ទំហំវិនិយោគលើអចលនទ្រព្យនៅអាស៊ី-ប៉ាស៊ីហ្វិកកើនឡើងដល់៧២៦,៩ពាន់លានដុល្លារអាមេរិក

ដោយៈសុខុម
ហុងកុង: ទំហំទុនវិនិយោគសរុបលើអចលនទ្រព្យ ដែលស្ថិតក្រោមការគ្រប់គ្រង (AUM) ក្នុងតំបន់អាស៊ី-ប៉ាស៊ីហ្វិក បានកើនឡើង២០%ដល់៧២៦,៩ពាន់លានដុល្លារអាមេរិក ក្នុងឆ្នាំ២០២០ បើធៀបនឹង៦០៨,២ពាន់លានដុល្លារអាមេរិក ក្នុងឆ្នាំ២០១៩ ទោះបីជាស្ថិតក្នុងវិបត្តិកូវីដ-១៩ក្ដី។

យោងតាមគេហទំព័រ The Asset ចុះផ្សាយនៅថ្ងៃទី២០ ឧសភានេះឱ្យដឹងថា នៅទូទាំងពិភពលោក ទំហំវិនិយោគសរុបលើអចលនទ្រព្យ ដែលស្ថិតក្រោមការគ្រប់គ្រង (AUM) បានកើនឡើង១១%ដល់៤,១ទ្រីលានដុល្លារអាមេរិក នៅដំណាច់ឆ្នាំ២០២០ បើធៀបនឹង៣,៦ទ្រីលានដុល្លារអាមេរិក ក្នុងឆ្នាំ២០១៩ ហើយក្នុងនោះអាស៊ី-ប៉ាស៊ីហ្វិក មានចំនួន១៨% នៃទំហំវិនិយោគសរុបលើអចលនទ្រព្យ ដែលស្ថិតក្រោមការគ្រប់គ្រង (AUM) ទូទាំងពិភពលោក។

អចលនទ្រព្យ ដែលមិនត្រូវបានចុះបញ្ជីមានមួយចំណែកធំ នៃអចលនទ្រព្យ ដែលស្ថិតក្រោមការគ្រប់គ្រង (AUM) សរុបទូទាំងពិភពលោក។ ក្នុងចំណោមទំហំវិនិយោគ៤,១ទ្រីលានដុល្លារ អចលនទ្រព្យដែលមិនត្រូវបានចុះបញ្ជីមានចំនួន៨៣% ឬស្មើនឹងប្រមាណ៣,៤ទ្រីលានដុល្លារ។

លោកស្រី Amélie Delaunay នាយកផ្នែកស្រាវជ្រាវនៅសមាគម វិនិយោគិនអចលនទ្រព្យ ANREV បានលើកឡើងថា “ជាការពិតណាស់ ទំហំវិនិយោគលើអចលនទ្រព្យដែលស្ថិតក្រោមការគ្រប់គ្រង (AUM) មិនត្រឹមតែកើនឡើងអំឡុងវិបត្តិឆ្លងរាតត្បាតវីរុសកូវីដ-១៩ ប៉ុណ្ណោះទេ ប៉ុន្តែថែមទាំងមានសន្ទុះលឿនជាងឆ្នាំទៅមួយ (២០១៩) ទៀតផង ហើយវាជាសញ្ញាបង្ហាញថា តម្រូវការអចលនទ្រព្យនៅតែមិនថមថយ”។

លោកស្រីបានបន្ថែមទៀតថា “លទ្ធផលស្រាវជ្រាវបង្ហាញថា អាស៊ី-ប៉ាស៊ីហ្វិក នៅតែបន្តទាក់ទាញ និងបង្កើនចំណែកទីផ្សារអចលនទ្រព្យ ដែលស្ថិតក្រោមការគ្រប់គ្រង (AUM) ហើយនេះឆ្លុះបញ្ចាំងពីទំនុកចិត្តយ៉ាងរឹងមាំ លើទស្សនវិស័យសំរាប់រយៈពេលវែងនៃទីផ្សារអចលនទ្រព្យក្នុងតំបន់ ទោះបីជារងផលប៉ះពាល់ ដោយសារការឆ្លងរាតត្បាតវីរុសកូវីដ-១៩ ក្ដី”៕

ដំណឹងល្អៈអភិបាលក្រុងភ្នំពេញនឹងអនុញ្ញាត្តឲ្យផ្សារទាំងអស់បើកដំណើរការចាប់ពីថ្ងៃ ទី២៤ ឧសភាខាងមុខនេះ

ដោយៈគង់ សូរិយា

ភ្នំពេញៈ អភិបាលរាជធានីភ្នំពេញ លោក ឃួង ស្រេង នៅថ្ងៃទី២០ ខែឧសភា ឆ្នាំ២០២១នេះ បានប្រកាសសម្រេចឲ្យបើកដំណើរការផ្សាររដ្ឋទាំងអស់ ក្នុងមូលដ្ឋានរាជធានីភ្នំពេញ ចាប់ពីថ្ងៃទី២៤ ខែឧសភា ឆ្នាំ២០២១តទៅ។

នេះបើតាមសេចក្ដីសម្រេចដែលបណ្ដាញព័ត៌មាន Fresh News ទទួលបានផ្លូវការនៅរសៀលថ្ងៃនេះ។

អភិបាលរាជធានីភ្នំពេញបានបញ្ជាក់ និងទទូចឲ្យគណៈកម្មការផ្សាររដ្ឋទាំងអស់ អាជីវករ និងអតិថិជន ត្រូវរួមគ្នាចូលរួមទប់ស្កាត់ តាមវិធានការសុខាភិបាល និងអនុសាសន៍របស់សម្ដេចតេជោ ហ៊ុន សែន គឺ៣ការពារ និង៣កុំ ឲ្យមានប្រសិទ្ធភាព ហើយបើសិនរកឃើញថា តាមទីផ្សារទាំងនោះនៅបន្ដមានការករណីឆ្លងជំងឺកូវីដ១៩ នោះសាលារាជធានីភ្នំពេញ និងបន្ដផ្អាកឡើងវិញ។

អភិបាលរាជធានីភ្នំពេញ ក៏បានបញ្ជាក់ថា មិនទាន់អនុញ្ញាតឲ្យបើកដំណើរការផ្សារមិនរៀបរយទាំងអស់នោះឡើយ ដូចជាផ្សារក្រមួន, ផ្សារចាត់តាំង, ផ្សាររោងចក្រ, ផ្សារសហគមន៍, ផ្សារក្នុងដីឡូត៍ឯកជន, ផ្សារជុំវិញមន្ទីរពេទ្យ និងផ្សារតាមចញ្ចើមផ្លូវ ដើម្បីបន្ដបង្ការ និងទប់ស្កាត់ការរីករាលដាលធ្ងន់ធ្ងរ នៃជំងឺកូវីដ១៩ ក្នុងសហគមន៍៕

