ឥណ្ឌូនេស៊ីប្រើមូលនិធិរបស់ខ្លួនទាក់ទាញការវិនិយោគដល់ទៅ១០ពាន់លានដុល្លារ

ដោយៈសុខុម

ហ្សាការតា: សារព័ត៌មានCNA ចុះផ្សាយថា ប្រទេសឥណ្ឌូនេស៊ី ទទួលបានការវិនិយោគពីបណ្ដាក្រុមហ៊ុនជុំវិញពិភពលោក រហូតដល់១០ពាន់លានដុល្លារអាមេរិក សម្រាប់មូលនិធិ Sovereign Wealth Fund (SWF) របស់ខ្លួន នៅមុនការចាប់ផ្ដើមដំណើរការមូលនិធិនេះជាផ្លូវការដែលគេរំពឹងថា នឹងធ្វើឡើងនៅឆ្នាំ២០២១ នេះ។ នេះបើយោងតាមទេសរដ្ឋមន្ត្រីមួយរូបទម្លាយឱ្យដឹងកាលពីថ្ងៃអង្គារ ទី២៦ ខែមករា ឆ្នាំ២០២១។

អាជ្ញាធរឥណ្ឌូនេស៊ី ទទួលបន្ទុកផ្នែកវិនិយោគ (Indonesia Investment Authority (INA)) មានបំណងទាក់ទាញមូលនិធិបរទេស ឱ្យចូលរួមធ្វើជាសហវិនិយោគិន ដែលខុសពីមូលនិធិSWF ផ្សេងទៀតដែលបណ្ដាប្រទេសអភិវឌ្ឍន៍បង្កើតឡើង ដើម្បីគ្រប់គ្រងចំណូលប្រេង ឬរូបិយប័ណ្ណបរទេស។

ទេសរដ្ឋមន្ត្រី Airlangga Hartarto និងជារដ្ឋមន្ត្រីសម្របសម្រួលកិច្ចការសេដ្ឋកិច្ចឥណ្ឌូនេស៊ីបានថ្លែងប្រាប់វេទិកាពាណិជ្ជកម្មមួយថា INA ត្រូវបានដាក់ឱ្យស្ថិតក្នុងចំណោមវិនិយោគិនចំនួនជាង៥០ជុំវិញពិភពលោក។

ជាមួយនឹងគោលដៅ គ្រប់គ្រងមូលនិធិ២០ពាន់លានដុល្លារអាមេរិក រដ្ឋាភិបាលឥណ្ឌូនេស៊ី នឹងត្រូវផ្ដល់សាច់ប្រាក់ចំនួន៥ពាន់លានដុល្លារអាមេរិក និងទ្រព្យសកម្មផ្សេងៗទៀតដល់ INA ជាមុនសិន។

បទបង្ហាញរបស់ទេសរដ្ឋមន្ត្រីខាងលើបង្ហាញថា មូលនិធិសោធនកាណាដា Caisse de depot et placement du Quebec (CDPQ) បានចុះហត្ថលេខាលើលិខិតក្រៅផ្លូវការមួយ ដោយបញ្ជាក់ពីបំណងវិនិយោគ រហូតដល់ទៅ២ពាន់លានដុល្លារអាមេរិក និង១,៥ ពាន់លានដុល្លារអាមេរិក ទៀតបានពីមូលនិធិសោធនហូឡង់ APG។

មូលនិធិ SWF របស់សិង្ហបុរី ដែលមានឈ្មោះថា GIC ក៏បានចុះឈ្មោះដែរ ខណៈធនាគារវិនិយោគអូស្ត្រាលី Macquarie បានសុំគ្រប់គ្រងមូលនិធិផ្លូវបង់ប្រាក់ ហើយអាចនឹងចូលរួមចំណែក៣០០លានដុល្លារអាមេរិក បន្ថែមទៀត។

ទោះជាយ៉ាងណា ពេលទីភ្នាក់ងារព័ត៌មាន Reuters ព្យាយាមទាក់ទងដើម្បីសុំការបំភ្លឺដោយឡែកៗពីគ្នាជុំវិញបញ្ហានេះ មូលនិធិសោធនហូឡង់ APG ធនាគារវិនិយោគអូស្ត្រាលី Macquarie មូលនិធិសោធនកាណាដា CDPQ និងមូលនិធិសិង្ហបុរី GIC មិនបានឆ្លើយតបនោះទេ។

តើមូលនិធិ SWF ជាអ្វី?

SWFជាមូលនិធិគ្រប់គ្រងដោយរដ្ឋមួយ ដែលមានទ្រព្យសកម្មហិរញ្ញវត្ថុដូចជាភាគហ៊ុន សញ្ញាប័ណ្ណ ទ្រព្យសម្បត្តិ និងឧបករណ៍ហិរញ្ញវត្ថុ (Financial Instrument) ផ្សេងៗទៀត។ មូលនិធិប្រភេទនេះគឺជាស្ថាប័ន ដែលគ្រប់គ្រងលុយសន្សំរបស់ជាតិសម្រាប់គោលបំណងវិនិយោគ៕

រដ្ឋាភិបាលបន្តពិភាក្សាផែនទីចង្អុលផ្លូវស្តីពីផែនការស្តារ និងលើកស្ទួយវិស័យទេសចរណ៍ខេត្តសៀមរាប ២០២១-២០៣៥

ដោយៈគង់ សូរិយា

ភ្នំពេញៈ រដ្ឋាភិបាលបានបន្តពិភាក្សាផែនទីច្ងូលបង្ហាញផ្លូវ និងផែនការស្តារលើកស្ទួយនិងអភិវឌ្ឍន៍វិស័យទេសចរណ៍កម្ពុជា និងខេត្តសៀមរាបសម្រាប់ឆ្នាំ២០២១ ២០៣៥ខាងមុខនេះ។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិ ការជាតិអភិវឌ្ឍន៍ទេសចរណ៍បានដឹកនាំកិច្ចប្រជុំលើកទី៣ នៃគណៈកម្មាធិការជាតិអភិវឌ្ឍន៍ទេសចរណ៍ ដើម្បីត្រួតពិនិត្យនិងសម្រេចលើសេចក្តីព្រាង(១).ផែនទីចង្អុលផ្លូវស្តីពីផែនការស្តារ និងលើកស្ទួយវិស័យទេសចរណ៍កម្ពុជាក្នុងនិងក្រោយវិបិត្តជំងឺឆ្លងកូវីដ-១៩ និង(២).ផែនការអភិវឌ្ឍន៍ទេសចរណ៍ខេត្តសៀមរាប២០២១-២០៣៥។

