ដោយ:គង់ សូរិយា

ភ្នំពេញៈ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក​ សុខនីមបានមានប្រសាសន៍ថា ក្នុងស្ថានភាពនៃការរីករាលដាលជំងឺកូវីដ១៩នាពេលនេះ អ្នកមានធនធានច្រើននៅតែបន្តវិនិយោគអចលនទ្រព្យ ពិសេសដីធ្លី។

លោកបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៦ កុម្ភៈនេះថា ការវិនិយោគនៅក្នុងស្ថានភាពនេះ អ្នកវិនិយោគទទួលបានលក្ខខ័ណ្ឌល្អ និងតម្លៃល្អ ដោយសា​រអចលនទ្រព្យ ពិសេសតម្លៃដីធ្លីនៅក្រុងភ្នំពេញ និងតាមបណ្តាខេត្តមិនបានឡើងថ្លៃនោះទេ គឺស្ថិតក្នុងសភាពទ្រឹង ប៉ុន្តែទីតាំងខ្លះតម្លៃបានធ្លាក់ចុះ ដែលជាឳកាសល្អសម្រាប់អ្នកវិនិយោគមានធនធានច្រើន។

លោកបន្តថា “វិបត្តិកូវីដ១៩ មិនប៉ះខ្លាំងពេកដល់វិស័យនេះទេ ព្រោះស្ថានភាពថ្ងៃនេះហាក់ធូរស្រាលបន្តិច ព្រោះខ្ញុំជឿថាបន្តិចទៀត រដ្ឋាភិបាលនឹងគ្រប់គ្រងជំងឺនេះបាន ព្រោះយើងមានបទពិសោធន៍គ្រប់គ្រងបានល្អនាពេលកន្លងមក”។លោកបន្តថា “ស្ថានភាពបែបនេះអ្នកវិនិយោគពីក្រៅប្រទេស មិនទាន់ហ៊ានចូលមកទេ ដោយសារពួកគេបារម្ភពីសុខភាពរបស់ណពួកគេ ហេតុនេះមានតែអ្នកវិនិយោគក្នុងស្រុកទេ ដែលបានធ្វើសកម្មភាព”។

លោកច្រឹក សុខនីមបានបន្តថា ក្នុងពេលវេលាបែបនេះ អ្នកមានធនធានបានទិញដីទុក សម្រាប់សាងសង់គំរោងអចលនទ្រព្យ ពិសេសលំនៅដ្ឋានថ្មីៗ នៅពេលស្ថានភាពសេដ្ឋកិច្ចវិលមករកភាពប្រក្រតីវិញ។លោកបន្តថា ស្ថានភាពធូរស្រាលពេលណា វាអាស្រ័​យលើប្រសិទ្ឋភាពនៃវ៉ាក់សាំងការពារជំងឺកូវីដ១៩ ថាតើវាមានភាពជាក់លាក់ និងជឿទុកចិត្តបានកម្រិតណា។

ជាមួយគ្នានេះ ឧកញ៉ាម៉ន សុខាប្រធានសមាគមអ្នកអភិវឌ្ឍន៍ដីឡូត៍កម្ពុជាបានមានប្រសាសន៍ឲ្យដឹងនៅថ្ងៃដដែលថា គិតរហូតមកទល់ពេលនេះ ស្ថានភាពនៃការទិញលក់ក្នុងវិស័យអចលនទ្រព្យ មិនទាន់មានឃើញសញ្ញាប៉ះពាល់នៅឡើយ ដោយសារព្រឹត្តិការណ៍២០កុម្ភៈ ទើបមានរយៈពេល៦ថ្ងៃប៉ុណ្ណោះ ប៉ុន្តែបើវាអូសបន្លាយរយៈពេលវែងថែមទៀត វាអាចនឹងមានផលប៉ះពាល់ខ្លះៗមិនខាន។

លោកបន្តថា នៅក្នុងពេលមានការរីករាលដាលជំងឺនេះខ្លាំង យើងឃើញប្រមុខ​រដ្ឋាភិបាលបានខិតខំខ្លាំងណាស់ ហេតុនេះក្នុងនាមជាប្រជាពលរដ្ឋ ខ្ញុំសូមគាំទ្រទាំងស្រុងនូវការខិតខំរបស់រដ្ឋាភិបាល និងគោរពតាមការណែនាំ និងវិធានការណ៍នានាដែលបានដាក់ចេញដោយសម្តេចតេជោ”៕

