ចូ បៃឌិន គ្រោងប្រើយុទ្ឋសាស្ត្ររបស់លោកដូណាល់ ត្រាំ ដើម្បីចាត់ការក្រុមហ៊ុនបច្ចេកវិទ្យាចិន ដែលបង្កការគំរាមកំហែងដល់អាមេរិក

ដោយៈសុខុម

វ៉ាស៊ីនតោនៈ យើងដឹងហើយថា ទំនាក់ទំនងការទូតរវាងសហរដ្ឋអាមេរិក និងមហាយក្សចិន មានភាពប្រេះឆាយ៉ាងខ្លាំង នៅរយៈពេលប៉ុន្មានឆ្នាំចុងក្រោយនេះ ដោយសាររដ្ឋការរបស់លោកដូណាល់ ត្រាំ បានបញ្ឆេះសង្គ្រាមពាណិជ្ជកម្មប្រឆាំងចិន។ មជ្ឈដ្ឋានទូទៅព្យាករថា ក្រោមរដ្ឋការថ្មីរបស់លោក ចូ បៃឌិន ទំនាក់ទំនងរវាងប្រទេសមហាអំណាចទាំងពីរនឹងធូរស្រាលឡើង ប៉ុន្តែប្រហែលជាមិនងាយស្រួលដូច្នេះឡើយ។

យោងតាមសារព័ត៌មាន CNA ចុះផ្សាយកាលពីថ្ងៃទី២៧ កុម្ភៈ ឱ្យដឹងថា រដ្ឋការរបស់លោកចូ បៃឌិន មានផែនការអនុញ្ញាតឱ្យវិធានការ ក្នុងសម័យដឹកនាំរបស់លោក ដូណាល់ ត្រាំ ចូលជាធរមាន បើទោះបីជាមានការជំទាស់ពីបណ្ដាក្រុមហ៊ុន សហគ្រាសរបស់សហរដ្ឋអាមេរិកយ៉ាងណាក្ដី។

ក្រសួងពាណិជ្ជកម្មសហរដ្ឋអាមេរិក បានបញ្ជាក់កាលពីថ្ងៃសុក្រ ទី២៦ កុម្ភៈ ថា វិធាននោះ មានគោលបំណងចាត់វិធានការណ៍ លើក្រុមហ៊ុនបច្ចេកវិទ្យាចិនណា ដែលគេរកឃើញថាបង្កការគំរាមកំហែងមកលើសហរដ្ឋអាមេរិក។

ក្រសួងនេះ បានចេញវិធានចុងក្រោយជាបណ្តោះអាសន្នមួយ ក្នុងគ្រាដែលលោក ដូណាល់ ត្រាំ សល់ពេលកាន់អំណាចតែប៉ុន្មានចុងក្រោយ។ វិធាននោះមានគោលបំណងដោះស្រាយក្ដីកង្វល់នានាអំពីសង្វាក់ផ្គត់ផ្គង់បច្ចេកវិទ្យាព័ត៌មាន និងទូរគមនាគមន៍ ហើយបានបញ្ជាក់ថា វិធាននោះនឹងមានប្រសិទ្ធភាពអនុវត្តន៍ បន្ទាប់ពីសាធារណជនបញ្ចេញមតិយោបល់រយៈពេល៦០ ថ្ងៃ។

កាលពីថ្ងៃសុក្រ សប្ដាហ៍នេះ អ្នកនាំពាក្យក្រសួងពាណិជ្ជកម្ម បានលើកឡើងតាម រយៈសេចក្ដីថ្លែងការណ៍ថា ក្រសួងពាណិជ្ជកម្ម នឹងបន្តទទួលយកការបញ្ចេញមតិយោបល់របស់សាធារណជន អំពីវិធាននេះរហូតដល់ថ្ងៃទី២២ មីនា ជាពេលដែលវិធាននេះត្រូវចូលជាធរមាន។

សេចក្ដីថ្លែងការណ៍ដដែលមានខ្លឹមសារដូច្នេះថា “បច្ចេកវិទ្យា ព្រមទាំងសេវាព័ត៌មាន និងទូរគមនាគមន៍ដែលអាចជឿទុកចិត្តបាន ពិតជាមានសារៈសំខាន់ណាស់ចំពោះសន្តិសុខជាតិ និងសន្តិសុខសេដ្ឋកិច្ចរបស់យើង ហើយវានៅតែជាគោលនយោបាយអាទិភាពកំពូលសម្រាប់រដ្ឋការលោក ចូ បៃឌិន” ។

សភាពាណិជ្ជសហរដ្ឋអាមេរិក និងក្រុមតំណាងឧស្សាហកម្មសំខាន់ៗ បានលើកឡើងពីក្ដីព្រួយបារម្ភ នៅក្នុងលិខិតមួយផ្ញើជូនទៅក្រសួងពាណិជ្ជកម្ម កាលពីខែមករាថា “វិធាននេះ ទទួលបានអំណាចស្ទើរតែគ្មានដែនកំណត់ នៅក្នុងការអន្តរាគមន៍ក្នុងការធ្វើប្រតិបត្តិពាណិជ្ជកម្ម រវាងក្រុមហ៊ុនសហរដ្ឋអាមេរិក និងក្រុមហ៊ុនបរទេសពាក់ព័ន្ធនឹងប ច្ចេកវិទ្យា ដែលមានតិចតួច ឬក៏គ្មានសោះនូវដំណើរការត្រឹមត្រូវ គណនេយ្យភាព តម្លាភាព ឬការសម្របសម្រួលជាមួយកម្មវធីផ្សេងៗទៀតរបស់រដ្ឋាភិបាល” ។

កិច្ចប្រជុំតុមូលរបស់ក្រុមតំណាងនាយកប្រតិបត្តិ នៃក្រុមហ៊ុនធំៗរបស់សហរដ្ឋអាមេរិក បានលើកឡើងមុននេះថា វិធាននេះ “មិនអាចទៅរួចឡើយ សម្រាប់ក្រុមហ៊ុនសហគ្រាសសហរដ្ឋអាមេរិក បើស្ថិតនៅក្នុងទម្រង់បច្ចុប្បន្ន” ។

ទោះជាយ៉ាងណា ខណៈក្រសួងពាណិជ្ជកម្មអាមរិក កំពុងទទួលយកមតិយោបល់ពីសាធារជននៅឡើយ ក្រសួងប្រហែលជាអាចកែប្រែវិធាននេះលើចំណុចខ្លះ ដោយផ្អែកតាមការជំទាស់ពីក្រុមហ៊ុនសហគ្រាស និងភាគីពាក់ព័ន្ធផ្សេងទៀត៕

ផ្ទះជាង ៣០០ត្រូវបានលក់ក្នុងកម្មវិធីបើកសម្ពោធជាផ្លូវការ គម្រោងថ្មីបែបអេកូធម្មជាតិ៣ គម្រោងព្រមគ្នា “សុភមង្គលថ្មីបែបធម្មជាតិ”

