ក្រុមហ៊ុនបដិសណ្ឋារកិច្ចអន្តរជាតិធំមួយនឹងបើកដំណើរសណ្ឋាគាររបស់ខ្លួន នៅកម្ពុជានៅដើមឆ្នាំក្រោយ

ដោយៈ ម៉ាណេត
ភ្នំពេញៈ ក្រុមហ៊ុនOakwood ដែលជាក្រុមហ៊ុនបដិសណ្ឋារកិច្ចធំមួយ នៅលើពិភពលោកបានប្រកាសថា ខ្លួននឹងពន្យាពេលបើកដំណើរការសណ្ឋាគាររបស់ខ្លួន នៅខែមករា ឆ្នាំក្រោយដោយសារជំងឺកូវីដ១៩។ នេះបើយោងតាមការចេញផ្សាយរបស់កាសែតបាងកកប៉ុស្តិ៍ នៅថ្ងៃទី២៤ ខែមេសា ឆ្នាំ២០២១។

លោកស្រី Lina Abdullah ប្រធានគ្រប់គ្រងទូទៅប្រចាំតំបន់នៅប្រទេសកម្ពុជា មីយ៉ាន់ម៉ា និងថៃ នៃក្រុមហ៊ុន Oakwood បាននិយាយថា នាពេលនេះ អាជីវកម្មស្នូលរបស់យើង ផ្តោតលើភ្ញៀវស្នាក់នៅរយៈពេលយូរ ហើយនេះបានជួយយើងឱ្យរួចផុតពីវិបត្តិជំងឺរាតត្បាត ហើយជាមួយគ្នានេះដែរ ក្រុមហ៊ុននឹងពន្យាពេលបើកដំណើរការសណ្ឋាគារមួយនៅភ្នំពេញទៅដើមឆ្នាំក្រោយ។

លោកស្រីបានថ្លែងថា “ក្រុមហ៊ុនក៏គ្រោងនឹងបើកសណ្ឋាគារមួយ នៅទីក្រុងភ្នំពេ​ញប្រទេសកម្ពុជាផងដែរ ប៉ុន្តែបានពន្យារពេលកាលបរិច្ឆេទ បើកដំណើរការរហូតដល់ខែមករា ឆ្នាំក្រោយ ដោយសារតែរលកឆ្លងថ្មីនៃជំងឺកូវីដ”។

ទាក់ទងនឹងការបើកដំណើរការសណ្ឋាគារ នៅទីក្រុងភ្នំពេញ ក្រុមហ៊ុនធ្លាប់បានប្រកាសថា គ្រោងនឹងបើកដំណើរការសណ្ឋាគាររបស់ខ្លួន នៅក្នុងត្រីមាសទី២ ឆ្នាំ២០២១។

ជាមួយគ្នានេះដែរ សណ្ឋាគារ Oakwood Premier Phnom Penh នឹងមានការរួមបញ្ចូលសិល្បៈបុរាណ និងវប្បធម៌ខ្មែរ ជាមួយនឹងភាពឆើតឆាយនាពេលបច្ចុប្បន្ន ដែលផ្តល់នូវការស្នាក់បន្ទប់សណ្ឋាគារ និងអាផាតមិនចំនួន២០៧យូនីត៕