តើកម្ពុជាទទួលបានផលប្រយោជន៍អ្វីខ្លះពីការអភិវឌ្ឍសេដ្ឋកិច្ចបៃតង?

ដោយៈ ម៉ាណេត

ភ្នំពេញៈ ការអភិវឌ្ឍសេដ្ឋកិច្ចបៃតង ក្នុងផែនការរៀបចំដែនដីនៅខេត្តកម្ពុជា ត្រូវបានប្រើជាឧបករណ៍យុទ្ធសាស្ត្រមួយ ដើម្បីតម្រង់ទិសដៅជាអាទិភាព សម្រាប់ការអភិវឌ្ឍនិងការអភិរក្ស តាមរយៈការដោះស្រាយតម្រូវការបច្ចុប្បន្ន និងការធានាបាននូវការអភិវឌ្ឍប្រទេសកម្ពុជា ប្រកបដោយនិរន្តភាពរយៈពេលវែង និងមានការបំភាយឧស្ម័នកម្រិតទាប។

តួយ៉ាងក្រុមប្រឹក្សាខេត្តមណ្ឌលគីរី កាលពីខែកុម្ភៈ ឆ្នាំ២០២១ បានឯកភាពទទួលយកផែនការរៀបចំដែនដីខេត្តមណ្ឌលគិរី ហើយនេះជាកំណត់សំគាល់ប្រវត្តិសាស្ត្រមួយ ដែលខេត្តមណ្ឌលគិរី មានផែនការរៀបចំដែនដីរបស់ខ្លួនជាលើកដំបូង ដោយមានការចូលរួមពីតំណាងមកពីក្រសួងរៀបចំដែនដី នគរូបនីយកម្ម និងសំណង់ សមាជិកក្រុមប្រឹក្សាខេត្តមណ្ឌលគិរី ទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិ (USAID) អង្គការ WWF កម្ពុជា និងក្រុមអ្នកជំនាញបច្ចេកទេស ដើម្បីកសាងផែនការរៀបចំដែនដីផងដែរ។

ផែនការរៀបចំដែនដីខេត្តមណ្ឌលគិរី គឺជាផែនទីបង្ហាញផ្លូវសម្រាប់ការគ្រប់គ្រងប្រកបដោយប្រសិទ្ធិភាព និងមានការទទួលខុសត្រូវ និងតុល្យភាពនៃការបែងចែក ប្រើប្រាស់ដីធ្លី ធនធានធម្មជាតិ និងហេដ្ឋារចនាសម្ព័ន្ធបច្ចេកទេសនិងសង្គម ដោយផ្អែកលើតម្រូវការជាក់ស្តែងរបស់ខេត្ត និងគោលការណ៍ច្បាប់ ការចូលរួម និងកិច្ចសហប្រតិបត្តិការយ៉ាងជិតស្និទ្ធពីគ្រប់ស្ថានប័ននិងភាគីពាក់ព័ន្ធទាំងអស់។

លោកសេង ទៀកនាយកអង្គការ WWF កម្ពុជា បានមានប្រសាសន៍ថា “នវានុវត្តន៍ចម្បងៗបំផុត នៅក្នុងវិធីសាស្ត្រគ្រប់គ្រងតំបន់ទេសភាព គឺការទទួលស្គាល់នូវតម្រូវការដើម្បីដោះស្រាយអន្តរកម្មដ៏សាំញ៉ាំ នៃវិសាលភាពការប្រើប្រាស់ដែនដី រួមទាំងការយល់ដឹងអំពីស្ថាប័ន និងអាកប្បកិរិយារបស់មនុស្សក្នុងនៅទីនោះផងដែរ” ។

លោកបន្ថែមទៀតថា “អង្គការ WWFកម្ពុជា ត្រៀមខ្លួនជាស្រេច ដើម្បីគាំទ្ររដ្ឋាភិបាល ក្នុងការរៀបចំផែនការប្រើប្រាស់ដីធ្លី ប្រកបដោយនិរន្តភាព ដើម្បីថែរក្សាការពារជីវៈចម្រុះសម្បូរបែបនៅក្នុងខេត្តមណ្ឌលគិរី” ។

ការបង្កើតផែនការរៀបចំដែនដី ជាដំណើរការដែលមានការចូលរួមពីពហុភាគី និងត្រូវបានផ្តួចផ្តើមឡើងនៅខែមករា ឆ្នាំ២០១៧ ដោយមានការបង្កើតឡើងនូវរចនាសម្ព័ន្ធអភិបាលកិច្ច ក្រោមការគាំទ្រថវិកាពីសហភាពអ៊ឺរ៉ុប (EU)។ ការបង្កើតផែនការរៀបចំដែនដី ត្រូវបានចាប់ផ្តើមនៅខែតុលា ឆ្នាំ២០១៨ ក្រោមការគាំទ្រថវិកាពីគម្រោងគាំទ្រដែនជម្រកសត្វព្រៃ របស់ទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិ(USAID) តាមរយៈអង្គការ WWF កម្ពុជា។

ដំណើរការកសាងផែនការរៀបចំដែនដីនេះ បានអនុវត្តដោយក្រុមអ្នកជំនាញបចេ្ចកទេស រួមមាន ក្រុមការងារស្នូលរៀបចំផែនការរៀបចំដែនដី ខេត្តមណ្ឌលគិរី ក្រុមទីប្រឹក្សាបច្ចេកទេស ដែលជ្រើសរើសដោយអង្គការ WWF កម្ពុជា និងបុគ្គលិកជំនាញរបស់ អង្គការ WWF កម្ពុជា។

ផែនការរៀបចំដែនដី ជាឯកសារយុទ្ធសាស្ត្រ គោលនយោបាយសំខាន់មួយ ដែលផ្តល់នូវចក្ខុវិស័យ និងគោលដៅអភិវឌ្ឍរយៈពេលវែង សម្រាប់រយៈពេល២០ឆ្នាំខាងមុខ (២០២១-២០៤០) ក៍ដូចជាផ្តល់ទិសដៅជាក់លាក់ សម្រាប់ការអភិវឌ្ឍដែនដីខេត្ត ដើម្បីធានាឲ្យបាននូវការអភិវឌ្ឍប្រកបដោយនិរន្តភាព ដែលផ្សារភ្ជាប់នឹងការអភិរក្ស។

ផែនការរៀបចំដែនដី ក៏ត្រូវបានបង្កើតឡើង ដើម្បីឆ្លើយតបទៅនឹងតម្រូវការកើនឡើងរបស់សហគមន៍មូលដ្ឋាន បញ្ហាប្រឈមនៃការអភិវឌ្ឍ និងការប្រែប្រួលនៃប្រព័ន្ធបរិស្ថាន វប្បធម៌ និងសេដ្ឋកិច្ចសង្គមនៅក្នុងខេត្ត៕

លោកឧបនាយករដ្ឋមន្ត្រី ជា សុផារ៉ា រំលឹកជាថ្មីពីការរុះរើ និងសាងសង់សំណង់ចាំបាច់ ត្រូវតែមានលិខិតអនុញ្ញាត