ដោយៈ សហការី

ភ្នំពេញៈ បុរី ប៉េង ហួត ទើបតែប្រកាសបើកលក់ជាផ្លូវការគម្រោងថ្មី បែបអេកូធម្មជាតិ៣គម្រោងព្រមគ្នា ជាគម្រោងដែលអតិថិជនទន្ទឹងរង់ចាំ ហើយចង់បានការរស់នៅបែបអេកូធម្មជាតិ។

អ្វីដែលនឹកស្មានមិនដល់ គម្រោងថ្មីទាំង៣នេះ ពិតជាទទួលបានការគាំទ្រយ៉ាងខ្លាំង ពីសំណាក់អតិថិជន ព្រោះគិតមកដល់ត្រឹមតែថ្ងៃទី1ប៉ុណ្ណោះ គឺលក់បានជាង 300ផ្ទះ។ ប៉ុន្តែអតិថិជនទាំងអស់ នៅតែអាចអញ្ជើញមកចូលរួមសាកសួរព័ត៌មាន ព្រោះទីតាំង ល្អៗ កំពុងរង់ចាំលោកអ្នកនៅឡើយ ហើយការបើកលក់នៅសល់រយៈពេល២ថ្ងៃទៀត។

មូលហេតុដែលអតិថិជន ពេញចិត្តចំពោះគម្រោងដ៏ថ្មីសន្លាងនេះ ព្រោះថាគម្រោងថ្មី ដឹស្តាផ្លាទីនីម អេកូ រ៉ូមែនស៍ និង ដឹស្តា ផ្លាទីនីម អេកូ វេរ៉ាន់ដា គឺជាគម្រោងអភិវឌ្ឍជាសហគមន៍ទំនើបធម្មជាតិពណ៌បៃតងមួយ ដែលផ្តល់ជូននូវបទពិសោធន៍រស់នៅដ៏អស្ចារ្យ ជាមួយនឹងប្រភេទវីឡាទំនើបចម្រុះរាប់ពាន់ខ្នង ឧទ្យានដ៏ធំអស្ចារ្យអមទៅដោយរុក្ខជាតិចម្រុះខៀវស្រងាត់ ទីធ្លាកម្សាន្ត ហ៊ុមព័ទ្ធដោយបឹង ផ្លូវជិះកង់ និងផ្លូវរត់ Marathon កន្លែងក្មេងលេង ដែលពោរពេញទៅដោយបរិយាកាសបែបធម្មជាតិពិតៗ ហើយផ្តល់ជូននូវបទពិសោធន៍ថ្មីប្លែក ទៅតាមបែបផែននៃការរស់នៅជាមួយ “សុភមង្គលថ្មីបែបធម្មជាតិ” ។

ចំណែកឯគម្រោងដឹស្តាផ្លាទីនីម អេកូ សាន់រ៉ាយ ជាគម្រោងដែលមានប្រភេទស្សបហោស៍ សម្រាប់ការធ្វើអាជីវកម្មខ្នាតតូច និងខ្នាតធំគ្រប់ប្រភេទ។ គម្រោងនេះ នឹងក្លាយជាភូមិសាស្ត្រអាជីវកម្ម ដ៏រីកចម្រើនយ៉ាងឆាប់រហ័ស ដោយសារតែទីនេះ គឺជាតំបន់ពាណិជ្ជកម្ម ដ៏សំខាន់សម្រាប់ផ្គត់ផ្គង់តម្រូវការ របស់អ្នករស់នៅក្នុងគម្រោង ហ្គ្រេនស្តា ផ្លាទីនឹម វគ្គ២ អេកូខលឡិកសិន ជាពិសេសអ្នកដែលរស់នៅជុំវិញផងដែរ។

លក្ខណៈពិសេសរបស់គម្រោងថ្មីទាំង3 នេះ គឺផ្តោតសំខាន់ទៅលើ ភាពទំនើបស៊ីវិល័យ ប្រណិតភាព ឧត្តមភាព ឯកជនភាព ផាកសុកភាព និងសុភមង្គលគ្រួសារ ដែលផ្សារភ្ជាប់ជាមួយធម្មជាតិពិតៗ សម្រាប់គ្រួសារជាទីស្រលាញ់របស់លោកអ្នក។

អ្វីដែលកាន់តែពិសេសជាងនេះទៅទៀត អតិថិជននឹងទទួលបានសំណាងផ្ទួនៗគ្នា ដែលរួមមាន- ទទួលបានការបញ្ចុះតម្លៃរហូតដល់ 11% ភ្លាម- ទទួលបានកង់ស្ព័រម៉ាកល្បី Giant ភ្លាមៗចំពោះការទិញគ្រប់ប្រភេទផ្ទះ។ – ចំណេញបន្ថែមរហូតដល់ $20,000 ។

ពិសេសលើពិសេស ដែលលោកអ្នក នឹកស្មានមិនដល់ នោះគឺឱកាសឈ្នះដំណើរកម្សាន្ត VVIP ទៅកាន់កោះសង្សារ ជាមួយមនុស្សជាទីស្រលាញ់យ៉ាងរ៉ូមែនទិកជាច្រើនរង្វាន់។ សូមរួសរាន់ឡើង ការផ្តល់ជូនពិសេសនេះ មានកំណត់ត្រឹមតែ3ថ្ងៃតែប៉ុណ្ណោះ គឺចាប់ពីថ្ងៃទី19 ដល់ថ្ងៃទី21 ខែកុម្ភៈ ឆ្នាំ 2021 ខាងមុខនេះ។

ប្រញាប់រួសរាន់ឡើង មកមុនបានជម្រើសមុន ព្រោះចំនួនមានកំណត់។ សម្រាប់ព័ត៌មានបន្ថែម សូមទាក់ទងទូរស័ព្ទលេខ 098/ 016 / 017 596 789 ឬ រង់ចាំតាមដានគេហទំព័រ Facebook បុរី ប៉េង ហួត៕

វិនិយោគិននៅតែបន្តអភិវឌ្ឍន៍អចលនទ្រព្យជាមួយក្ដីរំពឺងថាស្ថានភាពនៃវិបត្តិនឹងត្រលប់ទៅភាពដើមវិញ

ដោយៈ សហសេវិក

ភ្នំពេញៈ ថ្វីត្បិតតែ កម្ពុជាជួបវិបត្តិដោយសារតែកូវីដ១៩យ៉ាងណាក្ដី តែគេបានមើលឃើញគម្រោងអភិវឌ្ឍន៍ ដោយមានវិនិយោគិនបន្តដាក់ទុនវិនិយោគ ជាបន្តបន្ទាប់ ជាមួយនឹងក្ដីរំពឹងថា ស្ថានភាពនៃវិបត្តិដោយសារតែកូវីដ១៩ នឹងបានបញ្ចប់ហើយធ្វើឱ្យសេដ្ឋកិច្ចវិលទៅរកភាពដើមឡើងវិញ។

