សម្ដេចតេជោរំលឹកពីវេលាដែលឆ្លងកាត់នៃទុក្ខសោកក្នុងរបបខ្មែរក្រហមនៃខួបទី៤៥ឆ្នាំរបស់សម្ដេច

ដោយ ៖ រ៉ាណេត

ភ្នំពេញ៖ នៅថ្ងៃទី៥ ខែមករា ឆ្នាំ ២០២១នេះគឺជាថ្ងៃគម្រប់ខួបអាពាហ៍ពិពាហ៍៤៥ឆ្នាំ (៥មករា ១៩៧៦_៥មករា ២០២១) របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជាប្រមុខថ្នាក់ដឹកនាំកំពូលរបស់កម្ពជា។

តាមរយៈ បណ្តាញទំនាក់ទំនងផ្លូវការនៅព្រឹកថ្ងៃទី៥ ខែមករា ឆ្នាំ ២០២១ សម្តេចតេជោ ហ៊ុន សែន បានសរសេរថា ខ្ញុំតែងតែគិតថាអ្វីដែលខ្ញុំនិងភរិយាបានឆ្លងកាត់ក្នុងសម័យសង្រ្គាមគឺពុំគួរឱ្យជឿថា ខ្ញុំអាចមានជីវិតរហូតមកដល់សព្វថ្ងៃនេះឡើយ។ ជីវិតយុទ្ធជនក្នុងភ្លើងសង្គ្រាម ពិសេសក្នុងរបបប្រល័យពូជសាសន៍ ប៉ុល ពត

សម្តេចតេជោ សរសេរបន្តថា ដែលយើងត្រូវតស៊ូផ្ដួលរំលំដោយយកជីវិតធ្វើដើមទុន គឺមិនមែនជារឿងសាមញ្ញនោះឡើយ។ ជីវិតប្តីប្រពន្ធបន្ទាប់ពីរៀបការគ្មានទេដែលហៅថាសេចក្តីសុខ។ ខ្ញុំបានស្លាប់កូនទី១និងបែកគ្នាក្នុងពេលកូនទី២នៅក្នុងផ្ទៃម្តាយ៥ខែ រហូតជួបគ្នាជាថ្មី ដែលកូនប្រុសបង (ម៉ាណែត) ហៅខ្ញុំថាពូអស់រយៈពេល២ខែ។

ទាំងនេះគឺសុទ្ធតែរឿងរ៉ាវមិនគ្រាន់តែសម្រាប់ខ្ញុំនិងភរិយាប៉ុណ្ណោះទេ ប៉ុន្តែវាក៏ជារឿងរ៉ាវដែលបានកើតឡើងសំរាប់ប្រជាជនកម្ពុជាទូទាំងប្រទេសដែលបានឆ្លងកាត់ក្នុងសម័យនោះផង ដែរ។ “ទុក្ខស្រីប្តីព្រាត់” បានធ្វើឱ្យខ្ញុំនិងភរិយាស្រក់ទឹកភ្នែករាប់លានដំណក់។ ប៉ុន្តែទឹកភ្នែកនេះគឺបាននាំមកនូវការរស់រានមានជីវិតសម្រាប់ប្រជាជនទូទាំងប្រទេស រាប់ទាំងក្រុមគ្រួសារខ្ញុំដែរ។ ចាប់ផ្តើមពីប្តីប្រពន្ធដ៏កំសត់វ័យក្មេង២នាក់ រហូតមកដល់ពេលនេះយើងមានកូន និងចៅយ៉ាងច្រើន ប៉ុន្តែនៅតែចងចាំជានិច្ចចំពោះជីវិតតស៊ូដ៏លំបាកបំផុតរបស់ខ្ញុំនិងភរិយាជាទីស្រឡាញ់។ ខ្ញុំ និងភរិយាសូមជូនពរបងប្អូនជនរួមជាតិទូទាំងប្រទេស ជួបប្រទះតែសេចក្តីសុខ និងសំណាងល្អក្នុងឆ្នាំសកលថ្មី ២០២១ កុំបីខានឡើយ៕

វិភាគៈ តើកម្ពុជាបានបង្ហាញលក្ខណៈសម្បត្តិកាន់តែច្រើនដើម្បីទាក់ទាញលំហូរ FDI?

ដោយ:ប៊ី

ភ្នំពេញៈ កម្ពុជាគឺជាប្រទេសមានសេដ្ឋកិច្ចកំពុងរីកចម្រើន ដែលបានបង្ហាញពីកំនើនសេដ្ឋកិច្ចខ្ពស់រង្វង់៧ភាគរយ ក្នុងរយៈពេលពីទស្សវត្តចុងក្រោយ ខណៈប្រហែលពាក់កណ្តាល នៃប្រជាជនមានអាយុក្រោម ២៥ឆ្នាំ ហើយកំណើនសេដ្ឋកិច្ចត្រូវបានរំពឹងទុកថានឹងកើនឡើងជាបន្តបន្ទាប់។

ប្រតិបត្តិការភាគច្រើន ត្រូវបានធ្វើឡើងតាមរយៈប្រាក់ដុល្លារអាមេរិក មិនមែនរូបិយប័ណ្ណក្នុងស្រុកទេ ដូច្នេះហានិភ័យនៃការផ្លាស់ប្តូរប្រាក់មានតិចតួច។

គម្រោងវិនិយោគ ដែលត្រូវបានអនុម័តដោយរដ្ឋាភិបាលកម្ពុជា ត្រូវបានរួចផុតពីពន្ធសាជីវកម្ម និងពន្ធនាំចូលសម្រាប់វត្ថុធាតុដើម និងគ្រឿងបរិក្ខារសម្រាប់រយៈពេល៩ឆ្នាំ។ នោះហើយជាមូលហេតុដែលប្រទេសកម្ពុជា ត្រូវបានគេចាត់ទុកថាជាទិសដៅវិនិយោគដ៏ទាក់ទាញមួយ។

ផលិតផលក្នុងស្រុកសរុបសម្រាប់មនុស្សម្នាក់ របស់ប្រទេសកម្ពុជាមានចំនួន១៦០០ដុល្លារក្នុង២០២០ ហើយរំពឹងទុកថានឹងកើនឡើងដល់ ១៧៧១ក្នុងឆ្នាំ២០២១ ។ ប្រទេសនេះ មានភាពទាក់ទាញខាងវប្បធម៌ល្បីៗ នៅលើពិភពលោកដូចជាប្រាសាទអង្គរវត្ត ធនធានកម្លាំងពលកម្មច្រើន និងគោលនយោបាយមិត្តភាព ឆ្ពោះទៅរកការវិនិយោគបរទេស។

អរគុណចំពោះគុណសម្បត្តិទាំងនេះ ដែលបានធ្វើឲ្យសេដ្ឋកិច្ចកម្ពុជាបានកើនឡើងច្រើនជាង ៧ភាគរយក្នុងរយៈពេល ២០ឆ្នាំចុងក្រោយនេះ។

