ខេត្តព្រះសីហនុនឹងស្វាគមន៍ជើងហោះហើរឆ្លងទ្វីបលំដាប់ពិភពលោកនៅឆ្នាំ២០២២ខាងមុខនេះ

ដោយៈ ប៊ី

ព្រះសីហនុ ៖ ក្រុមហ៊ុនសាងសង់ផ្លូវរត់ព្រលានយន្ដហោះកងកេង ដែលជាផ្លូវរត់វែងជាងគេក្នុងប្រទេសកម្ពជា អះអាងថា គម្រោងសាងសង់នេះនឹងបញ្ចប់នៅដើមឆ្នាំ២០២២ ដែលអនុញ្ញាតឱ្យយន្ដហោះធំៗហោះចម្ងាយឆ្ងាយ រាប់ទាំងយន្ដហោះរបស់ប្រធានាធិបតីអាមេរិកអាចមកចុះចតនៅកម្ពុជាផងដែរ។

ផ្លូវរត់ព្រលានយន្ដហោះកងកេង ខេត្ដព្រះសីហនុ ដែលជាផ្លូវរត់វែងជាងគេក្នុងប្រទេសកម្ពជានោះ ត្រូវបានរាជរដ្ឋាភិបាលផ្ដល់សិទ្ធិឲ្យក្រុមហ៊ុនវ៉ាងស៊ីរបស់ប្រទេសបារាំងជាអ្នកសាងសង់។

ក្រុមហ៊ុនវ៉ាងស៊ីបានធានាថានឹងធ្វើឲ្យរួចរាល់នៅក្នុងរង្វង់ឆ្នាំ២០២១ ឬដើមឆ្នាំ២០២២ ដូច្នេះយន្ដហោះធំៗ ដែលមកពីឆ្ងាយរាប់ទាំងយន្ដហោះរបស់ប្រធានាធិបតីអាមេរិកក៏អាចមកចុះចតនៅប្រទេសកម្ពុជាបានដែរ។

លោកគួច ចំរើនអភិបាលខេត្តព្រះសីហនុមានប្រសាសន៍ថា ព្រលានយន្ដហោះកងកេង ខេត្តព្រះសីហនុ គឺជាព្រលានយន្ដហោះ ដែលមានប្រវែងរត់វែងជាងគេនៅក្នុងប្រទេសកម្ពុជា ហើយមកដល់ពេលនេះបានកសាងផ្លូវរត់ ផ្លូវចុះចតសម្រាប់យន្ដហោះ។

លោកបានឲ្យដឹងទៀតថា បើគ្មានការវាយប្រហារពីជំងឺកូវីដ-១៩នោះទេ សង្ឃឹមថាផ្លូវរត់ព្រលានយន្ដហោះកងកេងនឹងអាចរួចរាល់នៅក្នុងឆ្នាំ២០២២ ដែលជាការគាំទ្របន្ថែមទៀតសម្រាប់ការវិនិយោគ និងការអភិវឌ្ឍ នៅក្នុងខេត្តព្រះសីហនុ។

រាជរដ្ឋាភិបាល បានកំណត់ក្នុងផែនការរៀបចំដែនដី ខេត្តព្រះសីហនុក្នុងចក្ខុវិស័យឆ្នាំ២០៣០ គឺរៀបចំ និងអភិវឌ្ឍខេត្តព្រះសីហនុជាប៉ូលអភិវឌ្ឍន៍ជាតិប្រកបដោយចីរភាពនៅតំបន់ឆ្នេរសមុទ្រកម្ពុជា តាមរយៈការអភិវឌ្ឍទីក្រុងទំនើប រមណីយដ្ឋានឆ្នេរសមុទ្រ ដែលស្អាតបំផុតលើសកលលោក។

ជាពិសេស ជាតំបន់សេដ្ឋកិច្ចពិសេស គំរូពហុបំណង ច្រកចេញចូលអន្តរជាតិ មជ្ឈមណ្ឌលកំណើនជាតិ មជ្ឈមណ្ឌលភស្តុភារកម្មជាតិ ដោយមានទំនាក់ទំនងជាមួយទីផ្សារអាស៊ាន និងទីផ្សារសកលលោក និងជាមជ្ឈមណ្ឌលឧស្សាហកម្ម ផលិតកម្មបែបបច្ចេកវិទ្យាទំនើប ដែលមានសុខដុមនីយកម្ម ជាមួយនឹងបរិស្ថានរស់នៅល្អប្រសើរ៕

អាជ្ញាធរខេត្តកំពតពន្លឿនការស្ថាបនាហេដ្ឋារចនាសម្ព័ន្ធសំខាន់ៗរួមមានផ្លូវថ្នល់ និងសួនកម្សាន្តឱ្យរួចរាល់មុនបុណ្យចូលឆ្នាំខ្មែរ

ដោយ ៖ រ៉ាណេត

កំពត ៖ រដ្ឋបាលខេត្តកំពតបានជំរុញឱ្យក្រុមហ៊ុនទទួលម៉ៅការសាងសង់ និងស្ថាបនាផ្លូវថ្នល់ រួមជាមួយគម្រោងកែលម្អរសួនកម្សាន្តនានា ជាពិសេសស្ថិតនៅស្របនឹងព្រែកកំពតឱ្យបានលឿនតាមដែលអាចធ្វើទៅបាន ដែលយ៉ាងណាឱ្យរួចរាល់មុនពិធីបុណ្យចូលឆ្នាំខ្មែរខាងមុខនេះដើម្បីស្វាគមន៍ទេសចរជាតិ និងអន្តរជាតិ។

អភិបាលខេត្តកំពត លោកជាវ តាយ កាលពីរសៀលថ្ងៃទី២៥ ខែកុម្ភៈ ឆ្នាំ២០២១បានជំរុញដល់មន្ត្រីពាក់ព័ន្ធឱ្យជួយពន្លឿនក្នុងការស្ថាបនាផ្លូវបេតុងមួយខ្សែដែលស្ថិតក្នុងសង្កាត់កំពង់បាយ ក្រុងកំពត ខេត្តកំពត ដែលជាផ្លូវដ៏សំខាន់មួយឱ្យរួចនៅមុនចូលឆ្នាំខ្មែរ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ ក៏ដូចជាកាត់បន្ថយការកកស្ទះចរាចរណ៍ បន្ថែមពីលើគម្រោងកែលម្អសួននៅតាមព្រែកកំពត។