 

រដ្ឋាភិបាលកម្ពុជាត្រៀមនាំចេញប្រេងឆៅប្រមាណ៣០០ពាន់ប៉ារ៉ែលលើកដំបូងទៅកាន់ទីផ្សារអន្តរជាតិនៅខែឧសភានេះ

ដោយៈ ប៊ី
ភ្នំពេញៈ ក្រុមហ៊ុន សិង្ហបុរី KrisEnergy ដែលជាក្រុមហ៊ុនទទួលបានសិទ្ធិរុករក និងបូមប្រេងនៅកម្ពុជា នឹងនាំចេញប្រេងឆៅជាលើកដំបូងពីកម្ពុជាទៅកាន់ទីផ្សារអន្តរជាតិ ចន្លោះពី២៧៥ពាន់ទៅ៣០០ពាន់ប៉ារ៉ែលនៅក្នុងខែឧសភា ឆ្នាំ២០២១នេះ។ នេះបើយោងតាមការបញ្ជាក់របស់មន្រ្តីជាន់ខ្ពស់ក្រសួងរ៉ែ និងថាមពល។

អគ្គនាយកនៃអគ្គនាយកដ្ឋានប្រេងកាត នៃក្រសួងរ៉ែ និងថាមពល លោកជៀប សួរ បានបញ្ជាក់កាលពីម្សិលមិញថា ការនាំចេញប្រេងឆៅក្នុងដំណាក់កាលដំបូងនេះ នឹងអាចប្រែប្រួលទៅតាមខ្នាតរង្វាស់រង្វាល់ជាក់ស្តែង។

លោកបានឲ្យដឹងថា សម្រាប់ទិសដៅនៃការនាំចេញ បច្ចុប្បន្នក្រសួងកំពុងពិនិត្យជាមួយក្រុមហ៊ុនអំពីការស្នើរសុំទិញជាលើកទី១ ក្នុងនោះនៅពេលក្រសួងសម្រេចលើសំណើរណាមួយហើយនោះ នោះនឹងដឹងថា ប្រេងនេះនាំចេញទៅទិសដៅមួយណា និងការនាំយកទៅស្តុកទុកដាក់កន្លែងណាមួយ។ ដោយឡែក ជំហាននៃការនាំចេញប្រេងបន្ទាប់ ក្រសួងមិនទាន់ធ្វើការកំណត់ទៅតាមទិសដៅនាំចេញបាននៅឡើយ ដោយអាស្រ័យលើការផលិតជាក់ស្តែងនិងការស្វែងរកទីផ្សារថ្មីៗបន្ថែមទៀត។

លោកបានលើកឡើងថា ទាក់ទងនិងដំណើរការផលិត ក៏ដូចជាការនាំចេញក្នុងស្ថានភាពនៃការរីករាលជំងឺឆ្លងកូវីដ១៩ ក្រុមហ៊ុនអាចនឹងជួបបញ្ហាខ្លះៗ ដោយសារប្រទេសមួយចំនួនក្នុងតំបន់ទទួលរងនៃការកើនឡើងចំពោះការរីករាលដាល ដែលបណ្តាលឲ្យមានការបិទរោងចក្រ សហគ្រាស ឬកន្លែងធ្វើការផ្សេងៗ ដែលជាហេតុធ្វើឲ្យមានការប៉ះពាល់ខ្លះៗដែរ អំពីតម្រូវការ និងបញ្ហាថ្លៃលក់ចេញ។

លោកបានថ្លែងបន្តថា ដោយឡែក ការអភិវឌ្ឍន៍លើទិសដៅបន្ត ក្រសួងនិងភាគីក្រុមហ៊ុនកំពុងពិនិត្យមើលផែនការទៅមុខជាមួយគ្នា ក្នុងនោះភាគីក្រុមហ៊ុនក៏បានលើកផែនការ ពិនិត្យ និងការសិក្សាទិន្នន័យ និងការវ៉ាស់ស្ទង់បន្ថែមទៀតផងដែរ ចំណែកចំពោះតំបន់ដែលនៅជុំវិញ ដែលកំពុងដំណើរការផលិតប្រេងនេះ ក្រុមហ៊ុននឹងធ្វើការវាយតម្លៃបន្ថែម និងលើកផែនការទៅតាមទិសដៅនាពេលខាងមុខ៕

ចិនកំពុងចាប់យកសក្តានុពលក្នុងវិស័យកសិកម្មបន្ថែមពីលើការវិនិយោគក្នុងវិស័យអចលនទ្រព្យ

ដោយៈ លក្ខិណា
ភ្នំពេញៈ បច្ចុប្បន្ននេះ វិនិយោគិនបរទេស ដែលដាក់ទុនវិនិយោគច្រើនជាងគេនៅកម្ពុជា គឺជាវិនិយោគិនជនជាតិចិន ហើយការវិនិយោគភាគច្រើនត្រូវបានធ្វើឡើងក្នុងវិស័យអចលនទ្រព្យ ប៉ុន្តែថ្មីៗនេះ វិនិយោគិនចិនបានចាប់ផ្ដើមដាក់ទុនវិនយោគលើវិស័យកសិកម្មបន្ថែមពីលើវិស័យដែលពួកគេបានដាក់ទុនរួចហើយ។

លោកឧកញ៉ាចេង ខេង អគ្គនាយកនៃក្រុមហ៊ុនអចលនទ្រព្យCPL បានមានប្រសាសន៍នៅក្នុងសន្និសីទតាមវីដេអូនអនឡាញកាលពីព្រឹកថ្ងៃទី២០ ឧសភា ២០២១នេះថា បច្ចុប្បន្ននេះចិនក៏បានសម្លឹងមើលឃើញវិស័យកសិកម្ម សម្រាប់ការវិនិយោគរបស់ខ្លួននៅក្នុងប្រទេសកម្ពុជាផងដែរ ពីព្រោះប្រទេសចិនក៏បាននាំចូលផលិតផលកសិកម្មពីកម្ពុជាច្រើនដែរក្នុងមួយឆ្នាំៗ ដូចជាចេកអំបូងលឿង ស្វាយស្រស់ និងដំណាំផ្សេងៗទៀតកំពុងចរចានាំចេញ។

រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទលោកវេង សាខុនឱ្យដឹងថា ចិនគឺជាទីផ្សារធំមួយនៃផលិតផលកសិកម្មរបស់កម្ពុជា តែកម្ពុជាត្រូវតែពង្រឹងគុណភាពផលិតផលរបស់ខ្លួនបន្ថែមដើម្បីអាចឈានជើងចូលទីផ្សារនៃប្រទេសចិន។

លោកបានបន្ថែមថា តាមពិតកម្ពុជាមានផលិតផលជាច្រើនដែលអាចនាំចេញទៅចិនបានព្រោះមានតម្រូវការខ្ពស់ តែដោយសារតែរបាំងនៃភូតគាមអនាម័យ ទើបធ្វើឱ្យកម្ពុជាត្រូវរាំងស្ទះក្នុងការនាំចេញ ហើយក៏ត្រូវការពិនិត្យល្អិតល្អន់ពីសំណាក់អ្នកជំនាញចិនផងដែរ។

វិស័យកសិកម្មរបស់កម្ពុជា ក៏មានវិនិយោគិនជាច្រើនបាននិងកំពុងបណ្ដាក់ទុនវិនិយោគដើម្បីកែច្នៃនិងនាំចេញទៅកាន់ទីផ្សារប្រទេសចិនវិញ ក្នុងនោះក៏មានចេកអំបូង ដំឡូងមី និងផលិតផលកសិកម្មផ្សេងទៀត ។ហើយតាមរយៈកិច្ចព្រមព្រៀងពាណិជ្ជកម្មសេរី កម្ពុជាចិន និងទាក់ទាញវិនិយោគិនបន្ថែមមកបណ្ដាក់ទុនវិនិយោគបន្ថែមនៅក្នុងប្រទេសកម្ពុជា។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងថា ការវិនិយោគរបស់ចិន មានច្រើនណាស់នៅអាស៊ីនិងពិភពលោក ហើយបើនិយាយពីការវិនិយោគអចលនទ្រព្យវិញ ការវិនិយោគជនជាតិចិនចូលចិត្តកសាងបណ្ដុំសហគមន៍របស់គេ។

លោកបានបន្តថា នៅក្នុងប្រទេសកម្ពុជា តំបន់ពីរដែលជនជាតិបានចាប់ផ្ដើមកសាងសហគមន៍របស់គេ គឺនៅក្នុងខេត្តព្រះសីហនុនិងនៅរាជធានីភ្នំពេញ រួមទាំងផ្នែកខ្លះនៃខេត្តកោះកុង (តារាសាគរ)៕

សម្តេចតេជោផ្តល់អនុសាសន៍សំខាន់ៗដល់បណ្តាប្រទេសក្នុងតំបន់អាស៊ីដើម្បី ស្តារសេដ្ឋកិច្ចឡើងវិញ

ដោយៈ ប៊ី
ភ្នំពេញៈ សម្តេចតេជោហ៊ុន សែន នាយករដ្ឋមន្រ្តីនៃកម្ពុជា បានលើកឡើងនូវអនុសាសន៍ពីកិច្ចការអាទិភាពនិងទិសដៅមួយចំនួន ដល់បណ្តាប្រទេសក្នុងតំបន់អាស៊ី ដើម្បីស្តារប្រទេសឡើងវិញ ដែលធានាបានការអភិវឌ្ឍន៍ និងជំរុញកំណើនសេដ្ឋកិច្ច ក្រោយវិបត្តិកូវីដ១៩។

សម្តេចតេជោ បានថ្លែងក្នុងសន្និសីទអន្តរជាតិលើកទី២៦ ស្តីពីអនាគតរបស់អាស៊ី ក្រោមប្រធានបទ ការរៀបចំសម័យកាលថ្មី ក្រោយវិបត្តិកូវីដ១៩ តួនាទីរបស់អាស៊ី ក្នុងការស្តារពិភពលោកឡើងវិញ តាមរយៈប្រព័ន្ធវីដេអូ នៅថ្ងៃទី២០ ខែឧសភានេះថា ដើម្បីជំរុញការងើបឡើងវិញ នៃសង្គមសេដ្ឋកិច្ចប្រកបដោយសមធម៌ ចីរភាពនិងបរិយាបន្ន យើងទាំងអស់គ្នា ចាំបាច់ត្រូវគិតគូរ ចំពោះមុខការទប់ស្កាត់ការរីករាលដាល និងគ្រប់គ្រងផលប៉ះពាល់ដែលបណ្ដាលមកពីកូវីដ១៩ គឺជាកិច្ចការចាំបាច់បំផុត ដើម្បីឲ្យប្រទេសទាំងអស់អាចចាប់ផ្ដើមដំណើរការស្ដារ និងងើបឡើងវិញបានប្រកបដោយប្រសិទ្ធភាព។

សម្តេចតេជោបន្ថែមថា “ការប្រយុទ្ធប្រឆាំងនឹងជំងឺឆ្លង ជាលក្ខណៈសាកលដែលបែបនេះ ទាមទារនូវការសាមគ្គីភាព ការជឿទុកចិត្ត ការគិតគូរ និងអនុវត្តរួមគ្នាប្រកបដោយភាពហ្មត់ចត់ និងក្រោមយន្តការពហុភាគីនិយម ការគោរពច្បាប់អន្តរជាតិ និងអធិបតេយ្យភាព របស់ប្រទេសនីមួយៗ”។សម្តេចបន្តថា “ក្នុងស្មារតីនេះអាស៊ីត្រូវផ្ដល់អាទិភាពខ្ពស់និងចាំបាច់បំផុត ក្នុងការធានាវ៉ាក់សាំងបង្ការ និងថ្នាំព្យាបាលជំងឺកូវីដ១៩ គឺជាទំនិញសាធារណៈសាកល ដែលត្រូវបានផ្គត់ផ្គង់ និងចែកចាយក្នុងស្មារតីមនុស្សធម៌ ទៅដល់គ្រប់ប្រទេសទាំងអស់ជាពិសេសប្រទេស ដែលងាយរងគ្រោះ”។

សម្តេចតេជោបានលើកឡើងថា អាស៊ីចាំបាច់ត្រូវដឹកមុខ ក្នុងការបើកចំហនូវទីផ្សារពាណិជ្ជកម្ម លើឧបករណ៍វេជ្ជសាស្ត្រ និងការផ្គត់ផ្គង់ស្បៀងអាហារ ដោយមិនត្រូវដាក់កម្រិតណាមួយនោះទេ ជាពិសេសត្រូវកាត់បន្ថយឬលុបបំបាត់ពន្ធគយ និងកែសម្រួលវិធាន មិនមែនពន្ធដារលើទំនិញសេវាកម្មវេជ្ជសាស្ត្រ និងលុបបំបាត់ការរឹតត្បិតការនាំចេញស្បៀងទៅកាន់ទីផ្សារអន្តរជាតិ។

