ការសិក្សា: ទីផ្សារអចលនទ្រព្យទូទាំងពិភពលោកនឹងស្ទុះឡើងខ្លាំងក្នុងឆ្នាំ២០២១នេះ

ដោយៈ សុខុម

អន្តរជាតិៈ យោងតាមការស្ទង់មតិធ្វើឡើងដោយទីភ្នាក់ងារព័ត៌មាន Reuters បង្ហាញថា ទីផ្សារអចលនទ្រព្យប្រភេទលំនៅដ្ឋានក្នុងបណ្ដាសេដ្ឋកិច្ចធំៗនឹងមានសន្ទុះកើនឡើងខ្លាំងនៅឆ្នាំ២០២១នេះដោយសារមានការគាំទ្រយ៉ាងធំផ្នែករូបិយវត្ថុ និងសារពើពន្ធ និងស្របពេលកំពុងងើបឡើងពីវិបត្តិឆ្លងរាតត្បាតវីរុសកូវីដ១៩។

ទីភ្នាក់ងារព័ត៌មាន Reuters បានចុះផ្សាយនៅថ្ងៃអង្គារ ទី២៥ ខែឧសភានេះថា តម្លៃលក់ផ្ទះជាមធ្យមបានហក់ឡើងខ្លាំងក្នុងឆ្នាំ២០២១ នេះនៅក្នុងប្រទេសមួយចំនួន។ តាមការរំពឹងទុកថា និន្នាការនេះនឹងនៅតែបន្តដោយសារកត្តាមួយចំនួន រួមមានអត្រាប្រាក់ទាបសម្រាប់កម្ចីទិញផ្ទះ ការចែកចាយវ៉ាក់សាំងកូវីដ១៩ ឆាប់រហ័ស និងការបន្ធូរបន្ថយវិធានការរឹតបន្តឹងនានា ក្រោយសេដ្ឋកិច្ចដាំក្បាលចុះកាន់តែជ្រៅ ដោយសារការឆ្លងរាតត្បាតវីរុសកូវីដ១៩ កាលពីឆ្នាំមុន។

ការហក់ឡើងទូទាំងពិភពលោកនូវតម្លៃអចលនទ្រព្យនេះកើតមានឡើង ស្របពេលទីផ្សារភាគហ៊ុនហក់ឡើងវិញយ៉ាងឆាប់រហ័ស ក្រោយធ្លាក់ចុះ ដោយសារផលប៉ះពាល់ធ្ងន់ធ្ងរមកលើសេដ្ឋកិច្ច និងការបាត់បង់ការងារធ្វើ។

ការស្ទង់មតិរបស់ទីភ្នាក់ងារព័ត៌មាន Reuters ទៅលើអ្នកជំនាញទីផ្សារអចលនទ្រព្យជាង១០០នាក់ ដែលបានធ្វើឡើងពីថ្ងៃទី១១ ដល់ថ្ងៃទី២៤ ខែឧសភា បានបង្ហាញពីការប្រែប្រួលខ្លាំងនូវការព្យាករអំពីតម្លៃផ្ទះ សម្រាប់សហរដ្ឋអាមេរិក ប្រទេសអង់គ្លេស ប្រទេសកាណាដា ប្រទេសអូស្រ្តាលី និងក្រុងឌូបៃ បើធៀបទៅនឹងរយៈពេល៣ខែមុន ដោយលឿនជាងការរំពឹងទុកអំពីកំណើនផលិតផលក្នុងស្រុកសរុប (GDP) និងអតិផរណាតម្លៃទំនិញប្រើប្រាស់។

លោក Andrew Harvey អ្នកជំនាញសេដ្ឋកិច្ចជាន់ខ្ពស់មកពីស្ថាប័ន Nationwide របស់អង់គ្លេស បានលើកឡើងថា “ទំនុកចិត្តរបស់អ្នកប្រើប្រាស់បានកើនឡើងខ្លាំង ដោយសារភាពជោគជ័យនៃកម្មវិធីចាក់វ៉ាក់សាំង ហើយភ័ស្តុតាងនៃការស្ទង់មតិនេះបង្ហាញថា វិបត្តិឆ្លងរាតត្បាតវីរុសកូវីដ១៩ បានធ្វើឱ្យមនុស្សកាន់តែច្រើនរើផ្ទះទៅរស់នៅផ្ទះថ្មី ហើយកង្វះនៃការផ្គត់ផ្គង់បានធ្វើឱ្យតម្លៃហក់ឡើងរយៈពេលខ្លី”។

ស្ទើរតែ៦០%នៃអ្នកវិភាគ ឬ៥៥នាក់ក្នុងចំណោម៩២នាក់ ដែលបានឆ្លើយសំណួរដាច់ដោយឡែកពីគ្នា ស្តីពីទីផ្សារអចលនទ្រព្យទូទាំងពិភពលោក បានលើកឡើងថា ហានិភ័យចំពោះទស្សនវិស័យត្រូវបានរំពឹងថានឹងកើនឡើងនៅឆ្នាំខាងមុខ ចំណែកឯ៣៧នាក់ទៀតនិយាយថា ហានិភ័យទំនងជាធ្លាក់ចុះច្រើនជាង។

និន្នាការនៅក្នុងការស្ទង់មតិរបស់ចុងក្រោយរបស់ទីភ្នាក់ងារព័ត៌មាន Reuters នេះបានបង្ហាញពីក្ដីរំពឹងថានឹងមានកំណើនរឹងមាំក្នុងវិស័យអចលនទ្រព្យនៅឆ្នាំនេះ ហើយនឹងធ្លាក់ចុះវិញនៅប៉ុន្មានឆ្នាំក្រោយ ដោយសារការផ្គត់ផ្គង់កើនឡើង ការធ្វើអន្តោប្រវេសន៍មានកម្រិតទាប និងនៅពេលលទ្ធភាពទិញក្លាយជាឧបសគ្គធំ។

អ្នកឆ្លើយតប៤១នាក់ក្នុងចំណោម៧៨នាក់និយាយថា ទីផ្សារអចលនទ្រព្យនឹងធ្លាក់ចុះ ដោយរួមទាំង៥នាក់ដែលនិយាយថានឹងធ្លាក់ចុះខ្លាំងផងដែរ ចំណែកឯ៣៧នាក់ទៀតនិយាយថា តម្រូវការការិយាល័យនឹងកើនឡើង ដោយរួមទាំង២នាក់ទៀត ដែលនិយាយថានឹងកើនឡើងខ្លាំងផងដែរ។

លោក Matthew Pointon អ្នកជំនាញសេដ្ឋកិច្ចជាន់ខ្ពស់ផ្នែកអចលនទ្រព្យប្រចាំនៅក្រុមហ៊ុនពិគ្រោះយោបល់អង់គ្លេស Capital Economics និយាយថា “ការធ្វើការងារពីផ្ទះ ដែលត្រូវបានអនុវត្តក្នុងរយៈពេលប៉ុន្មានខែចុងក្រោយនេះ នឹងធ្វើឱ្យតម្រូវការប្រែប្រួលខ្លាំងក្នុងវិស័យការិយាល័យ ដោយបុគ្គលិកការិយាល័យដល់ទៅប្រមាណ៥០%ត្រូវធ្វើការងារពីផ្ទះយ៉ាងតិចម្តងក្នុងមួយសប្តាហ៍”៕

អ្នកជំនាញៈ ជ្រោយចង្វារនឹងក្លាយតំបន់ពាណិជ្ជកម្មថ្មីមួយ ខណៈអ្នកអភិវឌ្ឍន៍កំពុងសម្រុកទៅតំបន់នេះ

ដោយៈ ម៉ាណេត
ភ្នំពេញៈ ជំនាញបានលើកឡើងថា គម្រោងអភិវឌ្ឍន៍ជាច្រើនបាននិងកំពុងសម្រុកទៅកាន់ផ្លូវជាតិលេខ៦ និងមានការអភិវឌ្ឍផ្លូវខ្វាត់ខ្វែង ដែលនឹងអាចប្រែក្លាយតំបន់នេះ ទៅជាទីក្រុងថ្មីមួយ សម្បូរដោយការអភិវឌ្ឍអចលនទ្រព្យចម្រុះ ហើយស្របទាញយកការវិនិយោគជាច្រើនបន្ថែមទៀតនាពេលអនាគត។