ដោយៈ រ៉ាណេត

ភ្នំពេញៈ ជាថ្មីម្តងទៀត លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានក្រើនរំលឹកសាជាថ្មី ទៅកាន់អ្នកធ្វើសកម្មភាពនៃការសាងសង់សំណង់ ឬរុះរើសំណង់នានាចាំបាច់ ត្រូវតែអនុវត្តឱ្យបានត្រឹមត្រូវ ទៅតាមច្បាប់ដែលបានចែងជាកំហិត។

លោកឧបនាយករដ្ឋមន្ត្រី ជា សុផារ៉ា បានបញ្ជាក់តាមរយៈបណ្តាញទំនាក់ទំនងអេឡិចត្រូនិក កាលពីថ្ងៃចុងសប្ដាហ៍កន្លងទៅថា យោងមាត្រា២៦ នៃច្បាប់ស្តីពីសំណង់ ដែលត្រូវបានប្រកាសឱ្យប្រើ ដោយព្រះរាជក្រមលេខ នស/រកម/១១១៩/០១៩ ចុះថ្ងៃទី២ ខែវិច្ឆិកា ឆ្នាំ២០១៩ រាល់ការងារសាងសង់ ឬរុះរើ ចាំបាច់ត្រូវតែមានលិខិតអនុញ្ញាតសាងសង់ជាមុន។

លោកបញ្ជាក់ទៀតថា “រាល់ការសាងសង់សំណង់សាធារណៈ (សំណង់របស់រដ្ឋ) និងសំណង់របស់ឯកជននានា ចាំបាច់ត្រូវតែមានលិខិតអនុញ្ញាតសាងសង់ ដែលចេញដោយក្រសួងរៀបចំដែនដី នគរូនីយកម្ម និងសំណង់ ឬពីអភិបាលនៃគណៈអភិបាលរាជធានី ខេត្ត ក្រុង ស្រុក ខណ្ឌ ទៅតាមទំហំក្រឡាផ្ទៃសំណង់ ដែលបានកំណត់ដោយអនុក្រឹត្យលេខ ២២៤ អនក្រ.បក ចុះថ្ងៃទី៣០ ខែធ្នូ ឆ្នាំ២០២០ ស្តីពីលិខិតអនុញ្ញាតសាងសង់” ។

ពាក់ព័ន្ធទៅនឹងការជំរុញ និងកំណត់ឱ្យមានការអនុវត្តប្រកប ដោយប្រសិទ្ធភាពខ្ពស់ទៅលើច្បាប់សំណង់ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានសម្រេចចេញអនុក្រឹត្យស្ដីពី លិខិតអនុញ្ញាតសាសង់សំណង់គ្រប់ប្រភេទ លើកលែងតែប្រភេទសំណង់ ដែលមានកំណត់ក្នុងលិខិតបទដ្ឋានគតិយុត្តដោយឡែក ដើម្បីលើកកម្ពស់គុណភាពសំណង់ បង្កើនជំនឿទុកចិត្តរបស់វិនិយោគិន រួមទាំងអ្នកអភិវឌ្ឍក្នុងវិស័យសំណង់ និងអចលនទ្រព្យនៅកម្ពុជា។

យោងតាមអនុក្រឹត្យដែលត្រូវបានផ្សព្វផ្សាយ នៅល្ងាចថ្ងៃទី១ ខែមករា ឆ្នាំ២០២១ មានចំនួន២០ទំព័រ ១២ជំពូក និង៥៤មាត្រា បានបញ្ជាក់យ៉ាងលម្អិតទៅលើសមត្ថកិច្ចនៃការគ្រប់គ្រងការអនុញ្ញាត និងការសម្រេចផ្សេងៗពាក់ព័ន្ធ ទៅនឹងសកម្មភាពនៃការសាងសង់ និងអភិវឌ្ឍសំណង់ផ្សេងគ្រប់ប្រភេទ ដែលស្ថិតនៅក្រោមក្រសួងរៀបចំដែនដី នគរូបនីយកម្ម និងសំណង់ ដែលមានលោកឧបនាយករដ្ឋមន្ត្រី ជា សុផារ៉ា ជារដ្ឋមន្ត្រី។

អនុក្រឹត្យដដែលបានបញ្ជាក់ពីបទប្បញ្ញត្តិទូទៅ ស្ថិតនៅក្នុងមាត្រា១បានកំណត់អំពីសមត្ថកិច្ច លក្ខខណ្ឌ និងនីតិវិធី ក្នុងការផ្តល់លិខិតអនុញ្ញាតសាងសង់ លិខិតអនុញ្ញាតជួសជុល លិខិតអនុញ្ញាតរុះរើ លិខិតអនុញ្ញាតបើកការដ្ឋាន និងលិខិតបន្តសុពលភាព ដើម្បីធានាបាននូវគុណភាព សុវត្ថិភាពសំណង់ ការពារទ្រព្យសម្បត្តិ និងសុខុមាលភាពរបស់ម្ចាស់សំណង់ អ្នកប្រើប្រាស់សំណង់ និងសាធារណៈជន។

ជាមួយគ្នានេះ អនុក្រឹត្យក៏បានសង្កត់ធ្ងន់ ទៅលើសមត្ថកិច្ចនៃការការពារដីសាធារណៈរបស់រដ្ឋ និងរបស់នីតិបុគ្គលសាធារណៈដទៃទៀត ធានាគុណភាព និងភាពត្រឹមត្រូវនៃការរៀបចំដែនដីនគរូបនីយកម្ម បង្ការ និងទប់ស្កាត់វិវាទក្នុងការងារសាងសង់ ឬរុះរើ ដើម្បីបង្កើនជំនឿទុកចិត្ត របស់វិនិយោគិននៅក្នុងវិស័យសំណង់ និងជំរុញទីផ្សារអចលនទ្រព្យប្រកបដោយប្រសិទ្ធភាពផ្នែកសេដ្ឋកិច្ច និងសង្គម៕

តំបន់ជុំវិញភ្នំប្រសិទ្ធនឹងត្រូវកាត់ចូលក្នុងរដ្ឋបាលរាជធានីភ្នំពេញនាពេលអនាគត?

ដោយគង់ សូរិយា

ភ្នំពេញៈ ប្រភពព៌តមានពីមន្ត្រីជាន់ខ្ពស់រដ្ឋាភិបាលបានឲ្យដឹងថា តំបន់ភ្នំប្រសិទ្ធ និងតំបន់ជុំវិញមួយចំនួន នឹងត្រូវកាត់ចូលក្នុងដែនរដ្ឋបាលរាជធានីភ្នំពេញ នៅឆ្នាំ២០២៥ឬយ៉ាងយូរនៅឆ្នាំ២០៣០ខាងមុខនេះ។

មន្ត្រីជាន់ខ្ពស់ដែលបាននិយាយ ក្នុងលក្ខខ័ណ្ឌមិនបញ្ចេញឈ្មោះបានឲ្យដឹងកាលពីថ្ងៃច័ន្ទថា ការពិតតំបន់ភ្នំប្រសិទ្ធ បានក្លាយជាទឹកដីរាជធានីភ្នំពេញរួចទៅហើយ ដែលបច្ចុប្បន្នស្ថិតក្នុងខ័ណ្ឌព្រែកព្នៅរាជធានីភ្នំពេញ ហើយតំបន់នេះបាននិងកំពុងរីកចម្រើនយ៉ាងលឿន ដែលមានអ្នកវិនិយោគក្នុងស្រុកជាច្រើន បានសាងសង់លំនៅដ្ឋាន និងបុរីនានា។

