លោក​ឡោ វិចិត្រ បង្ហើប​ពី​វិធីសាស្ត្រ​ក្នុង​ការលក់​អចលនទ្រព្យ​ក្នុងសម័យ​កូ​វីដ​ដល់​ភ្នាក់ងារ​ថ្មី​កំពុង​ជួប​ឧបសគ្គ

ដោយៈ រ៉ា​ណេ​ត

ភ្នំពេញៈ ស្ថិតនៅក្នុង​បរិបទ​នៃ​សម័យកាល​កូ​វីដ ដែល​កំពុង​រាតត្បាត​គួរឱ្យ​ព្រួយបារម្ភ​នៅពេល​បច្ចុប្បន្ន បាន​ជះឥទ្ធិពល​អាក្រក់​ទៅលើ​ស្ទើរ​គ្រប់​វិស័យ ជាពិសេស​ទីផ្សារ​អចលនទ្រព្យ ដែល​កំពុងមាន​ភាពស្ងប់ស្ងាត់ ខណៈដែល​សកម្មភាពរ​បស់​មនុស្ស​ពាក់ព័ន្ធ​នៅក្នុង​វិស័យនេះ​ត្រូវបាន​កាត់បន្ថយ។

 

អនុប្រធាន​សមាគម​អចលនទ្រព្យ​សកល​ប្រចាំរាជធានី​ភ្នំពេញ លោក​ឡោ វិចិត្រ ដែលជា​អ្នកមាន​ជំនាញ និង​បទពិសោធន៍ នៅក្នុង​ការជំរុញ​ការលក់​អចលនទ្រព្យ​បាន​ចែករំលែក​ថា មិន​ថា​ទោះជា​ស្ថិតនៅក្នុង​កាលៈទេសៈ​ណានោះទេ សម្រាប់​អ្នកលក់​ដែល​ឆ្លាត​វៃ​នៅតែ​អាច​អាច​បាន ប្រៀប​ដូច​អ្នកជំនួញ​ដែល​ពូកែ ទោះ​ស្ថិតក្នុង​ស្ថានភាព​លំបាក សេដ្ឋកិច្ច​ធ្លាក់ចុះ ក៏​គេ​នៅតែ​អាច​រកប្រាក់​ចំណេញ​បាន។

លោក​បន្តថា “យើង​ទទួលស្គាល់ថា នៅក្នុង​ស្ថានភាព​នាពេល​បច្ចុប្បន្ន​ពិតជា​បានធ្វើឱ្យ​ប៉ះពាល់​ដល់ទី​ផ្សា​រ​អចលនទ្រព្យ​ជាខ្លាំង” ។ លោក​បន្តថា “មាន​បងប្អូន​ខ្លះ​ដែលជា​ភ្នាក់ងារ​លក់​លើកឡើងថា ដោយសារតែ​មនុស្ស​ភាគ​ច្រើន មិនសូវ​ហ៊ាន​ចេញ​ដើរ​ក្រៅ​ច្រើន ទើប​ពិបាក​ណាត់​ភ្ញៀវ​ទៅ​មើល​គម្រោង បើទោះជា​ដឹងថា​ភ្ញៀវ​មាន​ចំណាប់អារម្មណ៍​ចង់​ទិញ​ដី ក៏​ភ្ញៀវ​មិនទាន់​ទៅ​មើល​ដល់ទី​តាំង ក៏ដូចជា​អ្នកលក់​ខុន​ដូ ក៏​ពិបាក​ក្នុងការ​ណាត់​ភ្ញៀវ​ដូចគ្នា” ។

លោក​ឡោ វិចិត្រ​បាន​បន្តថា ដើម្បីឱ្យ​យើង​អាច​ទទួលបាន​លទ្ធផល​ល្អប្រសើរ​ពី​ការលក់ ដំបូង​ភ្នាក់ងារ​ដែលជា​អ្នកលក់ គប្បី​ស្វែងយល់​ពី​ប្រភេទ​អចលនទ្រព្យ ដែល​ខ្លួន​ទទួល​លក់​ឱ្យបាន​ច្បា​ស់សិន បន្ទាប់មក​ត្រូវ​ស្វែងរក​ដៃគូ ដែលមាន​បទពិសោធន៍​ច្បាស់ មានការ​យល់ដឹង​ពី​ទីផ្សារ​អចលនទ្រព្យ ដើម្បី​ជួយ​ជ្រោមជ្រែង និង​ជា​ជំនួយ​អាចឈាន​ទៅដល់​ការសម្រេច​ផែនការ​លក់​របស់ខ្លួន។

ជាមួយនឹង​ការលើកឡើង​ខាងលើនេះ លោក​ឡោ វិចិត្រ ក៏បាន​បញ្ជាក់​ផងដែរ​ថា សម្រាប់​អ្នក​ដែលមាន​បទពិសោធន៍ លើ​ការលក់​អចលនទ្រព្យ អាច​មិនសូវមាន​បញ្ហា​ចោទ​នោះទេ ប៉ុន្តែ​សម្រាប់​ភ្នាក់ងារ ដែល​ទើប​ចូលប្រឡូក​ក្នុង​វិស័យនេះ​ថ្មីថ្មោង គប្បី​មានការ​ស្វែងយល់​បន្ថែម​ពាក់ព័ន្ធ​ទៅនឹង​របៀប និង​វិធីសាស្ត្រ​ជំរុញ​ការលក់ តាមរយៈ​ការអាន​សៀវភៅ​ចំណេះដឹង​ផ្នែក​អចលនទ្រព្យ ឬ​អាច​តាមរយៈ​ការចុះឈ្មោះ ចូលរៀន​នៅក្នុង​វគ្គ​បណ្តុះបណ្តាលផ្សេងៗជាច្រើន។

ដោយឡែក​ពាក់ព័ន្ធ​ទៅនឹង​ការលក់​អចលនទ្រព្យ នៅក្នុង​សម័យ​កូ​វីដ​នៅពេលនេះ លោក​ឡោ វិចិត្រ​បាន​មានប្រសាសន៍ថា ពេលនេះ​គឺជា​ឱកាស​មួយ​ដ៏​ល្អ ក្នុងការ​ស្វែងយល់​បន្ថែ​ម​ពី​ចំណេះដឹង​ពាក់ព័ន្ធ ជាពិសេស​ការចេះ​ប្រើ​បច្ចេកវិទ្យា​ជា​ជំនួញ ក្នុង​ការលក់។ លោក​បន្តថា មិន​ថា​ពេលនេះ ឬ​ពេល​បន្តិចទៀត​នោះទេ ការលក់​អចលនទ្រព្យ​អាចធ្វើ​ឡើង តាមរយៈ​បច្ចេកវិទ្យា​បែប​ទំនើប​ទាំងនេះ​បាន ដោយ​មិនចាំបាច់​អញ្ជើញ​ភ្ញៀវ​មកដល់​ទីតាំង​គម្រោង​ផ្ទាល់​ទៀត​នោះទេ។