លោកង៉ែត ជូ សេដ្ឋវិទូមួយរូបនៅកម្ពុជា និងជាអ្នកវិនិយោគក្នុងវិស័យអចលនទ្រព្យបានឱ្យដឹងថា វិស័យអចលនវត្ថុកាលពីមុនមានវិបត្តិ គឺមានការកើនឡើងខ្ពស់ និងសកម្មភាពមមាញឹកខ្លាំង ដោយមានវិនិយោគិនក្នុង និងក្រៅប្រទេសជាច្រើនចូលមកបណ្ដាក់ទុនវិនិយោគនៅក្នុងប្រទេសកម្ពុជា។ ដូច្នេះនៅពេលមានវិបត្តិដោយសារតែកូវីដ១៩ សកម្មភាពទាំងនោះ មិនបានផ្អាកទាំងស្រុងឬបញ្ឈប់នោះឡើយ ពោលគឺនៅតែមានសកម្មភាពវិនិយោគជាហូរហែ។

លោកបន្តថា “ការវិនិយោគអចលនទ្រព្យនៅក្នុងប្រទេសកម្ពុជា មានច្រើនផ្នែកក្នុងនោះ មានដីធ្លីសម្រាប់កសិកម្ម សំណង់ រោងចក្រ និងការអភិវឌ្ឍអគារខ្ពស់ៗក្នុងរាជធានីភ្នំពេញជាដើម”។ លោកថា “អ្នកវិនិយោគដែលគិតតែផលចំណេញ វានឹងពិបាកបន្តិចក្នុងរយៈពេលនេះ តែអ្នកដែលវិនិយោគដែលគិតពីការវិនិយោគយូរអង្វែង គេនៅតែបន្តអភិវឌ្ឍន៍គម្រោងរបស់គេដដែល ដោយរំពឹងថាអ្វីៗនឹងប្រសើរ”។

ជាមួយគ្នានេះ អ្នកឧកញ៉ាលី ហួរប្រធានសមាគមអ្នកអភិវឌ្ឈន៍លំនៅដ្ឋានកម្ពុជាបានមានប្រសាសន៍ថា សកម្មភាពនៃការវិនិយោគលើវិស័យអចលនទ្រព្យ មិនបានផ្អាកនោះទេ ពិសេសគំរោងសាងសង់លំនៅដ្ឋាននានា ព្រោះគំរោងមួយមិនបញ្ចប់រយៈពេលពីរ ទៅបីខែនោះទេ ប៉ុន្តែសកម្មភាពនៃគំរោងវិនិយោគថ្មី អ្នកវិនិយោគហាក់កំពុងរង់ចាំមើលស្ថានភាពថា តើមានសភាពដូចម្តេចលើការគ្រប់គ្រងការរីករាលដាលជំងឺកូវីដ១៩។

លោកបន្តថា “លោកជឿថារដ្ឋាភិបាលនឹងអាចគ្រប់គ្រងស្ថានភាពនេះបាន ព្រោះយើងមានបទពិសោធន៍គ្រប់គ្រងបានល្អនាពេលកន្លងមក”៕

កំណើនតម្រូវការរបស់ក្រុមហ៊ុនបច្ចេកវិទ្យាធំៗផ្តល់ក្តីសង្ឃឹមឡើងវិញដល់ទីផ្សារការិយាល័យនៅអាមេរិក

ដោយៈ ប៊ី

ញូវយ៉កៈ កំណើនតម្រូវការជួលរបស់ក្រុមហ៊ុនបច្ចេកវិទ្យាធំៗ ដូចជាក្រុមហ៊ុន Amazon.com Inc ក្រុមហ៊ុន Facebook Inc និងក្រុមហ៊ុន Google នៅទីក្រុងញូវយ៉ក បានផ្តល់ឱ្យម្ចាស់អចលនទ្រព្យ និងភ្នាក់ងារអចលនទ្រព្យមានសង្ឃឹមថា ទីផ្សារការិយាល័យការិយាល័យ ដែលរងផលប៉ះពាល់យ៉ាងធ្ងន់ធ្ងរដោយវិបត្តិកូវីដ១៩ នឹងវិលត្រឡប់ទៅសភាពដើមវិញ។

បច្ចុប្បន្ន ក្រុមហ៊ុនបច្ចេកវិទ្យាធំៗទាំងនេះ បាននិងកំពុងសម្លឹងរកអាគារការិយាល័យនៅទីរដ្ឋហិរញ្ញវត្ថុដ៏ធំ របស់សហរដ្ឋអាមេរិកមួយ ដែលការណ៍នេះផ្តល់ឱ្យក្តីសង្ឃឹមយ៉ាងខ្លាំងដល់ទីផ្សារការិយាល័យ ក្នុងការងើបឡើងវិញ។ នេះបើយោងតាមការចេញផ្សារយរបស់សារព័ត៌មាន CNA នៅថ្ងៃទី២៧ ខែកុម្ភៈ ឆ្នាំ២០២១។

ប៉ុន្តែការធ្វើការពីផ្ទះ និងការចាកចេញរបស់ប្រជាជន ពីទីតំបន់ឆ្នេរសមុទ្រ ដែលមានតម្លៃនៅរស់នៅថ្លៃៗ នឹងទំនងជាមានផលប៉ះពាល់ដល់តម្រូវការ នៃទីផ្សារការិយាល័យ។

ជាមួយគ្នានេះដែរ តម្លៃលក់អាគារការិយាល័យ នៅតាមបណ្តាទីក្រុងនានារបស់សហរដ្ឋអាមេរិកនៅទ្រឹង ឬឡើងថ្លៃតិចតូចក្នុង កំឡុងពេលមានជំងឺរាតត្បាតនេះ។ ទិន្នន័យបានបង្ហាញថា ប៉ុន្តែអត្រាជួល និងចំនួនអាគារ ដែលបានលក់ចេញបានធ្លាក់ចុះ។

លោក Joe Gorin ប្រធានគ្រប់គ្រងអចលនទ្រព្យក្រុមហ៊ុន Barings នៅសហរដ្ឋអាមេរិកបានថ្លែងថា ជំងឺរាតត្បាតបានបន្សល់ទុកនូវសំនួរដ៏ធំមួយ ដែលជាប់គាំងនៅក្នុងវិស័យការិយាល័យ។

លោកបានថ្លែងថា “ខ្ញុំដឹងថាអ្នកធ្វើការនឹងប្រើសណ្ឋាគារ ឬនៅផ្ទះជំនួសឱ្យការិយាល័យ អំឡុងពេលជំងឺរាតត្បាត”។ ហេតុអ្វីបានជាអ្នកធ្វើការនឹងប្រើអគារការិយាល័យ? វានឹងមានផលប៉ពាល់ខ្លះ ពីព្រោះយើងនឹងត្រូវទទួលយកនូវរបៀបថ្មី នៃការប្រើប្រាស់ការិយាល័យរបស់អ្នកធ្វើការ”។

លោកGorin បាននិយាយថា ក្រុមហ៊ុនចាំបាច់ ត្រូវធ្វើឱ្យការិយាល័យកាន់តែមានភាពទាក់ទាញ ប៉ុន្តែអាគារ ដែលមិនអាចផ្តល់បរិយាកាសល្អសម្រាប់ការងារ នឹងទទួលរងនូវប៉ពាល់លើតម្រូវការ។

លោកបន្តថា “ប្រសិនបើអ្នកបង្កើតអ្វី ដែលត្រឹមត្រូវ សម្រាប់អាគារការិយាល័យ វានឹងងបង្កើនតម្លៃដល់អាគារនោះ”។