សេចក្តីព្រាងផែនទីចង្អុលផ្លូវ(Roadmap)ស្តីពីផែនការស្តារ និងលើកស្ទួយវិស័យទេសចរណ៍កម្ពុជាឡើងវិញនៅ ក្រោយពីវិបត្តិនៃជំងឺកូវីដ-១៩។ ផែនការនេះមានរយៈពេល៥ឆ្នាំដោយរំពឹងថានឹងទាក់ទាញភ្ញៀវទេសចរ អន្តរជាតិ ឱ្យបាន៧លាននាក់នៅក្នុងឆ្នាំ២០២៥។ ក្រសួងទេសចរណ៍កម្ពុជានឹងធ្វើឱ្យប្រសើរឡើងវិញពីការចូលរួមរបស់វិស័យ ទេសចរណ៍ទៅក្នុងសេដ្ឋកិច្ច និងសង្គម។

វិស័យទេសចរណ៍ត្រូវបានរដ្ឋាភិបាលកម្ពុជាចាត់ទុកថាជាឧស្សាហកម្មគ្មានផ្សែង និងជាមាសបៃតងដែលបានរួម ចំណែកសម្រាប់ផលិតផលក្នុងស្រុកសរុបរបស់កម្ពុជាប្រមាណ១៣%។ ប៉ុន្តែដោយសារការរីករាលដាលនៃជំងឺកូវីដ១៩ បានធ្វើឲ្យវិស័យមួយនេះដាំក្បាលចុះ ហើយកម្ពុជាបានខាតបង់ចំណូលប្រមាណជាង៣ពាន់លានដុល្លារអាមេរិកក្នុងរយៈពេល៤ខែដំបូង ឆ្នាំ២០២០។ នេះបើយោងតាមរបាយការណ៍ពីក្រសួងទេសចរណ៍។

ក្រសួងទេសចរណ៍នៅពេលនេះនឹងចង្អុលបង្ហាញនូវផែនការស្តារ និងលើកស្ទួយវិស័យទេសចរណ៍កម្ពុជាឡើងវិញ ដោយចាប់ផ្តើមអនុវត្តពីឥឡូវនេះសម្រាប់ទីផ្សារទេសចរណ៍ ដែលមានសក្តានុពល និងទីផ្សារទេសចរណ៍សមស្របណាមួយនៅក្នុងដំណាក់កាលនៃការរីករាលដាលជំងឺឆ្លងកូវីដ-១៩នេះ។ ប៉ុន្តែ ដើម្បីសម្រេចបាននូវចក្ខុវិស័យនេះ ផែនការស្តារ និងលើកស្ទួយវិស័យទេសចរណ៍បានដាក់ចេញនូវវិធានគោលនយោបាយអន្តរាគមន៍ក្នុងរយៈពេលខ្លី មធ្យម និងវែងជា៣ដំណាក់កាល។

ដំណាក់កាលទី១. (Resilient & Restart)៖ ការគ្រប់គ្រងវិបត្តិក្នុងដំណាក់កាលប្រក្រតីភាពតាមទម្លាប់ថ្មី(New Normal) និងរៀបចំផែនការសម្រាប់ការស្តារឡើងវិញ(ឆមាសទី២ ឆ្នាំ២០២០ ដល់ឆមាសទី១ ឆ្នាំ២០២១) ទី២. ដំណាក់កាល(Recovery) ការជំរុញ និងការស្តារឡើងវិញនៃវិស័យទេសចរណ៍(ឆមាសទី២ឆ្នាំ២០២១-២០២២) និង ទី៣ ដំណាក់កាល(Relaunch)៖ ការរៀបចំឆ្ពោះទៅកាន់អនាគតថ្មីនៃវិស័យទេសចរណ៍កម្ពុជា(២០២៣-២០២៥)។

ក្រសួងទេសចរណ៍បានបន្តថា ក្នុងដំណាក់កាលនីមួយៗមានការដាក់ចេញនូវយុទ្ធសាស្ត្រ និងផែនការសកម្មភាពអនុវត្តដោយអនុលោមទៅតាមសសរស្តម្ភ៤ គឺ បេតិក ភណ្ឌវប្បធម៌ ទេសចរណ៍ តំបន់ឆ្នេរ អេកូទេសចរណ៍ និង ភាពជាប្រជាជនខ្មែររួមទាំងគោលដៅយុទ្ធសាស្ត្រចំនួន៣ គឺសេដ្ឋកិច្ច និងការងារក្នុងវិស័យទេសចរណ៍ ការផ្សព្វផ្សាយ និងការជំរុញទេសចរណ៍ក្នុងស្រុក និងអន្តរជាតិ និងអភិបាលកិច្ចក្នុងវិស័យទេសចរណ៍។ សេចក្ដីព្រាងផែនទីចង្អុលផ្លូវនេះនឹងបញ្ចូលនូវសកម្មភាពយុទ្ធសាស្ត្រចំនួន៤៨ និងគម្រោងអភិវឌ្ឍគំរូធំៗសរុបចំនួន១៦ដែល សេចក្តីព្រាងនេះគ្រោងនឹងដាក់ឆ្លងគណៈកម្មាធិការជាតិអភិវឌ្ឍន៍ទេសចរណ៍នាពេលខាងមុខនេះ។

ផែនការអភិវឌ្ឍន៍ទេសចរណ៍ខេត្តសៀមរាប ២០២១-២០៣៥ មានរយៈពេល១៥ឆ្នាំដើម្បីអភិវឌ្ឍទេសចរណ៍នៅក្នុងខេត្តសៀមរាបឱ្យក្លាយទៅជា«មាសបៃតង»ផងដែរ៕

ជប៉ុនបានផ្តល់ឥណទានសម្បទាន២៣៨លានដុល្លារដល់កម្ពុជាក្នុងកិច្ចអភិវឌ្ឍន៍វិស័យអាទិភាព

ដោយៈ គង់ ម៉ាលីន

ភ្នំពេញៈ រដ្ឋាភិបាលប៉ុន បានផ្តល់ជំនួយឥណទានសម្បទាន ប្រមាណ២៣៨លានដុល្លារ សម្រាប់ការអនុវត្តផែនការអភិវឌ្ឍន៍ នៅក្នុងវិស័យសំខាន់ៗ ដែលជាអាទិភាពរបស់កម្ពុជា ក៏ដូចជាការចូលរួមលើកកម្ពស់ និងទ្រទ្រង់កំណើនសេដ្ឋកិច្ចកម្ពុជាផងដែរ។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៥ ខែមករា ឆ្នាំ២០២១ បានមានប្រសាសន៍នៅក្នុងកិច្ចទទួលជួបពិភាក្សាការងារជាមួយលោកស្រី KAMEI Haruko ប្រធានតំណាងថ្មីរបស់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំកម្ពុជាថា ជប៉ុនគឺជាមិត្តដ៏ជិតស្និទ្ធ និងជាដៃគូអភិវឌ្ឍន៍ប្រទេសដ៏សំខាន់របស់កម្ពុជា។