លោកស្រីតាំង ហួរអគ្គនាយិកាក្រុមហ៊ុនអចលនទ្រព្យAMATAK Property Serviceបានថ្លែងប្រាប់នៅថ្ងៃទី២៥ ខែឧសភា ឆ្នាំ២០២១នេះថា តំបន់ជ្រោយចង្វារ ឬតំបន់ផ្លូវជាតិលេខ៦ នឹងក្លាយជាទីក្រុងថ្មីមួយ សម្បូរដោយលំនៅដ្ឋានប្រណីត និងការអភិវឌ្ឍន៍ចម្រុះជាច្រើន។

លោកស្រីបានថ្លែងថា ជាក់ស្តែង គម្រោងអភិវឌ្ឍន៍ជាច្រើនបាននិងកំពុងសម្រុកទៅកាន់ផ្លូវជាតិលេខ៦ និងមានការអភិវឌ្ឍផ្លូវខ្វាត់ខ្វែង ដើម្បីបម្រើឱ្យលំនៅដ្ឋាន ដែលកំពុងអភិវឌ្ឍន៍នៅបណ្តោយផ្លូវជាតិលេខ៦ ឬតំបន់ជ្រោយចង្វារ ដូចជាប្រជាពលរដ្ឋនៅតំបន់នេះ

លោកស្រីបានឱ្យដឹងទៀតថា តាមព័ត៌មាន យើងនឹងមានការអភិវឌ្ឍ China Town នៅតំបន់លីយ៉ុងផាត់។ តំបន់នេះ (ជោយចង្វា) នឹងក្លាយជាទីក្រុងថ្មីដ៏ឥទ្ធិពលខ្លាំងជាងតំបន់ផ្សេងៗទៀត ដោយសារតំបន់នេះកំពុងមានការអភិវឌ្ឍខ្លាំងលើលំនៅដ្ឋាន និងអាគារពាណិជ្ជកម្ម និងខុនដូជាដើម ហើយចំណុចល្អមួយគឺមានទន្លេសងខាង ដែលមានអំណោយផ្នែកបរិស្ថាន និងខ្សល់បរិសុទ្ធ
ដូច្នេះវាស័ក្គសមនឹងទីក្រុងថ្មី ដែលមានការអភិវឌ្ឍច្រើន សម្បូរដោយលំនៅដ្ឋាន និងអាជីវកម្ម។

លោកស្រីបានថ្លែងបន្តថា លំនៅដ្ឋាននៅតំបន់នៅតាមបណ្តោយផ្លូវជាតិលេខ៦ ឬតំបន់ជ្រោយចង្វារមានតម្លៃល្អនៅឡើយ សម្រាប់វិនិយោគ ឬក៏សម្រាប់ការរស់នៅផ្ទាល់។ តម្លៃវីឡាភ្លោះមានក្រោម២០ម៉ឺនដុល្លារ ខណៈផ្ទះShophouse មានតម្លៃចាប់ពី២០ឡើងទៅ អាស្រ័យទៅលើទីតាំង ហើយតម្លៃលំនៅដ្ឋានវាអាស្រ័យទៅទីតាំង និងគម្រោងនីមួយៗ។ លោកស្រីបានបន្តថា រយៈពេល២ ឬ៣ឆ្នាំទៅមុខ តម្លៃនឹងកើនឡើងខ្ពស់ជាងនេះ។

លោកស្រីអាន សុធីតាអ្នកនាញអចលនទ្រព្យអន្តរជាតិមួយរូប ដែលមានបទពិសោធន៍ជាច្រើន បានលើកឡើងនៅថ្ងៃដដែលថា ផ្លូវជាតិលខ៦ គឺស័ក្កសមជាលំនៅដ្ឋាន ហើយយើងឃើញមានការរីកចម្រើនខ្លាំង ទាក់ទងនឹងលំនៅដ្ឋានក្នុងរយៈ២ឬ៣ឆ្នាំចុងក្រោយនេះ។

លោកស្រីបានបន្តទៀតថា បច្ចុប្បន្ន យើងឃើញថា មានការអភិវឌ្ឍនលំនៅដ្ឋានតម្លៃសមរម្យជាច្រើនចាប់ផ្តើមទៅទីនោះផងដែរ ប៉ុន្តែនៅចំណុចខ្វះខាតមួយ គឺអ្នកអភិវឌ្ឍន៍អន្តរជាតិ និងខ្វះតំបន់ពាណិជ្ជកម្មនៅឡើយ។ លោកស្រីបានថ្លែង តំបន់នេះសម្រុកលើលំនៅដ្ឋានមុន ហើយលំពាណិជ្ជកម្មនឹងអាចដើរតាមក្រោយការអភិវឌ្ឍលំនៅដ្ឋាន។

លោកស្រីបានឱ្យដឹងទៀតថា “ខ្ញុំគិតថា ក្នុងរយៈពេល៥ខាងមុខ តំបន់ជ្រោយចង្វារតំបន់ពាណិជ្ជកម្មថ្មីមួយ ដោយសារតំបន់នឹងទទួលបានការអភិវឌ្ឍអចលនទ្រព្យចម្រុះ”។

បច្ចុប្បន្ន គម្រោងអភិវឌ្ឍន៍លំនៅដ្ឋានធំៗជាច្រើន ដូចជាបុរីប៉េងហួត បុរីជីបម៉ុង បុរីអូគីដេ បុរីហាយលែន បុរីMorgan និងបុរីធំជាច្រើនទៀត៕

មន្រ្តីជាន់ខ្ពស់ក្រសួងដែនដីៈមិនមានវត្តមានទីក្រុងនាគរាជសម្តេចតេជោ ហ៊ុន សែននោះទេ

ដោយៈស៊ីវ ម៉េង
ភ្នំពេញៈ មន្រ្តីជាន់ខ្ពស់ក្រសួងរៀបចំដែនដី នគរូបនីយកម្មនិងសំណង់បានបដិ​សេធថាមិនមានគំរោងទីក្រុងនាគរាជសម្តេចតេជោហ៊ុន សែននោះទេ។

ថ្មីៗនេះមានគេហទំព័រនិងទូរទស្សន៍អនឡាញមួយ បានយកអត្ថបទចាស់របស់គេហទំព័រPropertyarea.asia ដែលបានចេញផ្សាយកាលពីថ្ងៃទី១៣ កុម្ភៈឆ្នាំ២០១៨ យកមកផលិតជាវីដេអូ ដោយលើកឡើងពីគម្រោងនេះ។

អំឡុងពេលនោះ លោកយិន លាងគង់សហស្ថាបនិក និងអគ្គនាយកគេហទំព័រPropertyarea.asiaបានជួបសម្ភាសន៍ផ្តាច់មុខជាមួយ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់លោក ភឿង សុភ័ណ្ឌបានមានប្រសាសន៍ដោយលោក​បានមានប្រសាសន៍ថា ទីក្រុងនាគរាជសម្តេចតេជោ ដែលគ្រោងចំណាយថវិកាវិនិយោគ៨០ពាន់លានដុល្លារអាមេរិក និងស្ថិត នៅលើផ្ទៃដីប្រមាណ៣៧,០០០ហិកតា ស្ថិតនៅស្របតាមបណ្តោយផ្លូវជាតិលេខ៦អា និងបន្តរហូតដល់ផ្លូវជាតិលេខ២១ ដែលស្ថិតនៅចំណុចថ្នល់បំបែករវាងផ្លូវជាតិលេខ៦អា ឆ្ពោះមកកាន់ផ្លូវជាតិលេខ៥ ហើយអូសតាមបណ្តោយផ្លូវជាតិលេខ៥ មកកាន់រាជធានីភ្នំពេញ។