ទិន្នន័យបានបង្ហាញថា តម្លៃអាគារការិយាល័យលំដាប់ក្រោមកម្រិត A ធ្លាក់ចុះ និងអាចនឹងធ្លាក់ចុះបន្តទៀត ប្រសិនបើការធ្លាក់ចុះនៃតម្រូវការនៅតែបន្តកើតមាន។

សកម្មភាពជួលបានកើនឡើង បន្ទាប់ពីចូលឆ្នាំថ្មី ប៉ុន្តែនៅតែទាបជាងកម្រិត មុនវិបត្តិជំងឺកូវីដ១៩។

លោកSam Isaacson ប្រធានក្រុមហ៊ុន Walker & Dunlop Investment Partners នៅទីក្រុង Denver ក្នុងរដ្ឋColorado និយាយថា វិស័យការិយាល័យគឺពិបាកបំផុតក្នុងការវាយតម្លៃ ពីព្រោះការជួលជាទូទៅមានកុងត្រារយៈពេលវែង។

លោកបានថ្លែងថា “ជាមួយគ្នានេះដែរ លំហូរសាច់ប្រាក់ត្រូវតែត្រូវគ្នានឹងការឡើងតម្លៃអចលនទ្រព្យ (ការិយាល័យ) ប៉ុន្តែនៅពេលរឿងនេះមិនកើតឡើង នោះជាពេលដែលយើងនឹងឃើញ ការរងផលប៉ះពាល់យ៉ាងពិតប្រាកដ”៕

រដ្ឋាភិបាលសម្រេចអនុម័តគម្រោងវិនិយោគថ្មីចំនួន១៤បោះទុនជាង២២៥លានដុល្លារក្នុងខែកុម្ភៈនេះ

ដោយៈ ប៊ី

ភ្នំពេញៈ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា (CDC) ក្នុងខែកុម្ភៈ ឆ្នាំ២០២១ បានសម្រេចអនុម័តគម្រោងវិនិយោគថ្មីចំនួន១៤ ដែលប្រកាសទុនវិនិយោគប្រមាណ២២៥,១លានដុល្លារអាមេរិក និងបង្កើតការងាររាប់ពាន់កន្លែងដល់ប្រជាជនកម្ពុជា។ នេះបើយោងតាមរបាយការណ៍របស់ CDC។

ក្រុមហ៊ុន និងគម្រោងទាំង១៤ ដែលក្រុមប្រឹក្សាអភិវឌ្ឍកម្ពុជាអនុម័តគាំទ្រ និងចុះវិញ្ញាបនបត្រជាស្ថាពររួមមាន ទី១- ក្រុមហ៊ុន “CART TIRE CO., LTD” គម្រោងបង្កើតរោងចក្រផលិតសំបកកង់យានយន្ត មានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេសឈីលូ បាវិត ខេត្តស្វាយរៀង មានទុនវិនិយោគប្រមាណ ១៥លានដុល្លារអាមេរិក និងអាចបង្កើតការងារបានចំនួន៣៨០កន្លែង។

ទី២- ក្រុមហ៊ុន ONION MOBILITY CO., LTD គម្រោងបង្កើតរោងចក្រផ្គុំតម្លើងទោចក្រយានយន្ត និងត្រីចក្រយានយន្តប្រើដោយថាមពលអគ្គិសនី ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស សុវណ្ណភូមិ ខេត្តកណ្តាល មានទុនវិនិយោគប្រមាណ២០លានដុល្លារអាមេរិក និងអាចបង្កើតការងារបានចំនួន៣៨០កន្លែង។

ទី៣- ក្រុមហ៊ុន SHANE (CAMBODIA) FURNITURE CO., LTD គម្រោងបង្កើតរោងចក្រផលិតសាឡុង គ្រែ និងគ្រឿងសង្ហារឹមគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសស៊ីន បាវិត ខេត្តស្វាយរៀង, មានទុនវិនិយោគប្រមាណ៤៧,៧លានដុល្លារអាមេរិក និងអាចបង្កើតការងារបានចំនួន៨២០កន្លែង។

ទី៤- ក្រុមហ៊ុន XIN JELLY INDUSTRY AND TRADING CO., LTD គម្រោងបង្កើតរោងចក្រកាត់ដេរសម្លៀកបំពាក់ និងក្រណាត់ទ្រនាប់សម្លៀកបំពាក់ ដែលមានទីតាំងវិនិយោគស្ថិតនៅភូមិតិក្ខបញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ២,៦លានដុល្លារអាមេរិក និងអាចបង្កើតការងារបានចំនួន ៧៦៤កន្លែង។

ទី៥- ក្រុមហ៊ុន MAYCO FURNITURE COMPANY LIMITED គម្រោងបង្កើតរោងចក្រផលិតគ្រឿងសង្ហារឹមគ្រប់ប្រភេទ (ពីឈើនាំចូល) ដែលមានទីតាំងវិនិយោគស្ថិតនៅភូមិព្រហែក ឃុំសូភី ស្រុកបាទី ខេត្តតាកែវ មានទុនវិនិយោគប្រមាណ ៣,៨លានដុល្លារអាមេរិក និងអាចបង្កើតការងារបានចំនួន១៨៨កន្លែង។

ទី៦ – ក្រុមហ៊ុន P P C H Y MACHINERY MANUFACTURING CO., LTD: គម្រោងបង្កើតរោងចក្រផលិតគ្រឿងបន្លាស់ (រថយន្ត គ្រឿងចក្រ គ្រឿងយន្ត) និងប៊ូឡុងគ្រប់ប្រភេទ ដែលមានទីតាំងវិនិយោគស្ថិតនៅភូមិឫស្សី ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ៦,៩លានដុល្លារអាមេរិក និងអាចបង្កើតការងារបានចំនួន ២០០កន្លែង។

ទី៧ – ក្រុមហ៊ុន KHEMA GLOBAL CO., LTD: គម្រោងសាងសង់ និងអាជីវកម្មមន្ទីរពហុព្យាបាលអន្តរជាតិ ចំនួន ៨១គ្រែ ដែលមានទីតាំងវិនិយោគស្ថិតនៅផ្លូវជាតិលេខ១ ភូមិឫស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ មានទុនវិនិយោគប្រមាណ ៦,៣លានដុល្លារអាមេរិក និងអាចបង្កើតការងារបានចំនួន២៨០កន្លែង។

ទី៨- ក្រុមហ៊ុន KHEMA GLOBAL CO., LTD: គម្រោងសាងសង់ និងអាជីវកម្មមន្ទីរពហុព្យាបាលអន្តរជាតិចំនួន៥៤គ្រែ ដែលមានទីតាំងវិនិយោគស្ថិតនៅ ផ្លូវជាតិលេខ៥២៨ ភូមិ១២ សង្កាត់បឹងកក់ទី១ ខណ្ឌទួលគោក រាជធានីភ្នំពេញ មានទុនវិនិយោគប្រមាណ ៣,៦លានដុល្លារអាមេរិក និងអាចបង្កើតការងារបានចំនួន១៨០កន្លែង។