នៅប្រទេសកម្ពុជា កម្រិតប្រាក់ឈ្នួលមានកម្រិតទាប ដែលជាចំណុចខ្លាំងមួយទៀត។ កាលពីឆ្នាំមុន ប្រាក់ឈ្នួលអប្បបរមាប្រចាំខែ នៅក្នុងវិស័យកាត់ដេររបស់ប្រទេសនេះមានចំនួន ១៨២ដុល្លារអាមេរិក ដែលស្មើនឹង ៦០ភាគរយ នៃប្រាក់ឈ្នួលរបស់ប្រទេសថៃ ដែលនៅជិតខាង។ ដោយមានកម្លាំងពលកម្មវ័យក្មេង និងសម្បូរបែប ប្រទេសកម្ពុជាមានអត្រាចូលរួមកម្លាំងខ្ពស់បំផុតនៅក្នុងអាស៊ាន។

អ្វីដែលប្រសើរជាងនេះ ប្រទេសកម្ពុជាគឺជាប្រទេសមួយ ដែលទទួលបានអត្ថប្រយោជន៍ពីប្រព័ន្ធអនុគ្រោះពន្ធទូទៅ។ ក្រោមប្រព័ន្ធអនុគ្រោះពន្ធនេះ ទំនិញដែលនាំចូលពីប្រទេសកំពុងអភិវឌ្ឍន៍ដូចជាកម្ពុជា ត្រូវបានផ្តល់ការកាត់បន្ថយ ឬគ្មានអត្រាពន្ធ។

ដូច្នេះ ប្រទេសកម្ពុជាអាចទទួលបានអត្ថប្រយោជន៍ ពន្ធគយនៅពេលនាំចេញផលិតផលទៅសហរដ្ឋអាមេរិកសហភាព អឺរ៉ុប និងជប៉ុន។ គ្មានអ្វីប្លែកទេដែលប្រទេសកម្ពុជាត្រូវបានគេហៅថា “គុជដែលលាក់ខ្លួននៅអាស៊ីអាគ្នេយ៍” ។

ការនាំចេញរបស់ប្រទេសកម្ពុជាត្រូវបានរំពឹងថា នឹងទទួលបានផលចំណេញ ដោយសារការចុះហត្ថលេខាលើកិច្ចព្រមព្រៀងដ៏ធំមួយ ដែលប្រទេសចំនួន១៥ នៅអាស៊ីប៉ាស៊ីហ្វិកចូលរួម ក្នុងអំឡុងពេលកិច្ចប្រជុំកំពូលអាស៊ាន នៅទីក្រុងហាណូយ កាលពីពាក់កណ្តាលខែវិច្ឆិកា។

នៅឆ្នាំ២០២១នេះ មានរឿងវិជ្ជមានជាច្រើនសំរាប់កម្ពុជា ទាំងការអនុវត្តន៍កិច្ចព្រមព្រៀងពាណិជ្ជកម្មសេរីជាមួយចិន ការអនុវត្តកិច្ចព្រមព្រៀង RCEP ការអនុវត្តកិច្ចព្រមព្រៀងលើកលែងពន្ឋ (GSP) ពីអង់គ្លេសដល់កម្ពុជា ដែលនឹងធ្វើឲ្យកំណើននៃការនាំចេញកម្ពុជាកើនឡើង។

ការវិនិយោគនៅកម្ពុជា កាន់តែទាក់ទាញច្រើនថែមទៀត ដោយក្រុមហ៊ុនចិន អាមេរិក ជប៉ុន កូរ៉េជាដើមនឹងចូលមកវិនិយោគនៅកម្ពុជា ដើម្បីនាំចេញដោយរួចពន្ឋ។

ប្រទេសហត្ថលេខីទាំង១៥ មានចិន ជប៉ុន កូរ៉េខាងត្បូង អូស្ត្រាលី នូវែលហ្សេឡង់ និងប្រទេសជាសមាជិកអាស៊ានទាំង១០ ដូចជាប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម។

RCEP ត្រូវបានចាត់ទុកថា ជាកិច្ចព្រមព្រៀងពាណិជ្ជកម្មធំបំផុត នៅលើពិភពលោក ដែលគ្របដណ្តប់ជិតមួយភាគបី នៃចំនួនប្រជាជនពិភពលោក និងប្រហែល៣០% នៃផលិតផលក្នុងស្រុកសរុបរបស់ពិភពលោក។

ការចុះហត្ថលេខាលើកិច្ចព្រមព្រៀង RCEP ត្រូវបានរំពឹងថានឹងជួយជំរុញពាណិជ្ជកម្មក្នុងតំបន់ ដែលធ្វើឱ្យការនាំចេញរបស់កម្ពុជាទទួលបានផលប្រយោជន៍។

អ្នកវិភាគបាននិយាយថា ច្បាប់វិនិយោគដែលបាន និងកំពុងធ្វើសមាហរណកម្ម គោលនយោបាយពន្ឋលើកទឹកចិត្តដល់អ្នកវិនិយោគអន្តរជាតិ ការលើកទឹកចិត្តដោយឲ្យជនបរទេសអាចមានសិទ្ឋបោះទុន ១០០ភាគរយនៅកម្ពុជា ការបង្កើតច្បាប់សហកម្មសិទ្ឋនិងកត្តារួមផ្សំដទៃទៀត សុទ្ឋតែមានចំណែកក្នុងការទាក់ទាញ និងរុញកម្ពុជាឲ្យរំកិលឈានឡើងពីទាសភាព មករកឧត្តមភាព និងសម្រេចវិបុលភាពសំរាប់កម្ពុជានាពេលអនាគត។

អ្នកវិភាគបានបន្ថែមថា “ប្រសិនជាគ្មានការដាក់ចេញនូវគោលនយោបាយ ផែនការយុទ្ឋសាស្ត្រ និងចក្ខុវិស័យច្បាស់លាស់ពីប្រមុខរដ្ឋាភិបាលកម្ពុជាទេ កម្ពុជានឹងមិនអាចងើបឡើងលឿនបែបនេះទេ” ៕

ចំណេះដឹង! តើការវាយតម្លៃថ្លៃអចលនទ្រព្យគួរប្រកាន់ភ្ជាប់នូវអភិក្រមអ្វីខ្លះ?

