ចំណេះដឹង! តើអ្វីជាមូលនិធិពាណិជ្ជកម្ម ?

ដោយ ៖ រ៉ាណេត

ភ្នំពេញ ៖ មូលនិធិពាណិជ្ជកម្ម គឺជាសញ្ញាណគតិយុត្តមួយ នៃការប្រកបពាណិជ្ជកម្ម ដោយសារតែវាជាផ្នែកមួយនៃបេតិកភណ្ឌ ឬស្ថិនៅក្នុងបញ្ជីសារពើភណ្ឌរបស់សហគ្រាស ពាណិជ្ជកម្ម ដែលជាហេតុនាំឱ្យមូលនីធិពាណិជ្ជកម្ម ក្លាយទៅជាកម្មវត្ថុនៅក្នុងការសិក្សានៃវិជ្ជាជីវៈពាណិជ្ជកម្ម។

មូលនិធិពាណិជ្ជកម្ម ត្រូវបានកើតចេញពីពួកពាណិជ្ជករ នៅសតវត្សរ៍ទី១៩ ដែលកាលពីមុនមកគេ បានហៅថាជាហាងទំនិញ ឬមូលនីធិហាងទំនិញ។ មូលនិធិនេះ មានតម្លៃសេដ្ឋកិច្ច និងទ្រព្យកម្មសិទ្ធិជាពិសេស ចាប់តាំងពីសតវត្សទី១៩មកម្ល៉េះ ពីព្រោះ បច្ចុប្បន្នសញ្ញាណនេះ មានធាតុជាចម្បង គឺអតិថិជនសម្រាប់អ្នកបង្កើត ទំនងជាមិនយកលំនាំតាមវិជ្ជាជីវៈមុខរបរនោះទេ ព្រោះដោយហេតុថា មូលនីធិពាណិជ្ជកម្ម ត្រូវបានផ្សំឡើងពីបណ្តាធាតុផ្សេងៗមានចលនវត្ថុ និងអចលនវត្ថុ ដែលពាណិជ្ជករ ក្រុមឧស្សាហករ បានរៀបចំឡើងដើម្បីស្វែងរកអតិថិជន។

តើសញ្ញាណរបស់មូលនិធិពាណិជ្ជកម្មមានអ្វីខ្លះ និងប្រតិបត្តិការគតិយុត្តរបស់មូលនីធិនោះធ្វើឡើងយ៉ាងដូចម្ត៉េច?

សញ្ញាណនៃមូលនីធិពាណិជ្ជកម្ម គឺជាសំណុំនៃរូបទ្រព្យ ឬអរូបទ្រព្យដែលពាណិជ្ជករម្នាក់ ឬក្រុមហ៊ុនមួយប្រមូលផ្តុំ និងប្រើប្រាស់ដើម្បីសម្មតិកម្ម នូវសកម្មភាពឧស្សាហកម្ម ឬពាណិជ្ជករ ដើម្បីបំពេញនូវសេចក្តីត្រូវការរបស់អតិថិជនមួយ ក្នុងមូលនីធិពាណិជ្ជកម្ម។ ដោយគ្មាននិយមន័យ ដែលកំណត់ដោយច្បាប់មូលនិធិពាណិជ្ជកម្ម ត្រូវបានកំនត់ដោយ សមាសភាពរបស់ខ្លួន ដែលក្នុងនោះមាន អតិថិតាចម្បង ដូច្នេះមូលនីធិពាណិជ្ជកម្ម ត្រូវបានបង្កើតឡើងដោយចលនទ្រព្យ ដែលពាណិជ្ជករម្នាក់ ឬឧស្សាហករណាម្នាក់រៀបចំឡើង ដើម្បីស្វែរកអតិថិតា។

ក្នុងនោះគេឃើញមានវិបាកមួយចំនួន បានលេចឡើង រួមមាន មូលនីធិពាណិជ្ជកម្មត្រូវជាប់ទាក់ទង និងសកម្មភាពពាណិជ្ជកម្ម ដើម្បីអនុវត្តនៅ សកម្មភាពពាណិជ្ជកម្មមួយបានចាំបាច់ត្រូវមានមូលនីធិពាណិជ្ជកម្មមួយ ហើយសញ្ញាណនេះត្រូវតែខុសប្លែកគ្នា ពីសញ្ញាណសហគ្រាស និងសញ្ញាណរបស់ក្រុមហ៊ុន។

ដោយឡែក សហគ្រាសគឺជាស្ថាប័នស្វយ័តមួយ ដែលប្រមូលផ្តុំដោយកត្តាមនុស្ស និងកត្តាសេដ្ឋកិច្ចដើម្បី ផលិតទ្រព្យ និងសេវាកម្ម។ ដូច្នេះសញ្ញាណនៃសហគ្រាសនេះមានលក្ខណៈទូលំទូលាយជាង សញ្ញាណនៃមូលនីធិពាណិជ្ជកម្ម។ ពាណិជ្ជករដែលដឹកនាំសហគ្រាសឯកបុគ្គល មួយអាចប្រើប្រាស់ បុគ្គលិកបាន ហើយជាញឹកញាប់មានមូលនីធិពាណិជ្ជកម្មតែមួយគត់ និងសហគ្រាសធំៗ អាចមានមូលនីធិពាណិជ្ជកម្មច្រើនខុសៗពីគ្នា។ ចំណែកឯក្រុមហ៊ុនបុគ្គលភាពគតិយុត្ត មានបេតិកភណ្ឌ នាមករណ៍ ទីស្នាក់ការក្រុមហ៊ុន សញ្ជាតិ ដូច្នេះក្រុមហ៊ុនគឺជាប្រធាននៃសិទ្ធិ និងកាតព្វកិច្ច៕

ក្រុមហ៊ុនលំដាប់យក្សHuawei នៅតែទទួលបានប្រាក់ចំណេញ ទោះបីរងទណ្ឌកម្មពីសហរដ្ឋអាមេរិក

ដោយៈ សុខុម

សៀងហៃៈ ប្រធានផ្លាស់វេននៃក្រុមហ៊ុន Huawei បានបញ្ជាក់កាលពីថ្ងៃអង្គារ ទី២២ ខែកុម្ភៈកន្លងមកថា ក្រុមហ៊ុននេះនៅតែទទួលបានកំណើនប្រាក់ចំណេញ ក្នុងឆ្នាំ២០២០ ស្របតាមការរំពឹងទុករបស់ខ្លួន ថ្វីបើទទួលរងទណ្ឌកម្មជាបន្តបន្ទាប់ពីសំណាក់ រដ្ឋាភិបាលក្រុងវ៉ាស៊ីនតោនយ៉ាងណាក្ដី។ នេះបើយោងតាមទីភ្នាក់ងារព័ត៌មាន Reuters ចុះផ្សាយកាលពីថ្ងៃទី២៣ ខែកុម្ភៈ ឆ្នាំ២០២១។