សម្តេចតេជោបានថ្លែងបន្តថា ម្យ៉ាងវិញទៀតក្នុងបរិបទនៃការរាតត្បាតជាសាកលនៃជំងឺកូវីដ១៩ យើងត្រូវជំរុញបដិវត្តន៍Digital តំបន់យើង ដែលជាប្រភពកំណើតថ្មីសម្រា ប់ជំរុញកំណើនសេដ្ឋកិច្ចតំបន់ តាមរយៈការផ្ដួចផ្ដើមនិងជំរុញការរៀបចំអភិបាលកិច្ច រួមសម្រាប់ការអភិវឌ្ឍន៍ ហេដ្ឋារចនាសម្ព័ន្ធឌីជីថល ដែលរាប់បញ្ចូលទាំងការកំណត់ស្តង់ដារបញ្ញត្តិឯកជនភាពនិងការចែករំលែកទិន្នន័យជាដើម។

សម្តេចតេជោបានថ្លែងទៀតថា ជាងនេះទៅទៀតអាស៊ី ត្រូវពង្រឹងយន្តការក្នុងតំបន់ក្នុងការសម្របសម្រួល ការដាក់ចេញគោលនយោបាយម៉ាក្រូសេដ្ឋកិច្ច និងហិរញ្ញវត្ថុដើម្បីធានាឲ្យមានស្ថិរភាពម៉ាក្រូសេដ្ឋកិច្ច និងហិរញ្ញវត្ថុតំបន់ទន្ទឹមនឹងការខិតខំជំរុញលើកកម្ពស់ពីប្រតិកម្មវិស័យហិរញ្ញវត្ថុ នវានុវត្តន៍ ក៏ដូចជា ជំរុញលើកស្ទួយតួនាទី និងជីវភាពរបស់វិស័យឯកជន សំដៅជំរុញវិនិយោគនិងមូលធនឯកជន នៅក្នុងប្រទេសកំពុងអភិវឌ្ឍ ឬប្រទេស អភិវឌ្ឍទាប ជាពិសេសគឺការវិនិយោគផ្ទាល់ពីបរទេស ដើម្បីបំពេញតម្រូវការផ្នែកហិរញ្ញវត្ថុសម្រាប់ការស្ដារឡើងវិញ នូវកិច្ចអភិវឌ្ឍសេដ្ឋកិច្ច សង្គមប្រកបដោយចីរភាព។

ការពង្រឹងគោលការណ៍សកលភាវូពាណិជ្ជកម្ម យន្តការពហុភាគីនិយមនិងសេរីភាវូបពាណិជ្ជកម្ម ពាណិជ្ជកម្ម និងការវិនិយោគ នៅតែជាកិច្ចការចាំបាច់ តាមរយៈការបន្តធ្វើសមាហរណកម្មសេដ្ឋកិច្ចតំបន់អាស៊ី តំបន់ស៊ីជម្រៅនិងពង្រឹងខ្សែសង្វាក់ ផ្គត់ផ្គង់ ឧស្សា ហកម្ម ទិន្នន័យព័ត៌មាន ធនធានមនុស្សនិងកិច្ចសម្របសម្រួលពាណិជ្ជកម្ម។

សន្និសីទអន្តរជាតិលើកទី២៦ ស្តីពីអនាគតរបស់អាស៊ី ក្រោមប្រធានបទ ការរៀប ចំសម័យកាលថ្មី ក្រោយវិបត្តិកូវីដ-១៩ តួនាទីរបស់អាស៊ី ក្នុងការស្តារពិភពលោកឡើងវិញ តាមរយៈប្រព័ន្ធវីដេអូនេះ ត្រូវបានរៀបចំឡើងដោយក្រុមហ៊ុននីកកេ តាមប្រព័ន្ធវីដេអូ ដែលមានសារសំខាន់ សម្រាប់ថ្នាក់ដឹកនាំនិងដៃគូពាក់ព័ន្ធទាំងអស់បានពិភាក្សា និងផ្លាស់ប្ដូរទស្សនៈ អំពីស្ថានការណ៍នៃការវិវត្តន៍ នៅក្នុងតំបន់ និងសកលលោក ជាពិសេសការគិតគូរអំពីទិសដៅអនាគត សម្រាប់កិច្ចអភិវឌ្ឍន៍តំបន់អាស៊ី ក្នុងនិងក្រោយពេលវិបត្តិកូវីដ១៩៕

អ្នកជំនាញៈវិស័យអចលនទ្រព្យនឹងអាចងើបឡើងវិញ នៅចុងឆ្នាំ២០២១ ឬដើមឆ្នាំ២០២២ខាងមុខ

ដោយៈតារា
ភ្នំពេញៈ អ្នកជំនាញនៃសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានរំពឹងថា វិស័យអចលទ្រព្យនៅកម្ពុជា នៅចុងឆ្នាំ២០២១ ឬនៅឆ្នាំ២០២២ អាចងើបឡើងវិញជាបណ្តើរៗ ខណៈវិនិយោគិនក្នុងស្រុក បានចាប់ផ្តើមមានចន្តរក្នុងការទិញ-លក់ បន្ទាប់ពីកម្ពុជាទទួលបានការចាក់វ៉ាសាំងបង្ការជម្ងឺកូវីដ-១៩ បានកាន់តែច្រើន ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្តសាសន៍ឲ្យដឹង នៅក្នុងសន្និសីទសារព័ត៌មានស្តីពី “បច្ចុប្បន្នភាពទីផ្សារអចលនវត្ថុក្នុងកំឡុងកូវីដ-១៩” នៅថ្ងៃទី ២០ ខែ កុម្ភៈ ឆ្នាំ ២០២១ នេះថា បញ្ហាប្រឈមនៅក្នុងវិបត្តិកូវីដ១៩ គឺបានធ្វើឲ្យប៉ះពាល់ដល់សេដ្ឋកិច្ចជាតិយើង ក្នុងនោះចំពោះវិស័យអចលនទ្រព្យក៏ជាផ្នែកមួយ ក្នុងការប៉ះពាល់ដោយសារវិបត្តិជម្ងឺនេះផងដែរ ដែលជាការរាំងស្ទះដល់ការអភិវឌ្ឍន៍វិស័យនេះ និងការបាត់បង់អ្នកវិនិយោគទុន ជាពិសេសអ្នកវិនិយោគទុនបរទេសជាដើម។