ដោយៈវុត្ថា

ភ្នំពេញៈ រដ្ឋាភិបាលបានរៀបចំឱ្យមានប្រព័ន្ធ វាយតម្លៃថ្លៃអចលនទ្រព្យស្របទៅនឹងស្ថានភាពជាក់ស្តែងរបស់កម្ពុជា និងមាលក្ខណៈឯកភាពគ្នានៅទូទាំងប្រទេស ដើម្បីតម្រង់ទិសជាដំណាក់ៗទៅរកនិយាមមួយ ដែលមានជាលក្ខណៈអន្តរជាតិ នៃការវាយតម្លៃអចលនទ្រព្យ មានការទទួលស្គាល់ជាសកលសម្រាប់បំរើពហុគោលបំណង។

ក្នុងគោលបំណងនេះ គ្រសួងបានចងក្រវិធីសាស្ត្រនៃការប៉ានស្មានតម្លៃថ្លៃដី និងតម្លៃសំណង ផ្សេងៗនៅជាប់នឹងដី ទៅតាមតម្លៃប្រហាក់ប្រហែលនឹងតម្លៃទីផ្សារ។ បង្កើតបានជាផែនទីវាយតម្លៃថ្លៃដី និងធ្វើការវាយតម្លៃថ្លៃសំណង់នៅជាប់នឹងក្បាលដី ដើម្បីរៀបចំបញ្ជីវាយតម្លៃថ្លៃអចលនទ្រព្យនៅតាមភូមិ ឃុំ សង្កាត់ សម្រាប់បម្រើសេចក្តីត្រូវការរបស់វិស័យសាធារណៈ និងវិស័យឯកជនដែលនឹងជំរុញដល់ការអភិវឌ្ឍសេដ្ឋកិច្ច។

យោតាមឯកសារគោលនយោបាយជាតិ របស់ក្រសួងរៀចំដែនដី នគរូបនីយកម្ម និងសំណង់ស្តីពី ប្រព័ន្ធវាយតម្លៃថ្លៃអចលនទ្រព្យបានឱ្យដឹងថា ដើម្បីសម្រេចគោលបំណងខាងលើនេះ រដ្ឋាភិបាលបានរៀបចំបទដ្ឋានបច្ចេកទេស យន្តការអនុវត្តន៍ និងការតាមដានត្រួតពិនិត្យប្រកបដោយតម្លាភាព និងមានសង្គតិភាព ដែលពាក់ព័ន្ធមានទំនុកចិត្ត និងយល់ព្រមទទួលយក។

ជាធម្មតា ប្រព័ន្ធវាយតម្លៃថ្លៃអចលនទ្រព្យ គួរប្រកាន់ភ្ជាប់នូវអភិក្រមនៃអភិបាលកិច្ចល្អ និងគោរពទៅតាមគោលការណ៍ ទី១តម្លាភាព: ដោយមានការចូលរួម និងមានការផ្សព្វផ្សាយជាសាធារណៈ ដល់ភាគីពាក់ព័ន្ធព្រមទាំងបើកទូលាយ នូវសិទ្ធិតវ៉ាចំពោះលទ្ធផល នៃការវាយតម្លៃស្របតាមនីតិវិធី ដែលបានកំណត់ជាគោលការណ៍។

ទី២ យន្តការ និងនីតិវិធីឯកភាពគ្នា: មានទម្រង់ជាបទដ្ឋានរួមមួយដូចគ្នារវាងតំបន់ផ្សេងៗទូទាំងប្រទេស។ ទី៣ យុត្តិធម៌ និងមិនលំអៀង: គោរពទៅតាមនីតិវិធីដែលបានកំណត់ និងមិនមានការរើសអើង។ ទី៤ សុក្រឹតភាព: ភាពជឿទុកចិត្តលើការវាយតម្លៃ និងធានាបច្ចុប្បន្នភាពនៃការវាយតម្លៃ។

ទី៥ ភាពអាចដឹងជាមុន: គ្រប់ភាគីពាក់ព័ន្ធ និងសាធារណៈជនអាចដឹងបានមុនអំពីតម្លៃថ្លៃដីនៅតាមទីតាំង ឬតំបន់ជាក់លាក់នីមួយៗ និងគោលនយោបាយវិមជ្ឈការ និងវិសហមជ្ឈការ៕

ចក្ខុវិស័យទីផ្សារអចលនទ្រព្យកម្ពុជាអាចងើបឡើងវិញបន្តិចនៅឆមាសទី២ ឆ្នាំ២០២១

ដោយៈ រ៉ាណេត

ភ្នំពេញៈ ក្រោយការគំរាមកំហែងពីវិបត្តិនៃជំងឺឆ្លង ក្នុងសហគមន៍ក្រោមការគ្រប់គ្រង និងទប់ស្កាត់យ៉ាងមានប្រសិទ្ធភាព របស់រាជរដ្ឋាភិបាលកម្ពុជា ចាប់តាំងពីដើមឆ្នាំ២០២១ ការទិញលក់អចលនទ្រព្យ អាចនឹងមានសកម្មភាពឡើងវិញខ្លះ ហើយបន្តរហូតដល់ឆមាសទី២នៃឆ្នាំដដែល ទើបអាចមានកំណើនឡើងវិញបន្តិចបន្តួច។

ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា លោកច្រឹក សុខនីម បានមានប្រសាសន៍នៅល្ងាចថ្ងៃទី៤ ខែមករា ឆ្នាំ២០២១ថា ក្រោយការបញ្ចប់នូវព្រឹត្តិការណ៍២៨វិច្ឆិកា កាលពីពេលកន្លងទៅថ្មីៗនេះ សម្រាប់អ្នកដែលប្រឡូកនៅក្នុងវិស័យអចលនទ្រព្យ ចាប់ផ្តើមមានសកម្មភាពចេញដើរមើលគម្រោង និងផ្សព្វផ្សាយឡើងវិញ រួមមានទាំងអ្នកកាន់គម្រោង អ្នកវិនិយោគ ក៏ដូចជាអតិថិជន ដែលមានបំណងទិញអចលនទ្រព្យសម្រាប់តម្រូវការជាក់ស្ដែងផងដែរ។

លោកបន្តទៀតថា “មនុស្សមួយចំនួនចាប់ផ្តើមចេញដើរវិញជាបណ្តើរៗ ដែលក្នុងរួមមានទាំងភ្នាក់ងារលក់ អ្នកវិនិយោគក៏ដូចជា អតិថិជនដែលស្វែងរកអចលនវត្ថុសម្រាប់បំពេញតម្រូវការជាក់ស្ដែងផងដែរ” ។ លោកបន្តថា “សកម្មភាពទាំងនេះ គ្រាន់តែជាការចាប់ផ្តើមតែប៉ុណ្ណោះ ប៉ុន្តែបើឱ្យនិយាយថា សកម្មភាពទីផ្សារចាប់ផ្តើមានភាពមមាញឹក ឬពុះកញ្ជ្រោលឡើងវិញនោះ គឺនៅមិនទាន់អាចទៅរួចនោះទេ” ។