លោកឧបនាយករដ្ឋមន្រ្តី ក៏បានថ្លែងអំណរគុណចំពោះរដ្ឋាភិបាលជប៉ុន និងប្រជាជនជប៉ុន ដែលតែងតែជួយគាំទ្រក្នុងការស្តារ និងការអភិវឌ្ឍសេដ្ឋកិច្ច និងសង្គមដល់កម្ពុជា។ លោកបានមានប្រសាសន៍ថា ប្រទេសជប៉ុន គឺជាដៃគូយុទ្ធសាស្រ្ត និងជាដៃគូសហប្រត្តិការទ្វេភាគីធំជាងគេមួយ ដែលបានផ្តល់ហិរញ្ញប្បទានដល់ប្រទេសកម្ពុជា។

ការផ្តល់ហិរញ្ញប្បទានរបស់រដ្ឋាភិបាលជប៉ុន គឺចំគោលដៅលើគ្រប់វិស័យ រួមមាន៖ សុខាភិបាល អប់រំ កសិកម្ម ហេដ្ឋារចនាសម្ព័ន្ធផ្លូវជាតិ ស្ពាន កំពង់ផែស្វយ័ត អន្តរជាតិប្រព័ន្ធធារាសាស្រ្ត បណ្តាញថាមពលអគ្គិសនី និងការផ្គត់ផ្គង់ទឹកស្អាតជាដើម ។ល។ ជាក់ស្តែងក្នុងឆ្នាំ២០២០ កន្លងទៅនេះ រដ្ឋាភិបាលជប៉ុនបានផ្តល់ឥណទានសម្បទាន មានទឹកប្រាក់ចំនួន២៥ពាន់លានយ៉េនជប៉ុន (ត្រូវជាប្រមាណ ២៣៨ លានដុល្លារអាមេរិក) ចូលរួមចំណែកជាមួយដៃគូអភិវឌ្ឍន៍នានាជួយគាំ ទ្រសកម្មភាពនៃការអនុវត្តគោលនយោបាយរបស់រាជរដ្ឋាភិបាលកម្ពុជា ក្នុងការឆ្លើយតបទៅនឹងផលប៉ះពាល់ដោយសារជំងឺកូវីដ-១៩ លើបញ្ហាសុខភាព សង្គម និងសេដ្ឋកិច្ចកម្ពុជា សំដៅរក្សាលំនឹងសេដ្ឋកិច្ច-សង្គម ក៏ដូចជា ជំរុញកំណើនសេដ្ឋកិច្ចឡើងវិញ។

ជាថ្មីម្តងទៀតលោកអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនជប៉ុន ពិសេស ទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុនប្រចាំកម្ពុជា ដែលបានដើរតួនាទីយ៉ាងសកម្ម ក្នុងការផ្តល់កិច្ចសហប្រតិបត្តិការអភិវឌ្ឍន៍ផ្លូវការ (ODA) ឆ្លើយតបចំទិសដៅអភិវឌ្ឍន៍របស់រាជរដ្ឋាភិបាលកម្ពុជា និងសង្ឃឹមថា JICA នឹងបន្តជួយពង្រឹង និងពង្រីកកិច្ចសហប្រតិបត្តិការក្នុងវិស័យសេដ្ឋកិច្ច-សង្គមរវាងព្រះរាជាណាចក្រកម្ពុជា និងប្រទេសជប៉ុនឲ្យកាន់តែទូលំទូលាយ និងស្អិតរមួតថែមទៀត ។

លោកស្រី KAMEI Haruko ក៏បានសម្តែងនូវសេចក្តីសោមនស្សរីករាយ ដែលបានមកបំពេញភារកិច្ចនៅកម្ពុជា និងបានសម្តែងនូវការកោតសរសើរ ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលសម្រេចបាននូវសមិទ្ធផលផ្លែផ្កាជាច្រើន ជាពិសេស ក្នុងការចាត់វិធានការយ៉ាងម៉ឺងម៉ាត់ និងម៉ត់ចត់ បង្ការ និងទប់ស្កាត់ការរីករាលដាលនៃជំងឺកូវីដ-១៩ នាពេលបច្ចុប្បន្ននេះ៕

រដ្ឋមន្រ្តីមកពីក្រសួងចំនួន៣រៀបចំវេទិកាជាតិអេកូទេសចរណ៍រួមគ្នានៅសៀមរាប

ដោយៈ ស៊ីវ ម៉េង

ភ្នំពេញៈ រដ្ឋមន្រ្តីសំខាន់ៗមកពីក្រសួងចំនួនបី បានរួមគ្នារៀបចំវេទិកាជាតិអេកូទេសចរណ៍នៅខេត្តសៀមរាប ដើម្បីជម្រុញនិងលើកស្ទួយវិស័យនេះ ឲ្យមានភាពរីកចម្រើនប្រកបដោយនរន្តរភាព។

រដ្ឋមន្រ្តីទាំងនោះរួមមាន លោកបណ្ឌិត ថោង ខុន រដ្ឋមន្រ្តីក្រសួងទេសចរណ៍ និងជាប្រធានក្រុមការងារអន្ដរក្រសួងគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ (ក.គ.អ.អ.) តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា លោក សាយ សំអាល់រដ្ឋមន្រ្តីក្រសួងបរិស្ថាន និងជាអនុប្រធានអចិន្រ្តៃយ៍ (ក.គ.អ.អ.) និង លោកវេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងជាអនុប្រធាន (ក.គ.អ.អ.) នៅខេត្តសៀមរាប។