ដោយ:គង់ សូរិយា

ភ្នំពេញៈ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា អ្នកឧកញ៉ាលី ហួរបានមានប្រសាសន៍ថា បច្ចុប្បន្ននេះសមាជិកសមាគម ដែលសុទ្ធតែជាអ្នកវិនិយោគលើវិស័យលំនៅដ្ឋាន មិនបានផ្អាកគំរោងវិនិយោគរបស់ពួកគេនោះទេ។

អ្នកឧកញ៉ាបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៦ កុម្ភៈនេះថា ដោយសារគំរោងអភិវឌ្ឍន៍និមួយៗ មិនបញ្ចប់រយៈពេលពីរឬបីខែ ហេតុនេះគំរោងអភិវឌ្ឍ​ន៍លំនៅដ្ឋាននានា មិនបានផ្គាកការសាងសង់នោះទេ បើទោះជាមានវិបត្តិជំងឺកូវីដ១៩លើកទី៣នេះក្តី ប៉ុន្តែសម្រាប់គំរោងអភិវឌ្ឍន៍ថ្មីៗ អ្នកវិនិយោគក្នុងស្រុករបស់យើងកំពុងរង់ចាំមើលស្ថានភាពជាក់ស្តែង។

លោកបន្តថា “យើងពិតជាមានការបារម្ភពីជំងឺនេះ ប៉ុន្តែបើគិតពីស្ថានភាពជាមួយប្រទេសជិតខាង កម្ពុជាយើងមានភាពល្អប្រសើរជាង ហើយរដ្ឋាភិបាលកំពុងខិតខំលើការងារទប់ស្កាត់ជំងឺនេះ”។ លោកបន្តថា “ការវិនិយោគច្រើនឬតិច វាអាស្រ័យលើជំងឺកូវីដ​១៩ ប៉ុន្តែបើស្ថានភាពប្រែជាល្អប្រសើរវិញ គេនឹងចាប់ផ្តើមវិនិយោគឡើងវិញហើយ”។

អ្នកឧកញ៉ាលី ហួរបានបន្តថា នៅពេលយើងចាប់ផ្តើមចាក់វ៉ាក់សាំង ជំងឺនេះបានរីករាលដាល និងផ្ទុះក្នុងសហគមន៍ ស្ថានភាពរីករាលដាលនេះ មិនដឹងចប់នាពេលណា តែ​លោកជឿលើសម្តេចតេជោ ដែលបាននិងកំពុងខិតខំ ដើម្បីបញ្ចប់ការរីករាលដាលក្នុងសហគមន៍។

គិតរហូតមកទល់ថ្ងៃម្សិលម៉ិញនេះ រាជធានី ខេត្តចំនួន៥នៅកម្ពុជាបានរកឃើញថា ជំងឺកូវីដបានឆ្លងចូលក្នុងសហគមន៍ ដោយថ្ងៃនេះអ្នកជំងឺចំនួន៤៤ករណីត្រូវបារកឃើញ ធៀបនឹងថ្ងៃម្សិលម៉ិញ គឺមានចំនួនថយចុះ ដែលកាលពីថ្ងៃទី២៥ កុម្ភៈកន្លងមកចំនួនអ្នកឆ្លងជំងឺកូវីដ១៩ ត្រូវបានរកឃើញចំនួន៦៥ករណី៕

ដោយ:គង់ សូរិយា

ភ្នំពេញៈ ក្រុមមន្រ្តីជាន់ខ្ពស់អង្គការសហប្រជាជាតិ និងអភិបាលខេត្តលោកគួច ចំរើនធ្លាប់បានពិភាក្សាគ្នា ដើម្បីប្រែក្លាយក្រុងព្រះសីហនុជាទីក្រុងស្អាត និងមានការអភិវឌ្ឍ​ប្រកបដោយនិរន្តរភាព។

កាលពីដើមសប្តាហ៍នេះ ក្រុមមន្ត្រី​អង្គការ​សហប្រជាជាតិ​ប្រចាំ​កម្ពុជា ​បាន​បើក​កិច្ចប្រជុំ​តាម​ប្រព័ន្ធ​អនឡាញ ​ជាមួយ​មន្ត្រី​ខេត្ត​ព្រះសីហនុ ដើម្បី​ពិភាក្សា​លើ​ដំណើរការ​គម្រោង «​ក្រុង​ព្រះសីហនុ​សម្រាប់​ទាំងអស់​គ្នា​៖ លើកកម្ពស់​ទីក្រុង​ស្អាត និរន្តរភាព និង​បរិយាប័ន្ន​» ដែលជា​គម្រោង​អនុវត្ត​ដោយ​ការិយាល័យ ​ឧត្តមស្នងការ​អង្គការសហប្រជាជាតិ​ទទួលបន្ទុក​កិច្ចការ​សិទ្ធិមនុស្ស និង​អង្គការសហប្រជាជាតិ​ផ្នែក​ទីជម្រក (UN-Habitat)​។