លោកបន្តថា “វាត្រូវការពេលវេលាបន្ថែមទៀត តាមខ្ញុំគិត បើមិនស្ថានភាពនៃការរាលដាលជំងឺឆ្លងត្រូវបានគ្រប់គ្រងបានដូចស្វថ្ងៃ ហើយប្រសិនបើយើងទទួលបាននាំយកវ៉ាក់សាំង មកកាន់កម្ពុជារួចរាល់នោះខ្ញុំជឿថា យ៉ាងយូរនៅត្រឹមពាក់កណ្តាលឆ្នាំ ឬនៅក្នុងអំឡុងឆមាសទី២ ឆ្នាំ២០២១នេះ ចរន្តទីផ្សារអចលនទ្រព្យ នឹងចាប់ផ្តើមមានកំណើនឡើងវិញ ប៉ុន្តែនៅមិនទាន់ខ្លាំងក្លានោះទេ” ។

លើកឡើងស្រដៀងគ្នាខាងលើនេះ នាយិកាប្រចាំប្រទេសក្រុមហ៊ុន CBRE Cambodia លោកស្រី អាន សុធីតា បានមានប្រសាសន៍ថា “សកម្មភាពទិញលក់អចលនទ្រព្យ ដែលភាគច្រើនសំដៅលើទីផ្សារលំនៅដ្ឋានកម្រិតមធ្យម និងទីផ្សារដីធ្លីដែលមានតម្លៃក្រោម១លានដុល្លារ គឺកើតចេញពីតម្រូវការជាក់ស្ដែងរបស់អតិថិជន ដែលជាជនជាតិខ្មែរ ឬអ្នកវិនិយោគនៅក្នុងស្រុកតែប៉ុណ្ណោះ” ។

លោកស្រីថា “ទីផ្សារដែលនៅបន្តមានសកម្មភាពសព្វថ្ងៃនេះ ភាគច្រើនគឺមានតែការទិញលក់លំនៅដ្ឋានជាន់ផ្ទាល់ដី តម្លៃសមរម្យក្រោម៧ម៉ឺនដុល្លារ ឬលើសពីនេះតិចតួច រួមជាមួយនឹងការទិញលក់ដីធ្លីក្នុងទ្រង់ទ្រាយតូចតែប៉ុណ្ណោះ” ។ លោកស្រីបន្តថា “បើសម្រាប់ការទិញលក់អចលនវត្ថុ ឬដីធ្លីដែលមានតម្លៃថ្លៃលុះត្រា តែការដាក់លក់នៅក្នុងតម្លៃមួយទាបជាងទីផ្សារ ដែលអាចផ្តល់ឱកាសចំណេញច្រើន ក្រោយបញ្ចប់វិបត្តិជាសាកលតែប៉ុណ្ណោះ” ។

លោកស្រីអាន សុធីតាបានបញ្ជាក់ថា បើទោះជាស្ថានភាពនៃការរីករាលដាលជំងឺនៅក្នុងប្រទេសកម្ពុជា ត្រូវបានរាជរដ្ឋាភិបាលធ្វើការទប់ស្កាត់ ទទួលបានលទ្ធផលល្អប្រសើរក្ដី ប៉ុន្តែសម្រាប់ទីផ្សារអចលនទ្រព្យ ជាពិសេសគម្រោងអភិវឌ្ឍន៍សំណង់ធំៗដែលមានតម្លៃលានដុល្លារភាគច្រើន ជាការបណ្តាក់ទុនវិនិយោគ ពីសំណាក់ក្រុមហ៊ុនអន្តរជាតិដែលជាជនបរទេសមកពីក្រៅស្រុក។ ដូច្នេះទោះជានៅក្នុងប្រទេសកម្ពុជា មានភាពល្អប្រសើរក្នុងការគេចេញពីវិបត្តិនេះ ប៉ុន្តែនៅតាមបណ្តាប្រទេសមួយចំនួនទៀត នៅមិនទាន់ស្រាកស្រាននោះទេ។

លោកស្រីបន្តថា ទោះជាបណ្តាប្រទេសមួយចំនួន បានចាប់ផ្តើមប្រើប្រាស់វ៉ាក់សាំងយ៉ាងណាក៏ដោយ ប៉ុន្តែវាក៏ត្រូវការពេលវេលាសម្រាប់ពួកគេ ដែលជាអ្នកវិនិយោគរៀបចំ ត្រៀមខ្លួនឡើងវិញសាជាថ្មី ក្នុងការចាប់សម្រេចចិត្តចាប់ផ្តើមបន្ទាន់ ពីទទួលរងគ្រោះដោយសារតែវិបត្តិនៃជំងឺជាសាកលមួយនេះ។ ក្រោយពេលពួកគេរៀបចំ និងត្រៀមខ្លួនរួចរាល់គឺវាត្រូវការពេលវេលាបន្តិច ដូច្នេះចង់មិនចង់ក៏ត្រូវចំណាយពេលមិនតិចជាង ១ឆ្នាំនោះទេ៕

រដ្ឋាភិបាលចំណាយថវិកាជាង ១០០លានដុល្លារ កសាងផ្លូវចំនួន ១១ខ្សែ នៅក្រុងព្រះសីហនុបន្ថែមទៀត

[youtube https://www.youtube.com/watch?v=xbdq54V2Zzs]
ដោយស៊ីវ ម៉េង
ភ្នំពេញៈ រដ្ឋាភិបាលកម្ពុជា បានសម្រេចចំណាយថវិកាជាតិ ចំនួនជាង១០០លានដុល្លារកសាងផ្លូវសំខាន់ៗចំនួន ១១ខ្សែ នៅក្នុងក្រុងព្រះសីហនុបន្ថែមទៀត ដើម្បីសម្រួលការធ្វើដំណើរ និងលើកកំពស់សោភ័ណភាពខេត្ត។

អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យ បានមានប្រសាសន៍ឲ្យដឹងតាមទូរស័ព្ទកាលពីល្ងាចថ្ងៃម្សិលម៉ិញនេះថា ផ្លូវចំនួន ១១ខ្សែនេះមិនរាប់បញ្ចួលលើហេដ្ឋារចនាសម្ព័ន្ឋ ៣៤ខ្សែ ដែលចំណាយថវិកាសាងសង់អស់ជិត ៣០០លានដុល្លារកន្លងមកនោះទេ។ លោកបន្តថា ការស្ថាបនាផ្លូវចាស់ ដែលត្រូវសាងសង់ និងពង្រីកថ្មីនេះ បាននិងកំពុងបន្តយ៉ាងសកម្ម ដែលវានឹងក្លាយជាគមនាគមន៍តភ្ជាប់មកកាន់ក្រុងព្រះសីហនុឲ្យកាន់តែនមានភាពងាយស្រួលបន្ថែមទៀត។

លោកបន្តថា “ការស្ថាបនាផ្លូវថ្មី១១ខ្សែនេះ ជាតម្រូវការចាំបាច់ ក្រោមការទម្លាក់ថវិកាជាង១០០លានដុល្លារពីសំណាក់រាជរដ្ឋាភិបាលកម្ពុជាតាមរយៈក្រសួងសាធារណការ និងដឹកជញ្ជូន ដោយមានការចុះត្រួតពិនិត្យ នឹងដឹកនាំដោយលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន រួមជាមួយនឹងលោកគួច ចំរើនអភិបាលខេត្តព្រះសីហនុដោយផ្ទាល់ ” ។