លោកបន្តថា “ទោះបីនៅក្នុងស្ថានភាពវិនិយោគិនបរទេស មិនទាន់អាចធ្វើដំណើរយ៉ាងណាក៏ដោយ ក្នុងនោះប្រសិនអ្នកវិនិយោគទុកក្នុងស្រុក មានសកម្មភាពការធ្វើដំនើរបានអ្នកវិនិយោទុននៅក្នុងស្រុក ពួគគេនឹងចាប់ផ្តើមសម្លឹងមើលឱកាសវិនិយោគឡើងវិញ ជាពិសេសអ្នកដែលមានធនធានហិរញ្ញវត្ថុ”។លោកបន្តថា “អ្នកមានធនធាន គាត់នឹងចាប់ផ្តើមមើលឃើញសក្តានុពល ទិញអចលនទ្រព្យទុក ក្នុងនោះខណៈដែលវិនិយោគិនបរទេសអាចធ្វើដំណើរបាន ពួកគេនឹងអាចសម្លឹងមើលឱកាសនៃការវិនិយោគបន្ត ហើយចំនួននៃការវិនិយោគលើវិស័យនេះ នឹងអាចហក់ឡើងខ្ពស់បន្តិចម្តងៗ”។

លោកច្រឹក សុខនីមបានបន្តថា ដើម្បីធ្វើឲ្យវិស័យនេះងើបឡើងវិញលឿន វាត្រូវការកត្តាខាងក្នុង និងកត្តាខាងក្រៅ។ កត្តាខាងក្នុង គឺរដ្ឋាភិបាលអាចចាក់វ៉ាក់សាំងបានលឿន លែងបង្កហានិភ័យនៃការឆ្លងជំងឺនេះ និងការចាប់ផ្តើមពេញលេញនៃការអភិវឌ្ឈក្នុងស្រុក។

ចំណែកកត្តាខាងក្រៅ អ្នកវិនិយោគអន្តរជាតិតែងតែបារម្ភ ពីការធ្វើដំណើរដោយសារបញ្ហាជំងឺកូវីដ១៩ ហេតុនេះវាត្រូវការពេលវេលាយូរ ដើម្បីឲ្យវិនិយោគិនអន្តរជាតិចូលមក ប៉ុន្តែយើ់ងរំពឹងថា ពួកគាត់នឹងចូលមកនៅចុងឆ្នាំនេះ និងឆ្នាំ២០២២ ដែលពេលនោះវិស័យអចលនទ្រព្យនឹងមានភាពរីកចម្រើនឡើងវិញលឿន។

ជាមួយគ្នានេះ លោក លឹម សុជាតិ ប្រធានក្រុមប្រឹក្សាភិបាល សមាគមអ្នកវាយតម្លៃនិងភ្នាក់ងារអចលនវត្ថុកម្ពុជាលើកឡើងផងដែរថា សម្រាប់ចន្តរនៃការទិញ-លក់ វិស័យអចលនទ្រព្យក្នុងពេលបច្ចុប្បន្ន យើងសង្កេតឃើញថា អ្នកវិនិយោគក្នុងស្រុកបានទិញ-លក់ មានកំណើនខ្ពស់ជាងបរទេស ក្នុងនោះចំពោះអចនទ្រព្យដូចជាដីធ្លី ផ្ទះសម្បែង អ្នកវិនិយោគទុនក្នុងស្រុក មានការទិញលក់យ៉ាងច្រើន។

ចំណែកការវិនិយោគ ទិញ-លក់ ដូចជា ខុនដូ ឬអគារពាណជ្ជកម្មផ្សេងៗ អ្នកវិនិយោគបរទេសមានការអភិវឌ្ឍន៍ និងទិញ-លក់ច្រើន ជាក់ស្តែងនៅក្នុងការរីករាលដាលនៃជម្ងឺកូវីដ-១៩ ឬការ Lockdown វិស័យនេះ នៅតែដំណើរការទិញលក់ជាធម្មតា៕

ប្រធានCVEA វត្តមានភ្នាក់ងារអចលនទ្រព្យអន្តរជាតិនឹងជំរុញក្រុមហ៊ុនក្នុង ស្រុកកាន់តែរឹងមាំ

ដោយៈ ម៉ាណេត
ភ្នំពេញៈ ទោះបីស្ថិតក្នុងវិបត្តិកូវីដ១៩ នៅឆ្នាំ២០២១ខាងមុខនេះ ដែលបណ្តាល ឱ្យវិស័យអចលនទ្រព្យផលប៉ះពាល់មួយចំនួន ក្រុមហ៊ុនភ្នាក់ងារអចលនទ្រព្យអន្តរជាតិនានាបានចាប់ផ្តើមឈានជើងចូលកម្ពុជា ដែលតម្រូវឱ្យក្រុមហ៊ុនក្នុងស្រុកត្រៀមខ្លួន ដើម្បីប្រកួតប្រជែង។

ប្រធានសមាគមអ្នកវាយតម្លៃ និងភ្នាក់ងារអលនវត្ថុកម្ពុជា(CVEA)លោកច្រឹកសុខនីមបានលើកឡើងនៅថ្ងៃទី២០ ខែឧសភា ឆ្នាំ២០២១ថា សេដ្ឋកិច្ចសាកលបានចាប់ផ្តើមល្អជាបណ្តើរៗឡើងវិញ ហើយសកម្មភាពនៃវិស័យអចលនទ្រព្យនៅកម្ពុជា ក៏ចាប់ផ្តើមវិលត្រឡប់ទៅរកភាពល្អប្រសើរឡើងវិញបណ្តើរៗ ហើយក្នុងនោះក៏ក្រុមហ៊ុនភ្នាក់ងារថ្មីៗបន្ថែមទៀតបានចូលមកក្នុងទីផ្សារកម្ពុជា ដែលវាអាចបង្កើតការប្រកួតប្រជែងដល់ក្រុមហ៊ុនភ្នាក់ងារមានស្រាប់នៅក្នុងស្រុកមួយចំនួន។

លោកបានថ្លែងថា “វត្តមានក្រុមហ៊ុនបរទេស នឹងជម្រុញឱ្យមានការប្រកួតប្រជែងគ្នាជាមិនខាន”។ ដោយឡែកសម្រាប់ទីផ្សារអចលនទ្រព្យនៅកម្ពុជា នៅក្នុងឆ្នាំ២០២១ ក្រុមហ៊ុនថ្មីៗ ចូលមកបន្ថែមទៀតជាមិនខាន ដែលក្នុងនោះមានទាំងក្រុមហ៊ុនក្នុងស្រុក និងក្រុមហ៊ុនអន្តរជាតិផងដែរ”។