អង្គវេទិកានឹងប្រព្រឹត្តទៅ ដោយមានការចូលរួមពីថ្នាក់ដឹកនាំក្រសួង- ស្ថាប័នពាក់ព័ន្ធ គណៈអភិបាលរាជធានី-ខេត្ត ដែលជាសមាជិកក្រុមការងារអន្តរក្រសួងគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ មន្ទីរជំនាញពាក់ព័ន្ធទាំងបី គឺទេសចរណ៍ បរិស្ថាន កសិកម្ម រុក្ខាប្រមាញ់ និងនេសាទ តំណាងអង្គការជាតិ-អន្តរជាតិ និងដៃគូពាក់ព័ន្ធដែលធ្វើការងារពាក់ព័ន្ធនឹងសហគមន៍ តំណាងសហគមន៍ទេសចរណ៍ និងអេកូទេសចរណ៍ទូទាំងប្រទេស ផ្នែកឯកជន ប្រតិបត្តិករទេសចរណ៍ សមាគមក្នុងវិស័យទេសចរណ៍ និងភាគីពាក់ព័ន្ធជាច្រើនទៀត។

អង្គវេទិកាប្រព្រឹត្តទៅដោយមានការរៀបចំ ជាកិច្ចពិភាក្សាបច្ចេកទេស (Panel Discussion) ដោយមានការចូលរួមពីវាគ្មិនសំខាន់ៗ អញ្ជើញមកពីស្ថាប័នសាធារណៈ ផ្នែកឯកជន តំណាងសហគមន៍ទេសចរណ៍ និងអេកូទេសចរណ៍ ដៃគូជាតិ និងអន្តរជាតិ និងភាគីពាក់ព័ន្ធនានា ដោយលទ្ធផលនៃកិច្ចពិភាក្សានេះ នឹងត្រូវបញ្ចូលជាខ្លឹមសារក្នុងសេចក្តីថ្លែងការណ៍លើកទី២ ស្តីពីការអភិវឌ្ឍសហគមន៍ទេសចរណ៍ និងអេកូទេសចរណ៍ ដែលនឹងពិភាក្សា និងអនុម័តនាពិធីបិទវេទិកា។

កិច្ចពិភាក្សាបច្ចេកទេសនឹងផ្តោតលើប្រធានបទសំខាន់ចំនួនបីដូចជា ទី១ ការវិវត្តន៍ និងអនាគតនៃវិស័យអេកូទេសចរណ៍ និងសហគមន៍ ក្នុងបរិបទជំងឺកូវីដ-១៩ ទី២ ភាពជាដៃគូបំពេញគ្នារវាងការអភិវឌ្ឍ និងការអភិរក្ស ក្នុងការជំរុញការអភិវឌ្ឍសហគមន៍ទេសចរណ៍ និងអេកូទេសចរណ៍ និងទី៣ ការគាំទ្រក្របខណ្ឌគោលនយោបាយអន្តរវិស័យ និងយន្តការជម្រុញការអភិវឌ្ឍសហគមន៍។

ទន្ទឹមនឹងនេះ អង្គវេទិកាក៏មានរៀបចំជាពិព័រណ៍ខ្នាតតូច ស្តីពីសហគមន៍ទេសចរណ៍ និងអេកូទេសចរណ៍ដើម្បីបង្ហាញ ពីផលិតផល និងសមិទ្ធផលសំខាន់ៗពាក់ព័ន្ធនឹងការងារអភិវឌ្ឍន៍ផលិតផលទេសចរណ៍ និងអេកូទេសចរណ៍ទូទាំងប្រទេស។

ព្រមជាមួយអង្គវេទិកា នឹងមានរៀបចំដំណើរទស្សនកិច្ចសិក្សា (Technical Tour)ទៅកាន់តំបន់សហគមន៍សំខាន់ៗ មួយចំនួនក្នុងខេត្តសៀមរាប ដូចជាសហគមន៍ទេសចរណ៍កំពង់ភ្លុក សហគមន៍អេកូទេសចរណ៍ទឹកជប់ខ្នារពោធិ៍ សហគមន៍ទេសចរណ៍ភ្នំគូលែន សហគមន៍ទេសចរណ៍បាគងភូមិខ្ញុំ សហគមន៍ភូមិធម្មជាតិរុនតាឯក សហគមន៍ទេសចរណ៍បឹងឈូកបន្ទាយស្រី៕

ឥណ្ឌូនេស៊ី អះអាងថា មូលនិធិថ្មីមួយរបស់ខ្លួនទាក់ទាញបានការវិនិយោគដល់ទៅ ១០ពាន់លានដុល្លារ

ដោយ សុខុម

ហ្សាការតា៖ សារព័ត៌មាន CNA ចុះផ្សាយថា ប្រទេសឥណ្ឌូនេស៊ី ទទួលបានការវិនិយោគពីបណ្ដាក្រុមហ៊ុនជុំវិញពិភពលោករហូតដល់ ១០ ពាន់លានដុល្លារអាមេរិក សម្រាប់មូលនិធិ Sovereign Wealth Fund (SWF) របស់ខ្លួន នៅមុនការចាប់ផ្ដើមដំណើរការមូលនិធិនេះជាផ្លូវការដែលគេរំពឹងថានឹងធ្វើឡើងនៅឆ្នាំ២០២១ នេះ។ នេះបើយោងតាមទេសរដ្ឋមន្ត្រីមួយរូបទម្លាយឱ្យដឹងកាលពីថ្ងៃអង្គារ ទី២៦ មករា។

អាជ្ញាធរឥណ្ឌូនេស៊ី ទទួលបន្ទុកផ្នែកវិនិយោគ (Indonesia Investment Authority (INA)) មានបំណងទាក់ទាញមូលនិធិបរទេសឱ្យចូលរួមធ្វើជាសហវិនិយោគិន ដែលខុសពីមូលនិធិ SWF ផ្សេងទៀតដែលបណ្ដាប្រទេសអភិវឌ្ឍន៍បង្កើតឡើងដើម្បីគ្រប់គ្រងចំណូលប្រេង ឬរូបិយប័ណ្ណបរទេស។

ទេសរដ្ឋមន្ត្រី Airlangga Hartarto និងជារដ្ឋមន្ត្រីសម្របសម្រួលកិច្ចការសេដ្ឋកិច្ចឥណ្ឌូនេស៊ី បានថ្លែងប្រាប់វេទិកាពាណិជ្ជកម្មមួយថា INA ត្រូវបានលើកឱ្យស្ថិតក្នុងចំណោមវិនិយោគិនចំនួនជាង ៥០ ជុំវិញពិភពលោក។

ជាមួយនឹងគោលដៅគ្រប់គ្រងមូលនិធិ ២០ ពាន់លានដុល្លារអាមេរិក រដ្ឋាភិបាលឥណ្ឌូនេស៊ី នឹងត្រូវផ្ដល់សាច់ប្រាក់ចំនួន ៥ ពាន់លានដុល្លារអាមេរិក និងទ្រព្យសកម្មផ្សេងៗទៀតដល់ INA ជាមុនសិន។