លោកបន្តថា “ខ្ញុំមិនចង់បញ្ចេញព៌តមាននេះទេ ដោយសារព្រួយបារម្ភពីដី ឡើងថ្លៃនៅតំបន់នេះ ដែលរារាំងដល់ការអភិវឌ្ឍន៍គំរោងដ៏ធំនេះ”។លោកបន្តថា “តាមប្លង់ ដែលសម្តេចតេជោបានអនុញ្ញាត្តឲ្យធ្វើការសិក្សា គំរោងទីក្រុងនាគរាជ សម្តេចតេជោ មានមជ្ឈមណ្ឌលពាណិជ្ជកម្មសម្តេចតេជោមួយ ដែលជាមជ្ឈមណ្ឌ លពាណិជ្ជកម្ម ស្ថិតនៅកណ្តាលទីក្រុងនេះ ដែលមានផ្សារទំនើប សាលារៀនអន្តរជាតិ មជ្ឈ មណ្ឌលពាណិជ្ជកម្មកំពស់៦០០ម៉ែត្រ កំពង់ផែអន្តរជាតិ និងសេវាកម្មជាច្រើនទៀត”។

លោកបន្តថា កម្ពុជាខកខានសាងសង់ទីក្រុង៥៨០ឆ្នាំមកហើយ ហេតុនេះទើបកម្ពុជាត្រូវ កសាងទីក្រុងនេះឡើង ដើម្បីឆ្លើយតបនឹងកំណើនសេដ្ឋកិច្ច ប្រជាសាស្រ្ត និងជា ការដឹងគុណដល់សម្តេ ចតេជោហ៊ុន សែនដែលហ៊ានពលីជីវិត ដើម្បីភាពសុខសាន្តរបស់ប្រជាពលរដ្ឋកម្ពុជា ពិសេស សម្តេចបាននាំមកនូវសុខសន្តិភាព និងការអភិវឌ្ឍន៍ប្រទេសជាតិរហូតមកដល់សព្វថ្ងៃនេះ។ លោកភឿង សុភ័ណ្ឌបញ្ជា ក់ឲ្យដឹង។

ហេតុអ្វីបានជាលោកសម្រេចជ្រើសរើសទីតាំងនេះ ក្នុងគំរោងកសាងទីក្រុងនាគ​រាជសម្តេចតេជោ លោកភឿង សុភ័ណ្ឌបានបន្តថា ដោយសារទីតាំងនេះ បើមើលតាមយន្តហោះ មានរូបរាងនិងសណ្ឋានដី ដូចជារូបនាគ ហើយជាទីតាំង បើតាមក្បួនចិន ជាទីតាំងមានហុង ស៊ុយល្អបំផុត ព្រោះទីតាំងនេះមានទន្លេព័ន្ឋជុំវិញ ដែលផ្តល់ជាមធ្យោបាយដឹកជញ្ជូន និងផ្តល់លក្ខខ័ណ្ឌអាកាសធាតុល្អប្រសើរ សម្រាប់ភាពសុខដុមរមនា ដល់ប្រជាជននៅក្នុងទីក្រុងនេះនាពេលអនាគត។

លោកបន្តថា មានតែមិត្តចិនតែមួយប៉ុណ្ណោះ ដែលអាចជួយកសាងទីក្រងនេះបានទទួលជោគជ័យ ព្រោះគំរោងនេះធំណាស់ និងចាយលុយច្រើនណាស់ ដូច្នេះ ដើម្បីគាំទ្រសម្តេចនិងទុកជាកេរ្ត៍តំណែល ក៏ដូចជា បង្កើននូវមិត្តភាព និងកិច្ចសហប្រតិបត្តិការរវាងប្រទេសទាំងពីរ ដែលសម្តេចបានគាំទ្រគោលនយោ បាយចិនតែមួយ រដ្ឋាភិបាលចិនគួរតែជួយកសាងទីក្រុងនេះ ឲ្យលេចរូបរាងឡើង  ដើម្បីជាការអបអរសាទរនូវសមិទ្ឋិផល នៃកិច្ចសហប្រតិបត្តិការរវាងរដ្ឋាភិបាល ប្រទេសទាំងពីរ។

តាមប្លង់មេរបស់ទីក្រុងនេះ នឹងត្រូវកសាងហេដ្ឋារចនាសម្ព័ន្ឋលើគោក ក្រោមដី និងលើអាកាសដែលនឹងមិនឲ្យ មានបញ្ហាកកស្ទះចរាចរក្នុងទីក្រុងនេះរយៈពេលរាប់រយឆ្នាំ។

មន្រ្តីជាន់ខ្ពស់់ដដែលបាននិយាយក្នុងលក្ខខ័ណ្ឌមិនបញ្ចេញឈ្មោះថា ប្រសិនជាមានគំរោងបែបនេះមែន ថ្នាក់ដឹកនាំក្រសួងនឹងប្រជុំពិភាក្សា និងមានមន្រ្តីចុះសិក្សាពីគំរោងនេះហើយ ប៉ុន្តែតាមលោកសាកសួរមន្រ្តីជំនាញ គឺពួកគាត់មិនបានសិក្សាពីគំរោងនេះនោះទេ។

សម្តេចតេជោហ៊ុន សែននាយករដ្ឋមន្រ្តីនៃកម្ពុជា ក៏ធ្លាប់បានអះអាងថា មិនមានគំរោងទីក្រុងបែបនេះទេ៕

កម្ពុជានឹងនាំយកកេរ្តិ៍ដំណែលស្នាដៃម្ហូបខ្មែរដើម្បីបង្ហាញដល់ពិភពលោក

ដោកយៈ ប៊ី
ភ្នំពេញៈ ស្ថានទូតកម្ពុជានៅទីក្រុងប៉ារីស ដោយសហការជាមួយGourmand World Cookbook Awards នឹងនាំយកសៀវភៅ “កេរ្តិ៍ដំណែលស្នាដៃម្ហូបខ្មែរ ឬ The Taste of Angkor” ចូលរួមក្នុងពិធីតាំងពិព័រណ៍សៀវភៅមុខម្ហូបលំដាប់ពិភពលោក។

ការនាំយក សៀវភៅ “កេរ្តិ៍ដំណែលស្នាដៃម្ហូបខ្មែរ” នឹងប្រែក្លាយប្រពៃណីខ្មែរដែលមានអាយុកាលរាប់ពាន់ឆ្នាំ ឲ្យទៅជារូបមន្តធ្វើម្ហូបជាក់ស្តែង ដែលជាទីពេញនិយមចូលចិត្តបំផុតរបស់ ប្រជាជនខ្មែរ និងបានបង្ហាញពីភាពសម្បូរបែប នៃកេរ្តិ៍ដំណែលមុខម្ហូបខ្មែរ ដែលគួរតែចែករំលែកជាមួយមិត្តភក្តិទាំងអស់ នៅទូទាំងពិភពលោក។

បើយោងតាម ផេកហ្វេសប៊ុក ផ្លូវការរបស់ក្រសួងការបរទេស និងសហប្រតិបត្តិការអន្តរជាតិ ដែលបានចេញផ្សាយនៅ ថ្ងៃទី២៥ ខែ ឧសភា ឆ្នាំ ២០២១នេះ បានឲ្យដឹងថា ក្នុងឱកាសខួបលើកទី២៥ឆ្នាំ នៃពានរង្វាន់ហ្គ័រម៉ង់ (Gourmand) ស្ថានទូតកម្ពុជានៅទីក្រុងប៉ារីស ដោយសហការជាមួយGourmand World Cookbook Awards មានកិត្តិយសនាំយកសៀវភៅ «កេរ្តិ៍ដំណែលស្នាដៃម្ហូបខ្មែរ ឬ The Taste of Angkor» ចូលរួមក្នុងពិធីតាំងពិព័រណ៍សៀវភៅ មុខម្ហូបលំដាប់ពិភពលោក នៅគេហដ្ឋានរបស់លោក អាល់ហ្វ្រេត ណូបែល (Alfred Nobel) នាទីក្រុង Björkborn ប្រទេសស៊ុយអែត ចាប់ពីថ្ងៃទី១៧ ខែមិថុនា ដល់ថ្ងៃទី២១ ខែតុលា ឆ្នាំ ២០២១។

ប្រភពបន្ថែមថា សៀវភៅ «The Taste of Angkor» ដែលជាស្នាដៃសម្រិតសម្រាំង និងចងក្រងដោយក្រសួងការបរទេស និងសហប្រតិបត្តិការអន្តរជាតិកម្ពុជា។