ដូច្នេះ​បងប្អូន ត្រូវតែ​ធ្វើការ​ស្វែងយល់​ និងបង្កើន​ចំណេះដឹង​ផ្នែក​នេះ ជាក់ស្តែង​បច្ចុប្បន្ន​អ្នកលក់​ដែល​ជោគជ័យ ក្នុងសម័យ​កាល​នេះ​មួយចំនួន ក៏ត្រូវ​បាន​ជ្រើស​យក​ប្រព័ន្ធ​បច្ចេក​វិទ្យា​ធ្វើជា​ជំនួញ​នៃ​ការលក់​ដែរ៕

រដ្ឋាភិបាលគ្រោងបង្កើតមជ្ឈមណ្ឌលពាណិជ្ជកម្មកម្ពុជា ចិនបន្ថែមដើម្បីពង្រឹកទំំហំពាណិជ្ជកម្ម និងទាក់ទាញវិនិយោគ

អត្ថបទៈ រតនៈ

ភ្នំពេញៈ ខណៈដែលទីតាំងមជ្ឈមណ្ឌលពាណិជ្ជកម្ម កម្ពុជា ចិន នៅប្រទេសចិនមានជាង១០កន្លែងហើយនោះ កម្ពុជានៅតែមានគម្រោងបង្កើតបន្ថែម ដើម្បីបង្រីកទំហំពាណិជ្ជកម្មរវាងប្រទេសទាំងពីរ។

ក្នុងកិច្ចប្រជុំពិនិត្យលទ្ធផលការងារនៅឆ្នាំ ២០២០ និងកំណត់ទិសដៅសម្រាប់ឆ្នាំ ២០២១ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មមានប្រសាសន៍ថា គម្រោងនេះគឺជាការធ្វើសមាហរណកម្ម ទីផ្សារសម្រាប់ផលិតផលរបស់ប្រទេសកម្ពុជា ទៅក្រៅប្រទេសជាពិសេសគឺប្រទេសចិន។

ចំនួនមជ្ឈមណ្ឌលពាណិជ្ជកម្មកម្ពុជា នៅប្រទេសចិនកើនដល់១១ទីតាំង ខណៈដែលបច្ចុប្បន្ន ទីតាំងចំនួន ៦ កំពុងដំណើរការ ដែលមានដូចជា  មជ្ឍមណ្ឌលពាណិជ្ជកម្មកម្ពុជាប្រចាំនៅទីក្រុងក្វាងចូវ មជ្ឍមណ្ឌលពាណិជ្ជកម្មកម្ពុជាប្រចាំ ទីក្រុងហាយនីង មជ្ឍមណ្ឌលពាណិជ្ជកម្មកម្ពុជា ប្រចាំនៅទីក្រុងស៊ីអាន មជ្ឍមណ្ឌលពាណិជ្ជកម្មកម្ពុជាប្រចាំនៅទីក្រុងហុងកុង។

មជ្ឈមណ្ឌលពាណិជ្ជកម្មទាំងអស់នោះ ជាទីតាំងសម្រាប់ដាក់តាំងបង្ហាញ និងផ្សព្វ​ផ្សាយរកទីផ្សារ សម្រាប់ផលិតផលសក្តានុពលកម្ពុជា ដូចជា អង្ករ ម្រេច ស្ករត្នោត អំបិល កាហ្វេ ទឹកផ្លែឈើ ស្រាបៀរ គ្រាប់ស្វាយចន្ទី ដំណាប់ផ្លែឈើ ក្រមា វត្ថុអនុស្សាវរីយ៍ និងសៀវភៅផ្សព្វផ្សាយអំពីវិនិយោគ និងទេសចរណ៍។

រដ្ឋាភិបាលកម្ពុជា បានសម្រេចជោគជ័យ ក្នុងការចរចាកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសចិន ហើយកម្ពុជារំពឹងថា ការនាំចេញពីកម្ពុជាទៅចិន នឹងមានការកើនឡើងប្រមាណ ២៥% បន្ទាប់ពីកិច្ចព្រមព្រៀងនេះចុះហត្ថលេខារួចរាល់។

ក្រសួងពាណិជ្ជកម្មកម្ពុជាបានអះអាងថា ទំនិញកម្ពុជាជាង៣០០មុខអាចនាំទៅចិន ដោយមិនគិតពន្ធនៅពេលកិច្ចព្រមព្រៀងពាណិជ្ជកម្មសេរីទ្វេ ភាគីកម្ពុជាចិន(FTA)​ចូលជាធរមាននៅដើមឆ្នាំ២០២១។ នៅក្នុងចំណោមមុខទំនិញជាង៣០០មុខនេះ គឺផលិតផលកសិកម្ម៩៥ភាគរយ ត្រូវរួចពន្ធសម្រាប់ការនាំចេញទៅចិន។ ប៉ុន្តែផលិតផលគ្រឿងចក្រ និងយានយន្តផ្សេងៗវិញ ចិននៅតែបន្តយកពន្ធនាំចូលដដែល៕

ខុនដូតែលទស្សនទាននៃការអភិវឌ្ឍន៍ថ្មីនៅកម្ពុជា និងចាប់ផ្តើមពេញនិយមឬ?

ដោយៈ រ៉ាណេត

ភ្នំពេញៈ ខុនដូតែល គឺជាផ្នែកមួយនៅក្នុងវិស័យអចលនទ្រព្យ សម្រាប់ការស្នាក់នៅ ដែលមានលក្ខណៈស្រដៀងគ្នាទៅនឹងសេវាសណ្ឋាគារ ប៉ុន្តែស្ថិតនៅក្នុងអគារខុនដូ។ ទីផ្សារមួយនេះ សម្រាប់កម្ពុជាអាចនិយាយបានថា វាជាប្រភេទផលិតផលថ្មីក្នុងវិស័យអចលនទ្រព្យ ខណៈដែលនៅតាមបណ្តាប្រទេសជិតខាងមួយចំនួន ដូចជាប្រទេសថៃ វៀតណាម និងសិង្ហបុរីបានដើរមុនមួយជំហានរួចទៅហើយ។

នាយកក្រុមហ៊ុនភ្នាក់ងារអចលនទ្រព្យ ERA Cambodia លោកខន គង្គា ដែលកំពុងកាន់គម្រោងខុនដូជាច្រើន នៅក្នុងដៃបានមានប្រសាសន៍ប្រាប់នៅល្ងាចថ្ងៃទី៧ ខែមេសា ឆ្នាំ២០២១ថា ខុនដូតែល ជាប្រភេទផលិតផលថ្មី នៅក្នុងវិស័យអចលនទ្រព្យ ដែលមានលក្ខណៈស្រដៀងគ្នា ទៅនឹងបន្ទប់សណ្ឋាគារ ប៉ុន្តែស្ថិតនៅក្នុងអគារខុនដូដែលមានម្ចាស់ច្រើន។