បទបង្ហាញរបស់ទេសរដ្ឋមន្ត្រីខាងលើបង្ហាញថា មូលនិធិសោធនកាណាដា Caisse de depot et placement du Quebec (CDPQ) បានចុះហត្ថលេខាលើលិខិតក្រៅផ្លូវការមួយដោយបញ្ជាក់ពីបំណងវិនិយោគដល់ទៅ ២ ពាន់លានដុល្លារអាមេរិក និង ១,៥ ពាន់លានដុល្លារអាមេរិក ទៀតបានពីមូលនិធិសោធនហូឡង់ APG។

មូលនិធិ SWF របស់សិង្ហបុរី ដែលមានឈ្មោះថា GIC ក៏បានចុះឈ្មោះដែរ ខណៈធនាគារវិនិយោគអូស្ត្រាលី Macquarie បានសុំគ្រប់គ្រងមូលនិធិផ្លូវបង់ប្រាក់ ហើយអាចនឹងចូលរួមចំណែក ៣០០ លានដុល្លារអាមេរិក បន្ថែមទៀត។

តើមូលនិធិ SWF ជាអ្វី?

SWF ជាមូលនិធិគ្រប់គ្រងដោយរដ្ឋមួយដែលមានទ្រព្យសកម្មហិរញ្ញវត្ថុដូចជាភាគហ៊ុន សញ្ញាប័ណ្ណ ទ្រព្យសម្បត្តិ និងឧបករណ៍ហិរញ្ញវត្ថុ (Financial Instrument) ផ្សេងៗទៀត។ មូលនិធិប្រភេទនេះគឺជាស្ថាប័នដែលគ្រប់គ្រងលុយសន្សំរបស់ជាតិសម្រាប់គោលបំណងវិនិយោគ៕

គម្រោងស្ថាបនាព្រលានយន្តហោះខេត្តបាត់ដំបងចាប់ផ្តើមដាំបង្គោល កំណត់ព្រំដី ដើម្បីឈានទៅជួសជុលឡើងវិញ

ដោយ ៖ រ៉ាណេត

បាត់ដំបង ៖ គម្រោងស្ថាបនាសាងសង់ព្រលានយន្តហោះបែកចានខេត្តបាត់ដំបង រហូតមកដល់ពេលនេះឈានដល់ដំណាក់កាលនៃការដាំបង្គោល កំណត់ព្រំដី និងកំពុងបន្តសិក្សាពីទំហំទុននៃការសាងសង់ រួមជាមួយនឹងផលប៉ះពាល់លើគម្រោងផងដែរ។

លោក សឿម ប៊ុនរិទ្ធិ អភិបាលរងខេត្តបាត់ដំបងបានមានប្រសាសន៍នៅថ្ងៃទី២៥ ខែមករា ឆ្នាំ២០២១ថា បច្ចុប្បន្នរដ្ឋបាលខេត្តកំពុងធ្វើការមួយជំហានហើយ ជាមួយនឹងរដ្ឋលេខាធិការដ្ឋានអាកាសចរស៊ីវិល ដោយទីមួយក្នុងក្របខ័ណ្ឌនៃការចុះបញ្ជីដីធ្លីលក្ខណៈជាប្រព័ន្ធ ក្នុងការអនុវត្តការងារជាក់ស្តែង តាមណែនាំរបស់ក្រសួងរៀបចំដែនដី នគរូបនីយកម្ម និងសំណង់ ដោយបានឆ្វៀលផ្ទៃដីព្រលានយន្តហោះទុកសម្រាប់ការសាងសង់ឡើងវិញនាពេលខាងមុខ ទាំងនៅស្រុកសង្កែ និងក្រុងបាត់ដំបង។

លោកបានបន្តថា ប្រសិនបើប្រជាពលរដ្ឋទៅដាំដុះ ឬធ្វើស្រែទៅដល់ដីកន្លែងព្រលាននោះ នៅពេលដែលចេញប្លង់កម្មសិទ្ធិ គឺរដ្ឋមិនចេញប្លង់ឱ្យទេ ហើយប្រជាពលរដ្ឋក៏បានទទួលស្គាល់ និងផ្តិតមេដៃអនុវត្តតាមកិច្ចសន្យានេះហើយដែរ។

លោកបញ្ជាក់ថា “ការពង្រីកត្រូវឱ្យមានលក្ខណៈសមស្របជាព្រលានក្នុងស្រុកមួយដែលការចុះចតយន្តហោះកម្រិតណាបាន គឺនៅលើការងារបច្ចេកទេស ជាពិសេសនៅលើរដ្ឋលេខាធិការដ្ឋាន អាកាសចរណ៍ស៊ីវិល ដែលត្រូវសិក្សាបន្ថែមជាមួយអ្នកបច្ចេកទេស។ រដ្ឋបាលខេត្តគ្រាន់តែសម្របសម្រួល រឿងបញ្ហាបោះបង្គោលព្រំដីព្រលាន ដើម្បីជៀសវាងប្រជាពលរដ្ឋចេះតែទន្ទ្រានកាន់កាប់ដីរបស់រដ្ឋនៅទីនោះបន្ថែមទៀត” ។

បច្ចុប្បន្ន ប្រជាពលរដ្ឋក្នុងតំបន់បានធ្វើស្រែ ធ្វើចំការនៅក្នុងដីព្រលានយន្តហោះស្ទើរតែទាំងស្រុង ហើយពួកគាត់នៅតែមានបំណងទាមទារឱ្យរដ្ឋដោះស្រាយគោលនយោបាយ ខណៈដែលដោយពួកគាត់បានដឹងហើយថាទីតាំងនេះជាដីរបស់រដ្ឋជាទ្រព្យសម្បត្តិសាធារណៈ ដូច្នេះ រដ្ឋមិនចេញបណ្ណកម្មសិទ្ធិជូនឡើយ៕

ប្រធាន CVEA ៖ ទីផ្សារអចលនទ្រព្យក្នុងអំឡុងពេលនេះនៅតែជាឆ្អឹងខ្នងជួយទ្រទ្រង់កំណើនសេដ្ឋកិច្ចកម្ពុជា