លោកស្រីPauline Tamesis អ្នកសម្របសម្រួល​ប្រចាំ​ប្រទេស​កម្ពុជា​នៃ​អង្គការសហប្រជាជាតិ​បាន​ថ្លែងថា គម្រោង​នេះ កើតចេញ​ពី​កិច្ចប្រជុំ​មួយ​រវាង​ក្រុម​ការងារ​អង្គការ​សហប្រជាជាតិ​នៅ​​កម្ពុជា​ជាមួយ​លោក គួច ចំរើន អភិបាលខេត្ត​ព្រះសីហនុ​កាលពី​ខែវិច្ឆិកា ឆ្នាំ ២០១៩​។ នៅក្នុង​ជំនួប​នៅពេលនោះ ភាគី​ទាំង​ ២ ​បាន​ពិភាក្សា​លើ​បញ្ហា​ជាច្រើន រួមមាន ទាំង​នគរូបនីយកម្ម កំណើន​សេដ្ឋកិច្ច និង​ការអភិវឌ្ឍ​ប្រកបដោយ​បរិយាប័ន្ន​។

លោកស្រី​បាន​ថ្លែងថា​ “​ដោយសារ​តែ​មាន​ការអភិវឌ្ឍ​យ៉ាង​លឿន ​នៅ​ខេត្ត​មាត់សមុទ្រ​មួយ​នេះ ការយកចិត្ត​ទុកដាក់​គួរតែ​ផ្ដោតទៅលើ​ថា តើ​ទីក្រុងនិង​ខេត្ត​នេះ អភិវឌ្ឍ​ឲ្យ​ទៅជា​ខេត្ត​ដែល​មាន​ភាពវៃឆ្លាត ប្រកប​ដោយ​បរិយាប័ន្ន និង​ប្រកប​ដោយ​ចីរភាព​ដោយ​របៀប​ណា”។

គម្រោង​នេះសហការនេះ ​បាន​ចាប់ផ្ដើម​ពី​ខែសីហា ឆ្នាំ ២០២០ និង​បញ្ចប់​នៅ​ខែកក្កដា​ឆ្នាំ ២០២១​។ វា​ឈរ​នៅលើ​របៀបវារៈ​ការអភិវឌ្ឍ​ប្រកបដោយ​ចីរភាព​ឆ្នាំ​ ២០៣០ និង​គោលដៅ​អភិវឌ្ឍន៍​ប្រកប​ដោយ​ចីរភាព​។

លោកស្រី​ថ្លែងឲ្យដឹងទៀតថា “ការផ្សារភ្ជាប់​គម្រោង​ទីក្រុង​វៃឆ្លាត ​ទៅ​នឹង​គោលដៅ​អភិវឌ្ឍន៍​ប្រកប​ដោយ​ចីរភាព មិនទាន់​គ្រប់គ្រាន់​ទេ”​។ លោកស្រីបន្ថែមថា “តាមពិតទៅ គ្មាន​ទីក្រុង​ណា ដែល​ត្រូវបាន​ចាត់ទុកថា មាន​ភាពវៃឆ្លាត​ទេ ប្រសិន​បើ​ទីក្រុង​នោះ​បំភ្លេចចោល​នូវ​ផលប្រយោជន៍​របស់​ជន​ក្រីក្រ អ្នក​ដែល​គេ​គិតថា មិនសំខាន់ ក្រុម និង​សហគមន៍​ដែល​ងាយ​រងគ្រោះ”។

លោកស្រី​បន្តថា គោល​គំនិត​បង្កើត​ទីក្រុង​វៃឆ្លាត​នេះ​ គួរតែ​ទទួល​នូវ​ធាតុ​ចូល​ពី​ក្រុម​អ្នកជំនាញ អង្គការ​សង្គម​ស៊ីវិល ក្រុម​ចលនា​សង្គម និង​តំណាង​ពលរដ្ឋ ដើម្បី​ធានា​បាន​ថា គម្រោង​ទីក្រុង​វៃឆ្លាត​នេះ គ្រប់​ជ្រុងជ្រោយ និង​មានតម្លៃ​សកល​។

រដ្ឋាភិបាលកម្ពុជាបាននិងកំពុងរៀបចំ ខេត្តសៀមរាប បាត់ដំបង និង​ទីក្រុង​ភ្នំពេញ​ ​ដើម្បី​ដាក់បញ្ចូល​ក្នុង​បណ្ដាញ​ទីក្រុង​វៃឆ្លាត​អាស៊ាន ប៉ុន្តែ​ខេត្ត​ព្រះសីហនុ មិនត្រូវ​បានដាក់​បញ្ចូល​ទេ​។