លោកបន្តថា “ទីផ្សារមួយនេះនៅតាមបណ្តាប្រទេសជិតខាង បានដើររួចទៅហើយ ដោយឡែកសម្រាប់តែកម្ពុជា អាចនិយាយបានថាជាទីផ្សារថ្មីមួយ ហើយទើបតែមានមួយរយៈពេលចុងក្រោយនេះតែប៉ុណ្ណោះ”។ លោកបន្តថា “បច្ចុប្បន្នមានអ្នកវិនិយោគក្នុងស្រុកមួយចំនួន ចាប់ផ្តើមចាប់អារម្មណ៍ នឹងការទិញចំណែកខុនដូយកជាខុនដូតែល ជាជាន់តែម្ដង”។

លោកបន្តថា Condotel គេធ្វើជាបន្ទប់តូចល្មម សម្រាប់ទុកវិនិយោគបន្តដោយការជួល ដែលមានលក្ខណៈស្រដៀងគ្នាទៅនឹងសណ្ឋាគារដែរ។ ការវិនិយោគបែបនេះពួកគាត់អាចមានឱកាសចំណេញច្រើន ព្រោះបច្ចុប្បន្នទីផ្សារមួយនេះ នៅមិនទាន់ទូលាយនៅឡើយនោះទេ ហើយអ្វីដែលសំខាន់គឺពួកគាត់ អាចមានជម្រើសច្រើនក្នុងការទិញដែលទទួលបានតម្លៃល្អ ឬទាបជាងទីផ្សារ ខណៈដែលពេលនេះ ក្រុមហ៊ុនអភិវឌ្ឍន៍បានផ្តល់នូវលក្ខខណ្ឌងាយស្រួលជាច្រើនដល់ពួក ដែលវាសុទ្ធតែជាឱកាសចំណេញលើការវិនិយោគ”។

នាយកក្រុមហ៊ុនអចលនទ្រព្យ TOWN CITY លោកវន ចាន់ថនបានមានប្រសាសន៍ថា ការចាប់ផ្តើមវិនិយោគនៅក្នុងទីផ្សារខុនដូតែលនៅពេលនេះ វាអាចជាឱកា​សល្អ ព្រោះតែជាទីផ្សារថ្មី និងអាចមានការចាប់អារម្មណ៍។

លោកបន្តថា “នៅប្រទេសគេដូចជាប្រទេសថៃ សិង្ហបុរី ជាដើមគឺមានការពេញនិយម ដោយសារតែវាមានតម្លៃថោក ជាងការទិញខុនដូស្ទើរពាក់កណ្តាល”។ លោកបន្តថា “ខុនដូតែលវាមានលក្ខណៈស្រដៀងគ្នា ទៅនឹងបន្ទប់សណ្ឋាគារដែរ វាគ្មានបន្ទប់បាយ គ្មានបន្ទប់ទទួលភ្ញៀវ ដូចជា ខុនដូដែលអាចរស់នៅបែបជាលក្ខណៈគ្រួសារនោះទេ”។

លោកចាន់ថនបានបន្តថា “វាអាចជាជម្រើសល្អទាំងការទិញសម្រាប់រស់នៅ ល្អទាំងសម្រាប់អ្នកទិញទុកសម្រាប់ជួល។ ព្រោះវាមានទំហំតូចតម្លៃថោក មិនដូចខុនដូមានទំហំធំតម្លៃថ្លៃនោះទេ”។

ទីផ្សារបែបនេះភាគច្រើន មានតម្រូវការពីសំណាក់ភ្ញៀវបរទេស ដែលមិនមានគ្រួសាររស់នៅជាមួយ ហើយអាចជួលបន្តក្រោយពេលពួកចាកចេញទៅប្រទេសកំណើត ក្នុងរយៈពេលវែងណាមួយ ដោយប្រគល់ឱ្យអ្នកគ្រប់គ្រងអគាររកភ្ញៀវថ្មី ជំនួសពួកគេបាន ហើយពេលវិលត្រឡប់មកវិញ ក៏អាចស្នាក់នៅក្នុងនាមជាម្ចាសកម្មសិទ្ធិដូចដើម គ្រាន់តែត្រូវការជូនដំណឹងមុនមកកាន់អ្នកគ្រប់គ្រងអគារតែប៉ុណ្ណោះ៕

មហាសេដ្ឋីអចលនទ្រព្យចិនឈរនៅលំដាប់កំពូល ខណៈពេលទ្រព្យសម្បត្តិសរុបកើនឡើង១៥១ពាន់ពាន់លានដុល្លារ

ដោយៈសុខុម

អាមេរិក:  យោងតាមការដាក់ចំណាត់ថ្នាក់ មហាសេដ្ឋីពាន់លានដុល្លាររបស់ទស្សនាវដ្ដី Forbes របស់សហរដ្ឋអាមេរិក ប្រចាំឆ្នាំ២០២១ បង្ហាញថា ទ្រព្យសម្បត្តិរបស់មហាសេដ្ឋីអចលនទ្រព្យទូទាំងពិភពលោក បានកើនឡើង១៥១ពាន់លានដុល្លារក្នុងឆ្នាំ២០២០។

ក្នុងនោះទ្រព្យសម្បត្តិរបស់មហាសេដ្ឋីនៅអាស៊ី កើនឡើងច្រើនជាងគេ ពិសេសមហាសេដ្ឋីអចលនទ្រព្យពាន់លានដុល្លារទាំង២១៥រូប មានទ្រព្យសម្បត្តិរួមបញ្ចូលគ្នាជាង៨០០ពាន់លានដុល្លារ ហើយមានតែ៣០រូបប៉ុណ្ណោះ ដែលទ្រព្យសម្បត្តិរបស់ខ្លួនបានធ្លាក់ចុះក្នុងឆ្នាំកន្លងទៅ។

មហាសេដ្ឋីអចលនទ្រព្យមានទ្រព្យ ដែលមានទ្រព្យសម្បត្តិច្រើនបំផុតចំនួន៦រូបជាពលរដ្ឋចិនដីគោក ឬចិនហុងកុង ដោយក្នុងនោះរួមមានទាំងលោក Lee Shau-kee វ័យ៩៣ឆ្នាំមកពីក្រុងហុងកុង ដែលជាមហាសេដ្ឋីអចលនទ្រព្យ មានជាងគេបំផុតនៅលើពិភពលោក ជាមួយទ្រព្យសម្បត្តិ៣១,៧ពាន់លានដុល្លារផងដែរ។

លោក Lee Shau-kee ជាម្ចាស់ហ៊ុនអភិវឌ្ឍន៍ Henderson Land Development ដែលទទួលសាងសង់គម្រោងលំនៅដ្ឋាន និងគម្រោងពាណិជ្ជកម្មនានាដូចជាអគារមជ្ឈ​មណ្ឌលហិរញ្ញវត្ថុពិភពលោក (World Financial Center) នៅក្រុងប៉េកាំង និងអគារមជ្ឈមណ្ឌលហិរញ្ញវត្ថុអន្តរជាតិ (International Finance Centre) នៅក្រុងហុងកុង ជាដើម។