លោកច្រឹក សុខនីមបានបន្តថា នៅពេលមានក្រុមហ៊ុនកាន់តែច្រើន វាបង្ហាញពីភាពរីកចម្រើន និងល្អប្រសើររបស់វិស័យអចលនទ្រព្យ ប៉ុន្តែដែលជាបញ្ហាប្រឈមគឺក្រុមហ៊ុនភ្នាក់ងារតូចៗក្នុងស្រុកមួយចំនួន ដែលតម្រូវឱ្យមានការប្រកួតប្រជែងជាមួយបណ្តាក្រុមហ៊ុនភ្នាក់ងារជំនាញធំៗ ជាពិសេសក្រុមហ៊ុន ដែលចូលមកពីក្រៅប្រទេសដែលពួកគេមានជំនាញច្បាស់ និងចំណេះដឹងទូលំទូលាយពាក់ព័ន្ធទៅនឹងវិស័យមួយនេះ។

លោកបានបន្តថា “ដូច្នេះក្រុមហ៊ុនភ្នាក់ងារតូចៗត្រូវពង្រឹកសមត្ថភាព គុណភាព និងចំណេះដឹងបន្ថែមឱ្យបានច្បាស់លាស់ ជាពិសេសត្រូវបង្កើតក្រុមសហការងារឱ្យបានរឹងមាំ គ្រប់ជ្រុងជ្រោយ និងភាពស្មោះត្រង់ដើម្បីធានាបាននូវប្រសិទ្ធភាពខ្ពស់ ដែលអាចទទួលបានទំនុកពីអតិថិជន”។

លោកបានថ្លែងទៀតថា អ្វីដែលមិនអាចខ្វះបាន សម្រាប់ក្រុមហ៊ុនភ្នាក់ងារអចលនទ្រព្យ គឺការរៀបចំជាយុទ្ធសាស្ត្ររបស់ក្រុមការងារ ក៏ដូចជាក្រុមហ៊ុន ដើម្បីអាចធ្វើការប្រកួតប្រជែងជាមួយក្រុមហ៊ុនដទៃទៀត ហើយការរៀបចំជាយុទ្ធសាស្ត្រ និងការត្រៀមខ្លួនេះនឹងធ្វើឱ្យក្រុមហ៊ុនក្នុងស្រុកតែរឹងមាំ៕

ផ្លូវជាតិលេខ៣ លេខ៤ នាតំបន់ភាគខាងលិចរាជធានីភ្នំពេញកំពុងក្លាយជា តំបន់ទាក់ទាញវិនិយោគិន

ដោយៈលក្ខិណា
ភ្នំពេញៈ ការរីកសាយនៃការអភិវឌ្ឍលើវិស័យអចលនទ្រព្យ នៅក្នុងរាជធានីភ្នំពេញ ត្រូវបានគេមើលឃើញថាស្ទើរតែគ្រប់ផ្នែក តែតំបន់នីមួយៗមានការអភិវឌ្ឍខុសគ្នា ក្នុងនោះផ្នែកខាងលិចរាជធានីភ្នំពេញ ត្រូវបានគេមើលឃើញថា កំពុងបង្ហាញពីសក្ដានុពលទាក់ទាញ សម្រាប់ការវិនិយោគពីវិនិយោគិនក្នុងនិងក្រៅប្រទេស។

លោកច្រឹកសុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ឲ្យដឹងកាលពីដើមសប្តាហ៍នេះថា បើយើងក្រលេកទៅមើលការអភិវឌ្ឍនៅជុំវិញរាជធានីភ្នំពេញ គេមើលឃើញថាមានការរីកសាយដូចៗគ្នា គ្រាន់តែមានការអភិវឌ្ឍខុសៗគ្នាបន្តិចបន្តួចប៉ុណ្ណោះ ក្នុងនោះដែរ តំបន់ខាងលិចរាជធានីភ្នំពេញ ហាក់កំពុងបង្ហាញពីសក្ដានុពលបន្ថែមទៀត សម្រាប់ទាក់ទាញការវិនិយោគក្នុង និងក្រៅប្រទេស ដោយសារតែរដ្ឋាភិបាលបានអភិវឌ្ឍន៍ហេដ្ឋារចនាសម្ព័ន្ធ ហើយគម្រោងធំៗមួយចំនួនទៀតក៏បានបង្ហាញខ្លួនជាបន្តបន្ទាប់ ដូចជាបុរីធំៗជាដើម។

លោកបន្តថា “តំបន់ណាដែលមានការអភិវឌ្ឍហេដ្ឋារចនាសម្ព័ន្ធច្រើន តំបន់នោះ នឹងទទួលបានការចាប់អារម្មណ៍ពីសំណាក់អ្នកអភិវឌ្ឍន៍។ ដូច្នេះហើយទើបឃើញរដ្ឋាភិបាលកម្ពុជាយើងបានចំណាយទុន ក្នុងវិនិយោគលើហេដ្ឋារចនាសម្ព័ន្ធជាបន្តបន្ទាប់”។

ជាមួយគ្នានេះ លោកឧកញ៉ាអ៊ឹង គីមហុង វិនិយោគិនអចលនទ្រព្យធំមួយនៅតំបន់ប៉ែកខាងលិចរាជធានីភ្នំពេញ ក៏បានឱ្យដឹងផងដែរថា កត្តាដែលជំរុញឱ្យលោកវិនិយោគអចលនទ្រព្យទៅលើលំនៅឋាន និងដីធ្លី ដោយសារតែលោកមើលឃើញថា ហេដ្ឋារចនាសម្ព័ន្ធ នៅតំបន់ប៉ែកខាងលិចកំពុងតែមានការអភិវឌ្ឍច្រើន ទាំងផ្លូវល្បឿនលឿនភ្នំពេញ ក្រុងព្រះសីហនុ ផ្លូវក្រវ៉ាត់ក្រុងដែលអាចតភ្ជាប់ទៅកាន់បណ្ដាខេត្តសំខាន់ៗ ដូចជា ទៅព្រំដែនកម្ពុជា ថៃ និងផ្លូវតភ្ជាប់ទៅកាន់កំពង់ផែទឹកជ្រៅក្រុងព្រះសីហនុ ។

លោកឧកញ៉ាបន្តថា “គម្រោងរបស់លោកនឹងមានជាបន្តបន្ទាប់ ដើម្បីបំពេញទៅតាមតម្រូវការរបស់ប្រជាពលរដ្ឋ ជាពិសេសទៅលើលំនៅឋាន តម្លៃសមរម្យដីឡូត៍សម្រាប់សង់លំនៅឋានជាដើម ហើយក្រុមហ៊ុនរបស់លោកក៏បានត្រៀមដី ប្រមាណ៥០០ហិចតា ដើម្បីអភិវឌ្ឍន៍អចលនទ្រព្យជាមួយ ក្រុមហ៊ុនអភិវឌ្ឍន៍ធំៗជាច្រើនទៀតក្នុងស្រុក”។