អ្នកនាំពាក្យរដ្ឋបាលខេត្តព្រះសីហនុ ​លោក ឃាង ភារម្យបានមានប្រសាសន៍ថា ការអភិវឌ្ឍ​ខេត្ត​ព្រះសីហនុ​ ឲ្យ​ទៅជា​ទីក្រុង​វៃឆ្លាត មាន​សារៈសំខាន់​ហើយ​ស្រប​ទៅ​នឹង​ទស្សន​វិស័យ​របស់​រាជរដ្ឋាភិបាល”។លោក​បន្តថា “រដ្ឋបាលខេត្ត​បាន​បង្កើត​ក្រុមការងារ​មួយ ដើម្បី​ធ្វើ​កិច្ចការ​នេះ ដោយមាន​សមាជិក​ពី​អាជ្ញាធរ​ពាក់ព័ន្ធ ក្រុមការងារ​អង្គការ​សហប្រជាជាតិ​ប្រចាំ​កម្ពុជា ដៃគូ​អភិវឌ្ឍន៍ អង្គការ​សង្គម​ស៊ីវិល និង​ភាគី​ពាក់ព័ន្ធ​មួយចំនួនទៀត”​។

លោកបន្តថា ក្រុមការងារ​នេះ ​មាន​ភារកិច្ច​បង្កើត​ផែនការ​សកម្មភាព និង​ផែនការ​ហិរញ្ញវត្ថុ បង្កើត​យុទ្ធសាស្ត្រ និង​ការងារ​អាទិភាព​សម្រាប់​រយៈពេល​ខ្លី មធ្យម និង​វែង ក្នុង​ចំណោម​កិច្ចការ​ជាច្រើន​ទៀត​។ក្រុមការងារ​ក៏មាន​ភារកិច្ច​រៀបចំ​ឯកសារ​ ដើម្បី​ដាក់​ស្នើ​បញ្ចូល​ទីក្រុង​ព្រះសីហនុ​ ទៅក្នុង​បណ្ដាញ​ទីក្រុង​វៃឆ្លាត​របស់​អាស៊ាន​ផងដែរ​៕

ដោយៈ រ៉ាណេត

ភ្នំពេញៈ ចាប់តាំងពីដើមខែមករា ឆ្នាំ២០២១ដែលស្ថិតនៅក្នុងត្រីមាសទី១ ស្ថានភាពនៃទីផ្សារជួលអាផាតម៉ិន ហាក់មិនមានអ្វីប្រែប្រួលនោះទេ ជាពិសេសនៅក្នុងរាជធានីភ្នំពេញ ខណៈដែលវត្តមានរបស់ជនបរទេស ដែលជាអតិថិជនគោលដៅនៅមិនទាន់វិលចូលប្រទេសកម្ពុជាវិញនៅឡើយ។

អ្នកជំនាញនៅក្នុងវិស័យអចលនទ្រព្យកម្ពុជា លោកស្រីអាន សុធីតា នាយិកាប្រចាំប្រទេសក្រុមហ៊ុន CBRE Cambodia បានមានប្រសាសន៍នៅថ្ងៃចុងសប្ដាហ៍នេះថា គិតត្រឹមពាក់កណ្តាលត្រីមាសទី១ឆ្នាំ២០២១នេះ ស្ថានភាពនៃទីផ្សារអាផាតម៉ិន ជាពិសេសនៅក្នុងរាជធានីភ្នំពេញ ហាក់នៅមិនទាន់មានអ្វីប្រែប្រួល គួរឱ្យកត់សម្គាល់នោះទេ ពោលគឺនៅរក្សាស្ថានភាពដូចគ្នាទៅនឹងចុងឆ្នាំ២០២០។

លោកស្រីបន្តទៀតថា “ទីផ្សារអាផាតម៉ិនភាគច្រើន ជាតម្រូវការរបស់ជនបរទេសដែលពួកគាត់ជួសម្រាប់ស្នាក់នៅ ក្នុងកំឡុងពេលដែលពួកគាត់មកបំពេញការងារ នៅក្នុងប្រទេសកម្ពុជា ប៉ុន្តែដោយសារតែបញ្ហាកូវីដ១៩ ពួកគាត់ដែលបានចាក់ចេញទៅប្រទេសកំណើតរបស់ខ្លួនមួយចំនួនធំ កាលពីដើមឆ្នាំ២០២០នោះ នៅមិនទាន់បានវិលត្រឡប់មកកម្ពុជាវិញនោះទេ”។លោកស្រីបន្តថា “ដូច្នេះបច្ចុប្បន្នគឺមានតែអតិថិជនចាស់ ដែលជាជនជាតិខ្មែរ ឬជនបរទេសមួយចំនួនតូច ដែលមានបានចាកចេញទៅតែប៉ុណ្ណោះ”។