ទ្រព្យសម្បត្តិរបស់មហាសេដ្ឋីអចលនទ្រព្យចិនដីគោក លោក Zuo Hui បានកើនឡើងច្រើនបំផុតកាលពីឆ្នាំមុន ក្នុងចំនួន១៣,៣ពាន់លានដុល្លារ។ គាត់មានទ្រព្យសម្បត្តិសរុប១៥,៥ពាន់លានដុល្លារគិតត្រឹមថ្ងៃទី៦ ខែមីនា នៅពេលការចំណាត់ថ្នាក់ប្រចាំឆ្នាំត្រូវបានបញ្ចប់។

លោក Zuo Hui ជាប្រធានក្រុមហ៊ុន KE Holdings ដែលជាក្រុមហ៊ុនមេរបស់ក្រុមហ៊ុនបុត្រសម្ព័ន្ធ Lianjia ដែលលោកបានបង្កើតឡើងក្នុងឆ្នាំ២០០១ ហើយលោកបានបង្កើតក្រុមហ៊ុនកម្រៃជើងសារ អចលនទ្រព្យធំជាងគេបំផុតនៅប្រទេសចិន ដោយធ្វើប្រតិ​បត្តិការនៅក្នុងទីក្រុងចំនួន២៨ និងមានភ្នាក់ងារកម្រៃជើងសារអចលនទ្រព្យ (អ្នកគួកជេ) ជិត១៥០.០០០នាក់។

លោក Zuo Hui គឺឈានមុខគេក្នុងចំណោមមហាសេដ្ឋី អចលនទ្រព្យនៅអាស៊ី ដែលដណ្ដើមបានចំណាត់ថ្នាក់លេខ១៥ នៃចំណាត់ថ្នាក់កំពូលទាំង២០ នៅក្នុងការដាក់ចំណាត់ថ្នាក់របស់ទស្សនាវដ្ដី Forbes។

លោក Donald Bren ប្រធានក្រុមហ៊ុន Irvine Co. ស្ថិតក្នុងចំណោមមហាសេដ្ឋីអចលនទ្រព្យអាមេរិក២រូប ដែលជាប់ក្នុងចំណោមមហាសេដ្ឋី មានទ្រព្យច្រើនបំផុតទាំង២០ក្នុងវិស័យអចលនទ្រព្យ។ ទ្រព្យសម្បត្តិ១៥,៣ពាន់លានដុល្លាររបស់លោក Donald Bren បានខាតបង់២០០លានដុល្លារក្នុងឆ្នាំ២០២០ ដោយសារការឆ្លងរាតត្បាតវីរុសកូវីដ-១៩។

ទ្រព្យសម្បត្តិរបស់មហាសេដ្ឋីអាមេរិក មួយរូបទៀតគឺលោកSun Hongbin ដែលបានបង្កើតក្រុមហ៊ុនអភិវឌ្ឍន៍ចិន Sunac China Holdings បានកើនឡើង១០០លានដុល្លារដល់៩,៣ពាន់លានដុល្លារ។

មហាសេដ្ឋីអចលនទ្រព្យអាល្លឺម៉ង់ Alexander Otto គឺជាមហាសេដ្ឋីលំដាប់កំពូលរបស់អឺរ៉ុប ដែលជាប់ចំណាត់ថ្នាក់លេខ២០។ ទ្រព្យសម្បត្តិរបស់គាត់បានកើនឡើងជិត៧ពាន់លានដុល្លារកាលពីឆ្នាំមុន៕

ក្រសួងកសិកម្មស្នើដៃគូអភិវឌ្ឍន៍អនុម័តគម្រោងចំនួន២មានទំហំទឹកប្រាក់៨០លានអឺរ៉ូ ដើម្បីលើកកំពស់ជីវភាពប្រជាពលរដ្ឋ

ដោយៈ ម៉ាណេត

ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ ជំរុញឱ្យទីភ្នាក់ងារបារាំងសម្រាប់ការអភិវឌ្ឍន៍ (AFD) ធ្វើការអនុម័តឲ្យបានឆាប់នូវគម្រោងពីរ ដែលកំពុងស្ថិតក្នុងធ្វើការវាយតម្លៃ ដើម្បីផ្តល់ហិរញ្ញប្បទាននៅក្នុងឆ្នាំ២០២១ និងរជួយទ្រទ្រង់សេដ្ឋកិច្ចគ្រួសារ ឱកាសការងារ និងសន្តិសុខស្បៀង។

ការជំរុញនេះត្រូវបានធ្វើឡើងនៅព្រឹកថ្ងៃទី៧ ខែមេសា ឆ្នាំ២០២១ ក្នុងជំនួបប្រជុំមួយរវាងលោកវេង សាខុនរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងលោកស្រី Ophelie Bourhis នាយិកាទីភ្នាក់ងារ AFD ប្រចាំក្រកម្ពុជា។

យោងតាមក្រសួងកសិកម្មបានឱ្យដឹងថា មានគម្រោងពីរទៀត កំពុងធ្វើការវាយតម្លៃ ដើម្បីផ្តល់ហិរញ្ញប្បទាននៅក្នុងឆ្នាំ២០២១ នេះ ដែលទីមួយ ជាគម្រោងកម្មវិធីស្តីពី “ការអភិវឌ្ឍន៍បច្ចេកវិទ្យាកសិកម្មដោយពឹងលើទឹកភ្លៀង រួមមាន កៅស៊ូ ដំណាំចំណីសត្វ និងបន្លែ” ដែលភាគី AFD និងចូលរួមផ្តល់ហិរញ្ញប្បទានចំនួន៥០លានអ៊ឺរ៉ូ និងគម្រោងកម្មវិធីទីពីរ ដែលមានឈ្មោះថា “ការគ្រប់គ្រងជលផលនៅតំបន់ឆ្នេ និងសមុទ្រ ប្រកបដោយនិរន្តភាព” ដែលត្រូវចូលរួមសហហិរញ្ញប្បទាន ជាមួយធនាគារអភិវឌ្ឍន៍អាស៊ី ចំនួន៣០លានអ៊ឺរ៉ូ។

ក្រសួងបានឱ្យដឹងទៀតថា ក្នុងកិច្ចពិភាក្សានេះ លោករដ្ឋមន្ត្រីបានគាំទ្រ និងជំរុញឲ្យ AFD ធ្វើការអនុម័តឲ្យបានឆាប់ ដែលអាចធ្វើទៅបានដើម្បីអនុវត្តន៍ ឲ្យស្របតាមស្ថានភាពបច្ចុប្បន្ននៃផលិតកម្មសត្វ និងបន្លែកំពុងតែចូលរួមយ៉ាងសកម្ម ក្នុងការជួយទ្រទ្រង់សេដ្ឋកិច្ចគ្រួសារ ឱកាសការងារ និងសន្តិសុខស្បៀង។

លោកស្រី Ophelie Bourhis បានឱ្យដឹងថា ដោយឡែកគម្រោងពីរទៀតនេះ មួយគ្រោងនឹងអនុវត្តក្នុងឆ្នាំនេះ និងមួយទៀតកំពុងពិនិត្យ និងវាយតម្លៃ ហើយអាចធ្វើការអនុម័តក្នុងឆ្នាំ២០២១ នេះដែរ។