លោកជាវ តាយ បានលើកឡើងថា ផ្លូវមួយខ្សែនេះ អាចចាត់ទុកជាផ្លូវមួយមានសារៈសំខាន់ក្នុងការសម្រួល និងបញ្ចៀសការកកស្ទះចរាចរណ៍ ក៏ដូចជាការសម្រួលធ្វើឱ្យប្រសើរឡើងទាំងសណ្ដាប់ធ្នាប់ អនាម័យបរិស្ថានក្រុង សម្រាប់ប្រជាពលរដ្ឋរស់នៅតាមដងផ្លូវនេះ។ ផ្លូវមួយខ្សែនេះគឺ ជាផ្លូវលេខ៧០១ តភ្ជាប់បំបែកចេញពីផ្លូវជាតិលេខ៣ ភ្ជាប់ទៅផ្លូវបេតុង ជាយខាងជើងក្រុងកំពត ស្របនឹងផ្លូវរថភ្លើង មានប្រវែងប្រមាណជាង ៩០០ម៉ែត្រ ទទឹងមានទំហំ ១២ម៉ែត្រ ដែលគម្រោងសាងសង់ដោយចាក់បេតុងសសៃដែក មានកម្រាស់ ២តឹក មានលូអមសងខាងទំហំមាត់កាត់ ៨តឹក ជាគម្រោងថវិការបស់រដ្ឋបាលខេត្ត អនុវត្តគម្រោងដោយកងវិស្វកម្ម។ ដូចនេះ ជំនាញ អាជ្ញាធរមូលដ្ឋានពាក់ព័ន្ធ និងក្រុមហ៊ុនសាងសង់ ធ្វើយ៉ាងណាសហការគ្នាឱ្យបានល្អក្នុងដំណើរការស្ថាបនាគម្រោងផ្លូវមួយខ្សែនេះ និងប្រកបដោយលក្ខណៈបទដ្ឋានបច្ចេកទេសត្រឹមត្រូវ។ ក្រៅពីនេះត្រូវបង្កើនការជំរុញអនុវត្តន៍ឱ្យបានឆាប់ចប់មុនឱកាសបុណ្យចូលឆ្នាំប្រពៃណីជាតិខ្មែរ។

លោកជាវ តាយក៏បានក្រើនរម្លឹកដល់ចៅសង្កាត់ និងអភិបាលក្រុងកំពតផងដែរ ក្រៅពីការស្ថាបនាផ្លូវមួយខ្សែនេះ ត្រូវតែមានការសិក្សាលើគម្រោងផ្លូវនានាបន្ថែមទៀត ពិសេសត្រូវយកចិត្តទុកដាក់រៀបចំសណ្ដាប់ធ្នាប់ សោភ័ណភាព អនាម័យ លើដងផ្លូវក្នុងក្រុង រួមនឹងការយកចិត្តទុកដាក់ធ្វើការឈូសឆាយ ពង្រាបផ្លូវ សម្រួលដល់ការធ្វើដំណើរ និងការរស់នៅរបស់ប្រជាពលរដ្ឋតាមដងផ្លូវឱ្យមានលក្ខណៈល្អប្រសើរឡើងថែមទៀត។

ដោយឡែកគម្រោងស្ថាបនាសួនកម្សាន្តនៅព្រែកកំពតត្រូវបានលោកអភិបាលខេត្តបញ្ជាក់ថា “ការបង្កើតសួនច្បារថ្មី ប្រកបដោយសោភ័ណភាពមួយនេះឡើង គឺសំដៅទាក់ទាញភ្ញៀវទេសចរឱ្យមកកំសាន្ដលេងកាន់តែច្រើនឡើងថែមទៀត ខណៈដែលខេត្តកំពត គឺជាខេត្តគោលដៅទេសចរណ៍មួយក្នុងចំណោមខេត្តជាប់តំបន់មាត់សមុទ្រ”។

យ៉ាងណាក៏ដោយ លោកបានលើកឡើងថា ទោះបីជាប៉ុន្មានឆ្នាំចុងក្រោយនេះ មានភ្ញៀវទេសចរមកកំសាន្តកាន់តែកើនឡើងជាបន្តបន្ទាប់ក៏រដ្ឋបាលខេត្តកំពតនៅតែបន្តយកចិត្តទុកដាក់បន្ថែមទៀតក្នុងការអភិវឌ្ឍ និងការកែលម្អហេដ្ឋារចនាសម្ព័ន្ធនានាក្នុងក្រុងកំពត ពិសេសតាមដងផ្លូវ និងសួនច្បារសាធារណៈ ធ្វើយ៉ាងណាឱ្យក្រុងកំពតមានភាពទាក់ទាញ និងរក្សាបានតំណែងជាទីក្រុងទេសចរណ៍ស្អាតអាស៊ានបន្តទៀត៕

ការព្យាករ៖ តម្លៃអចលនទ្រព្យក្នុងប្រទេសវៀតណាម នឹងហក់ឡើង ១០ភាគរយក្នុងឆ្នាំ២០២១នេះ

ដោយៈសុខុម

ហាណូយ: យោងតាមការព្យាករថា តម្លៃអចលនទ្រព្យ នៅក្នុងប្រទេសវៀតណាម នឹងហក់ឡើងខ្ពស់រហូតដល់ទៅ១០% ក្នុងឆ្នាំ២០២១នេះបើធៀបនឹងឆ្នាំ២០២០ ។ នេះបើយោងតាមសារព័ត៌មាន The Star ចុះផ្សាយកាលពីពេលថ្មីៗនេះ។

លោក Nguyễn Văn Đính អគ្គលេខាធិការរងនៃសមាគមអចលនទ្រព្យវៀតណាម (Vietnam Real Estate Association (VNREA)) បានថ្លែងប្រាប់វេទិកាមួយកាលពីពេលថ្មីៗនេះថា ការឆ្លងរាតត្បាតវីរុសកូវីដ-១៩ បានជះផលប៉ះពាល់ខ្លាំង មកលើវិស័យអចលនទ្រព្យ បណ្ដាលឱ្យតម្រូវការក្នុងទីផ្សារដាំក្បាលចុះ។

កាលពីដើមឆ្នាំ២០២០ ទីផ្សារអចលនទ្រព្យបាននៅទ្រឹង ដោយសារការឆ្លងរាត ត្បាតវីរុសកូវីដ-១៩ ។ ជាការឆ្លើយតប រដ្ឋាភិបាលក្រុងហាណូយ បានចាត់វិធានការជាច្រើន ដើម្បីដោះស្រាយការលំបាក ដែលវិស័យមួយនេះជួបប្រទះ ដូចជា ការប្រកាសឱ្យប្រើប្រាស់លិខិតបទដ្ឋានគតិយុត្តិ សម្រាប់ការអភិវឌ្ឍនគម្រោងខុនដូ បែបសណ្ឋាគារ (Condotel) ជាដើម។

ទោះជាយ៉ាងណា ឧបសគ្គផ្លូវច្បាប់បានធ្វើឱ្យរាំងស្ទះដល់ការផ្ទត់ផ្គង់ ជាហេតុបង្កផលលំបាកទ្វេដងដល់ទីផ្សារ។

នៅក្នុងឆមាសទី២ នៃឆ្នាំ២០២០ ទោះបីជាផ្ទុះការឆ្លងរាតត្បាតវីរុសកូវីដ-១៩ ដល់ទៅ ២ រលកយ៉ាងណាក្ដី ក៏ទីផ្សារអចលនទ្រព្យវៀតណាម នៅតែទទួលបានកំណើនខ្ពស់គួរឱ្យកត់សម្គាល់ នៅពេលផ្ទះសម្បែងថ្មីៗចំនួន៦០.០០០ ផ្ទះត្រូវផ្គត់ផ្គង់ដល់ទីផ្សារ ដែលស្មើនឹង ៦៧,៥% បើធៀបនឹងឆ្នាំ២០១៩ ។

អគ្គលេខាធិការរង នៃសមាគមអចលនទ្រព្យវៀតណាម បានគូសបញ្ជាក់ថា “ឆ្នាំ២០២១ នឹងគ្មានហានិភ័យវិបត្តិ ឬពពុះអចលនទ្រព្យឡើយ ពោលគឺមានតែការរីកចម្រើន” ។ លោកបន្តថា “គម្រោងហេដ្ឋារចនាសម្ព័ន្ធនានា បូករួមជាមួយនឹងឱកាសពាណិជ្ជកម្មអំណោយផលល្អ នឹងក្លាយជាកម្លាំងចលករដ៏ទាក់ទាញ” ។