ក្រុមហ៊ុនបច្ចេកវិទ្យារបស់មហាយក្សចិនមួយនេះ ត្រូវបានអតីតប្រធានាធិបតីសហរដ្ឋអាមេរិកលោកដូណាល់ ត្រាំ ចុះក្នុងបញ្ជីខ្មៅក្នុងឆ្នាំ២០១៩ ហើយត្រូវបានហាមឃាត់ដាច់ខាត មិនឱ្យទទួលបានបច្ចេកវិទ្យាសំខាន់ៗ របស់សហរដ្ឋអាមេរិកឡើយ ជាហេតុធ្វើឱ្យប៉ះពាល់ពាល់យ៉ាងខ្លាំង ដល់សមត្ថភាពរបស់ក្រុមហ៊ុននេះ ក្នុងការឌីហ្សាញបន្ទះឈីបផ្ទាល់ខ្លួន និងពិបាកទទួលបានការផ្គត់ផ្គង់គ្រឿងបង្គុំ។

មូលហេតុដែលសហរដ្ឋអាមេរិក ដាក់បម្រាមបែបនេះ ដោយសាររកឃើញថា ក្រុមហ៊ុនមួយនេះ បានលួចយកព័ត៌មានសម្ងាត់ពាណិជ្ជកម្ម និងយោធារបស់ខ្លួន ជាអ្វីដែលក្រុមហ៊ុននេះបានច្រានចោលទាំងស្រុង។

ក្នុងពិព័រណ៍ពិភពទូរស័ព្ទក្រុងសៀងហៃ Mobile World Congress Shanghai លោក Ken Hu ជាប្រធានផ្លាស់វេនបានលើកឡើងថា “ក្រុមហ៊ុន Huawei បានប្រឈមការលំបាកខ្លាំងកាលពីឆ្នាំមុន។ ប៉ុន្តែពេលនេះ ប្រតិបត្តិការមានស្ថិរភាពវិញហើយ ស្របតាមគោលការណ៍ណែនាំរបស់យើង ដោយទទួលបានកំណើនប្រាក់ចំណូល និងប្រាក់ចំណេញតិចតួច”។

កាលពីដើមខែនេះ លោក Ren Zhengfei ដែលជាស្ថាបនិក និងជានាយកប្រតិបត្តិក្រុមហ៊ុននេះបានថ្លែងថា លោកសង្ឃឹមថា រដ្ឋការរបស់លោកចូ បៃឌិន នឹង “រក្សាគោលនយោបាយបើកចំហ” ចំពោះបណ្ដាក្រុមហ៊ុនអាមេរិក ដែលធ្វើរកស៊ីជាមួយក្រុមហ៊ុនHuawei។

មន្ត្រីមួយរូបមកពីក្រសួងព័ត៌មាន និងបច្ចេកវិទ្យាព័ត៌មានរបស់ចិន បានបង្ហើបឱ្យដឹងកាលពីថ្ងៃអង្គារ ទី២២ កុម្ភៈ ថា រហូតមកទល់ពេលនេះ មហាយក្សចិនបានបោះទុនរហូតដល់ទៅជាង២៦០ពាន់លានយ័ន (៤០,២៧ ពាន់លានដុល្លារអាមេរិក) នៅក្នុងការសាងសង់ប្រព័ន្ធបណ្ដាញ5G៕

អ្នកទិញផ្ទះក្នុងបុរីត្រូវសិក្សាចំណុចទាំងនេះ ដើម្បីកុំឲ្យប្រឈមនឹងបញ្ហា និងការលក់ផ្ទះមិនចេញ

ដោយ:គង់ សូរិយា

ភ្នំពេញៈ អ្នកទិញលំនៅដ្ឋានក្នុងបុរីមួយចំនួន បាននិងកំពុងប្រឈមមុខនឹងបញ្ហាជាច្រើន ទាក់ទងប័ណ្ណកម្មសិទ្ឋគ្រប់គ្រងអចលនទ្រព្យរបស់ខ្លួន ដែលពួកគេប្រឈមបញ្ហានឹងការលក់ផ្ទះមិនចេញ ឬមានបញ្ហាក្នុងការផ្ទេរលំនៅដ្ឋានរបស់ខ្លួន ទៅអ្នកដទៃទៀតពេលត្រូវការលក់ឬដូរលំនៅដ្ឋានរបស់ខ្លួន។

អ្នកជំនាញផ្នែកសេដ្ឋកិច្ច និងអចលនទ្រព្យលោកង៉ែត ជូបានថ្លែងឲ្យដឹងកាលពីពេលថ្មីៗនេះថា អ្នកទិញលំនៅដ្ឋានក្នុងបុរី ឬសំណង់ផ្ទះល្វែង គួរសាកសួរម្ចាស់បុរីទាក់ទងនឹងប្លង់លំនៅដ្ឋានដែលខ្លួនបានទិញ ថាជាប្លង់រ៉ឹងឬជាប្លង់ទន់ ព្រោះបើប្លង់រ៉ឹងអ្នរោះបើប្លង់រ៉ឹងទាមទារថាជាប្លង់រ៉ឹងឬជាប្លង់ទន់បានថ្លែងឲ្យដឹងកាលពីម្សិលម៉ិញនេះថា អ្នកទិញលំនៅដ្ឋានក្នុងបុរីគួរសាកសួរម្ចាស់បុរីទាកទិញត្រូវទាមទារការកាត់ប្លង់ផ្លូវការ និងធ្វើឡើងតាមនិតិវិធីច្បាប់ ហើយការបង់ថ្លៃសេវាកម្មនៃការរត់ប្លង់កម្មសិទ្ឋ អាស្រ័យលើការចចារវាងភាគីអ្នកលក់ និងអ្នកទិញ។

លោកបន្តថា មានករណីខ្លះម្ចាស់គ្រប់គ្រងបុរី ឬអ្នកសាងសង់ផ្ទះល្វែងលក់ មានប្លង់មេរបស់ខ្លួន និងមិនបានផ្ទេរកម្មសិទ្ឋរបស់ខ្លួន ដល់អ្នកទិញលំនៅដ្ឋានរបស់ខ្លួននោះទេ គឺធ្វើប្លង់ជូនអ្នកទិញត្រឹមអាជ្ញាធរមូលដ្ឋានខ័ណ្ឌ ឬស្រុកប៉ុណ្ណោះ។

