៈការបើកប្រាក់ឧបត្ថម្ភជូនពលរដ្ឋក្រីក្រងាយរងគ្រោះ រួមទាំងការចែកអំណោយគ្រឿងឧបភោគបរិភោគផងដែរ។

ទីភ្នាក់ងារនេះបានទទួលស្គាល់ថា បំណុលរបស់កម្ពុជា នឹងកើនឡើង ប៉ុន្តែថា វាស្ថិតនៅកម្រិត “មធ្យម” នៅឡើយបើធៀបទៅនឹងបណ្ដាប្រទេសជិតខាង។ រដ្ឋាភិបាលកម្ពុជា បានព្យាករថា បន្ទុកបំណុលរបស់ខ្លួននឹងកើនឡើងពី៣៦,៦%ក្នុងឆ្នាំ២០២០ដល់៣៨,៧%ក្នុងឆ្នាំ២០២៥។

របាយការណ៍វិភាគឥណទានប្រចាំឆ្នាំដែលបានដាក់កម្រិតគុណភាពឥណទាននៅប្រទេសកម្ពុជា ថា “មានស្ថិរភាព” នេះត្រូវបានចងក្រងដោយអ្នកវិភាគជាន់ខ្ពស់៣រូបនៅប្រទេសសិង្ហបុរី និង២រូបនៅទីក្រុងឡុងដ៍ ប្រទេសអង់គ្លេស៕

កំពង់ស្ពឺនឹងក្លាយជាតំបន់ឧស្សាហកម្មដ៏ទាក់ទាញ នៅពេលអនាគតដ៏ខ្លី

ភ្នំពេញ ៖ ការអភិវឌ្ឍទៅកាន់តំបន់ប៉ែកខាងលិចនៃរាជធានីភ្នំពេញ បាននិងកំពុងបង្ហាញសក្ដានុពលកាន់តែខ្លាំងនិងទាក់ទាញដល់ការវិនិយោគរបសវិនិយោគិនក្នុងនិងក្រៅប្រទេស ក្នុងនោះខេត្តកំពង់ស្ពឺគឺជាខេត្តមួយដែលមានការទាញសម្រាប់ឧស្សាហកម្មហើយវាត្រូវបានព្យាករថានឹងក្លាយជាតំបន់ឧស្សាហកម្មដ៏ទាក់ទាញ ក្នុងពេលឆាប់ៗខាងមុខនេះ ។

លោកសន សៀប អគ្គនាយកក្រុមហ៊ុនអចលនទ្រព្យឃីរៀលអ៊ីស្ទេតបានឱ្យដឹងផងដែរថា ក្រៅពីរាជធានីភ្នំពេញ បច្ចុប្បន្ននេះ មានខេត្តមួយចំនួនកំពុងតែទាក់ទាញនូវការវិនិយោគពីសំណាក់វិនិយោគិនក្នុងនិងក្រៅប្រទេស ក្នុងនោះខេត្តកំពង់ស្ពឺក៏ឃើញថាមានការទាក់ទាញវិនិយោគិនសម្រាប់អភិវឌ្ឍជាតំបន់ឧស្សាហកម្មមួយសំខាន់ផងដែរ ។

លោកថា៖«កំពង់ស្ពឺជាទីតាំងដែលមានសក្ដានុពលសម្រាប់ឧស្សាហកម្ម ក្នុងនោះតំបន់តាមបណ្ដោយផ្លូវ៥១ក៏កំពុងតែសស្រាក់សស្រាំក្នុងការអភិវឌ្ឍដោយឃើញមានដីបម្រុងប្រមាណ៥០០ហិចតារបស់ក្រុមហ៊ុន OCIC ដើម្បីអភិវឌ្ឍន៍ជារោងចក្រឧស្សាហកម្ម »។

លោកបន្តថា ក្រៅពីនេះ ក៏មានការអភិវឌ្ឍនៅ តំបន់ផ្លូវ៤១ ក្នុងស្រុកគងពិសី ដោយមានការវិនិយោគពីវិនិយោគិនសិង្ហបុរី ព្រមទាំងតំបន់ផ្សេងៗនៃខេត្តកំពង់ស្ពឺក៏មានការទាក់ទាញខ្លាំងផងដែរ ។

លោកស្រីសុខ ស្រីអូន អគ្គនាយិកាក្រុមហ៊ុនTLLបានមានប្រសាសន៍កន្លងមកថា នៅតំបន់ផ្លូវ ៥១ នៃខេត្តកំពង់ស្ពឺ គឺជាតំបន់ដែលទាក់ទាញបំផុតសម្រាប់អភិវឌ្ឍន៍ជាតំបន់ឧស្សាហកម្ម ហើយក្នុងនោះដែរ គេឃើញថាក្រុមហ៊ុនធំៗជាច្រើនបាននិងកំពុងរកទីតាំងថ្មីនៃឧស្សាហកម្មពីកណ្ដាលក្រុងមកកាន់តំបន់ផ្លូវ៥១ ។

ក្នុងនោះក៏មានវិនិយោគិនក្នុងស្រុកជាច្រើក៏បានត្រៀមទីតាំងរបស់ខ្លួនរួចហើយក្នុងការអភិវឌ្ឍឧស្សាហកម្មនៅក្នុងតំបន់នោះ
លោកស្រីបន្តថាកត្តាដែលជំរុញឱ្យក្រុមហ៊ុនលោកស្រីនិងវិនិយោគិនដទៃទៀតចូលមកាន់តំបន់ផ្លូវ៥១នៃខេត្តកំពង់ស្ពឺដើម្បីអភិវឌ្ឍន៍នេះ ព្រោះហេដ្ឋារចនាសម្ព័ន្ធតភ្ជាប់ពីតំបន់នេះទៅកាន់តំបន់ផ្សេងទៀតមានភាពងាយស្រួលដូចជាទៅកាន់ព្រំដែនកម្ពុជាថៃ ខេត្តបន្ទាយមានជ័យ ទៅកាន់កំពង់ផែទឹកជ្រៅខេត្តព្រះសីហនុ និងតំបន់ផ្សេងៗទៀតក្នុងប្រទេសកម្ពុជាបានកាន់តែងាយស្រួល ។

លោកស្រីរំពឹងថានៅពេលតំបន់នេះ ក្លាយជាតំបន់ឧស្សាហកម្ម តម្រូវការលំនៅឋានសម្រាប់អ្នកមកបំពេញការងារនៅក្នុងតំបន់នេះនឹងមានកាន់តែច្រើន ជាពិសេសលំនៅឋានតម្លៃសមរម្យសម្រាប់បងប្អូនកម្មករ កម្មការិនីនិងអាជីវករមកពីតំបន់ផ្សេងៗទៀត៕