ទាក់ទងផ្លូវចំនួន ៣៤ខ្សែដែលបានជិតបញ្ចប់ការស្ថាបនានេះ លោកឃាង ភារម្យបានមានប្រសាសន៍ថា បច្ចុប្បន្នការស្ថាននាផ្លូវនេះ សម្រេចបាន១០០ភាគរយលើការចាក់បេតុង និងកំពុងចាក់កៅស៊ូ ដែលគ្រោងនឹងបញ្ចប់នៅមុនពិធីបុណ្យចូលឆ្នាំប្រពៃណីជាតិខ្មែរខាងមុខនេះ។

លោកបន្តថា “បច្ចុប្បន្នភ្លើងបំភ្លឺផ្លូវ ការរៀបចំសួនច្បារ និងហេដ្ឋារចនាសម្ព័ន្ឋដទៃទៀតបានបញ្ចប់ហើយ នៅសល់តែការបំពាក់កាមេរ៉ាសុវត្ថិភាពប៉ុណ្ណោះ” ។ លោកបន្តថា “នៅពេលជំងឺកូវីដ១៩ត្រូវបានគ្រប់គ្រង និងវ៉ាក់សាំងចែកចាយយ៉ាងមានប្រសិទ្ឋភាព ក្រុងព្រះសីហនុ នឹងមានការរីកចម្រើនបន្ថែមទៀត” ។

លោកឃាង ភារម្យ បានបន្តថា អ្នកវិនិយោគចិន ដែលបានចាក់បញ្ចូលលុយរាប់់លានដុល្លារសាងសង់អាគារពាណិជ្ជកម្ម កាស៊ីណូ ខុនដូ ជាដើម ពួកគេនឹងត្រលប់មកវិញ។ ពួកគេនឹងមិនចោលគំរោងរបស់ពួកគេនោះទេ ប៉ុន្តែបញ្ហាចំណោទនៅត្រង់ថា ការរីករាយលដាលជំងឺកូវីដ១៩ បានធ្វើឲ្យការធ្វើដំណើរត្រូវរឹត្បឹត ហើយអ្នកធ្វើដំណើរទៅមកត្រូវតែឆ្លងកាត់ការធ្វើចត្តាឡីស័ក្ត ដោយមិនអាចខកខានបានឡើយ៕

អ្នកជំនាញ៖ លំនៅដ្ឋានពីរប្រភេទនឹងមានទីផ្សារខ្ពស់សម្រាប់ឆ្នាំ២០២១នេះ

ដោយៈវុត្ថា

ភ្នំពេញៈ ផ្ទះការិយាល័យ ឬ SoHo នៅក្នុងប្រទេសកម្ពុជា នឹងមានទីផ្សារ និងតម្រូវការខ្ពស់សម្រាប់ឆ្នាំ២០២១នេះ ដែលទាមទារឱ្យអ្នកអភិវឌ្ឍន៍ បង្វែរមកវិយោគលើគម្រោ ងប្រភេទនេះឱ្យបានច្រើន បន្ទាប់ពីស្ថានភាពនៃជំងឺកូវីដ១៩ មានភាពធូស្រាលឡើងវិញ។

ប្រធានក្រុមប្រឹក្សាភិបាលនៃសមាគមអ្នកជំនាញអចលនទ្រព្យកម្ពុជា លោកឃាង ពុទ្ឋី បានឱ្យដឹងកាលពីម្សិលមិញថា ផ្ទះការិយាល័យ មិនត្រឹមតែអាចអោយធ្វើជាការិយាល័យសម្រាប់ធ្វើការនោះទេ ប៉ុន្តែវាក៏អាចធ្វើអាជីវកម្ម និងស្នាក់នៅក៏បានដែរ។លោកបន្តថា ក្រៅពីនេះផ្ទះអាជីវកម្ម ក៏មានតម្រូវការខ្ពស់ផងដែរនៅឆ្នាំនេះ។

លោកក៏បានអំពាវដល់ អ្នកអភិវឌ្ឍន៍លំនៅឋានទាំងអស់នៅកម្ពុជា គួរបង្វែរមកវិនិយោគ ចំពោះប្រភេទផ្ទះការិយាល័យឱ្យបានច្រើន ដើម្បីឆ្លើយតបទៅនឹងតម្រូវការ និងចាប់យកទីផ្សារដែលមានការកើឡើងនេះ។

អ្នកជំនាញវិស័យអចលនទ្រព្យរូបនេះបញ្ជាក់ថា ទីផ្សារផ្ទះការិយាល័យនេះមានតម្រូវការ ពីព្រោះមនុស្សនៅមានភាពភ័យក្លាចពីការឆ្លងនូវជំនូវជំងឺកូវីដ ១៩ និងមិនអាចទាន់ជួបមនុស្សដែលមានគ្នាច្រើន ពាក់ព័ន្ធវិធានការអនាម័យ ដែលទាមទាឱ្យធ្វើការតាមអនឡាញពីផ្ទះ។

លោកបន្ថែមទៀតថា ប្រការនេះហើយ បានធ្វើឱ្យផ្ទះការិយាល័យមានទីផ្សារ និងតម្រូវការ។ ជាមួយគ្នានេះ លោកពុទ្ធីក៏បានលើកឡើង ពីតម្រូវការប្រភេទផ្ទះអាជីវកម្មក៏នឹងអាចមានតម្រូវការខ្ពស់ផងដែរ បន្ទាប់ពីជំងឺកូវីដ១៩ មានភាពធូស្បើយឡើងវិញ ។

បើតាមលោក ឃាង ពុទ្ធី បើធៀបជាមួយនឹងអគារការិយាល័យ វាល្អដែរ ប៉ុន្តែផ្ទះការិល័យមានភាពងាយស្រួលជាង ហើយសុវត្ថិភាព និងល្អជាងឆ្ងាយណាស់ ដែលអាចធ្វើជាមួយនឹងមនុស្សដែលមានចំនួនតិច ហើយមិនមានភាពភ័យខ្លាច ពីការឆ្លងនូវជំងឺកូវីដ ១៩ផងដែរ។

វិស័យអចលនទ្រព្យ ក៏ដូចជាវិស័យផ្សេងទៀត នៅក្នុងប្រទេសកម្ពុជា និងពិភពលោកបានជួបបញ្ហាប្រឈមយ៉ាងខ្លាំង ពីជំងឺកូវីដ១៩ ហើយបានធ្វើឱ្យមនុស្សមិនអាចចរាចរណ៍ពីទីកន្លែងមួយ ទៅកាន់កន្លែងមួយផ្សេងទៀតបាន ជាពិសេសមិនទាន់អាចជួបជុំ ដែលមានមនុស្សដែលគ្នានច្រើននោះ បានបង្ខំឱ្យពួកគេធ្វើការតាមអនឡាញពីផ្ទះ៕