នៅពេលមានបញ្ហាគំរោងបែបនេះ អ្នកទិញលំនៅដ្ឋានមិនអាចលក់ផ្ទះរបស់ខ្លួនបានទេ គឺត្រូវតម្រូវឲ្យម្ចាស់ឬអ្នកអភិវឌ្ឍន៍មកកាត់ប្លង់ជូន ដែលត្រូវបង់ពន្ឋជូនខាងពន្ឋដា ហើយមានម្ចាស់បុរីខ្លះខិលខូច មិនព្រមកាត់ប្លង់ជូនអ្នកទិញឡើយ ដោយទាមទារឲ្យអ្នកទិញឬម្ចាស់ផ្ទះថ្មីបង់លុយមួយចំនួនដល់ខ្លួន ទើបព្រមផ្ទេរកម្មសិទ្ឋជូនម្ចាស់លំនៅដ្ឋានដែលបានទិញផ្ទះពីគំរោងរបស់ខ្លួន។

លោកង៉ែត ជូបានបន្តថា ហេតុនេះអ្នកទិញលំនៅដ្ឋានក្នុងបុរី ឬសំណង់ផ្ទះល្វែង គួរតែរួបរួមគ្នាដើម្បីមានសម្លេងរ៉ឹងមាំ ដែលអាចធ្វើការតវ៉ាជាមួយម្ចាស់បុរី ឬសំណង់លំនៅដ្ឋានដែលខ្លួនបានទិញ ដើម្បីទទួលបានប្លង់កម្មសិទ្ឋស្របច្បាប់ជាប័ណ្ណកម្មសិទ្ឋ ដែលទទួលស្គាល់ដោយមន្ទីររៀបចំដែនដី នគរូបនីយកម្ម និងសំណង់តាមរាជធានី ខេត្តដែលខ្លួនរស់នៅ។

លោកបន្តថា បច្ចុប្បន្នមានម្ចាស់លំនៅដ្ឋានមួយចំនួន មិនអាចលក់ផ្ទះឬផ្ទេរកម្មសិទ្ឋបាន ដោយសារបញ្ហាខាងលើនេះ ហើយក្នុងករណីចង់ផ្ទេរឬលក់ទៅម្ចាស់ថ្មីត្រូវទាក់ទងជាមួយម្ចាស់បុរី និងធ្វើការជាមួយអាជ្ញាធរ ដែលមាននិតិវិធីស្មុគ្រស្មាញនិងត្រូវបង់ពន្ឋជូនអគ្គនាយកដ្ឋានពន្ឋដាជាច្រើនដង និងត្រូវចំណាយអស់ប្រាក់ច្រើនដែលជារឿងមិនគួរឲ្យកើតមាននោះទេ៕

វិបត្តិកូវីដ១៩ តម្លៃដីអាចនៅទ្រឹង ប្រើវិធីសាស្រ្តនេះដើម្បីទិញដីបានល្អ និងចំណេញ

ដោយ:គង់ សូរិយា

ភ្នំពេញៈ វិបត្តិជំងឺកូវីដ១៩ កំពុងធ្វើឲ្យមានការបារម្ភ តម្លៃដីធ្លីក៏នៅទ្រឹង ការទិញលក់ស្ងប់ស្ងាត់ ហេតុនេះ ការជ្រើសរើសវិនិយោគដីធ្លី ដែលមានវិធីសាស្រ្តត្រឹមត្រូវ នឹងធ្វើឲ្យយើងទិញដីបានល្អ តម្លៃល្អ និងអាចមានផលចំណេញលឿន ពិសេសអាចបញ្ចៀសហានិភ័យបាន។

អ្នកជំនាញអន្តរជាតិបានលើកជារូបមន្តមួយចំនួន ដើម្បីធ្វើឲ្យការវិនិយោគដីធ្លីទទួលបានផលចំណេញ ដោយក្បួនមួយចំនួនដូចជា ៖

សិក្សាលើសក្តានុពលទីតាំង

នៅពេលនិយាយពីអចលនទ្រព្យ គឺនិយាយពីទីតាំង ទីតាំង និងទីតាំង ព្រោះទីតាំងមានសារៈសំខាន់ណាស់ សំរាប់កំណត់ភាពជោគជ័យរបស់គម្រោងណាមួយ ព្រោះតម្លៃអចលទ្រព្យពិសេសដីធ្លី ដែលមានតម្លៃឡើងថ្លៃលឿន។ ទីតាំងដែលគួរវិនិយោគគួរធ្វើនៅតំបន់ ដែលស្ថិតក្នុងផែនការអភិវឌ្ឍន៍របស់រដ្ឋាភិបាល តំបន់ព្រំដែន តំបន់ជាយក្រុង តំបន់ដែលមានការសាងសង់ហេដ្ឋារចនាសម្ព័ន្ឋរបស់រដ្ឋាភិបាលជាដើម។

ប័ណ្ណកម្មសិទ្ឋ

ប័ណ្ណកម្មសិទ្ឋច្បាស់លាស់នៅកម្ពុជា ហាក់ដូចជាមានបញ្ហាស្មុគ្រស្មាញមួយ ដោយសារមន្រ្តីមូលដ្ឋាន និងមានសមត្ថកិច្ចបានលួចេញប្លង់ត្រួតលើគ្នា ដើម្បីផលប្រយោជន៍ទោះបីពួកគេដឹងថាខុសច្បាប់ក៏ដោយ។ ហេតុនេះ ការសិក្សាលំអិតម្តងហើយម្តងទៀត ពីប័ណ្ណកម្មសិទ្ឋដីធ្លីឬអចលនទ្រព្យ វានឹងអាចបញ្ចៀសហានិភ័យ ដែលធ្វើឲ្យការវិនិយោគរបស់លោក អ្នកមានសុវត្ថិភាព និងមានឳកាសចំណេញខ្ពស់។

ប្រើរូបមន្តពិសេស

តាមធម្មតាដីតែងមានការដាក់លក់ច្រើន ហេតុនេះមុនសម្រេចជ្រើសរើសយកទីតាំងណាមួយ អ្នកវិនិយោគអន្តរជាតិបានផ្តល់ជាយោបល់ថា គួរជ្រើសរើសដី៥០ទៅ១០០ទីតាំង ហើយជ្រើសរើសយក១០ក្បាលដីឬទីតាំង ដើម្បីយកមកវិភាគពីតម្លៃ ពីសក្តានុពលទីតាំង ដើម្បីប្រាកដថាដីដែលខ្លួនបានជ្រើសរើសពិតជាល្អ។

បន្ទាប់មកគេជ្រើសរើសយកដី៣ទៅ៤ទីតាំង ដើម្បីសម្រេចចិត្តចុងក្រោយថាគួរជ្រើសរើសដីណាមួយ ដែលមានសក្តានុពល ដែលអ្នកវិនិយោគអាចដឹងថា ដីដែលខ្លួនបានជ្រើសរើសពិតជាល្អ មានទីតាំងល្អ មានប័ណ្ណកម្មសិទ្ឋត្រឹមត្រូវ និងមានឳកាសចំណេញខ្ពស់៕