លោកបន្តថា “ក្នុងគោលដៅពង្រីកទីក្រុង តាមការរីកចម្រើននៃនគរូបនីយកម្ម រដ្ឋាភិបាលកំពុងរៀបចំផែនការ ពង្រីកក្រុងបន្ថែមទៀត នាពេលអនាគត ដែលការពង្រីកទីក្រុងធ្វើឲ្យចំណេញសេដ្ឋកិច្ច ពិសេសលើកកំពស់ជីវភាពប្រជាពលរដ្ឋ និងធ្វើឲ្យតំបន់ដែលកាត់ចូលក្រុងរីកចម្រើនលឿន” ។

មន្ត្រីដដែលបានបន្តថា ដូចដែលបានដឹងហើយ ក្រសួងមហាផ្ទៃក៏បាននិងកំពុងរៀបចំទីរួមស្រុក ឃុំមួយចំនួនឲ្យក្លាយជាទីក្រុង ដែលមានឋានៈស្មើនឹងស្រុកផងដែរ ព្រោះការរៀបចំបែបនេះ នឹងធ្វើឲ្យមូលដ្ឋានរីកចម្រើនលឿន និងទាក់ទាញការវិនិយោគពីអ្នកវិនិយោគជាតិ និងអន្តរជាតិ។

យោងតាមការសិក្សារបស់ក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា ប្រជាពលរដ្ឋកម្ពុជារស់នៅរាជធានីភ្នំពេញ និងតាមតំបន់ទីក្រុងនានានឹងកើនឡើងដល់ ៧លាននាក់នៅឆ្នាំ២០៣០ខាងមុខនេះ។

សហស្ថាបនិក និងជាអគ្គនាយកគេហទំព័រ Propertyarea.asia លោកយិន លាងគង់ បានមានប្រសាសន៍ថា ការពង្រីកទីក្រុង ជារឿងល្អ វាប្រៀបបីដូចព្រួញមួយបាញ់បានសត្វពីរ ទី១ ចំណេញដល់រដ្ឋាភិបាល ងាយស្រួលអភិវឌ្ឍន៍ប្រទេស ស្របតាមគោលនយោបាយរបស់សម្តេចតេជោ ក្នុងការបង្ខិតតំបន់ជនបទមកកៀកនឹងទីក្រុង ពិសេសកាត់បន្ថយចំណាកស្រុក ធ្វើឲ្យដីឡើងថ្លៃ ដែលរដ្ឋាភិបាលអាចប្រមូលពន្ឋបានកាន់តែច្រើន។

លោកបន្តថា ហេតុផលទី២ ការពង្រីកក្រុង នឹងធ្វើឲ្យប្រជាពលរដ្ឋកាន់តែសប្បាយរីករាយ ដោយសារពួកគេទទួលបានផល ពីការអភិវឌ្ឍរបស់រដ្ឋាភិបាល ព្រោះនៅពេលដែនដីណាកាត់ចូលទីក្រុង នឹងធ្វើឲ្យតំបន់នោះមានការរីកចម្រើនលឿន ទាំងហេដ្ឋារចនាសម្ព័ន្ឋ សកម្មភាពសេដ្ឋកិច្ច និងទាក់ទាញការវិនិយោគពីវិស័យឯកជន។

កាលពីចុងឆ្នាំ២០២០កន្លងមកនេះ រដ្ឋបាលរាជធានីភ្នំពេញបានរៀបចំតំបន់មួយចំនួននៅជុំវិញភ្នំប្រសិទ្ធ ដូចជារមណីយដ្ឋានភ្នំរាប ភ្នំប្រសិទ្ធជាដើមឲ្យមានសោភ័ណភាព ដើម្បីទាក់ទាញភ្ញៀវទេសចរណ៍ និងផ្តល់ផលចំណូលដល់ប្រជាពលរដ្ឋ៕

ស្វែងយល់ពីប័ណ្ណកម្មសិទ្ធចំនួន៤ប្រភេទ និងសុពលភាពផ្លូវច្បាប់របស់វា

ដោយៈ ស៊ីវ ម៉េង

ភ្នំពេញ ប្រទេសកម្ពុជាមានការផ្លាស់ប្តូររបបដឹកនាំញឹកញាប់ បានធ្វើឲ្យការចេញប័ណ្ណកម្មសិទ្ធគ្រប់គ្រងអចលនទ្រព្យ ឬវិញ្ញាបនបត្រសម្គាល់អចលនទ្រព្យ មានច្រើនប្រភេទ ទៅតាមរបបនិមួយៗ ប៉ុន្តែតើប័ណ្ណទាំងនោះមានសុពលភាពផ្លូវច្បាប់បែបណា?។

គេហទំព័រ Propertyarea.asia បានជួបសម្ភាសន៍ជាមួយអ្នកជំនាញ និងអ្នកប្រឡូកក្នុងវិស័យនេះជាច្រើនឆ្នាំ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមនិងអគ្គនាយកក្រុមហ៊ុន Century21 Mekong បានថ្លែងឲ្យដឹងកាលពីពេលថ្មីៗនេះថា ការគ្រប់គ្រងតាមរយៈប័ណ្ណសម្គាល់ ឬវិញ្ញាបនបត្រគ្រប់គ្រងអចលនទ្រព្យនៅកម្ពុជា ពិតជាមានច្រើនប្រភេទនៅកម្ពុជា ដែលប័ណ្ណឬវិញ្ញាបនបត្រទាំងនោះមាន ដូចជា ទី១ ចន្លោះឆ្នាំ១៩៧៩ ដល់ឆ្នាំ១៩៨៥ កម្ពុជាមានប័ណ្ណសម្គាល់អចលនទ្រព្យ ដែលគេហៅថា “ប័ណ្ណសាធារណៈរដ្ឋប្រជាមានិតកម្ពុជា” ។

ប័ណ្ណប្រភេទនេះនៅបន្សល់ទុកតិតចតួចប៉ុណ្ណោះ ក្នុងករណីម្ចាស់ដីមិនផ្លាស់ប្តូរប័ណ្ណ និងភាគច្រើនស្ថិតនៅតំបន់ជនបទដាច់ស្រយាល។

ទី២ គិតចាប់ពីកំឡុងឆ្នាំ១៩៨៥ ដល់ដើមទសវត្សរ៍១៩៩០ កម្ពុជាបានផ្លាស់ប្តូរប័ណ្ណកម្មសិទ្ឋអចលនទ្រព្យថ្មីមួយទៀត ដែលគេនិយមហៅថា “ប័ណ្ណស្លាបមាន់” ដែលប័ណ្ណប្រភេទនេះ នៅតែមានការប្រើប្រាស់រហូតដល់បច្ចុប្បន្ននេះផងដែរ។

ទី៣ ប្លង់កាន់កាប់ឬគ្រប់គ្រងអចលនទ្រព្យ ដែលមានការចេញឲ្យប្រើប្រាស់កំឡុងឆ្នាំ១៩៩៣ មកដល់បច្ចុប្បន្ន (ហៅថាប្លង់ទន់) ដែលប័ណ្ណប្រភេទនេះមានការពេញនិយម ប្រើប្រាស់ច្រើនជាងគេនាពេលបច្ចុប្បន្ននេះ។