លោកស្រីសង្ឃឹម និងជឿជាក់ថា គម្រោងនឹងចូលរួមចំណែងធ្វើឲ្យខ្សែច្រវាក់តម្លៃផលិតកម្មកសិកម្មមានលក្ខណល្អប្រសើរ រួមទាំងងផលិតកម្មសត្វ និងបន្លែផងដែរ ដែលនឹងចូលរួមលើកកម្ពស់តម្លៃ បន្ថែមទីផ្សារ និងការប្រកួតប្រជែងទាំងបរិមាណ គុណភាព និងសុវត្ថិភាព តាមរយ:ការអនុវត្តបច្ចេកវិទ្យាកសិកម្មទំនើប សមស្រប ធន់នឹងការប្រែប្រួ​លអាកាសធាតុ បរិយាប័ន្ន និងនវានុវត្តន៍៕

ក្រសួងទេសចរណ៍ស្នើឲ្យមន្ទីរ រដ្ឋបាលរាជធានី ខេត្តបិទរមណីយដ្ឋាន និងគោលដៅទេសចរណ៍ទូទាំងប្រទេស

ដោយៈគង់ សូរិយា

ភ្នំពេញៈ  ក្រសួងទេសចរណ៍ បានណែនាំដល់មន្ទីរទេសចរណ៍រាជធានី ខេត្ត ឲ្យសហការជាមួយរដ្ឋបាលរាជធានី ខេត្ត និងអាជ្ញាធរមូលដ្ឋាន ធ្វើការបិទរមណីយដ្ឋាន គោលដៅទេសចរណ៍ ជាបណ្តោះអាសន្នរយៈពេល២សប្តាហ៍ ចាប់ពីថ្ងៃទី៧ ដល់ទី២០ ខែមេសា។

ការបិទរមណីដ្ឋាននិងគោលដៅទេសចរណ៍នេះ អនុវត្តតាមសេចក្តីសម្រេចរាជរដ្ឋាភិបាលស្តីពីការហាមឃាត់ការធ្វើដំណើរ និងការបិទរមណីយដ្ឋានទេសចរណ៍ទូទាំង ប្រទេសជាបណ្តោះអាសន្ន ដើម្បីទប់ស្កាត់ការឆ្លងរាលដាលនៃជម្ងឺកូវីដ-១៩។

ទន្ទឹមនឹងនេះ មន្ទីរទេសចរណ៍រាជធានី ខេត្ត ត្រូវចាត់តាំងក្រុមការងារ ដើម្បីតាមដានត្រួតពិនិត្យកិច្ចការ នេះឲ្យបានម៉ត់ចត់ដោយមិន ត្រូវអនុញ្ញាតឲ្យមានសកម្មភាពទេសចរណ៍ណាមួយនៅតាមរមណីយដ្ឋានទេសចរណ៍ គោលដៅទេសចរណ៍ សហគមន៍ទេសចរណ៍ និងកន្លែងដែលមានសក្តានុពលទេសចរណ៍ ដែលមាននៅក្នុងមូលដ្ឋាន របស់ខ្លួនក្នុងរយៈពេលនៃការបិទជាបណ្តោះអាសន្ននេះ ជាដាច់ខាត៕

ជំងឺកូវីត១៩ និងការស្ងប់ស្ងាត់គម្រោងសង់ស្ពាន ធ្វើឲ្យតម្លៃដីនៅតំបន់អរិយក្ស ត្រហាក់នៅទ្រឹង

ដោយៈរតនៈ

ភ្នំពេញៈ អ្នកធ្វើការផ្នែកអចលនទ្រព្យអះអាងថា ការស្ងប់ស្ងាត់គម្រោងសង់ស្ពាន និងជំងឺកូវីត១៩ ធ្វើឲ្យតម្លៃដីនៅតំបន់អរិយក្សត្រ ហាក់នៅទ្រឹងបើទោះជាតំបន់់នោះអំ​ណោ​យផលក្នុងសាងសង់លំនៅឋានក្តី។

លោកស្រី តាំង ហួរ ក្រុមហ៊ុន អមតៈ ប្រូភើធីស៊ឺវីសមានប្រសាសន៍ថា តម្លៃដីនៅតំបន់អរិយក្សត្រមុនការវាយលុក ជំងឺកូវីតគឹតម្លៃគឺហាក់កើនឡើងលឿន តែស្របពេលដែលជំងឺកូវីត១៩វាយប្រហារ ក្នុងរយៈពេល២ឆ្នាំចុងក្រោយនេះ ធ្វើឲ្យការអភិវឌ្ឍវិស័យអចលនទ្រព្យមានគម្រោងបុរី ផ្ទះល្វែង ខុនដូ ជាដើមបានផ្អាក ហើយក៏ធ្វើឲ្យតម្លៃដីធ្លីនៅតំបន់នោះហាក់នៅទ្រឹងមិនឡើងថ្លៃទៀតទេ។

លោកស្រីបន្តថា “បន្ទាប់ពីកូវីត១៩បានវាយប្រហារហើយ បួករួមទាំងបញ្ហាហិរញ្ញវត្ថុរបស់ម្ចាស់គម្រោងអចលនទ្រព្យនីមួយៗ នៅតំបន់នោះផងធ្វើឲ្យតម្លៃដី ហាក់នៅទ្រឹងផងដែរ”។

លោកស្រី តាំង ហួរ បន្ថែមថាក្រៅ ពីបញ្ហាហិរញ្ញវត្ថុ និងបញ្ហារាតត្បាតជំងឺកូវីត១៩  ការស្ងាត់ ដំណឹងអំពីគម្រោងសាងសង់ស្ពាន ទៅកាន់តំបន់អរិយក្សត្រនេះ ក៏ជាមូលហេតុមួយធ្វើឲ្យតម្លៃដីហាក់នៅទ្រឹង និងមានអ្នកខ្លះលក់ក្នុងតម្លៃក្រោមទីផ្សារ ព្រោះត្រូវការលុយប្រញាប់។

បើតាមលោកស្រី តាំង ហួរ តម្លៃដីនៅតំបន់អរិយក្សត្រនៅពេលនេះអាចនៅត្រឹ៤០០ទៅ៥០០ដុល្លាសហរដ្ឋអាមេរិក ក្នុងមួយម៉ែត្រការេសម្រាប់ដី ដែលមានទំហំធំ និង ដី ដែលមានទំហំតូចហើយក្បាលដីជាប់ថ្នល់កៅស៊ូ គឺអាចជិង១ពាន់ដុល្លាសហរដ្ឋអាមេរិកក្នុងមួយម៉ែត្រការ៉េ។

ជាមួយគ្នានេះ លោក ម៉ម សេរីបញ្ញា នាយកប្រត្តិបត្តក្រុមហ៊ុន Easy Property Investment បានឲ្យដឹងថា ស្ថានភាពទិញលក់ដីធ្លីនៅតំបន់អរិយក្សត្រនេះ ហាក់មានភាពស្ងប់ស្ងាត់តែលោកថា ប្រសិនបើគម្រោងសាងសង់ស្ពានពីភ្នំពេញ ទៅតំបន់នោះចេញជារូបរាងមែន គឺតម្លៃដីធ្លីនៅនោះនឹងឡើងខ្លាំង ព្រោះតំបន់អរិយក្សត្រកៀកនឹងតំបន់អភិវឌ្ឍដូចជាកោះពេជ្យ និងកោះនរាជាដើម។