ការវិនិយោគក្នុងវិស័យអចលនទ្រព្យ នឹងបន្តរីកទៅដល់តំបន់ភ្នំនានា។ បន្ថែមពីលើនេះ អត្រាការប្រាក់ធនាគារ ដែលអាចរក្សាបានត្រឹមកម្រិតក្នុងឆ្នាំ២០២០ នឹងជួយជំរុញការវិនិយោគកាន់តែច្រើនផងដែរ។

កត្ថាចុងក្រោយ វិធានការនានាពីរដ្ឋាភិបាលក្នុងឆ្នាំ២០២១ នឹងជួយដោះស្រាយរាល់ការលំបាកសម្រាប់ទីផ្សារ។

លោក Nguyễn Thọ Tuyển ប្រធានក្រុមហ៊ុន BHS Group បានបញ្ចេញទស្សនៈវិជ្ជមានស្រដៀងគ្នានេះថា តម្លៃអចលនទ្រព្យនឹងហក់ឡើងក្នុងឆ្នាំ២០២១ ។

ចំណែកលោក Lê Hoàng Châu ប្រធានសមាគមអចលនទ្រព្យក្រុងហូជីមិញ (HCM City Real Estate Association (HoREA)) បានលើកឡើងថា ឧបសគ្គផ្លូវច្បាប់គួរតែត្រូវបានដោះស្រាយ សម្រាប់ការអភិវឌ្ឍអចលនទ្រព្យ ក្នុងប្រទេសវៀតណាម ព្រោះក្រុមហ៊ុនទាំងអស់ ចង់បានបរិយាកាសពាណិជ្ជកម្ម ដែលត្រឹមត្រូវ បើកចំហ និងអំណោយផលល្អ។

លោកបានបន្តថា “ឆ្នាំ២០២០ មានការកែប្រែជាច្រើន នៅក្នុងការតាក់តែងយន្តការច្បាប់ នៅពេលសេចក្ដីព្រាងច្បាប់ស្តីពីការវិនិយោគ និងច្បាប់ស្ដីពីការសាងសង់ត្រូវបានអនុម័ត ដោយដោះស្រាយការលំបាកបានជាច្រើន” ។ លោកបន្តថា “ខ្ញុំយល់ថា ទីផ្សារអចលនទ្រព្យក្នុងឆ្នាំ២០២១នឹងបន្តរីកចម្រើន ព្រោះប្រទេសវៀតណាម គ្រប់គ្រងការឆ្លងរាតត្បាតវីរុសកូវីដ-១៩បានហើយ។ សេដ្ឋកិច្ចរបស់វៀតណាម ក៏ទទួលបានកំណើនជាវិជ្ជមានផងដែរ” ។

ទោះជាយ៉ាងណា លោក Đặng Hùng Võ អតីតអនុរដ្ឋមន្ត្រីក្រសួងធនធានធម្មជាតិ និងបរិស្ថាន បានព្រមានថា ប្រសិនបើគ្រប់គ្រងមិនបានល្អទេនោះ វានឹងបង្កឱ្យមានវិបត្តិ ឬពពុះអចលនទ្រព្យនៅក្នុងទីផ្សារ។

លោកបានគូសបញ្ជាក់ថា “ក្នុងឆ្នាំ២០២១ ការធ្វើវិសោធនកម្មច្បាប់ ដើម្បីបំពេញចំណុចចន្លោះប្រហោង និងលុបបំបាត់វិធានត្រួតគ្នា គឺជាកិច្ចការសំខាន់បំផុតដែលយើងត្រូវធ្វើ” ៕

ក្រុមហ៊ុនដ៏ធំមួយរបស់កាណាដាប្រកាសបោះទីតាំងផលិតវត្ថុធាតុដើមនៅកម្ពុជា

ដោយៈ ម៉ាណេត

ភ្នំពេញៈ ក្រុមហ៊ុន AREV Cambodia Brands Inc ដែលក្រុមហ៊ុនបុត្រសម្ព័ន្ធរបស់ក្រុមហ៊ុនកាណាដា AREV Nanotec Brand បានចាប់ផ្តើមដំណាក់កាលដំបូង នៃប្រតិបត្តិការផលិតវត្ថុធាតុដើម ដើម្បីគាំទ្រដល់ការផលិតអាហារបំប៉នរបស់ខ្លួន នៅជិតរាជធានីភ្នំពេញ។ នេះបើយោងតាមសេចក្តីប្រកាសព័ត៌មាន របស់ក្រុមហ៊ុនកាលពីដើមសប្តាហ៍នេះ។

សេចក្តីប្រកាសដដែលបានឲ្យដឹងថា គំរោងនេះ នឹងប្រតិបត្តិការលើផ្ទៃដីទំហំ ២០ហិកតា ដែលជាមូលដ្ឋានគាំទ្រដល់ការអភិវឌ្ឍវត្ថុធាតុដើម សម្រាប់ការច្នៃប្រឌិតផលិតផលអាហារបំប៉នរបស់ខ្លួន ដែលមានលើទីផ្សារនៅក្នុងត្រីមាសទី៣ឆ្នាំនេះ។

ក្រុមហ៊ុនបានឱ្យដឹងថា សសៃផ្សិតដែលត្រូវហៅថា Mycelium គឺជាប្រភពនៃប្រូតេអ៊ីនប្រកបដោយនិរន្តរភាព ក្នុងការផលិតជាអាហារបំប៉នរបស់ខ្លួន។

ទោះបីជាយ៉ាងណាក៏ដោយ ក្រុមហ៊ុនមិនបញ្ជាក់ទីតាំងជាក់លាក់ថា តើទីតាំងប្រតិបត្តិការនេះស្ថិតកន្លែងណានោះតេ ហើយមិនបញ្ជាក់ពីទំហំទុនវិនិយោគផងដែរ។

លោក Mike Withrow នាយកប្រតិបត្តិ និងជាប្រធានក្រុមហ៊ុន AREV បាននិយាយនៅក្នុងសេចក្តីប្រកាសព័ត៌មាននេះថា“យើងបន្តកសាង និងធានានូវសង្វាក់ផ្គត់ផ្គង់គ្រឿងផ្សំរបស់យើង សម្រាប់ប្រើប្រាស់ក្នុងរូបមន្តរបស់យើង។

លោកបានថ្លែងបន្តថា “នេះពិតជាសំខាន់ណាស់ដើម្បីធានាថា យើងមានគ្រឿងផ្សំ ដែលមានគុណភាព និងអាចទទួលបាននូវវត្ថុធាតុដើម ដែលអាចទុកចិត្តបាន ដើម្បីទាញយកទៅក្នុងផលិតផលសំខាន់ៗ ដែលយើងកំពុងអភិវឌ្ឍ ដើម្បីដោះស្រាយកង្វះអាហារូបត្ថម្ភនៅក្នុងបរិបទនៃជំងឺរាតត្បាតរាត ដែលកំពុងកើនឡើងលើពិភពលោកបច្ចុប្បន្ន របស់យើង” ។