ប័ណ្ណប្រភេទនេះ មានការទទួលស្គាល់ត្រឹមអាជ្ញាធរមូលដ្ឋានឃុំ សង្កាត់ និងតាមបណ្តាស្រុកនានា។

ទី៤ បច្ចុប្បន្នមានប័ណ្ណមួយទៀត ដែលហៅថាប្លង់រ៉ឹង ឬវិញ្ញាបនបត្រដែលមានការទទួលស្គាល់ពីមន្ត្រីជំនាញនៃក្រសួងរៀបចំដែនដី នគរូបនីយកម្ម និងសំណង់រាជធានី ខេត្ត។ប័ណ្ណនេះមានពីរយ៉ាង ដែលខ្លះគេហៅថា L MAP និងខ្លះទៀតហៅប័ណ្ណបំបែកក្បាលដី។

លោកច្រឹក សុខនីមបានបន្តថា រហូតមកទល់ពេលនេះ ដើម្បីទប់ស្កាត់ទំនាស់ដីធ្លី និងប័ណ្ណនិមួយៗមានសុពលភាពផ្លូវច្បាប់ គឺពេលចុះវាស់វែងដីធ្លី តែងតែមានមន្ត្រីជំនាញក្រសួងរៀបចំដែនដីចូលរួម ទោះជាធ្វើប្លង់ឬប្លង់រ៉ឹងក៏ដោយ។

លោកបន្តថា “ប័ណ្ណទាំង៥ប្រភេទខាងលើនេះ សុទ្ឋតែមានសុពលភាពផ្លូវច្បាប់ ប៉ុន្តែដើម្បីបញ្ចៀសហានិភ័យ ពីការរំលោភបំពានដីធ្លី អ្នកកាន់កាប់អចលនទ្រព្យ ដែលមានប្លង់របបសាធារណៈរដ្ឋ ប័ណ្ណស្លាបមាន់ និងប្លង់ទន់គួរតែរៀបចំឯកសាររបស់ខ្លួន ដើម្បីស្នើសុំធ្វើប្លង់រ៉ឹង ដែលមានការទទួលស្គាល់ពីមន្ទីរ និងក្រសួងជំនាញជាក់លាក់” ។ លោកបន្តថា “ការកាន់កាប់អចលនវត្ថុអ្វីមួយ ដែលមានវិញ្ញាបនបត្រទទួលស្គាល់ច្បាស់លាស់ពីសំណាក់អាជ្ញាធរជំនាញ ពិតជាមានសារៈសំខាន់ណាស់ ដើម្បីបញ្ចៀសហានិភ័យនាពេលអនាគត” ។

ទោះជាយ៉ាងណាបច្ចុប្បន្ននេះ ក្រសួងរៀបចំដែនដី នគរូបនីយកម្មនិងសំណង់បាននិងកំពុងបញ្ជូនមន្ត្រីជំនាញរបស់ខ្លួន ចុះធ្វើប័ណ្ណកម្មសិទ្ឋដីធ្លីថ្មី ជូនប្រជាពលរដ្ឋនៅគ្រប់ភូមិ ឃុំនៃបណ្តារាជធានី ខេត្តទាំង២បណ្តើរៗហើយ៕

ប្រធាន CVEA បង្ហាញពីភាពប្រឈមរបស់ក្រុមហ៊ុនភ្នាក់ងារអចលនទ្រព្យគ្មានអជ្ញាប័ណ្ណ

ដោយៈ រ៉ាណេត

ភ្នំពេញៈ ក្រុមហ៊ុនភ្នាក់ងារអចលនទ្រព្យ ដែលគ្មានអជ្ញារប័ណ្ណ និងគ្មានការទទួលស្គាល់ពីច្បាប់ នឹងត្រួវប្រឈមជាមួយបញ្ហាជាច្រើន ដែលអាចនឹងខាតបង់ផលប្រយោជន៍ ឬឈានដល់ការផាកពិន័យយ៉ាងធ្ងន់ធ្ង ពីសំណាក់ក្រសួង ដែលពាក់ព័ន្ធនៃកម្ពុជា ក្រោយពេលដែលច្បាប់ នៅក្នុងវិស័យនេះត្រូវបានរឹតបណ្តឹង។

ជាមួយនឹងបរិបទ ដែលវិស័យអចលនទ្រព្យ កំពុងអភិវឌ្ឍន៍យ៉ាងខ្លាំងនៅកម្ពុជា បច្ចុប្បន្ននេះ មានក្រុមហ៊ុនជាច្រើនត្រូវបានបង្កើតជាបន្តបន្ទាប់ ដែលក្នុងមានទាំងក្រុមហ៊ុនស្របច្បាប់ និងក្រុមហ៊ុនមិនស្របច្បាប់ និងកំពុងតែមានសកម្មភាពនៅលើទីផ្សារមួយនេះ ដើម្បីស្វែងរកផលប្រយោជន៍។

ប្រធានសមាគមអ្នកវាយតម្លៃ និងភ្នាក់ងារអចនវត្ថុកម្ពុជា លោក ច្រឹក សុខនីម បានមានប្រសាសន៍ថា វាមិនលំបាកនោះទេ ក្នុងបំពេញបែបបទ ដើម្បីទទួលបានអជ្ញារប័ណ្ណ និងសិទ្ធិប្រកបអាជីវកម្ម ក្នុងនាមជាក្រុមហ៊ុនភ្នាក់ងារអចលនទ្រព្យ។

លោកបន្តទៀតថា “នៅពេលដែលពួកគាត់ បានក្លាយជាក្រុមហ៊ុនស្របច្បាប់ ពួកគាត់ នឹងទទួលបានអត្ថប្រយោជន៍ជាច្រើន និងមានសិទ្ធិគ្រប់គ្រាន់ ក្នុងទទួលបានប្រកួតប្រជែងនៅលើទីផ្សារ ដែលកំពុងតែមានសកម្មភាពយ៉ាងផុលផុសមួយនេះ” ។ លោកបានបន្តទៀតថា “នៅពេលពួកគាត់ មានអជ្ញារប័ណ្ណត្រឹមត្រូវ ពួកគាត់មានឱកាសច្រើនក្នុងស្វែងរកដៃគូសហការ ដើម្បីទទួលបានផលប្រយោជន៍ ជាពិសេសទទួលបានទំនុកចិត្តខ្ពស់ពីអតិថិជន” ។

បន្ថែមពីនេះ គាត់ក៏ទទួលបានឱកាសចូលជាសមាជិក របស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដើម្បីទទួលបានការពិភាក្សា និងផ្តល់យោបល់ជាច្រើនពីសំណាក់អ្នកជំនាញ មានបទពិសោធន៍ខ្ពស់ដែលមានភាពជោគជ័យក្នុងវិស័យនេះ។