ឃុំអរិយក្សត្រ ស្រុកល្វាឯម ខេត្តកណ្ដា លគឺជាឃុំមួយមានទីតាំងទល់មុខនឹងទន្លេចតុមុខ ហើយក៏កៀកជាមួយទីក្រុងកោះពេជ្រ ក្នុងរាជ្យធានីភ្នំពេញផងដែរ។

កន្លងមករដ្ឋាភិបាលកម្ពុជាធ្លាប់ លើកពីគំរោងសាងសង់ស្ពានពីតំបន់ផ្លូវជាតិលេខ១ ក្តីតាកុយ ទៅកាន់តតំបន់អរិយក្សត្រ ប៉ុន្តែគំរោងនេះប្រហែលជាត្រូវដូរទីតាំងសាងសង់ចេញពីទីក្រុងកោះនរា ដែលកំពុងចាក់ខ្សាច់និងកសាងហេដ្ឋារចនាសម្ព័ន៕

ក្រុមហ៊ុនSP Groupសាងសង់អនុស្ថានីយអគ្គិសនីក្រោមដីខ្នាតយក្សដំបូង បង្អស់នៅអាស៊ីអាគ្នេយ៍

ដោយៈសុខុម

សិង្ហបុរី:  ក្រុមហ៊ុនផ្គត់ផ្គង់ទឹក ភ្លើង និងហ្គាសSP Group ទឹកបានប្រកាសកាលពីថ្ងៃអង្គារ ទី៦ ខែមេសាកន្លងមកថា ខ្លួននឹងដំណើរការសាងសង់ អនុស្ថានីយអគ្គិសនីក្រោមដីខ្នាតយក្សដំបូងបង្អស់ប្រចាំអាស៊ីអាគ្នេយ៍ នៅតំបន់ការពារធម្មជាតិ Labrador Nature Reserve ក្នុងចំណាត់ការមួយ ដើម្បីសន្សំទីធ្លាទុកសម្រាប់ការអភិវឌ្ឍទីក្រុងនៅក្នុងសិង្ហបុរី ដែលក្សត់ដី។ នេះបើយោងតាមការចុះផ្សាយរបស់សារព័ត៌មាន CNA។

ជាមួយនឹងគម្រោងសាងសង់បញ្ចប់ជាស្ថាពរ នៅឆ្នាំ២០២៤ អនុស្ថានីយអគ្គិសនីក្រោមដីនេះ នឹងផ្គត់ផ្គង់តម្រូវការអគ្គិសនី ក្នុងតំបន់ក្បែរខាងជាច្រើន ដូចជា តំបន់ Alexandra តំបន់ Clementi តំបន់ Keppel តំបន់ Pasir Panjang និងសង្កាត់ Science Park ជាដើម។

ក្រុមហ៊ុន SP Group បានចេញសេចក្ដីប្រកាសព័ត៌មានថា ការសាងសង់អនុស្ថា​នីយអគ្គិសនីក្រោមដីនេះ នឹងចំណេញដីដែលមានហាងឆេងខ្ពស់ រហូតដល់ទៅ៣ហិកតា ដែលស្មើនឹងតារាងបាល់ទាត់ដល់ទៅ៤ឯណោះ។

លោក Stanley Huang នាយកប្រតិបត្តិក្រុមហ៊ុននេះ បានគូសបញ្ជាក់ថា នៅពីលើអនុស្ថានីយនេះ នឹងមានការសាងសង់អគារពាណិជ្ជកម្ម មួយកម្ពស់៣៤ជាន់ ដែលគ្រោងសាងសង់បញ្ចប់ជាស្ថាពរនៅឆ្នាំ២០២៤ដូចគ្នា។

លោកថ្លែងថា “ការអភិវឌ្ឍនេះ គឺស្របគ្នាទៅនឹងផែនការកែលម្អ ទីក្រុងរបស់ប្រទេសសិង្ហបុរី និងគោលដៅអភិវឌ្ឍន៍ប្រកប ដោយនិរន្តរភាពរបស់អង្គការសហប្រជាជាតិ ដើម្បីធានាបាននូវការប្រើប្រាស់ “ថាមពលដែលអាចជឿទុកចិត្តបាន ប្រកបដោយនិរន្តរភាព និងទំនើបសម្រាប់គ្រប់គ្នា” និងការកសាងហេដ្ឋារចនាសម្ព័ន្ធប្រកបដោយនិរន្តរភាព”។

ក្រុមហ៊ុន SP Group និយាយថា អនុស្ថានីយអគ្គិសនី ជាផ្នែកនៃហេដ្ឋារចនាសម្ព័ន្ធដ៏សំខាន់មួយ ដែលផ្គត់ផ្គង់ថាមពលដល់លំនៅដ្ឋាន ការិយាល័យ ឧស្សាហកម្ម និងសេវាកម្មសាធារណៈ។

ក្រុមហ៊ុននេះបានគូសបញ្ជាក់ថា អនុស្ថានីយអគ្គិសនីក្រោមដីនេះ នឹងមានអគ្គិសនីកម្លាំង២៣០គីឡូវ៉ាត់ សម្រាប់ផ្គត់ផ្គង់ដល់តំបន់រហូតដល់ទៅ៨៕

វិភាគៈ តើសេរីភាព ជីវភាព និងអាយុជីវិត មួយណាមានសារៈសំខាន់ក្នុងកំឡុងវិបត្តិកូវីដ

          ដោយៈយិន លាងគង់ស្ថាបនិកនិងជាអគ្គនាយកគេហទំព័រPropertyarea.asia

ភ្នំពេញៈ គិតរហូតមកទល់ពេលនេះ មនុស្សចំនួន២២នាក់ហើយបានស្លាប់ដោយ​សារជំងឺកូវីដ១៩ និង៥នាក់ទៀតស្លាប់ដោយសារជំងឺពាក់ព័ន្ឋ ក្នុងចំណោមអ្នកឆ្លងសរុបចំនួន២៩១៥នាក់នៅទូទាំងប្រទេស។

វិបត្តិនេះនឹងមិនបញ្ចប់នោះទេ បើសិនជាគ្មានការចូលរួមពីប្រជាពលរដ្ឋ ម្ចាស់ប្រទេ​សនោះទេ បើទោះបីជារដ្ឋាភិបាលខិតខំយ៉ាងណាក៏ដោយ។
ការចូលរួមជួយខ្លួនឯង