ទី៩- ក្រុមហ៊ុន PRIME ROAD ALTERNATIVE (CAMBODIA) CO., LTD: គម្រោងបង្កើតស្ថានីយផលិតអគ្គិសនីដើរដោយពន្លឺព្រះអាទិត្យ អានុភាព ៦០មេហ្កាវ៉ាត់ ដែលមានទីតាំងវិនិយោគស្ថិតនៅភូមិព្រៃជ្រៅ ឃុំក្បាលទឹក ស្រុកទឹកផុស ខេត្តកំពង់ឆ្នាំង មានទុនវិនិយោគប្រមាណ៣៧,៤លានដុល្លារអាមេរិក និងអាចបង្កើតការងារបានចំនួន ១២កន្លែង។

ទី១០- ក្រុមហ៊ុន SYSG GARMENT COMPANY LIMITED: គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅអគារលេខ A-០៧ ផ្លូវជាតិលេខ៤ ភូមិស្វាយជ្រុំ ឃុំបែកចាន ស្រុកអង្គស្នួល ខេត្តកណ្តាល មានទុនវិនិយោគប្រមាណ៤,៣លានដុល្លារអាមេរិក និងអាចបង្កើតការងារបានចំនួន ១.៣៥១កន្លែង។

ទី១១- ក្រុមហ៊ុន VELONG (CAMBODIA) INDUSTRIES CO., LTD” គម្រោងបង្កើតរោងចក្រផលិតសម្ភារៈបរិក្ខារ សម្រាប់ចង្ក្រានBBQ ផ្គុំតម្លើងបរិក្ខារអេឡិចត្រូនិក និងអំពូលភ្លើង ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេសស្វាយរៀង ហ្គីហ្គា រីស៍ស, មានទុនវិនិយោគប្រមាណ៣,៥លានដុល្លារអាមេរិក និងអាចបង្កើតការងារបានចំនួន ១២០កន្លែង។

ទី១២- ក្រុមហ៊ុន ALLIED MAX INTERNATIONAL (CAMBODIA) CO., LTD គម្រោងបង្កើតរោងចក្រផលិតក្រណាត់ និងកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស សានដុង សាន់សែល, មានទុនវិនិយោគប្រមាណ៣២លានដុល្លារអាមេរិក និងអាចបង្កើតការងារបានចំនួន៣៧០កន្លែង។

ទី១៣- គម្រោងបង្កើតរោងចក្រកាត់ដេរសម្លៀកបំពាក់ របស់ក្រុមហ៊ុន OCEAN APPAREL MANUFACTURING CO., LTD មានទីតាំងវិនិយោគស្ថិតនៅដីឡូតិ៍លេខ១ ផ្លូវជាតិលេខ៤ ភូមិវល្លិសរ ឃុំវល្លិសរ ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៤លានដុល្លារអាមេរិក និងអាចបង្កើតការងារបានចំនួន២.៣០០កន្លែង។

ទី១៤- គម្រោងបង្កើតរោងចក្រផលិតផ្ទាំងកញ្ចក់សូឡា របស់ក្រុមហ៊ុន “GLAMOR GLASS CO., LTD” មានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស គិរីសាគរ កោះកុង និងមានទុនវិនិយោគប្រមាណ៧,៨លានដុល្លារអាមេរិក និងអាចបង្កើតការងារបានចំនួន១៩០កន្លែង៕

អ្នកជំនាញអចលនទ្រព្យ ៖ ស្ថានភាពបែបនេះជាពេលវេលាល្អបំផុតសម្រាប់ការវិនិយោគ

ដោយ:គង់ សូរិយា

ភ្នំពេញៈ អ្នកជំនាញអចលនទ្រព្យបាននិយាយថា ស្ថិតក្នុងស្ថានភាពបែបនេះ ការវិនិយោគអចលនទ្រព្យ គឺជាពេលវេលាល្អបំផុតពិសេសការវិនិយោគលើដីធ្លី ព្រោះវាជាស្ថានភាព ដែលអ្នកមានបញ្ហាសាច់ប្រាក់ត្រូវការលក់អចលនទ្រព្យបន្ទាន់។

នាយិកាប្រចាំប្រទេសនៃក្រុមហ៊ុនCBRE Cambodia អ្នកស្រីអាន សុធីតាបានមានប្រសាសន៍ឲ្យដឹងតាមទូរស័ព្ទកាលពីព្រលប់ថ្ងៃទី២៦ កុម្ភៈកន្លងមកថា ក្នុងស្ថានភាពមានវិបត្តិជំងឺកូវីដបែបនេះ ការវិនិយោគអចលនទ្រព្យជាឳកាសល្អបំផុត ព្រោះអចលនទ្រព្យដែលត្រូវការលក់ប្រញាប់នាពេលនេះ មានតម្លៃក្រោមទីផ្សារប្រមាណ៣០ភាគរយ។

អ្នកស្រីបន្តថា “នេះជាករណីអចលនទ្រព្យលក់ប្រញាប់ មិនមែនអចលនទ្រព្យទាំងអស់នោះទេ ប៉ុន្តែបើនិយាយពីស្ថានភាពទីផ្សារ វិលមករកភាពប្រក្រតីវិញនាពេលណា វាអាស្រ័យលើស្ថានភាពពិភពលោក”។អ្នកស្រីបន្តថា “ទោះជាវិបត្តិកូវីដនៅកម្ពុជាមានភាពធូរស្រាលក៏ដោយ ក៏អ្នកវិនិយោគអន្តរជាតិ នៅតែមិនទាន់ចូលមកកម្ពុជានោះទេ ដោយសារពួកគេ មានអារម្មណ៍មិនទាន់មានសុវត្ថិភាព”។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ឲ្យដឹងផងដែរថា ទីផ្សារអចលនទ្រព្យនៅកម្ពុជា កំពុងធ្លាក់ចុះ និងស្ថិតក្នុងសភាពទ្រឹង ប៉ុន្តែសម្រាប់អ្នកវិនិយោគមានធនធានច្រើន ពួកគេនៅតែប្រមូលទិញ បើទោះបីជាស្ថានភាពសេដ្ឋកិច្ចមិនអំណោយផលក្តី។

លោកបន្តថា “ពេលនេះអ្នកវិនិយោគទទួលបានលក្ខខ័ណ្ឌល្អ តម្លៃល្អ ហេតុនេះទើបអ្នកមានធនធានច្រើន ពួកគេបន្តប្រមូលទិញដីធ្លី ហើយនៅពេលស្ថានភាពល្អ ពួកគេនឹងចាប់ផ្តើមសកម្មភាពសាងសង់”។

យ៉ាងណាក៏ដោយអ្នកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជាបានមានប្រសាសន៍ឲ្យដឹងថា ពេលនេះអ្នកវិនិយោគធំៗកំពុងរង់ចាំមើល ពីស្ថានភាពនៃវិបត្តិជំងឺកូវីដ១៩ ប៉ុន្តែសម្រាប់គំរោងចាស់ៗ មិនបានផ្អាកសកម្មភាពនោះទេ តែសំរាប់គំរោងថ្មីកំពុងស្ថិតនៅក្នុងការរង់ចាំ៕