ដោយ ៖ រ៉ាណេត

ភ្នំពេញ ៖ ទោះជាកំពុងស្ថិតនៅក្នុងស្ថានភាពប្រឈមនឹងវិបត្តិសេដ្ឋកិច្ច ដែលមិនទាន់មានការវិលត្រឡប់ពីសំណាក់ដៃគូសហការវិនិយោគ និងអភិវឌ្ឍវិស័យអចលនទ្រព្យដែលជាជនជាតិបរទេសក៏ដោយ ប៉ុន្តែសម្រាប់ទីផ្សារអចលនវត្ថុកំពុងមានចរន្តក្នុងស្រុកនៅពេលបច្ចុប្បន្ននេះ នៅតែជាឆ្អឹងខ្នងដ៏សំខាន់ដែលអាចជួយទ្រទ្រង់នូវកំណើនសេដ្ឋកិច្ចជាតិកម្ពុជាដដែល។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍នៅរសៀលថ្ងៃទី២៦ ខែមករា ឆ្នាំ២០២១ថា ដោយសារតែបញ្ហានៃវិបត្តិសេដ្ឋកិច្ចសាកលបានធ្វើឱ្យសកម្មភាពធំមួយចំនួនក្នុងវិស័យអចលនទ្រព្យ ក៏ដូចជាសន្ទុះនៃការបណ្តាក់ទុនវិនិយោគនៅកម្ពុជាមានកាធ្លាក់ចុះ ប៉ុន្តែទោះជាយ៉ាងណា ទីផ្សារមួយនេះនៅតែមានលទ្ធភាពក្នុងការចូលចូលរួមជួយជ្រោមជ្រែងសេដ្ឋកិច្ចកម្ពុជាដដែល។

លោកបន្តថា “យើងទទួលស្គាល់ថាសកម្មភាពនៃការអភិវឌ្ឍគម្រោងថ្មីត្រូវបានធ្លាក់ចុះ ប៉ុន្តែមិនមែនទាំងអស់នោះទេ ព្រោះគម្រោងធំៗមួយចំនួនដែលបន្សល់ទុកតាំងពីឆ្នាំចាស់នៅតែបន្តសកម្មភាពសាងសង់របស់ខ្លួនគ្រាន់តែថាហាក់យឺតជាងមុនបន្តិច ដោយសារតែម្ចាស់គម្រោង ឬម្ចាស់ទុនដែលជាជនជាតិបរទេសនៅមិនទាន់អាចវិលត្រឡប់មកកាន់កម្ពុជានៅឡើយ” ។

លោកច្រឹក សុខនីម បានមានប្រសាសន៍ទៀតថា បើទោះជាស្ថិតនៅក្នុងកាលៈទេសៈបែបនេះក៏ដោយ ប៉ុន្តែតាមរយៈចរន្តទីផ្សារនៅក្នុងស្រុកបានជួយចូលរួមចំណែកក្នុងការជ្រោមជ្រែង និងទ្រទ្រង់សេដ្ឋកិច្ចជាតិបានមួយចំណែកផងដែរ ដោយសារតែអ្នកវិនិយោគ និងអ្នកអភិវឌ្ឍន៍ក្នុងស្រុកបានបញ្ចេញកញ្ចប់ថវិកាសម្រាប់កិច្ចដំណើរការគម្រោងរបស់ខ្លួនដើម្បីបំពេញតាមតម្រូវការទីផ្សារជាក់ស្ដែង។

លោកបានបញ្ជាក់ថា “ដូចជាក្រុមហ៊ុនអភិវឌ្ឍន៍លំនៅដ្ឋានតម្លៃសមរម្យដែលភាគច្រើនស្ថិតនៅតាមបណ្តាតំបន់ជាយក្រុងគឺពួកគាត់នៅតែបន្តដំណើរការសាងសង់ ខណៈដែលប្រជាពលរដ្ឋខ្មែរក្នុងស្រុកនៅតែមានតម្រូវការខ្ពស់។ ដូច្នេះតាមរយៈការសាងសង់ ការទិញលក់គម្រោងលំនៅដ្ឋានទាំងនេះក៏ជាចំណែកមួយក្នុងកៀងគរនូវប្រាក់ចំណូលដល់រដ្ឋាភិបាលតាមរយៈការបង់ពន្ធជាដើម។ ដោយឡែក ក្រៅពីនេះក៏មានការទិញលក់ដីធ្លីផ្សេងៗជាច្រើនទៀតដែលសុទ្ធតែជាការចូលរួមចំណែកនៅក្នុងជួយទ្រទ្រង់កំណើនសេដ្ឋកិច្ចជាតិកម្ពុជា” ៕

អានវិធីសាស្រ្តវិនិយោគអចលនទ្រព្យ និងការប្រើប្រាស់លុយរបស់លោក Robert Kiyosaki

ដោយ ៖ គង់ ម៉ាលីន

ភ្នំពេញៈ ប្រសិនបើអ្នកគ្មានចំណេះដឹងហិរញ្ញវត្ថុទេ អ្នកនឹងធ្វើការឱ្យលុយមួយជីវិត ហើយអ្នកនឹងក្លាយជាអ្នកមាន ដោយសារតែលុយធ្វើការឱ្យអ្នក។ សម្តីនេះស្រដៀងនឹងការនិយាយរបស់លោក Robert T.Kiyosaki អ្នកនិពន្ធ និងជាអ្នកជំនាញខាងផ្នែកហិរញ្ញវត្ថុ។

ប៉ុន្តែជាអកុសល មនុស្សភាគច្រើនមិនទាន់មានគំនិតថា តើគួរកាន់កាប់ ឬទុកដាក់លុយរបស់គេឱ្យបានគង់វង្សយ៉ាងដូចម្តេចនោះទេ។

លោក Robert T.Kiyosaki បានមានប្រសាសន៍ថា “ការដែលរកប្រាក់មួយលានដុល្លារគឺវាពិបាក តែអ្វីដែលពិបាកជាងនេះ គឺការដែលត្រូវយកលុយទាំងនេះធ្វើការឱ្យយើង”។លោកបន្តថា “បុគ្គលខ្លះដែលរស់នៅជុំវិញខ្ញុំ គឹរស់នៅដោយរំពឺងតែប្រាក់ខែមួយមុខ ដែលភាគច្រើនបានជំពាក់បំណុល ហើយបន្តការរស់នៅបែបនេះ ជារៀងរហួត”។