បច្ចុប្បន្នគំរោងបុរី លំនៅដ្ឋានជាច្រើនបាននិងកំពុងបង្ហាញខ្លួនលើផ្លូវជាតិលេខ៣ និងផ្លូវជាតិលេខ៣ ដោយសារតែការកើនឡើងនូវកត្តាប្រជាសាស្រ្ត ការរីកចម្រើនហេដ្ឋារចនាសម្ព័ន្ឋ កំណើនជីវភាពរបស់ប្រជាពលរដ្ឋ ពិសេសការពង្រីកផ្លូវជាតិលេខ៣ និងការរៀបចំស្តារឡើងវិញនូវផ្លូវជាតិលេខ៤ បានធ្វើឲ្យតំបន់នេះមានភាពទាក់ទាញកាន់តែខ្លាំង៕

រដ្ឋាភិបាលកម្ពុជាត្រៀមដាក់ចេញនូវផែនការស្តារសេដ្ឋកិច្ចឡើងវិញសម្រាប់ឆ្នាំ២០២១-២០២៣ដោយផ្តោតការងារអាទិភាពបី

ដោយៈ ម៉ាណេត
ភ្នំពេញៈ រាជរដ្ឋាភិបាលកម្ពុជា នឹងដាក់ចេញនូវផែនការស្តារសេដ្ឋកិច្ចឡើងវិញពីវិបត្តិកូវីដ-១៩ សម្រាប់ឆ្នាំ២០២១-២០២៣ ដើម្បីប្រែក្លាយវិបត្តិនៃជំងឺកូវីដ-១៩ ទៅជាឱកាស ដោយផ្អែកលើការកែទម្រង់កាន់តែស៊ីជម្រៅ សំដៅកសាងប្រព័ន្ធសេដ្ឋកិច្ចនិងសង្គមកាន់តែរឹងមាំ និងមានភាពធន់ទៅនឹងវិបត្តិនាពេលអនាគត។
សម្តេចតេជោ ហ៊ុន សែន នាយករដ្ឋមន្ត្រីនៃក្រកម្ពុជា បានថ្លែងក្នុងសន្និសីទអន្តរជាតិលើកទី២៦ ស្តីពី៛អនាគតរបស់អាស៊ី” ក្រោមប្រធានបទ “ការរៀបចំសម័យកាលថ្មីក្រោយវិបត្តិកូវីដ “តួនាទីរបស់អាស៊ីក្នុងការស្តារពិភពលោកឡើងវិញ” នៅថ្ងៃទី២០ ខែឧសភានេះថា គោលបំណងនៃផែនការស្តារសេដ្ឋកិច្ចឡើងវិញ ពីវិបត្តិកូវីដ-១៩ សម្រាប់ឆ្នាំ២០២១-២០២៣នេះ ដើម្បីអូសទាញកំណើនសេដ្ឋកិច្ចឱ្យត្រឡប់ ទៅខិតជិតកំណើន សក្តានុពលប្រកបដោយចីរភាព និងបរិយាបន្នកម្ម។
សម្តេចតេជោបន្ថែមថា “ផែនការស្តារសេដ្ឋកិច្ចឡើងវិញនឹងធ្វើឡើង តាមរយៈការធានារក្សានូវសន្តិភាព សន្តិសុខ ស្ថិរភាពសង្គម និងសណ្តាប់ធ្នាប់សាធារណៈ លើគន្លងនៃប្រក្រតីភាពថ្មី ព្រមទាំងការលើកកម្ពស់ភាពប្រកួតប្រជែង និងជំរុញការធ្វើពិពិធកម្មសេដ្ឋកិច្ច ជាពិសេសមូលដ្ឋានឧស្សាហកម្មរឹងមាំ ដែលមានសមត្ថភាពនាំចេញខ្ពស់ និងផ្សារភ្ជាប់កាន់តែខ្លាំងក្លាជាមួយ សង្វាក់ផ្គត់ផ្គង់តំបន់ និងពិភពលោក”។
សម្តេចតេជោបានបញ្ជាក់ថា កម្ពុជាផ្តើមចេញពីប្រទេសតូច ដែលធនធានមានកម្រិត នឹងប្តេជ្ញាបន្តខិតខំពង្រីក និងពង្រឹងកិច្ចសហប្រតិបត្តិការនានា សំដៅចូលរួមដោះស្រាយបញ្ហាប្រឈមរួម ដើម្បីកសាងភាពធន់ទៅនឹងវិបត្តិ និងធានាឱ្យបាននូវចីរភាពនិងបរិយាបន្នកម្ម នៃការអភិវឌ្ឍសេដ្ឋកិច្ច-សង្គម ទាំងក្នុងក្របខណ្ឌតំបន់ និងសកល។
លើមូលដ្ឋានទាំងនេះ កម្ពុជានឹងផ្តល់អាទិភាពដូចជា ទី១ ស្តារឡើងវិញ ដោយកសាងមូលដ្ឋានរឹងមាំ សម្រាប់សេដ្ឋកិច្ចវិលទៅមាគ៌ានៃកំណើនឡើងវិញ ដោយផ្តោតលើការធានាសុវត្ថិភាព ការគ្រប់គ្រងផលប៉ះពាល់ ការរក្សាលំនឹង និងការជំរុញឱ្យងើបឡើងវិញនៃធុរកិច្ចដែលមានសក្តានុពល ជាពិសេសក្នុងវិស័យដែលទទួលរងផលប៉ះពាល់ខ្លាំង និងការបង្កើតការងារបន្ថែមឱ្យបានច្រើន និងឆាប់រហ័ស ទី២ កែទម្រង់ ដោយបន្តដាក់ចេញវិធានការកែទម្រង់សំខាន់ៗ ជារចនាសម្ព័ន្ធ ដែលរួមមាន ការធ្វើឱ្យប្រសើរឡើងនូវបរិយាកាស និងកិច្ចសម្រួលពាណិជ្ជកម្ម, ការវិនិយោគនិងធុរកិច្ច ការជំរុញ និងការអភិវឌ្ឍន៍ឌីជីថលូបនីយកម្មក្នុងប្រព័ន្ធសេដ្ឋកិច្ច ទាំងវិស័យសាធារណៈ និងវិស័យឯកជន។
ទី៣ កសាងភាពធន់ដោយពង្រឹងការត្រៀមខ្លួន និងការឆ្លើយតបទៅនឹងជំងឺ ឬស្ថានភាពស្រដៀងគ្នា ដែលអាចផ្ទុះឡើងនាពេលអនាគត ដោយផ្តោតលើការអភិវឌ្ឍន៍ប្រព័ន្ធសុខាភិបាល និងប្រព័ន្ធគាំពារសង្គម ដែលរឹងមាំ មានប្រសិទ្ធភាពនិងការធានានូវចីរភាព និងបរិយាបន្នកម្មនៃការស្តារ និងការអភិវឌ្ឍន៍សេដ្ឋកិច្ច-សង្គម៕