លោកបានឱ្យដឹងទៀតថា ការអភិវឌ្ឍរបស់យើង ជាមួយនឹងគំនិតផ្តួចផ្តើមកសិកម្មនៅភ្នំពេញ ដើម្បីដាំដុះ mycelium ដើម្បីធានាថាប្រភពវត្ថុធាតុដើម មិនស្ថិតក្រោមការផ្លាស់ប្តូរតម្លៃយ៉ាងខ្លាំង នៅលើទីផ្សារទំនិញអន្តរជាតិនោះទេ៕

អ្នកអភិវឌ្ឍន៍លំនៅឋាននាពេលបច្ចុប្បន្ន បាននិងកំពុងផ្តល់នូវលក្ខខណ្ឌកាន់តែពិសេស

ដោយៈ រ៉ាណេត

ភ្នំពេញៈ ស្របពេលដែលកម្ពុជា កំពុងតែជួបវិបត្តិនៃការរីករាលដាលជាសកល នៃជំងឺ Covid-19 នាពេលបច្ចុប្បន្ននេះ ក្រុមអ្នកអភិវឌ្ឍន៍លើវិស័យលំនៅឋានបានឱ្យអះអាងថា ការទិញលក់លំនៅឋាននៅតែមានតម្រូវការ ខណៈដែលម្ចាស់គម្រោងមួយចំនួនបានផ្តល់លក្ខខណ្ឌពិសេសជូនដល់អតិថិជន។

លោក ម៉ាន់ ចាន់ឌី អគ្គនាយកក្រុមហ៊ុន Premium Group ឱ្យដឹងតាមទូរស័ព្ទកាលពីរសៀលថ្ងៃទី២៥ កុម្ភៈកន្លងមកថា បើទោះបីកម្ពុជាស្ថិតនៅក្នុងវិបត្តិជំងឺ Covid-19 យ៉ាងណាក្តី តែការតម្រូវការលំនៅឋាននៅតែមានជារៀងរាល់ថ្ងៃ ជាពិសេសគឺអ្នកដែលស្វែងរកទិញទទួល បាននូវលក្ខខណ្ឌពិសេសពីម្ចាស់គម្រោង។

លោកបន្តថ្លែងថា “តម្រូវការទិញលក់លំនៅឋាននៅតែមាន ហើយស្ថិតនៅក្នុងលក្ខណពិសេស ដូចជា ទិញដោយគ្មានប្រាក់កក់ និងមានការថែមនូវសម្ភារៈប្រើប្រាស់ផ្សេងៗនៅក្នុងផ្ទះបាយ ដូចជាទូទឹកកកជាដើម” ។ លោកបន្ថែមថា “ទាំងលក្ខខណ្ឌនៃការបង់រំលស់ផ្ទះ ក៏ស្ថិតនៅក្នុងស្ថានភាពល្អប្រសើរផង” ។

តែយ៉ាងណាក៏ដោយ លោកអះអាងថា ការទិញលក់លំនៅឋាននេះ ស្ថិតនៅក្នុងស្ថានភាពយឺតយ៉ាវជាងពេលមុន ដែលមិនទាន់មានការផ្ទុះឡើយនៅជំងឺ Covid-19 កាលពីកន្លងមកនេះ។ លោកបញ្ជាក់ទៀតថា ទន្ទឹមនឹងការទិញលក់នៅតែមាន ក៏គម្រោងអភិវឌ្ឍន៍លំនៅឋាននានា នៅតែបន្តមានផងដែរ ដើម្បីឆ្លើយតបទៅនឹង តម្រូវការនេះ។

ចំណែក លោក អ៊ីន ណាង អគ្គនាយកក្រុមហ៊ុន Show Up Real Estate បានឱ្យដឹងដែរថា ជាការពិតណា តម្រូវការលំនៅឋានសម្រាប់រស់នៅនៅតែមាន ហើយមានលក្ខខណ្ឌពិសេស ខណៈការទិញលក់លំនៅឋាន សម្រាប់ធ្វើការវិនិយោគបន្តមិនទាន់មាននោះទេ។

លោកថ្លែងថា “នាពេលបច្ចុប្បន្ននេះ ម្ចាស់គម្រោងមួយចំនួន បាននឹងកំពុងបន្ធូរបន្ថយនូវលក្ខខណ្ឌពិសេស ដល់អតិថិជនរបស់ខ្លួន តាមរយៈការបោះរំលស់១០០ភាគរយ និងផ្តល់នូវសម្ភារៈប្រាស់ប្រាស់ផ្សេងៗ ហើយបើមិនបន្ធូរបន្ថយទេ យើងមានការលំបាក។

លោកបន្ថែមថា “នៅពេលដែលអ្នកអភិវឌ្ឍន៍បន្ធូបន្ថយ នូវលក្ខខណ្ឌពិសេនេះ អតិថិជន ដែលជាអ្នកស្វែងរកលំនៅឋានសម្រាប់រស់នៅ ហើយមានលទ្ធភាពគួរតែទិញទុកអោយហើយ ជាពិសេសតម្លៃក៏មានលក្ខខណៈសមរម្យ បើទៅមុខទៀត តម្លៃនឹងមានការកើនឡើង” ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្លាប់បានមានប្រសាសន៍ ថា វិបត្តិនៃជំងឺ Covid-19 មិនមែនជាឧបសគ្គ ក្នុងអភិវឌ្ឍហេដ្ឋារចនាសម្ព័ន្ធទូទាំងប្រទេសកម្ពុជានោះទេ ជាពិសេសគម្រោងលំនៅឋានដែលមានតម្លៃសមរម្យ ខណៈដែលប្រជាពលរដ្ឋកម្ពុជានៅតែមានលទ្ធភាពទិញសម្រាប់រស់នៅ៕

កូវីដ១៩ ព្រឹត្តិការណ៍២០កុម្ភៈ បានធ្វើឲ្យមនុស្សគ្រប់គ្នាខកចិត្ត និងច្របូកច្របល់អារម្មណ៍

ដោយៈ គង់ សូរិយា

ភ្នំពេញៈ ការចូលមកលងបន្លាចនៃព្រឹត្តិការណ៍ មិនធ្លាប់មានកាលពីឆ្នាំមុន ចំនួន៥ បានធ្វើឲ្យប្រជាពលរដ្ឋកម្ពុជាខកចិត្ត ច្របូកច្របល់អារម្មណ៍ ទាក់ទងនឹងព្រឹត្តិការណ៍នយោបាយផង និងបញ្ហាជាច្រើនទៀតផង។

ឆ្នាំ២០២០ កម្ពុជាបានឆ្លងកាត់រឿងរ៉ាវជាច្រើន ដែលបានធ្វើឲ្យមនុស្សខកចិត្តភ័យព្រួយ និងតក្តមាក្នុងអារម្មណ៍ ព្រឹត្តិការណ៍ទាំងនោះរួមមាន ការកកូរកកាយរបស់អតីតៈមេដឹកនាំបក្សប្រឆាំង ការចូលមកដល់នៃពេលវេលា ដកហូតប្រព័ន្ឋអនុគ្រោះពន្ឋ (EBA)ពីសហគមន៍អឺរ៉ុប ការបិទហ្គេមអនឡាញយ៉ាងតក់ក្រហល់ពីរដ្ឋាភិបាល គ្រោះទឹកជំនន់ និងការធ្លាក់ចុះសេដ្ឋកិច្ចពិភព លោកបណ្តាលមកពីជំងឺកូវីដ១៩ ពិសេសព្រឹត្តិការណ៍៣វិច្ឆិកា និង២៨វិច្ឆិកា។