វិនិយោគដីនៅរមណីយដ្ឋានកំពតឋានសួគ៌ទទួលបានការផ្តល់ជូនផ្ទះលំហែរ

ដោយ:គង់ សូរិយា

កំពតៈ គំរោងកំពតឋានសួគ៌ ដែលបាននិងកំពុងអភិវឌ្ឍន៍កែច្នៃរមណីយដ្ឋាន និងផ្ទះលំហែរ កំពុងទាក់ទាញអ្នកទៅទស្សនាកាន់់តែច្រើន ពិសេសអ្នកវិនិយោគទិញដីក្នុងគំរោងនេះ នឹងទទួលបានផលចំណេញ និងផ្តល់ជូនយ៉ាងពិសេស។

ជាមួយនឹងការផ្តល់ជូនពិសេសនេះ ម្ចាស់គំរោងកំពតឋានសួគ៌ឧកញ៉ានួន អកបានមានប្រសាសន៍ថា ឱកាសពិសេសផ្តល់ជូនតែ១០ផ្ទះប៉ុណ្ណោះ សម្រាប់ខែថ្មីនេះ ដោយអតិថិជនទិញដីក្នុងគំរោងនេះ ដែលមានទំហំចាប់ពី- 5×15, 5×17, 5×20, 10×15 នឹងទទួលបានផ្ទះលំហែរចំនួន១ ដោយផ្ទះនិមួយៗមានទំហំ3×6 មានបន្ទប់គេង បន្ទប់ទឹក ផ្ទះបាយ។

សម្រាប់ដីចាប់ពីតម្លៃចាប់ពីជាង១២,០០០ដុល្លារឡើងទៅ នឹងទទួលបានកញ្ចប់ពិសេសដទៃទៀត។ គំរោងនេះ មានផ្ទះលំហែផ្ទាល់ខ្លួននៅតំបន់ទេសចរណ៍ តំបន់សមុទ្របងប្អូនចំណេញច្រើនណាស់ ដូចជា ឱកាសដីឡើងថ្លៃ មានកន្លែងស្នាក់នៅពេលមកកំសាន្តនៅសមុទ្រ អាចជួលបានចន្លោះ១៥ទៅ៤៥ដុល្លារក្នុងមួយយប់។

អតិថិជនចាប់អារម្មណ៍សូមទំនាក់ទំនងលេខទូរស័ព្ទ 098742792៕

ក្រៀមក្រំៈចំនួនទីតាំងពាក់ព័ន្ធជំងឺកូវីដបានកើនឡើងដល់៤៧កន្លែងហើយ

ដោយ:គង់ សូរិយា

ភ្នំពេញៈ ចំនួនទីតាំងពាក់ព័ន្ឋនឹងជំងឺកូវីដ១៩ បានកើនឡើងដល់៤៧ទីតាំងហើយ ខណៈចំនួនអ្នកឆ្លងជំងឺនេះកំពុងកើនឡើងផងដែរ ហេតុនេះសូមប្រជាពលរដ្ឋស្តាប់ការអំពាវនាវរបស់សម្តេចតេជោ កុំចាកចេញពីផ្ទះបើសិនមិនចាំបាច់ អ្នកនៅតាមបណ្តាខេត្តកុំចូលមករាជធានីភ្នំពេញ បើសិនជាមិនចាំបាច់។

យោងតាមការប្រកាសព៌តមានរបស់ក្រសួងសុខាភិបាលបានឲ្យដឹងថា គិតត្រឹមរសៀលថ្ងៃទី២៣ ខែកុម្ភៈ ឆ្នាំ២០២១នេះ ទីតាំងដែលមានការពាក់ព័ន្ធនឹងព្រឹត្តិការណ៍ «សហគមន៍២០កុម្ភៈ» រហូតដល់៤៧ទីតាំងហើយ ក្នុងនោះទីតាំងមួយចំនួនត្រូវបានបិទជាបណ្ដោះអាសន្ន ហើយបញ្ជូនមនុស្សទាំងអស់នោះ ទៅពិនិត្យសំណាក និងធ្វើចត្តាឡីស័ករយៈពេល១៤ថ្ងៃ តាមការកំណត់របស់ក្រសួងសុខាភិបាល។ (សូមពិនិត្យបញ្ជីឈ្មោះទីតាំងនៅខាងក្រោម)។

ក្រសួងសុខាភិបាល បានអំពាវនាវ និងក្រើនរំលឹកសាជាថ្មីម្ដងទៀត សូមបងប្អូនប្រជាពលរដ្ឋទាំង អស់នៅទូទាំងប្រទេស និងជាពិសេសអ្នករស់នៅក្នុងរាជធានីភ្នំពេញ និងខេត្តកណ្ដាល ត្រូវប្រកាន់យកនូវការប្រុង ប្រយ័ត្នខ្លួនជាប់ជានិច្ច គ្រប់គ្រងក្រុមគ្រួសារឲ្យបានល្អ និងចូលរួមអនុវត្តវិធានការការពារខ្លួនឲ្យបានខ្ជាប់ខ្លួនគ្រប់ៗគ្នា។

ក្រសួងសុខាភិបាលបន្តថា តាមការរុករកស្រាវជ្រាវបានបង្ហាញថា ស្ថានភាពនៃការចម្លងក្នុងសហគមន៍នាពេលនេះ មានលក្ខណៈធំជាង និងសាំញ៉ាំជាងព្រឹត្តិការណ៍សហគមន៍ ២៨វិច្ឆិកា ហើយវិធានការ និងអន្តរាគមន៍នានា បានដាក់ចេញជាបណ្ដើររៗ គឺអាស្រ័យទៅតាមស្ថានភាព នៃការរកឃើញវត្តមានវីរុសកូវីដ-១៩ នៅតាមទីតាំងនីមួយៗ (Localized interventions) ដើម្បីទប់ស្កាត់ការចម្លងបន្តនូវវីរុសកូវីដ-១៩ នៅក្នុងសហគមន៍ទ្រង់ទ្រាយធំធេង។

ជាមួយគ្នានេះ ក្រសួងសុខាភិបាល សូមធ្វើការអំពាវនាវដល់បងប្អូនប្រជា ពលរដ្ឋទាំងអស់ សហការសាមគ្គីភាពគ្នា ជួយគ្នាទៅវិញទៅមក ចូលរួមអនុវត្តន៍ដោយម៉ឺងម៉ាត់នូវការដាក់ ចេញនូវវិធានការសុខាភិបាល។