អ្នកជំនាញអចលនទ្រព្យរំពឹងថាក្រុងព្រះសីហនុនឹងទទួលបានការវិនិយោគកាន់តែច្រើននាពេលខាងមុខ

ដោយៈវឌ្ឈនៈ
ភ្នំពេញៈ ចាប់តាំងពីមានការចាកចេញរបស់ជនជាតិចិន ពីក្រុងព្រះសីហនុនិងរហូតមកដល់វិបត្តិកូវីដ១៩ គម្រោងវិនិយោគថ្មីៗនៅក្នុងទឹកដីខេត្តព្រះសីហនុ ត្រូវបានគេមើលឃើញថា មានសភាពនៅទ្រឹងបន្តិច ប៉ុន្តែអ្នកជំនាញនៃវិស័យអចលនទ្រព្យកម្ពុជា បានជឿជាក់និងរំពឹងថា ការវិនិយោគនៅក្នុងក្រុងព្រះសីហនុ នឹងទទួលបានឡើងវិញនៅពេលចប់វិបត្តិ។

ស្ថាបនិកនិងនាយកក្រុមហ៊ុនឃីរៀលអេស្ទេត លោកសន សៀបបានមានប្រសាសន៍ក្នុងសន្និសីទសារព៌តមានស្តីពីបច្ចុប្បន្នភាពនៃទីផ្សារអចលនវត្ថុ ក្នុងអំឡុងវិបត្តិកូវីដ១៩នាព្រឹកថ្ងៃទី២០ ឧសភានេះថា បន្ទាប់ពីវិបត្តិត្រូវបានគ្រប់គ្រងឆ្នាំក្រោយៗនឹងមានការវិនិយោគថ្មីៗ នៅក្នុងខេត្តព្រះសីហនុ ពីព្រោះបច្ចុប្បន្ននេះ ខេត្តព្រះសីហនុមានការកសាងហេដ្ឋារចនាសម្ព័ន្ធ ទាំងក្នុងខេត្តនេះផ្ទាល់ និងតភ្ជាប់ពីរាជធានីភ្នំពេញ ដែលមានផ្លូវល្បឿនលឿនផងដែរ។

លោកបន្តថា “មិនតែប៉ុណ្ណោះ ខេត្តនេះក៏មានឆ្នេរខ្សាច់ កោះស្រស់ស្អាតជាច្រើនកំពុងរៀបចំហេដ្ឋារចនាសម្ព័ន្ធ និងមានការអភិវឌ្ឍក្នុងកោះទាំងនោះជាបន្តបន្ទាប់”។

លោកបន្តថាក្រៅពីនេះ នៅខេត្តព្រះសីហនុ ក៏មានតំបន់សេដ្ឋកិច្ចពិសេសសំខាន់ៗដូចជាតំបន់សេដ្ឋកិច្ចពិសេសក្រុងព្រះសីហនុ តំបន់សេដ្ឋកិច្ចស្ទឹងហាវ និងតំបន់សេដ្ឋកិច្ចកំពុងរៀបចំជាបន្តបន្ទាប់ ហើយតំបន់សេដ្ឋកិច្ចពិសេសនោះទាំងភាគច្រើន ជាការវិនិយោគរបស់វិនិយោគិនចិន។

លោកបន្តថា “ដូច្នេះក្រុងព្រះសីហនុ អាចនឹងក្លាយជាតំបន់ឧស្សាហកម្មដ៏មានសក្ដានុពលនៅពេលអនាគត”។លោកបន្តថា “នៅពេលចប់វិបត្តិនៃកូវីដ១៩ ខ្ញុំជឿជាក់ថា រលកវិនិយោគទី២ ទី៣នឹងចាប់ផ្ដើមនៅក្នុងខេត្តព្រះសីហនុ ហើយនឹងធ្វើឱ្យខេត្តនេះកាន់តែមានសន្ទុះអភិវឌ្ឍន៍ទៅមុខជាបន្តបន្ទាប់ទៀត”។

លោកលឹម សុជាតិប្រធានក្រុមប្រឹក្សាភិបាលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាក៏បានលើកឡើងផងដែរថា រាជរដ្ឋាភិបាលបានតម្រង់ទិសយកខេត្តព្រះសីហនុជាប៉ូលមួយ នៃការអភិវឌ្ឍឧស្សាហកម្ម ហើយការអភិវឌ្ឍក្នុងខេត្តមួយនេះ យើងបានមើលឃើញហើយថា មានគម្រោងអភិវឌ្ឍន៍ជាច្រើន កំពុងបន្តការអភិវឌ្ឍរបស់ខ្លួនដោយគម្រោងខ្លះបញ្ចប់ និងខ្លះទៀតកំពុងបន្ត។ ម្យ៉ាងទៀតក្នុងខេត្តនេះក៏មានការទាក់ទាញខាងវិស័យទេសចរណ៍។ ដូច្នេះខេត្តនេះ នឹងទទួលបានការវិនិយោគទាំងទេសចរណ៍ ឧស្សាហកម្មនិងអចលនទ្រព្យ។

តាមផែនការរបស់រដ្ឋាភិបាលកន្លងមកបានឲ្យដឹងថា រដ្ឋាភិបាលនឹងអភិវឌ្ឍន៍យកខេត្តនេះតាមគំរូទីក្រុងស៊ិនជិនរបស់ចិន ដែលទីក្រុងមួយនេះ គឺជាទីក្រុងឧស្សាហកម្មដ៏រីកចម្រើនមួយរបស់ចិន។ បណ្ដុំរោងចក្រឧស្សាហកម្មធំៗ នៅក្នុងទីក្រុងស៊ិនជិនរបស់ចិនគឺជាផ្នែកមួយ នៃការនាំចេញផលិតផលរបស់ចិន ទៅកាន់ទីផ្សារពិភពលោកផងដែរ។ម្យ៉ាងទៀតស៊ិនជិន ក៏ជាទីក្រុងគំរូមួយរបស់ប្រទេសចិនទៀតផង៕