ការវាយសំពងផ្លូវអារម្មណ៍នេះ បានធ្វើឲ្យមនុស្សខកចិត្ត ឈានទៅបាក់ទឹកចិត្ត និងកើតជំងឺផ្លូវចិត្ត។ ទន្ទឹមនឹងការមកដល់ជាថ្មី នៃព្រឹត្តិការណ៍២០កុម្ភៈ ដែលបាននិងកំពុងឆ្លងចូលសហគមន៍ បានធ្វើឲ្យបញ្ហាជាច្រើនលេចឡើងជាថ្មី សេដ្ឋកិច្ចដែលរំពឹងថានឹងងើបឡើងវិញនៅឆ្នាំ២០២១នេះ ត្រូវបានទទួលរងការវាយដំយ៉ាងដំណំជាថ្មី ពិសេសសុខភាពផ្លូវចិត្តរបស់ពលរដ្ឋកាន់តែទ្រុឌទ្រោម។

លោកឧកញ៉ាវេជ្ជបណ្ឌិតគួច ម៉េងលីប្រធានក្រុមប្រឹក្សាភិបាលនៃក្រុមហ៊ុនម៉េងលី ជេ គួចគ្រុបបានមានប្រសាសន៍ថា ប្រជាពលរដ្ឋកម្ពុជាប្រមាណ៨០ភាគរយ បានកើតជំងឺផ្លូវចិត្តក្នុងកំឡុងវិបត្តិ២ឆ្នាំកន្លងមកនេះ ដោយសារបញ្ហាវាយលុកជាច្រើន ការជំពាក់បំណុលធនាគារ ដោយសារប្រាក់ចំណូលមានការធ្លាក់ចុះជាដើម។

លោកវេជ្ជបណ្ឌិតបានបន្តថា បច្ចុប្បន្នលោកសង្កេតឃើញថា សឹងតែ៨០ភាគរយនៃប្រជាជនកម្ពុជា មានបញ្ហាផ្លូវចិត្តដែលបណ្ដាលមកពីកត្តាជីវភាពថ្ងៃ ឬបញ្ហាហិរញ្ញវត្ថុនេះឯង។ លោកឧកញ៉ាបានបន្តថា ប្រជាជនកម្ពុជាមួយចំនួនធំ នៅខ្វះខាតចំណេះដឹងទូទៅជុំវិញសង្គមរស់នៅ និងខ្វះសាធាតុបំប៉ន់ក្នុងអាហារទទួលទាន រាងកាយ ទើបធ្វើឱ្យចិត្តពួកគាត់ ពុំបានរីកចម្រើនល្អនោះឡើយ។

លោកបន្តថា “កត្តាខ្វះខាតនេះហើយ បានរុញគាត់ឱ្យខិតមកកាន់តែកៀក មាត់ជ្រោះនៃអវិជ្ជា ឆាប់ខឹងក្រោធ បាក់បែក ឈ្លោះទាស់ និងរស់នៅដោយពុំយល់ហេតុ និងផលបានល្អប្រសើរ” ។

ជាមួយគ្នានេះ លោកយិន លាងគង់ សហស្ថាបនិក និងជាអគ្គនាយកគេហទំព័រPropertyarea.asia ដែលបានតាមដានដំណើរវិវត្តន៍ពីសង្គមបានមានប្រសាសន៍ថា ពិត ហើយ ឆ្នាំ២០២០ និងឆ្នាំ២០២១នេះ មនុស្សជុំវិញពិភពលោក ពិតជាជួបសោកនាដកម្មផ្លូវចិត្តផង ផ្លូវកាយផង ដោយសារការបាត់បង់សមាជិកគ្រួសារ ការបាត់បង់ផលប្រយោជន៍ផ្នែកសេដ្ឋកិច្ច ការតក់ស្លុតផ្លូវអារម្មណ៍ និងការខកចិត្តមិនធ្លាប់មាន។

លោកបន្តថា “វាជាសោកនាដកម្មមួយ វាជាបញ្ហាខកចិត្តមួយ ទាំងប្រជាជនកម្ពុជា និងប្រជាជននៅលើពិភពលោក” ។ លោកបន្តថា “ខ្ញុំសង្ឃឹមប្រមុខរដ្ឋាភិបាល នឹងអាចគ្រប់គ្រងព្រឹត្តិការណ៍២០ កុម្ភៈបានឆាប់ៗនេះ ។ ខ្ញុំជឿជាក់លើសម្តេចតេជោ និងការចូលរួមពីពលរដ្ឋកម្ពុជាគ្រប់គ្នា ដើម្បីបង្ការទប់ស្កាត់ជំងឺនេះ” ៕

សម្លេងពីមូលដ្ឋាន៖ តំបន់ជាយក្រុងកំពង់ស្ពឺកំពុងមានសន្ទុះទីផ្សារដីធ្លី

ដោយៈរ៉ាណេត

ភ្នំពេញៈ ដីធ្លីនៅតាមតំបន់ជាយក្រុងនៃខេត្តកំពង់ស្ពឺង បាននិងកំពុងមានសន្ទុះរីកចំរើនដីធ្លី តាមរយៈការពុះដីឡូតិ៍លក់ និងដីគម្រោងធំៗ សម្រាប់សាងសង់រោងចក្រសហគ្រាសផ្សេងៗ ខណៈខេត្តមួយនេះ ត្រូវបានគេចាត់ទុកជាខេត្តដែលមានសក្តានុពលខ្ពស់លើការទាក់វិនិយោគ។

លោកស៊ិន សុផា អ្នកលក់ដីឡូតិ៍ប្រចាំក្រុងកំពង់ស្ពឺ កាលពីថ្ងៃទី២៤ ខែកុម្ភៈ ឱ្យដឹងថា ក្នុងរយៈពេលប៉ុន្មានឆ្នាំចុងក្រោយនេះ និន្នាការពុះដីឡូតិ៍លក់ និងដីសម្រាប់វិនិយោគនៅតាមជាយក្រុងខេត្តកំពង់ស្ពឺ មានការរីកចំរើនយ៉ាងខ្លាំង ខណៈបច្ចុប្បន្ននេះ តម្លៃដីឡូតិ (៥mx២០m) ជាមធ្យមតម្លៃជិត៤ពាន់ដុល្លារអាមេរិក ជាពិសេសនៅតាមបណ្តោយផ្លូវចេញពីក្រុង។

លោកស៊ិន សុផា ពន្យល់ថា “មូលហេតុដែលធ្វើឱ្យដែលធ្វើឱ្យដីធ្លី នៅតាមជាយក្រុងនេះ មានសក្តានុពលខ្ពស់ដោយសារ មានគម្រោងសាងសង់រោងចក្រ សហគ្រាស ឃ្លាំង និងគម្រោងវិនិយោគផ្សេងៗ ដែលបង្កភាពងាយស្រួល និងផ្តល់ឱកាសការងារធ្វើជូនប្រជាពលរដ្ឋ” ។

លោកថ្លែងថា បច្ចុប្បន្ននេះ មានគម្រោងអភិវឌ្ឍន៍ដីឡូតិ៍ជាច្រើន បាននិងកំពុងមានវត្តមាននៅតាមជាយក្រុងកំពង់ស្ពឺនេះ ហើយអនាគត តំបន់ជាយក្រុងនេះ នឹងបន្តមានសក្តានុពលថែមទៀត ហើយតម្លៃវិញក៏នឹងបន្តឡើងថ្លៃទៀត នៅពេលមនុស្សមករស់នៅកាន់ច្រើន។