លោកឧបនាយករដ្ឋមន្ដ្រីប្រាក់ សុខុនរដ្ឋមន្ដ្រីការបរទេស និងសហប្រតិបត្តិការអន្តរជាតិកម្ពុជា បានមានប្រសាសន៍ថា “សៀវភៅមុខម្ហូបនេះ បានប្រែក្លាយប្រពៃណីខ្មែរ ដែលមានអាយុកាលរាប់ពាន់ឆ្នាំ ឲ្យទៅជារូបមន្តធ្វើម្ហូបជាក់ស្តែង ដែលជាទីពេញនិយមចូលចិត្តបំផុតរបស់ប្រជាជនខ្មែរ និងបានបង្ហាញពីភាពសម្បូរបែប នៃកេរ្តិ៍ដំណែលមុខម្ហូបខ្មែរ ដែលគួរតែចែករំលែក ជាមួយមិត្តភក្តិទាំងអស់នៅទូទាំងពិភពលោកផងដែរ”។

នៅក្នុងរូបថតនេះ លោក Pelle Aorelius ដែលជាអ្នកទទួលបន្ទុករៀបចំពិព័រណ៍សៀវភៅមុខម្ហូប ដែលល្អបំផុតចំនួន៥០០ក្បាល មកពីប្រទេសចំនួន៥០ នៅលើពិភពលោ​កកំពុងកាន់សៀវភៅ «The Taste of Angkor» ដោយឈរនៅក្បែររូបសំណាករបស់ លោក អាល់ហ្វ្រេត ណូបែល(Alfred Nobel) នៅទីក្រុង Björkborn ប្រទេសស៊ុយអែត៕

តើខណ្ឌណាខ្លះក្នុងរាជធានីភ្នំពេញដែលរក្សាតម្លៃដីធ្លីបានល្អជាងគេក្នុងរយៈពេល១០ឆ្នាំ

ដោយៈវឌ្ឈនៈ

ភ្នំពេញៈ វិស័យអចលនទ្រព្យជាពិសេសវិស័យដីធ្លី នៅក្នុងរាជធានីភ្នំពេញ ចាប់តាំងពីវិបត្តិហិរញ្ញវត្ថុក្នុងឆ្នាំ ២០០៨-២០០៩ ឃើញថា តម្លៃដីធ្លីបានងើបឡើងបន្តិចម្ដងៗ រហូតដល់ឆ្នាំ២០២១នេះ ទោះបីជាកម្ពុជាជួបវិបត្តិនឹងជំងឺរីករាលដាលក៏ដោយ ក៏ឃើញថាមិនមានការធ្លាក់ចុះឬប្រែប្រួលនោះដែរ។ បើតាមការសិក្សាពីក្រុមហ៊ុនវាយតម្លៃអចលនទ្រព្យនៅកម្ពុជា បង្ហាញខណ្ឌ៥នៅរាជធានីភ្នំពេញ បានរក្សាតម្លៃល្អជាងគេក្នុងរយៈពេល១០ឆ្នាំកន្លងទៅនេះ ។

លោកសន សៀប ស្ថាបនិកនិងជានាយកក្រុមហ៊ុនអចលនទ្រព្យឃី រៀលអ៊ីស្ទេតបានឱ្យដឹងកាលពីព្រឹកថ្ងៃទី២៥ ឧសភានេះថា នៅក្នុងរាជធានីភ្នំពេញ ក្នុងខណ្ឌចំនួន៥ គឺខណ្ឌដូនពេញ ៧មករា ចំការមន បឹងកេង និងទួលគោក តម្លៃដីចាប់ផ្ដើមមានកំណើនបន្តិចម្ដងៗចាប់តាំងពីឆ្នាំ២០១១ ២០១២ ដោយសារតែមានការអភិវឌ្ឍច្រើននៅក្នុងរាជធានីភ្នំពេញ ហើយក្នុងខណ្ឌទាំងនោះ ដីធ្លីមានតម្លៃខ្ពស់ជាងគេ ។

លោកបន្តថា នៅក្នុងឆ្នាំ២០១៧ តម្លៃដីធ្លីបានធ្លាក់ចុះរហូត-៨ភាគរយ និងបានងើបឡើងវិញ នៅក្នុងអំឡុងឆ្នាំ២០១៨ ឬ២០១៩ ហើយ២០២០ ទោះបីជាកម្ពុជាជួបវិបត្តិកូវីដ១៩ក្ដី តែខណ្ឌទាំង៥ក្នុងរាជធានីភ្នំពេញ នៅតែបន្តកើនឡើងប្រមាណ០,៥ភាគរយ។

លោកបន្ថែមថា ក្នុងពេលបច្ចុប្បន្នក្នុងចំណោមខណ្ឌទាំង៥ ដែលមានសក្ដានុពល ឃើញថា ទួលគោកមានកំណើនជាងគេជុំវិញ២ភាគរយ។ ចំណែកខណ្ឌនៅជាយៗរាជធានីភ្នំពេញដូចជាខណ្ឌដង្កោ ខណ្ឌកំបូល ខណ្ឌសែនសុខ មានសន្ទុះតម្លៃដីធ្លីងើបខ្ពស់ ជាពិសេសខណ្ឌដង្កោ ។

លោកថា “កត្តាដែលជំរុញឱ្យខណ្ឌដង្កោ ទទួលបានសន្ទុះកំណើនដីធ្លីខ្ពស់ជាងគេ ដោយសារតែហេដ្ឋារចនាសម្ព័ន្ធក្នុងខណ្ឌនេះ កំពុងទទួលមានការអភិវឌ្ឍ ដូចជាហេដ្ឋារចនាសម្ព័ន្ធទៅកាន់ព្រលានយន្តហោះថ្មី”។ លោកបន្តថា “ក្រៅពីនោះក៏មានផ្លូវក្រវ៉ាត់ក្រុង ដែលតភ្ជាប់ពីផ្លូវកប់ស្រូវ ក៏រត់កាត់ភូមិសាស្ត្រខណ្ឌដង្កោផងដែរ ដែលជាសក្ដានុពលជំរុញឱ្យតម្លៃដីធ្លីក្នុងខណ្ឌនេះមានសន្ទុះខ្លាំងជាងគេ”។

លោកបញ្ជាក់ថា សន្ទុះនៃតម្លៃដីនៅខណ្ឌដង្កោនេះហើយ ដែលធ្វើឱ្យមធ្យមភាគ នៃកំណើនតម្លៃដីធ្លី នៅក្នុងរាជធានីភ្នំពេញទាំងមូល មានកំណើនជាមធ្យម១,៩ភាគរយ និងធ្វើឱ្យមធ្យមភាគនៃតម្លៃដីធ្លីក្នុងរាជធានីភ្នំពេញ មានតម្លៃពី២០០០ដុល្លារ ទៅ២១០០ដុល្លារក្នុងមួយម៉ែត្រការ៉េ។

ជាមួយគ្នានេះលោកបណ្ឌិតគីម ហ៊ាង ប្រធានKW Cambodia ក៏បានឱ្យដឹងផងដែរថា តម្លៃដីធ្លីមានតែងើបឡើងតទៀតនៅពេលអនាគត ហើយតម្លៃតម្លៃដីនៅជាយក្រុងក៏នឹងងើបឡើងជាបន្តបន្ទាប់ ខណៈកណ្ដាលក្រុងក៏កាន់តែងើបផងដែរ។

លោកថា #នៅប្រទេសជិតខាង ដូចជាបាងកក សិង្ហបុរីជាដើម តម្លៃដីគេហក់ឡើងដល់១ម៉ឺនដុល្លារអាមេរិកក្នុងមួយម៉ែត្រការ៉េ។ ចំណែកនៅកម្ពុជាយើងនៅមិនទាន់មាននៅឡើយទេ ដូច្នេះអនាគតក៏នឹងអាចមានតម្លៃដូចនឹងប្រទេសទាំងនោះដែរ”៕

ប្រជាជនរនៅរស់នៅជាយក្រុងបង្ហាញទំនោរងាកមករស់នៅខុនដូកាន់តែច្រើន

ដោយៈ ម៉ាណេត

ភ្នំពេញៈ ប្រជាជននៅជាយក្រុងមួយចំនួនបង្ហាញចំណាប់អារម្មណ៍ថា មានបំណងចង់ទិញខុនដូបន្ថែម ក្រៅពីលំនៅដ្ឋាននៅជាយក្រុងដែលស្រាប់ ក្រោមហេតុផលថា វាជាការវិនិយោគមួយ នឹងផ្តល់ចំណេញខ្ពស់នៅនាពេលអនាគត និងភាពងាយស្រួលក្នុងការរស់នៅសម្រាប់ពួកគាត់។