អ្នកជំនាញអន្តរជាតិ៖ ព្រឹត្តិការណ៍២០កុម្ភៈ រំខានដល់វិស័យអចលនទ្រព្យរយៈពេលខ្លីប៉ុណ្ណោះ

ដោយៈ ម៉ាណេត

ភ្នំពេញៈ អ្នកជំនាញអចលនទ្រព្យអន្តរជាតិបានអះអាងថា ការផ្ទុះឡើងនៃព្រឹត្តិការណ៍២០កុម្ភៈ នៃការឆ្លងជំងឺកូវីដ១៩ ចូលសហគមន៍ ពិតជាបង្កផលប៉ះពាល់រំខានដល់វិស័យអចលនទ្រព្យនៅកម្ពុជា សម្រាប់រយៈពេលខ្លីប៉ុណ្ណោះ ព្រោះប្រតិបត្តិការទិញលក់ និងការស្វែងរកអចលនទ្រព្យភាគច្រើន នៅតែមិនផ្លាស់ប្តូរ ហើយវិនិយោគិនភាគច្រើនមានទំនោរទៅរកការវិនិយោគរយៈពេលវែង។

លោក James Hodge នាយករងក្រុមហ៊ុន CBRE Cambodia បានថ្លែងប្រាប់តាមរយៈសារអេឡិចត្រូនិចនៅថ្ងៃ២៦ ខែកុម្ភៈ ឆ្នាំ២០២១កន្លងមកថា ការផ្ទុះឡើងនៃការឆ្លងចូលសហគមន៍នាពេលថ្មីៗនេះ ប្រាកដណាស់ បានធ្វើឱ្យមានការរំខានដល់ទីផ្សារវិនិយោគរយៈពេលខ្លី ប៉ុន្តែប្រតិបត្តិការទិញលក់ និងការស្វែងរកអចលនទ្រព្យភាគច្រើននៅតែមិនផ្លាស់ប្តូរ។

លោកបានថ្លែងថា “វិនិយោគិនអចលនទ្រព្យភាគច្រើន មានទំនោរទៅរកការវិនិយោគរយៈពេលវែង ហើយបើទោះជាពួកគេ មិនអាចមកពិនិត្យមើលអចលនទ្រព្យ ឬជួបគ្នាដោយផ្ទាល់នៅពេលនេះ ក៏ពួកគេមិនផ្លាស់ប្តូរផែនការវិនិយោគរបស់ពួកគេឡើយ” ។

លោក James Hodge បានឱ្យដឹងទៀតថា ទោះយ៉ាងណាក៏ដោយ ស្ថានភាពនេះអូសបណ្តាយរយៈវែង នោះលទ្ធផលនឹងប៉ះពាល់ដល់អារម្មណ៍វិនិយោគិន ប៉ុន្តែបើស្ថានភាពនេះ នឹងស្ថិតក្រោមការគ្រប់គ្រងបានលឿ ហានិភ័យនឹងមានតិចសម្រាប់ការវិនិយោគរយៈពេលវែង។

លោកបានថ្លែងបន្តថា “យើងបានឃើញស្ថានភាពនេះ កាលពីមុននៅក្នុងប្រទេសកម្ពុជា ទោះបីមិនធ្ងន់ធ្ងរក៏ដោយ ហើយវាគឺជាបញ្ហា ដែលប្រទេសជាច្រើនបានប្រឈមមុខដូចគ្នា ដូច្នេះឥឡូវនេះ មានការយល់ដឹងកាន់តែច្បាស់អំពីថា តើការរំខានអាចមានរយៈពេលយូរ ឬយ៉ាងណា” ។

វិនិយោគិន និងអ្នកអភិវឌ្ឍន៍ គួរតែធ្វើតាមការណែនាំរបស់រដ្ឋាភិបាល យ៉ាងយកចិត្តទុកដាក់ និងយកចិត្តទុកដាក់ឱ្យបានខ្ពស់។ មាននីតិវិធីដែលបានបង្កើតឡើងយ៉ាងល្អសម្រាប់អ្នកជួល និងម្ចាស់ផ្ទះ រួមទាំងការត្រួតពិនិត្យសីតុណ្ហភាព ការប្រើប្រាស់ឧបករណ៍លាងដៃ ការសម្លាប់មេរោគប្រចាំ ការពាក់របាំងមុខ និងតាមដានទំនាក់ទំនងខាងក្រៅ។

លោក James Hodge បានលើកឡើងថា “ការធ្វើឱ្យប្រាកដថា នីតិវិធីទាំងនេះត្រូវបានអនុវត្តន៍យ៉ាងដិតដល់ គឺជាវិធីល្អបំផុតដើម្បីធានាថា អចលនទ្រព្យត្រូវបានការពារ ប៉ុន្តែទោះបីជាមាននីតិវិធីទាំងអស់ នៅក្នុងកន្លែងក៏ដោយ វាអាចពិបាកក្នុងការបញ្ឈប់ផលប៉ះពាល់នៃជំងឺកូវីដ១៩” ។

លោកបានថ្លែងបន្តថា ក្រៅពីផលប៉ះពាល់ដោយផ្ទាល់ វិនិយោគិន និងអ្នកអភិវឌ្ឍន៍ទាំងអស់បានឃើញ ពីឥទ្ធិពលរបស់ជំងឺកូវីដ១៩ ទៅលើទីផ្សារអចលនទ្រព្យក្នុងរយៈពេល១២ខែចុងក្រោយនេះ ហើយវិធីល្អបំផុត ដើម្បីកាត់បន្ថយហានិភ័យទីផ្សារគឺធ្វើពិពិធកម្មផលប័ត្ររបស់ពួកគេ ទៅជាប្រភេទអចលនទ្រព្យផ្សេងៗគ្នា។

លោកបានឱ្យដឹងទៀតថា ឧទាហរណ៍ អ្នកដែលមានដីកសិកម្ម ឬឃ្លាំងអាចនឹងអាស្រ័យផលប្រសើរជាងឆ្នាំកន្លងមក។ ចំណែកទីផ្សារលំនៅដ្ឋាន ការិយាល័យ ផ្សារលក់រាយ ឬសណ្ឋាគារទទួលរងផលប៉ះពាល់ខ្លាំងជាង៕

ក្រុមហ៊ុនក្នុងស្រុកមួយគ្រោងវិនិយោគតំបន់ទេសចរណ៍ធម្មជាតិមួយក្នុងខេត្តកំពង់ចាម

ដោយគង់ សូរិយា

កំពង់ចាមៈ អភិបាលខេត្តកំពង់ចាម លោកអ៊ុន ចាន់ដា បានឲ្យដឹងថា កក្រុមហ៊ុនក្នុងស្រុកមួយបាន និងកំពុងរៀបចំគំរោងវិនិយោគវារីវប្បកម្ម និងតំបន់ទេសចរណ៍ធម្មជាតិមួយក្នុងខេត្តនេះ។