          ការចូលរួមពាក់ម៉ាស់ការពារ អនុវត្តន៍តាមវិធានណែនាំ របស់ក្រសួងសុខាភិបាល ដោយ៣កុំ និងបីការពារ ពិសេសកុំចេញពីផ្ទះ បើគ្មានការចាំបាច់ វានឹងពន្លត់វិបត្តិនេះមិនឲ្យអូសបន្លាយរយៈពេលវែងតទៅទៀត និងអាចបញ្ចប់ព្រឹត្តិការណ៍៍២០កុម្ភៈបានកាន់តែឆាប់កាន់តែល្អ។
សម្តេចតេជោហ៊ុន សែននាយករដ្ឋមន្រ្តីនៃកម្ពុជា បានលើកដៃសំពញអង្វរក ម្តងហើយម្តងទៀត ដើម្បីឲ្យប្រជាពលរដ្ឋអនុវត្តន៍ នូវការណែនាំរបស់រដ្ឋាភិបាល ដោយស    ម្តេចលើកឡើងថា “ការអនុវត្តន៍នូវវិធានការណ៍៣កុំ ៣ការពារ និងតាមគោលការណ៍ណែ​នាំដទៃទៀត គឺដើម្បីប្រជាពលរដ្ឋខ្លួនឯង សម្តេចមិនចង់បានអ្វីនោះទេ”។

ផ្ទុយទៅវិញ ការមិនអនុវត្តន៍តាមគោលការណ៍ណែនាំ របស់ប្រមុខរដ្ឋាភិបាល ថ្នាក់ដឹកនាំក្រសួងសុខាភិបាល និងអង្គការសុខភាពពិភពលោក ស្មើនឹងការបំផ្លាញខ្លួនឯង ក្រុមគ្រួសារ និងបំផ្លាញប្រទេសជាតិ។

ការចាក់វ៉ាក់សាំង

          សម្រាប់ប្រជាជនស្ថិតនៅជួរមុខ ដែលត្រូវទទួលបានវ៉ាក់សាំងបង្ការជំងឺកូវីដ១៩ គួរតែរួសរាន់ទៅទទួលវ៉ាក់សាំង ដើម្បីការពារខ្លួននិងកាត់បន្ថយជំងឺនេះ ហើយជម្រុះចេញនូវការសង្ស័យណាមួយ ដែលថាវ៉ាក់សាំងរបស់ចិន ឬប្រទេសណាមួយ នឹងធ្វើឲ្យពិការឬគ្រោះថ្នាក់ដល់អាយុជីវិត។

គិតរហូតមកទល់ពេលនេះ មានប្រទេសមិនច្រើនជាង១០ឡើយ នៅលើពិភពលោក ដែលអាចផលិតវ៉ាក់សាំងបាន ខណៈមេដឹកនាំបណ្តាប្រទេសនានាកំពុងដណ្តើមវ៉ាក់សាំងគ្នា ដើម្បីយកមកចាក់ជូនប្រជាពលរដ្ឋរបស់គេ។
អ្នកវិទ្យាសាស្រ្តផ្នែកវេជ្ជសាស្រ្ត ពួកគេជាមនុស្សមានក្រមសីលធ៌ម មានវិជ្ជាជីវៈ និងឈរលើមូលដ្ឋានវិទ្យាសាស្រ្ត ច្បាស់លាស់ណាស់ ត្រឹមត្រូវបំផុត ដើម្បីអាចផលិតវ៉ាក់សាំងបានយកមកបំរើផលប្រយោជន៍មនុស្សជាតិ ពិសេសពួកគេមានភស្តុតាងយ៉ាងត្រឹមត្រូវ និងរ៉ឹងមាំបំផុត ដើម្បីបង្ហាញដល់រដ្ឋាភិបាលរបស់ខ្លួន អាចអនុម័តយកមកចាក់ជូនពលរដ្ឋរបស់ពួកគេ និងចែកចាយទៅកាន់បណ្តាប្រទេសនានា។

ឈរលើគោលការណ៍មនុស្សជាតិ សីលធ៌ម និងវិជ្ជាជីវៈ គ្មានមេដឹកនាំប្រទេសណា​មួយលើពិភពលោក ចាក់វ៉ាក់សាំងជូនប្រជាជនរបស់ខ្លួន ទាំងបានដឹងថា វាមានគ្រោះថ្នាក់ដល់អាយុជីវិតប្រជាជនរបស់ខ្លួនឡើយ។
ការរាលដាលនឹងបន្ត

          ប្រសិនជាគ្មានការចូលរួមពីប្រជាពលរដ្ឋ ពិសេសអ្នកសង្ស័យខ្លួនឯងកើតជំងឺកូវីដ១៩ទេនោះ ព្រឹត្តិការណ៍២០កុម្ភៈនឹងមិនងាយបញ្ចប់បានឡើយ។

ជាក់ស្តែងគិតត្រឹមម៉ោង៧នាទីព្រឹកថ្ងៃទី០៧ ខែមេសា ឆ្នាំ២០២១នេះ កម្ពុជាបានរកឃើញអ្នកឆ្លងសរុបចំនួន២៩១៥នាក់ ក្នុងនោះករណីសហគមន៍២០កុម្ភៈ មានចំនួន២៣៨៣នាក់, អ្នកជាសះស្បើយចំនួន១៨២៤នាក់ អ្នកកំពុងសម្រាកព្យាបាលចំនួន១០៦៤នាក់ អ្នកស្លាប់ចំនួន ២២នាក់ និងស្លាប់ដោយជំងឺផ្សេង ពេលកំពុងព្យាបាលកូវីដ១៩ចំនួន៥នាក់។

ព្រឹត្តិការណ៍២០កុម្ភៈ ត្រូវបានគេធៀបនឹងពោះវៀនកង់រថយន្ត ដែលបានមុតធ្លាយសុះពាសពេញ ដែលពិបាកគក្នុងការគ្រប់គ្រង ដូចគ្នានឹងប្រទេសនេះដែរ ជំងឺនេះបានឆ្លងសាយភាយស្ទើរគ្រប់រាជធានី ខេត្តនៅទូទាំងប្រទេសរួចទៅហើយ ដែលមនុស្សមានរោគសញ្ញា អ្នកសង្ស័យជំងឺនេះ ដែលជាប់ធ្វើចត្តាឡីស័កបានដើរហើរ ដោយគ្មានការទទួលខុសត្រូវ ដែលបណ្តាលឲ្យជំងឺនេះឆ្លងចូលសហគមន៍ស្ទើរទូទាំងប្រទេស ពិសេសនៅរាជធានីភ្នំពេញ។

វិធានការណ៍ផាកពិន័យមិនគ្រប់គ្រាន់នោះទេ ប៉ុន្តែការដាក់ទោសពីរដ្ឋាភិបាលឲ្យ​បានធ្ងន់ធ្ងរ លើអ្នកបំពានទាំងនោះ ជាការអនុវត្តន៍ច្បាប់មួយ ដែលមនុស្សមិនគោរព ប៉ុន្តែរដ្ឋាភិបាលត្រូវតែចាប់ឲ្យគោរព។