គិតត្រឹមម៉ោង៧៖០០នាទីព្រឹកថ្ងៃទី២៣ ខែកុម្ភៈ ឆ្នាំ២០២១នេះ កម្ពុជារកឃើញអ្នកឆ្លងកូវីដ១៩ ថ្មីចំនួន៥៩៣នាក់ ក្នុងនោះអ្នកជាសះស្បើយចំនួន៤៧៥នាក់ និងអ្នកជំងឺចំនួន ១១៦នាក់កំពុងសម្រាកនៅមន្ទីរពេទ្យ ក្នុងនោះឆ្លងក្នុងសហគមន៍២០កុម្ភៈ កើនឡើង៩៩ករណី៕

វត្តមានសំណង់អាគារពាណិជ្ជកម្ម និងអាជីវកម្មធំៗជាច្រើនកំពុងលើកមុខមាត់ច្រកព្រំដែនជ្រៃធំខេត្តកណ្តាល

ដោយៈ រ៉ាណេត

កណ្តាលៈ ជាមួយនឹងគម្រោងអភិវឌ្ឍន៍ ទៅលើហេដ្ឋារចនាសម្ព័ន្ធសំខាន់ៗរួមមានដូចជាផ្លូវថ្នល់ និងស្ពាន ដើម្បីសម្រួលដល់ចរាចរណ៍ និងការដឹកជញ្ជូនបម្រើដល់វិស័យពាណិជ្ជកម្ម បច្ចុប្បន្នច្រកព្រំដែនជ្រៃធំកំពុងតែបង្ហាញ ពីវឌ្ឍនភាពរបស់ខ្លួនជាមួយនឹងវត្តមានសំណង់អាគារពាណិជ្ជកម្ម មណ្ឌលកម្សាន្ត និងសំណង់ផ្សេងទៀតបម្រើដល់វិស័យទេសចរណ៍ជាច្រើន។

ប្រធានក្រុមប្រឹក្សាខេត្តកណ្តាល លោកម៉ៅ ភិរុណ បានមានប្រសាសន៍កាលពីពេលថ្មីៗនេះ បច្ចុប្បន្នវិស័យសេដ្ឋកិច្ចនៅទូទាំងខេត្តកណ្តាល នៅតែរក្សាបាននូវស្ថានភាពល្អប្រសើរ។ ដោយឡែកនៅតាមតំបន់ច្រកព្រំដែនសំខាន់ៗ ក៏អាចរក្សាបានសុខសុវត្ថិភាពយ៉ាងមានប្រសិទ្ធភាព។

លោកបន្តថា “សម្រាប់ច្រកព្រំដែនជ្រៃធំ ដែលស្ថិតនៅក្នុងស្រុកកោះធំ ខេត្តកណ្តាល យើងសង្កេតថាក្រៅពីអាចរក្សាបាននូវសុខសុវត្ថិភាព ពីការឆ្លងរាលដាលនៃជំងឺកូវីដ១៩ សម្រាប់វិស័យពាណិជ្ជកម្មក្នុងតំបន់ ដូចជាការដឹកជញ្ជូនក៏នៅតែមានសកម្មភាពរស់រវើកដដែល”។ លោកបន្តថា “នៅច្រកមួយនេះ រដ្ឋាភិបាលបានយកចិត្តទុកដាក់ក្នុងការអភិវឌ្ឍ ដែលធ្វើយ៉ាងណាអាចបង្កភាពងាយស្រួល ដល់ការរស់នៅរបស់ប្រជាពលរដ្ឋ ជួយសម្រួលដល់ការចរាចរណ៍ ដឹកជញ្ជូន និងការធ្វើពាណិជ្ជកម្មរវាងប្រទេសកម្ពុជា-វៀតណាមឱ្យកាន់តែប្រសើរថែមមួយកម្រិតទៀត”។

ពាក់ព័ន្ធទៅនឹងវឌ្ឍនភាពនៃវិស័យសំណង់ នៅច្រកព្រំដែនជ្រៃធំវិញ អាគារធំៗដែលទទួលបានការអនុញ្ញាត ពីសំណាក់ក្រសួងរៀបចំដែនដី នគរូបនីយកម្ម និងសំណង់កាលពីពេលកន្លងទៅមានជាង៥០គម្រោង ដែលក្នុងនោះរួមមាន ដូចជា គម្រោងសាងសង់អគារមជ្ឈមណ្ឌលកម្សាន្ត កាស៊ីណូចំនួន៦ទីតាំង អគារសណ្ឋាគារចំនួន២ គម្រោងផ្សារទំនើបចំនួន១ អគារផ្ទះសំណាក់ចំនួន៤៥ទីតាំង រួមជាមួយអគារសំណង់ផ្សេងៗមួយចំនួន។

លោកនៃ ចារី អភិបាលរងខេត្តកណ្តាល មានប្រសាសន៍នៅក្នុងសិក្ខាសាលាស្ដីពីការផ្សព្វផ្សាយប្លង់គោលប្រើប្រាស់ដី ទីប្រជុំជនជ្រៃធំ ឃុំសំពៅពូន ស្រុកកោះធំ សម្រាប់ការអភិវឌ្ឍ និងការអភិរក្សប្រកបដោយចីរភាព កាលពីពេលកន្លងទៅនៅសាលាខេត្តកណ្តាលថា តំបន់ព្រំដែនជ្រៃធំ និងផ្លាស់ប្ដូរមុខមាត់ថ្មី ប្រែក្លាយជាបេះដូងរបស់ខេត្តកណ្ដាល និងមានការរីកចម្រើនពិតប្រាកដនាពេលអនាគត បន្ទាប់ពីអនុវត្តត្រឹមត្រូវទៅតាមប្លង់គោល។

លោកបានបញ្ជាក់ថា “ទៅថ្ងៃអនាគតតំបន់ជ្រៃធំ និងក្លាយជាទីប្រជុំជន ដែលមានលក្ខណៈស្តង់ដារតាមរយៈការកំណត់តំបន់ប្រើប្រាស់ដីសមស្រប ដូចជា តំបន់លំនៅឋាន កសិកម្ម ឧស្សាហកម្ម ពាណិជ្ជកម្ម ទេសចរណ៍ រដ្ឋបាល និងគម្រោងហេដ្ឋារចនាសម្ព័ន្ធនានាបានយ៉ាងល្អប្រសើរ ដែលធ្វើឲ្យតំបន់ព្រំដែនជ្រៃធំ ផ្លាស់ប្ដូរមុខមាត់ថ្មី ក្លាយជាបេះដូងរបស់ខេត្តកណ្ដាល និងមានការរីកចម្រើនពិតប្រាកដនាពេលអនាគត”។