លោកច្រឹក សុខនីម បានបន្តទៀតថា ប៉ុន្តែនៅពេលពួកគាត់មិនមានអជ្ញាប័ណ្ណត្រឹមត្រូវដែលចេញដោយក្រសួងពាណិជ្ជកម្ម និងក្រសួងពាក់ពាក់ព័ន្ធ ពួកគាត់នឹងប្រឈមជាមួយបញ្ហាជាច្រើន។ លោកបានបន្តទៀតថា ពួកគេនឹងមិនមានឱកាសក្នុងការប្រកួតប្រជែងនៅលើទីផ្សាររួម គ្មានឱកាសបង្កើតកិច្ចសហការជាដៃគូ ជាមួយបណ្តាក្រុមហ៊ុនដែលទទួលស្គាល់ដោយច្បាប់ ហើយក៏គ្មានឱកាសទទួលបានទំនុកចិត្ត ពីសំណាក់អតថិជន ក៏ដូចជាក្រុមហ៊ុនធំៗនោះដែរ។

លោកបន្តទៀតថា “អ្វីដែលសំខាន់នោះ ពួកគាត់នឹងប្រឈមចំពោះមុខច្បាប់ ដែលត្រូវទទួលរងនូវការផាកពិន័យ នៅពេលដែលច្បាប់ ក្នុងវិស័យនេះត្រូវបានរឹតបណ្តឹង” ។

ជាមួយនឹងការលើកឡើងខាងលើនេះ ជាការចូលរួមលើកកម្ពស់ និងជម្រុញឱ្យវិស័យអចលនទ្រព្យនៅកម្ពុជា កាន់តែមានភាពរីកចម្រើន ប្រកបដោយភាពរលូន លោក ច្រឹក សុខនីម ក៏បានទទូច និងលើកទឹកចិត្តដល់បណ្តា ក្រុមហ៊ុនភ្នាក់ងារអចលនទ្រព្យ ដែលកំពុងប្រតិបត្តិការ ដោយមិនទាន់មានអជ្ញារប័ណ្ណត្រឹមត្រូវនោះ គួរតែរួសរាន់ទៅបំពេញឯកសារ និងសំណុំបែបបទនានា ស្នើសុំអជ្ញារប័ណ្ណស្របច្បាប់ពីក្រសួងពាក់ព័ន្ធ ក្នុងវិស័យនេះទាំងអស់គ្នា ដើម្បីទទួលបានអត្ថប្រយោជន៍ក្នុងរយៈពេលយូរទាំងអស់គ្នា៕

លោក ឡុង គឹមសួគ៌ ៖ ប្រកាន់គោលការណ៍៣ក្នុងដៃ ការវិនិយោគដី និងអចលនវត្ថុផ្សេងទៀតនឹងទទួលបានផលចំណេញខ្ពស់

ដោយ ៖ រ៉ាណេត

ភ្នំពេញ ៖ ដោយមើលឃើញពីវិសាលភាព និងការទទួលបានផលចំណេញយ៉ាងច្រើនពីវិស័យអចលនទ្រព្យ ជាពិសេសផ្នែកដីធ្លី បច្ចុប្បន្ននបានជំរុញឱ្យមនុស្សជាច្រើនចាប់អារម្មណ៍ និងងាកមកប្រឡូកក្នុងមុខជំនួញជាអ្នកទិញ-លក់អចលនទ្រព្យយ៉ាងច្រើន។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Century21 Advance លោក ឡុង គីមសួគ៌ បានមានប្រសាសន៍នៅរសៀលថ្ងៃទី៨ ខែមីនា ឆ្នាំ២០២១នេះថា មិនមែនការរកស៊ីនៅក្នុងវិស័យអចលនទ្រព្យសុទ្ធតែទទួលបានចំណេញ និងជោគជ័យទាំងអស់នោះទេ ដែលក្នុងនោះភាពបរាជ័យក៏កើតមានច្រើនដែរ ជាពិសេសសម្រាប់អ្នកដែលរកស៊ីតាមគ្នា ដោយគ្មានជំនាញច្បាស់ និងការស្វែងយល់ពីទីផ្សារមួយនេះ។

លោក ឡុង គឹមសួគ៌ បានមានប្រសាសន៍ថា “ទោះជាអ្នកទាំងនោះបានសម្រេចចិត្តចេញមកប្រកបជំនួញមួយនេះក៏ដោយ តែភាពជាក់ស្តែងត្រូវបានគត់សម្គាល់ឃើញថា មានមួយចំនួនអាចសម្រេចបានភាពល្អប្រសើរ និងរីកចម្រើនទទួលបានប្រាក់ចំណេញពីការវិនិយោគ ហើយក៏មានមនុស្សមួយក្រុមទៀត ជួបភាពបរាជ័យលើការធ្វើជំនួយក្នុងវិស័យមួយនេះទៅវិញ ដែលភាពបរាជ័យ និងភាពជោគជ័យ គឺមានការជាប់ព័ន្ធទៅនឹងចំណុចធំៗចំនួន៣ ដែលប្រៀបបានជាគ្រឹះក្នុងការប្រកបជំនួញទិញ-លក់អចលនទ្រព្យ”។

គោលការណ៍គ្រឹះទាំង៣ ដែលចាំបាច់ត្រូវតែដឹងមុនពេលចេញប្រឡូកក្នុងវិស័យអចលនទ្រព្យរួមមានដូចជា ៖

ទី១ ៖ ស្វែងយល់ឱ្យបានច្បាស់ពីតម្លៃទីផ្សារ និងតម្រូវការជាក់ស្ដែង ៖ នេះជាកិច្ចការដំបូងដែលអ្នកត្រូវដឹងតម្លៃអចលនទ្រព្យជាក់ស្ដែង នៅក្នុងតំបន់នីមួយៗ ជាពិសេសគឺតំបន់កំពុងអភិវឌ្ឍន៍ និងតំបន់គ្រោងអភិវឌ្ឍន៍។ នៅពេលដែលអ្នកដឹងពីតម្លៃអចលនទ្រព្យក្នុងតំបន់ណាមួយច្បាស់ នោះអ្នកនឹងងាយស្រួលក្នុងការលក់ ឬទិញ ដោយទទួលបានផលចំណេញច្រើន។ អ្នកត្រូវដឹងឱ្យច្បាស់ថា តម្លៃនៃអចលនទ្រព្យមួយនេះ វានឹងកើនតម្លៃនៅក្នុងរយៈពេលប៉ុន្មានឆ្នាំទៀត ជាពិសេសត្រូវដឹងថា ហេតុអ្វីតំបន់នេះមានការអភិវឌ្ឍន៍ច្រើន ប៉ុន្តែតម្លៃនៃអចលនទ្រព្យមិនកើនឡើងសោះ ។

ទី២ ៖ សម្លឹងទៅតំបន់ជាយក្រុងដែលមានសក្ដានុពល ៖ ជាការពិតណាស់ នៅពេលការអភិវឌ្ឍ តំបន់ក្នុងក្រុងកាន់តែតូចទៅៗ នោះក្រុមអ្នកវិនិយោគនឹងងាកទៅជាយក្រុងវិញម្ដង ដូច្នេះ អ្នកត្រូវដឹងថា បច្ចុប្បន្នតើការអភិវឌ្ឍនៅក្នុងទីក្រុងដល់កម្រិតណាហើយ ហើយវានឹងជះឥទ្ធិពលទៅដល់ជាយក្រុងនៅពេលណា? នៅពេលដែលអ្នកដឹងថា តំបន់ជាយក្រុងណាមួយ នឹងក្លាយជាតំបន់អភិវឌ្ឍន៍ នោះអ្នកនឹងមើលឃើញពីការរកស៊ី និងទទួលបានផលចំណេញពីការរកស៊ីនៅក្នុងវិស័យអចលនទ្រព្យមួយនេះ។