ក្រុមហ៊ុនដែលទទួលបានគំរោងវិនិយោគនោះ គឺក្រុមហ៊ុនផារ័ត្នរតនៈ ដែលនឹងសាងសង់គម្រោងវារីវប្បកម្ម និងតំបន់ទេសចរណ៍បែបធម្មជាតិថ្មីមួយកន្លែង លើផ្ទៃដីជាង៧ ហិចតា នៅទំនប់ចកបឹងធំ ក្នុងភូមិកំពង់សំណាញ់ ស្រុកព្រៃឈរ។

តាមការឲ្យដឹងពីថ្នាក់ដឹកនាំក្រុមហ៊ុននេះបានឲ្យដឹងថា គម្រោងមួយនេះ នឹងត្រូវចែកចេញជា ៤ផ្នែក ដោយផ្នែកសំខាន់ៗចំនួន៣ ទាក់ទិននឹងការងារវារីវប្បកម្ម រួមមាន ការសាងសង់ហេដ្ឋារចនាសម្ព័ន្ធ ជម្រុញការផលិតពូជត្រី ការបង្កើតទីតាំងចញ្ចឹមត្រី ដែលមានស្ដង់ដា និងការសាងសង់មន្ទីរពិសោធន៍ អគាររដ្ឋបាល ក៏ដូចជារោងចក្រផលិតចំណីត្រី។ចំណែកផ្នែកទី៤ គឺដើម្បីជំរុញវិស័យទេសចរណ៍ ដោយនឹងសាងសង់អាគារសាលពិព័រណ៌ជីវៈមច្ឆា និងសួនផ្កាត្រូពិចបែបប្លែកថ្មីក្នុងតំបន់។

ជាមួយគ្នានេះ លោកឧកញ៉ា ពាង ផារ័ត្ន តំណាងក្រុមហ៊ុនផារ័ត្នរតនៈ បានឱ្យដឹងថា គម្រោងនេះនឹងជួយកាត់បន្ថយបទល្មើសនេសាទ ដោយផ្លាស់ប្ដូរពីការនេសាទខុសច្បាប់នារដូវត្រីពង និងការបំពុលបរិស្ថាន មកធ្វើវារីវប្បកម្មបែបទំនើបវិញ។

លើសពីនេះ គម្រោងក៏នឹងជួយលើកកម្ពស់កម្រិតជីវភាព របស់ប្រជាកសិករក្នុងតំបន់ តាមរយៈការប្រមូលទិញផលិតផល ដែលប្រជាពលរដ្ឋរកបានផងដែរ។ទោះជាយ៉ាងណាលោកឧកញ៉ា មិនបញ្ជាក់ឲ្យដឹងពីទំហំទុនវិនិយោគ និងការបញ្ចប់គំរោងនេះនៅពេលណានៅឡើយទេ៕ ប្រភព Construction-property.com៕

អភិបាលខេត្ត៖ ហេដ្ឋារចនាសម្ព័ន្ឋធំៗចំនួន៤ កំពុងពង្រីកសក្តានុពល និងជីវភាពប្រជាពលរដ្ឋខេត្តកោះកុង

ដោយគង់ សូរិយា

ភ្នំពេញៈ អភិបាលខេត្តកោះកុង លោកជំទាវ មិថុនា ភូថង បានលើកឡើងពីមូលដ្ឋានហេដ្ឋារចនាសម្ព័ន្ឋជាច្រើន ដែលវិនិយោគដោយរដ្ឋាភិបាល និងវិស័យឯកជន កំពុងជំរុញការអភិវឌ្ឍ និងលើកកំពស់ជីវភាពរបស់ប្រជាពលរដ្ឋ។

លោកជំទាវបានមានប្រសាសន៍ឲ្យដឹងកាលពីពេលថ្មីៗនេះថា បច្ចុប្បន្នក្រសួងសាធារណៈការ និងដឹកជញ្ជូនបាន និងកំពុងអនុវត្តន៍គំរោងមួយចំនួនដូចជា ទី១ ការសាងសង់ផ្លូវជាតិលេខ១០ ដែលតភ្ជាប់ខេត្តកោះកុង ជាមួយខេត្តពោធិសាត់ និងបាត់ដំបង មកកាន់់ខេត្តកោះកុង ទី២ ក្រសួងសាធារណៈការ បានបញ្ចប់ការដេញថ្លៃរួ ពង្រីកផ្លូវជាតិលេខ៤៨ ដែលជាជំនួយរបស់រដ្ឋាភិបាលកូរ៉េ ដែលគំរោងនេះនឹងចាប់ផ្តើមស្ថាបនានិងពង្រីកនៅខែមិនាខាងមុខនេះ និងទី៣ ក្រសួងសាធារណៈការ ក៏នឹងសាងសង់កំពង់ផែទេសចរណ៍ និងពហុវិស័យនៅក្រុងខេមរៈភូមិន្ទ។

ទី៤ ការសាងសង់ព្រលានយន្តហោះ តម្លៃ ២០០លានដុល្លារ នូវការសាងសង់ព្រលានយន្តហោះក្នុងគំរោងតារាសាគរ ខេត្តកោះកុង ស្រុកបុទុមសាគរ និងគិរីសាគរ ដែលការសាងសង់ សម្រេចបាន៧០ទៅ៨០ភាគរយ ដោយផ្លូវរត់របស់យន្តហោះបានបញ្ចប់ នៅសល់់តែអាគារទទួលអ្នកដំណើរ ដែលសម្រេចបាន ៨០ភាគរយផងដែរ។ ព្រលានយន្តហោះខ្នាតអន្តរជាតិ។

លោកជំទាវមិថុនា ភូថងបានបន្តថា “ក្រុមហ៊ុននឹងបើកដំណើរការ ព្រលានយន្តហោះនេះ នៅក្នុងត្រីមាសទី៤ ចុងឆ្នាំ២០២១នេះ” ។ លោកជំទាវបន្តថា “ផ្លូវជាតិធំៗ និងហេដ្ឋារចនាសម្ព័ន្ឋនានា នឹងជួយលើកកំពស់មូលដ្ឋានសេដ្ឋកិច្ច និងជីវភាពរបស់ប្រជាពលរដ្ឋ ជាខេត្តធ្លាប់ដាច់ស្រយាលនេះ ពិសេសហេដ្ឋារចនាសម្ព័ន្ឋទាំងនេះ នឹងជួយទាក់ទាញការវិនិយោគ ងាយស្រួលដល់អ្នកវិនិយោគ ដែលមានបំណងស្វែងយល់ ពីសក្តានុពល និងឳកាសវិនិយោគនៅក្នុងខេត្តនេះ” ។

ទាក់ទងនឹងសក្តានុពល មូលដ្ឋានវិនិយោគការវិនិយោគក្នុងខេត្ត លោកជំទាវមិថុនា ភួថងបានមានប្រសាសន៍ថា នាពេលបច្ចុប្បន្នមានការវិនិយោគច្រើន លើវិស័យអេកូទេសចរណ៍ ដោយសារយើងមានព្រៃភ្នំ កោះឆ្នេរ ដីធ្លី និងមានការវិនិយោគផ្ទះសំណាក់ សណ្ឋាគារកើនឡើង វិស័យកសិកម្មក៏៏មានការដាំដុះបន្លែ ផ្លែឈើបានកើនឡើងផងដែរ។