នាយិកាក្រុមហ៊ុនអចលនទ្រព្យ KAT Appraisal លោកស្រី ចេវ សុឃុន ធ្លាប់បានប្រាប់តាមរយៈទូរស័ព្ទកាលពីពេលកន្លងទៅនេះថា ទីផ្សារអចលនទ្រព្យនៅតំបន់ជ្រៃធំ ជាពិសេសនៅជិតច្រកព្រំដែន កាលពីមិនទាន់ផ្ទុះជំងឺកូវីដ តម្លៃដី និងអចលនទ្រព្យនានាមានការកើនឡើង ប៉ុន្តែចាប់តាំងមានវិបត្តិជំងឺកូវីដ ទីផ្សារទិញលក់បានជួបសភាពស្ងប់ស្ងាត់ទៅវិញ។

លោកស្រីបន្តថា “ទីផ្សារអចលនទ្រព្យនៅតំបន់ច្រកព្រំដែនជ្រៃធំ អាចមានសកម្មភាពឡើងទាល់តែវិបត្តិកូវីដ ត្រូវបានកាត់បន្ថយដែលធ្វើឱ្យសកម្មភាព ធ្វើពាណិជ្ជកម្មនៅតំបន់នេះមានភាពមមាញឹកឡើងវិញ ព្រោះនៅពេលដែលសកម្មភាពពាណិជ្ជកម្ម មានភាពមមាញឹក តម្រូវការប្រើប្រាស់ដីធ្លីអាចនឹងកើនឡើង ហើយតម្លៃដីធ្លីក៏មានកំណើនផងដែរ”៕

ខេត្តមណ្ឌលគិរីរៀបចំផែនការអភិវឌ្ឍសេដ្ឋកិច្ចបែបបៃតងក្នុងផែនការរៀបចំដែនដីរយៈពេល២០ឆ្នាំ

ដោយៈ ប៊ី

មណ្ឌលគិរីៈ ក្រុមប្រឹក្សាខេត្តកាលពីថ្មីៗនេះ បានឯកភាពទទួលយកផែនការរៀបចំដែនដីខេត្តមណ្ឌលគិរី ហើយនេះជាកំណត់សំគាល់ប្រវត្តិសាស្រ្តមួយ ដែលខេត្តមណ្ឌលគិរី មានផែនការរៀបចំដែនដីរបស់ខ្លួនជាលើកដំបូង។ នេះបើតាមសេចក្តីប្រកាសព័ត៌មានរបស់អង្គការ WWF កម្ពុជា ដែលគេហទំព័រ Propertyarea.asia ទទួលបាននៅថ្ងៃទី២៣ ខែកុម្ភៈ ឆ្នាំ០២១។

ផែនការរៀបចំដែនដីខេត្តមណ្ឌលគិរីបែបនេះ ត្រូវបានធ្វើឡើងក្នុងកិច្ចប្រជុំ ដែលមានវត្តមានចូលរួមពីតំណាងមកពីក្រសួងរៀបចំដែនដី នគរូបនីយកម្ម និងសំណង់ សមាជិកក្រុមប្រឹក្សាខេត្តមណ្ឌលគិរី ទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិ(USAID) អង្គការ WWFកម្ពុជា និងក្រុមអ្នកជំនាញបច្ចេកទេស កសាងផែនការរៀបចំដែនដីផងដែរ។

លោកបណ្ឌិតម៉េង ប៊ុណ្ណារិទ្ធអគ្គនាយករងនៃអគ្គនាយកដ្ឋានរៀបចំដែនដី នគរូបនីយកម្ម និងជាអគ្គលេខាធិការរង នៃគណៈកម្មាធិការរៀបចំដែនដី និងនគរូបនីយកម្មថ្នាក់ជាតិបានមានប្រសាសន៍ថា ផែនការរៀបចំដែនដីនេះ គឺជាមូលដ្ឋានគ្រឹះសម្រាប់ខេត្តមណ្ឌលគិរី ដែលមិនត្រឹមតែឆ្លើយតបទៅនឹងតម្រូវការ របស់ប្រជាពលរដ្ឋ និងការអភិវឌ្ឍនៅក្នុងយុគសម័យ នៃភាវូបនីយកម្មថ្នាក់តំបន់ និងសកលភាវូបនីយកម្មប៉ុណ្ណោះទេ ប៉ុន្តែវាផ្តល់ឲ្យនូវទិសដៅជាយុទ្ធសាស្ត្រ ដើម្បីកំណត់ទម្រង់នៃការអភិវឌ្ឍដែនដីខេត្ត ក្នុងរយៈពេល២០ឆ្នាំខាងមុខ។

លោកបណ្ឌិតបន្ថែមថា“ដូចបានធ្វើសេចក្តីសន្និដ្ឋានរួម នៅក្នុងសិក្ខាសាលាពិគ្រោះយល់ចុងក្រោយកាលពីម្សិលមិញ ខ្ញុំទទួលស្គាល់ថាផែនការរៀបចំដែនដី បានគិតគូរពិចារណារាល់កង្វល់របស់ភាគីពាក់ព័ន្ធទាំងអស់ នៅក្នុងដំណើរការកសាងផែនការ ដូច្នេះហើយភាពសម្បូរបែបនៃសម្បត្តិធម្មជាតិ និងវប្បធម៌មូលដ្ឋាន គឺជាចំណុចកណ្តាលនៃផែនការនេះ”។ លោកបន្តថា “ខ្ញុំសង្ឃឹមថា រដ្ឋបាលខេត្តនិងរដ្ឋបាលចំណុះខេត្ត នឹងប្រើផែនការរៀបចំដែនដីនេះជាឧបករណ៍នាំផ្លូវ សម្រាប់ដំណើរការអភិវឌ្ឍនាពេលអនាគតរបស់ខេត្ត”។

ផែនការរៀបចំដែនដី គឺជាឯកសារយុទ្ធសាស្ត្រគោលនយោបាយសំខាន់មួយ ដែលផ្តល់នូវចក្ខុវិស័យ និងគោលដៅអភិវឌ្ឍរយៈពេលវែង សម្រាប់រយៈពេល២០ឆ្នាំខាងមុខ (២០២១-២០៤០) ក៍ដូចជាផ្តល់ទិសដៅជាក់លាក់ សម្រាប់ការអភិវឌ្ឍដែនដីខេត្ត ដើម្បីធានាឲ្យបាននូវការអភិវឌ្ឍ ប្រកបដោយនិរន្តភាព ដែលផ្សារភ្ជាប់នឹងការអភិរក្ស។ ផែនការរៀបចំដែនដី ត្រូវបានបង្កើតឡើង ដើម្បីឆ្លើយតបទៅនឹងតម្រូវការកើនឡើងរបស់សហគមន៍មូលដ្ឋាន បញ្ហាប្រឈមនៃការអភិវឌ្ឍ និងការប្រែប្រួលនៃប្រព័ន្ធបរិស្ថាន វប្បធម៌ និងសេដ្ឋកិច្ចសង្គមនៅក្នុងខេត្ត។