លោកបន្តថា វាគឺជាការល្អមួយ ដែលយើងអង្គុយគិតអំពីបញ្ហាហិរញ្ញវត្ថុ របស់យើង បង្កើតផែនការហិរញ្ញវត្ថុនាពេលអនាគត។ បន្ទាប់មកយើងរៀបផែនការសន្សំលុយទាំងនោះ។ ប្រសិនបើយើងមិនអាចធ្វើវាបាន យើងនឹងចំណាយលុយពីមួយខែទៅមួយខែ ហើយមិនបានសល់អ្វីទាំងអស់នៅពេលចុងខែ។

ជាមួយគ្នានេះ លោក លី កាស៊ីង (Li Ka Shing) បានពន្យល់អំពីរបៀបប្រើប្រាស់ប្រាក់ខែរបស់យើងត្រូវចែកប្រាក់ខែជា៥ចំណែកដូចជា

–៣០%ដើម្បីការចំណាយប្រចាំថ្ងៃ
–២០%សម្រាប់ចំណាយលើការពង្រឹងទំនាក់ទំនង
–១៥% សម្រាប់ការអប់រំ តាមរយៈការចូលសិក្ខាសាលា ទិញសៀវភៅ

–១០% សម្រាប់ការធ្វើដំណើរកម្សាន្តទៅក្រៅប្រទេស ដើម្បីពង្រីកចក្ខុវិស័យនៃការធ្វើជំនួញ។
–២៥% សម្រាប់ការវិនិយោគនាពេលអនាគត៕

តើតំបន់ផ្លូវវេងស្រេងចាប់ផ្តើមផ្លាស់ពីតំបន់រោងចក្រ ឧស្សាហកម្មមកជាតំបន់ពាណិជ្ជកម្ម និងលំនៅដ្ឋាន

ដោយៈ រ៉ាណេត

ភ្នំពេញៈ តំបន់ផ្លូវេងស្រេងនៃខណ្ឌមានជ័យ ដែលធ្លាប់តែជាតំបន់ប្រមូលផ្តុំទៅដោយរោងចក្រសហគ្រាស និងឃ្លាំងយ៉ាងច្រើនជាងគេ នៅក្នុងរាជធានីភ្នំពេញ បច្ចុប្បន្ននេះបានជំនួស ទៅដោយបណ្តុំលំនៅដ្ឋានបែបទាន់សម័យ និងមានតម្លៃសមរម្យចាប់ពីជាង៧ម៉ឺនដុល្លាររហូតដល់ប្រមាណ១៥ម៉ឺនដុល្លារ។

អគ្គនាយកក្រុមហ៊ុនភ្នាក់ងារអចលនទ្រព្យ Century21 Advance Property លោក ឡុង គឹមសួគ៌ បានមានប្រសាសន៍តាមទូរស័ព្ទកាលពីពេលថ្មីៗនេះថា បច្ចុប្បន្ននេះ តំបន់ដែលធ្លាប់តែជាបណ្តុំរោងចក្រ និងឃ្លាំងកាលពីប្រមាណ២ឆ្នាំមុននោះ បានក្លាយជាបណ្តុំលំនៅដ្ឋានបែបទំនើប និងទាន់សម័យស្អេកស្កះ រួមមានទាំងប្រភេទបុរីធំៗ និងគម្រោងអភិវឌ្ឍន៍លំនៅដ្ឋានលក្ខណៈជាបណ្តុំ។

លោកបន្តថា “សកម្មភាពអភិវឌ្ឍន៍សំណង់លំនៅដ្ឋាន នៅក្នុងតំបន់នេះនៅតែភាពមមាញឹកមិនចាញ់តំបន់ភាគខាងត្បូង និងខាងជើងក្រុងនោះឡើយ ដោយហេតុថាតំបន់នេះមានសក្ដានុពល និងមានអំណោយផលដល់ការរស់នៅ ក៏ដូចជាការប្រកបអាជីវកម្មលក្ខណៈគ្រួសារផងដែរ”។

លោកឡុង គឹមសួរបានបញ្ជាក់ថា បន្ថែមពីគម្រោងដែលមានស្រាប់ និងកំពុងអនុវត្តនូវសកម្មភាពសាងសង់នាពេលបច្ចុប្បន្ន សម្រាប់ថ្ងៃខាងមុខនេះ គម្រោងអភិវឌ្ឍន៍ថ្មីជាច្រើនទៀតនឹងបង្ហញរូបរាង ដោយសារតែក្រៅពីមានសក្ដានុពល តម្លៃដីនៅទីនេះនៅមានកម្រិត ដែលអនុគ្រោះដល់ការវិនិយោគផ្នែកលំនៅដ្ឋាន។

ជាមួយនឹងសកម្មភាពដ៏មមាញឹក នៃការសាងសង់សំណង់លំនៅដ្ឋាន រាជរដ្ឋាភិបាលបានយកចិត្តទុកដាក់ ក្នុងស្ថាបនាហេដ្ឋារចនាសម្ព័ន្ធនានាជាច្រើន រួមមាន ដូចជាផ្លូវក្រវ៉ាត់ទី៣ដែលមានទំហំ ផ្លូវក្នុងតំបន់ ក៏ដូចជាបណ្តាញអគ្គិសនីផងដែរ ដែលជាការឆ្លើយតប និងសម្របសម្រួលដល់ការរស់នៅរបស់ប្រជាជន ដែលកំពុងតែមានកំណើន។

លោក ឡុង គឹមសួគ៌ បានមានប្រសាសន៍បញ្ជាក់ថា “ជាធម្មតា នៅពេលដែលមានគម្រោងអភិវឌ្ឍន៍ក្នុងវិស័យសំណង់ ជាពិសេសបណ្តាញហេដ្ឋារចនាសម្ព័ន្ធនានា មានភាពរីកចម្រើន វានឹងជំរុញឱ្យមានមនុស្សចូលទៅរស់នៅច្រើន ដែលជាផ្នែកមួយយ៉ាងសំខាន់ក្នុងការជំរុញតម្លៃដី ក៏ដូចជាតម្លៃអចលនទ្រព្យមានការកើនឡើងជាបន្តបន្ទាប់”។

ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសន៍ថា ការរីកចម្រើនសេដ្ឋកិច្ចបានធ្វើឲ្យរាជធានីភ្នំពេញ ផ្លាស់ប្តូរគួរឲ្យកត់សំគាល់ក្នុងរយៈពេលពីរទសវត្សរ៍ចុងក្រោយនេះ ដែលនេះជាការផ្លាស់ប្តូរជាធម្មតា នៅតាមបណ្តាប្រទេសកំពុងអភិវឌ្ឈន៍នានា។