លោកវិន រតនាដែលជាអ្នករស់ក្នុងបុរីជាយក្រុងភ្នំពេញម្នាក់ ស្ថិតក្នងខណ្ឌពោសែនជ័យបានលើកថា លោកមានបំណងទិញខុនដូសម្រាប់កូនៗ នាពេលអនាគត ដោយសារការរស់នៅ នឹងមានភាពងាយស្រួលដល់នៅកូនរបស់លោក ក្នុងការធ្វើដំណើរទៅសាលា និងខុនដូភាគច្រើននៅជិតទីក្រុង។

លោកបានបន្តថា “នាពេលអនាគត ការរស់នៅខុនដូនឹងផ្តល់សុវត្ថិភាពដល់កូនៗលោក ដោយសារការអភិវឌ្ឍខុនដូ បំពាក់ជាមួយនឹងប្រព័ន្ធសន្តិសុខល្អ”។ លោកបានបន្តថា “វាមិនត្រឹមតែសម្រាប់ការរស់របស់កូនៗរបស់លោក លោកក៏នឹងអាចមានភាពងាយស្រួលក្នុងការមកបំពេញការងាររបស់លោកក្នុងទីក្រុងផងដែរ”។

លោកស្រីលីណា ដែលលំនៅដ្ឋាននៅជាយក្រុងម្នាក់ដែរ បានលើកឡើងថា លោកស្រីធ្លាប់បានទាក់ទងជាមួយភ្នាក់ងារអចលនទ្រព្យ អំពីខុនដូ ដែលបង្ហាញគម្រោងមួយចំនួននៅក្នុងក្រុងភ្នំពេញ ហើយលោកស្រីមានចំណាប់អារម្មណ៍ថា ខុនដូគឺមានភាពងាយស្រួលសម្រាប់ការរស់នៅ ដោយសារវាមិនឆ្ងាយពីកន្លែងធ្វើការ និងងាយស្រួលក្នុងការធ្វើ ដោយមិនសូវជួបបញ្ហាស្ទះចរាចរណ៍។

លោកស្រីបានថ្លែងថា “ការទិញខុនដូនេះ ថែមទាំងអាចជាការវិនិយោគមួយផងដែរ តាមការពន្យល់ពីភ្នាក់ងារ ដោយសារចំនួនប្រជាជននៅភ្នំពេញ នឹងកាន់តែកើនឡើង ដែលធ្វើឱ្យតម្រូវការខុនដូនេះកើនឡើង និងឡើងថ្លៃផងដែរ”។

លោកខន គង្គាអគ្គនាយកក្រុមហ៊ុន ERA Cambodia បានថ្លែងប្រាប់នៅ២៥ ខែឧសភា ឆ្នាំ២០២១ថា ការរស់នៅខុនដូ និងការរស់នៅតាមលំនៅដ្ឋាននៅជាយក្រុងមានភាពខុសគ្នា ដោយសារមជ្ឈដ្ឋានរស់នៅខុនដូ គឺការរស់នៅបែបសហគមន៍ ដែលអាចឱ្យអ្នករស់នៅខុនដូមកក្នុងស្រុក និងបរទេសអាចធ្វើការប្រាស្រ័យទាក់ទងគ្នា និងរៀនវប្បធម៌ពីគ្នាទៅវិញទៅមក។

លោកបានលើកឡើងថា ទាក់ទងនឹងទីតាំង ដោយសារការអភិវឌ្ឍខុនដូត្រូវការទីតាំងល្អ ដែលបង្កភាពងាយស្រួលការធ្វើដំណើរសម្រាប់អ្នករស់នៅ។ កត្តាសន្តិសុខ អ្នករស់នៅខុនដូទទួលបានសុវត្ថិភាព ជាប្រព័ន្ធសន្តសុខការពារ២៤ម៉ោង។ ការអភិវឌ្ឍន៍ខុនដូភាគច្រើនមានបញ្ចូលផ្សារទំនើប ភោជនីយដ្ឋាន កន្លែងហាត់ប្រាណ និងស្ទីមសូណាជាដើម ដែលបង្កភាពងាយដល់ការរស់នៅ។

លោកបានថ្លែងបន្តថា ការកត្តាវិនិយោគៈ ខុនដូមានទីផ្សារច្រើន សម្រាប់ការទិញលក់ ដោយសារអតិជិនមានទាំងជនជាតិខ្មែរ និងបរទេស។ កត្តាជួល ខុនដូតម្លៃ៥ម៉ឺនអាចជួលបានក្នុងចន្លោះពី៣៥០ទៅ៤០០ដុល្លារ ធៀបនឹងផ្ទះតម្លៃ៥ម៉ឺនដូចអាចជួលបានត្រឹមតែ១០០ដុល្លារក្នុងមួយខែ។

យោងតាមលោកខន គង្គាបានឱ្យដឹងថា ខុនដូត្រូវបានបែងចែកចេញជា៣ប្រភេទ ក្នុងនោះរួមមានខុនដូតម្លៃកម្រិតទាប កម្រិតមធ្យម និងលំដាប់ប្រណីត។ យើងអាចទិញបានខុនដូតម្លៃកម្រិតទាប ក្នុងតម្លៃក្រោម១០០០ដុល្លារក្នុងមួយម៉ែត្រការ៉េ ខុនដូតម្លៃកម្រិ​តមធ្យមយើងអាចរកទិញបាន ក្នុងតម្លៃចន្លោះពី១៥០០ដុល្លារ ទៅ២៥០០ដុល្លារ ហើយ

ក្រសួងទេសចរណ៍ត្រៀមស្នើដល់រដ្ឋាភិបាលដើម្បីបើកទេសចរណ៍ជាបណ្តើរៗក្នុងត្រីមាសទី៤ដោយយកខេត្តសៀមរាបជាអាទិភាព

ដោយៈ ប៊ី
ភ្នំពេញៈ ថ្នាក់ដឹកនាំក្រសួងទេសចរណ៍ ឯកភាពសម្រេចដាក់ចេញនូវផែនការសក​ម្ម​ភាពអាទិភាពមួយចំនួន ដោយរៀបចំស្នើសុំដល់រដ្ឋាភិបាល ក្នុងការបើកទេសចរណ៍ជាបណ្តើរៗក្នុងត្រីមាសទី៤ ឆ្នាំ២០២១។

ការត្រៀមរៀបចុះស្នើសុំនេះ ត្រូវបានធ្វើឡើង ក្នុងប្រជុំចង្អៀតតាមប្រព័ន្ធវីដេអូ (Video Conference) ពិភាក្សាសម្រេចលើឯកសារទស្សនាទានស្តីពី កញ្ចប់ទស្សនកិច្ចទេសចរណ៍វ៉ាក់សាំងកូវីដ១៩ ដែលដឹកនាំដោយលោកថោង ខុនរដ្ឋមន្រ្តីក្រសួងទេសច​រណ៍កាលពីម្សិលមិញ។

ក្រសួងទេសចរណ៍ បានរៀបចំស្នើសុំបើកទេសចរណ៍ជាបណ្តើរៗ ក្នុងត្រីមាសទី៤ ឆ្នាំ២០២១ ដោយផ្តោតអាទិភាពការអនុវត្តគម្រោងក្នុងជំហានទី១ នៅខេត្តសៀមរាប-អង្គរ និងសង្កត់ធ្ងន់លើយុទ្ធសាស្រ្តទាក់ទាញទីផ្សារទេសចរណ៍ ដែលមានហានិភ័យកូវីដ១៩ទាប ឬដែលមានការគ្រប់គ្រងការកូវីដ-១៩បានល្អ ឬទីផ្សារដែលស្ថិតក្នុងតំបន់ព័ណ៌បែតង។