ជាមួយគ្នានេះ លោកស្វាយ សំអ៊ាងអភិបាលខេត្តមណ្ឌលគិរី និងជាប្រធានគណៈកម្មាធិការរៀបចំដែនដី និងនគរូបនីយកម្មខេត្ត មានប្រសាសន៍បន្ថែមថា “ផែនការរៀបចំដែនដីខេត្តមណ្ឌលគិរី មានទិសដៅផ្តល់ឥទ្ធិពល លើការសម្រេចចិត្តនិងកសាងភាពជាម្ចាស់រួមគ្នា លើការអភិវឌ្ឍប្រកបដោយតុល្យភាព រវាងការគ្រប់គ្រងធនធានធម្មជាតិប្រកបដោយនិរន្តភាព ការអភិវឌ្ឍសេដ្ឋកិច្ច និងការទទួលបាននូវសេវាសាធារណៈប្រកបដោយសមធម៌”។

លោកស្រី ហាញ ង្វៀន(Hanh Nguyen) នាយកបេសកកម្មស្តីទី របស់ទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិ (USAID) បានថ្លែងថា ទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិសង្ឃឹមថា ផែនការរៀបចំដែនដីខេត្តមណ្ឌលគិរី នឹងត្រូវបានប្រើជាឧបករណ៍យុទ្ធសាស្ត្រមួយ ដើម្បីតម្រង់ទិសដៅជាអាទិភាព សម្រាប់ការអភិវឌ្ឍ និងការអភិរក្សខេត្តដ៏ស្រស់ស្អាតមួយនេះ តាមរយៈការដោះស្រាយតម្រូវការបច្ចុប្បន្ន និងការធានាបាននូវការអភិវឌ្ឍប្រទេសកម្ពុជា ប្រកបដោយនិរន្តភាពរយៈពេលវែង និងមានការបំភាយឧស្ម័នកម្រិតទាប។

ផែនការរៀបចំដែនដីខេត្តមណ្ឌលគិរី គឺជាផែនទីបង្ហាញផ្លូវសម្រាប់ការគ្រប់គ្រងប្រកបដោយប្រសិទ្ធិភាពនិងមានការទទួលខុសត្រូវ និងតុល្យភាពនៃការបែងចែក ប្រើប្រាស់ដីធ្លី ធនធានធម្មជាតិ និងហេដ្ឋារចនាសម្ព័ន្ធបច្ចេកទេសនិងសង្គម ដោយផ្អែកលើតម្រូវការជាក់ស្តែងរបស់ខេត្ត និងគោលការណ៍ច្បាប់ ការចូលរួម និងកិច្ចសហប្រតិបត្តិការយ៉ាងជិតស្និទ្ធពីគ្រប់ស្ថានប័ននិងភាគីពាក់ព័ន្ធទាំងអស់។

លោកសេង ទៀកនាយកអង្គការ WWF កម្ពុជា បានថ្លែងថា “នវានុវត្តន៍ចម្បងៗបំផុតនៅក្នុងវិធីសាស្រ្ត គ្រប់គ្រងតំបន់ទេសភាព គឺការទទួលស្គាល់នូវតម្រូវការ ដើម្បីដោះស្រាយអន្តរកម្មដ៏សាំញ៉ាំ នៃវិសាលភាពការប្រើប្រាស់ដែនដី រួមទាំងការយល់ដឹងអំពីស្ថាប័ននិងអាកប្បកិរិយារបស់មនុស្សក្នុងនៅទីនោះផងដែរ”។

លោកបន្ថែមទៀតថា “អង្គការ WWF កម្ពុជាត្រៀមខ្លួនជាស្រេច ដើម្បីគាំទ្ររដ្ឋាភិបាលក្នុងការរៀបចំផែនការប្រើប្រាស់ដីធ្លី ប្រកបដោយនិរន្តភាព ដើម្បីថែរក្សាការពារជីវៈចម្រុះសម្បូរបែបនៅក្នុងខេត្តមណ្ឌលគិរី។

ការបង្កើតផែនការរៀបចំដែនដីនេះ ជាដំណើរការ ដែលមានការចូលរួមពីពហុភាគីនិងត្រូវបានផ្តួចផ្តើមឡើង នៅខែមករា ឆ្នាំ២០១៧ ដោយមានការបង្កើតឡើងនូវរចនាសម្ព័ន្ធអភិបាលកិច្ច ក្រោមការគាំទ្រថវិកាពីសហភាពអ៊ឺរ៉ុប (EU)។ ការបង្កើតផែនការរៀបចំដែនដី ត្រូវបានចាប់ផ្តើម នៅខែតុលា ឆ្នាំ២០១៨ ក្រោមការគាំទ្រថវិកាពីគម្រោងគាំទ្រដែនជម្រកសត្វព្រៃរបស់ទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិ(USAID) តាមរយៈអង្គការ WWF កម្ពុជា។ ដំណើរការកសាងផែនការរៀបចំដែនដី បានអនុវត្តដោយក្រុមអ្នកជំនាញបចេ្ចកទេស រួមមានក្រុមការងារស្នូល រៀបចំផែនការរៀបចំដែនដីខេត្តមណ្ឌលគិរី ក្រុមទីប្រឹក្សាបច្ចេកទេស ដែលជ្រើសរើសដោយអង្គការ WWF កម្ពុជា និងបុគ្គលិកជំនាញរបស់ អង្គការ WWF កម្ពុជា៕

ក្រុមហ៊ុនOCICបោះទុនប្រមាណ៨០លានដុល្លារវិនិយោគគំរោងThe Financial Street

ដោយ:ស៊ីវ ម៉េង

ភ្នំពេញៈ ក្រុមហ៊ុនOCICបានសម្រេចបោះទុន ប្រមាណ៨០លានដុល្លារអាមេរិក ដើម្បីវិនិយោគគំរោងThe Financial Streetជាគំរោងមួយ ដែលមានទស្សនទាននៃការអភិវឌ្ឍថ្មី។

ប្រធានគ្រប់គ្រងគំរោងOlympia City លោកម៉េង ចំរើននៃក្រុមហ៊ុនOCICបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៣ កុម្ភៈនេះថា គំរោងនេះនឹងសាងសង់បញ្ចប់រយៈពេល៣ឆ្នាំ ដែលអាចបញ្ចប់នៅចុងឆ្នាំ២០២៣ ឬដើមឆ្នាំ២០២៤ខាងមុខនេះ ដោយបច្ចុប្បន្ននេះ ក្រុមការងាតបច្ចេកទេសកំពុងខួងគ្រឹះ ដើម្បីដំណើរការសាងសង់គំរោងនេះ។