ក្រុមហ៊ុនកាណាដាបោះទុន ២០០លានដុល្លារអភិវឌ្ឍភ័ស្តុភារនៅឥណ្ឌូនេស៊ី

ដោយៈវុត្ថា

ឥណ្ឌូនេស៊ីៈ ក្រុមហ៊ុន Canada Pension Plan Investment Board ហៅកាត់ថា (“CPP Investments” និងក្រុមហ៊ុនឯកទេសខាងភ័ស្តុភារ LOGOS កាលពីម្សិលមិញនេះ បានប្រកាសពីការសហការគ្នា ក្នុងការបណ្តាក់ទុនថ្មីនៅក្នុងប្រទេសឥណ្ឌូនេស៊ី សម្រាប់ការអភិវឌ្ឍមូលដ្ឋានភ័ស្តុភារទំនើបនៅតំបន់ Greater Jakarta។

យោងតាមគេហទំព័រ www.newswire.ca ចុះផ្សាយកាលពីម្សិលមិញឱ្យដឹងថា ក្រុមហ៊ុន CPP Investments នឹងបោះទុនវិនិយោគក្នុងទំហំទឹកប្រាក់ ២០០លានដុល្លារអាមេរិក ក្នុងការបណ្តាក់ទុនរួមគ្នា ដែលនឹងអភិវឌ្ឍផលប័ត្រចម្រុះ ដែលផ្តោតលើភ័ស្តុភារទី៣ (មជ្ឈមណ្ឌលទិន្នន័យ និងការជួល) នៅក្នុងប្រទេសឥណ្ឌូនេស៊ី ។

លោក Jimmy Phua នាយកគ្រប់គ្រង និងជាប្រធានផ្នែកវិនិយោគអចលនទ្រព្យតំបន់អាស៊ីរបស់ក្រុមហ៊ុន CPP Investments បានមានប្រសាសន៍ថា គោលបំណងក្នុងការដាក់ទុនដ៏សំខាន់មួយ សម្រាប់ការវិនិយោគរបស់ ក្រុមហ៊ុន CPP Investments ព្រោះ ប្រទេសឥណ្ឌូនេស៊ី មានការកើនឡើងនៃវណ្ណៈកណ្តាល និងកំនើននៃការប្រើប្រាស់ក្នុងស្រុក។

លោកថ្លែងថា “កំណើននៅក្នុងទីផ្សារពាណិជ្ជកម្ម តាមប្រព័ន្ធអ៊ីនធឺណេតរបស់ប្រទេសឥណ្ឌូនេស៊ី បានជំរុញឱ្យមានតំរូវការភ័ស្តុភារដឹកជញ្ចូនទំនើប។ យើងមានសេចក្តីរីករាយ ក្នុងការបន្តភាពជាដៃគូជាមួយ ក្រុមហ៊ុន LOGOS និងពង្រឹងជំហររបស់យើងនៅក្នុងទីផ្សារភ័ស្តុភាររបស់ឥណ្ឌូនេស៊ី” ។

លោកបន្ថែមថា នេះគឺជាការបណ្តាក់ទុនរួមគ្នាលើកទី២ រវាងក្រុមហ៊ុន CPP Investments និងក្រុមហ៊ុន LOGOS នៅឥណ្ឌូនេស៊ីដោយការបើកដំណើរការលើកដំបូងនៅឆ្នាំ២០១៧ ក្នុងភាពជាដៃគូជាមួយវិនិយោគិនអន្តរជាតិមួយផ្សេងទៀត ដើម្បីទទួលបានអចលនទ្រព្យ ប្រភេទដឹកជញ្ចូនទំនើបនៅក្នុងទីផ្សារនេះ។

លោកបន្ថែមថា ការបណ្តាក់ទុនដំបូង ចំពោះអចលនទ្រព្យប្រភេទដឹកជញ្ចូនមួយចំនួន រួមមាន មណ្ឌលដឹកជញ្ចូន Metrolink Logistics Hub មជ្ឈមណ្ឌល Cikarang Logistics Park មជ្ឈមណ្ឌល Cibitung Logistics Hub និងមជ្ឈមណ្ដល Cileungsi Distribution Centre។

លោក Stephen Hawkins នាយកគ្រប់គ្រងក្រុមហ៊ុន LOGOS បានមានប្រសាសន៍ថា ក្រុមហ៊ុនបានមើលឃើញ ពីតម្រូវការកើនឡើងពីអតិថិជនគ្រប់ជាតិសាស្ត្រ និងនៅក្នុងស្រុក សម្រាប់ទំហំដឹកជញ្ជូន ដែលមានគុណភាពខ្ពស់ នៅក្នុងប្រទេសឥណ្ឌូនេស៊ីដែលត្រូវបានគាំទ្រដោយកត្តាជំរុញសេដ្ឋកិច្ច ក្នុងតំបន់នៃការធ្វើពាណិជ្ជកម្មតាមប្រព័ន្ធអេឡិចត្រូនិច ការផលិត និងការធ្វើពិពិធកម្មទៅខ្សែសង្វាក់ផ្គត់ផ្គង់តាមបែបវិមជ្ឈការ។

លោកថ្លែងថា “យើងមានសេចក្តីរីករាយ ដោយបានធ្វើការជាមួយដៃគូយូរអង្វែងនៅក្នុងការវិនិយោគជាមួយកក្រុមហ៊ុន CPP Investments ដើម្បីបំពេញតាមតំរូវការនេះនិងតាមរយៈការបណ្តាក់ទុនទាំងពីរ ផ្តល់នូវសម្ភារៈដឹកជញ្ជូន ដែលមានគុណភាពខ្ពស់រហូតដល់ទៅ១ពាន់លានដុល្លារអាមេរិក ដល់ទីផ្សារនេះក្នុងរយៈពេលប៉ុន្មានឆ្នាំខាងមុខនេះ” ។

ក្រុមហ៊ុន LOGOS បានកំណត់នូវការទន្ទឹងរងចំពីឱកាសទទួលផល សម្រាប់ការបណ្តាក់ទុនថ្មីនេះ ហើយនឹងទន្ទឹងរង់ចាំអនុវត្តលើបញ្ហានេះ ក្នុងរយៈពេល១២ខែខាងមុខនេះ៕