លោកបន្តថា ពីមុនរដ្ឋាភិបាលបានប្រើវិធីសាស្រ្តអភិវឌ្ឍន៍សេដ្ឋកិច្ច ដោយយករោងចក្រ សហគ្រាសមកដាក់ក្នុងទីក្រុង ដើម្បីឲ្យមនុស្សចូលមករស់នៅទីក្រុងច្រើន ធ្វើឲ្យសេដ្ឋកិច្ចទីក្រុងមានភាពរសរវើក ប៉ុន្តែពេលនេះបរិបទបានផ្លាស់ប្តូរ ដោយសារការរីកចម្រើនទីក្រុង ដែលធ្វើឲ្យរដ្ឋាភិបាលគិតគូរជាថ្មី ដោយរុញរោងចក្រ សហគ្រាសទៅកាន់តាមបណ្តាខេត្ត ដែលនៅកៀករាជធានីភ្នំពេញ។

លោកយិន លាងគង់បានបន្តថា និន្នាការពិភពលោកក៏ដូចជាកម្ពុជា កំពុងផ្លាស់ប្តូរ ដោយសារការរីកចម្រើនសេដ្ឋកិច្ច នគរូបនីយកម្ម ដែលជម្រុញឲ្យមានការវិនិយោគលើលំនៅដ្ឋាន និងមជ្ឈមណ្ឌលពាណិជ្ជកម្មកាន់តែច្រើន ដែលអាចទាញបាននូវតម្លៃសេដ្ឋកិច្ចខ្ពស់ជាងមុន និងប្រជាជនបានទទួលផលប្រយោជន៍ច្រើនជាងមុន៕

តម្លៃលំនៅឋានចន្លោះ៤ទៅ៨ម៉ឺនដុល្លារនៅតែមានភាពពេញនិយមខ្លាំងក្នុងទីផ្សារ

ដោយ ៖ ម៉ាណេត

ភ្នំពេញៈ អ្នកអភិវឌ្ឍន៍លំនៅឋាននៅក្នុងប្រទេសកម្ពុជា បានលើកឡើងថា នៅក្នុងប្រទេសកម្ពុជានាពេលបច្ចុប្បន្ននេះ តម្លៃលំនៅឋានចន្លោះពី៤ម៉ឺន ទៅ៨ ម៉ឺនដុល្លារអាមេរិកំពុងពេញនិយមខ្លាំង ពីអតិថិនដែលភាគច្រើននៅតាមជាយក្រុងរាជធានីភ្នំពេញ។

អគ្គនាយកក្រុមអភិវឌ្ឍន៍លំនៅឋាន Premier Groupលោកម៉ាន់ ច័ន្ទឌីបានប្រាប់គេហទំព័រProperyarea.asia កាលពីពេលថ្មីៗនេះថា ក្នុងចំណោមគម្រោងអភិវឌ្ឍន៍លំនៅឋានទាំងអស់ នៅក្នុងប្រទេសកម្ពុជា នាពេលបច្ចុប្បន្ននេះ មានគម្រោងលំនៅឋានតម្លៃ ចន្លោះពី៤ ម៉ឺនទៅ៨ម៉ឺនដុល្លារអាមេរិកប៉ុណ្ណោះ ដែលត្រូវបានលក់ចេញនិងទទួលបានការចាប់អារមុ្មណ៍ពីពលរដ្ឋកម្ពុជា។

លោកពន្យល់ថា “កត្តាដែលជំរុញមានការបញ្ជាទិញពីអតិថិជន ដោយសារពលរដ្ឋកម្ពុជាមានចំណូលមធ្យមកើនឡើង ហើយលក្ខខណ្ឌនៃការទិញ មានភាពងាយស្រួល តាមយៈការបង់រំលោះ តែសម្រាប់តម្លៃចាប់ពី១០ម៉ឺន ទៅ២០ម៉ឺនឡើង ហាក់មិនសូវការពេញនិយមនោះទេ”។

លោកបន្ថែមថា តម្លៃលំនៅឋានដែលមានតម្លៃខ្ពស់ មានតែនៅក្នុងទីក្រុង ហើយពលរដ្ឋយើង អ្នកដែលមានចំណូលធម្យម គឺពួកគាត់មិនមានាលទ្ធភាពទិញនោះទេ។លោកបន្តថា “ដូច្នេះពួកគាត់បានទៅទិញលំនៅឋាន ដែលមានតម្លៃសមរម្យនៅតាមបណ្តាជាយក្រុងភ្នំពេញ។ម្យ៉ាងអ្នកដែលមានចំណូលធម្យម នៅក្នុងប្រទេសកម្ពុជា មានច្រើនជាងអ្នកដែលមានចំណូលខ្ពស់”។

លោកបន្ថែមថា គម្រោងអភិវឌ្ឍន៍លំនៅឋានភាគច្រើន ដែលមានតម្លៃធម្យម បានកើនឡើងនៅតាមជាយក្រុងភាគខាងលិច និងភាគខាងជើងរាជធានីភ្នំពេញ។

ជាមួយគ្នានេះ ប្រធានសមាគមភ្នាក់ងារ និងវាយតម្លៃអចលវត្ថុកម្ពុជាលលោកច្រឹក សុខនីមបានឱ្យដឹងដែរថា បើទោះកម្ពុជាប្រឈមទៅនឹងវិបត្តិសេដ្ឋកិច្ច ដែលបង្កឡើងដោយជំងឺកូវីដ១៩ តែសម្រាប់ទីផ្សារលំនៅឋានតម្លៃសមរម្យ នៅតែមានសកម្មភាពទិញ-លក់ជាធម្មតា ។

លោកបន្តថា គម្រោងលំនៅឋានដែលមានតម្លៃចាប់ពី៤ម៉ឺន ទៅ១០ម៉ឺនដុល្លារនៅតែមានទីផ្សារខ្ពស់ សម្រាប់អតិថិជននៅក្នុងស្រុក បើធៀបទៅនឹងគម្រោងលំនៅឋានតម្លៃខ្ពស់ តែយ៉ាងណាលោកថា វិស័យអចលនទ្រព្យគ្រប់ប្រភេទ ទាំងតម្លៃធម្យម និងកម្រិតខ្ពស់នឹងមានទីផ្សារឡើងវិញ បន្ទាប់ពីជំងឺកូវីដ១៩ត្រូវបានគ្រប់គ្រង និងមានចលនទីផ្សារពីក្រៅប្រទេសចូលមកកម្ពុជាកាន់តែច្រើន៕

1...2,0812,0822,083...3,260 Page 2,082 of 3,260