ទី៣ ៖ តាមដានព័ត៌មានដែលពាក់ព័ន្ធ ៖ ត្រូវមានទំនាក់ទំនងល្អជាមួយនឹងស្ថាប័នឯកជន ឬ ស្ថាប័នរដ្ឋ ដើម្បីទទួលបានព័ត៌មាននានាពាក់ព័ន្ធទៅវិស័យអចលនទ្រព្យ ព្រោះអ្នកនឹងដឹងថា តំបន់ណានឹងក្លាយជាតំបន់អភវិឌ្ឍន៍ពិតប្រាកដ តំបន់ណានឹងត្រូវរដ្ឋាភិបាលកាត់ធ្វើជារបស់រដ្ឋ។ មួយវិញទៀត ការមានទំនាក់ទំនងល្អជាមួយនឹងស្ថាប័នរដ្ឋ អ្នកក៏អាចនឹងទទួលបានផលចំណេញច្រើន ព្រោះនៅពេលមានក្រុមវិនិយោគមក គេអាចនឹងរុញច្រានគម្រោងណាមួយឱ្យមកអ្នកដឹងក៏ថាបានដែរ ៕

អ្នកជំនាញអន្តរជាតិ ៖ កម្ពុជាមានវិស័យឧត្តមភាព ប៉ុន្តែខ្វះបច្ចេកវិទ្យា និងធនធានមនុស្សក្នុងការទាញយកប្រយោជន៍សម្រាប់សេដ្ឋកិច្ចជាតិ

ដោយ ៖ រ៉ាណេត

ភ្នំពេញ ៖ ខុសប្លែកពីបណ្តាប្រទេសក្នុងតំបន់មួយចំនួន សម្រាប់ប្រទេសកម្ពុជាទោះជាកំពុងជួបប្រទះបញ្ហាប្រឈមនឹងការរាតត្បាតនៃជំងឺកូវីដយ៉ាងណា ប៉ុន្តែចំពោះការនាំចេញផលិតផលទៅកាន់ទីផ្សារក្រៅស្រុកនៅតែមានភាពវិជ្ជមាន ជាពិសេសផលិតផលក្នុងវិស័យកសិកម្មទៅកាន់ទីផ្សារប្រទេសចិន បានក្លាយជាវិស័យឧត្តមភាពមួយសម្រាប់ប្រទេសកម្ពុជានាពេលបច្ចុប្បន្ន។

លោកបណ្ឌិត ឈាង វណ្ណារិទ្ធ នាយកវិទ្យាស្ថានចក្ខុវិស័យអាស៊ី (AVI) បានមានប្រសាសន៍ប្រាប់ឱ្យដឹងនៅថ្ងៃចុងសប្ដាហ៍កន្លងទៅនេះថា កម្ពុជាមានវិស័យឧត្តមភាពមួយដែលជាស្នូលនៃសេដ្ឋកិច្ចជាតិ ប៉ុន្តែវិស័យមួយនេះមានចំណុចចំនួន២ដែលកំពុងបន្ទុចបង្អាក់ក្នុងការទាញយកប្រយោជន៍ពីវិស័យមួយនេះ រួមមានចំណេះដឹងផ្នែកបច្ចេកវិទ្យា និងចំណេះដឹងជំនាញក្នុងការផលិត។

លោកបណ្ឌិតបានបញ្ជាក់ថា “កម្ពុជាយើងមានវិស័យមួយដែលមានឧត្តមភាពខ្ពស់អាចឈរជាសរសរទ្រូងសេដ្ឋកិច្ចជាតិបានល្អនោះគឺវិស័យកសិកម្ម ប៉ុន្តែអ្វីដែលយើងនៅខ្វះខាតគឺចំណេះដឹងផ្នែកបច្ចេកវិទ្យា និងចំណេះដឹងលើការធ្វើកសិកម្ម ជាពិសេសបច្ចេកទេសកែច្នៃគឺយើងនៅមានកម្រិត ដែលចាំបាច់ត្រូវតែមានការជំរុញ និងបង្កើនលទ្ធភាពផ្នែកខ្វះខាតទាំងនេះឱ្យមានភាពល្អប្រសើរឡើងវិញ”។

លោកបន្តថា “តាមរយៈកិច្ចព្រមព្រៀងពាណិជ្ជកម្មសេរីរវាងកម្ពុជា និងចិន គឺយើងមានទីផ្សារធំទូលាយ ប៉ុន្តែអ្វីដែលសំខាន់គឺការពង្រឹងលទ្ធភាព និងគុណភាពក្នុងការផលិតសម្រាប់នាំចេញ ដែលធ្វើយ៉ាងឱ្យមានស្ដង់ដារតាមការកំណត់របស់គេ ដូច្នេះប្រសិនបើយើងគ្មានបច្ចេកទេស គ្មានចំណេះដឹងក្នុងការផលិត ដូច្នេះទោះជាយើងមានទីផ្សារធំទូលាយយ៉ាងណា ក៏ការទទួលបានប្រយោជន៍ពីការនាំចេញនៅតែមានចំនួនតិចតួចដដែល”។

ជាមួយគ្នានេះ លោកបណ្ឌិត ឈាង វណ្ណារិទ្ធ ក៏បានលើកឡើងផងដែរថា នៅក្នុងប្រទេសកម្ពុជាយើងមានវិស័យធំៗចំនួន៣ជាអាទិភាពក្នុងការជួយជ្រោមជ្រែងកំណើនសេដ្ឋកិច្ចជាតិ រួមមានវិស័យកសិកម្ម វិស័យទេសចរណ៍ និងវិស័យអចលនទ្រព្យ និងសំណង់ ប៉ុន្តែនៅពេលបច្ចុប្បន្ននេះ ក្នុងចំណោមវិស័យទាំង៣ មានវិស័យចំនួន២កំពុងទទួលរងនូវផលប៉ះពាល់យ៉ាងធ្ងន់ធ្ងរ នោះគឺវិស័យទេសចរណ៍ និងវិស័យអចលនទ្រព្យ ដែលយើងត្រូវការពេលវេលាយូរបន្តិចក្នុងការស្ដារឱ្យវិលត្រឡប់មករកភាពល្អប្រសើរឡើងវិញ។

បើទោះបីជាជំងឺកូវីដចូលរាតត្បាតយ៉ាងក្តី ប៉ុន្តែកសិផលកម្ពុជា នៅតែបន្តការនាំចេញ គ្រាន់តែរយៈពេល២ខែដើមឆ្នាំ២០២១នេះ ការនាំចេញអង្ករពីកម្ពុជាទៅកាន់ទីផ្សារអន្តជាតិសរុប ៧៦ ២២២តោន។ ដោយឡែកការនាំចេញស្រូវទៅលក់ប្រទេសវៀតណាម តាមខេត្តព្រៃវែង បានជាង៤០ម៉ឺនតោន ដែលគិតជាទឹកប្រាក់នៃការនាំចេញទាំង២ប្រភេទនេះសរុបជិត១៨០លានដុល្លារ ខណៈដែលរាជរដ្ឋាភិបាលកម្ពុជាក៏កំពុងអនុវត្តផែនការ និងគោលនយោបាយធ្វើពិពិធកម្មនៅក្នុងវិស័យកសិកម្មឱ្យកាន់តែមានឧត្តមភាពសម្រាប់បង្កើនការនាំចេញ៕