លោកបន្តថា “គំរោងនេះមានចំណុចពិសេសជាច្រើន ដោយផ្ទះមានទំហំ៨ម៉ែត្រ គុណនឹង២៨ម៉ែត្រ ដែលមានចំណតយានយន្តធំទូលាយនៅខាងមុខ មានជាន់សំរាប់ចំណតយានយន្តក្រោមដី និងមានជណ្តើរយន្តផ្ទាល់ខ្លួនសំរាប់ផ្ទះនិមួយៗ”។ លោកបន្តថា កាលពីមុនទីតាំងនេះ ជាដីទំនេរ ប៉ុន្តែដោយសារក្រុមហ៊ុនមើលឃើញ នូវទស្សនទាននៃការអភិវឌ្ឍថ្មី តាមនិន្នាការរីកចម្រើននៃសេដ្ឋកិច្ចជាតិ ទើបយើងរៀបចំគម្រោងនេះឡើង ដើម្បីបំពេញតម្រូវការរបស់អតិថិជន”។

ជាមួយគ្នានេះ លោកលឹម គៀនអានប្រធានផ្នែកលក់នៃគំរោងOlympia Cityបានមានប្រសាសន៍ថា ផ្ទះក្នុងគំរោងនេះលក់ក្នុងតម្លៃជាង៣លានដុល្លារអាមេរិក ដោយបច្ចុប្បន្ននេះ យើងមិនទាន់ប្រកាសលក់ជាផ្លូវការនៅឡើយទេ ប៉ុន្តែយើងទទួលយកការកក់ប្រាក់ជំហានដំបូងពីអតិថិជនបណ្តើរៗហើយ។ លោកបន្តថា អាគារនេះមានផ្លូវមុខទទឹង១៦ម៉ែត្រ ដោយតភ្ជាប់ពីមហាវិថីព្រះមុនីរ៉េត មកកាន់ផ្លូវ១៦១ ទល់មុខវត្តសំពៅមាស។

លោកបន្តថា “គំរោងនេះមានលក្ខណៈពិសេស ដោយមានផ្លូវខាងមុខ១៦ម៉ែត្រ ទំហំអាគារជាង២០០០ម៉ែត្រការ៉េ ដែលជាតម្លៃមួយដ៏សមរម្យ គួបផ្សំជាមួយទីតាំងគំរោងមានភាពជាប់គ្នានឹងផ្សារទំនើបOlympia Mall និងមជ្ឈមណ្ឌលពាណិជ្ជកម្មខ្ពស់់នៅជាប់នឹងគំរោងនេះ”។លោកបន្តថា អ្នកវិនិយោគអាចទិញសម្រាប់រស់នៅ ប្រកបអាជីវកម្មជាការិយាល័យក្រុមហ៊ុន គ្លីនីក ឬអាជីវកម្មដទៃទៀតបាន”៕

អភិបាលខេត្តត្បូងឃ្មុំជំរុញឲ្យមន្រ្តីជំនាញរៀបចំតំបន់រមណីយដ្ឋានទឹកធ្លាក់ហោង ដើម្បីទាក់ទាញទេសចរណ៍

ដោយៈ គង់ សូរិយា

ត្បូងឃ្មុំៈ អភិបាលខេត្តត្បូងឃ្មុំ លោកជាម ច័ន្ទសោភ័ណបានជំរុញឲ្យមន្រ្តីជំនាញពាក់ព័ន្ឋរៀបចំកែលម្អរមណីយដ្ឋានទឹកធ្លាក់ហោង ឲ្យក្លាយជារមណីយដ្ឋានទាក់ទាញ និងគំរូសម្រាប់់ខេត្តត្បូងឃ្មុំ។

រមណីយដ្ឋានទឹកធ្លាក់ហោង ស្ថិតក្នុងឃុំកំពាន់ ស្រុកមេមត់ ខេត្តត្បូងឃ្មុំមានចម្ងាយប្រមាណ៣៨គីឡូម៉ែត្រពីទីរួមខេត្ត និងជារមណីយដ្ឋានដែលមានទឹកធ្លាក់ដ៏ស្រស់ស្អាត។

លោកបណ្ឌិត ជាម ច័ន្ទសោភ័ណ បានចាត់ឲ្យមន្ទីរជំនាញ សហការជាមួយអាជ្ញាធរដែនដី ធ្វើការសាងសង់ស្ពានឆ្លងអូរ ដាំកូនឈើ និងរៀបចំទីតាំងបរិវេណជុំវិញឲ្យបានស្អាត ឲ្យក្លាយទៅជារមណីយដ្ឋានគំរូប្រចាំខេត្ត តាមផែនការរបស់រដ្ឋបាលខេត្ត ដើម្បីទាក់ទាញស្រូបយកភ្ញៀវទេសចរ មកកម្សាន្តតំបន់ធម្មជាតិទឹកធ្លាក់ខួបប្រាំង ខួបវស្សានេះ។

ទឹកធ្លាក់ហោង គឺជាតំបន់ភ្នំក្រំថ្ម ហើយរូងថ្មរាប់សិបម៉ែត្រ ដែលមានល្បាក់ទឹកធ្លាក់ជាច្រើនថ្នាក់ ហើយមានទេសភាពស្រស់បំព្រង និងខ្យល់អាកាសបរិសុទ្ធ។ ទឹកធ្លាក់ហោង គឺជាតំបន់ភ្នំក្រំថ្ម ហើយរូងថ្មរាប់សិបម៉ែត្រ ដែលមានល្បាក់ទឹកធ្លាក់ជាច្រើនថ្នាក់ ហើយមានទេសភាពស្រស់បំព្រង និងខ្យល់អាកាសបរិសុទ្ធ។

ភ្ញៀវទេសចរតែងតែនាំគ្នា ទៅទស្សនាទេសភាពពិតៗ និងហែលទឹកកម្សាន្តលេងជាមួយល្បឿនទឹកហូរ នាខែវស្សា ក៏ដូចជាទៅដើម្បីអធិដ្ឋានព្រះពុទ្ធបដិមា និងសុំពរជ័យពីព្រះសង្ឃដែលនៅទីនោះ។

ក្នុងនោះដែរក្នុងនាមអាជ្ញាធរថ្នាក់ដឹកនាំ ក៏ដូចជាមន្ទីទេសចរណ៍បានអំពាវនាវដល់ភ្ញៀវទេសចរទាំងអស់ ដែលមកកម្រាន្តតំបន់នេះរួមគ្នារៀបចំ ថែរក្សាទឹកធ្លាក់ និងល្អាងថ្មហោង ឲ្យមានសម្រស់ធម្មជាតិស្រស់ត្រកាល ជាទីកម្សាន្តដ៏សែនមនោរម្យបែបធម្មជាតិ សម្រាប់ភ្ញៀវទេសចរជាតិ និងអន្តរជាតិសម្រាប់មកសម្រាកលំហែកាយនៅទីនេះ៕

1...2,0462,0472,048...3,260 Page 2,047 of 3,260