ការពារពីជំងឺកូវីដ១៩ ជាការការពារឆ្នាំងបាយរបស់ខ្លួន

ស្ទើរគ្រប់អាជីវកម្មទូទាំងប្រទេស បានរងផលប៉ះពាល់រូចហើយ ដោយក្រុមហ៊ុនខ្លះបានបិទទ្វារ ក្រុមហ៊ុនខ្លះបានកាត់បន្ថយបុគ្គលិក និងក្រុមហ៊ុនខ្លះទៀតបានកាត់ប្រាក់ខែបុគ្គលិក ដើម្បីការពារកុំឲ្យក្រុមហ៊ុនរបស់ខ្លួនដួលរលំ។

ហេតុនេះមានតែការពារពារខ្លួនពីជំងឺនេះ ដោយអនុវត្តន៍៍តាម “ការណែនាំពីប្រមុខរដ្ឋាភិបាល ពីថ្នាក់ដឹកនាំក្រសួងសុខាភិបាលទេ” ទើបជំងឺនេះអាចគ្រប់គ្រងនិងឈានទៅកាត់បន្ថយការឆ្លងក្នុងសហគមន៍បាន។

ដោយមើលឃើញបញ្ហាដ៏លំបាក ដែលជំងឺនេះបានធ្វើឲ្យប៉ះពាល់ដល់ជីវភាព ប្រាក់ចំណូលរបស់ពលរដ្ឋ ទើបអង្គការក្រៅរដ្ឋាភិបាល សមាគមចំនួនជាង១០០បានស្នើ​រដ្ឋាភិបាលជម្រុញឲ្យស្ថាប័នមីក្រូហិរញ្ញវត្ថុ ធនាគារជួយសម្រួលដោយផ្អាកការបង់ប្រាក់រយៈពេល៣ខែជាបណ្តោះអាសន្ន ដើម្បីជួយសម្រូលជីវភាព និងកាត់បន្ថយការរឹបអូសទ្រព្យសម្បត្តិប្រជាពលរដ្ឋពីសស្ថាប័នហិរញ្ញវត្ថុទាំងនោះ។

ប៉ុន្តែយ៉ាងណាក៏ដោយ រហូតមកទល់ពេលនេះ មិនទាន់មានការឆ្លើយតបពីសមា​គមធនាគារកម្ពុជា សមាគមមីក្រូហិរញ្ញវត្ថុកម្ពុជា ពិសេសពីប្រមុខរដ្ឋាភិបាលកម្ពុជានៅឡើយទេ។

ដូច្នេះការចូលរួមការពារខ្លួនពីជំងឺកូវីដ១៩ នឹងជាការចូលរួមការពារអាយុជីវិតខ្លួនឯងផង ការពារក្រុមគ្រួសាររបស់ខ្លួនផង លើកកំពស់សេដ្ឋកិច្ចគ្រួសារផង និងសេដ្ឋកិច្ចជាតិរបស់យើងផង។

ពន្លឺថ្ងៃកំពុងទន់ទេរនៅកម្ពុជា យើងសង្ឃឹម និងពួតដៃទាំងអស់គ្នា ដើម្បីផាត់ពពកខ្មៅឲ្យចាកចេញ ហើយទទួលយកនូវពន្លឺនៃក្តីសង្ឃឹម និងស្នាមញញឹមឡើងវិញ តាមរយៈការចូលរួមពីយើងទាំងអស់គ្នា៕

ដំណឹងល្អៈចំណាយរយៈពេល៦ខែ គាស់ខ្មោចនាវាចម្បាំងសម័យសង្គ្រាមមកដល់គោកហើយ

          ដោយៈរតនៈ

កំពង់ចាមៈ បន្ទាប់ពីក្រុមការងារបានធ្វើប្រតិបត្តិការរយៈពេល៦ខែមក នាវាចម្បាំងដែលបានលិច អំឡុងសម័យសង្គ្រាមនៅកម្ពុជា នាទសវត្សឆ្នាំ១៩៧០ ស្ថិតនៅភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម ត្រូវបានកម្លាំងជំនាញស្រង់មកលើគោកហើយ នៅព្រឹកថ្ងៃទី៧ ខែមេសា ឆ្នាំ២០២១នេះ។ពិធីស្រង់នាវាម៉ារីននេះ ប្រព្រឹត្តឡើងក្រោមអធិបតីភាពនាយឧត្តមសេនីយ៍ នាង ផាត រដ្ឋលេខាប្រចាំការក្រសួងការពារជាតិ និងប្រធានក្រុមការងារអន្តរក្រសួង ដើម្បីចុះសិក្សា និងដោះស្រាយករណីរកឃើញគ្រាប់យុទ្ធភណ្ឌមិនទាន់ផ្ទុះ ព្រមទាំងភាគីពាក់ព័ន្ធ ។

នាយឧត្តមសេនីយ៍នាង ផាត បានបញ្ជាក់ថា ប្រតិបត្តិការបោសសម្អាតគ្រាប់យុទ្ធភណ្ឌមិនទាន់ផ្ទុះនេះ  គឺជាស្នាដៃប្រវត្តិសាស្ត្រ មិនធ្លាប់មានកន្លងមកសម្រាប់កម្ពុជា ហើ​យក៏បានបង្ហាញថា “កម្ពុជាមានសមត្ថភាពគ្រប់គ្រាន់ មិនត្រឹមតែបោសសម្អាតគ្រាប់យុទ្ធភណ្ឌមិនទាន់ផ្ទុះនៅលើដីគោកនោះទេ ដូច្នេះវាជាមោទនភាពមួយទៀត សម្រាប់ប្រជាជាតិកម្ពុជា”។នាវាម៉ារីនដែលលិច ក្នុងកំលុងសង្គ្រាមស៊ីវិលនៅកម្ពុជា កាលពីទសវត្សរ៍ឆ្នាំ១៩៧០នេះ បានលិចកប់ក្នុងបាតទន្លេមានជម្រៅ រហូតដល់២៧,៥ម៉ែត្រ ព្រមទាំងគ្រប់ដណ្តប់ដោយដីខ្សាច់នៅលើយ៉ាងច្រើនផងដែរ។

ក្រោយពីបានស្រង់មកលើគោគ ស្ថានភាពនាវាចម្បាំងនោះឃើញថា មានសភាពចាស់ទ្រុឌទ្រោមខ្លាំង និងមានស្នាមធ្លុះធ្លាយជាច្រើនកន្លែ ងដោយការបាញ់ពន្លិច ក្នុងពេលប្រយុទ្ធគ្នា។

កម្លាំងជំនាញបានប្រមូល និងស្រង់គ្រាប់យុទ្ធភ័ណ្ឌមកលើគោក ជាបន្តបន្ទាប់ចេញពីនាវានេះ រយៈពេល៦ខែមក។

បើតាមរបាយការណ៍ គឺចាប់ពីខែតុលា ឆ្នាំ២០២០ រហូតដល់ដើមខែមីនា ឆ្នាំ២០២១ ក្រុមការងារស្រង់បានគ្រាប់យុទ្ធភណ្ឌ សរុបប្រមាណ១៦តោន ព្រមទាំងបំណែកឆ្អឹងសពមនុស្សចំនួន៦ និងសម្ភារសឹកមួយចំនួនទៀត៕