ក្រុមហ៊ុនLSCGចុះកិច្ចព្រមព្រៀងជាមួយក្រុមហ៊ុនធំមួយរបស់ចិនលើទឹកប្រាក់ប្រមាណ២០លានដុល្លារ ដើម្បីដេញថ្លៃគំរោងធំៗនៅកម្ពុជា

ដោយស៊ីវ ម៉េង
ភ្នំពេញៈ ក្រុមហ៊ុនក្នុងស្រុកដ៏ធំមួយ បានសម្រេចចុះកិច្ចព្រមព្រៀងជាមួយក្រុមហ៊ុនរបស់រដ្ឋាភិបាលចិន ដើម្បីដេញថ្លៃគំរោងធំនៅកម្ពុជា ជាប្រទេសដែលកំពុងទាក់ទាញការវិនិយោគ និងមានការរីកចម្រើនយ៉ាងលឿននេះ។

លោកលី សុខឆាយអគ្គនាយក្រុមហ៊ុនLSCG បានមានប្រសាសន៍ឲ្យដឹងនាព្រឹកថ្ងៃទី៨ មិនានេះថា កិច្ចព្រមព្រៀងនេះមានទំហំទឹកប្រាក់ចន្លោះពី២០ ទៅ៣០លានដុល្លារអាមេរិក ដែលនឹងត្រូវប្រើប្រាស់លើការដេញថ្លៃគំរោងសាងសង់ធំៗ ក៏ដូចជាគម្រោងអាគារសំណង់នានានៅទីក្រុងភ្នំពេញ និងតាមបណ្តាខេត្តមានសក្តានុពលសេដ្ឋកិច្ច។

លោកបន្តថា “ការវិនិយោគដេញថ្លៃគម្រោងធំៗនៅកម្ពុជា ដែលកំពុងជួបការលំបាកដោយសារCovid ជាផ្នែកមួយនៃការផ្តល់ទំនុកចិត្ត និងលើកកំពស់វិស័យអចលនទ្រព្យនៅកម្ពុជា”។លោកបន្តថា “វិស័យសំណង់ និងអចលនទ្រព្យកម្ពុជា ទោះបីឆ្លងកាត់ពេលវេលាដ៏លំបាកដោយសារជំងឺកូវីដ១៩ក្តី ប៉ុន្តែយើងមិនរងផលប៉ះពាល់ធ្ងន់ធ្ងរនោះទេ ដោយសារកត្តាដឹកនាំដ៏ឈ្លាសវៃ របស់ប្រមុខរដ្ឋាភិបាលកម្ពុជា គឺសម្តេចតេជោហ៊ុន សែននាយករដ្ឋមន្រ្តីនៃកម្ពុជា”។

ជាមួយនឹងការពង្រីកការសហការ ជាមួយក្រុមហ៊ុនជាតិ អន្តរជាតិ ពិសេសក្រុមហ៊ុនមកពីប្រទេសចិន បានធ្វើឲ្យក្រុមហ៊ុនLSCG ពង្រីកខ្លួនចាប់យកចំណែកទីផ្សារអចលនទ្រពន្យនៅកម្ពុជាយ៉ាងលឿន និងជាក្រុមហ៊ុនដែលកំពុងលេចធ្លោមួយ ដែលនឹងរួមចំណែកដល់ការលើកស្ទួយសេដ្ឋកិច្ច សង្គមកម្ពុជាឲ្យមានការរីកចម្រើនលឿនថែមទៀត។

លោកលី សុខឆាយបានបន្តទៀតថា លោកជឿថាវិស័យសំណង់ និងអចលនទ្រព្យនៅកម្ពុជានឹងងើបឡើងវិញ យ៉ាងលឿននាពេលឆាប់ៗខាងមុខនេះ បន្ទាប់ពីបញ្ចប់ព្រឹត្តិការណ៍៍២០កុម្ភៈកន្លងមកនេះ។លោកបន្តដោយសុទិដ្ឋិនិយមថា ប្រមុខរដ្ឋាភិបាលកម្ពុជានឹងអាចគ្រប់គ្រងជំងឺនេះបានលឿន និងឆាប់ចប់ ហើយសេដ្ឋកិច្ចកម្ពុជានឹងមានកំនើនឆាប់រហ័សឡើងវិញនាពេលឆាប់ៗខាងមុខនេះ៕

តើគួរចាប់ផ្ដើមពីចំណុចណាមុនដើម្បីក្លាយជាអ្នកវិនិយោគអចលនទ្រព្យមានជំនាញច្បាស់លាស់?

ដោយៈ លក្ខិណា

ភ្នំពេញៈ នាពេលបច្ចុប្បន្ន ការវិនិយោគអចលនទ្រព្យមានច្រើនបែប និងច្រើនសណ្ឋាន អ្នកខ្លះមានទុនច្រើនក៏ចាប់ផ្ដើមវិនិយោគធំ ហើយអ្នកខ្លះទៀត ដែលមានទ្រព្យធនតិចតួច ក៏មិនដឹងថា វិនិយោគអ្វីឱ្យទទួលបានផលចំណេញនៅពេលអនាគត។

ដូច្នេះដើម្បីឱ្យក្លាយជាអ្នកវិនិយោគអចលនទ្រព្យដែលអាចរកប្រាក់ចំណាញ និងក្លាយជាអ្នកវិនិយោគ ដែលមានជំនាញច្បាស់លាស់ តើគួរចាប់ផ្ដើមពីចំណុចណាមុន?

លោកង៉ែត ជូសេដ្ឋវិទូមួយរូបនៅក្នុងប្រទេសកម្ពុជាបានមានប្រសាសន៍ឱ្យដឹងថា សម្រាប់អ្នកដែលមានទុនតិចតួច ហើយគ្រាន់តែចង់បានផ្ទះនៅនិងមិនចង់បានបិទពិសោធន៍ប ឬការវិនិយោគច្បាស់លាស់នៅពេលអនាគតទេ គឺអាចទិញផ្ទះនៅតែម្ដងទៅ ប៉ុន្តែសម្រាប់ដែលមានបំណងចង់អភិវឌ្ឍខ្លួន និងយកការវិនិយោគអចលនទ្រព្យជាវិជ្ជាជីវៈ មុខរបរនៅពេលអនាគត គួរតែវិនិយោគទៅលើដី។

លោកបានថ្លែងថា ការវិនិយោគដីធ្លីនេះ វាមិនខុសពីការវិនិយោគទៅលើវិស័យផ្សេងៗនោះទេ គឺត្រូវវិនិយោគលើខ្លួនឯងជាមុនសិន ដែលសំដៅទៅលើការវិនិយោគលើចំណេះដឹង។

លោកបន្តថា ការវិនិយោគដីធ្លី គឺត្រូវមើលទៅលើទីតាំង ទើបអាចទទួលបានផលចំណេញ។ ជាក់ស្ដែងបើសិនជាគម្រោងវិនិយោគដីធ្លីរបស់យើង មានបំណងផ្ដោតទៅលើអ្នកដែលមានជីវភាពមធ្យមឬក្រោមមធ្យម គួរមើលទៅលើតំបន់ទើបកកើតថ្មីៗ ព្រោះតំបន់នោះ តម្លៃដីនៅមានតម្លៃទាប និងអាចលក់ចេញវិញនៅពេលអនាកត ក្នុងតម្លៃមួយខ្ពស់ជាង ជាពិសេសទៅលើតំបន់ណាដែលនៅជិតរោងចក្រកកើតថ្មីឬរោងចក្រដែលនឹងកកើតនៅពេលអនាគត។