គម្រោងសាកល្បងនៃការបើកទេសចរណ៍ ជាបណ្តើរៗនេះនឹងផ្តោតលើ ១). ការកសាងទំនុកចិត្តសម្រាប់ទេសចរ (Build Trust and Confident) ២). ការសម្រួលការធ្វើដំណើរ (Travel Facilitation) ដោយគម្រោងស្នើសុំលើកលែងលក្ខខណ្ឌ នៃការធ្វើចត្តាទ្បីស័កទាំងស្រុង ចំពោះទេសចរអន្តរជាតិ ដែលបានចាក់វ៉ាក់សាំងហើយ ចេញពីទីផ្សារបៃតង ៣). ការសម្រួលតម្លៃកញ្ចប់ទស្សនកិច្ចសមរម្យ ដើម្បីធានាការប្រកួតប្រជែងក្នុងតំបន់។

ក្រសួងទេសចរណ៍គ្រោងនឹងដាក់ឯកសារទស្សនាទាននេះ ដើម្បីពិគ្រោះយោបល់ល្អិតល្អន់បន្ថែមជាមួយវិស័យឯកជន នៅថ្ងៃព្រហស្បតិ៍សប្តាហ៍នេះ នឹងដាក់ក្នុងរបៀបវារៈប្រជុំដើម្បីស្នើសុំយោបល់ និងកិច្ចសហការពីសំណាក់អន្តរស្ថាប័ននៅសប្តាហ៍ក្រោយ មុនស្នើសុំសេចក្តីសំរេចពី រាជរដ្ឋាភិបាល។

ជាមួយគ្នានេះដែរ លោកថោង ខុនរដ្ឋមន្រ្តីក្រសួងទេសចរណ៍បានឱ្យដឹងថា លោកបានស្នើសុំសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងការពិចារណាបើកទទួលភ្ញៀវទេសចរអន្តរជាតិ ដែលបានចាក់វ៉ាក់សាំងបង្ការជំងឺកូវីដ១៩ហើយ មកទស្សនាគោលដៅទេសចរណ៍សៀមរាប-អង្គរ នៅត្រីមាសទី៤ នៃឆ្នាំ២០២១ ស្របពេលដែលការគ្រប់គ្រងសហគមន៍នៅខេត្តសៀមរាប- អង្គរស្ថិតក្នុងភាពល្អប្រសើរ ព្រមជាមួយនឹងការជំរុញដំណើរការចាក់វ៉ាក់សាំងបានលឿន ជូនចំពោះមន្ត្រីរាជការ និងការជំរុញការចាក់វ៉ាក់សាំង ជូនដល់អ្នកបម្រើការក្នុងឧស្សាហកម្មទេសចរណ៍ និងផ្នែកឯកជនក្នុងវិស័យផ្សេងទៀត។

លោករដ្ឋមន្ត្រីបានបន្តទៀតថា “សៀមរាប-អង្គរ ជាគោលដៅទេសចរណ៍ដ៏ចម្បងមួយនេះ ដែលមានការគ្រប់គ្រងសហគមន៍បានល្អហើយ និងនៅពេលដែលអ្នកផ្តល់សេវាទេសចរណ៍ទាំងឡាយបានទទួលវ៉ាក់សាំងរួចហើយ គួបផ្សំនឹងយុទ្ធនាការចាក់វ៉ាក់សាំងជូនប្រជាលរដ្ឋក្នុងគោលដៅនេះ បានដំណើរការទៀត វាអាចនឹងបង្ហាញបាននូវភាពជឿជាក់កក់ក្តៅដល់ទេសចរបានហើយដែរ”។

លោកបានបន្តថា ករណីនេះអាចជាការចាប់ផ្តើមពិភាក្សាគ្នាអំពី ការរៀបចំកញ្ចប់ទស្សនកិច្ចរបស់ទេសចរ ដែលបានចាក់វ៉ាក់សាំងហើយមុន ពិសេសសម្រាប់ទេសចរដែ​លធ្វើដំណើរតាមជើងយន្តហោះត្រង់មិនមាន Transit ឬអាចពិចារណាតាមជើងរថយន្តពីប្រទេសជិតខាងផងដែរ។

លោកថោង ខុនបានបញ្ជាក់ទៀតថា “អ្វីដែលបានគិតគូរនេះ គឺស្របជាមួយនឹងការអនុវត្តផែនការសកម្មភាពនៃ «ផែនទីចង្អុលផ្លូវសម្រាប់ស្តារវិស័យទេសចរណ៍កម្ពុជាឡើងវិញក្នុង និងក្រោយវិបត្តិកូវីដ១៩” ដែលរាជរដ្ឋាភិបាលទើបបានអនុម័តថ្មីៗនេះផងដែរ៕

តើធនាគារADBបានចាប់កំណើតបែបណា និងមានឥទ្ធិពលបែបណាលើសេដ្ឋកិច្ចតំបន់

ដោយៈសុខុម

ភ្នំពេញៈ អ្នកទាំងអស់គ្នាប្រាកដជាស្គាល់ហើយ នូវធនាគារអភិវឌ្ឍន៍អាស៊ី ហៅកាត់ថាADB ដែលតែងតែជួយដល់បណ្ដាប្រទេសក្រីក្រ។ ប៉ុន្តែមានមនុស្សមិនច្រើនទេដែលដឹងពីប្រវត្តិ និងឥទ្ធិពលរបស់ស្ថាប័នមួយនេះ ហើយតើវាបានប្រភពលុយកពីណា? អញ្ចឹងតោះ! មកស្វែងយល់ត្រួសៗទាំងអស់គ្នា។

ADB ជាធនាគារអភិវឌ្ឍន៍ថ្នាក់តំបន់មួយ ដែលត្រូវបានបង្កើតឡើងនៅថ្ងៃទី១៩ ធ្នូ ឆ្នាំ១៩៦៦ ពោលគឺកាលពី៥៥ឆ្នាំមុន។ ធនាគារនេះ មានទីស្នាក់ការកណ្ដាលនៅសង្កាត់ពាណិជ្ជកម្ម Ortigas Center ក្នុងទីក្រុង Mandaluyong ប្រទេសហ្វីលីពីន។

ធនាគារនេះ មានការិយាល័យចំនួន៣១នៅទូទាំងពិពលោក សម្រាប់លើកកម្ពស់ការអភិវឌ្ឍសង្គម និងសេដ្ឋកិច្ច។ នៅពេលបង្កើតដំបូង ធនាគារនេះមានប្រទេសជាសមាជិកចំនួន៣១ ហើយបច្ចុប្បន្នមាន៦៨ប្រទេសជាសមាជិក

ធនាគារនេះ បានយកម៉ូឌែលស្រដៀងគ្នានឹងធនាគារពិភពលោក (World Bank) ដែរ ហើយមានប្រព័ន្ធបោះឆ្នោតស្រដៀងគ្នា។ ធនាគារនេះ តែងតែបញ្ចេញរបាយការណ៍សង្ខេបអំពីប្រតិបត្តិការ ថវិកា និងព័ត៌មានផ្សេងៗទៀតសម្រាប់សាធារណជន។

កម្មវិធីអាហារូបករណ៍ADB-ជប៉ុន (ADB-JSP) ផ្ដល់ជូនដល់និស្សិតប្រមាណ៣០០នាក់ក្នុងមួយឆ្នាំៗ នៅតាមគ្រឹះស្ថានឧត្ដមសិក្សា ក្នុងប្រទេសចំនួន១០ក្នុងតំបន់។ នៅពេលបញ្ចប់ការសិក្សា និស្សិតទាំងនោះនឹងវិលត្រលប់ ទៅចូលរួមចំណែកដល់ការអភិវឌ្ឍសង្គម និងសេដ្ឋកិច្ចនៅក្នុងប្រទេសរបស់ពួកគេវិញ។

* ឥទ្ធិពលនៃធនាគារ ADB

ធនាគារ ADB មានឥទ្ធិពលខ្លាំងមិនធម្មតាឡើយ ព្រោះស្ថាប័នមួយនេះ បានក្លាយជាអ្នកឃ្លាំមើលផ្លូវការមួយរស់អង្គការសហប្រជាជាតិ។