ផ្លូវប្រវែងសរុបជាង៣៧៣គីឡូម៉ែត្រនៅទីជនបទខេត្តសៀមរាបនឹងត្រូវស្ថាបនា នៅឆ្នាំ២០២១នេះ

ដោយៈ រ៉ាណេត

សៀមរាបៈ មន្ទីរអភិវឌ្ឍន៍ជនបទ ខេត្តសៀមរាបបានឲ្យដឹងថា នៅក្នុងឆ្នាំ២០២១នេះ គម្រោងស្ថាបនាផ្លូវនៅតាមទីជនបទនានា ទូទាំងខេត្តសរុបប្រវែងជាង៣៧៣គីឡូម៉ែត្រនឹងត្រូវអនុវត្ត និងធ្វើឱ្យប្រសើរឡើ ងដើម្បីសម្រួលដល់ការធ្វើសំណើរ ការដឹកជញ្ជូន និងការលើកកម្ពស់សោភ័ណភាពនៃហេដ្ឋារចនាសម្ព័ន្ធរបស់ខេត្ត។

លោកសោ ប៊ុនធី ប្រធានការិយាល័យផ្លូវលំជនបទ នៃមន្ទីរអភិវឌ្ឍន៍ជនបទខេត្តសៀមរាបបានប្រាប់នៅថ្ងៃទី៤ ខែមករា ឆ្នាំ២០២១នេះថា មន្ទីរអភិវឌ្ឍន៍ជនបទខេត្តសៀមរាបមានគោលការណ៍ចំនួន៣ ដែលនឹងត្រូវអនុវត្ត រួមមាន ទី១ គម្រោងស្តារឡើងវិញនូវផ្លូវថ្នល់ដែលរងការខូចខាត ទី២ គម្រោងកែលម្អពីផ្លូវគ្រួសក្រហមមកជាផ្លូវកៅស៊ូ គម្រោងថែទាំខួប និងទី៣ គម្រោងថែទាំជាប្រចាំនូវហេដ្ឋារចនាសម្ព័ន្ធផ្លូវថ្នល់ ដែលស្ថិតនៅក្នុងការគ្រប់គ្រងរបស់អង្គភាពខ្លួន។

នៅក្នុងឆ្នាំ២០២០កន្លងទៅ មន្ទីរអភិវឌ្ឍន៍ជនបទខេត្ត បានធ្វើការជួសជុលផ្លូវថ្នល់ ទាំងគម្រោងកែលម្អ គម្រោងជួសជុលបន្ទាន់ គម្រោងថែទាំខួបនិងគម្រោងថែទាំជាប្រចាំបានចំនួនប្រមាណ១៩៣គីឡូម៉ែត្រ។ ដោយឡែកនៅក្នុងឆ្នាំ២០២១នេះវិញ មន្ទីរមានផែនការសម្រាប់គម្រោងជួសជុល ស្តារឡើងវិញ ថែរទាំខួប និងថែទាំជាប្រចាំផ្លូវថ្នល់ជនបទសរុបចំនួនប្រមាណ៣៧៣គីឡូម៉ែត្របន្ថែមទៀត ដើម្បីសម្រួលដល់ការធ្វើដំណើរទៅមករបស់បងប្អូនប្រជាពលរដ្ឋ។

លោកសោ ប៊ុនធីបានបន្តថា “ទន្ទឹមនឹងគម្រោងជួសជុល ស្តារឡើងវិញ ក៏ដូចជាផ្លូវដែលបានធ្វើរួចរាល់ហើយនោះ តាមរយៈការិយាល័យផ្លូវលំជនបទ នៃមន្ទីរអភិវឌ្ឍន៍ជនបទខេត្តសៀមរាប សូមស្នើដល់អាជ្ញាធរមានសមត្ថកិច្ច និងប្រជាពលរដ្ឋទូទៅ មេត្តាចូលរួមថែរក្សាផ្លូវថ្នល់ទាំងអស់គ្នា ដើម្បីឱ្យផ្លូវថ្នល់អាចប្រើប្រាស់បានយូរអង្វែង”។

សម្រាប់គម្រោងថែទាំផ្លូវថ្នល់ និងគម្រោងស្តារឡើងវិញនូវផ្លូវថ្នល់ដែលរងការខូចខាតដោយសារជំនន់ទឹកភ្លៀងកន្លងមក គឺទទួលបានថវិកាពីរាជរដ្ឋាភិបាល និងមួយចំណែកទៀត ទទួលបានពីគម្រោងជំនួយរបស់រដ្ឋាភិបាលអាឡឺម៉ង់(KFW)។

ដោយឡែកសម្រាប់គម្រោងជួសជុល កែលម្អផ្លូវថ្នល់ផ្សេងៗទៀត ក៏ទទួលបានពីអង្គការដៃគូមួយចំនួន ដូចជាធនាគារអភិវឌ្ឍអាស៊ី(ADB) ធនាគារពិភពលោក(World Bank) និងគម្រោងជាច្រើនទៀតដែលកំពុងអនុវត្តទៅតាមជំហានៗ៕

សកម្មភាពអភិវឌ្ឍន៍នៅលើកោះពស់ក្រុងព្រះសីហនុបានចាប់ផ្តើមសកម្មភាព ឡើងវិញហើយ

ដោយគង់ សូរិយា

ភ្នំពេញៈ សកម្មភាពនៃការអភិវឌ្ឍន៍៍លើកោះតេជោមរតក(កោះពស់) នៅក្នុងក្រុងព្រះសីហនុ បានចាប់ផ្តើមសកម្មភាពឡើងវិញហើយ ដោយបច្ចុប្បន្ននេះមានក្រុមហ៊ុនចំនួន៣កំពុងដំណើរការអភិវឌ្ឍន៍។

អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យបានមានប្រសាសន៍ឲ្យដឹងតាមទូរស័ព្ទនាល្ងាចថ្ងៃទី៤ មករានេះថា បច្ចុប្បន្នក្រុមហ៊ុនKoh Pous Investment Groupដែលជាក្រុមហ៊ុនរបស់រុស្ស៊ី បានចែកកោះនេះទៅក្រុមហ៊ុនក្នុងស្រុកចំនួនពីរ ដើម្បីអភិវឌ្ឍន៍កោះនេះ ហើយបច្ចុប្បន្នក្រុមហ៊ុនទាំងបី កំពុងសាងសង់វីឡា រមណីយដ្ឋាន និងរៀបចំឆ្នេរខ្សាច់នៅលើកោះនេះឲ្យកាន់តែមានភាពស្រស់ស្អាត។

លោកបន្តថា “កោះនេះមានទំហំ១១៦ហិកតា មានសកម្មភាពអភិវឌ្ឈន៍វិញហើយ ប៉ុន្តែស្ពានតភ្ជាប់ពីដីគោក ទៅកាន់កោះនេះមិនទាន់ឲ្យមានអ្នកឆ្លងទេ លើកលែងតែពេលមានពិធីបុណ្យទានម្តងៗ ក្រុមហ៊ុនអនុញ្ញាត្តឲ្យមានអ្នកទៅទស្សនា”។ លោកបន្តថា “យ៉ាងណាក៏ដោយ ការចូលទៅទស្សនាកំសាន្តនៅលើកោះ មិនទាន់មានការអនុញ្ញាត្តទេ ដោយសារក្រុមហ៊ុនកំពុងសាងសង់ និងមានគ្រឿងចក្រច្រើន”។