លោកបន្ថែមថា ការវិនិយោគដីធ្លីក៏មើលទៅលើពីតម្រូវការជាក់ស្ដែងដែរ ហើយលោកបានផ្ដល់ជាមតិថា ដីនៅតាមបណ្ដាខេត្ត បើនិយាយពីតម្រូវការគឺនៅមានតិចតួចជាងតម្រូវការនៅក្នុងភ្នំពេញ ដូចជាតម្រូវការសាងសង់លំនៅឋានតម្រូវការសាងសង់រោងចក្រជាដើម ។ ដូច្នេះអ្នកវិនិយោគដីធ្លីដែលមានទុនតិចតួនហ្នឹងគួរតែងាកមកភ្នំពេញ ដើម្បីសម្លឹងមើលការវិនិយោគរបស់ខ្លួន ។

លោកបណ្ឌិតគីម ហ៊ាងប្រធានក្រុមហ៊ុនអចលនទ្រព្យ KW Cambodia បានលើកឡើងថា ការអភិវឌ្ឍដ៏ធ្លី នៅក្នុងប្រទេសកម្ពុជាបើប្រៀបធៀបនឹងប្រទេសមួយចំនួន ឃើញថា កម្ពុជាដើរក្រោយគេ១០ឆ្នាំ ២០ឆ្នាំ និងខ្លះមានដល់ទៅ៣០ឆ្នាំផងដែរ ដូច្នេះសក្ដានុពលក្នុងការវិនិយោគដីធ្លីនៅតែមានឱកាសខ្ពស់និងអាចរកប្រាក់ចំណេញបាននៅពេលអនាគត គ្រាន់តែទីតាំងដីដែលត្រូវវិនិយោគវានឹងកាន់តែឆ្ងាយពីរាជធានីភ្នំពេញ ឬឆ្ងាយពីទីប្រជុំជនបន្តិច៕

លំហូរទុនវិនិយោគលើវិស័យសំណង់នឹងងើបឡើងវិញនៅត្រីមាសទី៣ចុងឆ្នាំនេះ

ដោយ ៖ រ៉ាណេត

ភ្នំពេញ ៖ គម្រោងសាងសង់ និងទុនវិនិយោគក្នុងវិស័យសំណង់នៅកម្ពុជា ដែលស្ថិតនៅក្នុងសភាពស្ងប់ស្ងាត់ក្រោមឥទ្ធិពលនៃវិបត្តិសេដ្ឋកិច្ចបណ្តាលមកពីជំងឺឆ្លងចាប់តាំងពីដើមឆ្នាំ២០២០មកនោះ ត្រូវបានអ្នកជំនាញនៅក្នុងវិស័យមួយនេះធ្វើការព្យាករថា អាចនឹងនឹងកម្រើកឡើងវិញនៅក្នុងត្រីមាសទី៣ ឬចុងឆ្នាំ២០២១ ប្រសិនបើការប្រើប្រាស់វ៉ាក់សាំងការពារជំងឺកូវីដ១៩បានកាន់តែទូលាយ និងមានប្រសិទ្ធភាពទាំងនៅតាមបណ្តាប្រទេសនានា ក៏ដូចជានៅក្នុងប្រទេសកម្ពុជា ។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យ CBRE Cambodia លោកស្រី អាន សុធីតា បានមានប្រសាសន៍នៅព្រឹក៨ ខែមីនា ឆ្នាំ២០២១នេះថា ប្រសិនបើបញ្ហានៃការរីករាលដាលនៃជំងឺឆ្លងត្រូវបានធ្វើការទប់ស្កាត់ ជាពិសេសប្រសិទ្ធភាពនៃការប្រើប្រាស់វ៉ាក់សាំងកាន់តែមានភាពទូលាយ នោះសកម្មភាពវិនិយោគក្នុងវិស័យសំណង់នៅកម្ពុជាអាចនឹងមានកំណើនឡើងវិញបន្តិចម្ដងៗនៅត្រឹមចុងឆ្នាំ២០២១ ហើយភាគច្រើនផ្តើមចេញពីវិនិយោគិន និងអ្នកអភិវឌ្ឍន៍ក្នុងស្រុក។

លោកស្រីបានបញ្ជាក់ថា “សកម្មភាពអភិវឌ្ឍន៍ និងសាងសង់ទាំងអស់ដែលអាចនឹងបង្ហាញនៅចុងឆ្នាំ២០២១ភាគច្រើនជាគម្រោង និងទុនវិនិយោគដែលបានស្នើចូលមកកាន់កម្ពុជាតាំងពីឆ្នាំចាស់ ដែលមិនមែនទើបតែកើតមាននៅក្នុងឆ្នាំ២០២១នោះទេ។ យើងទទួលស្គាល់ថា សកម្មភាព និងទុនវិនិយោគថ្មីអាចកើតមាននៅក្នុងឆ្នាំ២០២១ខ្លះពិតមែន ប៉ុន្តែគម្រោងថ្មីទាំងនេះ ភាគច្រើនជាសកម្មភាពរបស់អ្នកវិនិយោគក្នុងស្រុកដែលវាមានកំណើនទុនក្នុងវិស័យសំណងតិចភាគរយបើប្រៀបទៅនឹងទុនវិនិយោគដែលទទួលបានពីក្រៅប្រទេស”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម ធ្លាប់បានមានប្រសាសន៍កាលពីពេលកន្លងទៅថ្មីៗនេះថា នៅក្នុងឆ្នាំ២០២១នេះ សកម្មភាពវិនិយោគក្នុងវិស័យសំណង់ភាគច្រើនជាសកម្មភាពរបស់អ្នកក្នុងស្រុក ដោយឡែកសម្រាប់រំហូរទុនចូលពីក្រៅស្រុកគឺមានតិចតួចបំផុត។ លោកបានបន្តថា “វិបត្តិសេដ្ឋកិច្ចដែលកំពុងកើតមាននៅពេលនេះ គឺជះឥទ្ធិពលគ្រប់ប្រទេស ដែលបណ្តាលឱ្យប៉ះពាល់ដល់គម្រោងវិនិយោគទាំងអស់។ ប៉ុន្តែក្រោយពេលវិបត្តិនេះត្រូវបានទប់ស្កាត់ គម្រោងវិនិយោគនានានឹងចាប់ផ្តើមរៀបចំឡើងវិញ ហើយតាមខ្ញុំគិត ប្រសិនបើវិបត្តិជំងឺដែលកំពុងរាលដាលនេះត្រូវបានបញ្ចប់នៅត្រឹមចុងឆ្នាំនេះ នោះសកម្មភាពវិនិយោគនៅក្នុងវិស័យសំណង់អាចនឹងចាប់ផ្តើមនៅដើមឆ្នាំ ឬនៅត្រឹមពាក់កណ្តាលឆ្នាំ២០២២ខាងមុខនេះ”៕