លោក វ៉ី សំណាង អភិបាលខេត្តកំពង់ស្ពឺបានឱ្យដឹងថា ខេត្តកំពង់ស្ពឺគឺជាខេត្តមួយនៅជាប់នឹងទីក្រុងភ្នំពេញ ហើយមានប្រព័ន្ធហេដ្ឋរចនាសម្ព័ន្ធផ្លូវជាតិ ឆ្លងកាត់ជាច្រើនតភ្ជាប់ទៅកាន់ខេត្តក្រុងសំខាន់នានា និងជាចរន្តសេដ្ឋកិច្ចដ៏សំខាន់ ដែលធ្វើឱ្យមានការវិនិយោគលើវិស័យអចលនទ្រព្យ ជាច្រើនជាពិសេសគម្រោងដីឡូតិ៍។

លោកថ្លែងថា “គម្រោងវិនិយោគ កើតមានជាបន្តបន្ទាប់នេះ បានជំរុញនិងលើកមុខមាត់ខេត្តកំពង់ស្ពឺ ឱ្យកាន់តែមានសក្តានុពល ប្រែក្លាយជាតំបន់ប្រមូលផ្តុំដោយ រោងចក្រ ឧស្សាហកម្ម ស្របពេលដែលអ្នក ជំនាញអចលនទ្រព្យលើកឡើងថាចរន្តទិញ លក់ដីធ្លី ក៏មានការកើនឡើងផងដែរ” ។

លោកវ៉ី សំណាង បន្តថា បច្ចុប្បន្ននេះ ចំពោះសក្តានុពលខេត្តកំពង់ស្ពឺ ទាំងកត្តាភូមិសាស្ត្រ និងប្រជាសាស្ត្របានទាក់ទាញអ្នកវិនិយោគទុន មកបណ្ដាក់ទុនវិនិយោគកាន់តែច្រើន ឡើងពីមួយថ្ងៃទៅមួយថ្ងៃ។

លោកវ៉ី សំណាង បានបន្ថែមថា សក្តានុពលនេះ គឺដោយចង់បង្ហាញពីបុគ្គលិកលក្ខណៈរបស់ប្រជាជនខេត្តកំពង់ស្ពឺ ដោយមានចរិតស្លូតបូត និងខិតខំអំណត់តស៊ូធ្វើការងារ ព្រមទាំងមានភាពស្មោះត្រង់ ហើយកត្តាភូមិសាស្ត្រខេត្តកំពង់ស្ពឺ ជាខេត្តមួយមានផ្លូវជាតិឆ្លងកាត់ជាច្រើន ពិសេសផ្លូវជាតិលេខ៤ ឆ្លងកាត់ដែលបង្កលក្ខណៈងាយស្រួលនាំផលិតផលចេញនិងនាំចូល៕

អ្នកវិនិយោគពីទីក្រុងហុងកុងក្លាយជាវិនិយោគិនបរទេសធំជាងគេទី៥ នៅអង់គ្លេស

ដោយៈ ប៊ី

ក្រុងឡុងដ៏ៈ ភ្នាក់ងារអចលនទ្រព្យជាច្រើនបាននិយាយថា ប្រជាជនហុងកុងកំពុងទិញផ្ទះ និងអាផាតមិនជាច្រើន ដើម្បីជួលបន្ត ក្នុងការរកប្រាក់ចំណូលនៅអង់គ្លេស ដែលជានិន្នាការមួយ ស្របគ្នានឹងអ្វីដែលមនុស្សជាច្រើនរំពឹងថា នឹងក្លាយជារលកនៃការធ្វើចំណាកស្រុក បន្ទាប់ពីចិនបានអនុម័តច្បាប់សន្តិសុខជាតិកាលពីឆ្នាំមុន។

យោងតាមការចេញផ្សាយរបស់សារព័ត័ត៌មាន CNA នៅថ្ងៃទី២៥ ខែកុម្ភៈ ឆ្នាំ២០២១ បានឱ្យដឹងថា ប្រជាជនហុងកុងបានក្លាយជាវិនិយោគិនបរទេស ធំជាងគេទី៥នៅកណ្តាលទីក្រុងឡុងដ៏ កាលពីខែសីហាឆ្នាំមុន ហើយបាននិងកំពុងជំរុញឱ្យតម្លៃអចលនទ្រព្យឡើងថ្លៃ នៅតាមបណ្តាតំបន់មួយចំនួន ដែលមានការពេញនិយម នៅខាងក្រៅរាជធានីរបស់ចក្រភពអង់គ្លេស។

ប៉ុន្តែរលកថ្មីនៃការទិញអចលនទ្រព្យនេះ ក៏រួមបញ្ចូលផងដែរនូវប្រជាជនហុងកុងមួយចំនួន ដែលកំពុងប្រមូលលុយដើម្បីវិនិយោគ ដែលនេះជានិន្នាការមួយ ដែលភ្នាក់ងារអចលនទ្រព្យរំពឹងថា នឹងបន្តកើនឡើង ខណៈប្រជាជនហុងកុង ដែលមានជីវភាពមធ្យមកាន់តែច្រើន បានពិចារណាចាកចេញទៅចក្រភពអង់គ្លេស ហើយសម្លឹងមើល និងបង្កើតប្រភពប្រាក់ចំណូល មុនចាកចេញពីហុងកុង។

លោក Guy Bradshaw ប្រធានក្រុមហ៊ុន Sotheby’s International Realty បានប្រាប់សារព័ត៌មានរ៉យទ័រថា “វាក្លាយជានិន្នាការមួយទៅហើយ ក្នុងរយៈពេលប្រាំមួយខែកន្លងមកនេះ។ ខ្ញុំបានចូលរួមនៅក្នុងការសន្ទនាគ្នា និងការហៅទូរស័ព្ទបន្ថែមជាមួយប្រជាជននៅហុងកុង ទាក់ទងទុនវិនិយោគនអង់គ្លេស” ។

រដ្ឋាភិបាលអង់គ្លេសកំពុងផ្តល់ទិដ្ឋាការថ្មី ដល់អ្នកកាន់លិខិតឆ្លងដែនហុងកុង ដែលផ្តល់ឱ្យពួកគេនូវឱកាស ដើម្បីក្លាយជាពលរដ្ឋអង់គ្លេស ដែលជាការផ្លាស់ប្តូរមួយ បន្ទាប់ពីច្បាប់សន្តិសុខជាតិរបស់ចិន បានធ្វើឡើងសម្រាប់ទីក្រុងហុងកុង។

ប្រាក់ចំណូលថេរពីការជួលអចលនត្រព្យ នឹងមានប្រយោជន៍ក្នុងការដាក់ពាក្យសុំសញ្ជាតិ ព្រោះអ្នកកាន់លិខិតឆ្លងហុងកុង ត្រូវការបញ្ជាក់ថា ពួកគេអាចផ្តល់ការគាំទ្រផ្នែកហិរញ្ញវត្ថុសម្រាប់ខ្លួនគេ យ៉ាងហោចណាស់រយៈពេល ៦ខែ។