លោកឃាង ភារម្យបានបន្តថា ការអភិវឌ្ឍកោះពស់ នឹងរួមចំណែកទាក់ទាញទេចរណ៍ជាតិ អន្តរជាតិជាច្រើនទៀតនាពេលអនាគត ខណៈពេលនៅក្នុងឱកាសថ្ងៃឈប់សម្រាក៣ថ្ងៃ(៣១ធ្នូ ឆ្នាំ២០២០, ថ្ងៃទី១ និងថ្ងៃទី២ ខែមករា ឆ្នាំ២០២១)នៃពិធីឆ្លងឆ្នាំសាកលកន្លងមកនេះ ខេត្តទទួលបានភ្ញៀវទេសចរជាតិ អន្តរជាតិ និងអ្នកនៅមូលដ្ឋានមកទស្សនាកំសាន្តសរុបប្រមាណ១០ម៉ឺននាក់។

ទាក់ទងនឹងសកម្មភាពវិស័យអាកាសចរណ៍ ដែលភ្ជាប់មកខេត្តលោកបានបង្ហើប ឲ្យដឹងផងដែរថា បច្ចុប្បន្នដោយសារជំងឺCovid19 បានរីករាលដាលទូទាំងសាកលលោក និងប៉ះពាល់ដល់កម្ពុជាផងដែរ បានធ្វើឲ្យប៉ះពាល់វិស័យជាច្រើន នៅក្នុងខេត្តទាំងការវិនិយោគថ្មីៗ និងភ្ញៀវទេសចរណ៍ ប៉ុន្តែនៅពេលជំងឺនេះគ្រប់គ្រងបាន និងវ៉ាក់សាំងមានប្រសិទ្ឋភាព១០០ភាគរយ នឹងធ្វើឲ្យសេដ្ឋកិច្ចក្នុងខេត្តព្រះសីហនុ មានការរីកចម្រើនលឿនថែមទៀត។

លោកបន្តថា បច្ចុប្បន្នមានជើងហោះហើរចន្លោះពី៣ ទៅ៤លើកប៉ុណ្ណោះ បានចុះចតនៅព្រលានយន្តហោះខេត្តព្រះសីហនុ និងមានជើងហោះហើរតិចតួចផងដែរ មកពីប្រទេសនានា៕

បច្ចុប្បន្នភាពៈព្រលានយន្តហោះអន្តរជាតិខេត្តមណ្ឌលគិរីនឹងចាប់ផ្តើម សាងសង់ចុងឆ្នាំនេះ

ដោយស៊ីវ ម៉េង

ភ្នំពេញៈ មន្រ្តីជាន់ខ្ពស់នៃរដ្ឋលេខាធិការដ្ឋាន អាកាសចរណ៍ស៊ីវិលបានថ្លែងថា ព្រលានយន្តហោះខេត្តមណ្ឌលគិរី នឹងអាចចាប់ផ្តើមសាងសង់នៅចុងឆ្នាំនេះ ប្រសិនជាការចចាររវាងក្រុមហ៊ុន និងរដ្ឋាភិបាលបានបញ្ចប់តាមផែនការ។

អនុរដ្ឋលេខាធិការ និងជាអ្នកនាំាំពាក្យស្ថាប័នខាងលើ លោកស៊ិន ចាន់សិរីវត្ថាបានមានប្រសាសន៍ឲ្យដឹងតាមទូរស័ព្ទនៅរសៀលថ្ងៃទី ៤ មករានេះថា ក្រុមហ៊ុនPowerchina International Group នឹងចាប់ផ្តើមសិក្សាលំអិតលើផែនការ សាងសង់ព្រលានយន្តហោះនេះ មុនដាក់ជូនរដ្ឋាភិបាល ដើម្បីពិភាក្សាគ្នាលើការបែងចែកភាគលាភលើការវិនិយោគគំរោងមួយនេះ។

លោកបន្តថា “ប្រសិនជាមានការចចាបញ្ចប់តាមផែនការ ព្រលានយន្តហោះនេះនឹងចាប់ផ្តើមសាងសង់នៅចុងឆ្នាំនេះ ដែលព្រលាននេះមានសមត្ថភាពទទួលការចុះវចតយន្តហោះកម្រិតតំបន់អាស៊ាន”។លោកបន្តថា “ព្រលានយន្តហោះនេះ នឹងអាចទទួលការចុះចតប្រភេទយន្តហោះBoing 737, 320, 321 ដែលអាចផ្ទុកអ្នកដំណើរចន្លោះពី១៦០ទៅ១៨០នាក់”។

លោកស៊ិន ចាន់សិរីវុត្ថាបានបន្តថា អ្វីសំខាន់ថាតើមានអ្នកធ្វើដំណើរច្រើនឬអត់ ហើយយើងមានអ្វីសំរាប់ទទួលអ្នកដំណើរ អ្នកទេសចរណ៍និងវិនិយោគិនអន្តរជាតិឬនៅ? ហេតុនេះទាមទារឲ្យមានការវិនិយោគច្រើនថែមទៀ តនៅខេត្តមណ្ឌលគិរី ដើម្បីទាក់ទាញភ្ញៀវទេសចរណ៍អន្តរជាតិ។

លោកស្រីឆាយ ស៊ីវលីនប្រធានសមាគមទេសចរណ៍កម្ពុជាបានមានប្រសាសន៍ថា មណ្ឌលគិរីជាខេត្តមានសក្តានុពលពហុវិស័យ និងស្ថិតក្នុងផែនការមេអភិវឌ្ឍន៍របស់អន្តរក្រសួង ដែលមានគោលដៅអភិវឌ្ឍន៍ខេត្តនេះ ជាតំបន់សេដ្ឋកិច្ចពហុបំណង លើវិស័យទេសចរណ៍ កសិកម្ម ឧស្សាហកម្ម។

លោកស្រីបន្តថា “ការសាងសង់ព្រលានយន្តហោះនេះជាកាតល្អ ព្រោះពេលភ្ញៀវទេសចរណ៍ទៅដល់ទីណាច្រើន នឹងមានវិនិយោគិនទៅដល់ទីនោះហើយ ប៉ុន្តែខេត្តនេះត្រូវពង្រឹងសេវាកម្មបដិសណ្ឋារកិច្ចបន្ថែមទៀត ខណៈបច្ចុប្បន្ននៅមានកម្រិតនៅឡើយ”។លោកស្រីបន្តថា “បើអនុវត្តន៍បានតាមផែនការមេអន្តរក្រសួង ខេត្តមណ្ឌលគិរីនឹងមានសេវាកម្មសម្បូរបែប និងមានការរីកចម្រើនលឿន និងកាន់តែមានភាពទាក់ទាញថែមទៀត”៕