បន្ថែមពីនេះ ក៏មានអ្នកខ្លះដែលជួលអាផាតម៉ិនស្នាក់នៅជាប់កុងត្រា បានចាកចេញទៅជួលផ្ទះជាយក្រុង ដើម្បីស្នាក់នៅក្នុងរយៈពេលខ្លី ដោយសារតែបារម្ភពីការរាលដាល ព្រោះត្រូវប្រើជណ្ដើរយន្តរួមគ្នា ដូច្នេះមានតែជម្រើសជួលផ្ទះជាយក្រុងស្នាក់នៅដាច់ដោយឡែក។

ទោះជាយ៉ាងណាក៏ដោយ លោកស្រីរំពឹងថា នៅពាក់កណ្តាលឆ្នាំ ឬដើមត្រីមាសទី៣ទីផ្សារមួយនេះ អាចនឹងមានកំណើនឡើងវិញ បន្ទាប់ពីស្ថានភាពនៃការទប់ស្កាត់ការីករាលដាលមានភាពល្អប្រសើរទាំងនៅក្នុងតំបន់ ក៏ដូចជានៅក្នុងប្រទេសកម្ពុជាផងដែរ។

អគ្គនាយកក្រុមហ៊ុនភ្នាក់ងារអចលនទ្រព្យ Town City លោកវន ចាន់ថន បានមានប្រសាសន៍ថា ស្ថិតនៅក្នុងស្ថានភាពប្រឈម នឹងជំងឺចាប់តាំងពីពាក់កណ្តាលឆ្នាំ២០២០ សម្រាប់ទីផ្សារអាផាម៉ិន ក៏មិនសូវខុសពីផ្នែកដទៃទៀតនោះដែរ។ ការជួលអាផាតម៉ិនភាគច្រើន ត្រូវបានចុះកុងត្រាជួលក្នុងរយៈពេលយូរ ប៉ុន្តែអ្វីដែលសំខាន់គឺភាគច្រើនជាជនបរទេសច្រើនជាងអ្នកនៅក្នុងស្រុក អត្រាចំនួននៃការជួលអាចមានច្រើន។

ប៉ុន្តែចំពោះតម្លៃគឺធ្លាក់ចុះ ដោយសារតែម្ចាស់អគារ បានជួយសម្រួលទម្លាក់ចុះនូវតម្លៃក្នុងចន្លោះពី២០- ៣០ភាគរយទៅដល់អតិថិជនរបស់ខ្លួន ដែលជាអ្នកក្នុងស្រុកផ្ទាល់ ដោយឡែកសម្រាប់អតិថិជន ជាជនជាតិបរទេសនៅមិនទាន់ បានវិលចូលប្រទេសកម្ពុជាវិញនោះទេ។

លោកបានបន្តថា “សម្រាប់ដើមឆ្នាំ២០២១នេះ ក៏នៅតែមិនទាន់បានធូរស្រាលវិញនោះទេ ប៉ុន្តែខ្ញុំជឿថា មិនយូរទេ ទីផ្សារអាផាតម៉ិន នឹងងាកមករកភាពល្អប្រសើរវិញខណៈបណ្តាប្រទេសមួយចំនួន ចាប់ផ្តើមប្រើប្រាស់វ៉ាក់សាំង ជាពិសេសប្រទេសចិន ដែលមានប្រជាជនជាច្រើនចូលមករស់នៅ និងប្រកបការងារនៅក្នុងប្រទេសកម្ពុជា ដែលភាគច្រើនរស់នៅក្នុងអគារអាផាតម៉ិន ហើយនៅកម្ពុជាក៏ផ្តើមចាក់វ៉ាក់សាំងដែរ”។

លោកបន្តថា ព្រឹត្តិការណ៍២០កុម្ភៈ គ្រាន់តែជាព្រឹត្តិការណ៍សង្គម ដែលកើតមាន ប៉ុន្តែក្រោយពេលរួមគ្នាអនុវត្តន៍ វិធានការតាមការណែនាំរបស់រដ្ឋាភិបាល នឹងធូរស្រាលបន្តិចម្ដងវិញជាមិនខាន៕