ទីក្រុងឡុងដ៏បានប៉ាន់ប្រមាណថា ប្រជាជនហុងកុងជាង ៣០ម៉ឺននាក់ អាចធ្វើអន្តោប្រវេសន៍ ក្នុងរយៈពេល៥ឆ្នាំខាងមុខ ហើយធនាគារអាមេរិករំពឹងថា ការផ្លាស់ប្តូរលំនៅដ្ឋានរបស់ប្រជាជនហុងកុង ទៅអង់គ្លេស អាចនឹងធ្វើឱ្យមានរំហូរមូលធន ចេញពីទីក្រុងហុងកុងចំនួន៣៦ពាន់លានដុល្លារនៅឆ្នាំ២០២១ ។

ខណៈប្រជាជនហុងកុង បានក្លាយជាអ្នកទិញផ្ទះយ៉ាងសកម្មនៅអង់គ្លេស ភ្នាក់ងារអចលនទ្រព្យនិយាយថា ថ្មីៗនេះមានការចាប់អារម្មណ៍កាន់តែខ្លាំង ក្នុងការជួលអាផាតម៉ិននិងផ្ទះចាស់៕

តើតំបន់អាស៊ានបានតភ្ជាប់ខ្សែរថភ្លើង និងអភិវឌ្ឍន៍បែបណាក្នុងការធ្វើសមាហរណកម្មសេដ្ឋកិច្ចជាមួយប្រទេសចិន

ដោយៈសហការី

ភ្នំពេញៈ អាស៊ាន និងមហាយក្សចិនបាន និងកំពុងខិតកៀកគ្នាកាន់តែខ្លាំង ទាំងធនធានមនុស្ស ពាណិជ្ជកម្ម និងការតភ្ជាប់លើ់ប្រព័ន្ឋហេដ្ឋារចនាសម្ព័ន្ឋ ដែលបច្ចុប្បន្នប្រទេសមួយចំនួន៥ ក្នុងតំបន់នេះ បាននិងកំពុងតភ្ជាប់ប្រព័ន្ឋដឹកជញ្ជូនតាមផ្លូវដែក ដើម្បី លំហូរទេសចរណ៍ ពាណិជ្ជកម្ម និងការវិនិយោគ។

ប្រទេសឡាវ

ទី១ ប្រទេសដែលមានព្រំប្រទល់ជាប់គ្នានេះ កំពុងសាងសង់ខ្សែរថភ្លើងល្បឿនលឿន ដំណើរដោយអគ្គិសនីរបស់ប្រទេសឡាវ ជាផ្លូវដែកដំបូងគេរបស់ប្រទេសឡាវ តភ្ជាប់ទីក្រុងវៀងចន្ទន៍ ជាមួយទីក្រុងបាងកក និងគុនមីង ប្រទេសចិន។

ផ្លូវដែកវៀងច័ន្ទបូថេនមានប្រវែង ៤១៤គីឡូម៉ែត្រ។ ផ្លូវដែកនេះដើរដោយថាមពលអគ្គីសនី ដែលកំពុងសាងសង់នៅក្នុងប្រទេសឡាវ តភ្ជាប់រវាងរដ្ឋធានីវៀងចន្ទន៍ និងទីក្រុងតូចបូថេន នៅតាមព្រំដែនជាមួយប្រទេសចិន ដែលវាតភ្ជាប់ជាមួយផ្លូវដែកជាតិរបស់ប្រទេសចិន គឺបណ្តាញ និងស្ថានីយសំខាន់របស់ទីក្រុងគុនមីង។

ទី២, ផ្លូវដែកល្បឿនលឿន ពីប្រទេសឡាវទៅកាន់ទីក្រុងបាងកក

ទាក់ទងទៅនឹងផ្លូវដែកឡាវ ដែលបានពិពណ៌នាខាងលើ គឺការសាងសង់ផ្លូវដែកល្បឿនលឿន ដែលនឹងតភ្ជាប់ជាមួយទីក្រុងបាងកក ជាមួយខេត្តនគររាជសីមា ហើយបន្ទាប់មកលាតសន្ធឹងទៅណុងខៃ (Nong Khai) ហើយភ្ជាប់ទៅនឹងប្រព័ន្ធផ្លូវដែករបស់ឡាវ។

ប្រទេសមីយ៉ាន់ម៉ា

ទី៣, ប្រទេសមីយ៉ាន់ម៉ា ក៏មានផែនការសាងសង់ផ្លូវដែកតភ្ជាប់ជាមួយប្រទេសចិន ដើម្បីធ្វើសមហារណកម្មប្រជាជនផង និងពាណិជ្ជកម្មផងដែរ។ ប្រទេសចិន បានវិនិយោគ រោងចក្រផលិតទំនិញតម្លៃថោក ជាមួយនឹងតំបន់ឈូងសមុទ្របេងហ្គាល់ អាចចូលទៅកាន់តំបន់សេដ្ឋកិច្ច ពិសេសមីកក្យូភូរបស់មីយ៉ាន់ម៉ា។

តំបន់សេដ្ឋកិច្ចពិសេស Kyauk Phyu មានទំហំ ៦០០ហិកតា តំបន់សេដ្ឋកិច្ចពិសេសរបស់ប្រទេសមីយ៉ាន់ម៉ា កំពុងត្រូវបានអភិវឌ្ឍនៅលើកោះ Ramree ក្នុងរដ្ឋរ៉ាក់ឃីន ដោយបានចាប់ផ្តើមការងារសាងសង់ កាលពីខែកញ្ញាឆ្នាំ២០១៣ ។

ទី៤ តំបន់ទេសចរណ៍លំដាប់ផ្កាយ៦ របស់អាស៊ាននៅប្រទេសឥណ្ឌូនេស៊ី

ទីក្រុង MNC Lido City គឺជាតំបន់រស់នៅ បែបពាណិជ្ជកម្ម ការកម្សាន្ត និងតំបន់រមណីយដ្ឋានមានទំហំ ៣.០០០ ហិកតានៅទីក្រុង Lido ខេត្ត Bogor ភាគខាងលិចកោះជ្វា ដែលនៅជាប់ខេត្ត DKI Jakarta និង Banten។

ទីក្រុងនេះ មានទីតាំងប្រហែល ៦០គីឡូម៉ែត្រ តភ្ជាប់ពីទីក្រុងចាការតា គម្រោងទីក្រុង MNC Lido City អាចទៅដល់ដោយផ្ទាល់តាមរយៈផ្លូវ Bocimi Toll ដែលមានចំងាយតែមួយម៉ោងពីចាការតា។

គំរោងនេះ ត្រូវបានកំណត់ជាគោលដៅលំដាប់ពិភពលោក MNC Lido city រួមមានរមណីយ ដ្ឋានឧទ្យានកម្សាន្តសណ្ឋាគារលំដាប់ផ្កាយ៤ ផ្កាយ៥ និងសណ្ឋាគារលំដាប់ផ្កាយ៦ វីឡាប្រណីតនិងខុនដូ PGA ទីលានវាយកូនហ្គោល ១៨រន្ធ ដែលរចនាដោយអេរីនីអេលស៍។ កន្លែងស្នាក់នៅផ្តាច់មុខការលក់រាយ ការបរិភោគ ការកំសាន្តសៀគ្វីអន្តរជាតិ សាកលវិទ្យាល័យមេហ្គាវ៉ាន់ និងកន្លែងគាំទ្រផ្សេងទៀត។