គិតត្រឹមថ្ងៃទី៣១ ធ្នូ ឆ្នាំ២០១៨ ប្រទេសជប៉ុន និងសហរដ្ឋអាមេរិក កាន់កាប់ចំណែកភាគហ៊ុនក្នុងម្នាក់ៗ១៥,៥៧១% ចិនកាន់កាប់៦,៤២៩% ប្រទេសឥណ្ឌា កាន់កាប់ ៦,៣១៧% ហើយប្រទេសអូស្ត្រាលីកាន់កាប់៥,៧៧៣%។

អ្នកធ្វើគោលនយោបាយខ្ពស់បំផុតនៃធនាគារនេះ គឺគណៈអភិបាល (Board of Governors) ដែលមានសមាសភាពតំណាងមួយរូបៗ មកពីប្រទេសជាសមាជិកនីមួយ​ៗ។ គណៈអភិបាលនេះបោះឆ្នោតជ្រើសតាំងខ្លួនឯង ក្នុងចំណោមសមាជិកទាំង១២រូបនៃក្រុមប្រឹក្សាភិបាល (Board of Directors) និងអនុប្រធានរបស់ពួកគេ។  សមាសភាព៨រូបនៃសមាជិមទាំង១២ មកពីតំបន់អាស៊ី-ប៉ាស៊ីហ្វិក។ ចំណែកឯសមាជិកផ្សេងទៀតបណ្ដាប្រទេសជាសមាជិកដែលមិននៅក្នុងតំបន់។

គណៈអភិបាល ក៏បោះឆ្នោតជ្រើសតាំងប្រធានរបស់ធនាគារនេះ ដែលនឹងក្លាយជាប្រធានក្រុមប្រឹក្សាភិបាល និងគ្រប់គ្រងធនាគារADB ផងដែរ។ ប្រធានធនាគារនេះកាន់តំណែងមួយអាណត្តិ៥ឆ្នាំ ហើយប្រហែលជាត្រូវបោះឆ្នោតជ្រើសតាំង មួយអាណត្តិទៀត។ ហើយដោយសារតែប្រទេសជប៉ុន ជាម្ចាស់ភាគហ៊ុនធំបំផុតមួយ ជាទូទៅប្រធានគឺតែងតែជាជនជាតិជប៉ុន។

ទីស្នាក់ការកណ្ដាលរបស់ធនាគារនេះគឺស្ថិតនៅផ្លូវ 6 ADB Avenue ក្រុង Mandaluyong ប្រទេសហ្វីលីពីន ហើយមានការិយាល័យចំនួន៣១នៅអាស៊ី-ប៉ាស៊ីហ្វិក និងការិយាល័យតំណាងនៅរដ្ឋធានីវ៉ាស៊ីនតោន សហរដ្ឋអាមេរិក ក្រុង Frankfurt អាល្លឺម៉ង់ តូក្យូ ប្រទេសជប៉ុន និងក្រុងស៊ីដនី ប្រទេសអូស្ត្រាលី។  ធនាគារនេះជួលបុគ្គលិកប្រមាណ៣.០០០នាក់ ដែលតំណាងឱ្យប្រទេសចំនួន៦០ ក្នុងចំណោមប្រទេសដែលជាសមាជិកទាំង៦៨ប្រទេស។

ធនាគារ ADB ជាស្ថាប័នអភិវឌ្ឍន៍សង្គម ដែលប្ដេជ្ញាជួយកាត់បន្ថយភាពក្រីក្រនៅអាស៊ី-ប៉ាស៊ីហ្វិក តាមរយៈការផ្ដល់ឥណទាន ដើម្បីជំរុញកំណើនសេដ្ឋកិច្ចប្រកបដោយបរិយាប័ន កំណើនប្រកបដោយនិរន្តភាពផ្នែកបរិស្ថាន និងការសមាហរ័ណកម្មតំប់។ ហើយការកាត់បន្ថយភាពក្រីក្រនេះ ធ្វើឡើងការវិនិយោគ ក្នុងទម្រង់ជាឥណទាន ជំនួយឥតសំណង និងការចែករំលែកព័ត៌មាន ដោយជួយប្រទេសនានាឱ្យត្រៀមខ្លួនសម្រាប់ផលប៉ះពាល់ដែលបង្កឡើង ដោយបម្រែបម្រួលអាកាសធាតុ ឬគ្រប់គ្រងធនធានធម្មជាតិរបស់ពួកគេ ព្រមទាំងនៅក្នុងវិស័យផ្សេងៗទៀតផងដែរ។

ចំនួន៨០%នៃការផ្ដល់ឥណទានរបស់ធនាគារ ADB គឺផ្ដោតលើវិស័យចំនួន៥ដូចខាងក្រោម៖

  • វិស័យអប់រំ
  • បរិស្ថាន បម្រែបម្រួលអាកាសធាតុ និងការគ្រប់គ្រងហានិភ័យគ្រោះមហន្តរាយ
  • ការអភិវឌ្ឍវិស័យហិរញ្ញវត្ថុ
  • ហេដ្ឋារចនាសម្ព័ន្ធ រួមមានវិស័យដឹកជញ្ជូន និងទូរគមនាគមន៍ ការផ្គត់ផ្គង់ទឹក និងថាមពលអគ្គិសនី និងអនាម័យ និងការអភិវឌ្ឍក្រុង
  • កិច្ចសហប្រតិបត្តិការ និងការធ្វើសមាហរ័ណកម្មតំបន់
  • ការផ្ដល់ឥណទានដល់វិស័យឯកជន

* មូលនិធិ និងធនធាន

Financing Partnership Facilities (Platform ប្រតិបត្តិការសម្រាប់កិច្ចសហប្រតិបត្តិការជាយុទ្ធសាស្ត្ររយៈពេលវែង និងពហុភាគី) ជាង៥០ មូលនិធិ Trust Fund និងមូលនិធិផ្សេងៗទៀតដែលក្នុងមួយឆ្នាំៗ មានទំហំទឹកប្រាក់ជាច្រើនពាន់លានដុល្លារ ត្រូវបានគ្រប់គ្រងដោយធនាគារ ADBហើយស្នើគម្រោង ដែលជួយលើកកម្ពស់ការអភិវឌ្ឍសង្គម និងសេដ្ឋកិច្ចនៅអាស៊ី-ប៉ាស៊ីហ្វិក៕

សេដ្ឋកិច្ចកាទូតៈ​គោល​នយោបាយ​ការ​បរទេស​ថ្មី​របស់​កម្ពុជា​ដើម្បី​ចាប់​យក​កាលានុវត្តន៍​ភាព​ជម្រុញ​កំនើន​សេដ្ឋកិច្ច

ដោយៈ គង់ ម៉ាលីន

ភ្នំពេញៈ រដ្ឋាភិបាលកម្ពុជាបានដាក់ចេញនូវយុទ្ធសាស្ត្រថ្មី បន្ថែមចំនួន៤ដែលមានសារសំខាន់ និងភាពចាំបាច់ក្នុងការជួយជ្រោមជ្រែង និងពង្រឹងសេដ្ឋកិច្ចកម្ពុជាក្រោយវិបត្តិសេដ្ឋកិច្ចពិភពលោក តាមរយៈការទូតសេដ្ឋកិច្ចនៃក្រសួងការបរទេស និងសហប្រតិ​បត្តិការអន្តរជាតិ។

ឧបនាយករដ្ឋមន្ត្រី រដ្ឋមន្ត្រីការបរទេស លោកប្រាក់ សុខុន បានលើកឡើងកាលពីពេលថ្មីៗនេះថា ក្រសួងការបរទេសបានប្តេជ្ញារៀបចំ តាក់តែងនូវយុទ្ធសាស្ត្រការទូតសេដ្ឋកិច្ច ដើម្បីជាត្រីវិស័យ ក្នុងការពង្រឹងប្រសិទ្ធភាពការងារផ្នែកការទូតសេដ្ឋកិច្ច និងដើម្បីចូលរួមជាវិភាគទាន ពង្រឹងជន្ទល់កំណើនសេដ្ឋកិច្ច កាត់បន្ថយការពឹងផ្អែកលើជំនួយពីខាងក្រៅ និងលើកកម្ពស់ផលប្រយោជន៍កម្ពុជានៅក្នុងតំបន់ និងអន្តរជាតិ។