លោកជំទាវបន្តថា “អ្នកវិនិយោគភាគច្រើនជាជនជាតិខ្មែរ ប៉ុន្តែទោះជាយ៉ាងណា ក៏មានជនបរទេសមកវិនិយោគតិច ប៉ុន្តែមានទំហំទុនធំ” ៕

លោកឡោ វិចិត្រ លើកឡើងពីការវិវត្ត និងបញ្ហាប្រឈមលើផ្នែកសំខាន់ៗចំនួន៣នៃវិស័យអចលនទ្រព្យកម្ពុជា

ដោយៈគង់ សូរិយា

ភ្នំពេញៈ ក្នុងរយៈពេល២០ឆ្នាំមកនេះ មុនពេលវិបត្តិសេដ្ឋកិច្ចសកលកើតឡើង ដែលបណ្តាលមកពីជំងឺកូវីដ១៩ វិស័យអចលនទ្រព្យនៅកម្ពុជា បានឈានមុខគេក្នុងតំបន់អាស៊ាន ដោយវិស័យនេះបានស្រូបទាញទុនវិនិយោគ ៦០ពាន់លានដុល្លារ ក្នុងការជម្រុញកំនើនសេដ្ឋកិច្ចជាតិ។

ប៉ុន្តែបើយើងក្រឡេកមើលពីទិដ្ឋភាពទូទៅ និងបញ្ហាប្រឈមក្នុងវិស័យនេះនាកំឡុងពេលកើតជំងឺកូវីដ១៩ លោក ឡោ វិចិត្រ អនុប្រធានសមាគមអចលនទ្រព្យសកលប្រចាំរាជធានីភ្នំពេញបានមានប្រសាសន៍ឲ្យដឹងថា វិស័យអចលនទ្រព្យកម្ពុជាបច្ចុប្បន្ននិយាយជារួម គឺមានសភាពខុសៗគ្នាទៅតាមប្រភេទអចលនទ្រព្យនីមួយៗ ដែលមានដូចជា ទី១ វិស័យដីធ្លីនៅកម្ពុជា បើប្រៀបធៀបជាមួយបណ្តាប្រទេស នៅក្នុងតំបន់គឺមានសភាពបត់បែន និងរស់រវើកជាង ដោយសារប្រទេសកម្ពុជា មិនមានបំរាមនៃការផ្ទេរក៏ដូចជាចំនួននៃរូបិយវត្ថុបរទេស ចូលមកកម្ពុជាហើយរាជរដ្ឋាភិបាលកម្ពុជា បានបើកជំហរជើងមេឃ សំរាប់វិស័យទេសចរណ៍ តាមរយៈការអនុញ្ញាតឲ្យមានជើងហោះហើរផ្ទាល់ពីបណ្តាប្រទេសនានានៅលើសកលលោកមកកម្ពុជា។

លោកបន្តថា បន្ថែមពីលើនេះ,រាជរដ្ឋាភិបាលកម្ពុជា បានផ្តល់ភាពអនុគ្រោះផ្នែកពន្ធទៅវិនិយោគិន ដែលបានមកបណ្តាក់ទុន ក្នុងវិស័យអាទិភាពមួយចំនួន។ កត្តាសំខាន់ខាងលើ បានជុំរុញឲ្យវិស័យដីធ្លីនៅកម្ពុជា ទទួលរងផលប៉ះពាល់តិចតួច បើប្រៀបធៀបនិងបណ្តាប្រទេសនៅក្នុងតំបន់ ដោយហេតុថាកម្ពុជានៅតែអាចទាក់ទាញទុនវិនិយោគពីក្រៅប្រទេស ទោះបីស្ថិតក្នុងស្ថានភាពនៃកូវីដ១៩ ដែលធ្វើឲ្យវិស័យដីធ្លីកម្ពុជានៅមានការវិវឌ្ឍធម្មតា ទោះមានប្រតិបត្តិការទិញលក់ថយចុះ ប៉ុន្តែតម្រូវការក្នុងការទិញលក់គឺនៅតែមានធម្មតា។

ទី២ ទីផ្សារខុនដូនៅកម្ពុជា ហាក់មានសភាពទ្រឹង បើប្រៀបធៀបនិងវិស័យដីធ្លីតែនៅមានឪកាសសំរាប់អភិវឌ្ឍបន្ថែម បើកម្ពុជាមានកំណើនសេដ្ឋកិច្ចថេរ រយះពេល៥ឆ្នាំខាងមុខ។

លោកឡោ វិចិត្របានវិភាគទៀតថា បច្ចុប្បន្ន កម្ពុជាបានលេចចេញនូវគំរោងខុនដូជាច្រើនជាពិសេស នៅរាជធានីភ្នំពេញ ប៉ុន្តែអត្រានៃការចូលស្នាក់នៅសំរាប់អគារនីមួយៗ នៅមានគំរិតដោយបរិបទ នៃការរស់នៅនៃអគារសហកម្មសិទ្ធ គឺមានសភាពថ្មីនៅឡើយ ដោយទាមទាពេលវេលាសមស្របមួយ សំរាប់ឲ្យវិស័យនេះដំណើរការទៅមុខកាន់តែខ្លាំង។

ដើម្បីឲ្យខុនដូមានការពេញនិយម ក្នុងការវិនិយោគនិងការស្នាក់នៅ ម្ចាស់គំរោងមួយចំនួន បានបញ្ចុះតម្លៃ និងផ្តល់ជូនលក្ខខ័ណ្ឌបង់ប្រាក់បត់បែន ដើម្បីស្រូបទាញអតិថិជនថ្មីមកវិនិយោគក្នុងវិស័យនេះ។

តាមការស្រាវជ្រាវរបស់អ្នកជំនាញបានបង្ហាញថា រាជធានីភ្នំពេញនឹងមានកំណើនប្រជាជនរហូតដល់៥លាននាក់នាឆ្នាំ២០៣០ កត្តាខាងលើនេះ នឹងជួយបង្កើនតម្រូវការលំនៅដ្ឋានដែលក្នុងនោះគឺមានខុនដូផងដែរ។

ទី៣ វិស័យលំនៅដ្ឋាន ឬបុរីនៅកម្ពុជា កាន់តែមានសភាពស្វិតស្វាញ ដោយការប្រកួតប្រជែង តណ្តើមចំណែកទីផ្សារ រវាងម្ចាស់គំរោងកាន់ តែមានសភាពក្តៅគគុកទៅតាមតំបន់នីមួយ។

ការអភិវឌ្ឍហេដ្ឋារចនាសម្ព័ន្ធ លើគ្រប់វិស័យរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន បានផ្តល់អំណោចផលដល់ម្ចាស់គំរោង ទៅអភិវឌ្ឍនៅតំបន់យុទ្ធសាស្ត្រមួយចំនួន ដែលមានការអភិវឌ្ឍលឿន ជាកន្លែងដែលមានលំហូប្រជាជនរស់នៅច្រើន។ កត្តាខាងលើ បានបង្កើនតម្រូវការផ្ទះជាប់ដីដើម្បីការស្នាក់នៅនិងធ្វើអាជីវកម្ម៕