ទី៥ រមណីយដ្ឋានលើកោះសិប្បនិម្មិតធំជាងគេបំផុត របស់អាស៊ាននៅប្រទេសម៉ាឡេស៊ី។

រមណីយដ្ឋាន Melaka គឺជាការអភិវឌ្ឍនៅលើកោះសិប្បនិម្មិត នៅម៉ាឡាកាប្រទេសម៉ាឡេស៊ី។ ការងារអភិវឌ្ឍន៍បានចាប់ផ្តើមនៅខែកុម្ភៈឆ្នាំ២០១៤ ហើយត្រូវបានរំពឹងថានឹងបញ្ចប់នៅឆ្នាំ២០២៥ ។

ផ្នែកខ្លះនៃកន្លែងនេះត្រូវបានគេរំពឹងថា នឹងបើកដំណើរការ នៅពេលដែលជំងឺរាតត្បាត Covid បានបញ្ចប់៕

កម្ពុជា និងសម្ព័ន្ធហិរញ្ញវត្ថុប្រទេសកូរ៉េ ចុះអនុស្សារណៈយោគយល់បង្កើតសមិទ្ធផលការទូតសេដ្ឋកិច្ចថ្មី

ដោយ ៖ រ៉ាណេត

ភ្នំពេញ ៖ ក្នុងគោលបំណងបង្កើនកិច្ចសហប្រតិបត្តិការរវាងប្រទេសទាំង២ឱ្យកាន់តែស្អិតល្មួត និងផ្តល់ផលប្រយោជន៍ដល់ការធ្វើពាណិជ្ជកម្ម និងការវិនិយោគ ស្ថានឯកអគ្គរាជទូតកម្ពុជានៅកូរ៉េខាងត្បូង និងសម្ព័ន្ធហិរញ្ញវត្ថុ DGB Financial Group បានចុះហត្ថលេខាអនុស្សារណៈយោគយល់គ្នាក្នុងការផ្ដល់នូវកិច្ចសហប្រតិបត្តិការរវាងគ្នាទៅវិញទៅមក ជាសមិទ្ធផលថ្មីមួយទៀត នៃការងារការទូតសេដ្ឋកិច្ចដែលស្ថានទូតកម្ពុជាសម្រេចបាន។

លោកឡុង ឌីម៉ង់ ឯកអគ្គរាជទូតកម្ពុជាប្រចាំនៅប្រទេសកូរ៉េនាព្រឹកថ្ងៃទី២៥ ខែកុម្ភៈ ឆ្នាំ២០២១បានបញ្ជាក់ប្រាប់ថា អនុស្សារណៈ នៃការយោគយល់គ្នារវាងភាគីទាំងពីរនេះ ផ្តោតសំខាន់ទៅលើការលើកកម្ពស់ការវិនិយោគនៅក្នុងប្រទេសកម្ពុជា ក៏ដូចជា កិច្ចគាំពារផ្សេងៗដល់ពលរដ្ឋខ្មែរនៅកូរ៉េ និងការផ្ដល់ឱកាសដល់និស្សិតខ្មែរយើងបានបំពេញកម្មសិក្សានៅក្នុងធនាគារ DGB។

ឯកសារអនុស្សរណៈនេះ នឹងក្លាយជាឯកសារតម្រង់ទិស នៃកិច្ចសហប្រតិបត្តិការរវាងភាគីទាំងពីរក្នុងគោលបំណងបង្កើនចំណងមិត្តភាព និងផ្តល់ជាផលប្រយោជន៍សម្រាប់ភាគីទាំងពីរ ក៏ដូចជាសម្រាប់ប្រជាពលរដ្ឋខ្មែរ ដែលនៅក្នុងប្រទេសកូរ៉េ និងនៅក្នុងប្រទេសកម្ពុជាផងដែរ។

អនុស្សរណៈនេះផ្តោតលើចំណុចសំខាន់ៗមួយចំនួនដូចជា៖
*កិច្ចសហការរវាងភាគីទាំងពីរក្នុងការអនុវត្តកម្មវិធីសង្គមនានា ដែលមានអត្ថប្រយោជន៍ចំពោះជនជាតិខ្មែរដែលរស់នៅកូរ៉េ និងនៅកម្ពុជា
*សម្ព័ន្ធហិរញ្ញវត្ថុ DGB Financial Group ផ្តល់ឱកាសគាំទ្រដល់សិស្ស-និស្សិតកម្ពុជា អាចចូលរួមក្នុងកម្មវិធីចុះកម្មសិក្សានានានៅក្នុងប្រទេសកូរ៉េ ក៏ដូចជាផ្តល់ជូនវគ្គសិក្សា ការបំពាក់បំប៉នជំនាញផ្នែកហិរញ្ញវត្ថុ និងធនាគារ សម្រាប់សិស្ស និស្សិតកម្ពុជាផងដែរ
*សម្ព័ន្ធហិរញ្ញវត្ថុ DGB Financial Group នឹងផ្តល់នូវអត្រាការប្រាក់ទាបពិសេសសម្រាប់ពលករខ្មែរយើង ដែលមានបំណងចង់ទទួលប្រាក់កម្ចីពីធនាគារ
*សម្ព័ន្ធហិរញ្ញវត្ថុ DGB Financial Group នឹងជួយឧបត្ថម្ភដល់ស្ថានទូតកម្ពុជា ក្នុងករណីដែលស្ថានទូតកម្ពុជារៀបចំព្រឹត្តិការណ៍សំខាន់ៗណាមួយ
*ស្ថានទូតកម្ពុជា នឹងសម្របសម្រួល និងផ្តល់ការប្រឹក្សាយោបល់ចាំបាច់នានាជូនដល់សម្ព័ន្ធហិរញ្ញវត្ថុ DGB ពាក់ព័ន្ធនឹងបរិយាកាសធុរកិច្ច សង្គម សេដ្ឋកិច្ច នៅក្នុងកម្ពុជា ដើម្បីអាចជួយគាំទ្រដល់ការធ្វើធុរកិច្ច ក៏ដូចជាគម្រោងសំខាន់ៗនានារបស់សម្ព័ន្ធហិរញ្ញវត្ថុ DGB Financial Group នៅក្នុងប្រទេសកម្ពុជា។

សម្ព័ន្ធហិរញ្ញវត្ថុ DGB Financial Group នេះជាសម្ព័ន្ធដែលគ្រប់គ្រងទៅលើក្រុមហ៊ុន និងធនាគារបុត្រសម្ព័ន្ធដទៃទៀតចំនួន៨ នៅក្នុងប្រទេសកូរ៉េខាងត្បូង ដែលមានកេរ្តិ៍ឈ្មោះល្បីផងដែរ។
កាលពីពេលកន្លងទៅថ្មីៗនេះ ស្ថានទូតកម្ពុជានៅប្រទេសកូរ៉េ ក៏បានចុះអនុស្សរណៈនៃការយោគយល់មួយផ្សេងទៀតជាមួយនឹងមន្ទីរពេទ្យដ៏ល្បីមួយឈ្មោះរបស់ប្រទេសកូរ៉េ ដែលក្នុងនោះបានពាំនាំយកមកនូវអត្ថប្រយោជន៍ ជាច្រើន ក្នុងវិស័យសុខាភិបាលសម្រាប់ប្រជាពលរដ្ឋខ្មែរយើងនៅក្នុងប្រទេសកូរ៉េខាងត្បូងផងដែរ៕