លោកបញ្ជាក់ថា“យុទ្ធសាស្ត្រការទូតសេដ្ឋកិច្ច ដែលក្រសួងបានសម្រេចដាក់ចេញ និងចាប់អនុវត្តគឺផ្តោតទៅគោលដៅចំនួន៤ធំៗ រួមមាន ការជំរុញពាណិជ្ជកម្មអន្តរជាតិ ការទាក់ទាញ ការវិនិយោគទុនផ្ទាល់ពីបរទេស ការលើកកម្ពស់វិស័យទេសចរណ៍ និងការជំរុញឱ្យមានការផ្លាស់ប្តូរវប្បធម៌”។

លោកឧបនាយករដ្ឋមន្ត្រីបានមានប្រសាសន៍ថា តាមរយៈយុទ្ធសាស្រ្តខាងលើក្រសួ​ងការបរទេស និងសហប្រតិបត្តិការអន្តរជាតិ នឹងដើរតួនាទីជាអ្នកសម្របសម្រួល និងជំរុញយន្តការដែលមានស្រាប់ ដើម្បីទាក់ទាញការវិនិយោគទុនផ្ទាល់ពីបរទេស ជំរុញឱ្យមានកំណើននៃការធ្វើពាណិជ្ជកម្មទ្វេភាគី និងពហុភាគី និងទាក់ទាញភ្ញៀវទេសចរណ៍តាមរយៈការពង្រឹងតម្លៃវប្បធម៌ខ្មែរនៅក្រៅប្រទេស។ បន្ថែមពីនេះនៅមានការអភិវឌ្ឍធនធានអ្នកការទូតជំនាន់ថ្មីប្រកបដោយវិជ្ជាជីវៈ សមត្ថភាពខ្ពស់សកម្មការពារ និងលើកស្ទួយផលប្រយោជន៍ជាតិលើគ្រប់វិស័យ”។

លោកបានបន្តឱ្យដឹងថា នៅក្នុងការរៀបចំអនុវត្តយុទ្ធសាស្រ្តការទូត សេដ្ឋកិច្ចនេះ ក្រសួងការបរទេស ពុំមានភារកិច្ចដើរតួនាទីជំនួសឱ្យក្រសួងស្ថាប័នជំនាញ ដែលកំពុងអនុវត្តការងារនេះស្រាប់នោះទេ ប៉ុន្តែដើម្បីធានាអនុវត្តសម្រេច ដោយជោគជ័យនូវយុទ្ធសាស្រ្តការទូតសេដ្ឋកិច្ចនេះ គឺទាមទារឱ្យមានការចូលរួមពីគ្រប់ភាគីពាក់ព័ន្ធ ដូចជា ស្ថានតំណាងកម្ពុជាប្រចាំនៅបរទេស ក្រសួងស្ថាប័នពាក់ព័ន្ធនៃរាជរដ្ឋាភិបាលកម្ពុជា និងវិស័យឯកជនផងដែរជាចាំបាច់៕

ឥណ្ឌូណេស៊ី គ្រោង​សាងសង់​រោងចក្រ​ផលិត​អាគុយ​ក្នុង​ទំហំ​ទឹក​ប្រាក់​១,២​ពាន់​លាន​ដុល្លារ​ជាមួយ​ក្រុមហ៊ុន LG ឆាប់ៗ​នេះ

ដោយៈ សុខុម

ហ្សាការតាៈ រដ្ឋមន្ត្រីវិនិយោគរបស់ឥណ្ឌូនេស៊ី បានប្រកាសកាលពីថ្ងៃច័ន្ទ ទី២៤ ឧសភា ថា ក្រុមហ៊ុនដែលគ្រប់គ្រងដោយរដ្ឋ Indonesia Battery Corporation (IBC) និងក្រុមហ៊ុន LG របស់កូរ៉េខាងត្បូង នឹងសាងសង់រោងចក្រផលិតអាគុយថ្មីមួយ ក្នុងទំហំទឹកប្រាក់១,២ពាន់លានដុល្លារអាមេរិក។

យោងតាមសារព័ត៌មានCNA ឱ្យដឹងថា រោងចក្រដែលជាផ្នែកមួយនៃកិច្ចព្រមព្រៀ​ងផលិតរថយន្តអគ្គិសនី (EV) ក្នុងទំហំទឹកប្រាក់រហូតដល់ទៅ៩,៨ពាន់លានដុល្លារអាមេរិក រវាងក្រុមហ៊ុន LG និងឥណ្ឌូនេស៊ី ដែលបានចុះហត្ថលេខាកាលពីឆ្នាំមុននេះ នឹងត្រូវសាងសង់នៅក្នុងទីក្រុង Bekasi។

តាមរយៈសេចក្ដីថ្លែងការណ៍ លោក Bahlil Lahadalia រដ្ឋមន្រ្តីវិនិយោគឥណ្ឌូនេស៊ី មិនបានបញ្ជាក់ ពីពេលវេលាចាប់ផ្ដើមការសាងសង់នោះទេ ដោយគ្រាន់តែលើកឡើងថា រោងចក្រនេះ នឹងត្រូវសាងសង់ក្នុងពេលដ៏ខ្លីខាងមុខនេះ។

លោកបានបន្ថែមថា “ដំណាក់កាលទី១ នៃការសាងសង់នឹងមានសមត្ថភាពផលិតថាមពលបាន១០ជីហ្គាវ៉ាត់ម៉ោង (GWh)ដែលនឹងត្រូវប្រើសម្រាប់រថយន្តអគ្គិសនី ពីក្រុមហ៊ុន Hyundai”។

យោងតាមសេចក្ដីថ្លែងការណ៍ខាងលើឱ្យដឹងថា សម្ព័ន្ធក្រុមហ៊ុនLGមានបុត្រសម្ព័ន្ធជាច្រើនរួមមានក្រុមហ៊ុន LG Chem ក្រុមហ៊ុន LG Energy Solution ក្រុមហ៊ុន LG International ព្រមទាំងក្រុមហ៊ុនផលិតដែកថែបកូរ៉េខាងត្បូង POSCO និងក្រុមហ៊ុនចិន Huayou Holdings ផងដែរ។

ទោះជាយ៉ាងណា ភ្លាមៗទីភ្នាក់ងារព័ត៌មាន Reuters ទំនាក់ទំនងទៅអ្នកនាំពាក្យក្រុមហ៊ុន LG Energy Solution ដែលជាក្រុមផលិតអាគុយរបស់ក្រុមហ៊ុនសម្ព័ន្ធ LG ដើម្បីសុំការបំភ្លឺបានទេជុំវិញបញ្ហានេះ។

ទីភ្នាក់ងារព័ត៌មាន Reuters បានចុះផ្សាយកាលពីដើមខែនេះថា ក្រុមហ៊ុន LG Energy Solutionកំពុងសម្លឹងរកឱកាសផលិតអាគុយ បច្ចេកវិទ្យាជឿនលឿនឱ្យក្រុមហ៊ុនផលិតរថយន្តអគ្គិសនីសហរដ្ឋអាមេរិក Tesla Inc នៅឆ្នាំ២០២៣ ហើយកំពុងពិចារណាទីតាំងផលិតនៅសហរដ្ឋអាមេរិក និងអឺរ៉ុប។

ក្នុងនាមជាប្រទេសផលិតលោហៈធាតុនីគែល (Nickel) ធំជាងគេ ឥណ្ឌូនេស៊ីមានផែនការប្រកបដោយមហិច្ឆតាធំ គឺចាប់ផ្ដើមកែច្នៃលោហៈធាតុនីគែល ដ៏សម្បូរបែបរបស់ខ្លួន សម្រាប់ប្រើប្រាស់ក្នុងអាគុយ Lithium ហើយទីបំផុតនឹងក្លាយជាមជ្ឈមណ្ឌលពិភពលោកសម្រាប់ការផលិត និងនាំចេញរថយន្តអគ្គិសនី។

ក្រុមមន្រ្តីនិយាយថា ប្រទេសឥណ្ឌូនេស៊ី កំពុងកំណត់គោលដៅផលិតអាគុយ ដែលមានសមត្ថភាព ផលិតថាមពលបាន១៤០ជីហ្គាវ៉ាត់ម៉ោង (GWh) នៅត្រឹមឆ្នាំ២០៣០៕